𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟐)

ZOREMPUIA

(Mizo Romantic Novel)

By

Havali Adam

Chapter 2

Zîng khua a lo vâr a, zîngkâr phat aṭangin ka mood chu a fuh nghal cher cher hle a, ka hawiher hrim hrim pawh a zàng vâh a, engkim chu nizana ka thil tawn vang kha a ni tih ka hai lo chiang hle bawk.

Engtin teh lûaa min ngaih ve ring chuang lo mah ila a rawn lêng hrim hrim kha mak ka tih piah lamah ka hlim ruk phah em em a, zun lah chu a nei roh leh ta nghal emaw ni, ka ngaihtuah zui loh leh ka mitthlà zui ve ziah!

Dawr ka thlen rual rual chuan Lâtei bulah nuam ti zet hian nizana kan awm dan chu ka sawi nghal siam siam a, mahse mi dang hriat ve ka duh loh avangin ka ṭawng ring vak lo thung. Kei ai a phur záwk emaw tih tur ang hrimin a zeldin zui ta mawlh mawlh a, ṭawng zàwi deuh tura khap paw'n awmzia a awm eih lo lehnghal!

"A lo duh ru ve reng che hi a ni lo màw?" Lâtei chu ner nâng hian ka melh ral a, chutiang thu chu engtin nge awih se min tih reng reng nì!

"Awihawm loh lutuk! A lo lêng satliah mai mai záwk a nih ka ring" ka ti deuh pang pang a, keini ang chawhmeh zuar mai mai te chu eng atân mah min tih ka ring lo a ni.

"Chutiang ringawt a ni thei lo, in in thleng a thlah thlap che a, nizanah a rawn lêng bawk a nia, mipate chuan an hmeichhe ngaihzàwn ruk te chu an rim ṭhin alawm" a rawn ti teh duah a, ngaihtuah loh lôh tur ka ngaihtuah kual phah vek dâwnin ka hria.

"A!!!...." ka ti dek dek chu

"A!!! tih chì pawh a ni lo chû......ngaihtuah chiang ve ta che" min ti leh ta èrh a, rinhlelhna nena ner khum sawk chung hian

"Thil ni lo lô min ngaihtuahtîr suh, a rawn lêng ve a ni mai, chutiangin ka lakah eng rilru mah a put ka ring lo" ka ti deuh tlat a, ani lah chuan

"I hming te a záwt che a nia, a duh ve chiang lutuk che" a la rawn ti fan a, za lo zet hian ka nui hul hak ringawt!

"Ka zawh hmâsak vang alawm min zawh lèt ve" ka tih pawh chuan awih lo tih hriat tak hian lû min thin khum nak nak a, sawi zel pawh ni ila a awih dâwn chuang lovin ka hria.

"I ngaih ngaihin ngâi teh" insawi fihlim tum ang hrima ka ti leh ringawt te chu min nuih kar kar a, awmzia a awm dâwn chuang lova ka hriat avangin a pathlawi star chanchin lam ka sawipui ta daih bawk.

Nu Kimtei chuan ni dang aia kan tlai deuh tur thu a rawn sawi lang lang a, a tua mah hnialna leh harsatna sawi pawh kan awm lo va, kan bàn hun pangngai aia kan haw tlai hret tur chu thil harsa ni paw'n ka hre lo.

Ṭhui tur a tam deuh bawk nen kan bàn meuh chuan khua a lo thim titih der tawh a, nu Kimtei lah chu dawr neitu nu mah ni se a inthlahrung ber berah a ṭang leh ta nghal a, keimahni tân tak pawh a inthlahrunawm lehling záwk!

"E....lo kal rawh, chaw in ei tawh em?" Thathara hmêl ka hmuh rual chuan ka ti zàng vâh a, pa Ramngheta fapa naupang záwk tih takah a hawiher hrim hrimah pawh a u nen inang lo tak an ni!

"La ei lo ve, u Chhûanga a lo la haw na nge, mahse apa chu a lo haw tawh reng sia?" a rawn ti lut phar phar a, kei pawh chuan

"Kal kawi lawkna tur a nei a ni ang" ka lo ti ṭha ve mai a, pa Ramngheta ber a rawn haw tawh lâia u Chhûanga lo la haw loh bîk chhan chu ka ngaihruat thiam titih nghal mai bawk.

"Eng chawhmeh nge i siam a?" tiin ka chawhmeh chawh lâi chu a rawn bih dûk dúk a, chhâng nghal mai lovin ka lo nui hak nghe nghe a, bih suh pawh ti ila a bih tho ka ring.

"E hê......anṭam buh bai a nih hî.....anu paw'n a siam ve ṭhin asin" ti deuh vang vang hian a bih hnai lehzual a, a ei châk tih lah chu hai theih pawh va ni suh!

"Chaw lo ei thla daih la" a rilru àwm ang tur hre ru deuh reuh taka ka tih chuan

"Apa ka han dil chhin" tih leh in chung lam tlan chhoh a rual zui nghal thuai a, engtin tak han dil ang maw!

