𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟕)

ZOREMPUIA
(Mizo Romantic Novel)

By

Havali Adam

Chapter 7

U Zorema nena in chhûng kan han lut chiah chu ka chhuah dâwna ka chhuanlam siam fahrah zet kha ka hre chhuak nghal zawk a, ka nu leh pate pahnih mawlh chuan an hriat tawh loh hram ka beisei tawp ringawt!

Kan palîa in turin thingpui ka lûm a, rei lovah u Chhûanga pawh a rawn haw a, u Zorema nen chuan an mutna tur enin in hnuai lamah an chhuk thla zui daih a, an inpawh ve tawh lutuk chu an inhriatna a rei tawh ngaihtuah chuan a àwm lo hran lo.

Rei awm lovin an rawn chho ve leh mai a, thingpui pawh ka lo thlî chhuak diam tawh bawk. Thingpui in lâi chuan u Zorema leh ka pate chu an titi deuh reng a, kei erawh an titi ngâithlain ka lo awm ve tawp a ni ber a, han ṭawng zeuh te chu nei tho mah ila an thil sawiah chuan ka inrawlh lo tluk a ni. 

Thingpui kan inzawh aṭanga rei lovah mut zâi kan rél zui nghal chu a ni mai a, mut hmunah chuan u Zorema ka ngaihtuah ru reng bawk.

Ka beisei ngai reng reng loh hringnunah min chùankàipui a, amah avang hian ka tawng ang tih pawh ka rin thiam phak loh thil chi hrang hrang nen lam ka tawng zing malh malh ta viau e!

Ka tân chuan lungngàih châng leh rilru hah chânga ka inhnemna ṭhinna ber pakhat a ni tawh a, ka hringnunah bu lian tak a khuar fel dim diam tawh bawk. Keimahah hian châm reng se ka duh a, ka thinlungah hian amah avang liau liauin hmangaihna a rawn piang ni ta berin ka hria.

Ni e, kei hian ka hmangaih tawh chiang a ni. Zep rual a ni lo, ka thinlungah hian a chiang lutuk tlat!

Engtik nîah emaw chuan i nunah khan a hmâ zawnga i la hmêlhriat ngai reng reng loh mikhual a lo la lut ve ngei ang a, i nuna pawimawhna a chan aṭang chiah khan hmangaihna zun zâmin a phuar vel che a ni tih hrethiam la, rei lo tê emaw i tih lâi khan hmangaihna lîpuiah i lo zuang lut fel der tawh tih hre bawk ang che; chu chu a ni mihring rilrua hmangaihna lo pian chhuah dan mawlmang tak mai chu!

Zîng khua a rawn vâr a, thawh ka hai lo hlauh a, kan in a nih tâk avanga ka mu tui cherh cherh ta lutuk chu ka thiam loh ni paw'n ka hre tawh lo. Ka nu leh pate nen tapchhaka kan ṭhut lâi chuan u Zorema a rawn chho hlawl a, ka rin ai a tho hmâ daih!

Ka lo be nghal siam siam a, thingpui ka siamsak zui zung zung bawk a, ka ngaihbel nge pawh ka hre lo, nizana ka hmangaih a ni tih ka hriat chhuah aṭang khan ka chhûngril lam chu a hlim veng veng ni berin ka hria.

Mize hran hlak, sawi duh zâwng pawh inchu e kha e vak lo leh ngainat zâwng nen lama inang ngai miah si lo kha tunah chuan kan danglam ve ve tawh tih hai rual a ni lo va, kan kârah inhriatthiam tawnna leh inngaihsak tawnnain ro an rel chhun zan zawm a ni ber a, inngàih lah kan bâng chuang hek lo, kan hringnun zin kawng zawh dun mêk chu thil inchar bet tlat ang mai te'n ka chan hial ṭhin.

Chu hringnun, inhriatthiam tawnna leh inngaihsak tawnnaina an chen chilh fô chu hmangaihna avanga piang ni lo se eng dang vang nge ni chuang ang nì!?

U Zorema che ri ruk ruk chu ka en deuh reng a, tukṭhuan ei kham a ni tawh bawk nen Aizâwl lama haw thla turin a inbuatsaih mual mual a, car hnung a khar rik dup hnu chuan min rawn melh nghal chat a, mit khap kâr lekin ka bulah a rawn ding der a, hmuh phak lova a awm leh tawh mai tur chu ka ngâi veng veng dâwn viauin ka hria.

