𝐕𝐈𝐍𝐂𝐄𝐍𝐓 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟑)

VINCENT

(Mizo Romantic Novel)

By

Havali Adam

Chapter 3

Chutia thutlukna ka'n siam ta rup mai chu a ngaihna a hriat loh hmél hle a, engmah sawi zui tawh lovin a ngâwi ngal a, kei tak pawh ka ṭawng chhunzawm chuang der lo, a chhan chu ka thutlukna siam teh thut chuan a hril thui thei ve êm bawk a ni.

Ka nu leh pa leh ka pu pawh râwn miah lovin kan bula a khawsak tur thu ka sawi riap a ni ber a, Zualbawihi ber lah chu a en ngai a en tlawk tlawk a, thil a ngaihtuah thui hle a ni tih lah hai theih ni hek lo, a nihna takah chuan a chungchâng leh a dinhmun engkim chu ka mawhphurhna anga ka ngáih nghet bur tawh vang a ni ber.

Tukverh lamah pheiin ka phone chu ka phawrh a, Siaha lama ka ṭhianpa, police officer ve tho chu ka call zui zat a, Zualbawihi a ni emaw, ni lo emaw pawh ni se, chu ka thil buaipui tum mêk chu ka hna a nih avangin hlawhtlinna chan ngei ka tum a, ṭanpui ngâi ṭanpui te, chhanhim ngâi chhanhim te leh thil tisual man ngâi te man chu ka thil tih mâkmawh a ni tih ka hre chiang viau bawk.

"Ve teh hlawl che chuan.....eng nge ni ta?" phone call a làk rualin ka ṭhianpa chuan a rawn ti deuh hluai a, tun hnai hian kan inbe khât ang reng a, chutianga mi a rawn chhâng nghal pawh chu àwm lo ka ti hran lo.

"I dam maw? Tunlâi eng nge in an?" ka ti mawihnai hmâsa tê tê a, ka zawh tum tak han zawh nghal tut tut chu a fuh chiah lova ka hriat vang a ni pakhat!

"He lam zawng eng kan ang hlei thei meuh lo, chanchin tharah i lo hmuha i lo hriat fô ka ring asin, nge ni a, mamawhna min nei a, thu i rawn pehhel kual vel phawt záwk?" a rawn ti tlang ta charh charh a, Siaha lam district area-a thil thleng ṭhin chu ka hre ve vek a ni tih a hre chiang hle a ni mahnà le!

"I sawi dik e, mamawhna che ka nei" zep nei hauh lovin ka ti tlang ve ta riap a, keini ṭhian dun inkârah hi chuan zep sî sê hi a awm ve vak ngai lo, a awm paw'n a tu emaw ni záwk záwkin kan hre leh thuai zel tho.

"Han sawi la......" pangngai taka a rawn tih ve leh tâkah chuan

"Thil pakhat min lo ngaihvensak teh" tiin Zualbawihite khua leh ka mamawh tur chi hrang hrang chu ka hrilh ta mawlh mawlh a, chutia ka ṭawng mual mual lâi chuan amah Zualbawihi tak pawhin ka lam a rawn hawi deuh hâ nghe nghe!

"Puih che chu ka duh viau a, mahse i rin ai a buaithlak ang Vincent, he lamah chuan sual langsar bak kan buaipui meuh lo, chuti chung paw'n nitin kan buai ṭhin tih i hriatthiam ngei ka ring" a rawn ti thlup thlup a, sawi dik viau mah se inpuihtîr erawh ka la tum ruh hle thung.

"A nih leh documents pawimawh min lo hai chhuahsak thei ang em? Chu bak ka inhnamhnawihtîr lo ang che, a harsa a nih chuan ka rawn zin mai ang" ka ti nghet churh churh a, mipa ka ni a, thutlukna ka siam tawh a, ka rilru sawhsawn ka tum tawh der lo.

"Engati nge tuna taka i rawn buaipui teh thut!? In chhûngte'n buaina an nei em ni? Ka sawi tawh kha Vincent, he lam chu Mara Autonomous District Council a nihna hian thil tam tak a hril a, Aizawl ang mai mai khan hna i thawh fum fe theih inbei sei suh!" a rawn ti deuh nghut nghut a, a thil sawi dan kalhmang aṭang chuan ka thil buaipui tum chu buaipui zui lo turin min duh tih a chiang viau mai.

"Eng pawh ni se, engtikah emaw ka rawn zin ang, zan riak law lawin, titipui tur che pawh ka ngah, mahse ka rawn zin hun tur hi ka la sawi chiang rih thei lo, ka rawn hrilh ṭha leh ang che" ka ti ve leh ta dut dut a, hmaichhanah inbe law law záwk ila a ṭhat ka ring.

Kan inbe zui zel a, minute eng emaw zah chu kan inbe lûam a, kan inbiakna kan tihtawp hnu lawkah ka nu hnen aṭangin phone call ka dawng leh nghal zat a, hospital lama ka pa a rawn kal mêk thu leh ani'n ka pu a awmpui thu chu min rawn hrilh mial mial a, ka pa a rawn thlen ṭep tawh a rin thu a sawi nghe nghe bawk.

