𝐒𝐀𝐋𝐌𝐎𝐍 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 [𝟏]

SALMON

By

Havali Adam

Bung 1-na

'Ngaiteh, kumhlui mûal liam tur saw' tih hla, pi Lalsangzuali sak ngei mai chuan beng a luah a, kum hlui thlah zan tih takah pâwn boruak pawh a reh lo hle.

Pindanah ka awm a, keima hriat táwk lekin hla ka play ral ral a, music ṭhing dap dap mâwina chuan min fan a, kum thar tur chu beiseina nen ka thlir a, kum a vei a vei tàkah chuan nula pangngai kum kan lo chûangkai ve dâwn ta reng mai.

Nakinah chuan kan kum a tam ang zelin kan taksa paw'n chuai lam a la pan ngei dâwn a, kan hringnun hian tawp hun a nei ang a, chumi hunah chuan mite'n engtin nge min sawi ang a, min hriat zui zel ang tih hi ka ngaihtuah fô ṭhin.

Mi fel nih te, mi ṭha nih te, mi dik nih te hi thil awlsam tak a ni lo a, kan fel reng thei lo te, kan ṭha reng thei lo te, kan dik reng thei lo te hi a harsa lâi ber a ni.

Chutia zâi ngaithla chunga thil ka ngaihtuah lâi chuan phone call ka dawng a, Zodini a lo ni a, min rawn call tâkah chuan tihtur kan nei tih ka hrechhuak chawpchilh nghal bawk.

Chhuah a inpeih tawh thu leh min lam tura a lo kal dâwn thu a sawi a, biak pawh kan inbe rei lo. Ka insiam a, thlasik tih takah ka inha pan lo khawp mai.

Ka insiam zo ṭep tihah in hnuai lam aṭanga ka nu min kohna aw ka hria a, Zodini a lo thleng tawh a nih ngei ka ring.

In hnuaiah ka chhuk a, kei ang bawkin Zodini chu a lo inthuam lùm ve hle a, ka nu chuan rei lo turin min chah a, mahse eng chen nge kan awm dâwn ka hre hauh lo.

Zodini nen hian vêng khata awm kan ni a, vêng mawng lamah an awm a, keini kawngpui hnaih lamah kan awm thung a, senior department aṭanga inkawm ṭan kan ni a, kan in inkâr thui deuh mah se kan inlèn pawh vang vang ṭhin.

Tunah hian Living Water School-ah a thawk mêk a, nikum aṭanga thawk ṭan a ni nghe nghe! Kei erawh Durtlânga Nurse ka training tè tè hnuah Pharmacy dawr ka hawng a, sum tam tak là lut ṭun ṭun lo mah ila mahni táwkah ka lung a âwi ve hle.

Thian inkawm ngeih tak e ti lo hian kan mizia leh duhzâwng erawh a inang lo khawp a, rawng duhzâwng thlengin, ani'n a dum a duh lâiin keiin a vâr ka duh thung a, pangpâr ka ngainat em em lâiin eng atân mah a ti lo a, mahse kan inkawm táwk ve em em tho.

"Zuali i hmuh hunah chuan mak i ti ve ngawt ang, danglam tawh tak a ni," scooty khalh pahin Zodini chuan a rawn ti deuh lang lang a, "Ka hmu tawh alawm, ka hmuh tirh chuan ka hai ṭep lehnghal," ka lo ti ve mai a, "A takah a nia ka tih, group-ah kha chuan a thlalak chiah a nia, a mizia zawng zawng pawh a dang vek tawh," a rawn ti leh a, kan inhmuh lohna a rei ve leh tawh a, ngaihruat dan tur ka thiam chiah lo.

"Tlan mûang deuh teh Zo, a vawt bawk si," ka tih chuan a tlan mûang ve mai a, mahse beisei loh deuhin Durtlâng chhoah kan ding ta tlat mai.

