𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟏)

 

ZOREMPUIA

(Mizo Romantic Novel)

By

Havali Adam

Chapter 1

Hringnun hi zawng mak tih piah lam a ni a, sawifiah phak baka mâwi leh hlimawm nih châng awm ṭhin mah se chànna leh duhamna te, fel hlel riaua hriatna leh harsatna lo thleng zut zut ṭhin te, lungngàihna leh beidawnna te, huatna leh inchhirna te nen kawng khat zawh dun ang hrimin an inlan chhawk awl lo leh lawi si ṭhin a nih ber hi màw!

"Kha.....mi'n an biak che khâ……?" nu Ṭanzuali aw chuan ka ngaihtuahna ata min tiharh chhuak zawk a, hmâ lam ka hawi chiah chu za lo zet hian ka nui sen sen ringawt!

"Aw…..lo thlang rawh, eng nge i duh ang?" ka ti nghal ta zung zung a, ngawi renga ka thlai zawrh lâi thlang mual mualtu erawh ka biakna chu hria ang paw'n a awm lo.

"Vawiin chu a tharlâm hlawm asin, kg eng zat nge i duh ang?" ka tih zawm leh zat tak náin min chhàn nghal mai ka beisei lem lo thung.

"Kg 1 a ni mai" zawi hniam ruih hian a rawn ti sup a, mak pawh ka ti tawh lo, ni danga min dawr paw'n ani hi chu a ṭawng tam lo ṭhin ve hrim hrim!

"Eng nge thil dang i duh belh ang? Lêngser te hi a tlâwm asin, ṭawn khat hi chêng 20 man chauh a nia, samṭawk te pawh kha bawkbawn nen a rate a inang reng, lei nghal law law la, bai pawlhin a tui duh lutuk......." ka ti leh ta mawlh mawlh a, sumdâwng mi nih hi chuan ṭawng zung zung a ngâi ṭhin rèng a ni.

"A nih chuan buk leh nghal mai rawh" rawn ti ve leh supin lêngser chu a ban zui zat a, a bazàr bag khài lâiah chuan a khung zui nghal ta daih bawk.

"Tukin chu i tlai deuh a ni maw?" samṭawk buk mial mial paha ka tih chuan

"Immm........." tih bakin min chhâng lo va, zawhna dang ka zawh belh zel ta bîk lo.

Ka buk zawh rual chuan a bazàr bag khàiah ka dah luhsak nghal thlap a, pawisa nawi a lo neih sa diam avangin chawhmeh man pawh kan inpe fel har lo hle. Min hlat zâwnga a kal sawn nul nul chu en zui loh ka tum zet nàin ka en zui leh ta hram a, ni dangah pawh ka en zui ziah a, tuna taka en zui loh ngawt zawng ka thei lo a chhá chu a ni e!

Ni e, ka hmuh hmasak ber nî aṭang tawh khan ka mit a là ru em em reng a, tun thlengin a la là zui zel a, fel pawh a fel viau ka ring. A chhan chu inrinni apiang hian mipa mah ni se chawhmeh leiin a rawn bazâr ve ziah a, mipa an bazâr thei lo ve tihna lam ni lovin, min dawr ziah mai bakah ka sawi ang apiang a lei mai ṭhin a, tlangval fel tak a nih ka ring hmiah bawk.

"Nichin khan eng nge i lo ngaihtuah a? Khati chen chen mî biakna pawh han hriat loh chu!?" rawn titu nu Ṭanzuali chu ka nuih lèt sak a, chhàn loh aiah tiin

"Thil dang daih ka lo ngaihtuah alawm le......" ka ti liam puat a, thlai rah leh thlai hnah zawrh lâi chu rem felin ka che zawm ta daih bawk nen min be zui zel ta bîk chuang lo.

Chawhnu her a ni ṭan dek dek e ti lo chuan kâr lovah khua chu rawn hniam nghal ruihin a dur deuh khup a, ruah pawh a sùr har a rinawm loh hle. Thlî lah chu a thaw vúk vuk ang leh ta nghal a, thil zawrhna atâna kan hman kan thil phah lâi pawh a rawn theh lip ṭep ṭep a, beisei ang ngeiin ruah chu a rawn sûr zui ta buan buan bawk.

Fur lâi tih takah tun lai chu ruah a sûr duh cher cher hle a, chawhmà lama khua a ṭhat paw'n chawhnu lamah a sûr leh tho va, chawhmâ emaw chawhnu emawa a sùr loh paw'n zan lamah tal a sûr tho ṭhin. Zana a sùr hi chuan pawi tihna ka nei lem lo thung a, a chhan pawh mut a titui duh viau záwka ka hriat vang a ni.

Ruah a sùr miau avangin a tua mah kan inzûar thei lo va, chep zet hian hmun khatah kan tawm khawm ṭhap a, inhralh zawh thuai thuai duh nâk alâiin ruah lah chu a sûr han mai lo lehnghal a, capital pawh hralh chhuak lovin kan châwi ang tih mawlh ka hlau ta ber mai.

Kan thlai zawrh te hi a tam zâwk chu man neia lâk chhawn leh khar chhawn deuh vek a ni hlawm a, tlêm azâwng erawh ka nute min lo thawn a awm ve nial nual a, a dang zawng chu khar chhawn vek ti ila a sual lo ang. Chutianga zûar kan nih avang chuan hralh mang lova awm ka hlau em em a, ṭum dangah hralh zo ziah ṭhin mah ila tun ṭum chu chàwi ka hlau ve tak zet!