"Thlai hnah leh thlai rah min hawntîr in tum hnem bawk si a, ka nute pawh an lawm ngawt ang" a rawn tih chuan

"I nihlawh ngawt mai" ka lo ti fiamthu raih a, ka ṭawngkam chu a lawm zâwng tak te pawh a ni mahnà, hmuh ninawm loh zet hian a kiai zui nghal suk nghe nghe!

"Fimkhur la aw......?" thlahlel ngawih ngawih ang hrim hian ka ti leh hap a, chutiang em ema ka ngàih nghal ringawt chu ka ring bîk lo, chutah kal pawh a la kal lo a nia!

"Immm......." ti supin ka lû ah chuan a rawn chûl zeuh a, mi dang hovin in chhûng lamah a chawhmeh hawn thlak tur an buaipui lâi tak a ni tho bawk nen zah pawh dâwn lovin ka kuah ta ringawt!

"Hun nuam tak min hmanpui avangin ka lawm e" ti dam leh ruihin ka hnung chu a chûl zui hauh hauh a, rei pawh kan inkuah chuang lo.

Ka nute an rawn chhuah tâkah chuan pangngai takin ka awm ve leh mai a, ka ding ngawi reng a ni záwk mah a, u Zorema paw'n lawmthu a sawi deuh mawlh mawlh a, ka chhûngte chuan ka rin ai an duhsak thiam daih bawk. 

Mâi ban pum khat an pe tel nghe nghe a, rawn zin leh ngei tur te paw'n an chah thlap a, kan han invai liam meuh hnu chuan ka ruak deuh huaiin ka hria.

Suangtuahna nen nî chu ka hmang ral ta ṭhak a, tisaa hmuh tur leh tawh tur awm tawh lo mah se ka thluak chhûngah erawh amah bakin hmun a chang meuh lo va, kim lo riaua ka inhriatna te chu ka ngàih zui vawng vawngzia tichiang em emtu pakhat a ni ka ti lo thei lo va, chutiang taka ngàih chu ka nunah ka la nei ngai lo hrim hrim bawk.

A hmâsa ber chu amah a ni a; a tawp ber pawh amah tho ni se ka duh!

A thlen tluan leh tluan loh ngâichang reng rengin hun ka hmang a ni ber a, tukṭhuan ei dâwn tawhah pawh a hnen aṭang phone call ka la dawng lo tluang zel a, ka call lahin busy a inti tlat zel mai bawk si, rilru chu hah ru duh tak a ni.

Zan lamah erawh a hnen aṭangin phone call ka dawng ta nge nge a, signal a neih ṭhat loh thute chu a rawn sawi ve nuah nuah a, kei lah rilru a lo kal ding laklawh tawh kher bawk nen ka hau nghal tan tan a, huatah pawh a là chuang lo.

Kan inbe rei ang reng fû a, tunlâi chu thil ho tê tê sawia inbiak kan chîng khawp mai. Khuma ka mut fel hnu chuan rilru leh mitthlaah a rawn lang zui nghal zat a, min ngâi ve ang em le tih mai mai ngaihtuahin zan rei tak thleng ka men phah hial a, ani ang mipa hi ka tawng lo ang tih leh ka nunah ka là lut lo ang tih ka hlau nawn leh nge nge bawk.

Hun chu a liam zel a, krismas boruak pawh a reh tial tial a, a hun lâi tih takah kohhran lènkhawmna lamah hun kan hmang zantin ta ziah a, lêngkhawm pawh kan ṭhahnem thei hle a, thingpui semah te kan han ṭang leh ang lawp lawp bawk a, nuam kan ti tlâng khawp mai. 

Chutiang zelin u Zorema nen pawh kan inbe zantin reng a, inbe lovin kan awm thei tawh lo te pawh ti ila a sual tam ka ring lo.

Hunpui boruak a zo fel chiah chu kum tharin a rawn luah zui nghal a, Aizâwl lama kan chhuk thlak hun pawh a hnai leh ta kuar mai. 

Kâr hnih vel bak chàmna hun kan nei tawh lo a tih theih a, keini thawhna dawr ngat phei chu pakhat awm lo hlek paw’n indaih loh a nâ duh em em a, nikuma Lâtei awm loh zeuh chhûng pawh khan kan buai hman zèk chu a nih kha!

Chhun lama ka hun hman dan tlangpui chu insuk leh in tihfel a nih loh chuan nùla kal a ni deuh tawp a, ram te pawh kan nei ve tho nàin vawi khat bak ka la kal lo va, tih tur em em a awm rih loh vang a ni pakhat!

