𝐕𝐈𝐍𝐂𝐄𝐍𝐓 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟔)

VINCENT

(Mizo Romantic Novel)

By

Havali Adam

Chapter 6

"U Vincent...!!!?" theih tawp chhuah tih hriat taka min nam sawn rual chuan a rawn ti nghal thuaia a, ka thil tih zawh chiah chu a dik lo tih chiang takin ka hria, mahse engkim a nih tur ang a ni vek tawh!

Engmah sawi lovin a hmêl chu ka en reng a, ani paw'n hlauthawng tih hriat fahran hian min melh chho ve kal a, ka hmâah chuan rei pawh ding lovin hmanhmawh ru zet hian a kal sawn ta hlawk hlawk a, kei erawhin in chung lama a chho pawk pawk lâi te chu ka la en zui zel a, ka rilrua inthiam lohna pakhat mah a awm miah lo te hlei hlei chu thil mak a va'n tling chiang èm!

Thawm awmchhun chu ruah sûr buan buan thawm a ni deuh tlawng a, chu bak thawm dang rèng hriat tur a awm lo tawp a, ka dinna ngaia la ding rengin thil thleng zo chiah chu ka ngaihtuah kir rauh ruah a, ka chet dan kha a mawi miah lo tih ka hai lo, mahse engati nge chhe tê them paw'n inthiam lohna ka neih miah si loh!?

A thu hrimah eng vang teh chaia fawp ringawt kha nge ka nih reng reng? Chu zawhna chu keimah leh keimah ka inzawt mawlh mawlh a, hmuh hmaih rual lova a duhawm ruk riauna te, a vun nung no nalh tak te, fawh chàkawm ngawih ngawih khawpa a heh sen vàm te khan ka mipa rilru chapona ṭhiat darhin rilru fîm min puttîr thei lo ni ta berin ka hria.

Ka hmai tuai puatin thawk ka lá ham ham a, ka rilrua thumal pakhat rawn lang chhen lah chu rinhlelh rual lovin a dik tih ka hre chiang ropui bawk si, engtin nge chutiang tak chuan ka danglam mai theih pawh ka hre hrep lo!

Ni e, ka rilruah hian 'duhna' a rawn piang ka ti lo thei lo, kei Vincent Ramhmangaiha hian awlsam lutuk tak maiin Zualbawihi hi ka duh fel der tawh chu a ni ber hi màw!

Ka ngaihtuah chian pôh leh phàt ngaihna awm lo khawpin ka duh tih ka hre chiang zual leh ta nghal a, mahse amah Zualbawihi ber hian engtin nge min ngaih ve tâk ang? Ka rilru ang hi a pu ve kher ang em?

Ni lo, a teuh lo, ani ang hmeichhe rilru thianghlim lutuk chuan tlangval anga min en ka ring lo hulhual! A chhan chu û ang bakin min en dâwn lo tih ka chiang tlat, kei erawh a laka ka rilru puthmang a va dang ta si èm!

Ka rilru tak chuan ka'n hui leh pap ṭhin a, mahse thawm erawh ka chhuah lo hrim hrim thung. Chokaa kan chaw eina dawhkanah chuan kiu nghatin ka ṭhu ngâwi reng a, ka rilruah eng dang rèng a awm thei mawlh lo; Zualbawihi tih ngawt loh chu!

Engtik lâi aṭang khan nge a laka ka rilru puthmang a danglam tâk ka hre lo va, mahse kei hian ka lo duh ru reng a ni tih ka hriat chhuah meuh chuan kawla thlun beh ang hrimin ka rilru leh ngaihtuahnaah a lo châm nghet tawh viau thung si, mihringte hian hmâ huna thil thleng tur kan lo hre lo ngawt mai.

Keimah tak pawh hi engtia han danglam ta vak nge maw ka nih reng reng ni!?

Chapo thu hla ni lo se, ngaihzawng hi ka nei ve nial nual tawh a, kan inṭhen avanga rilru nâ lo an awm pawh ka hre lo. Chutih rual chuan keimah ber erawhin eng he hu ah ka ngâi der lo va, a thlaa thla inzui hnua inṭhen pawh ni mah ila ka ngaihtuah zui hi an awm khat khawp a, kan inṭhen fel vek tawh hnua sual min ti chíamtu pawh an awm fô phah rèng bawk.

Chutiang taka mipa inla ve larh, mahni táwka induh ve váh chu a ruka ka hmeichhe ngaihzawn thar Zualbawihi lakah erawh tui ang maiin ka luang ral lo chauh a ni hawt a, thuneih khum tum viau ṭhin mah ila a rilru tur ka dâwn thleng a, ka tih nàt palh hlauin ka rilru ka thlak leh nge nge ṭhin.

Kawngka inkhar ri khep thawm lam chu ka hawi phei a, room aṭangin ka nu a lo chhuak chu niin, mi pawh be chuang lo hian choka lamah a rawn pen phei chhat chhat a, kei tak paw'n engtin teh ual ka lo be bîk chuang der lo.

Ka rilruah Zualbawihi bak a awm hleithei tlat lo va, ka nu chuan ka rilru a hria ang tih hlei hlei ka hlau a, hre ngat se zawng mak a tih piah lamah min zahpui viau ang ka ring. A chhan chu mi hrang angin Zualbawihi an en lo hrim hrim a, chuta kârah keiin ka lo duh khanglang bawk si, ka pa leh ka pu chenin an rilru tur ka hre chiang lutuk tlat!

