𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟔]

SALMON

By

Havali Adam

Bung 6-na

"Nang venhim che hi ka hna a ni a, min hriatthiam a ngâi ang," a ti leh chuan hmâ lam thlirin ka thaw hap a, engnge ka chungah lo thleng dâwn hre lo mah ila hlauhthawnna erawh ka nei ru ran a, kei chang ni lo, ka nu leh pate chungah nen lam harsatna a lo thleng ang tih ka hlau a ni.

Car kawngkhar chu a ri khep a, ngâwi rengin ka chhuak a, hawi lèt miah lovin kan in ka pan a, dik tak chuan hawi lèt ka châk reng, mahse ka inthunun lui tlat a, ani chu engtin pawh awm se keia ngaihtuah ngâiah ka ruat tawh lo.

Kan in kawt thlen dâwna gate tê reuh tê chu ka nam hawng a, engnge ka hriat ka hre lo, ka hawi lèt hram a, ka beisei loh deuhin Salmon-a chu a car bulah a lo ding reng chu niin, min en reng a, chutia kan inen lâi chuan a che deuh thut a, kan in lam panin a rawn chhuk a, a awm dan chu ka hrethiam lo leh ta hle mai.

"Engnge tih i tum?" ka bul a rawn thlen rual chuan ka lo ti a, "I nu leh pate hmuh ka bâin ka hria," a ti sup a, ka rin loh lam daiha a ṭawng ṭhin te, a che ṭhin te hi ngaia neih a har ka ti!

"I sawi awmzia chu..." ka tih laklawh lâi chuan, "Lut ang," a lo ti thum leh dup a, amah che chhuakin gate chu a nam hawng a, min thlek khum zauh a, a thuhnuaia ka awm awlsam ṭhin lutuk chu kei paw'n ka hrethiam bîk lo, a mak a ni.

Kawngka hmâa kan din hnu chuan thawk ka la deuh vang vang a, ka nu leh pate'n Salmon-a nen min hmuh dun hunah engtin nge min ngaih ang tih ka ngaihtuah a, kan in mah ni se keimahah chuan zam ruk riauna a awm a, kawngka chu ka hawng ta nge nge bawk.

In chhûng kan pen luh hnu chuan pangngai takin ka nu leh pate bulah Salmon-a chu ka inhmèlhriattîr a, an hmuh tirh kha chuan inlêng satliah mai tur emaw an ti a, mahse chutia a chanchin leh ka dam lo enkawl ṭhin kha a ni tih an hriat tâk chinah erawh an lo ngaihsak thiam hle.

A taksa dinhmun an záwt a, ka pa phei chuan fiamthu titih deuh hian dam lo enkawl ka thiam leh thiam lo te a záwt nghe nghe a, Salmon-a paw'n an zawhna apiang chu ngaihthlak nuam tak hian a chhâng vek a, chhàn ṭhat duh loh emaw, ngàwih tlat ang chì emaw kha a nei leh ang tih ka hlau ru hman viau nghe nghe!

Thingpui ka siam lâi chuan ka pa bawkin engvanga mi kut tûar ngawt nge a nih a záwt a, ka nu pawh a bang chuang lo, mahse Salmon-a chuan an zawhna chu dik takin a chhâng lo a, ṭawngkam hnih khat lek lekin a pehhel a, ka nu leh pate chuan záwt tawh lo mai se ka ti, thil ni lo lô an hre palh ang tih ka hlau.

Thingpui ka va chhawp phei thuai a, titi dang vawrh tur ka zawng a, ka nu leh pate hmêlah chuan thil dang an la hriat belh châk tih a lang reng a, mahse thu dang daih ka sawi a, an záwt zui tawh lo ve mai bawk.

Ka rin ai Salmon-a chu a lêng rei phian a, Jeremy-a hnen aṭanga phone call ka dawn avangin ka pindanah ka chhohsan a, darkâr chanve dâwn chu kan inbia ang. In hnuaia ka chhuk thlak leh paw'n Salmon-a chu a lo la ṭhu run a, ka pa chuan football chanchin a lo sawipui leh daih tawh bawk.

