𝐕𝐈𝐍𝐂𝐄𝐍𝐓 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟒)

VINCENT
(Mizo Romantic Novel)

By

Havali Adam

Chapter 4

Thil ri khep chuan min tiharh riai riai a, ka mit ka'n meng chu khua a lo éng iar tawh a, nî pawh a chhuak tawh nghe nghe a, ka taksa, ka âwm ngeia muhil bâm hmeichhia chu ka en deuh vung vung a, mak ka ti hman viau a, mahse nizana thil thleng kha ka hre chhuak nghal zut zut a, kan lo muhil tlang ve ve tih ka hrethiam nghal mai bawk.

Chutia ka'n harh ta chu thawm lo chhuahna lam ka hawi phei a, ka beisei loh lutukin ka pa'n min lo en reng chu niin, ka harh chiang lehzual sawt a, ka âwma muhil bâm Zualbawihi ngaihthah khawpa thawh nghal ka tum chu a kutin tho lo tur hian min rawn khap a, Zualbawihi nena kan awm dan chuan a lakah inthlahrunna namên loh min pe a ni ber.

A kal sawn hnu thleng pawh chuan ka mut réng a chhuak thei tawh der lo va, ka taksaa mu bei ran Zualbawihi lah a la muttui bawk si, tihharh ka hlau tho bawk si, ka awm dan chu a lai ru kher mai. Ka che deuh riai riai a, tihharh ka hlau viau náin a rawn harh ta tho va, kan awm dan a'n hre chiang chiah chu ani pawh inla hrang rang tak a ni.

"Ka tihpalh" thophang aw zet hian a rawn ti thuai a, inthiam loh tak tak hmêl hi a pû reuh leh ta nghal a, eng ka hria nge pawh ka hre bîk lo, ka mit chu ka là sawn lawk thei ta hauh lo mai.

"A zia lo hle mai, ka tihpalh, min hrethiam hram dâwn a nia......" a rawn ti leh zung zung a, a awm a nawm loh theih nân ka en rei mah mah tih ka hre chhuak zui zat nghe nghe!

"Engmah inthiam lohna tur i nei lo" ka tih chuan a kun deuh ngul a, mi pawh a en ṭha ngam lo hrim hrim a, taksa insi riala kan lo mu dun kha a zak hnuhnawh ni berin ka hria.

"Zualbawih....?" ti hniam supin a lamah ka pen phei a, a kut chu nghet zet hian a hum ruh ngar ngar a, ṭawng thlamuan a ngâi leh tawh tih ka hre chiang viau bawk.

"Engtik lâi paw'n min....." ka tih laklawh lâi chuan

"Aih......ih.....eng lo......ka sawi awmzia chu nizana mi ang kha thleng nawn tawh lo se ka duh, ka duh tawh lo, ka tibuai tawh lo ang che" a rawn tih zawm nghal sawk sawk a, ka laka a inthlahrung ta lutuk chu a dar tawn tawnah ka chelh phah nghe nghe!

"Thleng nawn leh mah se a pawina a awm reng reng lo, ka tân hian buaina i ni hek lo" ka ti dek dek chu

"Ni lo, ka tibuai tam tawh lutuk che" a rawn ti deuh tawn tawn a, inthlahrunnaa khat a hmêl chu hai theih pawh va ni suh!

"Enteh....." ka tih laklawh lâi bawk chuan amah záwk chu a rawn che thut a, room aṭanga chuan a chhuak ta nal nal a, ka nuih lah chu a za ru deuh tlat leh ta nghal a!

Ka room lamah pheiin ka inphih fai a, nizana kan awm dan kha ka ngaihtuah lèt pah reng a, kei tak pawh engtia muhil awlsam em em nge maw ka nih le, a ṭe thawm ka hriat hmâ zawng kha chuan ka harh kur kha a ni si a, ka hrethiam bîk lo kher mai.

Eng dang zawng aiin ka pa mawlh mai kha!

Ni e, ani khan Zualbawihi kuah run chunga ka mu kha min hmu vek a, insawifiah ka ngâi tih pawh ka hre chiang viau mai, mahse engtin nge ka insawifiah ang? Tin, ka insawifiahna a awih kher ang em?

Eng pawh ni se ka insawifiah ngei ngei a ngâi, chuti lo zawng Zualbawihi lakah rilru dang daih ka pu emaw a ti reu reu palh ang e! Kei lahin eng rilru mah ka pu der si lo, ka tân chuan ṭanpui ngâi hmeichhe satliah ve mai chauh a ni a, chu bak thil dang a awm lo hrim hrim!

In hnuai ka thleng thla chu Zualbawihi ka melh ru deuh a, mahse ka hmu mai lo va, choka lama ka nu che ri rak rak lam ka en pawh chuan a hmêl rèng hmuh tur a awm lo va, ka pa ni se mi a rawn en zauh zauh leh ta nghal a, ka awm dan a ti dik lo zual vek dâwnin ka hria.