Hnathawh tur a awm hunah erawh Aizâwl lama kan awm thlak leh daih tawh a rinawm a, ka nu leh pate chu pui thei ila te pawh ka ti ve ṭhin, mahse tun dinhmunah chuan pawisa kan thawh chhuah a la ngâi rih tlat bawk si a ni.

Hunin Aizâwl lama kan liam thlak hun a rawn her chhuahpui meuh chuan chhuk lo thei kan ni ta lo, zin kawng tluanin rilruah thil chi hrang hrang a rawn lut zut zut a, hna vanga chhuk ngâi chu ni lo se zawng ka la châm deuh ngei ang. 

Kawng lakah chuan ka nute nen kan inbe pawp reng a, motor lah chu ka rui leh ta nghal a, zin kawng nuam lo ve tak chu a ni.

Aizâwl ka han thleng thla te chu thingtlâng boruak nen a inang lo nghal em em a, motor ka rui kher bawk nen boruak danglam ta hlawk chuan min hmet chau zual ngawih ngawihin ka hria.

Kan in luah ka thleng chiah chu khumah ka mu nghal thlawp a, u Chhûanga erawh bike-a chhuk a nih avangin a lo thleng fel diam tawh a, ka awm dan aṭang chuan ka chau tih a hria te pawh a ni mahnà, ka thlen tirha min bia tih loh chu min be em em hran lo.

Mipa ṭawng thum deuh bul bul chuan min tiharh riai riai a, ka harh chiang telh telh a, pa Ramngheta a lo lêng thla tih ka hrethiam chawpchilh ve nghal mai bawk.

Tho chhuak nghal mai lovin khumah chuan ka mu meng deuh reng a, eng ka ngaihtuah ding pawh a ni chuang lo, thawh ka la peih vak lo a ni ber. Ka phone chu hmet èngin dâr zat ka en zui zat a, dâr 4 leh a chanve a lo ri vel chiah a, khum aṭang chuan ka tho chhuak ve ta nge nge bawk.

Ka hmêl a hmuh rualin pa Ramngheta chuan min lo be nghal dap dap a, min chibai zui nghal nghe nghe a, an in hnuai luah kan nihna chu hriain thlen thlak tirh phat aṭang min rawn ngaihven thiam khawp mai.

Krismas leh kum thar an hman nawm leh nawm loh te ka záwt lèt ve luam a, ani pawh chuan pangngai tak hian min chhâng dut dut a, ka beisei loh deuhin a lêng rei roh phian lehnghal a, khaw thim fel hnuah a haw chho ve ta chauh nghe nghe!

Hun milin ka che mial mial a, zan lamah chuan u Zorema hmêl ka hmu har lo hle a, ani ang mipa vantlâng chung lam hâwl pha chin ngatina ka tarmit thlansak ngei a rawn bun ta ziah ringawt pawh chu intihtheihna tham niin ka hria.

Ka thlan tirh kha chuan nalh ka ti ngei a, amah záwkin a tun lâi mah mah deuha a hriat avang khan a inhmeh ka ring chiah lo chawpchilh ve leh nghal mai kha a ni a, mahse a han vuah fô tâkah chuan inhmeh ka ti telh telh mai.

"Khaw'nge Chhûanga?" min kuah deuh hlun a, thlasik boruak a la her liam chiah lo bawk nen ka lûm nghal riai riaiin ka hria.

"A lêng....." ka lo ti ve mai a, chutah amah vek chuan

"Lèn a cheh ve ngawt mai" rawn ti leh supin a nui nghawr dat a, ka hnial châk tlat pek a nih chu!

"Nang pawh lèn i cheh ve tho lo em ni?" ti khauhin a hmêl chu ka en chho deuh kal a, engtin tak mi chhâng ang maw!

"Keite chu a hiptu a nâ alawm" a lo ti awlsam than a, hmut pet sawi chunga ka ner zeuh chu rawn hmuin a nui zui nghal sun sun bawk.

"U Chhûanga pawh a hiptu a nâ a ni maithei asin" meinei zeta ka ti leh hram chu a rawn nui chhuak ta hawk hawk!

"Ka rin ai ka tarmit thlansak che hi i inhmeh daih....." a nuih nghawr dat dat hnu chuan ka ti deuh hliai a, zep thu a cheng lo, a tilang ṭha zual ve êm a ni.

"A ni ang, Veni paw'n a tilang young sawt che min tih ve tak kha maw le, ka nu pawh a bang chuang lo" pangngai taka a rawn tih chuan

"Tu nge Veni chû......?" ka lo ti thuai a, hmeichhe dang hming a lam rik rual ringawt paw'n ka danglam nghal thei a nih chu!

