𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟏𝟕]

SALMON

By

Havali Adam

Bung 17-na

In ka thleng chu ka pi leh ka puin Mâmtea chanchin min lo zàwt a, nî Mâwipuii erawh a chhuak a ni ang, ka hmu miah lo. Ka intifai a, khumah ka mu meng ran a, ka mitthlâah Salmon-a a rawn lang a, Mâmtea a fapa a ni tih a hrechhuak tawh bawk si a, eng thil nge ka hmâchhawn dâwn ka ngaihruat thiam lo a ni.

Mâmtea ngaihtuah ran chungin ka mu meng kar a, zan a rei zel a, ka ngaihtuahna a kal ding telh telh a, thil chi hrang hrang ka ngaihtuah kual chíam a, Salmon-a leh Mâmtean ka rilru an inluah chhawk a, buaina leh harsatna dangin min tlakbuak leh ang tih mawlh ka hlau!

Zîngkâr hmâ takah ka harh a, ka mu ṭha lo bawk nen ka nguai deuh bui a, ei rawng ka bâwl laiin ka pi a lo tho chhuak a, min be siam siam a, Mâmtea a khawngaih thu pawh a sawi lûam a, kan zavaiin Mâmtea chu kan khawngaih vek a ni ber e.

Chhunah chuan dawr pawh hawng lovin damdawi inah ka kal a, chawhnu dâr 2 veleh Mâmtea a rawn harh a, nung dama ka fapa ka hmu chiah chu ka mittui ka dang hman lo a, tihnàt hlau tak si hian ka kuah a, ani erawhin thil awm dan a hrethiam lo hle thung.

"Anu, khawiah nge ka awm a?" a ti ban chap a, "Damdawi in a nih hi Bawihte, i dam lo a, mahse hlauthawng miah suh aw," ka lo ti thuai a, ka bianga mittui la châmbâng chu ka túai hul zui nghal thuak thuak bawk.

"Apu.....?" mak ti tih hriat tak hian ka pa a hmuh a rual chuan a ti leh a, ka pa chuan a lo hnaih thuai a, ka nu pawh a ding hle hle thei bîk lo.

"Ngati nge ka lû hi apu?" Mâmtea chuan a ti leh a, ka pa chuan, "I tlu palh a, a dam vat vat theih nân tuam a ngai a," a lo ti mai a, Mâmtea chuan mitmeng fiah kala en pah hian, "School-ah pawh ka tlu a, ka ṭap a, mahse ka ṭap zel duh miah lo, pà min ti em?" a ti leh sát sàt reuh a, a rawn harhna a la rei loh tehreng nen dam ṭha var ang maia a awm chu mak ka ti a, ka lawm tho bawk si!

A pi leh a pute nen chuan an inkawm zui ta reng a, Mâmtea chanchin chu in lam ka hriattîr a, chutih lâi vek chuan Zodini hnen aṭangin phone call ka dawng a, a message pakhatmah ka view loh avangin a rawn vui a, acdident kan tawh hnu aṭang khan pangngaiin phone ka la khawih mumal lo tih ka hrechhuak nghal bawk.

Accident kan tawh chungchang ka hrilh chuan min ngaihtuah hle a, Mâmtea dinhmun a hre chiah phei chu mi ngaihtuah zual tak a ni. Amaherawhchu, Mâmtea pawh a rawn harh tawh a, tunah chuan a hmâa ka hlauhthawnna leh mangannate kha a kiam duak tawh a ni ber.

Zodini nena kan inbiak zawh hnu chuan Mâmtea awmna lamah ka phei a, a rawn harh huna eitur ka kensak chu ka eitîr a, thil ei pahin a pû nen a inbe melh melh a, a tân chuan a pu hi chu a hlu ve chiang a ni.

Dârkar a liam a, Mâmtea chu a muhil a, ka nu leh pate chuan Aizawl chhuk zâi an rêl a, hna lamah ka pa a ṭul tawh bawk nen ka chelh tlat duh bîk lo a, mahse Mâmtea lo harh leh hun tur ka huphurh ru khawp mai.

