𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟐]

SALMON

By 

Havali Adam

Bung 2-na

In ka thlen chuan dâr 1 a lo hnai thuak tawh a, ka nu leh pa an la meng ve ve a, thil thlen dan kimchang ka sawi lâi chuan uluk tak hian an ngaithla a, ka sawi zâwng ringawt paw'n ka mitthlâah a rawn lang nghal uar uar a, khatiang taka thil hlauhthawnawm kha ka tawn àwm rèng ka la hre lo.

"Puitu a nei hlauh che u chu a lawmawm hle mai," ka pa chuan a ti a, a hlauhthawnawm viau nàin pui theia kan awm kha hliam tuartu tân kha chuan a thlamuanthlak ngawt ang ka ring.

Zan a rei zel a, ka muhil thei lo a, ka ngaihtuahna ka kawm a, ka tum ni miah lovin dam lo hmêl kha ka mitthlâah a châm tlat a, kha zan, mangang taka kan awm zana min puitu ngei kha a ni tih ka hriat ruala ka hlauhthawn zualzia te kha ka ngaihtuah kir a, a thih ka hlau em em bawk a nih kha!

Eng nge ka hriat ka hre lo, ka rilruah hrisel taka a dam ṭhat leh theih nân ṭawngṭai a rawn lang a, rilru ṭawngṭaina ka hmang zui a, muthilh tum mah ila ka la muhil thei lawk chuang lo.

A tukah chuan thawh ka hai chiang hle a, Pathianni a ni hlauh záwk a, ni lo se zawng dawr ka hawng tlai duai ngei ang. Thil mak tak pakhat chu, kha dam lo kha ngaihtuah loh ka tum paw'n ka thei miah lo, a harh tawh leh tawh lohah ka buai a, damdawi ina va kal chilh èm erawh nuam ka ti chiah bawk si lo, mi dang hriatthiam si lovin ka tawt ru ṭûn a ni ber.

Chawhnu her a ni a, ka nu bulah ka rilrua awm ka sawi chhuak ta tawp a, nizana dam lo kha va tlawh ka duh thu ka sawi chuan rem a lo ti khawp a, ka pa erawh pavalai thilah a la buai avangin ka râwn buai lo law law thung.

Zodini ka call a, hospital-a kal ka sawi rual chuan ka ṭhat leh ṭhat loh thu min zàwt nghal a, nizana thil thleng kha ka la hrilh lo bawk nen a àwm tho mai.

"Lo chho phawt la, thil ka hrilh ang che," ka tih chuan engmah min záwt zui tawh lo.

Rei lovah a rawn thleng a, nizana ka thil tawn zawng zawng kha bo bang awm miah lovin ka hrilh a, mak a ti ve khawp mai. Hliam tuar erawh tunge a nih ka hrilh lo a, a hmuh hunah a hre chawp ve mai ang.

Hospital kan thlen chuan zawh mai dan tur ka hre lo a, mahse vanneihthlak takin ka ṭhiannu pakhat, nurse kan training pui ṭhin nen kan inhmu hlawl a, amah záwkin ka hmingin min rawn ko a, a zârah kan dam lo kan tum awmna pawh kan hriat theih phah nghe nghe!

Dam lo awmna cabin floor kan thleng chu mi an lo tam phian a, a lan dan chuan tlawhtu an awm nûal a nih hmèl! 

Ka inthlahrung leh deuh a, lèt leh mai te ka duh rum rum a, mahse nula pakhat hian min rawn bia a, ka hriat sual loh chuan nizana a nu ṭap hnemtu ngei kha niin ka hria.

"I lo kal leh a ni maw, lo kal rawh u, u Salmon-a pawh a harh tawh asin," ngainatawm tak hian a rawn ti a, "A va lawmawm ve," ka tih lâi chuan, "Min lo zui rawh u," a rawn ti zung zung a, zui loh theih pawh a ni lo.

