𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟐𝟎]

SALMON

By

Havali Adam

Bung 20-na

"Ka phù loh èm che avangin ka rawn ngaihven zui ngam lo che a, tibuaitu nih ka hreh a, mahse fapa ka nei tih ka hriat khan rilru sualin min bual â leh a, i lakah ka thinurna ka hrithla leh bawk a, engkim hi a bul chu keimah ka ni," a ti dam leh thluam a, "Ni lo, nangmah i ni lo, keimah alawm," ka lo ti thâm chhal a, ka aw chhuak chu a fiah lo tak zet!

"I nu kha keimah vanga thi a ni tih theihnghilh suh Salmon," ti sapin, "Kei chu i fapa nu mai chauh ka ni," ka tih zawm dat a, puitling taka hmâchhawn duh teh mah ila, a lakah chuan ka tê chem chem a, kum 6 liam taa ka thil lo tihsual avanga ka inthiam lohna khan min hnuk hniam leh nge nge ṭhin.

"Engmah thlak danglam theih a ni tawh lo," ka ti leh a, ka kut lak sawn ka tum chu a lo chelh nghet hle.

"Hun kal tawh kan thlak danglam thei lo a ni mahnà, hmâ hun erawh kan her danglam thei alawm," a tih chuan ka melh ngawt ngawt a, eng nge ka lakah hian a la beisei cheu ka hre lo a ni.

"Min thlah rawh, ka lut dâwn," ka ti hap a, awlsam tê hian min thlah zal zal a, car aṭanga ka chhuah rual chuan a lo chhuak ve nghal zat bawk.

Ka bânah a rawn vuan a, thlipui ang maia chak hian a ri vut a, a âwmah nghet zetin min kuah bei thlawp a, khawiah mah ka kal sawn phal tawh lo ang hrimin min kuah vawn vawn a, kuah lèt ka châk lutuk, mahse ka chhia leh ṭha hriatna chuan rem a ti ngàng lo a ni.

"Salmon, hetiang hian awm suh, khawngaihin, awm ngaihna ka hre lo a nia," ṭah chhuak ru zet hian ka ti thawp raih a, a awm dan chuan min tihrilhhai zual a, min thlahlel ngawih ngawih ang maia a khawsa chu ka hrethiam lo tak zet!

"I thiam loh a awm lo, thiam lohna i nei lo, kei min hmangaih avangin ka nun chhan i duh a, vau beh i ni a, ti lo thei lovin an siam che a, i tân khan duhthlan tur dang a awm lo, nang ka huat theih nân chea an thang kam kha ka rap per a, engkim kha ka fimkhur tàwk loh rah vek a ni," a rawn ti ta mawlh mawlh a, min kuah nghet sauh a, ka chhip sam a fawh vang vang lâi chuan ka mittui ka dang zo leh ta pek lo.

"Ka lakah inthiam lo tawh lo turin ka duh che a ni," a ti leh a, chutah amah bawk chuan, "Min en teh," tih zawm zatin a inla hrang det a, a kut lûm vung vung chuan ka hmai a khuap a, ka mitah tak a en bawk.

"Chan nawn leh che ka duh tawh lo," ngunthluk zeta min en chung hian a ti hniam ruih a, "Ni lo Salmon....." ka lo ti sap a, "Hlauthawng suh, min ring tawp rawh," tih leh ka chala fawh vang vang a rual a, ka chhungril hlauhthawnnate chu a kiam riai riai ni mai hian ka hria.

"Min hua a ni lo'm ni? Engati nge hetiang hian i awm? Min haw kumkhua tur i ni záwk asin," rinhlelhna ka la nei fan avangin ka ti chhal a, thutak zet hian, "Ka hua che emaw ka ti ṭhin, mahse engtik lâi mahin ka haw ngai lo che," a ti nghet dap a, a taksa sia min kuah leh chiah chu ka kuah lèt lo thei ta bîk lo.

Ka rilru a hrethiam a ni ang, duat tak hian ka hnungzâng a chul hauh hauh a, sawi tur rèng ka hre tawh lo, ka laka a thusawi zawng zawng chu dàwt pakhatmah a tel lo tih ka hria, mahse ka ngaih erawh a la ṭha famkim thei lo a ni.