An bula ka ṭhut hnu, rei pawh ni lo ah ruah a rawn súr a, mar zet hian a sûr nghal buan buan a, chutah a la sûr rei phian zui! Ka nu chu ṭhutthlengah mu zâlin ka pa mal chungah a ke a nghat a, ka nu hian ke za a nei ṭhin a, a za a rawn chhuah châng hi chuan ka pa bak hmehtîr a duh ngai lo.

Ka nu chuan Salmon-a chu a be leh siam siam ṭhin a, Salmon-a erawhin a rul tàwk tê bakin a chhâng ngai lo thung. Dâr 9 leh a chanve a pelh hnu paw'n ruah chu a la hàn duh der lo a, Salmon-a hmêlah chuan haw a duh tawh tih ka hmu thiam vek bawk.

"Nihliap in nei em?" a ti ta nge nge a, "Nei e, mahse a la sûr tam si a, nghak deuh rih la," ka tih chuan, "Ka haw a ngâi," a lo ti dut a, tihtur pawimawh a nei a nih ka ring.

"A nih chuan ka'n la ang e," tih leh thawh ka rual a, kan nihliap neih zînga lian ber chu ka la chhuak a, ka nu leh pate chuan Salmon-a chu ṭawngkamin an thlah a, kei erawhin ka zui chhuak thung.

"I hman remchan hunah i lo dah lèt leh mai dâwn a nia," tia nihliap pek ka tum chu, "Car awmna thleng min lo thlah la," a ti sup a, thu min pe nge min ngen pawh ka hrethiam lo.

"A buaithlak loh záwk," a ti zawm leh a, ka hnial ta bîk lo.

Nihliap chu ka kut ding lamin ka keng a, kei ai a sâng bawk si a, ka bân a kham ru kher mai. Kan kal chhohna step lah chu a tê si, mi pakhat kalna àwm vel leka zau a ni a, a sîr erawh scooty emaw bike tlan thlak theihna turin a mâm pulh thung.

Kawngpui kan chhuak chho hnai tawh tihah chuan ka che buai leh ta, ka ke penna turah tak min pen khalh a, kei lahin rah mai tur ka hre tawh si lo, ka balance ka hloh a, ka thil ken lâi pawh chelh nghet zo lovin ka phar dâwrh a, mahse ka tlu tur chu Salmon-a chuan a bân vei lamin ka kawngah a rawn kuah chat a, ka ding chiang hle.

Ngâwi reng hian ka taksa awn duai chu a kuai ding a, ka nihliap ken lâi pawh a la ta daih a, kan awm dan chuan ka thin a tiphu rang leh ta viau mai. Kawngpui kan thleng a, car chhûngah a lut zui thuai a, inbiakna em em pawh nei tawh lovin a tlan chhuak nghal vang vang bawk.

Chumi zana ka mu chu thil ka ngaihtuah neuh neuh a, a rawn lèn chhûng zâwnga eng hlauhthawnna mah ka nei miah loh kha mak ka ti a ni.

Hlauhthawn chu sawi loh, thil thleng zawng zawng kha ka theihnghilh vek ta emaw tih mai turin ka thluak chhûngah engmah a rawn lang lo a, ka nunna a derthawn leh thawn loh lam lah ka ngaihtuah chhuak hek lo, a mak ngawt mai.

A tukah chuan nilêngin dawrah hun ka hmang a, ka dawr khar hun pawh a pangngai leh ta! Kawngpuia motor tlan te chuan thil min hriatchhuahtîr a, ka thil hriat chhuah chu eng dang ni lovin Salmon-a bawk a ni.

A mak ka ti, ka ngaihtuahnaah a châm tlat a, kan inhmêlhriat ṭan dan te ka ngaihtuah kir a, hmaichhanah ngei min ngaihtuah thu a sawi lâi te kha ka ngaihtuah chhuak a, engtin emaw tak hian ka awm a, a nuam veng veng ni maiin ka hria.

