๐ ๐๐ ๐๐๐๐ ๐๐ ๐๐ฒ ๐๐๐ฏ๐๐ฅ๐ข ๐๐๐๐ฆ (๐๐๐๐ ๐)
"U Sangzual....?" Cynthia-i kohna aw chuan Sangzuala chu a tiharh zรกwk a, chutah Cynthia-i bawk chuan, "Eng thil nge i lo ngaihtuah a? Ka be mawlh mawlh che a, i hre thei bawk si lo," a ti leh a, Sangzuala erawh a rilru a la kal ding hle thung.
"Lo awm lawk rawh, ka lo kir leh ang," tiin Sangzuala chu dawr aแนญang chuan a tlan chhuak titih a, Cynthia-i chuan a hrethiam lo hle.
Sangzuala chu zawn nei tih hriat tak hian a hawi kual a, pen pร wk pรกwk pahin a mit a len zak zak a, nichin maia a hmuh hmeichhia kha a zawng a ni tih a hmรชlah chuan a lang chiang em em bawk.
Thui a kal hmรขin hmeichhe pakhat, kawngpui kan mรชk chuan a mit a lร nghal zar a, a hnung lam aแนญang mah ni se nichin maia a hmeichhe hmuh ngei kha niin a hria a ni.
Sangzuala chuan a zui zel a, chu a hmeichhe zui chu ding dat hian a indawm vang vang a, lungchhia tih hriat tak hian a awm a, chutia a han din tรขkah chuan Sangzuala pawh chu a ding ve mai a, chiang takin a hmรชl chu a melh a, hmรขna a hmeichhe hriat แนญhin, a fapa nu, mipa dang laka uiresantu ngei kha a ni tih a hriat chian hnu chuan a inhum ruh ngawt ngawt a, engtin mah awm zui tawh lovin a kal liam lรขi chu a thlir ta ringawt bawk.
Phone dawra a let leh chu rilru kaptu nei tih hriat fahran hian a hmรจl a tak ngul a, Cynthia-i chuan chรฌk zet hian a lo en a, a hmรชl lan dan leh awm danin azir loh รชm avangin zawhna erawh a zร wt duh rih lo thung.
In an thlen thlengin Sangzuala hmรชl chu a la thutak run a, engmah tih chร k a nei lo a, ngaihven ang hrima a nupui hlui a um te kha a inchhir hnuhnawh leh lawi a, chutih rual erawh chuan a hmuh dan khan a แนญhawng thlawt a ni.
Cynthia-i chuan an chhuahnaa an thil tawn chu Hlimpuii a hrilh a, Hlimpuii pawh chuan mak a ti ve hle a, mahse chutianga Sangzuala a awm thutna chhan chu a tua ma'n an hre lo.
Tlai khua a ngui a, Muani chuan a nu awm dan chu mak tih ruk riau a nei a, thil dik lo a awm leh awm loh a zawh lahin engmah dik lo a awm loh thu bak a sawi bawk si lo. Smart phone dawr aแนญanga a lo haw hnu khan a awm dan a dik lo แนญan ni berin a hria a, zanah chuan a pi a hrilh ta tawp bawk.
"I nuamsam lo em ni Zote? In lo haw tirh aแนญang tawh khan i chian loh hmรจl riauin ka hria," tiin Muani pi chuan a zร wt ta nge nge a, Zotei chuan, "Nuamsam e, ka hah deuh a ni ang, ka mu hmรข ang a, ka pangngai ve leh mai ang," a lo ti mai a, a nu chuan zawhna a zawh belh zel ang tih hlauin pindanah a lut zui ta daih bawk.
Zanah chuan Zotei chu muhil thei lovin a mu meng kar a, a mitthlรขah chuan vawiina a mi hmuh, a pasal lo ni tawh แนญhin, uirea puhtu, Sangzuala hmรชl ngei mai kha a lang zut zut a, kum tam tak hnua a hmu leh thut chu dawnsawn dan a thiam lo a, a lung a chhe thar ngawih ngawih a ni.
