𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟗]

SALMON

By

Havali Adam

Bung 9-na

"A in chhûnga ka hmuh zan che khan a tân mi satliah i ni lo tih ka hrethiam nghal asin, khatah pawh khan nangmah avang bawk hian kan duh ang kan ti thei lo a, awm lo la chu a in kha meiahlin a luahkhat vek ngei ang. Chuvangin nang hi chu ka bula awm tur i ni, a bulah ni lovin," a ti leh charh charh a, thil awm dan ka hrethiam ta kuarh mai.

"Salmon-a dam loh lâia rawn thah tumtute zîngah khan i lo tel ve reng a ni maw," ka ti salh a, ngeiawm zet hian a nui a, mak ka ti lo thei lo a ni.

"Eng harsatna mah kan siam lo, amah záwk hian buaina min thlen a, kan kawng a dal a, a pa zâr zo lo phei se chu kan dah ṭhatna a rei tawh ang, mahse tunah a pa a awm ta lo bawk a, eng pawh kan ti thei tawh, a chungah mai ni lo, a farnu leh a nu chungah ngei pawh," a tih chuan ka mak tihna a zual hle.

"Engnge i sawi awmzia? Engtin nge pu Châma chu a awm?" ka lo ti vat a, "A boral tawh, a thil tihsual rah a sengah ka ngâi, ka pa nen an thawh dunna a ti tawp khanglang a, ni lo se zawng a dam te pawh a la dam mahnà," a ti ham ham a, rapthlak ka ti lutuk chu sawi zui tur pawh ka hre tawh lo.

"Nang pawh hi ka thu i zawm lo a nih chuan eng thil mah tih hreh ka nei lo a nia, mahse i tihtur a harsa lo bawk a, ka thu i zawm ngei ka ring," a ti zui zat a, ka melh râwm ràwm a, pasala neih ka tum lo bur!

Phone call a dawng a, ka hriat tur kherin loud speaker-ah a dah a, a mi biak mêk chu hmeichhia a ni a, an inbiak dan aṭang chuan chu hmeichhia chu Salmon-a inah a awm mêk a nih hmêl!

"Kan chungchâng kaihhnawih zawng zawng kha hal ral ang che," Jeremy-a chuan a ti nghet charh a, "Aw le, chuan, nichin lawk khan a rawn chhuak chiah a, a lo thleng har lutuk lo ang ka ring," lehlama mi chuan a rawn ti a, ka rilruah Salmon-a a rawn lang a, ka khawngaih tak zet a ni.

"Hre rawh, kei min nei lo a nih chuan i chhûngte mai ni lo, he kan mihring phiangsena chhûngte nen lam hian ka tichimit vek ang, chuan, heng thute hi khawiah mah a chhuak tur a ni lo, i nu leh pa, i ṭhian hnaivai tak tak te bulah pawh i sawichhuak thiang lo tih hria ang che!" ti vin hrakin Jeremy-a chuan min melh ngur a, pindan aṭangin a chhuak a, rilru hah zetin ka ṭhu nghal hnawk a, ka dinhmun chhe lutuk chuan min hmet chau a ni.

Ka tih theih awmchhun chu ṭawngṭai a ni a, ka tân mai ni lo, ka chhûngte leh Salmon-a tân ka ṭawngṭai a, nung dama kan chhuah ngei theih nân ka ṭawngṭai mawlh mawlh a, chu chauh lo chu tih theih ka nei tlat lo a tin a ni!

Zan a rei zel a, pindanah Jeremy-a a rawn lut leh a, ka phone ngei chu min pe ta! Ka nu leh pa call turin min ti a, pasala neih ka duh thu leh nupui atâna min ruk thu hrilh turin min nawr lui a, kan in leh a chhehvel video chu min entîr pah reng bawk.

A duh anga thil ka tih lawk loh avangin kutthlak ka tûar a, ka samah kekin ka hmaiah a beng chawrh a, ka ngik feih a, chhantu ka mamawh tluk zetin keimah avanga nunna chân thei rengte chhan thei dinhmunah ka ding tlat bawk si, ka rilru a hah tawngkhawng tak zet!

