𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐋𝐀𝐒𝐓 𝐂𝐇𝐀𝐏𝐓𝐄𝐑 𝟏𝟎)

ZOREMPUIA

(Mizo Romantic Novel)

By

Havali Adam

Last Chapter 10

Harsatna kan tih te pawh hi a hmâchhawn thiam thiam a lo nih ber hi màw! Mi pakhat tâna harsatna lian tham tling em em si kha mi dang tân erawh chuan eng teh vak a lo ni lo ve thei tlat a, kan thil dawnsawn dan te pawh hian kawngro a su viau a ni.

Thil ho té ni si kha a ni lo lam zâwnga kan ngaihtuah tlat chuan harsatnaah a chang lo thei lo va, chuvangin harsatana hi chu rilru sukthlek azira lo irh chhuak mai chauh a lo nì!

Tukṭhuan kan ei lâi chuan ka chhûngte bulah Lâtein restaurant-a thawhna tur min lo zawn hmuhsak thu chu ka sawi ta ngei a, ka nu leh pate chuan ṭha an ti vak lo nge ni, eng an sawi zui thui lo hle a, u Chhûanga erawhin ṭha a ti viau thung a, mahni chauha in luah a peih loh thute chu a sawi zawm nghal lûam nghe nghe bawk.

"Mi tu emaw i ngâi tawh lutuk te hi a ni lo maw?" ka nu min fiamna avang chuan ka khi sak a, u Zorema nen kan inngâizâwng tih a hriat aṭang khan meinei ang reng taka mi fiam zeuh zeuh a hrat ta khawp mai.

"Chu lam pawh a ni lo, pawisa thawk chhuak mang hlei lova hetia awm mawl tawp hi a fuh ber lo alawm nu, Aizawla ka awm chuan inrinnîa bazâr ṭhut mai bakah restaurant-a thawkin pawisa ka hlawh chhuak pah thei bawk ang a, ṭha in ti viau záwk lo em ni?" ka ti deuh duah a, ka chaw ei lâi chawl meuhin ka ṭawng a ni ber.

"A dik chiah, ka rualin chhuk thla ve lehnghal nghe nghe la a ṭha ang" tiin u Chhûanga chuan a lo tuihnih zat a, mahni chauha in luah a hreh avang maia ka chhuk a duh lutuk chu ka ner khum sâwng ringawt!

"Nula i rim duh vang mai mai a ni leh lo maw? I nau i lén chhuahsan deuh rengin ka hria, a dik em?" ka pa chuan a rawn ti dut a, u Chhûanga erawh a nui hak thung.

"Anite chuan awmtu a nei ṭha alawm, u Zoreman min awl hneh thei lutuk" u Chhûanga chu melh zawkin a malah ka ṭham nghal vak a, dawhkan hnuai ni lo se chu ka nu leh pa chuan ka chet dan an hmuh ngei ka ring.

"Chu bakah u Zoremate chu a fel ve hrim hrim a, a rawn lèn tawh hi chuan a ngàihṭhatthlak ṭhin alawm, ti raw Helen?" u Chhûanga ṭawng dan vel chu ṭul ka va han ti lo ber kher tak!

"In sawi ho sawt èm mai, restaurant-a thawh chu in phal em pa? Lâtei hrilh leh a ngâi dâwn a, in phal loh chuan sawi tlang pawp ula, chhuk luih ṭalh pawh ka tum chuang lo" ka tih tâkah chuan ka nu pawh a ngaihtuah thui hmèl ta hle.

"I û amahin a awm peih lo ropui bawk si a, zu chhuk ve leh mah la a pawina a awmin ka hre lo" ka pa chuan a rawn ti dap dap a, ka làwm ru kher mai.

"Pawisa thawh chhuah tum lutuk pawh hi a ṭha miah lo a nia, humsual dai a awl bakah tawhsual thlengin tawh a awl bîk a, fimkhur a ngâi lutuk, i hriat vek tawh kha" ka nu chu melhin ka buk khum nghat a, sawi dik loh a nei lo hrim hrim!

"Nangni pawh kum 50 ral in kâi ve ve tawh a, tun ai hian hna thawk tlèm ula ka duh khawp mai. Hlawhfate pawh chhawr zel mai r'u, a chhawrna tur pawisa chu kan lo ngaihtuah zel mai ang. A bîkin ka pa hi, awm awl deuh tawh teh" u Chhûanga chuan a rawn ti ve leh thlap thlap a, a biak ber ka pa erawh a ngàwi run thung.

Ka chaw ei chu engti tihin emaw ni a tui phian lehnghal a, ka nu thusawite, u Chhûanga leh ka pa thusawite chu dik lo pakhat mah a awm lo va, chhûngkua kan nih angin kan tâna ṭha tur thu kan sawi khawm laih laih a ni ber a, chutia Aizawla kan han chhuksan leh daih tur te chu lehlam kawng zâwng tak chuan an tân a khawharthlak viau dâwnin ka hria.

