𝐊𝐀 𝐂𝐇𝐀𝐍𝐂𝐇𝐈𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

Suangtuahna khawvel ata ka harh chhuah meuh chuan khua a lo hniam ruih tawh a, kâwla nî tla tur pawh a lo èng sen phût a, engkim mai chuan lunglèn a kai tho a, han hawi vel ila, mitthlâah hun liam tawh a rawn lang zut zut bawk nen ka nun ram chu a riangin a khawhar tak zet a ni.

Ka hmâ lam tlâng dung chu thlir reng chung hian ka thaw chhuak ham ham a, mi â lailet ber paw'n min rawn hmu se ka awm dan aṭang chuan beidawnna rilruin min sal bet a ni tih an hriatthiam ngei ka ring. Ka ṭhutna aṭanga ka thawh ṭuah ṭuah rual chuan a ri deuh rap a, hnahthel rô hmuna ṭhu ka ni tih ka inhre chhuak chawpchilh nghal zat bawk.

Ka mit ka chhîng vang vang a, kawng dawm meuhin ka van vadak leh vang vang a, ka mit takngial pawh meng peih lo khawpa ka nguai ruk chhan bulpui ber chu ka dam hlawl lo a ni. Ni e, ka dam mawlh lo. Nàtnain ka rilru leh taksa a tuamhlawm a, ka engkim, hmun tin kil tin nâ lo lâi rèng a awm lo va, nunhlui ngâia ka thinlung rum ruah ruah ri chu lo bengkhawntu awm se tihnain ka khat a; mahse, engkim mai chu duhthusam satliah, a tak ram chang ngai reng reng lo tur a ni tih ka hre chiang em em lawi si!

Chutia lunglènna ruam ata harh chhuaka ka din ngàwih vung vung lâi chuan ka kerkawr iptéa ka phone chu a rawn ri nghawr dat dat a, uksak zui lem chuang lo hian ka meng deuh diar diar a, ka chhûngte hnen aṭang bak chutiang hunah chuan phone call ka dawng dâwn lo tih ka chiang a, min lo ngaihtuah leh viau tawh a ni tih pawh ka hrethiam nghal mai.

A zâwna ka phone rawn ri chhen chu kham zet hian ka switch off hmak a, ka bike hùnna bul ka thlen chuan nî a tla fel titih tawh nghe nghe a, mahse ka tân zawng chhun leh zan, khaw èn leh thimin awmzia a nei lo va, thuhmun reng an ni a, khawvela ka neih rohlu ber ka chán tâk aṭang kha chuan engtik lâi paw'n thim rorélna hnuaiah hringnun ka hmang tawh záwk a ni.

Khawfing chah hnuah in ka thleng ve chauh a, kan in chhûng ka luh rual chuan ka nu mitmenga min ngaihtuahna ka hmu nghal zat a, ka pa tak pawh a bang chuang lo. Min biakna leh an zawhnate chu chhàn tumna rèng ka nei lo va, bengngawng ang mai hian ka awm ngul a, ka pa lungâwi lo ṭawng deuh khur khur te chu ka ngâi thutak lem hlei lo va, min zilhna thu an chhah chhuah thui tak tak hmâin pindan lam ka pansan ta daih bawk.

Pindan chhûnga ka awm hnu chuan baihvai rilru zet hian khumah ka ṭhu ngâwi run a, banga thlalak intâr chu rilru khawhar leh ipik em emin ka en ngawt ngawt a, kâr lova ka mittui rawn parawl nghal ṭuam ṭuam te chu dan tumna pawh ka nei chuang lo. Ka thlalak thlir mêk, vanduaina avang liau liaua fam min chansan ta, ka hmangaih Mapuii tân chuan eng anga tam pawh ni se mittui sèn ral ka ui lo va, ka ui ngai bawk hek lo ang.

Rei pawh ṭhu lovin khumah chuan ka mu zâl ta hle hle a, Mapuii thlalak chu ka la en reng a, mahse mittui avanga ka khaw hmuh a phé ruai tâkah chuan ka maimitchhîng zui riai riai a, suangtuahna leh mitthlâah Mapuiin hmun a rawn luah lûm leh nghal zat bawk. Bianga mittui lûang thla lúm pap chungin ka nui tawi suk a, mitthlâ mai mah ni se a nui hmêl te, a hlim hmêl te, mi nung ang maia a khawsa hmêl ka han hmu leh thei hrim hrim te chu ka lawm a, chu bak chu tih theih leh chan ka nei tawh lo tih hre reng chungin ka lung a âwi táwk em em a ni.

"Pa….!?" ka fapa aw chuan mang ram ata min tiharh zawk a, ka taksa chu a rawn sawi che deuh dat dat a, ka mu zâl mai mai kha ka lo muhil tlang daih ni ngei tur a ni.

"Pa.....api'n kai tho tur chein min tia....." a rawn tih leh chuan ka tho ve mai a, rei pawh awm lova a chhuak leh nghal nal nal chu ka en zui vung vung a, ka ngaihsak loh ang bawkin min ngaihsak bîk lo tih a hriat khawp mai.

Pindan aṭanga ka chhuak fel chiah chu ka nu'n min lo be hmâsa ber a, chaw ei dawhkana ka chaw ei tur, chaw inkhawrh sa thlap leh chawhmeh inchhawp sa thlap a awm thu a sawi hnu chuan choka lam ka pan a, ngâwi reng hian ka ei zui mual mual a, ka awm dan ren run aṭang chuan ka thengthawngah tûmah an awm lo tih a hriat hle a, ka fanu meuh paw'n ka awmna hlàt lo takah thleng sil ri rak rak mah se min biak a tum chhe té eih lo hrim hrim!

Min be tehreng pawh ni se a beisei ang chhànna ka pe dâwn lo tih a hre chiang thawkhat bawk a, min be chhawnchhaih peih lo law law niin ka hria. A nu a chhun lutukna lamah erawh chaw bar ṭhulh ṭhak khawpin ka en leh vung vung ṭhin a, mahse a nu; ka hmangaih Mapuii kha a ni lo tih ka hriat chian êm avangin hmuh kan mai chu a finthlak záwk mah a ni.

Ka chaw ei lah chu a tui fahran lo hle lehnghal a, tam pawh ei lovin ka duh táwk thuai a, mahse ka awm hmun erawh ka sawh sawn mai lo thung. Chaw tui tak ei ang hrim hian ka ṭhu reng a, sitting room lama ka fapa leh a pu inbe thawm chuan beng a verh lo thei lo va, an awmna lam ka hawi phei chu ka nu chenin an hlim tih a hriat hle a, Mapuii tel lova nui hmêl an han pu thei ringawt te chu ka tha a nâ ru tlat a, ka thin a rim ru hlur zui nghe nghe bawk.

Thleng chu dim tehchiam lo hian ka dah ri deuh chawrh a, ngâwi rengin ka tho zui nulh a, kut sil tura thleng silna lam ka pan lâi chuan ka fanu chu min hlau tih hriat tak hian a lo petek thuai thuai a, hmun min lo kian sawt sawt a, sitting room lam ka hawi phei leh tawh miah lo nàin ka chet dan leh ka thawm siam chuan ka nu leh pa mit leh beng a verh dâwn tih ka chiang hle.

"Zoher.....lo ṭhu teh....!" pindan lam pan lehnghal mai ka tum chu ka pa záwkin min rawn be ta nge nge a, ka fapa nena an ṭhutna ep ṭhutthlengah chuan ka ṭhu thla ve nghal mai bawk.

"I awm dan hi a dik lo tih hria la, insiam ṭhat tum rawh.....!" ka pa bawk chuan a rawn ti leh a, ṭawngkam nêm a hmang lo va, ṭawngkam khauh pawh a hmang chuang hek lo.