Ka pate an tlan liam hnu chuan keimahin ka awmpui a, tlai hna bàn hun àwm velah nî Mâwipuii a lo kal a, chumi hnu lawkah Awitei leh Thianga an lo lang zui zat bawk a, Awitein Mâmtea a rawn harh tawh tih a hriat chuan lawmawm a ti hle a, a awm pawh a nuam ta huaiin ka hria.

Khua a thim a, Awitei leh Thiangate an haw a, nî Mâwipuii pawh Mâmtea nena kan eitur là turin in lamah a haw a, chutia mahnia ka ṭhut hle hle lai chuan Mâmpuia a rawn harh a, ka rin láwk ang chiahin a pu a zawng nghal a, Aizawla a pi leh pute an chhuk tawh thu a hriatthiam tur táwka ka hrilh chuan a lungâwi lo hle.

Kawngka inhawng ri rak lam chu ka hawi a, nî Mâwipuii a nih ka ring a, mahse a ni hauh lo, Salmon-a záwk a ni. Ngâwi reng hian kan awmna lamah a lo phei a, Mâmtea a harh tih a hmuh rual chuan a hmêl lan dan a danglam a, mahse engmah a sawi chuang lo.

"Nu, ngati nge apu kha a kal daih, lo kaltír leh rawh," ngui bái hian Mâmtea chuan a ti a, "A pi leh a pute kha an buai rih a, nakinah an hman veleh an lo kal leh dâwn alawm," tiin ka hrilhfiah leh ta nge nge a, mahse a lung a àwi phah chuang reng reng lo, a ṭap mai dâwnin ka hria.

"Nu, apu bulah ka awm duh," ti ṭiauin Mâmpuia chu a men pur a, tih ngaihna hre lovin ka thaw halh ringawt!

"Ṭap suh le, mipa an ṭap ngai hleinem," ti dam daptu Salmon-a chu ka melh tlawk tlawk a, Mâmtea a ṭhut hnaih zui zat bawk.

"Nu....?" Mâmtea mitmenga zawhna chu ka chhiar thiam a, fimkhur thil thu ah tiin hmêlhriat loh inbiaktîr ka phal lutuk ṭhin lo a, chutia a mi hmuh ngai lovin a bia chu mak a ti ni ngei tur a ni.

"A hlauhawm loh," ka tih chuan Salmon-a chu a melh ral a, a pa a ni tih rèng a hre der si lo.

"I lû hi a nâ em?" Salmon-a chuan a ti hniam leh dap a, Mâmtea chuan a lû a lo thing a, a en chiang hle bawk.

"I hmaiah hmul a va'n tam em em," Mâmtea ṭawngkam avang chuan Salmon-a chu a nui thum dut a, a nui ri ka hriat lohna chin pawh a rei ta hle mai.

"Apu tak tak chuan a nei ve miah lo," Mâmtea bawk chuan a ti leh reuh a, Mâmtea kut vuanin Salmon-a chuan a ṭhut hnaih sauh a, an che vel chu ka lo thlir reng ringawt!

"I fel hle mai," ti supin Salmon-a chuan Mâmtea kut chu a là kang a, a fawp vang vang a, a chet dan chu ka beisei loh dan hlir a ni.

"Tinge i hmaiah hmul a awm ṭeuh a," Salmon-a hmuihmul vel chu Mâmtea rilru luahtu a ni ta tlat mai.

"I nei ve châk èm," dam dap si hian Salmon-a chuan a ti hniam chhal a, hmân ang bawk khan awlsam téa zawhna pehhel dan pawh a lo la thiam reng e!

"Aih.....apu tak tak paw'n a nei lo," Mâmtea chhàn dan avang chuan Salmon-a chu a nui thum leh dut a, engnge ka chungah thleng ta ka hre lo, an awm dan chuan ka awm a tinuam ru huai huai ni mai hian ka hria.

"A nih, apu tak tak chuan a duat che em," Salmon-a chu ka en reng a, thil ṭul lo a zàwt kâi ang tih hlauhnain ka khat chawpchilh nghal!

