𝐀 𝐋𝐀 𝐓𝐀𝐖𝐏 𝐋𝐎 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐏𝐀𝐑𝐓 𝟏)

𝐀 𝐋𝐀 𝐓𝐀𝐖𝐏 𝐋𝐎

By

Havali Adam

Bung 1-na

Kum chawhnu lam, fùr ruah tui tlàk hun lâi a ni a, khua pawh a cheng duh cher cher hle. Sik leh sâin zir lo viau mah se mi tam tak tân chuan tihtur ṭhulh ringawt theih a ni lo a, dinhmun harsa zual deuh tân phei chuan hna thawh hram hram a ngâi záwk a ni.

Thawhṭanni khaw chhe ang reng tak hnuaiah chuan Muani paw'n Mizorama zirna in sâng ber Mizoram University lam a pan a, ṭha taka B.A a pass avanga a nu'n scooty a leisak chu thiam sawih sawih hian a khalh a, khalh thiam ṭan tir tih takah mahni inrintàwkna a ngah lo hle.

Muangmara tlan reng ta nà nâ ná chu Mizoram University campus a inkhalh thleng ve mai a, Education Department lam a pan ding nghal a, B.Ed training tura entrance an pek ṭum khan kalkawng a hre vek tawh a, mi dang zawh buai lah a ngai tawh hek lo.

Muani hi lehkhathiam thei tak a ni a, B.A result chhuak hnuhnung berah khan Mizoram pumpuiah rank holder a ni a, B.Ed entrance pawh hmun thum, IASE, DIET leh Mizoram University-ah te a pe hlawm a, a taimak leh thiam avangin a tling vek a, mahse a nu duhpuina ber Mizoram University-ah training a thlang ta a ni.

A ni khatna a ni bawk a, zirtirtute chuan zirlai an zirtir em em hran lo a, inhmelhriattirna ang reng deuh zirlai kal thar te'n an nei ṭheuh a, Muani paw'n ṭhian thar a chhar nghal chu a ni der mai. Mahni táwka ṭawng duh leh mize harhvàng chì a lo ni bawk a, ṭhian siam lamah chuan harsatna a nei hran lo.

Haw hun a lo ni a, a ṭhen chu University bus-ah an haw sap sap a, ṭhenkhat erawh mahni lirtheiin an haw bawk a, mi dang ang lo takin Muani chu a han tawikhawmuang rih deuh a, a classmate te an haw rem vek hnuah scooty a tinung ve chauh a, a la khalh thiam ṭha tawk bawk si lo nen, mi dang hmuha mualpho a hlau a ni ber.

Chutia a inkhalh chhuak, gate tlan pelh a tum lai tak chuan a ding lampangah bullet bike a rawn ri thum dut dut a, Muani tha chu a khur a, inrintawkna a hloh a, a hlauhthawn ruk ang ngeiin a tlu ta ṭhuai mai. A zak lutuk chu a taksa a nâ nge nà lo pawh a ngaihven lo a, eng nge tih ber tur lah a hre hek lo.

A hnung lawka bullet bike thum dut dut ri chu a tawp a, Muani chuan a khalhtupa chu helmet chhanah a lo melh ran a, a zah chu thuhran, a lung a áwi lo ru tak zet a ni.

"Khalh zir i la ngâi a nih kha!" chu pa chuan a rawn ti hmuk a, Muani scooty chu a tun dinsak a, Muani erawh lo lungàwi loh ruk tawh sa nen, a ngâwi mai mai thei ta hauh lo.

"Ka la khalh thiam táwk lo tih chu ka hria, mahse ka tluk chhanah khan i thiam loh a awm ve tho," Muani chuan a ti fiah kalh a, a awkî erawh a ring hran lo.

"Ka thiam loh a awm àwm ka hre hauh lo," chu pa chuan a rawn ti ve leh hmuk a, Muani nen chuan an inen chiang ta khawp mai.

"Eng nge mi rawn sut tum ang hrima i rawn tlan vak nì, min tihlauthawng a, ka tluk phah alawm, khatiang vak vaka tlan kha a ṭulna a awm miah lo," Muani chuan a ti a, a hmâa ding mipa chu a melh chho ral bawk.

"I ngaih ngaihin ngâi teh, khalh fimkhur tawh ang che," tiin chu pa chuan a bike a ti rum dut dut a, a tlan ta vang vang a, Muani paw'n a ngaihtuah zui tawh bîk chuang lo.