Cabin chhûng kan lut ṭep tawh tihah chuan, "A rawn harh tirh khan 'khaw'nge nizana min puitute kha?' a ti nghal a, keini lahin sawi ngaihna kan hre vak si lo, i phone number neitu ber ka pa lah a awm loh lâi tak a ni bawk si a, rawn biak pawh ngaihna che kan hre lo a ni," a rawn ti leh siam siam a, cabin chhûngah kan lut zui nghal bawk.

"U Salmon, hei, nizana buaipuitu che kha a nia, a rawn kan che a nih hi," chu nu chuan a ti zàng vah a, dam lo khuma mipa hmêl chu ka en a, mahse ka en rei ngam lo, ka hrethiam bîk lo, ka zam ru tlat!

"Awi, a ni maw, nula, ka fapa chunga i thil tih avang hian engtia lawmthu sawi tur nge pawh ka hre lo, ka lawm tak zet a ni," tiin nu pakhat chuan ka kut a rawn chelh a, a lawm tak tak a ni tih a hmêlah chuan a hriat khawp mai.

"Hmân zana mi kha a va'n ang," ti sepin Zodini chuan ka beng bulah min rawn hrilh ru se se a, chhàn pawh ka chhâng lo, ka nghawk zauh ringawt!

"I rawn harh leh a, a lawmawm, lo dam ṭha zel rawh," tiin dam lo lam chu ka hawi a, a ngai te bawkin ka en rei ngam leh ta miah lo mai.

"Nizan avang khan ka lawm e," thum dam dap hian a rawn ti a, kan mit chu a intawng chat a, engati nge ka melh ṭhat ngam miah loh ka hre lo, tum mah ila a harsa tlat!

"Mi dang paw'n hmu ta che se le kan tih ang kha an tih ve tho ka ring," ka ti sap a, "Khaw'nge mipa kha?" a rawn tih chuan, "Ani chu a buai deuh a," tiin dàwt muhlum ka sawi a, a nihna takah chuan ka sâwm lo hrim hrim a, a phone number lah ka nei hek lo.

"Ani hnenah pawh khan lawmthu min lo hrilhsak dâwn a nia," awkâ dam thluam hian a ti a, a ṭawng apiang chuan a lam ka hawi a, mahse kan mit a intawn apiangin a hawi sawn hmâsa záwkah ka ṭang ziah thung.

"Ina inenkawl ka duh," a rawn ti leh chuan keimahni min be tawh lo tih ka hrethiam nghal mai a, chutah a nau chuan, "A chî loh lutuk, damdawi ina i la awm rih hi a ngâi," a lo ti thuai a, a nu pawh a bang chuang lo.

"Hospital-ah hian ka riak tawh dâwn lo," hniam dap, mahse khauh hmuk si hian dam lo khuma ṭhu thluang duai pa chuan a rawn ti a, an chhûngkaw thila inrawlh ka duh lo viau nàin ngàwih chu harsa ka ti tlat a ni.

"I hliam hi a serious ang reng a, damdawi inah hian ni 2 emaw ni 3 tal chu awm la a ṭhat ka ring, chumi hnuah chuan i duh leh in lamah in inenkawl záwk ang a, tunah rih chuan damdawi ina inenkawl hi a ṭha ber," ka ṭawng lâi chuan chiang tak hian min rawn en a, tawi tè hian ka nui lui sak a, ka thusawi chu eng atân mah a ngàih loh hmèl hle.

"Nia, chu chu a ṭhat ka ring, ka ṭhiannu hi nurse training tawh a ni a, i taksa nàt dan pawh kha a hre viau ang," tiin Zodini chuan a lo tuihnih a, mahse kan dam lo pa ber chu a luhlul hmèl ngel ngul khawp mai.

"Vawiin tlaiah ka chhuak ang," a la rawn ti fan a, inrawlh buai ka tum tawh lo. A nu leh a nau chuan an han tilui viau tak nà a, awmzia a awm lem lo.