"Engati nge a?" ka tih chuan, "Ka hre bîk lo," tiin scooty chu a en kual a, a ke hnung bula tlawh nunna chu a tlawh ri ṭhat ṭhat a, mahse awmzia a awm hauh lo.

"A va'n mak ve....." a tih chuan, "Engati nge?" ka lo ti thuai a, dik tak chuan khua a vawt bawk si a, chuti lai hmuna awm chu nuam ka ti chiah lo a ni.

"Petrol a zo a nih ka ring, hei, a head light te hi a èng fiah miah lo, a phe zuk zuk mai, kâr tir khan ka thun vek sia," a ti nang nang a, a ngaihna ka hre der lo.

"A nih chuan engtin nge ni ang?" ka tih chuan, "Ka pa ka'n bia ang e, thawhṭanni khan petrol ka thun ngei alawm, Ramdinsangan a lo khalh chhuak te a nih ngawt loh chuan zo thei a ni lo hrim hrim," a rawn ti ta charh charh a, a pa nena an inbe lâi chu ka en reng a, a lan dan chuan a hriat loh lâiin a nau Ramdinsangan a lo khalh chhuak ngei a nih hmèl!

"Khu, khu car khu lo phar ding tawp mai ang," tia car lo tlan chho lam ka hawi chu Zodini chuan min rawn bia a, mahse ka ngaihven hran lo.

Car chu a lo hnai zel a, kan bul a lo thleng ṭep tawh tihah ka bân ka lo vai lauh lauh a, a tlan mûang deuh a, a ding mai dâwn emaw ka ti a, mahse a tlan leh ta daih mai.

"Khawngaihin ding teh....." tih leh um ka rual a, a auin ka au a ni ber.

"Mimi....." ka hnung lam aṭanga ka ṭhiannu min kohna chu ka hre pha ngei a, mahse ka din phah hauh lo.

"Ding hram teh....." ring zet hian ka ti leh a, hah avangin ka thaw lak a buai a, ka um zui zel thei ta ngàng lo a ni.

Khup dawm meuhin ka thaw hlawp hlawp a, kan awmna hmunin a zir lo bawk nen keimahah chuan hlauh rukna riau hi a awm a, hlauh loh tum mah ila ka thei lo, chutah zan a la ni zui!

Chutia car tlan liam tur nia ka ngaih tawh ka thlir zui dauh dauh lai chuan muangchâng hian a ding a, a inher riai riai a, kan lam panin a rawn inher leh ta hlauh mai.

Chumi ka hmuh rual chuan ka bân ka lo vai vak vak a, eng pawh ni se, lo tih din chu ka tum bur tawh, a ṭul chuan kawngpui lâi takah pawh ka ding mai ang.

"Mimi....." Zodini chuan a rawn ti leh a, mahse a ngai te bawkin ka ngaihven leh ta chuang lo.

Ka hmâa car lo tlan thla chu ka en reng a, a tlan chak lo a, a lan dan chuan min rawn puih ngei tum a ang a, mahse a tlan tlang leh daih ka hlauh avangin kawngpui lâi takah ka ding ta thawr a, ka bân pahnih ka phar zui zat bawk.

Muangchâng hian car chu ka hmâah a ding a, a khalhtu hmêl ka hmuh chian theih loh ang bawkin tunge a nih ka ngaihven hek lo. Ka pan nghal rawk rawk a, ka tiding thei hlauh chu ka lawm kher mai.

"Enteh ka pu, khu lâiah khuan kan scooty petrol a zo daih a, min puih theih chuan a lawmawm ngawt ang," ka ti ta zung zung a, zah pawh ka hre tawh lo a ni ber.

"Min pui thei ang em?" ka ti leh a, ngâwi reng hian a driver seat bul kawngka chu a hawng a, chûang lut tura min hrilhnaah ka ngâi nghal hmiah bawk.

