𝐕𝐈𝐍𝐂𝐄𝐍𝐓 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟏)

VINCENT

(Mizo Romantic Novel)

By

Havali Adam

Chapter 1

"Khatia khaw khawm a han nih tâkah kha chuan keini naupangho tân pawh hun râlmûang hnuaia lêng kan ni lo tih hriatthiam loh rûal a ni lo va, kan la naupang ang reng viau nà chu ka pa leh a ṭhiante'n changel zik no an seh sawk sawk lâi te kha mitthlâah a la châm reng mai" tiin ka pu chu a nui nghawr dat a, chutah amah bawk chuan

"Ka pa kha pa fing, khawtlângah pawh mî ráwn kâi pha chin ngat a ni ve a, kan khua aṭanga Shillong-a lehkha zu zir hmâsa ber a ni nghe nghe a, lehkhathiam a nihna khan zahawmna dinhmun chang turin a hlâng kâi te pawh ti ila a sualin ka ring lo. A sawi dan chuan Mizoramin rambuai a tawh pawh khan tharum thawh zâwngin a che tam meuh lo va, ṭhalâi tam tak te'n an hmuh dik loh phah hial rèng bawk a, mahse Zoram tâna tha thawh lo tawp erawh a ni bîk chuang lo" a rawn tih zawm leh dap dap a, hun liam tawh a ngaihtuah kir tih chu a hmêlah pawh a hriat khawp mai.

"Tharum thawh a thlawp lutuk loh chhan chu eng thil emaw ni tak a nih ngei ka ring" ka ti ve ta sup a, tum nei rana sawi ka ni nghe nghe!

"Ni ve bawk e, a nihna takah chuan District Council kan nih lâi aṭang daih tawh khan langsar si lovin buaina neuh neuh leh politics boruak thianghlim lo tak a inmung reng a, MNF Party-in India sawrkâr hnena thil phut an neih te a hlawhtlin tâk loh avang leh India sawrkâr min enkawl dana duhkhawp lohna a tam êm avangin rambuai pawh kha chhuak a ni ber àwm e" a thil en ngai en reng chunga a rawn tih leh tâkah chuan thil thlen dan tur àwm ang a hriatthiam theih nghal kuarh mai.

"Tharum leh chet làk pawh keimahni lam aṭanga chhuak hmâsa záwk a nih thu ka pa khan min hrilh ṭhin nghe nghe a, Mizote rilru sukthlek aṭanga thlir chuan thil ni thei tak niin ka hria" ka pu chu ka en deuh vung vung a, hmun dang pawh hawi sawn lêk lova a inngaihtuah ding hmèl danah hun liam tawh a dâwn kir a ni tih chu hai rual a ni mawlh lo.

"Mu hahdam tawh záwk la a ṭha ang ka pu, nî dangah kan la titi dun leh záwk dâwn a nia, damdawi i ei tawh em?" ka ti ta dut dut a, kum lamah an lo upa ve tawh bawk nen tun lâi chu a taksa hrisel loh a rawn chhuak leh zauh ṭhin a, enkawl urhsun ngàih lâi tak pawh a ni.

"Ni e, ka chau hnai tlat mai, damdawi kha min han làk teh khai......" tar aw zet hian a rawn ti chûar chùar a, kei pawh chuan ka láksak ve nghal mai bawk.

"I pate chhuak kha an lo haw tawh em?" a lukham ka siam ṭhatsak lâi chuan a rawn ti ṭial deuh charh a, damdawi ber a ei tawh tho bawk a, amah chauha kalsan pawh a ngamawm tawhin ka hria.

"La haw chiah lo, an lo haw mêk ang ka ring, a nih ka chhuahsan ang che aw....?" ka tih chuan thatho lo tih hriat tak hian a lo bu zeuh a, ka chhuahsan zui ta nal nal!

Filter-a tui chu thli chhuakin ka in ri khawlh khawlh a, chutia ka in lâi tak chuan ka pate pawh an rawn haw thleng ve chiah a, ka nu záwk chu ṭawng nghal siam siamin choka lamah a phei zui zat a, tlai chawhmeh tur siam belh a ngàih leh ngáih loh a va thlithlai dâwn tih hrilh hranpa ka ngâi lo hle.

"Patea chu a ṭha zel maw?" tiin ka pa chu ka be sup a, patea kan tura chhuak kha an ni a, chanchin engmah han zawh loh tawp ka tum lo hrim hrim!

"A lo zia viau e, mahse a dam chian hunah zû bawk a bel leh ang tih erawh a hlauhawm khawp mai" ka pa chuan a rawn ti dap dap a, kei pawh chu a ep chiahah ka ṭhu thla zui ve nghal mai bawk.

"I pu engtin nge a awm? A muhil em ni?" aw thian kharh paha a rawn tih chuan ka lo bu nghut a, en pawh ka en lem chuang lo.

