𝐓𝐇𝐀𝐙𝐔𝐀𝐋𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

ṬHAZUALA
(Mizo Romantic Story)

By

Havali Adam

"Inkhawm i tum na nge?" Ruatsanga, ka unaupa neih chhun chu melh zeuhin ka buk khum nghat a, inkhawm taihmak loh nen inkhawm tur hian min sâwm ve ziah lehnghal a, ka ning lek lek ṭhin.

"Engmah tihtur i nei chuang lo, insiam rawh!" a rawn ti leh a, chhán enah pawh ka en lo, ka inkhawm dâwn lo tih a hriatthiam vek pawh ka ring.

Chutia engmah sawi zawm lova kan ngàwih ren rawn lâi chuan a fapa Bawihpuia lo kalin, "Apa, aû sawn a thil ei lâi min pe ve duh lo," a rawn ti zat zat reuh a, a pa lakah mai ni lo, ka bulah nen lam a rawn zualko zawm zat a, ka lo khi sak nghe nghe!

"Lo kal daih rawh Bawihpui, nakinah ka lei ve dâwn che a nia," tiin ka lo thlem titih a, mahse a pa záwk chuan, "Khatiang khan lo ti ṭhin suh, ṭha ka ti lo a nia," a lo ti thuai a, mahse chutianga han thinrim erawh a ni chuang lo.

"Khawiah nge i û chu a awm?" tih zawm zatin a fapa, ka bul cheta ding ngâwi ran, lungâwi fahran lo tih hriat tak chu a pawm kang nawlh a, sitting room aṭang chuan a kal sawnpui ta daih bawk.

Ruatsanga hi ka unaupa neih chhun leh kan unaua naupang ber a ni a, a nunin a zir bawk a, tunah hian thingtlâng khaw pakhatah pro pastor rawngbawl hna a thawk mêk a, nupui duhawm leh fel tak a nei a, fa pawh pahnih lâi an nei tawh a, ka nau pawh ni lo mah se ka hmuh dan leh ngaihdanah chuan nupui fanaute tâna innghahna tlâk tak mipa ang chì hi a ni a tih theih àwm e.

Tin, ani nena kan inkârah hian ka nau chiah hmeichhia, Mahlimi a awm ve leh a, mahse ani erawh chuan a û ang lo takin pasal a nei dim diam tawh a, fate pawh a nei tawh hial nghe nghe a, hmeichhia tih takah pasal a neih hnu hian kan inbe nasa thei hle a, ka nu leh pate nena an inbiak ai paw'n kan inbe tam záwk ṭhin ti ila a sual lo ber ang.

Kei ve thung hi chu kum lamin min chaldelh tawh viau mah se ka rilruah pasal neih lam rèng a lang ngai eih lo va, ngaihzawng neih hrim hrim pawh hi ka tluan lohna kawng tak a ni záwk nge ni, ka vanduai ang reng viau a, pangngai taka ngaihzawng ka neih lohna chin pawh hi ka hre tawh lo.

"Inkhawm chu i tum lo tak tak em ni?" Ruatsanga bawk chuan phone ka khawih mial mial lâiin a rawn ti leh a, ka melh zawk a, ka duh tàwk der!

"Inkhawm rawh, kei pawh ka inkhawm dâwn," a rawn ti leh a, a nihna takah chuan thawhṭanni zan a ni a, KṬP inkhawm zan a nih avanga inkhawm peih vak lo ka ni ber!

"Min lo inkhawm kep mai rawh, keini ang rual tumah an inkhawm tawh ngai lo," chhuanlam tlachawp deuh siama ka ti zo chiah chu, "I inngâi senior mai mai a nih kha, kum 35 chauh alawm i la nih, insiam rawh, kan kal rual dâwn a nia," a la rawn ti hram a, eng nge ka rilruah awm pawh ka hre tawh bîk lo, inkhawm tumna ka nei hran lo va, tum lohna pawh ka nei chuang lo.

Ka awm ngaiin ka awm reng a, Ruatsanga erawh an pindan lamah pheiin a insiam mual mual thung a, a fate pahnih ka bula an rawn tlat phei loh danah an nu kianga awm rih turin a hrilh a nih te ka ring a, ni lo se chu ka bula a rawn pheina a rei tawh ang.

Inkhawm dâr hmâsa a ri zo chiah tihah ka nu chuan ka nau ruala inkhawm ve turin min rawn hrilh a, Ruatsangate ang, ṭul avanga Aizawl an rawn zin zawk chhûng pawha inkhawm an tum lâia inkhawm ka tum miah loh chu ṭha a ti vak lo ni ngei tur a ni.

Phurna nei miah lovin inkhawm tur chuan ka insiam ve ta nge nge a, keini ang kum tawha KṬP inkhawm zana la inkhawm ṭut chu ka zak tlat pek a, tunlâi chhanah mi an thar hmâ tawh ropui bawk si nen tleirawl tê tê te nena han inchiahpiah thar leh vel kha ka phur hlawl lo a ni ber e.

Amaherawhchu, kohhran inkhawm pangngai, nilaini zan te, inrinni zan te, Pathianni zan te hi chu ka ngaihthah leh chuang miah lo lawi a, KṬP inkhawm ka hmu hniam ta viau e tihna pawh ni lovin, KṬP inkhawm zana inkhawm hi chu ka zak ru deuh tlat ti ila a sual tam lo viau ang.

Ka'n han inkhawm te reng reng lah chu mi mitmei ka vêng lutuk nge ni, ka khawr deuh ṭut ang leh ta nghal a, inkhawm hruaituin ka nau dintîr paha thu ngaihthlak nuam tak a sawi lâi te chuan ka awm a lo nuam veng veng a, inchhùan ruk riauna ka nei nghe nghe!

Zep thu a cheng lo, ka nau hi chu tû fa leh unaupa pawh ni se zahawm ruk riauna hi a nei a, a chhûngte tân pawha inchhùanna tham khawpin a nungchang a máwi a, a rilru a dik a, a thil tih engkim mai hi a felhlel ve ngai meuh lo a tih theih àwm e.

Chuti chung chuan amah ber hi a insit thei em em  a, tling lo viauah te hian a inngâi ṭhin a, a nunzia reng reng hi zah loh theih ni paw'n ka hre lo. Ka nau mah ni se kei ngei pawh hian han sawisel em emna tur hi ka nei mang ngai lo, a luhlul burna te hi a ṭha lam zâwngin a hmang daih lawi a, a naupan lâi aṭang tawh mî pawi a sawi hi ka hre khât khawp mai.

Inkhawm bànah hla zir a awm nghal a, mahse kei chu ka haw tlang ta záwk a, Ruatsanga erawh chelhtu an awm deuh núal avangin a rawn haw ve nghal lo va, nula senior nihna dinhmun chelh chho ṭan tawh tih takah kei chu a tua ma'n min sâwm lo hrim hrim a, min sâwm pawh ni se ka awm khawtawi tawh kherin ka ring lo.

In ka thleng chu ka nu'n thei a lo bâwl a, naupangho nen kan ei liam liam a, ka ei tui luatah siam belh ka rawt nghe nghe a, ka nu chuan mi zawt chuang miah si lovin ka thil ei châk leh rawp em em a lo hre chat ka ti mai, ei tui ka ni!

A tukah chuan ka tho hmâ ang reng viau a, keima pûala dawr ka neih ve avang hian zîng hi chu ka tho tlai ngai lo hrim hrim a, zîng dâr 9-ah hi chuan dawr ka hawng var var tawh ṭhin a, tlai lamah ka khar hmâ thung a, mahni táwkah ka intodelh ve viau chuan ka inhre bawk.

