𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟖]

SALMON

By

Havali Adam

Bung 8-na

"Nang....nang hian min duh maw?" ka ti ban chap a, sawifiah thiam si loh hian chhûngrilah ka hlim veng veng a, chutiang thu chu a kâ aṭang a chhuah ka beisei lo a, ka hriat ka ring hek lo.

"Ni lo, nizana i thil sawi chu 'ka duh che' tih hi a ni," a rawn tih chuan chawplehchilhin ka rilru puthmang a inthlak nghal vek a, "Aih....awihawm loh, teuh lo mai," ka ti bah nawk nawk a, "A pawimawh lo tak hle a nih chu," ti leh sawk sawkin ka kal sawn thuai a, choka ah ka phei daih a, ka zak lutuk chu thingpui ka va siam ta ringawt!

Gas hmâah ngâwi rengin ka ding a, ka ngaihtuahna chu a buai a, ka rilruah Zodini a rawn lang hmâsa ber a, záwh leh ngat ka duh, chutiang thu ka lo sawi tak tak a nih vaih chuan ka chhe vek a ni mai.

"Thingpui kha chawh daih i tum em ni?" a mi rawn biakna chuan min tiharh zawk a, a lam ka hawi chu min lo en reng a, ka che buai leh teuh viau!

"Tum lo e, ka zo chiah," tih leh cháwi phei ka rual a, ka pek lâi te chuan ka melh ṭha ngam der lo.

"Hetah chaw ei la, ka thlah dâwn che a nia," a ti dap a, "Ruah han velah ka haw záwk ang," ka lo ti a, "Han lawk lo ta se....?" a rawn tih leh chuan ka ngâwi chiang hle.

"Ih....eng lo, nizana thil thleng kha....." ti sapin ka chawl dat a, kan mit a intawn rual chuan ka zam kher mai.

"Engmah kha a dik lo, ka awm dan a dik lo a, ka thil in vang kha a ni ang," ka tih zawm a, "Thleng nawn tawh suh se," a lo ti thum dut a, ka bu nghauh a, nizan chungchâng kha chu ani nena sawi dun reng chì ah pawh ka ngâi lo.

"Chuan, chanchin tharah ka lo hmu che u a, engnge a dinhmun? A ṭha zel maw?" ka ti ta daih a, bangbo ang hrim hian min en a, "I nupui hlui kha a nia ka tih," ka ti leh sap a, ani pawh chuan, "A ṭha," a lo ti ve mai bawk.

"Mahse..." ti lehin a ngâwi dat a, sawi tum a nei tih ka hrethiam nghal!

"Kan chhanchhuah a ni lo," a tih chuan mak ti ru zet hian, "Tunge chhanchhuak?" ka lo ti thuai a, "Túma'n," a ti tawi leh sup a, "Engnge i sawi awmzia?" ka ti ve leh a, dilchhut min ti mah se pawi ka ti lo, ka hre chàk tlat!

"Amahin a lo haw," a ti hniam chhal a, amah bawk chuan, "Thil dik lo a awmin ka hria, fimkhur ang che," a ti leh a, mahse hlauhthawnna ka nei hran lo.

Kan thingpui inna ka silfai hnu chuan sofa-ah ka ṭhu a, pindana awm chu ka duh reng a, mahse ka pindan a ni miau lo a, ka inthlahrung a ni. Ruah lah chu a sûr tawp duh der lo lehnghal a, khua erawh zawi zawiin a êng a, zîng dâr 7 a ri hnai a, chutia awm teh tlawng chu dikin ka hre ta bîk lo a ni.

Choka ah ka lut a, fridge aṭangin chawhmeh ka la chhuak a, thlai rah a nei nûal bawk a, thlai rah nena thlak pawlh tur bai siam ila a ṭha ang. Ei rawngbâwla hun ka hman lâi chuan pindan aṭangin a lo chhuak a, fridge a hawng a, sawhthing a rawn la chhuak a, a hnuah hnaha fun, bekang a rawn dah chhuak zui zat a, engnge tih a tum erawh ka hre lo.

