𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟑)

ZOREMPUIA

(Mizo Romantic Novel)

By

Havali Adam

Chapter 3

Hawi pawh hawi chhuak ngam lovin a kut chu ka en tlawk tlawk a, eng thu mah a sawi belh tawh miah lo bawk nen awm dan tur ka baihvai tak zet a ni.

Chutia ngaihtuah ber pawh nei lova ka men kual ralh ralh lâi chuan che deuh hrut hian ka kut a vawnna chu a thlah a, min tihnàt hlau ang hrima min han kuah zawm leh nghal zat phei chu engtia lo dawnsawn tur nge ka hre lo lehzual; ka ding khawng awt ringawt!

Rei táwk fang chu kan ngawi dun vang vang a, hneh ang reng taka min kuah khawm titih vek lâiin kei erawh kuah lèt ngaihna pawh ka hre lo va, ka kut chu nghet zet hian ka hum ruh ngawt ngawt a, kan awm dan chuan ka thawk nen lam a tibuai vek bawk.

Ka thin phut dan rang ta dawt dawt chu ka thunun theih piah lam thil vek a ni tawh a, hip loh theih loh a rim pà ru hrak te hlei hlei chuan awm ngaihna min tihre lo a ni.

"Le......! Zu lut tawh rawh le.......!" min kuahna ata a inlàk hran rual chuan awkâ dam zet hian a ti zui dap a, kan taksa insi tawh lo mah se nghawng erawh a va la nei thui si èm!

"Ih.....eng lo.....kal hmàsa záwk rawh" ka ti ban deuh chap a, amah ka hlauh avanga ṭawng tim dai leh ṭawng bahlalh nak nak pawh ka ni hran lo, thawk leh khata ka taksa inthlak danglam dâwrh chu ka la thunun hleih theih loh vang záwk a ni.

"I chhuk hmâ chu kal ka tum lo a nia......" ṭawngkam vin leh khauh a hmang miah lo nàin zawm loh theih loh khawp nghet cherh churh a ni thung a, a thusawi ang chuan a awm ngei dâwn tih a hriat nghal vek bawk.

"A nih....." ti zawi sepin a che chhuak hmâsa záwkah ka ṭang ta nge nge a, chutah keimah bawk chuan

"Naktuk chu tluang deuhin i kal dâwn a nia, mangṭha le....." ka tih zawm leh sap a, ka aw aṭang chuan ka zàm ru hle a ni tih a hriat loh hram ka beisei!

"Immm......mangṭha le....." a rawn ti ve sup a, hawi lêt tawh lovin in lam pan chuan ka chhuk thla zui ta nal nal bawk.

In chhûng ka lut chiah chu dawhkan dawm meuhin thawk ka là ham ham a, thawm erawh ka dim ang reng hle a, ka awm dan chu u Chhûangan min rawn hmu ang tih ka hlauh vang a ni pakhat!

Khuma ka mu te reng reng chu ka la pangngai hlei thei lo va, chutiang em em chuan a mi tawhna khan ka rilru leh taksaah nghawng a nei zui zel thei ang tih lam rèng ka dâwn pha lo a ni.

A thu hrimah eng rilru pua min kuah nge a nih reng reng lè?

Ka kut a rawn chelh ringawt pawh kha awm dan tur ka hriat loh phah tawh a nia, min han kuah zui zat phei kha chu ka thluak nû bulh bulh khawpin ka sa chhuak pup pup hial a nih kha!

'A lo duh ru ve reng che hi a ni lo màw?' tia Lâtei min hrilh chamchî ṭhin kha ka thinlungah chuan a rawn inthum nawn tluk tluk a, mahse awih harsa ka ti tlat si a ni.

Chu bakah min ngâizâwng ang paw'n lo ngâi ta tehreng ila, min duh thu erawh a chhak chhuak ngai hauh si lo, chuvanga Lâtei thusawi pawh awih hlei thei lo chu ka ni!

Chutih rual chuan hmèlhriat satliah ang ngawtin min en tawh bîk lo tih ka hai lo va, ka chian tâk ber chu ngaihbel theih turin ka lakah a awm ve ṭhin tho tih a ni.

Muthilh tumin ka mit ka chhîng vang vang a, ka mitthlâah erawh u Zorema hmêl a la châm zui reng thung a, ngaihtuah loh tum paw'n a theih loh; ka ngaihtuah zel tho!

Ni e, kan duh leh ngainat zâwngte hi chu eng hunah pawh ni se kan ngaihtuah ngut ngut zel a nih ber hi màw!

A laka ka rilru puthmang ai mah chuan eng tiang chiahin nge min ngàih ve ang tihah rilru leh ngaihtuahna ka sêng awl lo ta ber záwk a, ka thluak pawh a tibuai hle tih phat rual a ni lo va, min duh ve ang hrima min kuahna te hlei hlei khan beiseina dang min siam ka ti lo thei lo a ni.

