𝐕𝐈𝐍𝐂𝐄𝐍𝐓 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟐)

VINCENT
(Mizo Romantic Novel)

By

Havali Adam

Chapter 2

Chutia taksa chak lo leh bawihsàwm ngâi ka'n phur ta chu ka tlan chak vúk vúk hle a, kâr lovah hospital pawh ka thleng thuai a, ka thlen rual rualin ka hmeichhe phurh, taksa zawi hnuang tawh leh meng thei ṭawk ṭawk chu ka pawm chhuak nghal vat vat a, casualty-ah ka tlan luhpui rang hle bawk.

Nurse te chuan min lo buaipui zung zung a, tih theih ka nei tlêm bawk si, ka rilru a buai ru tho bawk si, awm dan tur pawh ka hre lo. Dârkâr khat dâwn doctor leh nurse te'n an bawihsàwm hnu chuan thil hriat chhuah ka nei zawk a, ka pa ka call thuai a, thleng har min lo ti tawh viau maithei a ni.

Ka call a làk rual chuan hospital-a ka awm thu leh Aizâwl khaw pâwna ka la awm thu chu ka sawi nghal zung zung a, ka awm chhan tak pawh ka hrilh nghal mawlh mawlh a, thil thlen dan chu zia lo a lo ti ve hle bawk.

Rei táwk fang kan inbia a, ka pa phone mah ni se ka nu a rawn ṭawng ri ve reng a, min biak rawn a ni ber. Ka awmna hmuna rawn kal an tum deuh nà chu keimah záwkin ṭul ka ti lem lo va, anni paw'n an tum lui duh ta bîk lo.

"Ka pu, doctor-in a hmu duh che a?" nurse la naupan hmél tak lam chu ka hawi rang kher mai.

"Heti lamah hian aw....." tiin doctor room lam min kawhhmuh zel a, kei tak paw'n doctor chu biak ka duh a ni.

"Eng nge a dinhmun?" doctor room ka luh rual chuan ka ti nghal pang a, dârkâr eng emaw zah an bawihsâwm tawh a, ka hriat tur chanchin thar a neih ngei ka ring nghet bur!

"Ka hrilh tlang tawp mai ang che, tunah rih chuan beisei awm tia sawi ngam a ni lo. A taksa khawi lâi mai pawh hi hliamin a khat emaw tih theih tur a ni a, sawisak a tâwk tih pawh a chiang khawp mai" doctor thusawi zawng zawng chuan ka mipa rilru a kai tho chiang teh e!

A chhan pawh chutiang taka hmeichhia âwm nêm lo sawisa duhtute chu ka haw nghal hlur a tin a ni!

"Hliam dang zawng aiin a nâka a hliam neih a buaipui awm ber a, han thihpui tham ém chu ni lo mah se ngai awh leh tur chuan hun a duh ve deuh maithei" a rawn ti leh a, ka ngaihtuahna chu a kal thui khawp mai.

"A dam ṭhat leh ngei theih nân theihtawp min chhuahsak turin ka duh che doctor, a dam ṭhat leh ngei ngei a ngâi!" ka ti ta nghut nghut a, eng pawh ni se chutiang taka hliam lo siamsaktu chu ka chhui chhuak ngei ang.

Doctor room aṭanga ka chhuak chiah chu ka thaw chhuak hawk a, ka rilru a buai pawh a ni tawh lo, ka thin a rim a ni tawh mah záwk! Ka hna nen inzawmna a lo nei kher bawk nen chhui chhuah ka tum bur a, mahse chumi ti tur chuan dam lo ber a dam ṭhata a rawn harh chian phawt a ngâi!

"Ka pu, cabin pakhat a ruak a, dam lo kha kan sawn aw, i lo hriat loh pakh tàkin" nurse pakhatin a rawn tih chuan ka hawi chhuak thuai a, ka zui nghal zat nghe nghe.

Nurse te'n dam lo an buaipui mial mial lâi chuan ka lo thlir reng a, dam lo mawlh chu ka en chian pôh leh ka khawngaihna a zual a, kei ang mihringah pawh chapo ve lâhin chutiang taka ka khawngaih ta mai chu eng nge a chhan ber pawh ka hre lo.

Cabin-a an sawn fel hnu chuan ka ṭhut chilh deuh chawt a, eng inzawmna mah kan nei lo tih ka hai lo va, mahse dam chhuak se tih ngawt ka rilruah a awm thung a, a hmêl aṭang reng reng chuan a la upa lo tih a hriat em em leh ta nghal a, zep thu a cheng lo, a hmêl dâng bal te chu khawihngaih loh theih pawh va ni suh!

Ngaihtuahna sênga ka ṭhut ngawt ngawt hnu chuan khua pawh a rawn vâr ṭan der a, nurse te'n a khât mâwi tàwk velin min rawn thlithlai leh zauh ṭhin tih loh chu thawm dang réng hriat tur a awm lo va, a reh hian a reh ṭhiap a, chu tak chuan rilru leh ngaihtuahna pawh a tikal ding duh viau mai.

