𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟒)

ZOREMPUIA

(Mizo Romantic Novel)

By

Havali Adam

Chapter 4

Tlai nî nèm boruak thengthaw dawn nuam tak chu kan hmâ lama tlâng dung thlir ngawt ngawt chungin ka hip lut vang vang a, u Zorema nena kan awm dan mawlh mai chuan ka ngaihtuahna a tikal thui hle bawk.

Thil hriat chhuah zawk ka nei zui zat nghe nghe a, kan boruak hip dun mêk nen inmil viau lo mah se chu ka thil ngaihtuah chhuah thut avang chuan ka inlà hrang vat ta tho!

"Engati nge i lo kal…..?" ka ti chhuak halh a, mi chhâng nghal mai lo hian a khi deuh suk a, kei erawh ka nuih a za ve hauh lo thung.

"Haw thla leh vat rawh, khaw thim hmâin" keimah bawk chuan ka tih zawm leh zat a, nimin maia a hmeichhe hawpuinu khan chawp leh chilhin ka rilru sukthlek zawng zawng a rawn thlak danglam nghal vek a ni ber.

"Haw duh lo ta ila?" ti supin min rawn din hnaih salh a, ka lo tawlh hnung thuai nghe nghe!

"Ka hre tawh bîk nàng, i duh dûh danin i awm thei alawm, puitling ṭhan kin tawh i nia, mahni inngaihtuah thiam lo rual pawh i ni tawh hleinem" duham fê hian ka ti ta hmarh hmarh a, dik tak chuan nimina a hmeichhe hawpuinu kha ka la thik fàn a ni.

"Tan tan reuh che hian.…..” ti nghutin ka kawngah a rawn chelh zui zat a, tal chhuah nghal phat ka tum chu a taksa bawh rawk khawp hian min pawt hnai salh a, kan inmelh chhuk chho chiang leh tawh hle bawk.

"Min thlah teh!" ka ti deuh hlak pawh chu hre miah lo ang hrimin ka kawngah a la chelh run a, tal chhuah tum ve teh mah ila ka thei lo a chha chu a ni e!

"I hmêl mai bakah i mizia zawng zawngte nen lam hian ka duh vel vek che tih i haider loh hram ka beisei" awkâ dam thlupa chutiang thu a rawn sawi chiah chu ka ṭang nghal ṭeu a, ka thin pawh a phú rang leh ta dawt dawt khawp mai.

A thusawi zawh chiah chuan ka thluak chhûng a luah ngut ngut a, engtia han chhàn tur nge pawh ka hre lo. Sawi tur haihchham tih takah second eng emaw zah chu ka ngawi deuh ren rawn a, ani ren run lah chuan ka chhànna a nghak reng mai bawk si; rilru a buai duh teh e!

"Ih.....eng lo....." ti ban chapin ka chil chu ka lem dawk a, chhànna beisei tih hriat taka min enna thuk tak ngul chuan ka dang a tiawk zo vek a ni ber.

"Haw tawh ang......." thawp sapa ka tih zawm daih tâkah chuan lungâwi lo ang hrim hian a lo rum deuh nghut a, ka zàm lutuk chu en pawh ka en ṭha ngam tawh lo.

"I taksa hi chuan min hnar bîk lo tih ka hai lo va, mahse ka laka i rilru puthmang ka hre chiang fak thei lo ber hian pangngaiin min awmtîr thei lo a ni" ti thum chhal hian a rawn thaw chhuak zui ham ham a, rilru buai tak tak te pawh a ang ve alawm lè!

"Han sawi teh le, engtin pawh sawi rawh, hmâ làk a ngàih chhûng chu ka là mai ang" dam dapa a tih zawm leh zat tâkah chuan ka thaw chhuak ve ta halh a, ka inpuang mualpho mai mai ang tih mawlh ka hlau a ni.

"Bialnu i nei a ni lo'm ni?" kan hun hman dun mêk dan chu pehhel kual chì a ni tawh lo tih kan hre chiang ve ve tho bawk nen tlang rawta thil sawi law law a fuh zàwkin ka hria.

"Tu nge ka nei ti?" zawhna veka min chhâng lèt kher erawh ka ril rem zâwng a ni bau lo.

"Haw ang!" tih leh chet ka rual nghal zat a, chutiang teh thuta ka chet chu a ring bîk lo a ni mah nà; min kuahna ata tal chhuak deuh phatin thui vak lo ka kal sawn hman thuak nghe nghe!

"Kan sawifel phawt loh te chuan a dik nàng" ti nghet churh hian ka bân rekah tak a rawn chelh thuai a, ka tal chhuak thei lo chu a ni leh ta der mai.

"Sawifel tur kan nei lo...…" ti hmak paha a kut phih thlak ka tum lâi tak chuan hneh zet hian min rawn kuah a, tal chhuah tumin awmzia a nei dâwn chuang lo tih ka hre chiang tawh bawk nen a mi kuah ang áng chuan ka awm hle hle ringawt!

"Bialnu ka nei lo Helen" chu thu a sawi lâi chuan min kuah dan a thlak danglam eih lo va, fiah ṭha ang reng viau mah se awih tur nge awih loh tur tihah ka rilru a buai hle thung.

"Nimin paw'n in haw rual reng khâ.......?" ka ṭawngkam chhuakah chuan kha nu, a haw rualpuinu kha ka thik tih hai rual a ni lo va, ka laka a awm danin a zir miau loh avanga ka rilru dik tak chu sawi chhuak phawng pawh ka ni!

"Ani te kha chu ka ṭhiannu alawm a nih; ka bialnu ni lovin!" ti thlupin min kuahna ata chu a inlà hrang deuh hlek a, kan inhmâchhawn zui nghal zat bawk.

"Aw le, ka hre tawh e" lungmuan hmêl zeta a rawn tih leh dap chuan

"Eng maw i hriat?" ka lo ti vat a, ka mitmeng aṭangin ka hlauthawng ru hle tih a hriatthiam vek pawh ka ring.

