𝐕𝐈𝐍𝐂𝐄𝐍𝐓 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟓)

VINCENT

(Mizo Romantic Novel)

By

Havali Adam

Chapter 5

Hun inher danglam zel chuan mitin nghahfàk hunpui a rawn her chhuahpui ta nge nge a, Krismas boruak thaw lêng vel tih takah khawi kip pawh chu a Krismas rim em em vek a, chhûng leh khat, laina hnaite nena chaw ei khawm neih lah kan bâng lo, ka û'n min la dampui ve ngat phei se chu kan hun leh nî chhiar dan a kim biai ni mai tur!

Chutiang zelin Zualbawihi pawh kan zîngah ni tam a lo khawsa ve ta reng a, zep rual lovin ka nu leh pa phei chuan an mihrang en miah lo a tih theih a, amah Zualbawihi ber lah a mawng a zàngin a lo ngainatawm reuh phian bawk si nen a tua ma'n kan haw lo tlâng a ni ber.

A taksa hriselna lam pawh a pangngai chho tial tial a, kan zîngah a ṭawng ve bawrh bawrh ngam tawh a, mahse chutianga hmeichhe mize harh leh ṭawng duh par par chì erawh a ni hran lo va, nungchang tlâwm tak a nei te chu amah tingainatawm zualtu ka ti lo thei lo.

Tin, mi inthlahrung mi a ni tih te kan han hre chho zel bawk a, kan laka thil tisual anga a inhriat chângte hian a inthlahrun luatah a kimki chawih zel a, a tisual tih pawh kan hriat loh te hi amah záwkin a rawn sawi chhuak hlawl zel a, ka pu phei chuan a thusawi eng pawh nuihpui nuam a ti em em a, kan zînga Zualbawihi a rawn awm chu kan chhûngkaw tân bungthar ni mai te'n ka hre hawt ṭhin.

A rilru a la thianghlim mai bakah mi dangte zah thiam tak a ni a, a dinhmun avanga inkiltawih chângte pawh a nei tih ka hria, mahse ka theih ang angin ka fuih ṭhin a, ngaihngam tak leh rilru zalen taka awm turin ka hrilh awl lo va, chu chuan kawngro pawh tam takin a su rèng a, a rilru lam chenin hmâ kan sawn ve tawh viau bawk.

Thil dang chu eng pawh ni se, keimah ber hi ka tum angin ka awm hlei thei der lo va, khatia Siaha lama zin phei tum rum rum kha ka ni a, mahse Aizawl khaw chhûngah thil chhui ngâi leh case rawn lut a awm neuh neuh lehlawi bawk si a, zin pawh ka la zin chhuak thei lo.

A bîkin tun hnai hian rukruk leh pawngsual tih ang reng a hluar em em a, inruk bo nen lam chhui zui ngâi a awm deuh reng a tih theih a, Pathian khawngaihna azârah ka la hlawhtling ve zel záwk mai pawh a, thil awlai zawk zawk chu a ni lo khawp mai.

Ka rilru tak chuan Siaha lama zin ka la tum ru reng a, Zualbawihi pawh ka hrilh tawh lem lo. Keima hmâlaknaa kal tawp ka tum a ni ber a, ka nu leh pa leh ka pute phei chuan ka pamṭul rei tawh avangin ka zin dâwn lo emaw an tih hial ka ring tawh a ni.

Hunpui a han zo chiah chu kum tharin a rawn zui nghal a, thlasik boruak la châmbâng rengte hlei hlei chuan kawng lehlam záwng tak hian khawhawi a tinuam a, kum bul ṭanin mi tin kan eizawnna lamah leh kan hna ṭul lamah kan tlan mup mup a, chungte chuan mihring kan nihzia a tarlang chiang hle.

"Awi......!" ti ṭhawtin Zualbawihi chu bathroom lamah a tlan lut nghal thuai a, inbual zo hlim, bathroom aṭanga rawn chhuak chiah e ti lo chuan a lut leh rang khawp mai.

"Sorry....." tih bak sawi tur ka hre meuh lo.

Room aṭang chuan chhuakin in hnuai lamah ka chhuk thla nul nul a, keia awm rengna chì ni hek lo. Ka mitthlâah lah chuan ka thil hmuh zawh chiah chu a châm zui reng leh ta nghal a, ka lû ka'n thing leh ngawt ṭhin a, mahse reh lam chu khawi lamah, a fiah tulh tulh záwk emaw tih tur hian a chiang záwk za mah a, room kawngka kik miah lova ka lut ringawt kha ka tisual a ni.

"File là turin i chho a ni lo'm ni? Engati nge kut ruaka i rawn chhuk leh si?" ka nu chuan a rawn ti a, ka harh chhuak zawk nghe nghe!

"Nia....." tih leh thawh ka rual a, ka room lam pan chuan ka chho leh hna hna a, ka awm dan chu àtthlak ka ti hnuhnawh khawp mai.

Ni e, file là tura station aṭanga haw vang vang ka ni a, in ka thlen rual rualin file là tur vekin in chung lamah ka chho nghal kha a ni a, mahse Zualbawihi thlithlai ka duh avangin ka û room, ama room ni ta ah lut hmâsa phawtin eng nge a tih hriat tum ka ni ber a, ka thil hmuh erawh ka beisei piah lam a ni thung.