"Duat lutuk, apu tak tak i hmu tawh mi," Mâmtea chuan a melh kal reuh a, pafa inang tak zawng an ni chiang a ni.

"Hmu tawh e," Salmon-a chuan a ti mai a, Mâmtea záwkin sawi tur dang a nei leh ta tlat!

"A duat che em, kei chu min duat lutuk, ka birthday-ah te thil min lei ṭhin," a ti ta niah niah reuh a, pafa an ni a, an inbiaknaah chuan inrawlh buai ka tum lo law law!

"A nih chuan i birthday-ah engnge ka lei ang che," Salmon-a chuan a ti a, thu danga a pakâi chu ka awm a nuam huai a, Mâmtea erawhin mak a tih hmèl hle.

"Thil min lei dâwn maw," a ti hau a, naupang ṭawng duh leh harhvang a ni tih hi chu hriat sa a ni a, mahse an vawikhat inhmuhnaa chutianga a awm chu ka beisei miah lo.

"I duh duh a ni mai," chìk tak hian Salmon-a chuan a fapa chu a en dauh dauh a, Mâmtea erawhin, "Aih, anu'n hmêlhriat loh thil inleitîr a phal lo," a lo ti daih thung.

Muangchang hian Salmon-a chuan ka lam a rawn hawi a, ka lakah a lungni lo tih a mitmeng aṭangin chiang takin ka hria a, Mâmtea awm lo se chu min demna awkâ ka hriat ngei pawh ka ring.

"A hlauhawm loh ka tih tawh kha Mâmte, misual a ni lo," ka ti ve leh ta nge nge a, an titinaa inrawlh duh lo viau mah ila, inrawlh lo thei dinhmunah ka ding tlat lo a tin a ni!

"Nu, ka ril a ṭam," Mâmtea chuan a rawn ti a, "Anî Mâwipui a lo kal mêk a, a lo thleng ṭep tawh ang, lo nghak lawk ang aw," ka ti thuai a, chutih lâi vek chuan Salmon-a chu a lo rum deuh nghut a, min en chiang hle bawk.

Salmon-a chuan Mâmtea kut chu a fawp leh vang vang a, ngâwi reng hian a chhuak zui nul nul a, khaw'nge a kal dâwn ka hre lo, a awm lo chiah chu ka thaw a veng huaiin ka hria.

Mâmtea lû chu dawmin ka be sep sep a, chutih lâi tak chuan eitur kengin Salmon-a a lo lut a, ka awm dan ka tidanglam a, Salmon-a erawh a hmâa a ṭhutna ngaiah tak khan a rawn ṭhu leh a, a eitur rawn lei chu a phawrh zui nghal mual mual bawk.

"Nu...hei....sausage...sausage ka hmu," Salmon-an rice a phawrh láiin Mâmtea chuan a lo ti hliai a, engtin nge chutiang leina châng chu a hriat ka hre lo.

"Sausage i ei ve duh mi," Mâmtea chuan a ti leh a, kei ni lovin Salmon-a záwk a be miau a, ka tân chuan ngâwi renga lo thlir tawp a ni mai.

"Immm....ka ei ṭhin alawm," Salmon-a chuan a ti dam thlup a, chu veleh Mâmtea chuan, "Kei paw'n ka duh lutuk, chaw eina ah ka ei ṭeuh zel," a lo ti nghal zat zat reuh a, nui nghawr dat hian Salmon-a chuan a biangah a piai a, Mâmtea rilruah erawh sausage bak a lang thei tawh lo.

"I ril a ṭam tawh si a, rice hi ei rawh le," tiin rice chu ka chawk kual tè té a, ka barh lâi te chuan a lo âng ṭha duh ngàng mai.

Kan nufa chaw ineitîr lâi chu Salmon-a chuan min thlir reng a, Mâmtea awm lo se zawng ka zàm chhe hneh khawp ang.

Kan pathuma hun kan hman lâi chuan nî Mâwipuii a lo thleng a, kan bula Salmon-a ṭhu run a hmuh rualin zawhna mitmeng hian min en nghal a, a ṭul ta a nih leh nakinah engkim ka hrilhfiah tawh mai a ni ang chu!