"I dam ṭhat leh ngei ka beisei, kan kal ang e," ka tih chuan a nu chu lo ṭawng vatin, "Ngawi lawk teh, nurse i nih chuan ka fapa hi in lamah min enkawlsak thei mai ang em? Hun i nei thei ang em?" a rawn ti hlawl mai.

"Ka theih ka ring chiah lo, pharmacy dawr ka hawng ve a, ka buai ve thei lutuk a," ka tih chuan, "A pawi lo, i buai lâia tihbuai belh che chu ka tum lo, mahse kan tân hun i insiam theih hlauh chuan kan lawm ngawt ang," a la rawn ti ṭalh a, "Zanah bak hun awl ka nei lo asin," ka ti ta ngawt a, min nawr luih pawh ka ring tawh lo.

"Nula, ka phone number hi là la, hun i insiam thei a nih ngat chuan eng harsatna mah kan thlen lo ang che," tiin lehkhaah a phone number chu a ziak mawlh mawlh a, khuma lo ṭhu thluang duai pa chuan, "Nurse rawih a ngâi lo, keimahin ka inenkawl thei," a rawn ti hmuk a, a chapo nge thil a ngaihtuah chiang lo záwk pawh ka hre lo e a!

"A nih, kan kal phawt ang e," ka tih chuan dam lo nau chu lo ṭawngin, "Ka lo thlah ang che u," a rawn ti a, hospital kawt thleng a lo kal a, "U Salmon-a hian damdawi in hi a huatin a haw hluah hluah a, a sawi ang khan zanin pawh hetah kan riah ka ring lo, kan tân hun i insiam theih chuan kan lawm ngawt ang, ka ti tak tak," a ti sap sap a, chhàn dan tur pawh ka hre rih lo.

"Ka lo inngaigtuah dâwn a nia," ka tih chuan a lawm hmèl hle.

Haw kawngah Zodini nen kan sawi dun a, mî ina nurse anga va thawh ka duh loh thu chu ka hrilh tlang nghal a, dik tak chuan chhun lamah dawr buaipui a ngâi a, zanah lehzel hnathawh chu ka châk fahran lo a ni.

Chu bakah nurse an duh te a nih chuan kei lo chhawr tur an tam alawm, thawk lo tura ka rilru ka siam fel tawh avangin ka nu leh pa pawh hrilh loh law law ka ti tlu a, Zodini paw'n ka ngaihdan chu min ṭawmpui viau!

Zan inkhawm bànah Jeremy-a a lo lêng a, keimah nen ai mah chuan ka nu leh pate nen thil an sawiho nasa záwk a, kei chu an ṭawng loh kâra lo inrawlh ve ang lek ka ni.

A haw tur chu ka thlah a, kan in kawtah chuan kan ding ngâwi reng a, sawi tur a vâng kher mai. A motor chhûngah a lut mai dâwn emaw ka ti a, mahse a lut mai bawk si lo, ka awm dan chu a khaihlak vek a ni ber e.

"Naktukah Lungleia haw ka tum a, Aizawl chhuahsan hmâin i dawra lo kal kawi a rem ang em?" Jeremy-a chuan a rawn ti a, "Aw, rem e, a rem lohna a awm hleinem," ka lo ti hliai a, "Lo kal ka tum dâwn a nia," a ti leh a, motor chhûngah a lut ta nge nge a, kan inmangṭha fel hnu chuan a tlan liam zui ta vang vang bawk.

"Tunlâi chu kan Mimii hian inlêng a nei ngun riauin ka hria," in chhûng ka luh rualin ka pa'n min lo fiam a, lài chhe tak ka ni!

"Awihawm loh," ka tih chuan min nuih ruh ruh a, ka nu pawh a bang chuang lo.

"Ka mu dâwn a nia," tih leh ka pindan lama chhoh ka rual a, ka nu leh pate ṭawng thawm hre zui mah ila ka ngaihsak lo a, ka chanchin an sawi ngei ka ring.