"Engnge i siam dâwn?" kan ngàwih dun vang vang lâi chuan ka ti ta nge nge!

"Tui i tih ngei ka beisei," a ti sup a, zawhna chhâng ni si, chhâng ni chiah bawk si lova a ṭawng ziah hi ngaia neih a har a ni.

"I siam thiam ang maw?" ka ti zauh pek a, "Kum 6 chuang keimahin ka khawsa tawh alawm," a lo ti mai a, a hnâr a tum zui dat bawk.

Sawhthing leh bekang chu a rawt pawlh a, chì a telh hnu chuan a kut zung têin a tem zeuh a, naupang thil ei tui ti ang mai hian a bu nghauh nghauh a, ka nui chhuak teuh hman viau nghe nghe!

Chaw kan ei lâi chuan inbiakna kan nei hran lo a, a thil siam lah chu a tui phian lehnghal! Champhaia kan awm ṭhin lâi ka hrechhuak a, kan ṭhenawmnuin bekang leh sawhthing rawt pawlh min rawn suah ṭhin lâi te kha ka rilruah a rawn lang a, hun neih a, kâr khat chhûng tal ka pite bula han awm leh ka chàk thar hle.

Kan ei leh inna ka sengfel hnu chuan dâr 8 leh a chanve a lo pel tawh a, ka nu ka call a, dawra ka tlang nghal dâwn thu ka hrilh a, engmah a sawi buai lo a, Zodinite ina la awm angin min ngai ngei dâwn tih ka hria, ka awmna hmun dik tak chu hrilh pawh ka tum chuang lo.

Ruah a la tla reng a, a han mai dâwn lo niin a lang. Zodini ka call leh a, an school bàn huna lo pêng kawi tura ka hrilh chuan a lo nui pat pat a, zawhna min zawh leh duah hmâin kan inbiakna ka hmet tawp daih nghe nghe!

A ngai tê bawkin car chhûngah Salmon-a nen kan chûang dun leh ta ran a, sawi tur a vâng kher mai. Ka ngaihtuah takngial paw'n ka hre chuang lo, kan ngâwi reng a, ka dawr kawt thleng min thlah a, engmah sawi lovin a kal zui leh nghal vang vang bawk.

Nilêngin ruah a tla a, a chângin a sûr tam a, a chângin a sûr tlèm deuh a, chhum lo chat lovin a tla a ni ber. Ka hrilh láwk ang ngeiin Zodini school bâng chu a rawn peng kawi a, nizana thil thlen dan dik tak hriat chàkna chuan ka khat tawh a ni.

"A rawn hruai hnu che khan engtin nge in awm?" a tih chuan, "Engmah ka hre chiang tawh lo, zawh tur che ka ngah lutuk, nizan khan eng thil chiah nge thleng? Engtin nge a inah ka awm daih theih?" ka ti zui mawlh mawlh a, ani erawh a lo nui var var thung.

"A rawn call che a, ka lo pick up, i awmna min zawt a, kan inah a rawn kal chilh hmiah che alawm, i hre tawh na nge?" khi saka a tih chuan, "In ina ka awm lâi khan a lo kal maw?" ka lo ti a, "Kal chiang e le, a ngaihtuahzia che chu hria la i hlim ngawt ang," a rawn ti leh a, mahse chu erawh ka awih kher lo.

"A nih, thil sawi ka nei em?" ka tih chuan, "Nei e, i ngah mai, a pawm lâi che paw'n i nuih vel a, 'pathlawia' te i ti bawk a, engmah i hre tawh miah lo hi a mak záwk, i thil in kha i taksaah a thawk nâ hle a ni ang," a lo ti malh malh a, nizana ka thil in ang kha chu in nawn leh ka chák tawh lo hrim hrim!

