𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟒]

SALMON

By

Havali Adam

Bung 4-na

Chutia thil ngaihtuaha ka din veng veng lâi chuan pindan lamah thil ri ṭhuai thawm a rawn awm a, ka harh záwk a, ka phei nghal vat a, Salmon-a hmêl ka hmuh rual chuan, "I ṭha em?" ka ti a, "Ka ṭha," a lo ti mai a, "Engnge a?" ka tih leh chuan, "Engmah a ni lo," tih bakin min chhâng lo a, nichin láwka ka thawm hriat kha thil ri deuh chawrh a ni a, mahse engmah thleng lo anga a awm tlat lawi si chu mak ka ti!

"I tlu em ni?" ka ti leh a, "Ka ṭha," a rawn ti nghet churh a, ka ngâwi chiang hle.

"Min lo va chhuahsan rih rawh," a tih chuan hrilh nawn ka ngai lo, ka kal nghal vang vang a, choka ka thleng chu ka thaw chhuak hawk ringawt!

A mizia mak tak chuan min tichau nghulh a, chutah nichin lawka ka thawm hriat ang chiah kha ka hre leh a, ka chhûng lam chuan min pam et et a, phei loh tum teh mah ila ngaihven lovin ka awm thei tlat si lo a tin a ni!

Pindan kawngka hawn ka tum chu chhûng lamah a inkalh a, dam lo, taksa hliam nei a ni a, a lo tlu reng ang tih ka hlau a ni. Kawngka chuma biak ka tum lâi tak chuan a aw ka hria a, ka hmui ka chip nghal hmak bawk.

"Zawng chhuak ang che, kei min ngaihtuah a ngâi lo, ka inbuaipui thei," a ti khauh hmuk hmuk a, tunge a biak ka hre lo a, eng chungchâng nge an sawi lah ka hre hek lo.

"Inzawmna an lo nei a nih ngat chuan ka kut ngei hian ka that ang," hniam chhal hian a ti bung leh nghut a, 'that' tih ṭawngkam chuan min tiṭim uaih a, thawm dim zetin ka pen sawn riai riai a, vawilehkhatah pindan kawngka a rawn inhawng thut a, ka ding chiang teh e!

A ṭawng ka ngaithla ru tih chu ka pha lo, mahse ka ngaithla ru tih hre lo se ka duh a ni. Amah hnungchhawn zâwng ding ka ni a, a hmêl ka hmu lo ringawt pawh chu lawmawm tak a ni.

Hmanhmawh fahran lo hian min kal pel a, choka ah a lut a, ka anṭam chhum chu hawngin a bih duk duk a, a inthlak danglam awlsam lutuk chu mak ti tak ka ni!

"A hmin tawh, chaw ei i siam dâwn em ni ang?" a rawn tih chuan, "Aw...aw....nia," ka lo ti bah nuaih a, pangngai taka awm ka tum a, mahse a harsa lam hret chu a ni.

Dawhkanah a chaw ei tur leh chawhmeh ka hûng thliah thliah a, ani erawh ṭhutthlengah a ṭhu diam tawh a, a ril a ṭam tawh te pawh a ni maithei. Chaw bâr hmâin ka anṭam chhum chu a hawp hmâsa ber a, a tui tih zâwng a nih leh nih loh ka hre châk leh ta tlat mai.

"Engnge a an?" ka tih chuan, "A tui turah ngai ang," a ti dut a, a hawp zo chiah kha a ni si a, tui a tih leh tih loh chu hre vek tawh ngei ang, a sawi duh lo mai záwk a ni.

Kan ngâwi zui vang vang a, a chaw ei chu ka thlir reng a, mi eng emaw ve tak a niin ka hria. A luhlul tih chu ka hre tawh a, a ṭawng tam lo ti pawh,  nelawm loh hmêl viauin lang ṭhin mah se misual tak a nih erawh ka ring chuang miah lo.

"Naktuk zan aṭang chuan zanriah ei hmâin ka lo kal ṭhin tawh dâwn a nia," ka ti sap a, dik tak chuan khawngaih ruk riauna ka nei, a chhûngte reng reng pawh an ti àwm ang lo ka ti, ama'n duh lo tlat pawh ni se!

"Min buaipui rei a ngai lo ang," chaw ei mual mual chung hian a rawn ti a, a thil sawi dan aṭang chuan amah enkawltu tur ka ni tih a pawm thiam tawh a nih hmèl!

