𝐀𝐍𝐈 𝐋𝐄𝐇 𝐊𝐄𝐈 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

ANI LEH KEI

(Mizo Romantic Story)

By

Havali Adam

"I la kal na nge?" ka hmâa ding mêk chu en deuh hâ hian ka bia a, ka ṭawngkam leh hmêl aṭangin mak ka ti a ni tih a hai ka ring mawlh lo.

"Monday-ah ka kal leh si záwk mai ang ka tia," a rawn ti sam mai a, kei erawh ka rilruah zawhna dang a rawn piang zui nghal zat thung.

"Engati maw?" ka han ti chu, "Vawiina chhuk ka peih leh chiah lo, in bulah ka rawn hnatlâng ve záwk dâwn," a lo ti ve leh mai a, ka mak tihna pawh a nep ta deuh!

"A hmanhmawhthlak loh em ni?" ka ti leh hram a, ani pawh chuan, "Hmanhmawhthlak lutuk hran lo," tiin min chhâng duh táwk der a, ṭhiannu Ruati a lo thleng chiah bawk nen thu dangah kan pakâi ta daih!

Inrinni tih takah kan lo inbuatsaih láwk ang ngeiin KṬP hnatlâng turin kan chhuak ṭhap hlawm a, branch hnatlâng a ni mah záwk a, kan khuaah chuan kan branch a len ber vang leh pastor ṭhuthmun a nih vangte pawh a ni ang, hnatlâng tur kan tam phian mai.

Vêngthlang lamah kan inzui thla diah diah hlawm a, a ṭhenin lirthei an keng a, keini erawh ṭhiannu Ruati leh Muansangate nen kein kan kal thung a, beisei loh deuha kan zînga Muansanga a rawn tel thei chu nuam ka ti ru viau bawk.

Muansanga hi kan khaw high school-ah zirtirtu hna a thawk mêk a, Aizawl lam mi niin kan khuaa a rawn thawh na tak phei hi chu a rei ve tawh ang reng a, ka hmuh hmâsak ber nî aṭang khan ka tân chuan mi danglam bîk tak a ni nghal a tih theih àwm e.

Zirna avanga ka awm bo ṭhin lâi tak kha kan khaw high school-a a rawn thawh ṭan lâi vel ni ta in ka hria! D.El.Ed te kan han training ve lawp lawp a, Pathian zârah ka training zawh rual deuh thawin kan khaw primary school-ah hna ka hmu zui zat bawk nen tun thleng hian kan khuaah ka awm ta reng a, amah Muansanga nen tak pawh kan inhriat chian zual phah ta a ni.

Tunah hian kan inzui ve mêk a, ka ngaihzâwng hmâsa ber a ni a, ani tân erawh a hmâsa ber ka ni lo tih ka hre thung a, mahse pawi tihna emaw harsatna ka neih phah chuang lo.

"Vawiin chu hnatlâng kan tam hmèl sia, kan rei pawh ka ring lo," Ruati chuan a rawn ti a, kei pawh chuan, "Nia, kan rei vak lo maithei a ni," ka lo tih zawm zat a, Muansanga erawh kan inhmuh tirha a ṭawng tih loh kha chu a ṭawng tam lo hle thung.

Kan hnatlànna hmun tur kan thleng a, slab kan chhung dâwn avangin kan hah em em pawh ka ring lo. Mipa hovin cement, rawra leh balu an chawk suau suau hlawm a, hmeichhe lam pawh kan intlar ṭhap hlawm a, hnatlâng a nih rualin inhlawh te pawh ti ila a dik záwk mah ang.

"Muansanga hi chuan kan khua hi chu nuam a ti ve chiang alawm," awmze nei tak hian ka beng bulah Ruati chuan a rawn ti sar sar a, kan hawina lam a inang a nih hmêl!

"U Faka paw'n kan khuate chu nuam a ti hlarh hlarh e, Muansanga chauh sawi bîk suh," ka tih chuan a nuih a za ngei mai.

"U Fakate chu hemi khua hi a nia, eng nge ani nen i tehkhin daih a, ṭan viau suh aw," ring si lo hian a rawn ti leh barh barh a, kan nui dun hak hak a, kan khaw tlangvalho kâra Muansanga chetlâ vel chu ka thlir reng bawk.

Kan inngaizawng tih hi chu hretu neuh neuh an awm tih pawh ka hria, a tirah phei kha chuan ka zak viau nghe nghe a, mahse amah Muansanga berin zak lo turin min fuih ṭhin kha a nia, tunah chuan mi dangin kan inngaihzawn thu hria pawh ni se dawnsawn dan tàwk ka thiam ve tawh khawp mai.

Tin, ka chhûngte chenin Muansanga nena kan inkâr dik tak an hre tawh a, chhûngte hriatpuina thlapa ngaihzawng han neih takah chuan a dan a dang viau a, mahse kawng lehlam zâwng tak chuan a hahdamthlak ang reng!

Kan inngaihzawn tirh lai tak tak te kha chuan engkim kha a ruk a râl veka tih a ngai a, a zakzum chì ka lo ni kher bawk nen Muansanga rawn lèn a tum te khan ka phal lo tlat zel a, tun hnua ka ngaihtuah leh hian a nuihzatthlak piah lamah mawl intihhnuhnawh chângte pawh ka ngah mai.

Ka phal lo chung a rawn lèn luih zan phei kha chuan zah avangin ka thi lo chauh a nih kha! Ka chhûngte'n an hriatthiam ka hlau si, awm dan tur lah ka thiam bawk si lo, zak tak ka ni!

Khami zan aṭang khan a khât táwkin a rawn lêng ta zauh zauh kha a ni a, ka pa ai ka nun a hrethiam rang záwk ta nge nge a, a tirah phei chuan ka hrilh ṭha ngam lo, zak tlat hek!

Amaherawhchu, khatia Muansanga ber a rawn lèn fô tàkah chuan kan inkâr thu a zep reng theih ta lo a, chaw ei lâiin ka pa'n min han zàwt khauh mai kha chu chhan a va han har mai mai tak!

Muansanga nena kan inkâr kha ka sawi hreh ngawih ngawih a, mahse ka hrilh ta tho a, engtin chiah nge ka sawi ka hre tawh lo, ka nau a awm ve ran bawk si nen ka zak lutuk kha ka kham zui daih nghe nghe a nih kha!

Dik tak chuan duh ber te nena han inngaihzawn kha nuam ka ti em em a, awm dan ka thiam lo ni berin ka hria. Tunah erawh kum 2 lâi kan lo inzui ve ta bawk nen awm dan tâwk pawh ka hre ve tawh viau a, kan mizia, duh zâwng leh zâwng loh chenin kan inhre chiang thawkhat ve tawh viau chuan ka hre bawk.

Kan hnatlâng chu dâr 12 rik dâwnah kan zo titih der a, ei tur siam a ngaih avangin a tawp thleng kan thawk ta lo va, hmeichhe ṭhenkhat hovin ei tur kan siam laih laih a, kan arsa buhchiar pawh a rim a tuiin a tui hmèl sar sar khawp mai.

A ngai te bawkin Ruati leh kei leh Muansangate nen kan ei ho leh a, rei pawh ni lovah u Fakan min rawn zawm a, ṭhiannu Ruati lah chuan a lo ngaihtuah nasa mai si, a hmarcha tur te, a chi hmeh tur te a va làksak thlap vel a, ka nuih tawp ringawt!

