𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟏𝟒]

SALMON

By

Havali Adam

Bung 14-na

Thawm chhuah miah lovin a che vel ka thlir reng a, nâ zet hian bang a chum leh dawt ṭhin a, chutiang taka a thinrim chu ka la hmu ngai lo. Chutia thawm a reh ṭhuap lâi chuan Rinkimi a lo lut a, Salmon-a chu a kuah a, a hnem a, a ṭawng thlamuan siam siam a, Salmon-a laka a tih ang chu tih theih ve ka châk tak zet a ni.

Pindan aṭang chuan a hruai chhuak a, an chhuak tur chu Rinkimi chuan thir thingrem awmna lam a rawn hawi zawk a, keimah tak erawh min hmu lo hlauh a, ka hlauthawng hman viau nghe nghe!

'Kal tawh rawh' tih message ka dawng a, engtin nge ka awm dan zawng zawng chu an hriat theih ka hre lo a ni. Ka message dawn ang chuan ka che chhuak ta riai riai a, ka fimkhur em em a, min hmutu an awm ang tih mawlh chu ka hlau a ni.

Kan in ka thlen hmâ hretin message ka dawng leh a, file chu tûmah hmuhtîr lo turin leh kawl ṭha rih turin min hrilh a, message dang a rawn thleng leh a, mahse ka en zui duh tawh lo, ka awm àwmin ka awm tawp a, eng thil mah tih chàkna rèng ka nei lo bawk.

Chumi zan chuan Salmon-a ka call leh a, beisei loh deuhin phone call a lo pick up teh mial a, damdawi ina a nau a awmpui thu a sawi a, an damdawi in awmna ka zawh chuan min hrilh ve mai a, muangchang lo takin ka che chhuak nghal a, eng pawh hmâchhawn dâwn ila Salmon-a hmuh chu ka tum bur!

Damdawi in ka thlen chuan Rinkimi hmêl ka hmu nghal zat a, intitatu tak hian Salmon-a hnaih takin a ding ran a, Salmon-an min rawn hmu chiah chu engnge a hriat ka hre lo, ka lamah a rawn pen phei pawk pawk a, nghet zet hian min kuah a, ka hamhaih luatah awm dan tur pawh ka hre mai lo.

Chutia min kuah lai chuan Rinkimi chu a lo meng ling hlar a, min thah duh hmêl hi a pu a, mahse ka ngaihven zui duh lo, ani ai Salmon-an ngaihven a mamawh záwk tlat!

Salmon-a hnungah chuan ka chûl a, ka thiam ang táwkin ka hnem a, a taksa aṭanga mi nam hlâ deuh hlekin ka chalah a fawp vang vang a, ka laka a chet dan chuan ka lung a tichhe lehling záwk, a chhan chu min huat ngawih ngawihna tur thil ka ti vek tawh tlat a tin a ni!

Mahse, engnge duhthlan tur dang ka neih? Ka ti lo a nih chuan amah Salmon-a ngei pawh a thi dâwn asin, chu chu ka phal hleinem! Engtik nî ah emaw chuan engkim a la hrechhuak dâwn tih ka hria, chumi hunah chuan huat namen lovin min haw ngei bawk ang, mahse amah ka hmangaih avanga engkim ti ka ni tih erawh ka hrilhfiah a ngai ngei ang.

Awitei muhil chu a rawn harh a, a mitmeng a sen ram a, a ṭah a la chhuak tak zet tih a hriat hle. Rinkimi chuan zawldawh aw tak hian a lo ṭawng thlamuan siam siam a, kei erawh ka inrawlh buai lo law law a, a rilru pangngai huna biak ka thlang záwk a ni.

Chumi zan vek chuan damdawi in aṭangin an chhuak a, in lamah kan inphur haw a, an inah pêng kawiin rei lutuk lo ka awm ve rih a, dâr 9 leh a chanve velah ka haw a, Salmon-an min thlah thlap bawk.