A ngaihtuahnaah chuan a fapa, hmangaih em em chunga a kalsan tรขk kha a rawn lang bawk a, engkim mai chu a tรขn lungchhiatna hlir a ni a, a thunun theih niin a hre hek lo. A pasal hlui Sangzuala hmรชl mawlh chuan a ngaihtuahnaah hmun a chang a, hmuh nawn leh erawh a duh tawh lo a ni.
Chumi zan chuan Sangzuala pawh a muhil thei bรฎk lo a, a kutah chuan thlalak pakhat hi a chelh ran a, chu thlalak chu Zotei nena an thlaklak, Andrew-a a pai lรขi a ni a, Zotei hmรชl mawlh chuan khaw dang a hawi sawntรฎr thei lo a, a thinlungah thinurnain bu a khuar hneh hle bawk.
Zu bur nen a inchhawp rup a, thil tam tak ngaihtuahin hun a hmang a, a rilru a nรข ngawih ngawih tih chu amah tluka hre chiang an awm lo a, a nupui hlui avang mai maia rilru tihnร t tum lo teh mah se tih theih dang a nei chuang hauh si lo.
Zรฎngkhua a lo vรขr a, Andrew-a chuan a pa pindan kawngka inkhar chip lo chu mak a ti a, a va en chian chuan a pa chu zu bur nen khum bawhin a lo muhil run a, khumah a mut แนญhattรฎr a, a pa kuta thlalak chuan a mit a lร zar a, a han en chiang chu a nu leh pa thlalak a ni tih a hre nghal a, a pa chuan a nu a ngรขi a ni tih hrethiamin a khawngaih ru hle bawk.
"La dam la chuan ka pa hi hetiang em em hian a mal bรฎk lo ang maw le," tiin thlalaka a nu chu a bia a, a nui tawi tap a, a pa berin a nu a thih tawh thu a hrilh miau a, a tรขn chuan a nu a la dam a ni tih chu hriat ngaihna a awm lo a ni.
Chumi tuk chuan Sangzuala tel lovin tukแนญhuan an kil a, Andrew-a chuan nizana a pa a mut แนญhat loh thu a sawi a, mi dang pawh chuan ngaihแนญhat lohna an nei hran lo a, Andrew-a thusawi chu an awih ve mai bawk.
Class kal tura a insiam zawh hnu chuan a pa pindanah a va kal leh a, a pa chu a lo harh tawh a, mahse a harhna a la rei lo tih a hriat hle thung. Andrew-a chuan a pa che ruk ruk chu a en deuh reng a, zawn a nei tih a hrethiam nghal.
"Hei hi em ni i zawn pa?" a tih chuan a pa chu a lam a rawn hawi a, a pa chuan, "Immmm....." lo ti nghutin thlalak chu a la a, chutah a pa vek chuan, "Engtin nge i lo kawl daih theih?" a ti hniam chhur a, Andrew-a chuan, "Tukin khan ka lo lut alawm, inbual rawh pa, i rimtui lo, class ka kal dรขwn a nia," a ti ta zung zung a, a pa chu ngaihven zui ngรขiah pawh a ruat tawh lo.
Chutia a fapa a kal liam hnu chuan Sangzuala chu intifai turin a ding uaih a, thlalak chu ennawn leh zauhin a wallet-ah a khung zui zat bawk. A inbual fai hnu chuan in hnuaiah a chhuk a, nu Chhuani leh Cynthia-i an lo awm a, nu Chhuani chuan chaw a lo siamsak nghal zung zung a, Cynthia-i pawh a nelawm siam siam leh tawh khawp mai.
Nilรชngin Sangzuala chu แนญawng mang lovin a awm a, eng tih mah a chร k lo ti ila a sual lo viau ang. Cynthia-i chuan Sangzuala awm dan chu mak a ti ru telh telh a, in chung lamah chhovin Sangzuala nau Hlimpuii chu a han sawipui ta ringawt bawk.