Nî a han chhuah èn siar siar tâkah chuan rilru sukthlek a dang ta deuh a, ka nu nen kan inbe zuaih a, hospital-a an rawn kal dâwn thu a sawi chuan hnialna pawh ka nei chuang lo, chutin lo kal se ka duh tihna pawh a ni chuang hek lo, ka ngâithla liam vel mai mai a ni ber e.

"Aih......! Ka duh lo......! Ka duh lo......!" tiin ka bul lawka mi chu vawi leh khatah a rawn au chhuak tuarh a, meng miah si lovin a ṭap khur nghal hlawp hlawp a, ka hnaihchilh rang khawp mai.

"I ṭha em?" tia a lû ka'n dawm chu theihtawp chhuah ang hrim hian a rawn tal chîam a, ṭe pawh a ṭe nasa nghal hle.

"Min thlah rawh! Ka duh lo! Min thlah vat rawh!" a rawn ti leh tuarh tuarh a, ka bân chu a sik pilh pheng phung a, eng thil ṭha lo emaw tak chu a chungah a thleng chiang a ni.

"Hlau suh......ka tinâ dâwn lo che" ka aw chu ka thunun hram hram a, ka pian a hnu lama ka la ṭawng zaidam ve ber a ni hial ang.

"Khawngaihin......khawngahin min thlah rawh, thih ka la duh lo....khawngaih takin!" ṭap chhuak rawih rawih chung hian a rawn ti hlawp hlawp a, chutah zet zawng ka zaidamnain a tlin ta bîk ngáng lo.

"Duh táwk rawh! Ka tinâ dâwn lo che ka ti a ni lo'm ni?" ka ti deuh hrawk a, ani pawh chu a rawn meng chiang ngàng mai.

"Ngaithla teh, tu nge i nih ka hre hauh lo, mahse ka bulah chuan i him ngei ang" ka ti leh hluk hluk a, ka aw chu tlêmin a vin ta lo hlek bawk.

"Tu nge i nih?" men pur chung hian a rawn ti ṭiau a, chhán pawh ka chhán hmâin a ṭap zui nghal feih feih a, a awm dan vel chuan ka rilru a tibuai hneh tak zet!

"Tu nge i nih? Khaw'nge ka awm?" la ṭap reng chung hian a rawn ti leh a, kei erawh ka lo thaw chhuak hawk ringawt!

"Khawngaih takin min pui rawh, thih ka la duh lo" amah bawk chuan a rawn ti leh a, ka hmuh tirha a hmêl ang chiah kha a pû a, awm ngàihna min tihre lo zo mai dâwnin ka hria.

"Khawngaih takin....." zuai raiha a rawn tih leh chuan

"Hlau suh, ka bulah chuan i him ang, ka tiam a che, tûma'n an tinâ lo ang che" ka ti ve ta sup sup a, ka aw pawh chu a dam deuh ruih tawh nghe nghe!

Ka kut chu nghet zet hian a rawn chelh a, ka beisei loh deuhin a âwmah a kuah bet zui zat a, maimitchhíng reng chung si hian a la ṭap feih feih a, ka awm dan lah chu ka hrethiam bîk lo kher mai.

Ka lûm deuh pup pup a, ka kut ni se a kuah bet nghet nasa mai bawk si, tlêma tlêmah ka hawihai lo chauh a ni. A hmêl chu ka en deuh vung vung a, zawi zawiin a ṭap thawm pawh a zawi tial tial a, nâ zetin a mit a la chhîng reng thung a, eng thil fakau nge a hlauh chu ka hre chiang châk tawh tak zet a ni.

Cabin kawngka inhawng ri rak lam ka hawi chuan ka nu leh pa hmêl ka hmu nghal zat a, ka beisei ai an lo thleng hmâ daih!

An mitmengah chuan min ngaihtuahna hlir a lang a, ka dam lo buaipui mêk lam ka'n hawi leh chiah chu hahdam hmél zet hian a lo muhil bâm a, nichin lawka muthilh hreh em em hmél ang kha a lo pu tawh miah lo bawk.

"Ka hmèlhriat ngai a ni lo i ti khan ka hre sia....?" ka pa lam chu ka hawi a, ani erawhin ka kut a lo en deuh ngat ngat chu niin!

"Ka tih a ni lo" ka ti deuh tawl a, ka nu phei chuan ka thusawi awmzia chu a hriatthiam loh hmèl kher mai.

"Amah záwk hian a vuan bet tlat a......" ka ti leh ringawt a, ka pa záwk chu a rawn nui chhuak huk a, ka nu erawh a la hriatthiam loh hmèl hle thung.

"Eng nge a an?" ka nu chuan a rawn ti ta nge nge a, zawhna min zawh a châk tawh khan ka hre rèng a ni.

"Ka hrethiam lo, a taksa lam tak chu a zia deuhin ka hria" hniam deuh dapa ka tih chuan

"Eng nge i sawi awmzia?" a rawn ti leh nghal zat a, chutianga min zawh chu ka beisei sa hrim hrim bawk.