"Pa, u Helen-in chaw eiah min sâwm a, ka ei thla dâwn aw.....?" in chunga Tharthara ṭawng ri lang láng chu ka hre pha vek a, ka lo nui tawp ringawt!

"Nang tak hi chu âw......i lo zu 'aw' nghal tawp a ni lo màw......?" ti fiah faktu chu a aw aṭang paw'n pa Ramngheta ni lovin nu Sangtei záwk a ni tih a hriat hle a, bai chhùan lâi chawh zeuh zeuh pahin ka lo nui leh ver ver ṭhin a, chutah Tharthara bawk chuan phur tih hriat fahran hian

"Ka ei châk alawm nu, anṭam buh bai a siam a, a tui hmèl lutuk, i siam ṭhin ang chiah chiah kha a ni mai, i fel êm kha nu, ka ei thla dâwn aw?" a ti leh zat zat a, a duhnaah hi chuan a nu leh pate hi chu a tlawn thiam ve chiang a ni.

"Awi, vel deuh duah che chuan, i pa kha dil rawh" tiin nu Sangtei chu a nui zui hak hak a, chu bak chu a ṭawng thawm ka hre zui tawh lo hrim hrim bawk.

"I zu tihek mai mai lo màw....?" pa Ramngheta aw chu a ring vak lo nàin a hniam fiah ṭha hle thung.

"Tihek lo ang, buhfai pawh an ngah lutuk pa, gas bulah an dah khawl ṭeuh, ka rawn chhoh dâwn khan ka en vek alawm" Tharthara chhàn dan thawt thawt chuan min tinui zui zel lo thei lo.

"A nih chuan zu ei mai rawh, chawhmeh kha suak thla den den la a ṭha ang, zu ṭawng zung zung lo deuh bawk la" nuih za aw lam lek lek hian pa Ramngheta pawh chuan a ti ve ta nge nge!

A pa sawi ang ngeiin Tharthara chuan an chawhmeh a rawn suak thla ṭeuh reuh a, vawksa te a rawn keng thla tel hial a, dah chho leh tura ka tih lahin a duh tawh bîk tlat lo lehnghal a, mi dang chu ni se a pâwng a takin chaw an rawn ei mai mai lo tawp ang maw lè; Tharthara erawh hi zawng an unauah chuan a danglam ve a ni!

Ei rawng ka bàwl zawh hnu lawkah u Chhûanga paw'n in a rawn thleng a, zanriah kan kil zui nghal chu a ni mai. Mize harh leh ṭawng duh chì tih takah chaw ei lâi chuan Tharthara chu a ṭawng malh malh reng a, zep sî sê a nei ve bawk si lo, nuih insum lah a hâr bawk si, chaw pawh kan ei nui reng ringawt!

A û mize zawih bîkzia a sawi phei chu nuih loh theih pawh a ni lo, a sawi dik vek tho bawk si nen chaw kan ei ṭha mang lo hial záwk te'n ka hria.

Chaw kan ei kham a, Hlutea chawhmeh rawn suah thlakna dah chhoh pahin kan lêng zui nghal a, u Chhûanga pawh hmun danga lêng chhuak lovin kan zîngah chuan a awm ve nghe nghe bawk.

Ka nu hnen aṭanga phone call ka dawn avangin kan in lamah ka chhuk thla ta daih a, minute eng emaw zah kan inbiak hnu chuan chhoh ve leh nghal mai ka tum a, kawngka ka hawn ruala u Zorema hmêl ka hmu hlawl erawh beisei loh luatah ka phu dâwrh lo chauh a ni.

"Nang maw!?" ka ti chhuak deuh hap a, chawp leh chilhin ka thin chu a rawn phû rang nghal dawt dawt bawk.

"Lo lèn a rem ang chu maw……?" thum dam deuh si hian a ti nghet churh a, dàwt sawi hmêl a pû paw'n ka hre lo.

"E.....aw.....rem e.....lo lut rawh" ka ti bahlah deuh nuaih chu chik ang reng tak hian min melh chhuk run a, awmze nei lo zetin ka nui lui ringawt nghe nghe!

Kan in chhûnga a rawn pen luh thuk thuk lâi te chuan ka thin chu a phu dep dep reng a, pangngai taka awm hram hram tum ve teh mah ila ka thunun theih piah lam thil a ni tlat tawh si chu thil buaithlak ber pakhat a ni.

"Thingpui ka'n lûm ang aw u Zorem?" ka zàm rukzia thup hram hramin ka ti zàng lui vâh a, a hming ngeia ka vawi khat kohna a ni bawk nen ka zàm zual tak zet!

"Immm....." a lo ti thum dut a, vawi khat hmuhna ang hrimin in chhûng chu a en kual deuh hruk hruk a, ka en ru reng tih erawh a hriat loh hram ka beisei.

Thingpui chhùan chhûng zawng chuan gas bulah ka ding zum zû reng tawh bîk lo va, a ṭhutna lamah ka ṭhu phei ve a, kan inṭhut ep chiah a ni záwk mah ang chu!

