𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟑]

SALMON

By

Havali Adam

Bung 3-na

Nilêngin ka rilruah dam lo, Salmon-a kha a awm a, kan inhriatna a la rei lo tehreng nen, engtia chutia ngaihtuah zui tlat chu nge ka nih ka hre lo a ni. Ka mitthlâah a hmêl, thutak run kha a rawn lang a, tukina kan awm dan te kha ka ngaihtuah lèt a, keimahah hian thil dik lo chu a awm chiang a ni.

Zanah chuan number lawng aṭang bawkin phone call ka dawng leh a, Awitei a nih ringin ka pick up a, mahse Jeremy-a záwk a lo ni a, u Tlankima hnen aṭangin ka phone number a nei a ni ngei ang.

Chutia han inbiak tâkah chuan a thlen tluan leh tluan loh te ka záwt a, kan inbe rei lo nà chu kan inbiak chhûng chuan sawi tur ka vàn leh hman khawp mai.

Kan vêng tlangval, Sawmtluanga a lo lêng lut a, a nihna takah chuan lo lêng pawh a ni chiah lo, KṬP hnatlânga tel ve turin min rawn sâwm a ni mah záwk! Min sâwm tirh chuan mawihnai takin ka hnial a, mahse min sáwm ngawrh phian a, hnar reng theih pawh a ni lo.

Kohhran hall-ah kan hnatlâng a, KṬP-ah hian ka inhmang tam em em lo a, ka hman hi chuan ka inkhawm a, ka duh táwk mai zel. Chumi zan chuan hnatlâng an tam ang reng viau a, kâr lehah KṬP pûalin crusade a awm dâwn a, chumi atân chuan kan lo inbuatsaih láwk a ni ber e.

Thingpui in chawlh kan neih lâi chuan an zînga pakhat chuan ka besei loh deuhin Salmon-a chanchin a rawn sawi chhuak hlawl a, misualin an kah thu te, a khawngaih thu te chu a sawi a, mi dang paw'n an lo sawi zawm liam liam a, chanchin tharahte hial a chanchin an lo pûang a ni awm e.

An sawi dan hmang chuan misualte chu tute nge an nih la hrechhuak chiah lo mah se chhui zui mêk an ni a, an damdawi tawlh ruk a man avanga kap an ni lehzel a, an thil sawi engkim chuan Zoram chhiat tawhzia a tarlang chiang hle.

Dâr 10 rik hmâin kan haw a, Sawmtluangan min thlah thlap a, ani hi kan kawmthlang lawka awm a ni a, ka pa hnathawh avanga Champhai aṭanga Aizawl kan insawn thlak tirha ka ṭhian kawm hmâsak ber a ni nghe nghe!

In ka lut chu inlêng kan lo nei a, kan inlêngte hmêl ka hmuh rual chuan mak ka ti hman viau a, mahse ka awm dan ka siamṭha leh vat thung.

"Hetah lo ṭhu teh Mimi...." ka pa chuan a rawn ti a, ka phei ve nghal mai bawk.

"Hei, pu Châmate pafa an lo lêng a, an mamawh hle che a nih hmèl a," ka pa'n a tih lâi chuan ka ngâwi ran a, Awitei leh a pa chu ka melh zauh a, Awitei záwk chu a inthlahrun hmèl hle.

"An fapa dinhmun min lo hrilh a, engtin nge ni ang? I va tlawmngaihsak mai dâwn em ni ang?" ka pa chuan a rawn tih zawm leh a, chhàn dan tur ka hre láwk lo.

"Ngaihṭhat lohna tur a awm miah lo a nia, riah kher pawh a ngâi lo turah ngâi ang," pu Châma chuan a lo ti a, "Ka hre lo le, ka pate thu thu hi a ni mai," ka ti ta ngawt a, ka nu chuan, "Chuti chu, va tlawmngaihsak mai rawn Mimi, rei tak pawh a ni nàng," a lo ti a, chuti maia an remti chu mak ka ti ang reng!