"Ni e, insiam ṭha thuai teh…..! Vawiin tlai khan pu Hmuaka hna bâng a rawn pêng kawi a, a hmuh tum ber lah i lo chhuak bo daih bawk si a, zanina rawn kal ṭhat leh a tum ta mai a nih kha! Chuvangin zanin chu khawiah mah chhuak lo la, inah awm ve hle hle ang che!" tiin ka nu chuan a lo tuihnih zui duah a, ka lakah an lungâwi lo ve ve tih chu a hriat khawp mai.

"I awm dan ngel ngul avang hian eng rah ṭha mah a chhuak dâwn chuang lo, i luhlulna kha dah bo la, i fate hi ngaihven rawh….!" ka pa chuan a rawn tih zawm leh a, kei erawh ka ngâwi reng thung.

Rilru dang daih pû chungin TV chu ka mi â thlir tlawk tlawk a, min zilhna ni pah fawma ka nu thusawite chu ka bengah lut ve teh mah se lehlama chhuak lehnghal zel ang a ni a, ka nu ṭawng kâr lakah ka pa pawh a rawn ṭawng ve leh zauh ṭhin bawk.

Dawhkana ka fate lehkha inzirtir thawm leh an che vel chu ka mitmei ru reng a, mahse ka en a ni tih an hriat loh nân ka awm dan erawh ka thup nasa hle thung. Mapuiin chatuan ram min pansan tâk aṭang phei kha chuan ka ngaihsak lo zual hle a, chhûngkaw kima hringnun hunbi kan chhiarho dial dial lâi pawh khan ka ngaihven lutuk lo hrim hrim tih keimah ngei pawh hian ka inhria; mahse, insiam ṭhat tumna rilru ka pû chuang der lo, chutin fel leh ṭhaa ka inngàih vang pawh a ni chuang hauh lo.

Chutia ka nu leh pate min zilhna thu hla ngâithla chunga ka fate lehkha inzirtir ka mitmei ruk zauh zauh lâi chuan pâwn lam aṭangin kan in kawngka a rawn inkik ri karh karh a, ka nuin a lo chhawn thuai a, ka awm dan ka thlak danglam miah lo nà chu thawm aṭang chuan pu Hmuaka a rawn lèng tih ka hrethiam nghal mai a, pa ṭawng duh leh titi nuam ti mi tih takah in chhûng a rawn luh tirh phat aṭangin a ngâwichawi lo hle.

"Tunlâi chu kan va inhmu khât ve ti raw Zoher......?" hmêl ngainatawm tak pu chung hian pu Hmuaka chuan min be nghal suam a, ka thawhna school principal mah ni se hawihhawm lo chhuah takngial pawh ka tum lo a ni ber e.

"I ṭha zel maw....?" amah bawk chuan a rawn ti leh a, thla hmâsa lawkah ka nupui, eng dang zawng aia ka hmangaih leh ka ngàihhlùt Mapuii ka chân tih a hre ve vek a, chutiang zawhna chu min zàwt teh mah se ka awm dan leh ka hmêl aṭang chuan ka la ṭha lo tluang zel a ni tih a hriatthiam ngei ka ring.

"Zoher….!?" ka pa chuan a rawn ti hniam deuh hmuk a, pu Hmuaka min biakna ka chhâng eih lo hrim hrim chu ṭha lo a lo ti hle ni tur a ni.

"Thingpui ka va lûm ang e, ti khan lo inkawm r'u....." tiin ka nu chu a tho tharh a, ka rilruah thil pakhat a rawn lut zawk a, ka ngaihtuah làwk pawh a ni hran lo.

"Ka hna thawh lâi hi ka bansan mai a ṭha zàwkin ka hria," ka rilrua lo lut thut ka sawi chhuak tawl chu pu Hmuaka chuan urhsun deuh tak hian min en a, ka pa lam erawh ka hawi buai duh lo law law; hlim hmêl a pû dâwn lo tih ka chiang!

"Hun i la mamawh a nih chuan ka nghak thei che alawm, chuti ngawta nang ber i ban mai te'n a dik thei náng maw le...." pu Hmuaka chuan a rawn ti dap dap a, kei erawhin eng thu mah sawi zui ka tum tawh lo hrim hrim thung.

Lungâwi lo leh ngaih ṭha lo hmêl pawh pû chuang lo hian pu Hmuaka chu a ṭawng zui suah suah a, ka nu'n thingpui a rawn châwi phei ta bawk nen ka pa hovin an titi laih laih a, an zînga awm chu ka kham ta deuh a, ding hluaiin ka fate lehkha inzirtirna lamah chuan ka phei a, mahse rei pawh ka awm peih leh chuang der lo.

Pindanah lutin khum bawk ka bel leh chawt a, bânga intar Mapuii thlalak chu ka lá thla a, lawm lovin ka nui tawi leh suk ṭhin a; mahse, ka nuih a zat avanga nui erawh ka ni lo, beidawnnain min luah khat hneh lutuk chu tih ngàihna hre lovin ka nuih leh ngawt ṭhin a ni ber. Tin, ka mit ka chhìn apianga Mapuii hmêl ka mitthlà zui veng veng thei ṭhin chu ka khawhar inhnemna pakhat a ni nghe nghe bawk.

Thawm ri sat sat chuan min tiharh deuh hlawl a, ka mit ka men ruala ka hmuh hmâsak ber chu ka fanu a ni a, puan min lo sintîr sat sat a, pindan chhûng a thim vek avangin ka harh tih a hre miah lo niin a lang. Pindan aṭanga a chhuak tur te chu dingdi hlip titih hian a pen chhuak ṭhem ṭhem a, eng thawm mah ka chhuah lo bawk nen ka muhil lâi min tiharh palh ang tih a hlauh hmèl kher mai.

Mi dang láksak phal lo ang hrim hian ka âwmah chuan Mapuii thlalak ka lo la kuat bet run a, ka fanu puan min sintîr tak pawh chu rei sin pei lovin ka nawr kiang leh ta daih a, muthilh zui pawh ka tum tawh chuang lo. Khum aṭanga thovin tukverh bulah ka ding a, van lam chu ka thlir dauh dauh a, suangtuahna lipuiah ka zûang lut leh ta nge nge bawk.

Ka hringnun mumal lo tak chuan hmâsawn lam ai zual lam a pan tial tial tih keimah ngei paw'n ka hai bîk lo; mahse, insiam ṭhat tumna ka nei chuang der lo va, insiam ṭhat tumna rilru lo pû ta tehreng pawh ni ila bul ṭan dan tur ka hre hlawl lo a ni. Mapuii kha la damin mi nung ramah hian la cheng ve ni se zawng ka hringnun tlabal lutukin ka awm lo ang a, lungngâi mangangin hun leh nî ka hmang ral miah lo bawk ang.

Amaherawhchu, tunah zawng engkim a danglam zo a, a nih tur ang a ni vek tawh a, vanduaina thlazar hnuaiah ka awm tih pawm thiam tum sa teh ṭhin mah ila ka thinlung hian a ngâi thiam thei thlawt lo va, Mapuii ngàih lah ka bâng thei hek lo. Hetiang tak hian mihring nun hi a lo chaurau thei ang tih pawh ka hre ngai lo; mahse, tunah erawh ka nunin pachhiat a táwk a, nunna nei reng chung siin dam ka thlahlel meuh tawh lo a nih ber hi màw!

Kâr thar a lo inher chhuak a, ka hun hman dan a la pangngai thei lo tluang zel a, nitin zantin ka nu leh pate kâ aṭangin zilhna thu hla ka dawng awl lo va, Mapuii thihna avanga ka tawrhna chu hrethiam lo an ni lo tih ka hai bîk lo, min ṭawng thlamuan pawh an tum fô ṭhin. Nimahsela, ka thengthawngah eng a thawh theih tak tak rih lo a ni ber e.

"Khawiah nge i kal dâwn?" lehkhabu keng chunga ka fanu chhuak tur chu awkâ dam fahran lo hian ka be ding deuh dat a, chuti teh thuta ka bia chu mak a tih hmél hle bawk.