Zawhna ka zawh apiang chu tawi fel tak hian min chhâng mai zel a, zàm rukna la awm reng tho mah se nizan ai thlawt kha chuan ka awm dan pawh a pangngai ta deuh záwkin ka hria.

Eng emaw chen a ngawih vung vung hnu chuan kan khuate min zàwt ve teh mial a, zawi zawiin sawi tur pawh ka baihvai ta lo deuh bawk.

Thu tam sawi dun lo mah ila kan awm dan chu nuam ka ti ru lehling phian ang lawi a, rilruah lah chuan Lâtei thusawi kha a rawn lang ve chhen lehnghal a, mahse ka ngaihtuah zui duh lo lui ngar ngar thung.

Thingpui chu a hânga siamsakin kurtai ka chhawp tel a, chutianga in chu a duh ka ring deuh tawp ringawt a ni ber. Zawhna tawi tê tê min zàwt leh dut dut ṭhin tih lovah chuan ka be hmâsa záwk zel a, inrinnî bîk chauha chawhmeh kan zawrh ṭhin thu te, kan làkna ṭhin nen lam thleng chuan min zawh kài zel avangin ka hrilh ve ta vek bawk.

"Thil i ṭhui ṭhin em ni?" dawhkan sîra kawr ṭhuina khâwl inhûng en chung chuan a ti sup a, ka lam a rawn hawi leh chiah chu ka lo hawi sawn nghal vat!

"Immm.....ṭhui ṭhin e" ka ti ve mai a, chutah amah bawk chuan

"A va ṭha ve....." a rawn ti leh dup a, lo nui tawi sak pah hian

"Nia.....a ṭha ve tak tak a ni; a ṭangkâi phian lehnghal!" ka ti deuh hliai a, sawi zui tur erawh a vâng leh ta pharh mai.

Chutia kan ngawih ren rawn lâi tak chuan current a rawn thim thut a, ka phone ka dap nghal rak rak a, ka la hmu mai lo zui! U Zorema záwk chuan a phone a rawn chhî èng a, mombati chhî tura gas lam ka pan phei lâi chuan ruah sûr thawmin kan boruak uap ru deuh churh chu a rawn luah zui zat a, sûr ṭan chiah mah se a sûr tam buan buan nghal hle.

"Puih i ngâi em?" ka chet dan aṭangin mombati ka chhî alh lawk thei lo tih a hrethiam ni ngei tur a ni.

"Ngâi lo e, lighter zâwk hi a alh lawk thei lo a" ka tih chuan hawi kher lo mah ila thawm aṭangin a rawn pen phei khup khup tih ka hre thung a, tuna taka lighter ka tialh thei lo ringawt te chu ka hrethiam tawh bîk lo.

"Khawi màw......" tih leh ka lighter ken lâi rawn lâk a rual zawm zat a, rei ni lo mah se lighter a làk paha kan kut a insi zuaih hman chu ka lûm chhuak deuh pup ni berin ka hria.

Kei anga vawi tam hmet ri ṭhak ṭhak ve hauh lovin lighter chu a vawi khat hmehnaah a alh sâng nghal vâh a, mombati pawh amah záwkin a chhî alh zui nghal nghe nghe bawk.

Mombati keng chunga kal mai ka tum chu a kê chhuih palhin ka la inpal khut leh ta nghal a, current awm ngat phei se zâwng ka zahzia a hmu thiam nghal vek ngei ang ka ring.

Ruah sûr buan buan chuan haw thei lovin a dang ta reng a, u Chhûanga a lo la chhuk thla chuang lo bawk nen la lêng ve rih mah se pawi tihna ka nei em em hran lo.

A ṭawng hmâsa leh zauh ṭhin tih loh chu keimah záwk hlirin bul ka ṭan hmasa leh nge nge ṭhin a, kan ina rawn lêng a ni a, nuam lo a tih theih tur ang zâwnga lo ngawih khum reng chu ka duh lo a ni.

Tin, a la inthlahrung ve pakhat bawkin ka hria; chuvanga biak tlângnel tum deuh ngar ngar pawh chu ka ni!

Mihringte hi chu kan dangdai ve hrim hrim a, kan awmna hmun azira kan insiam ṭha thei ve zel te hi kan danglamna a ni a, ṭawng duh lo leh ṭawngmawh kan tih ṭhin te pawh hi an ṭhian ṭha leh an mi ngainatte bulah chuan an ṭawng duh ve vek tho.

"A zia lo ê......i haw duh tawh awm sia....?" a lam pawh hawi chuang lova ka tih chuan

"Haw duh hran lo e" a lo ti ve mai a, dâr zat a en leh zauh ṭhin avanga sawi ka ni pakhat!

Ngawi reng hian a phone chu a khawih mual mual a, kei ve thung chuan a awm dan ka en chìk ru reng thung a, current thim lâi a ni kher bawk nen current awm lâi ai thlawt chuan ka en rei ngam ve ta viau! Phone khawih ang deuhin ka awm char char a, ani paw'n phone ka khawih emaw a tih ngei ka ring.