"Ti khan lo ei rawh, i kham hunah i kalsan tawp dâwn a nia, thawmhnaw suk tur te i neih tâkin ka va thlithlai ang e," tih leh kal ka rual a, hun khawh ralna tur ka zawng a ni ber.

Pindanah ka lut a, khum síra a kekawr leh kawr lûm lo awm deuh nuaih chu ka là a, ka lak rual chuan phone bula lehkha vâr chu a inlet thla tap a, ka chhar a, eng thu emaw ni hi a lo inziak a, ka'n chhiar chiah chu a ngaihna ka hre lo hle.

'I VANNEIHNA A LA KAL TLUANG RIH E, INRING RENGIN LO AWM RAWH' tih thu hi a lo inziak a, lehkha tlângah chuan thisen a kâi nghe nghe a, engtin emaw ni tak hian hlauhthawnna ka nei ru nghal bawk.

Min rawn hmuh hmâin pindan aṭang chuan ka chhuak a, washing machine-ah a thawmhnaw chu ka nuaitîr a, tihfai ngâi lai àwm ka tifai thuak thuak a, ka awm dan chu awmpui ka ang mah záwk te'n ka hria.

Ṭhutthleng nawr tawlh ri ka hriat rual chuan chaw eina dawhkan lam ka pan a, ka tifel nghal zung zung a, ka be lo a, ani paw'n min be lo a, kan ngâwi reng a, mahni chet chetin kan che a, nuam loh tihna pawh ka nei chuang lo.

Washroom-a a lut tur chu ka melh zawk a, nichina ka lehkha hmuh kha ka rilruah a lo lang a, engnge a awmzia ka hre lo a, mahse hriat erawh ka chák, ka buaina tur ni miah lo mah se!

A chaw eina ka senghawi fel hnu chuan a duh huna a in mai theih turin thingpui ka chhûang a, inbe lovin kan awm rei ta bawk nen ka awm thiam lo ṭan a, biak dan tur kawng ka dap chawp leh ta nge nge!

"I hliam kha kan dressing leh lawk dâwn em ni ang?" ka tih chuan ka lam a lo hawi a, min en dan aṭang chuan pawi a ti lo a nih ka ring ve hmiah!

Sitting room-ah kan inṭhut chilh ran a, a hliam chu lapuain ka hru fai tè tè phawt a, thisen chhuak ser ser pawh a awm mang tawh lo. A tir ai thlawt kha chuan a hil tawh a, mahse a la nàt viau ka ring.

"Ka dam chak theih dan tur ber i hria em?" a rawn ti dap a, a mitah ka melh zawk nghe nghe!

"Inenkawl ṭhat a ni mai, chu tluka ṭha leh dam chak dan a awm lo," ka ti ve mai a, ka ṭawngkam pawh a pangngai viau!

"Tunkâr chhûnga ka dam a ngâi," a rawn ti chuan, "Engati maw?" ka lo ti hû a, dam thuai thuai a duh a nih paw'n chutiang em em chu a nih ka ring miah lo.

"Ka dam a ngâi," a ti tawi leh tup a, zawhna a chhâng tawi ṭhin hrim hrim a nih dâwn hi ka ti ta!

"Theihtàwp ka lo chhuah ang e," ka ti hniam sap a, a hliam ka buaipui zawm mial mial a, kan inawm hnaih lutuk chuan ka awm a tinuam lo lek lek ṭhin.

"Thil ka záwt ang che aw," ka ti leh a, ṭawng zawm zatin, "Engati nge i chhûngte ngaihven i duh miah loh a? Tun ang hunah hi chuan chhûngte aia thlamuanthlak an awm lo asin," ka ti dat dat a, a ngàwih reng danah min chhàn a tum lo a nih ka ring.

Kan inbuaipui fel hnu chuan thil dang ka tihsan a, ani pawh khumah awmin lehkha a en kual a, dam lo mah ni se hna a thawk reng thovin ka hria. A chângin mi tu emaw ni hi a be leh ṭhin a, a thil khawih lâiah chuan a rilru zawng zawng a pe tih a hriat hle bawk.

Dárkar a liam a, dâr 9 a ri hnai a, haw nân a la hmâ deuh avangin kan pahniha in tur thingpui ka siam a, pindana ka va pek lâi chuan hria ang paw'n a awm lo.

