𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟏𝟗]

SALMON

By

Havali Adam

Bung 19-na

Pindan chhûng ka lut chu kawngka nghengin ka ding vang vang a, ka thaw chhuak hap a, ka mittui a la tling pam a, Salmon-a thusawi kha ka ngaihtuah lèt a, ni lo, ani nen chuan kan inkâr a ṭhat theih ka ring tawh lûl lo, min ngaihsak tak tak ang maia min en te kha a lem vek a nih ka ring, ka hmu sual bak a ni lo ang.

Ṭah tawh loh hram tumin Mâmtea lamah ka phei a, tui taka ka fapa muhil chu hmangaih zet hian ka kuah a, ka rilruah Salmon-a hmêl kha a la châm reng a, ka mittui ka dang zo lo leh takngial dâwna ka hriat avangin ka maimitchhing ta tawp bawk.

Hun kal tawh ngaihtuah kirin ka ṭah a chhuak ru et et a, ka chhûngril lamah min hnawh tut tuttu a awm a, mitthlà zui loh ka tum paw'n Salmon-a hmêl chu ka mitthlâah a riak zui reng a, dik tak chuan a hmêla min huatna rèng lang miah loh khan ka insum theihna a tikehchhe vek a ni.

Min la haw ngawih ngawih se, ka lakah thinrim reng se, min be ṭha duh miah lo se ka awm a nawm zàwk ka ring. Nimahsela, zanina a awm dan zet kha zawng, ka rin phak bak a ni a, ka dawngsawng thiam lo mai pawh ni lovin, hun kal tawh ka hrechhuak lo thei lo a ni.

A mitmenga min khawngaihnate kha a tak a ni lo, a lem mai a ni. Ni e, kei hi engtin nge min khawngaih theih teh lûl ang, khati khawp khan a chungah thil tenawm tak ka tisual a, a nu thihnaah ka inrawlh bawk a, kumkhuain kha thil thleng kha a theihnghilh tawh lo ang.

A tân chuan mi pangngai, hmeichhe satliah mai chauh ka ni tawh, a fapa nu ni lo ila zawng kan inhmuh leh tawh pawh ka ring lo. Kan fapa avang chauhin chenho a rilruk tih ka hria, mahse ka thei lo ang, a chhan chu min la haw reng tih ka hria a ni.

Âw, engati nge maw hetiang hi ka nih tâk mai le, ka vanduai vang nge, ka thil tih sual rah ka seng záwk, duhthlanna ka lo thlang sual kha a pawi a ni, a pawi tak zet!

Ka ṭap muhil daih a ni mahnà, ka harh chuan khua a lo vâr tawh a, Mâmtea chein min tiharh nghe nghe a, a mitmengah chuan a pa a zawng tih ka hrethiam nghal bawk.

"Anu, khaw'nge apa tak tak kha?" a ti thâm chhal a, "Apa kha hnathawh a ngai a, a lo kal leh vat ang," ka ti sap a, "I bulah ka awm reng dâwn a ti alawm," a rawn tih chuan chhán dan tur ka hre lawk lo.

"Anu...." ṭah chhuak hmêl tak hian a ti leh a, Salmon-a call ka tum a, mahse a buai ka hlauh avangin ka pa ka call ta zàwk!

"Aizawla apu tak tak kha bia ang aw," ka tih chuan a la men deuh pur a, nizanah a pa nen khati khawp khan hun an hmang nuam a, chutia a pa a ngâi thar em em pawh chu àwm ka ti viau mai.

Ka pa nen an biak lâi chuan a ṭawng ṭha duh mang miah lo lehnghal a, a pu biakna chu tawi tê tè hian a chhâng a, a rilruah a pa bak a awm lo a nih ka ring.

Ka pa nena kan inbiak ve leh hnu chuan, "Nimin piah khan Salmon-a a rawn kal a?" a rawn ti a, mak ka ti khawp mai.

"A lo kal maw?" ka ti halh a, ka beisei lo ve êm bawk a ni.