"I pu pawh hian min kalsan mai ang tih chu a hlauhawm khawp mai, a taksa lah hi a chak tawh lo ang reng viau bawk si a, tunlâi chu mutmu pawh ka tuah ṭha thei meuh lo, zîng lamah ka mu ve thei chauh a ni ber e" ka pa ṭawng chu ngâithla reng chungin phone ka khawih mual mual a, chutah amah bawk chuan

"I û thihcham pawh naktuk mai a ni tawh a, i haw hmâ theih chuan lo haw hmâ la a ṭha ang" a rawn tih zawm leh zat a, kei pawh chu ka bu leh ta nghut nghut!

"U Vincent.......!?" beisei loh taka hmeichhe thlabâr aw ka'n hre thut chu ka hawi chhuak rang kher mai.

"U Vincent! Ih.....eng lo.....apa'n anu kut a thlak leh tawh a.....eng lo....." a rawn ti bah zui nawk nawk a, thil awm dan tur chu ka hrethiam nghal thuai bawk.

"Awi, a va'n zia lo ṭhin ve, Vincent.....kal vat ta che, Ngaihtei kha zu zui thla vat rawh" ka nu chuan a lo ti sawk sawk a, kei pawh chu che muangchâng lo tak ka ni!

Rei rial lovin Ngaihteite in chu kan thleng thla thuai a, in chhûng kan luh rual chuan bungbel lo tla hnawk nuaih te, ṭhutthleng lo inhung sawi nuaih te leh TV lo let rum te  chu ka hmu nghal zat a, ṭum dang ang bawkin chhûngkawpa ber zû rui sual chetna a ni tih ka hai lo chiang hle.

"Duh tàwk hram teh!" ṭap tih hriat taka pi Awmtei aw khur dat dat ka hriat rual chuan thawm lo chhuahna lamah ka phei nghal a, pindana ka va lut chu chhuatah pi Awmtei a lo let tûal a, chhûngkawpa ber pu Rochana erawh a lo la inhro nasa khur khur viau thung.

"He in aṭang hian i chhuak dâwn nge ka pet chhuak dâwn záwk che!? I duh thlang rawh!" pu Rochana chuan a ti chhur chhur a, zû rui tih takah a rim a tui lo khawp mai.

"Insum teh pu Ro, hetiang tur a ni ngai lo, ti rawh, pâwnah inbe teh ang" tiin pu Rochana dar chu ka va chelh thuai a, mahse awmzia a awm lo hle.

"Lo inrawlh suh! Mî chhûngkuaa i inrawlhna chhan tur pakhatmah a awm lo, thlawk bo vang vang rawh!" tia pi Awmtei han chhir zui leh mai a tum chu ka dang vat a, pâwn lamah ka kai chhuak titih nghal thuai bawk.

"Lo inrawlh buai suh ka ti a ni lo'm ni!? I va zak lo ve! In inah han haw chho rang rawh, chuti lo zawng ka kut i tûar palh hlauh ang e!" a ṭawngkam hrim hrim chu ngáihthlak a nuam lo vel vek a ni ber e.

"I nupui fanaute chunga kut i thawh reng hian buaina i insiam tih i hre lo em ni? Keini lama report a rawn luh vaih chuan dan ang takin ka man nghal thei che tih pawh vawi engzah fakau nge hrilh nawn i ngàih dâwn!?" ka ti vin fiah ve ta hluk hluk a, ani pawh chu a ngâwi chiang ngàng mai.

"Inngaihtuah chiang rawh pu Ro, ruih sual avanga nupui fanaute tihthlabàr reng ringawt hi thil dik niin i hria em? An hmangaih êm záwk che a, ni lo se chu kan department lamah FIR a rawn lut ang a, jail i tâng tawh ngei ang" ka tih zawm churh churh a, ka chhuk thlak tirha tharum thawh châknaa khat mitmeng pû kha tunah chuan a reh ta deuhin ka hria.

"Keimah ngei pawh hian ka duh chuan report ka siam thei reng, a chhan chu mita hmutu leh benga hretu ka ni a, i ruih apianga i chet ṭhin dan pawh ka hre chiang hle a ni tih i hai bîk ka ring lo. Chuvang chuan insiam ṭha thuai teh, i ruih loh chuan pa fel tak i ni, ka hria che, zû hi in tawh lo tawp mah la a pawina a awm reng reng lo" ka ti zui leh lûam a, police hna chelh lo ngat phei ila zawng ka ṭawng chu a ngàihthlak duh pawh ka ring lo.

"Kan lut dâwn em ni ang? I nupui leh i fanu bulah ngaihdam i dil ang a, anni chuan an hmangaih che a, an lo ngaidam leh vek mai ang che" kan ngàwih vung vung hnu chuan ka ti hniam sup a, ani pawh chu ngâwi reng hian a che zui ve mai bawk.

Chutia pu Rochana nen an in chhûnga kan luh leh hnu chuan boruak a dang hlawk a tih theih a, ṭhutthlengte chu ka siam ṭha zung zung a, Ngaihtei chuan bungbelho a lo rem fel ve mial mial bawk a, pi Awmtei erawh taksa nâ nei lo ang maiin savun ṭhutthlengah a lo ṭhu ngâwi reng thung a, pu Rochana tak pawh in chhûng kan luh aṭang khan a ṭawng leh tawh lo hrim hrim!

