𝐌𝐀𝐕𝐀𝐋𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

MAVÂLA

(Mizo Love Story)

By

Havali Adam

Mittui tling pamin ka en ngai ka en ngawt ngawt a, ka bul hnaiha mi dang ṭap ruah ruah thawm chuan ṭah insum a tihar zual hle a, ka tum ngial paw'n ka mittui tla tur chu ka dang zo leh ta ngàng lo.

"Kan lo va haw dâwn em ni ang?" min rawn betu chu a aw aṭangin ka pasal a ni tih ka hria, en pawh ka en lo.

"Ti rawh, i kal teh ang," a rawn ti leh a, ka bânah kaiin min kal sawnpui zui chu a ni nghal mai.

Ka hawi lèt leh hram a, he khawvela awm ve tawh lo ka pa, ka pasal pa kan han chân ta chu hrehawm ka ti ngawih ngawih a, ka nu leh mi dangho ṭap hmêl chuan ka mittui a ko chhuak leh mai dâwna ka hriat avangin hmâ lam ka hawi a, pangngai taka awm ka tum hram hram bawk.

"I va'n hmanhmawh ve? Tih tur i nei em ni?" motor-a kan chùan luh hnu chuan ka ti chhuak sap a, ka pa vui nî mah ni se a hmanhmawh danah a hna lam thil a nih leh ngei ka ring.

"Ka patient pakhat, kha, college zirlâi ka tih kha i la hria em?" a rawn tih chuan ka lo bu nghat a, kan tlan chhuak zawm zat bawk.

"Kha nu kha a buai thut a ni àwm e! Kan chhiat tawh avang hian anmahni lam pawh an inthlahrung viau a, mahse ka kal loh chuan tih vak ngaihna an hre si lo a tin a ni!" a rawn ti felfai leh than a, han sawi zawm mai tur ka hre lo hle.

"In lamah ka dah phawt che ang a, ka kal chauh ang," a rawn tih leh pawh chuan ka la ngâwi reng a, ka pa vui nî lehzelah pawh hna thawh tur a nei chu a mah mah ka ti deuh hlek a ni.

"Lungàwi lo kher lo la?" amah bawk chuan a rawn ti leh a, kei erawh ka lo thaw chhuak hap thung.

"Lungàwi lohna ka nei lo," ka ti ve ta dat a, ka awm dan ka siam ṭha zui zat nà chu ka lung a âwi zàn lo tih erawh a hriatthiam vek tho ka ring.

Rei tlan lovin in kan thleng thuai a, thlanmûal aṭangin a hlâ lutuk lo bawk nen kan thleng har lo khawp mai. In chhûng kan lut chu YMA ṭhutthleng a lo la inrem nûal a, chhiat tàwk tih takah room bang te pawh vuah ṭhat a la ni lo va, in chhûng chu a la veng deuh huau bawk.

"Thei tui ka lo thlit ang che u aw Sangpui?" min hmuh rualin u Mafaki chuan a lo ti zàng vah a, ani hi kan awmpui a ni a, mahse awmpui ang em em paw'n ka en lo, ka ṭhian kawm bawrh bawrh záwk ṭhin.

"Pi Mali leh Nghaki an lo thleng hnai em? Ka thlit kep ve nghal dâwn em ni ang?" a rawn tih zawm leh a, ka pasal Zira záwk chuan

"Thlit kep duh rih suh, an la awm deuh ka ring. Kei pawh min thlit kep lo law law rawh, ka chhuak lehnghal dâwn" a lo ti zung zung a, eng sawi belh tawh lovin in aṭang chuan a chhuak zui nal nal bawk.

"In intithiam lo deuh em ni a Sangpui?" u Mafaki chuan a rawn ti nghal chat a, engkim ka hrilh ngamna a ni a, ani paw'n ka pasal nena kan inkâr ṭha lova a hriat hi chuan min zàwt hreh ngai lo.

"Keimah záwk a nia, ka lung a âwi chiah lo va, vawiin ang te chu ka pa ruang vui nî a ni a, patient te buaipui reng renga hun a hmang hi ṭul tih lohna chin ka ngah ṭhin," ka ti ta malh malh a, a thei tui min thlit chu ka in zui nghal a, min tidai sawng sawngin ka hria.

"Ni e ti raw, Zira hi chu a awl hman lo reng reng, zan rei tawh lamah pawh hian a ni tho. A patient te a ngaihtuah bawk si a, fak pawh a hlawh viauin ka hria" u Mafaki chuan a rawn ti ve leh a, sawi erawh kan sawi thui hran lo.

Ka nute hovin in an rawn thlen tâkah chuan titi dun reng theih a ni ta lo va, u Mafaki chu chetna tur awm ang ánga chein a phe buai char char a, keiin ka puih theihna lâiah ka pui bawk a, Nghaki leh ka nu erawh an rawn thlen tirh tih loh kha chu ka hmu zui tawh lo hrim hrim!

Chhûng leh khat, laina hnai te ho chu awm chambâng awm chhun an ni mai a, u Mafaki hnenah pawh rawngbàwl kep turin ka hrilh nghe nghe a, puitlingho titinaah chuan rei lutuk lo ka tel ve a, an ṭawng ka ngâithla a ni ber a, lungchhe táwk te pawh an la awm a, mahse han hnem vak dan tur ka hre lo khawp mai.

An zîng ata ka inlàk hran hnu chuan u Mafaki ei rawngbâwl ka pui a, ka puihna pawh a la rei lo ang tihah Zira a rawn haw a, kan awmna lamah a lo phei tlang a, mahse rei erawh a awm lo. Kan chhûngte nen chuan an titi zui mawlh mawlh a, ka nu leh Nghaki hmêl rèng hmuh tur a awm rih lo bawk nen ani tal a awm chu ka ngaih a ṭha sawt!

Tlai dâr 6 rik dâwnah zanriah kan ei a, kei leh u Mafaki leh Zira chu dawkantê pakhatah kan ei ho a, mi dang erawh dawhkan lianah te, ṭhutthlengah te leh a rem remah an ei hlawm a, ka nu leh Nghakite pawh an pangngai tawh viauin ka hria.

A sârhu lâi a la ni bawk a, zan lamah chuan inlêng kan nei nual a, thingpui pawh kan siam ngun mawlh mawlh hle a, a bîkin ka pa phei chu thingpui heh chì a lo ni bawk nen kan pe deuh tluk tluk a, kan khua Champhai aṭangin ka pasal pa ruang vuina hun nang hman turin a rawn zin thla vang vang a, chauh pawh a chauh ruk viau ka ring.

Zira nen pawh an titi ve lûamin ka hria, an thusawi erawh eng nge ka hre chuang lo. Zan a rei a, kan inlêng te pawh an haw kâm ṭan a, lêng hawn âr khùan hun àwm velah chuan keini chhûngkua tih loh chu tumah an awm tawh lo va, keini paw'n mut zâi kan rêl zui ve nghal mai bawk.

Nî a ral a, ka pa pawh Champhai lamah a liam chho leh tawh a, ka pa hi sawrkâr driver ang chì hi a ni a, kum 10 chuang fê chu a thawk ve tawh a, tunah hian a ngheh theih dan te kan buaipui chho ve mêk bawk a, Pathian zârah han nghet ve thei tawh se chu ka ti khawp mai.

Kan chhûngkua hrim hrim hi chhûngkaw awm thei tak kan ni hran lo va, ka làwina chhûngkaw khawsak dan nen phei hi chuan inthlau tak kan ni! A hmingin dawr tênâu kan nei a, ka pa hlawh nen chu chu kan ei hmuhna ber leh kan inchawmna ber pawh a ni.

Tin, kan unau hi kan rual ve ang reng a, fa hmâsa ber niin nau palî, mipa ṭhah ka nei a, mipa e ti lo chuan an fel hlawm em em a, ka pa'n zirtîrna a pe ṭha bawk a, pasal ka neih hnu pawh hian in chhûngkhur enkawl lamah an ngaihtuahawm dâwn loh tih ka chiang a, ka ngaih a ngam ṭhin.

Thla a vei leh meuh chuan keini chhûngkaw chhiat táwk boruak pawh a dai ta hle a, ka nu ber hian ka pa kha a la ngâi a, mood fuh loh châng pawh a ngah ṭhin khawp mai. Inlêng erawh kan la nei zeuh zeuh a, mahse kan chhûngkhat laina hnaite aṭang chauhin a ni tawh thung.

"Awi! Min tiphu alawm le, engati nge ngâwi renga i lo din?" kawngkapui ka hawn ruala u Mafaki ka hmu thut chu âwm dawm pah hian ka bia a, min tiphu hman tak tak a ni!

"Khaw'nge i kal daih a?" keimah bawk chuan ka ti leh a, za lo zet hian a nui a, a awm dan chu nî dang a ang lo ka ti ru viau bawk.