A khabe ruh invuah dik zaih te, a hnâr ngul mawi táwk chiah leh a hnap thleng langsar vâh te nen lam chuan ka en chîk em em vek a, ka mipa hmuh tawh azawnga hmêl belhchian dawl ber a va'n ni chiang tehreng èm! 

A biang lah chu cher ni si lo, thau lutuk ni bawk si lo hian a mâm thla deuh pul a, engkim chu a nih dan tur dik tak ang mai a ni.

Dâr 10 pelhah ruah sûr tam buan buan lutuk pawh tlêmin a han ta deuh a, u Zorema paw'n haw zâi a rêl zui nghal chu a ni mai a, kawngka bulah chuan u Chhûanga lo lut tur nen kan intáwk nghe nghe a, u Zorema zàwk en zauhin min kal pel ve leh mai a, ka ṭhianpa ni turah a ngâi a nih ka ring.

Mumang pawh nei lo khawpa tuia muin zîngah chuan ka tho nuam leh viau a, tun lâi chu zan lama ka hun hman dan a fuh cher cher thei bawk a, ka tho nuam ṭhin khawp mai. Ei rawng ka bâwl zui nghal malh malh a, tukṭhuan pawh kan ei har lo hle.

Kâr thar kan chûangkâi a, Lâtei pawh an khaw lamah a naute inneihna hmang turin a haw ta ngei a, nu Kimtei hnenah chawlh ka dilpui thlap nghe nghe bawk. Nî tam a châm a rinawm lo va, an khuaa zin ve tur chuan min sâwm hial a, mahse ka 'aw' 'e' vak loh avangin min sâwm nawn duh bîk hran lo.

"I va mal ve a?" min betu lam ka hawi chu nu Kimtei pasal, pa Hminga hmêl ka hmu nghal zat a, chhàn loh aiah tiin

"Nia......." ka ti zàwi raih a, ka bul chèta a rawn ṭhu thla chu ka awm a tinuam lo ru nghal rawih thei!

"In bàn hun chu ka thlah ang che aw?" nèlawm takin min be mah se ka nêl hauh si lo, ka nêl ngam lo a ni mah záwk!

"Bus-in ka haw ṭhin a, thlah ka ngâi lo ang" pangngai tak hian ka ti fiah deuh fak a, min zuam zel ang tih mawlh ka hlau a ni.

"Thlah duh tlat ta si che ila....." fiamthu ang hrima a nui hmêl phenah chuan thil dang a awm tih ka hai lo chiang kher mai.

"Tak tak a, ka'n fiamthu hluai a nih kha!" amah bawk chuan rawn ti leh suar suarin a kal sawn zui nghal daih a, ka thawhpuite'n min lo en hrek hrek kher bawk nen ka awm a nuam lo ru veng veng!

Ka thawh tirh ata tawh pa Hminga hian min nêl mah mah tih theih a ni a, a tirah kha chuan kei paw'n ka nêl ve hman ngei a, mahse min nêl dan a dang tih ka hriat tâk aṭang kha chuan nêl dan chin táwk thiam a ngàih mai bakah hnaih loh law law a ṭhat záwk châng a tam chho ta hle a, nu Kimtei lahin engmah a hre ve bawk si lo, hrilh ringawt ila keimah záwk ka mualpho daih dâwn tih ka chiang ropui si, ka tih theih awm chhun chu fimkhur a ni mai.

"Nu Sangte......in awm èm?" in chhûng lut paha ka ti deuh làng láng chu min chhângtu pakhat mah an awm lo va, thawm a reh ṭhuap nàin kawngka erawh a inkalh bawk si lo, tu emaw ni tal chu an awm ka ring a ni ber.

"In awm ém?" ka tih leh pawh chuan tûma'n min la chhâng chuang lo va, ka nute chawhmeh rawn thawn pêk ka tum pawh chu hawn thlak leh mai ka rilruk rum rum a, chutia kal ka tum deuh ut ut lâi tak chuan

"Immm.....hah lo ve....." tia mipa ṭawng thawm chu kawngka a inkhar rik khap rualin ka hre zui zat a, pa Ramngheta aw ngei niin ka hre nghe nghe.

"I zirlâi lam te i thiam ṭhin em?" mipa aw thum hniam lam lek lek ri ka hriat leh tâkah chuan pa Ramngheta ngei a ni tih ka hre chiang ta a, nichin lawka ka ṭawng lang lang thawm kha a hre miah lo ni ngei tur a ni.

Ka awm ve tih hre map lo hian ṭhutthlengah chuan a ṭhu thla duai a, biak ka tum zet nàin phone a hmang laklawh bawk si nen maian leh anṭam; ka nute'n an tân liau liaua an rawn thawn thlak tel chu dawhkana dah tawp a fuh záwkin ka hria! 

Chu bakah min la rawn hmu ve lo hrim hrim a, min hmu ta pawh ni se kan inbe em em dâwn chuangin ka hre lo.