Chutah Muansanga lah chuan, "Min ngaihtuah lo bîk e," a la rawn ti nui nui leh ta nghal a, a fiamthu emaw tiin ka nuih liampui mai mai a, mahse a lo fiamthu hauh lo chu niin!

"Hmarcha rawt ka duh belh," in la boss deuh tak hian a ti tlat a, u Faka leh Ruatite pahnih chuan min lo nuih tet tet a, ani erawh a nui duh lo hrim hrim thung.

"I ho em mai a...." ka tih pawh chuan a là thutak sawt emaw tih tur hian a awm a, ka va láksak ve ta nge nge bawk.

Hmarcha rawt ka'n pe chiah chu naupang thil hawn ang mai hian a nui nghal sun sun a, tih ngaihna pawh ka hre bîk lo, ka nuih tawp ringawt! Kei ai kum 2-in a upa záwk a, mahse a châng hi chuan la che naupangchhia ve ṭhin tak a ni.

Kan inei puar fel hnu chuan in lamah kan haw a, kei, Ruati leh u Faka hi chu vênglâiah kan awm a, Muansanga erawh vêngchhakah in a luah thung a, high school hnaih takah a ni nghe nghe a, a fuh phianin ka hria.

Zanriah ei kham hlimah a hnen aṭangin message ka dawng a, a ina lêng turin min sâwm hi a lo ni a,  a tirah chuan ka hnial deuh a, mahse min sàwm deuh tlat bawk si nen ka remti ve leh mai a, ka chhûngte bulah erawh Ruatite ina kal tur angin ka insawi daih thung.

Kawngpui ka chhuak chho chiah chu kawngpui chhak zunin bulah min lo nghak reng tawh chu niin, min lo hui a, kei pawh chu ka phei ve nghal mai a, bike-in vêngchhak lamah kan inphur chho a, rei tak ka lèn hman loh tur thu ka hrilh lâi chuan a lo bu nghut a, a in pawh kan thleng har lo hle.

"Vawiin kha cement in chawk nasa sia, i chau viau lo maw?" ṭhutthlenga kan ṭhut dun hnu chuan ka ti a, "Chau ve tho," a rawn ti mai a, a chau pawh a chauh tak tak ka ring, an chawk nasa êm mai.

"Bag engzah chiah nge in chawh a? Bag ruak kha a ṭhahnem viauin ka hria," ka ti leh hliai a, ka kut rawn hum pah hian, "Bag 40 dâwn a ni ang, ka chau sia, min malis dâwn lo em ni?" a ti zui zat a, ka nui chhuak hak nghe nghe!

"I duhna ah hi chuan i phakar zaih zaih ṭhin sia!" ka tih chuan a nui vur vur a, huatah pawh a là lo, huat turin ka sawi lo hrim hrim bawk.

"Min lo malis teh, ka taksa pum hi malis chhuak vek teh," tih leh ṭhutthlenga mut chu a rual titih nghal a, a pa tè chhe der si lo, hmun a luah hnem rem rem teh e!

"Engtin?" tiin ka hrethiam lo lui der tlat a, naupangchhia deuha a awm hi chuan chimawm chhuah hi ka chàk tlat zel!

"Ka hnungte kha hmet la, ka nuam huai dâwnin ka hria," maimitchhing pah hian a ti a, a bawk run tawh ang leh ta nghal a, a sawi ang chuan ka ti ve mai bawk.

"Khawi lâi ber hi nge?" a hnung hmet chunga ka tih chuan, "A vai khan," a rawn ti a, a hmêl ka'n en chu meng chuang lo hian a lo nui sun sun a, chu chuan ka rilruah thil dang a rawn tuh lut zui zat nghe nghe.

"I tider a ni maw? I chau tak tak miah lo," ka ti chiah chu ri meuh hian a rawn nui a, ka thiltih lâi ka tawp nghal hmak bawk.

"Ti zel teh, a nuam a nia, zanin chu min duat ka duh vang alawm lêng tura ka sâwm che," a rawn ti lûam a, ka la chet zawm duh mai chuang lo.

"Dàwt sawi kher a ngâi hleinem," titau ang deuhin ka ṭawng a, mahse ka titau lo nasa mai.

"A nih, ka chau lo, vawiina mi te kha chu chauhna tham a ni lo hrim hrim, mahse min malis tho rawh, i malis ka thlahlel ve em em a, min malis loh te chuan a dik nàng lè," a rawn ti leh duah a, mahse ka la inla luhlul lui ve tlat!

"Lêng tura min duh chhan ber han hriat tâkah chuan a ho hle mai," ka ti deuh hmak a, ka titau tak tak emaw tiin a rawn tho nghal vat nghe nghe!

"Heih...." ti hniam dui hian, "Hun hman dun ka duh vang alawm lêng tura ka sâwm che, i ngaih ang kha a ni lo," tiin a rawn insawifiah zawm zat a, ka beisei loh deuha a lo là thutak chu nuam ka ti leh chiah lo.

"Ṭhu ṭha ang," tiin ka ṭhut dan ka siam rem sat sat a, ani erawhin min en reng thung.

"Thingpui ka va lúm dâwn em ni ang?" ka ti leh a, hmêl pangngai tak hian ka en a, chawp leh chilhin a ner ta suk mai.

"Tihtauh der hi i thil thiam tharah chuan ka duh loh ber thil a ni, min malis nghal rawh," tih leh ṭhutthlenga bawh chu a rual nghal a, ka nui ta chîam ringawt!

A hnung ka hmeh lâi chuan nuam tih hmêl tak hian a awm a, ka ṭawng melh melh a, kan nui dun leh hak hak ṭhin a, a hnung chu rei pawh ka hmet chuang lo. Amah záwkin a duh táwk thuai a, kan titi ta daih bawk.

Thingpui in pahin eng eng emaw ni kan sawi a, ka hrilh láwk tawh ang ngeiin rei ka lêng lo va, ani paw'n min chelh lui bîk chuang lo. Kan kawm chhak thleng min thlah turin a lo kal emaw tih lâiin kan inah min zui lut teh deuh thut a, a la tlai hran lo bawk nen eng thu hla mah ka nei bîk lo.

A lêng rei ang reng phian leh ta nghal a, a haw meuh chuan dâr 11 a ri dâwn tawh der a, mahse inthlahrunna tur a awm hran lovin ka hria. Keini chhûngkua hi chu zan lamah hian kan meng rei ve a, kan meng rei ṭhang laklawh a ni ber e.

A tukah chuan nilêngin kan inhmu lo va, thil chhut tur a neih nûal avangin a buai ve mual mual hle a, sunday a lo ni kher bawk nen inkhawm tih loh chu inah ka awm deuh tawp a, zan lamah erawh a rawn lêng leh ta tho thung.

Monday zîngah Aizawl lam panin a chhuk thla ta nge nge a, a rawn lèt chho leh dâwn tih hre tho mah ila rilruah erawh a châm zui veng veng a, ka mipa hriat tawha ka thinlung luah lûm hnehtu ber a ni bawk a, min hlàta a han awm chiah chu keimahah pawh a thawh dan a dang khawp mai.

Nilêngin school-ah hun ka hmang leh a, naupangho han hui khawma thil han zirtir vel hi ka tui záwng tak a ni a, ka nêl ang bawkin anni paw'n min nêl a, ka vanneih asiamin an nu leh pate hnen aṭang paw'n fakna ankâ ka dawng ngun ve ṭhin viau nghe nghe!

