𝐒𝐀𝐍𝐆𝐒𝐀𝐍𝐆𝐈 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

SANGSANGI
(Mizo Short Story)

By

Havali Adam

Chhun pachan lâi taka chhuak ka ni bawk a, nî pawh a sâ ṭha vawl vawl hle a, chhuah ngei ngei ngâi lo ila zawng inah ka awm hle hle ni mai tur! Ka âwmah bâwk ruh deuh ṭulh a awm avangin ka nu'n civil hospital lama inentîr turin min nawr lui tlat a, inrinnî a lo ni vei kher bawk nen inentîrna hun remchâng tak pawh a ni rèng a, mahse ka phur tehchîam lo chu a ni.

Hospital ka thlen rualin OPD card láknaah ka intlar ve nghal a, ka rin ai inentîr tum an lo tam phian mai. Pathian zârah dam lohna avanga hospital chùankài hi ka nei khât khawp a, ṭhian leh hmêlhriat ṭha te dam lo kàna hospital kal châng erawh ka nei tam ang reng fû thung.

OPD card ka làk fel hnu chuan mûangchâng fahran lo hian ka inentîrna tur floor lam ka pan a, floor ka'n thleng chho chiah chu mi an lo ṭhu khat hmur a, ka tum angin ka haw vat thei dâwn lo tih ka hre tlang nghal vek bawk.

Nghen chhan nei lo ṭhuthlengah chuan ka ṭhu a, chapo arh ni si lo hian ka'n hawi kûal den den a, pitar putar, naupang, nu leh pa, nu tlangval thlengin kan awm kim hle a, a bîkin kum upa lam an tam fer fur viau a, chutah kan mi ràwn tur ber doctor lah chu a lo la thleng lo leh ta nghal a, lung pawh a tiâwi zàn lo khawp mai.

Dâr 9 rik hmâa OPD card là fel diam tawh si kha kan inentîr ṭan hun erawh dâr 10 leh a chanve pelhah dâwrh a ni lawi a, nurse ṭhenkhat leh duty ṭhenkhatte kâ aṭang doctor lo thlen har tur thu kan hre tawh tho nàin a lo thleng har mah mah lam hret chu a ni.

Kei chang ka ni lo, mi dang paw'n chutia doctor lo thlen hmâ zawng lo ṭhut ngawt ngawt chu an kham ve hlawm hle a, a bîk takin kum upa lam ho chu an khawngaihthlak lehzual! Kan doctor-i ber lah chu lo thleng ta e ti lo chuan a'n la che mûangchâng thiam em em zui a, a lo thlen aṭanga dârkâr chanve dâwnah inentîr tur te min ko lut chauh a, kum lamah ani ai upa ngat ila chuan inentîr pahin zilhna thu ka fah hlak ngei ang.

Dâr 11 leh a chanve rik dâwnah ka hun pawh a rawn inher chhuak ve ta nge nge a, mahse chuti maiin lut tura kohna ka dawng tlat lo mai. Amah kan doctor-i chu room aṭangin a rawn chhuak a, thingpui a in lawk tur thu sawi zaih zaih chung hian a kal sawn zui nghal a, a kum rualpui kan ni e, ni lo e, a tua mah zahna chhe tê mah a nei lo hrim hrim a ni ber.

Ka rilru a inlûm let thut a, step-a a pen thla sawk sawk chu ka um zui titih nghal a, eng anga thingpui in châk pawh ni rawh se, a thingpui in hmâ ngeia inentîr ka tum nghet bur a ni ber! A thu hrimah chhun chawlh a rawn ni ang a, thingpuite chu a duh tâwkin a in thei alawm, dam lo inentîr ngâi kan awm ṭhep ṭhup lâia thingpui in tur mai maia a chhuak tur chu ka ngaithiam îkhaw lo a ni hawt e.

"Min lo hrethiam teh ka pi....?" tia ka biakna chu a hre reng tih ka hria, mahse hre lo ang hmakin a ke chheh a tikhawtlai duh lo hrim hrim thung.

"Ka pi....?" ti leh ngatin a darah chuan ka vuan a, ka kuai her te pawh ti ila a dik záwk mah ang.

"Ka va hre ngai lo che ve?" ka lam a rawn hawi rual chuan a ti a, a ṭawngkam hman duh dan chu ka mil zâwng a ni hlawl lo.

"Hre lo tawp ang," ka ti lèt ve salh a, mi a en chìk râm râm sawt ta khawp mai.

"Eng nge?" awkâ dam fahran lo hian a rawn ti leh a, a awm dan chu ka hrethiam lo lek lek záwk, mipa ṭawngkam takin 'a pawr' nghal hlar ni berin ka hria.

"Inentîr tur kan la tam si a, thingpui in rih lova min tlàwmngaihsak theih hram chuan a lawmawm ngawt ang....?" hawihâwm ang reng tak hian ka ti chhuak sup a, doctor a nih mai bakah nuvalâi rual a nih tawh avangin zahna ka lantîr a ni ber.

"Ka rei dâwn pawh ni hlei lo, lo han ṭhu mai mai rawh, min hrethiam ve záwk teh u!" ti zat zata kal sawn mai a tum chu a darah bawk ka chelh leh a, a ding chiang khawp mai.

"Kan hrethiam viau che asin...." ka ti dek dek chu a meng ling nghal hlar a, ka mit ka lá sawn duh bîk ṭhak lo.

"Min thlah phawt mai teh!" ti deuh hmaka ka kut phih thlak a tum chu ka vuan nghet sauh a, ka mipa rilru a chhuak laklawh tawh tlat a tin a ni e.

"Security guard ka koh i duh em ni? Ka phalna là hmâsa hauh lova min khawih ringawt avang pawh hian ka report thei che asin, min thlah vat rawh!" a rawn ti leh chîam a, a ṭawngkam chuan ka thin a khei mai bakah ka chapona a kai tho chiang hle.

A dara ka chelhna chu thlahin a bân rèkah záwk ka chelh zawm zat a, eng a sawi hmâ hauhin ka kai chho zui nghal dawr dawr a, ka chet dan avang chuan mî mit ka là rang hle bawk. Kan doctor-i lah chu pâwngsual tàwk tur ang hrim hian a rak ang chîam leh ta nghal a, mipa tha tih takah tum nasa sa teh mah se ka kaihna aṭang chuan a tal chhuak lo chiang khawp mai.

"Engati nge ka pi?" room-a ka kaih luh hmawk hmawk lâi chuan duty pakhat hian a lo ti a, chhàn pawh a chhâng lo, thinrim eng phiarin a thinrimna chu ka chungah a leih bua a ni ber a, rap pawh a rapthlak miah miah khawp mai.

A ṭhutna tur taka ka ṭhut feltîr chawrh hnu chuan a ding leh nghal at a, hmeichhe pakhat hnenah chuan security guard ko turin a chah zui hrak a, ka hlau lo lutuk chu ka nui suk duh lek chauh! Inentîr tumna pawh ka nei tawh lo hrim hrim a, mahse a awm dan dik lo lutuk chu hriattîr a ngâiin ka hria.

A âng hlak hlak a, ṭawngna hman awm lo khawpin a ṭawngthei leh ta nghal a, ka chet dan avang chuan a lawm lo hle ni ngei tur a ni. Police te nen lam a sawi kâi zui zel a, kei lahin ka hlau chhe tê them si lo. Ka chet dan chu a dik lo tih ka hre ve tho; mahse, kei ai mahin a chet dan chu a dik lo záwk tih ka hre chiang em em thung.

"Enteh ka pi, inentîr turin mi tam tak kan lo kal a, pâwna ṭhu zîngah sawn thingtlâng khua aṭanga lo pan vang vang che pawh an awm nûal nghe nghe asin! Chutih lâia thingpui in tura i chhuah leh daih si te chuan a dik nàng, thingpui in hun te chu nakin lawkah a rawn inher chhuak dâwn tho tho a, chuvangin chawlh hun hmâ chu i hna thawk la ka tih vang a ni," pangngai tak hian ka ti a, tlâwm záwka ṭan mai loh chuan tih ngaihna awm hek lo.

"Chu....ka hna ka hre lo emaw i ti a ni maw?" a rawn ti vin fiah hrak a, chhàn ngaihna hre lawk lovin ka thaw chhuak hak ringawt!

