𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟖)

ZOREMPUIA
(Mizo Romantic Novel)

By

Havali Adam

Chapter 8

In ka thleng chu ṭhutthlengah ngawi rengin ka ṭhu a, thil chi hrang hrang ngaihtuah kualin ka rilru a kal ding hle bawk. Chutia ka ṭhut ngawt ngawt lâi chuan ka phone a rawn nghawr ri dat dat a, Lâtei a ni tih pawh ka hmu nghal a, mahse làk erawh ka tum lo hrim hrim.

Tunah tak chuan eng tih tha mah ka tho rih lo, awm chák dan pawh ka nei chuang lo, ka hun tawn mêk chuan ka rilru zawng zawng a hruai pêng vek a ni ber.

Ka ngaihtuah chian pôh leh ka chunga thil thleng mêk, nu Kimtei min tih dan zawng zawng chu thawk leh khata han theihnghilh theih mai chí pawh a ni lo tih hai rual a ni lo va, hun kal tawh thlengin ka ngaihtuah chhuak a, thawmhnaw ṭhui sual táwk leh a mit titlung lo táwk te chu an awm ngai lo pawh a ni lo, ṭha takin a hrilhfiah mai záwk ṭhin.

Ka chungah erawh awihawm loh khawpin a danglam a, ṭawngkam a duh tui lo va, ka dikna ngeiah pawh dik lo anga lan châng ka ngah phah hle bawk.

Nge ni a, thingtlângmi ka nih vang záwk em ni ang?

Ka ngaihbel lo thei lo, a chhan chu khang hun liam tawh, a hmâ zawnga che sual leh thawmhnaw ṭhui sual te reng reng kha ṭha takin a zilh mai ṭhin a, keini anga thingtlângmi ni ve lo lem chu changkan pawh an changkang a, an felfai a, khawpuimi tih takah an thusawi duh záwng leh an hawiher chenin a inzûl bîk em em a, keini min biak ṭhat dan leh anni a biak ṭhan dan kha a inang ngai lo hrim hrim!

Dinhmun hian thil a lo tithei ngawt mai, rethei deuh hlek leh belh tur em em pawh nei lo te hi chu khawngaih tho mah ila hmuh hniam rukna chen kan nei fer fur lawi a, kan hmusit ta viau e tihna lam pawh ni chuang lovin mihring rilrua chapona awm hi kan khap dai zo hman lo záwk ṭhin a ni ber.

Chutih rual chuan sum leh pâi ngah, hnathawh sâng leh dinhmun ṭha te ve thung erawh hi chu a enga mah hmâin kan han ngâi zahawm nghal ringawt a tih theih lawi a, mahse zahawmna hi chu reitheih leh hausak lam ai mah chuan nunah záwk hian a lo chiang ber mai.

"Zanin chu chhuak turin lo inring rawh aw….?" u Zorema message ka hmuh rual chuan ka ngaihtuahna ka lo kawm rei mah mah tih ka hre chhuak chawpchilh nghal a, missed call pawh a lo tam hman ang reng khawp!

"Khawiah maw?" tiin ka reply zui zat a, rei lovah ani pawh chuan

"Kan inah" tih thu a rawn thawn ve leh nghal mai a, ka chhâng zui ta lo.

Thla eng emaw zah chu kan inngâizâwng ve tawh a, mahse an inah erawh vawi khat mah min la hruai ngai lo va, min hruai tur paw'n ka phut lo va, kal chàkna pawh ka nei hran lo, ama'n a sawi rik tam loh avangin ka ngaihtuah ngai lo ni berin ka hria.

Tun ṭum erawh a dan a dang ta viau mai, u Zoremate inah ka kal dâwn a nih hmèl a, rilru a lo puitling ve tâk vang nge ni, han zah ṭit ṭet emaw han huphurh chíam ang paw'n ka awm lo va, chutih rual chuan a chhûngte bulah engtia awm tur nge tih lam ka ngaihtuah ru nasa nghal viau thung.

Ka phone ka'n check chiang chiah chu Lâtei ai mahin u Zorema hnen aṭang missed call a lo awm ṭeuh a, ka call back duh ta kher lo law law a, rilru tithatho luiin ka ṭhutna aṭang chuan ka tho zui nghal tharh bawk.

Ni e, ka hnual rengna chhan tur a awm lo, awmzia a awm hek lo. Chutia tui in tura ka kal lâi chuan ka phone a rawn ri ral ral a, ka'n en chu u Zorema bawk hi a lo ni a, rei riktîr lovin ka là zui ve nghal mai bawk.

"Khaw'nge i awm….? Dawrah i kal lo em ni?" phone call ka lák rual deuh thawa a rawn tih chuan dâr zat ka en vat a, dâr 4 a lo pel daih tawh chu niin!