Scooty awmna kan thleng thla chu Zodini chuan min lo melh kiau a, mak a ti ni ngei tur a ni. Thil thlen dan a hrilh zui malh malh a, min puitu tur an awm tawh vang nge pawh ka hre lo, him ta riau hian ka inhria a, ka hah a dam ru huai bawk.

"Engtin nge scooty hi kan tih ang?" Zodini chuan a ti a, chu pa, kan biakna pawh la chhâng miah lo chuan, "Khaw'nge a chabi?" a rawn hniam rut a, Zodini chuan a lo pe thuai a, a che ve zel chu kan en zui reng a, Zodini hmêl chu a ṭi deuh dai hian ka hria a, mahse kei erawhin hlauhthawnna ka nei hauh si lo.

"Ka lock a, in chhûngte be rawh u," ti supin Zodini hnenah chabi chu a pe kir a, car-ah a ṭhu lut zui nghal zat bawk.

"In rawn lut dâwn lo em ni?" bung hmuk hian a rawn ti leh a, a ṭawngkam chuan inthlahrun a tizual kher mai.

Zodini chu ka nawr deuh rawk rawk a, a hnungah kan chûang lut a, ṭawng zui kan awm mai loh avangin lawmthute ka'n sawi mâwi a, chhanna erawh pakhat mah ka dawng lo, mahse min pui hrim hrim chu a lawmawm tho tho.

Durtlang leitan kan tlan pelh hnuah kan chhuk a, lawmthu ka sawi nawn mawlh mawlh a, ani erawh a tlan zui nghal vang vang thung. Zodini chuan phone a hmang a, a nau a lo kal mêk thu min hrilh ve nghal mai bawk.

Minute 20 dâwn kan nghah hnu chuan Ramdinsanga pawh a lo thleng a, Zodini chuan a lo hau nghal mawlh mawlh a, Ramdinsanga erawhin a hlauh loh hmêl khawp mai. An unauin scooty kan dahna lamah an inphur thla a, petrol te zu thunin Zodini chu a rawn inkhalh chho a, hun pawh a kal deuh duai tawh nghe nghe!

Zodini sawi ang ngeiin hmaichhana Zuali ka'n hmu chu a lo danglam tawh khawp mai. A hmêl chu thuhran, a mizia dang ta daih chuan min ṭhawng a, mahse mak ti angin ka awm duh lem lo thung.

Zualite nen hian Higher kan kalho ṭhin a, inkawm em em lo mah ila ṭhian tia sawi theih chu kan ni ve tho. Zanin hian a piancham lawm tura kal kan ni a, kan kal chhan tak pawh a classmate te min sawm ngawrh êm vang a ni.

Kan hun hman dan chu Zodini chuan nuam a ti khawp a, kumhlui thlah zan a ni kher bawk nen beer pawh a in nûal a, scooty khalh haw tur a la nih avangin in tawh lo turin ka hrilh nghe nghe!

Dâr 11 vel thleng kan awm a, kan haw lamah chuan a ṭawng lawng lawng a, vawt ti ang paw'n a awm lo, keiin vawt ka tih tehreng nen! A duh duh a sawi a, a chang leh a nui a, khalh fimkhur tura ka hrilhna te chu thutakah a khukpui lo nasa mai.

"Kan kal lama mi pa kha, kha pa kha, eng nge a hriat nì! A'n ding duh lo vel khanglang a, ka ngei a nia," a rawn ti bawng bawng a, "Kan mangan lâia min puitu a nih kha maw le," ka ti chiah chu, "Ding lo thei lova i siam vang mai mai alawm, kawngpuiah khan ding tawp lo la chu a ding kher lo ang, chu bakah, a awm dan nghet nghut kha, ka ngei," a rawn ti zui zuah zuah a, chutah amah bawk chu ṭawng zawm lehin, "Nang pawh, eng nge i buai vak, hlauh tur a awm hleinem, ka pate an lo kal thei reng alawm," a rawn ti leh a, kei chenin min ngei a nih hmêl!