Tukṭhuan kan ei kham a, rama feh turin kan insiam zui mial mial hlawm a, nizan leh tukin lamah ka mood fuh zàn lo mah se chhun lamah erawh a fuh em em tawh thung a, a chhan pakhat chu Aizawla ka chhuk leh dâwn vang a ti theih a, a dang lehah chuan u Zorema hmèl hmu thuai dâwna ka inhriat vangte pawh a tih theih ang.

Zînga kan inbiak lâia a sawi ang chiahin chhun chawlhah min rawn be leh ta ngei a, eng kan sawi pawh a ni lo, keimahah lungàwi lohna leh lung dam lohna a awm tawh miah lo ti ila a dik ber ka ring.

Tin, kan awmna hmunah ruah a sûr kher bawk nen thlâmah kan tawm deuh chawt a, ni lo se chu hna kan thawk daih emaw a ni ang a, u Zorema nen pawh kan inbe hman lo maithei a ni.

Kan khaw lamah khua a ṭhat loh èm avangin rawn kal lo mai turin ka hrilh leh lawm lawm ṭhin a, mahse awmzia a awm chuang der lo.

Ni dang aia bán hmà a tum thu leh chawhnu dâr 2 vela rawn chhuah hman a inrin thu a rawn sawi mual mual ta zàwk a, min hmuh a chák tawh thu ka beng hriat ngeia a sawi ri tel zeuh chu ka awm a nuam nghal veng veng tih ka hai lo chiang khawp mai.

Boruak lêng vel chu a inher danglama a, hnathawh chhunzawm zel chí a nih tâk loh avangin ka pa chuan haw a rawt ta nge nge a, u Chhûangan a bike a keng lo kher bawk nen kan haw huh hluam hlawm a, in kan han thleng te chu kan che zung zung a, ka hritlàn nghal phah hialin ka hria.

Ruah sûr chuan hàn zâi rèl mai lovin a sùr belh ta buan buan záwk a, u Zorema call ka tum ṭhin, signal lah a awm thei bawk si lo, ka ngaituahna a luah ngut ngut a, kawng lakah tawhsual a táwk palh ang tih mawlh ka hlau a ni.

Hmun tin kil tin chu chhûmin a bawh páw chûk a, dâr 4 dâwn a han nih tâkah chuan ruah pawh a tla tlêm ta deuh a, mahse a la sûr bâng chuang der lo. Khumah ka ṭhu ngâwi reng a, ka ngaihtuahna erawh hmun dang daihah a awm thung.

"I mu dâwn emaw ka tia......?" ka nu lam chu ka hawi nghal a, mut tuma pindan lut si kha ka lo la mu hauh si lo va, mak a ti te pawh a ni mahnà!

"Eng lo......." ti raihin ka ngâwi zui leh daih a, min en chìk sawt hle bawk.

"U Zorema lo kal a tum a, ni lo, a lo kal tawh záwk, mahse ka la be tlang thei lo hrim hrim" ka ti chhuak sap a, hrilh tlang law law a ṭhat záwk ka ring vang a ni pakhat!

"Vawiinah hian maw!?" ka nu awah chuan mak tihna a lang chiang hle.

"Immm.....khua lah hi a chhe bawk si, lo kal lo mai tura ka tih lahin a ṭhulh duh der bawk si lo, ka rilru a tihah!" ka ti leh halh halh a, ka nu pawh chuan

"Aizawl lamah khua a ṭha ang a, he lam pawh a ṭhat ve a ring te hi a ni lo maw?" a rawn ti ve leh sap a, chu chu thil ni thei tak a ni.

"Ka hre lo le" tih thu bak ka sawi belh thui lo hle a, ka rilru leh ngaihtuahna zawng zawng chu u Zorema ah a bet fai vek a ni ber."Dâr eng zatah nge a rawn chhuah hrim hrim?" ka nu'n a rawn tih leh chuan

"Dâr 2 velah khan......." ka lo ti ṭha ve leh mai a, ka nu bula ka awm dan vel chu puitling lo riaua hriatna ka nei nghal zat bawk.

"Chu......a lo va thleng hnai tawh ve, a rawn thlen har a rinawm tawh lo tawp mai" ka harh chhuak zawk a, ka nu rilru ang chu ka lo pu reng reng lo chu niin!

"Biak han tum leh chhin teh" ka nu bawk chuan a rawn ti leh a, kei pawh chu ka che muangchâng lo khawp mai.

Chutia phone ka han hmet èng chiah chu phone call ka dawng nghal zat a, tu dang ni lovin u Zorema ngei a ni a, min rawn call theih danah signal awmnaah a awm tawh a ni ngei ang.

"Khua ka rawn lut chiah e" phone call ka làk rual chuan a rawn ti sup a, ka thaw a veng nghal huai bawk.

"In in èma rawn kal chilh che ai chuan in kawm chhak kawngpuiah khan min lo nghak leh záwk la?" amah bawk chuan a rawn ti leh a, a rilru tur chu ka hrethiam nghal mai.

"Aw......aw le.....ka lo awm ang" tih leh phone chu hmeh tawp ka rual a, ka nu chuan min lo en duh dauh dauh teh e!