Kâr a ral a, zan khat chu Jeremy-a hmêl ka hmu hlawl a, phone call-in inbe ṭhin tho mah ila Aizawla a lo kal thu engmah min hrilh si lo a, mak ka ti hle.

Tin, kan inkâr chu ka sawi thiam chiah lo, inngâizawng anga ngaih theih si loh, mahse mi dangte ngaihah chuan inngâizawng ang mai kan ni lawi a, ka nu leh pate paw'n ṭhian satliah ang mai chuan min ngai lovin ka hria.

Jeremy-a chuan titi vawrh tur a hriain ṭawngkam a thiam zaih zaih bawk a, Salmon-a lo lêng nen kha chuan in ang lo tak a ni. U Tlankima min hrilh dan chuan Jeremy-a te hi chhûngkaw awm thei pangngai tak an ni a, Lungleia an dawr enkawl mêk pawh a lianin a hlawk hle a ni àwm e.

Amah tak hi chuan min hrilh ngai lo a, ka záwt ngai hek lo. Min ngâizawng tih ka hria a, mahse keimah záwk hian ngaihzawng enin ka en thei miah lo thung si, a laka ka rilru puthmang dik tak chu hria se zawng min ngei viau maithei a ni.

A haw tur kawngpui thleng ka thlah chho chu Aizawla a châm rih dâwn thu min hrilh a, a awm chhûng lo lêng ṭhin tur te chuan ka sâwm ve tak nà a, ṭhian ang bakin ka sâwm lo, dik tak chuan a fel a, a hawihhâwm a, an hausa a, ṭawngkam a thiamin mi ningkhawng a man chak em em a, mahse ka mipa duh záwng, ngaihzâwng atâna ka duh tur chí a ni lo ni ta berin ka hria.

A tlan liam thlengin ka en zui a, in lama chhuk thlak nghal mai ka tum chu kawngpui sira car inhûng chuan ka mit a la ta tlat mai. Street light hnuaia car pawl chu chìk ang reng tak hian ka en a, chutah car chhûng aṭang chuan Salmon-a a rawn chhuak hlawl a nih chu, eng titura lo kal nge a nih ka hre hauh lo.

"Engnge i lo tih dâwn?" ka hmâ zawna a rawn din rual chuan ka lo ti hâ a, ka en chho kal bawk.

"Engmah....." a ti sup a, a sawi ṭha duh lo ni ah ka ngâi!

"Min hrilh ṭha mai mai teh, chhan awm lovin i lo kal tawp lo ang," ka ti deuh diai a, a thil tih reng rengah chhan awm lovin thil a ti ngai lo tlat a tin a ni!

"A chhan hriat loh a ṭhat záwk ka ring," a rawn tih chuan za lem lo tak hian ka nui hak a, zawhna a pehhel thiam thei lutuk hi a mizia ve hrim hrim a nih dáwn hi!

"Hre duh tlat ta ila...?" ka ti hniam dat a, min en chian ang bawkin ka en chiang a, a hmêl chu ni dang ai a fai a, hmuh a nuam a, a inthuam dan chu amah ngawih ngawih bawk.

"Ka rilruah i awm reng a," thum dam dapa a rawn ti chiah chu ka awm dan a danglam nghal vek a, ka thin a su dup dup a, sawi mai tur pawh ka hre lo.

"I him ka duh a, hetah hian ka riak ṭhin," a rawn ti leh chuan, "Hetah hian i riak ṭhin maw!?" ka lo ti thuai a, a lo bu nghut a, a hmêlah chuan dàwt a sawi loh tih ka chiang lutuk tlat!

"Min ngaihtuah suh Salmon, ka ṭha alawm, min ngaihtuah a, ka lawm, mahse engmah ka chungah a thleng dâwn hleinem, engtin mah ka awm lo ang," ka ti ta duah a, ka lamah a rawn pen hnai a, ka rilru zawng zawng hriat tum ang hrim hian min en a, ka zam rukzia chu pui tak a ni.