Thil tam tak ka ngaihtuah a, ka rilruah chuan hlauhthawnnain hmun a chang a, ka nu leh pate chân chu ka duh lo a ni. Rei fê min nawr luih hnuah ka nu leh pate ka call ta nge nge a, mangang zet hian ka nuin min lo chhâng a, ka awmna min záwt nghal thuai bawk.

Ka ṭhat thu ka sawi a, loh theih lohna avangin Jeremy-a nen kan inruk thu chu ka hrilh a, ka sawi lâi chuan ka ṭah a chhuak a, mahse ka insum hram hram a, ka nu leh pate awa manganna leh ngaihsakna chuan ka rilru a ti zuau a, biak pawh ka be rei thei lo.

Kan inbiakna ka tihtawp hnu lawkah anmahni záwkin min lo call leh a, Jeremy-a chuan Lungleia kan awm mêk thu leh naktuka ka haw tur thu hrilh turin min lo ti a, a thupek anga sawi lo thei lo dinhmunah ka ding leh ta!

Jeremy-a duh dan ang diaka ka hrilh hnu chuan kan inbiakna ka titawp a, rilru ipik zet hian ka thaw chhuak halh a, ka ngaihtuahna a buai nuaih nuaih a, tih ber tur pawh ka hre lo a, tih loh tur lah ka hre hek lo.

Ka bula Jeremy-a lo ṭhut a tum chu ka lo nam dâwrh a, ka ten a, ka rap a, ka hlau a, mi ṭha lo tak a ni tih ka hriatna chuan amah ka lo ngaih ṭhin dan zawng zawng a thlak danglam vek tawh a, a bul hnaiha awm ringawt pawh chu ka tân a him hlawl lo tih ka hre tawh a ni.

"Eng thil chiah nge Salmon-a chungah tih i tum?" ka tih chuan, "Ka that ang," a lo ti chhum bung hmuk a, a ṭawngkam chu rapthlak ka ti tak zet!

"Chutiang thil i ti a nih chuan kei pawh ka thi ve nghal ang," ka ti fiah fak a, "Chu, thil hriat hmaih ka lo nei reng a ni maw," a rawn ti dat a, min nuih hak a, mahse a nuih dan chu innuihsawhna rawngkâi a ni.

"Ka chhûngte leh mi dang, tu pawh ni rawh se, nangmah avanga nunna an chân a nih chuan he khawvelah hian nung damin min hmu tawh lo ang," ka ti leh fak fak a, ka thutak hle bawk.

"Min vau let ve khanglang em ni a?" tih leh ka hmaia rawn hmer a rual a, ka lo ṭhen sawk a, min thlah rual chuan ka hawi sawn rang kher mai.

"Zanin hian eng buaina mah siam suh ang che, ka ruahmanna anga thil a kal a nih chuan i chhûngte pawh an him ang, i hria em?" a ti vin khauh hmarh a, ka luhlul lui ve tlat!

"Ka thusawi kha ngaihtuah chiang la a ṭhat záwk ka ring Jeremy, min neih i duh tak tak a nih chuan tûmah an thi tur a ni lo," ka ti charh charh a, thinrim zet hian min melh a, kei erawhin ka hlau lo lui ngar ngar thung.

"Thih i va chák àwm ve a," ti nghatin ka hmai bawk chu a rawn hmer leh a, thle sawn sawk pah hian, "Nang hian dam ka thlakhlelhna zawng zawng i hnawt kiang vek tawh, i nupui ka ni a nih paw'n i beisei ang i hmu lo ang, ka thinlung hi engtikah mah i nei ngai bawk hek lo ang," ka ti siah siah a, ka inrin hmâ hauhin min kek dak àwrh a, nâ ka ti kher mai.