Nî Mâwipui chuan duat tak hian Mâmtea chu a be siam siam a, Mâmtea pawhin 'anì' a lo ti chùl a, nî Mâwipui zâwk hian innìtîr a duh miau avangin Mâmtea paw'n 'anî' a ti mai ṭhin a, mahse inkohna te hi chu engmah a lo ni lo, inngainatna te, inhmangaihnate hi a ni pawimawh záwk chu!

Salmon-a leh Mâmtea inkawm thawm chu kan ngaithla deuh tawp a, nî Mâwipuii chuan zawhna mitmeng hian min melh leh ralh ṭhin a, min zawh tur áwm ang pawh ka hriain ka hria.

Mâmtea a muhil a, kan boruak reh duk thlak danglam tum tih hriat tak hian nî Mâwipuii chuan a dawra thawmhnaw a lak thar nûal thu min hrilh a, a sawi dan chuan ka inhmeh tur chì leh ka hak duh tur chì thawmhnaw a awm ṭeuh a nih hmèl!

"Mâmtea i rawn ngaihven a, kan lawm hle mai, awm lo la chu tun dinhmun hi kan thleng miah lo ang," tiin nî Mâwipuii chuan Salmon-a chu a bia a, Salmon-a chuan, "Thil harsa a ni hleinem," a lo ti pangngai ve mai bawk.

"Tun lo hi hmuh tawhna che ka nei tlatin ka hria," nî Mâwipuii bawk chuan a ti leh a, "Mâmtea an zai nî khan in inhmuh kha," ka lo ti a, "Chutiang ni lovin, tun hmâin hmu tawh tlat chea hriatna ka nei," a rawn tih chuan Salmon-a nen kan inmelh chat a, rei erawh a ni lo.

"Mahse, ka hrechhuak thei rih mai lo," a ti zui zat a, Salmon-a erawhin engmah a sawi lo, ṭawng zui a tum loh hmèl viau bawk.

"Zanin chu kan pahnihin Mâmtea hi kan riahpui dâwn a nia Mimi, ka nu pawh ka hrilh tawh," nî Mâwipuiin a rawn tih leh chuan, "Keimah pawhin ka riahpui thei alawm, chu bakah Mâmtea pawh a tlangval a, ngaihtuahawm a ni tawh lo, an pahnih chauha ka pite awmtîr zawng a khawharthlak lutuk ang," ka lo ti thuai a, mahni chauh paw'n riak dâwn ila, harsatna engmah ka nei lo.

"Ka hrilh vek tawh alawm," nî Mâwipuiin a ti zo chiah tihah Salmon-a chuan, "Mimi nen hian kan lo riahpui ang," a rawn ti thum dut a, a kâ ngeia ka hming a lam ri leh chu min ṭhawng a, nî Mâwipuii nen chuan a lam kan hawi rual ṭhawt nghe nghe!

"Chuti tur màw...." nî Mâwipuii chuan a ti fân ta raih a, Salmon-a leh kei min melh tawn zak zak a, Salmon-a erawhin Mâmtea muhil hmêl ngawt a thlir thung.

"In lamah tui takin va mu záwk rawh nî, kan ngaihtuahawm loh tak tak, thil thleng a awm chuan ka lo be dâwn che a nia," ka ti ta dat dat a, nî Mâwipuii hmêlah chuan thil hriatthiam loh a nei tih a hriat hle.

"A nih, ka awm rei tawh lo mai ang," tih leh din a rual a, "Ka lo thlah ang che," tiin ka ding zui ve nghal a, min en chìk lehzual a, mak a ti deuh deuhin ka hria.

Kan inzui chhuak a, damdawi in kawt kan thleng chiah chu, "Khapa kha tu nge Mimi? Mâmtea thisen pe tu a ni tih chu ka hre ngei a, mahse thil dang a awm ti raw? Mâmtea i kalsan ngam danah te hian thil zep i nei chiang mai, a dik em?" a ti ta mawlh mawlh a, a dinhmunah chuan ding ila a rilru ang tho chu ka put ka ring.