Nî a liam a, Muansanga pawh ni thum ngawt chu Aizawlah a châm ta! Min hrilh dan chuan kâr tawpah a rawn chhoh theih hmèl a, hna lam thila zin a ni bawk a, buaipui tur neih neuh a awm a nih ka ring.

Zan tin kan inbe ziah a, chhun lamah hi chuan school-ah ka kal daih ṭhin bawk nen kan inbe ngai lo tluk a ni a, mahse inbe lo tawp erawh kan ni chuang lo. Rilrua a lan châng leh hun thawl neih lâi hian kan inbe zauh zauh ṭhin a, kan inbiak pangngai tak záwk hi chu zan lam ti ila a sual lo ang.

"Nunu....?" ka hminga min kotu lam ka hawi chu u Faka lo ni rengin, "Aw, eng nge ni ta?" ka ti ve nghal mai a, a thutak hmèl viau lehnghal a, Ruati chungchâng min sawipui a tum a nih ka ring nghal ringawt bawk.

"I hman em?" a rawn tih chuan, "Eng ti turin maw?" ka lo ti ve leh mai a, "Ngâi leh lo mai," a rawn ti leh ang lawi a, ka nui sak nghe nghe!

"I va'n ho tak, min biak duhna i nei em ni?" ka tih chuan, "Nei lo e," a lo ti sam mai a, mahse a thusawi chu ka awih em em hran lo hle.

"I nei chiang mai, sawi mai mai teh," ka ti chu a rawn nui ve ta suk a, chutah keimah bawk chuan, "Ruati chungchâng em ni?" ka ti leh a, ani pawh a lo bu ve ta nghut mai.

"Sawi la....." ka tih lâi chuan min lo pan hnai a, chutah ka rin loh lam lutuk mai hian, "A hmêlṭha ka ti lutuk a," a rawn ti daih a, ka nui nghal hak hak bawk.

"I va han sawi ho leh si ve, hmèlṭha i ti ve bawk loh te'n i bialnu alawm a nih," nui pat pat chung hian ka ti zat zat a, ani pawh a nui ve vur vur tho.

"A nih, i Aizawl zu zin chu, thil i rawn haw ṭha viau lo maw? Nimin aṭang khan a mood a fuh zual tlat,  i hawn ṭha hle a ni hrim hrim," ka ti leh zar zar a, "Hawn ṭha lo thei nàng," awmze nei deuha mi melh chung hian a rawn ti kher a, Ruati záwk ka záwt dâwn khawp mai, ani hi chuan zàwt ngar ngar pawh ni ila a sawi ṭha duh tak tak dâwn chuang lo.

"Ka'n kal ang e, hei, ka pa kuhva tur ka lei a, rei min ti lutuk palh ang," tia kal zui mai ka tum chu, "Kei pawh nula ka'n rim ang e, mikhual nula a awm an ti tlat," a rawn ti deuh kher a, ka ner khum sawk nghe nghe!

"Ruati ka hrilh mai tur a nia....." ka tih chuan, "Hrilh rawh, hrilh rawh, titau se, han thlem ve ila, a nuam ve alawm," a lo ti sam leh at a, ka nuih tawp ringawt, sawi tur pawh min tihre tawh lo.

In ka lut chu ka rin ang ngeiin ka pa'n rei min lo ti hman viau a, kuhva a ei châk avanga min tîr kha a ni a, kei lah u Faka nen kan lo inbe khawtawi khanglang bawk si nen, ka pa ṭawng chu ka ngaithla liam vel mai mai ta ringawt!

Chumi zan vek chuan Ruati nen kan inbia a, u Faka Aizawl zinin thil a hawn ka rin bur avangin ka záwt ta ngei a, mahse min hrilh ṭha duh lawk lo. Ka zawh ngat ngat hnuah ṭhi a rawn hawnsak thu leh thil dang min hrilh tur a neih thu a sawi ta zuah zuah a, hmaichhan ngeia min hrilh a duh nghe nghe bawk.

Nî a ral a, kâr tawp a rawn inher chhuah meuh chuan Muansanga pawh kan khuaah a awm ve leh tawh a, ka beisei loh deuhin sana min rawn hawn ve tehmial leh nghal a, dik tak chuan ka beisei lo hrim hrim bawk nen ka lawm mai bakah mak ka ti ang reng viau a ni.

A sana min rawn hawn lah chu a rawng a nù zên leh nghal a, ka inhmeh chì tak ni pawhin ka hria. Tin, Ruati hnen aṭangin thu lawmawm tak ka hre lehzel a, u Fakan palâi tirh a tum hi a lo ni a, thinlung takin ka lawmpui a, harsatna awm lovin innei se, nupa hlim tak ni se ka ti khawp mai.

Hun leh ni a inher danglam a, mit khap kâr lèkin thla thar kan chûangkai der a, mak tak maiin Muangsanga awm dan a dangdai chho ṭan riau a, langsar ni si lo, mahse thil eng emaw tak danglam awm si chu ka hrethiam chiah lo a ni.

Thil thleng a awm leh awm loh ka zawh lah hian engmah a awm loh thu a sawi mai zel a, kan inkâr lah chu tluangtlam deuh siin a danglam ru riau lawi bawk si, ka sawi thiam chiah lo, a hmâ kha kan pha ta lo ni berin ka hria.

Zawi zawiin kan inkâr chu a inthlak danglam zel tih keimahah a fiah tulh tulh a, mahse han nghing lawih tih tur chì a ni hauh bawk si lo. Zan lama rawn lèn a ṭhulh ngai miah lo nàin amahah danglam a awm tlat a, ka ngaituahna kal dik lo mai mai emaw tiin zawh pawh ka zàwt duh ngai lo va, mahse thla a'n vei lehzel tâkah chuan thil dik lo a awm tih hai rual a ni ta lo a ni.

Ṭum khat phei chu ka call a, mi dang a biak laklawh avangin a pick up lo va, an inbiak zawha a rawn call back ve mai ka ring a, mahse zankhuain ka chang hlawhchham ṭhak thung.

Ka tihtuah phah nghe nghe a, hmeichhe dang pawh ni se an tauh ve tho ka ring. Min ngaihtuah ang tak leh min ngaihsak ang tak hi chuan a la awm reng a, mahse lem chang ang tlata hriatna ka nei ṭhin.

Mi dang hriatthiam si lovin kan inkârin hniam lam a pan tial tial a, chutih lâi chuan Ruati leh u Fakate inkâr erawh a ṭha mar hle thung a, eng emaw ni neuh neuh an buaipui fel hnuah u Faka paw'n palai a tîr ve ta nge nge a, an inneih hun tur pawh ruahman làwk diam a ni tawh nghe nghe bawk.

Inrinni zan a ni a, Muansanga a rawn lêng a, ka pute in lamah ka nu leh pa leh ka nau an lêng daih a, kan pahnih chiahin kan awm a, a hmingin TV te chu kan han chhuah ve tak nà a, kan en lo hrim hrim!

"Kâr leh chu Aizawlah ka zu chhuk leh zuaih ang e," Muansanga chu ka melh zawk a, hna thil a ni tih hre tho mah ila ka rilru erawh a nuam zan lo.

"Kumin hi i zin thla ngun riauin ka hria," ka tih chuan, "Nia, school mamawh lei ngâi a awm ṭhin a, a zuanzàng ber ka ni bawk nen tirh ka hlawh khawp mai," a lo ti ve mai a, min ṭhut hnaih zui zat bawk.