Zîngkhua a lo vâr a, amah hmâchhawn zawngin ka lo mu reng chu niin, nizan kha chuan Mâmtea lam ka hawi ngei a, ani'n ka hnung lam aṭangin min lo kuah kha a nia, chutia ka lo hmâchhawn ta daih chu mak ka ti ang reng!

A hmèl pá zet chu ka thlir reng a, tim dai hian a hmâi ka khawih a, chu veleh a rawn meng a, rang takin ka kut ka là sawn thuai a, mahse amah záwkin ka kut rawn làin a biangah a nghat a, ka thin a phû rang dawt dawt hle.

A mitmengah chuan ka chhiar thiam phak bak thil a awm a, thawh tuma ka che tur chu ka darah chelhin awlsam zet hian a lamah min pawt hnai a, ka mut rèng a chhuak tawh lo, ka harh tulh tulh záwk!

"Salmon....." ka tih chuan a ngâwi run a, "Mâmtea a awm ve reng hi, a harh ang e," ka ti leh a, ani erawh chuan, "A harh a nih leh, a pain a nu, a ngàih èm avangin a kuah tih a hrethiam ve mai ang," a lo ti sam mai thung.

"Ka kamis, a bo emaw ka tih kha i lo kawl reng a," a ti dut a, awm sawn tumin ka che riai riai a, dik tak chuan ka zak a ni.

"Min la theihnghilh bîk lo tih ka hriat hian ka lawm  a, kan fapa tân nu leh pa ṭha tak kan nih ngei ka beisei bawk," a ti thum leh dap dap a, min kuahna a ti nghet sauh a, awm sawn ka tum ta bîk lo.

"Ka hua che anga i ngai kha a dik lo, i tân hian ka thinlung hi a inhawng zau tulh tulh záwk a ni," a ti leh chuan a lam ka hawi chho a, a hmêlṭha tak zet!

"Kan inhmuh hmâsak ber nî aṭang khan hmeichhe danglam tak i ni tih ka hria, ka nunna i chhan a, min enkawl turin i rawn lang zui leh a, ka tân kha chuan vei loh che kha thil harsa tak a ni," a ti hniam sup sup a, ka mitthlâah hun kal tawha kan awm dan a rawn lang a, mahse min vei erawh ka ring chiah lo a ni.

"Engmah i sawi ngai loh kha," ka ti ve ta sap a, "Ka inthunun alawm," tiin a nui nghawr dat a, "I bula ka awm hi chuan naupangchhia riaua inngaihna ka nei ṭhin," a ti zui zat a, ka khi sak a, ka nui tih erawh a hre kher lo ang.

"Ka hnenah i lo kir leh thei ang em Mimi?" kan ngàwih vang vang hnu chuan a ti hniam chhal a, min nawr luih a tum lo tih a hriat hle bawk.

"Ka hre lo, keimahah hian ngaihṭhat lohna leh rinhlelhna a la awm tlat a, a chhan ka hre bîk lo, ka la inpeih lo te pawh a ni ang," tiin ka rilru dik tak ka sawi chhuak ta nge nge a, ka thaw a veng huai nghe nghe!

"Keimah vang a ni a, engkim ka siam ṭha ang," ti dam ruihin ka chalah a rawn fawp zauh a, mi tihnât hlau tak hian min kuah a, a pangtilûm chuan min ur ham ham a, a nawm dan a dangdaiin a thlamuanthlak tak zet!

Ka lo muhil leh daih a ni ang, thawmin min tiharh a, ka men chuan nî a lo chhuak diam tawh a, dâr zat ka en vat a, dâr 8 leh a chanve a lo ri dâwn reng tawh, engtin nge chung chen chen ka mut theih záwk!

Ka tho thuai a, nî Mâwipuiin ei rawng a lo bâwl a, Salmon-a leh Mâmtean dawr an lo nghak a, ka inthlahrung tak zet!

Ka inphih fai zung zung a, nî Mâwipuii puih ka tum chu dawr nghak záwk turin min ti a, hnial lovin ka kal zui ve nghal mai bawk.

"Min kai tho ta che," dawr chhûng ka luh rualin Salmon-a chu ka melh ran a, a lo nui suk a, Mâmtea chuan, "Anu, apa tak tak hian ball min lei dâwn asin," a lo ti var var a, chhán pawh ka chhâng lo.

