𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟕]

SALMON

By

Havali Adam

Bung 7-na

"I awm dan hi ka hrethiam lo," insum hman lovin ka ti ta tawp a, min rawn melh zawk a, ka inthiam lo leh deuh a, "Eng ber hi nge ka siam dâwn?" ka ti zui zat a, "I duh dûh a ni mai," a ti dut a, a che vel hrim hrim chu a nuihzatthlak lehling a, mahse a thutak hmèl tho bawk si, a châng hi chuan hriatthiam har ka ti ṭhin a ni.

Cooker-ah phuihnam ka phit a, gas-ah thir bêl chhûangin dawhkana mai rah, invel sa thlap chu ka la a, ka zai tê a, têl a hmui rualin ka kang zui nghal a, engmah sawi lo hian ka bulah a lo ding ve reng a, a ruk tak chuan ka zàm ang reng!

"I nupui hlui kha chanchin tharah ka lo hmu a," che mial mial paha ka tih chuan a la ngâwi reng a, "A zia lo ngawt mai, in hmuh leh ngei ka beisei," ka ti leh a, "A awmna chu ka hre tawh alawm," a lo ti sup a, a hmêlah chuan rilru buai hmêl pawh a lang lo.

"I hriat te chuan engati nge chet i làk vat loh?" tiin ka melh ral a, "Ka laka an thil duh an hmuh theih nân hmanruaah an hmâng alawm, mahse ka chhanchhuak ang a, an thil duh erawh ka pe lo ang," a ti bung nghut nghut a, a melh ngai a melh ngur a, a hmêlah danglamna a awm chuang miah lo bawk.

"Engati nge chung mite chuan an huat em em che a?" ka tih chuan, "Dan kalha an thil tih dik loh ka hailansak ṭhin avangin," a lo ti dap a, chutiang lam zawh zui zel chu ka tum tawh lo.

Ei rawng ka bàwlsak chhûng zawng chuan ka piah lawkah a ṭhu run a, engmah a sawi lo a, kei lahin ka be zui bawk si lo, ka ei rawngbâwl thawm tih loh chu thawm hriat tur a awm lo tluk a ni.

A rukin ka melh leh zauh ṭhin a, kan hun hman dun dan chu nuam ka ti ta phian bawk. Ei rawng ka bâwl zo, dawhkana a chaw ei tur ka dah lâi chuan naupangchhia zet hian a lo en kual dan dan a, a hmêlah chuan a ril a ṭâm tawh tih a hriat hle bawk.

"Hetia i ei tur siam ringawt tur hi chu ka ni lo asin maw le, chuan, ka enkawl tawh lo che a nia, kan lo inhmêlhriat tawh avangin ka siamsak mai mai che a nih hi," fiamthu ti tak deuh hian ka ti duah a, thutaka a làk leh pawh ka ring chuang lo.

"Hmêlhriat satliah kan ni hleinem," min en miah lo hian a ti thum dut a, kei erawhin ka melh chiang hle.

"A tui dâwn hi...." a ti leh sup a, a chaw ei chu ka en reng a, ka mit a kham mawlh lo, engtin pawh awm se, a màn hi a ni tawp mai.

"Ka haw har thei lo a nia, ka nu leh pa bulah dáwt ka sawi ringawt lehnghal," ka tih lâi chuan engtin mah min chhâng lo a, chaw a bâr mual mual a, phuihnam chu tui a tih hmèl hle bawk.

"Ti khan lo ei rawh, pâwnah ka lo va awm ang e," tia kal sawn ka tum chu, "Ei ve leh la," a rawn ti dut a, ka mit taka min en vang nge ni, ka en ṭha ngam leh ta miah lo.

"Ei lo mai ang, ka la pûar rih êm mai," tih leh kal ka rual a, pâwn ka chhuak chu vân lam ka hawi a, arsi an de sep sep a, veranda light-in a chhun phak chin tih loh chu a thim vek bawk.