"I lung a va àwi loh hmèl ve?" a rawn tih chuan ka ngàwi ran a, pangngai taka awm ka tum a, mahse ka thei lo chu a ni e.

"Engtik aṭang khan nge ka hre chiah lo, i awm dan hi a dang sawt ka ti, ka chik ru reng che a, eng emaw tak nangmahah hian a awm chiang ti raw?" ka ti chhuak ta hluai a, a rin loh lam daih ka zàwt a ni mahnà, min en chìk kher mai.

"Chutiang engmah a awm lo," a tih lakawh lâi chuan, "A hmâ kha i ang tawh lo Muansang, engtia han sawi fak tur nge ka hre bawk si lo, i danglam tlat alawm, nangmah paw'n i inhriat ka ring," ka lo tih zawm zat a, ka aw chu a hniam deuh raih bawk.

"A ni em?" keimah bawk chuan ka ti leh a, "Ka hre lo le, tun lâi chu ka awm a nuam chiah lo a, chuvangte pawh chu a ni maithei," a rawn ti ta sup a, a âwmah min kuah bei zui zat a, a mipa rim, pà ru riau chu ka hip lut vang vang nghal bawk.

"Rilru ka sêng nasa deuh te pawh a ni ang, phone pawh ka khawih ṭha peih mang der lo, mahse ka dam lo tihna a ni lo a nia," pangngai tak hian a rawn ti leh dap dap a, chutia a mizia a danglam chhan ni àwma a hriat a han sawi ta chu ka awm a nuam huai mai.

"Chuan, i mu ṭha lo a ang ka ti bawk, i chauh hmèl thei tawp a, eng lamin nge i rilru chu chu tibuai reng reng?" ka ti sap a, min kuah nghet salh pah hian a thaw huai a, kan inkâr chu zawi zawia a pangngai ve leh mai ka ring nghet ta bur bawk.

"I hre duh tak tak em ni?" tawi tèa nui suk chung hian a rawn ti a, nuih hi chu a inhmeh ve thlawt, a nuih loh pawh hian a hmelṭha tho a, a nuih phei hi chuan ṭha lehzual tak a ni.

"Immm....." ka ti zo chiah chu ka inrin hmâ hauhin a rawn che thut a, ka hmuiah tak a rawn fawp a, ka lo thlahlel bawk nen ngaihngam zet hian a mi fawhna chu ka dawngsawng a, ani paw'n ka awm dan a hrethiam rang khawp mai.

Eng chen chiah nge mu leh mal hre lova ka awm pawh ka hre lo, "Thingpui min lùm dâwn nge heti hian ka fawp reng záwk dâwn che?" a rawn tih chuan hmui pet sawi ngawng ngawng hian ka chhoh melh ran a, ka awm dan chuan a nuih a tiza hle ni tur a ni.

"Kan lung a âwi tawh a va ang ve?" rawn ti leh kherin a nui ta hawk hawk a, kei erawh ka nui duh der lo.

"Chimawm suh, i thingpui in turah chi ka thlak mai tur a nia," ka tih chuan a hmâ ai a nuih a za zual leh ta nghal a, ka tih ngaihna hre lo chu ka nui ve ta ringawt bawk.

Chumi zan aṭang chuan tlêmin kan inkâr pawh a zia chho ve leh bek bek a, ani paw'n ka rilru leh ka lungawi lohna te a hre chiang a, hmâ a là tih pawh ka hria, mahse, mahse a la awm tlat!

Eng thil emaw, harsatna, min hrilh ngam si loh nei anga hriatna ka la nei tlat a, ka ngaihbel pawh a ni lo, eng emaw tak chu a awm chiang a ni.

A tirah kha chuan ka ngaihbel a nih ringin keimah leh keimah ngei pawh ngaihtuah buai tawh lo turin ka infuih ru ṭhin a, mahse ni a ral a, kan ṭha chho viau tura ka ngaih kha kan chuti teh lûa leh si lo va, amahah eng emaw dik lo a awm tih ka hmu lehzel bawk nen ngaih ṭha taka awm thei dinhmunah ka ding lo a ni ber e.

Kâr lovah ṭhiannu Ruatite inneih nî pawh a rawn inher chhuak der a, a ṭhianah min hmang nghe nghe a, thinlung takin ka lawmpui a, nupa hlim leh nghet tak ni turin ka duhsak hle bawk.

Ṭhiannu Ruatite inneih nî chuan Muansanga pawh a rawn tel ve a, inhmu mah ila inbiakna hun leh awm dunna hun a awm lo tluk a ni a, mo ṭhian ka ni kher bawk si nen mahni táwkah kan buai ve em em a, inneih ruai kil zawhah phei chuan a hmêl hmuh tur a awm tawh lo hrim hrim.

Zan lam thlengin kan buai zawm zel a, rin ai tak boruak chu a chauhthlak ru ang reng viau bawk. U Fakate in aṭanga haw tura kan chhuah hnu chuan Muansanga ka hmu hlawl a, u Fakate in hnaih lutuk lo, hlàt lutuk ni si lo, éngin a chhun phak chin chiah chiahna velah hian phone hmangin a lo ding a, min rawn hruai a tum tih ka ring thiam nghal mai bawk.

U Faka ṭhianpa, min thlah tum tupa bulah chuan min hruai tura ka ṭhianpa a lo kal thu chu hawihawm takin ka sawi a, inneihnaah hi chuan mo neitu ṭhiante hian mo ṭhiante hi chu an mawhphurhnaah a ngâi tawp ṭhin a, mahse keini erawh khaw khat, inhre sa kan ni tho bawk nen Muansanga a lo lan tâk si ah chuan min hrethiam ve mai a, keimah tak paw'n chutianga han inthlahrunna ka nei hran bîk lo.

"Ka rin ai in rei daih a....?" a bul ka thlen dâwn ṭepah Muansanga chuan a rawn ti a, ka ngaihbel nge ka hre lo, a phone chu a ak ṭha rang viauin ka hria.

"Nia...." tih bakin ka chhâng lo a, "Kan haw nghal mai dâwn em ni ang?" a rawn tih leh chuan ka lo bu ve nghal mai bawk.

Kan in lam pana kan inphurh lâi chuan phone call a dawng deuh chhen a, làksak mai ka tum lahin ṭul a ti bawk si lo, a awm dan chu ka hrethiam lo ru kher mai.

Kan in kawta kan din hnu lawkah phone call bawk a dawng leh a, pick up turin ka ti nghe nghe a, mahse a pick up duh miah lo a nih chu!

"Tu nge a?" ka tih lahin chhánna mumal min pe ṭha duh bawk si lo, a awm dan chuan ka ngaih a tiṭha lo thlawt a ni.

"Ka lakah hian thil zep i nei ti raw?" ka ti ta hmiah a, ani erawh a ngâwi ngul thung.

"Dik tak chuan kan pangngai chho leh mai dâwn emaw ka ti a, mahse a ni miah lo, kan danglam chuang lo reng reng," keimah bawk chuan ka ti leh a, sawi tur ka haihchham ṭan chu a ni der!

"Engmah i sawi dâwn lo em ni?" ka ti leh pawh chuan a la ngâwi reng a, ka lung a âwi lo ru tak zet!

"Ka kal a nia, muttui le," ti deuh nghatin ka kal ta sawk sawk a, mahse in chhûng ka luh thlengin ka ngaih a ṭha thei chuang lo.

