𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟏𝟏]

SALMON

By

Havali Adam

Bung 11-na

"Eng thil nge i ṭhiannu khan a hrilh che?" Jeremy-a aw chuan ka ngaihtuahna ata min tiharh zawk a, ka lam a lo hawi lo nàin min lo hmu ru reng a nih hmèl!

"A pawimawh lo," ka ti sap a, ka ṭawng ring lo a, mahse a hriat phak ngei erawh ka ring.

Chu ṭawngkam, 'a pawimawh lo' tih ka hman lâi chuan chawplehchilhin Salmon-a ka hrechhuak a, ka duh thu ka hrilh tih min hrilh ṭuma a ṭawngkam hman ngei kha a ni a, hun kal tawh ka mitthla let vawng vawng a, pasal nei mai tawh tur mah ni ila ka rilru chu hmun dang daihah a awm a ni.

Minute a liam zel a, mi an lo kal belh zel a, dik tak chuan ka rilruah Salmon-a bak a awm thei thlawt lo. Nimahsela, lo kal pawh ni se engmah a danglam tawh dâwn lo a, beiseina ka nei tawh hek lo.

Chairman chuan min dintîr a, Pathian thu chhiar paha kan kut a rawn chelh lâi chuan ka mittui a parawl a, mi dangin an hriat ka hlauh avangin ka khap let sak sak a, chutih lâi tak chuan kawngka a rawn innam hawng ṭhuai a, kohhran hall-a mi zawng zawng kan hawi ṭhap a, Salmon-a hmêl ngei mai ka hmu chiah chu ka ṭah a chhuak zual tak zet!

Kan dinna lam panin a rawn pen phei nghut nghut a, engnge tih a tum ka hre lo a, a awm dan leh chet dan ang ang chuan kan thlir ṭhap a, kan bul a rawn thleng chiah chu Jeremy-a kawr âwmah a ṭham a, mipui an lo phu mur mur a, Jeremy-a ṭhianpain lo khawih a tum chu a nam thal tawp a, ka kutah a rawn chelh zui chat bawk.

"I thiltih tenawm tak hi i la thihpui ngei ang," Salmon-a chuan a ti hniam chhur a, Jeremy-a lah lo zàm duh bîk lo, "Police i ni tawh lo tih i theihnghilh a va ang ve, he lâi hmun aṭang hian chhuak la, inthiarfihlim thuai rawh," a lo ti nghet charh charh a, an ṭawng ring lo dun khawp mai.

"Kan inkâr hi a la fel lo tih hria ang che," ti nghutin Salmon-a chuan min kai kal nghal a, chu veleh Jeremy-a chu lo inrawlh vatin, "Thlah nghal rawh," tih leh ka bâna lo chelh a rual a, Salmon-a chuan nâ zet hian a hnek thal hnawk a, min kai chhuak zui nal nal bawk.

"Salmon...." ka ti dek dek chu, "Engmah sawi rih suh," a lo ti hmuk a, mahse a thu ka zawm thei rih tlat lo.

"Hetiang hian awm suh Salmon, min kaltîr rawh, i thiltih hian engmah a thlak danglam dâwn lo," ka ti fiah fak a, ka kut chu ka phih thla sawk a, Zodini leh ka nu leh pate an lo lang zui chat bawk.

"Thil hriat loh pakhat ka la nei tih chauh lo chu engkim ka hre tawh," a ti khauh hmuk a, "Engnge thil awmzia hi?" rawn titu chu ka pa a ni a, a mitmenga zawhna chu ka tân chhàn sèn rual a ni lo.

"Min lo zui a ngâi, in vaiin," Salmon-a chuan a ti nghet churh a, a car-ah min nawr lut a, hmanhmawh zet hian Zodini a lo chùang lut thuai a, Salmon-a chuan ka nu leh pate lam hawi chung hian, "Min ring rawh u, in nunna hi a derthawng," a ti leh a, a naute chu a ko a, a naute chuan motor dangah an nawr lut titih a, kan tlanchhuak nghal vang vang bawk.