"Enteh u Hlimpui, u Sangzuala awm dan khu ni dang a ang lo reng reng. A ngรขwi ngul a, ka biak paw'n min chhรขng lo hrim hrim, nimin aแนญang khan a danglam hlawk ni berin ka hria," Cynthia-i chuan a ti sap sap a, Hlimpuii ve thung chuan, "Hlauthawng duh suh, a mood a fuh lo a nih khu, nakin lawkah a pangngai ve leh mai ang," a lo ti sam et a, Cynthia-i rilru chu a nawm phah der lo.
"Dik tak chuan min duh lo ni mai hian ka hre แนญhin, kum 5 chhรปng ngawt chu hetiang vel reng hian kan awm tawh, ka duh tih pawh hi a hrethiam ve vek, mahse amah zรกwk hian min hnaih แนญha duh ngai miah lo ni berin ka hria," Cynthia-i chuan a ti chhuak halh a, chu veleh Hlimpuii chuan, "Lungngai suh Cynthia, a duh che tih ka hria alawm, engtik nรฎ ah emaw chuan kan mo i la ni ngei bawk ang, ka kutah dah tawp mai rawh," a lo ti thuai a, Cynthia-i pawh tlรจm chuan a awm a nawm phah ta deuh.
Chawhnu lamah chuan ruah a sรปr buan buan a, fรนr lรขi tih takah khua a แนญha mawh hle. Sangzuala chu a pindanah a tawm chawt a, a แนญhu ngรขwi run a, chutia hun a hman lรขi chuan a nau a lo lut a, a lo melh zauh tih loh chu a en zui hran lo.
"I awm dan hi siam แนญha teh u Mam, Cynthia-i tรขn hian a nuam dรขwn miah lo a nia, hei chen chhรปngte belh tur pawh nei lovin a rawn zui chho ve che a, nang lahin i ngaihsak แนญha leh duh bawk si lo," a รป rilru hneh tum takin Hlimpuii chuan a ti a, Sangzuala erawh a ngรขwi ngul thung.
"Ani tluka hmeichhe แนญha hi i tawng leh tawh kher lo ang, chuvangin ngaihven ve deuh teh, i tikhawngaihthlak mah mah," Hlimpuii chuan a ti leh a, Sangzuala chuan, "Eng beiseina mah ka siam hleinem," a lo ti thum sup a, Hlimpuii chu a thaw chhuak hap a, a รป rilru chu thlaksak a duh tak zet a ni.
"A nih chuan engati nge beiseina nei tur tร wk chiaha i awmkhum si? Enteh u Mam, Cynthia-i hi i haw lo tih ka hria, chu chu Cynthia-i pawh hian a hriat ngei ka ring. Ka hrilh leh ang che, Cynthia-i tluka hmeichhe แนญha hi chu i tawng leh tawh kher lo ang," Hlimpuii chuan a han ti leh a, Sangzuala chuan, "Chutiang lam bak sawi tur i nei lo a nih chuan chhuak rawh, ka ngaithla peih lo," a ti ta hmuk a, Hlimpuii chu a thin a rim kher mai.
"I thu thu le! Mal ngawih ngawihin awm kumkhua la a ni mai alawm!" ti charh charhin Hlimpuii chu a chhuak tau nghawng nghawng a, Sangzuala chuan a ngaihsak zui lo chiang hle.
Zawi zawiin ruah sur chu a han a, khua pawh a รจng ta deuh a, Sangzuala chu chhuak turin a insiam a, a thil tih tum chu thil แนญul ber niin a hre lo a, mahse tih tho a duh bawk si, eng nge a chhan tak pawh a hrethiam bรฎk lo.
Garage-ah a chhuk a, motor-in a inkhalh chhuak zui nghal nal nal a, nimin maia Cynthia-i phone an leina dawr lam kha a pan a, traffic jam chhen chu a ning ru hle bawk. Dawr chu a thleng ta ngei a, dawr chhรปnga mite chuan phone lei tur emaw tiin an lo be zung zung a, mahse chutiang lam rรจng a ni hauh si lo.