Salmon-a hmêla thinrimna chu thup tum viau mah se ka hmu thiam vek a, a èng lam zâwng hlirin thil ka sawipui a, a ṭawng tam lo sa nen, a ṭawngkam a bul hmuk hmuk ṭhin khawp mai.

Ka rilru tè tèin 'ka tihpalh Salmon' ka ti leh ngawt ṭhin a, engkim a hriatchhuah hun ka huphurh tak zet a, ka chungah engtiang pawhin ṭawng se emaw, engtiang pawhin che se, dem thei ka ni lo ang.

A sawi dan chuan an mi chhui lai pakhat, Shillong-a hmuh a nih avangin a zin bo a, chu chu min rawn be ngai lo tia ka vui hun lâi vel kha a ni a, min biak ngaih loh chhan ka hriat hnu chuan amah ka khawngaihna a zual a, a tân phatsantu ang mai niin ka inhre bawk.

Car kawngkhar hawn tuma ka chelh lai chuan phone call a dawng a, a naute hnen aṭang niin ka hria, "Lo chhuah hauh suh ang che u, ka lo kal nghal ang," a ti chang rut a, chhuah ka tum tawh pawh chu ka chhuak leh ta lawk lo.

"Thil thleng a awm em ni?" ka tih chuan, "Ka nu thattu an man tawh," a ti bul hmuk a, ka thin a phû nghal dawt dawt a, ka hlauthawng ru em em bawk.

"Engtin nge i tih dâwn?" ka ti leh a, "Engkim a sawi lo a nih chuan ka that ang," a ti chang bawl a, ka nghing dawt a, ka thil tih avang khan inchhirnain ka khat a, mahse engkim a nih tur ang a ni vek tawh si!

"Ka kal nghal a ngai, hun ka neih veleh ka lo bia ang che," ti supin ka kut chu a fawp vang vang a, buk khum nghatin car aṭang chuan ka chhuak a, mittui tling pam hian a tlan liam lai ka thlir a, ka thil tihsual rah ka seng ngei dâwn a ni tih ka chiang viau bawk.

In ka lut chu ka nu'n eitur a lo siam a, ei tura min tih chuan ka ei ve nghal mai a, pindanah ka chho tlang nghal a, mahse pindan chhûng ka lut chiah chu vawilehkhatah ka luak a rawn chhuak thut a, ka uak zui ṭhat a, ka hmui ka hup vat a, eng rim berin nge ka luak tichhuak tih erawh ka hre thei lawk lo.

Pindan chhûngah chuan ka tei kual ka tei kual a, ka hnâr ka len a, mahse engmah awmzia a awm chuang lo. Bathroom-a ka lut tur chu ka uak leh ṭhawt a, chuta ka thil hriatchhuah tàk chu, ka nu thil siam ka ei khan la luak a tichhuak chu lo niin, mak ka ti khawp mai.

Ka ngaihtuah zui rauh rauh a, thil eng emaw hriatchhuah nei thutin ka meng bial kawk a, ka pum chu ka dawm thuai a, ka thin a phu dawt dawt a, ka ngaihtuah chian pôh leh ka taksa awm dan danglam chuan ka thin a tiphu rang zual sauh bawk.

Nurse ka ni a, ka awm dan chu rinhlelh rual lovin hmeichhe rai tir awm dan chiah chiah a ni tih ka hre chiang a, ka rilruah Salmon-a a lo lang hmâsa ber a, ani nen khan kan chesual tawh ngei a, mahse thil dang a thlen zui zel erawh ka beisei lo hrim hrim a nih kha!

Amaherawhchu, kan chetsual hun nen chhut chuan rai thei dinhmunah ka ding tlat! Ka rai inring viau mah ila test kit hmang ngeia finfiah ka duh a, amah Salmon-a pawh hrilh chì ah ka la ngâi lo.