"I va huh deuh chap chap ve, ruah in do em ni?" ka nu'n a rawn tih chuan ṭawngkâa chhâng lovin ka lo bu nghut a, chutah amah bawk chuan

"Khaw'nge Zualbawihi? In rawn haw rual na nge?" a rawn ti leh a, ka rilru pêng pakhat chuan ka fawh avanga in chung lamah a chhoh daih thu chu hrilh turin min rawn tur et et a, mahse chutiangin ka sawi chhuak ngawt dâwn teuh lo mai.

"In chungah a chho" tih bakin ka nu chu ka chhâng lo va, min biak zui zel hlauin ka room lamah ka chho ve ta daih bawk.

Step-a ka pen chhoh khut khut lâi te chuan ka rilruah Zualbawihi a châm a, ka mitthlâah ka fawh dâwna a mak ti hmêl kha fiah takin a rawn lang zut zut bawk a, hmeichhe naran ve mai avanga ka inngaihtuah muk lutuk chu a awihawm loh hial záwk a ni.

Ni lo, hmeichhe naran a ni hauh lo, ka tân ngat phei chuan hmeichhe naran a ni awzâwng lo e!

Ka room chhûnga ka'n lut te chu kawr pawh thlak lem hlei lo hian ka ṭhu ngâwi run a, ka thil ngaihtuah ngai bawk ka ngaihtuah ngut ngut a, thawmhnaw thlak ka ngâi tih leh inbual fai ka ngâi tih lam rèngin rilru a luah thei lawk lo va, chutiang chuan minute tam fê chu ka ṭhu deuh ngawt ngawt nghe nghe!

A tawpah erawh 'ka hrilh tur a ni' ti rilru nghut chungin intifai tur chuan ka che chhuak ta nge nge a, inbual pawh ka inbual rei lo. Ka intifai zung zung a, thawmhnaw dang ka ha deuh sawk sawk a, in hnuai lama a chhuk thlak hmâ ngeia Zualbawihi biak chu ka tum nghet bur bawk.

Ka room aṭang chuan ka chhuak thuai a, ka û room ka pan ding nghal chat a, ngaihtuah sî sê hmâsa hauh lova kawngka hawn mai ka tum chu chhûng lamah a inkalh tlat a, in hnuaiah a la chhuk thla bîk lo tih ka hrethiam zui nghal zat a, kawngka a kalh tlat chhan erawh ka hre hauh lo thung.

"Zualbawih.....?" ti thum supin kawngka chu ka kik ri karh karh a, room chhûng aṭang chuan eng thawm mah a awm eih lo va, ka kohna ri leh ka kawngka kik ri chu a hre miah lo ni maiin ka hria.

"Zualbawih.....?" ka ti nawn leh ngat a, kawngka chu kik tawh lovin ka chum zui ta dat dat bawk.

"Eng nge?" zawi fiah raih hian a rawn ti thâm deuh ṭiak a, kan inkârah daidangtu kawngka a awm kher bawk nen a aw chu a ring fahran lo khawp mai.

"Inbia ang, kawngka hi lo hawng rawh" ka ti thum dap a, ani erawh a ngâwi leh reng tawh thung.

"I hawng lo a nih chuan rawn luh dan ka dap tho dâwn tih i hriat ngei ka besei" keimah bawk chuan ka tih zawm leh zat a, ngâwi rengin a rawn hawn hun chu ka nghak deuh vang vang a, chuti mai chuan rawn hawn a tum lo a nih hmêl!

"Zualbawih.....!?" ti nghuta kawngka chum leh ka'n tum chu beisei loh takin a rawn hawng thut a, mi pawh en lo hian a kal sawn zui nghal nal nal bawk.

"Eng nge sawi i duh?" khum bula ding ngal chungin a rawn ti charh reuh a, min la en lo tluang zel a, ka lakah a lungâwi tih chu ka hai bîk lo hle.

"Nichin lawka thil thleng kha ka tum rèng vang a nih kha!" ka ti tlang nghal riap a, ka thusawi chu a rin loh lam lutuk a ni te pawh a ni ang.

"Maw.....!?" a rawn ti hû a, min melh chho deuh kal nghe nghe!

"I tum réng vanga khatiang thil kha ti maw i lo nih a!?" amah vek chuan a rawn ti leh a, kal hnaih salhin a dar tawn tawnah ka chelh a, awm sawn pawh a tum bîk der lo.

"Ni chiang e" ka tih zawh rual rual chuan

"Engati nge?" a rawn tih zawm nghal zat a, mi  a la melh chho ve kal reuh leh ta nghal a, engtin paw'n awm se ka hmu ṭha laklawh vel vek tawh a ni ber.

"A chhan chu ka duh che alawm, kei hian ka duh che" ka ti thum chhal a, chu thu ka sawi zo chiah chu ka chelhna ata inla hrang nghal vatin hmun dang a melh rang hle a, kei erawh ka thawveng huai thung.

"A theih loh u Vincent, chutiangin ka lakah rilru i pu thei lo ang" a rawn ti thawp sap a, ka insum thei leh der tawh lo.

"A theih lohna chhan tur ka hre ve reng reng hleinem" tih leh a hnung lam aṭanga kuah ka rual zui zat a, phu deuh zuk hian a ṭang nghal ṭung a, ka kuah ngheh sauh phah nghe nghe!