Tin, ka inngàih senior ṭan tawh vang nge ni, hmeichhe mize khirh ru ran ka ni reuh a, min ngaina lotu pawh an awm nûal tih ka hria. Vêng chhûngah ngat phei chuan ka hmeichhiatpuite'n min rêl nasa ṭhin ngàng mai a, runluih ka châk sawt ṭhin.

Tukṭhuan ei khamah dawr lam ka pan nghal a, dawr ka hawn lâi tak chuan ka dawr opposite, kawngpui àna dawr pakhat chhûng aṭang chuan tu tih pawh ka hriat loh hian min lo en reng a, a inthuam dan aṭang chuan two wheeler taxi driver a ni tih hai rual a ni lo va, meizial a pak khu leh pap pap ṭhin bawk.

Min thlir rengtu an awm tih ka hriatna chuan ka awm a tinuam lo ru ang reng khawp a, ka hawi phei apiang lahin min lo la en reng ziah leh ta nghal a, tu nge a nih ka hre si lo, inhmuh tawhna tal te chu nei ila ka hriat mai ka ring.

Dawr chhûng phiat faia ka chet lâi chuan ka hawi phei leh zeuh a, a hmâ zawnga milem che thei lo ang maia ṭhu reng kha a lo awm tawh azawng lo va, ka mak ti chu khaw'nge a awm hre châk lutuk ang fahran hian ka mit ka len kual zui zat a, mit khap kâr leka a awm lo thut chu mak ka ti ve bawk êm a ni.

"Min zawng em ni?" ka sir lawk aṭanga mipa aw rawn ri chhuak thut chuan min tiphu dâwrh a, ka âwm ka dawm nghal vat bawk.

"I va'n mawl tak!" ka ti deuh tawl a, ka fiamthu loh tehreng nen ani erawh a lo nui suk thung.

"I hawng thar em ni? Ka va'n hmu ngai lo che ve?" pangngai tak hian a rawn ti a, mi en a nghal thawkhat hle tih chu a awm dan leh min en dan aṭang chuan hriatthiam loh theih pawh a ni lo.

"Hawng thar lo ve, he lâi velah hian i tlâ tam lo mai mai a ni ang," ka ti deuh kher a, chutia ka chhàn kher chhan pawh ka dawr neihna lên hi chu a inzawm deuh pât a, heng lâi vela lo kal ṭhang tân chuan hriat loh kan harsa záwk mah ang ka ring.

"Rawn tla tam tawh ila a ṭha ang," a ṭawng dan chuan ka beng a verh zar a, ka melh zawk nghe nghe!

"I hming min hrilh thei ang em?" a rawn ti leh a, kan inmelh chiang hle a, a mitmeng fiah kulh chuan engtin emaw ni ka awm dan a sawi nghing deuh dawt bawk.

"Engati maw?" ka chhán dan chu a hawihhawm lo tih ka hria, ka hming min zawttupa tân pawh chuan mi ngei ru tak chunga kal sawn vang vangna tham a ni.

"Ka hre duh, a hriat theih dâwn na nge?" amah bawk chuan a rawn ti leh a, a la nui deuh suk thei chu mak ka ti ru khawp mai.

"Hawilopâri," tih leh inhera dawr chhûng luh ka rual a, miin ṭha takin ka hming min záwt a, ka hrilh ṭha duh lo vel kher chu keimah ngei paw'n ngeiawm ka inti ve tho, mahse ka ti tawh laklawh tlat!

"Belhchian i chakawm reuh hi le," a rawn tih chuan ka hawi let thuai a, a kal sawn mai tura ka ngaih kha a lo ni lo nasa mai.

"Hawilopâri maw, a ṭha e, Hawilopàr tia ka koh che i duh te pawh a ni mahna," a rawn ti leh kher chu ka lo ner nak a, ka hmuh tirh phat aṭang khan ka ngainat zâwng a ni lo bawk nen a awm dan vel chu ka ei thlawt lo.

"Ṭhianpa, i hman theih em?" tia nula pakhatin a rawn biak tâkah chuan ka dawr hlat zâwngin a kal sawn ta hlauh a, ka thaw te pawh a veng huaiin ka hria.

Nilêngin dawrah hun ka hmang a, min dawrtu neuh neuh an lo lut ve reng a, ka dawr hi cosmetic dawr a ni a, tunlâi khawvelah chuan a tua te mai pawh hian incheina leh taksa enkawl  lamah hmâ kan là uar em em vek a, keini ang dawr nei tân chuan inhralh a nuam ṭhin khawp mai.

Tlai dâr 5 pelhah dawr ka khar fel a, Ruatsanga ta tur perfume ka hawn mai bakah kan mo ta tur hmai hnawih chì pawh ka hawn tel nghe nghe a, naktuk mai khi an awmna lama an let leh hun a lo ni reng tawh a, chuvanga hawnsak pawh chu ka ni!

In ka thlen fel hnu chuan ka inbual fai a, ka thil hawnsak pawh ka pe lawk lo ve ve a, ka pa'n an pûal liau liauin chhûngkaw chaw ei khawm a rawt bawk nen kan chhûng leh khatte an haw rem huna pekah ka ti tlu ta law law mai.

Vêng chhûnga kan chhûngte an rawn tel kim viau a, ka nau chiah Mahlimite nupa pawh an rawn tel ve thei hlauh a, a bikin an pa hi hna lamah a buai ṭhin em em a, hmun danga zin chhuak fô chì hi a ni a, an chhûngkawbil kima an rawn tel thei hrim hrim chu a lawmawm!

Kan thawm a zawi lo hle a, kan ri deuh laih laih a, naupang mai ni lo, puitling chenin kan ri nak nak hlawm a, kan chaw ei khawm chu a nuamin ei pawh kan ei puar hlawm viauin ka hria.

Zanriah ei khamah haw nghal mai lovin dâr 9 dâwn thleng an awm khawtawi hlawm a, an han haw rem chiah chu thawm a reh duak a, a nuam lo lehling hial zàwk!

Chutia keimahni chauh kan han awm tâkah chuan Ruatsanga leh kan mo fel em em tâna ka thil hawn chu ka phawrh a, ka pe zui nghal mai a, ṭul lo ti viau mah se ka pek tawh miau avangin min hnar ngam chiah lo va, an fate pahnih erawh haw kawnga ei tur ka leisak kha ka pe thung.

Boruak a dai ta maw tihah chuan mahni pindan ṭheuhah kalin mut zâi kan rêl zui chu a ni mai a, khum ka mut hnua ka phone ka'n khawih chu number lawng tawp aṭang hian whatsapp message pakhat hi ka dawng a, ka duh ai ka view rang nghe nghe!

"Mahruaii a ni em aw?" tih hi a lo ni a, ka hming a rawn hriat danah min hria ni ngei tur a ni.

"Aw ni e, tu nge aw?" tiin ka chhâng ve mai a, ka hmèlhriat emaw ka ṭhian hlui emaw a nih ka ring nghal tawp bawk.

"I mu tawh em?" ka zawhna pawh chhâng chuang lo hian a rawn ti leh a, "Ka mu chiah," tih téin ka chhâng a, tu nge a nih hriat tumin ka rilru ka sêng a, mahse ka hre thei der lo.

"I mu tawh a, i la meng tihna a ni maw?" min rawn biak dan vel chu tunge ka nih hre chiang tak, mi rawn fiam vel mai mai a ang ka ti ta khawp mai.

"Hawilopâr," tih message chu ka dawng zui zat a, chutiang teh daih a rawn thawn avang chuan ka nui sak nghe nghe a, mahse chawp leh chilhin ka ngaihtuahnaah thil dang a rawn lut nghal thung.

"Awi, engtin nge ka number i neih ringawt theih? Delete nghal rawh, tu nge i nih pawh ka hre lo," tiin ka thawn ta duah a, hmaichhan ni se chu ka fiamthu lohzia a hriat chian viau ka ring.