Ka room-a ka luh rual chuan za lo zet hian ka khi suk a, ka inngainep a ni ber. Tlangval phan chang tawh leh lung fing chin ngatin ka room-a kal ka theihnghilh hmin hmak thei chu mak pawh ka ti lo, àtthlak ka tih rualin nep ka inti hle a ni.

File chu ka là ta ngei a, room aṭanga ka chhuak chiah chu ka û room aṭangin Zualbawihi a rawn chhuak ve chiah a, kan chhuah hun chu a innang ti mai teh ang.

Kun deuh lap hian a pen pawk pawk reuh a, a hmai lah chu a tai hlar leh ta nghal a, nichin lawka thil thleng avang khan a zak ni maiin ka hria.

"Station-a i lèt leh hmâin hetah inei puar law law mai rawh, Zualbawihi pawh i che nasa si a, i chau ngawt ang" in hnuai ka thlen thlak rual chuan ka nu'n a lo ti malh malh a, chutih lâi mek chuan a room aṭangin ka pu pawh a rawn chhuak ve chiah bawk.

"I rawn haw zuaih em ni?" tiin ka pu chuan min rawn bia a, vawiin chu a tlangval hmêl viau mai.

"Immm.....haw zuaih....i lo tho chhuak peih a ni maw?" ka ti ve dut a, tiang nena kan lam a rawn pan chhat chhat chu ka lo pui nghal vat nghe nghe!

"Zualbawihi hian mi enkawl a thiam reuh a, hei, a tar a tarin ka ṭha sawt sawt mai" nui sun sun pah hian ka pu chuan a ti lûam a, Zualbawihi lam ka hawi chu a lo hawi sawn nghal vat a, ka en hmâ khan min lo en ni ngei tur a ni.

"A ei theih e, ei ve nghal rawh aw ka pa....?" ka nu'n a rawn tih tâkah chuan ka hawi sawn ve leh mai a, ka pu chu chair láksakin dawhkan bulah ka ṭhut feltîr zui zat bawk.

"A pawi hleinem, mahse ka duh tam lo" ka pu chuan a lo ti sam than a, chutih lâi vek chuan ka mit leh Zualbawihi mit chu a intawng leh ta chat a, mahse hawi sawn rang vet vet tak a ni!

Ka nu chow kan chu tui ti zet hian ka ei mual mual a, ka pu titi kan ngâithla pah reng a, a changin Zualbawihi a be fiam leh zauh ṭhin bawk a, ka nu leh ka pu an ṭawng deuh char char a ni ber.

Ka inei puar fel ta maw tihah chuan station lama phei mai ka rilruk a, mahse Zualbawihi biak duhna ka neih avangin chuti maia kal nghal ngawt erawh ka tum hran lo.

In chung lamah ka chho a, mahse Zualbawihi erawh hmuh tur a miah lo thung a, ka thil ei lâia puar ta daih kha a ni a, ka û room-a a awm loh chuan in kawt velah a awm emaw a ni leh ngei ang.

Pâwn lam pana kawngkapui ka hawng chiah chu Zualbawihi rawn lut tur nen kan intawk chat a, ka kai sawn nghal a, ka awm dan teh thut chu ka khap dai hman bîk miah lo, amah tak pawh a hamhaih hmèl kher mai.

"Inbe lawk ang" tih bak ka sawi der bawk si lo nen ka kaih sawn ang angin a awm tawp a, ka bike hùnna bul kan thlen rual chuan

"Nichin kha chu ka tihpalh, ka tum a ni miah lo, i lut dâwn tih kha ka hre lo hrim hrim" tiin amah záwk a rawn ṭawng chhuak hmâsa hliai a, ka beisei loh lam tak thu a rawn sawi chhuak hlawl chu ka nui chhuak hawk lo chauh a ni.

"Ka tum a ni lo tak tak......" mitmeng fiah kala mi melh chho ral chung hian a rawn ti nawn leh ngat a, kei pawh chu ka ṭhen ve ta suk bawk.

"Ka hria alawm, kha kha chu keima thiam loh záwk a ni e" ti supin a kut ka chelh chu ka thlah a, ṭum dang ang bawkin mi a en ṭha ngam leh ta miah lo mai.

A zah châng te, a zàm châng te leh a inthlahrun chângte hi chuan min en ṭha ngam ngai der lo a ni ber e!

"Engati nge vawiinah i lo chet hah vak?" ka ti leh deuh tawl a, awkâ dam taka zawh ka tum vei nen ka aw chu ka thunun hman miah lo.

"Ka che hah pawh a ni lo, nu Beki khan a sawi ve mai mai a nih kha, chu bakah in tihfel te chu ka tih tur alawm, a harsa chuang hleinem" a rawn ti dam diai a, nui lui tih hriat tak hian a ṭhen zeuh bawk.

"Lo awm mai mai tawh ang che" thum deuh dapa ka tih leh chuan a lo bu nghat a, ngâwi reng hian in lam a pan ta nal nal a, ka thlir zui reng nghe nghe!