"Ka laka i rilru puthmang hi maw lè" tia chawl deuh dat hian

"Ka zin tawh azawnga ka la hlawhtlin ber ṭum a ni hial ang" a rawn tih zawm zat a, pà zet hian a nui thum dut leh ta nghal a, ka rilru zawng zawng a hre chiang lutuk chu lài ru chem chem tak ka ni!

"I zak elo?" amah bawk chuan a rawn ti leh sup a, hmuh theih khawpin ka hmêlah a lo lang chhuak vek a ni mah nà!

"Awihawm loh!" ti deuh hlarin ka meng kual zawk zawk a, mi lah chu a nuih ang sun sun leh ta nghal a, awm dan tur pawh min tihre lo zo vek!

"A nih chuan i zak lo ni mai rawh se, hmai tài sen hlar hlar tê....…" nui thum dut paha a rawn ti chiah chu

"I ninawm!" lo ti zui nghal thuaiin ka kal sawn nghawng nghawng a, zah namên lovin ka zak a ni ber.

Car chhûnga kan han chûang dun te chu sawifiah thiam si loh hian ka awm dan a danglam vek a, hriat hahdam táwk vel leka ring hian hla a play ri dap dap bawk a, min rawn en leh zauh zauh ṭhin tih loh chu a tua mah kan ṭawng lo hrim hrim a, ngawi renga khaw chhûng thleng kan chûan dun tâkah chuan ṭawng chhuak hmâsa záwkah ka ṭang lo thei ta lo.

"I haw thla lehnghal dâwn ta em?" ka ti chhuak sap a, ka aw chu a ring teh viau lo bawk.

"Haw thla tur khan min duh bawk sia; ka haw lehnghal mai loh te chuan!" ti hniam supin a nui zui suk a, kei erawh ka lo ner náng thung.

"A thu hrimin engati nge vawiin angah te i lo kal reng reng? Tawhsual tàwh a awl ropui bawk si, tawhsual táwk palh ta la i chhûngte'n keimah asin min dem daih dâwn" ka ti ta barh barh a, ani ren run lah chuan

"Min va ngaihtuah leh si ve......." a lo ti duh lek chauh a nih chu!

"Ka uang lo a nia u Zorem......" ka ti deuh hap a, melh zeuhin hmâ lam ka hawi zawm ta daih bawk.

"Eng dang vang a ni lo, ka thluak i luah hneh êm a tin a ni!" a rawn tih dap tâkah chuan ka ngawi zui vang vang a, kei ang bawkin min lo duh ru ve tak tak a nih dâwn hi ka ti ta!

Kan in hmu ve hrim hrim tura ka sàwm chu min hnial bîk hran lo va, kan vêng kawng pheia kan tlan lâi te chuan ka awm deuh huih a, kan inkâr fiah ta uarh chu a tak ngei mah ni se ka la awih chiangbal thei rih lo a ni ber.

A mak ve êm asin!

Ka hmuh tirh phat aṭanga ka star, a hnua ka duh ruk zui tâk em em mipain kei thingtlâng nula satliah ve mai hi min lo duh ve reng a nia; mak tak a ni!

Kan in chhûnga kan han lut chu u Chhûanga chuan mak a lo tih hmèl hle a, mahse rei erawh a ni hran lo. Inhmêlhriat sa tawh tih takah a lo be tlângnêl thiam viau a, ka nute bulah chuan u Zorema nena keini unau inhriat dan leh kan chawhmeh zawrh a rawn lei ṭhin thute chu ka sawi siam siam a, u Zorema paw'n ka nu leh pate chu a chibai ve ve nghe nghe bawk.

A hminga thingpuite a in hnu chuan Aizâwl lamah a haw thla ta vang vang a, ka ngaihtuah ru ang reng viau a, tawhsual a táwk palh ang tih mawlh chu ka hlau a ni.

A haw tur kan inthlah liam dâwn khan ka chhûngte nen kan nih ṭhap avangin eng thu mah han inchah hran sí sê hman kha a ni lo va, Aizâwl a thlen thlak huna min rawn biak erawh ka ring deuh tho.

Ka phone chu hmet èngin nu Kimtei ka call zui nghal a, kan khaw lama kan chhoh thu ka la hrilh miah lo va, kâr khat dâwn kan châm rih a rinawm bawk nen chawlh dil law law chu a fuh záwkin ka hria.

Phone call a làk rual chuan kan khuaa kan haw thu leh chhiat kan tawh thute chu ka hrilh ta zung zung a, ani paw'n tawrhpuina thu a rawn chhakchhuak ve nûal a, ngaihngam taka châm rih turin min ti nghe nghe bawk.

Thim hlimah chuan u Zorema hnen aṭangin phone call ka dawng ta ngei a, him dam taka Aizâwl a thleng thla chu ka awm a nawm phah huai a, biak pawh kan inbe rei hran lo.

Zan lama kan inbia erawh eng eng emaw ni sawiin hun kan hmang ral hnem ang reng viau a, chutia kan han inngâizâwng ve ta mai chu ka awih lo leh rum rum ṭhin a, mahse thil thleng mêk a ni tih ka hre chiang viau lawi si!

Ka ti ta; hmâ hun kan lo hriat lohzia mawlh mai hi!

A hmâ te kha chuan bialpa ka nei a nih paw'n mipa fiamthu duh ve tak, ṭawng duh ve par par tak, fel leh ri zar zar ang chì ka nei ang tiin duhthu ka lo sam nasa ve ṭhin hle kha a ni a, ka kum rualpui a nih loh paw'n tlêma kei aia upa hret bak ka nei lo ang te kha ka lo ti ṭhin hial a, mahse tunah erawh khang ka suangtuahna zawng zawng lehling thawk mize pû mipa nen kan inngâizâwng mêk chu a ni si a, chutah awihawm loh khawpin ka'n la duh em em zui leh ta nghal a!

Nîte chu an liam zel a, zirtawpnî a rawn inher chhuah meuh chuan loh theih lohna avangin Aizâwl lamah kan chhuk thla leh ta vang vang a, chawhmeh zawrh ngâi lo se chu kan châm tlang law law záwk maithei a ni.