Dâr 3 leh a chanve vel daihah ruah pawh a han fel ve ta nge nge a, beisei ang kan la inla inhralh lo mawlh chu ka rilru tibuai ru em em tu pakhat a ni a, a dang lehah chuan khaw thim hnua haw ka phur hlawl lo a ni. Ni dangah chuan khaw thim hmâa haw ziah ṭhin kan ni a, tun ṭum erawh kan tlai hle dâwn a nih hmêl!

"Kan la haw hman dâwn na nge?" u Chhûanga hnathawk bâng lo thleng chiah chu en zawkin ka buk khum zeuh a, tam tia han sawi tur em em ni tawh lo mah se kan inhralh zo lo ang tih ka hlau ber.

Hmanhmawh kan ngâi tih inhre chhuak zawkin ka che zui sawk sawk a, samṭawk leh bawkbawn te chu buk buai ngâi lovin polythene chhûngah ka khung ta mawlh mawlh bawk. Au a ngaih châng lah a tam a, mahse kan inhralh zawh theihna tur a nih phawt chuan zah lam rèng rilruah a lang thei tawh lo.

Inhralh zawh loh hlau reng renga chawhmeh kan han sale chur chur tâkah chuan dâr 7 dâwnah kan inhralh zo thei ta hram a, taksa lamin tûar deuh mah se rilru erawh a hahdam tawh viau thung. In kan thlen chuan u Chhûanga inbual hlanin ei rawng ka lo bâwl thung a, in kan thlen aṭanga rei pawh ni lovah ruah a rawn tla leh ta cher cher a, mut hahdam der der a chakawm tawh khawp mai.

U Chhûanga a inbual zawh hnu chuan inbual turin bathroom-ah ka lut zui ve nghal a, chawhmeh vil chauh a ni tawh bawk nen ka inbual zawh hunah zanriah pawh kan ei nghal theih mai ka ring.

U Chhûanga nen hian mî in hnuai luahin kan khawsa ve nàw naw a, mite angin lehkha zir sâng ni lo ve ve mah ila hlawhtlin tumin kan bei ve ṭauh ṭauh ṭhin a, têt té aṭanga min enkawl seiliantu kan nu leh pate chawm lèt ve tawh kan duh vangte pawh a tih theih ang.

A bîkin u Chhûanga záwk hi; Aizâwla kan awm thlak tirh kha chuan a rem rem a thawk kual mai ṭhin a, cement work lam a thawh loh leh zan rei tak tak thleng ṭheka-in a inhlawh fô va, welding lam hna a thawh châng pawh chhiar fê tham a ni a, sum mamawhna avanga hna a thawk kual nasa lutuk kha ka lo khawngaih záwk hial ṭhin.

Kei chang pawh ka bang chuang lo, panhnah roll leh kuhva thela ka inhlawh ṭhin lâi te kha a tam em em a, mi reithei tân chuan engkim kha a harsa a ni. A beiha kan beih tak meuh a ngâi bîk ṭhin a, mite'n awlsam têa an neih leh an hmuh mai ṭhin kha keini ang; pawisa thawh chhuah duh avanga thingtlâng aṭanga khawpui pan thla ve rawih tân kha chuan theih tawp tak meuh chhuah a ngâi ṭhin a ni ber!

Aizâwl kan kum 3 awm tlin kumah kan in luah kan sawn a, inluah man a tlàwm záwk vang a nih rualin a neitute an fel em em vang a ni pakhat bawk a, kan inhriat dan pawh keini thlai chawhmeh zawrh an rawn lei ṭhin aṭangin a ni nghe nghe a, chu kan insawnna in chu tuna kan in luah mêk hi a ni a, kan in luah hmasa zâwk neitute nen kha chuan inang lo hliah hliah tak an ni!

Chhûngkawpa ber hi pa Ramngheta a ni a, pa ṭawng tam lo ve tak leh hmêl rorum el ul lam lek lek mah ni se a zâidam em em thung a, chhûngkawnu ber nu Sangtei lah fel bawk, hawihhâwm bawk, ṭawng duh bawk ang chî hi a ni a, anni fel leh rilru ṭhat azârah u Chhûanga paw'n hna pangngai tak thawh tur a hmuh phah nghe nghe bawk.

Motor siamna dawr lian leh changtlung tak neiin pa Ramngheta hian a enkawl deuh chawt a, chu dawrah chuan u Chhûanga pawh a thawk ve a, kan naupan lâi aṭang tawha thil siam neuh neuh peih mi tih takah motor part thlak leh han siam ṭhat vel chu nuam a ti tih hai rual a ni lo va, kei ngei paw'n a thawhna tur hmun dik takah a thawk ni maiin ka hria.

Tin, pa Ramnghetate hi chhûngkaw awhawm leh inpawh tak an ni a, fa pathum neiin an fapa upa ber hi phâiah lehkha zirin a awm bo rih mêk a, mi dang pahnih ve thung chu nu leh pa kâra awmin han inhauh bawng bawng chângte pawh nei ve ṭhin tho mah se an lungawi lohna erawh nîin a tlâkpui leh vek ṭhin a tih theih àwm e!