In chhûng hnawk zualpui ka tihfelpui thuak thuak hnu chuan pi Awmtei bulah ka ṭhu phei a, buaina inṭan chhoh dan chu ka zàwt zui nghal zat a, ani pawh chuan ṭha tak hian min hrilh ve mai bawk a, ka hmuh tirh ang lo takin hahdam huai hmèl a pû nghe nghe!

Police officer ka nih avang hian a pasalin min hlau tih a hai bîk lo va, ka bulah chuan thil thlen dan zawng zawng a sawi vek ngam a, ṭum dangah pawh a ni tho, Ngaihtei chenin, ka awm tawh chuan him sawtah an inngâi ṭhin.

Ka tân tak a lawmawm; eng he hu ni lo mah ila tute emaw tâna himna ka ni ve hrim hrim pawh chu thil lawmawm tak zawng a ni!

"U Vincent.......?" kan in lam pana ka kal hnuk hnuk chu ka lehhawi zawk a, Ngaihtei hmêl ka hmu nghal zat bawk.

"Kan lawm lutuk aw, awm lo la chuan ka pa a insum zo lo leh ngei àwm si a, kan lawm tak zet!" zângkhai vâh hian a rawn tih zawm sap sap a, inthup tum viau mah se a hmêlah chuan ṭap thei reng dinhmunah a ding tih a hriat hle.

"Eng êm a thleng tawh lo turah ngâi ang, buaina a awm leh a nih erawh chuan min rawn hrilh hreh lo ang che" ka ti thum deuh chhal a, min buk khum nghauh nghauh a, Pathiannî lehzelah pawh chutiang boruak an han tawng chu ka khawngaih ru khawp mai.

Kan in ka thlen chhoh hnu chuan ka pa'n chanchin min lo zàwt nghal a, ka nu pawh a bang chuang lo. Thil thlen dan chu pangngai tak hian ka sawi ve nghal mai a, zep thu a cheng lo, pi Awmteite nufain ka rilru ang chu pu se zawng pu Rochanan jail bang a zût tawh ngei ang.

Keini ṭhahnem ngàih avang leh khawngaih avanga report han file ngawt lah a nghawng zawng zawng nen lam ka hre vek bawk si a, duhthusam chuan pi Awmtei emaw a fanu Ngaihtein ka hnenah report rawn theh lut se, a bak zawng chu ka tân pawh hnathawh harsa a ni tawh hran lo.

"Ka lo chhuk ve ang chu ka ti deuh a, mahse a hmâ ang khan boruak ka tisosâng mai mai ang tih ka hlau hnuhnawh a, ka lo chhuk leh ta lo law law a ni" ka pa chuan a rawn ti hniam dap a, hun kal tawh ka hre chhuak zui zat nghe nghe!

Engtik tlai nge ka hre mai tawh lo, ṭum khat chu pu Rochanan a ruih sual avangin an in chhûng khurah buaina a siam chîam mai a, puitu tur zawngin Ngaihtein kan in a rawn thleng chho va, station aṭanga ka haw har nî tak a lo ni kher bawk nen dawr aṭanga ka pa in haw thleng deuh chiah chu Ngaihteite in lamah a chhuk thla nghal thuai a, mahse boruak a zu khapdai lo chiang hle thung.

Tlêma tlêmah patling pahnih an inkhuainuai lo chauh hi a lo ni a, in ka thlen rual rualin ka pa'n a lo sawi nghal a, ani buaipui aia ka buaipui a fuh záwk thu a sawi charh charh a, police officer ka lo ni kher bawk nen pu Rochana rilruah pawh ka pa âi chuan ka tla nâ záwk rèng a, tun thleng hian ka pa ni lovin keimah hlirin ka buaipui ta char char bawk.

"Ti teh u, zanriah i ei teh ang u, inkhawm kan tlai lutuk palh ang e" ka nu'n a rawn tih lang lang tâkah chuan choka lamah kan phei zui chu a ni nghal mai a, ka pu erawh a mut tui hun vel tak a nih avangin kan kai tho duh rih lo law law thung.

Zanriah kan ei lâi chuan ka nu a ṭawng melh melh a, ka pa nen an inbia a ni ber a, kei erawh ka pa'n ka hna lam chungchâng min záwt a nih loh chuan ka ṭawng lo tluk a ni.

Ka nu chuan Lucy-i hming a lam ri leh zauh ṭhin a, thil hriat chhuah ka nei zawk nghe nghe a, famta ka û nupui a nih avangin naktuk lama ka û thihcham kan hmanna turah pawh a hmêl kan hmuh ngei ka ring.

Zanriah kan ei kham aṭanga rei pawh ni lovah inkhawm dâr a rawn ri zui zat a, mipa tân insiam a harsa lo bawk nen ka nu chu insiam hmâsa záwk turin ka hrilh a, kei erawh kan eina hmun hmâ vel tifelin ka che zung zung a, thleng pawh ka sil zawm nghal mual mual a, mipa mah ni ila in chhûngkhur chet vel hi chu ka nu leh pa kaihhruaina hnuaiah ka ti ve nasa khawpin ka hria.