"Mi zawn ka nei a, min puih theih chuan a lawmawm ngawt ang," tiin Sangzuala chuan bul a แนญan phawt a, dawr chhรปnga mite chu an lo inhawn hmรจl viau bawk.
"Zotei tih hming pu in hria em? Nimin khan hetah hian ka hmu a, in hriat zรขwng a nih chuan a awmna min hrilh thei ang em?" Sangzuala chuan a ti dap a, an zรฎnga pakhat chuan, "I mi sawi chu nu Zotei a ni lo maw, nimin khan a lo kal ngei a, sรขw lรขi deuhah sawn dawr a nei nghe nghe asin, va ngaihven chhin rawh ka pu, 'Zotei Dawr' tih a lo intรขr mai ang," a lo ti a, Sangzuala chu bu nghut hian a chhuak zui nghal mai bawk.
Kawngpui a kan aแนญanga kawi 5-na ah chuan 'Zotei Dawr' tih intร rna chu a hmu ta ngei a, dawr chhรปngah chuan mi an lo แนญhu deuh nual a, lut ta mai lo chuan pรขwn aแนญangin a thlithlai vel phawt a, a mi hmuh duh hmรชl erawh a hmu mai lo thung.
Dawr kawngka bulah chuan a ding a, chhรปng lam chu a han bih chiang leh deuh a, chutah a mi hmuh tum hmรฉl ngei mai chu a hmu ta. Kawngka bul aแนญang chuan Zotei ei siam mawlh mawlh chu a thlir reng a, a khawngaih nge a haw hluah hluah zรกwk tih pawh a hre hrang thei lo.
Chutia uiresantu zรกwk a'n ngaihven thar leh hnuhnawh chu tlawm thlak a ti a, a thinlungah chaponain hmun a rawn khuar zawm zat a, eng dang ngaihtuah tawh lovin a haw zui ta nal nal bawk.
A pindan chhรปng a lut chiah chu thinrimnain a khat a, dawhkan a chum ri แนญhuai a, nep a inti vawng vawng hle. Eng vanga lo va zawng chhuak kher nge a nih a inhrethiam thei lo a, tih loh tawp tur ti ni berin a inhre bawk.
Khuain hniam a hnaih a, Zoteite pawh chhun lam ang em em chuan an buai tawh bรฎk lo. Khaw thim fel hnuah dawr an khar a, in an thlen aแนญanga rei lovah chaw an ei a, zan hun chu chawlh hahdam nรขn an hmang leh tawp a, a แนญul fรช a nih loh chuan an chhuak ngรขi lo tluk a ni.
Nรฎ leh thla a liam a, Zotei rilruah chuan a pasal hlui chanchin awm leh zauh แนญhin mah se a ngaihtuah thui tak tak duh lo a, hmuh leh mawlh a hlau a ni. Pathiannรฎ tih loh chu hna thawkin a buai nรฎtin แนญhin a, dawr chu a hun hman tamna ber a ni.
Chutiang bawkin Muani pawh a zirlai laiah a แนญang nghal hle a, training zawh vat vat a, zirtirtu hna thawh a, a nu leh a pi chawm thuai thuai chu a thil chร k ber leh a tum ber a ni a, hlawhtlin ngei tumin a rilru pawh a siam nghet sauh sauh แนญhin.
Ni khat chu class an bรขng hmรข a, a แนญhiante nen gate bula dawrah thil an ei a, chutia an แนญhut khawm laih laih lรขi chuan class an kal hmรขsak ber แนญuma a hmuh pa kha dawr chhรปngah chuan a rawn lut nawlh a, Muani chuan chรฌk zet hian a lo melh kar a, chu pa pawh chuan a rawn hmu ve chat bawk.
Muanite แนญhutna piah lawkah chu pa chu a แนญhu a, ngรขwi reng hian a ei mual mual a, Muani chuan a rukin a melh leh zauh แนญhin a, a lo hmu fรด tawh แนญhin hmรจl nen a inang deuh tlat chu mak a ti ru a, a rilru chu hmun dang daihah a awm a, a แนญhiante thusawi pawh a ngaithla em em lo.
