𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟏𝟎]

SALMON

By

Havali Adam

Bung 10-na

"Salmon...." ka ti thawp sap a, engkim chu a thununna hnuaiah a awm vek ni mai hian ka hria, hawi sawn duh mah ila ka thei tawh lo, khuahkhirh ang mai hian ka tâng tlat tlawh!

"Ka.....ih....." ka ti ban leh chap a, a rim pa hrak chuan ka vèl a luahkhat a, ka lama a rawn kun hniam riai riai lâi chuan awm dan tur ka haihchham vek a, ka lo maimitchhîng tawp ringawt!

"Salmon...." ka ti hniam leh sap a, a hming ka lam zo chiah tiha a hmui lûm thar tharin ka chal a rawn tawk chiah chu awm ngaihna rèng ka hre lo.

Che leh hrutin a âwmah min kuah bei vang vang a, min tihnàt hlau tak, mahse nghet tak si hian min kuah a, ka thinlung chu lawmna leh hahdamnain a khat a, a ângchhûngah chuan ka thla a muang hliah hliah a ni.

"I hlauthawng tih ka hria, mahse i him ang tih ka tiam a che," ka biang tawn tawna dawm chung hian a ti hniam chhal a, chu chuan ka rilru a hruai pêng a, a lak ata ka inla hrang thei ta hram bawk.

"I pa a boral tih ka lo hria a, a pawi hle mai," ka ti sap a, ani erawh chuan, "A pawi ber záwk chu thil tisualtute thil tihsual finfiahna ka neih te kha a bo vek," a lo ti thum dut thung.

"I inhnamhnawih loh hram ka beisei," amah bawk chuan a ti leh a, nichin lawka a awm dan nen kha chuan danglam leh tawh tak a ni.

"Chutiang thil ti duh tur khawpa mi ṭha lo ah min lo ngâi reng a ni maw?" ka ti hniam salh a, dik tak chuan min ngaihdan chu ka lawm miah lo.

"Thil ni thei a ni tlat," a ti leh lèk phei chu ka melh ral a, insawifiah erawh ka tum buai lo, ka inrawlh lo tlat!

"Kal tawh rawh, engtin nge i rawn lawn chhoh theih reng reng?" ka ti ta daih a, kan boruak uap churh chu thlak danglam ka duh a ni.

"A harsa hleinem," a lo ti sam mai a, ani tân chuan a harsa lo te pawh a ni mahna lè!

"Kal rawh Salmon, ka nu leh pate'n tun ang huna an hmu che a nih chuan insawifiah dan tur ka thiam dâwn miah lo a nia," ka ti leh a, tukverh lam ka pan zui zat bawk.

"Tukverh aṭanga chhuah ka tum tawh hleinem," a rawn tih chuan, "Enga...?" ka lo ti hâ a, "Kawngkapui aṭangin ka chhuak ang," a ti leh sup a, mak ti zet hian ka en ngawt ngawt ringawt!

"Kei ai kawngka i hawn dim thiam záwk ring," ti duta kal zui mai a tum chu, "Ka nu leh pate'n kan thawm an hria ang e, a chì loh, tukverh aṭang hian chhuak leh mai rawh," ka lo ti vat a, "Chì lohna a awm lo," tih leh kal a rual a, ka tân chuan zui loh theih a ni lo.

In hnuaia kan chhuk thla chu thawm kan dim dun hle a, a hnungah ka kal a, ke lawnga kal ka nih avangin ka ke pen thawm a ring hran lo a, ani erawh pheikhawk nen a ni a, a ri deuh kauh kauh thung.

"Khawi, ka lo kal hmâsa ang," step tawp kan thlen thlak rual chuan ka ti sep a, kal zui nghal mai ka tum chu ka pate pindan kawngka a rawn inhawng thut a, ka banah a lo chelh thuai a, a lamah min pawt let dáwrh a, kei lah ka inring hman bîk tawh si lo, ka bawh deuh rawk a, kan hmui chu a insi teuh hle bawk.