"Kha lai hmun kha hmun him a ni hleinem, ruitheih thil ti, pawisak nei lo ho tlat tamna hmun a nih kha, chuvang alawm ka hlauh em em, kal sawn vat kha a him ber," ka tih chuan a nui hak a, ka thusawi chu a awih lo teh e!

Kan vêng kan thleng a, kan ina lo pêng kawi turin ka sâwm a, mahse a haw tlang ta záwk a, kan in ka lut chu ka nu'n TV a lo en a, a bulah ka pa'n a ke a lo hmehsak nuap nuap a, hmuh an nuam kher mai.

Khuma ka mut hnu chuan phone ka khawih a, rei lo tê hnuah ka mut a chhuak thuai a, chutah mumang mak tak ka la nei zui!

Kha pa, tunge a niha engnge a nih pawh ka hriat loh nen khan hmun pakhatah kan lo awm dun a, kan awm dun nà chu kan inawm hlat em em thung. Engtin emaw ni tak hian ka tâng a, tal chhuah tumin ka bei a, ka tha tawp ka chhuah a, mahse awmzia a awm hauh si lo.

Vawilehkhatah bân tha chak zet hian min rawn pawt chhuak lawp a, min kai kal dawr dawr a, kan awmna hmunah chuan mi dang tûmah an awm ve lo ni berin ka hria. Nî èng tak ngial pawh a awm lo a, thla eng hnuaiah kan kal a, engkim chu a tak tak ang mai a ni a, ka kut chelhtu pawh chu mihring ngei a ni.

A tuka ka ngaihtuah leh paw'n engtin nge chung zawng zawng chu ka mumangah ka hmuh theih ka hre lo, ka mangphan a nih ka ring ta ber mai. Tin, a vai vaiin hre tawh lo mah ila ka hriat chin erawh ka la hre chiang em em a, sawi chhawng leh dawn pawh ni ila mitthlà chungin ka sawi theih ngei ka ring.

Ka nu zo chhangban kan chu thingpui nen ka hmeh a, Champhaia ka pite'n min lo thawn a ni a, a tui dan a chiang hle. Ka kâah chan heng lai, Aizawl bazâra an chhangban zawrh te aiin a tui fê záwk a, a dip ṭha em em bawk.

Kum thar tuk tih takah nî chhuak te chu a mâwi zual em em a, thlasik boruakin hmun tin kil tin a la luah a, khaw hawi a nuamin boruak pawh a dai raih a, chu kum chu ka tân kum ṭha a nih ngei ka beisei.

Kâr a ral a, nitin dawrah hun ka hmang chawt a, kan dawr hi a lian hran lo a, kan lun em em lo a, mahse kan inhralh ve reng tho.

Nilaithawhṭan zan a ni a, ka pa nau chiah fapa, u Tlankima leh a nupui fanaute an lo lêng a, kum a la tir bawk nen Aizâwlah an la châm rih a, ani hi MCS-ah inziak tlingin tunah hian Lunglei district-ah SDC-in a awm mêk a, a hna chelhin a zir bawk a, a lang zahawm ta khep khup khawp mai.

A fate pahnih mawlh chu ka làwm a, an duhawmin an ṭawng duh si, fiah lo taka an ṭawng te hlei hlei chuan min tihlim a ni.

Ruah a sùr avangin an haw lawk thei lo a, eng emaw chen an awm hnuah haw an tum ve ta chauh a, an haw dâwn chuan u Tlankiman min hui zauh a, ka phei ve mai a, thil min hrilh tur a nei a nih ka ring.

"Kum engzah nge i nih khà......?" u Tlankima zawhna avang chuan ka nui chhuak hawk teuh kher mai.

"I va'n sawi ho tak....." ka ti ringawt a, "Sawi teh," thutak ang reng tak hian a rawn ti leh a, "Kumin hian kum 27-na ka pum ang, engati nge chutiangte min zawh daih daih, eng atân nge?" ka han ti leh chu, "Ka hre duh mai mai maw le," tih bakin min chhâng lo a, thil dang min zàwt zui tawh lo bawk.