Kei ai mahin ka û khan a ti tam záwk ṭhin a, he khawvela a awm ve lâi kha chuan kawng engkimah min awl a, min kaihruai a, ka nu leh pate ai mahin ka mamawh leh ka duhzâwng a hre záwk a, ka pa phei chuan kawng engkimah a ring tawp a ni ber.

Amaherawhchu, kan chungah vanduainain ro a rêl ta hlauh a, khatiang khawpa mihring fel, zaidam leh inngâitlâwm si khan thihna a pumpelh thei bîk ngáng lo va, kei, a luhlul leh tihmawh záwk pawh nung dama ka la awm reng laia min liamsan hmâ bîk lutuk kha tun thleng hian ka lungngàihna kai thotu a la ni fàn a, chuti maia a reh pawh ka ring hek lo.

Ka û kha chu û azawnga û nih tlin ber a ni a, amah ang kha an awm leh theih tawh pawh ka ring lo. Unau mah ni ila ṭhian ang tak takin kan inkawm ṭhin a, a hmeichhe vei zâwng leh a nupui ni ta Lucy-i chanchin thlengin engkim a sawina ka ni ve a, chutiang bawk chuan ani pawh ka engkim sawina a ni.

Bachelor Degree neih tuma lehkha ka zir lâiin ani chuan sawrkâr hna ṭha tak a chelh daih tawh thung a, kum lamah kan inthlau viau pawh a ni hran lo, kum 4 bakin kan inthlau lo va, mahse amah puitling thlup chì a lo ni bawk nen kum upa lo takah sawrkâr hna sâng chelin a lang zahawm em em a, ka nu leh pate paw'n an chhûang ṭhin viau réng a, mahse nàtnain a tlâkbuak aṭang kha chuan a tua mah kan hlim thei tawh lo a nih kha!

Nàtna khirh tak avangin khawvel a chhuahsan a, amah hmangaiha ngâi em em tute min kalsan vang vang bawk a, doctor te meuh paw'n an chhan theih loh zanah phei kha chuan mu leh mal rèng ka hre lo va, Pathian ka dem a, engkimah ka mawhpuh a, ka û ai khan thi zâwk ila ka ti hial a, mahse chung lam rorelna erawh keini mihringte her danglam rûal a ni si lo.

Inkhawm tura kan insiam fel meuh chuan ka pu mu pawh a rawn harh ve ta nge nge a, inkhawm lova awmpui mai ka tum chu a phal tlat lo va, lehkhabu a chhiar deuh chawt a, upa tawh viau e ti lo chuan lehkhabu chhiar hi chu a la thlahthlam thei meuh lo zawng a ni e.

Amah berin awmpui a ngàih loh thu a sawi miau avangin kan inkhawmsan ta diak a, rilruah erawh a riak reng thung. Kan inkhawm chhûng zawng paw'n thil dang ka ngaihtuah em em lo, ka pu tih chauh lo chu!

Ka pu hi chu ka ngaina a, ani paw'n min duat hle tih ka hria. A thluak a ṭhat êm avang hian ka thil hriat duh tam tak pawh hi ka záwt fô va, ka pa ka hmu hniam phah sawt tihna pawh a ni chuang lo.

"Kan pastor chu a sawi ṭha piap piap hle mai" kan inkhawm bâng in chhûnga kan luh sang sang hnu chuan ka nu a rawn ṭawng chhuak hmâsa ber a, thlasik tih takah in chhûng mah ni se boruak chu a la hit deuh mem mem tho.

"Kei chu Bial Zâipâwl mawlh mai kha an thiam ka ti, pastor bial fan ni ziah se a ṭha ang" ka pa chuan a rawn tih zawm ve zat a, kei erawh ka lo ngâwi mai mai thung.

"Nang pawh Vincent, Pathiannî zan inkhawm bànah te chuan kohhran zâipâwlin hla an zir ṭhin a ni lo'm ni? I hman tho te chuan zir ve ṭhin mah la a pawi miah lo a nia, i hna lamin a zir loh chu thuhran ni se, KṬP ah hian inhmang tam ve deuh la ka duh ngawt mai" ka pa bawk chuan a rawn ti zui lûam a, han sawi mai tur pawh ka hre leh chuang lo.

"Anite zawng zâi chì a ni hleinem le" ka nu chuan a rawn ti thuai a, zâi mi ka nih lohzia hre chiangtu a ni bawk a, ka pa chu ka chhán a ngâi lo hrim hrim, ka nu'n min chhànsak thei lutuk tlat!

"Zâi mi a nih leh nih loh lam pawh a ni lo, kohhran zâipâwl an zai te hian hmuh tur awm ve se ka ti mai a nia, zâithiam leh zâi mi nih kher a ngâi lo hrim hrim bawk" ka pa thusawi chu ka ngaihtuah zui vung vung a, chutia ka ngàwih deuh run lâi chuan

"Police officer i nih avang hian inhmeh lo deuhah i ngâi tlata hriatna ka nei" a rawn tih zawm leh dap a, kei erawhin ka lû ka lo thing nak thung.