"Khawi, ka lo nghak ang," ka tih chuan Mâmtea pawm chung hian a tho ve mai a, an awm dun tawh hi chuan an inpawm reng a ni ber e.

"Vawiin chu kan chhuak dâwn em ni ang?" a rawn ti a, "Ka hman ka ring lo," ka ti tawi tap a, "Anih chuan ni dangah Mâmtea hi ka bazarpui mai ang" a ti leh mai a, a lam ka hawi zawk nghe nghe!

"Ka tel lovin kal záwk rawh u, kei chu dawr nghah ka ngai alawm," ka ti ve leh dat dat a, ka aw chhuak a pangngai ta deuh bawk.

"Kan pathuma chhuahho ka lo rilruk a," inthlahrun hmèl tak hian a ti a, a awm dan chu a inhmeh lo ka ti, chutiang chuan awm lo se ka duh!

"Mâmtea pawh hian nuam a tih ngei ka ring," a ti leh a, ka hrethiam lo, eng pawh sawi se, ka rilru a hmin nghal zel ni ber hian ka hria.

Rei tàwk fang ka inngaihtuah a, a tawp a tawpah chuan ka aw ta nge nge a, lawm hmêl emaw phur hmêl emaw pawh a pu chuang lo, mahse chu chu amah ti-Salmon-a tu záwk a ni.

Chawhmâ dâr 10 velah kan chhuak a, nilêngin hun kan hmangho a, rin ai tak chuan nuam ka ti ang reng, Mámtea lahin nuam a ti ropui bawk si, ball mai bakah ball boot nen lam Salmon-an a leisak a, a nuam ti chu a ṭe chel chul reng mai.

Ei rawngbâwl hmanin kan haw a, in chhûng chu Mâmtea ṭawng thawmin a luah khat a ni ber a, a mi biak ber Salmon-a ni se lo ngaihven dan táwk a thiam si, Mâmtea tân chuan a engkim thlenna a ni hawt e.

Chumi zan chuan riak tawh lovin Aizawl lamah a chhuk thla a, min hrilh miah lo nà chu, kan ina riah a inthlahrung niin ka hria, inzawmna lo nei tawh ṭhin kan ni a, mahse tunah erawh thil a danglam tawh miau a, mi pangngai tân chuan ka chhûngte mitmei ven loh theih a ni lo.

A kal hmâin Mâmtea hnenah fel taka awm turin a chah thlap a, a lo chhoh leh thuai tur thu a hrilh a, Mâmtea chuan a ngen titih a, zui a tum nghe nghe a, Salmon-an thlem dan thiam hlauh lo se chu tihngaihna ka vàn khawp ang.

Nitin zantin phone call-in kan inbe ziah a, kei nen tak chuan kan inbe tam pawh a ni lo, Mâmtea záwk hian a ngâi ṭhin èm a, an inbe reng ti ila ka sawi sual ka ring lo.

Thla thar kan chûangkai a, fur ruah tui pawh a tla tlêm ṭan a, boruak a nuam chho tial tial a, nitin zantin, chhum lo chat lova min rawn ngaihven reng ṭhintu Salmon-a chu Mâmtea mai ni lo, kei ngei paw'n ka thlahlel ru telh telh a, hmâna amah ka hmangaihna kha, a rawn nung thar det det ni mai hian ka hre ṭhin.

September thla a ni a, Mâmtea birthday a hnai a, amah Mâmtea ber chu a phur tawh a, a sawi chhen a, kum 7 nih thuai thuai a châk a, a pa bulah pawh a sawi zing ta khawp mai.

Salmon-a lahin thil ṭha deuh a leisak tur thu a hrilh leh nghal a, a pa thil leisak tur mawlh chu a nghakhlel fâl tawh a ni. Kil tin aṭanga duat rawn a ni bawk a, a châng hi chuan han tih tauh bai bai te hi a chîng ve reuh a, mahse rei erawh a ni ngâi lo.

Kâr a liam a, a birthday lo thleng a, chumi zan chuan hun hlimawm tak kan hmang a, ka nu leh pate pawh an rawn chho a, Mâmtea chu Salmon-a leh ka pa bulah a awm chhawk chhen a ni ber e.

Salmon-a chuan cycle a leisak a, in chhûngah khalh an inzirtir nghal nghe nghe a, engtin nge chutiang thil ngaihtuah chhuah nachang chu a hriat ka hre lo, kei erawhin thawmhnaw ka leisak a, chu zawng chu a ni mai.