"Eng nge a rawn tih?" ka ti zui zat a, "A lo kal chhan tak chu..." tiin a ngâwi leh daih a, "Nakinah in pahnihin la sawi dun záwk ula a ṭhat ka ring," a tih chuan mak ka ti tulh tulh!

Mâmtea a rawn nûar ṭan a, ka pa nena kan inbiakna ka hmet tawp a, dik tak chuan mak ka ti a ni. Ka pa a ngainat dan hi a namai lo a, a ngâi ṭhin tak zet a, mahse Salmon-a a lo lan chinah erawh thil a inthlak danglam vek ni berin ka hria.

A awm ṭha duh lo telh telh a, zîng kâr hmâ tak a ni tawh lo bawk nen loh theih lohna avangin Salmon-a ka call ta nge nge a, mahse a ring ral ṭhak a, a hnu lawkah a rawn call back nghal thung.

Salmon-a leh Mâmtea inbiakna chu mu chung hian ka ngaithla reng a, pafa tih takah a dan a dang khawp mai. Mâmtea pawh a hlim sâr a, a ṭawng zat zat a, Salmon-an silai a lo hawn tur thu a sawi lâi phei chuan hlim tak a ni.

Mâmtea bulah chuan fel taka awm tur leh ka thu awih turin a chah a, kei min biak a duh thu a hrilh zawm zat a, Mâmtea chuan, "Nu, apa'n a be duh che," a rawn ti a, loudspeaker-a ka dah avangin an ṭawng chu ka hre vek bawk.

"A lungàwi loh hmâin i lo call thei lo em ni?" a rawn ti ro hulh a, kei nena kan han inbe chiah chu a ṭawngkam pawh a dang khawp mai.

"I buai ka ring a," ka ti sap a, loudspeaker ka off tawh a, Mâmtea chuan a pa ṭawngkam bul hmuk chu a rawn hre tawh lo hrim hrim!

"Ka fapa tâna hun nei lo tur khawpin ka buai lo," a ti nghet churh a, nizana min biak dan awkâ dam dap nen kha chuan a inang tawh lo hle.

"Hnathawh tur i neih thu kha i sawi bawk sia," ka ti leh chu, "Ka fapa aia ngaihpawimawh thil dang ka nei lo," a ti nghut a, engmah sawi lovin ka ngâwi ta ringawt!

"Khaw thim hmâin lo thlen hman ka tum ang," a ngáwih deuh vung vung hnu chuan a ti leh a, a aw pawh a hmâ ai thlawt chuan hriat a nuam ta deuh!

"Eng lo....kan....." tiin ka ngâwi leh daih a, ka pa thu min hrilh kha ka hrechhuak a, engvanga kan ina kal nge a nih zawh ka tum zuai hman a, mahse a hun chiahin ka hre leh lo a ni.

"Engnge?" a ti dam thlup a, a ṭawngkam chuan min tur et et a, mahse ka ngáwih rih a ngai tlat!

"Engmah...." ka ti hniam raih a, "Thil min hrilh duh emaw, min zawh duh i neih chuan i sawi thei reng a nia," pangngai tak hian a ti a, mahse ka rilrua awm chu zawh loh law law ka thlang rih záwk!

"Engmah a ni lo," ka ti sap a, a ṭawng leh hmâin kan inbiakna ka hmet tawp daih bawk.

Mâmtea awm dan vel chuan min tinui leh sak ṭhin a, apa'n silai a rawn hawn dâwn thu chu nî Mâwipuii bulah mai ni lo, ka pi leh pute bulah nen lam a sawi chhen a, ka pu lahin a lo sawi phurpui thiam bawk si, a pa chah ang tak tak khan ka thu a awih sawt bawkin ka hria.

Nilêngin dawrah ka awm a, Mâmtea pawh a chángin ka bulah a rawn awm a, a châng leh ka pite bulah a awm a, a taksa a dam chho ve tawh lutuk te chu ka lawm a ni.

