𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟓]

SALMON

By

Havali Adam

Bung 5-na

Inbe lovin eng emaw chen kan awm a, in khata awm dun ve ta lema han inbiak miah loh tawp chu hrehawm ka ti ru kher mai. Sawi mai tur lah ka hre bîk bawk si lo, ani ni se min be hmâsa dâwn lo tih ka chiang si, kan awm dan chu a nuam lo teh e!

Hun khawh ral nân chetna tur ka zawng a, thingpui ka chhûang pah bawk a, ani erawh pindanah a inkhung leh daih tawh thung. A lehkhabuho chu ka en lâwr dan dan a, ka chhiar duh chì pakhatmah ka hmu lo.

Chutia hun ka hman mêk lâi chuan vawilehkhatah tukverh darthlalang a rawn keh ri chuaih a, phut tak té hian ka phû a, sitting room chhuatah chuan eng emaw ni, thil bial hi a lir teng teng a, chu thil aṭang chuan meikhu ang tak a rawn chhuak a, pindan kawngka a rawn inhawn rual chuan ka hawi nghal vat bawk.

"Lo kal rawh," ti leh ka kuta rawn chelh a rual a, pindan chhûngah min luhpui thuai a, rei lovah in chhûng chu thil khu vâr chuan a luah khat a, eng khu nge ka hre lo, mahse thawk erawh a ti harsa tak zet, chutah light a la rawn thim vek zui!

"Hei hian i hmui leh i hnâr hup tlat ang che," tiin rawmâwl min pe a, chutah amah bawk chuan, "Khum hnuaiah hian lut rawh," ti lehin fimkhur tih hriat tak hian a hawi kual zuk zuk a, kan hun tawn mêk chu a hahdamthlak hlawl loh!

"Khaw'nge i kal dâwn?" a kal sawn tur chu a bânah ka chelh thuai a, tun ang dinhmunah chuan mahnia awm ka zuam lo a ni.

"Hlauthawng suh, i him ang," ti supin khum hnuaiah min bawh luhtîr a, a kal sawn chu ka thlir reng a, lehkhabu kâr aṭanga silai a là chhuak ka hmuh rual chuan mak ka ti kher mai.

Chutia a awm dan ka thlir reng lâi chuan tukverh darthlalang a rawn keh leh ṭhuai a, silai puak riin a zawm a, chutiang renga thawm rapthlak chu ka nunah ka la tawng ngai lo.

Hlauhthawnnain ka khat a, ka tha a khur a, men pawh meng ngam lovin ka maimitchhing ngawt ngawt a, ka rilruin 'Lalpa min pui rawh, min pui hram rawh' ka ti mawlh mawlh a, ka thi ngei dâwna inhriatna ka nei nghet em em bawk.

Silai puak ri ka hriat apiang chuan ka lo phu uih uih a, ka mitthlâah ka nu leh pa leh ka ṭhiante an lo lang zut zut a, ka ṭah a chhuak ngawih ngawih a, hlauhna nasa tak chuan min hmer a, talchhuah ngaihna rèng ka hre lo.

Chutia hlau leh khura ka awm lâi chuan pindan tukverh darthlalang chu a rawn keh darh leh chuaih a, thawm dim baksak lo hian mi tu emaw hi a lo lut a, a ke pen thawm chuan ka lungphu a nghawr nghing dup dup a, ka thih loh rèng ka ring tawh lo.

Vawilehkhatah silai a puak ri ṭhuai a, ka hmâ zawnah tak chuan mihring taksa ruangam ngei mai a rawn let thla hnawk a, a taksa aṭang chuan thisen a luang chhuak zut zut a, ka hlau lutuk chu ka ṭe chhuak nghal ṭhawt bawk.