"Thil dang sawi ka nei em?" ka ti leh a, "Chutiang sawi bîk em em pawh i nei lo, i sawi pawlh nawk nawk a, chuan, tukinah i harh tirhin engtin nge in awm?" a lo tih zawm zat a, "Mak ti tak ka ni!" ka ti hap a, "Engtin nge a tih che?" a ti leh a, "'Thleng nawn tawh suh se' a ti nghut ringawt, engtin vak mah min ti lo," ka lo ti ve leh mai bawk.

"Thil dang engmah ka sawi tawh lo tak tak maw?" tiin zawhna ngai bawk ka zàwt leh a, dik tak chuan tukina a thu min hrilh khan ka rilru a tibuai a ni.

"I neih áwm pawh ka hre lo, mahse car chhûnga a dah luh lâi che kha chuan sawi niah niah i nei a, in awm dun hnuah pawh i nei maithei, a chhan chu i awm dan kha ṭawng chák zek zek ang hian i awm tlat a, eng eng emaw chu i sawi nûal ka ring," a tih chuan ka lo thaw halh a, ka mitthlâah Salmon-a a rawn lang a, a bulah thil sawi ka nei ngei a nih ka ring ta!

"Nizana a rawn kal khan hlauhthawn rukna ka nei deuh a, mahse a ngaihtuahzia che ka hmuh khan engmah hlauhthawn tur a awmin ka hre lo a, ni lo se chu a hruai che kha ka phal miah lo ang, in rilru puthmang a inangin ka hria Mimi," a rawn ti leh a, "Ni lo Zo, i hre sual, chutiang mi a ni lo," ka ti zawi sap a, engmah ka sawi zui tawh lo.

Dawr ka khar thleng min awmpui a, a scooty-in kan inphur haw a, in ka thleng chu mi dang hriatthiam hauh si lo hian ka tîm dai a, nizana ka awm dan kha ka hrechhuak lo thei lo a, ka nu leh pate lakah chuan ka inthiam lo ru hle bawk.

Tin, ka vawi khat inna a ni a, nizan bak kha chu in leh ka tum tawh lo. Thil ṭha lo a thlen phah lam ni lovin, taksaa a thawh dan kha a turu èm a, engmah tih hreh nei lo tluk hialin ka khawsa a, mualpho pawh a awlsam dâwn tih ka chiang!

Zanah chuan Jeremy-an min rawn bia a, nitin min be lo mah se a khât mâwi táwkin min be ziah a, kan kal thui tak tak hmâin hrilh tlang law law ka duh rum rum a ni.

Pindanah ka awm a, sawi tur dap kualin a hun hman dan te ka záwt a, dârkâr chanve dâwn kan inbe tawh ang tihah in hnuai lam aṭang ka nu min kohna aw ka hria a, kan inbiak tih tawpna tur chhuanlam ṭha tak a ni ta hlauh a, in hnuaia ka chhuk chu Salmon-a ka hmu hlawl mai.

Zawhna mitmeng hian ka en a, min rawn en rual chuan ka mit ka là sawn thuai a, ka pa'n a lo be mêk a, a hna lam chanchin a záwt a, thil nih dan dik tak hre miah lo hian ka pa chuan an hmeichhe chhanchhuah chungchâng a záwt kâi a, a sawi dan kalhmangah chuan a inah a nupui hlui nen an awm dun a nih hmèl!

Mahse, mahse tih chu ka rilru a rawn awm nghal a, nizan leh tukinah khan a nupui hlui hmèl áwm rêng ka hmu miah si lo a, chutia a ina a awmpui mêk thu a hrilh chu mak ka ti a ni.

Ka mak ti hmêl chu a hrethiam nge ni, min rawn melh a, ka lo insiamṭha vat a, thingpui lùm turin ka kal ta daih bawk.

Tray-a thingpui ka châwi phei lâi chuan min lo en reng a, min ti zam chhe lek lek ṭep a ni. Ka thil hriatthiam loh pakhat leh bawk chu, hetia a rawn lèn chhan hi ka hre lo, chhan a nei dâwn tih chu ka chiang a, mahse záwt pawh ni ila min hrilh ṭha duh leh kher lo maithei a ni.