"Kal e, ka haw hmâ a....." ka ti ta ringawt a, mahse sawi dik loh ka nei pawh a ni chuang lo.

"Engati nge min hrilh loh?" a ti deuh khur khur a, kan dawrah a pêng kawi leh a ni ngei ang.

"Nia......ka lo theihnghilh daih a......." tlawn titih hian ka ti chhuak sap a, ka haw hmâ chhan dik tak hria se chu min ngaihtuah leh nghal viau ka ring.

"A nih chuan ka'n haw tlang mai ang e, chaw ei khamah ka rawn lam ang che" a rawn tih zawm ta daih a, kei pawh chuan

"Aw le....." ka lo ti ve pangngai ve leh mai a, biak pawh kan inbe zui rei lo.

Ei rawng chu ka bâwl zui nghal malh malh a, chutia ka chet mial mial lâi chuan pa Ramngheta a rawn léng thla hlawl a, ngawi rengin a rawn lut thurh bawk nen min tiphu leh hman viau nghe nghe!

Rei a awm hran lo va, a haw chhoh hnu lawkah u Chhûanga paw'n in a rawn thleng ve chiah a, vawiin lama ka pa nen an inbiak dan te min hrilh a, a sawi dan chuan kan khaw lamah mangkhawh turin a haw chhoh lawk a ngâi dâwn niin a lang!

Khua a thim a, zanriah kan ei kham hnu lawkah u Zorema hmêl kan hmu nghal zat a, simple ang reng takin rawn inchei mah se ka mitah chuan a inhmeh leh pek hle.

Tin, u Chhûanga pawh chaw kan ei lâi khan u Zorema nena kan chhuah tur thu ka hrilh vek tawh a, lèn chhuah a tum loh zan tak a ni nghe nghe a, kan kalna tur erawh min zawh loh avangin ka hrilh hran lo va, ka hnathawhna aṭanga ka bàn thu pawh ka la hrilh duh rih lo, ni danga hrilhah ka ti ta law law mai.

Kan kalna tur lam pana kan tlan lâi chuan ka ṭawng melh melh reng a, u Zorema pawh a rawn ṭawng ve leh dut dut ṭhin a, hmangaihtu thlirna aṭang chuan engtin pawh awm se a awm dan chu a ngainatawm mai bakah a bula awm hrim hrim chu a hahdamthlakin a thlamuanthlak veng veng ka ti lo thei lo.

An in kawt kan thlen chuan ka chhuak nghal tharh a, rei lo tê hnua a chhûngte hmu tur ka ni bawk nen zàm rukna a awm lo thei lo va, mahse ka zàm avanga ka awm dan zawng zawng tihbahlah kher ka tum bau lo thung.

In chhûng kan han lut chu u Zoreman inhmêlhriattîrna min neihsak zung zung a, TV bulah chuan pa pakhat thlalak lian deuh mai hi a lo intâr kiau a, thil dang pawh ngaihsak lawk lovin ka en deuh reng nghe nghe a, u Zorema pa a ni tih ka hrethiam nghal mai bawk.

Ka lo ral khat hriat Veni pawh chu ka hmu ta ngei a, u Zorema nau chiah nupui pawh a lo fel siam siam khawp mai. Ka laka an awm dan leh min biak dan vel hrim hrim chu ka beisei loh lam daih a ni a, an ina ka kal tur thu chu hre làwk te pawh an ang záwk hialin ka hria.

"Khawi vêngah nge in awm a?" u Zorema nu chu ka melh nghal ralh a, ka aw thian zui kharhin ka sawi ve mai a, ka luh tirh aṭang tawh hmêl ngainatawm tak a pu reng a, nu nèlawm tak pawh a nih ka ring.

"In vêngah chuan hmêlhriat ka nei asin…..." u Zorema nau nupui lam chu ka hawi zawm zat a, ani pawh a bang chuang lo, a lo nui deuh sâng a, kan vênga a hmêlhriat chu a sawi nghal nghe nghe a, mahse ka hre miah lo thung.

"A vêng mi leh sa dik tak kan ni lo va, keini chu in luah mai chauh kan nia......" ka ti ta dat dat a, sawi tlang nghal law law chu a ṭha záwkin ka hria a ni.

"A nih chuan khawi khaw chhuak nge in nih?" tiin u Zorema nu chu a rawn ṭawng chhuak ve leh a, kei pawh chuan pangngai takin kan khaw hming leh awmna ka sawi ve nghal mai a, u Zorema kâ aṭang ka chanchin an la hre tam vak lo a nih ka ring hmiah bawk.

Chutia kan titi melh melh lâi chuan Veni chu thingpui nen a rawn inchâwi phei a, in chhûng kan luh tirh aṭang tawh a la ngawi reng a, u Zorema nu tirhna ah a kal kual zung zung a, kum lamah a naupang fâl deuh bawk nen kan titina ah chuan a inrawlh buai duh lo law law niin ka hria.