"Che suh," a ti sup a, a thaw rim pa hrak chuan ka hnâr mai ni lo, ka chhûngril thlengin a fan chiang hle.

Inkuah titih hian kan ding ngâwi ta reng a, kan inlen hleih bawk si, khabe ka chen ṭawk chauh a ni. Ani chuan thawm awmna lam a melh a, kei erawh a lam ka hawi chho ral thung. A khabe hmul te, a biang hmul leh a hmuihmul te chu ka en kham mawlh lo, a pà thlawt!

Thawm aṭang chuan ka nu emaw ka pa emaw zung turin an rawn tho tih ka hrethiam nghal mai a, kan awm dan ngaiin kan la awm reng a, mi dang hmuh hlauh avanga biru kan ni bawk a, thawm kan chhuah lo hrim hrim!

"Kal rawh le," thum dam dapa a rawn tih tâkah chuan min chelhna a thlah riai riai a, kei pawh chu ka inher a, kawngka lam ka pan zui ve nghal mai bawk.

Thawm dim tak hian kawngka inkalh chu ka hawng a, thawm chhuah ka hlauh êm avangin ka hmanhmawh lo hle. Veranda kan thleng chiah chu ka thaw huai a, ani erawh ngâwi rengin a kal zui nal nal a, a kal liam thlir reng pah chuan ka khi sak a, zep thu a cheng lo, ka nuih a za tlat, ka hlim a ni ang.

Mi dang hriat hlau takin in chhûngah ka lut ṭhem ṭhem a, ka pindan ka luh hnu chuan khumah ka mu zangthal duai a, ka meng kar a, ka nui leh sak ṭhin a, Salmon-a nena kan hun hman dun dan chuan min tihlim a ni.

Ka phone chu a rawn nghawr dat a, Salmon-a hnen aṭangin 'muttui' tih message hi ka dawng a, ka insum thei tawh lo. Lukham ka kuah vawn vawn a, chu a message tawi tê chuan min tinui var var a, ṭawngkâ ngeia a sawi dan tur te thlengin ka mitthlâ a, ṭawng chhumbung ṭhin viau mah se amah ka duhna chuan zual lam a pan zel záwk a ni.

A tuk aṭang chuan dawr pawh ka hawng leh ṭan tawh a, pa Vâla paw'n dawr ka hawn loh chhûng khan min lo ngaihven ve hle a, mahse zawhna min záwt duah hran lo.

Tlai lamah Zodini a lo pêng a, ani erawh a dang zar mai. Zawhna ngai min záwt ngar ngar peih a, mahse hrehawm tiru tak chungin thudik ka thup thung.

A ngâi tlat a ni!

Engkim ka hrilh a nih chuan Jeremy-an hriat dan kawng a lo nei leh emaw a ni ang a, ka chhûngte chungah a ṭuan ngei bawk ang a, chutiang thil chu thleng lo se ka duh a ni.

Salmon-a leh ka nu leh pate pawh ka hrilh lo thei a nih chuan mi dang ka hrilh loh theih mai ka ring a, mahse Zodini erawh a dan a dang tlat, zawhna min zawh apiangin thudik hrilh chákna hlirin ka khat a, hrilh thei ka ni lo tih ka inhriatna chuan min thunun hram hram ṭhin.

Zan khat chu Jeremy-a hnen aṭangin phone call ka dawng a, min hmuh a duh thu a sawi a, kan kawmchhak lawka a awm thu a sawi nghe nghe! A thuhnuaiah ka awm miau a, a duh ang chuan thil ka ti lo thei lo a ni.

"He mihring phiangsen nen hian inzawmna kan nei lo kha i ti a ni lo'm ni?" ti nghatin Salmon-a nena kan inkuah lai leh ka chala a fawp lai ngei mai thlalak chu ka hmâah a rawn theh a, motor chhûngah kan ṭhu dun a, a ṭawngkam chuan min dêng dawt a, engtin nge chutiang thlalak chu a lo neih theih ka hre lo.