In kawta scooty inhùnna lam chu ka pan a, Awitei scooty kha a ni a, engvanga chuta la awm reng chu nge a nih ka hre hauh lo. Ka tâna a hnutchhiah kha a ni a, mahse Salmon-a ka enkawl lohna te chu a rei ve leh tawh viau si, an rethei zawk zawk lo bawk a, a ui lutuk lo a nih ka ring.

Scooty-ah chuan ka chûang chhin vel a, han khalh thiam ngat ila zawng ka hman ṭangkai dâwn tehreng nen, ka thiam bawk si lo. Zodini paw'n vawi tam min hrilh tawh, scooty khalh zir turin, mahse ka duh tlat lo, chetsual ka hlau ni berin ka hria.

Khalh thiam ila chuan dawr kal nân leh haw nân ka hmang thei ang a, ka nu thlengin a kal duhna hmunah ka hruai thei ang a, dik tak chuan khalh thiam nih chu ka châk ngei a, mahse a harsa lâi ber, khalh zir lâi tak chu ka huphurh a ni.

Chutia a mik a mak hre hlei lova ka'n chûang chhin vel chu vawilehkhatah ka awn duai a, kei chang ka ni lo, scooty pawh chu lei lamah a awn thla riai riai a, ka inrin hmâin leiah ka thum thla zui nghal dawt bawk.

Leiah chuan a zangthal zâwngin ka let tual a, muangchang hian ka tho a, ka din ngil rual chuan veranda-a Salmon-a lo ding chu va hmu a, chal chuar nang hian min lo en a, ka bul a rawn thleng phei har lo hle bawk.

A bân vei lam chuan ka dar a chelh a, a ding lamin min bêng fai thuak thuak a, kan bul lawka scooty let ran chu awlsam tê hian a tung tho a, ka che chhe thei lutuk chuan min tizak ru chem chem a, engmah a sawi miah lo te hlei hlei chuan min tiinthlahrung zual!

"Ka tum pawh a ni lo," ka ti sap a, "Chhe lai a awm em?" ka ti zawm leh zat a, "In chhûngah lut ang," a lo ti duh lek chauh a, pawi ti hmêl a put loh danah engmah chhia leh dik lo a awm lo a nih ka ring ve tawp!

In chhûnga kan luh hnu chuan dawhkan lam ka en hmâsa ber a, engkim a lo felfai thlap a, thleng chenin a awmna hmun turah a lo inrem diam a, pâwna ka awm lâi khan a lo tifel vek a nih ka ring ta hmiah bawk.

"I intifai dâwn em?" a rawn tih chuan, "Aw, ka rei lo ang, a bal zualpui hi a ni mai," tih leh washroom-a luh ka rual a, ka inbuaipui mial mial lâiin washroonm kawngkhar a rawn kik ri karh karh a, "Kawngka bulah hian towel ka dah a nia," a tih hnu chuan thawm a reh zui ta vang vang.

Ka intifai zo chu haw ka rawt nghal a, pâwnah kan inzui chhuak a, câr chhûnga kan awm hnu chuan sawi mai tur ka hre lo. Ani lah chu a ngâwi reng a, ei rawng ka báwlsak avanga lawmthu a sawi ri hriat ka inbeisei tehlul nen, engmah a sawi duh miah lo chu ka ngei ru ngei mai.

"I ei tui maw?" keimah zâwkin ka ti ta nge nge a, "Chawhmeh siam i thiam khawp mai," a rawn tih chuan, "A tui i ti vak lo emaw ka lo ti asin," ka ti deuh nghat a, ka lawm chiah lo tih a hrethiam maithei a ni.

"Tui e," tih tê hian min chhâng a, a lam ka hawi rual chuan min rawn en ve chiah a, motor khalh lâi a nih vang a ni mahnà, tun ṭum chu a hawi sawn hmâsa záwkah a ṭang ve tlat!