"Nakinah engkim ka hrilh ang che nî," ka tih chuan, "Tunah min hrilh law law záwk teh, ka hre chiang duh," a lo ti thuai a, sawi ṭan dan tur hre lo zetin ka thaw chhuak hap ringawt!

"Sawi teh Mimi," a rawn ti leh a, ka ngâwi deuh vang vang a, "Mâmtea pa a nih kha," ka ti ta nge nge a, ka zep rei tawh bawk a, a hriat a hun ve ta te pawh a ni ang.

"Tak tak maw!?" a ti hluai a, mak a ti hle bawk.

"Immm....a hming chu Salmon-a a nia," ka ti leh sap a, "Khawiah emaw hmuh tawhna neia ka inhriat chhan kha ka hre ta chiah e, Mâmtea nen an inang lutuk, chuan, engati nge tun hmâ zawng khan a rawn inlan ngai miah loh?" a ti zui ta duah a, "Nakinah engkim ka hrilh ang che nî," ka tih chuan zawhna dang min zàwt zui zel tawh lo hlauh!

Kan inthlah fel hnu chuan damdawi inah ka lut a, ka fapa awmna cabin ka lut chu Salmon-an Mâmtea kut a lo chelh ran a, ka lut thawm hre mah se ka lam erawh a rawn hawi lo hrim hrim!

Rei táwk fang inbe miah lovin kan ṭhu a, sawi tur ka hre lo a, ani lahin min biak hmâsak ka ring si lo. Thawm reh ṭhiap hnuaiah chuan ka rilru ka kawm rauh rauh a, hmun khatah awm mah ila kan rilru erawh a inhlat viau ka ring.

Ka aw ka thian kharh a, "I hna lam i tluang maw?" ka ti ta nge nge a, awm dun ve ta lem a, inbe miah lova awm ngawt zawng ka thei ngàng lo a ni.

"Hrechhuak lo ta ila, min hrilh i tum tho em?" a ti hniam ruih a, Mâmtea chungchang a sawi tih ka hre chiang khawp mai.

"Dawt tel miah lovin," a ti leh a, ka mitah tak min en run bawk.

"Tum lo," ka ti sap a, "Engvangin?" a ti chang rut a, mahse a ṭawng ring hran lo.

"Fapa i nei tih hrilh tur chein ka huaisen táwk lo," tiin Mâmtea muhil hmêl chu ka thlir tlawk tlawk a, a thaw chhuak hulh a, a thin a rim a ni ngei ang.

"Mahse, amah Mâmtea erawh hi chu thil hrethiam rual a nih hunah pa a neih thu hrilh ka tum, accident kan tawh hmâ khan a pa a hmuh ngai loh thu a sawi a, school-a a thil tawn avangin pa a neih thu ka hrilh hmâ a ngaih phah a, mahse a la hriatthiam tak tak ka ring lo," ka ti leh duah a, chu chu ka rilru dik tak pawh a ni.

"Fapa ka nei tih hre tur hian dikna ka nei a, ka lak ata kum 6 chhûng ngawt i thukru bawk a, i huaisen táwk viau lo em ni?" a ti nghut nghut a, a ṭawngkamah chuan min dem tih a hriat tak zet!

"I duh dan dânin min ngâi thei ang," tih bak chhánna ka nei rih tlat lo.

Chumi hnu chuan kan inbe zui tawh lo a, naupang ṭawng thawmin min tiharh a, ka lo muhil tlang daih chu niin, dar zat ka en chuan zîng dâr 2 a la ri lo deuh a, ka âwm khuhtu kawr ka hmu chiang chiah chu Salmon-a lam ka hawi nghal a, mahse ani erawhin Mâmtea chiah a ngaihven thung.

Che miah lo hian an pafa inbia chu ka thlir reng a, Mâmtean a ngainat nghal em em chhan te chu ka ngaihtuah a, eng dang vang a ni lo, pafa an ni miau a, thisena inkungkaih an ni tlat a tin a ni!

Ka harh tih an hre lo hrim hrim a, ka âwma kawr chu zawimuang hian ka dah sawn riai riai a, Mâmtea chuan Salmon-a biang hmul chu a chûl chhin vel a, zawhna chi hrang hrang a zàwt pah reng a, dik tak chuan hmuh an nuam ngawih ngawih!