"A rilru hi a la buai khawp mai a, nichin lawk khan a rawn harh a, hlauh a nei tih pawh a chiang viau a, mahse pangngai taka a rawn harh hunah bak zawhna pawh a zawh theih ka ring lo" ka ti ta duah a, ka hriat ngai pawh ni lovina ka kut a kuah bet tlatna ata chu ka inla hrang zal zal a, muhil lo se zawng a la chelh ngheh viau ka ring, ka pa lah chuan min lo en chìk em em lehnghal!

"Thil ti ru ang mai alawm i nih le" a rawn ti ta khurh a, za vak lo hian a nui zui zat nghe nghe!

"A tua chu maw?" ka nu chuan a lo ti nghal a, ka pa ang lo takin ka awm dan chu a lo la hrethiam lo tluang zel a nih hmèl!

"A ho lutuk" ka pa chuan a ti leh daih a, engmah pawh sawi chuang lova min han nuih leh ruh ruh ṭhin chu ka nui ve ta ringawt bawk.

Khuma muhil bâm, kan dam lo buaipui mêk nena kan inhmuh dan chu kimchang záwkin ka sawi malh malh a, nizan khan ka hrilh kim chiah lo va, sawi vekna hun nia ka hriat loh vang a ni pakhat!

Ka nu mawlh chuan a khawngaih thu hlir a sawi chamchî reng a, kei ai aiin a ngaihven ta mah záwk a, kei erawh ka pa nen kan titi daih a, cabin chhûngah erawh kan la awm vek tho.

Nî a kang sâng tial tial a, kan dam lo ber pawh dâr 10 rik dâwnah a rawn harh leh hlawl a, doctor awm lâi tak a ni nghe nghe a, a rawn harh tirh chuan mi â ang mai hian a rak chíam a, ka nu phei chuan a hlau hman hial nghe nghe!

"Ka duh lo.....! Ka thi duh lo....!" tih ngawt chu a ngai te bawkin ṭah hlaah leh au hlaah a hmang leh a, doctor leh nurse te chu a hlau ang thul, loh theih lohna avangin ka va buaipui leh ta nge nge bawk.

Mak tak mai hian a bul hnaiha ka awm chinah erawh a ṭe tuarh tuarh tawh lo va, ṭah erawh a la ṭap feih feih reng thung a, ka nu leh pate mawlh chuan a awm dan chu mak an ti a, engmah pawh an sawi lo, ngâwi rengin min en tawp ringawt!

Chutia a rawn harh leh tâkah chuan nghah deuh phawt a, zawhna zawh chu ka tum ru ta ran a, doctor te paw'n han buaipui zui vak dan an hre lem lo khawp mai. An buaipui a duh der bawk si lo, nurse leh doctor te chu a hlau tlat ni maiin ka hria.

Rei fê chu thil awm dan leh bawihsáwm ngâi a nihzia inhrilhfiah nân hun kan hmang a, ka nu leh pa chenin chhuak rih turin ka ti ta tawp a, a nihna takah chuan eng nge thleng dâwn ka hre bîk lo, ka thil zawh tum chu min chháng duh kher ang em tih lam phei zawng ka hriat loh lam tak a ni.

"Engati nge doctor leh nurse te ho buaipui kha i duh miah loh?" ka ti dam dap a, tun dinhmunah chuan awkâ dam taka biak baka fuh a awm lo.

"Min thah an tum alawm, ka hria, an rilru ka hre vek, min thah an tum chiang a ni" a rawn ti chhuak ta piap piap mai.

"Ni lo, annite kha chuan dam lo te an enkawl dam ṭhin záwk alawm......" ka ti hman dek dek chu

"Aih....! A ni lo, ka hria asin, min thah an tum tih ka hre chiang lutuk!" a rawn ti nghal ṭiak a, ṭah chhuak ngawih ngawih hmèl a pu zui zat nghe nghe!

"Eng thil chiah nge i tawn min hrilh teh?" ka ti hniam ruih a, mittuia khat mitmeng hian min rawn melh kal a, ka zawhna chhán mai a tum loh hmèl viau bawk.

"Min hrilh rawh le, engkim min hrilh la ka duh, ka bulah chuan i him ka tih tawh kha, sawi rawh le" ka ti leh dap dap a, chutiang taka ka dawhthei thluam thluam ta lutuk chu keimah ngei paw'n mak ka ti lo thei lo.

"Han sawi teh le, engkim min hrilh vek rawh" ka tih leh pawh chuan a la ngâwi reng a, hlauh a nei tih lah ka hre chiang bawk si nen

"Police alawm ka nih, min ring ring lo em ni? Hei, en rawh, police ka ni e. Police hna chu ṭanpui ngâite puih leh thil tisual titute man a ni a, chuvangin engkim, thil thlen dan zawng zawng min hrilh vek la ka duh" ka ti leh ta duah a, ka ID ka phawrh lâi te chuan min en chiang khawp mai.