An tê ber hmeichhia hi a ṭe hiar ve leh zauh ṭhin tih mai loh chu in hnuai aṭang paw'n an thawm hriat a hlimawm thei em em a, nu ber leh pa ber an han inchhaih nuih uarh uarh tawh phei chuan an chhûngkaw boruak a hrisel tih a hriat ngawih ngawih ṭhin.

Pa Ramngheta ṭawng ri hriat mai a awlai loh tehreng nen nu Sangtei erawh a awrâwl a ring em em lawi a, an inhmangaih tih lah hai der theih pawh va ni suh!

"Mut hmâin ei tura kan hawn chawhmeh ṭhenkhat saw pa Ramnghetate han pe ṭhen ve la a ṭha ang" u Chhûanga mu turin a rawn tih chuan ka lo buk khum nghat a, pêk chhoh chu ka thil tum sa hrim hrim a ni.

Ruah a sûr tam vak lo nàin nu Mâmite chawhmeh pe tur chuan nihliap ka khum chho ta tho va, an in chhûng ka lut chu min lo be nghal siam siam a, an fapa naupang zâwk Tharthara phei chuan thingpui min siamsak tumin choka lam a pan phei nghal tharh tharh a, nu Sangtei ni se lêng ve rih turin min ti tlat bawk si nen tum loh deuhin ka lêng deuh reng ta ringawt!

Zan hun a ral a, zîng nî chhuak èng mâwi tak chuan chawlhnî thianghlim leh duhawm tak a rawn her chhuahpui a, u Chhûanga nen pawh inkhawm turin kan insiam malh malh a, biak in awmna a hlâ hran lo bawk nen kein kan kal mai zel a, nu Sangteite nena kalho châng pawh kan ngah ṭhin viau!

Inkhawm kan bâng a, u Chhûanga chu a ṭhiante ina a lèn zawk tur thu sawiin a inkhalh chhuak zui nghal daih a, kei erawh inah ka awm hahdam der der thung a, chawhnu ka inkhawm peih dâwn chuang lova ka hriat avangin ka mu ta daih nghe nghe a, ka harh leh meuh chuan khua a lo hniam ruih tawh a, ei rawng pawh bàwl a lo hun der tawh bawk.

"Chhûanga inkhawm a tum na nge?" ka zan inkhawm kal tur pa Ramnghetan min be ve teh nulh chu mak ka ti rum rum hman hial a, an in hnuai kan luah e ti lo chuan min be hmâsa khât viau a, ka be hmâsa a nih ngawt loh chuan min be hmâsa ngai lo tluk a ni.

"Aw, nia.....ka sâwm a, a peih chiah lo va, kei tal ka'n inkhawm hram ang e" ti pangngai diaia kal zui nghal mai ka tum chu

"Min lo nghak rawh, kan kal rual dâwn a nia....." ti bul deuh dutin in chhûng lama luh a rual a, kei erawh ka kal tho ang nge ka nghak ang tihah ka rilru a buai nghal nak thung.

Rei pawh thang lovin pa Ramgheta chu an fanu Chhanchhani pawm chung hian a rawn chhuak leh ta ngei a, nu Sangtei leh Tharthara paw'n a hnungah an rawn zui ve nghal a, mahni chauha kal ngawt ai an chhûngkaw bula kal chu a nuam lehling ta phian bawk.

A tukah chuan ka thawhna dawra kal turin ka insiam malh malh a, u Chhûanga erawh dâr 9 rik hmâin a chhuak fel daih tawh thung.

Tunah hian puan ṭhuina dawrah ka thawk ve mêk a, kum 2 ngawt chu ka thawk ve tawh nghe nghe a, kan dawr neitunu nu Kimtei nen pawh kan innêl hle a; chutiang bawkin ka thawhpuite nen pawh!

Puan ṭhuina dawr mah ni se engkim kan ṭhui thei vek titih a, order lo lut reng reng ṭhuitu tur bîk kan awm hrang thliah thliah a, dawr chhûng pawh a tê chhe lo khawp mai.

Pâwl 12 thleng bak zirna ka rah loh avangin hna sâng tak thawk turin ka inbeisei ngai lo hrim hrim a, mahse puan ṭhuina dawra ka thawh tâk aṭang khan hna sâng leh sâng lo hi a lo ni vak paw'n ka hre ta lo; pawimawhna leh kawngro a sutna chen chu awm tho mah se tuina leh nuam tih zâwng hi a pawimawh ta ber zâwkin ka hria!

"Helen, Lâtei nen khan ei tur va lam lawk mai ta che u, vawiin chu an indaih lo deuh a ni ang" kan thawhna dawr neitunu nu Kimtei chuan phone-a mi a biak zawh rualin a rawn ti zui siam siam a, keini ṭhian dun pahnih pawh chu kan tho ve nghal mai bawk.

Lâtei nen hian kan thawh dun tirh ata tawh hmuh theih khawpin kan inkawm hrang deuh chawt bîk a, ka tân chuan ṭhian ṭhaah pawh a ṭha ber te zînga mi a ni a, rilru hah châng leh mangan ruk châng pawha engkim ka thlen ngamna a ni nghe nghe!

Tin, Mamit lam mî niin chhûngkaw awm thei tak an ni bîk lo va, dinhmun inang khat tlâng tih takah kan rilru sukthlek pawh a inzûl ṭhin khawp mai.