"Pi Malin chawhmeh lei turin min tîr a, ka va chhuak lawk maw le," tih leh min kal pelh a rual a, in chhûng lama a lut chu ka zui lut ve nghal mai a, ngâwi reng hian a che ri malh malh a, a awm dan chu ka nu'n a hau deuh a ang ka ti; a ngâwichawi tlat!

"Tukin lamah thil thleng a awm em?" ka tih chuan min lo en zawk a, tawi tê hian a nui ringawt a, mi pawh a chhâng chuang lo.

Ṭawng leh ka tum lâi takin phone call ka dawng a, Zira hnen aṭangin a ni a, ka làk rual chuan a thil chah a rawn thlen dâwn thu a rawn sawi a, lo ngaihven mai turin min chah zui zat bawk.

Kan inbe rei hran lo va, ani nen hi chuan hmaichhanah pawh kan inbe rei ngai lo hrim hrim! Ka pasal a ni tih leh a nupui ka ni tih chu ka hria, mahse kan inkâr erawh a dang hlak thung.

Nupui angin min en lo chu ka ti dawt ngam lo va, kei paw'n pasal ang chuan ka en chiang alawm, mahse kan inkârah hian thil felhlel a awm tlat a, lang si lovin kan thup ve ve a, min hmangaih tak tak paw'n ka hre ṭhin lo.

Kum 2 leh a chanve zen zawn chu kan innei ve tawh a, vanduaithlak takin fa kan la nei thei lo hlauh a, mahse fa neih leh neih loh hi chu kan buaina a ni lo, amah paw'n ka bulah chiang takin a sawi tawh, kan buaina ber záwk chu inmil ang deuha lang siin kan inmil chiah lo lâi hi a ni.

Ka lakah suahsual rawng a bâwl ngai lo va, kut pawh min thlak ngai hek lo. A nihna takah chuan ka nu leh Nghakite hnen aṭangin ṭawngkam duk dak lo leh hriat hrehawm ka dawng hnem fê záwk!

Nimahsela, ka pasal ber Zira nen erawh inhal ni si lovin kan hrang em em a, nupa nun pawh hi kan hman lohna a rei tawh mai. A châng chuan keimah leh keimah ka indem ṭhin a, ka pasal nena kan inkâr chu siam ṭhat te pawh ka tum ve ṭhin.

Zah loh chhuah a ngaih chângte a awm fô va, mahse ka pasal erawh a ngai reng thung. A bîkin kumin kum tir lam aṭang khan a mizia a dang lehzual a, pasalte tihlawm kawngah ka zei hawi lo ropui mai bawk si, a lang lo ruamah kan inkâr a zau ru hle ti ila a sual tam awm lo e.

A sawi ang ngeiin chawhnu dar 2 velah a thil chah chu a rawn thleng a, ka lo buaipui zung zung a, hair dryer teh daih a chah chu mak ka ti viau a, ka ta tur a nih ka ring chiah si lo.

A nau Nghaki ta tur záwk a nih ringin rilru dang ka pu ve leh mai a, a lo haw hunah zawh te pawh zàwt chiang ve hrim hrim ila a ṭha ang. Kan room-a ka dah fel hnu chuan choka lamah ka phei a, u Mafaki thil sil chu ka pui a, a rawn thlen tirh ang lo takin a lo ṭawng duh siam siam leh tawh viau bawk.

Kan titi barh barh lâi chuan Nghaki class bâng a lo haw a, ani hi MZU-ah master a zir mêk a, a kuma kum han khawsakpui tâkah chuan an dinhmunin a zir bawk nen, a che hautak ve hlein ka hria. Ka pa dam lâi phei kha chuan a duh duh a nei hi a ni ringawt a, Zira paw'n a zilh leh hluk ṭhin nghe nghe!

"U Mafak, eng emaw ei tur min lo siam teh, ka ril a ṭam riau mai," tiin Nghaki chu a room lamah a chho zui nghal a, awmpui an nei tih hi a hre chiang thawkhat ve viau chuan ka hria.

Mi zahpah lah hi a nei em em hran lo lehnghal a, ka nu pawh a zah lutuk chuang lo, Zira chenin, kei leh u Mafaki phei chu keini ai nau daih e ti lo hian mi tham loh châng a ngah a, in chhûnga a ngàihzâwng leh ṭhiante rawn hruai luh lah a hreh ngai bawk si lo, a ṭawng deuh fak fak te hian en liam châng ka ngah mai.

Khaw thim det detah Zira a rawn haw a, a thil chah chungchâng zawh ka tum viau nà chu a rem rih lo êm a, mutnaa zawhah ka titlu leh ta záwk a, nî dang ai a mood a rawn fuh haw deuh hlawl leh ta nghal a, chu ringawt pawh chuan ka awm a tinuam huai thei.

Amaherawhchu, chaw ei kham hnu lawka a awm dan chuan ka ngaihdan a her danglam chiang kher mai. Vawiina a thil chah lo thleng, hair dryer kha a ṭhiannu, tu tih pawh ka hriat loh ta tur lek chu lo niin, ka zawh ngâi lovin ama'n a rawn sawi chhuak a, engah mah ngâi lo ang takin awm mah ila ka chhûng lam erawh a nghing deuh dawt thung.

"Ngàihzâwng i nei em?" tiin kan nupa room aṭanga a chhuah dâwn lâi tak chuan ka záwt a, a ding deuh chat nghe nghe!

"Ka rawn haw hunah kan sawi ṭha dâwn a nia," min chhàn dan chuan a dènin min dêng dawt a ni ber.

A chhuak zui nal nal a, kei erawh ka hnual nghal rawih thung. A rawn haw hmâ zawng chu mumal lo zetin ka awm a, ngàihzâwng a neih thu sawi dawt lo mah se eng emaw tak a awm tih ka chiang em em a, chu mawlh chuan ka rilru a tinâ a ni.

Kan nupa room-ah chuan ka tawm ngawt ngawt a, ka ngaihtuahna a kal thui hle bawk. Khup tawm chawihin khumah ka ṭhu ngâwi reng a, ngaihsaktu rèng ka nei lo va, min ngaihsaktu awm pawh ni se ka rilrua thil awm chu an hnawh kian theih pawh ka ring lo.

Kawngka a rawn inhawng ri khep a, room chhûnga lo lut chu tu dang ni lovin Zira ngei a ni a, dâr zat ka en chuan dâr 10 a lo ri vel chiah chiah a, chaw ei kham hlima chhuak kha a ni a, a thang rei danah nuam pawh a va ti viau a nih hmêl!

"I dam lo em ni?" tia ka pang a rawn tawk chu ka lo thle sawn thuai a, kan inmelh chiang hle bawk.

"Ngàihzâwng i nei ti raw?" ka ti fiah raih a, rei pawh ka en thei lo.

"Immm....." pawi tihna nei miah lo tih hriat taka a rawn tih chuan awm dan ber tur ka hre lo, ka en ngai ka en ngawt ngawt ringawt!

"Engati nge? Min duh tawh lo em ni? Ka rai theih loh vang hi a ni em?" ka ti ta duah a, ka rilrua áwm àwm ka sawi chhuak a ni ber.

"Chutiang lam a ni lo," a rawn tih chuan ka lo nui hak a, mahse ka nuih erawh a za lo kher mai.

"Enteh Sangpui, keini pahnih hi kan intihlim tawn thiam lo tih hai rual a ni lo va, chuvangin kan inṭhen mai a ṭha záwkin ka hria," a rawn tih zawm leh a, sawi dik loh a nei miah lo, mahse ka nâ a ni.

"Aw le, chhuak turin ka lo inbuatsaih dâwn a nia," ka tih chuan min ngaihtuah hmêl tak hian min en a, mahse a rilru chhûngril ka hre chiang lutuk tlat!

"I rilru tih nàt hi ka duh bîk lo, mahse ka bulah hian i hlim lo tih ka hre si a ni," a rawn tih chuan ka ngâwi reng a, sawi mai tur ka hre lo.

"Ka thiam loh tam tak a awm tih pawh ka hria, ka huat vang che lah a ni hek lo. Kan inkâr kan hre chiang ve ve a, i ngaihtuah chian chuan nang paw'n kan inṭhen hi ṭha zàwka i hriat ve tho ka ring," a rawn ti leh a, min ṭhut hnaih zui zat bawk.

"A rei tawh em?" ti sepin a mitah chuan ka en a, mahse ka en rei thei der lo.

"Engtia rei nge in inngàihzàwn tawh?" ka ti leh a, ka ngaihtuah chian pôh leh inṭhen bak hmâbak a awm lo tih ka hai bîk lo va, mahse a rang teh thut èm a, ka dawngsawng thiam chiah lo chu a ni.

"Kumin kum tir lam aṭang khan...." a rawn tih chuan ka lo bu nghat a, dàwt a sawi lo tih ka hre chiang viau bawk.

"Min hriattîr vat záwk la chu i tân pawh a hahdamthlak záwk tur a nia, nangmah leh nangmah i lo intihrehawm ru rei mah mah a nih chu maw le," ka ti dam diai a, ka rilru nâ chu ka thup hram hram a ni ber.