A ṭhutna ṭhutthlengah ka ṭhu a, mahse kan inṭhut hnaih hran lo. Ka pa nen chuan an titi dap dap a, ka nu leh kei chu an titi kâra lo inrawlh zauh zauh ang lek kan ni!

A haw tur chu pâwnah ka zui chhuak a, kan in kawt thleng thlah a táwk maiin ka hria a, mahse thil min sawipui duh a neih thu a sawi avangin a car hùnna thleng ka zui chho a, ka rin láwk ang chiahin lo kal chhan a nei leh ngei e!

"Eng lampang nge?" ka tih chuan, "Tunkâr chu ka rawn ngaihven ṭha hman dâwn lo che a, lo fimkhur ang che," a ti hniam chhal a, "Min ngaihtuah ka ngâi hleinem, i nupui hlui kha buaipui záwk rawh," ka ti dat dat chu min melh run a, a pawi ka sawi emaw ka ti hman hial!

"Vawiin aṭangin ka hnenah a cheng rih ang," ti supin a thaw chhuak deuh hulh a, "Ven ka ngai tawh lo Salmon, hahdam takin awm rawh, ka chungah engmah a thleng lo ang, ṭul lo ah i inti hah mai mai a ni," ka tih chuan min din hnaih hrut a, a rim pà ru hiam chuan ka hnâr a verh nghal zar bawk.

"Ka ngaihtuah che alawm, i chungah hian eng pawh thleng thei a ni," ti thum dupin ka mitah tak min en a, "Ka sawi tawh kha, ngaihtuah ka ngai lo, ven ka ngai tawh lo bawk, pangngai deuhin i hun hmang záwk rawh," ka ti leh a, a mitmenga min ngaihtuahna ni àwm fahran chu awih loh law law ka thlang a, a laka ka rilru puthmang dik tak leh ka laka a rilru puthmang pawh a inang dâwn lo tih chiang a ni.

"Haw tawh rawh," a ngàwih run lâi chuan ka ti leh a, chet mai pawh a tum lo.

"Thil hi a inṭan dâwn chauh niin a lang, fimkhur ang che," ti thum chhal hian a inher a, car chhûngah a lut a, a tlan liam zui ta vang vang bawk.

Chumi zan aṭang chuan a hmêl ka hmu khât ta pharh a, kan kawmchhakah pawh a rawn riak ngai tawh lovin ka hria. Chutia a reh ta vung vung chu awm thiam har ka ti ru em em a, ka ngaihzâwng a ni lo a, a ngaihzâwng lah ka ni hek lo, mahse ka ngâi a ni.

A hnen aṭangin phone call ka dawng ngai lo a, min rawn ngaihven tawh ngai lo hrim hrim ni berin ka hria. Dawra ka awm châng te hian a hmêl hmuh ka inbeisei leh thut ṭhin a, a inah va kal chilh ila chuan ka hmu ngei ang a, mahse chutiang èma ka zahawmna tihbawrhban chu ka duh chuang si lo a tin a ni!

Hun a liam a, hriat loh kârin nipui kan chùangkai leh ta der mai. Zan khat chu Jeremy-a a lo lêng a, ka nu leh pate inkhawm lâi a ni a, kan pahnih chauhin ṭhutthleng khatah kan ṭhu dun a, kan titi melh melh a, ṭawng suam suam paha min ṭhut hnaih lâi chuan ka tim deuh dai a, ka awm dan chu a hrethiamin ka hria.

"Tun ṭum chu Lungleia ka haw leh hmâin kan inkâr hi sawifel tawh ila a ṭhain ka hria," a tih chuan sawi mai tur ka hre lo.

"Ka duh che tih hi chu nang paw'n i hre tawh a, ka duh satliah lo che a, ka duh em em che a, a rem a nih ngat chuan nupuia neih ngei che pawh ka duh a, mahse ka laka i rilru puthmang dik tak hi ka hre hmâsa phawt duh a ni," ti lehin ka kut chu a rawn hum a, min en ta reng bawk.