"Ka u fanu maw lè......" a rawn tih tâkah chuan chawp leh chilhin ka rilrua zawhna awm neuh neuh chu a kiam ta duak a, ka thikthu chhiat vang nge pawh ka hrethiam tawh bîk lo.

Remchângah làin an chhûngkaw chanchin chu ka zàwt zui ta melh melh a, ani pawh chuan min hrilh ve mai bawk. 

Unau mipa pathum niin an upa ber a boral tawh hi a lo ni a, chu an upa ber fa neih chhun chu Veni niin an awmpui nghe nghe a, an upa ber nupui a boral zui ve leh tâk zel avanga awmpui an ni ber a, Veni pawh chuan a nute lam ai a pa chhûngte bula awm chu a lo duh záwk hrim hrim a ni awm e.

Rei tak a léng lo va, motor ka chùan chauh a rin vang pakhat a ni a, kawng tluan deuh thawa ka ruih thu erawh ka hrilh ta lo law law mai.

A haw hnu chuan khumah ka mu zui nghal a, muthilh hmâin u Chhûanga ka call leh tê tê phawt a, ani paw'n a lo haw dâwn chiah thu a rawn sawi ve nghal mai bawk. 

In chung lam erawh an la meng kim ṭhap a ni mahnà, an thawm a zawi lo khawp mai; ka ning tihna pawh ni chuang lovin!

Zîng boruak thiang sárh chu dawn a nuam leh pek hle a, hna ṭan nî a ni bawk nen ka tho hmâ ang reng viau a, thawh hmà hrim hrim hi chuan thil tih a sawt mai bakah hun vawn dik pawh a lo awl deuh nge ngein ka hria.

Tin, hun hi chu a hlu telh telh dâwn niin a lang! Ram changkang leh mihring hmâsawn apiangin hun hman an thiam a, hunin engkim a phuarzia hrethiam ran chungin an nung ṭhin bawk.

"Helen, lo kal lawk teh" nu Kimtei lam chu hawiin ka phei zui ve nghal mai a, kan inkârah han inhmuh thiam lohna em em awm tawh lo mah se a hmâ ang kha kan pha tak tak thei tawh lo a ni ber.

"Pawisa hi a kim lo tlat mai, ka chhiar zing tawh lutuk, eng nge a chhan ni ang?" a ṭhutna dawhkan bul kan thlen rual chuan a ti deuh nghal lang lang a, ka bangbo teh e!

"Ka va'n hrethiam bîk lo ve nu Kimte" ka ti sap a, chutianga pawisa kim loh ringawt chhan chu ka hre bîk lo tak tak!

"Nichin khan pawisa i dawng a ni lo'm ni?" a rawn ti fiah leh fak a, min ringhlel tih chu hai rual a ni lo.

"Aw......dawn chu dawng e, mahse ka dawng kim thlap sia, a va'n mak em em....." ka ti nang nang a, ka rilru pawh a kal ding ta khawp mai.

"Chuti si engati nge a kim loh…..!? I dawng kim vek a, mahse ka hnenah a lo lut kim si lo, eng nge a awmzia?" a ṭawng zawi hauh bawk si lo nen mi dang hriatah chuan pawisa ru te pawh ka ang alawm lè!

"Ka hre lo tak tak nu Kimte, pawhdawha ka duh luh dâwn pawh khan a la kim vek chuan ka hria" ka ti nghet charh charh a, rukru melha min melh tlat chu ka duh loh zâwng tak a ni.

"A nih.....i dah luh dâwn chuan i chhiar nawn leh thlap em?" a rawn ti khauh ve leh ta fak a, indawp te pawh kan ang lek lekin ka hria.

"Chhiar nawn tawh chiah lo" ka ti chiah chu a lo chek ri tlak a, insawifiah ngaihna ka hre lo khawp mai.

"I mamawh a nih te chuan min hrilh mai ta che, a ruka là kher lo hian....." ka hlauh ang ngeiin thil ru ah min puh ta nge nge e!

"A rukin ka là hleinem nu Kimte" insum rilru zet hian ka ti chhuak hap a, mi dang hriat lâia min sawi dan ber kher chu ka lungâwi lo ru tak zet!

"Belhchian i lo dawl tehchîam lo a nih hi!" a rawn ti kha leh hmarh a, dawr chhûngah customer an rawn lut chiah bawk nen ka ṭawng zawm tawh lo hrim hrim a, ka rilru erawh dam lo tak a ni.