Kan hmâah ka nu leh pate an tlan a, keini'n an hnung kan dawl a, keimahah chuan zawhna tam tak a awm a, engtin nge engkim a hriatchhuah tih mawlh chu ka hre duh a ni.

Thui pawh kan tlan hmâin min umzuitu an awm tih ka hria a, hlauhthawnnain ka khat a, ka hmangaih Salmon-a kiangah awm mah ila ka hlauthawng em em tho. A chhan chu a thih ka hlau a, ka ṭhian leh ka nu leh pate an thih ka hlau bawk a, kei erawh thih mah ila pawi tihna ka nei tawh lo, ka bei a dawng tawh a ni.

Kan tlan zel a, min umzuitute chuan min hnaih tial tial a, vawilehkhatah silai a rawn puak ri ta pawp pawp a, Zodini nen chuan inkuahin kan ṭe ṭhawt a, hlauh luatah ka ṭap lo chauh a, Jeremy-a lak ata ka tlanbo theih ka ring tawh lo hrim hrim bawk.

"A chak thei ang berin tlan ula, keiin ka lo hruai pêng ang, in mi phurte kha hmun himah dah ula, in nu leh pa tlukin vênghim ang che u," ti churh churhin Salmon-a chuan phone-ah mi pakhat, a naute zinga mi ni ngei tur hi a bia a, silai a rawn puak zui ṭhuai a, Zodini nen kan ṭe leh ṭhawt a, hlauhthawnna hlirin kan khat tawh a ni ber e.

Khawi lam kawngah nge kan tlan zel pawh ka hre tawh lo, kawng pêngah kan tlan ta vang vang a, motor pathumin kan hnungah min um zui a, kan tlan chak thawkhat bawk a, kawng kawiah te chuan kan inthen deuh dáwrh dáwrh a, thih leh dam inkâra awma kan ni tih chu hrilh hranpa pawh kan ngai lo.

Chutia vung taka kan tlan lai chuan bike pakhat hian chak zetin min rawn tlan pel fua a, kan hmâ zawn hlâ takah a ding a, kan tlan hnaih zel a, thawklehkhatah motor hmâ darthlang chu a rawn keh chuaih a, Salmon-a chuan kun turin min hrilh thuai bawk.

Thil puak ri ṭhuai ka hriat rualin boruakah kan kang dàwrh a, nâ zet hian kan insawh nawk nawk a, motor darthlalang ka tauh keh chuaih rual chuan ka lû a hai sawk a, thil hre zui zel thei dinhmunah ka ding ta lo.

Hmeichhe ṭe thawm hian min tiharh zawk a, ka mit ka men rual chuan khua a lo thim vek tawh a, ka hmâ lawka Zodini lo ṭhu kun ngul chu ka hmu hmâsa ber a, ngaihsak tuma ka che tur chu ka thei ta hauh lo mai.

Phuarhbeh ka ni tih ka hre chawpchilh nghal a, ka harh tih a hriat rualin Jeremy-a chuan ka hmai a rawn hmer sawk a, rapawm zet hian min nuih a, ka thle sawn sawk a, ka hmaia a beng chiah chu ka tlu chiang hle.

"Nangnu teh hrep avang hian ka buai lohna turah ka buai rei mah mah tawh," ti hrawkin ka samah a rawn kek a, min phih tho sawk a, nâ zet hian ka hmaiah bawk a hmer leh a, ka kâ chhûng thlengin a nâ vek thei!

"Ngun takin ngaithla rawh, ka thupek zawm ang che, kha mihring phiangsen kha heta lo kal turin i ko tur a ni," Jeremy-a chu ka melh ngawt ngawt a, a hmâ ai zawng khan a rapthlak tawh záwk!