"A theih loh alawm, a theih loh tawp!" a rawn ti niah niah a, nghet zet hian a kut chu a hum ran bawk.

"I kawr hi i la thlak miah na nge?" ka ti ta daih a, kuah lo ila chuan a thawmhnaw chu a hnawm chap tih ka hre miah lo ang.

"I awm sawn theih chuan ka lawm ngawt ang" a rawn ti fiah deuh fak a, ka awm sawn ve nghal mai a, ka zawhna chu chhàn pawh a tum chuang lovin ka hria.

"Intifai la, inha lûm thuai ang che" tih leh room aṭanga chhuah chu ka rual a, chutia a laka ka rilru puthmang ka'n hriattîr ta chu sawifiah thiam chiah si loh hian ka awm a nuam sawng sawng a, hnâra hlit phawi ang mai a ni.

In hnuaiah ka chhuk thla a, ka nu chuan thingpui min lo siam a, eng ka hria nge pawh ka hre lo, ka zàng deuh huih a, ka hlim han ti ngawt dâwn ila ka hlim em em ka hre chuang hauh si lo, chutin ka hlim lo chuang bawk si lo, ka awm dan teh thlawt chu a chawhchawrawi khawp mai.

Thingpui kan in lâi chuan ka nu chu a ṭawng siam siam a, dawr chungcháng mai bakah eng eng emaw a sawi kâi duah a, ka hnathawhah nen lam a pakâi zui zel a, in chung aṭanga Zualbawihi a rawn chhuk thla chiah phei chu ṭawng duh barh barh zual tak a ni.

Ka nu leh Zualbawihi chuan ei rawng an bâwl dun mial mial a, kei erawhin Zualbawihi ngawr ngawr ka en tlawk tlawk a, duhawmna zawng zawng neitu hmeichhiaah te ka chan hial a, ka mitah chuan a tling zo thlawt a, ka hmeichhe ngaihzawn tawh azawnga ka la ngaihzawn ber a ni hial awm e!

Ani pawh chuan ka en reng tih hre ru ranin mi a rawn melh ve leh zeuh ṭhin a, ka en deuh ngar ngar avang chuan a zàm ni mai te'n ka hre nghe nghe a, aieng bûr chhin a tih tlàk palh ruala lei a chhuah tet reuh te hlei hlei chu hmuh nawn ka chák awn awn a, chutiang tak chuan hmeichhe lakah ka luangliam ang tih réng ka dâwng pha ngai lo.

Kan inhmêlhriat chhoh ṭan dan ka chhui kir a,  movie te pawh a ang hialin ka hria. Tin, chuti fakauva Zualbawihi ka'n ngaizawng ta hluah hluah mai chu mak ka ti lo bîk lo va, ka hmeichhe duh tawh azawnga ka la duh awlsam ber a ni ti ila a sual lo viau ang.

Ka en rei lutukna lamah ka nu min biak pawh ka hriat loh phah nghe nghe a, ka ngaihtuahna ata ka'n harh chhuak chiah chu ka awm dan ka siam ṭha nghal vat vat a, ka nu erawhin a lo hrethiam lo hlauh; a vanneihthlak tak tak a ni!

'Kal sawn rih zàwk mai teh ang, chuti lo zawng ka nu'n min hre chhuak palh hlauh ang e' ti rilru nuah nuah chung hian sitting room lam chu ka pan ta nge nge a, phone khawiha ṭhuthmun ka siam fel rual chuan ka pa hnen aṭangin phone call ka dawng a, ka là zui nghal mai a, hruai turin min rawn ti dâwn a ni hrim hrim!

"Ruah hi a la sûr char char a nih chuan dâr 5 velah motor khan min rawn hruai mai dâwn a nia, a sûr hàn a nih leh bike hian ka rawn haw mai ang" a rawn ti ta ngei a, kei pawh chuan 'aw' ka lo pawh ve nghal mai bawk.

Choka lam chu ka hawi phei leh zauh ṭhin a, chu pawh Zualbawihi ka thlithlai ruk reng vang bak a ni lo. Tho deuh thurhin ka pu room-ah ka lut a, mahse a lo la mu tui chuah chuah hle chu niin, ngâwi rengin ka chhuak leh hnu hnu a, tih tur ber nei hawt si lovin tih tur nei ang tlata inhriatna ka nei ru reng leh ta nghal a, awm hle hle thei lovin ka room lamah ka chho zui daih nghe nghe!

Khua chuan hniam zâi a rêl tial tial a, ruah pawh a la sûr rèng a, a sûr nileng zankhua dâwn te pawh a ni mahnà, a sûr duh cher cher êm mai. Tlai dâr 5 a ri hnai ta maw tihah chuan in hnuai lamah chhukin kawngkapui bula motor chahbi chu ka là a, ka nu chu ka pa ka hruai dâwn thu hrilh zauhin in chhuahsan ka rual a, en miah loh ka tum vei nen Zualbawihi chu ka melh hman hram tho!

Kan dawr ka va thleng chu kan mi chhawr te'n min lo be siam siam hlawm a, ka nèlawm viau loh tehreng nen hian mi nêltu hi ka nei ve leh pheuh pheuh ṭhin a, chung zîngah chuan anni pawh hi an tel ti ila a sual tam lo khawp ang.

Khua a thim fel diam tâkah chuan ka pa chu dawr ka kharpui a, haw kawng tluanin helhkam nei miah lo hian a ṭawng suah suah a, kei tak pawh ka ngâwi reng bîk chuang lo. Eng eng emaw ni kan sawi dun a, hriat loh kârin in kan thleng der bawk.