A sawi ang tak takin ka pa chu kan hmu thuai a, ka nu'n ei tur a rawn dahtîr chu niin, tiffin box-ah a rawn siam thlap a, ka pa kaltlangin ka nu'n damdawi in chaw a tui lohzia a sawi dan te chu kan han hre zui mawlh mawlh a, chuvanga chaw leh chawhmeh rawn dahtîr pawh a ni ber àwm e.

Ka pa chuan Zualbawihi chu a be ve leh sup ṭhin a, Zualbawihi pawh a rilru lam a zia ta deuh bawk nen a ṭawngkam a pangngai tawh hle a, tu pawh hlau em em vek ang hmêl kha a pu tawh lo hrim hrim a, dam chian erawh kan la hnaih lutuk lovin ka hre thung.

Ka pa chu ka ko hrang a, Zualbawihi chungchâng sawipuiin fahrah a nih thu te, a dinhmun tawhkhirh tak avanga chhuan a chhamziate chenin ka hrilh mual mual a, ka thutlukna siam a hriat rual chuan a mitmengah ka tisual lo tih ka hmu nghal a, ka nu leh ka pute paw'n kan hnena Zualbawihi a awm tur chu pawi tihna pakhat mah an neih ka ring lo.

Dârkâr khat vel ka pa chu a awm ve reng a, a haw dâwn chuan hospital kawt thleng ka zui thla a, cabin aṭanga Zualbawihi ka chhuahsan thei hrim hrim pawh chu hmâsawnna pakhat niin ka hria.

Ka pa a haw fel ta maw tihah chuan cabin lam ka pan chho leh nghut nghut a, cabin ka'n lut chiah chu Zualbawihi mitmeng a dik lo tih ka hre chawpchilh nghal a, ka pan hnai thuai a, ngaihngam taka ka lo chhuahsan ringawt kha ka ti dik lo tih ka hre nghal bawk.

"Eng nge thleng?" en deuh run chunga ka tih chuan a lû a lo thing thuai a, ka en chìk sawt kher mai.

"Sawi rawh......!" ka tih leh pawh chuan a ngâwi tlat a, thil thleng eng emaw tak chu a awm chiang a ni.

"Han sawi teh le, eng nge thleng? Doctor te an lo kal em ni?" ti dap dapin a kut vei lam záwk chelh chu ka rual zui zat a, chutia chet chu ka tum em em pawh a ni bîk lo, ka che deuh tawp a ni ber.

"Ka hlau....." a rawn ti thawp ta sep a, chutah amah bawk chuan

"Engmah a thleng lo, doctor leh nurse te pawh an lo kal lo, mahse ka hlau, ka hlau a ni" a rawn ti leh sap sap a, ṭawng pawh a ṭawng ring lo khawp mai.

"I bulah ka awm tawh hi, hlau tawh suh" ka ti hniam dut a, ngàih ṭha sawt hmêl erawh a pu chuang der lo.

"Engtikah nge he lâi hmun hi ka chhuahsan theih ang?" mi en kal chung hian a ti fân raih a, kei pawh chuan

"Ka hre lo, dam i duh chuan i awm rih a ngâi tih erawh ka hria" ka ti ve nghal mai a, a meng buai deuh nak a, damdawi in a nél lohzia chu hrilh hranpa ngâi lo tak ka ni!

"Ka pate man chu i la tum tho em ni?" mi pawh en miah lo hian a rawn ti sep a, a ngaihtuahna a kal ding hle ni tur a ni.

"Tum e" ka ti zo chiah chu

"Tum suh ka tih kha, tum suh, i tân a ṭha lo, police officer pawh ni mah la an that hreh dâwn lo che" a rawn ti thâm deuh chhal a, a hmêl ka'n en chu a mittui a lo hnai kuarh tawh chu niin!

"Khawngaihin min buaipui zawm tawh lo law law záwk mai rawh, damdawi in aṭang hian ka chhuak ang a, hmun hla takah ka kal bo ang a, tu dang mahin buaina an tawh belh lo a ni mai" a rawn ti leh sap sap a, kei erawhin a hmêl chu ka lo en chiang hle thung.

"A nih khawiah nge i kal ang?" ka tih chuan a ngâwi vang vang a, thlahthlama a duhna hmuna kaltîr ka tum pawh a ni lo, a rilru ka hriat duh vang mai záwk a ni.

"Ka hre lo" tiin a hmai chu a tuai puat a, a ṭap tih lah hai theih pawh va ni suh!

"Kan hnenah i awm ang a, engkim a fel vek mai ang" tia ka ṭawng thlamuan zo chiah chu

"Ni lo, thil thleng tur ka hre chiang lutuk, min la rawn zawng hmu leh ngei ngei dâwn....!" a rawn ti nghal tuarh a, hmai hup meuhin a ṭap khur beuh beuh a, ka tih ngaihna hre lo chuan ka kuah leh ta ringawt bawk.

"Min ring tawp rawh" tih bak sawi tawh lovin ka kuah hle hle a, zawi zawiin ani pawh chu a ṭap bâng ve leh mai a, han thlêm chiam dan lah ka thiam der si lo, ka mizia nen inperhsan taka awm châng ka ngah ta khawp mai.

Kan boruak a zia deuh hnu chuan chaw ka eipui a, amah ngâichang ru rengin ka ei lep lep a ni ber a, ei pawh ka ei tam lo. Kei aiin chaw a mamawh záwk a, ei zo vek mah se pawi tihna pakhat mah ka nei lo.