In a thleng a, rei lo tê a awm hahdam hnu chuan a nu dawr lamah a phei a, a nu dawr hi a nu hmingchâwiin 'Zotei Dawr' tih a ni a, an inchawmna ve ber a ni a, Pathian zârah dawrtu pawh an ṭhahnem ṭhin hle.

"I lo haw tawh a ni maw?" dawr a va thlen rualin a pi chuan a lo ti a, Zotei chu lo ṭawng zawm ve nghalin, "Bawihi a lo thleng tawh tho bawk a, lo va haw tawh rawh ka nu, kan lo haw rual mai ang," tiin a nu chu a chah a, Muanpuii pi pawh chuan ngaihṭha takin a hawsan ve mai bawk.

"Nu, thil hrilh tur che ka nei," ring fahran lo hian Muani chuan a ti sap a, Zotei chuan, "Eng thil maw?" a lo ti mai a, thingpui siam lâi a ni bawk nen a fanu thusawi chu a ngaithla liam puat a ni ber.

"Âaaa....ngai leh lo, nakinah, haw hunah ka hrilh law law záwk ang che, "Muani chuan a ti leh lawi a, an ei siamtu chhawr Fela chuan, "Nu Zote, ngaihzawng chungchang hrilh che a tum a ni hrim hrim," a lo ti zauh a, chu veleh Muani chuan, "Chutiang lam a ni teuh lo mai," lo ti thuaiin a nui zui hak hak a, Zotei erawh a bula mite inbiakna chu hria ang paw'n a awm lo.

Zotei hi nu taima tak mai a ni a, pasal tel lovin a fanu a enkawl seilian ṭhak a, pasal mamawhin a inhre tawh hek lo. Tunah hian a nu leh a fanu nen an khawsa mek a, kum 15 dâwn liam ta khan a pa'n a boralsan a, khatia chhûngkawpa berin a thihsan nî aṭang kha chuan eizawnna dap a ngai a, a theihtawp chhuah azârah tun dinhmun hi an thleng thei ta a ni.

Tin, Pathian malsawmna dawngin a dawr hi a lun ve ang reng a, kawng ànah a awm bawk nen lêng lut an inawm chhawk reng tih theih a ni a, a eitur siam tui avangin a lar a, fak pawh a hlawh hle. Dawr a hawn tirh aṭanga rei fê kha chu amah vekin ei a siam ṭhin a, tun hnuah erawh a nu leh a fanu thu zawmin ei siamtu dang a chhawr belh a, amah tak pawh a hahdam phah sawt nghe nghe!

Khua a thim a, zan a lo ni a, Muani chuan a nu hnenah scooty a tlukpui thu chu a hrilh ta a, a nu chuan pangngai tak hian a lo dawngsawng mai a, chutia a nu'n engtin mah a hau lo chu Muani pawh a awm a nawm phah hle. A rilruah chuan kha pa, security guard te hmuh laia a tlukna chhan, bullet bike khalh pa kha a rawn lang zawk a, a ngei thar kher mai.

Zan dang ang lo takin chu zan boruak chu a thiang kak a, chhum karah thla eng mâwi tak a rawn lang bawk a, zan a rei telh telh a, a mâwi dan a chiang telh telh emaw tih mai tur a ni. In ropui leh lian tak aṭangin Sangzuala chuan chu zan lalnu mâwina chu a thlir a, a zu no changkang tak dawm lai chu a han lem leh zauh ṭhin a, a lan danah chuan mutchhuak hmêl reng a pu lo.

In hnuai lama kawngka inkhar thawm chuan a ngaihtuahna ata a tiharh zawk a, zu no chu dawhkanah a dah a, pindan aṭangin a chhuak a, in hnuai a zu thleng thla chu a fapa Andrew-a lêng lo haw chiah nen an inhmachhawn ta chat a, chutiang chen chen a len chu a beisei lo a ni.

"Khaw'nge i kal?" tiin Sangzuala chuan a fapa chu a zawt a, Andrew-a chuan, "Ka ṭhiante inah," a lo ti mai a, a pindan pan a tum nghal mai bawk.

"La ding rih teh," Sangzuala chuan a ti hniam churh a, Andrew-a ke pen lai chu a tawp nghal chat bawk.

"Tun ang zan rei tawhah hian em ni i haw ṭhin?" Sangzuala chuan a ti leh a, Andrew-a tân chuan dawt sawi chì a ni hauh lo.