"Chutiang thil ho lutuk chuan min tibuai pha lo, ka nupui i nih chuan a táwk!" a ti chhur chhur a, ka mittui lo tling ṭiam ṭiam chu ka khap let thuai a, a hmuha ṭah ka tum reng reng lo.

"Hetah hian lo awm hle hle ang che, eitur ka rawn la ang," ti lehin pindan aṭang chuan a chhuak a, ka biangah mittui a luang thla zui nghal pap bawk.

Tukverh bulah ka ding ngâwi reng a, kan awmna in leh a chhehvel chu thing leh mauin a hliahkhuh titih vek a, Lungleiah mah ni se khawpui chhûngah kan awm lo tih a chiang hle.

Eitur a rawn ken luh hnu chuan min eitîr a tum a, mahse ka ril a ṭam loh thu sawiin ka hnar tlat a, min tihluih ngial paw'n luhlul ka chhuah lui ngar ngar a, a beidawng ta a ni ang, pindan aṭangin a chhuak a, ka bul hnaiha a awm loh apiang chuan ka veng hawk zelin ka hria.

Zan a rei telh telh a, Jeremy-a chuan mi tu tu emaw ni a call kual dan dan a, Salmon-a thah ngei tumin ro an rel a, Salmon-an kan awmna hmun a rawn chhuichhuah theihna turin amah nena kan inbiakna phone kha a tinung reng a, ka phone erawh khawiah nge an thuhruk ka hre leh tawh lo.

Jeremy-a chu ka melh tlawk tlawk a, engtin nge chutiang thil rapthlak lutuk chu tih a tum theih záwk ka hre lo, mihring a ni ta lo emaw ka ti hman hial! An inbiakna aṭanga a lan dan chuan Salmon-an Lunglei a rawn thleng tawh a nih hmêl a, rawng takin an that mai ang tih mawlh ka hlau a ni.

Tukverh lamah ka kal phei a, zawimuang hian ka hawng a, ka chet dan chu Jeremy-a chuan a hre lo a, phone a la hman mêk avangin min hmu lo hrim hrim bawk.

"I ruahmanna i thlak a nih loh chuan heta ṭang hian ka zuangthla ang," ring leng lawng hian ka ti a, ka lam a rawn hawi rang hle.

"Min lo hnaih suh Jeremy, tun tluka thutak hi ka nei miah lo a nia, ka zuangthla hreh reng reng lo," ka lama ke a pen rual chuan ka lo ti vat a, a ding deuh chawt a, a phone a hmet thim nghal hmak bawk.

"Khata ṭang khan chhuk rawh Mimi," hmâna Jeremy-a ka hriat ṭhin ang mai khan min bia a, mahse engkim chu a lem vek a ni.

"I ruahmanna i thlak a nih loh chuan ka zuangthla ang, engtikah mah i nupui ka ni ngai bawk hek lo ang," ka ti nghet charh a, a mitmeng chu a buai nak a, min huat hmèl hle bawk.

"Chhuk nghal rawh, a nih loh chuan kan police officer-a mai ni lo, i nu leh pate paw'n an tuar ang," tiin min vau a, mahse engah mah ka ngâi duh der lo.

"I duh duh ti rawh, anni an thih chuan kei pawh thi tluk alawm ka nih, chuvangin anni aia thih hmâsak ka thlang zàwk," tih leh inher ka rual a, chutia ka che chiah chu, "Duh táwk rawh!" a rawn ti ṭhawt a, ka thih a phal lo hle ni tur a ni.

"Ni lo e, i ruahmanna thlak i tum lo tih ka hria alawm, ka tân chuan thih leh damin awmzia a nei tawh lo," ka ti chuai ta raih a, "Che tawh suh, che tawh miah suh, a ṭha e, ka thlak ang, ka thlak em em ang," a rawn tih mawlh mawlh tâkah chuan ka thil tih tum chu ka tawp dat a, a lam ka hawi riai riai bawk.