Kei pawh chu station lam panin ka inkhalh chhuak nghal a, ka rilru leh mithlâah chuan Zualbawihi hmêl a chàm tlat leh ta nghal a, eng nge a chhan pawh ka hre bîk lo.

Station ka thlen hnu rei pawh ni lovah Lucy-i a rawn lang nawlh a, a duh hûn huna min rawn kal pawh ngam ta mai hi ka rilrem loh zâwng tak a ni a, constable ṭhenkhat phei hi chuan ka ngaihzawng a ni emaw an ti tawh hialin ka ring.

Ṭum dang ang bawkin ka lo chhawn ṭha duh lo leh pek hle a, ani pawh a zak leh chuang der lo va, han khak emaw han ṭawngkhum deuh hluk hluk pawh hian awmzia a awm tam lo ṭhin khawp mai.

A ṭawngkam hman duh dan te hlei hlei hi ka hne chî tak a ni a, kei nen kan awm dun apianga Zualbawihi chanchin a sawi ta ziah te hi ka ngaithei der lo.

A chhûngte hrilh mai ka duh rum rum tawh a, mahse a khawi lam lam pawh kan mualpho dâwn tih ka hriat chian êm avangin ka ngâwi leh nge nge ṭhin.

Ka haw dâwn te chuan min zui hawa rawn lén a tum a, mahse ka phal lo bur thung. A rilru ka hre chiang a, a rawn lêng a nih chuan a rilru hre miah lo ka nu leh pate'n chaw eiah an sâwm leh ngei dâwn tih pawh ka hre láwk vek a, chuvanga a rawn lén pawh phal lo bur chu ka ni!

An in thleng thlah tur te'n min la ti ta deuh deuh lehnghal a, ka thlah loh chuan rawn kal a tum tlat thu sawiin luhlul a chhuah ngar ngar a, ka ṭawngkhum hluk hluk chung paw'n zahna chhe tê mah a nei lo hrim hrim a, a rawn lén ka hlauh luatah an in thleng chu ka thlah phah ta ringawt bawk.

Ka hmuh phaka a'n awm lo chiah chu ka thaw huai a, ka awm a nuam sawng sawng a, zep thu a cheng lo, mihring azawngah ka hne ngawih ngawih, engtin nge ka û khan a lo neih reng peih záwk pawh ka hre nek lo e!

In ka thleng chu khua a thim titih tawh a, choka lamah ka nu leh Zualbawihi an lo infiam nui barh barh a, mit lá sawn lék lo hian Zualbawihi nui hmêl hmuh hahdamthlak tak chu ka en vung vung a, ka awmhmun nen lam chhe tê paw'n ka sawn eih lo va, ka awm dan ka hriat chhuah meuh chuan nep ka inti ru kher mai.

Zep rual a ni lo, tun hnai hi ka dik hlawl lo, a bîkin Zualbawihi ka en dan mawlh hi; thil nih dan tur a ni lo!

Ka room-ah chhovin ka inbual fai nghal sur sur a, in hnuai lama ka chhuk leh chuan ka nu'n chaw ei a rawn rawt a, ka pu pawh sitting room-ah a rawn ṭhu chhuak ve peih a, a sawi ang tak tak khan tun hnai hian ani pawh hi a taksa hriselna a ṭha chho viau a, mahse Zualbawihi vang erawh a nih ka ring em em chuang lo.

Zanriah ei kham, sitting room-a kan ṭhut kim ṭhep ṭhawp lâi chuan kâr leha Siaha zin ka tum thu chu ka sawi chhuak ta nge nge a, ka pu leh ka pain an rawn sawi zui nghal a, ka thil tum engkim mai chu zep awm hauh lovin ka sawi tlang vek a, ka nu erawhin zin lo mai turin min ti thung a, a chhan pawh tawhsual ka tawh palh a hlauh vang a ni.

Ka pu chuan kei min biak mai bakah Zualbawihi pawh zawhna a zàwt leh khauh ṭhin a, Zualbawihi pa leh a ṭhuihhruaite va man nghal pawp chu ka tum ber pawh a ni chuang lo, va thlithlai hmâsak deuh phawt ka tum a ni mah zàwk!

Tin, dan phal loh thil zawrh leh làk luh an hrat tih ka hria a, chutianga an lo inhnamhnawih tel ve a nih ngat phei chuan Zualbawihi thah an tumna case nen case dang awrh belhtîr tur a awm thei dâwn a, chu tak chu man theihna chance ṭha tak niin ka hria.

Mut hmun thlengin ka ngaihtuah zui rauh rauh a, eng nge ka chungah thleng dâwn ka hre hauh lo nà chu Siaha lama mi hrawl tam tak te pawh sawn dan lova thil tih ruk an nei nualin ka hria a, chungte pawh chu chhui chian ka duh deuh deuh a, chutih rual chuan a namai dâwn lo tih ka chiang viau bawk.

A thu hrimin Myanmar lam aṭanga Mizoram lo lut te hi hmun hrang hrangah an vak kual a, awm lohna hmun tak pawh hi an nei mang tawh lo. Burma han tih tawh hi chuan Champhai nen an lo inhnaih bawk nen Champhai velah an awm tam ber duh hmél a, mahse a lo ni chuang hauh lo.