"A nih chuan, kan lo ring ang che aw Mimi, kan fapa tâna i inpekna hi kan hre reng tawh ang," pu Châma chuan a ti a, ka bu nghat ringawt!

"Engtik aṭangin nge i lo kal theih ang?" a rawn ti leh a, "Zanin chu a laklawh tawh si a, naktuk zan aṭang law law ka lo kal mai ang," ka tih chuan min hnialna pakhatmah an nei lo.

An haw tur kan thlah lâiin Awitei chuan, "Ka lawm tak zet Mimi, engtik ni ah emaw kan chhûngkaw chunga i ṭhatna hi ka la rul lèt ngei ngei ang che. Chuan, ka scooty pawh i tân ka lo dah dâwn a nia, i ta angin ngâi tawp rawh," a ti malh malh a, "Scooty ka khalh thiam lo alawm," ka tih chuan a nui hak a, "Ni tak, mahse buaina a awm lo, eng emaw ṭul thutah ka lo dah hrim hrim ang, kalna leh hawna tur kha chu buai duh suh, ka pa driver chhawrin a rawn lam che ang a, a thlah leh ziah dâwn che a nia," a ti zui zat a, chutia veivahna turah buaina a awm loh chuan a ṭha a ni mai.

Chumi zan ka mu tur chu ka inngaihtuah nawn leh a, puih an ngâi tih hre tho mah ila thawh ka châk fahran lo a ni. Chu bakah ka vawi khatna tur a ni a, an mit ka tlung leh si lo ang tih te ka hlau a, intihmualpho ting tang ai chuan thawh loh mai dan awm se ka la ti rilru fan a, mahse engkim kan sawi fel tawh a, ka thawk ta rau rau a nih chuan a ṭha thei ang bera thawh ka tum thung.

Zodini ka call a, a la mu dâwn lo tih ka chiang a, thil awm dan ka hrilh chuan mak pawh a ti em em hran lo, ka thawh a ṭul a nih a lo ring ve hmiah a, a ngaihdan chu a dik ve tho mai.

A tukah chuan zan lama ka tihtur ngaihtuah hman lo khawpin thil dangah rilru ka sêng a, dawra lo lêng lut an awm nûal a, Jeremy-a nen pawh kan inbe leh a, min duh thu a sawi nî aṭang khan min ngaihzâwng en nghal der ni maiin ka hria.

Ka rilruah erawh ngaihzawng angin a lang lo a, ngaihzawng neih châkna pawh ka nei lo a, ka vei em em lo bawk. Ka ṭhian kawm mai a, mipa fel tak a ni tih hre tho mah ila ka duh leh duh loh pawh ka hre lo, min rawn bia a, keiin ka lo chhâng a, chu chu a ni deuh tawp mai.

Zanah chuan chaw ei khamah pu Châma driver-in min rawn lam a, kan vawi khat inhmuhna mah ni se a ṭawng duh phian a, kan titi nûal mai. In kawt kan thlen chuan ka chhuk a, kawngka panna step sira scooty lo inhûng vàng ka hmuh rual chuan Awitei dah a ni tih ka hrethiam nghal a, a dah phal tak tak pawh ka ring lo kha a nia, chutia a dah tâk si ah chuan hmanna tur a vang ngawt ang.

"U Mimi, i haw hmâ chu ka ṭhiante inah ka léng thei ang em? I haw duh hunah min lo call mai ang a," pu Châma driver Thianga chuan a ti a, ani tân tihtur a awm loh bakah phone number kan inpe tawh tho bawk a, a pawina awmin ka hre lo.

"Thei tehreng e, ka haw duh hunah ka lo call dâwn che a nia," ka tih chuan lawm tak hian a ṭhiante in lam panin a inkhalh chhuak a, kei pawh ka hna thawk turin in chhûngah ka lut zui ve nghal bawk.