"Amah vang hi a ni em?" a rawn ti leh a, "I sawi awmzia ka hre lo," ka lo ti dat a, "Amah vang hi a ni em ṭhian ang baka min en theih loh chhan? Ani kuah chu i duh a, ka kuah erawh i duh ngai hauh si lo, mahse hre rawh, ka ta i nih loh chuan tû ta mah i ni lo ang," a rawn ti leh hrawk a, a zawhna ka hrethiam ta chiah, mahse sawi tur erawh ka baihvai hle.

"Palai lo kal leh hunah chuan kan inneih hun tur an sawi rem tawh ngei ka beisei," a ṭawngkam chu a dam ta deuh a, min bia pawh a ang chiah lo.

"Ka hmuh tirh phat aṭang che khan ka hmeichhe duhzâwng tak i ni a, nupuia neih che ka tum ruh bur a, mipa dang laka chàn che ka tum hek lo. Chuvangin ka rilru tur hi hrethiam la, ka nupui i nih hunah chuan tu mipa mahin an pek theih loh nawmsakna leh hlimna ka pe dâwn che tih hre bawk ang che," a ti leh dat dat a, a thusawi chuan ka rilru a tikal thui hle.

"Khawngaihin Jeremy, engkim hi thlak danglam rawh, ka ngen a che, thlak danglam thei awmchhun chu nangmah chiah hi i ni, kei hian ka hmangaih ngai dâwn lo che tih pawh i hre vek alawm, chuan, i nupui ka lo ni ta a nih paw'n ka hmangaihte nunna chhan ka duh avanga nei che ka ni tih i thinlungah khan a riak reng tawh dâwn asin, khawngaihin a tlai tak tak hmâ hian ngaihtuah ṭha leh rawh," ka ti sap sap a, ka thusawi chuan a rilruah nghawng nei hram se ka ti tak zet!

"Nang tluka hmeichhe duh hi ka la nei ngai lo Mimi, i lung ka tiâwi lo a nih paw'n ka duhna che a nasat èm vangah min ngaihsak dâwn a nia," tluangtlam dap hian a ti a, ka thaw halh a, engtin nge a rilru ka thlak theih ang tih ngawt ka ngaihtuah tawh a ni.

"Innei mai tur kan ni a, intihhlum emaw tukverh aṭanga zuanthlak ang chì emaw kha tum tawh lo hram ang che, chuan, kâr tharah palai an lo kal leh dâwn a, harsatna siam zâwnga i lo khawsak loh hram ka beisei," amah bawk chuan a ti leh a, engtin mah ka chhâng lo.

In ka luh hnu thlengin a thusawi zawng zawng chu ka ngaihtuah nawn a, engkim chuan ṭha lam ai ṭha lo lam a pâwl vek a, rilru sèn dan tur pawh ka thiam tawh lo, ka bei a dawng ṭan ni berin ka hria.

Jeremy-a sawi ang ngeiin kâr tharah chuan palai an lo kal leh a, kan inneih hun tur an rêl a, inru kan nih miau avangin a rang thei ang bera inneih an titlu a, engkim chu Jeremy-a te lam ruahmanna vek a ni a, an nihna dik tak hre lo ka nu leh pate tân chuan rin loh theih an ni lo.

Thla thar, kâr hmâsa bera kan inneih theihna turin ruahmanna an siam fel a, ka tân chuan ngàwih tawp a, an ruahmanna anga awm mai loh chu tihtheih dang a awm lo a, zawi zawiin ka hlimna a bo tial tial bawk.

Vêng chhûngah ka chanchin a ri ṭan a, kan inruk thute chuan mi beng a fah a, sawi nuam ti an tam ngàng mai. Kei erawh ka hmui ka chip tlat a, mi min sawi danah ka buai lo ka tih chuan dawt ka sawi ngei ang, a chhan chu thudik lo an sawi miau a, dawnsawn harsa ti ru tak chungin ka ngâwi mai záwk a ni.