Chutah ka bân chu tu emaw hian a rawn chelh a, chu veleh, "Ka duh lo, min thlah rawh," ka lo ti chiam a, tal chhuah tumin ṭan ka khawh a, mahse Salmon-a aw ngeiin, "Hlau suh, lo kal rawh," a rawn tih tâkah chuan thihna pumpelh ang mai hian ka inngâi a, khum hnuai aṭangin ka chhuak thuai a, nghet taka ka kut a chelhna chu thlah rèng ka tum tawh lo.

Washroom lamah min hruai a, a mi kaih ang ang chuan ka pen hlawk hlawk a, pâwn lama silai puak thawm ka hriat apiangin ka phu zùk zuk a, Salmon-a hmêl chu ka en leh ngawt ṭhin a, ka dam chhuak zo lo ang tih mawlh ka hlau a ni.

"Hetah hian lo awm la, ka lo kal hmâ chu lo chhuak suh ang che," ti nghet dapin washroom aṭang chuan chhuah zui mai a tum a, "I lo let leh tak tak ang em?" ti thuaiin a mitah tak ka melh chho kal a, keimah chauha ka awm tur chu ka ngaingam thlawt lo a ni.

"Ka lo let leh ngei ang," tih leh chhuah a rual a, pâwn lam aṭangin a kalh ri zui rak bawk.

Silai puak thawm kârah chuan thil keh ri te, inbe thawm te ka hriat pawlh nawk nawk a, keimaha hlauhthawnna awm chu a zual zel a, ka tih theih awmchhun chu ṭawngṭai a ni.

Himdam taka ka chhûngte ka hmuh leh theih nân ka ṭawngṭai mawlh mawlh a, ka dinhmun chu thih leh dam inkâr a ni tih ka hre chiang hle bawk. Ka tawt up up a, ka ṭah a chhuak a, mahse thawm ka chhuah a nih chuan mi dangin ka awmna an rawn hria ang tih ka hlau bawk si, ka awm dan chu ka hun tawn tawh azawngah a la hrehawm ber ang.

Hmai hupin ka ṭhu kun ngul a, a chângin ka beng ka hup leh tawp ṭhin a, a tawp a tawpah chuan ka ṭap ta nge nge bawk. Ka hlauhthawn èm avangin thi tlukah ka inngâi hman hial a, mahse washroom kawngka a inhawn ruala Salmon-a hmêl ka hmu chiah chu ka nungchang ka hloh vek a ni ber.

Ka kuah thlawp a, nghet zetin a kawngah ka kut ka suih a, ani erawhin min kuah lèt lo a, mahse min kuah leh kuah lo ah ka buai lo, ka bulah nung damin a la awm tih ka hriatna chuan ka hlauhthawnna leh ka manganna tam tak a su kiang a ni.

"I him tawh e," dam dap hian a ti a, ka inhrethiam bîk lo, a bulah chuan him hliah hliah angin ka inhre tlat a, keimahah hlauhthawnna la awm deuh tho mah se a nasa tawh lo.

"Sir, zanin atân chuan an rawn che ngam tawh lo turah ngai ang, loh theih lohna avanga kan mi dawp tum ber kan that ta erawh a pawi ka ti khawp mai," mipa dang ṭawng thawm ka hriat rualin Salmon-a ka kuahna chu ka thlah vat a, ka awm dan ka siamṭha thuai a, Salmon-a hnunga mipa pathum lo dingte chu ka hmu zui nghal bawk.

"Sir, zanin chu hetah ka lo awm ve ang e, thil thleng thei a la awm tlatin ka hria," an zînga pakhat chuan a rawn ti ve leh a, Salmon-a erawh a la ṭawng mai lo thung.

"Ni e, Zira hian awmpui che se la a ṭhat ka ring, chuan, engtin nge kan bawhzui ang?" pakhat chuan a lo ti zui zat a, sawi ve tur rèng ka hre lo a, ka inrawlhna chí lah a ni hek lo.

"Naktukah kan sawi ṭha dâwn a nia," Salmon-a chuan a ti thum chhal a, ka mitah min rawn en a, min ngaihtuahna mitmeng chu ka hmuh hmaih thei lo, ka thlâ a timuang tak zet!