In chhûng ka lut chiah chu current a rawn awm lo nghal pang a, a thim khup a, ka phone light ka on a, pindan kawngka ka hawng chu tûmah an awm lo a, a reh deuh ṭhuap bawk nen a ruk tak chuan ka hlau a, mahse hlau lo anga awm ka tum ngar ngar thung.

Pindan chhûng ka bih kual duk duk lâi chuan choka lam nge bathroom lam ka hre lo, thawm a rawn ri rak a, ka inher thuai a, phone light la on reng chungin ka phei a, choka ah chuan tumah ka hmu lo phawt a, bathroom lam a nih ka ring nghal bur bawk.

"Tunge....?" ka tih chuan min chhângtu an awm lo a, "Salmon.....?" ka ti leh a, mahse min chhângtu an la awm chuang lo ta cheu mai.

Washroom lam aṭangin thawm a rawn awm leh a, ka phu dâwrh a, engtin emaw tak hian ka thauah min man a, lehkhabu dahnaa lehkhabu pakhat chu làin ka lèk vâ a, hmân zana misual, Salmon-a kaptute kha an lo kal leh a nih te ka ring rum rum a, amah Salmon-a a awm lo lehzel chuan ka ngaih a tiṭha lo a ni.

Washroom chhûng aṭanga thawm a rawn awm leh chiah chu, "Tunge awm?....Tunge...?" ka lo ti nghal thuai a, in chhûng chu a reh tlawk tlawk a, hlau ru deuh siin kawngka inhawn hun chu ka chang ran a, chutah kawngka chu a rawn inhawng ta!

Washroom aṭanga lo chhuak taksa ruangam chu ka phone light-in ka lo chhun salh a, a èng bawk a ni ang, a kutin a hmai a hliah khuh a, mahse ka hmaa ding mihring chu a din dan aṭang chuan Salmon-a ni tlata hriatna ka nei! A hmêl en chian tumin ka thlek a, chutih lâi tak chuan current a rawn èng lehlawi a, chutah ka hmâa ding chu tu dang ni lovin Salmon-a ngei a lo la ni zui!

"Nangmah lek elo....? Engati nge ka koh lâi che khan min chhàn ve mai loh?" ka ti nghal a, ngâwi renga mi melh run pah hian ka kuta lehkhabu chu a rawn la a, a awmna ngaiah a dah lèt a, ka biak dan avang chuan nuam lo ka tihnuhnawh leh lawi a, mahse dik tak chuan ama thiam loh alawm, amah a ni tih mi hriattîr ve mai tur a nia!

"Engnge tih i tum?" choka lam a pan chhut chhut lai chuan ka ti leh a, ka zui phei nghal bawk.

"Engnge i tih dâwn? Min hrilh la, ka lo ti vek mai ang," ka ti leh a, min la chhâng duh lo cheu chu ka ngaithei lo ru khawp mai.

Filter aṭangin tui a herh haw a, no a dawm lohna lam chuan a áwm a dawm a, a hliam chu a la nâ thawkhat viau a nih ka ring. Tui a in zâwnga a hrawk bâwk che rulh rulh chu ka en reng a, hmuihmul, khabe hmul leh biang hmul nei mah se a lang ṭawpin a lang bawrchhawr chuang miah lo.

"Chaw i ei tawh em?" ka tih leh chuan mi pawh en lo hian, "Engnge hetah i rawn tih leh?" a lo ti daih a, a chhûngte'n engmah an la hrilh lo a ni maithei!

"I dam ṭhat hmâ chu ka enkawl dâwn che," ka tih chuan ka thusawi hria ang paw'n a awm lo.

"Haw leh rawh," ti hniam chhalin a pen chhut chhut a, muangchâng hian pindan lamah a phei a, sawi tur ber pawh ka hre lo, ka en tlawk tlawk ringawt!

"Duh lo eng ang mah la i chhûngte'n min ruai fel vek tawh," pindan chhûng ka luh rual chuan ka ti a, "Haw leh rawh, i pawisa dawn tur i dawn loh phah lo ang," a ti sup a, a ṭawngkam chuan min khei ta zak mai.