"Kawngpuiah min lo hmuak rawh a tia, ka kal nghal mai dâwn asin?" ka nu chu ka râwn ve tak nàin kal ka inpeih nghal at tawh a ni mah záwk!

"Heta rawn kal a tum na nge?" a hmèlah chuan mak tih deuhna a lang a, a àwm ka tihpui viau mai.

"Tum ang ka ring.....a nih..... ka kal aw.....?" tiin ka che ta zung zung a, nihliap nen pâwn lamah ka inkhum chhuak zui nghal zat bawk.

Kawngpui ka thlen chhoh chuan min lo nghak reng tawh záwk a, car kawngkhar chu lo hawngin ka ṭhu lut ve nghal tharh a, a hmèl pà leh tak ngul ka hmu leh ta chu ka awm a nuam nghal sawng sawng a, ani pawh a bang bîk chuang lo.

"Duh ber te hmu tur chuan ruah sûr kârah pawh inhuam a lo nâ duh khawp mai" awmze nei tak hian a rawn ti thum dut a, pà zetin a kiai zui suk nghe nghe bawk.

Ka ṭawng nghal melh melh a, khaw pâwn lamah min tlanpui zel a, khawiah nge min hruai a tum pawh ka hre chuang lo. 

Hmâna ka hriat ṭhin, a huhâng nâ churh kha tunah chuan a dam ruih tawh a, eng sawi em em lo mah se a bula awm hrim hrim chu a nuamin a hahdamthlak ngawih ngawih!

Kan khua a rawn zin hmâsak ber ṭuma kan awmna hmun, teak hmun bulah ngat khan min dinpui leh a, thla eng emaw zah liam hnua kan han kal dun leh chu mitthlâah hun liam tawha kan awm dan a rawn lang nghal zut zut a, ka tiril zawng zawng fan thei khawpa min duh thu a sawi lâi te kha ka hre chhuak uaih uaih bawk.

"Ka hmêl i hmu a, i hlim viauin ka hria" nui suk pah hian a rawn ti sup a, ka awm dan leh ka hmêlah a lo hriat viau te pawh a ni maithei!

"Nang pawh......" ka ti chu a rawn nui chhuak hawk a, ka kut a rawn hum nghal chat bawk.

"I bulah te chuan ka hlim reng zel alawm....." a rawn ti vei nuih leh suk a, a hmêl chu pá satliah pawh a ni lo, a pà chiang thlawt a ni.

"Lo hnai teh......" tih leh amah záwk chu ka lama rawn awn a rual zui zat a, ka khabeah châwi zeuhin lungchim zet hian min fawp vang vang a, a mi fawhna chu chhàn lèt loh theih loh khawpa dawnsawn nuam leh harsa a ni tih phat rual a ni lo.

"I lungâwi tawhin ka hria, a dik em?" ti supin kan hmai chu a insi titih a, a thaw rimtui leh pà ru chèk chu ka hip lut nghal zat bawk.

"Dik tak chuan......" tiin ka chawl deuh dat a, ka phun sep a ni ber.

"Pekin video leh message min lo thawn ṭhin a, phone kaltlanga ka hrilh che lahin i awih loh hmèl thei bawk si a, nizan leh tukina ka lungàwi lohna kha a àwm ve hliah hliahin ka hria" ka ti ta dat dat a, ka aw chhuak chu a pangngai ang reng viau bawk.

"Khawi maw i phone?" hnai set sawta mi en chung hian a rawn ti hniam ruih a, kei pawh chuan ka pe ve nghal mai a, kan kâr thua lungnih lohna a awm tawh loh nân engkim hre vek se ka duh vang a ni pakhat!

"Ka lo be dâwn a nia......" tih leh phone chu mi pek lèt a rual a, Peki hnen aṭanga message ka dawn dan leh video ka dawn dan zawng zawng a hmu ta vek bawk nen a rilru tur chu ka hrethiam nghal mai.

"A ngâi kher lo, be duh suh, engah mah ka ngâi tawh lo" ka ti nghal zung zung a, a thil tih tum chu ṭul ka ti lo tak tak bawk.

"Ni lo ve, thil a punlun hmâin hrilhfiah ila a ṭha záwk" a ti deuh nghut a, engmah ka sawi zui duh ta bîk lo.

Ni e, nakin lehzelah eng emaw pawh a la thleng thei a, a ngaihdan chu a ṭha ka ti hnuhnawh viau mai. 

Tin, chuti maiin a rilru ka sawhsawntîr dâwn lo tih ka chiang a, ka tân mai ni lo, kan pahnih inkâr tâna ṭha tur a nih tawh phawt chuan a ri nghal ṭhak zel ṭhin te hi amah ka duhna leh ka hmangaihna tizualtu an ni!

Nizan lama min rawn biak lawk loh chhan dik tak a sawi lâi te chuan lungthu kim zet hian ka lo ngâithla a, a thusawi engkim mai chu ka awih vek a, dáwt a sawi miah lo tih pawh ka hre chiang hle.