"Hlau miah suh, i bulah ka awm tlat dâwn alawm, ka bula i awm chuan engmah hlauh tur a awm lo" ti hniam leh supin ka ṭhut hnaih salh a, a mitmeng chu chhiar thiam lo nasa tak ka ni!

"Anniho khan min thah an tum a, mahse......" ti chhuak sepin a ngâwi leh daih a, ṭah chhuak tih hriat tak hian a hmui chu a pet fan fan a, khawngaihna nasa tak ka nei nghal bawk.

"Engati nge ka chung hi a pik em em le?" tih leh hmai hup a rual a, insum zet hian a inhnit feih feih a, a awm dan chuan awm dan tur min tihbaihvai leh ta viau mai.

"Ni lo, ka sawi duh tawh lo, ka hlau, min rawn zawng chhuak ang tih ka hlau, a chhan chu min hmuh hun hunah min that ngei dâwn tih ka hria a ni" ti ṭial deuh ruai hian a ṭap zui ta hlawp hlawp a, ka tih ngaihna hre lo chuan ka kuah ta ringawt!

"Ka tiam a che, ka bula i awm chhûng chu an that lo ang che, tûma'n an that lo ang che" ka ti dam thluam a, chu thu ka sawi zawh rual chuan nghet zet hian min rawn kuah a, kan awm dan chu ngaihtuah chian hman pawh a ni tawh lo.

"Engkim ka hnenah sawi vek la ka duh, ka ṭanpui theih nân che, i sawi duh tawh lo a nih paw'n vawi khat chiah sawi la, ka tâna hriat tur pawimawh i sawi chuan ka zàwt nawn tawh lo ang che" ka ti leh dap dap a, ani erawh a ngâwi deuh vang vang a, a awm dan aṭang chuan ṭawng a tum loh hmél hle thung.

"A bul chu ka pa a ni; engkim hi ama bulṭan vek a ni! Burma mi pasalah min neihtîr a tum a, ka duh loh chuan thahah min vau a, mahse ka neih duh loh avangin min that tur mi dang a ruai a, nasa takin min sawisa a, dam ve hram hram ka duh avangin ka tlanchhe ta a, mahse khawiah nge kal tur pawh ka hre lo, ka hre lo tak zet" ti ṭiau ṭiauin a ṭah zawm lehnghal zat a, a dinhmun khirh tak avang chuan ka khawngaihna a zual kher mai.

"Ka hrethiam e, a nih leh khawi khua aṭanga tlanchhia nge i nih?" ka tih hnu lawka an khaw hming a rawn sawi chiah chu ka awih lo lek lek záwk a ni.

"Engtin nge chhim tawp aṭangin he lai hmun daih daih i rawn thlen theih? Ke ngat lehnghalin maw!? Nî engzat nge tlanchhiat nân hian i hman tawh?" ka ti ta mawlh mawlh a, ka mak ti lutuk chu ka invêng hman lo a ni ber.

"Kâr hnih dâwn a nih ka ring" a awah ṭah chhuak aw la hriat viau mah se a hmêlah erawh ṭah mai a tum tawh bîk lo tih a chiang hle.

"In chhûngte han belh mai tur an awm lo em ni?" ka ti chiah chu mittui tling pam hian min chhoh melh kiau a, ka zàwt sual tih ka hre chhuak chawpchilh nghal bawk.

"Chhûngte ka nei tawh lo, keimah chiah ka ni mai" tih leh ka kuahna ata inlàk hran a rual zui zat a, khumah chuan a saisir zâwng, min hnungchhawn zâwngin a mu ta daih a, zawh loh tur ka zàwt palh chu ka inthiam lo hnuhnawh khawp mai.

"Eng pawh ni se, i him tawh tih hria la, thlamuang takin awm rawh" ka ti thum leh ta dap dap a, thawh zui nghal mai tuma ka che ri hrut chu

"Khaw'nge i kal dâwn?" a rawn ti thuai a, hlauhthawn hmèl zet hian min en kal lehnghal a, kei pawh chuan

"Ei tur ka zu lei lawk ang e" ka ti pangngai ve mai a, ka hlata awm hlau ang hrim hian a mitmeng chu a danglam rawih rawih a, ka dinna ngaiah ka din deuh reng phah nghe nghe!

"Ka rei lo ang" tih leh supin kawngka lam ka pan zui zat a, kawngka bul ka thleng tawh tiha ka'n hawi lèt chu hlauhthawn rukna nei ang hrim hian min lo la en reng a, chu chuan ka awm a tinuam thei bîk der lo.

"Dik lo a awm em?" ka'n ti ngawt a, ani lahin ṭawng a tum loh hmèl ropui bawk si!

"Ka rawn chho leh thuai ang, hlauthawng suh, ka awm loh chhûng chu ka nu leh pate'n an lo awmpui dâwn che a nia....." ka ti leh dap dap a, ka chhuahsan zui ta nul nul bawk.

Cabin ka chhuahsan fel chiah chu ka nu leh pa ka be nghal a, anni paw'n zawhna an lo ngah viau a, ei tur lei ka tum thu sawiin cabin-a lo va awmpui tur chuan ka chah zawm zat a, an lut zui ve nghal mai a, kei tak pawh ka che muangcháng lo hle.

