𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟏𝟖]

SALMON 

By

Havali Adam

Bung 18-na

"Ka lak ata làk bo tum lo hram ang che," ka ti fiah raih a, chu thu sawi tur chuan ka huaisenna neih a beitham tak zet a, mahse ka fapa ka chân thei lo, ani chân ai chuan eng pawh ka ti mai ang.

"Ka lak ata i là bo tih i theihnghilh em ni?" a ti nghet churh a, chhán tumin ka âng zuau a, mahse ka chhâng leh ta lo.

"A rang thei ang berin a pa ka nih thu hrilh ang che," a ti leh nghut a, ka lo thaw hap a, a bulah hruai daih a tum ang tih mawlh ka hlau tawh a ni.

"Khawngaihin ka fapa hi ka lak ata làk hran tum suh, a tel lo chuan ka nung thei lo, ni e, ka ti dik lo ngei alawm, i chungchang engmah ka hrilh ngai lo a, mahse ka sawi tawh ang khan hriattîr erawh ka tum tho," ka ti ta duah a, engmah sawi lovin a ngâwi ngul a, lungâwi hmèl a pu miah lo bawk.

"Chuan, i bulah aiin ka bulah a him záwk," ka ti leh chu tak run hian min melh a, ka sawi tum em em pawh a ni lo, mahse ka sawi vek tawh tlat!

"I bula a him záwk chhan ka hre lo e!" a ti vawt ruih a, a mit a là sawn duh der lo lehnghal!

"Kum 6 liam taa ka tawn ang kha ka fapa hian a tawn ka remti reng reng lo, tun thlengin i hna ngai i la chelh a, hawtu pawh i lo la nei ru reng lo ang tih tunge sawi thei, chuvangin ka fapa himna hi ka ngaipawimawh ber," ka ti charh charh a, min en nà chu ka en lèt ngam der lo.

"Thu awmze nei lo sawi suh," a ti hmuk a, a ṭawng ring lo a, mahse a fiah ṭha hle thung.

"Chu bakah ka fapa hi mi dang bula awmtîr ka phal lo, nuhrawn hrawn tur chuan a la naupang lulâi êm mai," ka ti leh a, ka rilruah Rinkimi kha a rawn lang lo thei lo a, ka fapa nena inhnimhnai turin ka duh bawk hek lo.

"Engvanga nuhrawn tih thumal chhakchhuak nge i nih?" a ti chang bawl a, a aw a khauh ṭha hle bawk.

"Ka sawi tum i hria tih ka hria," ka ti halh a, engkim chu ka fapa tâna ti ka ni!

"Ani nen eng inzawmna mah kan nei tawh lo," bul hmuka a tih chuan ka melh zawk a, ka sawi tum a hriat chian tluk zetin min lo en chiang kher mai.

"Ka fapa hian pa a mamawh a, kei hian a mamawh chu ka pe ang," a ti nghet leh churh a, sawi tur ka hre mai lo, ka rilruah chuan Rinkimi nena inzawmna an nei tawh loh lam daih a ni awm tawh nì!

"Theihnghilh suh ang che," a tih leh chuan ka harh zawk a, buaina ka hmâchhawn ngei dâwnin ka hre ta!

"Enteh, ka chungah hian eng pawh ti rawh, pawi ka ti lo, mahse ka fapa nena min ṭhen hran i tum a nih ngat chuan engmah tih hreh ka nei lo tih hria ang che," ka ti ta salh salh a, ka lak aṭanga ka fapa a làk bo ka phal reng reng lo.

Engmah sawi zui lovin a ngâwi run a, min en reng tih pawh ka hria, a rilruah chuan min huatna a sô bulh bulh maithei bawk.

Cabin chhûng chu a uap churh a, kan inbiak danin a zir lo nen ka chhuak ta daih a, damdawi in kawtah ka awm vang vang a, ka chau ru nghalh ni mai hian ka hria.

Ka mitmeng a dul raih a, ka ngaihtuahnaah thil tam tak a awm a, ka hun tawn mêk chuan hlauthawnna leh lungngaihna min pe a, hun kal tawha ka thil tihsual avang khan buaina leh harsatnain min la tuam rèng niin ka hre bawk.