Chumi zan chuan ka muhil lo hrim hrim a, varṭianah tho chhuakin ka thawmhnaw ka khung khawm a, pasalte berin inṭhen an rawta ngàihzâwng dang min neihsan miau si chuan ka tân tih theih a awm lo; a rang thei ang bera chhuah tih loh chu!

Tin, amah Zira tak pawh chu a muhil bîk chuang der lo va, in chhuahsan ka tum lâi te chuan min en reng a, min buaipui a tum chu ka duh lo bur bawk. U Mafaki erawhin mak a lo ti hle thung a, ka nu leh Nghakite pahnih an la harh lo hlauh chu a ṭha záwkin ka hria.

Sumo-ah chûangin kan khaw lam ka pan vang vang a, chumi nî chu ka tâna nî hriat reng tawh tur a ni a, ka hriatna ka hloh te a nih loh chuan ka theihnghilh mai mai tawh lo bawk ang.

Kan in ka thlen hmâin ka chhûngte'n Zira nena kan inṭhen thu chu an lo hre diam tawh a, ka nu, Zira nuin a lo han zàwt chiang chu niin, haw thla leh tur paw'n min rawn chah nasa viau a, mahse engtikah mah lèt leh ka tum tawh lo.

Zira nena kan han inṭhen ta chu ka là nâ vak dâwn lo emaw ka ti a, ka rin âi ka tuar nâ zék a, hmangaih avanga nei ni mah ila pasalte berin min hmangaih ve loh miau chuan tih ngaihna a awm lo a, a sawi ang tak tak khan kan inṭhen chu tu tân ve ve pawh kan intihrehawm loh záwkin ka hria.

Kan inṭhen aṭanga kâr khatna velah u Mafaki hnen aṭangin phone call ka dawng a, kha nî, a bazâr chhuak ngui ang reng taka a lo haw nî khan Zira leh a bialnu chhuak dun lâi a lo hmu vek chu niin, min hrilh duh viau mah se min hrilh hreh tho si nen, engmah sawi lovin a ngâwi hle hle záwk a lo ni a, kan inṭhen fel hnuah erawh engkim a rawn sawi chhuak a, mahse ka nàt belh em em hran lo.

Hun a'n liam leh deuh hlek a, ka rilruah nunhlui lam awm ru reng ṭhin mah se tih theih ka nei lo tih inhre reng chungin ka nun dan a pangngai chho tial tial a, dawr lamah ka nu ka pui deuh chawt a, ka pasal nena kan ṭhen tirh kha chuan min tawrhpui viau a, mahse tunah erawh thla hial a liam leh tawh bawk nen min hrethiam khawp mai.

Tin, ka nu leh pa, ka nauteho chenin Zira leh an chhûngkaw chungchâng min zàwt ngai lo hrim hrim a, chu tak chuan ka awm a tinuam veng veng ṭhin. Min zàwt se chu hun liam tawh ka ngaihtuah kir lo thei lo ang a, rilru nâtna tur ka ngaihtuah chhuak ngei bawk ang.

Ni khat chu ka nau chiah, Rammawia te college-ah parents teachers meet-a tel turin ka kal a, ka nu leh pate an hman loh avanga kal ka ni ber a, an college ka thleng chu kal ngai lo tih takah ka bo hû mai a, amah Rammawia ber lah chu ka call tlang thei der bawk si lo.

Buidling hrawl zet zet lo ding chu ka en deuh vang vang a, Rammawiate department hming chu ka hre ngei a, mahse khawi lai taka awm nge a nih ka hre lo a ni. Ka call leh ngat a, mahse busy a intih tlat avangin mawl zàwn deuh tawp chu ka tum ta mai.

Ka duhna lamah ka kal mawl tawp a, zirlâi naupang ka hmuh hmâsak remchâng ber zawh ka tum lâi tak chuan mit là tur tak hian car pakhat hi ka piah lawkah a rawn ding a, car chhûng aṭang chuan pa pakhat hi a rawn chhuak zui nghal a, a hmanhmawh hmél hle bawk.

Chutih lâi vek chuan hmeichhe pahnih ka táwk a, Rammawiate department awmna ka zawh chuan min hrilh ve nghal mai a, mahse an kal liam chiah tihah ka hriatpawlh leh ang lawi a, mawl ka intih rualin ka kal ngai lohna a ni miau a, dem theih ka ni bîk lo.

Pa pakhat hian min rawn kal pel vut a, chu pa chu nichina ka hmuh pa kha a ni a, a kalna lam chu ka kalna lam tur a nih avangin ka zui ve ta ngawt a, a hmanhmawh chu thuhran ni se, a kal chak em em mai lehnghal a, kal pangngai tur chuan ka tlin der lo, ka tlan titih ta ringawt!

"Min lo hrethiam lawk ka pu....?" tia ka kohna chu hria ang paw'n a awm lo hrim hrim!

"Heih......ka pu.....?" ti lehin a zawn ka tlan thleng a, min rawn melh chhuk deuh run a, kan kalna hmun tur chu inang dáwna hriatna ka nei tlat bawk.

"Parents teachers meet-ah tho em ni i kal ve dâwn? Khawi lâi room ber nge ka hre chiah lo a?" ka ti leh hliai a, ka mi biak pah lah chu a ṭawng peih loh hmèl em em lehnghal!

"He lamah....." ti thum supin a pen zui páwk pàwk a, a pen hlawk bîk lutuk chu ka um titih bawk nen min tihah vek thei.

Room pakhatah hian kan lut a, mi an lo ṭhu nûal tawh a, ka hmâa kal nghut nghut pa chu zuiin ka kal ve zel a, mahse a kalna lampang chu ka hrethiam lo, zui zel chì a ni ta hauh lo mai.

Zirtîrtu tih hriat tak tak ṭhutna lamah a kal daih a, kei erawh zirtîrtute ṭhutna lama kal tum deuh si, mipui ṭhutna lam hlàt laklawh bawk si hian ka ding chawt a, ka dinna chu a langsarin a lâi ang reng viau bawk.

Zirtîrtute ṭhutna stage lam chu ding khawng deuh ât hian ka hawi chho a, nichina ka zui luh pa khan khabe kàn àk pah hian mipui lama ṭhu turin min rawn signal a, ka zahzia chu pui hem hem tak a ni!

Inhup chawihin ka inher a, ka awm dan chu a mâwi lo tih ka hre chhuak hnuhnawh leh a, nui lui var var hian mipui ṭhutna tlar hnung ber ka chuh nghal a, ṭhutthlenga ka ṭhu fel chiah chu zah avangin ka kun ngal ringawt!

Programme an ṭan a, ka zah a la reh hleih theih loh avangin an thil sawi te chu ka ngâithla liam vel mai mai a, tlangval pakhat, felfai zet hian thu a pûang zar zar a, an zirlâite awm dan, nungchang leh an thiam theih leh theih loh te, an harsatnate a rawn sawi kâi zel a, Rammawia chanchin pawh a rawn sawi lang ve nghe nghe!

Programme a zawh fel hnu chuan room kawngka sîrah thingpui leh chhang an lo chhawp tlar dul a, ka boruak hip a fuh lo laklawh a, in chákna pawh ka nei lo. Room ka luh tirha ka zui luh pa lah kha a zahawm pâwl a ni mahnà, nutling patlingin an biak rawn laih laih a, mi dang zînga a chetlâ vel chu ka en deuh ren rawn a, dik tak chuan ka ngei lek lek a ni.

Chutah ka lam a la rawn hawi thut zui, rang mangkheng hian ka hawi sawn vat a, mahse ka mitthlâah a hmêl fiah tak run chu a rawn lang zui zat thung. Hnungchhawnin ka kal sawn ta nal nal a, hmuh leh pawh ka duh chiah tawh lo, amah avangin ka zak chem chem êm mai.

Ina haw tlang lovin kan dawrah ka kal a, chutah chuan Rammawia a lo awm reng chu niin, ka hmuh rual rual chuan eng vanga phone call là thei miah lo nge a nih ka zàwt nghal a, ka thil tawnin a zir bawk nen ka thin chu a rim deuh hlurin a tih theih!

"Engtin nge a chanchin an lo sawi a?" ka nu chuan a rawn ti a, kei pawh tlêmin ka pangngai ve leh ta deuh!

"A thatchhia an ti..." ka tih chuan amah Rammawia ber chu a rawn nui a, thawveng chì tih takah han hauh chîam dâwn pawh hian a theih tak tak loh!

"Chu.....i hria maw? Zir taima rawh, B.A hi i graduate lo mai ang," ka nu chuan a lo tih zawm zat a, Rammawia ber lah chu a nui ang vur vur leh ta nghal a, en pawh ka en rei peih lo, mood a ti off zual mai mai dâwnin ka hria.

"In zirtîrtute zînga mi, pa pakhat, bek vâr ṭhek ṭhek pa kha tu nge?" ka ti deuh thawr a, Rammawia chuan min rawn melh rang kher mai.

"Tu bek vâr ṭhek ṭhek pa maw?" a rawn ti hû a, ka sawi dan chu a man lo ni ngei tur a ni.