Accident kan tawh tirh kha chuan ka chân dâwn emaw ka ti hman tak tak a, mahse a pa, Salmon-a zârah tak meuh ka chân lo a, tun thlengin ka bulah nung damin a la awm a, ka tân chuan engkim chu lawmna hlir a ni.

Tin, Awiteite lam paw'n min rawn ngaihven zui reng a, Thianga pawh a hmâ ai chuan a zia deuh tawh a, mahse a thiam loh a nih loh thu ka hrilh viau ṭhin chung pawh hian a la inthiam lo ru reng tho.

Tlai dâr 4 leh a chanve a la ri lo deuh a, ruah a rawn hnai a, insuk ka seng fel chiah tihah a tla zui nghal buan buan a, dawr ka khar rih a, kawngkapui khar ka tum leh chiah chu veranda-ah Salmon-a ka hmu thut a, a huh hluam lehnghal!

"Apa....." Mâmtea chuan a rawn ti vak a, kan awmna lamah a rawn tlan phei a, Salmon-a chuan ṭhu hniamin a lo kuah chawt a, a biang leh a nghawnga a fawh lai chuan Mâmtea chu thle ngial hian a nui var var a, kawngka ka khar a, ngaihsak zui lo ang deuhin ka kal sawn a, mahse ka mitmei ru reng thung.

"Apa...silai chu min lo hawn em?" Mâmtea chuan a ti thuai a, Salmon-a chuan inngaihtuah vang vang ang taka lang hian, "Ka theihnghilh em âw, ka'n ngaihtuah lawk," tiin a fapa chu a chhaih vel phawt a, chutah amak vek chuan, "Ka theihnghilh lo hlauh e, ka lo hawn che alawm," ti zui leh zatin bag aṭang hian naupang tâna siam silai lem hi a rawn phawrh a, "Yes!!!"" ti vakin Mâmtea chu a au nghal ṭhawt bawk.

"Mi fel kah loh tur aw, mi sual chauh kah tur," Salmon-an a tih lai te chuan a bu nghauh nghauh reuh a, ei rawngbâwl pah reng mah ni ila an awm dan chu ka ngaihven lo thei lo.

"Mâmtea chu apa'n silai a lo hawn bîk bawk che sia, a nuam àwm ê," ka pi chuan a lo ti a, Mâmtea hlim hmêl mawlh chu a tua te paw'n kan hlimpui a ni ber e.

Salmon-an Mâmtea silai kah dan a zirtîr lâi te chu ka thiltih theihnghilhin ka lo en leh veng veng ṭhin a, dik tak chuan hmuh an an nuam êm a, ka en ning thei thlawt lo.

"Ka rin ai inhruk hulna tur i pe har, i pe mai dâwn emaw ka tia," ka pi chuan ka bul a lo thlen phei rual hian a ti a, ka harh chhuak nghal zawk!

Kan pindanah ka lut thuai a, towel ka va lá a, ka chhuah hnu chuan Salmon-a ka pe nghal a, bu nghut hian a lo là a, min en lo nàin a lakah chuan ka inthiam lo ru khawp mai.

Pindanah Mâmtea nen an inzui lut daih a, tun ang huna a lo kal danah zanriah a ei nghal ka beisei ve tawp a, tukin khan ka pi leh pute bulah pawh a lo kal tur thu ka hrilh tawh a, anmahni záwkin ei rawngbàwl kep turin min hrilh nghe nghe bawk.

Ruah a sûr tam ang reng viau a, nî Mâwipuii tih loh chu inah kan awm kim a, ani erawh ruah a sûr tam bawk nen dawrah a la awm rih a nih ka ring.

Ei rawng ka bâwl zo a, thawmhnaw ro buaipuiin pindanah ka lut a, Salmon-a chuan Mâmtea chu a âwmah kuah betin khumah a lo leh kualpui a, Mâmtea nui uar uar thawm chuan ka beng a titlai hle.