Chumi nรฎ chuan khua a แนญha ang reng viau a, van zรกwlah nรฎ a lang vawl a, Sangzuala pawh mahni inthunun zo ngร ng lovin a nupui hlui Zotei hmu turin a chhuak leh ta nge nge a, Zotei Dawr tih intarna dawr a va thleng chu customer an lo แนญhu nual a, Zotei hmรชlah bawk a mit a bur leh ta chat mai.
Sangzuala chu dawr chhรปngah a แนญhu lut a, ei tur a lam a, aw lo chhuahna lam a hawi rual chuan Zotei chu a meng phar deuh awn a, a thin a phu dup dup a, chutia a pasal hlui ngei mai, a dawra a rawn chawl hlawl chu mak a tiin a แนญhawng tak zet a ni.
Zotei chuan ei tur a va pe a, dawhkana thingpui leh chhang a dah thlak lรขi chuan Sangzuala chuan, "Kei min neih lรขia i khawsak dan nen a va inthlau ta ve," a lo ti hniam salh a, ring hran lo mah se Zotei tรขn chuan a fiah แนญha kalh kalh hle.
"Ni e......" Zotei chuan a ti muang dam diai a, a thinlung chhรปng chu a tawt a, mahse phawrh chhuah theih a ni si lo.
"Mamawh dang i nei a nih chuan i lam leh mai dรขwn a nia," ti sapa Zotei kal sawn mai tum chu a tum loh deuhin dawhkana thingpui no a tai fuh palh a, Sangzuala kawr hmรขah tak a buak per ta hlauh mai.
"Awi, ka tihpalh lutuk......" ti sawk sawkin a buaipui thuai a, Sangzuala chuan a kutah lo chelh chatin, "Buaipui ka ngai lo," a ti nghet churh a, Zotei pawh chu a tawp chiang hle.
"A zia lo hle mai," tiin Zotei chu ei siamna lamah a phei ta nal nal a, dawhkan dawm meuh hian thawk a la vang vang a, a rilru nรขt avanga a tha khur chuan thil a tichingpen vekin a hria.
A ngaihtuahnaah thil dang a awm thei lo a, eng vanga Sangzuala chu lo kal nge a nih tih te, amah hmusit tura lo kal nge a nih a, thil dang vang zร wk tih te chu a ngaihtuah chรฎam a, kum tam tak liam taa a thinlung hliamtu bawk khan a thinlung chu rawn hliamsak leh a tum a nih a ring nghet bur bawk.
Khaw dang hawi sawn map lova ei tur a siam mawlh mawlh hnu chuan muangchรขng hian Sangzuala แนญhutna lam a hawi phei a, a lo awm tawh reng reng lo chu niin, a thaw chhuak hawk a, dawhkan seng fel tura a va phei chu cheng 500 note hi a lo inpharh fel thlap a, a rilru a nรข kher mai.
Sangzuala pawisa dah chu thinrim ru tak chungin a lร a, a en hniamzia a hre thar awn awn a, a lo kal leh a nih ngat chuan pek lรจt leh ngei a tum ruh hle bawk. Zan lampang thlengin Zotei chuan thil dang a ngaihtuah thei lo a, a hmu leh a nih paw'n zam leh khur mai lova pangngai taka hmachhawn chu a thil tum ber a ni.
Sangzuala chu zรป no nen zan hun a hmang leh a, vawiin lama a chet dan avang khan nuam lo tih rukna chu a nei ngei a, mahse a rilru a tikhauh lui tlat thung. Pindan kawngka chu a ri rak a, tu nge lo lut tih pawh a ngaihven hran lo.
"Vawiin khan khaw'nge i kal?" tiin Hlimpuii chuan a รป chu a bia a, Sangzuala chuan, "I hriat a แนญulna a awm lo," a lo ti hmuk a, chu veleh Hlimpuii chuan, "A แนญul, ka แนญhiannute inneih anniversary lawmnaa kal tur kan ni a, Cynthia-i ngat phei chu a hrilhhai lutuk, i ruala kal turah a inngรขi a, nang lahin thil dang tihtur i neih thu sawiin i lo chhuahsan daih bawk si, min hrilh teh, khawiah nge i kal?" a ti ta duah a, a awki ah chuan a lungawi lo tih a hriat hle.