"I thil duh tipuitling turin engmah ka ti lo ang," ka ti lèt salh a, tenawm zet hian a nui a, keimah ni lovin Zodini záwk chu a kek dak awrh a, ka meng bial nghal kawk bawk.

"A nih chuan i ṭhiannu thi lai hi i hmuh mai a va ngaih hmèl ve," ti nghatin, "Khaw maw, chemtê kha min han pe teh u," a tih zawm zat a, mipa dang lo awm te chuan chemtê chu an pe a, ka tal vak a, mahse engmah awmzia a awm si lo.

"Ni lo, duh tàwk rawh Jeremy, keimah záwk hi min that mai rawh, ka ṭhiannu chungah khan engmah ti suh," ka ti nghal chiam a, Zodini erawh a taksa a zawi hnuang a, hliam nâ tak a tuar a nih ka ring.

"Ka sawi kha i hre tawh lo em ni, ka duh ka hmuh theihna tur a nih phawt chuan engmah tih hreh ka nei lo ka tih tawh kha," tenawm zeta nui hak hak pah hian a rawn ti a, chemtêin Zodini chu a tin uaih a, ka ṭe chhuak leh ta ṭhawt!

"Duh tàwk rawh Jeremy, Salmon-a awmna ka hre reng reng hleinem, engtin nge hria se min tih?" ka tih chuan, "A awmna i hriat a ngâi lo, i bia ang a, a lo kal mai ang, chuan, tunah hian i nu leh pate buaipui turin ka hote an thang mêk a, ka thu i zawm loh a nih vaih chuan an zavaiin i chân ang," a lo ti hmawk hmawk a, duhthlan tur dang ka nei ta thawt lo.

Phone pakhat hi min pe a, Salmon-a call turin min ti a, engtin nge ka thluak chhûngah a phone number a awm reng tih an hriat pawh ka hre lo. Phone number ka hmet chhuak a, ka dial zui nghal a, a ring tawp dâwn tawh emaw tih hnuah a pick thei hram!

"I ṭha em? Salmon?" tih chu ka thusawi hmâsak ber a ni a, engtin nge a awm ka hre lo a, a ṭhat leh ṭhat loh ka hre lo a, engtin nge motor khata chùang reng si kha kan inhloh daih theih ka hre lo a ni.

"Mimi.....!? Khaw'nge in awm!?" min ngaihtuah tih hriat tak hian a rawn ti thuai a, chutih lài vek chuan Jeremy-a chu lo inrawlhin, "Khatiang thu holam sawi nân hun kan nei lo," a lo ti hmuk a, ka phone ken lâi chu a rawn phih thla sawk bawk.

"Nangmahin lo kal ang che, a nih loh chuan an pahnih hian an thi ve ve ang," Jeremy-a chuan a ti hmarh hmarh a, phone a hmeh tawp rual chuan ka lamah a lo phei a, min bêng hawi sawk a, ka biangah mittui a luang thla nghal zawih a, mahse hmeichhe nep tak anga awm ka tum reng reng lo.

"Mihring pawh i ni lo, ramhuai i nih hi," ka ti ṭhawt a, tenawm zet hian a nui a, "Min la hrechiang dâwn chauh alawm, ka that hreh tawh reng reng hleinem che, ka mi dah ṭhat châk tak mihring ka thah theih nân hmanruaah ka hmang mai che alawm, i dam rei tawh dâwn lo," a rawn tih chuan ka tha a khur a, hlauhthawnnain min tuam a, dam khawchhuak thei dinhmunah dingin ka inhre tawh lo bawk.

Eng eng emaw ni a sawi a, amah leh amah a insawi thinrim a, a inhrosa a, a kut thak hiah nân ka taksa a hmang a, vawi tam min bêng a, a chângin min kek dak leh awrh ṭhin a, ka mittui luang te chuan a tân awmzia pakhatmah a nei lo.