"Zanin ang em em hi chuan ka haw tlai ngai lo, zanin chu kan laklawh a, ka lo haw tlai a nih hi, min rin loh chuan i duh leh nîtei pawh i zàwt thei ang," Andrew-a chuan a ti a, zah ru tak hian a pa chu a melh zeuh zeuh bawk.

"Tun ang hi chuan haw tlai tawh suh ang che," Sangzuala chuan a ti hniam sup a, Andrew-a pawh chuan, "Aw le," tih leh kal a rual a, a pindan a thleng chho ṭep tawh tihah a pa lam chu hawi thla lehin, "I la mu dâwn lo em ni?" a han ti a, Sangzuala chuan, "Mu dâwn hnai," a lo ti mai a, Andrew-a pawh chuan a ngaihsak zui tawh bîk chuang lo.

Zan a rei zel a, Sangzuala chu a pindan chhûng tukverh bulah a la ṭhu ngâwi ran a, a ngaihtuahnaah thil chi hrang hrang a awm a, Delhi khawpuia an sumdawnna anga Aizawl khawpui chhûng ngeia Hotel changtlung tak din te chu a rilruk rauh rauh a, kum fê lo sumdawng tawh tih takah a tân chuan buaina leh harsatna a awmin a ring hran lo bawk.

Kum tam liam ta khan Mizoram chhuahsanin Delhi khawpuiah a inbengbel a, sumdawnna a ṭan a, a nunah hlawhtlinnain a zui a, chutih rual chuan mahni ngawta fa enkawl erawh harsa a ti ṭhin hle. A sumdawnna lama a buai ṭhin em avangin a farnu a chah thla a, a fapa tân hun insiam ve ṭhin mah se harsa tih châng a ngah a, a fapa hringtunu, a uire avanga a hnawhchhuah tâk a nupui kha loh theih lovin a hrechhuak rum rum ṭhin.

Ni e, a nupui kha uire lo se zawng chhungkaw hlim tak an nih ngei a ring a, ama hnawhchhuah leh ṭhen mah ni se ngaih vawng vawng chang a ngah a, biak pawh leh mai a châk rum rum ṭhin. Amaherawhchu, a thinlunga chapona chuan a thunun a, a fapa a puitlin hnu thlengin a chanchin rèng a ngaihven zui ta lo a ni.

Zîng khua a lo vâr a, tukṭhuan an kil lâi chuan Sangzuala farnu Hlimpuii chu a ṭawng melh melh a, a ṭawng loh kârah a ṭhiannu Cynthia-i chu a lo inrawlh ve zauh zauh bawk. Cynthia-i hi Sangzuala ngaihzawng em em tu a ni a, Delhi aṭanga inhmelhriat tawh an ni a, Hlimpuii nen ṭhian inkawm ngeih tak an lo ni bawk nen Hlimpuii ṭan lâk azârah Cynthia-i pawh Sangzuala bul hnaiah a awm theih phah a, tun ṭum pawh hian Hlimpuii remruatna angin Mizoramah Sangzuala a rawn zui chho ve tawp a ni.

Mizoram lo thleng chho hlim deuh hlawl tih takah Sangzuala chuan chhun hun chu a ṭhian hluite tlawh kual nân a hmang a, a ngaihtuahna kil khatah chuan Lunglei a rawn lang a, a chhan chu a nupui hlui, mipa dang laka amah uiresantu kha a hriat chhuah vang a ni.

A fapa nu a ni miau a, a hrechhuak leh ṭhin pawh chu indemna a nei hran chuang lo. Engtin nge a awm tâk zel, a dam ṭha em tih lam ai mah chuan intihtheihkhum chàknain a khat a, amah aia a thlan mipa lakah chuan deuhsawh taka awmkhum a chàk a ni ber e.

Andrew-a class bâng lo haw chuan tukverh bula lo ding a pa chu a melh zawk a, thil dik lo awm deuh hian a hria a, a pindan lam pan ta mai lo chuan a pa lamah a phei a, inbe lum lam vak ṭhin lo mah se pafa an nihna chuan inzawmna nghet tak a siam a, an inngaihsak tawn reng ṭhin.

"Eng nge i tih a pa...?" a fapa aw chuan Sangzuala chu a thil ngaihtuah ngut ngutna ata a kai harh a, Sangzuala chuan, "In va bâng hmâ ve," a lo ti sup a, a fapa zawhna pawh chu a chhâng chuang lo.

"Nia, vawiin nî angah hi chuan kan bâng hmâ ṭhin alawm, thil dik lo a awm em ni?" Andrew-a chuan a ti leh a, Sangzuala chuan, "Awm lo e," a ti sam mai a, Andrew-a pawh chu a kal sawn ve leh nghal mai bawk.