A tuk inrinnî zîngah chuan mipui pawh an rawn bit mup mup leh viau a, thla tawp lam tih takah kan inlà tam vak lo bawk nen inhralh kàm zung zung a awl khawp mai.

"Kha.......hei hi lo keng lawk mai teh" nu Sangtei te nupa chu bag ruak thleh fel pahin ka en leh zeuh zeuh ṭhin a, an mizia a inperhsan viau e ti lo chuan nupa inhmeh tak tih tur ang chì hi an ni lawi a, hmangaih pawh an inhmangaih viauin ka hria.

"Inkhelh chu in tum ta em ni?" sawhthing thlang mawlh mawlh chung hian nu Sangtei chuan a ti leh vâh a, pa Ramngheta záwk a bia tih ka hrethiam chawpchilh ve nghal mai bawk.

"Immm......." ti dutin pa Ramngheta chuan a bâna sana chu a en zauh a, chawhmeh rawn lei tum an awm rih lo bawk nen an inbiakna chu ka lo ngâithla ve ran ringawt!

"A nih......i ṭhiante chuan chaw an rawn ei nghal dâwn ta em?" nu Sangtei chu a ding zui hluai a, chawhmeh dang a hai kual danah a la lei belh dâwn a nih hmêl!

"Ei ang" tiin pa Ramngheta chuan a lo chhâng ve leh mai bawk.

"Inkhelh hi in ti ve ziah a, dul kiar tur a vêng te in ti thul, a khelho lah hi an dul a kiar thei hlawm em em lehngal" za vak lo hian nu Sangtei chu a nui hak a, pa Ramngheta ve thung chuan

"Ka dul a kiar bawk lo e a!" a lo ti deuh hmuk a, badminton khel ṭhin tih takah pa Ramngheta ber kher hi chu patling mah ni se a dul a kiar ve vak paw'n ka hre lo.

"I dul a kiar ka ti reng reng lo, an dul a kiar thei hlawm ka ti mai alawm, mahse dul thep zai chu i ni bîk loh tawp kha, i dul a kiar ve deuh tho" ti zat zatin nu Sangtei chuan a en chho kal a, sawhthing buk tuma pa Ramngheta lam ka hawi chho zeuh chu nu Sangtei chhiatkhum ang hrim hian a lo ner nûng a, ka nui ta ringawt bawk.

"Ka dul kiar dan hi a táwk chiah, fit pawh min tih êm kha!" pa Ramngheta chhàn dan avang chuan thil buk ri rak rak pahin ka khi heu a, nu Sangtei chhàn lèt dan tur mawlh ka hre châk tawh!

"Awi, ka thil sawi lah hi i hre thei phian bawk sia, ka sawi zui peih tawh lo ni mai teh se!" ti hlak hlakin nu Sangtei chuan a melh chho deuh râm a, lo nuih loh theih pawh a ni lo.

"Fit min tih thu ka sawi mai alawm, sawi dik loh ka nei hleinem" thum bul hian pa Ramngheta chuan a ti leh dut a, nu Sangtei erawh a lo ner sawk thung.

Bike-a an inphur haw tur ringawt te pawh chu en zui tham fê a ni a, inhua ni miah si lova an han inchhaih thinrim bawng bawng dan vel chuan mit a titlai ngawih ngawih hi a ni tawp mai. 

An tlan liam thlengin ka nui zui var var a, zîng lamah khan u Zoreman min rawn awmpui reng tawh bawk nen ka hun hman dan chu a fuh vel vek a ni ber e!

Inrinni dang ang bawkin haw hun pangngai àwm velah kan haw a, kâr tin kan inhralh zo ve ziah ṭhin te hi Pathian malsawmna kan dawn vang ka ti lo thei lo. 

Inhralh theih loh ṭumah pawh kan inhawn ṭeuh ngai lo tluk a ni a, kan han inhawn deuh châng paw'n kan châwi ngai chuang lo, nu Mâmite kan pèk chhoh loh leh kan ei turah kan dah mai ṭhin.

Hun leh nîte chu an inher danglam zel a, u Zorema nena kan inkâr pawh a fiahin a tluangtlam em em reng a, sawi chhuah awm chuang lova thla khat dâwn kan inngàihzàwn hnuah u Chhûanga paw'n u Zorema nena kan inkâr thu chu a hre ve ta nge nge a, mipa tih takah a sawi zui vak lem lo va, u Zorema a lo lèn tawh hi chuan amah záwk a lêng chhuak daih ṭhin a, haw erawh a rawn haw har ngai lo thung.

"Helen, inbe lawk teh ang" nu Kimtei aw chu a fiah felfai fak a, chawhmâ lam aṭang tawh khan a mood a fuh vak lovin ka hria; eng thu pawh sawi se a ṭawng deuh fak fak reng mai!

"Eng nge ni ta?" ti sapin room kawngka chu ka khar zui zat a, room hran daiha awm tih takah thawm chu a reh deuh ṭhiap bawk.

"Ṭhu rawh" nèlawm loh lam lek leka a rawn tih chuan ka ṭhu ve nghal mai a, eng vanga min biak fàl chu duh nge a nih tih erawh ka hre hauh lo.

"I pa Hminga hi lo hnimhnai tawh lo la ka duh khawp mai" a rawn ti charh charh ta mai, ka va'n hrethiam lo tehreng èm!

"Engtia hnimhnaiin màw?" ka ti deuh hû a, eng lam hawi zâwnga sawi nge a nih ka hre lo nasa a ni.

"Chungte chu ka sawi kher ngâi lovin i hre záwk daih ang chû....." min chhàn duh dan te hlei hlei chuan ka awm ti nuam lo zual a, ka ngaihtuahna pawh a kal kual thui khawp mai.