Ka sawi mai bakah u Zorema chuan kan khaw chanchin leh nùl kan neih thute chu a lo tuihnih lûam a, u Zorema lo zin chhoh ṭuma mâi ban pum khat kan hawn thlaktîr thu leh chawhmeh dang kan hawntîr thu hla lam te kha kan sawi chhuak ta hial a, an ṭawng duh siam siam hlawm bawk si nen an bula awm chu nuam lo han tih tur a ni miah lo.

Tin, u Zorema leh a nau chuan a pa hming tir an chhawm ve ve tih pawh ka hrethiam chawpchilh nghal mai a, 'ZO' tia hming bul inṭan chu an ta bîk liau liau emaw tih tur hian an inhmeh phian leh ta nghal a, u Zorema nau chiah hming chu ZOMALSAWMA niin 'Sawma' tiin an ko mai a, kum lamah kan lo inrual vel chiah lehnghal a, ka rin ai a la naupang daih! U Zorema erawh 'Mapui' tiin an ko daih thung a, ka koh dan nen inang lo viau mah se inhmeh ka ti ru ang reng hle thung.

"Pate, naktuk zîng chu min kaih thawh theihnghilh suh aw…..ka mu dâwn a nia....." tiin Veni chuan u Zorema chu a rawn bia a, ṭawngkâa chhâng lo hian a lo buk khum nghut a, Veni pawh in chung lamah a chho zui nghal chu a ni mai.

Thawk leh khatah khawpui a rawn ri khawk dur dur a, kawlphein a zui nghal zat bawk a, ruah a sûr dâwn hnai tih chu a hriat khawp mai. Ka mitmeng leh awm dan aṭangin u Zorema chuan ka rilru tur àwm ang a rawn hre tlang vek a, rei awm tawh lovin min hawpui thuai a, haw kawngah erawh ruah a rawn sûr hman ta tho va, mahse a la sûr tam em em rih lo thung. 

Pa Ramngheta te in kawt kan thlen chuan kawl a rawn phe zawk zawk a, ka phu nasa bawk nen ka ṭe chhuak tuarh nghe nghe!

Kan in chhûng kan lut chu ruah do tih takah kan hnawm deuh chap a, pindan lamah lutin ka inthlak nghal sat sat a, u Zorema pawh ka towel pek chuan a lo inhru hul ve mual mual a, ruah chu a rawn sûr tam buan buan ta viau bawk.

Kawl ni se a la phe nasa zawk zawk hle a, u Zorema tân pawh han haw leh mai na chì ziazâng a ni lo. U Chhûanga nena an inbiaknaah chuan ka inrawlh ve leh zauh ṭhin a, thingpui ka lúmsak leh nghe nghe a, an inah khan in tawh tho mah ila a in leh duh ka rin vang a ni pakhat!

Ruah sûr a bàn meuh chuan zan pawh a tlai duai tawh a, tawi khawmuang tawh lovin a haw zui ta vang vang a, ka hlata a'n awm chiah chu ka ruak nghal huai te'n ka hria.

Ka taksa pêng pakhat ang maiin keimahah hian a bet tlat tawh a, rilru hah châng leh lungngàih ruk châng nei ṭhin mah ila ani nena kan awm dun tawh chuan chung ka rilru hah rukna te chu engmah lo maiah an chang zo ṭhin.

Ka tâna a pawimawhzia ka hriat chian tluk zetin ka hlut a, tihmawh châng nei ṭhin mah se ka ngainatna a kiam phah lo va, puitlingpui ni siin naupangchhia taka awm châng te pawh a nei ve ṭhin ngei alawm, mahse chumi avang ngawt chuan a zahawmna ka hmuh hniam phah ngai lo, a chhan chu ka hmangaih tlat a tin a ni!

A tukah chuan engmah ti lovin inah ka awm hahdam mai mai a, ka hnathawhna aṭanga ka bàn thu erawh Lâtei tih loh tûmah ka la hrilh chiang lo thung.

Chawhmâ lam chu in chungah lêng chhovin nu Sangtei nen kan inkawm char char a, chhun thingpuite kan in dun a, engmah ka sawi duh rih lo miau bawk nen chawl satliah angah min ngâi a ni ber.

Chhun thingpui kan in lâi chuan pa Ramngheta a rawn haw hlawl a, min be lem lo va, kei paw'n ka lo be bîk chuang lo.

Chawhnu her a nih meuh chuan rilruah u Zorema ringawt a awm tawh a, min lam turin ka thawhna hlui dawra a kal leh ngei ka ring a, a kal hmâ ngeia chhuanlam ka siam vat a ngâi tih pawh ka hria, mahse engtia chhuanlam han siam tur nge tih erawh ka hre lo a ni.