"Ka hre bîk lo, bek sam ṭuak kha, kha pa han mawl nelh nulhzia kha âw...." ka ti leh vawng vawng a, amah avanga ka zah chem chem lâi kha ka ngaihtuah chhuak nghal uarh uarh bawk.

"Tu nge kan sir te ah sam ṭuak awm? E.....sir Mavâla maw!? Pa tê chhe vak lo kha, a ni em?" thil hre chhuak zawk ang hrim hian Rammawia chuan a rawn ti deuh hluai a, pa len leh tèt thu ah chuan a pa tê hran lo viauin ka hria.

"Ka hre lo, a ni ang. A mawlzia chu, programme kan hmanna tur room tak ka hre chiang si lo va, chu pa chu ka zàwt a, a kalna lama kal turin min ti a, ka zui ve mai a, room kan luh hnuah erawh mi a ngaihtuah tawh lo reng reng! Stage-ah, zirtîrtu dang bulah a han ṭhu chho daih a, ka zui thuak hman a, ka zahzia chu pui tak a ni!" tiin ka nu bulah chuan ka sawi mawlh mawlh a, Rammawia chu a lo nui tet tet a, ka melh hrep ringawt!

"A thu hrimah nang pawh chu i ngaihtuah chiang lo a nih chu maw le, engati nge i zui zel? Hremhmunah kal ta se i kal ve dâwn tihna em ni?" nui hak hak chung hian ka nu chuan a rawn ti  ta zèk a, ka lawm lo kher mai.

"A dik chiah, sir Mavâla ai i mawl daih záwk a nih chu! Chu bakah sir Mavâla chu tûma'n mawl an ti lo, kum 2014 khan doctorate degree a nei daih tawh asin, kan department HOD a nih kha, lehkhabu pawh hi chhiar loh a mang a nei lo hial ang. A fing chì a nih chu thuhran ni se, mi inchhiar zau mi a ni lehzel a, MCS-a inziak tling, zirtîrtu hna a chelh duh záwk avanga civil service lam zawm duh lo mai chauh a nih kha, mawl ti reng reng suh!" Rammawia chuan a rawn tih zawm duah a, ka rilruah erawh chutiang velin nghawng a nei thui hran lo.

Chawhma lam ang lo takin ruah a rawn hmî seng seng a, kum chawhnu lam tih takah fur a la reh fel chiah lo va, favang thlen thuai thuai a chákawm khawp mai. Ka nu nen chuan thil dang daih kan sawi dun a, Rammawia erawh in lamah a haw fel diam tawh thung.

Ruah hmî seng seng hnuaiah chuan motor an intlan pel zut zut a, a ṭhen chu an ding ve leh zeuh ṭhin a, Aizawl khawpui ang em emin traffic pawh a jam rei lo bîk khawp mai.

Chutia pâwn lam ka thlir lâi tak chuan kan dawr hmâah tak car pakhat hi a rawn ding a, tum vang rènga rawn ding pawh a ni chiah lo, a hmâa tlan a ding miau a, a tân chuan din loh theih ni hek lo.

Chutah chu car khalhtu lah chu kha pa, vawiina ka hmuh pa ngei mai kha a la ni zui a, a hmêl fiah felfai vuk, hriat hran awl zet chu a sîr zâwng ringawt paw'n a langsar em em a, a bek sam vàr zeuh zeuh te hlei hlei chuan vawiina min tizaktu ngei kha a ni tih a tichiang viau bawk.

A ding rei hran lo va, a tlan liam hnu chuan tum loh deuhin ka mitthlâah chiang takin a hmêl, a sîr zâwnga ka hmuh zawh chiah chu a rawn lang a, ṭul lo ti zet hian ka lû ka thing nawk a, ka awm dan avang chuan ka nu'n min lo en deuh hâ nghe nghe!

Ruah a tlàk deuh cher cher tâk reng avangin tlai dang ai dawr kan khar hmâ a, in kan thlen chuan khua pawh a thim titih tawh a, ruah súr vang mai bakah chhum a zìn mup mup avangin khua a thim hmâ ni berin ka hria.

Zan lamah erawh boruak a thiang fiah kâk a, van zâwl zau takah chuan arsi an pe tuarh a, thla pawh a éng mâwi táwk hle a, panlâi hringnun ngaihtuah chhuakin, khang enghelh nei miah lova hun kan hman ṭhin lâi ngaihawm zet zet ta kha ka suangtuah lèt a, lung a lêng veng veng duh khawp mai.

Zan tlai lam tawhah ka ril a rawn ṭam a, ei tur kawl sa kan lo nei mai bawk si lo nen scooty-in ka inkhalh chhuak a, ka pa'n chhuah phal lo se chu ka inkhalh chhuah pawh ka ring lo.

Kan vêng dawrho chu a inkhar phei ṭhiap tawh a, dawr inhawng zawng chawpin ka tlan zel a, kan vêng ka tlan pel thui hman viau tawh tihah dawr pakhat inhawng ka hmu hlawl a, speed up deuh hleka ka'n tlan deuh vut chu kawng sir thim lâi aṭangin mihring a rawn lang thut a, ka kawi zawk a, brake ka tumna lamah ka tlu ri nghal ṭhuai bawk.

"I ṭha em?" mipa aw thum chhah ṭha zet ka hriat rual chuan ka meng chhuak a, rei lo tê chhûng chu mu leh mal hre lovin ka awm ni berin ka hria.

"I khawi lâi nge nâ?" chu pa bawk chuan a rawn ti leh a, mi dang pawh an rawn pung khawm nghal luai luai a, zak ru tak ka ni!

"Ka ṭha...." tia thawh ka tum chu ka darah chelhin min châwi ding titih a, zep lo chuan ka zak ngawih ngawih, ka tlu chiang ropui bawk si!

"I ṭha tak tak maw? Hliam i nei lo em ni?" chu pa bawk chuan a rawn ti leh sup a, a hmêl ka en ngam miau loh avangin tu nge a nih ka hre lo va, ka lû a en dik lâi vel te chuan ka lo dawh mawl tawp ringawt!

"A zia lo hle mai," ti hniam dut hian a ding hla deuh a, ka bân rek ding lam hit mem mem chuan ka rilru a lá pêng nghal zawk a, ka ngaih a ṭha ta chiah lo bawk.

A hmâ zawnga hit mem, nâ pawh ni miah si lo kha rei lo tê hnuah a rawn nâ ta ṭiam ṭiam a, ka bân rek chu a tliak ni maiin ka hria. Ka awm dan avang chuan ka hmâ lawka ding mipa pakhat chu a rawn tawlh hnai deuh hruk a, a hmêl ka'n en chiah chu ka zahna a zual kher mai.

"A nâ em ni?" a rawn tih chuan chhàn pawh ka chhâng lo, ka zak thar ngawih ngawih lutuk chu ngaihtuahna fîm ka pu thei lo a ni ber.

Ka bân a khawih rual chuan ka ṭe deuh ṭhat a, ka ṭhen chawn chawn hmêl pawh a hmuh ngei ka ring. Dimdawi ang reng tak hian kawngpui chhak lama car awmna bulah chuan min kuah chho titih a, car kawngka chu hawngin min ṭhut luhtîr zal zal a, ka la zak ru bawk si nen sawi tur réng ka hre lo.

"Scooty chabi hi ka'n ak rih ang e, nakinah, haw dâwnah ka pe dâwn che a nia," a ti thum leh sup a, car chu a tinung a, kan tlan chhuak zui nghal bawk.

"Lo chhuak thut lo ila chuan i accident lo ang maw le," mahni inthiam lo rilru rawngkâia a rawn tih chuan thil hriat chhuah ka nei nghal zawk mai.

"Ni lo, keimah alawm, ka tipalh lutuk," ka lo ti thuai a, thim zîng aṭanga mihring lo lang thut kha amah a ni tih han hriat tâkah chuan ka inthiam lo zual!

"Ka sû hman lo che ti raw?" ka ti leh a, a lakah chuan ka inthiam lo thar tak zet a ni.

"Sû hman lo e," a rawn ti pangngai ve mai a, vawiina a awm dan nen kha chuan a inthlau vet vet khawp mai.

"Khawiah nge kan kal dâwn?" ka ti leh chu nui titih, mahse nuih za lo tih hriat tak hian a rum deuh nghut a, ka en kiau nghe nghe!

"Hospital-a kan kal loh chuan i bân kha a nâ zual dâwn asin," a rawn ti a, ka ngâwi ta hle hle.

Hospital kan thlen hmâ zawng chu kan inbe zui tawh lo hrim hrim a, nurse lo duty te'n min bawihsàwm hnuah erawh kan boruak a dang ta deuh a, nurse lo duty te lah chu eng an hria nge ni, kan bek sam vâra thlâ chu an là ru zeuh zeuh a, tleirawl tih takah ka nuih an tiza ru kher mai.