A tukah chuan test kit ka lei a, ka in-test ta ngei a, ka lo rai ngei a ni tih ka hriat rual chuan hlimna leh lungngaihnain min tuam a, Salmon-a fa ngei ka pai chu ka lawm a, mahse a laka ka thil tihsual tenawm tak a hriatchhuah hun tur ka ngaihtuah a, ka lungngai làwk a ni.

Rilru sêngin dawrah ka ṭhu ngâwi reng a, a nu an vuina a la rei lo bawk nen hrilh rih loh chu ṭha záwkin ka hria a, kâr khat vel han liam phawt se, eng pawh hmâchhawn huama hrilh ka rilruk a, a fa ka pai tih a hriat hunah chuan thil a danglam ve thei tho bawkin ka hria.

Keimahah chuan hlim rukna riau hi a awm tlat a, nu ka ni ve tawh mai tur chu mak ka ti a, chutah ka mipa hmangaih Salmon-a fa ngei a la ni zui a, chu chuan min tihlim ru veng veng a ni ber e.

Zan khat chu phone number lawng aṭangin message ka dawng leh a, 'file zawng zawng kha hal ral vek rawh' tih hi a ni a, a hmâ zawnga kawl ṭha tlat tura min ti kha a ni si a, chuti teh thuta message ka dawng leh lawi si chu ka hrethiam lo hle.

Phone call ka dawng zui zat a, mahse chu erawh Salmon-a hnen aṭangin a ni thung. Ka pick up rual chuan kan kawmchhaka a awm thu a sawi a, min hmuh a duh thu a sawi bawk a, chutia kan inhmu dáwn a nih rau rau chuan ka rai thu hrilh ta law law pawh ni ila a pawi lo maithei a ni.

"Engati nge car chhûngah kher min hmuh i duh a? Inah chhuk ila," ka ti zàng vâh a, mahse a hmêl tak run ka hmuh rual chuan thil dik lo a awm tlatin ka hria.

"Engati nge? I hmêl a va dik lo ve, thil thleng a awm em ni?" ka tih leh chuan chìk tih hriat tak hian min melh a, ka ngaih a tiṭha lo kher mai.

"I thiltih pawizia hi i hria em?" nghet churha a rawn ti chiah chu ka thin a phû nghal dawt dawt!

"Engvanga inrawlh nge i nih? Engvang teh hrep nge!?" thinrim zet hian a ti chhur chhur a, engkim a hrechhuak tawh tih a hmêlah a hriat ngawih ngawih a, ka kimki chawih a, ka ṭawng lawk thei lo.

"Sawi rawh!" a rawn ti leh ṭhawt a, "Salmon...." ka ti sep a, ka mittui a hnám ṭiam ṭiam a, a lam pawh ka hawi ngam tawh lo, a hlauhawm tak zet!

"Hetiang hmeichhia hi i nih ka ring lo asin," thinrim insum tih hriat taka a tih chuan ka ṭap lo thei tawh lo.

"Engkim hi......" ka ti thawp raih a, "Ka.....ka hmangaih vang che a ni Salmon, chàn che ka duh lo a, hrilh che pawh ka duh lutuk, mahse min vau bet tlat a, duhthlan tur dang ka nei lo," ka ti chuai raih raih a, ka kutah thlalak chi hrang hrang a rawn dah a, chung thlalak te chu ka lanna vek a ni.

"Hmangaihna i ti maw, ni lo, hei hi hmangaihna vang a ni lo," ti nghutin, "Chhuak rawh, nang hian min bum nawn tawh lo ang," a tih zawm zat a, car aṭang chuan a chhuak a, ka ṭhutna lamah a rawn kal a, a pawhin min pawt chhuak a, ka rilruah chuan nàtna bak a awm thei tawh lo.

"I file dah ṭhat kha min pe lo a nih chuan, i chungah hian engmah tih hreh ka nei lo," a ti chhur chhur a, min pawt kal nawk a, in chhûng kan luh lai te chuan hrehawm ka ti tak zet!