"Engkim, a vai khan engmah lo mai a ni. Haw rawh u, in awmna aṭang khan kal sawn ula, haw vek rawh u, ka thupek a nih chu!" ti hrawkin phone-ah mi tu emaw ni a bia a, dik tak chuan chuti maia a chet zung zung ka ring miah lo.

"Ti khan i lawm tawh em!?" ti vin hlakin ka lamah a rawn pen phei pawk pawk a, ka dinna aṭang chuan min châwi thla nawlh a, nghet zet hian min kuah a, a awm dan chu ka hrethiam lo lek lek ṭep a ni.

"Vawi khat mah khatiang thil kha ti tawh suh ang che," ti lehin ka dar tawn tawnah a dawm a, chhàn pawh ka chhâng lo.

"A lo thleng ṭep tawh a, a lo lan hunah chuan i sawi tur i hriat ngei ka ring, Aizawla i nu leh pa nunna ngaihtuah tel reng bawk la, ka thupek vawi khat lekin thil tam tak a thlen thei a nia, engtiang pawhin police hrilh mah la, engmahin min dang chuang lo ang," a tih lâi chuan a hmêl chu ka en a, mi dang hlak a ni leh tawh!

"Nangmah avang liau liauin tun ṭum chu a dam khawchhuak leh hram dâwn a nih hmêl," a ti zo chiah chu kawngka inhawng ri ṭhuai thawm kan hria a, kan awmna pindan kawngka erawh a ni lo.

A hnu lawkah kan awmna pindan kawngka chu nâ zet hian a rawn inhawng a, Salmon-a leh a naute hmêl kan hmu zui zat a, Salmon-a chuan Jeremy-a chu a phih sawn dâwrh a, a naute'n an lo man bet nghal thuai bawk.

"I ṭha em?" ti supin Salmon-a chuan ka biang tawn tawnah a dawm a, "Hrep tak chuan!" ti leh hlukin a inher a, Jeremy-a chu a ṭham tho lawp a, chiang zet hian a hnek thal zui nghal ṭhuai a, a kutthlak a nâ thawkhat tih hriat fahranin a ri chawrh chawrh a, ka rilru a buai hman teuh kher mai.

"Salmon....." tia ka kohna chu hria ang paw'n a awm lo a, "Duh táwk rawh Salmon," ka ti leh pawh chuan a la tawp duh chuang lo.

"SALMON....." ka ti ta ṭhawt a, ngâwi reng hian a thil tih lâi chu a tawp a, ka lamah a rawn phei a, a âwmah min kuah bei thlawp a, a taksa sia ka awm chiah chu ka ṭah a chhuak ru et et a, mahse ka insum hram hram a ngâi a ni.

Ka chhip samah a fawp vang vang a, a chet dan chuan thlamuanna nasa tak min pe a, hlauhna rèng ka nei tawh lo a, him hliah hliah hian ka inhria a, mahse ka rilruah Jeremy-a thusawi kha a rawn lang a, Salmon-a min kuahna ata chu ka inla hrang zui nghal bawk.

"A tlanchhuak tur a ni lo," ti bul hmukin Salmon-a chuan a naute chu thu a pe a, Jeremy-a chuan hnâr thi hnuang hian a mit ko min san khum zauh a, ka thil sawi tur chu sawi ka hreh tak zet a ni.

"Thil hrilh tur che ka nei," Salmon-a chu ka melh ral a, "Tunah ni lo," a ti thum dut a, hrilh luih ṭal pawh ni ila min ngaihthlak ka ring chuang lo a, hrilh rih loh chu a ṭha záwkin ka hria.

Chumi zan la la chuan Aizawl kan pan nghal a, Salmon-a nen a car-ah kan chûang dun a, Jeremy-a erawh motor dangah police ho nen an chûang thung. Salmon-a chuan mi tu emaw ni a bia a, a ina kal turin thu a pe a, file chungchang a sawi nghe nghe!

Ani leh kei erawh kawng tluanin kan inbe lo a, mahse min ngaihtuah tih a hmêlah a hriat hle. Zîng dâr 4 dâwnah Aizawl kan lut a, police station kan pan ding nghal a, Jeremy-a chu lock-up-ah an nawr lut rawk rawk bawk.