"Aw ni tak e, vawiin khan ka hming ka lo hrilh theihnghilh che a ni maw, Ṭhazuala ka nia, vawiina mi pakhat, a awm bo hlek chhûnga i lo zawn ruk ruai pa kha ka ni e," a message ka chhiar zo chiah chu ka ngei ngawih ngawih hi a ni ber!

"I zak lo," tih leh kan inbiakna ata chhuah ka rual a, seen vek e ti lo chuan mi a rawn reply tawh bîk lo va, thil dangah rilru pek tum teh mah ila ka rilru kil khat chu a buai zui reng a, a chhan pawh ka hre chiang viau!

Engtin nge ka phone a number a neih theih tih te, engtin nge ka hming a hriat tih te, vawiina kan awm dan chen khan ka ngaihtuah zui nauh nauh a, a hmel tei vet lah chu ka mitthlâah a rawn lang chhen leh ta nghal a, a mitmeng fiah kulh te, a vun rawng, ngo hluak ni si lo, mahse fai vung si te kha mak tak maiin ka mitthlâah a rawn lang zut zut a, mi zaktheilo tak a nih ka ring nghet nghal bur bawk.

Eng emaw chen chu chhun lama ka hun hman dan ka ngaihtuah kir a, ka muhil lawk lo nghe nghe! Ni dang ang bawkin a tukah chuan ka tho hmâ pangngai leh viau a, kan mo nen ei rawng kan bâwl dun a, rei lovah mi dangho pawh an rawn tho sap sap a, naupang pahnih phei chu thingtlâng lam nuam an ti tawh záwk nge ni, an helhhawlh hialin ka hria.

Kei ngei pawh ka bang chuang lo, Ruatsangate chhûngkua an lèt leh tawh dâwn avangin dawr hawn tlai ka tum a, an kal liam fel hnuah chauh dawr hawn ka tum bawk. Tukṭhuan ei lai te chuan naupangho chenin kan ṭawng malh malh hlawm a, a bîkin naupang pahnih chu ka ngài viau ang ka ring.

Chawhmâ dâr 10 vel a rawn inher chhuah chuan Ruatsangate paw'n Aizawl an chhuahsan fel ta a, kei pawh dawr lamah ka ṭhu leh vàng tawh a, min rawn dawrtu neuh neuh an awm leh ṭan tawh avangin rilru ngai reng put a harsa hle bawk.

"Hawilopâr...!" mipa aw ka hriat rual chuan thawm lo chhuahna lam chu ka hawi zawk a, ka hming a ni lo tih hre reng chunga ka hawi hram erawh mawl ka inti hnuhnawh viau a, ka mi hmuh te hlei hlei chuan mood a ti-off chiang kher mai.

"Tukin chu i inhawng tlai em ni?" a rawn ti leh a, chhán pawh ka chhâng lo, thil lei tur an rawn kal hlauh a, ka ngaihsak zui lo ta daih bawk.

Ni lo, ka ngaihsak zui lo chu ka ti thei lo ang. A ruk chuan ka ngaihsak reng a, ka mitmei ru reng a, mahse ngaihsak lo anga lan ka tum tlat thung a ni ber.

Ka dawr chhûnga chair tè reuh tê ah chuan leng lo zet hian a ṭhu run roh a, kal sawn mai a tum lo tih pawh ka hre chiang viau mai. Min rawn dawrtute lei tur  Lotion leh hmai hnawih eng emaw ni ka pack-sak lâi chuan a lam ka hawi zeuh a, min rawn melh ve chiah nghe nghe!

A kuta meizial lek kang pah hian meizial zuk min dil ni àwm fahranin a khabe a rawn kan zeuh a, awlsam tê hian ka lo buk khum nghat a, ka ngaihtuah chiang a, ka buk khum ve ringawt chhan chu ka hre leh chuang der lo.

Customer an chhuah fel hnu chuan meizial a lo zu khu pât pàt a, a sî deuh ham ham a, han biak vak ngaihna ka hre lo va, biak dan tur lah ka hre hek lo; amah záwk a rawn ṭawng chhuak hmâsa te a nih ngawt loh chuan!

"Khawi vêngah nge in awm?" mi en miah lo hian a rawn ti a, pâwn lam hawiin meizial a la zu pah reng bawk.

"Engati nge chutiang zawhnate min zawh?" tiin zawhna vekin ka chhâng a, ani erawh ngaihsam tih hriat tak hian a lo nui mai thung.

"Ka hre duh a ni mai alawm," a rawn tih chuan, "Ka phone number engtin nge i neih? Delete thuai ang che!" ka lo ti zui barh barh a, a rawn chek deuh hlak a, a awm dan vel chu min nuihsawh ni berin ka hria.

"I phone number neih te chu thil harsa a ni hleinem, i dawr chungah i hming nen lam a intâr kuau alawm," a ṭawngkam chu ka ngaina lo lehpek hle a, mahse sawi dik loh pakhat mah a nei lo, nizan khan min ṭhawn êm avangin ka lo ngaihtuah tawi deuh hlek chu a ni.

"I buai lo em ni?" ka ti kher a, ka zawhna chu a làk nàt ka rin vei nen, eng teh ualah a lo ngâi awzawng lo.

"Lêngpuiah mi thlah tur ka nei a, chumi hmâ chu ka hman rih, ka hman lo ṭep tawh," a rawn tih chuan ka inthiam lo deuh a, mahse inthiam lo ang taka lan hnuhnawh vel chu khawilamah a ni mai.

"Mipa lam hi i zuar tel tho em?" a rawn ti leh a, "Tel tho, i duh zâwng a awm em ni?" ka ti pangngai ve mai a, min biak danin a zir teh daih èm a, tum loh deuhin ka chhâng ṭha phian!

"Wax emaw Hair Gel te hi i kawl lo maw?" tiin a ding hluai a, a en kual zui zat bawk.

A duh tak a hmu ni ang, Hair Wax pakhat chu a là nalh a, a man min zawh chuan ka sawi ve mai a, eng vanga min dawr teh thut nge a nih pawh ka hre lo. Dik tak chuan ka mipa ngainat zâwng a ni lo va, a hnimhnaih theiha awm pawh ka duh chiah lo, chuvanga invêng ru ran pawh chu ka ni!

"Khawi vêngah chuan maw in awm a?" a rawn tih leh tâkah chuan phur lo zet hian ka hrilh ve ta nge nge a, a mizia aṭang hi chuan kan inah min rawn kal chilh a tum lo ang tih pawh a sawi theih miah loh, a zia a zawi lo ropui bawk si!

Ka ṭawng zo chiah tihah phone call a dawng a, an inbiak dan aṭang chuan Lengpuia a mi hruai tur hruai a hun tawh tih ka hrethiam nghal mai a, ani pawh Hair Wax man dahin a chhuak zui ta nal nal a, a scooty khalh te reng reng chu ka sawi thiam chiah lo, a ri phar phar ka ti mai, lerh pawh a lerh viau tak ang.

Chawhnu a lo inher chhuak a, chawhmâ ai mahin dawrtu ka nei tlèm emaw tih tur hi a ni a, ka ṭhian kawm ve ber Zorini nen phone call-in kan inbe char char a, nikum mai khan pasal min neihsan ta kha a ni a, tunah chuan vêng dangah a lâwi tawh a, kan kâr hlâ ta deuh mah se kan inṭhian ṭhatna erawh a sawhsawn lo hrim hrim thung.

Dawr khar tuma ka thawh rual chuan beisei loh deuhin kha pa, Ṭhazuala kha a rawn lang leh hlawl a, nizan khan a hming min hrilh miau a, theihnghilh ngawt theih ni bîk hek lo.