Chaw kan ei kham aṭanga rei pawh ni lovah nurse pakhat a rawn lut a, damdawi a ei tawh leh tawh loh a rawn check a ni ber a, chaw ei khama ei tur a lo la ei miah lo chu niin, keimah záwk chuan ka eitîr zui nghal zat a, nurse buaipui chu ni se harsatna a awm leh maithei a ni.

Chutia damdawi kan han ineitîr fel chu rei awm lovin nurse pawh a chhuak ve leh mai a, mi be lûam chì ka lo ni lo bawk nen cabin chhûng chu a reh hian a reh ṭhiap a, Zualbawihi lahin ṭawng a tum loh hmél ropui bawk si, ka phone ka khawihsan ta vel mai mai a, ngaihtuahnaah erawh a awm ru reng thung.

Chutiang chuan zan hun kan hmang ral ṭhak a, ka muhil lo chu ka ti dawt ngam lo va, mahse ka mu tlêm leh pek khawp mai. Kan pute bulah kâr khat dâwn dam lo buaipui ka ngaih thu ka hrilh tawh tho bawk a, station lam pawh ka ngaihsak em em thei rih lo.

Zîng khua a lo vâr a, kei ai Zualbawihi chu a harh hmâsa záwk a, a thawmah ka harh nghe nghe a, ka harh meuh chuan tukverh bulah a lo ding ngâwi reng a, a nák chu a dawm pah reng a, ka harh nghal sawt sawt bawk.

A hmêlah chuan baihvaihna te, lungngaihna te, mangan rukna te leh beidawnna te a inlan chhawk reng a, ka thawm hriaa ka lam a rawn hawi hnu chuan a lan dan a inthlak danglam nghal thuai a, pangngai hmêl takin awm lui ngar ngar mah se a rilru ipikzia ka hmu tlang vek tho.

"Nangmahin i lo awm lawk ngam ang em?" ka tih chuan

"Ngam e" a lo ti ve mai a, khumah a mu fel leh diam tawh bawk.

"Thingpui leh chhang ka zu lei lawk ang e, ka rei lo ang, i lo awm ngam tak tak ang maw?" ka tih leh pawh chuan a lo bu nghat nghat a, tawi tê hian a nui zeuh nghe nghe!

Cabin chu chhuahsanin hospital kawt lamah ka chhuk thla nghal a, kawngpui sir leh kam vela thingpui leh chhang lo zuar te ka dawr zung zung a, thang rei thei ka ni lo tih ka inhre chiang bawk a, ka muangchang lo kher mai.

Thingpui leh chhang nen cabin lam chu ka pan chho leh hnak hnak a, mutmu tuah ṭha lo e ti lo chuan ka rilru erawh a zàngkhài viau lawi a, tlêma Zualbawihi rilru leh taksa dinhmun a'n ṭha chho bek bek ta chu ka awm a nawm phah te pawh a ni mahnà!

"Aih.....! Kal rawh! Awm sawn rawh! Ka duh lo!" cabin kawngkhar ka hawn ruala Zualbawihi rak tuarh tuarh thawm chuan ka beng a verh kher mai.

"Nangnu hi eng nge maw i hriat le!? Mi â dahna hmunah dah che ila a ṭha záwk ang, i mawl êm mai, nurse leh doctor te pawh i hlau tlat bawk si!" tiin nurse pakhat chuan a lo khak fak fak a, min hnungchhawn avangin min hmu lo hrim hrim a, Zualbawihi erawh bang nghengin a ding khur hlawk hlawk thung.

"Pu Vincent......!?" min hmuh rual rualin Zualbawihi chu ka lamah a rawn tlan phei nghal hlawp hlawp a, cabin chhûnga awm ve nurse pawh chu a meng phawk nasa ngàng mai.

"Eng nge thleng?" tiin Zualbawihi záwk chu ka bia a, nurse-in a lo ṭawngkhum dan avangin ka lung âwi chiah lo mah se ka awah tih lan ka tum hran lo.

"Engmah a thleng lo, min hlau suh ka tih paw'n min hlau tlat a, eng nge a chhan pawh ka hre lo" nurse záwk chuan a rawn ti zet zet a, a hmêlah Zualbawihi a ngaitheih lohzia a lang chiang hle bawk.

"Min chhuahsan theih chuan a lawmawm ngawt ang" ka ti bul deuh nghut a, dik tak chuan ka lung a âwi fahran lo a ni.

"Min ring miah na nge?" nurse bawk chuan a rawn ti leh hlak a, a zàm miah lo leh a zak miah lo chu ka ngaitheih záwng a ni ta bîk hauh lo!

"Chhuak rawh!" ka ti chang bawl a, ner sawk hian a chhuak nghal nal nal a, ka aw chu ka thunun sêng tawh lo a ni ber.

A chhuak fel chiah chu Zualbawihi lam ka hawi thla zui zat a, nurse nena kan inchhàn deuh bap bap lái khan ṭi zetin ka hnungah a ding tlat kha a ni a, tunah chuan a hlauthawng lutuk hmêl pawh kha a kiam ta deuhin ka hria.

"Eng nge thleng? Engtin nge kha nurse khan a lo tih che?" ka aw chu a la bul hmuk hmuk hle a, ka lung a âwi lo tih a hrethiam a ni mahnà, mi pawh a en ṭha ngam lo hrim hrim!