"Ka hrilh ang che Vâla, doctor hna hi kum tam fê ka lo thawk tawh a, ka hna hre lo turah chuan min ngâi suh! Kei ang hian private clinic te neiin kar tawn zak zak ta la, i tlin kher lo ang. Ka fit viau záwk asin, chuvangin ka hna hre lo emaw chu mi ti hauh suh! Pâwna ṭhute saw tute nge an nih ka hre lo va, thingtlâng khua aṭangin an lo kal emaw kal lo emaw, ka buaina a ni hek lo," a ti zo chiah chu za lo zet hian ka nui nghawr dat a, mi a ei loh hmél teh e!

"Chu lam chu thuhran ni ta se, thingpui i in duh a nih paw'n i hnuaia thawk te hi i tîr thei reng alawm, nangmah kal kher lovin!" ka tih lâia a lungni lo hmêl chu en rei chì pawh a ni lo.

"Vâla, ka tih tur min hrilh a ngâi lo e!" tiin ngeiawm zet hian a nui hak hak a, chutih lâi vek chuan security guard pawh a lo thleng ta nge nge a, min pawh chhuah a tum chu ka lo duh der lo thung.

Security guard lah chu a hmêl aṭang reng reng paw'n a la naupang tih a hriat hle a, mi pawh a khawih ṭha lutuk ngam lo niin ka hria. Ka tih tum ber leh ka kal chhan ber pawh ti lovin hospital aṭang chuan ka haw a, buaina dang a awm tawh lo hlauh chu a thawventhlak huai bawk.

Ka in luah ka thlen rual rual chuan ka ṭhianpa pakhat hnen aṭangin call ka dawng a, a thu rawn sawi lah chu ka ngaih hoh chì tak a ni lehnghal a, kha doctor nu ka kai hmawk hmawk lâi kha video-a lo là tu an awm chu niin, facebook leh instagram tih velah a lo lar chîam a, ka hmêl pawh a lang chiang khawp mai.

Kan thusawi a hoh êm avangin kan inbe rei hran lo va, rei pawh ni lovah phone call ka dawng zui leh zat a, mahse chu erawh ka nu a ni tawh thung. Ka entîr tâk leh tâk loh te min rawn záwt a, a ngaih ṭhat nân tiin ka inentîr thu te, ka âwma bâwk awm chu thil hlauhawm a nih loh thut te ka hrilh a, ka phuahchawp a ni tih erawh a hriat loh hram ka beisei.

Chawhmâ chhûng zawng chu eng ti lem lovin ka awm vel ta mai mai a, chawhnu lamah erawh ka ngaih a ṭhat zán bîk loh avangin ka ṭhianpa, Ebenezer Hospital-a thawk mêk ka be pawp a, ka âwma bâwk awm chungchâng chu ka sawipui a, an hospital-a lêng tura min sâwm chuan hnialna nei miah lovin aw ka pawh vat a, kal turin ka che chhuak chu a ni zui nghal mai bawk.

Ebenezer hospital lam pana ka tlan lâi chuan civil hospital pan lo khan ka ṭhianpa lo be pawp vat záwk ila tih te ka ngaihtuah chhuak hnuhnawh a, pakhatah chuan ka nu khan civil hospital a rawn sawi avang khan ka rilruah ka ṭhianpa lam reng a lang tawh lo va, ka ngaih a sam bawk nen ka nu thusawi kha ka zawm mawl tawp a ni ber e.

Hospital kawt ka zu thleng chu ka ṭhianpa ka call a, rei lovah kan inhmu thuai a, private hospital tih takah civil ang em em chuan mi pawh an tam lo. Ka ṭhianpa office-ah awmin kan inkawm char char a, a specialist-na ni chiah lo mah se ka âwm chu a'n en vel a, ka ruh a len avanga bâwk awm a nih a rin thu a sawi chuan ka thaw huai a, en pawh ka inentîr rei lo.

Chutia kan titi mual mual lâi chuan a phone a phawrh deuh thut a, nui put put chung hian video pakhat min entîr a, chawhmâ lama thil thleng kha lo ni rengin, thil thlen dan ka hrilhfiah thuak thuak a, insawifiah ka tum pawh a ni lo. Amah záwk chuan kha doctor-i chanchin kha a rawn sawi chhunzawm a, civil hospital-a a thawh ve lâi pawh khan hrawn a lo nuam tehchîam lo ni tur a ni.

Tlai dâr 3 a ri hnai a, haw zâi ka rêl a, hospital kawta kan inbiak khawtawi lâi chuan ka mit là tak mai ka hmu hlawl a, ka en chian pôh leh amah ngei kha a ni tih ka hre chiang lehzual a, zep thu a cheng lo, ka mit chu ka lá sawn hleithei lo a ni ber e. Ka ṭhianpa min biakna tak pawh hre chang lék lovin ka en zui reng a, eng vanga hospital hnaiha hmu chu nge ka nih ka hre chiang châk viau bawk.

"I hmêlhriat em ni?" ka ṭhianpa aw chuan min tiharh zawk a, mahse ka hawi sawn phah chuang der lo.

"Immm....." tih bakin ka chhâng lo va, mit lá sawn lêk lova ka mi en reng nu chuan entu a nei tih a hria te pawh a ni mahnà; kan awmna lam a rawn hawi ta nge nge a, ka hmêl a hmu teh hlawl chu kei ang bawkin mak a ti tih a hriat khawp mai.

"A fel reuh asin aw....." ka ṭhianpa thusawi chuan ka beng a verh zar a, tu nge a nih a hria ni ngei tur a ni.

"Engtin nge i hriat?" ka ti chhumbung deuh hmuk a, ka aw ka thian zui kharh bawk.

"Kan hospital-ah hian a pa saw a rawn kalpui ṭhin alawm, fel zaih zaih tak a ni. Ka naute zînga ṭhenkhat phei chuan an hel ru reng mai, a chanchin lah an sawi bâng lo," a rawn tih leh chuan ka hawi sawn ve ta hram a, mahse a ngai tè bawkah ka mit chu a ṭuan leh rang hle.

"A nih nangin?"  ka tih chuan a rawn nui chhuak hawk hawk a, chutiang zawhna chu ka zawh a besei lo viau a ni ngei ang.

"Nupui ka nei tawh tih i theihnghilh ta em ni?" ka zawhna tak pawh chhâng lo hian a rawn ti a, mahse a sawi tum erawh ka hrethiam nghal mai thung.

"Nupui nei tawh pawh ni se hmeichhe hmêlṭhate chu mipa tân chuan a dan a dang alawm," ka ti zo chiah chu thu chhep sual ka nei tih ka inhre chhuak chawpchilh nghal a, chutiang bawkin ka ṭhianpa pawh chuan a rawn hre nghal chat bawk.

"Inhre satliah chu in ni lo a ni maw? Hmêlṭha i tih danah a hriat mai, ka hriat ve chì te a ni em?" a rawn ti deuh dû dù a, a nui vur vur ang leh ta nghal a, ka sawi loh tawp tur ka lo sawi palh kher kher chu a pawi tak tak a ni.

"Inhmêlhriat satliah mai chauh kan ni, i ngaih ang kha a ni lo," tia phàt ngial ka tum paw'n a awih duh der lo va, ka insawifiah zui zel duh ta bîk lo.

"A nih leh Delhi nula lam khà......? Eng nge chanchin?" tiin thu dangah a rawn pakâi a, ka kiai suk nghe nghe!

"A hlui tawh êm mai ṭhiana, kan inṭhenna a rei tawh alawm," ka lo ti ve mai a, ka hnam dang nula ngàihzàwng chungchâng a rawn sawi tâkah chuan ka mitthlâ lèt nghal ruai ruai alawm lè!

"A nih khami hnu khan i nei leh tawh miah lo em ni?" a rawn ti leh a, kan titi chu a hmàn sáwt viau bawk.

"Nang angin duh duh thing ve thei hek lo," ka tih chuan za lo zet hian a nui a, ngàihzâwng lam sawi lovin kan lehkha zir lâi vel kan sawi zui ta zel a, inthlah tum e ti lo chuan kan titi rei leh phian ang lawi a, dâr 4 dâwnah ka inthlah fel ve ta chauh nghe nghe!

Bike tiruma tlan chhuah zui nghal mai ka tum chu ka mitthlâah chiang zet hian hmeichhe pakhat hmêl a rawn lang a, eng ka ti ta nge pawh ka hre lo, haw tum vek tawh si chu tlanchhuah nachâng hre lo ang hrim hian bike-ah ka ṭhu ngâwi reng a, zep thu a cheng lo, hospital aṭanga an lo chhuah leh hun ka chang a ni ber e.