Chutia rilru ka sèn rauh rauh lâi chuan nu Kimtei hnen aṭangin phone call ka dawng nawlh a, ka en deuh vang vang phawt nghe nghe!

"Engati nge dawrah i rawn kal loh?" phone call ka làk rual chuan awkâ nêm fahran lo ri ka hre zui zat a, zep thu a cheng lo, biak a châkawm hlawl loh!

"Ka lo kal tawh lo law law záwk mai ang, mahse in buai dâwn chuan ka lo la kal lui thei tho" pangngai tak hian ka ti sap a, ka awm loh thut avanga an buai viau a nih tâk leh thla a thar hmâ te chu ka kal lui hram mai a ni ang chu!

"A nih chuan i hlawh hi Lâtei hnenah ka lo dah ang a, in lo inpe chhawng leh mai dâwn a nia…." a rawn ti par par a, thla laklawh pawh ni se thawk zui tawh lo mah ila pawi a ti lo tih chu a chiang ta hle.

"Aw le......" tiin ka chhâng ve leh mai a, ani pawh chuan

"Ka dah....!" ti deuh hmakin kan inbiakna chu a hmet tawp zui nghal zat bawk.

Chutia ka hnathawhna aṭanga ka bâng fel ta chu nâ ka ti hran lo va, hrehawm pawh ka ti chuang lo, mahse dàwta min puhna mawlh kha ka hriatna ka hloh te a nih ngawt loh chuan ka theihnghilh mai mai ka ring tawh lo thung.

Ka bàn danah chuan thil felhlel a awm tih ka hai bîk lo va, kawr pawh kha ka ṭhui a nih avangin khatiang mai maia ṭet hmâ tur khan ka ṭhui lo va, hmân aṭang tawh ka ṭhui ngai bawk hek lo.

Ka ring sual te a nih ngawt loh ka ṭhui zawh hnu khan khawih danglamtu an awm ka ring bur a, chu erawh keia va hriat chian phak a ni hauh lo.

A lakah eng ang paw'n insawifiahna thu chhakchhuak chamchî mah ila min awih leh dâwn chuang loh tih ka hriat chian em avanga insawifiah buai duh ta lo mai chauh kha ka ni a, ka thawh reng a rem lo a nih ka ring ber tawh!

Ni lo se chu khang kum kal ta chhûng zawnga inhmuh thiam lohna nei ngai miah lo kha vawi leh khatah kan inkâr a buai nuaih nghal ngawt thei lo, chung lam remruatna te pawh a ni zàwk mahnà le!

"I buai em?" phone call a làk rual chuan ka ti chhuak sap a, office bàn hmâa ka hrilh làwk lo a nih chuan dawrah rawn pèn kawi a tum leh ngei dâwn tih ka chiang a ni.

"Buai lo e, eng nge ni ta?" a rawn ti ve mai a, buai lo ang takin insawi mah se mi dang ṭawng deuh lang lang ri chu ka hre pha vek a, engmah ti lova a awm mai mai ka ring chiah lo bawk.

"Eng lo a nia.......dawra lo kal kawi a ngâi lo aw, chu chu ka rawn hrilh zawk che, ka dah lehnghal mai, i buai hmél si" ti zung zunga kan inbiakna tihtawp zui nghal ka tum lâi chuan

"Ka buai tawh lo, ka buai zo chiah záwk, engati dawra lo kal chu a ngàih loh? Vawiin i kal lo em ni?" a rawn ti ve leh ta dut dut a, phone pawh chu ka hmeh tawp loh phah nghe nghe!

"Immm.......kal lo, zaninah......" tia ka ṭawng laklawh lâi chuan

"Zo.....lo phei rawh, thla là ang....." ti lang langtu hmeichhe awki sâng vah ka hriat avangin ka ṭawng tawp chat a, phone kaltlang mah ni se Peki aw ni tlatin ka hria.

"Nakinah ka rawn be ṭha ang che" ti supin phone chu a hmet tawp zui nghal daih a, che chang lovin ka awm deuh vang vang nghe nghe!

'Thla làkpuia lo sâwmtu hmeichhia kha Peki ni ta se' tih lam ringawt chu ka rilruah a awm ta ngawt ngawt a, ngaihtuah zui loh tuma eng eng emaw ka tihsan chung paw'n ka ngaihtuahnaah a riak tlat a, ngaih ṭhat lohna neih pawh ka tum chuang lo, mahse ka rilruah chuan zawhna chi hrang hrang a inmung nasa khawp mai.

Ka lo ral rin ang ngawtin Peki a ni kher lo thei tih ka hre reng a, mahse chumi avang chuan ka ngaihtuah zui loh phah hauh si lo.