"Sawi rawh le, engtin chiah nge a ruk bo che?" tiin Salmon-a chuan zawhna min zàwt a, "I bula ka awm chhûng chuan engmah hlauh tur a awm lo," a ti dam leh dup a, ka lo thaw chhuak halh ringawt!

"Engkim min hrilh rawh," ti thum chhal hian ka kut pahnih chu a hum a, thudik engkim hrilh ka chák tak zet, mahse ka nu leh pa ka ngaihtuah lo thei si lo.

"I ngaih ang kha engmah a thleng lo Salmon, Jeremy-a nen hian kan innei dâwn," ka tih lai chuan ngunthluk fê hian min en a, "Nupuiah min ru alawm, ka nu leh pate paw'n an hre tawh, Jeremy-a hian thil tih dik loh a nei lo," tiin dawt hlang hlak chu ka sawi ta!

"I thusawi hi i hre chiang em?" a ti bul hmuk a, ṭawngkâa chhâng lovin ka bu nghat a, ka mitah tak min en a, dawt sawi ka ni miau a, ka en rei ngam thlawt lo.

"Thil zep i nei tih ka hriat loh ring suh, min thah a tum tih pawh ka hria, mahse a ṭhuihruaite tel lova min lo hmâchhawn danah ruahmanna dang a nei a, nang nen hian thil zep in nei a ni," a ti nghut nghut a, hrehawm ka ti ru tak zet!

Chutih lâi tak chuan phone call a dawng a, a lak aṭanga rei pawh ni lovah, "Enga!?" a ti nghal ṭhawt a, ka lo phu zawk nghe nghe!

"Engtin nge chutiang thil chu a thlen theih?" a ti leh a, a awah chuan zaidamna pakhatmah a tel lo.

"Hrep tak chuan!" ti hmukin phone chu a hmet tawp a, min rawn en chiah chu ka hawi sawn nghal vat!

"Eng ruahmanna nge in neih dun min hrilh tum lo mah la ka hrechhuak tho ang," ti nghutin a pen zui pawk pawk a, khaw'nge a kal dâwn ka hre hauh lo.

Kut inthlak thawm chuan ka beng a verh zar a, thawm awmna lamah ka phei vat a, Salmon-a chuan Jeremy-a dawp pah hian a lo hnek siah siah a, Jeremy-a hmêlah chuan hlauhna réng a lang lo a, nâ a tuar chung paw'n a la nui thei cheu a, Salmon-a zawhna chu pakhatmah a chhâng ṭha duh lo hrim hrim bawk.

"I la inchhir dâwn a nia, tunah hian i mualphona tur i ti mêk tih i ngaihtuah pha thiam miah na nge..." Jeremy-a chuan a ti ham ham a, Salmon-a thin chu a so zual a, rum nghutin a hmaiah a hnek chawrh chawrh a, ka awm hle hle thei thlawt lo.

"Duh táwk tawh rawh Salmon, duh táwk rawh!" ka lo ti chîam a, rum zet hian min rawn melh a, dik tak chuan amah ka ngaihtuah vang zàwk a ni.

"Heta i awm hian hlawkna pakhatmah a nei lo," ti nghutin police station aṭang chuan min kai chhuak dawr dawr a, a thin a rim tak zet tih chu hmuh hmaih rual a ni lo.

Kan kawmchhak thleng min thlah a, car aṭanga ka chhuah fel hnu chuan vung zet hian police station lamah a tlan let lehnghal a, chutih lai vek chuan ka phone a rawn nghawr dat a, phone number lawng tawp aṭang hian ka nu leh pa muhil lai thlalak ngei mai ka dawng a, hmanhmawh zetin kan in ka pan thuai thuai a, kawngka zawn ka thleng chu ka chum ri nghal dawt dawt bawk.