"U Sangzual, hei, thingpui ka lo siam che a," Cynthia-i chuan a lo ti nêm thliam a, Sangzuala chuan, "A va lawmawm ve," a ti hniam dut a, Cynthia-i mitmeng leh awm dan chu a hrethiam lo bîk pawh a ni lo.

"Engtik thleng nge Mizoramah hian kan chàm ang?" Cynthia-i aw chu a no nghalh a, Sangzuala chuan, "A ṭul dan azir a ni mai, chhuk hmâ i duh chuan min hrilh la, ka thlah thla dâwn che a nia," a ti dam dap a, Cynthia-i erawh chuan, "Ni lo e, chhuk hmà ka duh pawh a ni lo, ka zàwt mai mai che maw le," a lo ti zung zung a, zawhna a zàwt sual palh tih a inhrechhuak rang teh e!

"Tun kâr tawp hian Lungleiah ka kal dâwn a, i hman ang em?" Sangzuala sáwmna chu Cynthia-i tân chuan hnial phal rual a ni mawlh lo.

"Aw, hman e, tihtur engmah ka nei hleinem, i bula awm tih tawp loh chu," Cynthia-i chuan awmze nei tak hian a ti a, din hnaih deuh salhin a nui sen sen a, Sangzuala erawh pâwn lam thlirin a ding ngâwi run a, ngunthluk zeta thil ngaihtuah tih a hriat hle bawk.

Sangzuala rilru kil khatah chuan a nupui hlui kha a châm ru reng a, eng ang taka mipa hlawhtling nge a nih tawh tih hriattir a duh a ni. Zanriah kil hmâ chuan a pa nen ṭhutthlengah ṭhuin an inbia a, Hlimpuii leh Cynthia-i te chu chokaah awm ve teh mah se titi nân an hmang a ni ber a, an awmpuinu nu Chhuani chu a tir kual zat zat a, chutianga awm chu a tih loh dan lah a ni hek lo.

Nu Chhuani hi hmân ata an awmpui tawh a ni a, Sangzuala leh a nupui an inṭhen hmâ aṭang daih tawha awmpui hna hi thawk a ni nghe nghe! Delhi khawpui lama Sangzualate pafa an insawn thlak hnu thlengin Sangzuala nu leh pate enkawlin hna a la thawh chhunzawm zel a, chu chu Sangzuala duh dan a ni.

"Chawhmeh hi purun vârin i kang em ni? A rim a va dik lo ve," Hlimpuii chuan chawhmeh kan tem zeuh pah hian a ti a, nu Chhuani chuan, "Aw, purun sen a awm si lo a, ka hmang ta mai a nih kha," a lo ti dam dap a, chu veleh Hlimpuii chuan, "Purun vâr ka ngaina lo tih i hre bel àwm hle sia, engati nge i hman hram, ei a ti peihawm loh vek alawm," a ti ta charh charh a, a ṭawng zawi lo hle bawk.

"A theihnghilh palh a ni ang chu, ni dangah te chuan a hmang tawh bîk nàng," Cynthia-i chuan a lo ti thuai a, mahse awmzia a awm teh chiam lo.

"A teuh lo, a hmang lui leh ngat duh ang ka ring, awmpui e ti lo hian mi hi a mil lo ve khanglang lehnghal a, inthlahrunnate hi neih ve zàwk tur hi a nia, ka thu chu ni se he inah hian hna a thawk tawh lo chiang khawp ang," Hlimpuii chuan a ti hmarh hmarh a, nu Chhuani chuan, "Ni lo, chutiang eng rilru mah ka pu lo," han ti ve teh mah se Hlimpuii chuan a rin loh hmèl kher mai.

"Hei chen hi kan inah i thawk tawh a, ka hre chiang thawkhat ve tawh che alawm nu Chhuan, ti rawh Cynthia, pindanah chho ang, chuan, chaw ei dâwnah min rawn ko ang che," ti deuh hlak hlakin Hlimpuii chuan nu Chhuani chu a melh khà khá a, Cynthia-i chu pindanah a hruai chho ta daih bawk.

"I ṭha maw?" Sangzuala aw a hriat rualin nu Chhuani chu a phu deuh uih a, ngaihtuahna a kawm nasat luatah chu chen chen engmah ti lovin a lo awm tih a hrechhuak chawpchilh chiang hle.