Ka nu leh pate nen an tlan haw chu kan in kawt aṭangin kan thlir liam a, an haw fel tâkah chuan thawm pawh a reh duk mai. Pindanah ka chho a, mut nân a la hmâ deuh si nen phone ka khawih ta vel mai mai a, mut erawh ka muhil har lem lo.

A tukah chuan nilêngin dawrah hun ka hmang leh a, tlai lamah Zodini school bâng a rawn pêng a, a thawhna school-a zirtirtu pakhatin a ngaihzawn thute chu min hrilh lûam a, ngaihzâwng nei ngai lo tih takah han sawipui vak dan tur pawh ka hre lo, ka lo ngaithla deuh tawp ringawt!

Chumi tlai chuan ruah a sûr leh chiam a, Zodini haw hnu lawkah a ni nghe nghe a, khua a thim thet thet tawh tihah dawr ka khar a, kan dawr awmna hi kan vêng a nih loh avangin kal lam leh haw lam hi chu city bus-in ka haw mai zel a, traffic a jam loh hi chuan in thlen nân rei ka thang ngai lo.

Ruah a la súr zawm zel avangin traffic a jam leh ta nge nge a, bus chhûngah chûang kan tam bawk si, kei phei chu ṭhutna chang lovin ka ding a, kan tâng rei a nih vaih chuan a ninawm khawp ang.

Ka tihtur hre lo chuan ka mit ka len kual a, chutah kan bul lawka car pakhat ding chuan ka mit a là ta zar mai. Kum hlui thlah zana thil thleng kha ka hrechhuak nghal a, car chhûnga chûang chu tunge a nih hre lo mah ila hmuh châkna riau ka nei tlat a, rem leh rem lovin ka thle bàk a, mipa pakhat, biang hmul leh khabe hmul nei chhup ka hmuh rual chuan thil ka ngaihtuah lèt a, kha pa, min puitu kha niin ka hre deuh a, mahse niin ka hre leh chiah bawk si lo.

Khami ṭum khan chiang takin a hmêl ka hmu lo a, car chhûnga light tak ngial pawh a tièng lo a, Durtlâng leitan kan pelh hnu khan tlêmin a hmèl kha ka hmu chiang ta deuh a, khabe hmul leh biang hmul vel chu a nei ngei a, mahse kha pa kha tuna ka mi hmuh mêk nen hian mi thuhmun niin ka hre chiah lo a ni.

Bus khawl ri nghawr dawt dawt chuan min tiharh zawk a, ka ding ngil thuai a, ka bula mi chu ka tauh deuh dat nghe nghe! In ka thlen chuan khua a thim fel tawh a, ka nu'n zawhna min lo zàwt a, haw har min ti deuh a nih ka ring.

Ka intifai a, thawmhnaw lùm ka ha a, ruah a tla tawh lo nàin khua a vàwt sùk a, zanah tihtur engmah ka nei lo bawk nen mut hle hle ka chàk tawh a ni. Zanriah ei hmain u Tlankima hnen aṭang phone call ka dawng a, a rawn call tâkah chuan thil hriatchhuah ka nei nghal zawk mai.

"Mimi, zanin engnge i tih dâwn?" a rawn ti chuan, "Tihtur ka nei hran lo, engnge ni ta?" tiin ka lo chhâng a, "Ka ṭhianpa pakhat lo lenpui ka tum a nia, lo inring rawh," a rawn ti a, "Tu i ṭhianpa maw?" ka lo ti pangngai mai a, "Kan lo thlen hunah i hre mai ang, i thlalak pawh ka pe vek tawh," a rawn ti zui zat a, mak ka ti ru viau!