Zodini taksa zawi hnuang a chhir pawp pawp lâi te chuan tih theih nei si lovin ka lo ṭap vawn vawn a, pawisawi lo ka ṭhiannu tawrh ai zawng zawng chu tawrh ka duh a, nikhaw hre lovin a awm tawh tih hre reng chunga an la sawisa duh cheu chu rapthlak ka ti tak zet a ni.

Vawilehkhatah silai a rawn puak ṭhuai a, ka bul lawka ding mipa chu nâ ti tak hian a kun ngawih ngawih a, rei pawh daih lovin ka hmâ lawkah chuan a indawm let run a, silai puak riin a zawm mawlh mawlh a, ka lamah Jeremy-a lo phei thuaiin min kai dawr dawr a, ka kal ṭha thei lo te chu engah mah a ngâi lo.

Ka taksa a chauh tawngkhawng êm avangin ke ka pen hleithei lo a, ka tlusawp a, mahse Jeremy-a chuan ka chauhzia hrethiam hauh lovin, ka awm ang áng chuan min kai kal hlawk hlawk a, a hnuhin min hnuk ta hial a, ka engkim chu a nâ chhuak vek ni mai hian ka hria.

Thui fê min hnuh hnu chuan leiah min theh let hnawk a, hruiin ka kut leh ke a ṭawn bet a, ka hmâ lawkah chuan dil, zau lutuk lo, sangha dil ni àwm tak hi a awm a, engvanga chu lai hmuna min hruai chu nge a nih ka hre lo a, ngaihtuahna sêng turin chakna ka nei tawh hek lo.

"A pawi ka ti, ka thah ngei che a ngai tlat, mahse ka kut lawng hi chuan ka that thei lo che, nangmahin i thi tawp ang," tiin Jeremy-a chuan min kuai ding a, ding ngil thei lova ka awn duai duai chu min chelh a, ka mit takngial pawh ka meng hleithei tawh lo a ni.

"Mangṭha le," tih leh min thlah a rual a, ka âwmah rawn nam vakin tui chhûngah ka pil thla nghal bàwrh a, dam khawchhuak tura beih ka tum buai tawh lo a, ka rilruah chuan thil chi hrang hrang a rawn lang zut zut a, ka thi ngei dáwn tih ka pawm nghet hmiah tawh bawk.

Ka ṭhiannu lakah ngaihdam ka dil rilru mawlh mawlh a, ka inthiam lo a, thihhnu piah lam rama kan inhmu leh te a nih ngai chuan a chunga thil ṭha lo thleng thei zawng zawng lakah ka venghim tawh ngei ang.

Ka taksa nâ chuan vawilehkhatah min tiharh zawk a, min châwi nawlhtu awm ang mai hian ka kang lawp a, ka taksa chauh luatah ka mit ka meng thei tawh lo a, engmah ka hrechiang tak tak thei tawh lo bawk.

"Harh teh...." ti paha ka biang bêng thek thektu chu tunge a nih ka hre lo a, mahse khawvel boruak ngei hip leh theia min siam avang chuan lawmthu sawi ka bâ a ni.

"Harh hram teh...." tia min betu, mipa aw thum chhal chu ka thil hriat hnuhnun ber a ni a, ka rilru leh taksa chuan engmah an hre zui tawh lo.

Ka thil hriat leh hmâsak ber chu nàtna a ni a, engkim a reh ṭhuap a, ka ngaihtuahna a vak vel a, ka mit ka chet ralh ralh a, fiah lo ruai hian ka meng a, ka awmna hmun chu a vâr pup ni mai hian ka hria.

Khawi lâi hmuna awm nge ka nih tih hriat tuma ka thle tur chu ka khawng deuh ṭhum a, ka taksa nàt dan aṭang chuan ka dam lo hle a nih ka ring. Ka hnârah oxygen hipna khawl a invuah ṭup a, damdawi inah ka awm tih ka hrethiam ta chiah bawk.