"Pa Sangzuala thil ka va zàwt lawk, ka rei lo ang," tih leh in aṭanga chhuah chu a rual a, lehkhabu a ken danah zirlai a va zàwt dâwn a ni leh pek ngei ang.

Engmah sawi lovin sitting room-a ṭhutthlengah chuan ka ṭhu ngul a, rei pawh ka la ṭhu lo ang tihah kan in kawngka chu inkik ri mang hlei lo hian a rawn inhawng ri ṭhuai a, kan hawi phei nghal ṭhap a, lo lut mêk chu Mapuii û chiah Ruattluanga lo ni rengin, a hmêl ka hmuh rual rual chuan buaina kan nei dâwn tih ka hrethiam nghal vek bawk.

"Engati rum rum nge Ruattluang?" tiin ka nu chu a ṭawng chhuak hmâsa ber a, kei min pan zâwnga rawn pen phei pawk pawk pah hian ka nu ding ṭha hle hle lâi chu a nam lêng deuh lawp a, ka thin a sâ nghal phat a, insum tumna pawh ka nei chhe tê them lo hrim hrim!

"Nang phiangsen hi dam reng tlâk pawh i ni hrep lo e!" meng ling hlur chung hian Ruattluanga chuan a rawn ti khur khur a, ka beisei loh lam daihin chemtê a phawrh zawm zat leh ta nghal a, eng thil chiah nge tih a tum chu hai rual a ni lo.

"I thil ken lâi kha dah thla rang rawh Ruattluang!" dam fahran lo hian ka lo ti lèt ve nghal hrawk a, hmanrua nen a rawn che chhuak rup mai chu ka hrethiam lo lek lek hial a ni.

"Ka nau kha nangmah avang hian thi a ni tih ka theihnghilh reng reng hleinem!" tih leh chemtêa mi rawn vih nghal a tum ta mai, lo insaseng hman hlauh lo ngat ila zawng ka taksa aṭang chuan thisen a chhuak chiang khawp ang.

"Duh táwk rawh Ruattluang, Mapuii kha ka thah a ni tei vet lo!" thinrim zet hian ka ti chhur chhur a, loh theih lohna avangin lo invenna tur hmanrua ka chuh ve ta nge nge bawk.

"Ka awih che ring suh!" ti khauh hmukin min rawn hnaihchilh zui nghal a, TV screen keh khi rawp khawpa nâin min rawn bawh a, min thah a hreh lohzia chu hrilh hranpa ka ngâi lo chiang hle.

"Duh táwk nghal rawh u!" tia ka pa lo ṭawng te chu engah mah a ngâi lo va, kei erawh rilru fîm pû záwk ka nih vangte pawh a ni mah nà, insum tum lo viau e ti lo chuan khawih lèt pawh ka tum hran lo, ka lo invêng tawp a ni ber!

"Ruattluang!" ka pa bawk chu a rawn ṭawng vin leh hrawk a, ka nu lo rak deuh chel chul te chuan boruak a tisosâng zual a, ka fapa meuh pawh a lo hlauthawng ve hle ni tur a ni.

"Pa.....!" a rawn ti lauh lauh reng a, ka pa chuan kan awmna a rawn thleng phei rang hle bawk.

"Duh táwk rawh u ka ti a ni lo'm ni!?" tia ka pa'n kan insual min rawn ṭhelh a tum chu Ruattluanga chuan a lam hawi zâwngin chemtê a lo vai khum siah a, inring hman lo tih takah ka pa bân chu a kak nghal zawih a, chutah zet zawng ka insum thei ta ngáng bîk lo.

Ruattluanga chu a nghawngah rek chawtin ka kuai kun a, thil danga rilru a pék lâi tak a ni bawk nen ka bawh bet thuai a, chemté a keng nge keng lo pawh ngaihsak lék lo hian ka hnek ri chawrh chawrh a, thinrim luatah ka bân rawn thip leh zawk zawk ṭhin te chu nâ tihna reng ka nei lo va, vawi tam a zâwna kut ka thlak mawlh mawlh tâkah chuan tha sèn tur pawh nei tawh lovin a chau chhe lai let der nghal bawk.

"Pa.....i bân kha a thi a nia.....!" ka fapain a rawn tih chuan ka rilru a fîm thuai a, ka indanna lamah ka bân a lo thi pheng phung tih ka hre chhuak chawpchilh nghal a, ka nuin min rawn buaipui sawk sawk a, ka pa tak paw'n min ngaihtuah hmél khawp mai.

"Kimkim, i û va ko thuai teh.....!" tiin ka nu chuan ka fapa chu a tîr vat a, kei min buaipui ngâi bawk, ka pa buaipui ngâi bawk, a indaih meuh lo chu a ni e.

Kâr lovah ka fanu hmêl kan hmu ta thuai a, mak tihnain a khat tih hai rual a ni lo va, amah mai ni lo ṭhenawmpa Sangzuala pawh a rawn thleng phei ve nghe nghe a, kan boruak ni deuh nuaih chuan a ṭhawng hle a ni tih an hmêlah a lang vek a, ka pa'n police lam a call fel diam tawh bawk nen Ruattluanga chu engtia buaipui zui mah ka tum tawh lo.

Mapuii nute lam erawh ka be pawp hram a, kan ina an fapa rawn chet dan ka sawi dâwn lâi tak chuan ka nu'n ka phone a rawn chuh a, lungâwi lo zet hian Ruattluanga chet dan zawng zawng chu a sawi chhuak nghal hmawk hmawk a, khap ka tum hran lo va, ka pa tak paw'n a tum bîk lo a ni ang, a ngâwi reng ringawt!

Chutiang vel chu kan boruak a ni a, police-in Ruattluanga an hruai dâwn lâi tak chuan Mapuii chhûngte an rawn thleng ve chiah a, chutah ṭha takin thu kan sawiho dâwn emaw tih lâiin buaina a awm belhchhah záwk za mah leh ta nghal a, Mapuii nu leh pa leh a nau chenin min puhmawhna an chhakchhuak chîam a, Mapuii nena kan inngáihzáwn lâi thlengin hun liam tawh an rawn sawi chhuak phiar phiar a, chhûngkawpa ber chena insum kárna an nei miah lo chu mak ka ti lehling záwk hial a ni.

Ka nupui Mapuii kha in chunga aṭanga tla thla palh a ni a, a lû a sawh nàt êm avangin kâ pawh chhawn lovin a boral zui nghal a, kha thil thlen nî kha insuk pho kan seng dun lâi a ni nghe nghe a, in hnuai lam pana kan chhuk thla tur kha a inrap sual palh ta hlauh mai a, ka tâna chelh hman ngaihna awm lo khawpin thil kha a thleng rang a, khatia mahni nupuite ngei pawh chhan thei lova ka awm kha tun thleng hian inthiam lohna ka la neih ruk reng phah bawk.

Chuta chhapah a chhûngte'n tum rèng avanga ka thah angah an lo ngâi tlat pek a, police station lam thlenga ka chùankài a ngàih phah hial a, Mapuii thihnaah ka inhnamhnawih lo tih leh vanduaina avanga thil thleng palh a ni tih police lamin an finfiah hnuah pawh a chhûngte erawhin ka lakah helna an la zawng fan a, mâwi lo taka ṭawng khum leh chet khum chângte chu nei ve tho mah ila an ni ang em ema mihringpuite zah lo ka ni ngai hauh lo thung.

Zep leh hai rual lovin Mapuii nena kan inngaihzawn lâi aṭang daih tawh khan min ngaina lo chhûngkua hle a, eng nge a chhan tak pawh ka hre bîk lo. Mapuii lahin ka hmangaih tluk zetin min lo hmangaih ve tho bawk nen an remti lo chung kan innei ta hmiah kha a ni a, kum fê a liam hnuah pawh ngainat leh makpa ang taka en ka hlawh chuang der lo va, mahse an laka ka lungáwi lohna leh vuivaina erawh Mapuii bulah takngial pawh ka sawi chhuak ngai lo, sawi chhuah kher ṭulin ka hre bawk hek lo.