"Kâr leh chu ka haw thut a ngâi dâwn a nia, nu Kimtei min dilpui la a ṭha ang" chhun thil ei tur lam tuma kan kal lâi chuan a rawn ti thuak a, en pawh en chuang lo hian

"Engati maw i haw thut dâwn?" ka lo ti ve mai a, ka hrawk ka thian ri zui kharh bawk.

"Ka nauin nupui a nei dâwn a........" ka hmêl aṭang chuan a thusawi chu ka ring chiah lo tih a hriatthiam ngei ka ring.

"Ka va awih chiah lo ê......" ka ti nàng náng a, ka awih lo tak tak!

"A ni alawm, nupui a lo ru haw ve khanglang a, an inrukna pawh a rei ve leh tawh, ka hrilh duh lo mai mai che alawm......" Lâtei chu enin ka nui zui hak a, ka nuih chhan erawh a hriat loh hmèl kher mai.

"A tih khalh dâwn che a ni màw?" fiamthu rawngkâi deuh taka ka tih chuan

"Awi, ani hi chu a buaithlak ṭhin a nia, ka nu'n min hrilh tirh khan ka awih duh lawk lo va, mahse a lo ru haw tak tak chu niin, ka pa phei chuan a nuih tawp ringawt a ni awm e" a rawn ti leh ta niah niah a, za lo tih hriat zet hian a nui hul hak bawk.

"A nih nang, inrinni khan i hmu leh em?" a rawn tih zawm nghal daih a, ka meng buai hman viau nghe nghe!

"Tu chu maw?" hniam fân raiha ka ti zo chiah chu

"Awi, hrethiam lo der vel lo mai teh!" min ti ta érh a, hrethiam zui ve nghal mai tih hriat taka ka nui pàt pàt chu min ei loh hmêl teh e!

"Hmuh chu hmuh leh ngei e, thil dang daih ka ngaihtuah lâiin a lo kal a" engah mah ngâi lo àwm ang hrima ka tih liam puat chuan

"I mood a on phah leh vek dâwn ngei a nih chu!" a rawn ti ve leh zat a, min hre chiang thawkhat bawk nen sawi dik loh pawh a nei chuang lo.

"Nia....." tih leh tawi têa nuih sak ka rual a, ni dang ang lo takin engmah min zawh zawm lo ve teh mial bawk.

Nî en dan chu a inthlak danglam riai riai a, chawhnu her pawh a rawn ni chhunzawm nghal chu a ni mai. Chawhmâ lama nî sâ ṭha viau si kha chawhnu lamah erawh khua a duai leh ruih tawh thung a, tunlâi chu nilênga khaw ṭha hmuh nî kan nei ngai lo a ni ber e!

Rin leh beisei lâwk ang ngeiin dâr 4 velah ruah chu a rawn sûr ta buan buan a, bus ka chán lâi tak a ni nghe nghe a, nihliap keng hlauh lo phei ila zawng bus chán chhûng ringawt paw'n ka huh hman vek thei ang ka ring.

Chutia bus chànga ka din veng veng lai chuan ka hmâ zawnah tak car pakhat hi a lo ding a, glass a in-down ruala ka mi hmuh erawh hmuh inbeisei lo tak ka ni!

"Bus stand-ah hian ka ding reng thei lo a nia........" car chhûnga lut turin min sâwm nge mi dang a be zâwk pawh ka hrethiam lawk lo va, ka hawi kual vel thuak thuak chu meng zim sun hian min lo en reng lehnghal!

"Keimah maw........!?" mawl hmel deuh hian ka ti hê hû ta ringawt!

"Lo lut rawh, bus a lo thlen ṭep ka ring" awkâ dam lam lek leka a rawn tih leh chuan keimah ngei min bia tih ka hrethiam chawpchilh ve nghal mai bawk.

"Lo lut thuai la........" ngawi deuh ren rawna ka din laiin amah bawk chuan a rawn ti hniam leh nghut a, min biak zâwh chiah dan ang lo takin a aw chu a bul ta mah mahin ka hria.

"Ih......eng lo…....bus lo thlen hun ka nghak tlang law law záwk mai ang, ka lawm lutuk tho a nia......." ṭawngkam mâwi ka hmang satliah pawh a ni lo; hmêl te chu inhre mah ila car chhûnga han chûang dun tur ém erawh chuan inthlahrun a nâ ka ti!

"Lo lut rawh le, ka lo thlah ang che" eng vanga min thlah tum teh tlat nge a nih pawh chu keia va hriat phak a ni hauh si lo, kan inhmêlhriat dan ni se a holam ang reng viau bawk si!

"I ti tak tak em ni?" ring vak lova ka la ti hram chu nin hmêl a put ka rin tehreng nen hmêl dam thlup hian min en run ang lawi a, hawi sawn hmâsa záwka ṭan loh pawh tum ila a theih loh chu a ni e.

"Ti tak tak e......" a rawn tih ve leh dut tâkah chuan

"A nih....." ti ban deuh chap hian a dinna lamah chuan ka pen phei zui nghal chhat chhat a, chutiang dinhmuna han chûan loh ringawt chu a hawihhàwmthlak loh lehling tawh záwk tlat a tin a ni!

Car chhûnga ka chùan luh fel hnu chuan kan tlan chhuak zui nghal chu a ni mai a, ka ke bulah ka nihliap huh dir diah diah pawh chu ka dah mawl tawp a, inthlahrun a nâ duh hliah hliah khawp mai.