"Chutiang lam pawh a ni lo" tih bakin ka chhâng lo va, a ni lo réng bawk.

"Ngâwi teh u, ka pa hi a ril a ṭam tawh hrim hrim ang" tih leh ka nu chu ka pu room lam pan a rual zui thuai a, ka pu tak pawh thawm engmah a neih loh danah lehkhabu a chhiar leh emaw a ni ngei ang.

"Naktuk chu i rawn haw hmâ thei ang em?" ka pa'n a rawn tih chuan

"Thei turah ngâi ang, kan pu ka lo be dâwn a nia....." ka ti ve nghal mai a, han haw hmâ theih loh ngawtna chhan tur a awmin ka hre lo hrim hrim bawk.

"Tun hnai hi rukruk leh inthah a tam riauin ka hria, chanchin tharah te pawh hian an pûang reng mai a, police mah ni la fimkhur tluk a awm lo a nia, mî kut i tuar palh hlauh ang e" ka pa chuan a rawn ti leh dap dap a, kei erawh ka lo bu nghut nghut thung.

"A zawng zawng chu ni lo mah se, Mizo dik tak ni lo, Mizoram chhûnga awm te hian buaina an siam fôvin ka hria" a rawn tih leh chuan

"A dik alawm, Mizoram sawrkâr hian inrelbawlna ṭha, nghet leh changtlung záwk han nei thei ila chu a duhawm ngawt mai" ka lo ti ve sup a, ka ṭawng tam em em lo nàin ka pa bulah hi chuan ka titi tui ve viau ṭhin.

"Kan rama lo lut hnam dangte pawh hi chin táwk neia kan lo dawnsawn thiam a ngâi, chuti lo zawng nakinah keimahni tân vek buaina leh harsatna thlentu an la ni lo ang tih a sawi theih miah loh!" a rawn ti leh charh charh a, zanin chu min titipui duhzâwng a dang khawp mai.

"Ni e, rukru leh tualthah thubuai awrhtu tam záwk hi chu Mizo dik tak pawh ni lo an ni deuh fur hlawm a, fing taka hnam dang lo lut te lo dawnsawn hi kan tih ngei ngei tur záwk a ni" ka ti ve ta dut dut a, boruak a hit deuh chiai bawk nen inthlak pawh a peihawm lem loh hle.

"Vincent, i pu tiang kha lo là lawk teh" ka nu aw ka hriat rual chuan ka hawi phei zawk a, ka pu a rawn tho chhuak dâwn a ni ngei ang.

"A ngâi hran lo, ka kal thei alawm...." rei lovah ka pu hmêl kan hmu thuai a, mahse a tiang erawh ka làksak ta tho thung.

Ka nu chuan ka pu chaw tur a siamsak mial mial a, keini mipaho erawh sitting room-ah kan ṭhu ṭhap a, ka pu leh ka pa titina kârah chuan ka inrawlh ve leh zauh ṭhin a, ka pu'n zawhna min zawh leh nulh ṭhin vang a ni pakhat a, chuti ni lo se chu ka inrawlh tam ka ring hran lo.

Ka pu chuan ngaihnawm zet hian rambuai chanchin leh a nghawng tam tak a sawi kâi leh a, Vâi sipai hovin Mizo hmeichhiate an pâwngsual dan chenin a sawi a, keini a tak ngeia tawng pha lo tân chuan thu bengvarthlak a nih avangin uluk zet hian ka ngâithla ve ran a, ka nu'n a chaw ei tur a rawn dah pheisak chiah bawk nen chaw ei pahin a ṭawng tuam tuam a, ka pa tak pawh a ṭawng duh suam suam khawp mai.

An titi tui viau a ni ang, room-a ka luhsan hnu thleng paw'n an ṭawng thawm ka la hre pha reng a, an han nui dun leh hawk hawk ṭhin te chu thil ngàihthlak hrehawm a ni der bawk si lo, ka harh chian meuh chuan varṭian a lo ni diam tawh a, khum aṭangin ka tho zui nghal ta thuai bawk.

Thawmhnaw ka inbel mual mual a, zîng tin exer là ṭhin ka nih avangin zîng lamah hi chuan thawh ka hai mawh khawp a, thawh ka hai ve chhunah pawh ka tho hmâ viau zel tho.

Exer là tura ka insiam zawh hnu chuan thawm dim takin kawngkapui ka hawng ri rak a, thlasik tih takah pâwn boruak ka'n hip chiah chuan vawt har har tak a ni.

Amaherawhchu, exer lák loh phah nân ka hmang lo hrim hrim a, police hna ka chelh aṭang kha chuan taksa hrisel leh fit veh vawh tak nih ka tum ruh reng a, tun thleng pawh hian ka rilru a la danglam lo hrim hrim!

Tin, ka ngaihdan chuan police chu mi dangte aia zuanzàng záwk, ngaihtuahna pawh hmang thiam záwk leh thil dik tak ti duh mi ni turah ka ngâi hmiah a, mi pangngaite ang ngawta dul kiar pung pung turah ka ruat lo bur bawk.