"Maw....? Aw, ka....ka ṭha e," a ti bah nawk nawk a, a bai chhuan lo liam lek lek tawh chu a chawk zui sawk sawk a, Sangzuala chuan, "I va ṭhat hmèl si loh ve," a ti leh a, nu Chhuani chuan nui lui tih hriat tak hian, "Ka ṭha alawm, Aizawl aiin Delhi chu i ngeih zàwk a ang ka ti, kan inhmuh lohna a rei tawh vang nge ni, i lang lian zual sawtin ka hria," tiin thu dangah a pakaipui ta daih a, Hlimpuii nena an buaina chu hriattir ve kher a duh loh vang a ni pakhat!

"Andrew-a hian a chhun viau chein ka hria, a hmel chu thuhran ni se, a kal dan te, a ṭawngkam te, a mizia te hi nangmah chiah chiah a ni mai, a hleitling ropui bawk si," nu Chhuani chuan a ti zui leh malh malh a, Sangzuala chuan, "Chuti maw, i lakah hian a lo hawihhâwm lo viau ang a, a pa ka nih avang hian ka bulah i sawi ṭha duh lo mai mai te hi a lo ni ang e?" a han ti zauh a, nu Chhuani chuan, "Chutiang engmah a awm lo, a fel lutuk zàwk, heta a rawn awm tirh khan a tihmawh hmel ka ti a, mahse hei, kum khat chuang kan han awmho takah chuan inang tak in ni," nu Chhuani chuan a ti ta siam siam a, Sangzuala paw'n lo bu nghut pah hian, "Mizorama tal tam lo, nikum lawk aṭanga rawn khawsa ve mai chauh a la ni a, kawng tam takah i lo hrethiam dâwn a nia," a han ti thum ve leh dut a, phone call a dawn avangin a kal sawn zui nghal ta daih bawk.

Chumi tlai zanriah an ei chu Hlimpuii chuan chawhmeh kan a sawisel deuh chhen a, Sangzualan lo khap leh zauh ṭhin lo se chu a phun rei viauin a rinawm. Cynthia-i ve thung chu Sangzuala bulah ṭhuin Sangzuala nu leh pate a be siam siam a, mi â tân lo chuan tlaktlum a tum tih a hriat khawp mai.

Zirtawpnî a lo inherchhuak a, ruahman làwk ang ngeiin Sangzuala leh Cynthia-i chu Lungleiah an kal a, Sangzuala chuan a ṭhiante a tlawh kual a, mi dang mitah chuan Sangzuala leh Cynthia-i chu inzawmna nghet tak nei ang maiin an lang a, mahse a nihna takah chuan eng inzawmna thuk mah an nei lo záwk a ni.

Sangzuala chuan an kal chhan ber buaipuiin a ṭhiante hnenah ram lei tur ngaihvenpui turin a chah a, a man zatah buaina a neih loh thu a hrilh tlang nghal vek bawk. A tirah kha chuan Aizawla Hotel din a tum rilru kha a ni a, mahse hmun a chep deuhin a hria a, Lunglei lam a thlurbing leh ta zàwk a ni.

A ṭhiante'n zan riak turin sâwm nasa viau mah se Sangzuala chuan haw leh nghal a titlu ta tho a, Lunglei chhuahsan zawnga an tlan lâi chuan a rilru inlet thutin motor chu a kuai her a, Cynthia-i chuan a hrethiam lo ru kher mai.

In pakhat hmâah hian motor chu a tiding a, Sangzualan chu in chhûnga awm te hmèl a han hmu chiah chu mak a ti a, Cynthia-i erawh chuan engmah a hrethiam lo a, chu ina an kal chhan chu a hre hek lo.

"Hei hi pu Lungmuanate in kha a ni lo em ni?" Sangzuala chuan a ti a, nu pakhat chuan, "A ni ṭhin a, mahse kan hnenah hian an hralh tawh alawm, kum 15 dâwn chu a ni tawh ang," a lo ti zàng vâh a, Sangzuala rilruah chuan zawhna dang a piang zui zat bawk.

"A nih, khawiah nge anmahni kha an awm?" a han ti leh a, chutah chu nu bawk chuan, "Pu Lungmuana tak kha chu a boral tawh a, a boral kum vek khan he in hi an zuar a, keini'n kan lo lei ta a ni. A nupui leh a fanu kha khawiah nge an awm tâk zel kan hre chiang chiah bîk lo, Aizawlah a ni maithei," a lo ti dat dat a, Sangzuala chuan mak a ti tulh tulh a ni ber e.