"Hetah ka awm tih hria la, hlauthawng suh ang che," a ti hniam chhal a, min en chiang lutuk chu ka taksa a sâ het het ni berin ka hria.

"Aw, nia, hlauthawng lo ang," ka ti bah deuh nawk a, ngâwi reng hian min la en reng a, ka awm dan dik lo tial tial chu a hriatthiam loh hram ka beisei.

"Chuan...." ka ti thawp sap a, ka mualpho mai dâwna ka hriat avangin kal sawn mai chu a ṭha a ni.

"Ka....muttui le," ti leh kal sawn vat vat ka rual a, min en zui reng a nih ka ring, ka tukhum chu a za mer merin ka hria.

Ka pindana ka luh rualin ka âwm ka dawm a, ka thin a la su dup dup a, engvanga khatianga awm kha nge ka nih ka hre lo, ka hre lo tak zet a ni. Ka tihtur hre lo leh ka awm dan la dik hlei thei lo tluang zel chu ka tei kual ka tei kual a, a hmêl ka mitthlaah a châm a, a bul hnaiha ka awm apianga ka talbuai ṭhin chu hriatthiam har ka ti tak zet!

Lukham bula ka phone chu ka ban a, Zodini ka call a, a pick up lo a, ka call nawn leh a, mahse a la pick up chuang lo. A buai a nih ringin ka call nawn zel duh ta lo a, mahse amah záwkin rei lovah min lo call lèt thung.

"Engnge ni ta?" a rawn tih chuan, "Thil hrilh tur che ka nei," ka ti nghal thawr a, "Eng maw?" a lo ti mai a, "Ni lo, zawh tur záwk che maw le," ka ti leh chuan, "Han sawi la," a lo ti a, "I buai em?" ka ti hmâsa té tê a, "Ka buai zo tawh," a lo ti ve leh mai bawk.

"Nangmahin i awm em? Mi dang hriat ve chì a ni miah lo a nia," ka tih chuan, "Thil dik lo a awm em ni? Pindanah keimahin ka awm," a rawn ti a, engkim hrilh tlang nghal vek ka tum ta bur!

"Enteh Zo, eng lo a nia, kha, ka dam lo enkawl pa, Durtlang kawnga kan tàn ṭuma min phurtu kha i la hria em?" ka tih chuan, "Aw, hria e, engah nge ka hriat loh ang, engati nge ani chu?" a lo ti mai a, sawi ṭan dan tur pawh ka thiam lo.

"Dik tak chuan....." tiin ka chawl dat a, chutah keimah bawk chuan, "Ka inhrethiam bîk lo, ka rilru leh ngaihtuahna, ka mitthlâah nen lam hian a châm tlat a, ka ngaihtuah lo thei bawk si lo, ka inhrethiam lo a ni," ka tih zawm dat dat a, chutia min hnawh ru ṭûntu ka'n sawi chhuak chiah chu ka thâwl huaiin ka hria.

"A va mak àwm ve...." tiin a chawl dat a, "Nang hi, i lo duh ru reng te hi a ni lo maw?" a rawn tih leh chuan, "Awihawm loh...." ka lo ti vat a, "A nih ka va ring e Mimi, i ṭhiannu hnenah hian kum kha leh chen kha hetiang thu hi i sawi ngai lo, tun ṭum hi i sawi hmâsak berna a ni, hetiang lampang hi i rawn sawi ka ring miah lo asin," tiin a nui zui hak hak a, mahse a thusawi chu pawm harsat ka la ti tlat!

"Chutiang a ni lo ang, keimah ngei paw'n ka hre lo a nia, chu bakah kan mizia a inperhsan lutuk, a nupui nena inṭhen tawh, mahnia khawsa a nih bakah a fapa a sùn tawh bawk a, thil dang a nih záwk ka ring," ka ti duah a, mahse ka ṭhiannu chuan ka thusawi chu thutakah a là duh der lo.