Hospital aṭanga kan chhuak fel chiah tihah ka pa hnen aṭangin phone call ka dawng a, ka phone ka'n en chiang chiah chu a temper glass a lo khi tuarh a, pawi ka ti nghal vawng vawng bawk.

Ka accident thu ka sawi chuan ka awmna min záwt a, hospital aṭanga kan chhuah tawh thu chu ka hrilh ve leh mai a, ngaihtuahawm ka nih loh thu ka sawi ve tak náin awmzia a awm tam lo hle.

"I chhûngte em ni?" ka bula mi chuan a rawn ti a, en pawh min en chuang lo.

"Immm....ka pa a nia, lo kal a tum a, kan lo nghak lawk mai dâwn em ni ang? A nih loh paw'n i hmanhmawh chuan i haw thei tho a nia, a rawn thleng har chuang lo ang," ka ti deuh duah a, mi lah chu a melh chhuk run ang leh ta nghal a, ka hawi sawn phah ringawt bawk.

"Kha...." a rawn tih chuan a lam ka hawi a, scooty chabi min pek a lo tum chu ni rengin!

"Ka lawm e...ih....eng lo.....scooty kha a chhe nasa èm? Engmah ka ngaihtuah zui tawh lo reng reng!" chabi làk pah chuan ka ti zui niah niah a, hman nî lawka ka pa'n Rammawia tâna a leisak a ni lehnghal a, a lo chhiat nasat viau phei chuan Rammawia a lungâwi lo nasa dâwn lutuk tlat!

"Chhe nasa lo ang, râng leh sawi erawh a awm ka ring," a rawn tih chuan a sawi dik hmèl viauin ka hria.

Inbe zui em em hran lovin ka pate lo thlen hun chu kan nghak a, rei pawh ni lovah an lo thleng thuai a, Rammawia pawh a rawn tel ve nghe nghe a, ka bula an sir ding run a'n hmu thut mai chu mak a ti tih a hmêlah chiang takin a lang a, mahse a insiam ṭha leh vat thung.

Ka pa chuan min hruai haw a, ei tur pawh min lei hawsak nghe nghe a, Rammawia paw'n scooty a khalh haw a, vanneihthlak takin a rang nuaih tih loh chu chhe em em a lo awm lo hlauh a, a side glass pakhat záwk a bung bawk a, thil dang erawh a lo la ṭha pangngai vek niin a lang.

A tukah chuan ka bân rek chu a sârhu lâi ai mahin a nâ zual a, a vûng deuh ùl a, chet pawh ka che ṭha ngam lo. Ka chaw ei thlengin a nghawng a, nàt hmèl vak angin lang lo mah se chhûng lamah a nâ ru phian bawk si, ka awm dan a tikhaihlak zo vek!

Hunin nî a liampui a, kâr a ral hnuah pawh ka bân chu a la nâ ru reng a, mahse a tir ang em emin a nâ tawh lo thung. Indim ka la ngâi hle a ni tih ka hre ran a, ka nu phei chuan ka chet pawh a phal mang lo va, ka bân nâ avanga ka awm awl der der lutuk chu a inthlahrunawm lek lek záwk a ni.

"Hello.....?" tiin number lawng tawp aṭanga phone call lo lut chu ka chhâng a, ka save loh danah ka mi hriat zâwng a nih ka ring chiah lo.

"I ṭha zel em?" mipa aw thum hniam lam lek lek hian a rawn ti sup a, a aw chu ka hriat hnu a ang viau a, mahse ka la hre mai chuang lo.

"Immm....." ka ti tawi deuh tap a, a mi biak danah chuan min hria ni ngei tur a ni.

"Zaninah tihtur emaw chhuahna tur i nei em?" a rawn ti leh a, tu nge a nih ka hre chiah bawk si lo, thluak a hruai pêng nasa ang reng viau mai.

"Nei lo e..." ka ti ve leh mai a, chutia kan inbiak lâi chuan ka nu chu a rawn hawi zeuh zeuh a, mi dang erawhin min ngaihsak hran lo.

"A nih chuan ka lo kal dâwn asin," a rawn ti leh thlup a, a aw chu khawiah emaw ni tak ka hre tawh chiang a, mahse ka hre chhuak thei rih tlat si lo a tin a ni!

"Min hrethiam la, tu nge i nih ka hre....." ka tih laklawh lâi chuan, "Min hre mai ang," a rawn ti zui zat a, phone lah chu a hmet tawp daih leh ta nghal a, min tibo hû mai.

"Tu nge a?" ka nu chuan a rawn ti ta chiah rèng a, ka pa paw'n min rawn en ve ta nge nge bawk.

"Ka hre bîk lo, number lawng tawp aṭangin a nia, ka hriat ngai a ni paw'n ka hre lo, amah lah khan min hriat hmèl em em lehnghal," ka ti mial mial a, min zawh belh tâk lovah chuan ka sawi zawm tawh bîk chuang lo.

"E.....u.....vawiin khan sir Mavâlan i phone number min dil tak asin, tlaiah khan ka hrilh ang che ka tia, ka theihnghilh daih," phone games khel pahin Rammawia chuan a rawn ti deuh thut a, an sir Mavâla hming a rawn lam chiah chu thil hriat chhuah ka nei nghal zawk!

Min rawn betu aw kha ka hriat tawh hnu a ang ka ti rèng a, chutia Rammawian a rawn sawi ta chu an HOD ngei kha a ni tih ka hre chhuak nghal a, lo kal a tum chhan pawh ka ngaihruah thiam nghal mai.

Accident ka tàwh zan tih loh kha chu kan inhmu leh tawh lo hrim hrim a, min rawn ngaihven zui pawh ka ring tawh hek lo. A chhan chu thil thleng kha a thiam loh ni lovin ka thiam loh záwk a ni a, ka speed kha up kher lo ila chuan muangchângin ka kawi ang a, ka tlu miah lo bawk ang.

"Lo lut rawh..." tia ka nu ṭawng thawmah chuan ka harh zawk a, ka ngaihtuahna ka kawm nasat lutuk aleiah engmah ka lo hre miah lo chu niin!

Chutah kan in chhûnga lo lut chu Rammawiate HOD a lo ni tak tak leh ta nghal a, ka ṭhutna ṭhutthlengah tak a rawn ṭhu a, ka nu'n a lo be siam siam a, kan ṭhutna inang mah se a kil ve ve ah kan ṭhu thung a, mahse a mi uap chu a nâ ka ti tho.

"Eng nge i bân chu a an?" ka pa nena an inbiak loh lâi tak chuan a rawn ti a, ka hawi à pheu hman nghe nghe!

"A dam ve zel e," ka ti sap a, an HOD ber kan ina a rawn kal tâkah chuan Rammawia paw'n games a khelh chhunzawm lo chiang kher mai.

"A ṭhat chu.....Aizawl lamah ka zin ta daih si a, ka rawn ngaihven zui hman lawk lo che alawm le," a rawn tih chuan ka mak tihna a zual a, chhán dan tur pawh ka hre mai lo.

"Ngaihtuahawm ka ni tawh lo, ka ṭha tawh lutuk," ka ti ta ngawt a, ani erawhin ka thusawi chu a rin loh hmèl hle thung.

Kei nena inbe zui zel lovin ka nu leh pate nen an titi zui ta záwk a, an in tur thingpui ka lùm a, ka bân rek la nâ deuh riak riak mah se a hmuha ka naute thingpui lúmtîr chu ka hreh deuh tlat a, ka nu paw'n ka rilru tur a hrethiam a ni ang, mi dang a au buai lo hrim hrim.

Thingpui ka siam zo, tray-a ka châwi phei chu Rammawiate HOD chuan beisei loh deuh hian min lo pui hlawl a, ka tray châwi lâi chu làin dawhkanah a nghat a, eng thu mah a chhakchhuak bawk si lo, inthlahrung ru vawng vawng tak ka ni!

Kan ngàwih ṭhuap lâiin ka pa chuan Rammawia chanchin a zàwt hlawl a, Rammawia ber chu a kal sawn nghal daih a, an HOD pawh chu a khi suk ringawt!

Rei lutuk awm lovin haw zâi a rêl thuai a, a mâwiah tiin kan in kawt thleng ka chhuahpui a, a ṭawng bawk si lo, kei lahin sawi tur ka vàn si, kan boruak chu a rit lûk a, haw thuai thuai se ka ti rilru viau nghe nghe!

"Engtin nge ka koh ang che?" mi pawh en lem hlei lo hian a rawn ti a, ka hming chu ka hrilh ve nghal mai bawk.

"Nang chuan min koh dan tur i hriat ka ring," a rawn ti leh a, ka lo nui hak ringawt!

"Nia, ka nau hnen aṭangin ka lo hre tawh alawm," ka ti zo chiah chu, "Engtin?" a rawn ti nghal chat a, kan mit a intawng chiah phei chu ka hawi sawn chiang kher mai.

"Pu Mavâl ti ta che ila a sualin ka ring lo," ka tih chuan, "Pu chu ka la ni chiah lo deuh," a rawn ti a, a nui tawi suk bawk.