Vawilehkhatah ka per lawp a, scooty pakhat hian damdawi in hmâa ṭhutna awm chu a su ri ṭhuai a, a khalhtu pawh a invawrh lawp a, ka thil hmuh leh hriat avang chuan ka thin a phu dawt dawt a, ka dara chelhtu lam ka hawi chiah phei chu sawi tur rèng ka hre lo.

"Ka koh che kha i hre miah lo em ni?" Salmon-a chuan a ti hmuk a, sawi tur ka la hre chuang lo.

"Khawiah mah lo kal sawn suh ang che," ti lehin scooty let ran lamah a phei a, a che vel chu ka thlir reng a, min rawn pawt sawn dâwrh lo se zawng hliam ka tuar nâ viau ang ka ring.

A lan dan chuan scooty brake a fail a, a khalhtupain a thunun thei tawh si lo a, chuvanga chesual chu a nih hmél a, a khalhtupa erawhin nâ leh hliam a nei lo hlauh a, scooty erawh a chhe nasa hle.

Ka lama lo pen phei nghut nghut Salmon chu mit là sawn lék lo hian ka en ngawt ngawt a, a lan dan te, a thawmhnaw inbel duh dan te, a che zia hrim hrim chu hmân ang vek kha a la ni reng a, tlêmin a lang thau deuh tawh tih mai loh chu danglam engmah a awm lo.

"Ka koh che hre lo khawpin eng thil nge i lo ngaihtuah?" ka bul a rawn thlen rual chuan a ti a, min melh chhuk run a, min ngaihtuah tak tak te pawh a ang mah záwk!

"Ka...." ti sapin ka ngâwi dat a, "Lut ang," tih leh kal a rual a, ka zui ve nghal mai bawk.

Cabin chhûng kan lut chu Mâmtea a lo la muhil bâm a, Salmon-a chuan thil sawi duh nei hmêl hi a pu a, a inngaihtuah ngut ngut ni berin ka hria, ka lam a rawn hawi a, ṭawng tum àwm taka a lan lâi tak chuan phone call ka dawng a, a awm dan a thlak danglam rang hle.

Min lo call-tu chu Awitei a ni a, number lawng a nih avangin amah a ni tih pawh ka hre lo. Accident kan tawh nî khan ka phone number a la a, Aizawl ka chhuahsan kum khan ka sim card leh phone number hman ka thlak vek tawh miau a, ani tân chuan ka phone number hlui khan awmzia a nei tawh lo a ni.

Eng dang ni lovin Mâmtea chanchin min rawn záwt a, Aizawlah an chhuk tawh a, a remchan vela lo chhoh leh an tum thute min hrilh lûam a, hmâ kan sawn thu leh ngaihtuahawm kan nih tawh loh thu ka hrilh ve nghal mai bawk.

Phone ka hmang zo chiah tihah Salmon-a chuan, "Kan fapa chungchang hi kan sawi dun a ṭulin ka hria," a rawn ti hniam sup a, nichin lawka a aw nen kha chuan inang lo tak a ni.

"I ngaihdan dik lo tak kha paih bo bawk ang che," a ti leh a, eng a sawi tumna nge ka hrethiam lo.

A ṭawng zui zel dâwn emaw ka ti a, mahse a ngâwi ta daih thung. Sawi tur a ngaihtuah a nih ringin ka nghak ran a, dik tak chuan kei paw'n sawi tur ka nei reng, mahse ama'n sawi hmâsa záwk se ka ti a ni.

"Enkawl a buaithlak em?" kan ngàwih dun vang vang hnu chuan a rawn ti a, "Ka tel lovin kum 6 ngawt i lo enkawl a, a harsa viau lo maw?" dam thluam hian a tih zawm leh a, a ṭawngkamin min ṭhawng lutuk chu ka hamhaih vek a ni ber.

"Min hrilh teh, engtin chiah nge in lo khawsak ṭhin?" a ti hniam leh ruih a, a ṭawngkam tinah chuan vin emaw, ngaihthlak nuam lo rèng a awm lo a, pangngai taka min be thut chu dawnsawn dan ka thiam lo lek lek záwk a ni.