Lâtei hnen aṭanga phone call ka dawn hnuah erawh kan inbiak tâk daih avangin ka ngaihtuah ngut ngut reng tawh bîk lo va, Lâtei chuan ka hlawh a kawl thu sawiin nu Kimtei hmêl hmuh hrehawm sawtzia min hrilh zui nghal malh malh a, hna bàna rawn pèn kawi zuaih a tum nghe nghe bawk. 

Kan inbe zo chu u Zorema hnen aṭangin phone call a lo lut ve leh chiah a, ka là zui nghal mai bawk.

"Nichin khan i sawi laklawh viauin ka hria?" zawhna záwt titih deuh reuha a rawn tih chuan

"Sawi laklawh lo ve......" ka lo ti sam mai a, awm dun ngat ila zawng ka thusawi a awih loh hmêl ka hmuh ngei ka ring.

"Zanin chu engtin maw?" a rawn ti ta chiah rèng a, office chhûngah a awm tawh te pawh a ni ang, thawm chu a reh ṭhuapin ka hria.

"Nichin khan Peki aw ang deuh ka lo hria a, ka hre sual záwk nge?" tiin zawhna ka zàwt lèt daih a, thum dut duta a nui ri chu ka hre zui nghal zat bawk.

"Immm......Peki a nih kha, zirtirtu training-ah an school aiawhin a rawn kal ve alawm....." a thusawi chu ka bo hman ang reng viau a, mahse ka hrethiam chawpchilh lehnghal mai.

"A nih chû......." tih bakin ka chhâng lo va, ka hriat phak loh leh hmuh phak lovah an lo inhmu fô thei tih ka ngaihtuah chhuak daih nghe nghe!

"I thik em ni?" ka rilru hre tlang vek ang ziazânga a rawn tih chuan

"Thik lo ve...." ka lo ti pangngai diai a, ka thik nge thik lo pawh ka hre chiah lo.

"I thik chu a va ang si ve?" a nui zui huk a, kan rilrua awm chu a inan loh viau ka ring.

"Thik hran lo ve, mahse mak erawh ka ti deuh....." ka ti thawp sap a, ka ṭawng rin hran lo hle bawk.

"I thik tih hre tho mah ila i thik lo angah ka ngâi mai ang" nuihza aw lek lek hian a rawn ti leh sup a, kei pawh za em em lovin ka ṭhen ve ta sak!

Thil dang sawi chhunzawmin kan inbe zui rei hran lo va, kan inbiak zawh chuan kawt zâwl lamah ka tei chho mai mai a, nu Sangtein min lo ko nghal chat a, an veranda ṭhutthlenga ṭhuin kan titi melh melh a, kawt zâwla Tharthara leh Chhanchhani infiam chu kan thlir pah reng bawk.

Tlai boruak chu dawn a nuamin a zàngkhai hle a, kan in lamah pawh ka chhuk thla lawk lo nghe nghe!

Khua a rawn thim a, zanriah ei lâi chuan u Chhûanga bulah ka thawhna dawr aṭanga ka bàn thu ka hrilh ta nge nge a, engkim, dàwt tel miah lovin ka hrilh fai vek a, hai rual lovin a hmêlah aṭang chuan a lungâwi lo tih a hriat hle a, sawi pawh a sawi thui zui duh vak lo. 

Ka nu leh pate erawh la hrilh rih lo turin ka hrilh zui siam siam a, keimah ngeiin hrilh ka duh vang a ni pakhat!

Kan khuaa a haw chhoh hun tur ka zàwt ta daih a, hnathawh tur ka nei mumal rih lo bawk nen a ruala haw chhoh ve chu ka tum rilru nghe nghe!

Kâr leh lampanga haw chhoh a tum thu a sawi chuan ka nu ka ngaihtuah zui nghal a, sawhthingte pawh lìnpui nghal law law ila a ṭha dâwn riauin ka hria.

Kum dangah lem eng hna rum leh hrâm mah kan thawhpui thei ngai lo va, kumin chu kan thawhpui theih hun a ni mai, anni tân tak pawh a hahdamthlak huai dâwn tih ka chiang a ni.

U Chhûanga chuan ka thawhna dawr aṭanga ka bàn chhan leh ka bàn dan chungchang chu engmah min zawh belh lo hrim hrim a, engkim a nih dan tur a ni vek tawh a, sawi vakin awmzia a neih lohzia a hre chiang hle te pawh a ni mahnà!

Zanriah kan ei kham hnu deuh lawkah u Zorema a rawn lêng lut a, khua a lùm chho ṭan ta bawk nen kekawr bul a rawn ha nghe nghe a, amah a lo hang chhe bawk si lo, a lang fai sar sar khawp mai.

"Tun hnai hi dawrah i kal lo zingin ka hria, i dam lo em ni?" a zawhna avang chuan ka nui sak a, thil dik lo hi chu a hrethiam rang ṭhin teh e!