Inrinni zînga kan chawhmeh zawrh a rawn lei ṭhin avanga inhmêlhriat satliah ve mai chauh kan ni a, ka hmuh tirh phat aṭang tawha star ru tu ka ni kher bawk nen car chhûnga kan han chûang dun te chu ka ṭang deuh ṭùng thei!

"Eng lo.....min phur ringawt a, in vêng leh kan vêng an inang àwm tawp si lo a!?" tiin ṭawng chhuak hmâsa zâwkah ka ṭang dai a, ka zawhna teh tawp lah chu ho ka va ti hnuhnawh leh si èm!

"Khawi vêngah nge in awm?" mi pawh en chuang lo hian a rawn ti ta sup a, kei pawh chuan pangngai tak hian kan vêng chu ka hrilh ve nghal mai bawk.

"Khaw'nge i kal hrim hrim a.....?" kan ngawih dun vang vang hnu chuan ka ti leh nge nge a, hmêlhriat satliah mai chauh mah ni ila ngawi renga han chùan dun tlawng chu a dikin ka hre lo a ni.

"Ka office......" a lo ti sam mai a, biak zawm zel ka duh rualin a ṭawng peih vak loh hmèl bawk si nen ka be zui zel duh ta bîk lo.

Kan vêng lam pan chuan kan tlan par par a, ruah lah chu a sûr nasa zual sauh emaw tih tur hian a sûr ri buan buan a, chutiang bawkin car chunga ruah mal lo far thla thawm te pawh chu a zàwi lo khawp mai. Kan in luahna, nu Sangteite in kawt gate kan thlen chuan chak vak lo hian kan tlan lut zal zal a, zawhna ka zawh zui tâk loh aṭang khan kan inbe leh tawh lo hrim hrim bawk.

"Ih......eng lo......thingpui i lo in kawi duh ang em?" car a tih din riai riai hnu chuan ka ti sap a, ka lam a rawn hawi chiah chu ka mit ka là sawn rang kher mai.

A bula chùan pawh tih tawh nâk alaiin; a mi en phei chu nâ rem rem tak a ni!

"Ni dangah ni rawh se" tih tê hian min chhâng a, min thlah avanga lawmthu sawiin ka chhuak zui zat a, mahse a tlan liam hmâ chu ina luhsan mai erawh ka tum bîk lo.

"He hi em ni in in?" nu Sangteite in záwk thlek deuh dûk duk paha a rawn tih chuan

"Ni lo ve, a hnuai záwk khu a nia......" ka lo ti ve mai a, tih zàngkhài ka tum luatah ka aw chu a zàngkhài lo zo vek záwkin ka hria.

"A nih le......" tiin a inher kual lâi chuan ka ṭawng chhuak leh sap a, min buk khum zauh tih loh chu ka lam a rawn hawi tawh lo hrim hrim a, ding khawtawi lovin a tlan haw zui ta vang vang bawk.

In chhûng ka lut fel chiah chu thinphu dep dep hian ka âwm ka dawm vang vang a, ka hlauthawng ti dâwn ila a ni hauh si lo, ka zàm lutuk ni ta berin ka hria.

Ni e, a dik ang!

Khatiang em ema mipa uap nâ cherh churh kha ka la tawng ngai lo, inthlahrun lah a nâ duh ropui bawk si, eng vanga min thlah duh tlat te kha nge maw a nih reng reng le?

Ni lo, chu lam zawng keia lo hriat theih chì ziazâng a ni lo e!

Dâr zat ka en chuan dâr 4 leh a chanve a lo pel vel chiah chiah a, ei rawngbáwl pawh a hun thawkhat tawh viau mai. Chawhmeh erawh han siam thar vak ngâi a awm hran lo va, tlêm azâwng ka bàwl belh tih loh chu zîng lama siam sa ka ring tlang nghal tawp a, tih tur ṭul dang em em a awm tawh rih loh tâkah chuan ka haw dan vel Lâtei ka hrilh châk tlat pek a nih chu!

"Tum loh deuhin kan inhmu hlawl asin......" tih tê chu Lâtei hnenah khuma mu zâl der der chung hian message ka va thawn a, zep thu a cheng lo, ka mood a on vet vet khawp mai.

"Tu nen maw?" rei pawh ni lovah whatsapp message ka dawng nghal zat a, min reply ran danah in a thleng ve tawh tho a nih ka ring.

"Ka star-pa nen khan......." tia ka thawn deuh tawl chu a hmu nghal vat a, lawm lovin ka khi nghal ver ver ringawt bawk.

"Awi, a ni maw!? Engtin nge in awm?" tih message ka dawn hnu lawkah phone call a rawn lut zui nghal zat a, inbiak pangngaia kan han inbe chiah chu

"Engtin nge in inhmuh ringawt theih?" a rawn ti nghal chùl a, naupang thil hrilh hlan nghakhlel lutuk ang mai hian a awm hawr hawr a, nuih te pawh a tiza lehling hial zâwk!

"Chiam chiam a che…..engtin mah kan awm lo, tum loh deuhin kan inhmu leh ringawt alawm......" tluangtlam taka ka tih chuan

"A nih leh khaw’nge in inhmuh hrim hrim…..? In inbia em?" a rawn ti leh lang lang a, ri meuhin ka nui chhuak ta hak hak ringawt!