"Bawihi....?" min hmuh ruala ka pa mak ti hmêl chu ka ngaihsak hman tawh lo, ka kuah thlawp a, pindan aṭanga ka nu lo chhuak chu ka kuah zawm nghal zat a, ka awm dan chuan a ṭhawng dun hle.

"Engati nge tun ang hunah i rawn haw? Khaw èn laia i lo haw kan ring asin," min ngaihtuah zet hian ka nu chuan a ti mawlh mawlh a, chhàn dan tur pawh ka hre mai lo.

"Ti teh u, i ṭhu teh ang u," ti dapin ka pa chuan kawngka a kalh a, sitting room-ah kan phei a, eng pawh min záwt se, dawta chhàn a ngâi tur chu ka huphurh lâi ber a ni.

"Engati nge hetiang thil hi i tih? Pasalah i nei duh a nih paw'n inruktîr kher a ngai lo asin, i ngaihtuah chiang lo êm mai Mimi," ka nu chuan a ti hap a, thudik engkim ka hrilh châk tak zet!

"Ka tihpalh," ka ti sap a, ka rilru a nuam lo tih hrethiam takin ka nu chuan min kuah a, ṭah hawm hawm ka châk lutuk, mahse ka thei si lo.

Ka nu leh pa zawhna hrim hrim chu dáwtin ka chhâng ta vek a, ka thlalak dawn khan hlauhthawnna nasa tak min pe a, thi thei reng dinhmunah an ding tih ka chian èm avangin Jeremy-a duh dan angin ka awm lo thei lo a, ka ti lo thei lo a ni.

Ka khuma ka mu chiah chu lukhamah ka hmai phûmin ka ṭap ta nge nge a, ka hmá hun khirhkhan tak chuan min tinâ a, beidawngin min siam a, engkim chu thlak danglam vek theih ni se ka ti tak zet!

A tukah chuan nilêngin inah ka awm chawt a, khawiah mah ka chhuak lo a, ka nu leh pate mit hmuhah chuan pangngai takin ka awm a, dik tak chuan engkim sawichhuah a, police hnena report vek ka châk lutuk, mahse Jeremy-a leh a ṭhuihruaite an chak ém a, a sawi ang tak tak khan a duh hûn hunah ka nu leh pate an that thei tlat a, chu chuan min phuar a ni.

Chumi zana chanchin tharah chuan thil hriat duhawm loh tak an rawn pûang a, Salmon-an Jeremy-a a sawisa lâi video chu a lang a, Jeremy-an 'i mualphona tur i ti mêk tih i ngaihtuah pha thiam miah na nge' a tih lâi kha ka rilruah a rawn lang a, ka hlauhthawn ruk ang ngeiin Salmon-a chu a mualpho chiang hle.

Social media-ah video chu a darh chuaih chuaih a, Jeremy-a hmêl lang si lovin Salmon-a leh a naute hmêl chauh a lang a, Salmon-a chu biak ka tum rum rum a, mahse ka phone call a lak duh ka rin loh avangin ka ṭhulh leh a, chutih lai tak chuan Zodini hnen aṭangin phone call ka dawng zui chat bawk.

Min ngaihtuah zet hian Zodini chuan thil nih dan dik tak min záwt a, mahse engmah ka hrilh thei lo, ka hrilh a nih chuan thil pawi a thleng dâwn tlat a tin a ni! Jeremy-a nena kan chanchin erawh ka hrilh a, chuta min chhànna chuan ka thinlung a tinghing dawt nghe nghe!

"Jeremy-a hi i duh miah lo, a hmâ paw'n i ngei èm kha, i chungah engnge thleng? Eng thil emaw ni tak zep i nei ti raw?" a rawn ti ta chat a, ka ṭhianṭha ber a nihna ang tal pawha thudik hrilh ka châk a, mahse thudik ka sawi leh sawi lohah ka nu leh pate nunna a innghat tlat si a ni.