"Ka...thil dang sawi ila," tiin thu danga pakai ka tum a, mahse a lo duh nasa mai.

"Min hrilh rawh Mimi, engtianga harsa pawh ni se ka taa siam che ka duh a ni," a tih chuan ka thaw chhuak hak a, engkim hrilh tlang tawp mai chu ka rilruk ta!

"Dik tak chuan i fel a, i hawihhâwm a, i zahawm a, hmeichhiate tân mipa innghahna tlâk tak i nih pawh ka ring, mahse ṭhian ang bakin ka en thei lo che a ni, a pawi ka ti," ka ti ta nge nge a, engtin chiah nge a dawnsawn ang ka hre lo.

"A nih chuan, ka beih ṭang ṭangna kha engmah lo mai a ni tihna a ni maw," a ti nghat a, "Chutiang lam pawh a ni lo, min hrethiam rawh," ka tih chuan chiang zet hian min en a, a lungâwi lo tih ka hmu thiam vek!

"Engati nge ṭhian ang bakin min en theih loh? Engnge i mit ka tlun lohna? Mipa duh dang i nei em ni? Min hrilh rawh, chu pa ai chuan engnge ka ṭhat loh bîkna?" a rawn ti ta mawlh mawlh a, min ṭhawng tak zet!

"Hetiang hian awm suh," ka ti dek dek chu, "Engtin nge awm se min tih?" a rawn ti deuh ṭhawt a, ka phu zawk nghe nghe!

"Engtik nî ah emaw chuan ka ta i la ni tho tho ang, chuti maia ka beidawn ring suh," ti leh charh charhin a ding tharh a, a awm dan inthlak danglam rang lutuk chuan rilru fîm pawh min put tîr thei lo.

Veranda-ah ka ding a, kawngpui pana a chho nghauh nghauh chu ka thlir zui reng a, ngaihzâwng anga ka en theih miah loh chhan kha amahah chuan a awm tlat a, lo kal tawh miah lo mah se pawi ka ti bîk lo, mahse a lo kal leh ngei erawh ka ring.

Chumi zan chuan ka rilru a buai ve tho bawk nen Zodini ka call a, ka laka Jeremy-a awm dan zawng zawng chu ka hrilh a, mak a ti ve hle. Mipa ṭha a nih a rin loh thu min hrilh a, dik tak chuan kei paw'n mipa ṭha tak a nih ka ring tawh lo, a awm dan khan a hmâa ka lo ngaihdan zawng zawng kha a thlak vek a ni ber.

A tuk zanah chuan a lo kal leh ka ring deuh a, mahse a rawn inlan lo hrim hrim a, Lunglei lamah a haw te pawh a ni maithei. Ka ngaihtuah zui viau hran lo a, ka lung a ni lo laklawh bawk nen a phone number ka delete daih nghe nghe!

Phone number lawng tawp aṭanga call lo lut reng reng chu ka chhâng duh tawh lo a, Salmon-a phone number pawh a hming ngeiin ka save tawh a, mahse kan inbe khât khawp mai.

A hmêl chu sawi loh, a thawm pakhat mah ka hre zui tawh ngai lo a, lo ngaihtuah leh veng veng châng ka ngah a, mahse a tân chuan engmah ka ni lo tih ka hre chiang tulh tulh a, ngaihtuah loh hram ka duh ṭhin.

Nilai zan a ni a, ka nawmsam loh deuh avangin inah ka awm hle hle a, ka nu leh pate erawh an inkhawm thung. Chutia mahnia ka awm lâi chuan tu emaw ni hian kawngka a rawn kik a, lut turin ka lo chhawn a, Jeremy-a hmêl ka hmuh rual chuan ka melh deuh ngal a, lo kal tawh lo tawp mah se pawi ka ti miah lo asin maw le!

"Hun i neih chuan ka be lawk duh che a," a rawn tih chuan, "Eng lampang nge?" ka ti pangngai ve mai a, puitling rilru lo taka lo awmkhum chu ka duh bîk chuang lo.