"Nizan khan mang ṭha lo a mang leh alawm maw le" ka pa bulah chuan ka ti sup a, ani lah chuan

"Ka zawh àwm che ka va hre lo ve...." a lo ti daih a, ka ner khum deuh sawk a, za zet hian a rawn nui chhuak ta hawk hawk bawk.

"Zualbawihi i lo hmu em?" ka ti leh chu

"A rawn chhuk àwm rèng ka hre lo" a rawn ti heu mai.

"A lo chhuk daih tawh kha, i lo hmu miah na nge?" ka tih leh pawh chuan

"Ka hmu lo hrim hrim" a lo ti leh mai a, ka rilru a buai ru ta viau!

Pâwn lamah ka chhuak zui nghal a, kan in leh a chheh vel chu ka en kual thuak thuak a, khawiah nge a kal ka hre bawk si lo, tlan bo daih a lo tum ang tih mawlh ka hlau a, chuvanga zawng nghal chung chung pawh chu ka ni!

Kan in leh a kawtkai vela ka hmuh tâk loh avang chuan kawngpui lamah ka kal thauh thauh a, ka rin zawn pawp pawp a ni ber a, thui fê ka kal hnuah pawh ka la hmu mai lo cheu a, zep thu a cheng lo, ka rilru a hah ru tak zet!

Ka rilru thlakin in lamah ka haw thuai thuai a, kea zawn ai chuan bike talin zawng ila ka hmuh ran zàwk ka rin vang a ni pakhat a, kan in kawt ka thleng, motor bula Zualbawihi ngei mai ka'n hmu nawlh chu lawm pawh ka lawm lo, ka thin a rim hlur ringawt!

"Khawiah phiangsen nge i lo kal bo hman!?" ti deuh hrawk hian ka kuai her sawk a, a phu zawk nghe nghe!

"Sawi rawh! Engvangin nge engmah sawi lova i bîkbo!?" ka ti zui leh hluk a, keimahah chuan insum theihna rèng a awm tawh lo a ni ber.

"Pu Vincent......" ṭi dêk hian a rawn ti a, kei erawh ka thinrim a kal tluang laklawh tlat!

"Min 'pu' tei vet suh!" ka lo ti hlur a, a mitmengah chuan min hlau tih hai rual a ni lo.

"Lo kal teh!" ti lehin in chhûng lamah ka kai lut sawk sawk a, thinrim luatah engmah ka ngaihtuah chiang hman tawh lo ti ila a sual tam lo khawp ang.

"Pu Vincent.....a nâ a nia.....ka nâk a ná......!" a rawn tih pawh chuan dimna chhe tê mah ka nei eih lo va, ka pawt kal hmawk hmawk a, chutiang taka mi dang ngaihtuah avanga ka thin a rim hlur ta mai chu eng nge a chhan ber pawh ka hre hrep lo e!

"Awi, engati nge hlawk hlawk nge Vincent?" in chhûng kan luh rualin ka nu chuan a lo ti nghal a, tlêmin ka rilru pawh a zia ta deuh!

"Nâ i nei em ni Zualbawih? Awi, engati nge i nák kha!? Thisen a chhuak a nia, engtin nge i awm!?" tia ka nu a rawn ṭawng chhuak leh chiah chu ka lehhawi nghal vut a, ka thil hmuh chuan a denin min deng dawt dawt a ni ber.

"Engati nge?" ti thuaiin Zualbawihi chu ka pan hnai vat a, ka kut chuan a nák aṭanga thisen lo put chhuak cher cher chu ka hup rang hle bawk.

"Hrep tak hian!" ti leh hlukin thil thleng chu ka thiam loh vek a ni tih ka hre chhuak chawpchilh nghal a, Zualbawihi erawh nghet zeta maimitchhîng chungin a ṭhen deuh chai chai a, mawl ka intih hnuhnawhzia chu pui tak a ni!

"Engati nge? Eng nge thil awmzia hi?" ka pa chuan a rawn ti nghut a, Zualbawihi ni lovin keimah ngawt min en deuh run a, in chhûnga ka kaih luh sawk sawk lâi te kha a lo hmu vek ni ngei tur a ni.

"Vincent!?" nêm fahran lo hian a rawn ti nghet leh charh a, chhán ngaihna pawh ka hre lo.

"Nutei call vat rawh nu.....!" tiin ka nu záwk chu ka be ta daih a, ka pa lam chu ka hawi chho ngam tawh lo hrim hrim!

Ka nu pawh chuan ka sawi angin a call nghal sawk sawk a, Zualbawihi nák lah chu a nàt hmél ropui bawk si, chutiang em em chuan ka rilru chu a buai leh theih tawh pawh ka ring lo.

Inthiam lohnain ka khat a, sofa-a Zualbawihi ka mut zàngthal lâi te chuan hrehawm ka ti ru em em a, kâr lovah Nutei a rawn thleng hlauh záwk a, ni lo phei se chu ka buai zual khawp ang.