Anmahni hnungchhawn zâwngin ka ṭhu a, thawmhnaw thleh fel pahin an inbe thawm chu ka ngaithla reng a, chutiang taka Salmon-an a fapa a duat chu mak ka ti leh thut ṭhin.

Amaherawhchu, amah nen kan inhriat tirha Awitein a chanchin min hrilh kha ka hrechhuak vawng vawng a, a fapa a boral avanga a khawsak nunphung a danglam vek dan te kha ka ngaihtuah lèt a, chuti taka Mâmtea a duat pawh chu mak ka ti ta lo tial tial bawk.

Ka ngaihtuahna ka lo kawm tui hman lutuk nge ni, an inbe thawm awm ta miah lo avang chuan an lam ka hawi a, Mâmtea chu thlamuang tak hian a pâ âwm nghengin a lo muhil siai siai a, chaw ei dâwn tawha a muhil erawh ṭul ka ti lo viau a, mahse engmah ka sawi lo.

Salmon-a chuan a fapa muhil hmêl ringawt a thlir a, an awm dan chu ka thil hmuh tawh azawngah a la mâwi ber hial ang.

A awm dan tidanglam chuang miah lo hian a mit a chet rulh a, ka mitah tak min rawn en a, harh chhuak zawkin ka hawi sawn thuai a, ka thil tih lâi ka tih zawm ta malh malh bawk.

Thawmhnaw ka thleh fel hnu chuan pindan aṭangin ka chhuak a, khua a thim ṭan titih tawh a, ruah a tla tlêm ta deuh a, nî Mâwipuii pawh a lo thleng ṭep tawh ang ka ring.

Tihtur hre lovin chokaah ka ding ngâwi ran a, ka pi leh pute an pindanah an awm a, Mâmtea leh Salmon-a ni se kan khumah an mu a, nî Mâwipuii lah a lo la haw bawk si lo.

Dawr hawn leh mai te chu ka tum deuh uk a, mahse chaw ei khamah law law hawn ka rilruk ta záwk a, phone khawih ka tum a, pindanah ka dah tih ka hrechhuak a, mahse ka va lut peih rih bawk si lo, tihtur ka vàn kher mai.

Chutia ka din ngàwih veng veng lâi chuan ka hnung lam aṭangin tu emaw ni hian ka kawng zawnah min rawn kuah a, rang taka talchhuah ka tum chu, "A rei lo ang," mipa aw thum chhal hian a rawn ti thuai a, tu dang ni lovin Salmon-a ngei a ni tih ka hre nghal bawk.

"Rei lo te chiah," a ti hniam leh ruih a, ka darah a khabe a rawn nghat a, a thaw lûm ham ham a, kei erawh ka thin a phu dawt dawt thung.

"Salmon...." ka ti sap a, a bân chu pawh phelh ka tum a, mahse a suih nghet sauh emaw tih tur hian a awm a, kan awm dan chuan ka thluak a chawk buai hneh tak zet!

"Salmon, hetiang hian awm suh, a dik lo," ka tih leh pawh chuan a che sawn duh miah lo a, ka thin phu ri te chu a hriat phak hial ka ring.

"Ṭha takin kan fapa i lo enkawl a, ka lawm e," thuk ruiha a rawn tih chuan ka chhûngril a tawt a, ka thaw a chham dâwn ni mai hian ka hria.

"Ka lawm e Mimi," a rawn ti nawn leh sup a, ka awm dan a dik lo tial tial a, ka mittui a rawn hnai nghal kuarh bawk.

"Khawngaih Salmon, hetiang hian awm suh, min thlah rawh," tluangtlam lo zeta ka tih chuan zawimuang hian min thlah riai riai a, mahse ka kal sawn tur chu ka darah a lo chelh chat thung.

"Thil sawi duh i nei em?" awkâ dam dap hian a ti a, "Nei lo," tia kal sawn ka tum chu min la chelh ta cheu a, a hmêla min khawngaihna leh min ngaihsakna ang tak lang te chu a tak emaw tiin ka mittui ka dang zo lo leh mai dâwnin ka hria.