"Nia......" ti sapin ka ngawi deuh dat a, u Chhûanga paw'n a hre ta tho bawk a, hrilh tlang law law chu a ṭha záwkin ka hria.

"Dawr aṭangin ka bâng a........" ka tih zawm zat a, en kher lo mah ila a taksa chet dan aṭang chuan min melh zawk tih ka hre thei!

"Engati nge?" ka rin táwk vel chiah a ni.

"Kan inhmu thiam lo laklawh mai mai maw le, eng dang vang a ni lo" pangngai tak hian ka ti zàngkhai vah a, mahse ani erawh chuan min en urhsun sauh thung.

"Kar lehah khian u Chhûanga nen kan khuaa haw chhoh kan tum a........" ka tih zawm nghal daih a, ani pawh chuan

"Engati nge? In va tum teh thut ve?" a rawn ti deuh vut a, a bawp chu a khawkher zui nghal zat bawk.

"Mangkhawh te a ngâi dâwn a, chu bakah kei phei chu ka nu leh pate sawhthing ka lìnpui nghal ka ring, ka rawn chhuk lawk tawh lo maithei a ni" ka ti siam siam a, rilru thawven hmèl deuhin ka awm tak nà chu ka ngâi dâwn tih ka hre chiang viau thung.

"Hnathawh tur zawnsak i duh em?" a rawn ti sup a, chutah amah bawk chuan

"Ka lo zawnsak ang che" a tih zawm leh nghal dut a, ka lo ṭhen sak ringawt!

"Ka awm bo chu i va hlau ve a.......?" tiin ka fiam zeuh a, ka nui zui pat pat bawk.

"Hlau e......" awlsam tè hian a rawn ti sup a, dàwt a sawi lo tih pawh a hriat viau mai.

Chumi zan chuan zan dang ang bawkin kan awm dun leh chawt a ni ber a, u Chhûanga ni se u Zorema rawn lèn hnu lawk khan a lêng chhuak ve lehnghal daih bawk si nen awm dun chawt lo thei pawh kan ni lo a ni zàwk mah ang chu!

Kan kâr thuah buaina em em awm rih lo mah se hlauhthawn rukna erawh ka nei reng thung a, hmangaihtu thinlungah chuan ho tê anga lang pawh hi thikna avangin thil lian tham takah a chang awl em em a, chutiang chiah chuan phat rual loh leh zep rual lovin Peki lakah rilru ka pu ru ran a ni ber.

Hmeichhe sual leh awm herh takah erawh ka ngâi ngai lo va, ni pawhin ka hre bawk hek lo, chutih rual chuan ka beng leh mit a tihkham ruk ṭhin tlat avangin rilruah ngaihtuahna dang a rawn piang lo thei lo va, u Zorema pawh hian ka thik tih chu a hre ve thovin ka hria, mahse mipa a nih vang nge ni, a ngaih a sam thei hle thung.

Nî leh kâr a ral a, mit khap kâr lek tluk zetin thla pawh a liam chak hle a, hnathawh tur nei lo ta na fàm chu kan khaw lamah ka haw chho ta nge nge a, ka nu leh pate'n ka haw chhoh chhan an han hre chiah chu an lungàwih loh rualin an lungâwi lo rei lo ang reng viau thung a, chutiang dawr, inrinhlelh ruk rengna dawra ka thawk tawh lo chu an lawm záwk vangte pawh ti ila a sual lo ang.

Ka lo tum rilruk tawh ang ngeiin nî tin hna ka thawhpui a, nipui lâi tih takah ni a sen sâ thei hle a, thil nuam tak zawng ni lo mah se ka nu leh pate dinhmun ngaihtuah chungin ka intipaukhauh lui ve ngar ngar a, keini an fate tâna hna an lo thawh nasat ṭhinzia ka hre thar awn awn bawk.

Tin, u Chhûanga leh ka pa pawh an buai ni tin zan tin thei hle a, khatia mang kan han khawh zo kha motor-in tlai hnih ngawt chu thing an trip haw nghe nghe a, kan ramah thing ṭha làk tur a lo awm ve nial nual bawk nen buai lo thei lo dinhmunah an ding a ni ber.

U Chhûanga tak phei chu a chhuna zanin Ruata nen thing an tan loh leh an ek nghal zel a, pakhatah chuan Aizawl lama chhuk leh thuai a ngàih vang a ni a, ka pa phei chuan chhuk tawh turin a ti nghe nghe a, mahse a awm loh huna lo che turte chu a chhûngte tho kan ni dâwn tih a hriat chian èm avang leh ka pa'n kan chhûngte pawh pun miah lova a lo vai hma leh vek ang tih a hlauh vang a ni pakhat!