"Hei aw, thingpui....." ka han ti chu min chhâng lo hrim hrim!

"Sikri i âi duh ang em?" ka tih leh chuan, "Duh lo," a lo ti sup a, pindan aṭangin ka chhuak a, tihtur ka vàn ta hle mai.

Sitting room-ah ṭhuin phone ka khawih a, Zodini ka call a, kan han inbiak tak tak tâkah chuan pâwnah ka chhuak daih a, thil ho deuh deuh kan sawi a, a châng leh kan nui chiam a, amah ngaizawngtupa nena an chanchin te min hrilh a, Jeremy-a ka hrechhuak zawk nghe nghe!

Min la rawn be leh miah lo a, min rawn biak hun ka nghak pawh a ni chuang lo, kan thil sawiin a zir êm a, ka hrechhuak mai chauh a ni.

Pâwna ka awm lâi chuan in chhûng lam aṭangin thil ri ṭhuai ka hre leh a, Zodini nena kan inbiakna hmet tawpin ka tlan lut thuai a, pindan ka'n thleng chu chair pakhat hi a lo let ran a, a chhe hneh hle bawk.

"Engnge thleng? Engati nge?" ka awah chuan mak tihna leh hlauhthawnna a inpawlh nawk nawk mai.

"Salmon....?" ka ti leh a, chutia a hming ngeia ka koh rual chuan min rawn melh a, phone call a dawng zui zat bawk.

"Chhuah suh ang che, a tlanchhuak tur a ni lo," phone call a lak rual chuan a ti khauh churh a, eng thil emaw ni tak chu a thleng chiang a ni.

"Chu lam ka buaina a ni lo, i man ngei tur a ni," a ṭawngkâ chhuak hrim hrim chu a nghet ṭha cherh churh hle.

A bula ka awm leh awm lovin awmzia a nei lo a, zawhna záwt pawh ni ila min chhan ṭhat duh ka ring lo. Chhuata chair keh thal nuaih chu ka chhar khawm a, ka tifai zung zung a, a âwm dawm chung hian a rawn rum nghut a, ka ngaihven nghal thuai bawk.

"Engtin nge i awm?" ka tih chuan, "Ka hre lo," a ti hniam chhal a, "Khawi maw, ka lo en ang," ka ti leh a, a kamis hak lâi a phelh rual chuan a t-shirt-a thisen kai chu ka hmu nghal a, thisen chhuak khawpin eng thil nge a lo tih ang ka ngaihruat thiam hauh lo.

"Hlip law law mai ang," tiin a t-shirt chu ka hlihpui a, t-shirt chungah hian kamis a ha a, hei hi chu a inthuam duh dan ve hrim hrim niin ka hria, kan inhmuh hmâsak ber pawh khan hetiang tho hian a nih kha a inthuam!

"A nâ em?" a hliam aṭanga thisen lo chhuak ser ser ka hruk faisak lâi chuan ka ti a, min chhâng leh ta hauh lo mai.

"Pâwna ka awm lâi khan eng thil chiah nge thleng? Thawm ri ṭhuai kha eng thawm nge?" ka ti leh a, chhànna erawh ka la dawng chuang lo cheu!

"Hetia i ngàwih tlat hian ka tân a buaithlak ting a nia, theihtawp chhuaha enkawl che ka tum a, ka zawhna tal hi chu pangngai deuha i chhàn theih chuan a lawmawm ngawt ang," ka ti leh chuan a rawn thaw nghulh a, min en reng nghe nghe!

"Ka thinthawk thil tih a nih kha," a tih tâk chuan zawhna dang zawh bel zel ka tum tawh bîk chuang lo.

Chumi zan ka haw tur chu engnge a hriat ka hre lo, veranda-ah lo chhuakin min thlir reng a, hmuh phak loh chin ka tlan thlen hmâ loh zawng min en zui zel ni berin ka hria.

In ka thleng a, rei meng lovin ka muhil thuai a, zan dang angin mut theih loh ka nei lo bawk a, zîngah chuan ka tho hmâ kher mai. Thingpui ka siam a, ka rilruah Salmon-a a rawn lang zawk a, a chhûngte tlawhpawh a duh bawk si lo, engtin nge a inhnawh puar ang tih te chu ka ngaihtuah kai a, ka dam lo enkawl lâi a ni kher bawk nen, a mizia leh a awm dan hrim hrim chu ngaihven zui loh theih pawh a ni lo.