Salmon-a chuan Mâmtea zawhna apiang chu aw dam dap hian a chhâng zel a, a kut làk kansakin a fawp leh vang vang ṭhin a, Mâmtea lahin a pa biang hmul vel mawlh chu khawih nuam a ti bawk si, zawhna pawh a chhâng ṭha duh khawp mai.

"Apa tak tak kha i hmu tawh èm?" Salmon-an a ti chiah chu ka harh kawk a, ka ṭhu ngil nghal at bawk.

"Aih, anu chuan a hmu tawh, kei chuan ka la hmu lo, apa i hmu tawh mi?" Mâmtea chuan a ti zat zat a, chutiang zawhna Salmon-an a zàwt chu ṭul ka ti rih lo hle.

"Immm....hmu tawh e," Salmon-a chuan a ti dap a, chutah Mâmtea chuan, "Apu pawh i hmu tawh a, apa pawh i hmu tawh a, i hmu thei e, apa chu anu'n a hmuh theih loh a ti," a ti leh reuh a, naupang tih takah a rilrua awm ang àng chu a sawi a ni ber.

"A hmâ chuan a hmuh theih loh ṭhin a, mahse tunah chuan a hmuh theih tawh alawm," Salmon-a thusawi avang chuan a lam ka hawi lo thei lo.

"Ka hmu ve duh," Mâmtea chuan a ti chùl a, chu veleh Salmon chuan, "I hmu duh a nih chuan i dam phawt a ngai," a lo ti thuai a, ka inrawlh ngai lovin thil dang a sawipui zui daih a, ka harh tih an hre ta lo law law bawk.

Tunlâi ka mu ṭha lo nen, ka lo muhil leh daih a, mahse ka harh ruala ka thil hmuh chuan min ṭhawng tak zet!

Salmon-a chuan hnaih zeta mi awm chilh chung hian a kamis chu ka âwmah a lo khuh mêk a, kan mit a intawng chat a, ani paw'n mak a ti tho a ni ang, a che tawp hmak!

Engmah sawi lovin a kamis chu ka là kiang a, khua a vâr tawh tho bawk nen ka tho tlang ta law law a, ka tukhum a zat mer mer danah ka awm dan vel min en zui reng a nih ka ring.

"I mu miah lo em ni?" kan ngáwih deuh vang vang hnu chuan ka ti sap a, a lam pawh ka hawi chuang lo.

"Ka mu thei lo," a ti tawi tup a, a ṭawngkam chhuak erawh a pangngai viau!

"Khawi vêngah nge in awm?" a rawn tih chuan chhâng mai lovin thil dang daih ka ngaihtuah kâi a, "Ka zâwn chhuah kher i phut loh ka beisei," a ti leh a, kan vêng hming chu ka hrilh zui ve mai bawk.

"I ril a ṭam em?" a ti leh sup a, "Ṭam hran lo e," ka lo ti mai a, ngâwi reng hian a chhuak a, engnge a tih dâwn ka hre hauh lo.

Chutia a chhuah lâi chuan Mâmtea a rawn harh a, "Nu, khaw'nge nizana mi kha?" tiin zawhna min zàwt nghal a, "A chhuak lawk a," ka ti liam puat a, a lû ah dawmin a biang chu ka chûl riak riak a, "Nu, Aizawla apu tak tak a ang e, a fel ka ti," a rawn ti leh reuh a, 'i pa alawm a nih, a fel loh te'n' tih mai ka châk rum rum a ni.

"Misual a ni lo alawm," ka ti ve sap a, "Nizana mi khan apa tak tak a hmu tawh a, min hmuhtîr ve dâwn a," a tih lâi chuan zà lo zet hian ka lo nui sak ringawt!

"Mahse, ka dam phawt a ngai a, apu tak tak angin apa tak tak pawh a fel em," a ti leh malh malh reuh a, a zawhna chu pehhel ka tum deuh ùk a, mahse a hriatthiam tur táwk vela hrilh ṭhain ka hre ta záwk!