Zan a rei zel a, Mâmtea chu tui tak hian a muhil siai siai tawh a, mi dang pawh an muhil tawh a ni ang, thawm a reh ṭhiap a, kei leh Salmon-a erawh kan la meng ran thung.

"Tun kâr zet zawng, ka ngâihna che a zual hle mai," ka beng bulah a ti sup a, min duh thu te, min ngàih thute hi a sawi ngai miah lo a, chutia min hrilh thut chu mak ka ti deuh, min ngâi tak tak a ni ang. 

"Engnge i hna lam, i tluang maw?" tiin sawi tur ka dap a, chu lo sawi tur ka hre mai lo a tin a ni!

"Ka hnena i lo kir leh theih nân hian engnge ka tih ang?" a ti thum chhal a, zawhna veka min chhàn avang chuan ka kiai sak a, Salmon-a dik tak a ni.

"Nupuia neih che ka duh a ni," hniam ruiha a tih leh chuan ka meng fiah kalh a, chutiang thu chu a sawi ka ring miah lo.

"Nang leh ka fapa, ka bula in awm hun tur hi zantin ka suangtuah ṭhin," a ti leh a, a thutak viau bawk.

Kan ngâwi zui vang vang a, ka dul zawnah a kuah run a, a taksa ka khan chial a, dik tak chuan nuam ka ti tak zet!

Ka hmangaih ṭhin mipa khan nupuia min neih a duh thu min hrilh a, tun thleng hian ka la hmangaih reng tih ka pha lo, mahse keimahah hian zawhna a la châmbang tlat a ni.

"I nupui hlui nen khan in khawsa dun turah ka lo ngai a," ka ti sap a, a hmâ aṭang daih tawha ka rilrua awm ru reng a, mahse amah záwk hian inzawmna an neih tawh loh thu min hrilh tih loh kha chu a sawi ri ngai miah lo a, ka zàwt ngai hek lo.

"A boral tawh alawm," a rawn tih chuan, "Maw....?" ka ti ro halh a, mak ka ti hle.

"Ka nu leh pa thihnaah a inrawlh a, nang an rukbona che zawng zawngah pawh khan a tel a, min hmangaih avanga engkim ti a nih thu sawi mah se ka pawm thei tawh lo, a hnu lawkah damdawi overdose-in a boral tih ka hre leh a, chu zawng chu a chanchin ka hriat dan a ni," a ti dap dap a, ka ngâwi kar a, mak ka la ti tho.

"Kei pawh kha...." ka tih laklawh lâi chuan ka sawi tum hria tih hriat tak hian ka hmui a rawn hup a, "I dinhmun leh a dinhmun a inang lo, ani chuan duh a thlang thei a, nang erawh, loh theih lohna avanga an thu zawm mai chauh i ni," a lo ti nghut nghut a, min ring tih ka hriatna chuan ka awm a tinuam veng veng!

"He lam lo hawi teh," ti lehin amah záwk chuan min kuai her a, ka insiam rem zui ve nghal mai bawk.

A kutzungṭangin ka biang a nûl thuak thuak a, "Ka hmangaih che," awkâ dam thluam hian a ti a, ka chalah a fawp vang vang a, dawnsawn dan ka thiam lo a, engkim a reh duk ni mai hian ka hria.

"Muhil tawh rawh le, thawh i hai leh duh te a nih loh chuan," ti leh supin a nui nghawr dat a, zîng thawh ka hai ṭum kha a lo la hre reng a nih hmèl!

A âwmah ka bei hle hle a, min hmangaih tih hriat hnua a bula mut zet zawng, a hahdamthlak dan a dang tak zet, chutiang chuan awm dun reng thei ila ka ti a, ka ngaihtuahnaah eng thil dang mah a leng thei tawh lo bawk.

Tui takin ka muhil siai siai a, a tukah chuan kei ai a harh hmâsa zawk a, ka hmai a nûl riak riak a, chu chuan min tiharh a, zana kan mut dan ang chiah khan kan lo la mu a, a hmêl pá hrak chu ka en vang vang a, a hmuihmul te hlei hlei chuan a va'n tilang ṭha zual teh lûl èm!