"I inhliam em?" mi dang an chhuah fel rual chuan ka ti nghal a, "Ka ṭha," tih tê hian min chhâng a, min en chiang lutuk chu ka awm thiam lo lek lek záwk a ni.

"Zanin chu ka thlah ang che," ka mita la en reng chung hian a ti sup a, mak ka ti hman viau nghe nghe!

"Ni lo, motor khalh thei i la ni rih lo, i hliam kha dim a la ngâi, chu bakah Thianga ka call thei alawm," ka ti zung zung a, ka phone ka khawih lâi chuan a rawn la a, Thianga chu biain a haw theih thu a hrilh tlang nghal a, a chet dan chuan min ṭhawng vel vek a ni ber.

"Thlah ka ngai lo tak tak a nia, Thianga awm lo mah se keimah paw'n ka haw thei," ka tih laklawh lâi chuan, "Khaw'nge i bag?" a lo ti daih a, sitting room sofa-a ka bag let ran chu hmuin a va la a, in aṭang chuan a chhuak zui a, ka tân zui loh theih pawh a ni lo.

"Motor khalh chì i la ni lo," pâwna kan awm hnu chuan ka ti leh a, mahse ka thusawi zawm chu khawilamah!

In hmâa Ignis car pawl chu hawngin driver seat-ah a ṭhu lut zui tharh a, a luhlulzia ka lo theihnghilh hman tih ka hrechhuak nghal bawk. Ka luhna turin kawngka a nam hawng a, ṭhut luh mai loh chu ka tân tih theih awm hek lo.

Ka chùan luh hnu lawkah a tlan chhuak a, a khalh chak hran lo a, khalh chak tur paw'n a taksain a tlin ka la ring chiah lo a ni.

Ka rilruah thil tam tak a rawn lang a, dik tak chuan thawh zui zel ka duh tawh lo, a hlauhawm èm mai. Hrilh tlang law law ka rilruk a, a chhûngte bulah pawh zanin là lâa hrilh nghal a ṭhat ka ring.

Kan in kan pan chhûng zawng chuan ṭawngkam khat paw'n kan inbe lo a, kan ngaihtuahna kan kawm ni berin ka hria. Kan vêng kan thleng chu engtin nge kan vêng awmna a hriat ka hre hauh lo, kei chuan ka hrilh àwm ka hre lo a, Awitei hnen aṭangin a hria te pawh a ni maithei!

"A remchâng laiah ka lo chhuk mai ang, kan in awmna a hlâ tawh lo," ka tih chuan muangchang hian kawng sîrah a ding riai riai a, ṭawng tuma ka kâ ka àn dâwn lâi tak chuan, "Naktuk aṭang chuan i lo kal a ngâi tawh lo ang," a rawn ti dap a, ka rilru a hria emaw ka ti hman hial nghe nghe!

"Zanin avang khan pawi ka ti khawp mai," a rawn ti leh a, car stearing la chelh reng chungin ka lam a lo hawi a, sawi tur ka hre lawk lo.

"Inenkawl ṭha ang che," ti sapin ka bag ka zen rawk rawk a, "Chuan, heng damdawiho hi ei ṭhulh lo la, i dam thuai mai ang," tiin a damdawi tur ka la kawlho chu ka phawrh chhuak a, ka awm danah chuan thawh zui zel ka zuam tawh lo tih a hriatthiam ngei ka ring.

"Ka lawm e," ti hniam dapin ka mitah tak min en a, "Min enkawlna zawng zawngah khan," a tih zawm leh a, sawi tur ka hre lo, ka bu nghat ringawt!

Car aṭangin ka chhuak a, kan in kawngka ka hawng tur chu ka hawi lèt a, car chhûng aṭang chuan min lo la en reng chu niin, min ngaihtuah hmêl ang taka a lang chu ka hrethiam chiah lo, ka hmu sual záwk te pawh a ni maithei!