"Aw....a nih chu, ka thiam loh ni rawh se," thuphâ châwi titih hian ka ti chhuak sap a, a bula awm pawh tih tawh nàk alaiin, a ṭawngkam hrim hrim chuan a mi uap a tinâ zual!

A tlan liam chiah chu ka thaw chhuak huai a, kan awm dun chhûng zawng khan pangngaiin ka awm thei lo a ni ber. Eng nge a chhan tak pawh hre lo, chumi zan, a rawn kal zan aṭang chuan mi a rawn ngaihven zui zauh zauh a, phone call-a inbiak zeuh zeuh châng pawh kan nei ṭhin.

Kâr khatah vawi khat te a rawn lêng ve leh zauh ṭhin a, kâr hnih tawp rawn lèn loh te pawh a nei tho va, a hmêl, a mitmeng leh a pianzia hriat hran a awl tih tawh nàk alaiin, a mizia lehzel pawh hriat hran a awl em em a, a dangdai hlak bawk.

Ka hmuh tirh leh hriat hmâsak ber kha chuan mi ti nghelh nghulh, inlapà hrak leh mi dangte rilru tur pawh dâwn lova mahni thu duh ve tak angin ka ngâi nghal kha a ni a, mahse a lo ni miah lo. A letling thawk záwk, a thiamna a sàn ang bawkin a fing a, zahawm pawh a zahawm narawh e!

Thla a vei a, krismas lam kan hnaih chho bek bek a, beisei loh deuhin kan bek sam vâra nen pawh kan inbe ve ta fô mai. Tin, nupui a lo la nei reng reng lo chu niin, tlangval hnahkhat, kum lamah pawh naupang zawk zawk tawh lo hi a lo ni a, Rammawia sawi dan chuan kumin hi a kum 40-na a ni a, mahse nupui leh ngàihzâwng lam erawh ngaihsak chì a ni vak lo a nih hmêl!

Ka hmuh tirh te khan ka'n pu ngawt kha a ni a, dik tak chuan hmêl fai vung mah se ka hmu patling ve êm alawm, nupui fanau nei duah tawh turah ka ngâi hmiah a nih kha! Chutah min la tizak em em zui leh ta nghal a, kha thil thleng kha chu ka theihnghilh mai mai theih pawh ka ring lo.

Hriat loh kârin krismas thla kan chûangkâi ta der a, Champhai tih takah khua chu a vawt vin tùk a, zan lam phei chu kawr lûm pakhat chiah hak chì pawh a ni lo. Khaw vawt tuar thei lo zual deuh tân phei chuan chhunah nen lam kawr lúm hak a ngaih châng te pawh a awm a, nî sâ mah se boruak lêng vel a vawt hit sùk ti ila a sual àwm lo e!

Nî khat chu tlai chawhmeh leiin bazar-ah ka kal a, haw dâwn tawhah chuan Mâvâla ka hmu hlawl a, biak tuma pan nghal mai ka tum chu a bula hmeichhe pakhat chuan nêl tih hriat fahran hian a be siam siam a, ka ding chat a, ka chhûng lam chu a rawn sa deuh nghal pup pup bawk.

Be lovin ka haw tlang ta daih a, dik tak chuan ka awm dan chu ka hrethiam chiah lo, Mâvâla lakah chuan ka inhmu tê chem chem ni berin ka hria. Accident ka tawh hnua kan awm zui zel dan kan hre ve ve a, mi â tân lo chuan hriatthiam loh theih pawh a ni lo.

Kan ina rawn lèn châng a ngah rualin phone call-a inbiak kan ngah mah záwk a, a tirah te kha chuan kan inbe tam vak lo va, mahse a rei tulh tulh a, kan inbe tam chho telh telh a, tun hnaiah ngat phei hi chuan ka laka a rilru puthmang hai theih loh khawpin a awm a, a lantîr a, ṭawngkâin sawi dawt lo mah se ka hrethiam ve vek!

Tin, kei ngei pawh hi ka bang bîk chuang lo. Kan inhmuh châng te, phone call-a kan inbiak châng te, kan ina a rawn lèn chângte hian nuam tih ruk dan riau leh ngaih ṭhat ruk dan riau ka nei ṭhin a, mi dang erawhin an hriatthiam loh hram ka beisei.

Dik tak chuan, ka lo duh ru reng tawh ni berin ka hria!

Ni e, a dik ka ring. Ka awm dan hi a dik miah lo, a laka ka rilru puthmangte pawh hi zawi zawiin a danglam zo a, dawr ka nghah paw'n a hna bâng hmuh ka inbeisei ru ran zel a nih ber tawh hi màw!

Amaherawhchu, amah berin ka beng hriatah engmah a la sawi chiang lo miau a, keia hrilh hmâsak ngawt chì pawh a ni lo. A awm dan aṭang hi chuan min ngàihzâwng en emaw ni le tih châng pawh ka ngah a, mahse chu erawh thil chiang a ni chuang lo, ka rin dan mai chauh a ni.

Zep rual lovin ka mipa hmêlṭha tih chì, pá tih chì leh ngainat chì chu a ni chiang alawm, a hmâ ang lo takin a bek sam ṭuak vâr ṭhek ṭhek te pawh ka hmu mâwi vek tawh a, amah ti amahtu ah ka ngâi hmiah a, a lo hang chhe lo bawk nen, tunah chuan inhmeh ka ti lehling ru viau tawh záwk!

Zan khat chu a rawn lang ve leh nulh a, hmeichhe pakhat nen bazar-a ka hmuh dun nî aṭang khan nî 3 lâi a liam tawh a, khami hnu khan phone call chuan inbe ṭhin tho mah ila ka be rei peih vak ngai lo va, ama tak paw'n a hriatthiam ka ring, zep thu a cheng lo, keia lo duh ve ngawtna hian kawngro a sut ka ring loh vang a ni ber.

Chumi zana a rawn lêng chu a lêng rei fû a, thingpui pawh vawi hnih lâi ka siamsak nghe nghe a, Aizawla krismas a hman tur thu te, kum thar hnua a rawn chhoh leh tur thute chu min hrilh ve nuap nuap a, heater âiin kan inṭhut hnaih set sawt viau bawk.

Aizawl khaw mi leh sa a ni tih pawh hi ka hriatna a la rei lo, záwt lo ila chuan min hrilh a tum lo hrim hrim niin ka hria. Eng eng emaw ni kan sawi a, ka thu khel chu a ho ang reng viau a, a haw tur chu pâwn thleng ka thlah a, ka awm dan chuan a awm a tinuam bîk chiah lo ni ngei tur a ni.

"I dam lo em ni?" a rawn ti ta nge nge a, khua a vawt ṭha bawk a, a ṭawng zâwng chuan a khu deuh ruih nghe nghe.

"Dam e," ka ti pangngai ve mai a, min rawn din hnaih salh a, chutah dim ang reng taka ka kawr lûm hak lâi pawt chip pah hian, "Naktukah Aizawl chhuk ka tum a, kum thar lama kan inhmuh leh ngei theih nân lo enkawl ṭha hle ang che," a rawn ti thum dam thlup a, a thusawi chuan min barakhaih chiang kher mai.

"Naktukah maw!? I va hmanhmawh teh thut ve?" ngaihtuah chiang mang hlei lo hian ka ti nghal hliai a, min ṭhawng ve êm bawk a ni.

"Chu....ka chhuk chu i la phal chiah na nge?" nui suk chunga a rawn tih chuan ka insiam ṭha nghal vat!

"Chu lam pawh a ni lo, i sawi làwk lo êm a, chuvang mai mai maw le," ka ti ta zaih zaih a, a hmêl leh awm danah erawh ka thusawi chu a awih lo tih a lang chiang viau thung.

"Thil pek tur che ka nei a," ti hniam supin a kawr lûm ipte aṭang chuan kutkawr, thlasik lâia bun chì ngei mai hi a rawn phawrh a, amah vek chuan ka kut chu làin min buntîr zui zat a, ka rawng duh chì tak a ni kher bawk nen ka ngaina nghal khawp mai.

"Ka lawm e," tiin ka nui var var a, chu a kutkawr min pek avang chuan ka lawm tak tak bawk.

"Nakinah krismas present pangngai chu khu lam aṭangin ka rawn thawn ang che," a rawn ti leh a, ka lû ka lo thing nghal vat!

"A ngâi kher lo, a buaithlak mai mai," tiin ka hnial thuai a, ka ngaihtuah zui rauh rauh a, a rawn thawn leh tak tak lo ang tih pawh a sawi theih loh!

Kan inthlah fel meuh chuan zan a lo tlai duai tawh a, dâr 12 pelhah daih ka mu ve chauh a, ka muttui hle bawk. A tukah chuan a sawi ang ngeiin Aizawl lamah a liam thla a, a awm lo chiah chu ka ruak deuh huai ni maiin ka hria.