Hospital chheh vela dawr ṭhenkhatah chuan ei tur ka lei zung zung a, ka chhuahsan dâwn khan hun ka hman rei loh tur thu ka sawi nasa êm a, chuvanga hmanhmawh sawk sawk viau pawh chu ka ni réng a, eng nge a chhan ka hre bîk lo, mahse a mitmengah khan min mamawh tih ka hmu thei tlat a ni.

Ka tum ang ngeiin ei tur lei nân chuan hun ka hmang rei lem lo hle a, cabin-a ka lut leh chu ka nu'n a lo be melh melh a, amah tak pawh a tir ang em em kha chu a ni tawh lovin ka hria.

Cabin chhûnga ka han awm leh ta chu ka ngaihbel deuh nge pawh ka hre lo, hahdam huai hmèl hi a pu a, rin ai takin ka nu biakna pawh a chhâng ṭha duh viau mai.

"Khaw maw ei tur kha, Zualbawhi hi a ril a ṭam tawh dâwn lutuk tlat! Engtin nge ni tam tak chhûng ei tur ei miah lova a lo awm theih zàwk nì!?" ka nu chuan a rawn ti zui sawk sawk a, ka thil ken lâi chu a lá nghal hmak bawk.

"Kha le......" tiin a bula hmeichhe damsam lo tih hriat tak chu ei tur a pe a, hmeichhia leh hmeichhia záwk nà nâ nà chu hming pawh an lo inzàwt fel diam tawh a nih hmêl!

"Vincent, doctor va ko rawh....." ka nu bawkin a rawn tih leh chuan

"Ka duh lo!" a lo ti thuai a, kan en deuh ṭhap nghe nghe!

"Engati maw?" ka nu chuan a ti hû a, engmah a hrethiam lo tih chu a hriat khawp mai.

"Ka duh lo, eng doctor mah ka duh lo" ka mit taka mi rawn en chung hian a ti nawn leh thuai a, a mitmengah chuan pui turin min duh ni maiin ka hria.

"Enteh....." ti supin a lamah ka pen hnai a, ka nu ei tur pek pawh chu a ei zawm tawh lo hrim hrim!

"I dam ṭhat a ngâi alawm, doctor leh nurse te bakin an enkawl thiam lo che a, chuvangin....." tia ka ṭawng dap dap laklawh lâi chuan

"Ka duh hleinem! Ka duh lo, ka hlau, ka hlau tak zet!" a rawn ti chhuak tuarh a, kun ngalin a ṭap zui nghal feih feih bawk.

"Hlau suh ka tih tawh khâ.....ka awm alawm, police officer ka ni a, ka bulah chuan engmah a hlauhawm loh" awkâ dam ang reng tak hian ka ti nghal thuai a, doctor leh nurse a hlauh tlat chhan ka hre tawh a, mahse chumi avanga a taksa enkawltîr loh tawp erawh ka tum teuh lo.

"Ka duh lo, khawngaihin.....ka duh lo tih hrethiam hram teh!" la ṭap reng chung hian a rawn ti ṭiau a, ka dawhtheihnain a tlin loh teuh kher mai.

"A nih leh ka awmpui ang che, a ṭha em? I bulah ka awm tlat ang, i duh em? I bula ka awm chuan doctor te paw'n thah che an tum ngam dâwn hleinem, a ṭha em?" ka ti leh ta nge nge a, chutiang taka insum thei ka ni tih chu keimah ngei paw'n ka inhre lo.

"Engati nge doctor enkawl kher ka ngáih?" ti thawp sepin mitmeng thlabâr ru zet hian min en kal a, kei pawh chuan

"A chhan chu i dam lo alawm....." tiin ka chhâng zui zat a, ani erawh a la lungngàih hmèl hle thung.

"Ka dam ve leh mai ang" a la rawn ti hram chu ka insum thei tawh lo tak tak dâwnin ka hria.

"Nu, pa, doctor min va kohsak mai teh u" ka ti nghet ta churh a, ka hmâa hmeichhia, hlauhthawnnaa khat chuan min en chiang ngàng ngàng hle bawk.

"Hlau suh, i bulah ka awm tlat dâwn alawm, nangmah thah tumtu apiang chu ka man zel bawk ang" tiin ka ṭawng thlamuan zawm zat a, mahse a thlâ a muan phah em em chuang paw'n ka hre lo.

Ka pa záwk chu cabin aṭangin a chhuak a, rei lovah doctor leh nurse pahnih te'n an rawn zui lut a, ka bula mi chuan rang zet hian ka kut a rawn chelh nghal thuai a, eng vang teh chai nge pawh ka hre bîk lo, chutiang taka doctor leh nurse hlau tura a thluak lo su tute chu ka haw hlur a ni ber.