Chhim chhak lam Siahaah pawh sumdawng an lo kat nuk tawh a ni àwm a, a sawi uar deuh phei chuan sum hmuhna hnâr ṭha tak an nei te an ti lehnghal a, an sum peipun dan hrim hrim saw felhlel riaua hriatna ka ngah a, mahse kan bial a nih miau loh avangin keini pawngpaw chhui ngawt theih pawh va ni suh!

"U Vincent.......?" ka room kawngka inkik thawm ka hriat hnu lawkah Zualbawihi aw ngei ka hre zui zat a, ka mu lâi chu ka inperh tho vat nghe nghe!

"Eng nge ni ta?" kawngka ka va hawnsak rual chuan ka ti sup a, mang ṭha lo a mang leh tawh a ni ngei ang.

"Ih.....eng lo.....rawn kaih thawh che chu ka inthlahrung lutuk, mahse thil sawipui duh che ka nei a....." a rawn ti thawp raih a, a hmêl aṭang ringawt pawh chuan a inthlahrunzia ka hmuh hmaih lo chiang hle.

"Lo lut rawh, ka la muhil hleinem" tih leh din sawn ka rual a, ka room-a lut turin ka thlek khum zauh a, ani pawh chu a rawn lut ve nghal mai bawk.

"Eng lam nge?" kawngka ka khar fel hnu chuan ka ti thum dap a, kut insualtîr neuh neuh pah hian min rawn en a, hlauh a nei ni maiin ka hria.

"Kal suh.....khawngaihin kal suh....." tiin bul a rawn ṭan thawr a, ka hrethiam lawk lo nghe nghe!

"Kan khuaa zin i tum kha ṭhulh leh rawh, khawngaihin kal suh, eng nge ka tih ang? I duh duh sawi rawh, i kal lohna tur a nih phawt chuan eng pawh ka ti ang" a rawn ti zui ta mawlh mawlh a, hlauthawng hmêl a la pu reng bawk.

"I rilru ka hria alawm, police ka ni a, i pate chuan chuti ngawtin min that lo ang" ka ti dap dap zo chiah chu

"Chutiang lam a ni lo u Vincent, khawngaihin ṭhulh hram teh! Hetia buaina leh harsatna táwk miah lova awm hi nuam ka ti a, in bulah hian hlauthawng lo leh thlamuang takin ka awm thei a ni tih min hriatthiamsak hram rawh" a rawn ti halh halh a, chutah amah bawk chuan

"He hmunah hi chuan ka him a, ka hlim bawk asin! Ka pate lam rèng ngaihtuah chhuah ka duh tawh lo, chuvangin kal lo hram rawh, ka pate man i tum a nih chuan keimah mai bakah nu Beki te, pa Mawia te, ka pu leh nangmah chen hian a lèt in tuar dâwn tih ka chiang a, chu chu ka phal lo, ka duh lo, ka pate lam hrim hrim chu chhui zui lo hram rawh, khawngaih takin u Vincent" a rawn ti leh ta ṭiau a, lungngàih hmêl tak hian min melh chho ral a, a hmêl mawlh chuan ka awm a ti nuam thei bîk der lo.

"Zualbawih....." ka ti hman dek dek chu ka kut rawn chelh chawt pah hian

"Khawngaih takin.....keimah avanga in tawrh ka duh lo, chu chu min hriatthiamsak hram rawh, ka duh lo hulhûal! Ka pate i chhui dâwn lo a nih phawt chuan khawiah mah tlan bo ka tum lo ang, hetah hian in phal chen chen ka awm mai ang" a rawn ti leh hlawp hlawp a, ka kuah ta tawp ringawt!

"Tunah rih chuan i duh ang chhànna ka pe thei rih lo che" ti dam thluamin ka kuah nghet zual sauh a, keimahah chuan eng emaw tak danglam a awm a, ka nuam suai suai ni mai te'n ka hria.

"Khawngaih takin u Vincent, ka ngenna che ang hian awm la, kan khuaah zin lo hram rawh" ṭap aw zet hian a rawn ti leh a, min kuah nghet ve viau bawk.

"Eng pawh ni se, lo hlauthawng lo phawt la, engkim a ṭha vek dâwn tih hria la ka duh, a ṭha em?" ti thum chhalin ka inla hrang deuh hlek a, a hmêl, mittui nena inchiahpiah hluam chu ngunthluk fê hian ka en a, keimaha thil dik lo inmung ṭuah ṭuah chu ka thunun zo lo mai ang tih mawlh ka hlau!

"Va mu tawh rawh le, hlauthawng miah lo bawk la" awkâ dam ang reng tak hian ka ti leh sup a, ani pawh chu bu nghatin a inla hrang zui nghal a, a hmai tuai deuh puat pah hian ka room aṭang chuan a chhuak ta nal nal bawk.

Mut theih tawh loh sa nàk alâiin ṭap chung meuha Zualbawihi min ngenna chuan ka mut a tichhuak lo lehzual a, ka ngaihtuah zui reng a, kawng lehlam zâwng tak chuan a sawi dik lo chuang miah lo.

Thla 1 chuang kan hnenah a awm tawh a, a hlauh ber a pa leh a ṭhuihhruaite'n thawm engmah an la rawn nei lo tluang zel a, chu chuan a nun a tihahdam te pawh ti ila a sualna a awm lovin ka hria.