A tukah chuan nilêngin dawr lamah hun ka hmang a, ruah lah chu a sûr duh em em leh ta nghal a, rilruah ni se u Zorema a lang reng bawk nen mahni táwkah ka lo ngaihtuah ve em em ringawt a, inngâizâwng ang maia a chanchin ka ngaihven ru reng chu ṭul lo te ka ti hnuhnawh ang leh lawi a, mahse ka rilru, ka thluak leh ka mitthlâ chenin a chen chilh awl chuang hauh si lo.

Ka phone number min dil zan te kha ka la hre reng; a ruka ka lawmzia leh hlimzia mawlh mai kha ka theihnghilh theih tawh pawh ka ring lo hial záwk!

A hmêl chu thuhran ni se, a huhâng a nàt tluk zetin zùn pawh a ngah a, chu a zùn chu kei hian ka lo phur zo lo lek lek záwk ṭhin. Inngâizâwng ang thawthanga ka vei zui leh vawng vawng ṭhin te chu àwm lo tih châng ka ngah a, mahse chuti ngawtin ka thinlung ka thunun thei chuang bawk si lo; a mak a ni!

Zanah chuan a hnen aṭang phone call ka dawng teh mial a, phone number kan innei tawn ve ve tawh nàin biak erawh kan inbe khât ṭhin hle thung a, mi a rawn biak loh nà nâ ná chuan keia lo va biak ringawt thu a awm lo.

Nilainî thleng a chàm tur thute chu a rawn sawi ve mual mual a, phone kaltlang mah ni se a aw dam deuh ruih chuan ka rilru a fan leh chiai chiai tawh a, kan awm dan engkim chu ka beisei phak ni lo mah se beiseina sâng tak ka va neih phah nasat tehreng èm!

Zep thu a cheng lo; ka veiin ka duh tak zet!

Mizoram pâwna a zin avangin khaw chhiat leh chhiat loh te ka záwt a, ani pawh chuan ruah a sûr mêk thu leh thil dang eng eng emaw ni a rawn sawi zui ve dut dut a, ka mood ṭha leh tawh lutuk te pawh chu amah vang a ni ka ti lo thei lo.

Kan inbe rei hran lo va, kan inbiak zawh chuan ka mu zui nghal daih a, kan mi ngaih leh ngaihtuah zâwngte chu mumang hmuh an awl an tih ṭhin kha a dik a nih ka ring. Ka mumangah te ka hmu hial a, ka ngaihtuah zui reng ṭhin tih chu ka pha lo, mahse mumang èma hmuh erawh ka beisei ngai lo hrim hrim!

"Vawiin chu ka thlah haw tawh ang che chù....?" pa Hminga lam chu hawi pawh ka hawi duh lo va, ka chhâng ang nge chhâng lo ang tihah ka rilru a insual mék záwk a ni.

"Nge ni a, ni dangah záwk ni ang?" a rawn tih zawm leh nghal zat a, tun hnai hian min hnimhnai zual viau bawk nen ka hlauthawng ru ṭhin khawp mai.

"Ka sawi tawh khâ......thlah ka ngâi lo, bus-in ka haw thei alawm......." dam fahran lova ka ti charh charh chu engah vak a ngâi lo a nih hmêl!

"A hun rih lo ni leh phawt mai rawh se, thlah haw hun che erawh ka la neih ngei ka ring" tiin a kal sawn ta nal nal a, chutianga em ema min thlah haw a châk tlat chu ka ngaih a ṭha lo telh telh záwk!

Kum 3 dâwn chu kan inhre ve tawh a, mahse a tira ka hriat ang kha a ni lo chho tial tial thung a, hmeichhe lawm tak a nihzia hre chiangtu tân chuan nêl der takngial pawh a ngama ngam chî ziazâng a ni lo.

Contractor mah ni se awm awl der der châng a ngah ṭhin hle a, dawra a lo kal lah hian nu Kimtei awm loh lâi tak a ni ziah lehnghal a, sawi chhuak ngam si lovin a bulah chuan a tua te pawh kan fimkhur ru kar vek a ni ber.

Tlaia ka haw in ka thleng fel deuh chiah chu ka nu hnen aṭangin phone call ka dawng zui zat a, ka pa nau fapa u Ruata lo zin thlak tur thu leh kan in luaha innghah a tum thute a rawn sawi zar zar a, thil dang sawi chhunzawmin kan inbe rei ta phian a, kan inbiak tawp tawh dâwn lamah chuan u Chhûanga pawh a lo thleng ve chiah nghe nghe!

U Chhûanga chu u Ruata lo zin thlak tur thu ka hrilh ve nghal sat sat a, an naupan lâi aṭang tawha inkawm nasa ṭhin tih takah u Ruata lo zin thla tur chu a phur thiam viau a, eng khaw sawi set set lo hian a call zui nghal nghe nghe a, an inbe thawm chu hre ve vek tho mah ila ka bengkhawn zui hran lo.