"Apa chu apu tak tak angin a fel alawm, apa chuan misual te a man ṭhin a, mi dik lo te pawh jail-ah a dah daih zel," ka ti dat dat a, "Apa chuan power a nei mi, ka hmu ve duh ê nu," a rawn tih leh chuan, "I dam phawt a ngai alawm, i dam veleh i hmu dâwn a nia," ka ti ta nge nge a, nakin lawkah a la hre dâwn tho thova ka hriat vang a ni.

"Nu, saw, nizana mi kha....." Mâmtea hawina lam chu ka hawi a, kawngka bulah Salmon-a a lo ding ngâwi reng a, a awm dan aṭang chuan Mâmtea nena kan inbiakna zawng zawng kha a lo hre vek a ang ka ti!

"Khawiah nge i kal a," Mâmtea chuan a ti hliai a, Salmon-a pawh kan awmna a rawn thleng chawpchilh nghal chu a ni mai.

"I rilṭam huna i eitur ka lei a," ti supin, "I ril a ṭam em?" a tih zawm zat a, Mâmtea chuan, "Aw, ṭam," a lo ti vat a, Salmon-a chuan min rawn melh zauh a, ka lo en lâi tak a ni bawk nen, kan ineng chiang hle.

Ka nu hnen aṭangin phone call ka dawng a, Mâmtea chanchin min záwt a, ka bula mite pahnih che vel thlir reng chungin ka nu chu ka be malh malh a, inbiak erawh kan inbe rei hran lo.

Chhunah nî Mâwipuii a lo kal a, dawt tel lovin Salmon-a nena kan inkâr engkim ka hrilh ta vek a, mak a tih rualin min khawngaih hnuhnawh hle a, mahse thudik engkim ka hrilh fai vek lo thung.

A dawrah a tlang a, tlai lama lo pen kawi a tum thu a sawi a, a kal liam hnu chuan kan pathumin kan awm leh tlawng a, Salmon-a leh Mâmtea awm dan chu mak tih loh pawh tum ila mak ka ti leh nge nge ṭhin.

A bîkin Mâmtea, kan ṭhenawmpa a ngainat harzia te kha ka la hre reng, mahse Salmon-a erawh a pa dik tak a ni miau a, awlsam taka a ngaina thei nghal mai chu a mak lehling záwk ka ti lo thei lo.

Mâmtea chuan lehkhapuanah rawng a chei a, a bulah Salmon-a a ṭhu run a, a cheipui a nih mah záwk, kei erawhin ka lo thlir leh tawp a, chu chu ka tih theih awmchhun a ni.

"Kei chu kan inang ka ti, sausage ka duh a, i duh a, colour chei ka duh a, i duh leh a, a mak ti raw...." Mâmtea chuan a ti niah niah reuh a, khi suk hian Salmon-a chuan a ṭhut hnaih a, Mâmtea biang chu fawpin a hnim deuh vang vang a, a nui hmêl te, a hlim hmêl te chu a lem a ni mawlh lo, a tak ngei a ni.

"I thil ngainat apiang chu kei paw'n ka ngaina alawm," tiin Salmon-a chuan Mâmtea bânah a chûl hauh hauh a, Mâmtea erawhin engmah a sawi tawh lo a, a thil chei lai a bih ngar a, a thla a muan hmèl hle bawk.

A mut a chhuak a nih ka ring, rei tawk fang colour an khawih hnu chuan, "Ka peih tawh lo," a ti zuai raih a, a thil ken lai chu ka lo là vat a, mut pawh a muhil zui har lo hle.

"Engtikah nge a pa ka ni tih hi hrilh i tum?" ti hniam ruihin Salmon-a chuan ka lam a lo hawi a, Mâmtea a muhil tawh bawk nen, kan boruak a dang ta zar mai.

"Remchâng hmâsa berah," ka ti sap a, chu chu ka tum dan dik tak pawh a ni.

"A dam chian hunah chuan ka hlata awmtîr ka remti tawh lo," nghet dap hian a ti thum chhal a, hlauhthawnna ka nei nghal!