Kan hnathawhin a zir emaw, zir lo emaw pawh ni se, a tua te mai pawh hian taksa hi kan enkawl uluk tur a ni a, kan thil ei nen lam hian chin táwk nei leh taksa tâna hrisel táwk chiaha ei te hi kan intihhmuh zual deuh deuh a ngâiin ka hria.

"Thingpui hi in la, tûalzâwlah i pu va tei chhuahpui la a ṭha ang, rei pawh a ngàih ka ring lo" exer ka là zo in ka luh rual chuan ka nu'n a lo ti siam siam a, thingpui chu ka in ve nghal mai bawk.

"Ka pa hi a la tho lo em ni?" pangngai taka ka tih chuan

"Zîng lamah bak a mu hleinem, mu rih rawh se, kei erawh nizan aṭang tawh khan mutmu pawh ka tuah ṭha thei meuh lo, i chhuak thawmte kha ka hre reng alawm, ka rawn tho chhuak duh lo mai mai a nih khà!" a lo ti deuh duah a, thil a ngaihtuah zui vang vang tih chu hmuh hmaih theih pawh va ni suh!

"Engati nge? I damsam meuh na nge?" ka ti ve leh ta sup a, thingpui chu ka in zawm zat bawk.

"Dam e, i û vang záwk a nia, nizan aṭang tawh khan ka rilruah a awm reng a, ka mumangah hial ka hmu lehzel bawk nen hun liam tawh ka ngaihtuah chhuak a, ka ngâi vawng vawng khawp mai" a rawn tih tâkah chuan a rilru tur àwm ang ka hre nghal mai a, han sawi zui vak dan erawh ka hre lem lo hle thung.

"Lucy-i te pawh heta zanriah ei turin ka sâwm a, an chhûngin an lo kal ka ring, vawiin chu i lo haw hmâ ka beisei a nia, sa vel pawh i pa hovin siam ula a ṭha ang" amah bawk chuan a rawn ti leh dat dat a, Lucy-i hming ka hriat apianga thil dangin ka rilru a luah nghal zawk ṭhin chu ka duh lo kher mai.

"Lo haw hmá chu ka tum alawm......" ka ti pangngai ve leh mai a, ka pu hmêl ka hmuh rual chuan a lamah ka phei zui ta thuai bawk.

Ka pu chu tûalzâwlah tei chhuahpuiin ka kuah deuh run a, tiang a hawl tho náin ka vêng ru reng a, boruak pawh zîngkâr ang em emin a vawt hit hiam tawh lo va, dawn nuam táwk vel chiahin a vawt ti ila a sual lo ber ang.

Minute 15 dâwn ka kal kualpui hnu chuan kan ṭhu hahdam ta hle hle a, ka û a hriat chhuah thute a sawi zui dap dap a, ka û hi chu a tuate mai pawh hian kan ngâi em em vek a ni ber e.

In chhûnga kan luh chuan ka pa pawh a lo tho ve tawh a, ka pu nen an inkawm zui ta bawk nen inbual turin ka kal nghal daih nghe nghe! Ka inbual zawh aṭanga rei pawh ni lovah tukṭhuan kan ei chu a ni der a, ka pu paw'n kan zîngah a rawn kil ve thei a, nimin lam ai chuan a zia deuhin ka hria.

Ka û thihcham a nih avangin ka nu leh pa chuan dawr hawn an tum lo hrim hrim a, dawr kan neihna hi a rei ve tawh ang reng a, len pawh a lian a, hmêlhriat leh hretu pawh dawr ṭhenkhat ai chuan kan ngah záwk rèng a, hnathawk chenin pathum ngawt kan chhawr nghe nghe a, Pathian zârah buaina leh harsatna kan la tàwk miah lo bawk.

"Vincent.....?" ka lehhawi rual chuan Lucy-i ngei mai ka hmu nghal a, ngainatawm zet hian a nui var var a, ka û nupui mah ni se kum lamah kan inthlau lo bawk nen ka û duh der lo.

"Kal i tum tawh em ni?" a rawn tih zawm zat a, min din hnaih ta viau bawk.

"I va rawn thleng phei hmâ ve?" ka tih chuan

"Nia.....ka lo kal châk tawh alawm....." a lo ti siam siam a, ka ngaihdan mai mai nge pawh ka hre lo, ka û thihcham pûala chaw ei khawm tur ni mah ila a hmêlah chuan ka û ngàihna réng ka hmu lo.

"Ka nute pawh an awm kha.....va lut rawh....!" tia kal mai ka tum chu ka kut a rawn vuan chat a, ka en rang teh e!

"Vawiin te chu i lo haw hmâ ang ti raw?" ka kut la chelh reng chunga a rawn tih chuan

"Ka hre lo!" ka ti deuh nghut a, ka kut chu ka pawt chhuak rang hle bawk.

"Lo haw hmâ rawh aw......?" khawngaihthlak lutuk ang hrima a aw a thlak danglam hnehsawh lutuk chu mak ka ti lek lek záwk a ni.