Mut hmunah ka ngaihtuah zui rauh rauh a, dam lohna eng emaw tak a nei ang a, natna eng emaw a vei ang a, a rukin khawpui doctor a lo râwn ru reng hi a ni lo maw le te ka ti ta rum rum a, a mizia a harhvang ta lo êm a, chungte pawh chu thil ni thei tak niin ka hria.

Zîng khua a lo vâr a, zan lamah ka ngaihtuah zui nasa bawk nen school bàn veleh a ina kal chilh a, a awm dan dik tak zawh chu ka tum nghet ta bur a, zawh dan tur pawh ka ngaihtuah láwk nasa khawp mai.

Nilêng deuh thaw naupangho bulah hun ka hmang leh chawt a, mahse ka rilru erawh hmun dang daihah a awm thung. Muansanga nen kan awm dun huna ka zawh dan tur ka ngaihtuah mai bakah min chhàn dan tur thlengin ka ngaihtuah tel a, nàtna eng emaw a lo vei ru reng ang tih mawlh ka hlau a ni.

Chhun chawlh lâiin ka bia a, school bàn huna inhmuh ka duh thu ka hrilh chuan mi hnialna pawh a nei hran lo. Rei kan inbe lo a, school-a awm ve ve kan nih avangin inbiak rei pawh duh ila a theih rih loh a ni mah záwk!

Dârkâr a liam a, primary school chu kan bâng der a, anni high school erawh dâr 2 leh a chanve emaw dâr 3 velah an bàn a rinawm a, inah ka lo nghak deuh ngat ngat a, ka nu leh pate ramah an feh daih bawk nen mahniin ka awm deuh tlawng a, ngaihtuahna a vàk thui duh kher mai.

Ka nau school lo bâng chuan Muansangan kan kawmchhaka min nghah thu a rawn sawi a, middle school leh high school hi an bâng rual a tih theih a, ka nau lo haw danah Muansangate pawh an bâng fel tawh tih ka hrethiam nghal mai a, ka chhuak ta vat bawk.

A in luah lamah kan inphur chho a, eng thu mah kan la chhakchhuak lo ve ve a, kan awm dan chu hrehawm ka tih zâwng tak a ni. Kan inpawh lo ti dawt dâwn ila a ni bawk si lo, inngaizawng reng siin inngaizawng ang paw'n kan awm lo ni berin ka hria.

"I ril a ṭam em?" in chhûng kan luh fel hnu chuan a rawn ti a, "Ṭam lo e, thil sawipui duh che ka nei a," ka ti pangngai ve mai a, ani pawh chuan, "Eng lam nge? A va pawimawh hmèl ve?" a rawn ti ve leh nghal mai bawk.

"Immm.....a pawimawh viauin ka hria," ka ti sap a, chutah keimah bawk chuan, "Enteh Muansang, nangmahah hian thil dik lo a awm chiang ti raw?" ka ti chhuak ta halh a, "Hetia ka laka zep i neih hian hrehawm ka ti teh a nia, a nuam ka ti lo," ka tih zawm leh zat a, engtiang takin nge ka ngaihtuah ang tih a hrethiam pha kher lo maithei a ni.

"I hre duh tak tak em ni?" a rawn tih chuan, "Aw.." ka lo ti vat a, min melh deuh run nghe nghe!

"Ka la inpeih lo," lû thing deuh nuk pah hian a rawn ti leh ang lawi a, a thusawi chuan ka rilru a tikal thui khawp mai.

"Dam lohna i nei em ni? Min hrilh teh Muansang, ka awm i ti nuam miah lo a nia," ka ti ta mawlh mawlh a, ka kut a rawn hum a, mahse ka tal chhuak vat thung.

"Ka lakah zep i neih ngai loh kha, engati nge i zep tlat? Min hrilh rawh, ka hre duh, engkim min hrilh rawh," amah ka ngaihtuah luatah ka aw chu a mumal lo phung mai.

"Ka la inpeih lo alawm Nunu, ka la inpeih lo tak zet," a rawn tih chuan hlauhthawn rukna hlirin ka khat tawh a ni ber.

"Aw le, ka nawr lui tawh lo ang che," tih leh ka ṭhutna aṭanga thawh ka rual a, ka kal sawn tur chu ka bânah a rawn chelh a, a mal chungah min pawt ṭhu zui nghal zat bawk.

"Ka rilru hi a buai a ni, a buai tak zet, sawi chhuah dan tur pawh ka hre lo," ti dap dap hian ka hnungah chuan a hmai a phûm vang vang a, chutah amah bawk chu ṭawng zawm lehin, "Thil nih dan dik tak ka hrilh che a nih chuan i dawnsawn dan tur ka hre láwk chiang ém a, chuvanga engkim, a ruh lang rawta la hrilh lo che pawh ka ni!" a rawn ti thum hniam leh dut dut a, eng thil emaw tak, ka rilru her danglam dawrh thei thil a awm tih chu a chiang ta viau e.

"Ka sawi tawh angin ka nawr lui lo ang che, mahse kei leh nang hian inzawmna kan nei a, chu chuan ken tel a nei tih erawh hi chu i theihnghilh loh hram ka beisei," ti deuh diaiin a lam ka hawi a, a mal chungah ka la ṭhu reng bawk.

"Dik tak chuan ka lak ata i hlâ ta riai riai hi hrehawm ka ti a ni," ka ti chhuak leh sap a, ka tho zui zat a, ani paw'n min chelh tawh bîk lo.

Ngâwi rengin in aṭang chuan ka chhuak a, rilru dam zàn lovin in ka thleng a, amaha thil dik lo awm chu ka hmu lian em em a, eng nge ka hre fak thei bawk si lo, eng nàtna emaw ni tak vei ruk a neih ka hlau tak zet!

Zanriah ei khamah a hnen aṭangin message ka dawng a, min hmuh a duh thu hi a lo ni a, chutah engkim min hrilh a tum thu a la ni zui! Ka hlauthawng ru nghal em em a, cancer nàtna te a lo vei ru reng a nih hlauh chuan tih dam theih a ni dâwn si lo, ka nâ dâwn lutuk tlat!

Ka chhûngte bulah chhuanlam fahrah ka siam a, Muansanga nen chuan a in luah lamah bawk kan inphur chho leh a, tlaia kan awm dan khan amahah nghawng nasa tak a nei tih ka hrethiam a, mahse ka laka a buaina leh harsatna sawi chhuak tur erawh chuan nawr luih ka tum tawh lo hrim hrim thung.

A inpeih hun ka nghak thei a, chu chu ama tâna harsatna ka siam belh loh theih dan kawng pawh a ni. Amaherawhchu amah záwkin engkim min hrilh a tum thu a rawn sawi leh lawi a, lo hlauhthawn ruk sa nen, a thu min hrilh tur ka hriat hmâ hauhin ka zàm ru er er thei hial a ni.

"Thil nih dan dik tak ka hrilh lo che a nih chuan ka tihrehawm rei mai mai che tih ka hriat mai bakah keimah ber hian hrehawm ka ti a, engkim hrilh che hi a ṭha ta berin ka hria," tiin bul a rawn ṭan a, han sawi mai tur ka hre der lo, chhàn dan tur lah ka hre hek lo.

"Thla hnih liam taa Aizawl ka zin khan ka hmèlhriat hlui ka zu tawng leh nawlh a, a nihna takah chuan inhmèlhriat satliah kan ni lo, nang ka tawn hmâ chea inzawmna ka lo neihpui ṭhin a ni," tia ka rin loh lam lutuk a rawn sawi daih chu mak tihnain ka khat a ni ber.