Nutei chuan a buaipui nghal zung zung a, nurse training mêk, chawlh avanga lo haw zuaih a ni bawk a, bawihsàwm dan a thiam zaih zaih bîk hle a, keini tân erawh tih theih a awm lo hrim hrim a, Zualbawihi nâ ti hmêl te hlei hlei chuan min run a, ka hmai ka tuai leh puat ṭhin a, ka ngaihtuah tawi luat avanga nâ a tuar chu ka inthiam lo tak zet a ni.

"A nàka hliam ṭhuina ṭhenkhat hi a peh a, civil-ah kal ula, ṭhui ṭhattîr leh law law ula a ṭha ang" Nutein a rawn tih chuan ka lo thaw chhuak ham ham a, ka mawl luat zâr zotu Zualbawihi chu ka khawngaih ngawih ngawih!

"A nih chuan kal vat ang u" tiin ka pa chu a rawn ṭawng chhuak a, kei pawh che chhuak ve nghalin Zualbawihi chu ka pawm thuai a, dim ang reng tak si hian pâwn lamah ka kal chhuahpui ta zung zung bawk.

Ka pa chuan motor a khalh a, kei leh Zualbawihi erawh a hnungah kan ṭhu thung a, ka la pawm reng a, ka laka thinrimna awkâ engmah a chhak chhuak lo hrim hrim te hlei hlei chuan ka awm a tinuam lo zual zàwk za mah a, ka pian tirh ata mawl ka la intih ber ṭum a ni hial ang.

Civil Hospital kan thleng te chu a rukin ka philî em em a, doctor te chuan an lo buaipui nghal zung zung a, rei erawh an buaipui lem lo va, a nák nâ lâi ṭhui ṭhat a nih hnu chuan in lamah kan haw leh nghal a, biak ka tum deuh uk ṭhin a, mahse a awm dan aṭang chuan ka biak a duh lo tih ka hrethiam vek a, chuvanga be lo ta char char pawh chu ka ni!

In kan thlen chuan ka nu'n a lo ngaihsak leh nghal viau a, ngaihsak reng pah chung hian in chhûnga ka kaih luh dan te kha a sawi chhuak ta hial a, min zilh deuh bawih bawih a, engmah sawi tur rèng ka hre lo, a chhan chu ka thiam loh a ni tlat a tin a ni!

Tin, ka pa paw'n sitting room lamah min titipui nghal a, titipui tih lemah, amah hlir a ṭawng a ni mah záwk! Kei chu ka ṭawng lo hrim hrim a, ka chet dan kha ka ngaihtuah lèt a, Zualbawihi lakah ka inthiam lo tulh tulh a, min hlauh phah sawt ang tih ka hlau ta viau bawk.

Muangchânga in chung lama a chho chu ka zui chho nghal a, biak erawh kan inbe leh tawh miah lo va, pangngai takin awm lui ngar ngar mah se a náka hliam awm sa, keimah avanga nàt belh leh chu a nâ ru hat hat dâwn tih ka chiang khawp mai.

"I ṭha em?" tiin ka û room-a kan awm dun hnu chuan ka be hmâsa ta nge nge a, ani pawh chuan awkâ dam diai hian

"Immm.....ṭha e, min ngaihtuah suh, ka ṭha tak tak a nia....." a rawn ti dat dat a, en erawh min en miah lo thung.

"Ka tihpalh....." ka ti thum chhal a, engtin nge kei ang mi chapo leh inla ngêng lutuk tak maiin chutianga awlsam chuan thuphâ ka châwi theih záwk pawh ka hre lo.

"Ka tihpalh tak zet" ka ti nawn leh sup a, nui lui sak chung hian

"Ka hria alawm, ka nâ tawh hleinem, a ho lutuk, inthiam lo duh suh" a rawn ti hniam fiah raih raih a, ka pan hnai deuh thut chu mak a tih hmél hle bawk.

"A thleng nawn tawh lo ang, ka tiam a che" ka ti dam dap a, tukverh lam hawi reng pah hian a lo bu nghauh nghauh a, ngâwi rengin ka chhuahsan ta daih a, amaha awmtîr rih ṭha záwka ka hriat vang a ni pakhat!

A nâk a nàt thu a sawi lawm láwm lâi te khan lo bengkhawn ila, ka thinrimna kha lo khap dai hman ila chuan eng buaina dang mah kan tawh belh hauh lo ang, mahse ka rilru chapo luatah Zualbawihin nàtna a tawrh belh a, keimah avangin a hliam dam ṭan tawh chu a zual leh phah a, ka laka eng vuivaina thu hla mah a nei lo te hlei hlei chuan ka rilru a tihrehawm ru zual tak zet a ni.

Nilêngin ka awm a nuam lo va, ka room-ah ka tawm deuh chawt a, ka nu nau fanu Nutei chu call-in a chawlh chhûng chu Zualbawihi enkawl turin ka ngen nghal nghe nghe a, tukinah pawh khan an inbuaipui tawh a, Zualbawihi paw'n a hlau miah lo a nih kha!