Nilaithawhṭannî a lo inher chhuah chuan ka rilruaah u Zorema a rawn awm nghal chat a, Lâtei thusawi pawh ngâthla ṭha mumal lovin ka ngaihtuah veng veng a, message-a min rawn hrilh dan kha chuan chawhnu lamah an lo chhuak ang a, thim hlim velah an lo thleng dâwn a nih hmêl a, ka phone number min dil pawh tih tawh nàk alâiin call leh whatsapp message thlenga min rawn bia min rawn be ve ta mai chu ka awih lo leh lek lek ṭhin hial a ni.

Zanriah ei kham hlim aṭang ka insu zung zung a, u Zorema a lo lèn ngei ka rin vang pakhat a ni. U Chhûanga pawh zan dang ang bawkin lèn chhuah leh a tum a, mahni chauha in lo nghah chu pawi tihna ka nei lo hran lo nàin a lo haw har loh tur thu erawh a sawi thlap a, in chhûngah chuan rei awm tawh lovin a chhuak zui ta nal nal bawk.

Chutia ka insuk mawlh mawlh lâi chuan kawngka a rawn inkik ri karh karh a, lo chhawn thuaiin u Zorema ngei a nih ka ring nghet bur a, mahse kan in chhûnga lo lut hmêl ka hmu chiah chu ka thil tih lâi ka tawp chiang teh e!

"Eng nge i lo tih dâwn?" ṭawngkam ṭha leh mâwia biak chî a ni lo tih ka hriat chian tluk zetin ka tân a hlauhawm tih pawh ka hre chiang hle.

"Ka lo kal chu i lawm vak na nge?" tiin a nui zui suk a, engtin nge kan in awmna a rawn hriat daih theih tih mawlh chu ka rilru luahtu pakhat a ni a, nu Kimitein a hrilh a nih ka ring ta hmiah bawk.

"Engati nge i lo kal?" a rilru ka hriat chian em avanga chutiang zawhna chu záwt tlang nghal rawt ka ni a, insuk pawh min insuk chhunzawmtîr hlei thei lo a ni ber.

"Ka lo kal thei lo em ni?" ti sam than hian a nui zui hak hak a, chutah amah bawk chuan

"Ka lo kal ta sa sa, thingpuite pawh kan in dun ang chû......?" a rawn ti leh nghal hiam hiam a, ngampa zet hian a tei kual thuk thuk a, eng tih mah ka châk chhunzawm tawh loh mai bakah a awm dan chuan hlauhthawnna min pe lo thei lo.

"Lo kal tur i ni miah lo pa Hming?" ka ti fiah kalh a, ka thusawi lah chu hria ang paw'n a awm duh miah lo lehnghal!

"Haw záwk la a ṭhat ka ring" ka tih zawm leh fak a, dik tak chuan haw thuai se ka duh hliah hliah; a chhan chu ka chungah thil pawi a thleng ang tih ka hlau a ni!

"I haw loh chuan u Chhûanga ka call haw dâwn a nia" ka ti leh ngat chu a rawn nui chhuak hawk a, ka ngenna anga a haw duh lo a nih chuan u Chhûanga call ka hreh reng reng lo.

"Dawhkana mi hi i phone a nih ngei ka ring a, mahse nang ai ka hnaih záwk tlat si a, i call thei lo chu a va nih hmêl ve" ti duahin a nui zui hek hek a, ka phone chu a là daih tak tak bawk.

"I awm dan hi a dik miah lo a nia pa Hming, ka phone kha min pe rawh" tia làksak ka va tum dawkana phone dah thla ri deuh rawk hian ka dar tawn tawnah a rawn hmer zawm nghal zat a, ka ṭe chhuak lo thei ta lo.

"Nu Sangte......!" tiin ka au tuarh a, mahse ka kâ chu a rawn hup nghal vat thung.

"Bengchheng siam miah suh, engtik hunah pawh ka nupui ka bàntîr thei reng che tih hre tel bawk la" ti khur khur hian ka âwm chu a kut pakhat záwk chuan a rawn nâwk zui zat a, chu veleh ka tha tawp chhuahin ka tal nghal phat a, thle sawn vakin ka kâ a hupna kut chu ka seh ta sawk bawk.

"Nu Sangte.......! Pa Ram.......!" ti chhuak leh nghal tuarh tuarhin a lak ata chu ka insaseng thuai thuai a, hlauh namên lovin ka hlau tawh a ni ber.

Dawhkan hnuaia chair chu ka pawt chhuak rawk rawk a, chumi pah chuan pa Ramngheta ka ko làwm láwm reng a, pa Hminga mitmeng tenawmnaa khat mawlh chu a ni hlau leh thlabâra min siamtu chu!

Min rawn pan hnaih a tum chu vuak tumin ka chair ken lâi ka lo lèk kang vat a, min hnaih zâwnga a rawn phei lui a nih ngat chuan ka vaw hreh reng reng lo.

Kawngka a rawn inhawn rik hrawk ruala pa Ramngheta hmêl ka hmu chiah chu chawp leh chilhin ka thlabàrna zawng zawngte kha a kiam duak a, vuak tum tih hriat taka pa Hminga ka lo tin ûr chu mak a tih hmèl hle bawk.