"Nang maw.....!? Eng nge hetah te i tih ve a?" hmeichhe awki zàng vâh lam ka hawi chiah chu Peki ka hmu zui nghal zat a, mak ka ti ru ang reng viau bawk.

"In lo inhria elo?" ka chhàn hmâiin nu Kimtei záwk a rawn ṭawng chhuak a, chutah Peki bawk chuan

"Hria e, chawhmeh a zûar ṭhin a, ka dawr ṭhin alawm" lo ti liam liamin a nui deuh sâwng a, min sawi duh dan ber kher chu a lawmawm viau loh khawp mai.

"Eng nge hetah i tih ve….? I dawr ve nge…?" Muanzuali chu ka en nghal zat a, chu lâi hmuna ka awm ve chhan chu hre chák ngawih ngawih ang ziazâng hian min en kal a, kei pawh chuan

"Ka thawk ve alawm......." tiin ka nui lui sâng a, ka nui lui tih chu a hrethiam vek maithei a ni.

"A nih chû........ka hmu thut bawk che sia, mak ka ti deuh mai mai maw le" ti nêm hliaiin nu Kimtei lam a hawi zawm zat a, kei pawh chu eng sawi tawh lovin ka phei zui ve ta daih bawk.

Thil ṭhui pahin nu Kimteite lam chu ka melh leh zeuh zeuh ṭhin a, an awm dan aṭang chuan ka chanchin an sawi ni mai te'n ka hria. 

Eng dang zawng aiin nu Kimtein pawisa ru anga min puhna chu ka rilru tibuai ru em em tu lian ber a ni a, ka insawifiah lah khan awih hmêl rèng a pu bawk si lo, ka tân chuan awm nawm loh rawih rawihna tham a ni ve chiang a ni.

Ka rilru nuam thei ngáng lo chuan Lâtei ka hrilh ta nge nge a, nu Kimtei min puh dan ka hrilh zo chiah chu àwm ang lo a tih mai bakah min tha nàtpui nghal hle a, pawisa ka ru lo tih ka inhriat chian tluk zetin pawisa ru duh tur mi ka ni lo tih a hre chiang thawkhat ve bawk a tin a ni!

Ni e, kei hian eng pawisa mah ka ru lo chiang alawm; dawr pawisa ngat phei chu! Amaherawhchu, eng vanga kim lo nge a nih ka hre bîk hauh lo, pawhdawha ka dah luh dâwn khan ka chhiar nawn tawh kher lo va, mahse ka chhiar hnuhnun ber kha chuan a la kim vek tih ka hre chiang em em thung.

"Ka'n kal ang e" Peki aw ka hriat rual chuan an awmna lam ka hawi phei zawk a, min rawn bia ni tlata ka hriat vang a ni pakhat!

"E.....aw.....aw le...." ka ti deuh hliai a, inhmêlhriat ṭha lutuk ang hrima min biakna leh a mitmeng de sawr avang chuan mak ka ti ru leh pek hle.

Peki chhuak tur chu nu Kimtein dawr kawt thleng a thlah thlap a, dawr chhûnga a rawn luh leh hnu chuan ngawi rengin ka pan nghal chat a, insawifiah ka bàt avanga insawifiah tum ṭha leh ngat ka ni lo va, thil felhlel leh dik tawk lo a awm avanga thil nih dan dik tak hrilhfiah tum mai chauh ka ni; a bak thil dang a awm lo!

"Nu Kimte, i hre sual em chu ka hre lo va, mahse eng pawisa mah ka là lo tih hria la ka duh" ka deuh charh charh a, ani ve thung chuan mi pawh en lo leh meinei rawngkâi tak hian

"I làk loh te chuan awm kim àwm tak a nia, a va mak dâwn ve....." a rawn ti zàng vâh a, chuti maia min rin chu a tum lo a nih hmêl!

"Eng pawh ni se, last warning-ah ngâi la a ṭha ang, a thleng leh a nih erawh chuan ka thutlukna siam dan tur chu i hriatthiam nghal mai ka ring" amah bawk chuan a tih zawm fak fak a, zep thu a cheng lo, a ṭawngkam chhahchhuah dan mal tin chuan a chhunin min chhun zawk zawk a ni ber.

"Phei tawh rawh, hna a la tam em saw!" a rawn tih leh chuan ngawi rengin ka phei chhat chhat a, ka rilru chhûngril nàt dan chu pui tak a ni.

Ka kum bul ṭan dan lungàwihthlak loh tak chuan ka rilru leh taksa a pawt chau nghal rawih rawih a, ka thil ṭhui te reng reng chu ka zawi ru em em a, nu Kimtei ni se bâng daih mah ila pawi tihna pakhat mah a nei lo tih ka hre chiang ropui bawk si, a va'n hrehawm ru ngawih tak èm!