A insawifiah tawp dâwn lamah chuan a inthiam loh thu leh thlen nawntîr a tum tawh loh thu a sawi leh dap dap a, ka tân chuan lungáwi loh theih pawh a ni tawh lo. 

Chu bakah keimah ngei pawh ka thikthu a chhe ve mah mah te pawh a ni ang, mahse thikthu hi chu hmangaihnaina a ken tel ka ti ve tlat thung.

Hmangaihna hian thil tam tak ken tel a nei a, mihringte finna hmanga chhui fiah phak baka thuk leh ril a ni a, chu tak chu Siamtu Pathian ropuizia lanna pakhat a ni.

Tin, hmangaihna hi chu boruak nen ka tehkhin ta ber mai, khawih theih loh leh hmuh theih loh mah ni se rilrua hriat theih a ni lawi a, thinlungah hian a fiah em em bawk.

Hun eng emaw chen chu rilru leh thinlung inpawh takin kan awm dun veng veng a, ruah tla cher cher reng pawh zawi zawiin a kiam a, khaw lama kan han tlan lèt leh dâwn meuh chuan nî a rawn èng ta hial a, tlâng kârah chhimbal a zâm kual duai bawk a, tlai khua a ngui ṭan tih hriat takin nî èng chuan a daih rei dâwn lo tih pawh a hriat hle.

"Ka rawn kal chhàn tak ka la sawi lo" ti nghutin u Zorema chuan a motor khalh lái chu a tiding thut a, ka bu deuh làwp nghe nghe!

"I hmêl ka hmu a, eng ka hre chang tawh lo te pawh a ni mahnà" tiin a nui chhuak leh huk a, amah leh amah chu a innuih ni mai te'n ka hria.

"Eng chu maw i la sawi loh?" ka lo ti pangngai ve mai a, motor khalh lâi tiding meuha a sawi hmaih a hriat chhuah thut chu eng nge ni tur àwm ang ka hre lo hle bawk.

"Helen....." ti hniam supin a tarmit vuah lâi chu a là thla zal zal a, ka kut pahnih chu a rawn hum lûm vung vung zui nghal zat a, ka hrethiam lo kher mai.

"Kan kâr thu chu heti hi a ni a, kan hre ve ve a, sawi leh vak tur pawh a awm tawh chuang lo" a tih dut dut lâi chuan

"Eng nge i sawi tum ber?" ka lo ti hman hmawh a, ka lei chu ka vêng hman lo a ni ber.

"Nupuia neih che ka duh Helen, ka nupui i ni duh ang em?" a thu rawn sawi chuan a denin min deng dawt a, ka thin a su nghal dup dup a, engkim chu a reh nghal duak ni maiin ka hria.

"Ka....." ti leh supin a chawl deuh dat a, chutah amah vek chuan

"Ka nupui i nih theih nân chuan eng pawh ka ti ang" a rawn ti thum chhal a, ka bangbo tak zet!

"U Zorem.......!?" ka ti halh a, ka rilruah chuan eng nge awm ber pawh ka hre lo.

"Enteh Helen, a ṭhawng viau che tih ka hria, mahse....." tia chawl datin min en chiang hle a, ka rilrua awm hriat tum ni àwm hrimin a awm a, kei lah chu ka mumal rih lo em em lehnghal!

"Zîng thawh ruala i hmêl ka hmuh hun tur leh ka kuah theih hun tur che ka suangtuah fô ṭhin asin" a rawn ti thuk ril leh ruih a, ka thinlung chu lawmnain a khat a, a khat satliah pawh a ni lo, a liam zawih zawih a ni ber.

"A nih.....eng vanga min neih duh nge i nih?" ka rilru chhûngril thup hram hramin ka melh deuh kal a, chutianga a zam hmél chu ka hmuh àwm ka la hre miah lo bawk.

"A chhan chu ka hmangaih che alawm Helen, ka hmangaih lutuk che" tih leh chet a rual zui zat a, min fawp nghal tawn tawn a, ka hlim lutuk chu ka ṭap thei mai dâwnin ka hria.

"I ti tak tak em?" a biang tawn tawnah ka dawm ran a, chawp leh chilhin ka mittui chu a rawn tling nghal ṭiam ṭiam bawk.

"Min fiah thei ang" ti thum chhalin min fawp leh vang vang a, kan hmui chu a inhlat rei thei tak tak lo a ni ber.

Khaw chhûng lam pana kan han tlan chhuak te chu a rukin ka nui deuh var var reng a, ka hmangaih a ni tih pawh ka la hrilh leh ta chuang lo. 

A la hun chiah lova hriatna ka nei teh tlat a, mahse ngàwih bo pui reng erawh ka tum lo hulhual thung.

Kan hmangaih te'n min lo hmangaih ve reng a ni tih hriat tluka thinlung tihlimtu hi khawvelah hian a awm leh chuang kher ang emaw ka ti hial a ni.

"Tun ṭum chu ka rawn pêng kawi lo law law mai dâwn em ni ang?" kan kawm chhak kawngpuia kan din dat rual chuan a rawn ti sup a, ka melh nghal zawk nghe nghe!