Rei táwk fang ka nghak ta reng a, khaw thim dâwn hnaihah ka mi nghah ber nu pawh chu a rawn chhuak ve ta nge nge a, a bula kal chu a pa a ni a, dam lohna nei tih hriat tak hian a hmêl a dâng hle a, hmâna ka hmuh ṭhin dan ang lo takin a cher deuh kûam bawk.

Ka nghak ta sa sa ti rilru nuah nuah chungin an awmna lam chu ka pan a, ka hnaih zel a, hmâna ka hriat ṭhin Sangsangi záwk ngei chuan a pa ai min rawn hmu hmâsa a, ka lo en chiang ngàng bawk nen a mit chu a là sawn rang hle a, an bul hnaih taka ka din tâk hnuah phei chuan min melh ṭha ngam lo hrim hrim a tih theih!

"Pa....." ti sepin Sangsangi chuan a pa chu a nghawk zeuh a, a pa lo hawi chhuak chuan min hmu ta chat bawk.

"Inhmuh a va khât ve pu Zui?" tiin ka kut chu a lamah ka phar zui zat a, kan inchibai lâi te chuan mak ti deuh si, hmêl hmuh hrehawm si loh hian min en a, chu lâi hmuna kan inhmu teh daih chu mak a ti ni ngei tur a ni.

"I lo haw a ni maw?" pu Zuia chuan a rawn ti dap a, inhmu khât hle mah ila khaw khat chhuak tih takah kan inpawh nghal viauin ka hria.

"Nia.....hei....ka rawn haw lawk...." ka lo ti ve leh mai a, Sangsangi záwk chu en châk ru viau mah ila a pa hmâah zawng a rem chiah lo chu a ni e.

"I chanchinte kan lo ral hriat ve ṭhin a, kan khaw mi leh sa nih i tinuam ṭhin khawp mai, han ṭang sauh sauh teh khai....! pu Zuia chuan a rawn ti leh dap dap a, chhàn dan tur pawh ka hre chiah lo, ka nui tawi suk ringawt!

"I dam lo em ni?" ka ti deuh tawl a, ka zawhna zawh dan chu ka inthlahrung leh hnuhnawh ang reng khawp mai.

"À.....dam lo tih lemah, tunlâi chu chuap lam harsatna ka nei a, chu mai mai chu maw le," a rawn tih chuan ka lo bu nghat a, ngaihsam hmêl takin lang mah se eng emaw a awm tlatin ka hria.

"A va zia lo ve...." tiin a fanu chu ka melh pah zeuh a, a pa nena kan inbiakna a lo ngâithla deuh tawp niin a lang!

"A nih nang, i dam ṭha maw? Hospital hnaiha inhmuh hi chuan ngaihtuahna hi a kal thui duh teh mai a nia, kal chhan deuh bîk te i nei ve lo maw?" pu Zuia chuan a rawn ti zàngkhài leh vuah a, ka kal chhan dik tak chu ka hrilh ṭha ve nghal mai bawk.

"I dam maw Sangsang?" ka ti deuh thut a, biak loh tawp zawng thil dik nia ka hriat loh vang a ni pakhat!

"Immm.....dam e, nang záwk?" rawn ti lèt ve nghal zatin a nui lui seih a, mahse a nui rei lo khawp mai.

"Immm....." tih bakin ka chhâng lo thung.

Rei inbe tawh lovin pu Zuiate pafa chu an inkhalh haw a, kei pawh Châltlâng lam panin kan tlan haw zui nal nal a, ka in luah ka luh fel hnu chuan ei rawng ka bâwl nghal mawlh mawlh a, Sangsangite pafa nena kan inbiak kha chu thuhran ni se, ka ṭhianpa nen záwka eng eng emaw ni kan sawi dun leh duah kha min tikhawtlai zualtu niin ka hria.

Amaherawhchu, khatiang khan hospital kawtah inbe lo ta ang ni ila, Sangsangite pafa kha ka hmu kher ka ring lo. Chawhmeh ka siam lâi te chuan tum em em ni si lo hian ka ngaihtuah zui rauh rauh a, pu Zuia ai mahin a fanu Sangsangi záwkin rilruah hmun a chang tam a, ngaihtuah zui theih tur táwk vel lekin sulhnu themlem kan lo nei ve khanglang tawh bawk nen han ngaihtuah zui vung vung loh ngawt theih pawh a ni bîk lo.

Khaw khat chhuak kan ni a, mahse khaw khat chhuak e ti lo chuan Aizawl lamah an awm tam hle thung a, kan khuaah nà nâ ná chuan an awm thei filawr lak a, a pu hi kan khaw primary school-a headmaster hna chelh reng ṭhin a ni a, a pa unaute pawh zirtîrtu an ni deuh fur a, a ṭhen pastor an ni bawk a, an hna chelhin a lo zir hlawm bawk nen chhûngkaw zahawm tak pawh an ni!

A pa ber hi kan khuaah a awm tam lo hle a, Aizawl lamah hna nghet a nei a, christmas leh eng emaw ni chânga lo zin chhoh tih loh chu kan khaw lamah an rawn tal ngai meuh lo a tih theih hial àwm e. Amah Sangsangi tak pawh a pa bulah a awm chawt a, a pa nupuite nen an awmho a, a chângin a patea te bulah a awm leh zauh ṭhin bawk a, amah ka hriatna tak phei hi chu a rei tawh ang reng!

Ka mit a làk em em nî te kha ka la hre reng mai, chawlhnî tlai a ni nghe nghe a, a ûte nena inkhelhho ṭhin na ta fam chu inhmuh inhmuh loh theih a ni bîk lo va, ka duh ang tih ngaihna pawh ka hre lo, mahse ka duh ru veng veng kha a nia, bul ka ṭan dan mawlh te kha han ngaihtuah chhuah leh tâkah chuan a zahthlak hnuhnawh duh ang reng khawp mai.

Christmas boruak vuakvet a ni a, chawlhnî tlaia lêng pawh kan tam hle a, kan khaw field leh a chhehvel tlângah chuan nula tlangval, tleirawl leh naupang chenin kan awm niah niah hlawm a, khami ṭuma Sangsangi han hmèlṭhat fàl bîkzia kha âw, tun thleng hian ka la mitthlâ lèt vang vang thei.

A tirah chuan ka be hmâsa duh bîk lawk lo va, min hmèlhriat loh en lo tih erawh ka hre vek thung. A û ṭhianpa ka ni bawk nen a laka ka rilru puthmang ang kha chu a nei lo tih ka chiang em em a, ka tân a naupang mah mah tih pawh ka hria, mahse hmèlṭha ka tihna te, ka ngaihtuahna a luah zui ta reng te kha keia tihreh theih a lo ni awzâwng lo.

Ṭum khat phei chu local football tourament-ah a ûte ho nen team khata insiamin kan tel ve a, kan inkhelh apiang khan a lo ṭang ve thei em em a, thei tui te, tui pangngai leh ei tur chenin min lo buaipuisak zung zung a, a hmêlṭhat chu thuhran ni se, a che vel hrim hrim khan ka mit a lâ pumhlum ṭhak a, inkhel tur ni lo ila chuan substitution ṭhutnaa ṭhut char char ka nàp hial a nih kha!

A û phone aṭangin a phone number te ka là ru ta hial a, a û ka'n ti tak nà chu a pa unaupa fapa a ni a, unau mah ni se unau pianghmun erawh an ni lem lo. Chutia a phone number ka'n nei ta chu ka be lawk leh ta chuang lo va, thla khat dâwn mai be lovin ka awm a, Delhi lamah ka chhuk thla fel than tawh nghe nghe bawk.

Zirna avangin phâi lamah hun ka hmang tam mah záwk a, ka pa hi kan khaw middle school-ah zirtîrtu hna a thawk ve a, chu chu kan chhûngkaw eizawnna ber pawh a ni. Pathian zârah min duhsaktu ka tawng lehzel a, kan pawisa neihin tlin lo mah se min duhsaktute puihna azârah phâia lekha zîr turin ka thlawk thla ve rawih kha a ni a, a nihna takah chuan Mizorama zirna chhunzawm mai kha ka rilruk tawh záwk a, mahse ka pa'n phâi lama zir tura min nawr luih tâk tlat si ah chuan kei paw'n a thu ka zawm leh ta záwk a ni.