"High school aṭanga college thlengin kan inzui chho zel a, mahse eng emaw thil hriat sual palh a awm avangin kan inṭhen a, ka rilru a nát em em lâiin nang ka tawng leh che a, ka nâ zawng zawng tireh thei hmeichhia ka tawng che hi vannei pawh ka inti a, ka hlim a, ka lawm em em bawk. Amaherhawchu, khatia ani nena kan inhmuh leh tâk aṭang khan ka rilru a nghet lo ṭan a, i lakah pawh hian inthiam lohna ka nei nasa ṭhin hle," a tih dap dap lâi chuan ka lo ngawi ran a, awm dan tur leh rilru sèn dan tur pawh ka hre lo.

"I la hria em, nang ka tawn hmâ chea ngaihzawng pakhat chiah ka la neih thu ka hrilh che kha?" a rawn tih chuan ṭawngkâa chhâng lovin ka bu nghat a, a hmêl pawh ka en duh lo hrim hrim!

"Kha nu nen khan tunah hian inzawmna thuk tak kan nei leh tawh a, chu chu a ni ka rilru tibuai a, hrilh ka hreh em em che chu! I laka ka chet dan hi a tenawm tih pawh ka hria, i rilru ka tinâ dâwn tih lah ka hai lo, mahse i lakah zep reng si ila, i nâ zual mai mai dâwn bawk si a, i laka inthiam lo em em chungin engkim hrilh che ka ti tlu ta a ni," a rawn ti leh a, a thusawi mal tin chuan min chhun zawk zawk a, nâ lo lâi rèng ka awm lo.

"A nih chû....." ti sepin ka lû ka bu dat dat a, "A pawi lo, ka hrethiam che alawm, min ngaihtuah suh," ka ti hniam leh raih a, ka khaw hmuh chu a rawn phê nghal ruai bawk.

"Ka tihpalh tak zet Nunu, keimah leh keimah ka inbum thei lo a tin a ni!" ti supin a âwmah min kuah bei a, meng reng chung hian ka mittui chu a dir zawih zawih a, ka tawt lutuk leh ka nâ lutuk chu ka ṭap ri thei lo a ni ber.

"Nang ang hmeichhe rilru ṭha lutuk ka tawng che hi ka lawm a, i rilru ka tinâ erawh hrehawm ka tiin ka inthiam lo tak zet a ni," a rawn tih dap dap lâi chuan ka mit ka chhîng a, ka hmui khur dar dar chu ka pet ngawt ngawt bawk.

Eng thu mah sawi lovin a mi kuahna ata chu ka inla hrang riai riai a, ani paw'n min kuah bet lui tlat bîk chuang lo. Ka tho zal zal a, min en reng tih pawh ka hria, a rawn tho ve nghal tih thlengin, mahse ka awmna hmun chu ka awmna tur a ni lo tih ka hre chiang tawh lutuk tlat!

"Nunu......" tia mi rawn chelh a tum chu ka lo vai kiang thuai a, ka tân chuan ina awm bak thil thlakhlelhawm a awm rih lo.

"Khaw'nge i kal dâwn?" a rawn ti leh a, "Ka zu haw ang e, muttui le," ka ti deuh ṭiau a, ka mittui chu dan ka tum ngial paw'n ka thei thlawt lo, ṭah loh a harsa ngawih ngawih!

"Ka lo thlah ang che," a rawn tih chuan, "A ngai lo," ka lo ti thuai a, "Ni lo, keimah avanga lo kal i ni a, thlah che chu ka mawhphurhna alawm," a rawn ti leh a, min din hnaih zui zat bawk.

"Khawngaihin Muansang, mahnia awm rih ka duh," ka tih tâkah chuan ngâwi reng hian min en a, a mitmenga min khawngaihna lang zut zut chuan ka rilru a tinâ zual tak zet a ni.

Engtin nge kan in kawt ka thlen thak pawh ka hre lo, ka ngaihtuahna a bing mup mup a, ka engkim mai chu a ni chhup a, ka nuna mi pawimawh em em tâna ka hlutna leh pawimawhna a thâmral titih ta chu tawrh thiam har ka ti a, awm dan tur ka hre lo hle bawk.

Kan in kawtah chuan ka ding deuh vang vang a, ka mittuite chu ka hru hul thuak thuak a, ka chhûngte'n ka ṭap a ni tih an hriat vaih chuan ka tân thil a buaithlak zual dâwn tih ka chiang a, an hmuha ṭah loh hram ka tum ngar ngar a, mahse ka thei kher ang em ka hre lo.

In chhûng ka lut chu inlêng kan lo nei hlauh a, ka pa chuan thingpui lúm turin min ti a, ka lùm ve nghal mai a, kan inlêngte zârah ka awm dan an chik lo va, chu chu ka tân chuan thil ṭha tak a ni.

Chumi zan chuan chhin khat pawh ka chhíng lo, ka thinlung a rum a, a ṭap a, a nâ a, Muansanga nena kan inṭhen tur chu tawrh thiam har ka ti ngawih ngawih a, inṭhen bak hmâbak kan nei bawk si lo.

Lungngaihna chhumpuiin ka nunah ro a rêl zui zel a, ka nî hman dan pawh nuam reng a awm ta lo. A lang a paute chuan hlim derin nui der ve ṭhin mah ila ka chhûngril lam erawh a thip ru vawng vawng a, ka thunun theih piah lam a nihna tak te chuan ka thinlung a tinâ zual tak zet a ni.

Ka tân a kianga hun hman leh ani nena inzawmna neih a rem tawh miau loh avangin kan inṭhen chu a ni ta mai a, ka lo hmangaih thuk hman hle a ni tih pawh ka hriat chhuah phah nghe nghe a, mahse tunah erawh thil a danglam zo tawh a, kan hmangaihte nen run hmunah kan lêng dun vek thei lo an lo tih ṭhin kha a dik a nih hi ka ti ta!

Ka lungngaih mangan hlaua mi rawn biaka kan ina lo lèn châng pawh a nei ṭhin ngei a, mahse ka tân chuan awmzia a awm tawh lo. Ani chu ka tâna ruat ni lo, ka pasal tur ni lo, mi dang ta tura chung lam ruatah ka ngâi a, chu chu thil nih dan dik tak pawh a ni rèng a ni.

Kan inzui lâi te kha lung tilêngtu leh lung tingâi zualtu ah an chang zo va, kan inkâr thu ah chuan a tua mah dem theih kan ni paw'n ka hre lo. Ka indem lo va, amah pawh ka dem hek lo.

A chhan chu kei ni lo hmangaih leh thinlung milpui záwk a nei miau a, chu thilah chuan thuneihna pakhat mah ka nei lo va, a rilru thlak danglam tur paw'n eng dikna mah ka nei lo. A tân leh ka tân chuan hmangaih taka en liam a, thlah zalen mai a finthlak ber záwk a ni.

Kan inkâr thu fiah kuar tawh mah se ka lo ngaihtuah leh veng veng ṭhin a, zawi zawia a danglam chhoh ṭan dan te, a awm dan avanga nàtna ṭihbaiawm tak a vei ang tih ka hlauh em em lai te kha ka suangtuah lèt fô va, nuihzat vang ni miah lova nuih châng pawh ka ngah narawh e!