Phone ri ral ral chuan min tiharh a, engtik lâiin nge ka lo muthilh hman ka hre lo. Caller ID ka en chu number lawng tawp hi a ni a, company emaw Vai emaw vel bak an nih ka ring lo a, ka hmet tawp hmak a, mahse a hnu lawkah number ngai bawk aṭangin call ka dawng leh a, ka pick up ta nge nge!

"Hello," muhil tui lâi kaih thawh hlim tih takah ka aw chu a nêm lo hle.

"Awi, i pick up hlauh chu ka va'n lawm tak èm, damdawi ina mi kha ka nia, dam lo nau kha, min la hria em?" a rawn tih chuan min rawn betu chu tunge a nih ka hrechhuak nghal!

"Aw hria e," ka ti zo chiah chu, "Enteh, ka û hi a tlun vak a, khawngaihin min lo tlawmngaihsak thei hram ang em? Khawngaih takin," a rawn ti mawlh mawlh a, damdawi inah kal mai se ka ti rilru a, mahse damdawi in a ngainat lohzia ka rilruah a rawn lang chawpchilh nghal a, ka ngaihtuahna an tibuai ru tak zet a ni.

"Lirthei pawh ka nei lo asin, ka khalh thiam lo hrim hrim bawk," ka tih chuan, "Ka lo lam ang che, in vêng leh in awmna min hrilh la, tunah ka lo kal nghal ang," a la rawn ti ta zel a, a awah chuan hlauthawnna a khat tih ka hre thei a, puih ngei chu ṭhain ka hre ta nge nge bawk.

Kan vêng hming leh kawngpuia ka lo awm tur thu ka hrilh a, kan inbiakna kan titawp a, chhuak turin ka insiam a, zan a rei tawh avangin thawm pawh ka dim hle.

Ka nute hrilh ka tum zet nà chu an muhil tui èm a, hrilh lovin in aṭang chuan ka chhuak a, ka tisual ang tih erawh ka hlau ru khawp mai.

Kawngpui thim lâiah ka ding vàng a, lirthei lo tlan apiang chu uluk takin ka lo en zel a, scooty sen a rawn khalh dâwn thu kha min hrilh a, mahse scooty sen àwm rèng a la rawn lang lo a, a rawn tlan mêk a nih ka ring.

Minute 15 dâwn ka din hnu chuan scooty sen ngei mai chu ka hmu ta, amah a nih ngei ringin a êng lâiah ka ding chhuak a, ani paw'n keimah ka ni tih a lo hre chat a, a eng a mah hmâin lawmthu min hrilh nghal mawlh mawlh bawk.

"Awitei ka nia, engtin nge ka koh ang che?" a tih chuan, "Mimi tiin min ko mai rawh," ka lo ti ve mai a, scooty chuan kan inphur chhuak thuai a, kan thleng har phian lehnghal a, an in awmna chu a lo zâwl deuh han a, an in bulah chuan in pangnga vel bak a ding miah lo.

In chhûng kan lut chu Awitei nu hmêl ka hmu hmâsa ber a, Awitei chuan a û mutna lam min panpui nghal sawk sawk a, dam lo pang ka dep chu a khawsik a lo sang hle a, ka damdawi ken ka phawrh thuai a, tun dinhmunah chuan eng dang ka rilruah a awm tawh lo, dam lo khawsik sâng lutuk chuan min tihlauthawng a ni.

"Tunge i nih? Buaipui ka ngâi lo ka ti a ni lo'm ni?" ti hrawkin ka bânah a rawn hmer a, ka tal chhuak vat a, damdawi pek ka tum chu a la duh miah lo zui!

"Enteh, ka buaipui châk che angah i ngâi a nih chuan i ring sual chiang hle a ni tih hre rawh, i dam lo a, buaipui i ngâi a, ka buapui mai che a ni, damdawi hi ei rawh," ka ti chang ta bal bal a, a awm dan chuan ka insum theihna a ṭhiat sawm tlat a tin a ni!