Ni e, a sawi dik alawm, hai rual lovin kan bulah hian a thla a muang a ni.

Keini tak paw'n kan ngaina hlawm em em a, a mizia ni se a dam raih reuh bawk si, harh zawk zawk ni si lo hian a nun a nêm diai reuh a, ṭawng duh lo leh ngâwichawi tak pawh a ni chuang lo, ka sawi thiam chiah lo, a ngainat awm táwk chiah ti ila a sual tam lo ber ang.

Zîng lam tawhah ka mut a rawn chhuak hnuhnawh ve leh ta chauh a, tun hnai chu ka mut ṭhat loh mai bakah ngaihtuahna sêngin hun ka khawh ral hnem ṭhin hle a, mahse ka tih loh dan pawh a ni lutuk chuang lo, buai châng hi chuan han buai mawp mawp ila, reh hun a awm ve leh zel tho.

Ka thawh tirh phat aṭangin Zualbawihi min ngenna mawlh chuan ka thluak chhûng a luah ngut ngut a, nilêng leh zankhuain ka rilruah a châm reng a, ka chhûngte erawh engmah ka hrilh rih lo thung a, Zualbawihi min ngenna chu sawi chhuak ila chuan ka nu'n a lo thlawp nghal dâwn tih ka hre chiang viau bawk.

Rilru kaptu nei reng chungin hun leh nî ka hmang ral a, kâr thar kan hnaih telh telh a, ka thluak a fîm thei lo telh telh a, ka pian a hnu lamah chutiang em ema ngaihtuahna ka sèn rei chu a la awm kher lo hial ang.

Inkhawm lâi chenin Zualbawihi chungchâng ngawt lo chu rilruah eng dang rèng a lut hlei thei meuh lo va, ngaihtuah fel fai vek hnua thutlukna siam mi ka nih teh vei nen tun ṭum zet zawng thutlukna ka siam fum fe thei lo a chha chu a ni e.

Thawhṭanni zîng a lo inher chhuak a, zîng kâr aṭangin namên lova tam ruah a sûr buan buan a, exer là turin tho hmâ teh mah ila pâwn chhuahna chì a ni awzâwng lo va, ka tih tur hre lo chu sitting room-ah ṭhuin phone ka khawih vel ta mai mai a, mi dang erawh tûmah an la rawn tho lo thung.

Ka ṭhutna aṭanga tho deuh nulh hian tui in turin filter lam ka pan a, tukin chu thawmhnaw ka inbel thlawn chiang kher mai. Chutia tui ka in khawlh khawlh lâi tak chuan thawm a rawn awm a, Zualbawihi zîng tho rawn chhuk thla chu ni rengin, mahse amah zàwk chuan min lo hmu ve reng reng lo chu niin!

"Awi.....!!!" phu zawk hian min hmuh rual chuan a ti hluai a, a âwm a dawm nghal vat a, min hmu miah lo chu mak ka ti kher mai.

"I va'n tho hmâ em em?" amah bawk chuan a rawn ti leh a, zep nei miah lova a rilru a sawi chhuak phawng zel te hi amah tingainatawm zualtu a ni ka ti lo thei lo.

"Ka tho hmâ ziah alawm......" ka lo ti pangngai ve mai a, chutiang huna a rawn thawh chu ka ring lo hrim hrim bawk.

"Eng lo....." tiin a ngâwi leh daih a, thil hre chák tàwk vel chiaha mi siam pawh hi a thil thiam thar nge a tih dan ve hrim hrim pawh ka hre lo e a!

"Eng nge?" ka ti deuh nghut a, min rawn en zawk nghe nghe!

"Kan khuaa zin chu i la tum fan em ni?" a rawn ti muang ban chap a, a lo ngaihtuah zui ve reng ni tur a ni.

"Ka hre lo" ka ti hniam sup chu mi a rawn melh chho hâ a, eng a hria nge pawh ka leh pek lo.

"A awmzia chu zin i tum em em tawh lo tihna a ni em? A ni ti raw?" a rawn ti deuh zung zung a, ka nui chhuak huk teuh kher mai.

"Sawi chiang teh u Vincent" amah bawk chuan a rawn ti leh niah niah reuh a, insum buai vel tawh lovin ka ṭhen ta suk bawk.

"Ka lawm e aw, ka lawm tak zet" a rawn tih zawm leh mawlh mawlh a, hmêl hlim sânga min enna te chuan mi en nghal lutuk angah min chhuah mai dâwnin ka hria.

"Ka zin dâwn loh thu ka la sawi miah lo" ngeiawm rawngkâi, awmze nei tho sia ka tih chuan ka bân pûamah a rawn chum nghal taih a, min nêl ve tawh lutuk chu ka tân tak a nuam!

"I phakar, ni lo, i zin dâwn lo, ka hria che alawm, mi sual i ni lo va, kei leh i chhûngte tâna ṭha lo tur thil engmah thlentîr i duh dâwn lo tih pawh ka hre vek, chuvang alawm lawmthu ka hrilh nghal mawlh mawlh che nì" a rawn ti leh tan tan reuh a, zep thu a cheng lo, zîngkâr dangdai tak zawng a ni chiang e!