Boruak sosâng lutuk a'n dai fel chiah chu a reh hian a reh diak a, Sangzuala hovin damdawi in lamah kan inphur chhuak a, ani hi kum lamah kan inrual chiah nà chu ka tluk lo hle a, kan kohhran tual upa ni lâi mêk a ni a, a nun a ngilin mî pawi a sawi khât em em a, tèt tê aṭanga inkawm chho tih takah a hriat pawh kan inhre chiang thawkhat hle.

Damdawi in aṭanga kan haw meuh chuan zan a lo tlai duai tawh a, hliam nâ tak nei lo mah ila ka bân chu bandage vârin a awh khat thliah thluah a, ka pa pawh a intuam vâr ve lû mai. Ka nu ber chu a thinrim a la reh hleithei lo va, kan ina Ruattluanga rawn chet vel dan chuan a lung a tidam thei mawlh lo a ni ber. Chutah kei leh ka pa lahin hliam kan lo neih kher bawk si nen in chhûng kan luh fel hnuah pawh a la ṭawng deuh hmarh hmarh reng a, ka pa'n duh táwk tawh turin hrilh lo phei se chu thinrim lungàwi loh luatah a sawi chhunzawm char char peih ka ring.

"Pa......?" ka fapa aw ka hriat rual chuan thawm lo chhuahna lam ka hawi phei nghal a, chutiang huna a rawn kal chu ka beisei lo hle bawk.

"I la mu na nge?" awkâ dam thluam ni si lo, khauh hmuk ni chuang si lo hian ka ti hniam ruih a, ka hmâ takah a rawn ding a, thil sawi duh nei ang hrima a awm chu ka hrethiam lo kher mai.

"Ka mu thei lo a……" a rawn tih chuan han ṭawng zui mai dan tur pawh ka hre lo.

"I bulah ka lo mu…..?" amah bawk chuan a rawn tih zawm leh zat a, zawhna min zàwt zo chiah chu ngampa lo tih hriat tak hian min rawn kuah zal zal a, ṭawngkâa chhâng lovin khumah ka mutpui ve nghal mai bawk.

"Engati nge anu hi a thih hmâ em em le....?" kan ngàwih dun vang vang lâi chuan a rawn ti chhuak leh hlawl reuh a, chhàn dan tur ka haihchham leh ta khawp mai.

"I û a mu tawh em?" tiin thu dangah ka pakàipui daih a, min zàwh zui zel ka hlauh vang a ni pakhat!

"A la meng ve tho....." ngaihsam hmèl tak hian a rawn ti ve leh mai a, ngâwi renga a kut a tichet neuh neuh danah kei ang bawkin a mut a chhuak bîk lo tak tak ni ngei tur a ni.

"A mu thei bîk na nge?" ka ti leh sup a, ka taksa siin ka kuah nghet deuh salh bawk.

"Ka hre bîk lo," tih leh ka kutzungpui chu rawn hum a rual a, zanin zet zawng a chet dan chuan min ṭhawng mah mah a ni.

"I bân hi a nâ èm.....?" a rawn ti hniam leh raih reuh a, zan dang nena a awm dan inthlau lutuk chu chhàn mai nachâng ka hre lawk lo ṭhin a ni ber.

"Nâ lo e, muhil tawh rawh....." ti thum chhalin a kut pahnih chu ka hum a, ani pawh chuan a mut dan a siam rem sawt sawt a, eng thu mah a sawi zui ta bîk lo.

Thawm chu a reh ṭhuap a, rei lovah ka fapa chuan muthilh zâi a rêl thuai a, thlamuan hmèl zet hian a thaw ri sâk sàk a, kei erawh ka mut a chhuak lo hrim hrim thung. Khum lûa ka phone dah chu ka fapa muhil tihharh hlau ru tak chungin ka hmet èng a, mut loh a hun tawh lo tih ka hre chawpchilh nghal a, muthilh tumin ka mit chu ka chhîng zui ve mai a, mahse chutih lâi vek chuan pindan kawngka a rawn inhawng leh ta tlat mai.

Muhil ang hmakin ka la maimitchhîng reng a, kan mutna lamah ke pen thawm a rawn hnai zel a, meng kher lo mah ila pindana lo lut chu a thawm dim dan aṭangin ka fanu a ni tih ka hre nghal vek bawk. Ka meng ta nge nge a, khum mawng lamah chuan a lo ṭhu ngâwi ran a, ngaihtuahna sêng tih hai rual loh hian a hmâ lam a thlir tlawk tlawk a, ka chet hrut ruala ka la muhil lo tih a hre chiah chu a phû deuh uih a, khum aṭang chuan a tho nghal thuai bawk.

"Khaw'nge i kal dâwn?" kal sawn a tum lâi tak chuan ka ti hniam ruih a, ani pawh a ding chiang hle.

"I duh chuan hetah i mu thei ang," ti leh supin ka bân khâma muhil bâm ka fapa lû chu ka châwi kang riai riai a, lukham ka khamtîr ta záwk a, khum aṭanga chuan ka tho zui zat bawk.

"Mu rawh, naktuk school kal i ngàih kha.....!" keimah bawk chuan ka ti chhumbung leh deuh hmuk a, mahse chutianga lungâwi lohna nei erawh ka ni chuang lo.

"A nih nàng....?" a rawn tih chuan chhàn tumna ka nei lo hrim hrim!

Pindan aṭang chuan chhuakin chokâ lamah ka phei tlang a, tui ka inzui nghal khawlh khawlh a, pindan ka luh leh meuh chuan ka fanu pawh a nau Kimkima kuah chung hian a lo muhil diam tawh a, an hmâ zawnah tak ṭhu sawp deuh hnuangin ka fate pahnih chu ka thlir reng a, ka ko a rit dâwn hle a ni tih ka ngaihtuah rauh rauh a, zep thu a cheng lo, Mapuii tel lova ka fate enkawl chu ka zuam lo tak zet a ni.

Ka ṭhut ang áng chuan ka lo muhil tlang daih chu niin, ka harh leh meuh chuan khua a lo eng iar tawh a, khuma ka fapa lo la muhil bâm chu ka hmu hmâsa ber a, ka fanu hmêl erawh ka hmuh loh danah a tho tawh tih ka hrethiam nghal thung.

Zi mar lem hlei lo hian ka tho deuh nulh a, ka puan sin lâi chu khumah ka dah thla zui zat a, pindan aṭanga ka chhuah chuan thawm a lo la reh ṭhiap a, ka fanu hmêl hmuh ka inrin ruk tehreng nen a tua mah ka hmu lo chu mak ka ti ru ang reng viau nghe nghe! A nau nena an pindan lamah ka phei a, pindan kawngka ka hawn ruala ka thil hmuh erawh ka beisei loh lam tak a va’n ni chiang èm!

Ka thawm pakhat mah a hriat miau loh avangin kawngka lam pawh a rawn hawi eih lo va, a nu thlalak chu kengin ring fahran lo hian a be sep sep a, fam ta a nu hnena ka chanchin a sawi dan chuan ka rilru leh ngaihtuahna a tikal thui hle bawk. Thlalak mai chauh mah ni se a nu bula a thusawi zawng zawng chu dawt ni lovin a rilru dik tak vek a ni tih ka hai lo chiang hle a, chawp leh chilhin ka thinlungah inthiam lohna a rawn inmung zui nghal a, chutiang tak chuan ka fate rilru sukthlek ka lo her danglam nasa ang tih ngàihna rèng ka hre lo.