"Cynthia-i chungchangah chuan ka thiam loh a awm ngei e, nakinah ka la bia ang," Sangzuala chuan a ti mai a, Hlimpuii erawhin a duh khawp lo teh e!
"I kalna chu sawi a harsa viau em ni?" Hlimpuii chuan a ti แนญhawt a, Sangzuala erawh chuan, "Chhuak rawh!" a l lo ti khauh hmuk thung.
Kawngka inkhar ri แนญhuai tih loh chu thawm dang a awm chhunzawm tawh lo a, Sangzuala chu Cynthia-i lakah inthiam lohna nei deuh mah se a nei rei hran lo. Thil dang bawkin a ngaihtuahna chhรปngril a luah a, hahdam taka a awm thei lo chu a kham hluah hluah a ni.
Nilaithawhแนญanni a ni a, Muani chu an bร n tlai nรฎ a nih avangin a haw tlai hle a, gate a tlan pelh aแนญanga hlรข pawh ni lo ah hian a hmรขa bike tlan chu lung chil fuh palhin a kawi zawr zawr a, kawng sรฎra thir ban suin a khalhtu chu a per kang lawp a, a tlak rual chuan nikhaw hre lovin a awm nghal a, Muani chuan rang takin a buaipui thuai bawk.
A tih theih ang ang a ti nghal mawlh mawlh a, bike khalhtu hmรชl a hmu chiang chu kha pa, class an kal hmรขsak ber nia a hmuh pa bawk kha lo niin, Ambulance motor lo thlen lรขi te chuan tih ber tur a hre lo a, scooty chuan motor chu a zui ve tawp a, a lan dan chuan hliam nรข tak a tuar a nih hmรชl leh nghal a, a mangang ru khawp mai.
Damdawi in an thleng a, nurse pakhat chuan Muani hnenah dam lo phone pe pahin a chhรปngte be pawp turin a chah nghal a, Muani pawh chuan a be pawp nghal zung zung a, mahse chu hun chu a nun inthlak danglam แนญanna a ni dรขwn tih rรจng a hre hauh si lo.
Sangzuala chuan chak zet hian damdawi in lam a pan a, a neih chhun a fapa chu a chรขn ang tih a hlau tak zet a ni. Hlimpuii leh Cynthia-i te nena kal an ni a, damdawi in an thlen rual chuan rang takin nurse te hnenah a fapa chanchin a zร wt nghal thuai bawk.
Nurse chuan nula pakhat แนญhutthlenga lo แนญhu chu damdawi ina a fapa lo hruai thlengtu a nih thu a hrilh a, chu veleh Sangzuala chuan chu nula chu pan hnai thuaiin engtia accident tรกwk nge a nih a zรกwt zui mawlh mawlh a, mahse a mi zawh chuan chhร n ngaihna a hre der lo.
"Sawi teh nula, engtin chiah nge ka fapa hi a accident?" tia sawi deuh nawktu chu Muani chuan a en reng a, a thin a phu dawt dawt a, a hmรข maia แนญhingแนญhi, amah be mawlh mawlhtu chu a vawikhat hmuhna niin a hre thei ngร ng lo a ni.
"Ka....ih.....eng lo.....ka hmรขah a tlan a, chuan, lung a chil a, thir ban a su pawp a, engmah a hre zui tawh lo, ka buaipui lai pawh khan nikhaw hre lovin a awm tawh," Muani chuan a ti thei ta hram a, a mittui a tling zui pam bawk.
"A nih chu," ti hniam supin Sangzuala chu a thaw chhuak hawk a, chu nula hmรชl chu a han en leh a, แนญah chhuak zet hmรฉl a pรป chu a hrethiam lo kher mai.