"I hriat lovin ka zin thut maithei asin" ka ti leh hram a, han fiam vel chu nuam ka ti tlat a tin a ni!

"Ka awih lo" lo ti nghal hliaiin

"Thingpui ka lûm dâwn asin, ka siam kep ang che aw?" a tih zawm zat a, kei pawh chuan

"Immm....." ka ti ve leh mai a, kan hun hman dun dan chu hun rei tak lo inhre tawh te pawh kan ang thawthangin ka hria.

"Exer a làk theih mang si lo va, tukin chu ka pu pawh mu hnem deuh mai rawh se" a rawn ti leh thliam thliam a, ka pu nen hi chuan a tir phat aṭang khan an inngaina tih ka hai lo hrim hrim!

"Engati nge ruah hi a sùr teh thut reng reng le, khaw vawh vawh nen" amah bawk chuan a rawn ti leh a, zawhna min zàwt pawh a ni chiah lo, amah leh amah a inbia a ni ber.

"Dekchia thingpui i siam luah ṭuma mi ang kha ka in leh chàk ngawt mai" ka ti zo chiah chu lungâwi lo tih hriat tak hian min rawn melh nghal râm reuh a, kei erawh ka nuih a za ru viau thung.

"I va'n nghal thiam tak, sawi chhuak tawh lo teh" haw tak tak ni si lo hian a rawn ti hlak hlak a, kei lah pek chuan

"Sawi chhuah a nuam ve alawm....." ka la ti zui ta zel a, mi a ner khum nasa sawng sawng khawp mai.

"Thingpui lúm bêl ka hmuh loh vang a nih kha aw, sawi tawh suh, a zahthlak!" ti zat zatin gas lam chu a hawi zui daih a, ka nui chhuak ta huk bawk.

"Min nuih suh" a rawn ti leh lek phei chu ka nuih a tiza ting a, min hmu miah lo nàin ka nui deuh sun sun reng a, ka lam a rawn hawi chinah erawh nuih ka insum hmak thung.

"Kha le....." tiin a thingpui siam chu min pe a, chhêm dai tê têin ka in ri zui hlup a, eng ka hria nge ni, fiam ka chák leh tlat tawh a nih chu!

"Thingpui hi a al....." ka ti deuh dut a, nâ em em si lo hian mi a rawn nghawk nghal zat a, a hmui a'n pet sawi vel te hlei hlei chu ka lawmah a tla ting ni maiin ka hria.

"Han mu leh rawh" ka tih chuan a lû a thing náng nàng a, thil dang daih ngaihtuah hmêl a pu tawh bawk.

"Ka mut a chhuak tawh lo, ei rawng ka bâwl nghal law law ang" a rawn tih chuan

"A la hmâ lutuk" ka lo ti deuh nghut a, kan mit chu a intawng nghal chat nghe nghe!

"Thil pakhat sawipui duh che ka la nei a....." a rawn ti zui daih a, eng lam nge ka ring thiam mai lo.

"Sawi la...." ka tih chuan

"In bula ka awm ve reng hi a rem ang maw?" a rawn ti zawi sap a, thingpui no dawm reng pah hian sitting room lam a melh ngawt ngawt a, a zawhna chu ka rin loh lam tak a ni.

"Rem e, a rem lohna tur a awm hleinem" pangngai tak hian ka ti sup a, chu chu ka ngaihdan dik tak a ni rèng bawk.

"Ka zawhna chhan che chu nuam ka ti chiah lo ṭhin a; in fel lo tihna lam ni lovin! Ka insawi khawngaihthlak angah min ngaihsak lo hram la, belh tur ka neih lohzia i hria tih ka hria, hetia in hnena ka khawsa thei ringawt te hi ka tân chuan vanram tluk zet a ni a, in zavai chunga ka lawm rual rual hian ka rilruah inthlahrunna chen a awm lo thei lo va, chuvangin ka...." a tih melh melh lâi chuan

"Zualbawih...." ka ti thum chhal a, ani pawh chu a ṭawng zawm lo chiang hle.

"I rilru tur chu ka hrethiam alawm, ka hnena i rilru dik tak i sawi ṭhin pawh hi ka lawm hle bawk. Chutih rual chuan min mi hrang en ang tih mawlh kan hlau tih hre reng la ka duh, keini chuan kan mi hrang en lo hrim hrim che" ka ti leh dap dap a, ka thusawi chu a hriatthiam ngei ka beisei.

"Chutak chu ka lawmna tizualtu a ni rèng asin, mi dang zawng aiin min hrethiam a, min ngaihtuah ṭhin a, i chungah hian ka lawm tak zet u Vincent" ka mitah tak en chung hian a rawn ti dat dat a, kan thil sawi lâiin a zir te pawh a ni mahnà, thingpui in nachâng ka hre lo mai dâwn alawm le!

Eng kan sawi zui tawh em em hran lo va, kan inbe leh zauh ṭhin tih loh chu a tua mah kan ṭawng tawh lo va, ruah ni se a la sûr ṭhahnem buan buan bawk si, inthlak turin ka room lamah ka chho ta nge nge a, rei awm lovin in hnuaiah ka chhuk thla leh thuai bawk.