Chutah ṭap feih feih chunga ka fanuin a nu thlalak a'n be zui leh chiah phei chu inthiam lohna hlirin ka khat a ni ber tawh a, ka khawharna chauh ngaihtuaha ka fate ka lo ngaihthahna chuan nghawng ṭha lo tak a nei tih nen lam ka hre chhuak zut zut a, ka fanu awm dan chu ka en liam mai mai thei ta hauh lo bawk. A hmâ te kha chuan engtin pawh awm se ka ngâizam mai zel kha a ni a, mahse tunah erawh ka rilru puthmang chu dang tawh tak a ni.

A awm dan ka thlir reng a ni tih a rawn hriat vaih chuan eng anga ṭah chhuak pawh ni se a ṭap tawp hmak dâwn tih ka hriat chian êm avangin thawm dim ang reng tak hian ka kal sawn a, eng nge tih ber tur pawh ka hre lo. Mapuii nena kan pindan ni ṭhin, min kalsan hnua ka pindan, keimah chauha ka mutna ni ta ah chuan ka lut a, tui taka ka fapa lo la muhil bâm chu ka thlir vung vung a, insiam ṭhat ka ngâi tih ka hre chiang hle bawk.

Ka fate laka ka awm dan ngainatawm loh zet avang chuan Mapuii lung a âwi ang em tih ka ngaihtuah thleng lo thei lo va, a lung a àwi phei chu ring lo nasa tak ka ni! Ka rilru leh ngaihtuahna ka sêng thui zel a, ka fate rilru tur ka dâwn a, ka piana hnu lamah chutiang taka inthiam loh chu ka la nei ngai lo a tih theih hial àwm e.

Kei ang bawkin an nu thihna chuan thinlung nâin a siam dâwn a ni tih takngial pawh ngaihtuah chhuah nachâng hre lo khawpa pa dàwn tawi nihna ka'n hauh ta mai chu tû thiam loh mah a ni lo va, ka thiam loh hulhual záwk a ni. Ka tân inthiam chawp ngaihna a awm lo va, ka fate rilru chu ka nun dan holam tak avangin a kal pêng duai tawh tih ka hre chiang hle bawk.

Pindanah pawh chuan ka awm rei peih leh ta chuang lo va, pâwnah chhuakin zîngkâr boruak hit thianghlim har chu ka hip lut vang vang a, zîng ṭawngṭai inkhawm tura kal nu leh pa ṭhenkhatte pawh ka hmu nûal a, Sangzuala ka hmuh chinah erawh inherin in chhûng lam pan ka tum deuh nghal rawk rawk a, mahse ka hlauh ang ngeiin min rawn ko ding vat thung.

"Ti rawh.....tukin chu biak inah i zu ṭawngṭai ang hmiang?" awkâ hriat nuam ang reng tak hian a rawn ti sûam a, eng nge a chhan pawh ka hre bîk lo; hnial tumna pakhat mah ka nei miah lo a nih chu maw lè!

"Lo kal rawh le....." amah bawk chuan tih zawm leh zatin min rawn kuah kal titih zui nghal a, ka awm dan chu a lài hû a, ka kal mawl ve tawp hi a ni ber.

Biak in kan thlen aṭanga rei pawh ni lovah ṭanna kan nei zui nghal a, nuho chuan ṭawngṭai thupui an thawh liam liam a, tuk dang ang lo taka an zînga ka awm ve hlawl chu mak an ti ru tih pawh an hmêlah hai theih a ni lo va, Sangzuala ni se ka bul lawkah a ṭhu chawt kher bawk nen mî mit ka là tih ka inhre chiang khawp mai.

Mi dangho zawng zawng ṭawngṭai lâi chuan ngâwi reng hian ka meng ran a, ‘ṭawngṭai pawh ni ila Pathian hnenah eng thu nge ka thlen chuang ang’ tih mawlhin ka rilru a luah khat a, ṭawngṭaia ka rilru chhûngril pûang chhuak tur takngial pawhin ka tling zo lo a ni tih ka inhre chiang em em bawk. Amaherawhchu, ka bula ṭhu, naupan lâi aṭang tawha ka ṭhianpa, Sangzuala ṭawngṭaina chuan ka thinlung a va'n ṭhiat hnehsawh chiang si èm!

"Lalpa, engkima thuneitu i nih ang bawkin khawvel leh a chhûnga thil thleng zawng zawngte hi i remruatna vek a ni tih a hriatthiam theih nân leh a pawm thiam theih nân nangin a thinlungah hna thawk la, i lam a lo hnaih zual deuh deuh theihna turin kei ngei pawh hi hmanruaah min hmang la, a bîk takin he khawvelah hian mamawh ngawih ngawihtu a nei a ni tih a hriat fiah ngei theih nân a tân ka rawn dilsak e," tia Sangzuala a ṭawngṭai dap dap lâi chuan ka tho thut a, zep thu a cheng lo, ka inchhir hluah hluah lutuk chu awm ngaihna ka hre thlawt lo a ni.

Biak in chhûng aṭang chuan eng thil dang mah ngaihtuah ikhaw tawh lovin ka chhuak thuai a, hmanhmawh fahran hian kan in lam ka pan vut vut a, ka tâna Sangzuala ṭawngṭaina kha ka bêngah a châm zui reng a, Mapuii thihna ka tuar lutuk a leiah ka awm dan dik lohzia leh pawi ka khawih thuizia sawi chhuak rawt rawt lo mah se a ṭawngṭaina khan chiang takin keimah leh keimah min inhmuh chhuahtîr ka ti lo thei lo.

In ka thleng chu pindanah ka lut tlang nghal a, tui taka muhil ka fapa hmâah chuan ka ṭhingṭhi rawp a, inthiam lohna leh inchhirnaa khat ka thinlung chu a rum vawng vawng a, ka kianga awm thlahlel tawh lo khawpin an rilru ka lo hliam thuk hman ang tih mawlh ka hlau a, chutiang thil chu a thleng a nih ngat chuan engtikah mah keimah leh keimah ka inngaidam thei tawh lo ang.

Thinlung inchhir lutuk avanga ka mittui rawn tling ṭiam ṭiam chu rei pawh nghah ngâi lovin ka biangah a baw zawih a, hmui khur dat dat hian ka thaw chhuak deuh halh a, dimdawi leh tih nàt hlau takin ka fapa kut chu ka hum a, châwi kang riai riaiin ka fawp zui vang vang a, chutia a kut ka fawh lâi vek chuan a rawn meng deuh diar diar a, mak a ti tih pawh a hriat hle.

"Engati nge i ṭah a pa…?" tho phang aw zet hian a rawn ti thâm chial a, kei erawh ka lo thaw chhuak hap thung.

"Ka ṭap hleinem....." tiin ka nui lui suk a, mahse dáwt ka sawi tih chu ani ang naupang tân pawh hai rual a ni lo.

"I ṭap alawm pa.....i mittui pawh a tlák khâ.....?" tih leh inbeng kan a rual a, a harh pangngai diam tawh bawk nen min en chik sawt ta khawp mai.

"I bân a nâ em ni pa....? A û ka va ko ang aw.....?" ka ngàwih reng avang chuan a rawn ti leh zung zung a, khum aṭanga chhuk zui nghal mai a tum a, mahse ka lo dang vat thung.

"Ka bân a nâ lo....." ti thum hniam ruihin ka fapa chu ka âwmah ka kuah bet hle hle a, khumah chuan ka tluk zàlpui zawm zat bawk.

"I dam lo a ang ê......" a thiam ang táwkin min ngaihtuah ve a ni tih hriat taka a rawn tih leh chuan lungchhe ru zet hian ka nui nghawr dat a, chhàn pawh ka tum tawh lo.

"Pa.....?" ti leh halh reuhin ka lû chu a rawn khawih a, ka lo kuah nghet mah mah nge ni, a ṭang deuh ṭungin ka hria.

"Immm......" ka ti thum chhal a, kan inmelh hnai thawkhat bawk nen kan hmai chu a insi lo chauh a ni ber.