"Nuam lo i va tih hmèl ve, i insawh nâ hman em ni?" kan ngáwih dun vang vang hnu chuan a rawn ti a, ka awm dan a hrethiam miah lo chu mak ka ti!

"Nâ lo e," tih bakin ka chhâng lo a, min melh zawk a, a lam hawi kher lo mah ila ka mit sîrin ka hmu ru reng thung.

Inbe lovin kan ngâwi zui leh ta vang vang a, chutia kan chùan hle hle lâi chuan eng emaw ni hi a chil a, kan sawt dâwrh a, thil dang vuan hman tawh hek lo, ka tum pawh ni miah lovin a malah tak ka va vuan rawk a, ka hmer a ni mah záwk!

"Tipalh...." ti sapin ka ṭhu ṭha vat a, ka kut ka hum ngawt ngawt a, a kianga ka che chhe thei lutuk chu ka inhaw ṭhin.

Chutah, kan tlan ṭha hle hle tawh ang chu tih nàk alaiin kawng chhak aṭang lung a rawn tla thut a, kan ding chawt a, kan din rual chuan hmâ lamah ka intheh dâwrh a, ka intauh nâ teuh viau nghe nghe!

"I ṭha em?" a rawn ti sup a, ka lo bu nghauh nghauh a, car aṭang chuan a chhuak a, kawng lâia lung chu a chawi lawp a, kawng sîrah a dah thliah thliah a, tunlâi khua a hnâwng bawk si a, leimin a tam ang tih a hlauhawm khawp mai.

Car chhûnga a lo luh leh hnu chuan kan tlanchhuak zui nghal a, kan in thleng min thlah a, lo lèn a tum leh tum loh a sawi lo a, ka záwt lo a, lêng tur paw'n ka sâwm hek lo.

Chumi zan chuan Zodini ka be leh a, Salmon-a nena kan hun hman dan chu ka hrilh a, ka sawi zâwng ringawt paw'n nuam ka ti veng veng a, a chângin ka ngei a, a chângin man ka ti hliah hliah leh ang lawi a, ka rilru a inthlak danglam awlsam ṭhin lutuk chu amah vang vek ni ta berin ka hria.

Ka zep lo, a nî telin ka vei tulh tulh a, ka thunun theih ni hauh si lo hian ka thluak kawngkhar a rawn hawng ṭhin a, tlângnêl takin a cheng a, a châm zui veng veng ṭhin.

Kâr tawp a ni a, misualte hmeichhe ruk bo an hmuh leh tawh thu chuan Aizawl khaw pum a luah a, chanchin thar leh social media-ah a lang chuaih chuaih a, Salmon-a'n a police uniform nen ngeia chu nu, a nupui hlui a kuah lâi thlalak ka hmu chiah chu ka thinlung a dek zar a, ka thik lo ka tih chuan dáwt ka sawi ngei ang.

Chumi nî, thuthang ka hriat nî chu nuamin ka hmang lo a, zan thlengin ka awm dan a dik lo a, ka mipa duh ruk takin a nupui hlui, ngaihven leh duat taka a pâwm chu ka mitthlâah a riak reng a, mahse tih theih ka nei hauh si lo.

Zodini ka call a, an inah ka lêng thla a, a pindana kan awm hmâin a chhûngte nen kan inkawm hmâsa phawt a, chumi hnu chuan a pindanah kan awm hrang ta chauh bawk.

"Thawl hawk na tur thil eng emaw i kawl em?" ka ti hap a, ka ṭawng hre sual ang hrim hian, "Enga!?" a rawn ti hau a, "Ka dik lo Zo, ka tawt up upin ka hria," ka ti leh a, "Thil thleng a awm em ni?" a ti ve leh nghal zat a, "I neih ang áng min pe tawp rawh, ka ven hawkna tur a nih phawt chuan a pawi lo," ka ti halh a, mak ti zeta mi en zui reng pah hian khum aṭang chuan a kal sawn a, "Beer bak ka nei lo a nia, engati nge hetiang hian i awm? Thil thleng a awm ti raw? Beer i in ngai pawh a ni si lo a, ka ngaih i tiṭha miah lo," ti malh malhin ka bulah a rawn ṭhu a, a beer ken chu ka lo ban nghal chat bawk.