"I chhuah hnu lawk khan a rawn lut a, a tirah chuan hlau ru tho mah ila hlauh loh ka tum ṭang ṭang a, mahse amah záwk khan min ṭawngkhum fek fek a, ka rilru a buai zo leh vek a, ka duh dan a ni bîk lo" a rawn ti raih raih a, dáwt sawi hmêl rèng a pu miah lo bawk.

"Ka hrethiam e" tih leh khum lama kuah phei ka rual a, a inthiam lo rilru ve hle a ni tih hriat tak hian a hmêl chu a nûr sur a, han sawi belh vak tur ka hre leh bîk chuang der lo.

Ka ei tur zu leisak pawh chu a ei ṭha mang hauh lo va, thil thleng zo chiah khan amahah nghawng a nei zui tih ka hrethiam vek a, ka nu awm se ka ti ru kher mai. Ani chu awm se chuan eng eng emaw ni a sawipui leh emaw a ni ang a, Zualbawihi rilru puthmang pawh a thlak danglam theih ka ring.

Zîngkâra thil thleng chuan ka rilru leh ngaihtuahna a tikal thui hle a, doctor ka hmuh phah nghe nghe a, mahse nurse laka ka lungàwi lohna thu hla lam ni lovin, in lama inenkawl chhunzawm kan duh záwk thu ka hrilh ta hmiah a, ka ngen te pawh ti ila a dik záwk mah ang.

Doctor chuan a lo phal chiah lo va, mahse ka ngaihtuah chian pôh leh in lama Zualbawihi enkawl chhunzawm chu a ṭha záwka hriatna ka nei tlat a, dik tak chuan damdawi in chhûng ringawt chu a taksa lam tán ṭha mah se a rilru lam tân ṭhain ka hre thei tlat lo a ni.

Rei fê kan inbiak hnu chuan doctor paw'n in lama inenkawl chu min phalsak ta nge nge a, ka nu leh pate pawh ka be pawp nghal thuai a, Zualbawihi chungchânga doctor nen kan inbiak dan chu ka hrilh nghal vek a, ka chhûngte an ni bawk nen zíngkâra nurse awm dan zawng zawngte nen lam ka hrilh nghe nghe a, ka rin ang ngeiin Zualbawihi chungchánga ka thutlukna leh ka rilru chu min lo pawmpui khawp mai.

In lama kan haw theih thu Zualbawihi ka'n hrilh chu mak tih zet hian min en kiau a, duh lo hmêl âi mahin bangbo hmêl a pu mah záwk a, ka pa'n motor-a min rawn hruai tur thu te chu ka hrilh zui mual mual a, damdawi ina ka luhpui zan tih loh kha chu ka pa'n motor hawnin a bike min hnutchhiah záwk kha a ni a, chuti ni lo se chu ka pa rawn kal buai ngâi lovin kan haw nghal thei ngei ang.

Ka pa nghah pah ni fawmin doctor kan hmu leh a, Zualbawihi ber chu dimdawi a la ngâi ang reng viau a, a bîkin a nàk nâ chuan amahah nghawng a nei nasa hle a, ka pawm lah a duh der bawk si lo, doctor hmu tur ringawt paw'n minute eng emaw zah kan hmang ti ila a sualin ka ring lo.

Dârkâr khat dâwn a liam hnu chuan ka pa hmêl kan hmu ta nge nge a, keiin Zualbawihi phurin motor ka khalh haw a, ani'n a bike min hnutchhiah a khalh haw thung a, tlan pawh kan intlan hlàt lo hle.

Zualbawihi ka phurh avangin ka tlan dim ang reng viau a, tlan dim a ngâi rèng a, taksa nâ nei a nih avangin kawng bumboh lâiah phei chuan kan tlan che che a ni ber a, ka bul lawkah a ṭhu bawk nen a hrehawm leh hrehawm loh ka zàwt deuh reng a, a inthlahrung deuh nge ni, a sawi ṭha duh miah lo lehnghal a, muangmara kan vêng kan thleng ve ta erawh awm a nuam deuh huai mai.

"Ti rawh le, i lut ang hmiang?" kan in kawta kan din dat hnu chuan ka ti sup a, ani erawhin kan hmâ lawka in chu a lo thlir dauh dauh thung.

"Engati buainaah i intah luh tlat mai le pu Vincent?" kan in lam hawi reng chung si hian a rawn ti dam diai a, ka en nghal zawk nghe nghe!

"Buaina a ni hleinem, ka tih tur zàwk alawm, ka chhûngte beng hriatah min 'pu' lo bawk la a lawmawm ngawt ang, chuti lo zawng ka chhûngte nuih i tiza lutuk palh ang" ka ti zui lûam a, motor aṭang chuan ka chhuak nghal tharh bawk.

"Lo chhuak rawh le" dam dap hian ka ti leh sup a, ka chhuah fel vek tawh hnu pawha a la rawn chhuak ve duh miah lo chu eng emaw tak a ngaihtuah leh tawh a ni ngei ang.

"Zualbawih......?" ti hniam leh thlupin a bul lawkah ka ding deuh run a, lungngáih rukna nei tih hriat tak hian min rawn chho melh ral a, motor kawngkhar chu ka hawnsak ta nge nge bawk.

"Ka pawm luh kher i duh nge ka rualin i kal dâwn?" a rilru hre ran chunga ka tih leh chuan zawimuang hian a rawn chhuak a, ka pawm luh a duh dâwn loh tih pawh ka hre chiang khawp mai.