Ka rilru hre miah lovin a rawn lut a, dawr khar ka tum hnai tih chu hrilh mai ka tum uk hman a, mahse amah záwk a rawn ṭawng hmâsak avangin ka ngâwi leh ta rih a ni.

"Zanin eng nge i tih ang?" a rawn tih chuan, "Inah ka awm ang," ka lo ti sam than a, "A nih chuan ka rawn lêng dâwn," a rawn ti ta heu mai.

"Ngawt a che! Kan in awmna pawh i hre lo," ka ti zo chiah chu, "Hriat a harsa hleinem, in vêng ber ka hre tawh alawm," a rawn ti zat zat a, a la nui ang ruh ruh leh ta nghal a!

"A ṭul lo, lo kal suh," ka ti deuh tawl a, chutiang taka chiang chuan mipa dang hnenah hmaichhana ka ngainat lohzia lantir ka la neih àwm pawh ka hre lo.

"I ngaihdan mai mai a nih chu! Keiin ṭul ka ti alawm, ina i awm dâwn tak tak chuan lo kal ka tum a nia," a rawn ti leh zung zung a, ka lo ner nak thung.

"Ka awm dâwn leh lo, ka lêng dâwn," ka ṭawngkam naupangchhia zet avang chuan a lo nui huk a, ka tum loh dan deuh deuhin min awmtîr ni berin ka hria.

"Khawi maw, dawr ka khar dâwn, nang pawh haw tawh rawh!" ka ti leh hmak hmak a, ka biak dan vel chu hriat a nuam lo ve thlawt alawm, mahse ani erawhin engah mah zu han ngâi eih lova maw le!

"Kharpui che ka tum vang alawm ka lo kal," a lo ti than a, chhàn ka ngaihna pawh ka hre lo, ka melh râm ringawt!

"I ṭawngthei zèk a nih dâwn hi!" ka tih chuan a nuih a lo za daih leh ang lawi a, a awm dan hi ka rilrem zâwng a ni thlawt lo!

'A ngâi lo, ka ti thei,' ka ti chung paw'n dawr chu min kharpui ta tho va, kha fek feka ka ṭawngkhumnate chu a beng lehlamah a chhuahtîr zel a, a tawpah phei chuan za fahran lovin ka nui tawp ringawt!

Min thlah a tum leh ta zel a, mahse chu erawh ka duh lo hulhual thung. Nimin lawk aṭanga ka hriat a ni a, min zuam lutuk dâwnin ka hre bawk. Tin, a mizia aṭang reng reng hian rin chì leh chì loh pawh a hriat theih loh, hriatthiam pawh a har rèng a, inhnimhnaihtîr buai lo law law ila a fuh ka ring záwk bawk.

Amaherawhchu, ka beisei loh lutukin thil a thleng leh ta tho! Zanriah ei kham aṭanga rei pawh ni lovah a rawn kal tak tak a, engtin nge kan in awmna a hriat pawh ka hre lo, mi dang a zawt kual a ni hrim hrim, chutiang lo chuan hriat ngawt ngaihna a awm lo.

Chutah ka nu leh pa lah chu eng an hria nge ni, pangngai tak hian an lo be lûam leh ta nghal a, amah Ṭhazuala ber lah a ṭawng duh si, enghelh nei hmêl rèng a pu eih lo va, a mizia en phei chuan kum lamah pawh la naupang tak, tlangval nuam ti chho ṭan mêk áwm vel hi a ni a, mahse chutiang erawh a ni hauh lo thung.

A mitmeng aṭangte, a hnap thlenga hmuihmul a neih dan aṭangte leh thil dang, a pianphung hrim hrim aṭang chuan a naupang tawh bîk vak loh tih a hriat hle a, thawvengin ṭawng duh viau mah se amahah puitlin ruk riauna a awm ka ti mai, a pa lian em em hran lo va, pa tè pawh a ni chuang lo, a lan dan hrim hrim chu a puitling ru tlat ti ila a sual lo viau ang ka ring.

Ka nu leh pa lah chuan ka ṭhianpa tak tak emaw tiin khawi lam mi nge a nih te min la zawt leh ta nghal a, ka tân chuan chhàn ngaihna a vâng khawp mai. Amah Ṭhazualan min rawn chhàn khalh vat záwk a, ni lo se chu ka hre lo ka ti bawl duh ngei ang, chutiang baka chhàn ngaihna awm hek lo.

Tin, mak ka tih deuh pakhat chu, nimin lawk aṭanga inhre ṭan chauh si kha a tlangnêl nghal em em a, mâwihnai taka han hnar deuh paw'n a hrethiam duh der lo lehnghal! Ka lakah ngat phei chuan hmân aṭanga lo inhre tawh ṭhin ang mai hian a awm roh a, heti zung zunga a awm duh hi ka ring miah lo bawk.

Hmun danga kalna tur a neih avangin haw a sawi ri thuai a, keimah ni lovin ka nute záwkin an chelh khawmâwi a, kei chu ka lo ngâwi reng ringawt, chelh khawtawi chu khawilamah a ni mai! Pâwnah ka zui chhuak a, scooty a rawn ken ka rin tehreng nen bike a rawn keng daih a, chhun lama a hnathawh ṭhin ngaihtuah chuan rilru a buai ta nak mai.

A ṭhiante bike a hawh ti dâwn ila ka awih chiah si lo, a ma bike han ti ngawt dâwn ila ka ring leh chuang bawk si lo, a awm dan hrim hrim hian ka hmuh tirh phat aṭang khan min la tibuai chawl lo chu a ni ber e.

"Ka hman châng chângin ka rawn lêng ṭhin ang, a rem chuan," a rawn ti hniam deuh sup a, a thusawi chuan ka rilru a kap leh ta kher mai.

'Engvanga a hman châng chânga lo lèn tum nge a nih?' tih ngawt chu ka ngaihtuah zui rauh rauh a, chutah ka rin loh lutukin nâ ni chuang miah si lo hian ka chal a rawn nawr deuh sawk a, a lam ka hawi hâ nghal nghe nghe!

"Eng nge i lo ngaihtuah a?" a rawn ti zui zat a, thil dang daih ka ngaihtuah lâi khan min lo bia ni ngei tur a ni; ṭawng thawmte chu ka hriat ngei kha màw!

"Engmah," tih bakin ka chhâng ṭha duh der lo va, kan awm dan vel chu inhmelhriat ṭha lutuk kan ang tak zet!

"A nih ka'n kal ang e, lo inenkawl ṭha la, ka rawn ṭhawng thut thut dâwn che a nia," a rawn tih leh chuan za lo zet hian ka nui hak a, a hmêl chu en loh theih pawh a ni lo.

"Kum eng zah nge i nih?" ka ti teh daih chu mak a ti ni ngei tur a ni.

"Maw?" a rawn ti hû a, chutah amah bawk chuan, "Thla hmâsa lawk khan kum 36 ka tling chiah, engati nge ka kum zat te min zawh? Min ngaihven ve ta deuh em ni?" a rawn ti leh duah kher a, insum thei bîk hek lo.

"I kum milin i nung lo ve hle a nih dâwn hi!" ka ti lèt ve kher a, ani erawhin huatah a lo là leh chuang miah lo, a nui suk duh lek chauh!

"Ka'n kal phawt ang e, naktukah inhmuh kan tum dâwn a nia," tih leh a bike-a chùan a rual a, mi rawn nuih leh sukin a tlan chhuak ta nal nal bawk.

Chumi zan, a rawn lèn hmâsak ber zan aṭang chuan eng thil thil emaw ni a thleng chho zui neuh neuh a, ka hrethiam tawh neih nuaih bîk lo. Kan ina a rawn kal ai mahin dawra a lo kal a tam záwk a, amah paw'n nuam a ti záwkin ka hria.