In chhúng kan lut chu Zualbawihi bawkin ka mit a là leh ta chat a, ka lo en leh vung vung ṭhin a, zanriah kan kil lâi te hlei hlei chuan ka melh ru ngun a, biak erawh ka be miah lo thung.

Ka duh thu ka hrilh avang khan a rilru leh a awm dan a la pangngai chiah lo tih ka hre chiang em em a, chuvanga be lumlàm duh vak rih lo pawh chu ka ni rèng a, mahse rei tak erawh ka theih ka ring lo. Ka be chàk zek zek a, ka taksa si riala kuah mai te ka nàp rum rum hial a, chutianga hun kan hman dun theih chu ka ring nghet bur nghe nghe!

Zan a ral a, zep rual lovin ni thar chuan ka awm dan zawng zawng a rawn her danglam vek a, office-a hun ka hman chhûng zawng paw'n ka ngaihtuahna kil khatah Zualbawihi a awm ru reng a, ka duh thu ka hrilh aṭang khan kan inbe leh tawh lo hrim hrim a, be hmâsatua ṭan ka duh rualin ka nawr mah mah tih ka hlauh vang a ni pakhat!

Station aṭanga ka haw in ka thleng chu choka lamah amah tè chiah hian a lo che ri rak rak reuh a, ka haw tih pawh a hre miah lo a nih hmél! Thawm dim em em lo, dim lo em em em bawk si lo hian ka pan khup khup a, a dekchi chhùan lâi suan paha min rawn hmu thut chu a phu dawrh dawrh teh e!

"Awi..!!!! Engtik lâi khan nge i lo haw?" a rawn ti hliai a, a meng buai deuh nak bawk.

"Ka lo thleng chiah" ka ti pangngai ve mai a, bu nghat hian ei rawng chu a bàwl zawm leh mial mial a, mi biak zui a tum leh tawh chuang paw'n ka hre lo.

"Khaw'nge ka nu?" tiin keima'n ka biak zawm ta záwk a, ani pawh chuan

"Ṭhenawmte inah a lêng phei lawk a, a lo haw ṭep ka ring" a rawn ti ṭha ve leh mai a, min en se ka tih ruk tehlûl nen ka lam rawn hawi chu khawi lamah; a duh lo bur te pawh a ang mah záwk!

"Zaninah lo muhil hmâ suh ang che, ka lo kal dâwn" ka ti deuh dut a, ka thusawi chuan a beng a verh zak a ni ang, a thil tih lâi chu a tawp chat nghe nghe!

In chung lamah chhovin ka inthlak nghal a, ka inbual fai zui zat bawk. Zanriah ei hmâ chu ka room-ah ka tawm reng a, file ṭhenkhat chhiara hun ka khawhral vang a ni pakhat a, chuti ni lo se chu Zualbawihi che vel leh a hmêl hmu tur hrim hrim paw'n ka chhuk thla ngei ang.

Kâr lovah zan a rawn inher chhuak thuai a, khua chu a thim chhah mup a, zanriah kan ei lâi chuan ka nu leh pa leh ka pute an titi barh barh a, kohhran hmeichhe inkhawm zan a nih avangin chaw pawh kan ei hmâ ang reng viau a, ka nuteho ṭawng lâi chuan Zualbawihi ka biak dan tur ngawt ka lo ngaihtuah ngut ngut thung a, Zualbawihi chu ka melh ru zauh ṭhin bawk.

Chaw ei kham hlim aṭang hawt ka room-ah ka inkhung deuh chawt a, hun chu kal thuai thuai se tihna rilrute ka pu thul a, ka hrilh láwk tawh avangin amah Zualbawihi tak paw'n min beisei ruk ve reng chu ka ring.

Dârkâr a liam a, ka duh leh beisei ang ngeiin Zualbawihi hmuh ka tum hun chu a rawn thleng ta ngei a, mi dang an mu vek tawh bawk nen thawm chu a reh ṭhiap ṭhuap hle a, muangchâng fahran lo hian ka room aṭang chuan ka chhuak a, Zualbawihi awmna room kawngka chu ka kik zui nghal karh karh bawk.

"Eng nge min hmuh duh chhan?" room chhûng kan luh fel hnu chuan a rawn ti dam diai a, kei erawhin sawi tur ka hre mai lo.

"U Vincent.....?" a rawn ti leh a, ka mitah tak min en kiau nghe nghe!

"Eng vak a ni lo" tih leh kuah ka rual a, rang mangkheng hian a tal chhuak nghal vat a, ka kuah rei loh tehlûl nen ka awm a nuam huai hman tho!

"Kan awm dan hi a dik lo, a ṭha lo, min duh tawh suh u Vincent" a rawn ti ta malh malh a, kei erawh ka lo khi suk ringawt!

"A bul ṭanna chauh alawm a la nih" ka ti hman dek dek chu

"A theih loh, min duh lo law law záwk rawh, buaina a awm belh mai mai" a rawn ti deuh charh charh a, ka lakah eng rilru chiah nge a put hre lo mah ila amah ka duhna chu chuti ngawtin a reh theih ka ring lo.

"Nawr luih che ka tum lo, chutih rual chuan beiseina erawh ka nei tih hria ang che" ka ti tlang leh ta riap a, chu chu ka rilru dik tak pawh a ni rèng!