Nitin Zodini school bâng a lo pêng ziah a, min titipui a tum ṭhin a, thil nih dan dik tak min zawh chhuah a tum ran ni mai hian ka hre ṭhin. Nimahsela, ka tân zawng thudik sawichhuah a rem lo a, ka sawichhuak a nih vaih chuan ama chungah ngei pawh thil ṭha lo a thlen ka ring tlat a ni.

Chawlhkâr a liam zel a, kan inneih hun a hnai tial tial a, ka huphurh telh telh a, ka dam chhûng hun sal ang maia ka awm tawh tur chu ka huphurh láwk em em a, mahnia ṭah châng pawh ka ngah ṭhin.

Ka thinlung a tawt a, ka ipik a, engmah tih chákna ka nei lo a, ka chaw ei lah a tui thei tawh hek lo. Ka nu chuan keimahah danglam a awm tih hriain a chhan min záwt ṭhin a, mahse chhâng thei ila ti ru em em chungin ka chhâng thei chuang si lo.

Chhun lamah Salmon-a a lo kal leh zauh ṭhin a, mahse a awm rei ngai lo a, min hmu tur ringawt lo kal a ang ber a, dawra awm ka nih avanga kal leh thuai ṭhin te pawh a ni maithei bawk.

Tlai khat ka haw chu kan in chhûngah kangmei a lo chhuak a, thil pawi thleng hman lo mah se ka nu leh pa an lo buai hman viau a, chumi zan vek chuan Jeremy-a hnen aṭangin phone call ka dawng a, ka pick up hreh hle.

"Kha mihring kha hmu tawh suh ang che, i hmu leh a nih chuan thil pawi záwk a thleng tawh ngei ang," a rawn ti chhur chhur a, kan ina kangmei chhuah chhan chu ka hrethiam nghal chat bawk.

"A hnaihah awm tawh suh, i ngenna avang chauha la dam hram hram a ni tih hria la, ka duh hûn hunah ka that thei tih hre bawk ang che, chuan, tun thla a tawp ang a, kâr leh khi kan inneih hun a ni tawh tih hre reng la, inenkawl ṭha ang che," a rawn ti leh a, dah zui mai a tum chu, "Lawk, la dah rih lo teh," ka ti thuai a, ani pawh chuan a hmet tawp lo ve mai.

"Thil pakhat dil duh che ka nei," ka tih chuan, "Han sawi la, ka nupui ni mai tur thil dil te chu ka tihsak chàk záwng tak alawm a nih," a lo ti huah huah a, "A tawp nân, a tawp nân tak tak Salmon-a ka hmu duh, a bak a awm tawh lo ang," ka ti chiah chu a ngâwi chiang hle.

"Engvanga la hmu duh tei vet nge i nih? Buaina siam zâwnga i khawsa a nih vaih chuan i chhûngte nunnain an tuar nghal ang," a rawn ti hmuk a, "Buaina siam ka tum lo a, harsatna siam lah ka tum hek lo, ka hmu duh mai chauh a ni," ka ti nghet charh charh a, ka hun hman dan lehzela thu a nei chu ka kham tak zet!

"I remti ah ka ngâi a nia," ka tih leh chuan, "Hre rawh, a tawp nân tak tak a ni ang, pasal nei mai tawh tur i nih thu hrilh la, i dawra lo kal tawh lo turin hrilh bawk ang che, ka thusawi hi i zawm lo a nih chuan ka hre leh vek dâwn a nia, a sawhkhawk a nâ khawp ang," a lo ti thuai a, engmah sawi zui tawh lovin kan inbiakna ka hmet tawp nghal hmak bawk.

Chumi zan chuan ka rilruah Salmon-a a awm reng a, hetiang taka mipa duh leh vei hi ka la nei ngai lo, ka duh satliah ni pawhin ka hre tawh lo, ka hmangaih hialin ka hre tawh, a chhan tak erawh ka ngaihtuah chhuak thiam bîk lo.