"I sawi awmzia hi ka hre miah lo a nia nu Kimte, min hrilh chiang law law rawh" ka ti ve ta charh a, ani pawh chuan chiang fek fawk hian

"I pa Hminga hi lo ngâizâwng tawh suh, in ina lêng tur paw'n lo thlem tawh bawk hek suh!" a rawn ti hmarh hmarh a, ka mak ti lutuk chu ṭawng mai nacháng ka hre lo hial a ni.

"Ka pasal a ni a, ka pasal pawh a ni satliah lo, i thawhna dawr neitu pasal a ni tih hre reng chungin lo inthiarfihlim hram ang che! I taksa hmanga i lo thlem leh a nih ngat chuan ka en liam mai mai dâwn tawh lo che a nia, tun ṭum hi chu ka hrethiam che ni mai rawh se!" nu Kimitei thusawi zozâi chuan ka thluak a tinû bulh bulh a, hmeichhe zak thei lo leh lerh tak ang maia min ngâi chu hrehawm ka ti tak zet!

"Ni lo, i hre sual a ni" pangngai taka ka tih pawh chuan

"I huaisar hle mai, mi lah chu i chhâng lèt pang pang reuh leh ta nghal a!" min ti lèt záwk ta erh a, insawifiah ngaihna ka hre lo lutuk chu ka ṭah a chhuak ru ngawih ngawih!

"Chutiang mi ka ni lo nu Kimte" ṭawng pawh ka ṭawng ring duh tawh lo, min ngâi dik lo zual ang tih mawlh ka hlau a ni.

"Ka pasal hi ka hre chiang a, dáwt min hrilh ka ring hauh lo bawk" a rawn ti kha leh fak fak a, insawifiah tum chuan awmzia a nei dâwn chuang lova ka hriat avangin ka ngawi ran ta ringawt!

"Chhuak tawh rawh, ka thlithlai ru reng dâwn che tih hre reng bawk la" a rawn tih zawm leh nghat nghat a, room aṭanga chhuah mai loh chu tih theih engmah ka nei rih lo a ni ber.

Khâwl hmâa ka ṭhut hnu pawh chuan eng tih châkna mah ka nei lo va, ka rilru chhûngril chu a nuam lo ru veng veng bawk. Lâtei paw'n ka awm dan chu a dik lo tih hrethiamin nu Kimtei nena kan inbiak dan leh min koh hran chhan chu min záwt nghal nghe nghe a, mahse engmah ka hrilh chiang duh rih lo thung.

Chawhnu pûm chu thathona rèng nei lovin ka hmang ral ta ṭhak a, nu Kimtei nen chuan kan inbe tawh lo hrim hrim bawk. Bus-a ka chûang haw te chu ka rilru ka kawm ngawt ngawt a, nu Kimtei min ngàihdan mawlh chuan ka awm a tinuam thei thlawt lo a ni.

Ka nihna ni lo puia min puh lâi khan insawifiahin awmzia a nei lo kha a ni a, ka insawifiahna leh ka thusawite kha chhe tê talin awih se chuan ka ṭang nâ khawp ang; mahse engah mah a ngâi duh tlat lo a nih kha!

Zanah chuan u Zorema pawh a rawn lêng leh ta ngei a, nilainî zan tih takah a inkhawm bâng chiah tih a hriat hle a, an ina haw lovin a rawn lêng tlang daih tih pawh ka hrethiam ve nghal mai bawk.

A inchei dan lah chuan ka mit a là em em leh ta nghal a, sweat shirt dum tak ruih hain a nghawng lamah erawh kamis a rawn lawr vâr zuah thung a, a kekawr, vutbuak rawng lah chu a tawt lek lek emaw tih theih tur hian a mal hrawl tak chuan a tawn mar deuh ṭung bawk a, a mawza vâr thianghlim hlarh leh a pheikhawk te nen lam chuan a inhmeh hluah hluah!

A tarmit rawn vuah mawlh mai chu en nin harsa khawpin a inhmeh dan a chiang em em a, mipa tê chhe lo tak a lo ni lehzel kher bawk nen a lang officer ruih ka ti lo thei lo.

A hmêl ka hmuh hmâ zawnga ka lungngàih rukna te pawh kha ani nena kan han awm dun tâkah chuan zawi zawiin an kiam tial tial a, do zawh loh khawpa huhâng ngah cherh churh mah ni se ka rilru erawh a va'n hahdam sawng sawng ta si èm!

"Engati nge i phelh a.....?" u Zorema chu ka en deuh kal a, tarmit vuah a inhmeh tehreng nen a làk thlak rual rual chuan rilruah zawhna a rawn piang nghal zat a ni ber.

"Vuah turin min duh záwk tihna em ni?" zawhna veka mi chhàn lèt hi chu a hrat ve hrim hrim a ni e!

"Chu lam pawh a ni lo" lài ru ang reng tak hian ka hawi sawn ta daih a, kan inṭhut hnaih salh salh bawk nen a rim pà chem chem te chuan ka thluak chhûng a fan ngut ngut thei hialin ka hria.

"A nih chuan eng lam nge?" chiang zet hian min en deuh run a, ka rilru hre tlang vek ang hrima chutiang zawhna min záwt khauh chu engtia han chhàn tur nge tih ka hre mai lo nghe nghe!

"Vuah leh vuah loh te chu i thu thu alawm" ka ti zawi sap a, kan inbiak dan vel chu ho viau angin lang mah se nuam erawh ka ti ru phian lawi a, ani bulah hi chuan nuam han tih loh tak tak lâi pawh ka nei lo a ni ber e!

"Han sawi hrim hrim teh……." a tih deuh ṭalh tâkah chuan nui zui hak pah hian

"Duh leh duh loh lam ai mah chuan i inhmeh chu ka ti záwk ngei a, mahse mi dang ngaihdan erawh ka hre lo" ka ti ve leh ta nge nge a, awlsam têa mi inpuantîr hi chu a hnehsawh ve thlawt a ni.

"Mi dang ngaihdan ai chuan i ngaihdan alawm ka hriat duh" ti hniam ruihin ka lamah a rawn awn thla riai riai a, kan inmelh hnai ṭha hem hem leh tawh viau bawk.