Salmon-a hmêl an hmuh rualin ka pa záwk chuan a lo bia a, Salmon-a paw'n thinrim insum tih hriat fahran hian a chhâng tawi sup a, ka pindanah kan inzui chho nghal daih bawk.

"Khawiah nge a awm?" pindan chhûng kan luh rual chuan a ti chang rut a, "Salmon, thil hrilh tur che ka nei," tia ka ṭawng zo chiah chu a che phut a, ka hmaiah hmer sawkin min nawr hnung tawlh dawt dawt a, bangah min nawr chilh rawk a, a thinrim hmêl rapthlak tak chu en pawh ka en ṭha ngam lo.

"Hun khawhral hman ka ni lo, ka duh chu min pe mai rawh," a ti hrawk a, ka bianga mittui luangte chu a tân zawng engmah lo mai a ni.

"Ka dawhtheihna hi fiah suh ang che," a ti vawt leh ruih a, nâ zeta ka hmai a hmerna chu a thlah a, ka kâ chhûng a nâ zui nghal vawng vawng bawk.

"Salmon......" ti hniam sapin file pek pah chuan ka melh chho ral a, rei lo tê tal min ngaithla se ka ti tak zet!

"Tuna chinah, ka hmâah i hmêl rawn in lan tawh ngai suh," tih leh chhuah a rual a, pindan aṭanga a chhuak chiah chu ka zawi hnawk a, chhuatah ka ṭhusawp nuaih a, lungchhe zet hian ka ṭap feih feih a, ka rilru a nâ ngawih ngawih bawk.

Zankhuain ka muhil lo a, ka rilruah Salmon-a bak thil dang a awm thei hek lo. Ka chunga a chet danah chuan dem thei ka ni lo a, a bul chu keimah ka ni! A rilru ka tinâ tawpkhawk a, ka tân chuan a fa ka pai mêk thu pawh sawichhuah chì ziazâng a ni lûl lo e!

Ka àt man ka têl nge, ka dawihzep man ka seng záwk pawh ka hre hrang thei tawh lo a, ka chungah eng pawh thleng se, vui thei ka ni hek lo, a chhan chu inrawlhna ka nei tlat a, engtik nî ah emaw chuan hmingchhe takin, mi zawng zawng sel luai luai kâi khawpin ka la awm ngei ka ring nghet bur bawk.

A tukah chuan tualthattu man a nih thu chuan hmun tin kil tin a luah a, hlauthawng reng rengin hun ka hmang a, mualpho hlauhnain ka khat a, ka nu leh pate'n ka thiltih tenawm tak an hriat hun tur ka dâwn ngam lo a, ka zak a, hmeichhe rapthlak tak ka ni tih an hriat hunah chuan min tuithlar duh hial ang ka ring.

Hahdamin hun ka hmang lo a, nilêngin ka awm a nuam lo tluan zak a, ka thiltih sual rah ka seng mêk tih hrilh nawn ka ngai lo chiang hle. Engkim a nih tur ang a ni vek tawh tih hre mah ila keimahah chuan inthiam lohna nasa tak a bet reng a, min man turin police an lo kal thuai ka ring ru reng ṭhin.

Amaherawhchu, zan thlengin kan inah police hmêl rèng an rawn lang lo hrim hrim a, thil awmzia ka hrethiam lo a, pu Lawrence-a leh a hote zawng zawng man an ni vek tawh a, ka tel ve miah lo chu mak ka ti a ni.

Tin, police lamin engkim an haichhuah vek hnuah pu Lawrence fapa chu Jeremy-a a lo ni rèng tih ka hre ve chiah a, pu Lawrence phei chu police laka tlanchhiat a tumna lamah kah hlum a ni a, chutiang bawkin a fapa Jeremy-a pawh a awmna jail-ah a inawkhlum tiin thu a thang lehzel bawk a, misualte'n an thiltih sual man an tuar laia ka him tlat lawi chu ka hrethiam lo tak zet a ni.