"Ni lo, u Vincent......" lû thing nak nak paha a rawn tih chuan ka melh chhuk run a, ka âwma bei thlawpa kuah beh ka châkzia chu pui tak a ni.

"Ka duh ve lo che, chuvangin min duh tawh suh, pangngai takin awm záwk ang" a rawn ti leh chiah chu ka meng zîm nghal sun a, ka chhûngril lam a sâ nghal zawk bawk.

"Dàwt i sawi....." ka ti zo hman ṭawk ang tihah chuan

"Ka sawi lo" a rawn ti zui nghal zat a, ka din hnaih salh nghe nghe!

"A la tepter rih êm a, i tân paw'n a buaithlak ang, mahse chuti ngawtin ka basan che ring suh" ka ti nghet churh churh a, ka aw chu a dam viau lo bawk.

"Ka duh theih che ka ring lo u Vincent" chiang kelh kawlha min en chung hian a rawn ti deuh fak a, kan boruak hip lâi chu ka a hit zual dukin ka hria.

"I chiang maw?" ka ti bul ta hmuk a, chutiang taka tlawm chuan hmeichhe lakah ka la awm ngai lo va, ka mipa rilru chapona chu ka khap sêng tawh lo a ni ber.

Ṭawngkâa mi chhâng lova min buk khum nghauh leh chiah phei chu ka tha a nâ ru nghal vawng vawng a, min duh îkhaw lo tu ka lo duh ve viau te chu ka inhmu nep zual a, ka rilru a nâ paw'n ka hre lo, ka thin a rim ru hlur záwkin ka hria.

"Ka lo hre reng ang" tih leh room aṭanga chhuah chu ka rual zui nghut nghut a, ka zak ru chem chem bawk.

Ka room ka luh rual rual chuan khumah ka ṭhu hnawk a, ka mipa rilru chapona chu khap daih zawh rual a ni lo va, thinrim luatah ka bul hnaia mite chu ka khawih chhe lo chauh a, ka tei kual vut vut a, mut lam rèng ka thengthawngah a thawk thei tawh lo.

'A ve khanglang a! Ka ngaihzawng tawh chai lo ang!' tih ngawt chu ka ngaihtuahnaah a awm ngut ngut a, chutih rual chuan ka duhna pakhatmah a kiam chuang der hauh si lo. Khuma ka mu te reng reng chu ka mu meng kar a, ka tlaivâr leh thei mai dâwnin ka hria.

Thinrim avanga ka rilru nû but but chu thunun zo lo lek lekin a room kawngkhar hmâah ka va ding leh ngat a, ka tum dan ber chuan luh a, fawh nghal bawrh bawrh a, tlâwm taka siam lèt ve a ni a, mahse eng ka hria nge ka hre lo, ka ti thei tak tak chuang miah lo.

Ka room-ah bawk ka lut leh hnu hnu a, keimah leh keimah chu ka inngaihtuah chiang a, ka inngainep ngawih ngawih! Mipa inti ve si chutiang taka hmeichhe pakhat vang maia ka tlâwm ta hliah hliah lutuk chu tu hriatpui si lovin hrehawm ka ti ru hle a, min duh lèt ve theih nâna tha thawh nawn leh pawh ka tum tawh lo chiang khawp mai.

Ka rilru leh ngaihtuahna ka kawm nasa lutuk te pawh a ni ang, hriat loh kârin khua a rawn vâr der a, tuk dang ang te chu ni se exer là turin ka insiam mual mual àwm si a, mahse tun ṭum zet zawng a dan a dang èm a, nizana thil thleng khan min deng nâ èm a, eng tih mah ka châk lo a ni ber.

A sârhu lâia thinrimnaa khat kha dârkâr tam a liam meuh chuan inchhirna hlirin ka khat tawh a, ka duh thu ka lo hrilh kher kher kha ṭul lo ka ti hnuhnawh viau bawk. Chutih rual chuan inthiam lohna pakhatmah ka la nei lo tluang zel a, nei tur ni paw'n ka inhre lo.

"Bawiha....?" ka nu aw chu ka hre reng a, mahse ka chhâng miah lo thung.

"Vincent....?" ka room kawngka kik karh karh pah hian a rawn ti leh a, chutah amah bawk chuan

"Lo chhuk la, tukṭhuan kan peih tawh a nia..." a rawn tih zawm zat a, Zualbawihi kâ ngei aṭanga min duh loh thu leh min duh theih a rin loh thu ka hriatna khan ka lâi a la chhun ngut ngut viau te pawh a ni mahnà, ka room chu chhuahsan chàkna rèng ka nei lo.

"Vincent.....?" ka nu bawkin a rawn tih leh chuan

"Ka lo chhuk ang" ka ti chhumbung hmuk a, ani pawh chu a kal sawn ve nghal mai bawk.

In hnuai ka thlen thlak aṭanga rei lovah tukṭhuan kan ei a, ka pu min biakna te chu chhàn chákna pakhatmah ka nei eih lo va, Zualbawihi mawlh chuan ka tha a la tinâ ru em em a, ka'n melh deuh hrawk leh ngawt ṭhin a, amah lah chuan mi a hmu lo der ngar ngar leh ta nghal a, ka ngei táwka awm dan chu thiam tak a ni.