Eng emaw chen chutiang chuan ka awm a, ka awmna pindan kawngka a lo inhawn rual chuan doctor ka hmu nghal zat a, amah rawn zuitu a hnunga lo kal mipa hmêl ka hmu leh chiah chu thil tam tak ka hrechhuak zut zut a, ka biangah mittui a luang nghal zawih zawih a, mahse engmah ka sawi thei rih tlat lo.

"Mimi......" ka harh tih a hriat rualin Salmon-a chuan min hnaihchilh thuai a, ka samah a chûl a, hrehawm a tih hmêl hle.

"Hnaih lutuk rih suh," lo titu doctor thusawi chu engah mah a ngâi lo a, ka kut chelhin a fawp vang vang a, a mitmenga min ngaihtuahna lang chuan ka rilru a ti zuau zual a, ka mittui ka dang sêng mawlh lo.

"I ṭha leh dâwn alawm," ti dam dap hian ka sam a chûl hliau hliau a, a awm dan engkim chuan ka ṭah a tichhuak zual sauh záwk!

"Ka....ka thi tawh dâwn emaw ka ti asin...." ka ti thâm chhal a, ka ṭah aw a ni mah záwk a, ka chalah a rawn fawp zui zat bawk.

"I him tawh e," a ti dam thluam a, ka ṭah la chhuak viau mah se a ṭawngkam chuan min tihahdam sawng sawng a ni.

Ka harh tial tial a, ka rilru puthmang a pangngai chho a, zawhna chi hrang hrang ka zàwt a, ka nu leh pate an him leh him loh ka zawh chuan engkim a ṭhat tawh thuin min chhâng a, mahse Zodini chanchin ka zawha min chhàn dan chuan ka thinlung a tinâ tak zet!

A sawi dan chuan zai pui hmâchhawn ngâi hial khawpin Zodini dinhmun chu a ṭha lo a, doctor te'n hlawhtling takin an zai tawh ngei a, mahse a harhchhuah hun tur erawh hriat a ni lo thung.

Jeremy-a chungchang erawh ka zàwt duh rih lo, engtin pawh awm se ka ngaihtuah duh rih lo a ni. Salmon-a thusawi engkim chu ka ring a, rinhlelhna ka nei lo a, ka him tawh thu a sawi danah engkim a pangngai vek tawh a ni ngei ang.

Chutia Salmon-an min ṭhutchilh run lâi chuan ka nu leh pate an lo lut a, an hmêl ka hmu chiah chu ka insum thei leh ta ngàng lo. Ka ṭap zawih zawih a, anni pawh an lung a chhia a, an mi hmangaihna leh lainatna chuan ka ṭah a tichhuak zual a, insum ngaihna rèng ka hre lo.

Ka harh pangngai ta tial tial bawk nen ka hnâra an khawl vuah chu doctor-in min lak thlaksak a, ka bulah Salmon-a leh ka nu leh pate an awm reng a, nung dama ka la awm chu vannei ka inti a, mahse ka rilru erawh a nuam thei tak tak lo.

Ka ngaihtuahnaah Zodini a awm reng a, ka khawngaih a, a lakah inthiam lohna nasa tak ka nei a, a dam leh ngei theih nân nitin ka ṭawngṭai a, ka taksa dinhmun erawh Pathian zârah a ṭha chho tial tial thung a, ngaiawh leh thuai ka chák tak zet a ni.

Kâr khat dâwn damdawi ina kan inenkawl hnu chuan in lamah kan inhruai haw a, zantin Salmon-a a lo kal a, awm erawh a awm rei ngai lo. A rei berah darkâr khat te hi a awm ṭawk zel a, tihtur nei ang mai hian a haw leh thuai ṭhin.

Ka nu leh pate kâ aṭanga ka hriat danin Jeremy-a chu jail-ah a tâng mêk a, an sawi dan chuan Salmon-a pa thihnaah pawh khan a lo inhnamhnawih ngei a ni àwm e.