"Engati rum rum nge?" pa Ramngheta aw chu a bul nghut a, ka tlan phei titih nghal vat a, nu Sangtei pawh a rawn thleng thla ve thuai nghe nghe!

Thil thlen dan chu zep awm hauh lovin ka sawi par par a, dawt pakhat mah ka sawi hauh lo bawk nen pa Hminga pawh a inthlahrun hmêl ta viau a, pa Ramngheta chuan haw nghal turin a ti chang rum rut a, patling ve ve tih takah buaina dang awm belh tawh lovin pa Hminga chuan min chhuahsan ve nghal nal nal mai bawk.

Thil thleng zo chiah chuan thlamuangin min awmtîr thei lawk lo nghe nghe a, pa Hminga chu a rawn lèt leh ang tih mawlh ka hlau a ni. Pa Ramngheta te nupa awm lâi rengin u Chhûanga pawh chu ka call ta thuai a, dik tak chuan mahnia awm ka ngam tawh rih lo a ni.

Tin, pa Ramngheta chuan FIR theh luh a sawi ri hial a, mahse chutiang boruak èm han neih zui zel chu ka hnathawhna nen lam a nghawng dâwna ka hriat avangin ngawih bopui rih ka thlang ta záwk a, ka dinhmun ang rawn hrethiamtu tân lo chuan mawl pawh min ti ngawt ta ve ang!

U Chhûanga a rawn haw thlen tâkah chuan nu Sangtei te nupa pawh an chho ve leh mai a, chutia thil thlen dan u Chhûanga ka hrilh melh melh lâia kawngka a rawn inkik ri karh karh chu hlauhthawnnain ka khat chawpchilh titih der a, mahse u Zorema hmêl ngei mai ka hmu chiah erawh ka awm a nuam nghal sawng sawng thung.

Ka awm dan chu zawi zawiin a pangngai chho tial tial a, bathroom-a thawmhnaw suk tur la awm deuh nuaih te pawh ka suk zawm ve leh mai bawk a, u Zorema nen chuan zan dang ang lo takin kan inbe tam lo khawp mai.

U Chhûanga nen záwk an titi char char a, kan inbe leh zauh zauh ṭhin tih loh chu kan inbe mang lo ti ila a sual lo ang.

Dâr 9 leh a chanve dâwna haw a tum chu kawt zâwl thleng thlah turin ka ding chhuak ve nghal zat a, kan inzui chhoh hnak hnak lâi te chuan kan ngawi reng a, kawt zâwla a car húnna bul kan thlen tâk chinah erawh ṭawng loh theih a ni ta lo.

"I ṭha em?" amah záwk chuan a rawn ti sup a, nui lui seih pah hian

"Immm.....ṭha e" ka lo ti ve mai a, mahse a hmêl aṭang chuan ka thusawi chu a awih chiah lo tih ka hre thei thung.

"Zanin chu i danglam riau mai" a rawn ti hniam leh ruih a, ka awm danah chuan thil thleng a awm tih a hrethiam deuh reuh ni ngei tur a ni.

"Min hmu danglam mai mai a ni ang" tia ka phun deuh sep chu

"Ka mitah chuan engtik lâi paw'n i danglam reng alawm" a lo ti thum chhal a, ka melh nghal zawk nghe nghe!

"Chhuk tawh rawh le, ka lo en ang che" pain a fanu duat taka a be dam thluam ang mai hian a rawn ṭawng chhuak leh a, eng thu pawh sawi se a aw pà ruih ruih lutuk hi chuan a mil vek hial ang ka ring.

"Kal hmâsa záwk la, kei te chu chhuk a ni mai, a harsa hleinem" zan dang ang bawkin ka hnial leh a, mahse awmzia erawh a lo hle.

"Chhuk tawh rawh, a tlai lutuk hmâin....." a awah chuan min ngaihtuah tih hai rual a ni lo va, min en dan te chu tak ngul angin lang teh mah se a dam thuk ruih thung a, ka tân zawng vei loh a har thlawt a ni.

In chhûng ka luh fel hnu thleng paw'n a la tlan chhuak lo tih ka hre thei a, ka awm dan pangngai zàn lo chu a hrethiam ve deuh ni tur a ni. A car tlan hlâ vang vang thawm a ral riai riai hnu chuan mu turin pindanah ka lut a, hlauhthawnna em em ka nei tawh lo nà chu zan tir lama thil thleng khan min la chenchilh reng ti ila a sual lo ang.

Kâr thar kan chûang kâi a, kan khaw lam aṭangin u Ruata pawh a rawn chhuk ta ngei a, ṭawng duh ve par par chì tih takah a thawm a zàwi lo ṭhin khawp mai. DC-a documents buaipui fel neuh neuh tur a neih avanga lo zin thla a ni ber a, châm rei pawh a tum hran lovin ka hria.