"Aw.....nia.....a pawi lo, i hawna tur a hlâ bawk si, haw leh thuai záwk rawh" ka aw chu a inbat deuh nawk nawk a, ka rin loh lam daih a rawn sawi vang a ni ber.

"Engtikah nge Aizawl i lo chhuk leh ang?" tih leh ka kut chu rawn vawn a rual a, nuam ka tih ruk veng veng theih tur ang hrimin a tuai deuh hat hat bawk.

"Kâr leh lamah a nih ka ring, Lâtein restaurant-a thawhna tur min lo zawn hmuhsak a, mahse amah pawh ka la hrilh leh chuang lo" ka ti siam siam a, ani pawh chu a lo bu nghut nghut a, thil dang daih a ngaihtuah ni maiin ka hria.

"Ka phur thla nghal daih mai dâwn che emaw ni le" a ngáwih deuh vung vung hnu chuan a rawn ti dut a, a fiamthu nuihzatthlak loh zet chu ka nuihpui chîam lawi a, chutianga fiamthu a han thawh leh mauh ṭhin chu inhmeh lo ka tih èm vang a ni pakhat!

"A nih.....tluang deuhin aw.....?" tia chhuah ka tum zui nghal mai chu ka kutah a rawn chelh a, hahdam hmèl deuh hian min en a, ka nuih sak ta ringawt!

"Ka rawn bia ang che" ti thum ruihin ka kut chu a là kang a, a fawp zui zeuh bawk.

Car aṭang chuan ka chhuak ri sat sat a, ka chhuak ta maw tihah a tlan liam zui ta vang vang a, engkim mai chu a dangdai a, a danglam a, a awm loh chu keimah a hriat em em a, min hmangaih thu a sawi lâi mawlh mai kha ka thinlung leh ka thluak chhûngah a châm reng a, zep thu a cheng lo, ka hlim a ni.

Kan in ka lut chu ka nu chuan mak tih hmèl deuh tak hian min lo en a, u Zorema hmuh a lo inbeisei tih chu ka hai lo chiang hle. 

Ka pa leh u Chhûanga hriat lovin a haw thlak lehnghal daih thu chu ka hrilh ta sep sep a, ani pawh chuan a lo hrethiam ve nghal mai a, mahse kan hun hman dun dan zawng zawng erawh ka hrilh vek duh lo thung.

Zan dâr 7 pelh hretah u Zorema chuan min rawn call ta ngei a, an in a thlen fel chiah thute chu min rawn hrilh sup sup a, chutia him dam taka an in a thleng ta chu rilru a hahdam veng veng ka ti lo thei lo.

Chumi zan vek chuan Peki hnen aṭangin video ṭhenkhat leh message ka dawng leh nual a, mahse eng teh lûa ah ka ngâi tawh lo hrim hrim!

U Zoreman min hmangaih thu a sawi kha ka ring a, ka rinna chu engmahin a tihdanglam theih pawh ka ring tawh lo, a chhan chu kan kârah hmangaihnain ro a rél mêk vang a ni.

Kan hmangaih tluk zeta min hmangaihtute chuan hlimna mai ni lo nàtna nen lam min thlen fô va, mahse kan nàt hlen loh nân kan thinlung hliam tuam damtu an ni leh nge nge ṭhin; chu chu a ni hmangaihtu leh an hmangaihte inkâr chu!

Kâr thar kan chûangkâi a, hun inher danglam ang zelin kan nitin hun hman dan pawh a danglam ve zel a, Lâtei min lo biaksak tawh ang ngeiin restaurant-ah chuan ka thawk ta ngei a, mahse Bawngkawnah daih a nih avangin vei vah lam a buaithlak ve hret chu a ni.

Amaherawchu, hrehawm han tihna em em ka nei lem lo va, pawisa thawh chhuah ka duh miau si a, ka tawrhchhel a ngâi a ni mai. 

Rin ai takin customer an lun thei hle a, a bîkin chhun lam ngat phei hi chu kan buai lâi ber a ni ṭhin ti ila a sual lo khawp ang.

Pakhatah chuan lunch eina atâna rawn hmang hi an tam ve ang reng a, chung zîngah chuan u Zorema pawh a tel ve nghe nghe a, amah chang a ni lo, a thawhpui ṭhenkhatte nen lam a rawn hruai ṭhin a, keini tân lah hlawkna a lo ni bawk nen chutia kan han inhmu nitin ṭhin chu a nawm dan a dangdai tak zet!

Ni khat chu pa Hminga ka hmu hlawl a, ani paw'n min hmu chu mak a tih ve hmèl hle a, min en deuh vang vang nghe nghe a, mahse rei en duh lovin hna ka thawhsan daih thung.

"I dam maw?" rawn titu chu tu nge a nih hrilh hranpa ka ngâi lo chiang kher mai.

"Dam e" tih bakin ka chhâng lo va, kal sawn daih ka tum chu ka kawngah a rawn chelh ringawt a, tal chhuak rang tak ka ni!