Eng anga inkâr hlâah pawh awm ila, ani chu ka thinlungah a riak reng a, khum theitu an awm leh tawh pawh ka ring lo a, ka duh bawk hek lo. Ka tân chuan mi danglam a ni a, mi danglam ni turin engmah a ti lo a, ka thinlung záwk hian a thlang a ni.

A tukah chuan hmuh ngei tumin ruahmanna ka siam a, zan a lo ni a, ka nu leh pa bulah chuan Zodinite ina riah thlak ka tum thu ka hrilh a, pasal ka nei hnai tawh bawk nen, an lo phal ve mai a, mahse a nihna takah chuan Salmon-a hmuh tum záwk ka ni!

Taxi-in Salmon-a in lam ka pan a, kan thleng hnai ta maw tihah ka dintîr a, kawngpui pêngah ka chhuk a, a in kalkawng hi link road a ni a, kea kal tham leka thui a ni a, in kawt ka zu thleng chu veranda light a lo èng vâ a, tukverhah chuan parda a inzâr phui vek bawk.

Kawngka ka kik a, amah ngeiin min lo chhawn a, in chhûng ka lut chiah chu ka ding chawt a, amah mai ni lo, a nauteho nen sitting room-ah an lo ṭhu khawm laih a, ka awm dan a lài zo vek!

"Engnge hetah i rawn tih?" Salmon-a chuan a ti dap a, a mitmenga zawhna lo lang chu ka hmuh hmaih lo chiang hle.

"Ka....ka lo kal mai mai," ka ti lawi rat a, a bula awm te mitmei chu ka hmu thiam vek a, let leh daih ka duh rum rum hial a ni.

"Haw r'u," tiin Salmon-a chuan a naute chu a hrilh a, an zînga pakhat chuan nui deuh pat pat pah hian, "Engati maw?" a lo ti hâ a, "Haw r'u ka tih chuan haw mai rawh u," Salmon-a chuan a ti leh nghut a, nuam lo ka ti ru kher mai.

"Engti tura lo kal nge i nih?" a naute an chhuak fel chiah tihah Salmon-a chuan a ti hniam dut a, min din chilh run a, chutiang huna ka lang thut chu mak a ti ve hle a nih ka ring.

"Eng lo.....ka ril a ṭam a," ka ti ta ringawt a, chal chuar nang hian min melh a, ka chhuanlam siam chu a fahrah ve bawk èm a ni.

"Ka ril a ṭam, ei tur siam ang," ti lehin choka lam ka pan a, fridge ka hawng a, thil hrechhuak zawkin, "Khaw'nge i nupui hlui kha?" ka ti hluai a, "Shillong-ah," a lo ti mai a, ka záwt zui tawh bîk lo.

Chawhmeh a kawl ang áng chu ka siam a, ani'n ngâwi rengin chaw a chhum a, chaw a ei tawh leh tawh loh ka záwt a, a lo la ei lo chu niin, kal fuh ka intih phah viau mai.

Ei rawng kan bàwl lâi chuan ka be reng a, ka ṭawng siam siam a, a châng leh ka nui a, kan hun hman dun dan chu hlimawm se ka duh mai bakah hriatreng tlâk ni se ka duh a ni.

Chaw kan ei dun lâi te chuan ka la ṭawng siam siam reng a, ka awm dan chu mak a ti deuh ṭhin tih pawh ka hria, mahse engmah a sawi lo a, min zàwt hek lo.

A chawhmeh làk tum tak ka lak khalh chu engmah sawi chuang lo hian min melh deuh run a, ka nui hak hak a, a hmêl pà tak chuan ka thinlung a ti tuiral a, a hmêlṭhat mai bakah a fai vuk a, a thawmhnaw hak te chu inhmeh tak hi a ni ringawt!

"I lo kal chhan min hrilh tawh rawh le," ei leh inna kan seng fel hnu chuan a ti dam dap a, "Ka hmu châk che a," ka ti ve mai a, ka rilru dik tak ka sawi a, a tawpna tur a nih vang nge ka hre lo, ka zak miah lo bawk.