"Ka ngâi hle mai che pa......" chutiang thu rawn sawitu chu phone kaltlang mah ni se a fapa upa záwk Muanpuia a ni tih ka hai lo va, dawhkan bul thleng phei der tawh mah ila an in-video call avangin an ṭawng chu a hriat phak vek tho.

"Kei paw'n ka ngâi che alawm......" pa Ramngheta pawh chuan a ti thum ve bul a, thawm dim ru zet hian kawngka lam chu ka pan zal zal a, ka chhuah fel dâwn tak takah erawh

"Ka lo haw hun chu ride ila, kan khaw hluiah te khan han ride mai mai ila ka lo ti deuh a, i peih ang em?" tia Muanpuia ṭawng thawm chu ka hre hman hram a, an in hnuai kan luah tirh aṭang tawh pafa inkawm ngeih tak an ni tih hi chu hai rual a ni lo.

Phone call-in nu Sangtei hnenah an dawhkana maian leh anṭam ka dah tawp thu chu ka hrilh ta tho va, ani lah chuan Chhanchhani school bâng a lo hruai daih chu niin, an in chhûng ka luh lâia ka kohna pawh kha lo hre chî ziazâng a ni lo. 

Ka nute chawhmeh lo thawn chang zawk ka nih avangin dawr lamah ka lèt leh a, nu Kimtei paw'n zirtawpnî ber kher hi chu min hrethiam tawp ṭhin.

Zirtawpnî apiang hian ka nute'n chawhmeh an lo thawn thla vang vang ṭhin a, sawhthing te, bal te, thlai hnah leh thlai rah zawrh theih tur ang áng a ni hlawm ber a, keini'n inrinni zîngah ka lo làk belh ve leh bawk a, chhûngkaw dinhmun berin a zir miau loh hi chuan thawh hreh leh tih hreh pawh a neih theih tak tak ṭhin loh zawng a ni e.

"Helen......!" min sàwi dat dattu chu meng ṭha mang lo hian ka en lui diar diar a, ka mut a la chhuak viau bawk.

"Tho vat ang, thawh kan hai a nia......." u Chhûanga thusawi chuan chawp leh chilhin min tiharh nghal zawk a, inrinni zîng a ni tih rèng ka lo hre tawh lo chu niin, ka theihnghilh thei chu mawl inti hliah hliah tak ka ni!

"Dâr eng zat nge!?" phak chuapa ka tih chuan

"Dâr 6 a ri dâwn" a lo ti ve nghal vut a, kan che reng reng chu mûangchâng lo dun tak kan ni!

Thlai chawhmeh zûara kan ṭhut ṭhinna lam pan chuan kan kal ding ngar ngar a, biak pawh kan inbe mang lo. Kan ṭhutpuite phei chu an lo inrem fel vek tawh a, kan kal tlai chhan min lo zàwt sap sap nghe nghe bawk. 

Chawhmeh zawrhna tur ka phah laiin u Chhûangan kudam-a kan bungraw dah a lo zu thiar zung zung a, mi an lo la chhuak tam vak lo erawh kan tân vanneihna a ni hlauh thung.

Kan inrem fel hnu aṭanga rei pawh ni lovah chawhmeh lei tur te an lo lang sap sap a, ka rilru chuan Pathian hnenah lawmthu ka sawi mawlh mawlh a, inrem fel hman lo ila zawng zîngkâr inhralh kal hun lâi chu kan chân dâwn tih ka chiang a ni.

Nî pawh a rawn èng ta iar iar a, inhralh lah chu a nuam phian lehnghal a, thla tir lam a nih vangte pawh a ni maithei!

Thla tir lam, a bîkin a kâr hnihna hi keini ang bazâra ṭhu leh chawhmeh zûar te tân chuan inhralh nawm lâi ber leh inhralh kal lâi ber a ni ve tlat a, hlawh lâk zawh hlim a nih ṭhin vangte pawh ti ila a sual tampui lo ang.

Thla tawpah erawh inhralh tam a har leh em em lawi a, chawhmeh zawrh tur thlengin fimkhur a ngàih mai bakah inzawrh sual a awl ang reng hle a, keini phei chuan làk pawh kan làk belh tam ngai lo.

"Tukin chu eng nge i duh ang? A ngai em ni ang?" u Zorema hmêl ka hmuh rual chuan ka ti zàngkhài vâh a, thawh kan hai avangin ka ngaihbel nge pawh ka hre lo, tun ṭum chu a mêng bui ve deuh chûk thovin ka hre tlat pek a nih chu!

"Immm.......a ngai a ni mai" tho phang aw lek leka a rawn ṭawng ṭial ruih tâkah chuan

"Thawh i hai ve tho a ni maw? Keini pawh kan hai a, mahse hei.....kan tlai chhe lo hlauh!" ka lo tih zawm siam siam a, peih loh hmèl zet hian a nui lui suk a, naupang titau ber bur a ang ren run roh lutuk chu a nuihzatthlak viau rualin hmuh nuam ka ti lehling viau lawi si!