"Sum duh avanga lo kal ka ni lo," ka ti zo chiah tihah, "A nih chuan engati nge hetah i awm?" a rawn tih zawm nghal a, ka dang der a, mahse sawi tur ka ngaihtuah vat thung.

"A chhan chu enkawl i ngaih avangin," ka ti nghet charh a, "A thlawnin min enkawl tihna em ni?" a la rawn ti fan a, fiamthu hmêl rèng a pû bawk si lo, ka insum theihnain a tlin lo leh ta nge nge!

"Enteh, naupangchhia pawh kan ni tawh lo, nangmah enkawl tur chea rawih ka ni a, hetia inhnial buai lo hian ṭha takin awm záwk ang, a ṭha em?" ka ti nghat nghat a, a hnâr a lo tum dat a, a awm dan avang chuan enkawl leh loh ka duh rum rum hial a ni.

"Chaw i ei tawh em?" ka aw chu a pangngai ta deuh a, "Ei tawh," bul hmuk hian a ti a, "A nih, damdawi i ei tawh em?" ka ti leh a, "Damdawi ka mamawh lo," a tih chuan Pathian hnenah dawhtheihna ka dil tawp ringawt!

"Mamawh lo angin in hre mah la i taksa hian a mamawh alawm," ka ti dam diai a, engtin mah min chhâng tawh lo.

"Thil lûm in tur ka va siam ang che, damdawi chu nakinah, i mut dâwnah i ei law law mai dâwn a nia," tih leh kal ka rual a, chokaah ka phei a, thingpui tur tui ka chhûang nghal zat bawk.

Thingpui sò hun nghah pahin in chhûng chu ka en kual a, pindan pakhat, inkalh tlat hi a awm a, hawn ka tum paw'n ka hawng thei lo nasa mai. Lehkhabute chu ka bih lâwr dan dan a, lehkhabu a ngah mai bakah a nei ṭha hlawm hle.

Tin, sitting room lam pawh a felfai thlap a, ṭhutna chu sofa vek a ni a, in chhûng rawng leh thil inrem dan hrim hrim chu a mipa awmna hliah hliah a, parda chen chuan thil pâr emaw râng neih nuaih a awm lo hrim hrim.

Ka tui chhûan a sô hnu chuan thingpui ka siamsak a, pindan chhûnga awm dun zawng sawi tur a vâng duh kher mai. Amah mitmei ru ran chungin pindan chhúng chu ka kal kual a, thlalak pakhat chuan ka mit a la ta zar mai.

"Hei hi em ni i fapa chu....?" tih leh thlalak chu làk ka rual a, an pafaa an nuih dun lâi a ni a, Salmon-a chuan kamis dum hain a hnuaiah kawr vâr sar a ha a, tuna a lan dan ang thovin hmuihmul leh biang hmul a nei a, mahse hmuh hrehawm a ni hran lo, a inhmeh mah záwkin ka hria.

"A hming eng nge ni reng reng a?" ti leh sapa a lam ka hawi chu khumah a lo awm tawh reng reng lo.

Ka bul chetah hian a lo ding ngâwi reng chu niin, ka awm sawn deuh dâwrh nghe nghe a, engtik laiin nge a lo kal ka hre lo hrim hrim a, hmuh pawh ka hmu bawk hek lo.

"Engtin nge ka fapa chungchâng i hriat?" a ṭawngkam chu a ngainatawm fahran lo hle.

"Awitein min hrilh a," ka ti ban chap a, ka kut ata thlalak chu a rawn là a, tlém chuan nuam lo ka ti ve deuh, a mimal nuna inrawlh tum anga min ngâi tur chu ka duh lo a ni.

"Chhuak rawh," bung nghuta a rawn tih chuan ka thin a rim phat a, melh hrawkin pindan aṭang chuan ka chhuak a, Awitei ka call zui nghal bawk.