Ka thil ken lâi chu ka hawng a, ka in khawlh khawlh a, ka vawikhatna a ni bawk a, tui pawh ka ti lo. A hiar hiam a, a kha deuh fek bawk a, rei lo tê hnuah ka danglam ṭan a, Zoi chuan in dan táwk thiam turin min hrilh a, mahse ka ngaihsak chiah em pawh ka hre lo.

"Eng thil chiah nge thleng min hrilh teh," ngenngâwl titih hian zawhna ngai min záwt leh a, ka veng ta huai bawk nen ka rilrua awm zawng zawng chu ka hrilh fai vek a, dik lo viau mah ila ka sawi zâwng chuan ka rilru a la nâ pha tho.

"I ngaih ang ngawt a ni bîk kher nàng, in tawh lo teh Mimi, i vawikhat inna a ni bawk si, i kâi nghal der a nia," ti dat data ka in tur min laksak a tum chu ka lo dang thuai a, ka in zui leh nghal zat bawk.

"Duh táwk tawh rih rawh," a tih lâi te chuan engah mah ka ngâi lo a, "Zanin chu hetah hian ka riak dâwn aw, ka nute'n ka awm dan hi an hria a nih vaih chuan min zahpui lutuk palh ang," ka ti hniam raih a, harhfim lo zeta haw ka zuam lo a ni.

"Hei, call i dawng a nia," a tih chuan, "Ka nu nge ka pa?" tluangtlam lo tak hian ka lo ti awn raih a, "Number lawng tawp a nia, ka hre bîk lo," tih leh pick up a rual a, an inbiak dan aṭang chuan tunge min lo call ka hre thei mai lo.

"Mimi, a be duh che?" tiin Zodini chuan ka phone chu min pe a, "Tunge?" ka tih lahin, "I hre mai ang," tih bakin min chhâng bawk si lo, "Hello...." ka ti fân diai a, ka dik lo hle tawh a ni ang, ka phone pawh ka vuan hle hle thei tawh lo chu a ni e.

"Ka lo kal dâwn," mipa aw thum chhal hian a rawn ti a, tunge a nih ka hre lo a, hriat a ṭulna ka hre hek lo.

"A ngâi lo," ti hmakin kan inbiakna chu ka hmet tawp a, khumah chuan ka mu ta hle hle.

"A lo call leh a nia," Zodini lam chu peih lo zet hian ka hawi a, "I duh dûh danin chhâng tawp rawh," ka ti liam puat a, ka awm dan chu a ni chiai chiai a, hrehawm tihna pawh ka nei lo.

"Ti khan lo awm lawk rawh," tia Zodini chhuak thawm chuan ka muhil min tiharh zawk a, mahse ka mit ka men phah chuang lo hrim hrim!

"Bûr engzat nge a in?" mipa aw thum chhal chu ka hriat hnu a ang riau a, ka meng che che a, Zodini chuan, "Bûr khat bak a in lo, mahse a vawikhat inna a nia, a thawk nâ khawp mai," a lo ti dat dat a, ka mu lâi min rawn kuai thotu ka hmu chiang chiah chu za lo zetin ka nui hak ringawt!

"Engnge hetah i rawn tih?" ka ti nghal a, ka beisei loh tak ka hmuh avang chuan ka harh phah deuhin ka hria.

"Engati nge nang pa hi ka thluak chhûngah mai ni lo, a takah lehzel pawh i lo inlan reng?" mumal lo zet hian ka ti leh a, ka mi biak pa chu a ngâwi reng a, min pawm tho nawlh a, ka taksa a zawi tawh bawk nen, ka bân chu a uai thla nghal duai nghe nghe!