Tin, thil mak deuh pakhat chu, chimawm em em si hian hnawksak han tih tur ang chi hi a ni leh chuang miah lo va, hei tak hi a miziaah chuan mak ka ti ber.

Zep thu a cheng lo, inhmu fô ta nà nâ ná chu kei pawh a tir ang reng khan rilru ka pu thei bîk lo va, mi a rawn tlawhpawh fô tâkah chuan a mizia hian fiamthu lam a pâwl tih te thlengin ka hre chho ve zel a, ṭhian satliah angin ka en ta vel mai mai bawk.

Chhun lam ang lo takin zan lamah hian a buai hmêl thei viau a, eng nge a tih ṭhin erawh ka hriat loh bakah ka zawt ngai chuang hlei lo va, mahse thil tih a nei ngei a ni tih hi chu ka hrethiam ve vek tho.

Chutih rual chuan zantin a hnen aṭangin message ka dawng ṭhin ti ila a sual ka ring lo, chhun lamah hi chuan a takin, hmaichhanah kan inhmu a, min rawn kal chilh ṭhin a ni ber a, zan lamah erawh a rawn kal tam lutuk loh avangin message-in min rawn be mai zel a, kei ngei paw'n tunah chuan a phone number ka save ve tawh nghe nghe!

A nihna takah chuan ka save-na pawh a la rei lo, kâr hmâsa lawk khan ka save ve chauh a, kan inhmuh ngun leh min rawn biak ngun ngaihtuah chuan save daih tawh tur záwk ka ni te pawh ka inti ve tho, hmeichhe dang chu ni se an save-na a rei tawh ka ring.

Zan khat chu mak tak maiin a reh hian a reh tlawk tlawk a, eng message mah min rawn thawn lo va, a message lo thlen hun ka ngaichang ru ran a, chutah chiah chuan ka hriat loh kârin amahah ka rilru ka lo pe fel der tawh a ni tih ka inhre chhuak nghal zawk bawk.

Chu thil chuan ka rilru a luah ta reng a, ka ngaihtuah zui zel a, khang thla liam ta chhûng zawnga min rawn hmuh fôna khan keimahah, ka rilruah zawi zawiin hmun a lo khuar chu ni rengin, chu pawh zan khat a message ka dawn loh vang chauh lehnghalin, ka awm dan chu keimah ngei pawh hian ka awih lo.

Amaherawhchu, thil thleng mêk, thil dik tak a ni miau bawk si! Tin, ka laka a awm dan hrim hrim hi hmeichhe tân chuan hai rual a ni lo va, ṭawngkâin engmah sawi lo mah se kei nula phanchang ṭan tawh hian ka hrethiam ve lutuk tlat, keimah záwk hi ka inhawng lo mai chauh a ni.

Chu bakah a mizia hi a tir tè aṭang khan hriatthiam a har thlawt, mipa dangte chu ni se hawihhawm tak leh smart tak, puitling takin min rawn biak ngei ka ring, mahse Ṭhazuala ve thung erawh hi chu chuti lo lam daih, huat dâwna huat tak tak theih si loh, khamawm si lova chimawm dan riau hi a thiam tlat a, hei tak hian ka rilruah a châmtîr ni ta berin ka hria.

Ni khat chu keimah záwkin message ka va thawn hmâsa ve a, ṭhian rilru pua thawn ka ni ber a, keimahah hi chuan a la thuk lutuk hran lo va, ka laka a rilru puthmang leh a laka ka rilru puthmang pawh a inang lo viau ang ka ring.

"Vawiin i service na nge?" tih ka va thawn a, ngaihsak pawh ka ngaihsak zui chuang lo.

Amaherawhchu, dawr ka khar dâwn thlenga ka message a la view miah lo chu mak ka ti dâwn nge, engtin emaw ni hian ka awm zawk a, a en hman lo ni turah ka ngâi ngawt tak ná chu keimaha thil danglam rawn awm chuan ka rilru a kap ta ber záwk a ni.

A tukah pawh ka message chu a la view lo zel a, han delete leh ngawt dâwn ila engkim a nih tur ang a ni vek tawh bawk si. A view emaw view lo emaw, engah mah ngaih loh ka tum a, mahse ka thei ta miah lo, ka lungâwi lo ru deuh tlat a nih chu maw le!

A mak zàwk!

Chuta kârah ngaihtuah zui loh ka tum pôh leh ka mitthlâah a rawn lang zel emaw tih tur khawpin a châm reng leh ta nghal a, zep lo chuan hmelchhia a ni lo va, hmelṭha hluak leh hmelṭha vul chúk pawh a ni chuang lo.

Ka thil ngaihtuah leh ka thil mitthlà avang chuan keimah leh keimah zawhna ka inzawt mawlh mawlh a, thil chiang tak pakhat, ka hriat chhuah ták chu, ṭhian mai mai anga kan en emaw kan tih te hi ṭhian piah lamin kan lo en reng thei tih hi a ni.

Zan khat chu phone call ka dawng a, a hnen aṭangin a ni nghe nghe a, ka hmuh lohna chin pawh kâr khat dâwn a ni tawh ang. Tin, ka message pawh kha ka thawn aṭanga a ni hnihna velah a view chauh a, mahse tun thlengin eng chhànna mah ka la dawng lo thung.

"Hello," ka ti hniam sap a, "I mu tawh em?" a rawn ti a, "Immm....mu tawh e," ka ti ve mai a, "A nih chuan naktukah a ni mai," tih leh kan inbiakna chu hmeh tawp a rual zui daih a, ka thin a tirim ru kher mai.

Ka message a view ka lo thlehlel ru ve em em te, mi a rawn chhàn ka lo nghakhlel ru em em te kha mawl intihnain ka khat thar a, dik tak chuan kha leh chen kha ngaihzawng lam rèng ngaihsak lovin ka lo awm tawh a, duh zâwng emaw pawh ka tawng ngai lo, mahse tunah amah a rawn lang a, ka rilru ka pe ṭan dek dek tihah a awm dan a danglam thut a, ka tih loh tawp tur ti ni te'n ka inhre hnuhnawh hial a ni.

A tukah chuan dawr nghakin chhun nì ka hmang ral a, nilêngin Ṭhazuala hmêl ka hmu lo tluan leh parh a, a rukin ka ngei bawk si, tih ngaihna vak a awm bawk si lo, a duh duhin tal vel mai mai teh se te ka ti thul, mahse ka rilru chhûngril erawh engtin emaw ni tak hian a la kap ru tlat tho.

Khua a thim a, zanriah ei kham aṭanga rei lutuk lovah a rawn lêng a, zep lo chuan ka beisei ru deuh reng a, mahse beisei anga awm pawh ka duh ṭhak lo thung. Lungàwi lohna tur awm miah lova ka lungàwi lo ru tlat chu ka thiam loh ni ta záwk te'n ka hria a, chutih rual erawh chuan engtia awm tur nge ka hre chuang der lo.

A rawn lêng ve tak nà chu kei ni lovin ka nu leh pate nen hun an hmang tam záwk a, ka nu phei chuan, "Tunlâi chu i va vâng ve?" a ti nghe nghe a, Ṭhazuala chhàn dan tur chu ka ngâichang ru reng a, a pa dam lohna avanga phâi an zin thut thu leh an buai deuh hlek thu a sawi chiah chu mak tihnain ka khat a ni ber.