Mood fuh lo ru ṭunin station lam pawh ka thleng phei a, ka hnuaia mite hovin ka duh loh zâwngin thil ti ngat phei se chu hrawk hrep mai bakah kut hial ka thlak duh maithei a ni. Chutiang vel khawpa mood fuh lo chuan ka awm a, ka nilêng hun hman dan te nen lam a nuam hlawl lo!

Station aṭanga ka haw hnu fêah pawh in lam ka pan nghal mai lo va, rei táwk fang chu ka khawtawi a, ni dang ai ka haw har mah mah an ti deuh te pawh a ni ang, ka pa'n min rawn call nghe nghe a, hna lama ka buai thuin ka chhâng liam vel mai mai a, ka haw tlai chhan dik tak hre ngat se chu mawl min ti miah miah khawp ang.

In lam pana ka haw lâi chuan ka nu hnen aṭangin phone call ka dawng ve leh thung a, zanriah ei an peih vek tawh thu leh min nghah thu a rawn sawi a, eng ang paw'n buai ila chaw hi chu chhûngkaw kim taka ei khawm hram hram kan tum ṭhin a, chuvanga min lo la nghak ṭhap pawh chu an ni!

A tawp a tawpah chuan in ka thleng ve ta nge nge a, in chhûng ka lut chiah chu Zualbawihi ber chuan tim deuh dai hian min rawn melh a, kei lahin ka melh rum ang reng viau bawk si, a hawi sawn rang teh e!

Ka room lama chho lovin chaw chu kan ei ta nghal a, ka pu chuan ka hna lam chanchin min záwt a, ka chhâng ṭha peih lo kher mai. Ka chaw ei a tui lo ngàng bawk nen ka kham hmâsa ber nghe nghe a, ka awm dan vel chu a naupangchhia thlawt a ni.

Zan lam chu ka room-ah ka tawm chawt a, zan hmâsa záwk ang em em ni tawh lo mah ila ka rilru erawh a la ná ru veng veng khawp mai. Zîngah pawh ka tho hmâ leh viau a, exer làin rei fê chu hun ka khawhral a, ka lèt leh meuh chuan an lo tho kim vek tawh nghe nghe!

Nitin ka rilru chu a dal tial tial a, ka la duh reng tih chu ka phâ lo, mahse ngaihzawn loh law law a fuh ta záwkin ka hria a ni. Ka awm dan ka thlak a, a awm nuam lo thei zâwnga awmkhum reng chu dikin ka hre lo va, ka insiam ṭha chho bek bek a, biak erawh ka be leh tawh miah lo thung.

Chutiang chuan hun leh nî ka chhiar mawp mawp a, ka ngaihtuah tawh ngai lo hrim hrim chu ka ti dawt ngam lo va, mahse tum nà nâ nà chuan engtik lâi paw'n ka thluak chhûngah a châm reng tawh bîk lo.

A chhan bulpui ber chu ka hna lama ka buai êm vang ka ti lo thei lo va, buai lo ta ila chuan Zualbawihi bawkin ka rilru zawng zawng a luah khat leh vek maithei a ni. Thil tisual man leh chhui ngâi chhui reng rengin hun ka hmang ral a, nitin FIR a rawn lut a tih theih deuh thaw a, buai ve mawp mawp tak chu kan ni!

Thla a liam a, thla thar kan chuangkâi a, sik leh sa pawh inthlak danglam ve zelin a thlasik boruak em em tawh lo va, Zualbawihi pawh ka nu leh pa rawtna ang ngeiin kan dawrah a thawk tawh a, hlawh neiin a thawk a ni ber a, amah tak pawh a lawm viauin ka hria.

Tin, ka lawmpuina deuh pakhat leh chu a pa leh a ṭhuihhruaite'n an rawn ngaihven zui ta miah lo va, an la rawn zawng chhuak lo tluang zel te pawh ti ila a dikna chen a awm tho mai.

Ani nena kan inkâr erawh ka sawifiah thiam chiah tawh lo, unau angin ka en thei lo va, ani paw'n min en bîk lo tih ka hria, mahse kan inkârah chuan engmah a awm chuang der lo.

A inthlahrun avanga mi biak hmâsak châng a nei leh zauh ṭhin tih loh chu kan inbe ngai lo tluk a ni a, chutih rual chuan a mamawh engkim ka ngaihven ru reng a, ngâwi renga a pawisa hman tur han pek deuh tawp chângte pawh ka nei ṭhin a, mahse tun hnaiah erawh a là duh tawh ngai lo thung.

Inhnaih tak siin kan inhlat tih chu ani paw'n a hriatthiam ngei ka ring!

Tlai khat ka hna bâng, kan dawra ka pêng kawi chu tlai dang ang bawka awm hle hle ka tum fan a, mahse ka thei der lo. Customer pakhat chuan Zualbawihi chu a nâwk a náwk ta mai a, ka pa ṭawng te chu ngâithla reng e ti lo chuan ka ngâithla liam puat puat a ni ber a, Zualbawihi leh customer pakhat awm dan mawlh chuan ka mit leh rilru zawng zawng a hruai pêng vek a ni ber.

Ka pa thusawi laklawh lâi pawh ngaihsak tawh lovin ka tho thurh a, Zualbawihite awmna lam chu ka pan ding nghal chat a, ka pen phei pawk pawk a, anni lah chuan min rawn hmu miah lo lehnghal a, an awm dan chu ka mit tikham zâwng a ni ka ti lo thei lo.

"I lei zawh tawh chuan chhuak la a ṭhat ka ring" ka ṭawngkam chu a ngaihnawm fahran lo hle a, Zualbawihi ber lah chuan mak a tih hmèl em em zui!