"Min ring tawp rawh Mimi, i awm dan ang hi i ṭhiannu hian ka paltlang hnem tawh alawm, i ṭawngkam aṭang khan a rukin i ngaina a, a bula awm nuam i ti a, a hmêl hmuh i châk tih a hriat vek alawm, i la inhrethiam rih lo mai mai a nih kha," a rawn ti lûam a, rilru a tibuai ting záwk!

"Ka ngaihtuah a, in inhmeh phian dâwnin ka hria," a rawn tih leh chuan, "Khatiang zâwng khan sawi lo teh Zo, ka rilru a buai a nia," ka lo ti thuai a, "A nih, i duh lo tih i pawm em?" a tih chuan ka ngâwi hmak a, "Ka tih rèng kha, i duh tih i la inhrethiam lo mai mai alawm," a rawn tih leh chuan, "Pathlawi a ni lehnghal, zahthlak!" ka ti hap a, a rawn nui chîam a, ka nui ve ta ringawt bawk.

"Pathlawi a nih leh nih lo ah buai suh, induhna te, inhmangaihnate hi dinhmun leh nihna avanga piang a ni lo," a tih chuan ka thaw chhuak hawk a, chutah amah bawk chuan, "Nang hian min hrilh loh i la nei chiang mai, i va enkawl lâi khan eng thil nge thleng? Hetia i sawi danah hian a ngaihsak hle che a ni maw? Engang mize pu nge  a nih reng reng?" a rawn ti zui mawlh mawlh a, ka lo hrilh ta kher kher chu ka buai phah ting záwkin ka hria.

"Engmah a thleng lo," ka tih chuan, "Zep tlat lo khan min hrilh ṭha mai mai teh," a lo ti zui vat a, a phur ching cheng lutuk chu nuih te lam lam a ti za záwk alawm le!

"A man ka ti," ka ngàwih deuh vang vang hnu chuan ka ti ta sap a, a rawn ṭe ṭhawt nghe nghe!

"Kha maw, hmêl ai chuan mizia záwk hian min hip ṭhin alawm," a tih laklawh lâi chuan, "A hmêl pawh a chhe chuang lo," ka lo ti zauh pek a, ka kâ ka vêng hman lo chu pawi tak a ni.

"Awi Mimi, nangmahah a tla nâ hle a nih dâwn hi, hetiang hian i la awm ngai lo hrim hrim, chuan, ani paw'n a lo duh ru ve reng maithei che asin," a ti zung zung a, mahse ka rilruah thil dang daih a rawn awm thung.

"Duhtáwk mai ila, ni dangah kan sawi ṭha dâwn a nia," ka tih chuan, "Aw le, hmaichhana min hrilh hun ka nghakhlel tawh, awi, a mak e Mimi, i puitling ve tak tak tawh a ni ang, ngaihzâwng ngaihsak ngai miah lo khan tunah chuan i mipa duhzâwng i sawi ve tawh a nia," a la rawn ti leh duah hram a, kan inbiakna chu kan ti tawp ta nge nge bawk.

Ka mu ngâwi ran a, ka rilruah chuan Salmon-a leh Jeremy-a an inlan chhawk zak zak a, ka laka an chet dan leh an awm dan chu inperhsan tak a ni a, an mizia pawh a hrang hlak! Jeremy-a lakah chuan inthiam loh rukna ka nei a, Salmon-a ka duh vang pawh a ni chuang lo.

Ni e, dik tak chuan ka duh a nih ka ring. Kan inhmuh hmâsak ber nî aṭang khan keimahah hian a cheng tlat a, ka ngaihtuahna a luah reng tihna lam ni lovin! Tin, enkawl lo ta ila chuan hetiang rilru hi a lakah ka pu lo maithei bawk.

Chungte avang chuan Jeremy-a lakah ka inthiam lo a, min duhtu ni miah lo záwk ka vei tlat chu nuam lo ka ti ve tho, mahse chinfel dan ka thiam bîk si lo a ni.

Salmon-a bawkin ka rilru a luah leh a, kan kawmchhaka a riah ṭhin thu a sawi kha ka hrechhuak zawk a, dàwt a sawi ka ring miah lo bawk.