U Zorema nen car khata kan chùan dun hnu thleng paw'n ka rilru chhûngril tak chu a la dik hlei thei chuang lo va, tihlan loh hram erawh ka tum ngar ngar a, ka buaina chu ani hriatthiam phâkah pawh ka ngâi lo hrim hrim!

Tin, hre ta pawh ni se tih theih a nei chuang hleinem, chuvangin hriattîr ai chuan hriattîr loh law law ka duh záwk a ni.

"I awm a nuam lo em ni?" kan in kawt zâwl kan thlen hnu chuan a rawn ti ta nge nge a, ka awm danah a lo hriat viau te pawh a ni mahnà!

"Nuam e" ti sepin car kawngka chu ka hawng zui rak a, ka nui lui deuh sak bawk.

"Dàwt sawi lo la…." tih leh ka bân reka rawn chelh a rual a, min ngaihtuah tih chu hriat loh der theih pawh va ni suh!

"A nih aw......? Fimkhur la, kei pawh ka'n lut nghal mai ang e" ti dam diain car aṭang chuan ka chhuak lui ta tho va, a rawn chhuak zui ve nghal zat nghe nghe!

"Engtin nge i awm..? I dam lo em ni?" ka dar tawn tawna chelh chung hian min melh chhuk run a, tih ngaihna dang ka hre ta bîk lo.

"Eng lo......." ti hapin ka ngawi zui vang vang a, ka hrilh ang nge hrilh lo ang tihah ka rilru chu a la insual fàn a ni.

"Vawiin chu ka rilruah i awm reng a….." ti thawp sapin ka ṭhen sak a, zawhna mitmenga min en reng lâi chuan ka kuah zui zat a, min rawn kuah ve nghal mai bawk.

"I awm dan a dik lo tih ka hria, mahse chu erawh zan lamah ni záwk rawh se" ti thum dam dap hian ka chhip sam chu a fawp zeuh a, rei erawh kan inkuah hran lo.

Kan inthlah liam fel meuh chuan khua pawh a lo hniam leh duai tawh a, in chhûng ka lut chu ei rawng ka bâwl zui nghal malh malh a, nu Kimtei min rin dan dik lo tak leh lungàwithlak loh tak avanga intihnual reng duh lovin keimah leh keimah ka intihlim chawp a ni ber a, mahse a harsa ang reng khawp mai.

Chutia ei rawng ka báwl lâi chuan Lâtei hnen aṭangin phone call ka dawng a, ka là zui ve nghal mai a, ka rin ang ngeiin nu Kimtei nena kan inbiak dan min rawn záwt nghal zat zat a, dawra kan awm lâi khan ka hrilh ṭha duh lo kha a ni a, mahse tun ṭum erawh ka hrilh tlang vek ta law law mai, ka zep reng thei dâwnin ka hre chuang lo a tin a ni!

Ka laka nu Kimtei thusawi duh dan zawng zawng ka'n hrilh chiah chu min lungàwipui lo ngang ngang hle a, naktuk lama be ṭha leh tur te'n min chah lûam a, mahse biak ṭhat leh tumna emaw a laka insawifiah leh tumna pakhatmah ka nei tawh lo hrim hrim!

Khati khawp khan ka insawifiah tawh a, thil nih dan dik tak nen lam ka hrilh vek tawh a, mahse awih ai chuan last warning min pe záwk a nih kha!

Lâtei nen chuan kan inbe rei ang reng phian a, kan thil sawi dunin a zir bawk nen u Chhûanga lo haw lâi paw'n kan la inbe char char a, kan inbiak chhûng zawng chuan ei rawng ka bâwl fel vek hman nghe nghe!

Chutia ṭhian ṭha ber te nena kan han inbe zo chiah chu ka rilru pawh a zia huai a, u Chhûanga erawhin engmah a la hre ve lo a, hrilh pawh ka tum rih lo law law, chutih rual chuan ka buaina chu a ho tham miah lo tih ka hre chiang em em thung.

Ka rilruah Peki a rawn lang zawk a, engtin nge nu Kimtei nen khan an inhriat tih lam ai mah chuan engtin nge nu Kimtei bulah min lo sawi ang tih ringawt ka ngaihtuah zui ta ngar ngar a, mi dang awm ve reng laia min sawi duh dan te kha dawnsawn a nuam lo ropui bawk si, nu Kimtei bulah phei chuan min chhuah ṭha vak dâwn lo tih ka chiang! 