Chutiang boruak hahdamthlak loh tak hnuaiah chuan hun leh nî ka chhiar a, nîtin inchhir reng rengin ka hmang ral a, ka pum chhûnga naute awm, ka hmangaih Salmon-a fa ngei mai chu ka dawm leh vang vang ṭhin a, ka nu leh pate tak ngial paw'n ka rai tih an la hre lo.

Nikhat chu Salmon-a hmu turin police station lamah ka kal ta tawp a, dik tak chuan ka rilru a nuam thei ngàng lo a ni. Police lo duty te hnenah chuan Salmon-a ka hmuh ngei ngei a ngaih thu ka sawi a, an va hrilh a, Salmon-a chuan a office-ah min luhtîr a phal ve mai bawk.

"Ka mit hmuha rawn inlan tawh lo tur che khan ka hrilh chiang viau che a ni lo'm ni?" min hmuh rual chuan a ti chang rut a, a ṭawngkam chu nâ viau mah se dem thei ka ni lo.

"Engati nge min man ve loh? Engati nge ka chungah engmah a thlen loh?" ka rilrua awm reng chu ka sawichhuak ta tawp a, rum zet hian min melh a, ka ban rekah chelhin pâwnah min kai chhuak dawr dawr a, police dang lo awm te chuan min en duh hle.

A car-ah min nawr lut a, chak zet hian a tlanchhuak nghal a, engmah a sawi lo a, eng thil mah tihhreh nei lo hmêl a pu run a, a huat zawng sawi ngat ila chuan min that duh hial ang ka ring.

Hmun reh takah min dinpui a, kan awmna lâi chu kawngpui sîr a ni a, thing leh mau a ding fur a, ngâwi reng hian steering chu a hum ngawt ngawt a, ka rilru engkim hriat tum ni àwm fahrana min rawn melh chiah chu ka inthiam lo zual tak zet!

"Ka mit hmuhah rawn inlan tawh suh, ka thil tih duh loh ka tih loh nân," a ti chang ta bawl a, a ṭawngkam tin chuan min chhun thip vawng vawng a, min that châk zek zek tih hai rual a ni lo.

"I criminal record awm thei zawng zawng ka thai bo tawh a, chu chu ka nunna i chhan avanga ka tih theih sâng ber leh tawp ber a ni," a ti leh chhur chhur a, ka thaw halh a, engtin pawh min ngai dáwn se, hrilh tur ka la neih chu hrilh ngei ila ṭhain ka hria a ni.

"I ngaihdamna ka phut lo a, i mi hriatthiamna ka phut lo a, dawng tlàk lah ka ni hek lo, chuan, ka thil tihsual avang khan min haw hluah hluah mah la thil pakhat hrilh tur che ka la nei Salmon, min ngaithla hram ang che," ka tih chuan, "Ni lo, i kâ aṭanga thu chhuak reng reng hi chu ka tân bawlhhlawh mai a ni tawh," tiin min lo pawt chat hmuk a, ka melh tlawk tlawk ringawt!

"Eng thu pawh sawi rawh, ka rinna che i tichhe tawh a, ka ring leh tawh ngai lo ang che," amah bawk chuan a tih zawm nghut nghut a, ka nâ vawng vawng a, a fa ka pai mêk thu hrilh pawh ni ila a awih dâwn chuang lo tih ka chiang a ni.

Car a tinung a, ngâwi reng hian a khalh a, engmah kan sawi zui tawh lo a, kan kawmchhakah a ding a, kan vêng aṭanga a tlan liam tur chu lungchhe tak hian ka thlir a, engkim, a tir té aṭang khan siam ṭhat leh vek theih se ka ti ngawih ngawih!

Chumi nî aṭang chuan vawikhatmah kan inhmu leh tawh lo a, ka hun hman dan a pangngai hleithei lo a, inthiam lo ru reng rengin nîtin hun ka hmang a, Salmon-a ka ngâi a, ka thlahlel a, Zodini ka tlawh chânga a chanchin min zàwt ṭhin te chuan ka rilru a tinâ zual a, a lakah ka inthiam lo leh nge nge ṭhin.