"Damdawi hi ei se, han mu leh bawk se, a zia chho ve zel mai ang, ka rin ai takin a ṭha chak phian, mahse damdawi inah hian in awm deuh rih a ngâi thung ang" doctor chuan a ti dap dap a, chutah nurse-in damdawi eitîr a tum chu a duh leh ta tlat lo mai.

"Ei rawh le, i taksa tâna ṭha tur alawm a nih" ti hniam supin keimah záwk chuan ka eitîr a, hnialna pakhatmah min nei eih lo chu ka nu leh pate tak paw'n mak an tiin ka hria.

"A rin ngam awmchhun i ni mauh mai bawk si a, awm hlat tam lo thei la chu a lawmawm ngawt ang" doctor chuan a rawn tih phah nghe nghe a, chutah amah bawk chuan

"Damdawi kha a chak deuh a, a mut a tichhuak maithei a ni. Han mu hahdam vang vang leh phawt se, a rawn harh leh hunah chuan a zia kâwk mai ang" a rawn ti leh charh charh a, rei pawh awm zui reng lovin an chhuak ta daih bawk.

Chutia doctor leh nurse te ber an han awm lo ta chu ka nu a ṭawng zui nghal siam siam a, ka pa pawh a rawn ṭawng dam leh ve dap dap ṭhin a, kei erawh kan pute biain ka chanchin leh ka awm dan te chu ka hrilh mual mual thung a, kan pu paw'n min lo hrethiam leh khawp mai.

Ka pu ka ngaihtuah avangin ka pa bulah chuan kan in lama haw leh tawh turin ka hrilh a, a nihna takah chuan damdawi ina an awm ve reng chu hlawkna a awm em em hran lo a ni. Amahni tân pawh hneawm lamah a kal thuai dâwn tih ka chiang a, chuvanga haw tura hrilh pawh chu ka ni!

Rei lo tê an awm khawtawi leh hnu chuan an haw ta nge nge a, an haw aṭanga rei pawh ni lovah ka bula mi chu a muhil zui nghal daih a, doctor khan a damdawi ei a chak thu leh a mut a tihchhuah thuai a rin thu kha a sawi tawh a, a muthilh thuai chu ka ring sa hrim hrim!

Chutia buaipui ngâi ber thawm chhuah miah lova a mut siai siai tâkah chuan kei pawh ka intiharh a, a muthilhl lâi tak chu chuhin hospital kawt lamah ka tei chhuk a, khua a lûm em em lo nàin cold drinks ka in ta tho va, cabin chhûnga awm ngawt ngawt ka ning ru ve deuh bawk nen minute eng emaw zah chu ka awm vang vang a, mahse rei lutuk erawh a ni chuang lo.

"Hello.....?" ti supin phone call lo lut chu phur vak lo hian ka là a, Lucy-i a ni kher bawk nen làk loh aiah ka lá a ni ber.

"Ka lo kal a, mahse hei, ka pu chiah a lo awm a, khaw'nge in awm diak a?" a rawn ti barh barh a, eng vanga lo kal nge a nih pawh ka hre lo va, zawh pawh ka tum hek lo.

"Ka hmu duh che asin le Vincent, engtikah nge i lo haw ang? Nge ni a, i office-ah ka lo kal záwk mai dâwn em ni ang?" amah bawk chuan a ti leh zat zat a, engtia han tih chì nge pawh ka hrethiam tawh nek lo e a!

"Station-ah ka awm lo, hna thilah ka chhuak!" ka ti deuh nghut a, a bulah hi chuan dáwt sawi a ngâi leh zeuh ṭhin.

"Engtik nge i lo haw dâwn?" a rawn tih leh chuan

"Eng chungchângah nge min hmuh i duh?" ka ti tlang nghal hluk a, ho tê bak a nih leh ring hek lo.

"Hmaichhana sawi chì a nia, phone-ah chuan inhrilh a buaithlak deuh......" tiin a nui zui hak a, a ṭawng dan velah chuan thu pawimawh tak sawi tur a nei lo tih ka hre chiang khawp mai.

"Ka buai, ka dah!" tih leh kan inbiakna chu hmeh tawp ka rual a, min rawn call nawn leh pawh ni se ka là tawh kher lo maithei a ni.

Ka bul lawka hmeichhe muhil bâm chu ka en deuh vung vung a, a lo berah kum 20 bawr vel bak a nih ka ring lo. Ka nu khan 'Zualbawih' tiin a koh tak kha maw le, a hming a ni ngei turah ngâi ila, inmawl biak ngawt ai chuan a hming te paw'n ko ve ila a ṭha ang.

Ka hnena a chanchin a sawi dan leh a tlanchhiat dan a sawi zawng zawng kha ka ngaihtuah lèt rauh ruah a, hun harsa leh khirh tak kâra a tlanchhe thei hrim hrim chu huaisen ka ti ru viau bawk.

Tin, a dinhmun chu mi tam tak paltlang zawh lo khawpa hautak a ni lehnghal a, mi ṭhenkhat chu ni se dam thlakhlelhna réng an nei tawh lo ang a, thih vang vang an duh záwk ngei ang.