"I mitmengah hian zawhna tam tak ka hmu a ni," a tih chuan ka lû ka thing a, a mi chelhna pawh zahpah duh tawh lovin ka kal sawn thuai a, pindanah ka lut a, awmdan tur ka hre lo hle bawk.

Tukverh bula ka din lâi chuan pindan kawngka a rawn inhawng ri rak a, thawm a reh duk danah Salmon-a a ni tih ka hria, mahse eng thu mah ka chhak chhuak lo, sawi tur ka hre lo a ni mah záwk!

"Kan inkâr hi nang leh kei chiahin kan siamṭha thei," thum dam dap hian a rawn ti a, "Ni lo...." ti sapin a lam ka hawi riai riai a, ka ṭawng lo thei ta bîk lo.

"Kei hian engtikah mah i inchhir lehna tur thil tih nawntîr che ka tum tawh lo, engtikah mah," ti hniam raihin ka bianga mittui luang thla zawih chu ka hru thuak a, pindan aṭang chuan ka chhuak leh ta nge nge bawk.

Washroom-ah lutin ka hmai ka phih a, nî Mâwipuii a lo thleng chiah a, ka mitmeng aṭangin ka ṭap tih a hriatthiam loh hram ka beisei. Phone call ka dawng zui zat a, ka pa a lo ni a, Mâmtea chanchin min rawn záwt a, biak erawh kan inbe rei hran lo.

Nî Mâwipuii a lo haw ta bawk nen ka pite bulah chaw ei ka siam tur thu ka hrilh a, rei lo te hnuah an nupain an lo chhuak a, Salmon-a leh Mâmtea erawh pindanah an la awm thung.

Chaw ka khawrh chhuak dan dan a, chutih lâi chuan nî Mâwipuii kan pindanah a va lut a, kawngka a inhawng bawk nen Salmon-a nena an inbe thawm chu ka hre pha vek a, Salmon-a paw'n a lo chhâng ṭha viau!

Chawhmeh ka suah lâiin Salmon-an Mâmtea a rawn pawm chhuak a, a lo muttui hman hle a ni ang, a la meng phak chuap mai.

Chaw kan han ei chu nî Mâwipuii leh ka pîte nupa chuan Salmon-a an be deuh reng a, a changin Mâmtea an be leh zauh ṭhin tih loh chu Salmon-a hlir a ni an biak ni!

A hnathawh chungchang thlengin an sawi kâi a, dik tak chuan kan inkâr engmah an hre chiang lo a, inṭha ṭhen tawp angin min ngâi a, kan inkâr dik tak hria se zawng keimah záwk hi min dem ngei ang, dem phû ka ni rèng bawk a!

Chaw kan ei kham a, kan ei inna ka senghawi fel hnuah dawr ka hawng a, nî Mâwipuiin min rawn ṭhutpui zuaih a, rei awm lovin a kal leh mai a, mi dang erawh engtin nge an awm ka ngaihven hran lo.

Kan ṭhenawmpa, u Hlua a lo lêng phei a, dawrah kan pahnihin kan awm a, thil chi hrang hrang a sawi a, keiin ka lo tuihnih ve leh zauh ṭhin bawk a, chutia hun kan hman lâi chuan Salmon-an Mâmtea a lo pawm lut hlawl a, ṭhutna tur ka lo pe a, a ṭhu zui ve mai bawk.

Ngâwi reng hian Mâmtea chuan a pa thil leisak a khàl nuap nuap a, Salmon-a erawh min en reng ni mai hian ka hria. Kan inkârah u Hlua a ṭhu a, ka awm a nuam lo zo vek, u Hlua lahin Salmon-a awm dan ren run chu a hrethiam ve der bawk si lo.

Minute eng emaw zah hnuah Salmon-a chu Mâmtea pawmin a lut ta daih a, tlêmin ka awm a nawm phah sawt a, u Hlua titi pawh ka ngaihven leh thei ta, mahse a ruk tak chuan Salmon-a ka ngaihtuah tel reng tho.