"I awm dan hi a mak ê......" a hmêl aṭang ringawt pawh chuan mak a tihzia hai theih a ni mawlh lo.

"Ka tipalh....." ti hniam supin a chalah ka fawp vang vang a, kha leh chen pa nihna leh chanvo pawh hlen mang hlei lova hringnun ka lo hmang ral kha àtthlak ka ti hnuhnawh hluah hluah a, ka inthiam lo tak zet a ni tih hrethiam se ka ti ngawih ngawih bawk.

A chala fawh chu duh táwk mai lovin a biangah te chuan ka fawp den den ta zel a, ka awm dan chu mak a ti ngàng a ni ang, ngâwi rengin min en tawp ringawt! Hmangaih taka ka kuah beh hle hle leh tâk hnuah erawh ani pawh chuan nghet zet hian min rawn kuah lèt ve vat reuh a, mu zàngthalin ka chungah ka bawh muttîr zawm zat a, engmah sawi tawh lovin a hnung chu ka chûl hliau hliau a, rei lo tê hnuah a muhil ve leh mai bawk.

Ka rilruin Mapuii hnenah ngaihdam ka dil mawlh mawlh a, Pathian lakah pawh chutiang em ema rilru inphah hniam chuan ka la awm ngai lo a tih theih hial ang. Sangzuala ṭawngṭaina khan awlsam têin ka thinlung a fan chhuak vek a, kei pa làk tlàk loh zet hi ka fate'n min lo mamawh tak zet a ni tih ka hriat chhuah phah nghe nghe kha a ni a, engkim, zîng ṭawngṭai inkhawmnaa ka kal ve ngawt dan chen khan Pathian remruat vek a ni tih ka hre chiang ta hle bawk.

Ka fapa chu tihharh hlau takin ka mut ṭhattîr a, a û nena an pindan lamah ka pheisan a, an pindan ka va lut chu ka fanu, a nu thlalak keng chunga lo muhil siai siai chu ka hmu nghal zat a, kal hnaihin a hmêl chu ngunthluk fê hian ka thlir dauh dauh a, hai rual lovin a ṭap muhil a ni tih pawh a hriat khawp mai. A sam hnawk deuh niah chu hui kiansakin a bêngah ka zep a, tawi tê hian ka nui suk a, chutih rual chuan ka lo khawsak ṭhin dan avang khan engkim ka siam ṭha thei tawh lo ang tih ka hlau ru em em thung.

Pindan aṭanga ka chhuak fel chiah chu kawng dawm meuh hian ka thaw chhuak ham ham a, chutih lâi vek chuan an pindan aṭangin ka nu a rawn chhuak a, chutiang huna min hmu teh hlawl chu mak a tih hmèl hle bawk. In chung zâwlah chhovin zîng nî chhuak èng mâwi tak chu ka thlir a, kha leh chen thimin a lo bawh beh tawh ka hringnun chu a rawn chhun èng siar siar a, beisei phak bakin ka rilru puthmang leh sukthlek a danglam nghal vek a ni ber e.

Chumi tuk vek chuan ka fate school kal tur ka thlah thlap nghe nghe a, ka chet dan vel chu an tân thil thar a ni tih ka hai bîk lo va, min mamawh lâi leh min thlakhlelh lâia uap lúm nachâng pawh hre lo pa â ang kha chu nih leh ka tum tawh lo hulhual a, vawi leh khatah an rilru thlakin min ngaihdan nen lam thlak nghal diak thei lo mah ila a tahtawl tê téa ṭan làk ka ngâi tih erawh ka hre chiang hle thung.

A tua te mai pawh chuan ka awm dan leh ka chet dan hrim hrim chu mak an ti em em vek a, muangchânga hun khawhral thei ka ni tawh lo tih ka inhre chiang bawk nen ka ri zung zung a ni hawt a, ka thawhna school principal pu Hmuaka pawh be felin ka thawh theih hun tur thleng chuan ka hrilh fai ta vek nghe nghe a, hna bânsan hial tum tawh, chuti teh thuta ka thawh zawm theih tur thu ka'n hrilh leh si chu a lawm rualin mak a lo ti ve khawp mai.

‘Nu....apa awm dan hi a mak tawh lutuk, a hmâ ai khan a nèlawm loh lehzual asin, chuvangin lo tho leh mai rawh, khawngaihin lo tho leh hram rawh, Kimkima nen kan ngâi lutuk che…’ tia ka fanuin ṭap chunga a nu thlalak a biak mawlh mawlh lâi kha ka thinlungah a riak reng a, chu tak chu ka khawsak dan siam ṭhat ka duhna chhan lian ber pakhat a ni te pawh ti ila a sual àwm lo e.

A nî telin ka nun dan ka thlak danglam chho a, ka nu phei chuan mak tih avangin zawhna min zàwt leh ngawt ṭhin a, ka pa erawhin engmah a sawi ngai lo va, mahse a lawm tih ka hmu thiam vek thung. Tin, Ruattluanga lampang pawh ka pa kuta ka dah vek avangin engmah ka ngaihtuah zui tawh lo va, mahse ka pa'n FIR a theh lut miau a, jail a tàn ngei erawh ka ring bur!

Hun leh nî a liam a, ka fateah hmâsawnna hmu tam rih lo mah ila beidawng thei ka ni lo tih ka inhriatna chuan min tiṭang sauh sauh a, Mapuii dam lâia ka nihna chelh hrang hrang, khawtlânga ka inhnamhnawihnate chu zah pawh dâwn lovin ka phâ fai vek a, zah dâwn thei dinhmunah ka ding tawh lo a ni záwk mah a, ka rilrua lian ber leh ka ngaih pawimawh ber chu ka fate an ni a, Mapuii dam lâi ang khan pa mamawhphurhna hlen lovin ka nung leh ang tih mawlh ka hlau tawh a ni.

Nî thar rawn inher chhuak apiang chuan ka nunah bung thar min kâipui a, zirtirtu hna ka thawk leh ta bawk nen nitin school lamah hun ka hmang ziah a, mahse a hmâ angin school bànah erawh tuition ka pe tawh ngai lo thung. A hmâte kha chuan school-a thawh kha ka duh táwk mai lo va, school bànah tuition ka pe kawi leh ṭhin kha a ni a, khang avangte khan ka nupui fanaute kiangah hun ka hmang tam ngai lo tih rèng kha ka hrethiam pha hauh si lo.

Nimahsela, tunah erawh ka rilru puthmang danglamin ka harh chhuak tawh a, min mamawhna apiangah chuan an tan awm zel ka tum bur a, chu chu ka mawhphurhna leh ka chanvo pawh a ni rèng bawk. Tin, khawtlânga inhman tam âiin kohhran lam ka bel tam ta záwk a, Pathian hnenah pawh chakna dilin ka ṭawngṭai fô va, Mapuiin min kalsan tirha ka lo dem chîam ṭhin te kha tunah chuan ka inchhir hnuhnawh em em tawh bawk.

"Khaw'nge i kal dâwn?" ka fanu chhuak tur chu ka ṭhutna aṭanga tho hluai hian ka bia a, mi a rawn en zawk nghe nghe!

"Pa Sangzuala thil ka va zàwt leh lawk....." tia kal zui nghal mai a tum chu ka ko ding chat a, mak a tih hmél viau bawk.

"Lo kal rawh, keima'n ka lo zirtîr ang che," dam thluama ka tih chuan a meng phawk lehzual a, ka che deuh nghal zung zung bawk nen tih ngaihna a hriat loh hmèl hle.

A lehkhabu chu ka láksak a, kuah kal titih hian a nau nena lehkha an zir dunna ṭhin dawhkan lam ka panpui a, an naupan tak tak lâi tih loh kha chu lehkha ka zirpui ngai mang lo a tih theih a, chutia tlai khawhnua ka han ngaihven thar leh thut chu anmahni mai ni lo, ka tân tak pawh a awlai bîk chuang hauh lo. Amaherawhchu, keima'n hmâ ka là a nih loh chuan thil pawi tak a thleng ngei dâwn tih ka hre chiang viau bawk si a ni.