A thusawi ka hriat tirha ka mak tihna kha zawi zawiin a reh a, inthiam lohna leh ngaihvennain ka khat ta záwk a, zawh châk pawh ka ngah a, mahse kan awmna hmun chu a rem teh ual si lo. Amaherawhchu, ka rilruah, "Zin pawh ni se message te chu chhàn ve tal àwm," ka ti rilru hnuhnawh leh nauh nauh a, ngaihtuah pawh ka ngaihtuah zui ta chiam lo law law mai.

Dâr 10 rik dâwn hnaihah haw zâi rêlin a ding uaih a, vawiin lama ka inhralh ṭhat leh ṭhat loh min záwt tih loh chu biak pangngaiin kan inbe meuh lo a tih theih a, a rawn lèn chhûng rei lo hran lo mah se pangngai taka kan inbiak theih hun chu a haw tur pâwn thleng ka thlah lâi a ni mai.

"I pa chu a serious viau em ni?" tia ka zawh chuan, "Serious ve ang reng, mahse tunah chuan a ṭha ve leh tawh khawp e," a lo ti sup a, chutah amah bawk chuan nui suk chung hian, "Ka rawn inlan loh chhûng khan min lo ngaihtuah zui chiang mai," a rawn tih zawm leh zat a, kan inmelh nghal chat bawk.

"A teuh lo, chutiangin ka awm lo, mak erawh ka ti deuh," ka tih chuan a lo nui sun sun a, mi rawn din hnaih hretin ka dar tawn tawnah a chelh a, "Eng nge?" ka ti hman ṭawk ang tihah ka hmui a rawn hup a, chutah chet zawm zui nghalin ka nghawngah a rawn fawp zeuh a, ka tal chhuak deuh phat nghe nghe!

"Eng nge i hriat a?" ka ti zo chiah chu, "Thil tam tak," a rawn ti sam than a, "Chutiang zawngin ka zawt lo che, engati nge khatiang thil kha i tih ringawt!?" ka ti deuh hlak hlak a, ṭawng erawh ka ṭawng rin hran lo.

"Mipain hmeichhe nghawng a fawp a nih chuan a duh tihna, i hrethiam miah na nge?" a rawn ti ta heu mai, amah lah chu a la nui sun sun ang leh ta nghal a, a thil tih zawh chiah chu eng teh vakah a ngâi eih loh niin a lang.

"Chutiang thil ho lutuk ka awih ring suh, haw tawh rawh," ka ti tan tan a, ka thusawi chu engah mah a ngâi lo ni berin ka hria.

"A ni alawm le, i nghawng ka fawh nawn leh kher i duh em ni?" a rawn tih chuan chhàn ngaihna pawh ka hre lo.

"I hmêl hmuh hi nuam ka ti a, hmuh reng ka duh bawk," a rawn ti leh a, ka awm dan vel chu ka hrethiam te neih nuaih lo, tleirawl zakzum zet ang hrimin ka chhûngril chu a awm chem chem a, inthunun erawh ka tum viau thung.

"Hetia i lài hmèl hmuh hi a nuam zual a nih hi!" a rawn ti leh chiah phei chu ka buai vekin ka hria.

"Thu ho mai mai sawi nân hun khawhral suh, haw rawh, kei pawh ka lut dâwn," tih leh kal sawn thuai thuai ka rual a, a bula ka awm reng a nih chuan keimah ngei paw'na ka hriat loh ka rilru chhûngrila awm a phawrh chhuak vek thei mai ang tih ka hlau a ni.

Khumah ka mu meng kar a, ka awm dan chu a mak han ti vak dâwn ila mak tih tur èm chu a ni bawk si lo, kan tleirawl chhuah lâia star kan neih ṭhin hun lâi vel ang chiah chiah khan ka awm thar leh ni berin ka hria, ka upat tawh tehreng nen!

Mut hun tawh mah se Zorini hnenah message ka va thawn chíam ta ringawt a, keimah ngawt chuan ka pai thei lo a tin a ni! Zorini pawh a lo la mu lo hlauh a, whatsapp message-in kan inbe ta char char a, Ṭhazuala chungchâng lo sawi tur hre lo ang hrim hian kan inbiakna chu Ṭhazuala lam vek a ni a, kha leh chen ngaihzawng nei lova ka lo awmna khan ka duh zâwng tak mipa ka tawng leh thut chu min tiawm mai mai thiam lo a ni hawt e.

Ni e, ka pha buai lo, ka haw miah lo, hne ang deuh te, ning ang deuh te'n awm ṭhin mah ila, keimahah hian a châm tlat a, a mizia harh thet thet te, a ṭawng suam suam ṭhin te, engkim a ni mai, ngaihtuah zui veng veng theih tur khawpin ka rilruah a tla nâ a, kei hian ka duh ru reng tih phat rûal a ni mawlh lo.

A tuka ka dawr kal te chu engtin emaw ni tak hian hmuh hlan ka nghakhlel ru em em a, mahse ka awm dan erawh tih lan ka tum lo hrim hrim thung. Ka beisei ang ngeiin dawrah a rawn kal leh ta ngei a, a pa chanchin ka záwt zuai zuai a, nizana thil thleng kha hria ang paw'n ka awm duh eih lo, ka hre lo der hmak!

A ni telin kan inbiak dan, kan inen dan leh kan inhmuh dan chenin a dang zel chho zel a, zak cheih cheih rual ka nih tawh loh avangin ka awm dan a lo man thiam rang hle a, ka haw lo tih chu a hre ta vat a, ani lahin min rawn birh ta tluk tluk bawk si nen ṭawngka ngeiin duh thu kan inhrilh tawn ta nge nge bawk.

Ka duh ve tho thu ka hrilh tirh phei chuan ka lài ru viau a, ṭawng pawh ka ṭawng ring lo, mahse amah záwkin ka awm dan a hrethiam a ni chek ang, fiamthu eng emaw a thawh daih a, ka làih chhûng a rei lo phah a, kan hlim zui viau nghe nghe!

Tin, thil mak ve leh deuh pakhat chu a bulah chuan ka thawveng hliah hliah a, ka zàngkhai vah a, ka ngaihzawng lo neih ve tawh te nen chuan inang lo tak a ni. A fiamthu duhna tak te hi amah ti amahtuah ka ngai zo tawh a, phone kaltlang ringawt paw'n min tihlim ver ver thei ṭhin.

Chu bakah ani ang em ema mi zar buai hnehtu leh ka rilru zawng zawng là péngtu mipa hi ka la tawng ngai lo va, a hnathawhte chen hian ka ngaina a, khawi ilo vela kal ka ngaih châng paw'n amah lo ka hmang ngai lo va, ka chhûngte bulah pawh two wheeler taxi a khalh tih hi chu a zep buai lo hrim hrim a, a zak miah lo bawk.

Thla a vei a, hriat loh kârin hun a liam zung zung a, kan inkâr pawh a pangngai viau a, engtik lâi paw'n ka ngaihtuah reng bîk lo nà chu ni khatah vawi thum emaw vawi lî emaw tal ka ngaihtuah hman ngei ngei ṭhin.

Kan inngaihzawn aṭangin thla tam a la ral lo va, ka chhûngte paw'n kan chanchin an hre thuai a, min zawh tirh paw'n ka zep miah lo va, chu chu amah Ṭhazuala duh dan tak pawh a ni.

Ni khat chu dawrah a rawn kal a, chumi ní chuan zana a rawn lèn tam hman lutuk dâwn loh thu leh chhunah pawh a service tawh rih dâwn loh thu min hrilh teh hlawl a, ka hriat tirh phei chuan mak ti he hu tak ka ni!

"Engati nge?" tiin ka zawt thuai ta rèng a, ani lah chuan, "Nakinah ka hrilh ang che," tih bakin min chhâng ṭha duh miah lo lehnghal!