Hun a kal zel a, thlate an liam a, Salmon-a nena kan inkâr chu siamṭhat leh theih rual lovin a tawp ta hmak a, nîtin amah ngâiin ka rum a, ka ṭap a, ka inchhir a, mahse engkim chuan sawtna rèng a nei si lo.

Ka dinhmunin chhiat lam a pan riai riai a, mahse Zodini erawhin hmâ a sawn tial tial thung a, an inah hial an inenkawl tawh a, Salmon-a nena kan inṭhen thu a hriat nî chuan mak a ti hle bawk.

Tin, ka pum chu a nih dan tur ang takin a ṭhang lian ve zel a, ka nu leh pate bulah pawh thil engkim, zep nei miah lova ka hrilh a ngai ta! Ka huphurh tak zet a, min ngaih dan tur ka dâwn ngam lo a, mahse thudik ka hrilh lo a nih chuan awm ngaihna ka hre chuang hauh si lo.

Ka huaisenna zawng zawng sâwngkhawmin ka nu leh pate bulah chuan engkim ka sawichhuak ta nge nge a, ngaihdam ka dil awl lo a, mak an ti lutuk chu sawi mai tur an hre lawk lo a, Salmon-a fa ka pai mêk thu ka sawi leh chiah phei chu an hmêl pawh ka en ngam tawh lo.

Salmon-a hrilh lo turin ka ngen zui lawm lawm bawk a, rilru hah tih hriat tak hian ka pa chu a ding hluai a, ka nu erawhin min en tlawk tlawk a, an fanu rapthlakzia an hriat hnua an lan dan mawlh chuan ka thinlungah inthiam lohna a belhchhah a, ka zak tak zet bawk.

Salmon-a hnena a fa ka pai thu hrilh tlâk ka nih loh thute chu ṭap chungin ka sawi a, a laka ka inthiam loh êm avangin hrilh loh hram turin ka ngen lawm lawm a, ka pa chu che thutin min kuah thlawp a, eng thu mah chhakchhuak lo mah se min lainat tih hai rual a ni lo.

Chumi zan aṭang chuan min hmangaih zual sauh emaw tih tur hian an awm a, ka lo rai kher bawk nen ka pa office bâng chuan ka eitur a lo hawn ṭhin a, ka nu pawh a bang chuang lo, min ngaihsak a, nau pai laia a thil tawn chi hrang hrang, a ṭha lam leh chhe lam min hrilh ṭhin a, ka tâna ka nu leh pate hmangaihna lo pâr chhuak chuan khawvel dangah min chentîr ni mai hian ka hria.

Hunpui kan hnaih chho a, boruak lêng vel chuan Salmon-a hlir min hriatchhuahtîr a, a châng chuan a kamis, ka la kawl ṭhat reng chu khumah ka mutpui a, ka pawm a, a bula awm ang maiin ka inchan ṭhin.

Ka thinlungah a riak reng a, paih bo vang vang ai chuan hriatreng ka duh zàwk a, ka pum chhûnga nautê pa a nih vang tal pawh hian hmangaih zui zel ka duh a ni.

Ka nu erawhin theihnghilh mai chu ṭhain a hria a, thu ṭha tak tak sawiin min fuih ṭhin a, mahse ka thei lo, engtin tehlûl nge ka theihnghilh theih ang nì!

Kei, amah hmangaihtu hian, a hmêl leh nungchang mai ni lo, a bula awm thlamuanthlakzia te kha theihnghilh a hnèkin ka kham lo a, ka la thlahlel fàn záwk asin!

Nimahsela, tunah chuan mihringte'n hmâ hun kan hriat lohzia a tak ngeiin ka tawng ve ta, amah ka hmangaihna hi hmangaihna dik a nih ngai chuan, ka thawk tawp thleng a daih ngei ang.