Zan khat chu a rawn lêng leh a, a khât mâwi táwk hian a rawn lêng leh ṭhin a, kan rilru dik tak kan inhriat chian tawnsak ém avangin kan kârah eng inzawmna mah a awm tawh lo tih kan hre ve ve a, ani leh kei inkârah chuan daidanna bang chhahpui awm angin ka chan ṭhin.

"Lo kal tawh suh Muansang," tiin a haw dâwn chuan ka hrilh ta tawp a, lo kal tawh lo law law se ka duh záwk vang a ni.

"Kum 2 chhûng khan ka hre chiang hman viau che a, mi rilru ṭha tak i ni tih pawh ka hria, i bula awm pawh nuam ka ti, mahse tunah chuan i hmêl ka hmuh apiang hian ka nâ thar zel a, chuvangin lo lêng tawh lo la ka duh a ni," keimah bawk chuan ka tih zawm leh a, ka rilru dik tak a ni a, ka ngenna chu hrethiam se ka ti hle bawk.

"Keimah avanga i nâ hmêl hi hmuh hrehawm ka ti êm a, engti kawng zawng emaw tala thawi dam ka duh a ni," a rawn tih chuan dáwt a sawi lo tih a hriat khawp mai.

"Ni lo, chutiang chu a thlen theih ka ring lo. Kan hun hmâsa lamah te kha chuan i thei ṭhin ngei a, mahse tunah chuan i tân tih a thiang tawh lo, min theihnghilh tum záwk rawh," ka ti dat dat a, chutiang taka inbiak unkhan chu kan la nei lo hial ang.

"Mipa nep tak ka ni!? I ti ve em?" a rawn tih chuan ka melh zawk a, za lo zet hian a nui tawi suk bawk.

"Ani nena kan inzawmna kha kum tam a liam hnuah pawh ka theihnghilh thei lo a, min theihnghilhtîr thei awmchhun chu nangmah chiah i ni a, mahse a hmêl ka hmuh leh nî aṭang khan ka thinlung hi i lakah a uire tlat bawk si, engkim hi ka thiam loh vek a ni," a rawn ti thum leh dap dap a, kan thusawi te, kan inbiak dan hrim hrim chu a dang tawh lutuk a, lungàwi mai a hahdamthlak ber ta záwkin ka hria.

"A nih tur ang a ni vek tawh a, inthiam lo lutuk duh suh! Tin, min khawngaih tih pawh ka hria, mahse hmeichhe chak lo tak ka ni bîk lo a nia," ṭhen deuh saka ka tih chuan min rawn en a, ka nui lui tih pawh a hai ka ring bîk lo.

Sawi tur hre lova kan ngawih vang vang hnuah kan inthlah liam ve ta chauh a, kan inkâr chu ka ngaihtuah zui a, ka tân chuan loh theih lohna avanga thlahna a ni a, ani tân erawh ka lak ata zalenna a nih ngei ka ring.

Tin, ka dem miah lo, a tih tur dik tak a ti ni záwkah ka ngai! Min hrilh lo ni ta se chu ka hriat hunah ka nâ dâwn tho tho a, kei aia thlan záwk a neih avang leh duh záwk a neih avangin kan inṭhen tih pawh ka pawm thlap, hlim takin nun hmang se ka duh bawk.

Amaherawhchu, keimah lam záwk hi, ka pâwn lam dan chu a ṭha reng, mahse ka chhûng lam erawh a va nâ ngaih ngaih si èm!

Ka ngaihzawng vawi khat neihna a ni a, ka thinlungah hmun a chang thuk em em a, ka lo hmangaih hman kher bawk nen kan han inṭhen fel ta chu tawrh dan ka thiam lo va, ka tih theih awmchhun chu nâ tawrh tlawk tlawk a ni rih mai.

A ni telin amah hmuh loh dan hlir ka zawng a, ka pehhel zel a, a hmêl ka hmu a nih chuan thil hriat chhuah ka nei zel bawk si, chuvangin a hmêl hmuh loh law law chu ka thlang ta záwk a ni.

Amah tak hi chuan min hmuh a la duh reng a, ka nâ tawrh mêk chu amah vang a ni tih a hre chiang a, a theih ang ánga ka rilru nâ tihdam a tum tih pawh ka hria, mahse ka thinlung erawh chuti maia thawi dam theih a ni tawh tlat lo.

Tin, lo kal tawh lo tura ka tih zan aṭang khan kan inah vawi khat mah a rawn lêng leh tawh lo hrim hrim a, a mizia ka hre chiang a, ka duh loh zâwngin a awm dâwn lo tih nen lam ka hre chiang em em a, mahse tunah erawh chu ka hriat chianna chuan awmzia pakhat mah a nei tawh lo a ni.

Nî leh thlate an vei a, ka rilru aṭangin ka paih bo thei mai dâwn emaw ka ti a, mahse a lo ni teuh lo. A zual zel záwk a, amah ka ngàihna a nasa em em a, hun kal tawh dâwn kira mittui tlâk châng pawh ka nei fô bawk.

A rawn lan khàt tâk êm avangin ka chhûngte paw'n zawhna an nei ta nge nge a, kan inkârah engmah a awm tawh loh thu ka hrilh chuan mak an ti ve khawp mai. Chutiang bawkin Ruati paw'n Muansanga nena kan inṭhen deuh thut chu mak a ti hle a, mi dang hriatah chuan inṭhen deuh thut te pawh kan ang a, mahse ka zep rei vang záwk mai mai a ni.

Amah kaltlangin u Faka Aizawl zu zin khan hmeichhe dang nena a hmuh ṭhin thu ka hre hnuhnawh leh ta zel a, ka ngaihtuah chet chet a, khang hun lâi kha Muansanga danglam chhoh ṭan hun lâi niin ka hre te nghe nghe bawk.

Kei ai mahin a lungâwi lo zàwk emaw tih turin Ruati chu a awm a, keimah avangin Muansanga a lo be hial a, ka tuar nâ ve êm bawk a, min lainat vangah ka ngaihsak ta mai. Vanneihthlak takin Muansangan kan inṭhen chhan dik tak a lo hrilh lo hlauh a, hrilh chu ni se mak a tih piah lamah kei min khawngaih avangin a thin a rim hial ang ka ring.

Kei lahin kan inṭhen chhan dik tak ka sawi ṭha duh bîk der bawk si lo, tuna ka nàtnate hi hunin a la liampui ve ang a, nakinah chuan engkim, zep awm miah lovin ka la hrilh ve thei mahnà le!

Tunah erawh kan inṭhen aṭang khan thla liam leh duai tawh mah se ka thinlung hliam a la dam tlat si lo va, chuvangin nàtna tur insiam belh ai chuan ngàwih ka chuh rih záwk a, ka sawi ṭhat duh loh avangin ka lakah Ruati thinrim hial mah se ngàwih rih ka la thlang fan tho.

Amah ka rin loh vang a ni lo va, rin thu ah chuan ka ring lutuk, ani tluka ṭhian rin ngam ka nei lo hial záwk ang, mahse hrilh ta ila, a nâ tur chu keimah tho ka ni dâwn a, min hnem eng ang mah se ka hliam tuam dam thei tur khawpin engmah a ti thei lo tih ka chiang a ni.

Hetiang tak hian ka là nâ ang tih ka ring pha lo hrim hrim, ka lo hmangaih thuk hman hle ni ngei tur a ni. Ka tân chuan ka ngaihzawng hmâsa ber leh ka mipa hmangaih hmâsa ber a ni a, tun dinhmunah hi chuan a hnuhnung ber pawh a nih hial ka ring.