Amah thah tum tu nia a hriat te zîngah doctor leh nurse an tel ve miau avanga doctor leh nurse hrim hrim chu hlau em em kha a ni a, tukinah erawh kha chuan Nutei kha a hlau miah lo va, nurse thawmhnaw a hak loh vangte pawh a ni thei tho bawk.

Ka ngenna leh ka sâwmna chu Nutei chuan a lo hnial hran lo va, vawiin là lâ lá aṭanga rawn kal nghal turin ka ti nghe  nghe a, vêng khatah kan awm tho bawk a, lângin lo kal mai se a ṭha ang.

Ka pu enkawl tura rawih nghal ka tum viau nàin amah ka pu berin a duh leh tlat dâwn bawk si lo va, ni lo se chu ka pu tân pawh ka chhawr nghal ngei ang. Ka pa pawh hian ka pu tâna nurse chhawr hi chu a sawi ri fô tawh a, mahse tih ngaihna a la awm lo tluang zel chu a ni e.

Zan lamah chuan tlêmin ka rilru pawh a zàngkhai ta deuh a, mahse Zualbawihi lakah erawh ka la inthiam lo ru reng thung a, thil dang ngaihtuah tumin Siaha lama ka ṭhianpa, police officer chu ka be ta ngawt a, ka zin phei hnaih thu ka hrilh chuan a lo phur nghal viau a, kei erawhin ka phur nge phur lo pawh ka hre lo.

Zan ka mu te reng reng chu ka mu meng kar a, ka û room lam ka ngâichâng ru ran a, zankhuain Zualbawihi mangchhe nei thawm hriat tur a awm miah lo va, kawng lehlam zâwng tak chuan a lawmawm ang reng hle.

Zankhuaa muhil miah lo tih takah zîngah chuan ka tho hmâ viau a, exer ka làk tê tê hnuah ka pu exer ka làkpui leh thlap bawk a, Zualbawihi pawh beisei loh deuhin a rawn tho hmâ ang reng hle a, ka ngaihtuah ru viau ná chu ka ngaihsak a ni tih erawh lantîr ka tum rih lo thung.

Tukṭhuan ei lâi te chuan ka nu'n a be siam siam a, ani pawh a ṭawng duh ve sawt hle a, kan zîngah ka puin chaw a rawn ei phei peih ve teh mial bawk nen kan chaw ei chu kan phuisui sawta hriatna ka nei a, ka nu leh pa chuan Zualbawihi chu an be liam liam a, ka pu tak pawh a bang chuang lo.

Chaw kan ei kham deuh chiah tihah Nutei a rawn thleng a, a ṭawng nghal mawlh mawlh a, a rawn haw chhûnga inhlawhna tur ka lo siamsak chu a lawm rilru hlein ka hria.

A nihna takah chuan hlawh nei ang zawnga inchhawr chu a chhûngte'n ṭul an ti tehchiam lo va, mahse keima'n 'hlawh nei rawh se' ka tih deuh tlat avanga ka rilru hrethiam ve leh mai an ni a tih theih ang.

"Ih....eng lo....thil sawipui duh che ka nei a...?" Zualbawihi lam chu ka hawi rang vut vut hle a, chutianga mi a rawn biak hmâsak ka beisei miah lo bawk.

"Eng lam nge?" ka lo ti pangngai ve mai a, ani pawh chuan

"Eng lo....min enkawl tur hian mi chhawr lo la ka duh......" a rawn ti fiah raih a, ka bike sil lâi pawh ka tawp chat nghe nghe!

"Engati maw? I hlau leh tawh em ni?" amah melh chhuk deuh run chunga ka tih chuan

"Aih.....chutiang lam a ni lo, ka hlau lo hrim hrim, u Nutei te chu a fel lutuk alawm, chu ai chuan kei min buaipui avang hian thil a buaithlak mai mai, pawisa a hek mai bakah ka tân a nuam lo" a rawn ti zui nghal dat dat a, a thutak viau náin mi erawh a en ṭha ngam leh chuang der lo.

"I inthlahrung em ni?" ka ti zo chiah chu

"Dik tak chuan 'aw', ka tâna in chhûngkaw inpekna avang hian inthlahrun loh theih a ni hleinem" a rawn ti leh charh charh a, chutah amah bawk chuan

"Chu bakah ka ṭha tawh, ka dam tawh lutuk, min enkawltu tur chhawr ngâi khawpa dam lo ka ni tawh lo" a rawn tih zawm leh hliai a, ka hnena a rilru dik tak a sawi ngam chu ka lawm ru kher mai.

"A nih chuan tun kâr tal chu Nutei nen han inbuaipui phawt ula, kâr leh aṭangin chawl ta záwk mai se, ṭha mai lo'm ni?" ka ti thum deuh bul bul a, mi pawh en chuang lo hian a lo bu nghauh nghauh a, pangngai taka kan inbiak avanga ka awm nuam ta huai leh ka rilru puthmang danglam chak vut vut lutuk chu a awihawm loh hial zàwkin ka hria.

"Zualbawih.....?" tiin ngâwi renga kal sawn a tum chu ka ko ding chat a, min rawn melh zeuh a, zeuh tih takah min en chhûng chu rei lo tak a ni.