Chutia ka'n ti chu mak tak maiin a ngâwi ta hle hle a, a chhan ka hre bîk lo. Meng mang hlei lo hian damdawi chu a ei a, khur bauh bauhin a âwm a dawm a, a taksa a la inṭham nasa dâwn tih ka hria, damdawi inah khan ni 1 tal awm rih se zawng chutiang em em chuan a dam lo hauh lo ang.

"Puan sin tur dang a la awm em?" tiin Awitei lam chu ka hawi a, pindan aṭangin a chhuak vat a, rei lovah rizai a rawn là a, keiin ka lo sintîr nghal a, chutia ka sintír lâi chuan nghet zet hian ka kut a rawn chelh thut a, rizai chhûngah a ni hlauh záwk a, mi dang chuan an hmu lo hrim hrim!

A kut lûm ham ham chuan ka tiril a fan a, ka awm dan a pangngai lo a, min chelh ngheh êm avang chuan ka kut ka la sawn thei ngawt bawk si lo, ka awm dan chu ka hrethiam bîk lo, ka mur deuh chuaih ni ber hian ka hria.

Tih ngaihna dang awm hek lo, ka ṭhut chilh ta reng a, ka kut a thlah hun nghah tawp loh chu tih theih dang ka nei lo a ni. Ka damdawi pek chuan a taksaah hna a thawk ṭan a ni ang, a taksa a zawi tial tial a, a taksa khur nasa lutuk pawh a kiam ṭan a, a pang erawh a la sâ ṭha hut hut hle.

A thaw a rawn sâ a, a rizai sin ṭhenkhat chu ka nawr sawn a, ka kut pawh a thlah fel ta, ka thaw huai mai. Mitthi ang mai hian a mu a, a thaw ri sùk suk a, lehlam kawng záwng tak chuan ka khawngaih ang reng!

Pindan aṭangin kan chhuak a, Awitei leh a nu leh pate nen sitting room-ah kan ṭhu a, an fapa enkawlsak turin min ngen leh a, tun ṭum chu pa ber paw'n a ngenin min ngen a, ka tân pawh hnial a inthlahrunawm tawh záwk a ni.

"Engati nge damdawi inah khan a awm duh miah lo a?" ka rilrua riak reng chu ka zàwt ta tawp a, Awitei chuan, "A chhan kum 6 liam ta khan a fapa hmangaih em emin mî kut a tuar a, damdawi in kan panpui thuai a, mahse damdawi in ṭha tak tak pan mah ila a fapa nunna erawh chhanhim zawh a ni lo a, chuvang chuan tun thleng hian damdawi in leh a kaihhnawih hrim hrim hi chu a haw ta em em a ni," a rawn ti muang dap dap a, ka beisei loh lam daih a ni.

"A zia lo hle mai," tih bak sawi tur ka hre lo.

"Ka fapa hi a dam ṭhat hmâ zawng min enkawlsak la, hlawh ṭha tak ka pe ang che," Awitei pa chuan a rawn ti a, "Chutiang lam ka phut lo ka pu, min mamawh tak tak a nih chuan ka chhûngte ka lo be râwn ve phawt ang, tunah tut tut chuan eng thutlukna mah ka siam thei rih lo. Chuan, engati nge kei kher enkawl tura min duh, nurse tam tak an awm alawm, in duh chuan in chhawr thei reng asin," ka ti ta duah a, ka tum ai ka sawi hnem daih mai.

"I rawn thlen hmâ kha chuan nurse dang rawih ka rilruk ngei a, mahse i buaipui dan ka hmuh khan kan fapa enkawl tur hian i ṭhat ber ka ring, mi dang zawn ngâiah pawh ka ruat tawh lo," Awitei nu chuan a lo ti thuai a, sawi tur ka vàn leh ta viau e!

Zan a rei tial tial a, Awitei nen chuan kan titi melh melh a, a nu leh pate erawh sitting room chhuatah an mu tawh a, Awitei sawi dan chuan chu in chu a û, Salmon-a in a ni a, an in tak tak erawh vêng hran daihah a awm thung.