"Kan awmna hmun hi i nupui dawr a ni tawh lo tih i theihnghilh ém lo ang chu màw?" ka ṭawng ring lo nàin ka ṭawngkam erawh a kha fak thung a, dawnsawn a nuam dâwn lo tih pawh ka chiang viau!

"I la ngai reng a nih dâwn hi!" ti deuh nghutin za lo zet hian a nui zui suk a, ei siamna lamah ka pheisan ta daih a, ka hnathawhna hmun a hria chu nakin zelah ka tân a pawi ang tih ka hlau ru hle bawk.

Chutia ka inngaihtuah bing lâi tak chuan u Zorema leh a ṭhiante an rawn lut a, dâr zàt ka'n en chu chhun dâr 12 a lo pel vel chiah chiah a, Châltlâng aṭangin a ṭhiante nen ka thawhna dawra a rawn inhnawh puar vang vang ṭhin chu a taimakthlak ka ti dâwn nge keimah vang záwk pawh ka hre tawh lo e a!

Kan dawra hun an rawn hman chhûng zawng chuan ngaihsak pawh ngaihsak ṭha hman lovin ka che buai char char a, customer an lun ṭha ve bawk nen ei tur sem kualin ka phe zak zak a ni ber a, amah u Zorema tak paw'n ka buai tih chu a hrethiam viauin ka hria.

Zan lamah erawh kan inah rawn lêngin hun kan hmang dun leh chawt a, kan awm dun tawh hi chuan hun te hi an liam zung zung ni mai te'n ka hre ṭhin.

A bulah chuan ka hlim a, ka him a, lungngàih châng leh lungàwi loh chângte chu awm ve teh mah se hlimthla ang maiin an ral leh mai ṭhin.

Ka chelha ka vawn ngam leh ka rin ngam mipa a ni tih hre reng chungin kan hmâ hun tur ka suangtuah thleng fô va, engtik nîah emaw chu ka suangtuahna ang chu hunin a la rawn herh chhuahpui ve ngei ka beisei tlat bawk.

"Awi.....! Min tiphu alawm......!" pa Ramngheta ka hmu teh thut chu ka au chhuak ṭhawt teuh kher mai.

"I dawih reuh hi le......" a lo ti duh lek chauh lehnghal a, amah hre chiangtu tân lo chuan a ṭawngkam bungraw chhumbung zet zet te hi huat tham a tling hial ta ve ang.

"Eng lo.....eng nge i tih dâwn?" ti sapin ka aw chu ka thian zui kharh a, amah a palian ang reng bawk si nen ka hmuh thut hi chuan ka la phu ve ziahin ka hria.

"In tui pipe ka check lawk dâwn, vawiinah tui a rawn haw maithei" ti deuh nghutin tui pipe chu a thlek dû dû a, kan inhre chiang thawkhat ve tawh bawk a, ṭawng lûam chì ni lo mah se keini unau hi chu min ngaihtuah ve khawp mai.

"A nih chuan ka chhuak daih dâwn sia, engtin nge ni ang? Tui a lo haw chuan a va'n buaithlak dâwn ve, u Chhûanga a chhuak daih dâwn bawk si" ka ti deuh duah a, zîng kâr kâra kan tui pipe a rawn check dû dû danah tui chu a rawn har ka ring miah lo.

"I nu Sangtei nen kan awm dâwn alawm, a buaithlak loh ang" a lo ti sam leh mai a, a check zo ta maw tihah ngâwi rengin an in lamah a chho nghal daih bawk.

In chhûng ka lut chu tui lûm ka chhûang a, kei ang lo takin u Chhûanga erawh a la muttui bawrh bawrh hle a, chutia tui lúm ka chhúan lái chuan gas bul lawka ka dah, ka phone chu a rawn èng deuh pap a, melh zui ralhin

"Morning....." tih message chu ka zu chhiar nghal zat a, tu hnen aṭanga dawng nge ka nih hrilh ka ngâi lo chiang hle.

"Morning le......" tih chu ka thawn lèt ve nghal a, ka hre sual te a nih ngawt loh chuan a tho hmâ ve ṭhin viauin ka hria.

Whatsapp Message-in kan inbe chhunzawm ta reng a, mahse ka thil tih tur erawh ka ṭhulh phah chuang lo va, ka che pah reng a ni mah záwk! Zîng kâr boruak nuam tak hnuaia ani nen han inbiak chu a hlimawm a, mood pawh a ti on leh vet vet tawh khawp mai.

Ni dang ang bawkin restaurant-ah ka kal leh a, restaurant ka thleng chiah tihah nu Sangtei hnen aṭangin phone call ka dawng a, tui a haw thu a rawn sawi a, in ka chhuahsan dâwn khan min lo dah khahsak vek a tum thu a sawi kha a ni a, a inthlahrunawm rualin a lawmawm tak zet!

Nilêngin kan buai leh mawp mawp a, tlai lamah chuan pa Hminga hmêl ka hmu leh hlawl a, hlauhthawn rukna ka nei nghal a, ka hlauhthawn ang chiahin min be suam suam a, mahse engtin vak ka chhâng ṭha duh der lo thung.