"Behhlawi rep leh anthur rep te hi nimina ka nute rawn thawn thar a nia, i duh tel ang em? A tui reuh phian asin, lei ve chhin la, in tûi tih zâwng a nih loh tâk leh ka tih luih ṭang ṭang che paw'n i lei duh tawh miah dâwn lo a nia...." ti leh zaih zaih hian ka nui zui var var a, ka mood pawh chu a fuh ta cher cher khawp mai.

"Han ti chhin la, eng zah man nge?" a rawn ti ve leh mai bawk a, pack khat man ka hrilh zo chiah chu mi dangin min rawn dawr nghal sap sap a, bawkbawn leh samṭawk buk a ngaih avangin ngaihsak pawh ka ngaihsak zawm hlei thei meuh lo.

"Mi dang kha buaipui phawt rawh, ka lo inlàk ang" ka mitmeng aṭanga hrethiam ni àwm hrim hian a rawn ti dut a, kei pawh chuan chhâng lèt lem hlei lovin mi dang chu ka ngaihven zui ta mawlh mawlh bawk.

"Puih i ngàih chuan sawi hreh lo la" amah bawk chuan a rawn ti leh sup a, ka bul lawkah a rawn ding thla run tawh nghe nghe a, indaih lo lam lek lek mah ni ila han inpuihtîr èm chu a inthlahrunawm ka ti tlat!

"Ngâi lo ve" ti liam puatin patla chuan thil dang ka buk zui mawlh mawlh a, min rawn dawr rual deuh huk chu a lawmawm rualin chet ran zung zung a ngàih phah khawp mai.

"Eng nge i tih dâwn?" bawkbawn bag hawn tuma ka chet rak rak lâi chuan a rawn ti hniam dut a, ka che vel reng reng chu min en chík ngut ngut hle bawk.

"Bawkbawn hi ka'n bun belh ang e, lo awm sawn lawk mai, bag hi a bal ang reng a" tia bawkbawn bag ka châwi tur chu

"Khawi.....keima'n..…!" ti bul deuh hmuk hian ka kut a rawn chelh vut a, ṭan pawh ka ṭan hmâin ka kut chu a pawt sawn daih leh ta nghal a, hnehsawh zeta bawkbawn a bun chhuah lâi te chuan ngawi rengin ka lo en tlawk tlawk ringawt!

"Thil dang a la ngâi em?" a kut bêng fai thuk thuk paha a rawn tih leh chuan

"Aih…ngâi tawh lo e, engati nge min puih duh….? I balh phah vek ang e aw.....?" ka ti ta sawk sawk a, liam vek tawh mah se a lakah chuan ka inthlahrung hnuhnawh khawp mai.

"I balh phah vek ngei ang a…." ka ti leh nàng náng a, han en mai chuan bal ang paw'n a lang chuang lo, mahse tlêm tê talin a balh phah dâwn tih erawh ka chiang hle thung.

"A inthlahrunawm e" ka ti fân deuh raih te chu hria ang paw'n a awm eih lo leh ta nghal a, ka tân zawng inthlahrun loh theih pawh a ni lo.

"Saw, thingpui an lo zuar asin, i in duh ang em? In ang aw?" thingpui leh chhang khâia zûar kual ka hmuh rual chuan ka ti leh zat zat a, thingpui tal chu in se ka ti khawp mai.

"Ka duh lo ni mai rawh se" a rawn tih chuan

"I duh lo tak tak em ni?" ka lo ti leh hliai a, dawrtu ka neih loh lâi tak a ni bawk nen han in dun chu a remchâng viauin ka hria.

"Thingpui hi ka ngaina hran lo; i siam te a nih ngawt loh chuan!" a fiamthu emaw tiin nui sak pah hian ka melh chho zeuh a, mahse fiamthu hmêl reng a lo pû awzâwng lo chu niin, ka lài ru nghal chem chem tih erawh ka awm dan leh ka hmelah a hriat loh hram ka besei.

"Zanin chu ka rawn lèn hman hmèl loh......" amah bawk chuan a rawn tih zawm leh zat a, min biak dan chu inngâizâwng emaw inṭhian ṭha tak te pawh kan ang alawm lè, mahse chutiang kan inkârah a awm hauh si lo.

"A nih chû.....a pawi lo" ka aw chhuak phuailuai ṭep pawh tih tawh nâk alâiin ka chhán dan te hlei hlei chuan sawi ṭul miah lo ka sawi tel tih min hriat chhuahtîr nghal vawn vawn a, min ngaihdan a dang vek ang tih mawlh ka hlau!

"Ka'n kal ang e" ti bul deuh nghutin chet chu a rual zui zat a, min kal pelh zâwnga a rim pà ru hrak rawn nam chhuak chem chem chuan ka hnâr a verh chiang hle bawk.