Chutah nu Kimtei nena kan inkâr ṭhat loh zual lâi tak a ni leh nghal a, an ngaih ngaihin min ngâi tawh mai teh se!

Zan lamah chuan u Zorema hmêl kan hmu har lo hle a, u Chhûanga a la lêng chhuak rih loh bawk nen eng eng emaw ni an sawi dun lûam a, an titina ah ka inrawlh ve leh zauh ṭhin tih loh chu ka ṭawng mang lo a tih theih a, chutia an ṭawng lâi chuan thingpui ka lùm ta daih nghe nghe!

Dâr 8 pelah u Chhûanga chu a lêng chhuak ve ta chauh a, u Zorema a lo lèn tawh hi chuan chance min pek a tum nghal tawp zel ni berin ka hria.

"Vawiin chuan min lo ngâi viau em ni?" pà zeta u Zorema nui thum dut ri chu ka tân zawng hriat ninawm loh a va'n ni tehlûl èm!

"Immm......" zep nei hauh lova ka tih chuan

"Min ngàih chuan engati nge min lo call mai loh?" lo ti khauhin ka khabe a rawn dawm zui zat a, inen pawh kan inen chiang ta viau mai.

"I buai ka ring a......" ka ti zo chiah chu a lo chek nghal hluk a, vawiin kha chuan a buai ka ring tak tak!

"Ka tâna i pawimawhzia hi i hrethiam pha kher lo ang" a thusawi awmzia chu ka thinlungah a fiah em em a, zawh fiah leh kher a ngâi tawh paw'n ka hre lo.

Ka hun tawn mêk fuh lo laklawh zet kârah pawh awlsam têa ka rilru sukthlek a tidanglam thei chu ka lawm a, ka vanneihzia inhriain 'ka hmangaih che' tia ka rilru chhûngril dik tak sawi chhuah mai te ka nap rum rum hial a, mahse ka zak leh hnuhnawh ang lawi a, chuvanga a bêng hriata ka hmangaih thu sawi chhuak rih lo mai chauh chu ka ni nghe nghe a, engtik nîah emaw chuan ka la sawi chhuak ngei dâwn tih erawh ka chiang a ni.

"A nih......engtin nge vawiinah hun i hman? Tlaia i awm dan te kha ka la hre reng a nia, ka zàwt nghal che ni bawk rawh se" ti thlup thlup hian a taksaah chuan min kuah bei ta hle hle a, pangtilúm ngah tih takah min ur lûm nghal hat hatin ka hria.

"Eng lo a nia......." tia chawl deuh datin vawiin lama nu Kimtei min rinhlelh dan zawng zawngte chu ka hrilh ve ta melh melh a, mahse chipchiar takin ka hrilh vek duh lo thung.

"Khawiah emaw ni i kal teh ang" a rawn ti daih a, ka thil sawi zawh chiah avanga ka rilru hnual ru leh nghal rawih rawih chu a hrethiam te pawh a ni mahnà!

"Khawiah maw?" ka ti deuh hê hû a, chutia chhuahpuia min sâwm teh thut chu ka hamhaih a ni ber.

"I hre mai ang, chu bakah zanah hian kan chhuak dun khât hrim hrim…." tih leh thawh a rual a, ka kutah chelhin min kai tho zui nghal zat bawk.

Kalna bîk pawh nei em em lovin Aizâwl khaw chhûngah chuan min phur kual a ni deuh ber a, kan titi pah reng bawk a, chutia boruak dang daih ani nena kan hip dun ta chu ka rilru pawh a inthlak danglam harsa lo hle a, chhun lama ka hun hman dan lungàwithlak loh zet kha chu hriat pawh ka hre mang tawh lo va, Khatlaah street food min ei hawpui leh ta zel bawk nen ka inngaihtuah lungkuai hman tawh lo te pawh a tih theih ang.

"Zo......." aw lo chhuahna lam chu u Zorema nen kan hawi phei rual ṭhawt a, u Zorema rawn kotu chu Peki lo ni rengin!

"Khaw'nge in kal a?" a rawn ti zui lang lang a, u Zorema pawh chuan pangngai deuh hian

"Kan han tei chhuak ve lawk a nih hi......" a lo ti sam mai a, chutah Peki bawk chu rawn ṭawng leh nghal zatin

"Inrinnîah chawhmeh i zûar leh dâwn em Helen..? I zawrh dâwn chuan lo kal ka tum a, ka rawn dawr ang che" a ti nêm hliai a, rilru tluang tak pu chunga sawi hmiah hmiah angin awm mah se a rilru chhûngril erawh min tihzah a tum ni berin ka hria.