"Ka awm rei hman lo Mimi, ka kal thuai a ngai, kawngpui thleng min lo thlah la, min thlah pahin kan sawi dun záwk mai dâwn em ni ang?" a ti leh a, ka remti ve mai bawk.

Kawngpui thleng kan inzui chho a, motor chhûnga sawi dun a rawt leh a, mak ka ti deuh a, mahse ngaihṭhat lohna erawh ka nei hran lo.

"Eng chungchangah nge min biak i duh?" ka tih chuan min rawn en a, engmah a sawi lo a, ṭawng leh ka tum chiah chu ka hnung lam aṭang tu emaw ni hian ka hmui a rawn hup thut a, ka tal vak a, thil rim nâ zet ka hip lut nghal kawk a, chu chuan ka taksa a tichau nghal rawih rawih bawk.

Ka harh chian meuh chuan khua a lo èng iar a, khumah ka lo mu diam a, ka awmna hmun chu khawi lâi nge a nih ka hre lo a, hlauhthawnnain ka khat a, ka phone ka zawng ruai a, ka hmuh hauh lo. Khum aṭanga tho thuaiin pindan kawngka hawn ka tum a, mahse a inkalh tlat!

Chutia kawngka ka sawi dawt dawt lâi chuan a rawn inhawng thut a, Jeremy-a nen kan inhmâchhawn ta ran a, ka chunga a chet dan chuan ka lung a tiâwi mawlh lo.

"Engvangin nge hetiang hi i tih?" ka ti charh a, "Ka thusawi kha i theihnghilh tawh em ni? Engti kawng paw'n ka ta ah ka siam dâwn che ka tih kha, chuan, ka nupui i la ni thuai bawk ang," a ti zo chiah chu, "A teuh lo, i nupui ka ni hauh lo ang," ka ti ṭhawt a, za lo tih hriat tak hian a nui a, chutiang mi a nih chu ka ring lo hrim hrim!

"I hrethiam lo der tlat te a nih ngawt loh chuan nupui atân ka ru che tih i hriatthiam ngei ka beisei," tiin a khi sak a, ka huat dan chu pui tak a ni.

"Kan inah min dah let rawh Jeremy, engati nge hetiang hian i awm? Hmeichhe âwm nêm záwk te duh lo chung nawr lui tur khawpin i àt ka lo ring miah lo asin," ka tih chuan, "Nangmah hian min ti â zo tawh a nih hi!" a lo ti hmak a, rilru hah zetin ka thaw halh ringawt!

"Kei min neih i duh thu hi i chhûngte bulah nangmah ngeiin i sawi ang," ti lehin khuma laptop chu a hmet zeuh a, chiang tak hian kan in leh a vel a rawn lang a, ka bo ta map mai.

"Eng thil chiah nge....." tia ka ṭawng laklawh lâi chuan, "Lungngai mah ta che, engmah ka la ti hleinem, mahse ka thu i zawm lo a nih chuan in chhúngah hian i nu leh pate an cheng mêk a, a ruala thi ve ve tur chuan i phal ka ring chiah lo," tiin min lo pawtchat hmak a, a thusawi zawng zawng chu rapthlak ka ti tak zet!

"Ni lo, hetiang hi i ti thei lo, duh táwk rawh Jeremy, hetiang mi i ni lo tih ka hria," ka ti mawlh mawlh a, "Min hre chiang lo a ni Mimi, ka duh ka hmuh hmâ loh chu ka veh ngat ngat ṭhin alawm, ka nupui i nih theihna tur a nih phawt chuan engmah tih hreh ka nei lo," a ti nghat nghat a, ka awih thei lo záwk!

"Zaninah i chhûngte i bia ang a, kei min neih i duh thu i hrilh ang, chuan, he mihring phiangsen hi i be bawk ang," ti charh charhin thlalak pakhat hi min pe a, chu thlalaka mi chu tu dang ni lovin Salmon-a ngei a ni.