"Tho ila," ti paha ka che chu a lo ner nawk a, "Engati nge?" ka ti leh a, a awm dan chu nàtna nei te pawh a ang alawm le!

"Che rih lo teh, ka bân hi a mu chuah chuah mai," a ti dut a, ka tho nghal vat!

"Sawi ta che......" ka ti fân raih a, zankhuain ka lo khan ngei awm si a, a mu nasa viau tak ang.

A awm dan en reng pah hian ka ṭhu ût a, mu leh tura min tih paw'n ka duh tawh der lo. A bân mu chuah chuah a reh fel hnu chuan khum aṭangin ka chhuk a, a lo tho zui ve nghal mai bawk.

Chumi nî vek chuan Aizawlah a chhuk a, a kal hmâin Mâmtea hnenah thu awih turin a chah leh thlap a, a pa thu a awih bawk a, Mâmtea paw'n a ngen tawh bîk lo.

Ka pa'n min ko hrang a, kan pandinah kan inzui lut a, Salmon-a nen kan chungchang kan sawi dun tawh leh tawh loh min záwt a, chhán dan tur ka hre lawk lo a, a sawi dan chuan kan ina Salmon-a a lo kal khan, ka nu leh pa bulah nuipuia min neih a duh thu a lo hrilh a ni àwm e.

Ka pate erawhin ka ngaihdan min zahsak a, keimah min be turin an lo hrilh thung a, kan inbiak dan te, kan hun hman dun dan te kha ka ngaihtuah lèt a, a mak ka ti hran lo.

Hun pui boruak kan hnaih chho hret hret a, sik leh sa a nuam tial tial a, kâwla nî chhuak tur leh nî tla tur te chu thlir ninawm loh, lung tilêng vawng vawng thei a ni a, ni thar duhawm tak lo chhuak apiang chuan ka hlimna tur a rawn herchhuahpui ni mai hian ka hre ṭhin.

Salmon-a nen kan inkârah buaina leh harsatna a awm tawh lo a, min hmangaih tih ka hriat tâk chinah hian mahni inthiam lohna nasa tak ka neih te kha a kiam riai riai a, mahse thil thleng engkim kha ka theihnghilh theih erawh ka ring tawh lo.

Zodini hnenah kan chanchin ka thlen ṭhin a, ka ṭhiannu a ni miau a, ṭhiante bulah hi chuan nu leh pa bula sawi ṭul kan tih loh te nen lam kan sawi vek ṭhin a nih ber hi màw!

Thla èn zan a ni a, a bial fiah kalh a, Salmon-a âwm nghengin ka ṭhu âwn duai a, ani'n khum tlâng a ngheng a, khumah Mâmtea a muhil bâm a, keini pahnih erawh insi rialin chhuatah kan ṭhu thung.

Pindan light kan off vek a, pindan chhûng chu thla èngin a rawn chhun a, hmun changkang takah awm lo mah ila, kan awm dan chuan ka lung a tiâwi hliah hliah a, suma lei theih lah a ni hek lo.

"Ka pathlawi rei tawh mah mah i ti ve lo em ni?" a ti sup a, ka khi sak a, fiamthu a thawh miah lo tih ka hria, mahse a thil sawi dan chuan ka nuih a tiza tlat!

"Pathlawi i nih leh nih loh pawh ka lo ngaihven hleinem," ka ti ve sap a, "Pathlawi ka ni tih chu i hriat chian èm kha," a lo ti dut a, chutah amah bawk chuan, "Khami zana min duh thu i sawi khan, engah mah ngaih loh ka tum a, mahse ka thei lo," a tih zawm leh a, ka kutzungṭang khawih nuap nuap pahin a thaw hulh bawk.

"Ka tâna i neih rohlu ber i hlan zan aṭang khan, ka thinlungah hmun i chang tawh tih ka hrechhuak a, i chet dan kha min duh vang chauh a ni lo tih ka hrethiam ta zel bawk a, inup bet lovin, ka thinlung duh záwng kawng kha lo zawh mai ni ila chuan, hetiang thil zawng zawng hi i paltlang a ngai miah lo ang," a ti leh dap dap a, a awah chuan inthiam lohna aw ka hre thei!

"Hmân ata tawh, tun thleng hian, ka la hmangaih reng che a, ka thinlung hian pen khat pawh a kalsan ngai lo che," tiin ka rilru dik tak ka sawi chhuak ve ta nge nge a, a ngâwi vung vung a, mahse engmah ngaihṭhat lohna ka nei lo.