A chhuk aṭanga rei lutuk lovah Zira a rawn lang hlawl a, pangngai takin kan lo dawngsawng a, a awm dan aṭang chuan mamawh nei tih pawh a hriat hle a, mahse ka rilru erawh a la ngai reng, ani nena inzawmna neih ka tum tawh lo bur!

Nghakhlel ru takin Mavâla phone call ka chang ṭhin a, mahse min rawn be ngai ta reng reng lo mai. A chhuk aṭang khan vawi khat mah min rawn be zui leh tawh lo hrim hrim a, chu chuan ka rilru a tinâ a, kan inkâra thil thleng awm tura ka lo suangtuah ṭhin chu engmah lo mai a ni tih ka hre chiang ta viau bawk.

A reh vang vang a, krismas nî chuan message-in ka zu be hmâsa nghe nghe a, mahse chhànna engmah ka dawng chuang lo. Ka mesaage hmu ang paw'n a awm lo hrim hrim, chu tak chu ka rilru tinâ zualtu a ni a, a lakah chuan ka tlâwm rawih rawih ni berin ka hria.

Krismas vuakvet chu ka hmang nuam lo nghal hle a, ka nihna, ka nun hlui nen lam a hria a, nuthlawi ka nih avangin min iai leh deuh si a ni ang te ka rilru hial a, a nihna takah chuan thil ni thei tak pawh a ni.

Ani ang tlangval zahawm, fing leh hleitling tân chuan keini ang nuthlawi mai mai te chu ngàihzâwng ena en chì tak tak pawh kan ni lo, kan nihnain a zir lo hrim hrim bawk.

Kha leh chen kha kan lo inbe ve tawh a, min duh tak tak ni se chuan min duh thu a sawi ngei ngei ang; mahse, a sawi miah lo, a awmzia chu min duh lo tihna a ni.

A nih leh keiin?

Keima lamah chuan zep leh tur chuang a awm lo, ka duh alawm, ka duh satliah pawh a ni lo, ka thinlung zawng zawngin ka lo duh fel hman der tawh záwk a ni.

Nimahsela, duh ang diak diakin thil a kal thei si lo.

Ani nena kan inkâr chu a ral riai riai a, chelh din theih loh, tawrh thiam har em em si a ni.

Kum hlui nî, kum khata nî tawp ber a lo inher chhuak a, dawrah ka phê buai char char a, hunpui tih takah dawrtu kan nei ve reng a, a lawmawm rualin a chauhthlak ve duh ṭhin khawp mai.

Chawhnu lam erawh kan hahdam ta deuh a, dawrtu em em nei lova ka ṭhut lâi chuan Mâvâla hnen aṭangin phone call ka dawng hlawl a, làk loh ka tum zet a, mahse ka làk loh chuan a laka ka rilru puthmang a hriat palh ka hlauh avangin ka là leh ta záwk!

"Hello...." ka ti zàngkhài vâh a, ka aw chu ka tipangngai lui a ni ber e.

"I dam em?" a rawn ti hniam sup a, a aw chu a dam lutuk hran lo hle bawk.

"Immm....dam e, i dam záwk maw? Kan va inbe khât ve ti raw?" ka ti leh zar zar a, lem ka chang tih a hriat loh hram ka beisei.

"Kumin krismas chu i hmang nuam a va nih hmèl ve?" awmze nei tak hian a rawn ti leh a, ka bo ta hû mai.

"Eng nge i sawi awmzia?" ka awah chuan ka insum hman lo tih a lang lek lek hial maithei a ni.

"I hre záwk ang chû.....?" tham lo aw zet hian a rawn ti deuh hmuk a, rilru dam loh sa nen, ka ngaihdan a ni ta bîk hauh lo.

"Ka buai rih tlat mai, kan duh táwk mai dâwn em ni ang?" ka ti ve ta salh a, lehlama mi erawhin thawm a rawn nei zui miah lo thung.

Kan inbiakna chu ka hmet tawp a, mahse rei lo pawh nih lovah Mavâla phone call bawk a rawn lut leh zat a, là duh lovin ka hmet busy daih a, a rawn call nawn leh ngat a, mahse la là duh chuang lovin ka ring raltîr ṭhak a, a ring zo chiah tihah a rawn call leh a, ka là ve ta nge nge!

"Hrep che chuan! Eng vanga mi hnar char char nge i nih?" a rawn ti hrawk a, chutiang taka a thinrim aw chu ka la hre ngai lo.

"Enteh Mavâl, i ṭawngkam vin ngaithla tura i phone call hi là ka ni lo a nia, inzawmna lah kan nei hek lo, hawihhâwm taka min biak theih chuan a lawmawm khawp ang," ka ti chang rat rat a, ka lung a âwi lo hle a ni tih chu a hriatthiam ngei ka ring.

"A nih chuan inzawmna siam tura ka rawn chhoh a ngâi a nih chu!" a rawn ti nghet churh a, ka meng fiah nghal kawk mai.

"Nanga duh thua inzawmna siam ngawt theih a ni hleinem," ka ti lèt ve leh fak a, a ṭawng dan vel chuan ka lung a tiâwi lo zual tak zet bawk.

"Eng pawh sawi rawh, ka rilru erawh ka sawh sawn lo ang," a rawn ti khauh hmuk a, thaw chhuak hakin ka biakna chu ka hmet tawp ta ringawt!

Ka hun hman a tinuam lo zo vek a, a rawn thinrim ringawt chhan lah ka hre hauh si lo. A nihna takah chuan keimah zâwk asin thinrim tur, biak pawh min rawn be ngai lo va, ka message ni se a en duh lo bawk a, chuta kâra a thinrim zâwka a rawn ṭang chu ka tân lo dawh mai mai a harsa thlawt a ni.

Khaw thim dâwn hnaihah dawr kan khar a, ka rilruah Mavâla a awm ru reng a, a lo chho tak tak ang tih mawlh ka hlau. Tun ang hian a awm ngai pawh ka hre lo, rilru a kap ru tak zet!

Zanah chuan ka ngâichang ru reng a, ka call ta hial vel a, Aizawl leh Champhai inkâr te chu a tawi lo va, a lo chho tak tak a nih chuan kawng lakah a chesual ang tih mawlh ka hlau tawh a ni.

Ka call lah chu a lá thei reng reng lo leh ta nghal a, ring chu a ring ngei a, a ring ral ṭhak a, a rawn chho tak tak a nih ka ring ta hmiah!

Dâr 9 rik dâwn velah a hnen aṭang phone call ka dawng a, ka rin ang ngeiin a rawn chho tak tak a nih chu! Champhai khaw chhûng a lo thlen chiah thu a rawn sawi a, ka ngaihtuah lo thei bawk si lo, engah mah ngai lo tak tak ila chuan ka mutsan daih ngei ang.

Nimahsela, ka rilruah ani tluka lian an awm lo va, ka thinlungah a thawm a lian ber a, a lakah lungâwi lo viau e ti lo chuan lungâwi lo ang paw'n ka awm tawh lo, chu pawh amah ka ngaihtuah êm avangin!

Kan in kawt a rawn thlen chuan min rawn call leh a, ka chhuak ve nghal mai a, ka chhûngte pawh engmah ka hrilh lo. Min hmuh rual chuan min rawn pan vat a, a car-a lut turin min hrilh a, ka lut ve nghal mai bawk.

Car chhûnga kan chùan dun hnu chuan ka melh leh zeuh ṭhin a, a puffer jacket hak chu a inhmeh tak zet! Amah a pa tê si lo, a fai bawk si, a hang chhe bawk si lo, a puffer jacket lah a dum a lo ni kher bawk nen, inhmeh tih piah lam a ni.

"Aizawl aṭanga Champhai thleng nula rima chhoh vang vang chu a dan a dang khawp mai," a rawn ti sup a, phone-a kan inbiak lâi ang khan a awm leh tawh miah lo, a nuih te hlei hlei chu a zain ka hria.

"Thil ṭul lo tak a ni," ka lo ti zui zat a, ka sawi awmzia chu a man mai ka ring.

"Thil ṭul tak záwk a ni," a rawn tih chuan ei lo zet hian ka lo melh a, a rawn thlen tirha a thu thua ka lo awm vel zat zat te kha mawl ka intihnuhnawh kher mai.

"Engati nge i rawn chhoh tak tak?" ka ti deuh halh a, ka melh ran bawk.

"Engati nge ka lo chhoh tak tak loh ang?" chinawm zet hian a rawn ti a, a awm dan vel chu a inhmeh hlawl lo.

"Mi chhâng ṭha mai mai teh!" ka tih leh pawh chuan min nuih duh lèk chauh a nih chu!

"Zan zanah lehnghal!" ka ti leh hram a, sawi loh tur ka sawi palh tih ka inhre chhuak nghal a, mahse ka tlai hret!

"Ngaihtuahtu neih hi a lo nuam ngawt mai, nang paw'n nuam i tih ka ring, a chhan chu ka ngaihtuah ve tho che si a," a rawn ti dut dut a, ka hawi sawn hmak ringawt!

"I pasal hlui nena ka hmuh dun che u tlai kha chuan ka sâ teh asin!" amah bawk chu a rawn ṭawng zawm leh a, ka kâ ta hau mai.