"Eng lo......eng nge i tih dâwn?" ka aw chu a tluangtlam lo hle a, inngâizâwng mah ni ila hnai taka min en tawh hi chuan ka zàm ru ngawih ngawih ṭhin a ni ber e!

"Eng nge ti ila min duh?" ti thum chhal hian a kiai zui suk a, ṭang ru deuh ṭeua a âwm ka nam ve na te chu engah mah ngâi lovin min bawh tlu riai riai zawm zat thung.

"U Zorem....?" lo ti chhuak halhin ka mit chu ka khap fuk fuk a, chutah keimah bawk chuan

"Eng nge tih i tum?" ka ti thawp leh raih a, zàm lutuk luatah ka lung chu a rawn phû chhuak dawt dawt dâwn hialin ka hria.

"Ka fawp dâwn che maw lè......" ti hniam supin ka hmuiah chuan a rawn fawp zui ta ngawng ngawng a, chhàn lèt loh harsa khawpa a mi fawhna zun ngah tak chu keia lo hnar zawh rual a ni lo.

Zei leh thuk ril taka ka hmui chung lam a peh loh leh hnuai lamah a insawn thla thul, a lei sâ ham ham te hlei hlei chu ka dawngsawng thiam lo lehzual a, awm ngaihna pawh min tihre lo hial a, chu a hmui thil tithei tak hmang chuan ka engkim a thunun fai vek a ni ber.

A tukhum sam ṭham chunga ka lo chhàn lèt ve tawn tawn lâi te chu hre ruai ruai mah ila mahni inthunun thei lo khawpa ka danglam tawh miau avangin rilru pawh fîm thei dinhmunah a ding tawh lo va, keimahah chuan nawmna nasa tak a thleng mêk tih erawh ka hre chiang em em thung.

Ka âwm bâwra a kut hrawl lûm ham ham a rawn nghat chiah phei chu a mur hian ka mur chhuak uaih uaih a, kum khua leh chatuan pawh ni dâwn se chutiang thil dawnsawn nuam dangdai lutuk dawn reng chu ka hnial phal ka ring lo hial a ni.

Chutah nghat satliah mai ni lova a kut a'n tiche zawm lehzel phei chu ka tân zawng awm ngaihna hriat a harsa ngawih ngawih; ka la tawn ngai loh leh ka rin phak bak a ni!

Inkuah riala kan ṭhut dun hle hle hnu pawh chuan ka la thaw dep dep reng a, ani erawh kei ang lo takin a pangngai vek tawh thung. 

Ka khan deuh chial a, pain a fanu duat taka a be dam thlup thlup ang mai hian a ṭawngkam chhuak reng reng chu ngaihthlak a nuam em em vek a, ani bula ka awm tawh hi chuan ka rilru leh taksa a hahdam veng veng zel a ni ber e!

"A hmâ khan tarmit i vuah ngai em em si lo va, tun hnai hian i rawn vuah ta ziahin ka hria" en pawh en chuang lova ka tih chuan a lo nui nghawr dat a, kan boruak hip dun mêkin a zir bawk nen ka mood te chu ṭha hliah hliah tak a ni!

"I hmuhah ka vuah zen zen lo záwk, i hmuh lovah chuah vuah reng ang ka ni!" min chhànna chu mak ka ti hman viau a, ka rilruah zawhna dang a rawn piang zui nghal zat bawk.

"I mit a ṭha vak na nge?" ka ti deuh hliai a, ani pawh chuan

"Immm......ṭha lutuk lo" a lo ti ve mai a, zawhna dang erawh ka la nei ta tho!

"A nih......engati nge kei ka nih avanga i vuah khât bîk kher a.....?" ka ti leh hram a, chu ka zawhna chhànna chu tun dinhmuna ka thil hriat châk ber pakhat a ni nghe nghe!

"A chhan chu min hmuh senior viau ka hlau alawm" a rawn ti chiah chu ka lo nui chhuak nghal hak hak a, beisei loh lam taka min chhàn dan chuan min tinui lo thei lo.

"Nui suh, ka thutak teh a nia…." rum deuh nghuta a rawn ti leh nui nui phei chu ka nuih a tiza zual a, min en chiang ren run bawk si; nuih loh a har thlawt!

"Khaw'nge i kal dâwn?" la nui var var chunga thawh ka tum chu nghet zet hian min chelh ding chat a, zawi zawiin ka nuihza pawh a reh ta tial tial bawk.

"Thingpui ka va lûm ang chu ka ti......." pangngai taka ka tih chuan min thlah ve leh mai a, ṭhutthleng bul dawhkana a tarmit dah chu làin a vuah zui nghal zat nghe nghe!

A rawn lèn chhûng zawng chuan chhun lama ka hun hman dan lungàwithlak loh zet ang lo takin ka ṭawng barh barh reng a, hun lah chu a kal chak em em mai leh ta nghal a, hlim lâi leh lawm lâi hi chuan hun a kal zung zung ṭhin an tih kha a lo dik ngei e!

Hun hi chu a nghaktu nih châng te hian a rei duh viau a, kan han hmanhmawh châng te erawh hi chuan a kal chak duh leh em em lawi a, dam loh châng te, nin châng te, lungngàih châng leh mangan châng te hian kan hrehawmna tihbelhchhah tum ang hrimin a kal muang ṭhin hle bawk.

Amaherawhchu, chutiang taka hriatthiam harsa leh inthlak danglam reng chu ni mah se hun tel lo chuan mihringte hi mu leh malin kan khawsa thei miah lo thung.

"Zu lut tawh rawh le" u Zorema chuan a rawn ti dap a, zan dang ang bawkin in chhûng ka luh hmâ chu tlan chhuah a tum lo tih a hriat khawp mai.

"I ti ve ziah!" ner nànga ka tih chuan tawi tê hian a lo khi suk a, ṭawng erawh a ṭawng zui tawh lèm lo.

"A nih......mangṭha le......" ka ti leh diai a, ani pawh chuan

"Mangṭha le....." a lo ti ve sup a, in lam panin ka chhuk thla ta nal nal bawk.