"A nih.....ka kal mai ang" tiin chu tlangval, a hmêl aṭang ringawt pawha ka nau rual fê tih hriat tak chu a kal sawn zui nghal nal nal a, thla hial vei tawh mah se Zualbawihi laka ka rilru puthmang chu a la reh pumhlum thei lo a chhâ chu a ni e.

"Dawra i awm chuan i hnathawh lâi chiah ngaihsak tawh ang che!" ti bul hmukin Zualbawihi chu ka melh chhuk run a, ani pawh chuan kun deuh ngal hian

"Ka tihpalh a ni e" a rawn ti thawp sap a, a kut chu a hum ruh ngar ngar hle bawk.

Ka pa bulah ka phei ve leh nghal mai a, chìk duh se chu kan dawra Zualbawihi a thawh aṭang hian haw lamah ka péng ngun ta hle tih a hriatthiam ngei ka ring. Amaherawhchu, a mit leh beng chhìt lohna lam tak te pawh a ni ang, engmah a hrethiam lo hlauh!

Dawr aṭanga kan haw, in kan thleng chu Lucy-i a lo awm heu a, ka nu nen an lo titi siam siam a, kei min han hmu chiah chu a rawn nui nghal ver ver a, en pawh ka en rei peih nek lo, ka room lamah ka chhohsan daih nghe nghe!

Engtin nge a la rawn kal ngam záwk pawh ka hre lo, a nau Grace-i khan a sawi ngei awm si a, chu bakah Grace-i mai ni lo a nu leh pate paw'n a awm dan an hriat chhuah vek tawh ka ring a, mahse kan in chhûnga a la rawn kal hawr hawr ngam danah engmah an la hre lo a nih hmêl!

"Tunlâi chu i buai ṭhin hle a ni maw? Ka nu'n min lo hrilh zo chiah a, zanin chu hetah zanriah ka ei dâwn a nia, ka lêng deuh rih maithei bawk" ka room chhûnga a rawn luh rualin a ti nghal zar zar a, chhán pawh ka chhâng peih lo, min rawn zui chho ngei ngei dâwn tih ka hre làwk vek bawk.

"Kan chungchâng hi Grace-i i lo hrilh a ni maw?" a rawn ti leh hliai a, zahna a tlachham lutuk chu mipa ni ngat se zawng kut ka thlak duh hial maithei a ni.

"Vincent....?" amah bawkin a rawn tih leh chuan

"Ka hrilh leh hrilh loh chu ka thu thu!" ka ti bul hmuk a, chhan leh vang awm lovin ka hrilh ngawt dâwn lo tih a hre chiang thawkhat viau bawk.

"Tunlâi chu ka ngâi zual hle mai che" tih leh mi rawn kuah a rual zui zat a, min kuahna chu ka phih thlaksak nghal thuai a, ka inla hrang vat nghe nghe!

"Ka room aṭang hian chhuak rawh!" ka ti hluk a, ka thusawi engah mah ngâi lo tih hriat taka mi rawn kuah nawn ngat a tum leh chu

"Ka mood a fuh teh hrep lo a nia Lucy!" ka ti ta bawl a, lem zeta nui sen sen chung hian a bu nghauh a, ka thin tirim zâwnga awm belh tawh lovin a chhuak ve ta hram bawk.

A chhuak fel chiah chu ka thaw chhuak ham ham a, tunlâi ka hun hman dan zet zawng a buaichuarin a khamawm ru tak zet a ni. Hna lamah ni se ka buai em em a, in lamah ni se Zualbawihi avangin ka buai bawk a, Lucy-i lehzel hi chu rawn lang tawh miah lo mah se pawi ka ti chhe tê eih lo.

Zanriah kan han ei te chu a kham hmâsa berah ka ṭang leh a, ka pa paw'n mak a ti deuh a ni ang, zawhna min zàwt nghe nghe a, mahse engmah ka sawi ṭha duh lo thung.

Zualbawihi lakah eng thinrimna mah ka nei tawh lo va, huatna pawh ka nei tawh hek lo, keimah ber ka inhaw záwk! Ka lo ngaizawng hman thawt thawt te chu ka la inchhir ru reng a, ngaihtuah miah lo tum teh mah ila ka thei bawk si lo, a laka ka rilru puthmang chu hunin a liam bopui ve leh mai beiseiin hun ka hmang nitin zantin ṭhin a ni ber e.

Zanriah ei kham aṭanga rei pawh ni lovah ka chhuah tur thu leh Lucy-i chu thlah nghal a rem thu ka sawi a, Lucy-i tak chuan mak ti zet hian min en a, ka sâwmna chu a hnar hian a hnar phal lo hrim hrim a, zep thu a cheng lo, chhuahna tur ka neih vang ni hauh lovin a haw ka duh tawh záwk avanga chu chhuanlam fahrah zet chu siam chawp ka ni!

An in kawt thleng ka thlah a, lêng lut tura min sâwmna chu chhàn pawh ka chhâng buai peih lo, ka lêng dâwn lo tih a hre chiang bawk a, min sâwm nawn lo hrim hrim! In lamah ka lèt leh vat záwk a, in ka thleng chu zan dang ang bawkin ka room-ah ka tawm leh chawt a, tih tur ka nei em em pawh a ni chuang lo.