A fapain a thihsan hnua a nun a buai chhoh tâk zia te min hrilh a, anni angin hrethiam dâwn lo mah ila ka hriatthiampui khawp mai.

In chhûngah chuan pindan pakhat chauh a awm a, a bak zawng chu choka, washroom, bathroom leh sitting room a ni mai a, in chhûng a zau lo nàin a kim biai lawi a, chhuata a nu leh pate an mu pawh chu àwm lo ka ti hran lo.

Tin, Awitei chuan a û hnathawh thlengin min hrilh a, sub-inspector (SI) a nih thu te, a hna chelh avanga buaina a tawh ngunzia te a sawi a, a nihna han hriat tâkah chuan a pian leh hmêl zawng zawng nen police hna thawk àwm tak pawh niin ka hria.

Thawm ri deuh hrutah chuan ka harh a, khua a lo vâr tawh chu niin, khum lam ka hawi chu Salmon-a chuan min lo en reng a, ka che buai teuh kher mai.

"I lo harh tawh a ni maw..." ka tih chuan min chhâng lo a, min en reng ringawt!

"ORS ka'n siam ang che, i in dâwn a nia," tiin ka che zui malh malh a, "Engnge hetah i tih?" a rawn tih chuan nizana thil thleng kha a hre tawh miah lo a nih ka ring.

"Nizan khan i dam lo vak a, i nauin min rawn call a, hetah ka riak tlang law law ta a nih hi!" ka tih chuan engmah a sawi zawm lo a, min zawh zawm hek lo.

"Kha le, hei hi in la, i harh sawt mai ang," tih leh pek ka rual a, "I hliam kha ka lo dressing dâwn em ni ang?" ka tih zawm zat a, ka thil pek chu vawi khatah a in zo nghal vek bawk.

"Thisen hi a chhuak reng a, ni khat danah kan dressing zel dâwn a nia," a âwm vei lama hliam ka buaipui lâi chuan ka ti dat dat a, min en runa ka hriatna chuan min tizam ru hle.

"Khami zana kaptu che kha an man tawh em?" ka tih chuan tukverh lam a hawi daih a, "Keima'n ka man ang," a ti thum bul a, a mitmeng chu a tak run bawk.

"A nih, engati nge an kah ngawt che a?" ka ti leh chu chiang mangkheng hian min melh chhuk run a, "Ka zàwt lo ah che ngâi rawh," ka ti nghal thuai a, ṭawng tawh loh a finthlak ber záwkin ka hria.

A hliam ka dressing zawh hnu chuan choka ah ka phei a, a ril a ṭam ringin ei tur awm ang ang ka siam a, mipa, mahnia cheng e ti lo chuan engkim chu a felfai thlap a, chawhmeh dahna chenin hnawmhnawk a awm miah lo.

Apple pum khat chu ei nuam tawkin ka zai phel a, bahhla leh grape ka pawlh bawk a, pindan ka va lut chu khum aṭanga thawh a lo tum mêk a, ka thil ken lâi dawhkana dah rawk rawkin ka pan hnai nghal thuai bawk.

"La tho rih suh, i hliam hi a la nâ dâwn a nia," ka tih chuan chhuatah a ding titawh a, mahse a la ding ngil thei chiah lo chu a ni.

"Mu leh rih záwk rawh," tiin a darah chuan ka dawm a, a ding ngil lo chung paw'n ka tiat lo khawp mai.

"A nih loh paw'n ṭhu tal rawh," ka ti leh a, chutah khuma ṭhut a'n tum chu ka lamah a rawn awn ta duai duai mai, a balance a hloh tih hriain a darah lo chelh ve teh mah ila ka tân tih ngaihna dang a awm lo, a rit lutuk tlat!

Rem lo zet hian khumah chuan min bawh thlu ruah a, nâ tih hmèl zet hian a ṭhen nawk a, ka hmai si deuh thaw hian a rawn thaw lûm ham ham a, ka sâ chhuak vek ni maiin ka hria. Ka lungphu a rang a, ka zam a, kan hmai insi teuh lutuk chuan pangngaiin min awmtîr thei lo a ni.