Chhunah chuan ka dawrah pa pakhat a lo lêng a, kum 60 a tling tawh hial maithei a ni. A hming vhu pa Vâla a ni a, ka dawr hmâ, a remchâng lâia eitur zawrh min dil a, an chhûngkaw dinhmun te min hrilh a, min dip dâwna ka hriat loh avangin ka lo phal ve mai bawk.

Chumi nî là lâ chuan a inzuar nghal a, vaipa mix kan tih ang hi a zuar a, a dawr hmâsa bertu ka ni nghe nghe a, a tui phian lehnghal! School naupang lo bâng ṭhenkhat chuan an dawr pheuh pheuh a, a ni khatna chauh la ni mah se a inhralh thei ang reng a, dawrtu pawh a ngah thuai ka ring.

A haw dâwn chuan lawmthu min hrilh a, ka dawr hmâa thil a zawrh avangin pawisa min pek a tum a, mahse ka lo là duh lo hrim hrim!

"Ka ṭhut man angah min ngaihsak mai rawh," a ti chung paw'n ka là duh tlat lo.

Ni dang ai dawr ka khar hmâ a, ka lo sawi láwk tawh ang ngeiin Salmon-a in chu thlen hmà ka tum a, min lam tura Thianga lo kal hmâtîr turin Awitei ka bia a, ka laka a inthlahrun thu a sawi lûam a, zîng, chhun leh zana a û eitur Thianga an kentîr ṭhintu te chu a sawi kâi zel a, kan inbe rei phian nghe nghe!

In ka thlen aṭanga rei lo tê hnuah Thianga a lo thleng a, ka nu leh pa ka hrilh láwk vek tawh a, an remtihna thlapa ka kal hun thlak danglam ka ni bawk.

Salmon-a in kan thlen chuan khua a thim thet thet ṭan tawh a, chutiang huna min hmu chu mak a ti deuhin ka hria, nizana ka thusawi kha thutakah a lo la lo teh pawh a ni maithei.

"Engnge i lo an?" ka tih chuan, "Ka ṭha," a lo ti mai a, ei rawng ka bâwl zui nghal malh malh a, ka che vel chu min en reng tih pawh ka hria, mahse ka hmu lo der tlat thung.

Chaw ka chhum lâi chuan bathroom lam a pan a, a intifai dâwn a nih ka ring. Arsa tlêm azâwng ka fry a, sa a ei tam loh thu a sawi avang khan ka siam hnem duh lo law law a, thlai ka siam hnem záwk a, ka bai siam chu ka hawp chhin a, a tui thawkhat viau chuan ka hria.

Bathroom aṭanga a lo chhuak chu ka melh zauh a, ka rin loh deuhin kawngkaah chuan a intauh ṭùt a, insum hman tawh hek lo. Ka lo nui hak a, ka nui thawm a hriat ruala min rawn en chuan ka nui tawp nghal riai riai a, zahzelah ka thil chhúan lâi ka chawk ta ringawt bawk.

A inthlak fel tawh a nih ka ring, pindan aṭangin a lo chhuak a, choka lamah a lo phei a, filter-a tui chu her hawin a in nghal khawlh khawlh a, chutah a kal sawn zui mai dâwn emaw ka tih chu a lo ni hauh lo.

Ka sîrah a rawn ding a, ka chawhmeh siam chu eng a nih hriat tum ni awm fahran hian a rawn bih a, a ruk tak chuan ka zam leh tawh hle. A rim lah chuan ka hnâr a verh zar a, rim nâ ni hauh si lo hian a nam táwk chiah ka ti mai, ka sawi thiam lo.

"Chaw kan ei thei ṭep, hei hi a hmin chuan kan ei thei a ni mai," ka ti zàng vah a, zam anga lan ka duh lo a ni.

"I ril a ṭam tawh em?" ka ti leh a, ka beisei loh deuhin, "Aw...." a lo ti thum dut a, a lam ka hawi chho zawk nghe nghe!

"A nih chuan heti hian lo inchhûang rih se, chaw ei ka'n siam ang e," ka ti ta zung zung a, ka chet vel lâi chuan gas bulah a la ding reng a, chawhmeh vil ve te pawh a ang mah záwk!