"A châng chuan a harsa ve ṭhin, naupang harhvang leh ṭawng duh tâk a ni a, ka theihtawp tak meuh ka chhuah a, a hlim lo ang tih mawlh ka hlau ṭhin," ka ti ta dat dat a, Mâmtea thlir reng chung hian a thaw hulh a, a hmêla rilru nâ hmêl lo lang chu ka hmu sual a nih ka ring.

"Ka hmun ruak a zau hle a ni maw...." a ti thum chhal a, chhán dan tur ka baihvai hle.

"Eng pawh ni se, tunah chuan ka awm tawh a, i hah tawh lo ang," a ti leh a, a sawi tum ka hrethiam hauh lo.

"Salmon....." ka ti sap a, ṭawng zawm ka tum lâi tak chuan, "Ka fapa hi ka bulah a awm ang a, i bulah pawh a awm ang," a rawn ti leh a, a thusawi chu ka hrethiam lo lehzual!

"Engnge i sawi awmzia?" ka tih chuan, "I hre mai ang," a lo ti duh lek chauh a, kan pathuma chenho a sawinaah ka ngâi ta hmiah mai.

"Ni lo Salmon, ti suh, hetiang hian awm suh," ka ti hap a, a thinlunga min huatna la awm reng chu ka hmuh hmaih lo a, chuti chunga khawsakho chu ka zuam lo a ni.

"Ka fapa hian nu chauh a mamawh lo a, pa chauh a mamawh hek lo, a mamawh chu nu leh pa a ni," a tih lâi te chuan ka en tlawk tlawk a, min hua tih hre reng chunga a bula chen ka zuam thlawt lo.

Mâmtea a rawn harh a, kei ni lovin Salmon-an a ṭhut hnaih nghal thuai a, Mâmtea laka a ṭawng dan te, a awm dan hrim hrim chu ka sawifiah thiam lo, a duat ngawih ngawih ni ber hian ka hria.

Tin, Mâmtea a nih vang nge lah ka hre lo, a bulah chuan a nui ve leh dut dut ṭhin a, a kut a fawhsak leh vang vang ṭhin te chuan a ngaihsak a ni tih a tichiang hle bawk.

Rei thang lovin a chhuak zuaih a, a fapa bula a sawi ang ngeiin eitur nen a lo lèt a, Mâmtea bulah bawk a ṭhu leh chat a, Salmon-a chuan eitur a barh hial a, Mâmtea lahin a lo dawh ṭha duh bawk si, ka chhûngril a tawp up up a, an awm dan chuan ka hnuk a tiulh thei mai dâwn!

"A sàt lâi khan ei rawh," Salmon-a chuan a rawn ti a, Mâmtea lam hawi thla thuakin a lo hawi lèt leh a, chiang tak hian min en a, ka awm dan dik lo a hriatthiam ka hlauh avangin ka lo bu nghauh nghauh ta ringawt!

Mâmtea chuan tui ti zet hian sausage zawng zawng a ei zo vek a, a lung a âwi tih a hriat ngawih ngawih a, a ṭawng tan tan a, a ngâi te bawkin zawhna chi hrang hrang a záwt leh a, ka rin phak bakin Salmon-a chuan a chhawnchhaih thiam daih bawk.

Nîtin damdawi inah a lo kal ziah a, a fapa inngainattîr a tum vang ni pawhin ka hre lo, inngainat thu ah chuan an inngaina fel vek tawh záwk, Mâmtea tâna pa ṭha tak nih chu a tum ber ni záwkin ka hria.

Damdawi in kan chhuahsan hun a lo inherchhuak a, bill pek ka tum chu duty te chuan pek vek a nih tawh thu min lo hrilh a, mak ka ti viau a, bill petu hming ka hmu chiah chu ka thaw chhuak halh ringawt!

"Engati nge min râwn hmâsa lovin bill i lo pek vek a?" a hmêl ka hmuh rualin ka ti nghal a, "Ka tihtur alawm," a lo ti mai a, "Kei paw'n ka pe thei reng alawm," ka ti leh chu, "Ka mawhphurhna a ni a, ka tihtur ka ti ah ngai tawp rawh," tiin min chhâng dang chiang hle.