Zan khat chu u Ruata nena kan titi barh barh lâiin u Zorema a rawn lêng lut a, u Chhûanga erawh a lêng chhuak fel leh der tawh a, u Ruata rawn awm chhûng a hmang ṭangkai thiam khawp mai.

U Zorema chu ka lo be nghal siam siam a, ka ngaihbel deuh nge pawh ka hre lo, amah rau rauah zan dang ai a ṭawng tlêm zual hle a, u Ruatan sawi tur a hriat êm vang pakhat te pawh ti ila a sual tam lo ang.

Dâr 10 pelh thleng u Zorema chu a lêng deuh ta reng a, haw zâi a rèl meuh chuan u Chhûanga lêng pawh a rawn haw fel diam tawh nghe nghe a, zan dangah te chuan dâr 10 rik hmâin a haw ziah ṭhin kha a ni a, tun ṭum erawh a dan a dang khawp mai; eng tak hria ni maw!

Kawt zâwl thleng ka han thlah leh thlap a, zan dang ang bawkin ka chhuk thlak hnuah a tlan chhuak ve ta chauh a, kan awm dan leh kan inkâr chu inngâizâwng ni chiah lo mah se nuam ka ti ru em em tho.

Tin, naupangchhe zawk zawk a nih tawh loh mai bakah a ṭawngkam leh chetphung a puitling deuh thlup ṭhin te hlei hlei chu ka duhna tizualtu pakhat a ni tawh nghe nghe a, Lâtei zia ka kâi tawh te pawh a ni ang; ka mipa duh zâwng a danglam ta êm mai!

"I bialpa chu a thikthu a va chhe rem rem ve......" in chhûng ka luh rualin u Ruata chuan a lo ti lung lúng a, chhàn lèt dan tur ka hre lawk lo nghe nghe!

"Ka bialpa a ni bawk lo e a!" ti halhin ka nui zui hak a, ani lah chuan mi ngàihnep hmèl zet hian

"Zep vel ṭit ṭet lo mai teh, a awm dan aṭang khan i bialpa a ni tih ka hre tlang nghal vek" a rawn ti leh ta zék a, u Chhûanga pawh a lo nui ruh ruh ringawt!

"Zep tur a awm reng reng lo, a rawn lêng ve ṭhin a, chu zawng chu a ni mai" zàngkhài vâha ka tih pawh chuan

"I ṭhianpa khan min thik tih hai rual a ni hleinem Helen, mipate chu kan mitmeng leh awm dan aṭangin kan inhrethiam thuai ṭhin alawm; hmeichhia leh hmeichhia in inhrethiam chak ang chiah hian!" a la rawn ti duah zui a, chhàn dan tur pawh ka hre tawh lo.

"Thil hi i inti hre ve ṭhin bawk sia....." ti deuh hlakin ka tho zui ta daih a, chutah amah bawk chuan nui vur vur chung hian

"Eng nge maw naupangchhia ang maia i awm tlat reuh le; nula ve uai tawh si!" a rawn ti leh hram a, chhiat khum vakin room-ah ka luhsan ta daih bawk.

A tukah chuan a hun pangngai aia hmâah kan tho va, zîngkâr boruak chu a vawt deuh suk a, nizan aṭang tawh khan u Ruata thusawi mawlh kha ka rilruah a la awm reng a, dik tak tak se ka tih rualin u Zorema nena han inngâizâwng tur èm chuan mahni insitna leh inhmuh hniamna ka nei lo thei si lo a ni.

Zirtawpnî a rawn inher chhuak a, ṭum dang ang bawkin sumo ka châng leh a, ka nute bungraw rawn thawn thlak erawh a tam lutuk hran lo va, u Ruata la awm se chu ka inchanpuitir ngei ang maw le!

A theih ang àng chu kudam-a dah nghal zung zungin a ṭhen inah ka hawn thung a, nu Sangtei te chawhmeh tur pawh an rawn thawn tel ve leh nghe nghe a, dawr lama lèt leh vat a ngàih avangin zana pekah ka dah ta mai.

Kâr lovah nîin tlák lam a hnaih tial tial a, ka hna bâng in ka thlen meuh chuan khua a thim fel ṭep titih tawh a, tlai dang aia kan haw tlai leh deuh hlek avangin ei rawng pawh ka bâwl hmâ hran lo hle.

Khua a rawn thim a, zan lam chu in chungah lêng chhovin ka nute chawhmeh lo thawn kan keng chho pah nghal a, nî dang ang bawkin nu Sangtei te pawh an lo lawm thiam leh teh e!

Zîng khua a lo vâr a, inrinni zîng tih takah kan buai leh mawp mawp hle a, mipui pawh an rawn chhuak nasa sap sap leh tawh viau bawk.

Dâr 7 velah u Zorema hmêl pawh ka hmu leh ta ngei a, ka buai lâi tak a ni kher bawk nen amahin a lo inthlan ve mual mual a, ka mit hmuh ngeia a rawn inlan leh tâkah chuan ka mood pawh a dang leh ta sawtin ka hria.