B.A ka final year kum a ni tawh a, Sangsangi pawh ka be ve ta nge nge a, mahse message-in bul ka ṭan phawt thung. Kan inbe chho zel a, ka rin ai min lo dawngsawng ṭha daih a, nula leh tlangval inbiak dan rawngkâia kan inbiak ngai loh vangte pawh a ni maithei.

Ka awmna hmun chanchin te min záwt a, a nawm leh nawm loh thu te, a lúm leh lùm loh te thlengin min záwt ṭhin a, chutiang chuan thla 2 leh a chanve dâwn kan inbia a, mahse a hnu lam erawh a dan a dang ta deuh!

Bul ka ṭan hmâsak loh chuan a ni lo lam zâwngin thil a kal thei tih ka hre ru ran a, phone call ngeiin a bêng hriatah ka duh thu chu ka hrilh ta piap mai a, zah pawh ka zak ve reng, mahse ka hrilh lo a nih chuan ka awm hle hle thei tlat lo a tin a ni!

Ka duh thu ka hrilh tlai chuan ka ṭawng bah nuaih lehnghal a, ani lah a ngâwi reng tawh mai bawk si, mawl ka intihnuhnawh leh thul, a chângin pawi lo ka ti leh ang lawi bawk a, khatiang taka ka rilru a inthlak nasat kha ka la hre lo.

A û ṭhianpa ka nih avang chauha ka biakna te chhâng ṭhin a nih thu a rawn sawi a, ka lakah eng rilru mah a pû lo tih pawh a chiang khawp mai. Chumi nî aṭang chuan ka be zui tawh lo hrim hrim a, number te chu la innei tawn reng mah ila inhre ngai lo ang vel kan ni tawh a, min duh lo tu biak reng chu ṭula ka hriat loh avanga be zui tawh lo ka ni ber!

Hun a liam a, ka ngaihtuahna leh ka rilruah a la châm ru veng veng ṭhin tih ka phâ hauh lo, mahse biak erawh ka tum tawh lo bur. Tha han thawh thar leh chu tlàwmah ka là tlat tawh a, hnam dang ngáihzáwngte ka nei chho ṭan a, eng ka nih bîk loh tehreng nen min duh huam huamtu ka tawng chho ve ta bek bek a, mahse ngàihzâwng ka neih lâi reng paw'n ka rilru chhûngril takah chuan Sangsangi bawk a awm ru reng ṭhin.

"Ê....kha....i va buai àwm ve?" kawngka hawng paha ka in luahna nuin a rawn tih chuan nui suk hian a lam ka hawi a, ka chaw eina thleng ka sil zo vel chiah bawk.

"Buai lo e, lo ṭhu rawh," ka lo ti a, zanriah ka ei tlai tih chu a hriatthiam nghal mai pawh ka ring.

"Naktukah chuan em ni in khaw lama chhoh chu i tum tâk?" ṭhu lem chuang lo hian a rawn ti a, a inchei dan aṭang chuan an inkhawm bâng vel chiah a nih hmêl!

"Aw, mahse rei ka chàm hman ka ring lo, ka lo chhuk thla leh thuai ang," ka ti ve leh ta dut dut a, ka hun hman dan tur ka chhut láwk vek tawh avanga chutianga chhâng chu ka ni!

"Delhi lama i chhuk thlak leh hmâin chaw lo ei ang che," thupe ni si lo, hawihawm leh zahawm tak, zawm loh ngam ni si lo hian a rawn ti a, a nui deuh var var bawk.

"Tehreng mai," ka tih chuan eng eng emaw ni a sawi zawm a, rei pawh a awm zui chuang lo.

Ka nute ka biak hnuah mut zâi ka rêl nghal der a, mutnaah chuan Sangsangi nena kan hun kal tawh bawk kha ka ngaihtuah chhuak leh a, ka duh thu ka hrilh hnua kan inbiak zui tâk miah loh dan te, inhmuh nikhua pawha zak hmêl taka a awm tlat ṭhin te, tun thlenga ka la vei ruk reng dan te chu ka ngaihtuah nauh nauh a, kum lo liam ve leh duai tawh mah se ka rilru chhûngril aṭang hian ka la paih chhuah hleithei lo chu a nih hi màw!

Khua a rawn vâr a, kan khaw lam panin ka zîng chhuah a, chawhmâ dâr 10 velah kan khua ka thleng a, kan in ngeia ka'n awm leh te chu a hahdamthlak a, a thlamuanthlak hle bawk. Ka haw tih hriaa kan ina lo lêng lut te pawh an awm nghal diah diah a, Pathian malsawmna azârah kan khuaah hi chuan zirnaa thleng sâng ber ka ni ve a, tunah hian Ph.D ka buaipui mêk a, doctorate degree ka nei thei hlauh a nih chuan kan khua aṭanga doctorate degree nei hmâsa ber ka ni dâwn nghe nghe bawk.

Kan khuaa ka chàm chhûng zawng chuan lòah te, leiletah te, ka pa sangha dil enkawlah te ka kar tawn zak zak a, kâr khat vel awrh chauh ka châm hman a, hun thawl tam deuh se chu chàm reng pawh a châkawm khawp mai. Aizawl ka thlen thlak tukah vek Delhi lam ka pan tlang nghal a, ka supervisor-in thil pawimawha min hmuh a duh vang a ni a, ka in luah neitute nen pawh chawhlui kan kilho hman loh phah nghe nghe a, mahse ka haw chhoh leh hmâsak bera ka ei tur thu ka tiam thung.

A nihna takah chuan Mizorama ka haw chhan pawh hi Mizoram University-a recruitment a awm vang a ni ber a, mi dang erawh ka la hrilh chiang duh rih lo law law, ka hna dilah ka tling dâwn nge dâwn lo hriat a ni lo tlat! Hrilh ta ila, ka tlin loh chuan an rilru a nàt mai mai ka hlau a ni.

Delhi ka thleng thla chu ka supervisor nen kan inkawm nghal a, ka thesis buaipui chhoh zel dan tur te, ṭha leh dik záwk te, taima taka bawh zui zel tur te chuan min chah a, kei paw'n a thu chu ka là thutak khawp mai.

Thla chanve tling lo hret Delhi-ah chuan ka châm hman ang tihah Mizoram lam aṭangin hriattîrna ka dawng ta tlat mai, Mizoram University-a ka hna dilah khan ka lo tling chu niin, a rang thei ang bera thlawh haw nghal ka rilruk a, ka chhûngte erawh ka la hrilh leh ta chuang lo, hmaichhan ngeia hrilh ka duh vang a ni pakhat!

Amaherawhchu, hriattîr lova awm reng zawng dikin ka hre tlat lo va, ka hrilh ta nge nge a, lawm ve tak an ni! Kei ai mahin an lawm záwk emaw tih tur a ni a, ka pa phei chu a nui deuh rengin ka hria. Ka ṭhiante hnen aṭang paw'n phone call leh message hmangin lawmpuina ka dawng mawlh mawlh a, Assistant Professor ka han ni ve tak tak tur chu kei ngei paw'n mak ka ti!

Mizoram ka thlen hmâ hauhin kan khuaah ka chanchin a lo thang nasa hman hle a, kan khua aṭanga Assistant professor ni hmâsa ber ka nihna te chuan a hlutna a tizual a, ka nu leh pa, ka naute hmêl ka'n hmu chiah phei chu kei lètin an lo lawm záwk tih hai rual a ni lo va, ṭhenawm khawvêngte aṭangin chibai pawh ka dawng nasa khawp mai.

Nimahsela, kan hlim lâi tak e ti lo chuan thu thin ṭhawng lamin beng a rawn thleng ta tlat mai le! Sangsangi pa, pu Zuia a zual hle a ni tih ka han hre chiah chu pu Zuia ai mahin Sangsangi záwk ka ngaihtuahnaah a rawn lut nghal chat a, mi ṭhenkhat sawi dan chuan pu Zuia chu thi thei reng dinhmunah a ding tawh a ni àwm e.

Aizawl lama ka ṭhianpa, Ebenezer hospital-a thawk ka call nghal vat a, Sangsangi pa chanchin ka zàwt chiah tihah mihring a chan tawh loh thu a rawn sawi a, khaw chhûng lamah pawh pu Zuia thih thu chuan boruak a luah zui nghal bawk.