Nî tin ram lamah kan chhuak ṭhin a, hmeichhia kan nihna lâiah erawh ka pa leh u Chhûangan min awl thiam em em a, kan tih ber chu thlai chì lo thlak a ni ber a, vaimim te, mai te, anṭam te leh thil dang tam tak kan tuhin kan thlak a, chutianga chhûngkaw kim ngeia hna kan han thawhkho leh chu hun liam tawh ka hre chhuah phah nghe!

Kan khua hi chhim chhaka awm a ni a, ram pawh hmân èm chu tluk tawh lo mah se a la ngâw ṭha pangngai viau a, kan naupan lâi phei kha chuan ramah te kan riak a, nuam kha kan ti thei em em a, u Chhûanga chini ei châkin hmarcha min eitîr ringawt te kha ka la hre reng!

Unau inchhangbung tih takah ka nu leh pa tih lova min awm tam ber tu chu u Chhûanga a ni a, ani chini ei châk tawh lutuk khan hmarcha min han eitîr ngawt a, chutah a duh leh beisei ang ngeiin ka nu khan chini min barh tur khan a hrilh ta ngei a, chumi ah chiah chuan remchâng lo làin chini a ei ru ve nghal zaih kha a ni a, khang hun lâi kha tun hnu thleng pawh hian a ngàihawmin a la hlimawm reng mai.

"Aw nu Sangte......" tiin phone call lo lut chu ka là a, ka aw chu a zàngkhai diai bawk.

"In dam ṭha maw? In awm lo chu a reh lutuk a, kan awm thiam lo lek lek alawm le" a rawn ti zar zar a, nu ṭawng duh ve tak hi chu a ni chiang a ni.

"Chu, a va inthlahrunawm ve, u Chhûanga pawh kâr leh lama lo chhuk a tum tawhin ka hria" ka ti ve ta siam siam a, ani bulah hi chuan mize zawi tak pawh an mizia a zawih theih tak tak pawh ka ring lo.

"A nih chu maw le, eng lo a nia, ka rawn biak chhan che chu North Vanlaiphaiah kan chhûngte tlawhin kan kal lawk dâwn a, in khua kan paltlang ngei àwm si a, rawn pèn kawi kan tum deuh bawk nen inah awm in awm dâwn em tih ka rawn záwt lawk che?" a rawn tih leh chuan

"Awm dâwn e, lo pêng ngei ngei rawh u, chaw pawh in ei nghal dâwn a nia...." ka lo ti zung zung a, ka nute tak paw'n an chhûngkuaa hmuh chu an duh viau ang ka ring.

"Chaw èm han ei chu.........." tia ngâwi deuh dat hian

"Ka hre lo le, i pa Ramngheta i biak thiam leh thiam loh a ni mai, in ina chaw kan ei i duh tak tak a nih chuan a tlawna i tlawn fê phawt a ngâi maithei a ni" a rawn tih zawm zat a, amah ber ber chuan a thusawi chu a làwm tih hriat takin a nui zui hak hak nghe nghe!

"Awi, i pakhar ê......lo sawipui teh aw, ka ring che a nia, ka nute pawh ka hrilh nghal dâwn" ka ti ta zaih zaih a, pa Ramngheta tlawn buai vel mawlh mai chu a ngâi ang tih ka hlau!

"Ka induh rih phawt dâwn......" tiin a nui zui iarh iarh a, chutah amah bawk chuan

"A nih, ka'n dah phawt ang e, nakinah kan inbe ṭha leh záwk dâwn a nia....." a rawn ti leh siam siam a, kei pawh chuan 'aw' lo pawhin kan inbiakna chu kan titawp zui nghal mai bawk.

Chutia kan inbiak zawh hnu chuan nu Sangtei te, North Vanlaiphaia an kal tur thu leh kan khuaa rawn pèn kawi an tum thu chu ka chhûngte bulah ka sawi nghal a, ka pa chuan hmeichhe pahnih ina lo awm turin min ti a, ka nu erawhin kan vaia awm law law a rawt thung a, tukṭhuan ei lâi thlengin kan sawi khawm laih laih a, a tawp a tawpah chuan ka nu duh dan angin ina awm vek kan ti tlu ta nge nge!

Boruak leh nî èn dan zâwng inher danglamin chhun chu a pachang sawt hle a, nipui lâi tih takah ni pawh a sâ ṭha vawl vawl hle a, insuk tur kan neih ang àngte suin ka pho nghal zel a, nî a sâ ṭha bawk nen rò pawh a rô har lo hlawm khawp mai.

Nu Sangtei hnen aṭangin phone call ka dawng leh zauh ṭhin a, an chanchin kan hre pawh reng a, dik tak chuan ka nu leh pate'n an hmuh châk em em chhan pawh keini unau chunga an ṭhat chhûngkua èm vang a ni ka ti lo thei lo.

A nih pawh a ni rèng a, nu Sângtei te ang chhûngkaw nun ngil leh khawsak nunphung ṭha hi chu Aizawlah an vâng pharh ang ka ring. 