Chu thu min hrilh nî aṭang chuan a hmâ ang em emin a rawn kal ngun ta lo tak tak a, mahse phone call leh whatsapp message-in kan inbe zui reng tho va, keimahah pawh ngaihṭhat lohna a awm em em hran lo.

Nî a liam zel a, chhun lamah hi chuan kan inbe ta lo tawp a tih theih a, zan lamah erawh a rawn lêng zeuh zeuh thung a, message leh phone call-in kan inbe tam ta ber! A hun neih dan a danglam hlawk tâk avang chuan zawhna neuh neuh ka nei a, ka zàwt ṭhin reng a, mahse min hrilh ṭha duh ngai miah lo thung.

Chumi avang chuan ka rilruah lungàwi lohna a rawn piang ta nge nge a, thla 3 leh a chanve vel àwrh chauh kan la inzui a, buaina kan nei titih nghal ringawt chu a ṭha lo tih hai rual a ni lo va, thil nihna dik tak min hrilh ni mai se chuan eng buaina mah kan neih ka ring lo.

Monday a ni a, dawrah ka awm leh tlawng a, chawhmâ dâr 11 vel a nih ka ring, tum loh deuhin Ṭhazuala ka hmu hlawl a, mahse ka hmuh dan erawh a dang khawp mai.

Bolero dum hi a khalh a, a bulah chuan pa pakhat a chûang a, a hnungah hmeichhe pahnih an chûang bawk a, amah paw'n min rawn hmu a, min rawn buk khum zeuh zeuh nghe nghe a, a lú a met tih hriat zetin a bek vel chu a felfai han bawk.

An tlan liam thlengin ka ngaihtuah zui a, driver hna a thawk daih emaw ni le tihna hlirin ka khat a, chu ringawt chu nilêngin ka ngaihtuah a, two wheeler taxi khalh a chawlhsan daih danah private driver hna a thawh duh tak tak hmèl bawk si, ka rilru a tibuai khawp mai.

Chumi zan vek chuan ka zàwt leh ta nge nge a, min hrilh ṭhat duh loh chuan biak zui tawh loh ka tum thu ka sawi nghe nghe a, dik tak chuan biak zui loh tak tak ka tum pawh a ni lo, inngaizawng ve lem sia thil zep a nei tlat chu ka thil duh loh zâwng tak a ni.

"Vawiina ka thil hmuh kha eng nge a awmzia?" tia ka záwt ṭan dek dek chu, "Inhmu ang, ka lo kal," tih leh kan inbiakna tih tawp a rual nghal daih a, ka lung a âwi lo hman ṭep a, mahse hmaichhana sawi dun chu a ṭha záwkin ka hria.

Thlen pawh a rawn thleng har lo va, chhuanlam siamin pâwnah ka chhuak a, a bike bulah a lo ding reng tawh a, a bike-a chûang tura min tih chuan ka chûang ve nghal mai a, khaw'nge min kalpui dâwn pawh ka hrethiam lo hrim hrim!

Kan tlan zel a, min fiam leh zeuh ṭhin tih loh chu kan inbe tam lo khawp a, minute 15 vel kan tlan hnu chuan kawng pêngah kan tlan kual lut a, rei pawh tlan zui tawh lovin in pakhat, changkang ve tak hmâah hian kan ding a, kan kalna hmun chu ka hrethiam lo tulh tulh bawk.

"Lut ang," tih leh ka kuta rawn chelh a rual a, ka lo tal chhuak vat a, mak a tih hmèl viau nghe nghe!

"Eng nge kan tih dâwn? Kan kalna hmun hi khawi lâi nge?" ka ti zo chiah chu ka kutah bawk a rawn chelh leh a, "Engmah ngaihṭhat lohna tur a awm lo," ti supin min kai kal titih nghal a, uiin a pû kaihna apianga a zui mawl tawp ang mai hian ka kal ve ta chhet chhet ringawt bawk.

"Zuala chu, i chhuak emaw tia?" in chhûng kan luh rualin nu pakhat hian a rawn ti a, kan hun tawn mêk chu hrethiam chiah si lo, hrethiam deuh ruai ruai tho si ang chi hian ka awm a, inrintàwkna ka nei lo a ni ber.

"Nia, ka va chhuak zuaih maw le, khaw'nge mi dang hi?" Ṭhazuala chuan a ti zui ve nghal mai a, "I ute chu an room-ah an awm ang, i nauin lehkha a zir a, i pa erawh a chhuak lawk, kha kha em ni i ṭhianu chu?" kan hmâa ding nu pakhat chuan a rawn ti ta mai, Ṭhazuala nu ngei a ni tih a hriat ta viau bawk.

"Immm....a nih hi, Mahruaii a nia, Hawilopâr tih paw'n a koh theih," Ṭhazuala ṭawng vel dan ber kher chuan min tizak chem chem thei!

"Khawi, lo inchibai ila," tiin a nu chuan polite zet hian min rawn be zui zat a, ka nui ve tak nà chu ka nui lui vel mai mai tih a hriat viau ka ring.

"Eng nge thil awmzia hi?" tiin Ṭhazuala chu ka zawt sep a, kan bula mi dang an awm lo chu remchângah ka là nghal a ni ber.

"Hei hi kan in a nih hî! Chuan saw saw ka nu, mi dang pawh ka hmèlhriattîr ang che," a rawn tih chuan a bânah ka hmer vak a, ani erawh a lo nui duh lek chauh!

A nuho chuan sitting room-ah kan ṭhu a, eng eng emaw ni min záwt a, ka hming hre si lova ka chanchin an lo hriat fô ṭhin thutte a sawi a,  rei kan ṭhut tak tak hmâin Ṭhazuala chuan in chung lamah min chhohpui a, a room-a min kalpui tum si kha a ute chhûngkua ka ti mai, room pakhat-a lo awm niah niah te hnenah inhmelhriattîrna min neihsak hmása leh té té phawt a, chumi hnu chuan a room-ah kan lut ve thei ta chauh bawk.

A room chhûng chu han hawi kual vel paw'n a felfai thlap a, lehkhabu pawh a ngah ngàng mai, a chhiar vek hman dâwn emaw ni le tih tur a ni. Tin, bângah chuan a thlalak a lo intâr kual duah a, a naupan lâi chenin, a cute reuh hlawm tawp, thlalak en chungin ka nui leh sak ṭhin nghe nghe!

"Tunah hian MPSC hnuaia Competitive exam awm ka bei ve mêk e ka tia, naktukah Main kan exam leh ang a, chumi hnu lamah chuan hun pawh ka nei leh deuh tawh turah ngâi ang," a rawn tih chuan, "Enga!?" ka lo ti hâ a, a thusawi chuan min ṭhawng tak zet!

"Eng nge awmzia? Two wheeler taxi i khalh a ni lo'm ni?" ka ti leh a, ka hmêlah zawng zawng nen ka rilru a buai ru hle tih chu a hriatthiam vek ka ring.

"Khalh tho e, mahse kha chu ka pa vang a ni ber. Ka û, nichin lawka i hmuh tâk kha BDO a nia, Aizawlah an rawn zin lawk a nih kha! Ka û vangte pawh hi a ni mahna, ka pa hian Civil Service lamah kal turin min ti ve tlat a, ka peih lo ṭhin a, luhlul chhuahin kum eng emaw zah ka khawhral a, two wheeler taxi te chenin ka khalh kual ta lawp lawp a, ka awm mai mai a phal bawk si lo, hna ka thawk kûal ka thawk kùal a, tlai khawhnuah Civil service lam ka tui leh hnuhnawh lawi a, mahse ka hun tawn tawh te kha ka ngaihtuah lèt châng paw'n lungàwi lohna ka nei hran lo, ka pa khan ka tâna ṭha tur a duh vang tih ka hrethiam a, ka puitling phah sawt bawk," a rawn ti dap dap a, a thusawi chu dàwt a ni lo tih a hriat viau bawk.