Ka nute sawi dan chuan a dam lohna a lo rei tawh viau a ni àwm e, kei lahin engmah ka lo hre ve hauh si lo. Hospital kawta kan inhmuh ṭuma a hmêl cher kuam te kha a àwm lo lo ve, a lo dam lo nâ ru êm mai!

Chumi zan vek chuan a ruang paw'n kan khua a rawn thleng a, a pa ruang bawha Sangsangi ṭap hmêl te chu ka en rei thei lo, thlamuan ka châk a, mahse ka thlamuan thei bawk si lo. Ka thiam ang táwkin biak dan ka zawng ru ngar ngar a, mahse hun remchâng a awm ngàng lo a ni.

A tukah chuan kan khaw pastor-in a vui liam a, Sangsangi chu a ṭap nasa leh hle a, kei chang ka ni lo, mi dang paw'n an lainat hlawm em em a, thisen zawmpui dik tak a nei mumal lo tur chu ka tha a lo nâ ve vawng vawng thei.

Nilêngin ka rilruah a riak reng a, a phone number ka la nei reng a ni tih hre chhuakin call te chu ka tum thul, mahse a sârhu lâi a la ni a, biak ka inthlahrung leh deuh bawk si, ka awm dan chu a khingbai deuh nuaih a ni ber.

Nî a ral a, kan khuaah pawh châm rei lovin Aizawl lamah an chhuk thla leh ta daih a, a patea te bulah a awm dâwn tih thute ka hre zui leh ta zel a, call pawh ka tum leh ta lo law law mai. Chu bakah a phone number a lo thlak daih thei tawh a, ka phone number pawh a nei tawh bîk kherin ka ring lo.

Kâr khat hnuah chuan Aizawl lamah ka ṭuan thla ve leh ta nge nge a, ka inluah neitute inah pawh chaw ka ei ta ngei a, chhûngkaw fel tak chu an niin ka hria. Ph. D ka buaipui tirh lâi vel aṭanga luah ṭan kha ka ni a, Delhi lama awm deuh vang vangte ka ngaih ṭhin avangin luah loh thla pawh ka ngah viau a, mahse chuti chung pawh chuan eng harsatna mah min siam ngai lo va, ka awm loh thla a nih hi chuan in luah man chanve bak an là duh ngai lo va, ka tân tak pawh a inthlahrunawm duh ṭhin khawp mai.

Thla a liam a, kei paw'n ka hna thar ka zawm ve ta! Thesis buaipui pah reng ka nih avangin hun awl ka nei mang lo hle a, ka chhûngte paw'n inenkawl ṭha turin min chah nasat phah hle. Tin, ka nu leh pa remtihna thlapin ka naute pahnih ka awmpui a, Aizawlah school ka kaltîr a, anni paw'n nuam an ti chho ṭan hle chuan ka hria.

Thil dang zawng aia mak ka tih pakhat chu ka student te zîngah Sangsangi ngei mai a tel ve tlat a, hna ka zawm nîa kan inhmuh te khan kei ai mak a ti záwk mah a, ka be hmâsa hial nghe nghe a nih kha!

B.Ed leh M.Ed student ho ka zirtîr deuh ber a, programme planning lamah chhawr ka hlawh ang reng hle bawk a, Sangsangi nen pawh zirlai leh zirtirtu nà nâ ná chu kan inhmu fô va, ka laka a kimki ta lutuk erawh mak ka ti ru leh vung vung ṭhin.

Ka laka a zah viauna chhan tur ka hre bawk si lo, a be hmâsatu záwkah ka ṭang zel a, ka la duh ru reng tih chu ka pha hauh lo, mahse lantîr erawh ka tum tawh hauh lo thung. B.Ed a zir chhan te ka zàwt a, zirtirtu nih a lo châk ve hle chu niin, a hmâ ai mah khan a hmêlṭha lehzual tih hai rual a ni lo va, chu tak te chu min hip zualtu a ni ka ti lo thei lo.

Ni khat chu faculty hovin thil kan ei khawm lâiin ka hmu fuh leh nawlh a, a bâna a sana bun chu a en leh zawk ṭhin a, hman hmawh ruk hmêl deuh hian a awm a, a awm dan chuan ka ngaih a tiṭha zàn lo hle bawk.

"Ei rawh sir, i la ei mang paw'n ka hre lo," miss Jenny-i chuan a rawn ti a, ka hawi sawn zawk phah nghe nghe!

"Chawhnu class i nei em khà sir....?" miss Jenny-i bawk chuan a rawn tih zawm leh zat a, a zawhna ka bengkhawn ru reng náin ka mit erawh Sangsangi awmna lamah a bur chat thung.

"Nei lo e...." ka ti liam puat a, ka awm dan ka thlak lo hrim hrim bawk.

"A nih chuan haw rual ila, kei paw'n ka nei tawh lo a," zàngkhài ang reng tak hian a rawn ti zar zar a, chhâng lovin ka ṭhutna aṭang chuan ka tho deuh thut a, mak pawh an tih hlawm viau ka ring.

Ka thawhpuite chu engmah hrilh lovin ka kalsan pawk pawk a, Sangsangi awm dan mawlh chuan ka ngaih a tiṭha lo miau a, ka rilruah thil dang a lut thei rih lo a ni ber. A dinna bul ka thlen dâwn hnaihah min rawn hmu a, a hamhaih hmèl viau nghe nghe!

"Buaina i nei em?" ka ti bul deuh sup a, ka zawhna zawh dan chu hriat a nuam tehchîam lo maithei a ni.

"Aih....nei lo....nei lo e...." a rawn ti ve mai a, mahse eng emaw tak a awm tih ka hrethiam vek thung.

"Nei i va ang si ve?" ka tih chuan a ngâwi hle hle a, hmâ lam a melh ding ngar bawk.

"Haw i duh em ni?" ka ti chhuak leh sup a, mi a rawn en zawk dan aṭang chuan a rilrua awm tak ka sawi ni ngei tur a ni.

"Immm....mahse min ngaihtuah suh, ka ṭhianpa'n min thlah dâwn a...." a rawn ti ta sep a, min chhàn dan ber kher chu a lawmawm lem loh khawp mai.

"A nih chu...." ti thum supin ka kal sawn zui nul nul a, ka thawhpuite bul ka thlen chuan miss Jenny-i bawkin min lo be hmâsa leh ber a, Sangsangi lam reng ngaihtuah zui ka tum tawh lo hrim hrim bawk.

Thil kan ei zawh hnu chuan miss Jenny-in dawra kalpuiah min sâwm a, ka kalpui ve mai a, dawr hi bus terminal lama awm a ni a, kan department aṭangin a hlâ hran lo va, mahse bike-in kan inphur chhuak tho thung a, thlen pawh kan thleng phei har lo hle.

Miss Jenny-in thil a lei lâi chuan dawr kawtah ka lo awm a, tum loh deuha Sangsangi ka hmu leh hlawl a, ka ngaihtuah zui ta miah lo kha a ni a, a haw daih tawh ka rin vei nen, a la haw miah lo chu mak ka ti ru khawp mai.

Ka dawr kalpui ber a inlei zawh tâkah chuan kan department lamah kan inphur phei a, mahse bus terminal lamah ka tlan lèt lehnghal thuai thung. Miss Jenny-i tak paw'n ka chet dan chu mak a ti a, mahse ani mak tih leh tih loh ka ngaihtuah sî sê hman tawh lo.

"I haw daih tawh turah ka lo ngâi asin....?" ka aw a hriat rualin Sangsangi chuan min rawn en thuai a, hlauthawng ang hrim hian a phu zawk nghe nghe!

"Engati nge i la haw loh?" ka ti leh a, ka din hnaih salh bawk.

"Bus a tlan chhuak hman chiah chiah a, ka nang hman lo alawm maw le," pangngai tak hian a rawn ti sep a, min chhàn teh daih chu ka rin loh lam tak a ni.

"I ṭhianpa'n a phur haw dâwn che a ni lo'm ni? Engati nge bus-a haw i tum leh si?" ka ti deuh ngat a, ka aw chu hriat a nuam zawk zawk dâwn lo tih ka chiang!

Ka zawhna hre vek mah se min chhâng tawh lo hrim hrim a, kan ngâwi dun vang vang nghe nghe a, nichîna ngaihven ka tum lâi khan ṭha takin haw a duh thu min hrilh ni se chuan ka phur haw daih tawh ang, mahse ani erawhin ka chapona kai tho táwk chiahin min chhâng záwk si a nih kha lè!