"Ka.....ka haw a ngai, ka haw tawh mai ang," ti nawk nawkin Muani chu a tlan hian a tlan chhuak a, "Kan lawm e nula," tia an biakna te chu hlรข tak aแนญangin a hre ruai ruai a ni ber.
Muani rilru chu a inhnawh tup tup a, in a thlen rual rual chuan a nu pindanah a tlan lut a, thlalak bawm chu a la chhuak a, a nu leh pa thlalak a hmuh rual chuan a แนญap nghal feih feih a, a rilruah chuan eng dang a lut thei tawh lo.
"Pa.....i la dam ti raw?" tiin thlalaka a pa hmรชl chu a chul riak riak a, nichin maia a hmuh, damdawi ina mi ngei kha a mitthlรขah chuan a rawn lang a, thlalaka mi nen chuan danglamna awm lo tlukin an inang a, thlalaka mi chu a naupan hmรจl zร wk tih mai chauh a ni.
Khua a thim fel a, Zotei chuan dawra a fanu a lo kal miah lo chu mak a ti deuh a, mahse ngaihแนญhat lohna a nei chuang lo. In an thlen chuan a pindan kawngka lo inhawng huau chu a hmu a, chhuata a fanu lo แนญhu sawp nuaih a hmuh rual chuan a pan hnai nghal thuai bawk.
"Engati nge Bawihi?" ngaihtuah taka a nu biakna chu Muani chuan lo chhรขng lรจt vatin, "Nu, ka pa hi a la dam ti raw? A la thi miah lo, a la dam reng a ni ti raw?" a ti ta mawlh mawlh a, a fanu zawhna chuan Zotei chu a แนญhawng tak zet a ni.
"Min hrilh rawh nu, ka pa hi a la dam ti raw?" Muani chuan a ti leh a, a mittui chu a dang seng lo a ni e.
"Ka hre lo, a la dam ka ring," beidawng aw zet hian Zotei chuan a ti sap a, chutah Muani chuan แนญap แนญiau chung hian, "Ni lo, i hria, i hre chiang lutuk, engati nge khang kum kal ta chhรปng zawng khan ka pa thi tawh anga min ngaihtรฎr? Maw.....!? Engati nge nu, ka pa a la dam reng si chuan engati nge a thi tawh anga min hrilh?" a ti leh buan buan a, Zotei pawh chu chhuatah a แนญhu sawp ve ta hnawk mai.
"A pawi ka ti Bawihi," tih thumal bak Zotei chuan a chhakchhuak thei rih lo.
"Nang pawh pi, engkim hi i hre vek ti raw, engati nge ka lakah hian thudik in zep?" tiin Muani chuan a pi chu a melh chho ral a, chutah amah bawk chuan, "Kum tin.....kum tin ka piancham a lo thlen apianga ka dil แนญhin chu mumangah tal ka pa hmuh a ni asin, thi tawh mah se ka mumangah tal chuan hmuh theih ka inbeisei แนญhin a, mahse ka pa chu a lo la dam reng zรกwk si, kei hi khang kum liam ta chhรปng zawng khan bum ka lo ni a, engmah ka hre si lo," ti lehin a pindanah a phei a, a inkalhkhum ta hmak bawk.
Chumi zan chuan Muani chu a muhil thei lo va, a nu leh a pite'n a pindan kawngka rawn chum แนญhin mah se a hawnsak duh hek lo. A rilru a nรข ngawih ngawih a, zawhna tam tak a nei bawk. Nimahsela, tunah rih chuan engmah tih loh a, a rilru kawm chu a hahdamthlak ber zรกwk a ni.
Chutiang bawkin Sangzuala pawh a fapa ngaihtuahin damdawi in chhรปngah hun a hmang a, a fapa leh zel a chan a nih vaih chuan a nunin a tuar khawp ang. Doctor te chuan a lรปa hliam a buaipuiawm ber an ti a, thisen a lo hloh hnem hman bawk nen a dinhmun a ngaihแนญhatthlak loh hle.
Comments
Post a Comment