"Sawi ṭha mai mai teh!" vin titih deuh hlara a rawn tih zui leh nghal zat tâkah chuan pangngai tak hian

"Eng lo, bus ka chàn lâiin ka hmà zawnah tak car a rawn tiding a, min rawn hria a nih ka ring ve tawp" ka ti ṭha ve ta nge nge a, mahse duh ang paw'n ka la sawi chiang hman lo.

"Chuan engtin zel..? Engtin nge in awm…? A phur haw che em?" tiin zawhna min zawh zawm zat zat a, kei pawh chuan

"A car chhûnga lut turin min sâwm a, ka hnial zet tak nàin min sâwm lui tlat bawk si a, ka chûang lut ve ta rawih a, kan in thleng min thlah nghe nghe a, mahse kan chùan dun chhûng zawng khan kan inbe mang lo, a ṭawng tam vak loh ring tho mah ila ka rin ai a ṭawng tam lo lehzual, min uap churh ni berin ka hria" ti deuh duah hian ka chùan dun lâi kha ka mitthlà zui veng veng a, a nih pawh a ni lah tak reng a!

"Awi, a nuam àwm vel ê.....i star-pa nen car khata chûang dunin in in thleng a thlah bîk thlap che a nia......" nui kar kar paha a rawn tih chuan

"A nawm leh nawm loh pawh ka hre lo, ka star tih a hre palh ang tih te a nia ka hlauh nì!" ka ti ve leh dat dat a, kan chùan dun lâi mawlh mai kha ka mitthlâah lah chuan a rawn lang reng leh ta nghal a, thil dang pawh ka ngaihtuah hlei thei lo.

"A ruk tak chuan nuam i ti dâwn hrim hrim, ka chiang, kei phei chu ni ila lawm avangin ka zûang tawr tawr hial ang ka ring" rawn ti thar thar hian a nui zui hak hak a, chutah amah bawk chuan

"Zanah kan inbe ṭha dâwn a nia, kei pawh tun lâi chu pathlawi star deuh ka nei thar a, mahse ka hrilh duh kher che ang em ka hre lo" rawn tih zawm leh zatin kan inbiakna chu a hmet tawp ta daih a, hriat belh châk táwk vel leka mi siam hi chu a thiam ve chiang a ni.

Call ka tum lâi takin u Chhûanga pawh a lo haw a, huh miah lova in a rawn thlen danah pa Ramgheta nen an lo haw rual a nih ka ring. Hnathawhna lama kal rual châng leh haw rual châng an nei fô va, pa Ramgheta zâwk hi nèlawm loh hmèl deuh anga lang si hian a nèlawm phian lawi a, chu tak chu u Chhûanga paw'n a bula awm nuam a tihna chhan pakhat niin ka hria.

Khua a thim fel a, zan lamah chuan Lâtei nen kan inbe leh ta ngei a, pathlawi a star tih rèng ka lo hre bawk si lo nen zawhna pawh ka ngah ngàng mai. Kum lamah inrual chiah e ti lo chuan a mipa star te reng reng lah hi an han upa bîk thei khawp a, 'star neih te chu a thiang alawm' tia mi hnial thlak zen lah hi a hrat zèk lehnghal a, mipa duh zâwngah nà nâ ná hi chuan kan inang chiah lo a ni.

Tlaia min phur haw tu, a ruka ka star-pa mawlh mai kha mitthlâah a châm veng veng reng mai; kan chùan dun chhûng zawnga nuam tihna nei em em si lo khan nuam ka ti thar hnuhnawh leh viau lawi si!

"E hê......Chhanchhani chu....lo lêng rawh......" kan in kawngka bula Chhanchhani lo ding ka hmuh rual chuan ka pan hnai rûak a, ka pawm titih chu a ni nghal mai.

"Ânu te, àpa te, à û te khan eng nge an tih a? Han sawi teh le, ka nautê ṭawngthei tawh em em tè........" tih leh a hnunga ben thek thek ka rual a, nau lawm mi ka lo ni bawk nen a biang puar chum, duhawmnaa khat te chu piai vawn vawn a chàkawm ngawih ngawih!

"Au Mama a lo haw dâwn asin au Helen" intithei tih hriat fê hian a rawn ti hliai reuh a, hmui pawrh târha a'n ṭawng vel te hlei hlei chu duhawm hliah hliah tak a ni!

"A ni maw…! A va'n nuam àwm bîk, au Mama chuan eng nge a lo hawn dâwn che a?" tiin ṭhutthlengah ka ṭhutpui sat sat a, ka la pawm pah reng bawk.

"Ka hre lo" tia min chhán lai chuan Tharthara pawh a lo thleng thla ve chiah a, a nau a rawn zawng ni ngei tur a ni.

"Heta i chhuk hi ka ring rèng a!" tih leh kan bula rawn ṭhut chu a rual a, pawm a'n tum ngawt chu Chhanchhani chuan a lo duh lo nasa mai.

"I sual chuan apa ka hrilh dâwn a nia aw......?" vau titih deuh, thlem titih deuh tho bawk si hian Tharthara chuan a ti leh a, ṭawngkam hriat nuam loh paw'n a be chuang lo.

"Aih.....ka colour pawh min pe duh lo va, apa ka hrilh vek dâwn...." Chhanchhani ve thung chuan a lo ti tàn tân reuh a, an lo intithiam lo ve ngei a nih hmêl!