"Rawn chûang rawh!" ka aw chu a nêm hran lo va, khauh hmuk leh nèlawm loh pawh a ni chuang hek lo.

"I buai lo em ni?" a rawn ti tîm dai a, a mit taka ka en rual chuan a hawi sawn rang khawp mai.

"Chawhnu class ka nei lo," ka ti hniam sup a, ka bike chu ka tirum zui nghal vut vut a, mahse ani erawh a rawn chûang lawk lo thung.

"Eng lo....ih....u Remrema a accident a, dik tak chuan tihbuai che ka hreh a, ka sawi awmzia chu ka inthlahrung a...." a rawn ti bah deuh niah niah a, ngampa lo zet hian min melh pah zeuh zeuh bawk.

"Min mi hrang en vang a nih dâwn chu!" ka ti tawi dut a, ka sawi zo vek tawh náin ka sawi tum tak pawh a ni em em bîk lo.

"Chutiangin ka mi hrang en lo che.....ih....eng lo...." a rawn ti nawi leh nak nak a, ka ṭawngkam chheh sual azârah ani pawh a tum loh dan deuhin a rawn ṭawng ve ni maiin ka hria.

"Eng pawh ni se, lo chûang rawh, kal ang, khawi damdawi inah nge Rema chu a awm mêk? A nâ em?" ka tih tâkah chuan a rawn chûang a, Rema awmna damdawi in hming pawh min hrilh ve nghal mai bawk.

Mizoram University campus kan pel fel chiah tihah miss Jenny-i hnen aṭangin phone call ka dawng a, mangnghilh palh ka nei tih ka hre chhuak chawpchilh nghal a, ka haw hmà thut a ngaih thu ka hrilh tak nà chu rilru erawh a nuam zàn lo khawp mai.

Ka ruala haw a duh thu kha a sawi ngei a, mahse kei lah chuan Sangsangi ka phur haw ta daih mai bawk si, min hmuh dan a dan phah sawt maithei a ni. Ka mi phur Sangsangi nen lah chuan inbiak pawh kan inbe zui tawh lo hrim hrim a, amah ka duh vang leh ka ngaihven vang ai mahin khaw khat kan nih avanga phur haw ta ni angah te ka inchan rum rum a, mahse chu ngawt chu a ni lo tih erawh ka hre chiang viau thung.

Falkawn hospital lam kan pan zel a, inbe lova awm reng chu dikin ka hre lo va, a be hmâsatu záwkah ka ṭang leh ta nge nge a, mi dang bulah a zakzum paw'n ka hre si lo va, ka bul a nih tâk avanga ngàwih a chuh tlat ṭhin chu mak ka tih rualin a chhan hriat chian ka châk khawp mai.

Hospital kawt kan thlen hnu chuan chhûng lamah kan lut zui nghal a, a patea leh a nupuiin an lo awmpui a, Rema ber chu harh chiang mang hlei lo hian a lo mu bâm a, a ke ruh a tliak tih te, doctor te'n an zai zo chiah tih te chu kan hre zui ta zel a, a lan dan chuan a accident nâ thawkhat viau a nih hmêl!

An zînga rei mâwi táwk ka awm ve tâk reng hnu chuan haw zâi ka rêl a, hospital kawt ka thleng ta maw tihah Sangsangin min lo zui tih ka hre ve chiah a, ward ka chhuahsan khan min zui àwm rèng ka hre hauh si lo, chutia hospital kawt ka thlen hnua a hmêl ka'n hmu leh deuh thut si chu mak pawh ka ti hman hle a ni.

"Ka lawm e u Zothan...." a rawn tih chuan ka lo bu nghat a, sawi duh chu ka nei reng; mahse, sawi erawh a hun chiah lovin ka hria.

"Inenkawl ṭha ang che," tih leh ka bike hùnna lam pan ka rual a, ka ṭawngkam hman ber kher avang chuan ka la duh ru reng a ni tih a hriat ka hlau hnuhnawh leh hle ang lawi a, hmân ata tawh, a bula ka awm apiang hian tum loh deuhin ka awm ve ziah tih phàt rual a ni lo.

In ka thlen chuan ka naute pahnih paw'n school an lo bâng ve ve tawh a, fridge-a mi thei tui vawt ka siamsak a, ka nute nen an inbe leh tê tê phawt a, chumi hnu chuan an inbual fai ve ta chauh bawk. Kum lamah an la nâu viau e ti lo hian an tlei phian a, mipa ve ve an nih vang nge pawh ka hre lo, awmpui an harsa lo dun khawp mai.

Ei rawngbàwl pahin miss Jenny-i ka bia a, thuphâ chàwi ka duh vang a ni ber a, ani lah chuan engah mah a lo ngâi tawh lo chu niin, awm pawh a nuam nghal huai thei! Ei rawng ka bàwl zawh hnu chuan ka inbual a, ka naute pahnih erawh chhun lama an school kalnaah an chau deuh a ni ang, an muhil ve ve a, chaw ei dâwn têa kaih thawh ka ti ta law law mai.

Ka inbual zo chu ka thesis lam ka buaipui chhunzawm thuak thuak a, mahse khua a rawn thim thuai avangin ka khawih tam hman hran lo. Zanriah ei kham aṭanga rei pawh ni lovah ka bur lehnghal char char a, zawh fel nân kum 3 leh a chanve lâi ka la nei a, mahse ka supervisor-in a sawi ang khan bul ka ṭan ṭhat chuan a tawpah ka hahdam dâwn tih ka hre ran a, chuvanga bei ngawrh nghal em em pawh chu ka ni!

Dâr 10 pelh hnu fê ah thil hriat chhuah ka nei zawk a, ka phone chu khawihin hmân aṭanga ka la save ngar ngar, Sangsangi phone number chu ka hmet chhuak a, ka save dan pawh a lo la ngai reng a, mahse chu number chu a la hmang char char kher ang em tih erawh ka hre bîk hauh lo thung.

Ka call aṭanga rei lovah a ring ri ka hre nghal a, tu nge min lo chhâng ang tih mawlh chuan ka rilru a luah hneh hle bawk.

"Hello.....?" hmeichhe aw hian a rawn ti dam diai a, chu aw chu ka hai lo, Sangsangi aw ngei a ni.

"Eng nge in an?" ka ti hniam sup a, ka ṭawng ring lo nàin ka ṭawng fiah loh phah chuang hauh lo.

"Tu nge áw....? Min hrethiam la, ka va'n hre mai lo che?" a rawn ti leh sap a, ka phone number a nei tawh lo ni ngei tur a ni.

"Rema eng nge a an?" tiin tu nge ka nih pawh chu ka sawi chiang chuang bík lem hlei lo va, min hre lo a nih chuan min hre lo law law mah se pawi tihna ka nei lo a ni ber.

"E....nangmah elo u Zothan?" a rawn ti deuh hliai a, ka aw aṭangin tu nge ka nih a hre chhuak thut te pawh a ni mah nà le!

"A rawn harh ṭha tawh e, a ngaihtuahawm tawh loh," amah bawk chuan a rawn tih zawm leh zat a, sawi tur ka vàn ta khawp mai.

"A ṭhat chu.....!" tih bak han sawi mai tur ka hre tawh lo chu a ni nghal der a, ani pawh a ngâwi reng ve tho.

"Muttui le...." kan ngàwih dun vang vang hnu chuan keimah záwkin ka ti thum leh dap a, kan inbiakna chu ka hmet tawp zui nghal daih bawk.

Ka thaw deuh huai a, ka thil buaipui lâi ka buaipui chhunzawm zat nà chu ka rilru leh mitthlâah erawh amah ngawr ngawr a awm thung a, kum a liam duai tawh e ti lo chuan ka duhna erawh a la reh hleithei hauh si lo, a mak ve ngawt mai, hetiang taka hmeichhe duh rei hi ka neih àwm pawh ka hre lo; min duh lo tu lehnghal!

A tukah chuan a ngaite bawkin university lamah hun ka hmang leh chawt a, Sangsangi nen pawh kan inhmu leh ngei a, mi dang bula hlim thei viau si, ka bula a kimki chawih chawih ṭhin tlat erawh ka la hrethiam lo tluang zel a, zawh chian hun pawh ka la nei dâwn khawp mai.