"Thil thleng avang khan ka tihpalh tak zet...." ti hniam supin thuphâ ka châwi nawn leh ta nge nge a, ka thusawi awmzia chu a hriatthiam ngei pawh ka ring.

"Inthiam lo duh suh, ka ṭha vek tawh alawm, i inthiam loh hian ka awm a nuam lo daih záwk...." a rawn ti sát sát reuh a, beisei loh deuhin min ṭhenkhum sak leh ta nghal a, chutah amah bawk chuan

"A nih.....ka lut aw.....?" a rawn ti leh sap a, kei pawh chu ka lo bu nghut a, engmah sawi belh tawh lovin in chhúng lam a pan ta nal nal bawk.

Ka rilru leh hun hman dan a pangngai chho tial tial a, mak tak maiin a tir ang em em  khan Zualbawihi lakah pawh inthiam lohna ka nei ngut ngut tawh lo va, ama'n lungni lo hmêl pu miah lova min biak hmâsak záwk vang leh inthiam lo lo tura min tih vang ni ta berin ka hria.

Zanah te chuan sitting room-ah TV en pahin kan ṭhu khawm ṭhap a, ka bul lawkah Zualbawihi a ṭhu a, ka nu leh pa an ṭhu dun bawk a, ka pu erawh a mu daih tawh thung a, TV kan en ka ti tak nà chu ka en mang lo a tih theih a, phone ka khawih mual mual a, mahse thil pawimawh a ni thung.

Chutia chhûngkim ṭhep ṭhawpa kan awm lâi chuan kan vêng nu pakhat a rawn tei lut hlawl a, eng dang ni lovin keimah min rawn hmu duh hi a lo ni a, kei pawh chuan ka lo chhawn a, an ina rukru ni ngeia an hriat a luh thu te, an pawisa leh in chhûngkhur bungrua a bo thute chu sawi zui nghal mawlh mawlhin thil thlen dan chu min hrilh vek a, ka tho nghal thuai bawk.

Police officer ni ve ta lem chu vêng chhûng mite hi chuan engtik hunah pawh min rawn pan pawp pawp ṭhin a, phurritah ka ngâi lo va, ka hna a nih miau avangin zanlâi, mî mut reh hun vek tawhah pawh ni se min mamawhtu an awm phawt chuan ka tho nghal tharh ṭhin; chu chu ka tih dan a ni!

"U Vincent.....!?" ka lehhawi záwk a, min kotu aw chu ka hre chiang viau nàin mak ka tihna erawh a bo der lo.

"Ih.....eng lo....." tiin a chawl deuh dat a, ka puihna mamawha lo kal kan vêngnu zui chhuak nghal ka nih avangin pâwn khaw vawt hnuaiah ka ding diam tawh a, Zualbawihi aw hre lo ila chuan ka kal liam vang vang tawh ngei ang.

"Fimkhur rawh aw.....?" hlauthawng hmêl tak hian a rawn ti sap a, ṭawng ring hran miah lo mah se ka bengah chuan a fiah lutuk tlat!

"Lut tawh rawh, a vawt si, ka lo lèt leh thuai ang" buk khum nghut pah hian ka ti hniam chhal a, ani pawh chu a lut ve nghal mai bawk.

Kan vêngnu te in lam pan chuan ka kal ta hmawk hmawk a, ka rilruah erawh rukru man leh zawn chhuah lam a awm em em paw'n ka hre tawh lo, Zualbawihi min kohna ri mawlh kha ka bengah a châm zui reng a, min 'pu' deuh tlat ṭhin kha tunah chuan min 'u' ta záwk a, eng pawh ni se, a ṭha lo lutuk chuang hleinem!

Chutih rual chuan engtia min koh nge ka duh pawh ka hre chuang hauh lo!

Kâr lovah kan tum ram pawh kan thleng thuai a, in chhûng kan han lut chu chhûngkawpa chuan min lo be nghal zung zung a, an gas bur la khat vek a bo tel thu te, rinhlelh neih tur àwm ang pawh an hriat loh thute chu min hrilh mawlh mawlh a, nupa reka khawsa an ni a, an chhûngte dam lo tlawha an chhuah hlanin an inah rukru a lo che ni ngei tur a ni.

An pa záwk bulah chuan vêng chhûng information mic aṭanga puantîr nghal turin thu ka rawn a, ani pawh chuan phone kaltlangin a hrilh nghal zung zung a, thil a nih tur ang a ni vek tawh a, kan hmâbak chu rukru chhui chhuah a ni a, kan chhui chhuah hmâin mi dang inah a che leh lo ang tih a sawi theih lo va, chuvanga information mic-a puantîr nghal thuai pawh chu ka ni!

Ka theih ang angin statement te ka là a, thil thlen lâia an awm miau loh avangin tih ngaihna erawh an hre bîk lo hle a, kei tak paw'n ka hre chuang lo.