Dâr 9 leh a chanve a ri hnai a, dawr hi dâr 10 thleng ka hawng tlangpui ṭhin a, mahse zanin chu khua a nuam lutuk lo bawk nen khar hmâ ka rilruk a, dâr 9 leh a chanve pelh hretah ka khar a, ka khar hmâ zawng u Hlu chu a leng nghe nghe!

Pindan ka luh ruala ka thil hmuh avang chuan ka ding chawt a, khum bula dawhkan chu puan hian an lo khuh hlùn a, a chhûngah an pafain an lo awm a, Salmon-a ke a rawn lawr tut a, ka nuih a tiza ru ang reng!

Mâmtea a ṭawng malh malh a, Salmon-an a lo chhâng thum leh dut ṭhin a, dawhkan hnuai aṭanga an rawn bawkvak chhuak dun chiah phei chu mit la sawn lêk lo hian ka thlir a, sawi ngaihna pawh ka hre lo.

Salmon-a chuan kamis hlipin t-shirt dum chauh a ha tawh a, amah a hang chhe lo hran lo nen, a tilang fai vûkin ka hria, a kekawr tlawn a khup thleng a thlep tawm chho a, ka awm tih an hre lo a, min hmu lo hrim hrim bawk.

An pahniha hun hman duntîr tumin chhuah ka tum a, kawngka ka hawng ṭep tawh tihah Mâmtea chuan, "Anu, apa nen bùk kan sa a," a lo ti vâh reuh a, an lam ka hawi lo thei lo.

"A ni maw, a nuam em," ka tih chuan rang zet hian, "Nuam lutuk," a lo ti a, "Anu saw lo tel ve se, ti raw?" titu lam chu phawk ang reng tak hian ka hawi a, min en duh miah lo leh nghal!

"Anu, lo kal rawh, lo tel ve rawh," Mâmtea chuan a rawn ti ta chul a, Salmon-a chu ka melh ralh a, ani erawhin min en duh lo lui ngar ngar thung.

"Nakinah ka lo tel ve dâwn a nia," tia hnial mai ka tum chu Mâmtea chuan min ngen titih ta tlat a, tel loh theih pawh a ni lo, Salmon-a a awm ve run bawk nen, ka awm a nuam zán lo a ni.

Dawhkan hnuaia ka lut tur chu Salmon-a chuan min lo kian a, dawhkan hnuaiah chuan Mâmtean toys a lo dah tlar dul a, a pa pheikhawk pawh a awm nghe nghe a, rei awm lovin ka chhuak leh thuai a, nichin lawka mi en ṭha duh miah si lo kha, Salmon-a chuan min lo en chìk ta khawp mai.

Pindan ka chhuahsan a, thingpui ka lûm a, ka pite an mu tawh a, nî Mâwipuii pawh a pindanah a awm tawh a ni ang, thawm a nei lo hrim hrim!

Thingpui chu Salmon-a nena kan in tur ka siam a, pindan ka va luh chuan bùk an lo sa tawh lo a, khumah an lo mu dun a, Mâmtea chuan, "Anu, apa'n thawnthu min hrilh a," a lo zat zat reuh a, ama'n hrilh a ngen a ni ngei ang, Salmon-an chuti ngawta a hrilh ka ring hauh lo.

Rei lo tê hnuah Mâmtea chu a muhil ta thuai a, tihharh hlau tih hriat tak hian Salmon-a chu a tho ṭhem ṭhem a, khum tlângah a rawn ṭhu a, thingpui in zui nghal mai a tum chu, "A dài vek tawh lo maw, a thar ka va siam law law ang," tiin chet zui mai ka tum a, "A pawi lo," ti thum sup hian no chu a ban a, vawikhatah a tlak zui nghal pap bawk.

"La ṭhu rih teh," no seng tuma ka ding uaih tawh chu a ti leh a, dam raih hian min en a, a mitmeng chu hmâna ka hriat ṭhin Salmon-a ang mai kha a ni.