A tukah chuan ni danga ka tih ṭhin dan pangngai angin dawr lamah ka kal leh a, ka fimkhur sawt viau nghe nghe a, pa Hminga chu thuran ni se, nu Kimtei lakah nen lam ka fimkhur a ngâi hle tih ka hre kar tawh a, min hmuh dik loh theihna tur zâwnga awm ka tum tawh lo tawp a ni ber. Pa Hminga pawh a bang chuang lo, hnaih ka tum tawh lo bur!

Tin, Lâtei hnenah chuan nu Kimtei nena kan inbiak dan leh ka nihna ni lo puia min puh dan zawng zawng kha ka sawi chhuak vek ta nge nge a, mak a tih mai bakah pa Hminga laka fimkhur lehzual turin ka hrilh zui nghal nghe nghe bawk. 

Ka ṭhian a nih piah lamah ka unaunu ang mai a ni a, ka thil tawn mêk chu rawn tawng ve lo se ka duh avanga engkim hrilh tlang nghal vek law law pawh ka ni!

Hna bàn hun a rawn inher chhuah tâkah chuan haw turin kan che ta sang sang hlawm a, nu Kimtei nen erawh kan inmelh leh zeuh ṭhin tih loh chu nimin aṭang tawh khan kan la inbe leh lo hrim hrim thung. 

Bus ka chàn lâi chuan u Zorema hnen aṭangin phone call ka dawng nawlh a, office an bàn fel chiah thu leh min rawn lam kawi nghal a tum thu a rawn sawi nuah nuah a, mak pawh ka ti ru hman viau nghe nghe!

Kâr lovah a rawn thleng ta thuai a, car chhûnga kan chùan dun hnu chuan office bàn apianga min rawn hruai a tum tawh thu chu a sawi zui nghal dut dut a, hnial ka tum zet nàin hnial erawh ka hnial ta lem lo va, pa Hminga lakah pawh ka him phah sawt záwk dâwna ka hriat vang a ni pakhat!

Kan in thleng min thlah fel thlap hnu chuan a haw ve leh mai a, kei paw'n ei rawng ka bâwl zui nghal mial mial a, khua a thim titih tawh bawk nen u Chhûanga erawh a rawn haw har leh deuh dâwn a nih ka ring. 

Tunlâi chu hna lamah an ṭul ang reng a, pa Ramngheta chena an rawn haw hmà ngai loh danah an laklawh ṭhin viau pawh a ni ang.

Ruah chu a tla cher cher a, sûr tam hran lo mah se a sùr dan chuan mut a tichhuak ru em em thung. Ruah sur tam tak tak hmâin u Chhûanga paw'n in a rawn thleng ve ta nge nge a, tui lûmin a inbual zui nghal sawk sawk a, ruah lah chu a tira a sùr tlèm tehreng nen a sûr tam buan buan sawt em em lehnghal a, kâwl nen lam a phe nasa zawk zawk khawp mai.

Zan thlenga ruah sûrin kiam zâi a rèl mai tâk lovah chuan u Zorema pawh a lo lèn loh phah nghe nghe a, zantin deuh thaw lo lêng ṭhin tih takah zan khat lèk a rawn lêng lo ringawt pawh chu keimahah chuan a hriat viau a, ka ngâi han ti dâwn ila niin ka hre chiah bawk si lo, ka ngaihtuahna chu a luah veng veng a ni ber.

Zîng khua a lo vâr a, khua chu a ṭha ang reng viau a, fur ruah tui tlâk thla a ral tawh dâwn vangte pawh a nih ka ring. 

Chhun lama ka hun hman dan chu ni dang ang bawka thawmhnaw ṭhui a ni leh mai a, nu Kimtei nen erawh kan inchhàn deuh bap bap aṭang khan kan la inbe mang lo tluang zel a, kan inhmuh dan felhlel tak chu reh vat se ka duh rualin tihreh dan tur erawh ka hre bîk mai bawk si lo.

"Ka sawi kha i la hre reng em?" pa Hminga aw ka hre thut chu phu nasa tak ka ni!

Bathroom kawngka khara kal sawn nghal thuai ka tum chu ka dar tawn tawnah a rawn chelh vat a, ka zun zawh chiahna bathroom chhûngah vek chuan min nawr lut rawk rawk a, mipa tha nà nâ ná chu ka hneh lo khawp mai.

Tha tawp chhuahin tal ve phat phat mah ila awmzia erawh a awm nep hle thung a, au chîam ka duh rualin nu Kimtein min ngâi dik lo zual ang tih ka hlau tho bawk si, ka rilru chu a ipik tak zet!

"Mi dang hmâa min tihmualpho avang khan i la tuar dâwn chauh tih hre rawh!" a rawn ti leh khur khur a, hlauh leh hlauh loh ai mah chuan a tenin ka ten hluah hluah tawh záwk!

"Min thlah vat loh chuan ka au vak dâwn a nia!" ka ti vin ve ta hlar a, hlauh ka tum tawh bîk lo hrim hrim!

"Han au ta che, au rawh, i duh tâwkin au rawh, eng nge i chungah lo thleng i hre mai ang" tenawm zet hian a nui zui hek hek a, min vau a ni berin ka hria.

"Min thla rawh!" ka ti leh hmarh a, ani erawh chuan ka aw khauh hrak te chu engah mah a ngâi duh eih lo thung.

"I sawi vang ni hauh lovin ka thlah ang che, chutih rual chuan min tihmualpho avang khan i la inchhir dâwn chauh tih theihnghilh ngai bawk suh ang che" a thusawi awmzia chu pakhatmah ka hre lo va, chuti maia hriatthiam theih a ni paw'n ka hre lo.

"Chhuak tawh rawh" a rawn ti leh chuan hmanhmaw ru ang reng tak hian ka chhuak ta thuai a, min lo hmutu an awm nge awm lo hriat tum tak hian ka hawi kual nghal zawk zawk bawk.