"Ka nupui ni tawh mai rawh," a ti hniam ruih a, "Min neih i duh thu chu i sawi tawh ngei a, mahse nupuia min sàwm àwm ka la hre miah lo," ka tih chuan a nui nghawr dat a, kei pawh ka bang chuang lo.

"Palai an lo kal har lo ang," ti thum chhalin ka chhipah a fawp vang vang a, ka chalah emaw, ka chhipah emawa a fawh tawh hi chuan him hliah hliah hian ka inhre ṭhin.

Chumi zan chuan zan dar 1 dâwnah a haw chauh a, riak law law turin ka ti a, mahse a riak duh tawh lo hrim hrim, Mâmtea birhtday kan lawm zana a riak tih loh kha chu a riak tawh ngai lo a, zanah, Mâmtea mut hnuah a haw mai zel a, kâr khatah vawi thum a rawn zin chho vang vang ṭhin bawk.

Chumi kâr vek chuan Aizawla kan inah palai a lo tîr tak tak a, palai a lo tîr dâwn tih hre tho mah ila, chutianga palai hmêl kan hmuh hmâ ka beisei lo a ni.

Palai hmêl kan hmuh ṭum hnihnaah ka nu leh pate nen kan inneih hun tur an sawi rem a, december thlaa innei turin ruahmanna an siam a, ka mipa hmangaih, ka fapa pa ni bawk bula ka chen tawh dâwn vangte pawh a ni ang, engmah lungngaihna ka nei lo.

Engkim sawi fel leh ruahman fel ni tawh mah se Champhaia lo zin chhoh a ṭhulh phah lo a, zantin kan nufain min bia a, a mizia ve hrim hrim nge pawh ka hre lo, a ruka ngàih zui veng veng theih tur hian a awm thiam ka ti!

Thlasik boruak kan thleng a, kum dang ang bawkin Champhai boruak chu a vàwt leh hle a, kum 6 hnuah, a vawi khatna atân Aizawlah, ka fapa nen kan chhuk a, Salmon-an min rawn hruai thlap nghe nghe!

Nî a ral zel a, kan inneih nî a lo herchhuak ta nge nge a, mo ṭhianah Zodini ka hmang a, Salmon-ah erawhin a hnathawhpui a hmang thung.

Mâmtea mawlh chuan nuam a ti leh pek a, kan pathum a, hmun khata kan chengho tur chu hrethiam ve tak tak ang mai hian a phur a, hunserh kan hman zawh rual rualin a pa bulah a tal chawt a, a pa lahin a duat bawk si, ka lung a dam hliah hliah a, ka hlimna chuan van a tawng pha hial ta ve ang.

Kum 6 liam taa hun kan lo hman dun ṭhinna, a in chhûng ngeiah ka lâwi lut a, a tirah kha chuan an in puiah záwkah kan awm dáwn emaw ka ti a, mahse a ina awm pawh chu pawi ka ti chuang lo, sulhnu kan lo neih dun tawhna kha a ni miau a, kan pahnih tân chuan a hlu tlat a ni.

Nupa kan han ni ta chu, engkim a fel duak ni mai hian ka hria. Min ngàih thu ṭawngkamin a sawi duah ngai lo a, min hmangaih thu a sawi fô ngai hek lo, mahse ka laka a awm dan aṭangin a rilru ka hre tlang vek a, ka pasal ni tawh mah se ka hmangaihna a zual zel a ni ber.

Tin, ngaihdan kan sawi dun reng rengin a ngaihdan a rintlak mai bakah a felfai záwk zel a, chhûngkawpa, fa tâna pa ṭha tak, nupui tâna pasal innghahna tlàk tak a ni dâwn tih hai rual lovin ka hre nghal a, mi famkim ni lo mah se, ka tân chuan mipa dik tak a ni.

Kum a thar a, nitin Mâmtea school kal tur a hruai ziah a, an bàn hunah a lam leh thlap zel a, station lama a kir leh hmâin tûalah cycle a khalhpui loh leh, ball a petpui hmâsa ngei ngei phawt ṭhin.