Ka thawh zawm theih loh tur thu hrilh tlang law law ka tum a, mahse Awitei aw ka hriat hnu chuan ka insum leh rih a, zan khat èm pawh kan la inbuaipui lo a, chuti tut tuta ka thawh theih tawh loh tur thu hrilh chu ka inthiam lo leh deuh a ni.

Thil dang sawiin engati nge tûmah an rawn kal loh chhan te chu ka záwt ta daih a, a sawi dan kalhmangah chuan a ú Salmon-a záwkin tlawhpawh a duh lo hi a lo ni a, mi tihmawh ve tak chu a niin ka hria.

Rei kan inbe lo a, min ngaihven tih erawh a hriat hle. A ngaite bawkin pindanah ka lut leh a, Salmon-a chu khumah a lo ṭhu thluang duai a, mamawh a neih leh neih loh ka záwt a, min chhâng lo chiang teh e!

Ka thaw chhuak hap a, ka lam a rawn hawi lo bawk nen ka melh ngal a, chutih lâi tak chuan mi tu emaw ni hian kawngka a rawn kik a, hlauhthawnna ka nei nghal ringawt chu ka inhrethiam bîk lo.

"Engnge tih i tum?" a chet rual chuan ka din hnaih thuai a, "Ka va hawng thei alawm," ka tih paw'n ka thusawi chuan a tân engmah awmzia a nei lo a ni ber e.

A ding tur chu ka lo pui vat a, ka darah min rawn kuah a, hmâ a sawn viau nàin kal erawh a la kal chak thei lo hle. Kawngka zawn kan thlen chuan keimah záwkin ka hawng a, mipa pakhat, police tih hriat tak hi a lo ding a, ka bula mi a hmuh rual chuan 'sir' tiin a ko a, chu pa chu a hnuaia thawk a ni ngei ang.

Sitting room-a sofa-ah chuan harsa tih hmèl zet hian a ṭhu a, a ṭhen leh nawk ṭhin a, police thuam inbel pa chuan eng file emaw ni hi a rawn phawrh a, ka awm leh awm loh an ngaihven lo hrim hrim!

"Thingpui i lo va lûm dâwn em ni ang?" dam dap hian Salmon-a chuan min bia a, chutiang taka a aw hriat nuam chu ka vawi khat hriatna a ni hial ang.

Choka lamah ka phei a, a hmâa ka thingpui siamsa kha ka chhûang lûm a, bawnghnute nen ka pawlh a, an thingpui tur ka chàwi phei lâi chuan an buai dun hmel hle.

An kianga awm ve reng chu ṭhain ka hre lo a, pâwnah ka chhuak a, Awitei scooty chu ka belchiang vel ta mai mai a, khalh thiam ngat ila chuan a ṭangkai dâwn tehreng nen, ka khalh thiam der si lo.

Eng emaw chen hnuah Salmon-a leh police pa chu an rawn inzui chhuak a, ka lo en reng a, an inthlah liam thlengin ka chìk ru reng a, ka laka a awm dan nen chuan inperhsan tak a ni.

"Vàwt i ti lo em ni?" a aw ka hriat rualin a lam ka hawi a, "Ti ve deuh reuh tho," ka tih chuan, "Lo lut rawh," tih leh min hnungchhawn a rual a, nichin lawk aṭang khan a ṭawngkam chu a inthlak hlawk ni maiin ka hria.

"Gas hnuaiah sawn meihawl leh sikri a awm a, va la lawk mai ta che," in chhûnga kan awm hnu chuan a ti dam leh thluam a, ka kal ve nghal mai bawk.

"Fridge sir pawhdawhah khan khawnvartui leh nawhalh a awm ang," a rawn ti leh a, a sawi ang apiang ka ti zel a ni ber e.

"Khawiah nge ka dah dâwn?" ka tih chuan, "Pindanah lo keng lut rawh," a ti sup a, "Nichin khan ka awm i phal lovin ka hre sia," ka ti deuh nghat a, min chhàn dan tur ka hriat châk vang a ni pakhat!

"Ka inthunun hman lo a nih kha," tih bakin min chhâng lo a, lungâwi lo ang paw'n a lang tawh lo hrim hrim!