"Zo....eng nge i tih ve a…..?" hmeichhe awki sâng vah chuan ka beng a verh nghal zar a, u Zorema dinna lam ka hawi chho zeuh chu an lo indin chilh titih der tawh nghe nghe!

"Ka bazâr lawk......" u Zorema pawh chuan a lo ti ṭha ve mai a, inbêng fai deuh thak thak paha ka melh ru leh zeuh zeuh ṭhin tih loh chu en pawh ka en rei duh lo.

"Awi, i inhmeh lo ê......tun ang huna hmuh che hi ka inbeisei miah lo asin" chu nu bawk chuan a ti leh har har a, nuam ti ching cheng ang hrim hian a nui sâng leh ta nghal a, ka lo thik ru ve em em ringawt!

"Inrinni zîng hi chu ka bazâr ziah alawm" u Zorema chuan a ti ve leh dut a, an awm dan vel chu en loh ka tum pôh leh en châkna hlirin ka khat tlat lawi bawk si!

"A nih i bazâr zo tawh em? Kei ka bazâr zo tawh a, haw rual ila?" hmeichhe aw chu a la ri phar phar a, u Zorema lah chuan

"Zo chu a ni mai" a lo ti sam than leh ta nghal a, thik loh tum paw'n ka thei thlawt lo chu a ni e.

"A nih chuan haw ila?" u Zorema bâna kuah thar thartu hmeichhe hmêl chu chiang ang reng tak hian ka en a, mahse ka en rei lem lo thung.

"Kal ang......engati nge i la din reng?" chu nu bawk chuan ti nêm leh thlîam hian u Zorema chu a pawt kal titih a, an bul lawkah ka lo awm ve reng bawk nen hmuh kan harsa tak an ni!

"Ka kal mai aw......?" u Zorema min biakna chu hre lo ang hmakin ka awm lui ngar ngar a, zep thu a cheng lo, ka rilru a nâ ru veng veng a ni ber e!

"Helen......?" a rawn tih leh sup tâkah chuan hawi chhuak hluai pah hian

"Aw.....eng nge ni ta?" ka ti zàngkhài lui vâh a, ka duh phak ni miah lo mipa ka lo duh ruk ve em em ringawt avang chuan a vawi khatna atân inchhirna rilru ka pu nghe nghe bawk.

"Ka kal aw.....?" u Zorema mit leh ka mit chu a intawng chat a, nui lui sâng hian ka buk khum nghauh nghauh a, mi erawh a en chîk ren run kher mai.

"Kal tawh ang, dawrah min kal kawipui leh lawk la ka duh a nia…..." tia a hmêlhriatnu a rawn inrawlh leh tâkah chuan an kal sawn zui nghal ta nal nal a, mawl ka inti thar hliah hliah bawk.

Kal paha a hmeichhia záwkin a be nui sun sun te chu rei en duh lo teh mah ila ka mit erawh anmahniah ngawt ngawt a fuh tlat ang leh ta nghal a, ka bula a nuih khàt tehreng nen hmeichhe dang nen an awm dun tâk avang maia a nui hmêl a lan chhuahtîr bîk te hlei hlei chu mena thlak mai a harsa ngawih ngawih!

Tlai khua a lo ngui a, ruah sûr tur inṭham mup mup chuan ka mood a ti off zual hle bawk. Vanneihthlak takin khaw tim tak tak hmâ chuan kan inhralh zo hlauh a, khua a dur ṭha viau nàin ruah erawh a la sûr lo hram hram a, chawhmeh zawrhna atâna kan thil phah ka thleh lâi te chuan thli a thaw vûk vuk a, ruah chu tam mangkhenga a rawn sur ṭeuh pawh a rinawm khawp mai.

"Kan khuaa kan haw chhoh vat a ngâi Helen, ka nu nen kan inbe zo chiah a, pa Lura a boral thut a ni àwm e" u Chhûanga hnathawk bâng chu a rawn thleng deuh hlawl a, eng dang zawng aiin a thil sawi mawlh chuan min ṭhawng tak zet!

"Màw.....? Pa Lura a boral maw!?" mak ti zet hian ka ti hliai a, chutiang thu dêngkhawng chu vawi leh khata hriat thut ka inbeisei lo êm bawk a ni.

"Aw.....buai pawh an inbuaipui hman lo, a rang khawp mai, inah haw thuai ila, chaw ei khamah chhoh nghal kan tum dâwn a nia" a rawn tih leh zung zung tâkah chuan mûangchànna chî a ni lo tih ka hre chiang ta hle.

Kan chawhmeh zawrhna bungraw ṭhenkhat chu u Chhûangan bike-in a phur haw thuai thuai a, kei erawh two wheeler taxi-in ka haw thung a, in kan thlen rual rual chuan intifai zung zungin kan inhnawh puar zui nghal sawk sawk a, chaw ei khama ka phone ka'n hmet éng chiah chu ka nu hnen aṭangin missed call vawi thum lâi a lo awm vâ a, engmah ka lo hre lo ni ngei tur a ni.