Chawhnu pûm chu pa Hminga vang bawkin ka hmang nuam lo ru hle a, Lâtei bulah erawh ka sawi duh rih lo va, mahse hrilh hun erawh ka la neih tho ka ring. 

Hna kan bàn fel hnu chuan u Zoreman min rawn lam kawi leh thlap a, chutia car-a kan han chûang dun ta chu ka rilru ipik ru ṭun pawh kha zawi zawiin a reh ve leh mai bawk a, mahse ka laka pa Hminga awm dan mawlh mai khan ka thluak chhûng kil khat a la luah reng thung.

"Zanin chu khawiah emaw min kalpui ta che? I hman ang em?" u Zorema min rawn biakna avang chuan ka ngaihtuahna ata ka harh chhuak zawk a, ka awm dan pawh chu ka siam ṭha rang hle.

"Khawiah maw?" ka tih chuan a steering herh kual lâi bahlah chuang miah si lo hian

"Kan ṭhianpa pakhatin a hnathawhna lamah promotion a hmu a, chumi lawmnaah chuan maw lè, i hman thei ang ti raw?" a rawn ti ṭha ve leh mai a, ka chhàn lawk loh avang chuan ka lam a rawn hawi zauh a, ka kal ve na chì a ni ang em tih lam ka lo ngaihtuah thleng daih a tin a ni!

"Tih tur i nei em?" pangngai taka a rawn tih leh chuan

"Neih chu ka nei hran lo va, mahse ka lo kal lo záwk mai ang" ka ti ta sap a, chu chu ka rilru dik tak a ni bawk.

"A nih chuan kei pawh ka kal lo mai ang" ngaihsam hmèl zeta a ti chiah chu

"Engati maw?" ka ti nghal hû a, ka kalpui dâwn loh avanga kal loh tum ve ringawt te pawh a ang záwk mahin ka hria.

"Kalpui tur ka nei lo" vui aw lam lek leka a rawn tih hniam dut chuan ka lo nui chhuak hak a, naupangchhia zeta a'n tum vel bur bur te chu inhmeh lo deuhin a inhmeh viau lawi a, nuih loh theih pawh a ni lo.

"Nangmah paw'n i kal thei reng alawm" khi deuh sânga ka tih pawh chuan

"I lo kal ve dâwn loh chuan ka kal peih leh lo, ka lo lêng záwk ang" a ti tlat roh a, titau ang hrim hian mi pawh a rawn en duh miah lo va, a thusawi ang chuan a awm leh duh tak tak ka ring bawk.

"Kal tur angin i insawi vek tawh a ni lo'm ni?" ka tih chuan a lo bu nghut a, mi pawh a la rawn en duh lo hrim hrim!

"Chu lehnghal...…! Ṭhulh ringawt a mâwi lo, kal ngei ngei rawh" ka ti leh zat zat a, tun ṭuma kan inbiak dan chu naupang záwk mah ni ila a upa záwk te pawh ka ang riauin ka hria.

"Min kalpui peih loh chuan ka kal peih hleinem" a la rawn ti fan a nih chu!

"I mak ê........" ka ti ta thlawt a, chutah keimah bawk chuan

"Keia lo kal ve ringawt kha a dik chiah lo alawm, hmêlhriat ka nei dâwn lo tih lah a chiang reng reng, nangte chu i ṭhiante an nia, ka kalpui dâwn loh che avang ringawtin i kal lo tur tihna a ni chuang lo" ka ti leh barh barh a, ani erawh a lo rum deuh nghut a, ka lam lah chu a rawn hawi ṭha duh miah lo leh ta nghal a, engtia han hrilhfiah chì nge pawh ka hre tawh lo.

"Kal loh i tum tak tak ang e aw u Zorem?" ka aw chu a ring hran lo nàin a fiah ṭha viau thung.

"Kal ka tum alawm, mahse nangmah nen…....." a rawn tih rual rual chuan

"Enga!?" ka lo ti nghal hluai a, chutiang em ema mipa luhlul chu a ni ang tih rin ngaihna rèng ka hre lo.

"Ka rawn lam ang che, hmêlhriat neih leh neih loh lam kha chu buai duh suh, i bialpa ka awm dâwn alawm" nghet cherh churha a rawn tih leh chuan ka ngawi deuh ren rawn a, rei inngaihtuah buai duh lovin kalpui mai chu ka tum ve ta nge nge bawk.

"A nih.....kan haw har ang em?" ti sapin ka thaw chhuak zui halh a, dik tak chuan ka phur tehchiam lo a ni.

"Haw har lo turah ngâi ang" a rawn ti ṭha ve mai bawk a, kan in kawt pawh kan thleng chu a ni der!

Kan inthlah fel hnu chuan a tlan haw zui vang vang a, chaw ei kham daihah min rawn lam dâwn tho bawk nen in chhûng ka lut chu ka che hmanhmawh hran lo va, mûangchâng lutuk erawh ka ni chuang lo. 

Zanriah ei lâiin u Zorema nena kan chhuah tur thu chu u Chhûanga bulah ka sawi a, phal lohna nei hran lo mah se fimkhur turin min chah thung a, dik pawh ka ti viau mai.

Dâr 7 leh a chanve velah u Zorema chuan min rawn lam ta ngei a, eng dang zawng aiin a inchei dan mawlh chu inhmeh leh tawh tak a ni. 

Kekawrah jeans pawl a ha a, kawrah erawh t-shirt rawng lài deuh tak hàin leather jacket a hak thuah thlup bawk a, pheikhawk lah chu ka ngainat chì em em converse, a dum leh vâra ṭial ngat a rawn bun leh ta nghal a, engkim mai chuan ka mit a la vel vek a ni ber.

Kan kalna tur lam pana kan tlan lâi te chuan ka ṭawng barh barh reng a, ṭawngkam ngeiawm ni miah si lova mi a fiam ve leh zauh ṭhin te chu kan titi tikaltu ber a ni ang lawi a, kan inkâr dam leh tluangtlam raih chuan hahdamna min pe ni mai te'n ka hre nghe nghe! Tin, a bula awm chu nuam ka ti hrim hrim ve pakhat bawk.