Ka fanu nena lehkha kan han inzirtîr chu keimah záwk ka khawr deuh ṭut a, mathematics-ah ngat phei chuan mite fak rawn ka hlawh ve a, kum tam hnua ka fanu ka'n zirtîr leh erawh zirtîr lohna chin rei tawh tih takah zirtirtu hna thawk tir ang mai hian ka awm a, mahse ngai kan awh chho ve leh mai ka ring tlat thung.

A chhan chu Pathian hnenah pawh kei leh ka fate inkâr ṭhat bak dil ka nei ngai mang lo a ni ber a, ani Pathian chuan ka dilna leh ka ngenna min ngaihthlaksak tih ka hai lo va, ka fate nena kan inkâr a ṭhat theih nân ka beih ṭang ṭang a ngâi tih ka hriat tluk zetin min pui ngei dâwn tih ka hre chiang hle bawk.

"I hrethiam em?" tiin ka fanu chu ka be sup a, min buk khum nghat a, en erawh min en lo hrim hrim thung.

"I hrethiam tak tak maw….? I hriatthiam loh chuan ka sawi ṭha leh ang, a ṭha em?" ka ti dam leh dap dap a, kan awm dan chu a ngaihṭhatthlak tak zet a ni.

"Immm.....ka hrethiam alawm....." a rawn ti felfai thlap a, a ṭawng dan chen chuan a nu a chhun ka ti lo thei lo.

"A nih chuan tih dik loh hlau miah lovin han chawk ve chhin teh le," ka ti leh a, ngâwi reng hian a chawk zui nghal mial mial a, a sawi ang ngeiin a lo thiam tak tak bawk.

Chumi zan chu zan danglam, zan chhinchhiah tlâk tak a ni a, mut hmun thlengin ka fanu nena kan hun hman dun dan chuan ka rilru a luah veng veng a, hmâ ka sawn chho bek bek tih hriat ringawt pawh chu ka tân chuan thil lawmawm tak zawng a va ni chiang èm!

Zîng khua a lo vâr a, ka harh rual chuan min kuah chiala muhil thaw ri sak sak ka fapa chal chu hmangaih leh duat tak hian ka fawp vang vang a, naupang rilru thianghlim tih takah a bula hun ka hman tam tâk aṭang khan kan mu dun zantin ta ziah a, nèl pawh min nêl thar sawt viau a, mahse a û záwk erawh a la harsa ṭalh ṭalh rih khawp mai.

"Thingpui i duh ve nghal dâwn em?" chokaa tui ka in khawlh khawlh lâi chuan ka nuin a rawn ti nêm diai a, pindan aṭanga ka chhuah khan a lo tho diam tawh a, ka pa erawh a hmêl ka hmuh loh danah a la mu ni ngei tur a ni.

"Immm....duh ang," ka ti pangngai dap a, tunlâi chu ka khawsak danah a lung a âwi thawkhat bawk a, hmêl hlim a pû deuh reng ni maiin ka hria.

"Tuition hi pek i tum ta miah lo em ni?" thingpui chawk ri rak rak pah hian a rawn ti leh a, min melh zui zeuh bawk.

"Tum tawh lo," ka tih chuan chiang ang reng takin min rawn en nawn leh ngat a, ka chhànna dan chu a beisei loh lam tak a ni tih a hriat hle.

"Engati nge?" a rawn tih leh chuan ka ngâwi deuh run a, ka chhâng lawk lo nghe nghe!

"Ka fate kiangah hun ka hman tam loh phah leh ang tih ka hlau," ka ti thum dam dap a, a thingpui chawh lâi tawp meuhin min en vang vang tih ka hre ru reng bawk.

"Thutlukna dik tak i siam a ni Zoher…." ngaih ṭha aw taka a rawn ṭawng chhuah chuan a lam ka hawi lo thei ta bîk lo.

"Kha le......!" amah vek chuan tih zawm lehin thingpui chu min pe zui zat a, ka lo là ve nghal mai bawk.

Chumi tuk chuan ka fate chu an school thleng ka thlah ve ve leh thlap a, mahse ka ngaih tiṭha lo thil eng emaw ka tawng ta tlat mai. Ka fanu ka thlah zo, an school lam pana a kal liam tur ka thlir zui dauh dauh lâi chuan naupang pakhat, a kum rualpui àwm mi vel leh a classmate ni ngei tur hian ka fanu chu nêl tih hriat fahranin a kuah bawrh bawrh a, in lam pana ka tlan haw hnu thleng paw'n ka ngaihtuah zui rauh rauh a, mena thlaka ngaihzam mai pawh ka tum nasa; mahse, ka thei tlat lo!

Nilêngin ka awm a nawm loh phah hial a, ka rilruah a châm reng a, eng dang vang a ni lo, tunah class 10 zirlâi chauh a la ni a, ngaihzâwng a lo nei ru reng ang tih mawlh chu ka hlau a ni. A thu hrimah ngaihzâwng nei rual pawh a la ni lo, neih lah a hun hek lo. Anni ang tân chuan ṭha taka lehkha zir a finthlak ber a, lehkha zir bak an rilruah awm rih lo se a ṭha berin ka hre bawk.

A school rawn bâng te chu ka lo chìk ru ngar ngar hle a, eng nge a chhan pawh ka hre lo, ka lakah thil zep ruk nei angin ka hre tlat leh ta nghal a, ka awm dan chu ka nu leh pate erawhin an hrethiam bau lo thung. An pindana a luh hnu chuan ka zui lut ve nghal a, ni dangah ka zui lut ngai der bawk si lo nen chutia ka zui lut ngawt chu mak pawh a lo ti khawp mai.

"Tunah hian ngaihzâwng i nei em?" ka ti nghal tawl a, ka ṭawngkam chu a chhumbung hmek hmuk viau bawk.

"Maw.....?" mak tih hmèl taka mi en chung hian a rawn ti awn diai a, ka zawhna chuan a ṭhawng ve hle ni ngei tur a ni.

"Ngaihzâwng i nei em?" ka ti nawn leh ngat a, ka din hnaih salh a, ani erawhin min chhoh melh ran thung.

"Nei lo," lungàwi loh hmèl fahrana a rawn tih chuan ka lo rum nghut a, a thusawi chu awihna pakhatmah ka nei lo hrim hrim bawk.

"A nih chuan tukina i inkuahtîr naupang kha tu nge?" ka ti leh hmuk a, ka aw chu ka thunun hman tawh lo a ni ber.

"Ka nunah lo buai suh!" a rawn ti vin hlar reuh a, chu chuan ka thin a khei nghal zak nghe nghe!

"Enga!?" tih leh a dar tawn tawna chelh ka rual a, ka chhûngril lam chu a sô nghal bulh bulh bawk.

"Min ngaihtuah ang deuhin awm tum suh, min ngaihtuah tak tak chuang lo, ka nuna inrawlh tur pawhin ka duh bawk lo che…..!" a rawn ti leh hraih hraih a, ka insum theihna ka hloh chiang khawp mai.

"LALTHANZÀM!" ti vin hrawkin ka thing zui nghal nawk a, ka chelhna ata tal chhuah a tum rual chuan a dar chu ka hmer nghet zual a, mittui tling pam hian min melh chho ran a, a hmêl aṭang chuan a thin a rim tih pawh a hriat hle.

"Min thlah rawh!" tia au chhuak tuarhin tal pit a tum leh a, a mittui chu a biangah a lûang thla nghal zawih bawk.

"Engati vak vak nge?" rawn ti deuh lang langtu chu ka nu a ni a, ka pa leh Kimkima chenin pindan chhûngah chuan an rawn lut thuai hlawm a, kan boruak erawh an hriatthiam loh hmél hle thung.