"Hmun danga inbiak i duh zàwk em?" ṭhu ta mai lova ka la din reng avang chuan a ti leh dap a, chhàn pawh ka chhâng lo.

Amah záwk chu a che mual mual a, pheikhawk a bun a, ka kutah chelhin pindan aṭang chuan min kai chhuak a, a awm dan chuan min ṭhawng ang reng viau nàin, dan pawh ka tum chuang lo, a kaih ang àngin ka kal mawl tawp a ni ber.

A car kawngkhar a hawng a, min ṭhut luhtîr zui zat a, car chhûnga kan han awm dun chiah chu boruak a inthlak danglam chawpchilh nghal vek ni mai hian ka hria.

"Hmâna ka hriat ṭhin Mimii tho kha i la ni," kan ngàwih vang vang hnu chuan a ti sup a, ni e, a sawi dik chiah, hmâna a hriat ṭhin Mimii, amah phatsantu, tun thlenga a la huat chhunzawm zel tâk hmeichhia ngei kha ka la ni e.

"Vawikhat tal min ngaihtuah chhuak ve ṭhin em?" a rawn ti leh a, "Hetiang thu sawi tur hi kan ni lo," ka ti ve ta nge nge!

"Kan ni alawm," ti hniam dap hian ka lam a rawn hawi a, kei erawh hmâ lam ka en ngar ngar thung.

"I sawi tum chu ka hria alawm, mahse a theih loh, Mâmtea vang pawh ni se kan chêngho thei lo ang, i thei lo a, kei paw'n ka thei bîk lo, mahse a pa i ni a, eng harsatna mah ka siam lo ang che," ka ti tlang ta rawih a, ka thaw chhuak zui hap bawk.

"Kan chengho thei alawm, hlim takin," a rawn tih chuan a lam ka hawi lo thei lo.

"Ni lo Salmon, eng harsatna mah siam belh che ka tum tawh lo ka tih kha, kei ka dam chhûng chu i hlim dâwn lo tih ka hria asin, engtin nge khatiang thu kha i la sawi ṭalh theih záwk? I mi huat em em nen chenho a, hlim i la inbeisei a maw? Ni lo, ka thei lo, min hua tih hre reng chunga chenho zawng ka zuam thlawt lo a ni," ka ti fiah raih raih a, mitthlâah hun kal tawh a rawn lang zut zut a, kan sawi ta sa sa, engkim sawifel vek law law ila a ṭha ang.

"I hmêl ka hmuh apiang hian min rinna i hloh tawh tih ka hre nawn fô a, chuvangin Mâmtea awm tawh mah se, keini pahnih hi chu awm dun thei kan ni lo, intihnàt tawnna mai a ni," ka ti leh sap sap a, ka thusawi chu a pawm zâwng ni hram se ka ti tak zet!

Ka malchunga ka kut dah chu a rawn chelh a, ka kutzungṭang inkârah a kut zungṭang a rawlh lut a, a lam ka hawi chu rilru nàt hmèl zet hian min lo en a, a hmêl lan dan chuan ka thinlung a tinâ zual a, ka hawi sawn ta ringawt bawk.

"A tir tê aṭang khan, nangmah vang hian inchhirna tur engmah ka ti lo, keimah vang záwk a ni," a ti thum chhal a, a hmui lûm thar tharin ka kut a tawh rual chuan ka mit ka chhîng sawk a, ka bianga mittui luang chu dan pawh ka tum tawh lo.

"I tâna ka thinlung inhawng kha, phatsan nia inhriat avanga thinurna khan a tuamhlawm a, ka thinlung kha a sô bulh bulh a, i nâ tih hre reng chungin ka en liam che a, thudik ka hriat hnuah pawh ka thinrimna kha meipui ang maiin a la alh hluah hluah a, mahse ka rilru a fìm meuh chuan engkim a tlai zo tawh," a ti dam dap dap a, ṭah loh ka tum ngial paw'n ka thei lo, ka insum thei thlawt lo a ni.