"Zo......" u Zorema ṭhianpate in kan luh ruala hmeichhe aw ki sâng vah rawn chhuahna lam ka hawi phei chu kha nu, u Zorema nen kan inngàihzàwn tak tak hmâa ka thik ruk em em nu kha ka hmu hlawl a, mak pawh ka ti hman viau!

"Kalpui i rawn nei elo?" chu nu bawk chuan a rawn ti leh zat a, hawihháwm tak hian ka lo nui ve sak ringawt!

"Immm......a nih hi!" u Zorema pawh chuan a lo ti ṭha ve mai a, kei erawh hmun dang melh kualin ka hawi sawn ta daih thung.

"Peki ka nia....." ti nêm thliamin u Zorema hmêlhriatnu chuan ka lamah a kut a rawn phar vâ a, chibai ve nghal mai chung hian

"Helen-i ka ni e" ka lo ti ve sap a, chutah amah bawk chuan

"Ka hmuh hnu i ang ê........" a ti zui leh lang lang a, kei erawh ṭawngkâa chhâng tawh lovin ka lo nui tawi sak thung.

"Chawhmeh zuar ṭhin kha i ni ti raw?" ring leng lawnga a rawn tih leh chiah chu ka zak ru chem chem a, mi dangho zawng zawng pawh chuan min en ṭhupin ka hria.

"Nia.....inrinnî bîk hian ka zuar ve ṭhin a......" loh theih lohna avangin ka ti zawi fiah ta raih a, mî zînga min biak dan leh zawhna min zawh duh dan ber kher chuan ka awm a tinuam lo ru nghal veng veng bawk.

"Phei ang le" dam dap hian u Zorema chuan a rawn ti sup a, ka kutah chelhin min kalpui zui zat a, ka awm a nuam chiah lo tih a hrethiam te pawh a ni ang.

Mi chu ka melh kual ralh ralh a, mi hausa leh awm thei tih hriat tak tak an ni vek hlawm a, ka rilruah chuan mahni insit rukna leh tê chem chema inhriatna a rawn piang nghal thuai bawk. 

An chet dan reng reng chu a changkang em em vek a, keini ang thingtlâng nula naran ve mai mai tân chuan insiam rem a harsa lam hret a ni.

A hmei a pain fel hlawm viau mah se ka pawh tak tak ngam lo va, u Zorema bulah ka tal chawt a ni ber. 

Peki mawlh mai chuan ka mit a tikham ru viau a, huat ngawih ngawih tham ni miah si lova mi biak a hnehsawh em em leh ta nghal a, ka awm ve tih hre lo ang maia u Zorema a kuah hawr hawr reng te chu en pawh ka en rei peih lo, ka thei lo hrim hrim bawk.

Hun kan hmang rei telh telh a, ka awm erawh a nuam lo tulh tulh thung a, u Zorema chuan min ngaihsak lo pawh a ni lo, keimah chu ka dik lo záwk a ni. Ka awmna tur ni miah lova awm lui ngar ngarah ka inchan a, dik tak chuan mi dang boruak hip mêk chu ka zo ve lo a ni ber e!

An ṭawng dan, an hawiher, an incheina leh min en dan te thleng chuan ka ngaihbel vek tawh a, u Zorema bula haw han rawt ringawt èm chu dikin ka hre bawk si lo, chep ru tak ka ni!

"I ṭha em?" u Zorema chu ka nuih lui seih a, ka awm dan aṭang chuan nuam ka ti lo tih a hrethiam te pawh a ni mahnà!

"Immm......" ti nêm diaiin mi dang che vel chu ka melh zawm ta daih a, nuam ka tih loh thu sawi ta ila min ngaihtuah leh lutuk palh ang tih ka hlauh vang a ni pakhat!

"Ka ṭhianpa saw ka va be lawk ang a, kan haw dâwn a nia…..." a rawn tih chuan ka en nghal vat a, ka rilru hria awm ziazânga haw a rawt chu ka lawm tho rualin ka tilang duh lo thung.

A sawi ang chuan a ṭhianpa bulah a va phei ta ngei a, rei pawh ni lova Peki hmêl ka hmu tel nghal zat erawh ka rilru a kal pêng leh ta viau mai. 

Chhoh melh ral chung hian u Zorema chu a be siam siam a, mipa pahnih inbiakna kâra a lo va inrawlh ve chhen te chu ka hmu kham a ni ber. Rei en duh lo e ti lo chuan ka en reng ang lawi a, zep thu a cheng lo, ka thik ngawih ngawih!

U Zorema ber a rawn lèt tâkah chuan kan haw zui nghal chu a ni mai a, kan kal lam ang lo takin ruah a tla cher cher a, tlan pawh kan tlan chak hran lo. 

Boruak dang daih ka'n hip chiah chu ka awm a nuam sawng sawng nghe nghe a, u Zorema nen chauha kan awm dun tawh vangte pawh a ni ang, ka ṭawng duh barh barh leh tawh hle bawk.

Kan inngàihzàwn tâk aṭang hian ka la hriat ngai loh thil tam tak ka hriat bakah ka la tawn ngai loh thlengin ka tawng a, tun hmâa ngàihzâwng lo la nei ngai reng reng lo tih takah awm dan ka thiam táwk lo tih pawh ka hria, ka hai bîk lo, mahse u Zorema hi chuan ka nihna ang ángin min ngaina mai a, chu tak chu a bula awm nuam ka tih chhan leh ka thinlunga hmun a chan hnem em em chhan pawh a ni.

Kan tâna mi pawimawh leh mi danglam bîk te hi chu hmun thuhmunah kan awm emaw, awm lo emaw, kan thinglunga an hlut dan a ngai reng a, hmuh phak lovah pawh awm se rilru leh ngaihtuahna zawng zawng an luah tlat avangin kan bul hnai lawka awm ang mai te'n kan ngâi hial ṭhin.

End of chapter 4