Ka call back nghal thuai nà chu a là thei lo ve thung a, pa Lurate in lamah an buai a nih ringin ka call chhunzawm zel duh ta bîk lo. Nu Sangtei te pawh kan chhûngte an boral thu leh kan haw nghal ngei ngei a ngaih thu chu kan hrilh ve nghe nghe a, bike-a kan inphur haw tur erawh min huphurhpui viau a, pa Ramngheta lo haw tawh phei se chu motor-a chhoh a sawi ri hial a, an in hnuai luah kan nihna angin min ngaihtuah thiam khawp mai.

Kan khua kan han thleng chu kan inah kan lut kawi hmâsa zawk a, rei pawh awm lovin pa Lurate in lam pan chuan kan inphur chho zawm leh nghal thuai bawk. Rilruah eng dang reng a awm thei tawh lo va, chan loh khana pa Luran min boralsan ta mai chu mak ka la ti tawp thei lo a ni.

Zîng lam dâr 2 a ri thuak tawh a, ka mitthlâah chuan pa Lura hlim hmêl te, kan naupan lâia min duat em em ṭhin lâi te kha a rawn lang zut zut a, insum hlei thei lovin ruang bulah chuan ka insût feih feih a, mi nung a ni tawh lo kumkhua tur chu ka ngâithiam thlawt lo; mihring nuna thleng ngei tur mah ni se hriatthiam a harsa tak zet!

Thihna hi zawng pawm thiam mai a finthlak rualin a nghawng erawh namên lova nâ leh tawrh harsa a ni lawi a; hringnun dam chhûng tawizia leh hlutzia hrilhfiahna ṭha ber te pawh a ni ta ve ang!

"Bawihi, i nu nen khan zu mu hahdam tawh mai rawh u, in chau lutuk palh ang" ka pa chuan a ti dap dap a, mipa mah ni se ṭap tih hriat tak hian a mit chu a bui ve lûk tho.

Ka nu nen chuan hnial pawh kan hnial hran lo va, zîngkâr aṭangin ka lo che hah ve bawk nen khuma ka'n mu chiah chu muhil zui nghal thei mai dinhmunah ka ding a, ka awm dan aṭang chuan ka nu paw'n min hrethiam a ni mah nà; biak pawh min be duh lo hrim hrim! 

Ka lo muhil ta ngei chu niin, ka harh leh meuh chuan nî a lo kàng sâng viau tawh a, vuina hunserh pawh a lo hun ṭep tawh nghe nghe!

Vùinaah chuan kan khaw pastor-in hun a hmang a, ka pa'n pa Lura chanchin tlangpui thu a sawi zuaih zuaih bawk a, ṭhenrual pâwl mi tih takah vùinaah chuan mi lo kal pawh an ṭhahnem ang reng hle a, an sawi tam ber chu pa Lura fel thu leh kawm a nawmzia thu hlir a ni a, thlanmûala an phum dâwn lâi te chuan a nupui fanaute’n ṭap hawm hawm chungin an thlah liam a, kei erawh a sârhu lâi ang em em kha chu ka ni tawh lo thung.

A chhûngte chu thuhran ni se, ka pa mawlh chuan a tuar nâ ve hle tih hai rual a ni lo va, pa Lura dam lâi pawh khan inchhang bung chiah tih takah an inkawm tam bîk em em a, nupui fanau nei duah tawh e ti lovin an pahnih chauha chhuah dun te kha an hrat thei em em a, an ram riahnaa kal ve phei chu an phal lo ṭhin hial záwk kha a ni a; mahse tunah chuan an inhmu leh tawh ngai dâwn si lo!

Kan in chhûng chu a reh deuh ṭhiap a, kan awm kim vek nàin a tua ma'n ṭawng kan châk rih lo te pawh a ni ang. Ka nu nen tapchhak lamah kan ṭhu a, ka pa leh u Chhûanga erawh TV bula ṭhutthlengah an ṭhu ngawi ran thung a, pa Lura thihna chuan kan rilru leh ngaihtuahnaah nghawng a la nei thui vawn vawn hle a ni ber e.

Pindan lama ka phone ri ral ral avang chuan tho zui nghalin ka phei chhat chhat a, min rawn call-tu ka hmu chiah chu ka là ang nge là lo ang tihah ka rilru a insual nghal nak a, pa Lura thihna avangin ka mood a ṭha lutuk lo kher bawk nen làk ai làk loh ka thlang ta záwk a, mahse rei pawh ni lovah phone call a rawn luh zawm leh nghal zat thung.

"Immm......" ti thawp deuh sapa phone call ka chhâng zo chiah chu

"In khaw dâiah ka awm mêk......" a rawn ti hlawl a, ka va han hamhaih tehreng èm!

"Màw.....!?" ka ti chhuak hap a, ka zawh nawn kherna chhan tak pawh a thusawi zawh chiah chuan min ṭhawn êm vang a ni.

"Khawiah nge in in a awm?" ka zawhna pawh chhâng chuang lovin a rawn ti leh sup a, kan khua daih daiha a lo kal chu mak ka la ti fan mai; chutah Pathianni ah lehnghal!