Pindanah kan inzui lut a, a ai theih turin sikri chu khum hnaih deuh takah ka dah a, khum tlângah a ke a rawn thluang thla a, sawi tur pawh ka hre lo. Kan ngâwi dun vang vang a, hun lah chu a kal muang phian lehnghal a, dâr 9 tal ri tawh se chu haw mah ila a pawi miah lo maw le!

Ka khupah ka khabe ka nghat a, mut chhuakin min rawn zem chiai chiai a, ka chhîng diar diar a, ka lo muhil tlang palh a ni ngei ang. Ka phone ri chuan min tiharh záwk a, Thianga a lo ni a, in kawta a awm tawh thu a sawi chuan dâr zat ka en thuai a, dâr 10 a lo pel tawh chu niin, ka tho rang teh e!

Salmon-a erawh a muttui hmèl hle a, damdawi eitîr lova hawsan ringawt chu dikin ka hre si lo, ka kai tho hreh bawk si nen a muhil hmêl chu ka thlir deuh vang vang a, a hahdam hmèl thlawt a ni.

"Salmon...." ka ti sep a, a che eih lo a, chutah a dara zu sawi ka tum chu ka inrin hmâ hauhin ka bân rekah a lo man thut a, rum zet hian min melh a, a chet dan chuan ka lungphu a ti rang a, engtin nge chutiang chuan a rawn chet theih pawh ka hre lo.

"Ka.....ka haw tawh dâwn a, mahse damdawi ei phawt rawh," hlauthawng aw tak hian ka ti thuai a, ka thin chu phu rang dawt dawt tak a ni.

Ka bân a chelhna a thlah rual chuan ka awm hlat vat a, a damdawi ei tur chu dawhkanah ka dah a, tui ka thlit chhuahsak a, chutia ka chet vel lâi chuan min en reng a, ka awm dan a la pangngai lo hle.

"Tihpalh...." a rawn ti thum sup a, hmêl pangngai a pu leh diam tawh bawk.

"A pawi lo, damdawi hi ei ngei ngei rawh aw, chuan, a tam thei ang ber mut i tum dâwn a nia, muttui le," ti zung zungin pindan aṭang chuan ka chhuak a, pâwn ka thlen thlengin ka lungphu rang lutuk chu a la reh hleithei lo.

Kan haw kawngah chuan Thianga a ṭawng malh malh a, kei erawh ka ṭawng tam lo khawp mai. Kan in ka thlen thlengin ka thinphu chu a la dik chiah lo a, ka nute'n zawhna min zawh lâi chuan engmah thleng lo ang leh engkim a ṭhat thuin ka chhâng thung.

Khumah ka mu a, rizaiin ka inkhuh a, zan dang ang bawkin ka muhil thei lawk lo leh ta! Tun hnai hi mut ka harsat thar riau a, a chhan tak ka hre bîk lo.

Dâr 12 rik dâwnah pawh ka la meng kar a, zep thu a cheng lo, ka thluak chhûngah chuan Salmon-a a awm tlat a, dam lo, hliam nei a ni a, amah chauha a awm chu ka ngaih a ṭha zán lo a ni.

Khua a vâr a, zîngkâr aṭangin ruah a tla sep sep a, mut a tui duh ngei mai. Ka thawh meuh chuan ka nu'n ei rawng a lo bâwl fel diam tawh a, a châng hi chuan nula ve lema ei rawng bâwl hman lova ka tho hi nuam lo ka ti ṭhin.

Tlai lamah ni se khaw thim dâwnah te ka haw leh bawk si a, ka nu erawhin ka rilru ang a pu lo a, phut pawh min phut ngai lo. Chhûngkaw member kan tam lo nen, ka pa hian hna a thawh a phal lo bur a, hmân ata tawh a hlawh kan ring tawp a ni ber e.