"Zanin chu i va rawn haw hmâ ve?" in chhûng ka luh rualin ka nu'n min lo bia a, "Nia," tih bakin ka chháng lo.

Ka pindanah ka chho a, engnge tih ber tur hre lovin khumah ka ṭhu thla hnawk a, keimaha hlauhthawnna la awm det det chu a reh lawk pawh ka ring lo.

Zan a rei a, muhil thei lovin ka la meng kar a, dâr 12 pelhah ruah a rawn sùr cherh cherh a, ka rilruah Salmon-a a rawn lang a, a tân chuan thlamuang taka mut a harsat viau ang ka ring.

Awiteite bulah a û enkawla ka zawm tawh dâwn loh thu ka hrilh theihnghilh tih ka hrechhuak a, buaina erawh ka nei hran lo, Salmon-an a lo hrilh ve tawh mai turah ka ngâi, chu bakah an chhûngkaw thila inrawlh leh inhnamhnawih ka duh tawh lo hrim hrim a ni.

Ka zan mu chu ka dik thei lo a, ka mit ka chhin apiangin thil thleng kha a rawn lang zel a, keimahah nghawng ṭha lo a nei zui ang tih ka hlau tak zet a ni. Thil dang ngaihtuah luih hram ka tum a, earphone-in hla ka ngâithla a, ka muhil ta ngei a ni ang, ka harh chuan nî a lo chhuak der tawh!

Nilêngin ka rilruah nizana thil thleng bawk kha a awm leh a, pa Vâla titi pawh ka zàwm hleithei meuh lo. Ka nguai bùi a, mi dangin ka thil tawn ang kha tawng ve ta se chu ka awm ang tho chuan an awm ka ring.

Ka nu leh pa hnenah pawh engmah ka la thlen lo a, sawi dan tur ka hriat loh bakah pu Châmate chhûngkaw chungah an ṭuan ang tih ka hlau a ni. Tin, ka thawk tawh lo tih ka hriattîr tawh bawk a, ngaihṭhat lohna rèng an nei lo hrim hrim!

Pindana ka ṭhut ngàwih reng lâi chuan phone call ka dawng a, number lawng tawp a ni a, chhàn pawh ka tum hran lo, ka ring raltîr vel mai mai a ni ber.

Number lawng a ṭang bawk phone call ka dawng leh a, rilru buai laia min lo call chhen chu ka ning a, ka hmet tawp hmak a, engkim, zep awm miah lova thil thlen dan ka nu leh pate hnena sawi mai chu ṭhain ka hre ta!

Ka pindan aṭanga ka chhuak tur chu phone call ka dawng leh a, number lawng bawk a ni leh a, mak ti ru ang reng takin ka pick up ta nge nge!

"Hello....?" ka ti diai a, lehlama mi chuan, "Kan inbiak a ngâi," a rawn ti thum chhal a, a aw chu ka hriat hnu ni tlatin ka hria.

"Ka rawn lam ang che," a rawn ti leh a, chutah erawh tunge a nih ka hre nghal a, mahse kan inbiak a ngaihna chhan ka hre ve hauh lo.

"Ka....." ka tih laklawh lai chuan kan inbiakna a hmet tawp daih a, ka ngei kher mai.

Minute 10 hnu velah phone call ka dawng leh a, amah bawk a ni a, kan kawmchhak kawngpuia a awm thu a sawi chuan mak ka ti leh ta viau, engtin nge kan in awmna lehzel a hriat ka hre lo, mi dang a zàwt a ni ngei ngei ang.

In aṭanga ka chhuak tur chu ka nu leh pate hnenah dawra ka kal lawk tur thu ka sawi a, Salmon-a nen kan inhmu dâwn tih hria se zawng an ngaihdan an dang deuh maithei a ni.

Salmon-a nen chuan a car bulah kan indin chilh ran a, chutih lâi tak chuan Thianga a rawn thleng ve chiah a, engvanga lo la kal nge a nih ka hre hauh lo.