"I lo kal tak tak em ni?" ka aw chhuak chu a thâm deuh chhal a, pindana awm reng lovin pâwn lam ka pan ta thuai bawk.

"Kal tak tak e, khaw chhûng ka lo lut dâwn chiah, khawiah chuan nge in awm?" dam dapa a rawn tih leh tâkah chuan

"Ih......eng lo.....kawngpui dungah lo tlan chho tawp mai rawh, ka lo ding lang ang" ka ti ve ta nge nge a, niminah te kha chuan a laka ka lungàwi loh mai bakah ka rilru puthmang thlak ka duh hman hial kha a ni a, mahse tunah erawh chawp leh chilhin a hmâ ang chiah khan ka awm leh vek tawh a ni ber.

"Aw le" ti sup hian kan inbiakna chu a hmet tawp zawm zat a, kei pawh kawngpui lam ka pan ding chho zui nghal chu a ni mai.

Kâr lovah kan inhmu ta ngei a, car chhûnga lut tur leh thil min sawipui tur a neih thu a sawi chuan hnialna pawh nei lo hian ka ṭhu lut zui ve nghal mai a, khaw pâwn lam panin kan tlan par par a, hriat nuam taka min biakna ka chhâng leh zeuh ṭhin tih loh chu ka ṭawng mang lo a tih theih!

Kawngpui sîra teak thing lo din thluahna zawnah chuan min dinpui a, ngawi reng hian a chhuak tharh a, car chu a hel kual zui nghal thauh thauh a, ka chhuak tur pawh min rawn hawnsak deuh thlap nghe nghe!

Car aṭanga ka chhuak fel chiah chu ka kutah a chelh nghal chat a, eng khaw sawi set set lo hian min kuah nghal ringawt bawk a nih chu!

Mak ti ru tak ka ni!

"A zia lo hle mai" ti thum chhalin ka hnung chu a chûl dap dap a, ka va han danglam nasa leh tawh tehreng em; ka taksa awm dan aṭang chuan a hriatthiam ve vek pawh ka ring!

"I awm lo thut erawh ka ngaihtuah hman hle che a ni" ti hniam leh sup hian tlêmin min nam hlâ deuh hret a, kan inmelh chiang ngang ngang ta viau bawk.

"In in luahna te khan in chanchin min hrilh lo se chu ka buai hman viau ang ka ring" tih zawm leh zatin tawi tê hian a kiai zui suk a, eng thu mah sawi tur ka hre ve lo a ni ber.

Thaw huai chung hian ka sam hnawk deuh niai chu a hui kiang a, kan inen hnai mah mah bawk nen ka rilru leh ngaihtuahna pawh a ruak vek hialin ka hria.

Hmêl thutak ang reng deuh, mahse hmuh hahdamthlak ru em em si hian min en deuh vung vung a, chutah kun hniam riai riain ka hmuiah tak a rawn fawp ta mai; ka va han meng fiah kalh kalh tehreng êm!

A inlàk hran hnu pawh chuan ka la ṭang khawng awt reng a, kut hum ruh ngar ngarin ka ding mar ât bawk a, ka thin phû rang nghal dawt dawt te chu a hriat phak vek ka ring hial a ni.

A kut lûm thar thara ka biang a'n nûl thla riak riak zui zat phei chu a mur hian ka mur chhuak uaih uaih a, dawnsawn ngaihna rèng ka hre lo a ni hawt e!

"Ka thinlungah hian i mikhual tawh lo hle asin Helen" thum dam dapa a rawn tih leh chuan ka chil ka lo lem dawk a, phat rual lovin a huhâng nâ zet chu ka zo lam lek lek zawng a ni e!

Ka lama a rawn kun hniam leh riai riai lâi te chuan engkim hre vek siin dan tumna erawh ka nei miah lo lawi a, ka hmuiah bawk a rawn fawp nawn leh chiah chu ka mar phû zawng zawng nen lam an ding ṭhuap ni mai te'n ka hre hial a, ka taksa khawilâi mai pawh chu a fawhna zun zâm chuan a kil ber leh chhûngril ber thlengin a fan raih raih a, ka hmui pet ngawng ngawng chunga min kuah hnaih salh lâi te chuan a tih ang àngin ka lo awm tawp ringawt!

A mi fawhna; tûr chak tak ang maia danglamna thlen thei leh thil tithei chu ka tân zawng lo do zawh rual a ni lo e!

Ka rilru a fìm meuh chuan thin phû dep dep hian a âwm chhah lûm ham hamah ka lo bei hle hle reng tawh chu niin, hahdam ngawih ngawih tih hriat taka inlàk hran tumna ka nei miah lo te chu ani ang tlangval lung fîng chin tawh tân phei chuan hriatthiam loh theih pawh va ni suh!

Inthup sen lah a ni tawh hek lo; zawhna leh ṭawngkâ tel hauh si lovin min inpuantîr hnehsawh ém a tin a ni!

End of chapter 3