"Ani nen hian inzawmna kan nei hleinem," ka ti fiah fak a, a thil tih dan hrim hrim chu ka haw hluah hluah!

"A tân i pawimawh alawm," a rawn tih chuan, "I hre sual, a tân engmah ka ni lo," ka lo ti thuai a, "Kan hre mai dâwn alawm," tih bakin min chhâng lo.

"Ani nen hian inzawmna kan nei lo tak tak, engati nge ka biak a ṭulna?" ka tih leh chuan, "Khami zana i hmêl ka hmu kha chu mak ka ti teh asin, awm lo la chuan kan dah ṭha hmak ngei ang," a rawn ti daih a, "Engnge i sawi awmzia?" ka ti hû a, a thusaw awmzia pakhatmah ka hre lo tlat a tin a ni!

"Ani hi kan dah ṭhat hunah chuan zalen takin sumdawnna pawh kan ṭan leh thei tawh ang, chuan, ka kiangah nang i awm bawk ang a, chu chu ka duhthusam a ni," ka zawhna pawh chhâng lo hian a ti a, chutiang mihring a lo ni reng chu mak ka ti thlawt a ni.

Pindan aṭangin a chhuak a, tih ber tur hre lovin ka inngaihtuah ngawt ngawt a, ka phone chu zawng ṭhin mah ila ka hmu thei chuang lo, a dah ṭha a nih ka ring nghet bur tawh!

Ka chhûngte mangang hmêl tur ka mitthla a, hrehawm ka ti a, ka chanchin ngaihvenin min zawng nasa tawh ngawt ang. Kei lahin engmah ka ti thei bawk si lo, ka awmna hmun te chu khawi lai nge a nih ka hre lo hrim hrim!

Nilêngin ka inngaihtuah a, a sawi anga ka ti lo a nih chuan ka nu leh pa nunna a derthawng bawk si, ka rilru a hah tak zet a ni. Salmon-a ka hrechhuak a, fimkhur tura min chah lai te kha ka ngaihtuah kir a, a sawi ang ngeiin tunah chuan ka dinhmun mai ni lo, ka chhûngte dinhmun nen lam a derthawng ta chu a ni si a, mang a va han ang tak em!

Zanah chuan pindanah Jeremy-a a lo lut leh a, phone pakhat hi min pe a, phone number a inchhû sa diam a, call turin min ti a, mahse ka hnial a, ka hmai a ri nghal sawk a, ka nu leh pate dinhmun a sawi rik rual chuan a duh angin ka ti lo thei ta lo.

"Hello...." mipa aw thum chhal ka hriat rual chuan engkim hrilh nghal vek ka châk a, mahse min vau bet tlat bawk si!

"Salmon....." ka ti sap a, "Mimi....?" a rawn tih rual chuan ka hmui ka hup a, ka hming ngeia min koh hmâsak berna a ni a, ka kiangah awm se ka ti tak zet bawk.

"Khaw'nge i awm?" a rawn ti deuh chhur a, hrilh ka châk lutuk, mahse ka thei lo a ni.

"Khaw'nge i awm sawi rawh," a ti leh nghut a, Jeremy-a chuan phone chu a lo la hmak a, "Tun ṭum chu i vannei tawh lo ang," a ti charh a, Salmon-a aw ngei chuan, "A sam zai khat pawh i lo khawih a nih chuan dan rorelna ni lovin keimah ngei hian ka chingfel ang che," a rawn ti khauh hmuk hmuk a, Jeremy-a chuan a hmet tawp zui hmak bawk.

"A lo kal ngei ang," tiin a nui zui hak a, "Ni lo, a lo kal lo ang," ka lo ti tlat thung.

"I la hria em, hliam tûar kan buaipui zan kha...." a rawn tih chuan hun kal tawh ka ngaihtuah kir a, "Khami zan pawh khan nang kha awm lo la chu thi turin ka hnutchhiah chiang khawp ang," a rawn ti leh a, "Salmon-a hi i hria maw!?" ka ti phawk hau a, ka mak tihna ka thup sêng lo a ni.