Dârkâr a liam a, ruah erawhin sùr bàn zâi réng a rêl lo a ni ber a, Grace-i hnen aṭanga phone call ka dawng teh nawlh chu Lucy nau mah ni se mak ka ti ru hman viau a, mahse zirlâi lampang bawk a nih ringin call chu ka là a, chhun lama inhmuh a duh thu a rawn sawi chuan a chhan ka záwt a, mahse chuti maiin a sawi duh miah lo thung.

"Kan inhmuh hunah ka hrilh ang che" a tih deuh tlat avangin kei pawh chuan inhmuh chu ka rem ti ve mai a, ka inbiak zawh hnuah erawh ka ngaihtuah zui em em tawh hran lo.

Ka nu rawn tho chuan zin ka tum leh tum loh min zàwt nghal pang a, ka pa pawh rawn tho se chutiang tho chu min zawh ka ring. Zin ka ṭhulh thu ka hrilh chuan lungâwi tih hriat tak hian a bu nghat nghat a, choka lama che ri rak rak Zualbawihi tak pawh a lo thawk huai ka ring.

Tukṭhuan ei lâi chenin ruah chu a tla awl lo tluang zel a, nilêngin khua a chhe dâwn te pawh a ni ang. Tin, ruah sûr satliah a ni lo va, thli a tel deuh a, chu chuan pâwn chhuah a ti peihawm lo ru viau bawk.

Chaw ei kham hlimah Grace-i hnen aṭang bawk phone call ka dawng leh a, kan ina a rawn kal mêk thu a rawn sawi chuan pawi ka lo ti lo khawp a, kan pu bulah zin tur anga ka insawi làwk laklawh vek tawh avangin chutia Zualbawihi min ngenna avang liau liaua zin ka ṭhulh leh tâk si ah chuan inah awm hle hle mah ila pawi tihna ka nei lo.

Kâr lovah Grace-i chu a rawn thleng ta ngei a, ka nu leh pa chuan a lo be nghal a, Zualbawihi nen erawh inhmêlhriat vak lo tih takah an inbe lo hrim hrim thung.

Ka nu chuan engti tura lo kal nge a nih a záwt a, Grace-i paw'n zirlâi lam min zawh a duh avanga lo kal a nih thu a sawi ve mai a, ka rin táwk vel chiah a ni.

"U Vincent, i room-ah chho ila?" Grace-in a rawn tih chuan bu nghut pah hian Zualbawihi lam chu ka hawi zauh a, mak tih ruk hmèl tak hian min lo en tawn zak zak chu niin, ka en a ni tih a hriat chinah erawh a hawi sawn rang hle thung.

"U Vincent, zirlâi záwt tur chea lo kal ka ni lo" ka room kan luh rualin Grace-i chuan a rawn ti deuh tawl a, ka mitmeng a thutak nghal run nghe nghe!

"A nih chuan eng lam nge?" ka ti dap a, chuta a thu rawn sawi chuan min ṭhawng khawp mai.

"U Lucy-i lam a nia, ni lo, amah chiah a ni lo, nangmah nen záwk" tiin a bag chu a hawng a, thlalak eng emaw zah hi a rawn phawrh a, chutah ka thlalak deuh vek a la ni zui!

"U Lucy-i nen hian in inngaizawng em ni?" a rawn ti leh charh a, min en chìk viau bawk.

"Kan inngaizawngin i ring reng reng em?" tih leh thlalak chu en kual thliah thliah ka rual zui zat a, engtin Lucy-i chuan chutianga tam ka thlalak a lo kawl ka hre lo hrim hrim!

"Min chhâng ṭha hram teh u Vincent? Engtin nge u Lucy-i lukham hnuaiah heng i thlalak zozai hi a lo awm theih?" a rawn tih leh chuan

"Ka hre nàng" ka lo ti duh lek chauh a, dik tak chuan thil nih dan dik tak hrilh chu a ṭha ber rih lovin ka hria.

"In inkârah hian eng emaw tak chu a awm chiang ti raw?" ka en nghal zawk a, ani erawhin a thil en ngai a lo en ngawt ngawt thung.

"Awm lo" ka ti sup a, ka chhàn zawh rual rual chuan

"A nih si chuan engati nge u Lucy-in i thlalak a kawl ṭeuh? A chhan a awm chiang alawm, i sawi ṭha duh lo mai mai a ni" a rawn ti zui nghal mawlh mawlh a, min en ta ran bawk.

"Khawngaihin min hrilh hram teh u Vincent" a rawn tih leh chuan

"Sawi pawh ni ila i awih dâwn chuang em ni?" ka ti ve ta nge nge a, ka beisei loh deuh hian

"Ka awih ang" a lo ti thuai a, thu dik han hriattîr ngawt chu ka la hreh ru deuh fan a, mahse a hriat ngei ṭulin ka hre tawh thung.

"Eng dang vang a ni lo, i û hian min ngaizawng tlat alawm, kei erawhin ka û nupui a nihna bakin ka en lo, a táwk em?" ka ti ta nge nge a, a meng zuai nghal raih a, ka thusawi chuan a ṭhawng vak paw'n ka hre lo.