"Rawn chawl ziah ila a ṭha ang, in thil siam a tui tlat!" a ṭawngkam awmze nei tak chu ka hrethiam chiang khawp mai.

"Kha le, tips-ah i ngâi mai dâwn a nia....." ti lehin ka dawhkan hruk fai mêkah chuan cheng 500 a rawn dah a, ka melh nghal ralh nghe nghe!

"Eng nge i hriat a pa Hming? Min hnimhnaih tum tawh suh, ka duh miah lo a nia, pawisa pawh hi là lèt nghal rawh" ṭawng châk lo viau mah ila a ṭawng loh theih loh!

"Ti khan nei rawh, duhsakna thilpekah i ngâi mai dâwn a nia...." tih leh kal sawn a tum zui zat a, mahse ka che chhuak vat thung.

"Kha.....là rawh, ka duh lo!" ka ti deuh hlak a, nui suk hian pawisa chu a lá ve leh mai bawk a, mi dang awm ve ṭhap lo se chuan ka chungah eng thil emaw tak tih a tum leh ngei ka ring.

Dawr aṭangin a chhuak fel chiah tihah u Zorema hmèl ka hmu zui zat a, thil thlen dan chu hrilh nghal mai ka tum deuh úk a, mahse ka ngáwi leh rih ta záwk! Chu bakah eng ém a thleng chuang lo va, hre lo law law se ka duh záwk vang a ni pakhat!

"Pâwnah ka lo nghak ang che" ti supin a chhuak lehnghal nul nul a, kan bâng ṭep tawh tho bawk a, min nghah rei pawh ka ring chuang lo.

Kan kâr thu chu ka ngaihtuah zui chet chet a, ka sawi thiam chiah lo, a cham deuh dul maiin ka hria.

Khatia min hmangaih thu leh nupuia min neih a duh thu a sawi tlai aṭang khan vawi khat mah a sawi nawn leh tawh lo va, mahse chu chu min hmangaih loh vang tihna pawh a ni chuang lo, min lo hmangaih ve tak tak a ni tih ka hriat theih nân a mi ngaihsakna leh ngaihtuahna min hmuhtîr awl lo záwk ṭhin.

Tlai dar 5 a rik tâkah chuan keini dawr pawh khar fel a ni ta nge nge a, haw kawngah te chuan ka ṭawng barh barh a, u Zorema pawh a rawn ṭawng ve leh dut dut ṭhin a, mize harh zawk zawk leh ṭawng duh par par chì a nih lohna lâi tak te hi amah tivei awm zualtu ni maiin ka hria.

Tin, tun hnai hian an ina mi hruai a chîng riau lehnghal a, eng nge a chhan pawh ka hre lo, a chhûngte ni se ka lakah an hawihhawmin an fel hlawm siam siam bawk si nen rei lovah ka nèl nghal thuai a, anni pawh min nél lo em em chu an niin ka hre lo.

Aizâwla kan chhuk thlak leh hnu aṭang khan Peki pawh a reh ta hmak a, u Zoreman thil awmzia a hrilhfiah ta a ni chêk ang chu! 

A rehin a reh hmak a, message emaw video emaw pawh ka dawng tawh ngai lo va, u Zorema nena kan inkâr tak pawh a nghet ta khawp mai.

"Aw....hello....." tiin Lâtei hnen aṭanga phone call lo lut chu ka chhâng a, mak ti aw tak hian

"Pa Hminga kha i hre ve tawh em?" a rawn ti hlawl a, a ngaihna ka hre lo kher mai.

"Hre nàng, engati nge a?" ka ti zo chiah chu

"Police-in an man alawm, hmeichhe pakhat a lo pawngsual a ni àwm e" a rawn ti zar zar a, ka mitthlâah pa Hminga hmêl a rawn lang nghal a, tlaia kan awm dan kha ka hrechhuak zui zat bawk.

"Enga!? Tak tak em ni!?" ka awah chuan ka mak tihzia a hriatthiam ngei ka ring.

"Ni e, kei paw'n mak ka ti lutuk....." tiin a rawi ṭawng zui mawlh mawlh a, kan inbe rei ta phian nghe nghe.

Mualphona leh hmingchhiatnate hi chu kan bul hnai lawka awm an ni a, zahawmna leh hmingṭhatna erawh a hlawha hlawh chhuah ngâi a ni thung si!

Zanriah ei kham aṭanga rei pawh ni lovah u Zorema a rawn lêng a, u Chhûanga nen an titi mual mual a, zan rei tawh lamah u Chhûanga záwk a lêng chhuak leh hnuhnawh lawi a, mahse kei leh u Zorema tân erawh hun hman dunna chance a ni hlauh thung.

"I thawhna hi nuam i ti em?" ti supin min kuah deuh hlun a, min sukpui deuh dalh dalh pah reng bawk.

"Immm.....ti e, engati nge?" ka ti ve mai a, thla 3 dâwn chu ka thawk ve leh dim diam tawh a, harsatna ka neih àwm pawh ka la hre lo.