A chhan chu min venhim a tum thu chiang takin min hrilh tawh a, a sawi ang chuan a awm ngei ang. Chutihrual erawh chuan keimahah eng hlauhthawnna mah a awm tawh lo a, pangngai takin ka nung a, misual kut ka tawrh lah ka ring hek lo.

Hun a liam ang zelin nî tharin a rawn zui a, Jeremy-a chu Aizawla a châm chhûng zawng zantin a lo léng a, kâr khat ngawt a châm a, kan inkârah erawh eng thil danglam mah a thleng lo thung.

Zan khat chu sitting room-ah kan ṭhu a, ka pa chuan chanchinthar a hmet chhuak a, chuta an thu rawn pùan chuan ka beng a verh zar mai. Hmeichhe ruk bo a nih thu an pûang a, hmeichhe thlalak ka hmuh rual chuan Salmon-a ka hrechhuak nghal zat bawk.

Chu thlalaka hmeichhia chu a nupui hlui ngei kha a ni a, police lamin a zawn hna an thawh mêk thu an pùan lâi chuan ka rilruah thil dang daih a lo awm a, a nupui hlui mah ni se Salmon-a tân phet buai lohna chì a nih ka ring hauh lo, a zawn kawngah pawh ṭankhawhtu ber a nih ka ring.

A tukah chuan ka dawr chhak lawkah ignis car pawl hi a lo ding a, Salmon-a a nih ka ring deuh rum rum a, car chhûng aṭanga mihring lo chhuak ka hmu chiah chu amah a lo ni tak tak, mahse chuti lai hmunah chuan engnge a tih dâwn ka ring thiam mai lo.

Chutah ka dawr awmna lam a la rawn hawi zui a, kan mit a intawng chat a, kawngpui kan a tum lai chuan mit la sawn lêk lo hian ka lo thlir a, t-shirt bân tlawn, navy blue rawng a ha a, a hnuaiah kawr dang a ha tih hriat takin a kawr nghawngah chuan t-shirt vâr hi a rawn lang kual kalh a, amah ti pà zual tur ang hrima a biang leh hmui hmul ṭo bit sep sep te chu a inhmeh thlawt a, a man tak zet!

Kawngpui a kan fel chiah tihah chuan ka harhchhuak zawk a, ka awm dan ka siam rem a, tihtur ka zawng a, mahse tihtur mumal ka nei der lo. Ka hawi chuan Salmon-a chu dawr chhûngah a lo lut titih der tawh a, zawhna mitmengin ka lo en ral bawk.

"Thil sawi dun tur kan nei," a ti thum chhal a, ka bo nghal map mai.

"Eng thil maw?" ka tih chuan, "Thil pawimawh," tih bakin min chhâng duh der lo.

"A nih chuan sawi la......" ka ti leh a, "Heti laia sawi chì a ni lo," a ti tawi tup a, a awm dan chuan ka ngaih a tiṭha lo lek lek záwk a ni.

"Dawr hi ka kalsan thei lo," ka ti hniam dat a, dawr chhûnga kan sawi dun thei lo a nih chuan dawr ka kalsan ngawtna chhan tur ka hre bîk lo.

"Zaninah ka lo lam ang che," a tih chuan ka ngâwi ran a, eng chungchang nge ka hre bawk si lo, a duh dan dâna min tihkawi a tum ṭhin chu a buaithlak ka ti!

"A pawimawh viau a nih chuan hetah hian sawi mai la, zana chhûah chhuah hi ka chhûngte paw'n an remti chiah lo," ka ti leh hram a, "Zanriah ei khamah ka lo lam ang che," ti nghet dapin a inher a, a kal sawn zui nghal nal nal a, "Salmon...." tia ka kohna chu hria ang paw'n a awm duh ṭhak lo.

"Kha pa nen khan in inhria elo?" pa Vâla lam chu ka hawi a, a zawhna avang chuan thil dangah ka rilru a kal peng zui nghal bawk.