"Hlauthawng lo la, i in ang chiahin i ngâi dâwn a nia....." tih leh kaih ka rual a, in chhûng lam ka panpui zui nghal zat a, in chhûng kan luh ruala ka nu lo awm dan chu ka beisei làwk ang chiah a ni.

"Awi, i ṭha em Zualbawih? Kan fapa hian a rawn tlan dimpui lo ang che tih mawlh ka lo hlau lutuk a, eng nge i an?" ka nu chuan a lo ti zung zung a, tui in turin filter lamah ka phei ta daih nghe nghe!

"Ka ṭha tawh lutuk, min ngaihtuah suh" tiin Zualbawihi pawh chuan a chhâng ve mai a, ka tui in zo chu ka pu room lamah ka lut a, ka nu leh Zualbawihi inbiakna pawh ka hre zui ta lo.

"Kha.....i rawn haw ve ta maw?" ka hmêl a hmuh rualin ka pu chuan a lo ti suam suam a, khum lû ngheng chung hian lehkhabu a lo chhiar a, chutia zan hnih ngawt ka riah bo hnua min han hmu leh chu a hlim hmêl viauin ka hre bawk.

"Eng nge i lo an? Exer te i lo là ṭha em?" ka ti ve nghal dut dut a, ṭhut pawh kan inṭhut hlàt lo leh khawp mai.

"Ka ṭha e, i awm loh chhûng khan i pa'n exer min làkpui ṭhin a, i dam lo buaipui chu eng nge chanchin?" a rawn ti ve leh nghal zat a, kei pawh chuan

"Zia lam a pan ve zel rualin hmâ erawh kan la sawn chak lo khawp mai, a bîkin a rilru lamah" ka ti deuh lûam a, a lehkhabu chhiar lâi chu a khup thak a, ṭhut ngil a han tum chu ka pui nghal thuai bawk.

"Engtia inbuaipui maw in nih a?" a rawn tih leh chuan Zualbawihi nena kan inchhar dan zawng zawng chu ka hrilh ta vek a, a dinhmun leh an chhûngkaw chanchin thlengin ka sawi a, ka sawi zawh meuh chuan ka thaw deuh huai nghe nghe!

"I tih tur dik tak i ti e, chutih rual chuan i fimkhur hle a ngâi dâwn a nih chu! Siaha lampang saw chu ralkhat aṭanga ngaihdan lo siam ngawt theih pawh a ni lo, an khawsak leh ṭawng hman thleng sawn a dang deuh nuk hlawm a, Lawngtlai lam pawh tiamin, Zualbawihi pawh hi a chhûngte'n an la rawn zawng zel lo ang tih a sawi theih miah lo" a rawn tih ta thlup thlup a, ka vawi khat hrilhna mah ni se a ngaihtuah thui hman ka ti kher mai.

"Ka hria alawm, amah tak pawh hian kan hnena awm a duh chiah lo, a chhan chu a pate'n an rawn zawng chhuak ang a, keini chenin min that ang tih a hlau hle a ni" ka ti ve leh ta duah a, ka pu chu ka en deuh run bawk.

"Ani ang hmeichhe tân te chuan hlauhthawn loh chì a ni hleinem, eng pawh ni se, mawhphurhna i là tawh a, i rilru sawhsawn lo ang che" a rawn tih chuan ka lo bu nghut a, thil dang kan sawi zui ta daih a, rei erawh ka awm lo thung.

Ka pu room aṭanga ka chhuak chu Zualbawihi ka zawng ru deuh nghal a, a chhan pawh ka hmuh mai loh vang a ni pakhat a, ka nu pawh ka hmu chuang lo, ka pa erawh sitting room-ah ṭhuin phone a lo khawih mual mual a, ka room lamah chhovin ka inbual fai zui ta daih bawk.

Ka inbual zo bathroom aṭanga ka chhuak chu phone call ka dawng nghal zat a, tu dang ni lovin Lucy-i bawk a ni leh pek a, a ruh lang rawta hrilh pawha awmzia a awm si loh avang hian ka la buai dâwn chauh niin a lang!

"Eng nge?" ka ti deuh hmuk a, mi pangngai tân chuan lungàwi lohna tham a tling khawp ang.

"Engtik nge i lo haw dâwn? I dam lo awmpui chu a serious viau em ni?" a rawn ti zar zar a, ka nu hnen aṭangin a lo hre leh vek tawh a nih hmêl!

"Ka lo haw tawh" tih bakin ka chhâng lo va, biak ka châk lo tih hre ru reng chunga min rawn be lui ngat ṭhin chu ka hne hluah hluah!

"A nih chuan ka lo kal dâwn?" a rawn ti zui ham ham a, ka rin tàwk vel chiah a ni!

"A ṭul lo!" ka ti bul hmuk a, ani erawh a lo nui har har thung.

"I inla ngêng ve ṭhin sia maw, i û nen kha chuan in va'n inang lo tak, mahse i veiawm tho bawk si" ti hiam hiamin a nui hek hek a, ka inbia pawh tih tawh nâk alaiin, chutianga a rawn ṭawng ngat phei chu ka ngaithei lo lehzual!

"Ka dah!" tih leh kan inbiakna chu hmeh tawp ka rual nghal zat a, thawmhnaw ka inbel zui ta mawlh mawlh bawk.