"Ka thawh tawp tawh thu i chhûngte i la hrim lo em ni?" tiin Salmon-a chu ka melh kal a, "La hrilh lo," a rawn tih chuan ka thaw chhuak hak a, ka rin táwk vel chiah a ni.

"Chuvang a nih dâwn chu Thianga hi a rawn kal, engati nge i la hrilh loh? Hrilh tawh tur i ni asin," ka ti ta duah a, "Hrilh loh chhan ka nei alawm," a rawn tih chuan zawhna mitmengin ka en a, mahse ka en rei lo.

Motor aṭanga rawn chhuak chiah Thianga chu ka ko a, ka awmna lamah a lo phei a, mi nêl tak hian min be suam suam a, ka zui nghal mai ringa  motor chhûng a lut tur chu thil sawipui tur ka neih thu ka hrilh a, a lo phei ve nghal mai bawk.

"Zanin atân chawlh ka pe ang che," ka hnung lam aṭanga lo titu Salmon-a lam chu kan hawi rual ṭhawt a, ka beisei loh ang bawkin Thianga chuan a beisei bîk lo a ni.

"Tak tak maw u Salmon?" Thianga chuan a ti hau a, eng thil chiah nge Salmon-a chuan tih a tum ka hre lo.

"Ka pa ka lo hrilh ang," Salmon-a chuan a ti leh a, "A nih chuan zanin chhûng motor hi ka kawl thei ang em, naktuk zînga dah let leh turin," Thianga chuan a rawn ti zui nghal a, Salmon-a erawh ṭawng tawh lovin a lo bu nghut thung.

"Ka lawm e," ti vâhin Thianga chu motor-ah a lut a, a tlanchhuak zui ta vang vang bawk.

"Engati nge hetiang thil hi i tih?" ka tih chuan, "Lut phawt ang," tih leh driver seat awmna lam pan a rual a, kawngpui sîra dawr nghaktute chuan min lo en hrek hrek hlawm a, a sawi angin ka awm leh ta nge nge!

"Engati nge i in lamah min hruai?" ngâwi renga a khalh mual mual lâi chuan ka ti halh a, pangngai takin thil a sawi theih reng a, rilru tihah zâwnga a awm ṭhin chu dawh reng theih niin ka hre lo.

"In kan thlen hunah ka hrilh ang che," a rawn tih chuan, "Tunah min hrilh law law rawh, i ina lo kal ka tum tawh hleinem," ka ti nghat a, ani erawh a ngâwi run a, kan inbe zui ta miah lo bawk.

A in kawt kan thleng chu chhuah ka tum lawk lo a, car chhûngah ka ṭhu ran a, beisei lo deuhin kawngka min rawn hawnsak a, mahse ka la chhuak duh mai chuang lo. Amah enkawl hna ka thawk ṭhin ngei a, a duh duha min tihkawi a tum erawh ka duh hauh lo.

"Lut ang," a rawn ti sup a, ka thaw chhuak halh a, a ṭul hle te a nih ngawt loh chuan tun ṭum bak hi ka kal ka ring tawh lo.

Car aṭang chuan ka chhuak nghauh a, ka hnungah min zui a, in chhûng kan luh hnu chuan ka hawi kual a, mak ka tih deuh chu nizana tukverh darthlalang keh nuaihho kha a lo awm tawh miah lo, a lo invuah ṭha fel vek tawh!

"Eng thil nge kan sawi dun tur awm?" ka tih chuan, "Ṭhu phawt ang," a ti leh tè tè a, sitting room sofa-ah ṭhuin kan inhmachhawn ta ran a, eng lam nge kan sawi dâwn rin ngaihna ka hre lo hle.

"Hetah i awm a ngâi, ka bulah," a rawn tih chuan, "Engvangin?" ka lo ti nghal zat a, "A chhan chu ka bulah lo chuan i him lo," a ti thum leh dap a, a thusawi awmzia chu ka hre lo kher mai.