Kan thawhpui pakhat lah hian a ngâizâwng tlata hriatna ka nei lehnghal a, a classmate mipaho bula a awm pawh tih tawh nàk a laiin, faculty zînga miin a hnimhnai lehzel a nih ngat chuan ka awm mai mai theih ka ring lo, mipa dang thik luatah ka awm dan zawng zawng a danglam vek hial a nia ka rin ni!

Thlithlai ru reng chungin nîtin hun ka hmang ral ṭhin a ni hawt a, class ka neih loh lâi paw'n ka ngaihven ru reng zel a, a vawi hnihna atâna tha thawh leh mai te chu ka châk rum rum ṭhin a, mahse hnawl nih nawn leh ka hlau tho bawk si, duh reng chunga engah mah ngâi tawh lo ang taka awm chu a awlsam tehchîam lo ṭhin hle.

Ka hnathawhna lamah ka tluang viau a, ka thesis lam pawh hmâ ka sawn chho ve zel a, Delhi-a zin thlak a ngâi leh zauh ṭhin tih loh chu thil buaithlak a awm hran lo. Ka buaina ber leh ka rilru kaptu ber ni ta záwk chu tu dang ni lovin Sangsangi a ni a, mut hmunah nen lam ka suangtuah zui veng veng ṭhin a, ka la duh reng thu hrilh leh mai te chu ka nàp thul, rilru a tibuai ru ang reng khawp mai.

Ṭum khat phei chu class ka làk lâiin a lo muthlu bâm reuh a, hmu ru rengin ka hmu lo der char char a, hauh pawh ka hau lo, kaih thawh pawh ka kai tho hek lo. A awm awmin ka awmtîr tawp a, a mut a chhuak tawngkhawng hle ni turah ka ngâi hmiah bawk.

Hun leh nî a inher liam zel a, thla 4 dâwn ka thawh tâkah chuan beisei loh deuhin miss Jenny-i nen hmehbel kan hlawh viau a, kei tak phei chuan ka nuih liampui vel mai mai a, mahse miss Jenny-i záwk erawhin nuam a lo ti viau chu niin, ka bulah a tal tam phah sawt a, mi dangte ngaihbel theih tura awm pawh a thiam hle.

Ka thawh tirh aṭang tawh khan min haw lo tih ka hre daih tawh a, duh ngat ila zawng thil thui tak pawh ka thlenpui theih ka ring. Amaherawhchu, ka hmeichhe duh chì a ni tlat lo va, ka tân chuan Sangsangi khum zo rèng an awm lo a ni ber.

Hmeichhe chhe lo leh hleitling tak tak te pawh ka lo hmu ve fô tawh a, ka mit an là lo chu a ni bîk hauh lo, mahse kawppui leh ngàihzâwng tur êm atân chuan suangtuahnaah takngial pawh ka la chenpui ngai lo, Sangsangi nen ka tehkhin zel a, Sangsangi záwk bawkin ka rilru a hneh leh nge nge ṭhin.

Zirtawpnî a ni a, khua a duai deuh ruih a, rin ang ngeiin ruah pawh a rawn sûr har lo ta rèng a, a tir phat aṭangin a sur tam buan buan nghal em em a, class làk lâi paw'n ṭawng rin a ngaih phah hle. M.Ed zirlâi naupang zirtîrna ka pe zo, office lam pana ka kal lâi chuan mipa leh hmeichhe inpawt deuh rawk rawk ka hmu a, kan department chhak lawk a nih avangin hmuh loh theih pawh a ni lo.

Office-a lut ta mai lo chuan ka en vang vang a, a mipa záwk chu kan thawhpuipa ang ka ti ang rèng hle a, a hmeichhia lah chuan a kaih a duh lo nasa mai bawk si, ruah sûr hnuaiah lehnghal! Office-a luh mai ka tum tawh tihah chuan a hmeichhe hmêl záwk chu ka hmu ve leh a, ka thin a phu nghal dup dup thei a nih chu!

Engtik lâiin nge ka chet chhuah pawh ka hre lo, an awmna lam pan chuan ka pen pàwk pawk a, a mipa záwk chu ka hmu sual lo, kan thawhpuipa a lo ni ngei e! Kei min hmuh rual chuan a hmeichhe buaipui mêk lak ata chu a inlà hrang deuh hlek a, mahse rei erawh a ni hauh lo.

"Kal thuai teh ang!" tiin a hmâa hmeichhe ding, Sangsangi chu kaih sawn a tum a, mahse ka inrawlh vat thung.

"Eng nge thil awmzia hi?" ka ti chhumbung hmuk a, Sangsangi záwk chuan min hlauh hmèl kher mai.

"Lo inrawlh suh!" ti khauh chhur hian kan thawhpuipapa chuan Sangsangi bân chu a chelh leh ngat a, Sangsangi lahin a lo duh lo nasa mai bawk si nen ka insum thei der lo.

Kan thawhpuipa chu ka nam lêng lawp a, a pai deuh chawn chawn a, Sangsangi chu ka kai sawn zui nghal zat bawk. Office lamah ka hruai a, kan thawhpuipa chunga ka thinrim chu thuhran ni se, a lakah pawh ka thinrim tel; a lo inhnimhnaihtîr hman lutuk chu ka hua a ni ber!

"A zùam turin awm tawh reng reng suh!" hulhiap china ka dinpui hnu chuan ka ti hniam hmuk a, ani erawhin min en ṭha ngam der lo.

"I hria em?" ka ti leh deuh hrawk a, ka lo vin mah mah a ni ang, a phu zawk nghe nghe!

"Immm....." a rawn ti sep a, ṭah chhuak zet hmêl a pu te hlei hlei chuan awm dan tur min tithiam lo zual!

"Engati nge class-a awm lova i chhuah reng reng?" ka ti leh a, tlêmin ka aw chu a khauh hmek hmuk ta lo deuh bawk.

"Sir khan thil pawimawh a awm a tia, ka zui chhuak a, chutianga class-a awm loh tum pawh ka ni lo," a rawn ti ve ta malh malh a, a hmêl leh awm danah chuan dàwt a sawi lo tih a chiang hle.

Inhruk hulna tur ka zàwnsak lâiin class-ah a lo va lut daih a, ka ngaihsak zui ta bîk lo law law mai. Kan thawhpuipa nen erawh kan inmelh rum nger ngur hle thung a, ka mood a tifuh lo vek bawk. Hun thawl kan nei chiah chu Sangsangi hnaih tawh lo turin ka vau titih nghal a, mahse eng teh vakah min ngaih loh hmèl hle thung.

Chumi tlai vek chuan Sangsangi chu ka phur haw a, duh loh tih pawh a nei bîk chuang lo. Nau anga zilh ka tum ngial paw'n ka thei der lo va, duhna rilru ka put miau avangin ka ṭawngkam chhuak hrim hrimah chuan mipa dang ka thikzia a hriat ngawih ngawih a, ka rilru puthmang tur àwm ang a hriatthiam leh hriatthiam loh lam pawh ka ngaihtuah hman tawh lo a ni ber.

Tin, an in awmna te ka hriat phah bawk a, lehlam kawng zâwng tak chuan a ṭha ve hrim hrim! An in kawt aṭanga ka tlan chhuah dâwn lâi tak chuan lawmthu min hrilh a, ka chhâng lèt lo va, hawi pawh ka hawi lèt hek lo. Ka tlan liam vang vang a, ngaihtuah erawh ka ngaihtuah zui reng thung.

Chuta chin chu a laka ka rilru puthmang a danglam sawt em em a, ka duhna a zual a, zan ka mut har phah hial ṭhin.

Nîtin inhmu ziah mah ila hmuh nawn ka thlehlel fô va, suangtuahnaah a châm a, ka rilrua lo lut thil dangte angin a ral ve mai mai lo va, a bet nghet em em záwk ṭhin.

Nî khat chu office-ah miss Jenny-i a rawn âng lut bawrh bawrh a, Sangsangi chanchin ngat a la sawi zui a, class test-ah a lo entawn a ni awm e. Miss Jenny-i thusawi chu ka awih hman lek lek a, mahse amah Sangsangi zawh chian ka rilruk ta a, entawn duh tur mi niin ka hre lo va, a lo entawn a nih paw'n zilh ka tum tho a, a lo entawn lo a nih leh a ṭha hlei hlei a ni mai.