Damdawi in kan chhuahsan nî chuan nî Mâwipuii a lo kal a, Salmon-an Mâmtea a pawm a, Mâmtea erawhin Salmon-a thil leisak a khàl niap niap a, tun hmâa a mi hriat ngai hlei lovin a pawm mêk a nih tih hre mah se eng buaina mah a siam lo.

Salmon-a car-in in lam kan pan a, a hnungah nî Mâwipuii nen kan chuang a, a hmâah Salmon-a leh Mâmtea an chuang a, Mâmtea phei chu Salmon-a kap kârah tak a chuang nghe nghe a, a pa dik tak a ni tih a hriat hunah phei chuan a ngaina zual viau ang ka ring.

Chumi nî aṭang chuan Salmon-a chu a reh zui vang vang leh ang lawi a, a chhan ka hrethiam chiah lo. Mâmtea paw'n 'anu, khaw'nge hmuihmul nei kha' a ti leh ṭhin a, chhànna fahrah tè tèin ka chháng mai zel a, thil hrethiam se chu buaina a tling ngei ang.

Damdawi in kan chhuahsan aṭangin kâr hnih a liam tawh a, Mâmtea pawh Pathian zârah a ṭha chho zel a, school kal thei dinhmuna a la din loh avangin thla khat chawlh kan la tawp bawk.

Zan khat chu number lawng tawp aṭang hian phone call ka dawng a, company a nih ringin ka pick up duh lo a, mahse number ngai bawk aṭangin call a rawn lut nawn leh a, ka pick up ta nge nge!

"Hello...." ka ti zàng vâh a, "Mâmtea a mu tawh em?" mipa aw thum chhal hian a rawn ti a, tunge a nih hrilh hranpa ka ngâi lo a, ka phone number a nei erawh mak ka ti deuh!

"Mu lo e," ka tih chuan, "Ka lo kal dâwn, apa ka lo kal tur thu hi lo hrilh rawh," a rawn ti zui nghal a, "Maw....?" ka ti hliai a, "Ka hrilh kher i phut záwk em ni?" a rawn ti leh a, chhàn dan tur pawh ka hre lo.

"In in kawtah ka awm reng tawh, ka lo lut har lo ang," a ti leh lek phei chu sawi tur ka hre lo lehzual!

Kan inbiakna a hmet tawp a, Mâmtea lam ka hawi a, lehkhapuanah rawng a lo chei mial mial a, engtin nge ka hrilh ang tih mawlh chu ka rilru tibuaitu pakhat a ni.

Mâmtea awmna lamah ka ṭhu phei a, dik tak chuan hrilh ka duhna a rei tawh, damdawi in kan chhuahsan hnu khan hrilh ka tum ut ut ṭhin a, mahse amah Salmon-a ber a reh leh tâk daih si avangin ka hrilh leh ta rih lo a ni.

"Mâmte, apa tak tak kha i hmu duh em kha...?" ka tih chuan a thil tih lâi chawl miah lo hian, "Duh e," a lo ti mai a, "A lo kal dâwn asin, apa tak tak kha nangmah hmu turin a lo kal a," ka tih leh chuan, "Apa tak tak ka hmu dâwn maw...." a rawn ti ta thuai a, a thil tih lai pawh a dah rang hle.

"Immm.....apa tak tak chu maw damdawi ina mi kha a nia, i la hria em?" ka ti dam diai a, hriatchhuah tum tih hriat tak hian a ngaihtuah vang vang a, a hmêl duhawm leh lawmawm zet avang chuan ka nui sak nghe nghe!

"Kha.....hmuihmul nei kha....." ka ti leh a, chu veleh, "Hmuihmul nei kha apa tak tak maw...." a rawn ti vat a, "Aw, apa tak tak a nih kha," ka tih chuan, "Yesssss.....!" a ti vak reuh a, a hlim hmêl chuan ka thinlung a tihlim nghal veng veng bawk.