Nimahsela, Zualbawhi erawhin dam a la thlahlel fàn a, dam chhuak tura a beihna chu a rilru huaisenthlak khawp mai; chutah hmeichhia lehnghal!

Tin, a dinhmun aṭanga thil lang chiang deuh pakhat chu, nu leh pate pawh hian dik lohna tam kan nei tih hi a ni.

Kan duhzáwnga awm tura kan duh luatah kan fate nun kan tichhe duai thei tih kan hriat tel ve tho a pawimawh hle a, fate duh loh chung kan nawrh luih nasat lutuk avangte hian rah ṭha lo a rawn chhuak daih thei tih i hre thar nawn awn awn teh ang u!

Hun chu a liam duak duak a, thlasik thla tih takah khua paw'n hniam a hnaih chak hle a, dam lo awmpuiin ka ṭhu ngawt ngawt nà chu ka nu leh pate nen kan inbe pawp reng a, ka nu phei chuan a rawn ngaihtuah leh tawh khawp mai.

Vawi leh khatah hmeichhe ṭe thawm ka hre thut a, ka lo chhîng sek chu niin, chiang mangkheng hian ka harh nghal kawk a, ka harh rual rualin Zualbawihi lam chu ka hawi thuai a, ka hnaih chilh nghal vat bawk.

"An lo kal, min man an tum, min man dâwn, ka duh lo, ka thi duh lo!" ti hlawp hlawpin a ṭap ruah ruah a, ka âwmah ka kuah bet thuai a, a mumangah nen lam a hmu a ni ngei ang.

"Tûma'n an man dâwn lo che, hlau suh le, engtin mah i awm lo ang, hlau suh" tiin ka ṭawng thlamuan zung zung a, a ṭap bâng nghal mai lo ná chu a hlauhna erawh a reh riai riaiin ka hria.

"Engati nge ka vanduai bîk em em.......?" ti ṭiauin a nghik zuih feih feih a, nghet zet hian ka kuah run a, chu bak chu tih theih dang ka nei meuh lo.

"I lo hmu em?" a rawn tih leh chuan

"Tute maw?" ka lo ti ve nghal mai a, a zawhna chu ka hriat loh lam tak a ni.

"Anmahni, ka pa hovin an lo kal alawm, hetah hian an zavaiin an lo kal a, min man an tum a, ka bânah an pawt vak vak a, ka zawng nasa che asin, khawiah nge i lo awm?" a thusawi mal tin mai chuan ka rilru a tikal thui hman viau a, a ngaihtuahnaa awm tur àwm ang pawh ka hrethiam ta kuarh mai.

"I bulah ka awm reng alawm, khawiah mah ka kal lo" ka ti zo chiah chu

"Aih....a ni lo, i awm lo, tal chhuak lo ila chuan min man ngei ang" a rawn tih zawm nghal hlawp hlawp a, kan hun tawn mêk chuan mawhphurhna lian tak ka nei tih min hriat chiantír ta viau bawk.

"Eng pawh ni se, hlau tawh suh, hlauh tur a awm tawh lo e" ka ti dam ruih a, ṭap ni si lo hian a rawn thaw chhuak leh hawk ṭhin a, ka mawhphurhna neih tawh azawngah a la dangdai ber ang ka ring.

"I ril a ṭam em?" pangngai taka ka tih leh chuan

"Ṭam ve tho...." a lo ti sep a, ṭah chhuak hmêl a pu tawh lo leh a ṭap tawh miah lo hrim hrim chu thil lawmawm tak a ni.

A harh hun atâna ka dah, ei tur ka lei láwksak chu ka eitîr ta mial mial a, rilṭam ngawih ngawih tih hriat tak hian a ei deuh buan buan a, tui te chu bottle hnih ngawt a in zo ṭhak a, keimahah chuan tenna leh hmuh hrehawm tihna vel ai mahin khawngaihna leh lainatnain hmun an chang zo va, ka pian tirh ata ani ang em em mihring khawngaih chu ka neih àwm pawh ka la hre lo.

"I ei leh duh em?" ti dutin a hmêl chu ka en reng a, ka hmèlhriat ngai miah lo mah ni se nau ang thawthangin ka en tawh a ni ber.

"Duh lo ve, ka pûar tawh alawm....." ti deuh hliai hian

"Ka lawm e, ka lawm lutuk, min pui a, engtikah emaw ka chunga i ṭhatna hi ka la rul ve ngei ang che" a rawn ti zui leh sap sap a, a thusawi chu ka rin loh lam tak a ni.

"Rulh ka ngâi hleinem, han dam ṭha ver vawr phawt la, hna ka thawk ṭan ang" ka tih chuan

"Eng nge i sawi awmzia?" a rawn ti thuai a, mak tih hmél tak hian min en deuh hû nghe nghe!

"Hetiang taka i taksa leh rilru lam thlenga hliam siamsaktu che hi ka chhui dâwn alawm, police officer ka nih thu ka sawi kha i hre tawh lo em ni?" ka ti lûam a, a mitmeng chu lungngàih rukna thuk takin a luah lûm nghal pup pup ni maiin ka hria.