A hna bâng lo haw ni se Mâmtean a lo pan chawt zel a, ka suangtuah phak baka kan inkâr a fel vek ta chu mak ka ti leh thut ṭhin a, a tawpah erawh hlimna leh thlamuanna bawkin min luahkhat leh nge nge ṭhin.

Nipui a liam a, ruah tui a rawn tla tam ṭan a, pâwna an infiam thiam theih loh châng hian inchhûngah an infiam mai zel a, silai lem hmangin an indo ziah bawk.

"A rim a va tui ve," ka beng bulah ti supin ka hnung lam aṭang min rawn kuah a, ka dul pûar al chu a chùl riak riak a, a chawhmeh duh chî tak ka siam miau a, rimtui ti lo chí a ni lo.

"Dâwn lo'm ni...." ka tih chuan ka nghawngah a fawp zauh a, ka bula a rawn kal danah Mâmtea a muhil tawh a ni ngei ang, an inchhaih nasa bawk a, mut chhuak àwm rèng pawh a ni.

"Ti daih ila, i hming hi tu phuah nge a? Ka hriat tirh khan mak ka ti tawp," ka ti leh a, "Ka pa pa, ka pu phuah a nia," a ti mai a, "Engnge a awmzia ni hrim hrim?" ka tih leh chuan, "Thlamuanna tihna," a lo ti ve leh mai bawk.

"'Chuvang a nih dâwn chu, i bula ka awm hian ka thla a muan theih ém em," nui seih pahin ka ti var var a, ka khabe châwiin ka hmuiah a fawp vang vang a, ka hmuiah hian a fawp zen zen lo a, mahse a fawh tawh hi chuan awm ngaihna ka hre ṭhin lo.

Khua a thim a, zanah chuan ka pate inah kan lêng a, rei táwk fang kan awm a, in kan thlen chuan Mâmtea muhil chu khumah a nghat a, keini pawh kan mu zui ve nghal chu a ni mai.

Vawilehkhatah tukverh a rawn keh ri chuaih a, Salmon-a nen kan harh thuai a, Mâmtea pawh a rawn harh har lo. Chutah silai puak ri ka hre zui zat a, ka lung phu a rang dawt dawt a, Salmon-a kawr hmâ chu thisen hian a khat a, a hmêl chau tak ka hmuh rual chuan 'ni lo' tiin ka ṭe chhuak tuarh a, ka ṭap nghal hlawp hlawp bawk.

"Mimi......!" ka dar sawi paha min kotu aw ka hriat rual chuan thawklehkhatah ka thlawk vang vang ni mai hian ka hria.

"I ṭha em?" min be mektu chu ka pasal Salmon-a ngei a ni a, ka hnaih rawk rawk a, ani paw'n min lo kuah nghet hle.

"A tak tak a ang lutuk Salmon, min thihsan emaw ka ti hman a," ka ti thâm chhal a, ka thinphu a la rang hle bawk.

"Mangchhia i mang em ni?" min ngaihtuah tak hian a ti a, "Misual an lo kal a, i âwmah hian an kap che a, chuan engkim kha," ka tih mawlh mawlh lâi chuan, "Ka hrethiam e, i bulah ka awm chhûng chu khatiang thil kha engtikah mah a thleng dâwn hleinem," a ti thum dam dap a, engtin nge engkim kha a tak ang chiaha ka hmuh theih ka hre lo.

Min ṭawng thlamuan dap dap a, ka awm a nuam huai a, kan meng zui reng nghe nghe a, ka dul pûar ve al tawh chul pah hian, "Kan fapa hi chu min hmangaihna avanga piang a ni a, tuna mi erawh, kan inhmangaihna rah a ni," a ti sup a, ka rilru a pangngai leh vek tawh bawk.

"Chu, duat deuh bîk i tum a ni maw?" ka ti lo zauh a, "Ka duat dan che u a inang vek ang," a tih chuan, "Kei chu min sawi tel lo law law rawh, tunah pawh Mâmtea bak i ngaihsak ngai lo a nia," lungàwi chiah lo ang hrim hian ka ti dat dat a, a rilru ka hriat chàk vang a ni pakhat!

"Fa eng zat pawh nei ila, ka hmangaih dan a inang vek ang, nang erawh, tû ma'n an khum thei lo che," a ti dap dap a, ani ang mipa dik tak ka tawng hi vannei ka inti tak zet a ni.

A tawp ta!