"Engnge i sawi awmzia? Engvangin nge i bulah lo ka him loh?" ka ti ta mawlh mawlh a, awki hniam chhal hian, "A chhan chu nizan khan i hmêl an hmu a, ka tâna mi pawimawh i nih ringin i nunna hi a derthawng a ni," a rawn ti a, sawi tur rèng ka hre lo, ka bangbo tak zet!

"Engkim min hrilh rawh Salmon, engvanga ka nunna chu derthawng nge a nih?" ka awah chuan hlauthawnna a tel a, mi â tân lo chuan hai chì a ni lo.

"Ka hnathawh avang hian hawtu ka ngah a, chung zîngah chuan min thah duhtu sumdawng mi lian tam tak an awm a," tia a ṭawng lâi chuan, "Ni lo, ni lo, kei hian tu pawi mah ka sawi lo a, nang angin sumdawng hausa hawtu pawh ka nei ve hek lo, chutiang ngawtin ka nunna hi a derthawng thei lo hrim hrim," ka lo tih zawm mawlh mawlh a, ka tho nghal uaih bawk.

"Hriatthiam a har tih ka hria, a bul chu keimah ka ni," a hmêl chu chiang tak hian ka en tlawk tlawk a, nizan maia thil thleng rapthlak zet kha ka rilruah a lo lang a, khang mite khan min that hreh hauh lo ang.

"Nung dama i awm leh awm loh hi ka kutah a innghat a ni," a rawn tih leh chuan ka ṭhu hnawk a, hlauhnain min rawn tuam a, mumalin thil ka ngaihtuah thei hek lo.

"Engati nge hetiang hi ka chungah a thlen? Engati nge kei teh daih min thah an tum? Nang nen eng inzawmna mah kan nei hleinem, engati nge kei ni lovin i chhûngte lakah an ṭuan mai loh? Engmah hi ka hrethiam lo, ka hrethiam lo tak zet!" ka ti chuai ta raih a, ka bul chetah a rawn ṭhu a, ka en ngai ka en tlawk tlawk ringawt!

"A pawi ka ti, mahse hlauthawng suh, ka venghim ang che," a ti dap a, ka rilru chu buai tak a ni.

"Vawiin khan min thah tum tute hnen aṭangin i thlalak ka dawng a, chuvangin nang venhim che hi ka mawhphurhna a ni," a tih leh chuan lungngâi ru tak hian a lam ka hawi a, kawngka inhawng thawm kan hriat rual chuan kan hawi phei nghal zat bawk.

"Engnge in lo tih a?" rawn titu hmeichhia chu hmân zana mi bawk kha a ni tih ka hre nghal a, a tlângnêl salh salh khawp mai.

"Engvanga lo kal leh nge i nih?" Salmon-a chuan a ti chang rut a, ka rilru a mangang bawk nen an bula awm chu ka châk thlawt lo.

"Ka sawi tawh kha Salmon, kei hian ka enkawl dâwn che alawm," tiin chu nu chuan ka lamah a kut a rawn lek a, "Rinkimi ka nia, Salmon-a nupui hlui," a tih zawm zat a, ka hmâah a kut a lek reng bawk si a, engmah sawi lovin ka lo chibai tawp ringawt!

Chutah amah bawk chuan, "Zanin aṭang chuan i lo kal a ngâi tawh lo ang," a ti leh a, min melh kal a, ka tho tharh a, chu veleh Salmon-a chuan ka ban rekah a rawn chelh a, ka en hau nghe nghe!

"In aṭang hian chhuak la, lo kal tawh suh," Salmon-a chuan a ti chang bawl a, a nupui hlui chu a en run a, ka ban reka a vawn tlat chhan erawh ka hre hauh lo.

"Ka lo va haw ang," ti sapin a kut chu thin thlak mai ka tum a, mahse min vuan nghet sauh záwk!

"Salmon.....?" ti lehin ka melh chho ral a, ka mitmengah chuan min thlah se ka duhzia a hmuh thiam ngei ka ring.