"I ti thei lo ang a, a theih loh, police ni mah la engmah chhui suh ka pu, min pui a, min vênghim a, ka lawm lutuk, mahse engmah chhui suh" lû thing deuh nàng nàng pah hian a ti zawi raih raih a, ka hrethiam lo kher mai.

"Engvangin!?" ka aw chu ka thunun hman lo teuh hle a, mahse hriat nuam loh lutuk erawh a ni hran lo.

"A chhan chu engkim hi ka pa ruahmanna vek alawm a nih, ka pa chu ka pa a ni a, eng ang paw'n ka chungah thil dik lo ti mah se keini tân eng tih mah a thiang ve lo, chu chu kan hnam dan a ni" lungngài tak hian a ti zuih ral dat dat a, a thusawi chu ka pawm loh zâwng tak a ni.

"Chutiang ngawt a ni thei lo, tu mihring mah dan chunga lêng an awm lo, i pa a ni emaw ni lo emaw pawh ni se, i chunga hetiang thil ti duhtu hi ka chhui chhuak dâwn hrim hrim, i puihna erawh ka mamawh nasa hle dâwn thung tih hria ang che" ka ti ta hluk hluk a, ka ṭawng dam dap dap hman tawh lo a ni ber.

"Ni lo, khawngaihin ti suh, chhui suh, i nunna atân a hlauhawm lutuk ka pu, ti miah suh aw, i ti lo ang ti raw?" ka kut chelh meuh hian a rawn ti lawm lawm a, min ngen mawlh mawlh te pawh a ang mah záwk!

"Tum lui suh aw ka pu, i thih phah ngei dâwn tih ka chiang, i rin phak bakin an hlauhawm ang, a chhan chu Mizo an ni lo" a rawn tih zawm leh nghal zat a, a thusawi hnuhnung ber chuan ka beng a verh zar bawk.

"Eng nge i sawi awmzia? Tute maw Mizo ni lo?" ka ti ta chiah rèng a, ani erawh a ngàwi hmak thung.

"Engkim min hrilh vek law law a nih loh chuan ka pui zel thei lo ang che, chuvangin ka hriat duh chu min hrilh vek rawh, tute ber maw Mizo ni lo?" ka tih leh ngat tâkah chuan

"An zavaiin; kei tih loh chu hnam dang vek!" a rawn ti ta nge nge a, ka rilruah chuan zawhna a piang nghal zawt zawt a ni ber.

"A nih engtin nge Mizo i nih theih bîk?" ka ti zui zat a, tukverh lam hawi chung hian

"Fahrah alawm ka nih, nu leh pa dik tak ka nei tawh lo. Kum 10 ka nihin tuna ka chhûngte bulah hian ka khawsa ṭan a, a tirah chuan an fel lutuk a, mahse a rei telh telh a, min tiduhdah telh telh a, hnam dang ka nih avanga min hmusittu pawh an tam mai, mahse engtin mah ka ti lèt ve ngai lo, ka pa ngat phei chu VC a ni bawk si a, tûma'n a thu kan hnial ngam lo" a rawn ti leh ta melh melh a, ka rilruah chuan chhim tawp lama ṭawng dang hmang an tamzia leh chhak lam aṭanga lo thlang tla hnam dang an infuankhawm nasatzia a rawn lang nghal zut zut a, engmah pawh ka zawh zawm lawk loh phah nghe nghe!

"Keimah ngei pawh hi engtik nî ah emaw chuan min la rawn zawng chhuak ngei bawk ang" a thlir ngai thlir tlawk tlawk pah hian a rawn ti zawi leh sap a, ka rilru chu kal thui vawng vawng tak a ni.

"Ka bula i awm chhûng chu i him ang" ka ti thum chhal a, vénhim ka tum bur a ni tih chu hria se ka duh a, thlâmuang takin awm se ka duh bawk.

"Kei min buaipui avang hian i nunna paw'n a tuar thei tih i hriatthiam ka ring, chuvangin ka dam chian hunah ka kal bo ang a, nang chu i him a ni mai" mitmeng khawharnaa khat hian min melh ralh a, kei paw'n ka en chiang khawp mai.

"Chhûngte i nei lo i ti em khà?" ka tih chuan a lo bu nghat a, chutah keimah bawk chuan nghet cherh churh hian

"A nih chuan kan bulah i khawsa ang, a ṭha em?" ka tih zawm lehnghal thlup a, a mak ti hmêl chu hmuh hmaih lo nasa tak ka ni!

"Ni lo, a chì loh ka pu, ka thusawi hi hriatthiam tum hram teh" a rawn ti leh ta hluai a, engah mah ka ngàihsak duh tawh der lo thung.

"Ka pu' min ti tawh lo la ka tân paw'n hriat a nuam deuh ang, ka hming chu Vincent-a a ni e" ka ti ta daih a, min en chiang kal kal hle a, ṭawng nachâng hre tawh lo ang mai a ni.

End of chapter 2