"Tlangvalin a rawn rim dâwn che angah ngai tawp rawh, engmah buaina tur a awm lo," a rawn tih leh chuan ka thaw hap a, sawi tur ber pawh ka hre lo.

"Engati nge ka thlalakte chu i lo pêk reng reng, zahthlak!" ka ti nang nang a, ani erawh a lo nui duh lek chauh!

"Engtik hun velah nge in lo kal dâwn? Zanin phei chu mut hmâ ka lo tum asin, min hrilh làwk ve tur che alawm," ka ti leh a, "Hei, ka hrilh láwk reng che alawm, Lunglei mi a nia, tlangval innghahna tlàk tak a ni a, in inmil phian ang ka ring," a rawn tih chuan ka lo hui hap a, a nui thawm chuan min tinui ve ta ringawt bawk.

Kan inbiak zawh rual rualin Zodini ka call a, u Tlankima thu min rawn hrilh chu ka hrilh chhawng a, lo lêng chho turin ka chah bawk a, mahse a lo duh teuh lo.

"Nangmah an rawn rim dâwn che a, keia lo awm ve a ṭulna ka hre lo," ti bakin min chhâng duh der lo a, min la phurpui em em zui leh ta nghal a, a awm dan chuan min tihuphurh tawlh tawlh záwk a ni.

Ngaihzâwng pakhat pawh ka la nei ngai lo a, tlangval lo chhawnchhaih dan chu ka thiam ka ring ngut lo a ni. Zodini ang chuan zei ila zawng harsatna a awm hauh lo ang, mahse Zodini nen kan inang si lo, ka che mâwi lo ang tih mawlh ka hlau.

Zanah chuan u Tlankima leh a ṭhianpa chu an rawn lêng ta ngei a, ka pa chuan mak a ti deuh ni ngei tur a ni. Min nui suk a, ka lo lai chhe ve em em ringawt!

U Tlankima ṭhianpa chu Jeremy-a a ni a, a ṭawngkam a felfaiin a hawihhâwm tih a hriat hle a, kei nen pawh eng eng emaw kan sawi dun a, biak hmâsak châng nei tho mah ila amah záwkin min be hmâsa hnem záwk a, a vawi khat rawn lènna a nih vang nge pawh ka hre lo, an lêng rei hran lo.

Mut tawh dâwnah Zodinin min rawn call a, chanchin min záwt a, sawi dan tur pawh ka hre lo. Kan vawi khat inhmuhna a ni a, ka duhzâwng a nih leh nih loh pawh ka hre lo, mahse a fel hmèl chu ka ti, a la tir ve èm bawk a, chuti maia han sawi lûam tur ka hre rih lo a ni.

Kâr tawp a ni a, u Tlankimate inah kan chhûngin kan lêng a, kâr tharah Lunglei lam an pan leh tawh dâwn avangin thlahna kan hmang a ni ber a, chumi zan chuan Jeremy-a pawh a rawn lang nghe nghe a, a fala inkawmna hun te kan nei a, tlangval fel tak a niin ka hria.

Dâr 11 dâwnah ka pate'n haw an rawt chauh a, u Tlankima chuan ka pate bulah min thlah haw tur thu leh thil min sawipui tur a neih thu a hrilh a, ka nu leh pate pawh ngaihṭha takin an haw ve mai a, mahse u Tlankima chuan thil tum a lo nei ran chu niin!

"Jeremy, Mimi kha va thlah leh si mai teh, tihtur ka nei thut mai," titu u Tlankima chu ka melh thuai a, mi dang hmuh lovin min la nuih put put zui, ngeiawm thiam tak a ni.

Jeremy-a nen chuan kan in lam panin kan inphur haw ta ngei a, eng eng emaw kan sawi a, titipui a nuam a, a bula awm pawh hrehawm ka ti hran lo, mahse ngaihzâwng tur angin ka en thei miah lo, ka ṭhian kawm ni berin ka hria.