"Mimi, hmu duhtu che an awm a?" kan pindan kawngka hawngin nî Mâwipuii chuan a rawn ti a, Salmon-a a nih ngei ka ring.

"Colour hi lo chei la, ka va kal lawk ang aw," tiin Mâmtea biang chu ka fawp zauh a, pindan aṭang chuan ka chhuak zui nghal bawk.

Pindan ka chhuahsan fel chiah tihah Salmon-a hmêl ngei mai ka hmu zui zat a, nî Mâwipuii bakah ka pi leh pu chenin Mâmtea pa a ni tih an hre tawh a, Salmon-a a lo kal chu mak an ti hran lo.

"Khaw'nge?" a ti sup a, "Pindanah a awm," ka ti ve mai a, nî Mâwipuii chu a kal sawn ta daih bawk.

"I hrilh tawh em?" a tih chuan ka lo bu nghat a, a thaw chhuak hulh a, amah ang lo takin zàm hmêl a puin ka hria.

Pindan kawngka a nam hawng a, a hnungah ka zui a, Mâmtea chuan a hmuh rual rualin, "Apa......" a lo ti vak a, khum aṭangin a chhuk tharh a, a pa lamah a rawn tlan phei a, Salmon-a chuan ke lehlam ṭhingṭhi chung hian a lo kuah thlawp a, ka mittui a tling pam a, Mâmtean a pa atâna a pawm nghal em em chu ka lawm tak zet!

"Ngati nge i lo kal tawh loh?" Mâmtea chuan a ti tan tan a, Salmon-a erawhin a chhâng lawk thei lo.

A kut te, a bân te, a hmai te, a bek leh a chhip te, a nghawng leh a ir thlengin a fawp kual dan dan a, a duh táwk mai dâwn emaw tih tawh hnuah pawh a hmaiah a fawp leh vang vang ṭhin a, chawplehchilhin ka hnuk a ulh a, ka biangah mittui a rawn luang lùm thla ta pap bawk.

Ka ṭap tih an hriat ka hlauh avangin pindan aṭang chuan ka chhuak a, nî Mâwipuiin min lo en chìk hle a, ka awm dan ka siam ṭha thuai a, sawi tur ka ván kher mai.

Rei táwk fang an pafain ka awm hrantîr a, keiin thingpui ka lùm thung a, nî Mâwipuii nen kan titi pah reng bawk a, a nihna takah chuan nî Mâwipuii ṭawng ka ngaithla a ni mah záwk!

Thingpui leh a hmêh kengin pindanah chuan ka va lut a, khum hnuai biha lo kun dû dû Salmon-a ka hmuh rual chuan ka ding chawt a, "Khaw'nge ka fapa hi a awm âw, a birukna a ṭha a ni ang, ka hmu thei lo reng reng," a lo ti dut dut a, ka awm tih a hre lo hrim hrim bawk.

"Khaw'nge a awm aw, lo chhuak tawh mai rawh se, ka hmu duh tawh," Salmon-a chuan a ti leh a, an lo inbiruksiak ni ngei tur a ni.

Steel almira chhung aṭangin Mâmtea chu a rawn chhuak hlawl a, "Min hmu thei lo ê, i biruk ve hun," a ti lang lang reuh a, a pa ṭhingṭhi nen chuan an inchen tàwk vel viau bawk.

"Anu, apu tak tak kawr ka hmu asin," ka hmêl a hmuh rualin a rawn ti heu a, almira chhûnga kawr inkhâi pakhat a va là chhuak chiah chu sawi tur rèng ka hre lo.

Chu kawr, kamis pawl ngei mai Salmon-an a hmuh rual chuan ka lam a rawn hawi nghal a, mak a ti tih a mitmengah a lang a, Mâmtea pu kawr ni lovin ama kawr a ni tih a hai mawlh lo a, zawhna nei hmêl a pu bawk.

"Dah rawh le Mâmte, hei, thingpui in ang," ti thuai thuaiin ka thil ken lâi dawhkan tê ah ka nghat rawk a, kawr chu ka va laksak vat a, almira chhûnga ka dah zo ka hawi lèt chu Salmon-a chuan min lo en chiang kher mai.