"Hetia han kuah vawng vawng reng mai che hi ka kham thei lo, hrehawm i ti ṭhin em?" a rawn ti leh daih a, ka nui chhuak hak nghe nghe!

"Hrehawm ti teh nàng" ti hliaiin ka ngheng zui ar ar a, hrehawm ka tih lohzia chu pui tak a ni.

"A nih chuan ka kuah bo vek mai dâwn che asin?" a nui nghawr dat a, kei pawh ka bang chuang lo.

"Ka nupui i nih hunah chuan hetah hian, he i kutzungṭangah hian kan inneih zungbun a awm tawh ngei awm si a, i ti ve em?" a rawn ti dam leh thlup thlup a, chutah amah bawk chuan

"Ka nupui i ni lo ang tih mawlh hi ka hlau" a rawn tih zawm leh dut a, kan chungah thil eng emaw thleng tur ang maia a awm chu ka hrethiam lo ang reng hle.

"U Zorem.....?" ti sepin a lam ka hawi chho riai riai a, mitmeng thuk dam ruih hian min lo en run a, a hmai chu ka dawmsak ta ringawt bawk.

"Tuna ka tih theih awmchhun chu i inpeih hun nghah a ni mai a, tih theih ka nei tam lo khawp mai" a ṭawngkam tinah chuan min neih a duh tawhzia hai rual a ni lo va, zanin ber kher phei chu a lungngâi ru riauin ka hria.

"Engati nge hetiang hian i awm thut a? I dam lo em ni?" ka ti ta ngawt a, mahse taksa dam lo hmêl rèng a pu hauh si lo.

"Dam e......" ti thum dutin ka chalah a fawp zui vang vang a, kei pawh chu ka lo chhîng nghal diar diar a, a inlàk hran rual chuan ka meng ve leh nghal mai bawk.

"Ka hmangaih che....." a mitmeng dam thuk ruih chu ka en reng a, ka thusawi zawh chiah avang chuan pá zet hian a kiai suk a, a awm dan vel chuan ka hmangaih a ni tih hrilh lo thei lovin min siam tlat a tin a ni!

"Min hmangaih lètin ka hmangaih záwk che a ni tih i hriat theih nân ka nupui ni mawlh teh Helen" a rawn ti deuh nghut nghut a, a hmêlah chuan a hlim a ni tih a lang chiang hle bawk.

"Min duat leh lo si lo ang maw?" tiin ka hawi sawn hmak a, kan awm dan chu a nuam dangdai tak zet!

"Duat dâwn lutuk tlat!" tih leh ka nàk nêm lâia rawn hmer zeuh a rual a, ka ṭe chhuak ṭhawt nghe nghe!

"Palâi ka rawn tîr tawh mai dâwn asin.....?" kan inchhaih nui uarh uarh hnu chuan a rawn ti thum chhal a, a aw ringawt pawh ka tân zawng luangliamna tham a va ni chiang ém!

"Ka rilru chu i hria alawm......" ka ti zawi sap a, ka kut chu rawn hum lûm vung vungin a fawp zui nghal vang vang bawk.

Ka ngaihtuah ṭhin êm avang leh ka thlakhlelh ṭhin êm avang maia hmangaih ta ka ni ngawt lo va, ani nena kan awm dun tawh chuan ka rilru leh taksa a thlamuan hliah hliah ṭhin vang chauh lah a ni hek lo, hmangaihna nena kal kawp reng harsatna hrang hrang min paltlangpui theitu tur mipa nia ka hriat avangin ka hmangaih em em záwk a ni.

A kiangah chuan tu emaw tâna hlu ve tàwk tak ka nihzia ka hria a, inrintàwkna leh huaisenna chenin min pe ṭhin. 

Ka kianga a awm loh châng paw'n mit chhîng vang vang chungin ka suangtuah a, hmun khata léng dun ang maiin ka mitthlà a, chumi avanga ka hahdam siai siai ta ṭhin te chu pâwn lam mite rawn hriatthiam ve phak rual pawh a ni lo.

Inthunun theihna ka hloh châng pawha inthunun thei tura min thunun theitu a ni a, ka tân chuan mi satliah ni lovin mi bîk dik tak a ni.

Lungâwi reng thei lo mah ila lungngâi reng turin min siam ngai lo va, kan thinlung nen lam pahnih ni si kha pakhat tluk zetin a phu rual a, kan hringun chuan bul a ṭan dâwn chauh zàwk a lo nì!

Ka hriat chian tâk em em pakhat chu engkim hi ral leh vek tur mai chauh a lo ni a; harsatna leh hlimnate chen hian hunin a la liampui vek dâwn tho tho a lo nì!

Tin, inlaichinnaah hi chuan beisei ang leh duh ang diak diakin thil a thleng reng thei lo va, hmangaihnaa inringtawn tlat tur kan nihzia hriattîr niin kan inhmangaih tak tak leh tak tak loh fiah kan ni fô ṭhin.

Chumi a nih avang chuan inlaichinna siam kawngah hian mahni thinlung chauh ni lo, inlaichinna kan neihpuite thinlung pawh kan hriatthiam tel ve a ngâi a ni.

The End