Ka room aṭanga ka chhuk thlak hnu chuan Zualbawihi hmêl pawh ka hmu leh ta a, ka nu nen chokaah awm dunin an lo titi barh barh a, ka duh ang ngeiin ka nu'n hun a hman tampui nghal viau a, an bula awm ve reng ka pa pawh chuan a be ve leh sup sup ṭhin a, Zualbawihi tân tak pawh a rilru lamah hmâ a sawn thuai ka ring.

Chutia kan in ngeia Zualbawihi kan han awmpui ta chu ka ngaih a ngam huai a, station lamah kal lawk ka ngàih avangin chhuah ka tum rilru a, pakhatah chuan Lucy hmêl ka hmuh peih loh vang a ni a, a dang lehah chuan kan pu hmuh ka duh hrim hrim bawk.

"Khaw'nge i kal dâwn ka pu....? Ah....! Pu.....pu Vincent...!?" kawngkapui bula bike chabi inkhâi ka làk lai chuan Zualbawihin a rawn ti hlawl a, ka hawi phei rang vut vut kher mai.

"Awi....in lo in 'pu' vel a ni maw Zualbawih, amah sawn min 'pu' rawh a lo ti leh pek tawh záwk em ni?" nui uarh uarh pah hian ka nu chuan a rawn ti nghal lang lang a, ka rin tàwk vel chiah a ni.

"Nu....!?" ka ti deuh hluk a, ani lah chuan

"I lo ti leh hman tawh a ni hrim hrim, a dik em? Thawk khat lâi khan Ngaihtei pawh khu min 'pu' rawh i tih tlat tawh kha, Zualbawihi te hi chu kan hnena khawsa tur a ni a, eng anga police officer thu pawh ni mah ila in 'pu' tir tawh reng reng suh" a la rawn ti duah zui leh ta nghal a, duh ai hi chuan a ṭawng hnem hret ṭhin a ni.

"A reng reng thuah khaw'nge kal i tum?" a rawn tih zawm leh zat a, kei pawh chuan

"Station-ah ka kal lawk dâwn....." ka ti pangngai ve leh mai a, ka chhuak zui ta nul nul bawk.

Rei tlan lovin station chu ka thleng phei thuai a, ka thleng chauh e ti lo chuan ka nu hnen aṭangin phone call ka dawng leh lawi a, Lucy-i a lo kal thu min rawn hrilh chiah chu za lo zet hian ka ṭhen suk a, ka nu thu rawn sawi pawh eng teh lûa ah ka ngâi lo hrim hrim!

Kan pu nena kan han titi chu thusawi a kal tluang ang reng viau a, Zualbawihi ka chhar dan te, ka puih dan te, ṭanpui a ngaihzia leh thah tumtu a pate chhui zui ka duhzia te chu ka hrilh mawlh mawlh a, direct takin statement ka siam thei reng nà chungin chutia pute han hrilh ve hrim hrim chu ṭha ka ti a, hnaa insawrbing mi ka ni tih a hre chiang bawk a, ka thusawi mal tin chu a awih hmèl khawp mai.

"I tisual hlauh ang tih erawh ka hlauhpui hle mai che" tiin min thlah ta kha a ni a, chutianga ka ṭhianpa, Siaha lam police officer chang pawh ni lo, kan pu lehzelin min han huphurhpui rilru tlat chu ka tûang ka tichhah lehzual a, ka rilru ka sawh ngheh bur phah nghe nghe bawk.

In lam pana ka haw lâi te chuan ka rilruah a riak zui reng a, police ka ni a, ka hna leh ka tih tur chu thil dik lo titute man a, ṭanpui ngâite ṭanpui a, mangangte tâna thlamuanna leh himna nih a ni a, mi lian leh hausa emaw, mi tawrawt leh mi thah hreh lo emaw pawh ni rawh sek sek, ka hna a ni a, ka thawk mai tur a ni.

"Vincent...." in chhûng ka luh rual chuan Lucy-in min lo ko nghal a, mi dang pawh an lo hawi phei ṭhap nghe nghe!

"Inbe lawk ang" tih leh ka lam rawn pan a rual a, kei erawh ka room lamah ka chho tlang daih a, min rawn zui chho ve nghal mai bawk.

"Tunge khu nu khu?" ka room chhûng kan lut chiah chu a rawn ti nghal a, chhán pawh ka chhâng peih lo.

"Vincent....?" a rawn tih leh pawh chuan ka la ngâwi reng a, zep thu a cheng lo, ka be chàk hlawl lo a ni.

"Sawi teh.....!" a rawn ti leh chiah chu khamawm ti zet hian

"Ka nau thar a nih khu, a tàwk em?" ka ti ta hluk a, ka melh chiang ngal ngal hle bawk.

"Sawi ṭha ve mai ta che" ti leh mi rawn kuah a rual zui zat a, ka nam phar deuh làwp a, mahse zak hmêl leh thinrim hmêl pawh a pu chuang der lo.

"Ka lakah hian eng beiseina mah nei suh Lucy, ka û pawh zah ve em em teh!" dimna nei miah lo hian ka ti hmuk hmuk a, mahse awmzia a la awm chuang lo cheu!

"Tlêm tê talin min ngaihsakna hi chu lantîr ve teh Vincent, i nau thar te hlei hlei khuan ka ngaih a tiṭha lo a nia, fimkhur hle rawh" a la rawn ti piap piap ngam a nih chu!