"Thil dang a awm em?" a tih chuan, "Awm lo e," ti diai pah hian ka khi sak a, ka sana ka bih zauh a, haw tawh mai ila a ṭhain ka hria.

"Tun bak hi chu ka rawn hmu tawh lo ang che Salmon, chuan, nang paw'n min rawn hmuh tum tawh suh," ka ti leh dat dat a, ani erawh chuan, "Thudik sawi la, engkim hi a danglam thei," a lo ti daih thung.

"Zep ka nei hleinem," tiin ka nui tawi tap a, ka hmuh tawpna tur a ni tia infuih ru reng chungin ka din hnaih a, zah pawh dâwn zo tawh lovin ka dingdihlip ak a, a hmuiah tak chuan ka han fawp a, ani erawhin min chhâng lèt lo a, a hmui a tiche miah lo bawk.

"Ka kal ang e," ti hniam sapin ka inher a, ka sâ hut hut a, ka zak ru chem chem a, mahse ka inchhir chuang lo, a chhan chu ka thinlung neitu a ni tlat a tin a ni!

"Mimi....." kawngka ka hawng tur chiah chu ka hming ngeiin min ko a, ka lehhawi riai riai a, engtin nge chutiang taka rang chuan ka bul a rawn thlen hman ka hre lo.

Ka biang tawn tawn chu a kut hrawl zeta khuapin ka hmuiah tak min fawp ngawng ngawng a, a duh tàwk mai dâwn emaw ka ti a, mahse a teuh lo!

Mi la fawp reng chung hian min châwi kang deuh lawp a, ka kein a kawngah ka lo kherh chial a, a hmui chuan ka rilru leh taksa a thunun a, ka awm dan zawng zawng chu ka thunun theih piah lam a ni a, keimahah danglamna nasa tak a thleng a, ka sosang a, ka lùm pup pup ni ber hian ka hria.

Ka rilru a mumal lo a, ka chawmawlh vek a, a khum dup nuam taka min nghah lâi te chu hre ve teh mah ila ka hre chiang tak tak lo. Ka taksaah nawmna nasa tak a thleng a, ngaihtuahna fîm pu thei lo khawpin ka khawsa a, engkim chu hmangaihna avanga thlengah ka ngai hmiah bawk.

Kawngka inhawng thawmin min tiharh a, ka mit ka meng chu khua a lo vâr diam tawh a, pindan kawngka hawnga lo lut mêk Salmon-a ka hmuh rual chuan ngainatawm tak hian ka lo nuih a, a hmêl chu hmuh a nuamin a hahdamthlak tak zet!

"Tho tawh rawh le," ti hniam dapin a eitur rawn chàwi luh chu dawkantê ah a nghat a, duat taka pain a fanu a bia te pawh a ang mah záwk!

"Ka rawl ṭhûmin ka hria," tiin ka zi mar ṭiah ṭiah a, ngâwi reng hian min en a, a nui suk ka hmuh rual chuan ka ṭawng sual tih ka hrechhuak chiang hle.

"Ka sawi awmzia chu......ka.....ei ang, ka ril a ṭam," ka ti bah ta nawk nawk a, ka awm dan chuan a tihlim nge ni, a nui ruh ruh a, a hmêl pà leh ṭha zet chu hmuh nuam ti leh tawh tak ka ni!

"Heng zawng zawng hi i siam vek em ni?" ti leh ka hmâa eitur inchhawp chu ei ka rual a, a tui kher mai.

"Ka eitur i siam ziah a, ka siam ve che a nih hi," ti dutin ka ei lâi chu min en reng a, "Ei ve ta che, keimah chauh chuan ka ei zo vek sêng dâwn lo a nia," ka ti hliai a, ani pawh chuan a ei ve nghal mai bawk.

Ka rilruah chuan kâr leh maia pasal ka neih tawh tur thu hrilh lam a lang lo a, kan boruak nuam tak chu tichhiat ka duh hek lo. Ka ṭawng siam siam a, ani paw'n a laka ka rilru puthmang dik tak a hrechiang tawh bawk a, ka kut chelhin a fawp leh vang vang ṭhin a, chutianga a tih apiang chuan ka awm a lo nuam veng veng ṭhin.