Class bàn hnu chuan ka chang ran a, a hmêl ka hmuh rualin ka ko hrang a, thlah haw ka tum thu leh thil sawipui tur ka neih thu ka sawi lâi chuan a lo bu nghat a, ka thu anga awm tawp chu a tum ni berin ka hria. Kan inphur chhuak lâi chu miss Jenny-in min lo hmu nghe nghe a, mahse engah mah ka ngâi hran lo.

Kan tlan zel a, Châltlâng lam ka panpui a, an in kawng lama kan tlan lo chu mak pawh a tih ruk viau ka ring. Kan inah ka luhpui a, ka naute pahnih an lo bâng tawh a, Sangsangi hmêl an han hmu chu hre deuh si, hre em em si lo hian an melh zeuh zeuh a, Sangsangi záwkin a be hmâsa a, kan khuaah a awm tam lo bawk nen ka naute'n an hre lutuk lo pawh chu a àwm viau tho mai.

In kawta inkhel turin inhnuai naupangte'n ka naute pahnih chu an lo sâwm a, an chhuak ta daih a, chu hun remchâng chu bawhpelh ka tum lo chiang hle bawk.

"Class test-ah i entawn em ni?" tiin zawhna ka zàwt nghal a, ka naute awm loh ka chang tih a hrethiam hial maithei a ni.

"Entawn lo e," a rawn ti pangngai ve mai a, mahse min chhàn dan chu ka duhkhawp a la tling hauh lo.

"Engati nge miss Jenny-in entawn a tih si che?" ka ti leh ngat a, min rawn melh zawk nghe nghe!

"A hre sual palh a, dik tak chuan ka ṭhiannu záwkin a nia entawn, keimah ni lovin," a rawn ti ve leh mai a, zep thu a cheng lo, a thusawi chu ka ring nghal hmiah!

"Entawn anga ngaihbel theih turin i awm hrim hrim a ni lo maw?" ka ti leh hram a, ani erawh a ngâwi ta reng thung.

"A ni maithei," a ngàwih vang vang hnu chuan a rawn ti sep a, nuam lo ka ti rang kher mai.

"Ka'n haw ang e," tih leh a ṭhutna aṭanga thawh zui nghal a rual a, ka ṭawngkam avang chuan a rilru a nâ tih pawh a hriat hle.

"La ṭhu rih teh, thil sawipui duh che ka nei," tiin ka pawt ṭhu a, mi a en deuh hau nghe nghe!

"I sawi tur i sawi zo tawh emaw ka tia....?" a rawn tih chuan za lem lo zet hian ka lo khi suk a, ka nui rei lo viau bawk.

"Ka sawi tur ber ka la sawi lo záwk," ti supin a mal chunga a kut chu ka hum hnan zui zat a, a ṭang nghal ṭungin ka hria.

"Min en teh le...." ka ti dam thluam a, ani erawhin chhuat a la bih ngar ngar thung.

"Sangsang.....?" ti hniam leh ruihin a kut vei lam chu ka hum khawm titih a, ani paw'n min en ve ta nge nge!

"Ka la ngai reng," ka ti thum dut a, mi a en chiang kal kal ve hle bawk.

"Eng nge i sawi awmzia?" a rawn tih chuan ka sawi tum tak a man chiah lo tih ka hrethiam nghal mai.

"Hmân ang chiah khan i laka ka rilru puthmang a la ngai reng," ka ti nawn leh ngat a, chutah zet zawng mi â ber tân paw'n ka sawi tum hriatthiam loh rual a ni ta lo.

Mi pawh chhâng chuang lo hian hnuai lam a bih leh daih a, a kut ka hum te chu a tiche ngam eih lo ni berin ka hria. Ka ṭhut hnaih hrut hrut a, ani erawh a ṭhu khawng ût thung a, min chhàn dan tur mawlh chu ka hre châk a, ka hlauthawng ru ang reng viau bawk.

"Min duh tak tak ka ring lo," a rawn tih chuan hnâra hlit phawi ang mai hian ka veng huai a, ka thawl hawk ni maiin ka hria.

"Duh tak tak e le....." ka ti nghal hluai a, ka chhâng rang mah mah hret chu a ni.

"Miss Jenny-i nen in inzui mêk a ni lo'm ni? Â....hetiang lam hi chu sawi tawh lo ang u Zothan, a ṭul lo, ka haw tawh záwk mai ang," a rawn ti ta duah a, a kut chu a pawt chhuak zal zal nghal bawk.

"Ni lo, i hre sual, miss Jenny-i nen kan inkârah engmah a awm lo," ka ti zung zung a, min duh lo tawp chu a ni tawh bîk lo tih ka hriatna ringawt pawh chuan min tihlim ru veng veng chiang khawp mai.

"Ka thutak a nia Sangsang...." ti leh supin a kut bawk chu ka humsak leh a, ani erawh zàm hmèl tak hian a thaw chhuak deuh hap thung.

"Ka lam lo hawi teh," ti thum dam dap hian a khabe chu ka chelh a, ka lam a lo hawi theih nân ka kuai her zawm zat a, kan inmelh chiang ta viau bawk.

A lama awn riai riaiin a hmuiah tak chuan ka fawp dep dep a, min hnar miah lo chu ka phur nghal surh a, mahse ka insum hram hram rih thung. Ka inlàk hran rual chuan zak tih hriat tak hian a hawi sawn a, ka nuih a tiza ru ang reng!

"Hmân ang khan min hnar tawh dâwn lo tihna a ni em?" ka tih chuan za lo tak hian a nui tawi tak a, ṭawngkâa sawi erawh a tum miah lo a nih hmêl!

"Han sawi chiang teh," ka ti leh a, kan awm dan chu a dangdai tak zet!

"A!!!.....a zahthlak!" a rawn ti hliai reuh a, a sîr zâwng ringawt pawha a duhawmzia leh a hmêlṭhatzia chu pui tak a ni.

"Zah tur a awm lo, ka duh che a, ka sawi mai a, nang paw'n i rilru dik tak min hrilh ve a ngâi alawm, min duh lo a nih leh a pawina a awm lo, ka lêng tar tawh mai ang," ka ti ta lûam a, a rawn nui ri hak a, kei erawh ka thutak viau thung.

"Sawi dan tur pawh ka hre lo," a rawn tih chuan a inrin hmâ hauhin ka âwmah ka kuah bei a, tal chhuah pawh a tum bîk lo hrim hrim!

"I mipa duh zâwng ka ni em?" ka ti leh ta ràwt a, a lái hmél chu hmuh a va han nuam chiang kher èm!

"Immm....." a rawn ti ve ta nge nge a, ka awm a nuam nghal vawng vawng!

"'Immm' chauh maw!?" ka la ti hram a, detective ang maia han dawp vel chu nuam ka ti thar tlat!

"Hmân aṭang tawh khan, mahse khatih lâi kha chuan mak ka ti êm a, chhân ngaihna che ka hre lo. Ka duh leh duh loh che pawh ka hre lo, i awm loh chinah erawh keimahah thil danglam a awm a, min rawn biak nawn leh kha ka ring a, mahse i reh ta vung vung si a, i sawi ve mai maiah ka ngâi ta a ni," dam diai hian a rawn ti sap sap a, thu hriat nuam tak zawng a ni chiang e!

"A nih chuan engati nge ka bulah hian i kimkit chawih ṭhin?" ka ti leh a, ka kuah nghet deuh salh bawk.

"I zahawm êm alawm, kan khuaah phei chuan mî chung en ber i ni a, i mi uap a nâ ka ti, ka sawi thiam lo," a rawn ti ve leh niah niah reuh a, fawh leh mai ka duh rum rum hial a ni.

"Kan inngàihzàwnna a rei tawh bawk a, innei thuai ila a ṭha ang," ka tih chuan min rawn melh chho kiau a, kei erawhin ka lo nuih suk thung.

"Kan inngâizâwng tawh em ni?" a rawn ti diai a, a ṭawngkam tê chuan a tiduhawm zual!

"Kan inngàihzàwnnate chu a rei tawh alawm, hmâna hmànah khan a nia, kan inhrilh lo ve ve mai chauh alawm, chuvangin innei thuai ang, ka upa mah mah dâwn," ka tih chuan nui sen sen hian ka âwmah a rawn chum taih a, a hmai tai tèk te hlei hlei chuan ka insum theihna a tikeh chhhe mai dâwnin ka hria.

"I sawi ho êm mai," tia awm sawn a tum chu ka kuai dak a, ka fawp leh ta nge nge bawk.

The End