Tin, amah mai ni lo, a pa pawh chhui zui mêk a ni a, mahse ani erawh ram danga tlanchhia anga hriat a ni thung a, mahse police lamin an la chhui zui reng tho.

Engkim chuan ṭhat lam a pan zel a, Salmon-a paw'n a hna ngai a nei lèt leh tawh a, thinlung takin ka lawmpui a, mahse a hmâa a lo mualpho tawhna kha chu thai bo theih mai a nih ka ring tawh lo.

Nitin damdawi inah Zodini kanin ka kal ziah a, kan tih theih awmchhun chu a rawn harh hun nghah leh ṭawngṭai a ni mai. A chhûngte lakah ka inthlahrung a, mahse anni chuan min hrethiam hle thung.

Tlai khat chu Salmon-a a rawn lang hlawl a, mak ka tih chhan pawh tlaiah a lo kal ngai lo miau a tin a ni! Chutah ka beisei loh lutukin ka pa hnenah  zanriah min kilpui a duh thu a sawi a, a dil a ni mah záwk!

Ka pa lah chuan awlsam tê hian a lo phal mai lehnghal a, kan inphur chhuah hnu thlengin Salmon-a chet dan chu mak ka la ti reng a, mahse a gentleman thlawt, ka pa khan phal lo ta se chuan a tilui miah lo ang a, min nawr lui hek lo ang, chu chu Salmon-a mizia a ni.

A in kan thlen chuan ei rawngbàwl ka tum a, mahse a lo remti hauh lo. Ama'n engkim a siam a, a ruahman vek a, kan awm dan chu a nuam dangdai tak zet!

Chaw ei dawhkanah inhmâchhawnin kan ṭhu a, chutia kan ei ṭan hmâ chiah chuan phone call a dawng a, a buai thu a hrilh a, mahse a lo call nawn leh a, a ṭawngkam, a hmêl leh a che vel chu ka en reng a, thil pawimawh tak a nih ka ring.

"Ka kal a ngai, ka lo let leh thuai ang," tia min thawhsan a tum chu, "Salmon...." ka ti hniam dat a, min en chiang hle.

"Chaw ei khamah a kal theih mai loh em ni?" ka ti leh a, dik tak chuan kan boruak nuam dangdai tak chu eng thil mahin tichhe lo se ka duh a ni.

"A nih chuan......ei ang hmiang....." a ti dam dap a, ka thlengah chawhmeh min rawn suah a, ka lo nuih sen sen a, ani nen chuan khawi hmunah pawh ni se, nuam ka tih vek theih ka ring.

"Ka rilruah hian thil riak reng a awm a, sawipui che ka duh deuh a, mahse ni dangah ni mai rawh se," ka tih chuan, "Tunah pawh kan sawi dun thei reng alawm," a lo ti mai a, sawi a hun chiah em tih erawh ka hre lo a ni.

"Min hrilh la....." a rawn tih leh chuan hrilh tlang nghal law law chu ṭhain ka hre ta!

"I hna hi i bansan thei ang em?" inthlahrung ru tak chung hian ka ti a, engnge a ngaihdan tur ka hre lo a, a ngaihdan a lo ni lo viau ang tih ka hlau ru hle.

"Engati nge?" ti supin ka mitah tak min en a, a mitmengah chuan thil dang ka hmu zui nghal zat bawk.

"A chhan chu......" tiin ka chawl dat a, chutah ṭawng zawm lehin, "A chhan chu nang nen hian inzawmna nghet tak neih ka duh a, mahse police hna i thawh chhûng hi chuan hawttu leh hmêlhma i nei reng dâwn hian ka hre tlat a, i nunna atâna thil pawi thleng thei tam tak a awm bawk a, mahse chutiang chu i chunga thlentîr ka duh si lo a ni," ka ti ta duah a, ani erawhin min chháng lawk lo.