"A chhûngte bulah heta a riah thu i lo hrilh dâwn a nia," ka taksa pawm kang rengtu chuan a ti thum dut a, "Khaw'nge i hruai dâwn?" lo ti thuaitu Zodini chuan mak a tih hmèl hle.

"Zanin chu ka bulah awm rawh se," ti supin min kal sawnpui a, car chhûnga ka chùan lâi te chu ka hre lo hrim hrim a, ka taksa a zawi hniang a, men pawh ka meng ṭha peih meuh lo.

Ka kang riai riai a, ka hnung chu ban tha chak takin a chelh run a, a hnu lawkah thil dup nuam zetah ka mu leh a, fiah lo tak hian ka meng a, ka mi hmuh avang chuan ka awm a nuam zual a, khawiah nge ka awm erawh ka hre lo thung.

"Engnge ka bulah hian i tih?" ti sepin a hmai chu thei leh thei lo hian ka tawk a, a biang hmul te, a hmui hmul te, a khabe hmul te chu a inhmeh thlawt a ni.

"Nangmah tak tak i ni em?" ka ti chuai leh raih a, a hmêl tawhkhirh hmêl tak, mahse chhûngril dam dap si chuan min hneh a, min fan a, ka thluak luah hneh tur khawpin a ṭha táwk em em bawk.

Engnge ka sawi zui zel ka hre tawh lo a, ka mit ka meng thei tawh hek lo. Mang ramah ka cheng riai riai a, ka harh meuh chuan boruak a lo hit deuh sùk a, ruah a lo tla cherh cherh a, ka mutna khumah chuan puan sinin ka mu ṭha sauh a, mahse ka mutna chu ka khum ang ta lo riauin ka hria.

Thil hrechhuak zawkin ka mu lâi chu ka har zawk a, ka ṭhu tung nghal ût a, ka hawi kual a, ka awmna hmun chu ka pindan chhûng a ni reng reng lo.

Ka puan sin lâi theh hlim làwpin ka tho chhuak nghal a, engtin nge chuti lâi hmunah chuan ka awm daih theih ka hre lo a, ka phone ka zawng a, mahse ka hmu mai si lo, ka rilru a buai tak zet!

Pindan kawngka ka hawn chuan sitting room sofa-a mipa lo mu thluang duai chu ka hmu nghal a, ka rilruin 'kei hian eng thil chiah nge ka tih' ka ti mawlh mawlh a, thawm dim thei ang berin ka che a, a ke bula ka bag chu amah tiharh miah lovin la thei ila ka ti hle bawk.

Ka pen dêm dèm a, zawimuang hian bag chu ka ban riai riai a, fimkhur zetin ka la kang a, ka chet phawsawlh ka hlauh avangin a hmêl pawh ka en duh lo law law!

Banga sana intâr chu ka en zeuh a, zîng 5 leh a chanve a la ri lo deuh a, khua erawh a èng tawh a, mahse ruah sûr chuan khaw èn tur angin a ti èng lo deuh hret thung.

Pindan kawngka chu dim tak hian ka khar a, bag chhûng aṭanga phone ka phawrh rual chuan Zodini call ka tum nghal rawk rawk a, mahse ka ngaihtuahna a fîm hman hlauh chu a vanneihthlak!

Chutiang hunah a la tho dáwn lo tih ka chiang a, ka tih theih awm chhun chu ngâwi renga awm tawp a ni mai. Nizana ka awm dan kha a theih ang àng ka chhui kir a, mahse engtin nge Salmon-a inah chuan ka lo awm daih theih ka hrethiam lo hle.

Zodini te ina lêng thla tur khan ka chhuak ngei a, ka rilru a nàt avangin beer ka in tih pawh ka la hria, a bak erawh hriat a mumal ka nei tawh miah lo.