"Engmah zep ka nei lo, Jeremy-a nen hian kan innei dâwn, chu chu a ni mai," ka ti sap sap a, dáwt ka sawi hnem tawh lutuk chu hrehawm ka ti ngawih ngawih!

"Thil dik lo a awm chiang a ni," a rawn tih leh pawh chuan ka ṭanna ngaiah ka la ṭang fan a, laklawh deuhin kan inbiakna chu ka hmet tawp daih bawk.

Chumi zan chu ka mu ṭha lo hle a, thin thiin ka mu thei lo a, ka thawh hmà phah hle. Chhunah chuan social media-ah Salmon-a, a hna aṭanga an suspend thu ka hmu fuh leh ta hlauh mai a, chutah zet zawng ka call lo thei ta lo.

Vawi hnih lâi ka call a, mahse a pick up lo hrim hrim! A tawp nân ti rilru chungin ka call leh ngat a, phone call chu amah ni lovin, hmeichhe pakhat hian a lo chhâng daih a, chu nu chu a nupui hlui kha ni ngeiin ka hria.

"Salmon-a ka be thei ang em?" ka tih chuan, "A buai rih," a lo ti hmak a, "A pawimawh lutuk a, ka biak theih hlauh chuan a lawmawm ngawt ang," ka ti leh ngat a, "A buai ka tih chu, engnge maw i hriat le?" a rawn ti ta hmarh hmarh a, ka hmet tawp chiang hle.

Social media leh chanchin thara a lan dan chuan Salmon-a chu pawisawi lo kutthlaktu a ni a, mî nupui nei tur tibuaitu angin a thang chiam bawk a, Jeremy-a hming leh ka hming erawh a ri miah lo thung.

Nî a liam a, kâr tawp a lo inherchhuak a, ka beisei loh lutukin palai hmêl kan hmu hlawl a, Jeremy-a hnen aṭangin engmah chanchin ka hre bawk si lo a, palai hmêl kan han hmu chiah chu min ṭhawng tak zet!

Ka nu leh pate chuan pangngai takin an lo dawngsawng a, an fanu hian ka duh emaw an ti miau a, dem theih an ni lo, a bul chu keimah ka ni!

Ka rilru a buai tulh tulh a, a tawt up up a, kan in leh a velah Jeremy-a ṭhuihruaite an awm reng tih hriat taka thlalak ka dawng zantin ṭhin te chuan ka rilru a tiipik zual a, amah Jeremy-a nen erawh hmaichhanah kan inhmu leh tawh rih lo thung.

Zan khat chu ka muthilh lâiin ka pindan tukverh a rawn inkhâwng ri karh karh a, ka harh hlawl a, mak ti ru tak hian va fiah ka tum a, mahse Salmon-a hmêl ka hmu hlawl mai, mak ka ti lutuk chu ka hmui ka hup tawp ringawt!

Tukverh chu ka hawng ri rak a, thawm dim tak hian a lo lut a, zawhna mitmengin ka en ngawt ngawt a, ka thinlung chuan a au mawlh mawlh a, mahse ka kâ aṭang erawh ri chhuak rèng a awm lo.

"Engnge tun ang hunah i rawn tih?" ka ti sap a, zan a rei tawh bawk si a, ka ṭawng ring ngam lo hle.

"Thudik min hrilh theih nân engnge ka tih ang?" thum chhal hian a ti a, min din hnaih hrut bawk.

"Ka thu hrilh zawng zawng che kha dik lo a awm lo," ka tih laklawh lâi chuan a kutin ka hmui a rawn hup a, "A ṭha e, ka záwt tawh lo ang che, mahse keimah ngei hian ka zawng chhuak ang," a ti hniam dap dap a, thinrim hmêl a pu miah lo chu mak ka ti leh ta viau!

Engmah sawi tawh lo hian ka biangah a dawm a, ka taksa chuan dawnsawn dan a thiam lo a, ka mur deuh uaih a, ka sam chu ka bengah a zep zui zat a, ka zam ru er er a, ka thin su dup dup ri te chu a hriat phak hial ka ring.