"Ka thu a ni lo, kan pute thu thu!" ti hlukin motor kawngka chu ka hawng a, ka tlan chhuak zui ta vang vang bawk.

Ka rilru leh mitthláah ka û a lang awl lo va, ka laka Lucy awm dan te hlei hlei chuan ka û laka inthiam lohna min neihtîr zual a, zep thu a cheng lo, Lucy-i awm dan hi chu a dik hlawl lo a ni.

Kum 5 liam ta khan ka ûin min boralsan kha a ni a, a nupui Lucy-i tak paw'n a ngâi ṭhin em  em a, mahse eng a hria nge ka hre lo, nikum aṭang khan ka lakah rilru dang a pu ta tlat mai a, thup pawh a tum bîk chuang lo, mahse ka tân erawh ka û nupui nena inzawmna lo siam chu ka duh loh mai bakah ka tum lo bur!

Vawi tam ka laka a rilru puthmang a dik loh thu ka hrilh tawh a, ka û nupui mah ni se chiang fek fawka ṭawngkhum châng pawh ka ngah mai, mahse tun thlengin ka laka a rilru put dan a la tidanglam duh der lo va, a chhûngte leh ka chhûngte'n hre ve ngat phei se chu tenawm lama an ngàih hial ka ring.

Ka tân chuan ka û nupui bak nihna nei lo va, mi beisei eng ang mah se ka thengthawngah a thawk thei eih lo a ni ber. Chutih rual chuan ka û nupui a nih avang chauhin ka be chhe hran lo va, ka be ṭha lûa chuang hek lo va, mi dangte hriatthiam theih tur ni hauh si lova a zak lo thiam ta lutuk te hi ka hnaih ngam lohna chhan pakhat ka ti lo thei lo.

"Morning Sir......" station ka thlen rualin constable pakhat chuan a lo ti zàngkhài vâh a, ka buk khum ve nghut a, anni aia dinhmun chungnung záwk chelh lo ngat ila zawng a tua mah hian min biak ṭhat peih pawh ka ring lo.

A chhan chu mi dangte lakah ka nèlawm tehchîam loh tih keimah ngei pawh hian ka inhria, ka û thihna khan ka nunah nghawng nasa tak a nei ti ila a sual lo khawp ang.

Chutiang mize pu chu ka ni a, mahse ka hna erawh ka chiang viau a, theih tawp chhuahin ka thawk ṭhin thung.

Min faktu an awm a, min sawiseltu pawh an awm a, tu fak leh sawisel mah ka phut hran lo bawk nen mî dang ngaihdan avanga hnual châng leh lunghnur châng ka nei ngai lo hrim hrim bawk.

Dârkâr a liam a, kan pu ber nen pawh chuan kan inhmu ta ngei a, ka û thihcham a nih avanga haw hmà ka ngàih thute chu ka hrilh dap dap a, ani pawh chuan min lo hrethiam viau a, case lian tham han buai tur a awm lo hrim hrim chu ka tân tak pawh haw hmâ a inthlahrunawm loh!

Chutia kan pu nena kan inbiak fel hnu chuan ka office-ah lutin ka nu hnen aṭanga phone call lo lut chu ka là zui zat a, bawngsa leh vawksa lei haw turin min rawn chah a duh hi a lo ni a, rei pawh kan inbe hran lo.

Chawhmâ chhûng zawng chu file leh report neuh neuh en felin hun ka hmang ral ṭhak a, mi dangte aia kan hna chelh a sán ve deuh avangin thil buaipui harsa leh case serious lutuk lo hi chu mi dang kutah ka hlanchhawng mai zel a, ngaihven erawh ka ngaihven ru ve reng zel tho.

Haw kawngah chuan ka nu min rawn chah ang ngeiin bawngsa leh vawksa ka lei haw a, thlan pawh ka thlang uluk khawp mai. Kan in kawta motor ka tihdin hnu lawkah ka nu leh Lucy-i hmêl ka hmu zui thuai a, Lucy-i mawlh mai chuan ka awm a tinuam thei der lo.

Min be siam siam a, hmeichhe ṭawng duh chì a lo ni bawk nen chhàn loh theih lovin min be awl lo a ni ber a, ka pa nen sa kan siam lâi te chuan kan bulah a lo awm ve reng a, kal sawn tura han tih ngawt lah a fuh ber bawk si lo, ka mizia nen ngat phei chuan a khamawm lam ta mah mah a ni.

Tlai dâr 3 velah kan inbâwl fel der a, sa thàng ka khawih nasa bawk a, ka rim chu a ni huam huam a, inbual turin ka room lamah ka chho thuai a, beisei loh deuhin Lucy-in min lo zui chho chu niin!

"Vincent....." tih leh min rawn kuah a rual nghal a, chuti teh thut a awm chu ka tân inrin hman ngàihna pawh a awm lo.

"Awm ṭha rawh Lucy!" ka ti deuh hluk a, mahse a awm sawn duh miah lo thung.

"Lucy!" ka ti leh hrawk a, ka aw chu a vin ta mah mah tih ka hai lo, mi a rawn melh chho chiang hle bawk.