An nupa hawtu leh hmu dik lo tu an neih leh neih lo te chu ka záwt lûam a, thil mak ve deuh pakhat chu, rukruk te, tualthah te pawh a ni ang, laina emaw hmêlhriat hnaite hi pawi khawihtu leh thil sual titu an ni duh cháwk a, mahse azawng aza erawh a ni chuang lo.

Ka tân pawh tih theih a tam lûa loh avangin haw rih mai chu ka rilruk ta a, ka haw dâwn chuan thlamuang taka awm tur leh chhui chhuahna kawnga theih tawp ka chhuaksak tur thuin ka thlah a, ka sawi ang ngeia awm chu ka tum nghet bur bawk.

Kan in lam pana ka haw tur, an in ka kal pel vel chiah ang tihah chuan an ṭhenawmte gate bula CCTV chu ka hmu hlawl a, ka mit a là nghal viau a, zah pawh dâwn lovin in neitute hmuh ka tum zui zat a, vêng khat tih takah in chhûng ka luh rual chuan mak ti hmêl an lo pu lo hrim hrim a, min lo be suam suam záwk a, ka beisei ruk angin thil awm thei se ka ti khawp mai.

CCTV en lawk ka duh thute chu ka sawi ta malh malh a, anni pawh chuan an lo phal khawp a, room hranah min hruai nghal a, information mic aṭangin thupuan an hre zo chiah bawk nen ka kal chhan chu hrilh hranpa pawh an ngâi tawh lo va, min lo hrethiam nghal viau nghe nghe!

CCTV record kan han enho ta chu ka duh ang ngeiin thil a awm a, record-a mipa pakhat gas pu lâi chuan engkim a tichiang viau a, mahse tu nge a nih erawh ka hre nghal thei mai lo thung a, second 5 vel lek pawh lan belh se chu ka hre thei maithei, mahse a inthup thiam êm a, zan a ni kher bawk nen hriat mai a har lam hret chu a ni.

Record aṭanga a lan dan chuan zan dâr 8 bâwr vela thil thleng a ni a, in neitute chhuah lâi tak a lo ni kher bawk nen an chhuak dâwn tih a hre láwk emaw ni ka ti hial a, in chhûngah chuan awm pawh ka awm rei lo, zanin là lâ láa a theih chin chin chhui zui ka tum ta záwk a, ka man chhuak lo a nih leh naktuk lamah a ni tawh mai.

In aṭang chuan chhuakin rukru kalna lamah ka kal nghal thauh thauh a, kawngkama lo awm te chu gas pu, pa tê lampang an hmuh leh hmuh loh ka zàwt zel bawk a, mahse ka thil tih chuan nghawng a nei thui lo lem lo khawp mai.

Ka zawn chhunzawm zel a, ka hmuh apiangte hnenah zawhna ka zàwt awl lo va, dawrah chenin ka lut kawi deuh chhen a, khua a vawt viau e ti lo chuan ka kal nasa bawk nen ka thlan a chhuak titih ta hial a, chhui zui vak dan a awm rih loh êm avangin haw mai chu ka rilruk deuh a, nuam erawh ka ti fahran lo hle.

Kawngpui dung ka thleng chu chhak lama coffee dawrah ka chawl kawi zeuh a, dawr nghaktunu paw'n min lo be siam siam a, rei erawh ka ṭhu khawtawi tawh lo va, dâr 10 a ri hnai ta thuak bawk nen haw zâi ka rêl zui titih nghal a, chutia mahni chauha ka kal lâi chuan ka dar chen vel tlangval pakhat hi ka táwk a, kan inkal pel mai a, chik pawh ka chik hran lo, mahse a kawr rawng chu ka mitthlà lèt a, rinhlelhna ka nei ta tlat mai.

Ka lehhawi thuai a, thawm dim tak si hian ka zui ru a, a kal dan te reng reng chu ka ringhlel zual a, a kawr rawng pawh tih tawh nàk alaiin a taksa ruangâm chen chuan ka ringhlel tulh tulh a, ka sa chan a rawn chhuak tluk zetah ka ngâi nghet hmiah tawh bawk.

"Lo ding lawk teh" a kal thui tak tak hmá chuan ka ti ta nge nge a, min rawn en chiah chu a mitmengah hlauhthawnna ka hmu nghal a, chungte hlei hlei chuan ka rinna a tinghet zual ting a, ka hnaih nghal rawk rawk nghe nghe!

"Khawi vêng......" ka ti dek dek chu che deuh thutin a tlanchhe nghal vawn vawn a, kei pawh chuan ka um zui nghal thuai a, kan inpa len hleih bawk nen ka um pha thuai a, a nghawng hnung lamah ka rek deuh chawt a, ka thinrim tirim zual zawngin a awm ang tih ka hlauhpui kher mai.

"Engvanga tlanchhia nge i nih!?" ka ti hrawk a, kan thawmah mi ṭhenkhatah an rawn chhuak sap sap a, ka mi man ber lah chu a rak chiam leh ta nghal a, Mizo a ni paw'n ka hre lo.

"Che miah suh ang che!" ti vin leh hlukin a kekawr leh kawr chu ka dap rawk rawk a, ka rin tàwk chiah a ni.