Kum 2 liam ta khan keiin pharmacy dawr ka hawng ve leh a, chu pawh ka pa remtihna thlap a ni. Dawr aṭang hian sum tam kan là lut lo a, kan heu chuang hek lo a, kan theih ang anga mi dang kan pui thei chu nuam ka ti záwk a ni.

Khua a thim a, zan hmâsa ang bawkin Thiangan chaw ei khamah min lo lam leh a, pu Châmate'n Salmon-a ei tur an lo kentir ṭeuh chu niin, a inkhâi bawr khawp mai.

In chhûng kan luh chuan pindan aṭangin Salmon-a a lo chhuak a, min be lo a, kei paw'n ka be lawk lo. Thianga chuan chawhmeh leh theiho chu fridge-ah a dah lut hlawm a, Salmon-a lam ka hawi zauh a, min biak hmâsak ka rin loh avangin ṭawng hmâsaa ṭan mai chu ṭhain ka hre ta záwk a ni.

"Engnge i an?" ka tih chuan, "Ka ṭha," a lo ti dap a, "Nizan khan damdawi kha i ei em?" ka ti leh a, a lo bu nghut a, zawhna dang ka zàwt zui ta bîk lo.

"Hei hi i zanriah tur a nia u Salmon, a sàt lai hian ei nghal daih la," tiin Thianga chuan polythene dum aṭang hian box a rawn phawrh liam liam a, mak ka ti leh ta!

"Chaw i la ei na nge?" ka tih chuan, "Ka ril a ṭam lo," a lo ti mai a, mak ka tih záwk tak chu a dam lo tih an hre reng si a, engati nge a chhûngte'n ei rawng tal an rawn bàwlsak mai loh lè, kei lah zanriah ei kham lo ah ka kal ngai bawk si lo.

"I ril ṭam lo mah se i taksa kha i ngaihtuah a ngai alawm, ei nghal daih rawh," ka ti leh dat dat a, Thianga chuan a mit ko mi san khum zeuhin a thle bàk a, ka lo bu nghat a, ka haw hmâ chu a ṭhiante ina lèn leh a duh tih ka hrethiam nghal bawk.

"Nakinah ka ei ang," Salmon-a chu ka melh zawk a, nawr luih ka tum lem lo.

"A nih chuan, i chawhmeh tur ka'n siam belh ang e," tih leh chokaa phei ka rual a, chutah arsa ka hmuh rual chuan, "Sa i ei châk em, arsa hi ka'n siam ang aw," ka ti leh a, ani erawhin, "Sa ka ei tam lo," a lo ti dut thung.

Chutia sa a ei tam loh thu a sawi tâkah chuan tiin anṭam chu chhumsak ka tum a, mahse khawiah nge bungbêl a dah ka hre lo a, gas hnuai ka hawng a, perek leh tuboh tih vel daih a lo awm a, bungbêl dahna zawh tuma ka inher chu min hnaih zet hian a lo ding reng chu niin, ka ip chawih a, kan inmelh chiang hle bawk.

"Ka....engnge....?" ka ti bah nawk a, engnge tih a tum ka hre hauh lo.

Ngâwi reng hian gas chunga kawngka tè chu a han hawng a, ka rilru a hria nge ni, dekchi a rawn la thla a, a awmna hria pawh ni ila ka tân chuan chuti maia làk awlsam a ni lo, stool dawh chawp a ngâi ngei ang.

Múangchanga che sawnin dekchi chu glasstile-ah a nghat a, ka thaw huai a, ka kut pawh ka hum ruh ngawt ngawt tawh bîk lo. Inhnaih zeta kan awm lâi kha chuan ka thawk làk a buai a, ka mumal lo vekin ka hria.

"Lo va awm hahdam rawh," ka tih chuan min chhâng lo a, a kal sawn ve mai.

Boiler aṭangin tui lûm ka la chhuak a, dekchia ka anṭam silfai sa ah chuan ka chhûng lut a, gas kap alhin ka chhûang zui a, tihtur em em a awm lo bawk nen chutia a chawhmeh tur siamsak chu hun khawh ralna ṭha tak a ni.