"Ih.....i eitur ka siam a, ei la a ṭhat ka ring," ka ti thawp sap a, awm sawn tum lo ang hrim hian min rawn chhuk melh a, ka thin phu rang dawt dawt lutuk chu a hriat phak hial ka ring.

Zawimuang hian a tho ṭuah ṭuah a, insi lova kan han awm chiah chu rang takin ka kal sawn nghal a, hmai ka va phih chiam ringawt a, mahse ka lungphu erawh a la pangngai thei chuang hauh lo.

Minute eng emaw zah chu ka awm deuh vang vang a, ngaihṭhat lohna a neih ka hlauh avangin pindanah bawk chuan ka lut phei leh a, ka eitur siamsak kha a lo ei mual mual a, a lo ei zo ṭep tawh nghe nghe!

"Ka va siam belh ang e," tia kal leh nghal mai ka tum chu, "A ngai lo," a lo ti dut a, kan mit a intawng leh ta nge nge!

Thil mak tak pakhat chu, hetiang hian mi tu mah, ka en ṭhat ngam loh hi an la awm lo, ka nei ngai bawk hek lo. Ka hmuh tirh phat aṭang khan ani hi chu ka mit hian a pehhel zel a, pangngai taka awm ka tum pôh leh a harsa ting a ni mai.

Ka thil siamsak a ei zawh hnu chuan din leh a la tum ṭalh a, intihah buai rih lo tura ka hrilhnate chu engah mah a ngai lo, luhlul ngar ngar tak a ni. Zîng hmâ tak a la nih avangin keini pahnih tih loh chu an la mû vek a, kaih thawh loh law law a ṭha záwkin ka hria.

"Khum bulah khan damdawi ka dah a, chaw ei khamah i lo ei dâwn a nia, chuan, rit lo châwi lo la, i hahdamna tur bak ngaihtuah rih suh ang che," ka tih chuan min en reng a, aw leh aih paw'n min chhâng leh ta chuang lo.

"Ka chhûngte'n ka rawn kal tih hi an hre lo a, ka va haw tawh ang e," ka ti leh sap a, ka bag ka ak a, in aṭang chuan ka chhuak ta nghal bawk.

Pâwn ka thleng chu boruak hip kawkin ka ding deuh vang vang a, ka hawi lèt chu Salmon-a chuan tukverh darthlalang aṭangin min lo en reng chu niin, ka buk khum zeuh a, ka kal ta nal nal a, hawi pawh ka hawi lèt tawh lo.

Kawngpui ka thlen rualin taxi phar tur ka zawng nghal a, ka nu leh pate thawh hmâ ngeia in thlen hman chu ka tum a ni. Vanneihthlak takin rei ka ding lo hlauh a, taxi hman tur ka hmu thuai a, in ka thlen meuh chuan nî a rawn chhuak der tawh nghe nghe!

Ka pindanah ka chho tlang nghal a, mahni in ngeia awm tâkah chuan ka thaw huai mai. Ka mu zâl a, ka lo muhil tlang a ni mahnà, ka nu'n min rawn kai tho a, ka harh chuan dâr 8:30 a lo ri thuak tawh a, ka tho zui ve nghal mai bawk.

Chaw ei lâiin nizana ka hun hman dan kha ka nu leh pate bulah chuan ka sawi a, Awitei nu leh pate'n min ngen dan te chu ka hrilh ta vek a, ka pa chuan riah chilh a ngàih dâwn loh chuan pawi tihna a nei hran lo a, ka nu erawh eng vak a sawi lo, a rilru a nuam zàn lo a ni maithei.

Chawhmâ lamah chuan a sawi làwk ang ngeiin dawrah Jeremy-a a rawn kal a, rei a awm lo a, a kal dawn tak taka a hmeichhe duhzâwng ka nih thu min hrilh lâi chuan chhàn dan tur pawh ka hre lo, za lo zetin ka nui tawi sak ringawt!