A kekawrah chuan rubber sena ṭawn 500 note hlir hi a lo awm nual a, tal chhuah tumin ṭang ve fan fan mah se ka man bet nghet êm a, ani tân zawng tal chhuah ngaihna a awm lo.

Amaherawhchu, ka lo ngaihtuah thui lo deuh nge ni, a kut awl lam chuan lung a là rawk a, min rawn chhu ta pawp mai. Nâ tak han tih tur chu ni lo mah se ka lu erawh a hai ve chhap a, keia thinrim insum thei tawh lo chuan let hnawk khawpa chiang hian ka hnek thal tawp a, mi dangho pawh an rawn tlan khawm rang kher mai.

A ṭhenin min buaipui lâiin ṭhenkhat erawh chuan rukrupa chu an hual deuh ṭhap hlawm a, an sawi dan chuan kan vêng chhûnga mi ngei, Kâwlho puan tah ṭhin te bula khawsa hi a lo ni a, ṭawngkam mai duh tàwk lova kut thawh châk tlangval an rawn pung khawm hnem ta bawk nen boruak khap daitu ah ka ṭang lo thei lo a ni ber.

"Duh táwk teh u khai, dawp ngâi lovin thil nih dan a chiang vek tawh tho bawk a, haw darh záwk tawh teh u, ka lo buaipui chhunzawm ang e" ka ti dap dap a, a tam záwk chu an kal darh zui nghal mai a, pa ṭhenkhat erawh an la chambâng thung.

"Engvanga thil ru nge i nih?" ka tih chuan ṭah chhuak hmèl zet hian min en a, min chhân loh chu thuhran ni se, a awm danah Mizo ṭawng a hrethiam em em lo tih a hriat viau mai.

"Man nghal hmak rawh Vincent, khatiang Mizo pawh ni lo lehnghal, hnam dangte suah sual zâr hi kan zo ngun tawh lutuk, jail-ah tâng ngei ngei rawh se!" pa pakhat chuan a rawn ti chhur chhur a, kan rukrupa chu rawn ṭawng chhuak ve nghalin 'jail' tih bak a thusawi hriatthiam mang ka nei hauh lo leh ta nghal a, ṭhingṭhi rawpin ka kut pahnih chu a chelh a, jail tân a hlau hle ni tur a ni.

Ka duh chuan station lam be pawpin ka naute ho ka ko nghal thei ngei a, mahse ka la be pawp lo tluang zel thung. Ka hmâa ṭhingṭhipa chu ka kai tho va, thil a rukna in lam panin ka kai thla deuh sawk sawk a, zep thu a cheng lo, a khawngaihthlak viau nàin lunga ka lû a chhu kher kha ka la thinrim ru deuh ṭun a ni ber.

Thil a rukna in chhûng ngeia ka'n luhpui chu chhûngkawpa a rawn ṭawng chhuak hmâsa ber a, an nu záwk pawh a ngâwi hle hle thei bîk chuang lo. 

Rukru ipté aṭang chuan pawisa zawng zawng chu ka là chhuak a, ka pe kir vek a, kan thawm chu mi dangin an lo hre chak viau a, pun pawh an rawn pung chak khawp mai.

"Awi, khu lâi Kâwl puan tah ho bula rawn awm thar pa kha a nih hî......." ti táwk an kat nuk a, ka lo hre ve reng reng lo chu niin!

Chutia a thil ruk engkim, gas bûr nen lam dah kir leh a nih hnu chuan station lam ka be pawp ta nge nge a, khawmuang lo fê hian an rawn thleng thuai a, ka naute'n an hruai dáwn lâi te chuan a ṭap hial a, kan vênga mi Kâwlho paw'n thil thleng mêk chu an rawn hre thuai a, ka beisei loh deuhin an zînga pakhat thinrim chuan kut a thlak sawk sawk a, dang vat lo phei ila chu an that duh hial ang ka ring.

"Kal tawh r'u....." ka tih tâkah chuan ka naute ho chu handcuff nen rukru hruaiin an kal liam zui nghal nal nal a, vêng chhûng mite chuan min fak liam liam hlawm a, rei awm tawh lovin ka haw ta vang vang bawk.

In ka thleng chu thawm a lo reh diak tawh a, sitting room-ah pawh ka nu bak hmuh tur a awm tawh lo nghe nghe a, dâr 11:30 a ri thuak tawh bawk nen mi dang tân paw'n mut loh a hun tawh lovin ka hria.

Ka nu bulah chuan thil thlen dan ka sawi thuak thuak a, naktuk lamah kimchang záwka hrilh ṭhat ka duh vang a ni pakhat a, kei ber ka haw ta chu kawngkapui kalhin an room lamah a lut zui nghal nal nal bawk.

In chungah ka chho ve nghal a, ka room-ah ni lovin ka û room-ah ka lut kawi hmâsa záwk a, tukverh bula lo ding reng Zualbawihi ka hmu chiah chu mak ka ti ru viau a, tui taka a mut siai siai ka rin tehlûl nen a lo la meng reng chu niin!