"I rawn chho tihna em ni?" ka ti nghal chat a, ka zawhna chu chhán pawh a chhâng chuang lo.

"Vawi tam ka inngaihtuah a, i pasal hlui bula i lèt leh duh ringin keimah leh keimah ka inhrem hial a, vawiin lama ka thinrim chhan pawh kha eng dang vang a ni lo. Amaherawhchu, mak tak maiin ka thinlungah hian rin duhna che a lian tlat a, i hmêl ka hmuh leh tâk chinah phei hi chuan ka hre fiah lehzual!" ṭum dang ang lo takin a rawn ti lûam a, ka rin loh lam hlir a sawi a ni ber e.

"Engtin nge ka pasal hlui a ni tih i hriat?" ka tih lah chuan, "I chungchâng leh a chhehvel hi chu ka hre vek," a ti sam than ang leh ta nghal a, sawi zui zel tur min tihaihchham chiang hle.

"Heti hian inzawmna kan siam chu a ni tawh mai em?" a tih chuan ka lo meng á leh hû tawh!

"Eng inzawmna maw?" ka ti chhuak hap a, ani erawh a nui nghawr dat thung.

"Kei val senior bek sam ṭuak tawh hian ka duh che tih chu i hria alawm Sangpui, nge nia i la haider lui hram dâwn?" a rawn ti dam dap leh ang lawi a, min duh thu a kâ ngei aṭanga ka hre chiah chu ka thin a su dup dup mai.

Chutah ka koh fiam ṭhin dan ang chiahin amah leh amah a la insawi zui!

"Min duh ringawt mah la keiin...." tia ka ṭawng laklawh lâi chuan, "Min duh ve tih ka hria alawm, nichin lawka min en ruk vawng vawng dan te kha ka hai lo a nia...." a rawn ti ta mai, ka zak lutuk chu ka sâ vek thei!

"A teuh lo, i duh leh bazâr-a i kalpuinu kha inzawmna chu siampui rawh," ka ti ta ngawt a, pâwn lam ka hawi nghal daih bawk.

Car chu a tiding deuh thut a, eng nge a chhan hriat tuma a lam ka hawi chu chiang lutuk tak mai hian ka hmuiah a rawn fawp a, tal chhuah tumin ṭan ka khawh nghal a, mahse ka khawh rei thei lo chiang kher mai.

Ka awm dan chu ka hrethiam chiah lo, thlasik khaw vawh lâi mah ni se a lûm nuam veng veng a, ka engkim thununtu hmui chu eng dang ni lovin Mâvâla hmui ngei a ni a, ka biang tawn tawn dawm meuha min fawh lâi te chuan mu leh mal rèng ka hre zo tawh lo.

A inla hrang chiah chu ka hmui a khur der der a, ka chil ka lem nghal dawk bawk a, men pawh ka meng hlei thei lo a ni ber e.

"Ka hmangaih che," ti thuk ruiha min rawn fawp leh chiah phei chu ka lo zawi nghal hniang a, a mi fawhna chuan hmun tin kil tin a fan chhuak a, eng tin paw'n min ti se dawh mawl tawp bak tih theih ka nei lo.

Dam deuh si hian min fawp tawn tawn a, kei lahin ka lo dawngsawng ṭha bawk si, engtik lâiin nge a mal chungah ka ṭhut kài hman pawh ka hre lo. Kan inkuah hle hle hnuah ka hre chhuak ve chauh a, ka duh ve tak zet a ni tih chu a hriat chian viau pawh ka ring.

"Ka senior tawh si a, min iai ru deuh lo maw? Nakin lawkah i pasal ka nih hmèl bawk si," a rawn tih chuan ka lo nui hak a, kan la inkuah reng bawk.

"Chutiangin sawi làwk suh, kan inṭhen leh daih maithei asin," ka ti dek dek chu, "A teuh lo, ka birh tluk tluk dâwn che, ka zuna uai a nâ teh a nia, nang pawh hian i tem chho ṭanin ka hria," a rawn ti zui dut dut a, nuih loh theih pawh a ni lo.

"Tunah kum 31 i ni a, keiin kum 40-na ka hmang mêk a, kum 41 ka tlin hmâa ka chhai thlu lo che a nih chuan kei hi Mavâla ka ni lo ang," a ti leh kher a, a ṭawng dan vel chuan ka mood a thlak chiang khawp mai.

"Ka sam pawh hi dùm ila a ṭha ang," amah bawk chuan a ti hniam leh dut a, ka ṭawng ve ta nge nge.

"A ṭul kher lo, hetia i bek sam vâr ṭhek ṭhek hi i inhmeh zâwk, heti hian pu reng rawh," nui pat pat chungin ka ti a, ani pawh a rawn nui nghawr dat dat a, kan boruak chu a hahdamthlakin a nuam tak zet!

"Zanin aṭang chuan ka hauh tùk dâwn che a nia, mipa dang i biak paw'n ka ta i ni tih hre reng ang che," a rawn ti dam dap dap a, a tih leh duh tak tak pawh ka ring.

"Mi hian 'i va'n nei senior' min ti mai ang a!?" a ngaihdan hre chák ru zetin ka ti hniam deuh dat a, ka nui ru tet tet a, mahse ka nui tih a hre lo thung.

"A pawina a awm reng reng lo, a senior nior hi alawm le zei, nichin pawh khan awm ngaihna i hriat miah loh kha aw...." a rawn ti chiah chu ka zak nghal chem chem; awm dan tur pawh ka thiam lo!

Ani erawh rei lo tê hnuah za zet hian a rawn nui hawk hawk thung a, a puffer jacket chu zip hawngin a âwmah min kuah hlun a, a lûm nawmzia chu pui tak a ni.

Chutah ka la muhil daih zui, amah zàwkin min kai tho lo phei se chu ka muhil tlang ngei ang. Kan in lamah kan inphur haw a, kan in kawt kan thleng a, a lo lut ve mai dâwn emaw ka ti chu a lo ni teuh lo.

Aizawl lama tlan thlak leh nghal a lo tum chu ni rengin, keia ngaih ṭha lo chuan riak law law turin ka sâwm fan fan a, mahse awmzia a awm tam lo khawp mai.

"Ka haw tlai si, i lo luh loh te chuan ka chhûngte bulah ka chhuah chhan chhuanlam tur ka nei dâwn lo asin," tia ka thlem ṭang ṭangna te chu, "Inngáihzàwn lâi te chuan chhûngte bulah vawi khat tal dáwt sawi a ngâi," tiin min lo hnial fithla zel a, tih ngaihna pawh ka hre tawh lo.

Chumi zan chuan ka chhûngte bulah Mavâla avangin dáwt muhlum ka sawi ta nge nge a, ka chhuanlam siam lah chu an awih loh hmèl em em lehnghal! Zawhna dang min zawh thui hmâin pindan ka pan a, ka mu nghal daih bawk.

Kum thar tuk aṭang phatin boruak a danglam em em a, Mavâla nen pawh nitin kan inbia a, kum 41 a tlin hmâ ngeia min chhai thluk a tum mai bakah a nupuia min siam a tum ruh bur a, senior viau tawh mah se a che naupangchhia leh thut ṭhin.

Khaw khata kan awm dun leh hnu aṭang phei chuan a sawi ang tak takin min rawn rim tluk tluk a, ka pa paw'n a awm loh lâiin fiamthu thawh nân a hman phah nghe nghe a, zep lo chuan min rawn len chilh ngawr ve bawk êm a ni.

A hna bánah pawh dawrah a rawn pêng kawi zauh zauh ṭhin a, mahse kan inhmu tam te, ka chhûngte nena an inhmu tam leh be tam te chu ṭha ka ti daih záwk! An inhriat chian phah a, ngainat pawh an inngainat zual phahin ka hria.

Hunin kan hringnun, a chhia a ṭha a her liampui zel a, nîtin nî thar kan hmang a, Mavâla nena kan inkâr pawh a nghet tulh tulh a, engati nge hmâna hmànah khan kan lo intawn loh le te ka rilru vawng vawng hial ṭhin.

Hmangaih nei leh thei tura inbeisei ngam tawh lo kha a mi hmangaihna avangin ka thinlungah hmangaihna thianghlim a rawn piang a, chu hmangaihna, lungngaihna leh harsatnate paw'n an awp beh zawh loh hmangaihna chu atân ka hlan kumkhua tawh bawk ang.

A sawi làwk ang ngeiin a nupuiah min siam ta nge nge a, chu pawh kum 41 a tlin hmâ ngeiin! Kan inneih nî chuan a thutiama a din thu min hrilh ru sur sur a, ka nuih chîam phah nghe nghe!

Ka ngainatna te, ka thlakhlelhna te, keimah leh keimah ngei ai pawha ka rin ngam záwkna te chu a lèt beisei hauh lova ka hmangaih vang a ni a, chu hmangaihna chu hmangaihna dik tak ni ngeiin ka hre bawk.

The End