"Ka ring reng a ni! A diary bu kâwmah pawh i hming a inziak a, ka hmuh tirh phei chuan mak ka ti hman viau a, mahse engah mah ka ngâi zui lo va, a lukham hnuaia i thlalak tam tak ka hmuh chinah erawh rinhlelhna ka nei a, chu ka rinhlelh chu a lo dik ta rèng bawk a, engtin nge a theih záwk?" a ti zawi fiah halh halh a, a lungngâi hmêl chu ka hmuh kan lo chiang hle bawk.

"Nikum aṭang khan a inṭan tawh, ka sawi chhuak duh lo mai záwk a ni. I hre ta bawk a, lo hrilhfiah ang che; kei min ngaizawng tawh lo turin!" ka ti ve ta nghut nghut a, ani erawh a ngâwi reng tawh thung.

"I lo kal ta sa sa, hetah zanriah ei ve nghal la a ṭha ang" thlalak rem khawm mawlh mawlh pah chuan ka ti leh sup a, ka aw pawh a rik dan a dam ta deuh e!

"Ka haw leh nghal záwk mai ang" awki pangngai tak hian a rawn ti a, mahse amah a pangngai lo tih erawh ka hre chiang viau a ni.

"A nih chuan chhun thingpui tal in rawh, i lo kal khât si a, ka nute paw'n an sâwm ngei ang che, chawhnu lamah i haw law law záwk dâwn a nia...." ka ti deuh duah a, ani pawh chu a lo bu nghat nghat a, a bag-a thlalak ka khung mawlh mawlh lâi chuan

"Mi dangin an hre lo ti raw?" a rawn ti sap a, a zawhna awmzia chu ka hre chiang hle bawk.

"Nangmah a ni mai" tih bakin ka chhâng lo va, ka chhâng tawi tek tuk viau nà chu thil awmzia hrilh hranpa ngâiin ka hre tawh lo.

In hnuai lamah kan inzui thla a, kan thlen thlak ruala Zualbawihi min lo en dan bawk chuan ka mit a là leh tlat pek a, eng rilru pua mi rawn en leh zeuh zeuh ṭhin nge a nih phei chu ka hre chuang hauh lo va, ka ngaihbel ti dâwn ila ni chiahin ka hre bawk si lo, sawi duh nei hmêl a pu ni maiin ka hria.

Grace-i chu ka nu nen inkawmin an titi barh barh a, ka pu room-ah ka va lut zuaih tih loh chu kei pawh sitting room-ah ka awm ve reng a, Zualbawihi erawh choka lamah a che mial mial thung.

Kâr lovah chawhnu her a rawn ni thuai a, chawhmâ lam aiin ruah pawh a sur tlêm ta deuh a, Grace-i thlah pahin Zualbawihi ka chhuahpui a, ka nu'n kan dawra kalpui tura min tih vang a ni pakhat a, khua a chhe bawk nen veivah chhûng ringawt pawh a rei duh khawp mai.

Bike-in kan dawrah ka va kal hmâsa tê tê phawt a, chumi hnuah dawr aṭangin ka pa ken chhuah motor-in ka haw leh a, Grace-i thlah pahin Zualbawihi ka phur chhuak leh bawk a, kikawi kual ve tak chu a ni!

Kan dawr kan lut chu ka pa'n Zualbawihi a lo be nghal lûam a, a vawi khat kalna a ni bawk a, Zualbawihi chu a hawi kual nasa kher mai.

Ruah pawh a sûr hàn ve tial tial a, tlai dâr 3 vel thleng kan awm a, ka pa chuan motor-a haw záwk tura min tih avangin motor bawk chuan kan inphur haw leh a, in kawt kan thleng chiah tihah ruah a rawn sûr leh ta buan buan a, in kan hnaih tawh viau nà chu huh deuh hluamin in chhûng kan luh phah nghe nghe!

Thawm a lo reh diak a, ka nu leh ka pute chu an mahni room-ah an awm ve ve tih ka hrethiam nghal mai a, eng dang zawng aiin Zualbawihi mawlh chuan ka mit a là leh tlat tawh!

A sam huh hlap te, a hmêl fai leh vun nung sârh te, ruah tui avanga a kawr huhin a tihlansarh tâk em em a âwm bâwr te hlei hlei chuan ka mit a là zual a, ka awm dan chu a dik lo tih pawh ka hria, mahse a dik lo tih hre reng chungin chutiang rilru duhdak lo chu ka pu tlat lawi bawk si a ni.

"U Vincent.....?" thawk leh khata ka'n hnaih chilh rawk chu chiang zet hian min melh chho kiau a, chil lem dawk paha a hmui a ti che det te hlei hlei chuan ka insum theihna a vaw chhe riai riai ti ila a sual lo khawp ang.

"Eng nge tih i tum u Vincent?" a lam hnaih zâwnga ka kun thlak riai riai lâi chuan a rawn ti zawi fiah raih a, meng bial deuh kawk hian a ding er tan a, kan awmna hmun te chu ka theihnghilh hmin vek tawh a ni ber.

"U Vin....." a tih laklawh lâi chuan ka inthun theihna zawng zawng puak darhin a hmuiah tak ka fawp chawt a, fawp satliah mai lovin duhthaw zet hian ka fawp zui ta ngawng ngawng bawk.

End of chapter 5