"Ka pe duh lo che pawh a nih loh khâ......bang i ziak râng nasa thei si, anu leh apa lo haw hunah ka sawi vaih chuan an hau mai ang che" tiin Tharthara chu a ding uaih a, Chhanchhani erawh a ṭawng tawh lo hrim hrim thung.

"Lo kal rawh le, khumah han mu daih ang, thawnthu ngaihnawm táwk ka hrilh dâwn che a nia....." ti lehin Tharthara chuan a nau chu pawm tum bawk hian a rawn ban zui zat a, Chhanchhani paw'n a lo hnar ta bîk lo.

"Khaw'nge u Chhûanga hi u Helen......? A awm loh chuan lo lêng chho rih daih la?" zàng fiah raiha min betu Tharthara en chung chuan

"Zanin chu ka lo lêng chho lo law law tawh záwk mai ang, u Chhûanga pawh a rawn haw ṭep ka ring. In awm kim na nge? Thawm a reuh riaua ka hriat?" ka ti ve ta siam siam a, zanin chu nu Sangtei ṭawng ri takngial pawh ka la hre lovin ka hria.

"Nia, kan unauin kan awm rih a, anu leh apate pahnih damdawi inah an kal bawk sia....." a rawn tih chuan

"Chuvang a nih dâwn chu......" ka lo ti sam mai a, nu Sangteite pawh awm se zanin chu lèn chhuah châkna ka nei vak lo hrim hrim!

"A nih.....kan chho mai dâwn asin, i lo lêng duh bawk si lo" ṭhen sen sen paha a rawn tih leh chuan lo buk khum zeuh hian kan inthlah liam zui chu a ni mai a, kei pawh ka mu ta daih bawk.

Ka harh ruala ka thil hmuh hmasak ber chu tukverh aṭanga nî èng lo lut páw chiai chiai a ni a, ka piah lawka khumah chuan u Chhûanga a lo la muhil súk sùk a, nizan khan a lo haw lai pakhat mah ka hre lo va, ka lo mu tui hman viau tawh a ni maithei a ni.

Tuk dang ai ka tho hmâ ang reng hle a, tui chhûan lùm hlan chuan pâwnah ka tei kual vel mai mai a, nu Sangteite in hi zâwl zau nuam leh hmunhmâ ṭha tak a ni a, in leh a chheh vela fâr thing ni àwm tak tak ding thluah te chuan a tilang hahdamthlak zual hle bawk.

Ka hmâ lama tlângdung inkham zùl chu rilru dang daih pû chung hian ka thlir reng a, hun leh nî hnuaia nung kan nihzia te ka ngaihtuah chet chet zui zat nghe nghe!

Mi lian leh ropui tak pawh ni ila hun erawh a nih dan tur ang thlapin a kal reng a, khaw thim hunah khua a thim tawp a, khaw vàr hunah a vâr leh mai a, mi hausa kan nih avangin khua a thim loh phah lo va, a vàr loh phah bawk hek lo.

Chûng kâra lêng vel mai mai chu kan ni tih ka hriatna chuan mihringte kan lo tétzia leh kan nuna thu kan lo neih lohzia thlengin min ngaihtuah chhuahtîr zui ta zel a, zan khat mitchhìn tâwk thut thei kan ni tih pawh inhre lêk lova mahni tâwka kan han chapo ve pang pang ṭhin te hi a dâwn thui loh thlak tak zet a ni.

Thawm ri khep lam chu hawiin min hnungchhawn zâwnga pa Ramgheta kal nghut nghut ka hmu hlawl a, chutiang huna hmuh ka inbeisei lo hrim hrim bawk. Ani erawh chuan min rawn hmu ve lem lo va, in hnung lamah a tei lut vut a, kei pawh chu rei ding tawh lovin kan in lamah ka chhuk thla zui ve nghal daih nghe nghe!

Nilêngin khua chu a ṭha tluan parh ve teh mial a, bàn hun pangngaiah bângin nî kan hmang ral leh a, ei rawngbâwl hmana kan bâng ziah ṭhin hi keini ang in luah, mahnia ei rawng inbàwl chawp leh vek ngâi ṭhin tân chuan ṭha ve tak chu a ni.

"Ka lêng dâwn a nia......" u Chhûanga chhuak tur che vel chu ka en ralh a, in chhuahsan zui nghal mai a tum lâi chuan

"Nizan ang kha chuan lo haw hâr tawh lo la......?" tiin ka be ding deuh dat a, sawi loh ka tum zet nà chu sawi loh tawp erawh a dikin ka hre si lo.

"Nia, haw hâr tawh lo ang" ti liam puat hian a chhuak zui nal nal a, ngaihzâwng nghet tak a neih avangin lêng chhuak ṭhin mah se pawi tihna ka nei hran lo va, lo haw hâr tawh lo se ka duh vang mai zâwk a ni.

Dârkâr 1 dâwn Lâtei nen phone call-in kan inbe char char a, thil eng eng emaw ni kan sawi kual duah a, nuih châng pawh a tam narawh e!

Kan inbe zo chiah chu kan in kawngka a rawn inkik ri karh karh a, lut turin ka chhawn ve nghal mai a, mahse kan in chhûnga lo lut mêk hmel ka hmuh rual chuan mak tihna hlirin ka khat a ni ber.

"Ka lo lêng dâwn asin?" a awah chuan hawihhàwmna leh inthlahrunna a inpawlh a, hamhaih ru zeta ka ngawih reng vangte pawh a ni maithei!