"Ka bulah i awm ang," a tih rual chuan a nupui hlui chu a lo nui hak a, min nuihsawh a ni ber.

"I bula ka awm i phal lo a, chuan, henu, nurse ve mai hi i bula a awm tur thu i sawi leh a," a nupui hlui chuan ngeiawm zet hian a rawn ti a, kan boruak teh nuaih chu ka kham a, àn khum hlawk hlawk ka châk a, mahse kan boruak hip mêk chuan min tichau a ni.

"Haw rawh Rinkim, he inah hian tihtur i nei lo," Salmon-a chuan a ti leh a, insum thei tawh lovin Salmon-a kut chu ka phih thla sawk a, kawngka lam panin pâwnah ka chhuak zui nghal thuai bawk.

"Lo ding teh," Salmon-a aw chu hre mah ila ka hawi lèt lo a, hawsan vang vang bak ka rilruah a awm tawh lo.

Hmanhmawh ru zet hian ka kal a, kawngpui ka thlen chhoh rualin taxi phar tur ka zawng nghal ruai a, mahse ka hlauh ang ngeiin Salmon-an min rawn nangching hman tlat!

"Lo lut rawh," awka pangngai tak hian a rawn ti a, ani nen car chhûnga chùan dun chákna ka nei lo hrim hrim!

"In in lamah ka kal dâwn," a rawn tih leh pawh chuan a car chhûnga luh ka la tum chuang hauh lo.

"Ka lo chhuah kher i phut em ni?" a rawn tih leh a, chiang zet hian kan inen a, taxi phar tur a awm mai bawk si lo nen loh theih lohna avangin a thu ka zawm leh ta nge nge!

Kan vêng lam pana kan tlan lâi chuan ṭawngkam khat pawh ka chhakchhuak lo a, a lam ka hawi duh hek lo. A thu min hrilh zawng zawngte kha dawt a nih rin ka duh a, mahse keimahah hian dawt a sawi lo tih ka chiang em em thung si!

Tin, eng buaina mah nei lo tur ka ni a, amah ka enkawl avang liau liauin misualin min thah an tum a, engkim chu ama thiam loh vek a ni. A chhûngte hmaizah avanga tlawmngaih ka lo chhuah lui hram kha ka inchhir hnuhnawh a, a chhûngte ber paw'n an ngaihsak ṭhat theih loh mihring ka lo enkawl kher kher chu ka inchhir a ni.

Kan kawmchhak kan thleng a, kawngpui sîrah car a tiding a, car kawngkhar hawn ka tum chu a in-lock tlat a, a lam ka hawi chuan ka awm dan chu hria ang paw'n a awm duh lo.

"Kawngkhar hi hawng rawh, ka chhuak duh," ka ti hap a, "Harsatna i neih chuan min lo call ang che,"  a lo ti daih a, chutah amah bawk chuan, "Thil thleng a awm chuan min lo call ang che, hmelhriat loh inlêng i nei tur a ni lo," a tih zawm leh a, "Min sawi ṭhaih em ni? Nang nen eng inzawmna mah kan nei lo a, ka nunna hi a derthawng bawk hek lo, kei leh nang chu nurse leh a dam lo enkawl mai kan ni," ka ti charh charh a, ka aw chu a fiah ṭha hle bawk.

"Ka sawi ṭhaih che a ni lo, thil thleng thei ka hrilh mai che a ni," a ti nghut a, "Engmah a thleng lo ang," ka lo ti salh thung.

Kawngkhar hawn ka tum leh chu a la hawng duh chuang lo reng reng, eng nge a hriat pawh ka hre lo.

"Ka chhuk duh a nia," ka ti ta halh a, thaw chhuak nghulh pah hian, "Ka ngaihtuah che a ni, i chungah eng thil emaw thleng ta se ka inthiam thei ngai lo ang," a ti thum sup a, a thusawi chuan ka ngaihtuahna zawng zawng a hruai pêng vek ni berin ka hria.