"A nih le......min pui bawk sia, awm lo la chu ka buai ngawt ang, ka lawm lutuk a nia...." ka tih chuan ṭawngkâa mi chhâng tawh lo hian a bu zauh a, ṭum dang ang bawkin min hlàt zâwnga a kal nul nul chu ka thlir zui vawng vawng leh ta nge nge!

A hnung lam aṭang paw'n ka hre chat thei ang tih tur khawpin a taksa rûangâm leh pianzia ka hre hrang thlap tawh a, zep thu a cheng lo, khawiah pawh ni se ka mitah chuan a langsar vâh ṭhin. 

A hmêl, lang vût si lova pà ru hrak te, a mitmeng thim deuh khup, mahse fiah ṭha em em lawi si te nen lam chuan vei loh a har ve thlawt a ni.

A hmâ kha chuan ka star satliah mai chauh kha a ni a, inrinni apianga a hmêl hmuh ziah te kha ka châk piah lamah ka nî hman thleng khan a nuam sawng sawng ṭhin hial a, mahse tunah erawh a dan a dang ta!

Khatia ka hna bâng min thlah haw tlai aṭang khan thil a danglam chho tih hai rual a ni lo va, keimah leh keimah ka inbum thei hek lo!

Inthup erawh ka inthup nasa ve ṭhin viau a, hmêlhriat satliah leh ṭhian ang ngawta min be bîk lo lâi tak te chu a laka feelings ka neihna chhan lian ber te pawh ti ila a dik hlel lo ang.

A rawn lèn zauh zauh tâk aṭang khan a bula awm nuam ka tihna a zual mai bakah han zàm ruk em emna pawh ka nei lo chho tial tial a, mahse kan inngâizâwng lo tih erawh ka hre chiang em em thung.

A laka ka rilru puthmang hi nakin lawka min tinâ mai maitu tur a ni thei tih hre reng chunga biak châng ka ngah a, mahse kan awm dun tawh hi chuan inthunun tum viau ṭhin mah ila ngaihtuahna leh thluak chhûng erawh a va'n luah hneh ngut ngut ṭhin si èm!

A bul hnaia ka awm châng te, a hmêl ka hmuh châng ringawt te pawhin a ni ang, a hmâ zawnga ka thunun theih ni reng si kha thunun hleih theih loh ang hrimin a harsa ṭàlh tawh ṭhin a, engkim chu ka thinlunga duhna a lo pian tawh vangah ka puh ta ber mai.

Dârkâr tin chu a liam hian a liam duak duak a, khua pawh a hniam chak viau e ti lo chuan khaw thim fel hmâin inhralh erawh kan inhralh zo hman diam thung. In kan thleng chu ei rawng ka bâwl nghal zung zung a, in chung lam thawm aṭang chuan Muanpuia pawh a lo thleng tawh a nih hmêl!

Zanriah ei khama nu Sangtei lo chhuk chuan lêng chho turin min rawn sâwm a, keini paw'n kan lo hnial bîk hran lo. Kan han lêng chho chu Chhanchhani chenin min lo be zat zat reuh hlawm a, vawi hnih lâi thingpui kan in nghe nghe a, Tharthara fiamthu thawh kan nuihpui loh leh mi tih dan a zir kan nuihpui thul, pa Ramngheta meuh pawh a fate bulah chuan a nui nasa ve khawp mai.

A tukah chuan chawhmâ lam inkhawm nân kan hmang a, chawhnuah erawh Muanpuia lo haw lawmna ni pah fàwmin nu Sangtei te'n chaw ei khawm an rawt a, tlai dâr 2 leh a chanve vel aṭangin nu Sangtei te nupa leh keini unauin ei rawng kan bâwl ṭan a, kan bawk hma chhan pawh zan inkhawm kan duh vang a ni pakhat!

"Pa......bike saw ka khalh chhuak lawk dâwn aw.....? Ka ṭhiante'n min lo tlawh ve rawh an tia, ka va tlawh lawk ang e" chawhmeh kan siam mial mial laiin Muanpuia chuan a rawn ti a, pa Ramngheta bawngsa siam pawh a inher titih chu a ni nghal mai.

"Immm.....fimkhur la" dam dap hian pa Ramngheta chuan a ti ve mai bawk a, Muanpuian a ma bike ngei pawh khalh chhuah a dil thlap chu mak ka ti ru ang reng hle a, u Chhûanga paw'n mak a ti ve thovin ka hria.

"Aw le, a nih ka kal mai, ka rei lo ang" tih leh Muanpuia chuan pa Ramngheta dar chu ben thek a rual a, rei awm tawh lovin a kal sawn zui ta nal nal bawk.

Dâr 3 velah Chhanchhani pi leh pute leh a nutei te pawh an rawn thleng a, nu Sangtei nu chu choka lamah a tal ve reng nghe nghe a, nèlawm zet hian a ṭawng siam siam a, nu Sangtei pa erawh pa Ramngheta nen inkawmin sitting room lamah an ṭhu thung a, bawngsa chu u Chhûangan a siam chhunzawm ta daih nghe nghe!