Chutia kan titi dun lâi chuan vawilehkhatah kan ding lam kawng pêng ṭhuam aṭang hian car pahnih an rawn insu ri chik tuarh a, ka phu dâwrh a, Jeremy-a paw'n a motor khalh lâi chu a tiding chiang hle.

Chutah silai puak riin a la rawn zawm zat zui, ka rak ṭhat a, silai puak ri chuan ka tha a tikhur a, ka hlau tak zet a ni. Car tlan liam vang vang thawm a reh hnu chuan ka hawi chhuak a, motor aṭangin Jeremy-a chu a chhuak a, kei pawh ka chhuak ve nghal thuai bawk.

Jeremy-a chuan car pakhat lo ding reng lam chu a pan a, ngampa zan lo hian ka zui a, car chhûngah chuan mi pakhat, hliam tuar a awm ni ngei tur a ni.

"Mimi.....lo hmanhmawh rawh, hei, silaiin an kap fuh a nih hi, a muangchan chì lo ang," Jeremy-a chuan a rawn ti thuai a, nurse training tawh ka ni tih a hriat avanga chutianga min ko vat pawh chu a ni.

Car chhûnga mi pakhat, harfim mang hlei loa lo indawm kun deuh ngul ka hmuh rual chuan ka thin a phu nghal dawt dawt a, ka che zung zung a, a dara silai mu luhna aṭang chuan thisen a rawn pùt chhuak a, ka chet buai loh nân ka ṭawngṭai ru mawlh mawlh bawk.

"Hospital-a kan hruai vat a ngâi, hmanhmawh ang," tiin Jeremy-a chu ka hrilh a, mahse kan hliam tuar pa chuan a lo duh reng reng lo.

"Ka ṭha, hospital pan a ngâi lo," a rawn ti bul hmuk a, a taksa a chau zual zel a, ama thusawi ngei pawh chu a hriat chian ka ring lo.

"Khawi, keima'n ka lo buaipui ang," tiin Jeremy-a chuan a kuah tho ṭuah ṭuah a, hliam tuarpa chu a zawi hian a zuai hnuang a, kal pawh a kal ṭha thei lo a, ka theih ang angin a bân lehlamah ka kuah a, mahse ka tân chuan a rit mah mah a ni.

Hospital kan thlen hnu lawkah ka thil tawn chu ka chhûngte ka hrilh a, chutia dam lo han hawsan  ringawt chu ṭhaa ka hriat loh avangin ka haw hun tur ka hriat loh thu ka hrilh tlang nghal law law bawk.

Nurse pakhat chuan dam lo chhûngte a call a, minute 10 hnu velah dam lo chhûngte chu an lo thleng a, an mitmenga manganna chu ka hrethiam a, ka hmu thiam a, a pa ni ngei tur chuan thil thlen dan min záwt a, ka hmuh leh hriat ang ang ka hrilh a, a hmai tûai puatin a kawng a dawm zui zat a, pawi a tih hmèl tak zet!

"Ka fapa hi ka chân thei lo, a theih loh," tiin dam lo nu ni ngei tur chu bang ngheng hian a insût feih feih a, a fanu chuan, "A thi lo ang nu, u Salmon-a hi chuti maiin a thi lo ang, a rawn harh leh em em ang," tiin a lo hnem thuai a, an awm dan chu hmuh nuam tak zawng a ni lo a ni.

Dârkâr 1 chuang kan awm hnu chuan doctor hnen aṭangin dam lo taksa aṭanga silai mu làk chhuah a nih tawh thu kan hre ta a, a dinhmun pawh a chhe lutuk lo a, mahse a harh hun tur erawh sawi fak theih a ni rih lo thung.

Chutia dam lo dinhmun a ṭhat deuh tâkah chuan haw mai kan tum a, dam lo pa chuan min biak pawh theihna tur ka phone number a là a, kan kal liam dâwn thlengin lawmthu min hrilh a, hospital kan chhuahsan hnu chuan ka thaw deuh huai bawk.