Thla a'n vei leh tâk chuan kum tawp kan hnaih ta hle a, krismas boruak rimin hmun tin kil tin a luah a, engkim mai chu ka tân Muansanga nena kan hun lo hman dun ṭhin dan hriat chhuahnaah a chang zel a, inṭhen fel vek tawh mah ila amah ka hmangaihnate, ka thlakhlelhna te, ka ngaihnate leh a hmêl ka hmuh châknate chu a la kiam thei chuang lo.

Min hmangaih lotu hmangaih tlat hi thil namai lo tak a ni a, kan lak ata kal bo tura thlah zalen ngat phei chu tawrhchhel ngai tak a ni. Amaherawhchu, hmangaihna thil tih theihzia leh ropuizia lantîrna a ni lawi si!

Ni khat chu Muansanga hnen aṭangin phone call ka dawng hlawl a, Aizawl a chhuk hmâin min hmuh lawk a duh hi a lo ni a, a tirah chuan ka hnial zet nà a, a tawp nân ti rilru chungin inhmuh chu ka remti leh ta záwk a ni.

Mahni chauha ka awm lâi tak a ni bawk a, kan inah min rawn kal chilh a, hmaichhan ngeia a hmêl ka'n hmu leh chiah chu ka thin a phu dep dep a, ka chhûng lam a dik lo nghal a, loh theih lovin hun kal tawh ka hre chhuak zut zut bawk a, mahse ka awm dan dik tak chu hriattîr loh hram ka tum thung.

"Engtikah maw i chhuk dâwn a?" pangngai takin ka bia a, ani pawh chuan, "Vawiin tlaiah," a lo ti ve mai a, mak ti ru viau mah ila mak ka ti tih erawh lantîr ka tum kher lo.

"Ngaihdam dil che ka bâin ka hria Nunu..." a rawn tih leh chuan, "Ngaihdam min dil chhan tur i nei hleinem," ka lo ti zàngkhai vâh a, tawi tê hian ka nui lui sak bawk.

"Ni lo, nâ taka ka siam che avang hian ngaihdam ka dil che a ngâi alawm," a rawn tih leh chuan ka ngawi ran a, lehlam ka hawi daih a, ka mittui a tlák mai loh nân ka mit ka khap zawk zawk a, ka awm dan chu ka siam ṭha lehnghal thuai bawk.

"Tluang deuhin i kal dâwn a nia, i chesual hlauh ang e," tluangtlam taka ṭawng luih hram hram ka tum a, mahse ka aw chu a phelh nuaih tho.

"Keimah avang hian i la nâ reng ti raw?" dam hniam dapa a rawn tih chuan ka insum theihna a kehchhe vek a ni ber.

"Nunu.....?" a rawn ti leh chiah phei chu ka mittui ka dang zo thlawt lo va, ani paw'n a hmuh hmaih lo chiang hle.

"Inenkawl ṭha la aw, hlim taka awm turin ka duh che a nia, i hriselna ngaipawimawh bawk la," ka nâ a ni tih thup tuma ka ṭawng lâi chuan a âwmah min kuah bei thlawp a, ka mittui chu a sùr hian a sûr a ni ber tawh!

"Ka tihpalh Nunu, ka tihpalh tak zet, ka lakah eng i tihsual loh tehreng nen, i lakah erawh ka nunrawng hle si, min ngaidam thei lo mah la ka dem lo che, ka pawm thlap, i tân hian ka ṭha lo êm a ni, ngaihdam ka dil mawlh mawlh a che," a tih thum dut dut lâi chuan ka lo insut feih feih a, a kiangah zet zawng insum a har zual tak zet a ni.

"Kum thar aṭang hian ai kal chhawr ka tum a, tun hi kan inhmuh tawpna tur pawh a ni maithei a, chuvanga hmuh duh tlat che pawh chu ka ni!" a rawn tih leh chuan ka inla hrang riai riai a, ka bianga mittui lûang chu ka tûai hul deuh puat bawk.

"Ni e, tun hi kan inhmuh tawpna tur te pawh a ni tawh maithei a ni. Eng nge in chanchin? In ṭha zel maw?" ka awah chuan ṭah aw a la châmbâng nual a, mahse a zia chho ve mai ka ring.

"Kan ṭha e," a lo ti ve mai a, ka zawhna awmzia chu a hre chiang viau bawk.

"A ṭhat nasat chu, hlim takin in awm dâwn a nia, kei chu min rawn ngaihtuah tawh suh, kan inhmu tam lo ang a, ka dam ve leh mai ang. A bîkin nangmah, i hlim loh ka duh miah lo a nia, hlim reng ang che," ka ti zángkhai vâh a, ka nui sen sen a, ani erawhin rilru hah hmèl deuhin min en reng thung.

Chumi tlai chu kan inhmu tawpna a ni tak tak a, kum thar hnuah pawh kan inhmu ta lo vang vang a, a sawi láwk tawh ang ngeiin ai kal a chhawr a, mahse chhawr pawh a chhawr rei lo, zirtirtu hna zâwk a bansan ta daih a, keimah min ngaihtuah vang a ni tih pawh ka hre chiang hle.

Kan khuaa a thawk reng a nih chuan ka rilru a tinâ dâwn tih a hre chiang em em a, chutiang bawkin a rilru pawh ka hre chiang ve viau bawk. Kawng lehlam zâwng tak chuan a ṭha ka ti záwk tho mai, ka tân tak hian a ṭha, mahse ka thinlungah erawh a châm reng ta thung a ni.

Hun a liam a, kum hial a vei hnuah pawh ka la theihnghilh ta chuang lo. Hetiang tak hian mi ka hmangaih theih ang tih ka ring pha ngai lo.

Engtik lâi paw'n ka hre reng chu a ni bîk lo, hriat chhuah loh chângte chu ka nei ve tho, mahse chumi avang chuan ka theihnghilh ta tihna erawh a ni lo, ka hriat loh lâi chenin min lo chenchilh reng ṭhin záwk a ni.

Eng dang a ni lo e!

Ani leh kei chu intawng lo tur intawng palh mai kan ni a, a tâna ka tih theih sâng ber pawh hringnun hlimawm tak nei se tia duhsakna hlan chauh a ni ta!

A hmangaih kiangah a awm tawh a, a hlim ngei pawh ka ring a, mahse kei erawh hun a liam ang a, ka dam mai ang ti si kha ka khingbai tlat tawh a, thinlung nâ ang zâwng chuan ka dam tawh ngei a, mahse keimahah hian thil kim lo lian tak a awm tawh thung a ni.

Amah avangin ka ṭap tawh ngai lo va, ka thinlung a nâ tawh ngai lo va, ka lungngai ngai tawh bawk hek lo. Ka hriatrengnaah hian a châm reng a, theihnghilh tumin ka bei ngai lo va, amah hre reng chunga khawsak zirin lungâwi ka tum ta záwk a ni.

A sana min pek pawh kha tun thlengin ka la kawl ṭha reng a, ka la bun reng a, a chhiat palh ka hlau em em záwk ṭhin. A chhan chu ka thinlunga hmangaihna zawng zawng hi a tân khan ka lo hlan ral vek hman tlat a, kan mi hmangaih tak te hnen aṭanga thilpek kan ngàihhlut ang chiah hian ka ngâihlu a, ka roh em em bawk.

The End

Author's Note: Tunlâi chu short story bak hi ka ziak hman tak tak lo, long a nih chuan a mûang beuh beuh dâwn si a, min lo hrethiam rih mai teh u!