"Apa, eng power nge i neih a, anu'n power i nei a tia," Mâmtean a rawn tih tâkah chuan a mit a là sawn ve thei ta chauh!

"Misual i man ṭhin a mi?" Mâmtea bawk chuan a tih zawm leh a, a fapa tâna ngainatawm tak tur hian Salmon-a chu a nui suk a, a mal chungah a pawm kâi nghal nawlh bawk.

"Silai pawh ka nei asin," Salmon-a chuan a ti thum dam dap a, chu veleh Mâmtea chuan, "Ka duh ve," a lo ti vat a, Salmon-a chuan, "Thingpui hi in phawt ang," tiin thil dang a sawipui ta daih a, Mâmtea chu a pa sawi ang àng chuan a awm a, a hlim hmêl te, a thlamuang hmêl te chuan ka awm a ti nuam veng veng!

Salmon-a chu zan rei tak thleng a awm a, Mâmtea nen an inawmchilh tawp a, Mâmtea muthilh hnuah haw a tum ve ta chauh a, a haw tur chu ka thlah ang nge thlah lo ang tihah ka rilru a insual a, pangngai takin kan lakah a awm a, pangngai taka lo dawnsawn mai chu a ṭha berin ka hria.

"Ka phone number kha save la, ka fapain min be duh a nih chuan min lo call ang che," a car bula kan din lâi chuan a ti hniam chhal a, "Khaw'nge i kal dâwn?" ka ti dat a, chutah ṭawng zawm lehin, "Ka sawi awmzia chu Aizawlah i chhuk thla dâwn em ni?" ka ti zui zat a, duh aiin ka aw chhuak a felfai lo.

"Hnathawh tur ka nei, a rang thei ang berin ka lo chho leh ang," a ti dap a, police a ni a, a buai viau tak ang.

"Thil sawi dun tur kan ngah hlein ka hria," a tih leh chuan ka ngâwi ran a, eng a sawi tumna nge ka hre chiah lo a, mahse Mâmtea te nen kan pathuma chenho lam a nih ngei ka ring.

"Engtikah nge hun i neih ang?" amah bawk chuan a ti leh a, "Hun chu ka nei reng alawm, dawr leh Mâmtea enkawl hi ka hun hman tamna ber a ni mai," ka lo ti sap a, a bu nghut a, "Thla leh hi a birthday thla kha a ni em?" sawi tur dap kual ang ziazânga a rawn tih chuan, "Immm.....nî 20 khi a nia," ka lo ti pangngai ve leh mai bawk.

"Kum tin i lawmsak ṭhin em?" a ti leh a, a fapa a ni miau a, a dilchhut pawh chu a àwm lutuk tlat!

"Lawmsak ṭhin e," ka tih chuan hmâ lam a hawi deuh vang vang a, "Ṭha takin i enkawl a, a tân chuan nu azawnga nu ṭha ber i ni ngei ang," a ti hniam ruih a, "A tâna nu ṭha ber nih ka tum alawm," ka ti ve nghal zat a, car chhûngah a lut mai bawk si lo, sawi tur ka vàn ta hle.

"Kan inkâr pawh hi sawi ṭhat a ngaih ka ring," tiin ka lam a lo hawi a, a mitmeng chu ka chhiar thiam lo.

"Khang kum 6 chhûng khan engtin nge i awm?" ti leh dapin min rawn din hnaih a, en pawh ka en ṭha ngam tawh lo a, ka awmdan a dik lo nghal bawk.

"Mimi.....?" awkâ dam thluama a rawn ti leh chiah phei chu ka chhûngril lam a sâ hut hut a, ka dar tawn tawna a chelh rual chuan mittui parawl ṭiam hian ka melh chho a, mahse ka en rei thei thlawt lo.

Ka dan hman hmâin ka mittui ka biangah a baw zawih a, ka che thut a, inherin in lam ka pan ta vang vang a, a hmuh lâia ka mittui ka thunun hman lo chu hrehawm ka ti a, ṭap tur ka ni lo tiin keimah leh keimah ka inhrilh mawlh mawlh a, mahse awmzia a va nei tlém si èm!