"Immm......" tih bakin ka chhâng lo va, ka chhâng ṭha duh lo tih chu a hriatthiam nghal vek pawh ka ring.

"A ṭhat nasat chu, ka lo kal ang" tiin a ṭhiante awmna lamah chuan a phei zui nghal daih a, ka thil ei lâi pawh chu ka ei tûi tawh lo hrim hrim!

Kan inei puar fel hnu chuan kan haw zui nghal chu a ni mai a, thawveng ang reng tak hian ka ṭawng barh barh a, mî zînga Peki min biak duh dan kha ka theihnghilh ta hmak pawh a ni bîk chuang lo, chutih rual chuan ani avanga ka rilru tihhnual ka tum lo bur a, ngaihtuah pawh ka ngaihtuah zui peih vel lo law law a, u Zorema nena hun nuam tak hman dun chu ka duh daih záwk a tin a ni!

Zan a ral a, nî thar a rawn inher chhuak a, dawr lamah hun kan hmang nilêng a ni leh ber a, nu Kimtei lakah pawh awm dan chin tàwk ka hre ta khawp mai. Hmân ang khan ka nêl thei tak tak tawh lo va, ka pawh tak tak thei tawh bawk hek lo.

A chhan chu amah záwkin ka lakah ngaihdan dik lo a nei laklawh tlat a, kan pangngai ve leh mai ka rin tehlûl nen a zual zel zàwk emaw tih turin kan inhmuh thiam loh dan a thuk tulh tulh a, chuti maia kan innèl leh theih pawh ka ring tawh lo.

Hun inher danglam zel chuan sik leh sa a thlak danglam a, nipui a rawn inher chhuak ṭan der tawh a, Aizâwl kan chhuk aṭangin thla pawh a liam ve leh ta duai mai.

Dawrah kan buai nitin reng a tih theih a, mahse krismas boruak lâi ang em em kha chuan kan buai tawh bîk lo va, chutiang zelin u Zorema nena kan inkâr pawh a la tluang mâm parh reng a, inngâizâwng rei ve ta nà nâ ná chu kan mizia, kan duh zâwng leh duh loh zâwng nen lam tunah chuan kan inhre chiang dun tawh khawp mai.

"Hei hi eng nge a awmzia!?" nu Kimtei aw chu a vin fiah ṭha fak fak hle a, kan en deuh ṭhap nghe nghe!

"Tu ṭhui nge!?" amah bawk chuan ti leh hmarhin a kawr ken lâi chu a pharh zui nghal a, mak tih hmèl zet hian Lâtei chu a rawn hawi zawk a, kei pawh ka bang chuang lo, mak ka ti ve tho.

"Keimah....." tim daia ka ti dek dek chu

"Engati nge i fimkhur loh ṭhin em em a Helen?" nasa zet hian a rawn ti nghal hmawk hmawk a, sawi ve tur rèng ka hre lo.

"Hei, en rawh, a zak te hi a ṭhuina a peh vek, hetiangte chuan customer kan hnar zel dâwn asin!" tiin min ṭawngkhum zui siah siah a, kum tir aṭang tawh ka vanduaina a kal tluang par par lutuk chu ka hne ngawih ngawih!

"Ka uluk viau khan ka hre sia......" ka ti zuai raih a, min melh nâ ngawt ngawt lutuk chu en pawh ka en rei ngam lo.

"Tun thla hi thawk zo law law la, thla leh aṭang chuan i rawn kal a ngâi tawh lo ang" mi dang awm ve reng lâia a thusawi chu ka tân zawng dawnsawn a va han nuam lo tehreng èm!

"In hna thawk r'u, eng nge in lo en ṭhup?" a ti zui leh khar khar a, pawisa thawh chhuah duh teh mah ila ka bàn ngei chu a ngâi dâwn ta niin a lang!

Nu Kimtei kal sawn hnu pawh chuan che chang lovin ka dinna ngaiah ka la ding reng a, Lâtein min kuai ṭhu hial a, chu dawr chhûnga awm ve reng pawh chu ka tân zawng a nuam tawh hlawl lo.

Tin, nu Kimtei min ṭawngkhum dan avang chuan ka zak ru ngawih ngawih a, mahse zak ang taka lan erawh ka tum lo bur! Ka bag chu ngawi rengin ka là a, Lâtei chuan min bia tih pawh ka hre reng, mahse chhàn tumna pakhatmah ka nei lo hrim hrim!

End of chapter 7