"Sawi rawh….! Kha naupang kha tu nge!?" ka aw chu a dam lo leh pek hle a, ka ngaihtuahna a kal ding luatah ka nu leh pate mitmei pawh ka veng zo lo a ni ber e.

"Eng nge i hriat a ṭulna…!? I tân a pawimawh em ni? Min zàwt tawh suh, min thlah vat bawk rawh!" rawn ti tawn tawnin tal chhuah a tum leh a, mahse ka vawnna chu thlah ka tum der chuang lo.

"I zak lo pang pang hle mai LALTHANZÀM!" ka ṭawng ring hran lo náin ka aw erawh a khauh ṭha hmuk hmuk hle thung.

"Ṭha takin min hrilh mai rawh!" ka tih zawm leh hmuk a, ka chelhna chu nâ a ti tih ka hriat chhuah deuh thut avangin ka inthlah dul rial rial nghal bawk.

"Ka hrilh vek tawh che, anite kha chu ka ṭhianpa bak a ni lo. Ka sawi a, i awih chuang hleinem!" men pur chung hian a rawn ti zuah zuah a, kei erawh ka ngâwi ta reng!

"Eng nge in buaina hi ni reng reng a?" ka nu'n a rawn tih chuan ka chelhna ata tal chhuak thuaiin ka fanu chu a pi lamah a tlan phei a, kan awm dan leh inbiak dan engkim chu a hrilh vek a, rilru nâ tih hriat ngawih ngawih hian a ṭap zui hawm hawm bawk.

"Min ngaihsak ang takin i lang a, mahse min ngaihsak ngai reng reng lo. Nang chuan i hna chauh i ngaihtuah, chu bak ngaihtuah i nei lo, i bula thil sawi ve paw'n i theihnghilh zel tho. Chuvangin min ngaihven lo law law la, mi dangte hmuhah fel em em la, mite fak rawn luai luai hlawh turin i hna thawk leh tawp záwk rawh!" a pi ṭânga bei chungin ka fanu chuan a rawn ti leh hlawp hlawp a, ka rilru chu kal thui vawng vawng tak a ni.

"Khatiang khan i pa be suh!" tiin ka pa chuan a lo khap thuai a, mahse engkim a nih tur ang a ni zo vek tawh; ka rilruah chuan inthiam lohna tih loh thil dang a awm thei tawh lo!

Inngaihtuah muk zet hian pindan aṭang chuan ka pen chhuak deuh chhut chhut a, kan pindan lamah ka phei a, ka fanu ṭawngkam zawng zawng chu ka thinlungah a ri nawn tluk tluk a, ka ngaihtuah chian pôh leh sawi dik loh a nei lo tih ka hre chiang tulh tulh a, thil holam taka thinrimna tur ka zàwn avangin ka lo beih ve ṭang ṭangna te kha engmah lo maiah a chang zo ni maiin ka hria.

Khum bul chhuatah chuan ka ṭhu thla deuh hnawk a, ka ke pakhat záwk chu ka thluang duai a, lehlam erawh ka tawm thung a, ka khupah chuan ka bân ka kham zawi hnuang a, ka lo khawsak ṭhin dan dik loh rah ka seng mêk a ni tih chu ka thinlungah a inthum nawn tluk tluk a, tûmah dem thei pawh ka ni lo, a chhan chu ka thiam loh a nih fai vek vang a ni.

Ni e, a dik chiah alawm, engkimah ka thiam lo hulhual a, bûrbun tur pawh zawng chiam mah ila keimah bak an awm chuang lo. Min mamawh lâi te khan an kiangah ka awm ngai lo hrim hrim a, lehkha an zìr paw'n ka zirpui tam ngai lo va, hna lam ngawr ngawr ka ngaihtuah ṭhin a, ina hun hmang tam hman lo khawpa khawtlânga ka inhman tam ṭhinna te kha chhûngkaw tâna thil ṭangkai a lo ni teh lûa lo va, mite fak leh fel tih te chu hlawh ṭhin mah ila engmah a lo ni tak tak hauh si lo, min mamawhna leh min thlakhlelhna pawh hrethiam lék lova ka nupui fanaute ka lo uap lùm ngai lo kha tunah zet zawng ka va'n inchhir vawng vawng tak èm!

Ka mit chu ka chhîng riai riai a, Pathian hnenah ṭawngṭaiin ngaihdam ka dil mawlh mawlh a, ka hmangaih Mapuii lakah nen ngaihdam ka dil bâng lo va, ka hun tawn mêkah chuan Pathian dem tumna pawh ka nei chuang lo, a chhan chu tû thiam loh nge tih ka hre chiang êm a ni. Chutia thinlung inchhira ka ṭhut ngàwih vung vung lâi chuan ka kut chu kut dangin a rawn vuan zal zal a, ka mit ka men ruala ka mi hmuh chu ka fanu ngei a ni a, mak ka ti ru ang reng viau bawk.

"Ka tihpalh....." a rawn ti thâm ṭiak a, kâr lovah a mittui chu a rawn tling zui ṭiam ṭiam a, kei erawh sawi mai tur hre lovin ka lo ngâwi reng thung.

"Ka tihpalh pa.....min ngaidam rawh....." lungchhe aw zeta a rawn tih leh chuan ka taksa chhûng lam chu chawp leh chilhin a lúm pup pup a, amah záwkin ngampa fahran lova min rawn kuah leh chiah phei chu awm ngaihna rèng ka hre lo a ni ber.

"Ni lo, ngaihdam min dil a ngâi reng reng lo," ti thum dam dapin ka fanu chu ka kuah vawng vawng a, uar taka a rawn ṭah ruah ruah tâk chinah phei chuan ka kuah nghet lehzual a, ka hmangaihzia chu hrethiam hram se ka ti tak zet bawk.

"Engkim hi ka thiam loh vek a ni tih ka hria alawm, fate pawh ngaihsak ngai lo pa mawl tak min neih avang hian min ngaidam záwk lûl teh u!" ti hniam ruihin a chal chu ka fawp vang vang a, ka taksa chhûnga pawm luh vek tum ang mai hian ka kuah nawn leh ṭhin a, patling mah ni ila ka mittui te chu dan tumna reng ka nei lo hrim hrim!

"Pa.....?" kawngka bula lo ding reng Kimkima lam chu mittui nen ka hawi ruai a, pindan chhûng a lo luh rualin kan awmna lamah a rawn tlan phei a, engmah sawi lo hian min rawn kuah ve nghal thlawp bawk.

Ka fate pahnih chu hmangaih leh duat takin ka taksaah ka kuah bei hle hle a, ka nunah an ni tluka pawimawh an awm lo va, Mapuii tel ve thei tawh lo mah se ṭha takin ka la enkawl thei a ni tih chu keimahah a rawn fiah thar em em a, hun kal tawha ka lo khawsak ṭhin dan ang ngawta pa mawhphurhna hlen zo lo, pa satliah leh pa nèlawm loh ang mai mai khan ka nung leh ang tih mawlh ka hlau tawh a ni.

Hringnunah hian chauh châng te, lungngàih châng te leh baihvai taka awm châng te kan tawng fô va, vanduai bîk leh chan chhe bîkah inngâiin puhmawh tur kan zawng ruai a, sawiselbo Pathian hial kan dem rum rum ṭhin. Nimahsela, engkima thuneitu leh remruattu kan Pathian chuan kan tâna ṭha tur ngaihtuahin kawngkapui khar ṭhin mah se ka tâna ṭha tur vekin tukverh min hawnsak záwk ṭhin hi a lo ni a, chumi hrethiam tur chuan kawng bumboh zawh a ngàih chângte pawh a awm a; mahse, a tawpah erawh a rêl sual ngai lo tih amah vekin thil tih hmangin a rawn nemnghet leh nge nge ṭhin thung.

A tawp ta