"Aw.....nia, hria a ni mai," ka ti ringawt a, chutah pa Vâla chuan, "Kum 5 emaw kum 6 liam ta vel kha a nih ka ring, Aizawla kan rawn insawn thlak hmâ a ni a, ka hnathawk haw, kawnga ka kal laiin min rawn hmu a, min khawngaih nge ni, a motor-ah min chùantîr a, tun thleng hian ka la hriat phah, ka theihnghilh thei lo, amah kha chuan min hre tawh kher lo ang," a rawn ti leh a, ka thu hriat chu dangdai ka ti khawp mai.

"A nih chû....." tih bakin ka chhâng lo a, kum 5 emaw kum 6 liam ta vel a nih chuan Salmon-a hringnun pangngai lai a la nih ngei ka ring.

Zanah chuan a sawi láwk ang ngeiin a lo kal a, kan kawmchhaka a awm hnuah phone call-in min bia a, ka nu leh pate bulah dawt muhlum ka sawi phah a, ngaihṭhat lohna engmah an nei lo chu ka lawm rilru kher mai.

A ngai tè bawkin a in lam kan pan a, kan thlen hmâ zawng engmah kan sawi dun lo a, car khâwl ri chu thawm awmchhun a ni mai. In kawt kan thlen chuan a chhuk nghut a, kei pawh ka chhuak zui ve nghal a, a awm dan leh a che vel chu ka lo en leh ngawt ngawt ṭhin.

In chhûnga kan luh hnuh chuan ka lam a rawn hawi a, chutah ṭawng chhuak hmâsa záwkah ṭangin, "Dan lova thil ti ru ṭhinte'n kan mi man lâi ka chhuah lo a nih chuan ka nupui hlui mai ni lo, nang ngei pawh hi thahah min vo a ni," a ti hniam dat dat a, a kekawr ipte aṭang chuan thlalak pakhat hi a rawn phawrh a, "He pa hi i hriat zâwng a nih ka ring," a tih lâi chuan thlalak chu ka en a, tu dang ni lovin Jeremy-a ngei a ni.

"Engmah ka hrethiam lo, engtin nge Jeremy-a thlalak hi i kawl daih theih?" ka tih chuan, "A hnaihah hian awm tam suh, i tisual lo ang," a ti tawi nghut a, chìk zet hian a hmêl chu ka en a, fiamthu hmêl a pu lo a, dáwt sawi hmêl lah a pu hek lo.

"Chu zawng chu em ni?" ka tih leh chuan min melh run a, a buainaa lo buai ve vak chu ka tihtur niin ka hre lo a, thi tura inngaihna emaw hlauhthawnna emaw pawh ka nei duh lo hrim hrim bawk.

"Thil pakhat a la awm," a ti sup a, "Sawi la...." ka lo ti mai a, "Chaw ka la ei lo," a rawn ti teh daih a, nuih za ru zetin ka kiai sak nghe nghe!

"Kan thil sawi lâi nen inzawmna a neih àwm ka va hre chiah lo ve," ka ti chhuak hak a, ka nuih a za ru ngei mai.

"I chawhmeh siam ka ei leh duh," tluangtlam dap hian a ti a, a thusawi chu thutakah ka la thei der lo.

"Nichin lawk khan thi thei reng dinhmuna ka din thu min hrilh a, tunah ka chawhmeh siam i ei duh thu i sawi leh a, a va mak teh nuaih ve," ka ti ta duah a, ka nui ri ta nge nge bawk.

"Engkim ka lei sa tawh a, i siam rei deuh a ni paw'n a pawi lo, ka nghak mai ang," tiin choka lam a pan a, "I tak tak elo?" ka tih chuan min chhâng lovin fridge a hawng a, chawhmeh a la chhuak dan dan a, ka phei ve ta ringawt!

"Siam tawp a ni mai, a bak zawng chu ka ti vek tawh," a tih chuan a sawi ang tak takin thlai hnahho chu a lo insilfai sa thlap mai.