"A ei theih e, lo va ṭhu la, bai kha ka lo suak ang," tih leh a awmna lama phei ka rual a, kan inkal pel tur chu ka inchhuih palh hlauh mai a, ka ṭhingṭhi chiang em em lehnghal!

Min buaipui a tum lâi chuan ka tho vat a, engtin nge keima ke ngei chu ka chhuih theih záwk pawh ka hre lo. Ka khup chu ka tûai vawn vawn châk khawp a, mahse a mit ka làk ka hlauh avangin ka insum hram hram a ni.

Inhmachhawnin chaw kan ei a, ka biak loh chuan min be hmâsa lo a, sawi tur ka dap deuh chhen a ni ber. A sawi ang tak takin sa a ei tam lo khawp a, hrang khat a la a, a duh táwk der a, chawhmeh dang a ei tam zàwk a, mahse a pa len ngaihtuahin a chaw làk erawh a nâ hran lo.

Kei ai a kham hmâsa a, kei lah chu ka ei tui phian a, ka kham rualin kan eina ka seng zui nghal a, Salmon-a erawh khaw'nge a awm ka hre lo, a kham hnu khan ka hmu zui tawh lo, pâwn lamah a chhuak a ni maithei.

Chumi zan aṭang chuan zanriah kan ei dun ta ziah a, ka chawhmeh siam dan pawh a tui tih zâwng a niin ka hria. A nî telin a hliam a dam chho zel a, kan inbuaipui tirh lâi anga inbuaipui em em pawh a ngâi tawh lo.

Dressing leh a mamawh tihsak chu ka hna ber a ni a, Awitei a lo kal ta zeuh zeuh bawk. A nu leh pa erawh chhun lamah an kal ṭhin nge chu ka hre lo a, zanah erawh an hmêl hmuh tur a awm ngai lo hrim hrim.

Nilainî, chawhnu her a ni a, dawr kawtah chuan pa Vâlan mix a zuar leh a, school lo bângin an rawn dawr haw ṭhin a, a siam hlawkin a siam tui bawk si a, lei a manhla ṭhin khawp mai.

Dawrtu a neih loh lâi tak chuan dawr chhûngah a lo ṭhu lut a, titi thiam tak a nih piah lamah mi hawihhâwm tak a ni a, kei nen pawh kan inkawm ngeih hle.

A châng hi chuan hringnun hi chhiar thiam har ka ti ṭhin. Hrisel leh pangdama zîng kan thawh theih lâiin tho thei lo tam tak an awm a, chaw leh chawhmeh man to tak tak ei chunga kan la sawisel ṭalh lâiin rilṭama tuihal dang char, eitur sawisel thei dinhmuna ding lo an awm a, hnathawh hniam tak, mahse hlim em em an awm lâiin hnathawh sâng tak, hlim chuang miah lo an awm leh bawk a, engkim hi a inkawkalh emaw tih mai tur a ni.

Nimahsela, hringnunina min zirtir tum tak kan chhut thiam a nih chuan engkim hi keimahni azir zelin a inrem dik thap a, kan hun hman mêk leh tawn mêka lungàwi mai hi hlimna zàwk a lo ni.

Kâr thar kan chûangkâi a, boruak pawh a inthlak danglam chho hret hret a, mahse thlasik boruak chambâng chuan min la chenchilh reng tho. Tin, Jeremy-a nen pawh kan la inbe zui reng a, mi tihhlim a thiam a, kan inbiak hi chuan nuihna tur eng emaw tal a sawi ngei ngei ṭhin.

Ni khat chu dawrah Awitei a lo lêng lut hlawl a, a vawi khat lo kalna a ni nghe nghe a, ani hi New Capital-ah khuan eng hna emaw ni a thawk a, min hrilh tawh ngei a, mahse eng hna tak nge a thawh ka hre leh tawh lo.

Tin, hetia a û ka enkawl aṭang hian min nêl sawt em em a, kei paw'n ka nèl a, kei ai a upa hret a, inkawm àwm vel tak kan niin ka hria. Ka hman châng apianga scooty khalh zir turin min hrilh ṭhin a, mahse tun thleng hian a khawih pawh ka la khawih chhin lo, ka rilru pek lohna lam tak a nih vang a ni ang.