"Aw.....nia....lo lêng rawh, lo ṭhu rawh" ka ṭawngkam chhuak chu a bah nawk nawk a, ka ding nghal hluai nghe nghe a, ka thin phùt dan danglam nghal dawt dawt te chu a hriat loh hram ka beisei.

"Eng lo....ih....thingpui i duh ang em?" hritlâng ang hrimin ka aw chu a chhang deuh ṭiam leh ta nghal a, awm dan tur ka hre lo a ni ber.

"Immm......" a lo ti ve dut a, min en loh lai tak chuan ka thaw chhuak halh a, kan inawm hnaih vak loh tehreng nen car chhûnga kan chùan dun lâi ang mai khan min uap leh churh tawhin ka hria.

"Khaw'nge i kal a.....?" thingpui lùmna bulah ka ding daih e ti lo chuan keimahah zàm ruk riauna a awm tlat lawi a, ka che sual pheng phung ang tih te chu a nia ka hlauh nì!

"Ka lo lèng......" a rawn ti hniam fân ruih a, min en chiang ngàng bawk si nen za lo leh lài ru zet hian ka nui lui sak ta ringawt!

Inlêng nei ve ta lema han biak tlângnèl loh ringawt zawng a dikin ka hre si lo, sawi tur dap chawp neuh neuhin a be hmâsatu zâwkah ka ṭang ngar ngar a, mi lah chu a chhâng tawi thei em em lehnghal!

Thingpui ka pêk lai te chuan min en tih ka hre ru reng a, mahse ka en lèt ngam teuh lo thung. Thil sawipui tur lah a vâng si; amah talin sawi tur nei deuh se chuan a zia deuh tur a nia!

"Khawi vêngah nge in awm a?" ka ti chhuak sap a, awlsam tê hian min hrilh ve mai bawk.

"I rawn bazâr ziah sia, nangmahin i awm turah ka'n ngâi deuh ringawt che a......?" zawhna záwt titih deuh, mahse záwt ni chiah si lo hian ka ti leh dat dat a, sawi tur hriat loh avanga chutiang thu sawi chhuak deuh thâwr chu ni mah ila a chanchin hriat belh ka châk vang a ni pakhat!

"Mahni chuan awm bîk lo ve....." tih têa min chhànna chu ka duhkhawp lo ang reng viau a, amah lah chuan sawi zawm a tum tawh loh hmèl em em lehnghal!

"Zan lam hi eng nge i tih ṭhin?" hriat zui veng veng theih tur khawpa thum ruih hian a rawn ti leh sup a, ring ni miah lo mah se ka bengah chuan a va fiah ṭha si ém!

"Eng ka ti hran lo" ka lo ti ṭha ve mai a, bu deuh nghutin a ngawi zui leh ta vung vung a, kei ang bawkin sawi tur a tlachham ve tho a nih ka ring hmiah!

"A nih chuan lo lêng ṭhin ta ila ka tibuai èm lo ang che chu màw?" pà lo tih ruk tawh sa nen zawhna min zawh dan vel chuan rilru leh thluak chhûng a luah khat ngut ngut a, chhàn mai nachâng ka hriat lawk loh phah nghe nghe!

"Tihbuai tur thu pawh a awm hleinem" thin phû dep dep chung hian ka ti zàwi diai a, chutah amah bawk chuan ding uaih pah hian

"Ka'n haw ang e" tih leh kal a rual titih a, dâr zat ka'n en chu awihawm loh khawpin a lo tlai chak a, ka tho zui ve nghal ta thuai bawk.

"Ih......eng lo.......engtin nge ka koh ang che? Eng lo a nia...i hming ka la hre miah lo a…...?" ṭhen deuh chai hian ka ti tîm dai a, dik tak chuan ka zàwt inthlahrung ve tho.

"Zorema....." ti hniam supa chawl dut hian

"Zorema ka ni e, a nih nang?" a rawn tih zawm zat a, kei pawh chuan

"Helen min ti mai rawh" ka lo ti ve sap a, zawhna dang inzawh belh tawh lovin pâwn lam pan chuan kan inzui chhuak nghal thauh thauh bawk.

Inbe leh tawh miah lo tih takah kawt lama kan inzui chho hnak hnak te chu kan ke pen thawm ringawt pawh a langsar hle a, hmeichhe zakzum tak tia sawi tur ka ni lo nàin a bulah erawh ka mize pangngai ka chhuah thei rih lo a ni ber a, ama zir loh nge ka zir loh pawh ka hrethiam chiah bîk lo, a huhang nâ mah mah chu ka zo lo te pawh a ni ta ve ang!

A tlan haw vang vang hnua in chhûng ka lut leh te chu sawifiah thiam chiah si loh hian ka thaw a veng deuh huai a, dik tak chuan a rawn lèn chhûng zawng khan kan inbiak deuh bawrh bawrh ka ring kha a ni a, mahse chutiang rèng a thleng hauh si lo.

'Zorema' tia a hming min hrilh lâia a aw thum ṭial pà ruih mawlh mai kha ka bengah chuan a ri nawn tluk tluk a, khum laizâwla zâl der der chungin ka ngaihtuah zui veng veng ta hial a, ka mitthlâah chuan a hmêl pà ru hrak kha a châm pah reng nghe nghe bawk.

End of chapter 1