"Nang nen hian awm dunna chhan tur pakhat mah kan nei lo" ti hlukin room aṭang chuan ka chhuak a, ngaihtuah pawh ka ngaihtuah zui peih lo, a awm áwmin awm teh se!

In hnuaia ka chhuk thlak hnu chuan ka nuin Lucy-i chu zanriah kil ve nghal turin a sâwm leh ta nghal a, Lucy-i lahin a lo hnial lo nasa mai bawk si, a hmêl ka hmu ning lutuk chu ka pu room-ah ka luhsan daih nghe nghe a, mi dang tân chuan unau ang maia lan châng kan ngah ang a, mahse ka laka Lucy-i rilru puthmang chu a dik hauh si lo.

Chaw kan han ei te chu mi a be deuh chhen a, hne ru ngawih ngawih tak ka ni! Zualbawihi záwk ka be leh sup ṭhin a, a inthlahrung lutuk nge ni, a kham hmâsa ber nghe nghe a, chaw a ei mang paw'n ka hre lo. Lucy-i lah a ṭawng duh par par bawk si, Zualbawihi a biak duh dan te reng reng chu keia huat táwk a lo tling em em vek zel a ni ber.

Ka chaw ei a tui thei meuh lo va, ka kham ve ta thuai a, Zualbawihi bawk chu ka ngaihven ru nghal vut vut hle a, chaw ei khama ei tur damdawi ka eitîr lâi te chuan nuam lo ti hmêl deuh hi a pu a, han sawi em em tur ka hre bawk si lo nen ka awm dan a lai laklawh kual vel kher mai.

"Min lo zui teh" ka ti ta ngawt a, ani pawh chuan min zui ve nghal mai bawk.

In chung lamah ka chhohpui a, room khata han awm dun em chu a chì loh avangin ka û room-ah awm se a ṭhat mai ka ring. Ka nu leh pate erawh engmah ka la hrilh lo va, ràwn pawh ka la râwn lo va, mahse ka duh dan chu an hnial ka ring chuang lo.

"Hei hi ka û room a nia, hetah hian i awm mai dâwn a nia...." ka ti hman dek dek chu

"Ka duh lo, a zahthlak, amah paw'n nuam a ti lo ang" a lo ti nghal vat a, ka nui chhuak hawk hawk lo chauh a ni.

"Ani te chu a boral tawh alawm" kiai suk hian ka ti thum chhal a, min rawn melh zawk a, ka lo en chiang ngàng bawk nen a meng khup nghal zal zal a, kan la inhre chiang lutuk lo nà chungin mize lawmawm ru tak a nei niin a lang!

"Ka tihpalh" a rawn ti sep a, kan boruak chu thlak a ngâiin ka hria.

"Ti rawh le, in hnuai lamah i chhuk teh ang, mut dâwnah kan inhrilh ṭha leh záwk dâwn a nia" ka tih tâkah chuan ngâwi reng hian min zui ve leh hnak hnak reuh a, amah enkawltu tur nurse pawh hmêlhriat sa ka nei tho bawk a, chu lam chu ka lungkham em em hran lo.

In hnuai kan thlen thlak hnu chuan chaw an lo ei kham vel chiah a, Zualbawihi chuan ka nu leh Lucy-i che vel chu puih a tum nghal ngawt a, ka nu erawhin a lo phal lo nasa hle thung.

Kei pawh ka pu room-ah lut lehin a chaw eina plate te chu ka khawmsak mual mual a, a phur châng tih lovah hi chuan dawhkanah chaw a rawn ei ngai meuh tawh lo te pawh ti ila a sual lo ang.

Sitting room-a kan ṭhut ṭhep ṭhup lâi chuan ka pa'n Lucy-i va thlah turin min ti a, hnial ka tum zet nà chu ka ngáwi ta záwk a, ka thlah phur lo hle bawk. Ṭum dangah pawh chhuanlam ka siam fô va, mahse tun ṭum chu han hnial ngawt a rem chiah lo a ni ber.

"Kal ila....?" tia Lucy-i ka'n bia chu a lo nui sen sen a, hmeichhe hmelchhia tia sawi tur ni lo mah se a mizia leh ka laka a rilru puthmangin a zir loh êm avangin ka hmu dik lo laklawh vek tawh!

Khua a vawh deuh súk avangin motor ka hawl chhuak a, Lucy-i chu a ṭawng barh barh a, kei erawh ka ngâwi ngul thung. Zawhna min zawh paw'n ka chhâng lem hlei lo va, ani lahin lungâwi lo hmêl a pu chuang hek lo, kan awm awmin kan awm a ni hawt e!

An in kawt kan han thleng chu a pa'n lêng ve rih turin min sâwm tlat a, ka lut ve ta nge nge a, Lucy-i tih loh hi chu an felin an rilru a tluang em em vek hlawm a, Lucy-i nau chiah Grace-i phei chuan û ang tak takin min en a, kei paw'n ka nau ang chiahin ka en a, zirlâi lamah pawh min râwn hreh lo ṭhin hle.

Ka û leh Lucy-in inzawmna an siam nî aṭang khan chhûngkhat ang tak takin kan in en a ni ber a, mâwihnai leh zahawm takin kan inpawh tawn a, a khawi lam mahin harsatna kan insiamsak ngâi lo va, kan hawihhâwm tawn dun ṭhin viau bawk.