Ka ngaihtuah ngial paw'n hriat chhuah ngaihna ka hre lo, ka hlauh tâk ber chu ka bula awm te ngaihsak miah lovin thil sawi chhuah ṭul lo ka lo sawi palh ang tih a ni.

Tukverh bulah ka ding ngâwi reng a, ka awm dan chu zahthlak ka ti a, Salmon-a hmai ka zah em em bawk. Ruah sûr chu han thuai thuai se ka ti a, mahse chuti maia a han erawh a rinawm loh khawp mai.

Ka zun a chhuah avangin pindan aṭang chuan ka pen chhuak ṭhem ṭhem a, thawm ka dim bawk a ni ang, washroom thlen nân ringawt pawh hun ka hmang rei fû!

Washroom aṭanga ka chhuak fel chiah chu ka hmâa Salmon-a lo ding ngâwi reng ka hmu thut a, insum hman lovin ka ṭe chhuak ṭhawt a, ka lungphu ran dan chu pui tak a ni.

En pawh en rei lovin ka kun deuh tlat a, ka pen ta hlawk hlawk a, ka kal pel dâwn chiah tihah chuan ka darah a rawn chelh thuak a, ka kal danin a zir lo lakawh bawk nen ka ke ka chhep sual a, mahse ka tlu tur chu min rawn kuai vat a, amah záwk chhuatah a insawh ri ta dup mai.

A taksa chungah chuan ka bawk ran a, chiang tak hian kan inmelh a, a taksa lumna chuan min ur ham ham a, ka thin a phu dawt dawt a, ka chil ka lem dawk a, ani paw'n min en chiang ngàng mai.

"I tho dâwn nge heti hian kan awm reng záwk dâwn?" a ti sup a, "Maw......?" ka lo ti hû a, chutah harh chhuak zawkin, "Aw....aw.....ka tho dâwn," ka ti phawlh phawlh a, awm sawn rang tak ka ni!

Pindanah ka tawm chawt a, ani erawh engnge a tih ka hre lo, thawm a neih loh danah a mu leh a ni maithei! Ka rilruah chuan zawhna tam tak a awm a, pindan chhûngah ka tei sek a, dik tak chuan nizanah khan engtin chiah nge ka awm ka hre chiang duh a ni.

Ka inngaihtuah fê hnuah pindan aṭangin ka chhuak a, sitting room lam ka pan a, sofa-a lo mu run Salmon-a chu a rawn meng a, chawplehchilhin ka zàm nghal a, mahse ka thil tih tum chu tih tlang ka tum tho.

"Engtin nge hetah hian ka awm daih theih?" ka ti chhuak sap a, kan inawm hlat lo bawk a, ka ṭawng ring hran lo.

"Nizanah i lo kal em ni?" ka ti leh a, min chhâng lo a, min en reng ringawt!

"Min chhâng teh Salmon," ka tih chuan, "I rilru a hah a nih paw'n nizan ang khan awm tawh suh ang che," a ti hniam chhal a, a tho nulh a, choka lamah a phei ta daih a, ka zui ve nghal bawk.

"Eng thil emaw sawi ka nei em?" ka ti leh a, dik tak chuan ka lo sawi chhuak palh hlauh ang tih mawlh ka hlau a ni.

"Nei e," a ti sup a, "Eng thil nge?" ka ti nghal thuai a, mahse min chhâng mai lo hian tui a in khawlh khawlh a, ka dawhtheihnain a tlin lo teuh kher mai.

"A pawimawh lo," tih tê hian min chhâng a, ka awm a nawm phah der lo.

"Eng thil nge ka sawi min hrilh teh Salmon...." tiin a kalna lamah ka zui dat dat a, thil ṭul lo tak ka sawi chhuah loh hram ka beisei.

"Salmon....?" ka ti leh chuan a ding dat a, ka lam a rawn hawi a, min din hnaih a, min en chiang hle bawk.

"Ka duh che," thum dam dapa a rawn ti chiah chu thawm a reh duk ni mai hian ka hria.