Khua chuan hniam lam a pan tial tial a, zan inkhawm hman turin chaw chu kan ei laih laih a, zanriah ei kham thlengin nuam kan la ti dar dar hle a, chaw eina seng fel vek hnuah kan chhuk ve ta chauh bawk.

Inkhawm tur paw'n kan kal rual leh ṭhap hlawm a, biak inah chuan nu Sangtei te bulah ka ṭhu nghe nghe a, u Chhûanga erawh hmun dangah a ṭhu thung. Inkhawm kan bâng hâr hran lo va, in kan thleng chu tih tur vak a awm lo bawk nen mut hahdam a ni mai.

"Lo lut rawh" kawngka inkik ri karh karh ka hriat rual chuan ka ti thluk deuh duai a, kawngka a rawn inhawn rik rat rat ruala u Zorema hmêl ka hmu chiah chu ka ding mar nghal awt a, chutah zan dang ang lo takin tarmit a la rawn vuah zui!

"Ka lo kal zawk....." ti thum dut hian a rawn pen phei khup khup a, inkhawm dress zet mai hi a la ha thlap leh ta nghal a, an inkhawm bànna a la rei bîk lo ni ngei tur a ni.

"Mut i tum tawh em?" amah bawk chuan a rawn ti leh sup a, ka zep lo ang, a lan dan danglam lutuk leh ṭha vut vut lutuk avang chuan ṭawng mai nachâng ka hre lo hial a ni.

"Aih......tum hran lo ve, lo ṭhu rawh" ka aw aṭang chuan ka ngaihtuahna ata ka harh chhuak zawk tih a hriatthiam loh hram ka beisei!

"Nangmahin em ni i awm?" awkâ dam ang reng taka min biakna te hlei hlei chuan ka chhûngril a va fan thla hneh raih raih ém!

"Immm.....mahse u Chhûanga a lo haw ṭep ka ring" ka ti ṭha ve mai a, chutah keimah bawk chuan

"Thingpui ka'n lûm ang aw?" tih leh thawh ka rual zui zat a, lo bu deuh nghut pah hian

"I thingpui lùm in châkin alawm ka lo kal" a rawn ti nui deuh suk kher a nih chu!

"Fiamthu mah ni se a lawmawm tho e" tiin kei pawh chu ka nui zui hak a, gas lamah chuan ka phei ve nghal mai bawk.

A rawn inthuam dan mawlh chu ka en chîk ru leh veng veng ṭhin a, tarmit te hlei hlei chuan a tilang zahawm zual ka ti lo thei lo. 

A lang officer ruih a, amah tho mah ni se khawi lai pisa emaw nia officer thu ber te pawh a ang sawtin ka hria. A tarmit lah chu a fîm tliang ralh bawk si, a va han inhmeh vuah vuah tak!

Kâr lovah u Chhûanga pawh a rawn haw a, u Zorema chu a vawi khat hmuhna a ni tawh bîk lo bawk nen a be ve nghal mai a, an titi dun thei phian lehnghal a, thingpui siam turin ka pheisan ta daih bawk.

U Zorema mawlh mai chu a ni ka rilru leh mit là pêng awl lo tu chu!

A ṭawngkam chhuak reng reng chu a nghet dam cherh churh em em vek a, a thin thawk aw pawh a dam viau ang ka ring. 

Zanin zet zawng phat rual a ni lo; zan dang ai ka hmu ṭha zual tak zet! Ka mitah hi chuan ka hmuh tirh ata tawh a danglam reng a, mahse zanin erawh a danglam dan a chiang thlawt a ni.

U Chhûangan eng hnathawk nge a nih a zawh lâi te chuan ka beng ka lo chhî ru kar a, ka la zawh ngai miah loh a nih avangin ka hre châk ru hle bawk.

U Zorema pawh chuan pangngai tak hian SCERT hnuaia science consultant hna a chelh mêk thu chu a hrilh ve mai a, eng hna nge a nih leh an thawh tak hrethiam chiah lo mah ila sawrkâr hna a ni tih erawh ka hre chiang viau thung.

A haw dâwn chuan kawt thleng ka thlah leh a, zan dang ang bawka a tlan haw lâi thlir liam ka tum a ni ber. Car kawngka a hawn vek tawh chu a khar leh ang lawi a, ka lamah a rawn kal phei zui nghal thauh thauh bawk.

"Ih....eng lo.....theihnghilh i nei em ni?" a mit taka en ṭhan ngam mang lo hian ka ti chhuak sap a, dik tak chuan hmân ang chiah khan ka zàm ru leh tawh tak zet; chiang zeta min en reng vangte pawh chu a ni ang! 

"Naktukah ka zin dâwn a......" ti dam dapin min rawn din hnaih salh a, chutah amah bawk chuan ka kut rawn chelh lûm vung vung pah hian

"Ni tam ni dâwn lo mah se kan inhmu thei lo tur erawh a phurawm loh khawp mai" a rawn ti thum leh chhal a, ka taksa khawi lâi mai pawh chu a sâ pup pup ni berin ka hria.

End of chapter 2