Kan ei leh inna a silfai lâi chuan a hnung lam aṭangin ka kuah a, a kawngah ka bân ka suih a, a thi tih lâi a tawp deuh dat a, min thlek zau tih pawh ka hria, mahse ka hre lo der tlat a, ka hmu tawh miah lo tur ber chu ka huphurh láwk a ni.

Chumi nî chuan dawr thleng min thlah a, thil buaipui tur a neih avangin a lèt leh thuai a, kan inbe zui ta miah lo bawk. 

Kan inkârah inngaihzawnna a awm lo a, hun kan hmang dun a ni mai a, min duh èm tih hre chiah lo mah ila min ngaihsak tih erawh hi chu ka hmuh hmaih phal bîk lo.

Ka thinlungah erawh amah lo mipa dang an leng tawh lo a, ka duh mai ni lovin ka hmangaih hial tawh záwk a ni. Ni e, a dik alawm, keimah leh keimah ka inbum thei lo. 

A tân chuan engmah tih hreh ka nei lo a, ka hmangaih hnena ka thianghlimna ka hlan ta chu inchhirna pakhatmah ka nei lo hrim hrim bawk.

Nî a ral a, Jeremy-a nena kan inneih hun a hnai zel a, inbuatsaihna pawh a kal chho mawp mawp a, ṭhian atân Zodini ka hmang dâwn a, engmah ka hrilh chiang duh bawk si lo nen, chutia mo ṭhiana a ṭang tur chu a phur fahran lo hle.

Thla a thar a, kâr hmâsa ber kan chùangkai ta! 

Lunglei lamah kan inphur phei a, Jeremy-a chhûngte chuan min lo dawngsawng ṭha hle a, kan vawi khat inhmuhna a ni a, mahse kan chunga an ṭhatna chu a lem ang bakin ka hmu lo thei lo.

Chumi zan chuan Zodini nen khum khatah kan mu a, naktuk zînga pasal nei tawh tur ka ni a, mahse ka hmêlah leh ka nungchangah phurna rèng ka nei hauh si lo, ka saltanna ata chu talchhuah ka thlahlel tak zet a ni.

"Engati nge hetiang hian i awm Mimi?" Zodini aw chu hre lo ang maiin ka maimitchhíng tlat a, mahse ka muhil lo tih erawh a hrechiang hle.

"Thil zep i nei tih ka hria, tun lo hi chu min hrilhna hun i nei tawh dâwn lo a nia," a rawn ti leh a, ka la ngâwi tlat tho.

"Khawngaihin Mimi....?" min kuah paha a rawn tih leh chuan ka tawt up up a, ka ṭap chhuak ta hawk mai.

"Ka hrilh thei lo che alawm, ka hrilh che a nih chuan ka nu leh pa mai ni lo, nang thleng hian i thi dâwn asin," ka ti ta nge nge a, mak a tihzia a hmêlah a lang a, engmah min záwt zui tawh miah lo bawk.

Zîngkhua a lo vâr a, beidawng rilru takin biak in ka pan a, ka bulah chuan Zodini a kal a, nizan aṭang khan engmah min zàwt tawh lo a, thil awmzia a hrethiam tawh te pawh a nih ka ring.

Kohhran hall kan thleng a, Jeremy-a leh a ṭhianpa an lo awm tawh a, kan ṭhu fel chiah tihah Zodini chuan ka kut a rawn hmer a, ka hrethiam lo hman viau nghe nghe.

"Salmon-a a lo kal mêk," ka bêng bulah a rawn ti sep a, ka meng â hau ringawt!

"Nizan i mut hnu khan i phone-in ka call alawm, a lo thleng har tawh lo ang," a ti leh chiah phei chu ka thin a phû dawt dawt a, ka rilruah Salmon-a bak a awm thei tawh lo.