"Kan inkârah hian eng buaina mah awm tawh lo se ka duh a ni," ka ti leh a, engtin nge min ngaih ang hre lo mah ila, amah ka hmangaihna chuan ka thinlungah nghawng a nei lian tawh èm a tin a ni!

"Police hna hi a zahawm a, dikna leh rinawmna tel lo chuan mi nazawng thawh theih a ni lo, ka tân chuan ka nuna bet tlat a ni," a ti nghet dap dap a, 'ka bansan thei lo' ti dawt lo mah se a rilru tur erawh mi â tân lo chuan hriatthiam loh rual a ni lo.

Kan ngàwih dun vang vang lâi chuan a naute hnen aṭang bawk phone call a dawng leh a, a tho uaih chu chelh duh tawh lovin ka thlir tawp a, kawngka bul a thlen chuan a rawn lehhawi a, "Ka lo lèt har lo ang," tih leh chhuah a rual zui zat a, ka chaw ei châkna zawng zawng a bo nghal vek!

Ka inngaihtuah rauh rauh a, a lung ka tiàwi lo ni mai te'n ka hre hnuhnawh a, mahse kan thil sawi dunah khan huat tur pakhatmah a awmin ka hre si lo.

A lo lèt huna ei atân chawhmehho chu bêlah ka chhung a, ka chhûang lùm a, amah ber a awm loh chuan ei chàkna rèng ka nei lo a, lo nghah mai chu ka tihtheih awmchhun a ni.

Darkâr a liam a, thawm engmah a la rawn nei lo tluang zel a, ka ngaihtuah deuh avangin keimah záwkin ka call a, mahse a pick up thei chuang der lo.

Dâr 9 a ri dâwn hnai a, ka ngaih a ṭha lo tulh tulh a, a chhuah hmâ khan a rei loh tur thu kha a sawi ngei a, mahse eng harsatna emaw tak a tawh ka ring ta bur mai.

Ka phone ka phawrh a, ka call leh ta nge nge a, a ring ral ṭhak a, ka call nawn leh a, a ring ral leh ṭhak a, a tawp nân ti rilru chungin ka call leh a, chutah erawh a pick up ta hram!

"Ka lo thleng ṭep," phone call a lak rualin a rawn ti sup a, a hmet tawp zui nghal daih bawk.

Minute 5 hnu velah kawngka a rawn inhawng ri rak a, Salmon-a ka hmuh rualin a hmeichhe rawn pawm luh chuan ka mit a la zar a, mahse tunge a nih ka hre thei mai rih lo.

"Engnge thlenga Salmon?" ka lo ti thuai a, "Hmanhmawhin tui lùm leh puan lo la rawh," tiin pindanah a lut zui zat a, ka che ve nghal thuai bawk.

"Engnge a chungah hian thleng a?" an awmna ka thlen phei hnu chuan ka ti a, chu hmeichhia chu a nupui hlui Rinkimi ngei kha a ni tih a hmêl aṭangin ka hria a, a hlauhthawn hmèl hle.

"Tunah rih chuan engmah min zàwt suh," Salmon-a chuan a ti hmuk a, ka awm a nuam lo ru veng veng!

"Min kalsan lo ang ti raw Salmon, ka duh lo, ka tawng nawn duh tawh lo, ka thi duh lo," Rinkimi chuan a rawn ti chiam a, Salmon-a chu nghet zet hian a kuah a, Salmon-a paw'n a kuah nghet hle.

"Lungngai suh, i chungah hian engmah a thleng lo ang," ti dam dapin Salmon-a chuan a hnem a, kei erawh ka awm dan a lài tak zet!

Engtia awm tur nge ka hre lo a, sawi tur ka hre lo a, Salmon-a ni se min ngaihsak thei dinhmunah a ding bawk si lo. Ka rilruah thil chi hrang hrang a inawm pawlh nawk nawk a, an kianga awm ve reng chu dika ka hriat loh avangin pindan aṭang chuan ka chhuak ta ringawt bawk.