"I puitling pawh ka ti lo e a! Kan inhriat tirh aṭang tawh kei ai kumah upa mah tlangval ṭan tir ang mai hian i la awmin ka hria," ka ti chu a nui chhuak hawk a, "Khang ka thusawi zawng zawng zîngah khan ka puitlin leh puitlin loh chiah maw i lo ngaihtuah a," a ti zui zat a, ka nui sak ringawt!

"Ka puitlin leh tlin loh a takin i hre duh záwk em ni?" ti lehin a khumah chuan min bawh tlu a, thawh ka tum chu min la chelh bet tlat zui!

"Ka puitling teh asin, puitling tih chì tam tak pawh ka thiam," nui sun sun chung hian a rawn ti leh kher a, kei erawh ka lo ner nasa mai.

"A thu hrimah, engati nge a tir tê aṭang khan min hrilh tlang ve mai loh? Zep lovah chuan, ka lungàwi lo hman alawm, mi hrilh ṭhat ve mai tur che a nia," ka ti ta zat zat a, nui sukin min fawp vang vang a, kei paw'n ka lo dawngsawng ṭha khawp mai.

"Ka hlawhtlin hunah chauh hrilh che ka tum a, mahse i lungawi lo tih ka hriat khan hriattir mai che a ṭhain ka hre ta a ni. Hna pangngai, chhûngkaw chawmna tur ka neih veleh ka nei nghal ang che," a rawn ti leh ta hmiah a, dik tak chuan a rilrua àwm awm sawi hi a ang ṭhin.

"Ringawt a che! Kan inṭhen maithei asin, hmâ hun pakhatmah a hriat loh, chu bakah kan inngaihzawnna pawh a la rei lo," ka ti dek dek chu, "Kan la inngaizawng dâwn chauh alawm, i mitmengahte hian ṭha min tihzia ka hmu tlang vek thei," min lo ti khalh zung zung a, "I ngaihtuahna vak vel mai mai a nih chu!" ka ti ve leh deuh hmak a, "A teuh lo, ka hming ka put zawhzia hi i la hre dâwn chauh, ka zunah hian i uai hnehsawh dâwn lutuk," a rawn ti leh zat zat tâkah chuan chhàn lèt dan tur ka haihchham chu a ni der!

Kan boruak chu inhnial deuh bap bap si hian a hlimawm phian lawi a, dik tak chuan ka hmu ṭha tawlh tawlh chiang alawm, hmêlṭha melh pawha ka melh ngai loh kha han inngaihzawn tak tak tâkah chuan a dan a dang em em a, ka hmu ṭha vel vek tawh a ni ber.

Tin, a mizia hian a châwi hrim hrim a, a nungchang leh a hmêl hi chu thil pakhat, pawh hran theih loh ang mai hian ka hre tawh! A harh a, a thawveng a, a nui duh em em bawk a, a nun hi a thutak ren run lo va, chu chuan a bula awm a tizàngkhai vàh ṭhin.

Rei tak min awmpui lo va, kan ina ka haw hnu thlengin ka ngaihtuah zui rauh rauh a, engtin nge thawveng em em chungin Civil Service exam-ah Prelims a paltlang theih leh tih ngawt ka ngaihtuah ta vel a, kan ṭhenawmah hian Competitive exam bei ve mêk a awm a, MPSC hnuaia exam reng reng inziah tlin a awlài lohzia a sawi fô ṭhin a, mahse Ṭhazuala, ani ang mi thawveng leh harhvang lutuk, lehkha a zir tih pawh ka hriat lohin prelims a paltlang thei chu ka tân zawng mak tih loh rual a ni lo.

Naktukah main an exam leh ang a, chumi zawh lamah chuan a rawn kal tam theih tawh tur thute pawh min hrilh tak kha màw! Ka thil ngaihtuah avang chuan ka nui leh ringawt ṭhin a, mi â te pawh ka ang lek lekin ka hria.

A tukah chuan phone call-in kan inbia a, ṭha taka chhâng tur te'n duhsakna ka hlan a, exam tur e ti lo chuan engah mah ngâi lo a ang mah záwk! An zawh fel vela dawr lo kal a tum thu ringawt a sawi a, a nui ri leh hak hak ṭhin a, a nui ri hriat ringawt pawh hi ka tân chuan hriat khamawm loh a tling vek tawh ti ila a sual lo viau ang.

A sawi làwk ang ngeiin an exam zo chu dawrah a lo kal a, min fiam nui deuh chhen a, customer awm lai leh lai lo pawh a sawi lo, a awm dan hrim hrim chu a zak lo tih dâwn chuan a dik chiah bawk si lo, a zak lo thiam ni berin ka hria.

Chumi zan vek chuan a rawn lêng nghal bawk a, a nihna dik tak, a thil tih dik tak nen lam ka hriat ve vek tawh avangin engtin emaw ni taka ngaihsan ruk riauna hi ka nei a, a pa thu a awihna te, anni ang chhûngkaw hausa ni chung pawha hnathawh hreh a nei miah lo te chu amah ka duhna tizualtu a ni a, ka chhûngte bulah erawh engmah ka sawi lo thung, hrilh kher ṭul rih pawhin ka hre lo.

Nitin zantin min rawn rim leh ta tluk tluk a, a sawi ang tak tak khan a ṭhatna ka hmu zual zel a, belhchian dawl tak a ni a, amah avang liau liauin kei ngei pawh KṬP-ah te ka inkhawm chho ve leh ṭan a, inkhawm turin min tilui ngar ngar ṭhin lo se chu ka inkhawm peih ngai miah lo ang.

A thawveng ka tih tawh kha, mahse a nun erawh a ngil em em lawi a, mi pawi han sawi te hi a nei mang lo a tih theih a, thutak hun te chu nei ve tho mah se a thutak dan erawh mipa dangte thutak dan nen chuan inang lo tak a ni.

Kan inkâr pawh a phusui chho zel a, kan rilru puthmang thlengin a danglam tial tial a, chutah beisei loh lâi takin an exam result a rawn chhuak hlawl a, interview hmachhawn tur zingah a tel ve tih ka'n hmu chiah phei chu lawm vawng vawng tak ka ni!

Pathianin a tân hun a ruat ve hrim hrim nge pawh ka hre lo, rei kan nghah hmâin MPS-a a inziah tlin thu kan hre leh ta thuai a, ka thinlung leh tih tak zetin ka lawmpui a, amah pawh a lawm ve viau chuan ka hria.

Tin, engkim mai chu a nih tur ang a lo ni fel vek tawh hi a lo ni a, a bîkin kan inkâr, engtik lâi aṭang khan nge ka hre lo, mahse ka hriat em em chu kum khat pawh a ral hmâ hauhin ka thinlungah hmangaihnain bu a rawn khuar a, mipa hmangaih tak ka nei fel der tawh tih hi a ni.

Chu ka mipa hmangaih chuan a ṭha lam zawngin ka nunah nghawng a nei a, ka mize ṭha lo zawng zawng min thlaksak a, inkhawm kawngah pawh Pathianin ka tân hmanruaah a rawn hmang ni ta berin ka hria.

A hna a zawm tak tak hmâin kâr eng emaw zah training an nei leh té té phawt a, ka hnena a sawi rik fô ṭhin, hna a zawm fel vela min neih a tum thu chu nitin zantin ka bengah a rawn fah nawn ṭhin a, amah tawp hi ka hlimna ka ti lo thei lo.

Hmun hlâ takah pawh awm se, kan thinlung erawh hmun khatah a awm tlat a, chu chuan thlamuanna min pe a, amaha rinna nghat thei turin chakna min pe bawk ṭhin.

The End