"I la mu na nge?" ka aw a hriat rual chuan a phu zawk a, ka lam a rawn hawi rang hle bawk.

"Immm....." tih bakin min chhâng lo va, eng a hria nge pawh ka hre lo, ṭum dang ang lo takin min en rei ngam ngàng mai, mahse ka mitah a ni lo thung.

"Engati nge i bek kha.....?" amah bawk chuan a rawn ti leh a, a thu rawn sawi chu ka rin loh lam tak a ni.

"Engtin nge a awm?" ka ti ve tak nà chu ka hre ru reng a, ka khawih deuh nuap nuap a, ka lû aṭanga thisen rawn lûang thla, ro tawh si niin ka hria.

Ka nu bulah kha chuan a hmuh loh nân a lam ka hawi duh miah lo kha a ni a, mahse Zualbawihi erawhin a lo hmuh hmaih lo chiang viau thung si!

"Thisen a ni em?" ka hmâah tak a rawn ding tawh a, ka bek chu a thlek deuh hâ a, a zawhna pawh chhâng lawk lovin ka kiai suk a, ama táwkah min lo ngaihtuah ve hle a nih hmêl!

"A ni ti raw....?" mitmeng fiah kala a rawn tih leh chuan

"Engmah a ni lo" ka lo ti sam mai a, ani erawh a hlauhthawn hmèl ta hle thung a, a awm dan chuan min tihrilhhai ru lek lek bawk.

"I la mu dâwn lo em ni?" ka ti hniam leh sup a, ka ṭawng ring hran lo hle.

"Ka mut a chhuak lo" ti zawi datin ngâwi reng hian a kal sawn daih a, bathroom-ah a va lut ri rak rak a, tui nen a rawn inkeng chhuak leh thuai a, a chet dan vel chu ka lo thlir deuh tlawk tlawk ringawt!

"Ka lo en chhin dâwn em ni ang? Pawi i tih loh chuan......?" a rawn ti dam diai reuh a, kei pawh chuan

"Ti lo ve...." tih leh khuma ṭhut ka rual a, thawk leh khata a awm dan danglam thut chu hratthiam har ka ti ru khawp mai.

"A va'n nàt hmél ve.....?" pawnchhiaa ka lû a hruk dep dep lâi chuan a rawn ti chhuak sap a, kan hun hman dun mêk dan chu ka beisei loh lam tak a ni a, mahse nuam erawh ka ti ru phian thung.

"A nâ hran lo....." ka lo ti ve leh mai a, rei min buaipui lem lo va, ka bek vela thisen kâi chu a hru fai vek a, ka lûa hliam chenin a en uluk hle a, kan inbe zui tam lo khawp mai.

Min buaipui zawh hnu chuan ngâwi reng hian bathroom lamah a phei leh a, a che ri sat sat reuh a, keiin a che vel chu ka lo thlir reng thung a, bathroom aṭanga a rawn chhuah hnu chuan room chhuahsana mu tawh tura mangṭha mai ka tum ta a, a awm dan chu ka chik ru leh ṭhin a, kei min ngaihtuah avangin a lo la meng ve hram hram ni maiin ka hria a, mahse ka hre sual ve thei tho bawk.

"Muttui le....." tiin room aṭanga ka chhuak tur chu min thlah thlap a, kei pawh chuan

"Muttui...." ka ti pangngai ve nghal mai a, ka room ka lut chu intleuh thuak thuakin ka mu zui zat a, mahse ka mut erawh a chhuak lem lo khawp mai.

Zualbawihi ka ngaihtuah chu thuhran ni se, hmâ ka làk dan tur ngaihtuahin hun tam ka sêng ral a ni hawt a, hun remchâng hmâsa bera Siaha zin ka tum bawk nen ka ngaihtuah làwk thui em em a, ka ṭhianpa sawi dan takah chuti mai chuan thil chhui a awlsam dâwn lo va, a hautak ru viau dâwn tih pawh ka hria, mahse ka rilru erawh sawhsawn emaw ka tih tur ṭhulh emaw ka tum chuang der lo.

Khaw vàr dâwn tawhah ka mut a rawn chhuak ṭan ve chauh a, ka lo muhil ta ngei chu niin, zîng ṭawngṭai inkhawm dâr riin min tiharh a, ka lû lah chu nizan lam ai khan a nâ daih záwk leh nghal a, chung vel avang chuan exer pawh làk ka tum ta lo law law mai.

Ka muhil ka han harh leh chu nî a lo chhuak diam tawh a, inphih faiin in hnuai lamah ka chhuk thla a, ka nu'n thingpui min lo siamsak nghal a, Zualbawihi pawh a lo che ve sat sat a, chutianga ngaihngam tih hriat taka kan zînga a khawsa chho ve ta chu rilruah engthawl huaina a rawn piang lo thei lo va, ka nu leh pate chu thuhran ni se, ka pu tak pawh hian a nêl dâwn riauin ka hria.

End of chapter 4