Lunglei khawpui an chhuahsan hnu thlengin Sangzuala chuan a ngaihtuah zui a, a ṭhiante hmu tura zin mai chauh kha a ni a, tum làwkna pawh awm hauh lovin a nupui hluite in a tlawh a, a chhan chu eng ang taka hlawhtling nge a nih tawh tih hriattir a duh vang a ni.

Amaherawhchu, a nupui hlui pa, pu Lungmuana boral tawh thuin a lo hmuak reng zàwk chu niin, a beisei loh thil a tawng chu dawnsawn dan a thiam chiah lo a ni e.

Aizawl an thlen chuan zan a ni tawh a, Hlimpuii chuan Cynthia-i chu phur tak hian an zinna vel a lo zàwt a, Cynthia-i chuan sawi tur vak a nei lo a, mahse pu Lungmuana hming a sawi ri chiah chu Hlimpuii thinlung a nghing nghal dawt a, pangngai takin a awm leh thuai thung.

Inrinnî a ni a, nî dang ang bawkin Zotei leh a fanu chu dawrah an buai leh mawp mawp a, chhuak vak an tamin dawra lo lèng lut pawh an inawm chhawk deuh reng a, chutia mahni buai buaia an buai lâi chuan Zotei chuan phone call a dawng a, an eitur pekna ṭhin Phone zawrhna dawr aṭangin a lo ni a, a pick up ve nghal mai bawk.

"Pi Zote, in soup siam hi a hîng tlat mai, engtin nge ni ang?" tih thu a hriat rual chuan Zotei chu a meng phawk hrâ a, kum kha leh chen ei siamin hun a lo hmang tawh a, an eitur siam a hìn ngai rèng a hre si lo, mak a ti tak zet a ni.

"A va'n zia lo ve, tunah ka lo kal nghal dâwn a nia," Zotei chuan a ti zung zung a, phone a hmeh tawp hnu chuan Fela hnenah, "Smart Phone dawr aṭanga order kha tu siam nge?" a ti a, Felan chhàn a tum lâi tak chuan a fanu záwkin, "Keimah, engati nge a nu?" a lo ti thuai a, Zotei chuan, "Soup kha a hîng a nih hmêl a, a thar i siam lo êm ni?" a ti zui zat a, a lungâwi zân lo tih a hriat khawp mai.

"Nimin tlaia mi kha ka tem chhin a, engmah dik lo a awm loh avangin ka chhûang lùm a, ka pack ta mai asin, a va'n pawi tak," a fanu chuan a ti nàng náng a, nuam lo a ti ru hle bawk.

"Chuvang a nih dâwn chu, a thar siam tur che alawm," ti hluaiin Zotei chuan soup chu a siam zui mawlh mawlh a, a fanu chuan, "Keimah ka va kal ang," ti ve teh mah se Zotei erawhin a lo hnial tlat thung.

Rei lovah smart phone dawr chu soup thar hlak keng chungin a va thleng a, thupha a châwi mawlh mawlh a, chutih lâi vek chuan hmeichhe changkan hmèl tak hi phone lei turin a lo lut a, hnathawk pakhat chuan a lo buaipui thuai a, chutah chu hmeichhia chuan, "Lo lut teh u Sangzual, eng ber nge ka lei dâwn pawh ka hre lo," a ti nêm diai a, chu veleh Zotei chu a ding khawng deuh awt a, chu hming, 'Sangzuala' tih hming chuan a den hian a dêng dawt a ni ber.

"I duh duh kha thlang tawp rawh," tia mipa ṭawng thum dap ri a hre leh chiah phei chu a thin a su dup dup a, rang zet hian mipa awmna lam chu a hawi thuai a, rinhlehna leh hlauhthawnnaa khat tih takah a taksa chu a thunun hman ngàng lo a ni e.

Zotei chuan a hmâ maia ding mipa hmêl a hmu chiang chiah chu eng nge tih ber tur a hre lo a, chu chang a ni lo, mit la sawn lêk lova a mi en pa pawh chuan chiang zet hian a lo en ve reng chu niin, a chak lohna tilang zual tura a mittui lo tling ṭiam ṭiam chu Zotei chuan thunun tumin a bei fan fan a, a mi hmuh avanga a thil ken lâi a thlauh rik ṭhuai chu rang zet hian a chhar sawk sawk a, dawr aṭang chuan hmanhmawh takin a chhuak ta thuai thuai bawk.

______________________________________________