Grace-i chuan thingpui min lo lúm nghal a, min be siam siam a, Lucy-i angin ka ngaithei lo nghal ngawt lo va, thingpui a lúm zawh hnu chuan ka bulah a rawn ṭhu nghal chat nghe nghe a, zep thu a cheng lo, Lucy-i nen chuan inang lo tak an ni!

Rei tak ka lêng hran lo va, ka haw dâwn chuan Lucy-in pâwn thleng min rawn thlah a, a ṭawng nêm thliam thliam ná chu a thusawi pakhat mah ka uksak duh der lo thung. 

A châng hi chuan sual ka inti ru ve ṭhin tho, mahse ka laka a rilru puthmang leh a awm dan a dik miau si lo va, thil pawi záwk a thlen hmâin ka lo invêng mai a ni.

Kan in ka thlen rualin ka nu leh pate bulah chuan ka û room-a Zualbawihi awmtîr mai chu a ṭhat thu ka sawi a, beisei ruk ang ngeiin pawi an lo ti lo nasa mai a, ka nu chuan engkim a kawhhmuh nghal zung zung a, sin tur rizai nen lam a buaipuisak mawlh mawlh a, kei tak pawh an bulah ka awm ve reng nghe nghe!

"Ka zu chhuk ang e, ti khan tui deuhin i mu dâwn a nia, buaina i neih chuan tumah tihharh hreh suh ang che aw?" tiin ka nu chuan Zualbawihi chu a be siam siam a, rei awm tawh lovin in hnuai lamah a chhuk zui ta nal nal bawk.

"Kawngka hi kalh lo ang che" ka tih chuan a lo bu nghauh a, ṭum dang bawkin mi a en ṭha ngam leh pek der lo.

"Thil thleng eng emaw a awm a nih chuan min rawn hrilh vat ang che, i hrethiam em?" ka ti leh dap dap a, ani pawh chuan khum lam melh deuh ran chung hian

"Immm....." a lo ti hniam raih a, ka chhuahsan zui nghal a, rilruah erawh amah ngaihtuahna a awm ru reng tho.

Eng ka hria nge pawh ka hre lo, chutia ka khuma ka'n mu chu ka mut a'n chhuak lo mai mai khawp a, thlasik e ti lo chuan thla lah chu a éng ṭha fia fia ropui bawk si nen rilru leh mitthlâah ka û a rawn lang lo thei lo va, ka ngaihtuah thui zel a, hun kal tawh avangin ka lung a lêng a, ka û chu ka ngâi a ni ber.

Zan a rei tial tial a, thawm pawh a reh ṭhiap tawh a, dâr zat ka'n en chu dâr 2 dâwn a lo ni tawh a, mut chu a hun tawh reng, mahse ka mut erawh a chhuak tlat si lo.

Ka tih tur ber hre lo chu ka tho ta nge nge a, thla éng rawn luhna tukverh lamah chuan pheiin ka ding ngâwi vung vung a, rilru leh ngaihtuahna pawh a kal ding duh cher cher hle.

Chutia ngaihtuahna sênga ka din ngàwih run lâi chuan hmeichhe ṭe ṭhawt thawm ka hre thut a, ka rilruah Zualbawihi a rawn lang hmâsa ber a, muhil lo tih takah ka che chhuak nghal zung zung a, ka û room ka'n lut chiah chu hlauh nei tih hriat tak hian a lo inkhuh khur hlawk hlawk a, ka hnaihchilh rang hle bawk.

"Engati nge?" ka ti deuh tawl a, a puan sin lâi chu ka hlim a, thlan tla phung hian min rawn en a, hlauh avanga a mitmeng thlabâr lutuk chu ka hmu rei thei der lo lehnghal!

"An lo kal leh tawh.....an lo kal, min man an tum, min man dâwn chiang a ni ti raw?" ti hlawp hlawpin a rawn ṭap chhuak feih feih a, ka kut chu thih tha meuh hian a chelh a, a hmêl leh ṭawngkam aṭang chuan mi â ber paw'n hlauh a nei tih an hai lo chiang khawp ang.

"Mangchhia i mang leh tawh em ni?" tia zawhna ka zàwt zo chiah chu

"Mumang a ni lo, a tak ngei a ni  pu Vincent, min rawn man dâwn!" a rawn ti thâm ṭiak a, nghet taka ka kut a chelh mêk chu a âwmah a pawm bet zawm zat a, eng nge a chhan pawh ka hre lo, ka sâ nghal pup pup a, keimahah chuan thil dik lo a awm tih ka hai lo chiang viau bawk.

"Hlau suh, tûma'n an man dâwn lo che" tiin ka ṭawng thlamuan dap dap a, nghet zeta maimitchhîng chung hian ka kawr chu a rawn pawt ṭai ṭai a, tih ngàihna ka hre ta bîk lo; a bula mut tawp mai loh chu!

"Hlau tawh suh le" ti dam thluamin ka âwmah ka kuah bei hle hle a, ani erawh a la ṭap feih feih reng a, ka rilruah chuan khawngaihna nasa tak a piang zut zut a, thei ni ila a hlauhnate chu vawm bosak vang vang ka duh a, mahse chuti ngawtin a awlsam hauh si lo.

End of chapter 3