"I intifai dâwn em ni?" a rawn tih chuan chhán pawh ka chhâng ṭha peih meuh lo.

"I rualin ka lo intifai ve ang chu......?" a rawn tih leh chuan ka lo meng nûr nàng a, engtin nge chutiang thu chu a sawi ngam záwk pawh ka hre nek lo e a!

"Ka room aṭang hian chhuak rawh!" ṭawngkam pangngaia biak chíah ka ruat tawh loh avangin ka aw chu a khauh ṭha hmuk hmuk khawp mai.

"A nih......in hnuaiah ka lo nghak ang che aw.....?" tiin room aṭang chuan a chhuak ve ta hram a, ka mit hmuha a awm lo chiah chu ka thaw chhuak hawk nghe nghe!

Ka pa'n hunserh a hman lâi te, chaw kan ei khawm laih laih lâi te chenin Lucy-i min melh dan chu a dik lo vel vek a, khaw thim thlengin a awm ve reng leh ta nghal a, ka pa'n thlah tura min ti chiah chu chhuanlam ka siam rang teh e!

Ka hman loh thu sawiin ka hnial vat a, mak pawh a tih hmèl viau a, ka pa záwkin Lucy-i chu an inah a va thlah nghe nghe bawk. A hmèl hmuh tur a awm lo chiah chu ka ngaihtuahna ata a bo nghal vang vang a, ka rilru pawh a pangngai chho leh ta viau bawk.

Kâr a ral a, thla a thar a, Krismas pawh kan hnaih chho tial tial a, boruak nen lam a Krismas rim ruih tawh a, kâwla nî chhuak te chenin hunpui kan hnaih tawh a ni tih a chiang em em a, Boney M hla paw'n hmun a luah hneh chuah chuah leh ta khawp mai.

Nilainî a ni a, hna thil avangin Lunglei lamah ka zin a, riah ka tum tawh zet nà chu a la tlai chhe lutuk lo bawk nen Aizawl lama haw leh ka rilruk ta záwk a, Lunglei ka chhuahsan chuan khua a la êng deuh iarh a, Aizawl erawh zanah bak ka thleng dâwn lo tih ka chiang hle.

Dârkâr 6 dâwn kawng laka chawl zeuh zeuha ka tlan par par hnu chuan zanlâi a ni hnai thuak tawh a, Aizawl pawh ka hlàt em em tawh lo va, zanin rei lam hnaih ṭan tawh mah se ka chhûngte erawh ka haw thu ka hrilh avangin an lo la men ṭhap ka ring.

Chutia in thlen bak ngaihtuah lova motor ka khalh lâi chuan kawng chhak lam aṭangin eng emaw ni hi a rawn lum thla thut a, ka ding nghal chawt nghe nghe a, eng nge a nih fiah tumin motor aṭang chuan ka chhuak rang hle bawk.

Ka kal hnai zel a, kawng chhak lam aṭanga lung lo lum thla emaw ka lo tih rilruk chu ka bih chiang a, lung a lo ni awzâwng lo; mihring taksa ngei a ni!

"I ṭha em?" tia ka'n kuai her chu nâ zet hian ka bánah a rawn hmer thuai a, chutah mipa emaw ka tih kha hmeichhia lèk chu lo niin!

Chuta chhapah thawmhnaw pawh a inbel mumal lo leh ta nghal a, pem nei tih hriat tak hian a ṭhen deuh chawih chawih bawk a, ka rilru a tibuai kher mai.

Ka kawr lûm hak lâi chu phelh sawk sawkin ka haktîr thuai a, buaipuitu mah ni ila ka tân tak pawh a taksa chu hmuh nuam zawk zawk a ni hauh lo.

"Min pui rawh.......khawngaihin min......min pui rawh.....ka.......thih ka duh lo......." chau tawngkhawng aw zet hian a rawn ti thâm ṭiak a, ka bân a hmerna chu a zawi tial tial nghal bawk.

"Hei....Hei....Hei.....! Harh teh, maimitchhíng suh!" ti mawlh mawlhin a hmai chu nâ vak lo hian ka bêng thek thek a, hmai khuh deuh vek khawpa a sam hnawk nuaih chu ka hui kiang a, hliam nâ tak a nei tih pawh a hriat hle.

"Ka duh lo......thih ka duh lo....." ti thawp zawi raihin a thle deuh ngiai ngiai a, hlauhna leh thlabárnaa khat mitmeng hian min rawn en a, chutiang mitmeng chu ka nuna ka vawi khat hmuhna a ni nghe nghe!

"Thih ka duh lo......" thei leh thei lo hian a rawn ti leh ṭhin a, ka pawm kang nawlh a, biak harh tum chí ni pawhin ka hre tawh lo.

Motor hnung lamah ka mut sawk sawk a, hmanhmawh zet hian ka tlan chhuak zui nghal vang vang a, hospital lo awm hmâsa bera kalpui chu ka thil tum a ni a, keimahah chuan hlauhthawnna eng emaw tak a châm reng lehnghal a, ka thin pawh a phû rang dawt dawt khawp mai.

End of chapter 1