Thawhleh zan a ni a, Salmon-a nen kan awm dun leh tlawng a, kâr hnih dâwn kan han inenkawl tâkah chuan a dam ve tawh khawp mai. Kâr khat chhûng chauh enkawl kha a duh a, mahse a chhûngte'n a dam chian hmâ awmpui turin min ngen tlat si a, tun thlengin ka la thawk ta zel chu a nih ber hi!

Kan chaw eina thleng ka rem fel lâiin kawngka a rawn inkik ri karh karh a, Salmon-a hnathawhpuite an nih ka ring deuh ngawt a, kawngka va hawn ka tum chu min lo kal khalh a, ka chetna lamah ka let phei ve leh nghal mai bawk.

"Eng ti tura lo kal nge i nih?" Salmon-a aw chu a chang bal a, tun hnaiah chutiang chuan a ṭawng ngâi si lo a, mak ka ti ang reng hle.

"Ka lo kal thei lo em ni?" hmeichhe aw ka hriat rual chuan ka mak tihna a zual a, chu nu chu Awitei a ni lo tih ka hre nghal bawk.

"Haw rawh," Salmon-a ṭawng dan avang chuan ka lo ip chawih a, chet pawh ka che ṭha ngam lo.

"Ka awm rei dâwn lo," ti deuh nghatin chu nu ke pen thawm chu a rawn hnai zel a, thawm dim thei ang berin ka che a, engnge a chhan ka hre lo, min hmu ang tih ka lo hlau em em ringawt!

Washroom-ah a lut tlang a, a lo chhuah leh hmâ chuhin pindan ka pan vat a, a hmuh theiha awm chu ka tum lo a ni ber. Washroom kawngka inhawng thawm ka hriat rual chuan tukverh hnaihah ka ding thuai a, pâwn lam ka hawi daih bawk.

"He nu hi tunge?" chu nu aw ka hriat rual chuan ka lehhawi a, min lo en chiang ngàng ngàng khawp mai.

"Tunge he nu hi Salmon?" chu nu bawk chuan a tih zawm leh a, Salmon-a chuan thum chhal hian "I buaina tur a ni lo," a ti churh a, a ṭawng ring lo náin a fiah hle thung.

"Hetiang mi i nih hi ka ring lo asin Salmon, i dam lo tih ka hriat veleh ka rawn kal nghal vang vang a, mahse nang erawh hmeichhe dang nen," a tih laklawh lâiin Salmon-a chuan, "I rin thu kalpui nasa lutuk ṭhin lo teh," tiin a lo pawt chat hmuk a, ka ṭawng ang e, ṭawng lo ang tihah ka rilru a insual buai nasa khawp mai.

"A nih chuan ani hian engnge i bulah a tih?" chu nu hmêlah chuan thikna ka hmu a, awm dan tur pawh ka hre lo.

"Nurse a nih kha," Salmon-a chuan a lo ti mai, mahse chu nu chu a la lungàwi hmèl chuang hauh lo.

"Tun aṭang chuan nurse i mamawh tawh lo ang, keima'n ka awmpui thei reng che alawm," ti nêm thliamin Salmon-a kut chu a va chelh a, Salmon-a erawhin zawimuangin a lo làk thlaksak thung.

"Haw tawh rawh," Salmon-a chuan a ti sup a, kawngka lamah pheiin kawngka a va hawng a, an awm dan chuan ka awm a tinuam lo ang reng hle.

"Engati nge hetiang hian i awm tlat a? Engati nge mi hrang ang maia min en? Mi hrang kan ni hleinem," chu nu chuan a ti deuh duah a, ka hmuh tirh phat aṭang khan inkungkaihna eng emaw ni tak an neih ka ring sa rèng a ni.

"Nang nen hian inzawmna kan nei tawh lo," Salmon-a awkâ chhuak hrim hrim chu a nghet em em vek a, mahse a ring hauh lo thung.

"I hmânlài rilru kha thlak tawh lul teh Salmon," a ti leh chiah tihah Salmon-a chuan, "Chhuak rawh," a ti ta hmuk a, ka lo ip chawih!

"A ṭha e, mahse ka rawn kal leh ang," ti nghatin chu nu chu a chhuak ta nge nge a, Salmon-a chuan kawngka a khar nghal hmak bawk.