Chutia khuma ka ṭhut ngàwih vung vung lâi chuan kawngka a rawn inkik ri karh karh a, ka hawi phei zawk nghe nghe a, mahse engtin mah ka chhâng lo thung.

Kawngka chu a rawn inkik nawn leh karh karh a, chutah erawh ka kalh loh thu ka sawi ve ta sup a, chumi hnua ka room chhûnga lo lut zal zal chu mit là sawn lèk lo hian ka lo en run a, ani ve thung chuan min en ṭha ngam lo khawp mai.

"Ih....eng lo...." ti bah deuh nawkin a kun chal a, mi a rawn en leh zauh ṭhin tih loh chu hmun dang a en nghal zel ti ila a sual lo ber ang.

"Eng nge ni ta?" pangngai tak hian ka ti dam dap a, ka hmâ lawka ding hmeichhe duhawm lutuk tak mai chu kuah thlawp ka châk rilru tak zet bawk.

"Eng lo....." ti sepin a ngâwi zui vang vang a, ka ṭhutna aṭang chuan ka thawh hluai phah nghe nghe!

"Tlaia thil thleng chungchâng kha em ni?" ka ti thum hniam thlup a, ani erawh chuan a lû a lo thing nak nak thung a, ka room chhûng ngeia min rawn hmuh chhan chu ka ring thiam lo ta kher mai.

"Ih....ka....eng lo...." ti thawp sapin a thaw chhuak halh a, eng nge a sawi tum ka hre chiah lo nà chu a sawi hreh tih erawh a hriat viau!

"Hetiang hian awm tawh suh u Vincent....." a ngàwih deuh ren rawn hnu chuan a rawn ti chhuak ta hap a, ṭang ru ṭun tih hriat tak hian ka mitah tak min en kal bawk.

"A hrehawm ka ti....." amah bawk chuan a rawn ti fiah leh sap a, ka din hnaih nghal vut nghe nghe!

"I nuamsam lo em ni? I ṭha em?" ka ti zo chiah chu

"Ṭha lo" a lo ti zui nghal halh a, ka meng urhsun ren run nghal hle.

"Hmêlhriat loh ang maiin min awmkhum tawh suh u Vincent" a rawn ti hniam leh raih a, ka indin hnaih tawh viau bawk.

"Chutianga ka awm àwm ka va hre lo ve...." ka ti dek dek chu

"I awm alawm....." a rawn ti nghal pang a, thawk harsa ti ang hrim hian a thaw chhuak leh ham ham ṭhin a, rilru hahna nei ru reng hmêl a pu ni berin ka hria.

"Ka hnaih che chuan ka inthun zo dâwn lo tih ka chiang a, chuvanga hlàt hram hram zel che ka ni!" tiin thil nih dan dik tak chu ka sawi chhuak ta nge nge a, ani bulah lo sawina tur dang a awm chuangin ka hre lo a tin a ni!

"Ka tihpalh....." ti sepin ka kut vei lam chu a rawn vuan dê dê a, ka awm dan leh ka mitmeng a danglam nghal hlawk nghe nghe!

"Ka tân hian i hlu asin, ka lakah engtin pawh awm la ka haw phal lo che, i hlu lutuk, mahse min hlàt taka i awm hian hrehawm ka ti a ni" a rawn ti leh halh halh a, a kut chu ka hum lo thei ta bîk lo.

"Ka hlàt chhan che chu i hre vek tawh a ni lo'm ni?" ka ti ve leh ta sup a, zanin rei lam a hnaih tawh bawk nen kan ṭawng ring hran lo dun hle.

"Ka tihpalh u Vincent....." tia chawl dat hian

"Dàwt ka sawi alawm, min duh thu i sawi zana ka thusawi zawng zawngte kha dáwt vek a ni" a rawn tih zawm leh zat a, chu thu ka hre chiah chu ka danglam nghal zawk a, ka thin a phu rang nghal viau bawk.

"Eng nge i sawi awmzia?" tih leh a dar tawn tawna chelh ka rual a, ani erawhin ka t-shirt tlâng a vuan ṭai thung.

"Zualbawih.....?" keimah bawk chuan ka ti leh sup a, kan boruak hip dun mêk chu danglam tak a ni.

"Min duh thu i sawi zan khan awm ngaihna ka hre lo hial asin, mahse nang chu kei ang hmeichhe naran tân chuan i sâng mah mah lutuk tih hai rual a ni lo va, chu bakah keimah avangin nang leh i chhûngte chungah thil ṭha lo a thleng ang tih ka hlau em em a, i laka ka rilru puthmang dik tak kha ka sawi chhuak ngam ngáng lo a ni" a rawn ti ta thliam thliam a, ka thu hriat zozâi chuan min va han tihlim ru vawng vawng si ém!

"Min haw ngawih ngawih angin awm tawh lûl suh u Vincent" mittui tling pam hian a rawn ti leh sep a, ka kuah lo thei ta lo.

"A teuh lo, ka haw phal teuh lo che" tiin ka kuah nghet sauh a, chutah keimah bawk chuan

"Ni lo, a tirah kha chuan ka chapona inhnehtîrin ka haw ngei che alawm, mahse ka haw rei tak tak thei lo che, a chhan chu ka thinlungah hian hmun i chang hnem tawh lutuk tlat" ka tih zawm leh mawlh mawlh a, nghet taka kuah run chungin a hnung chu ka chul hliau hliau a, hahdam sawng sawng tak ka ni!

End of chapter 6