Mi hausa uchuak leh awm thei lutuk ni lem lo mah se an chhûngkaw inrelbawl dan a ṭha em em thung a, chu tak chuan an chhûngkaw zahawmna a vawng nung ni berin ka hria.

Chawhmâ a ral dáwn ta maw tih àwm velah kan khaw dâi an rawn thleng ta nge nge a, kan in awmna te inhrilh chawpin u Chhûangan a zu hruai thlap a, ka nu leh pate nena an inhmuh rual rual chuan an chibai nghal thliah thliah a, Chhanchhani phei chu ka bulah a tal nghal deuh chawt a, Tharthara pawh u Chhûanga bulah ṭhuin sawi tur a nei tam leh pek hle.

Ka pa chuan kan ina zanriah ei tur leh riak ve nghal law law turin a sâwm a, pa Ramngheta paw'n hnial tam duh bîk lovin zanriah an rawn ei haw tur thu chu a sawi ve dut dut a, mahse han eiah zui nghal èm erawh naupang pahnihin school kal an ngàih avangin a hnial ta thung.

Ka pa pawh chuan riak turin a sâwm lui duh tawh bîk lo va, kan khua an chhuahsan hnu thlengin ka nu nen an sawi zui nauh nauh a, an lo rin làwk ang ngeia fel an tih thute chu an sawi zel a, ka pa chuan u Chhûanga chu vêngchhaka mi arsa lei turin a tir zui nghal nghe nghe bawk.

Kâr lovah khua a hniam thuai a, tlai dâr 4 velah nu Sangtei te chhûngkua pawh kan hmu leh ta ngei a, ka nu nen ei rawng kan lo bàwl fel diam tawh avangin zanriah pawh kan ei hmâ hle a, a nihna takah chuan lânga kal an nih avang leh zana haw tur an nih avanga chaw chu ei hmâ kan ni a tih theih ang.

Hlim takin hun kan hmangho a, nu Sangtei chuan ka hnathawh tur min zawnsak a tum thu min hrilh siam siam a, kan khuaa ka haw chhoh dâwn nî khan loh theih lohna avangin ka thawhna dawr aṭanga ka bàn thu leh ka bàn chhan a hre ve chiah a, a lung pawh a âwi lo hle a nih kha!

Chutia hnathawh tur min ngaihvenpui a tum chu a inthlahrunawm viau rualin pawi erawh ka ti lutuk duh bîk lo va, pawisa thawk chhuak lova awm tlawng zawng thil dik niin ka hre lo a tin a ni! Chu bakah ka nu leh pa ka hmai zah tlat a, anni rilru erawh ka rilru nen a inang dâwn lo tih ka hre chiang hle thung.

Nu Sangtei te an haw fel hnu chuan kan in chhûng chu a reh deuh diak a, ka ngaihbel nge pawh ka hre lo, an thawm ri va chu a la hriat theih ruai ruai te'n ka hria.

Eng han tih em em tur a awm tawh lo bawk nen tukverh bula ṭhutthlengah chuan ka ṭhu hle hle a, ka phone ka'n khawih chiah chu u Zorema hnen aṭanga missed call vawi hnih lâi lo awm ka hmu nghal zat a, ka call lèt thuai nghe nghe!

"Hello....." rawn titu hmeichhe aw ngei mai ka hriat rual rual chuan ka meng tak nghal raih a, mak pawh ka ti viau!

"Hello....." a rawn ti nawn leh ngat a, engmah sawi lo leh thawm chhuah miah lova ka ngàwih reng vang a ni pakhat!

"U Zorema......." ka ti hman dèk dèk chu

"A la buai a....." a rawn ti nghal zat a, a aw aṭang chuan Peki ni tlatin ka hria.

"A nih chû......nakinah a ni mai" ti sepa kan inbiakna tihtawp zui mai ka tum chu

"Nakinah pawh a hman ka ring chuang lo, a buai ang reng a, i duh leh naktuk lamah be law law zàwk rawh" a rawn ti leh zung zung a, ka hrethiam lo hman kher mai.

"Eng nge a tih a?" ka ti lèt ve ta ngat a, dik tak chuan a bialnu ka nihna ang paw'n a thil tih chu hre ve tur ka ni!

"Chutiang lehzel hriat a ṭul kher hleinem Helen, nakinah amah i la zàwt zàwk dâwn a nia, ka dah mai" ti zar zarin phone chu a hmet tawp nghal daih a, Peki ngei a ni tih ka hre chiang ta hle bawk.

Ka thinlungah thikna namên loh a rawn piang nghal a, ka rilru leh ngaihtuahna chu u Zorema ah ngawr ngawr a bur chat a, Peki daih daihin a phone a lo chhànsak ngâi khawpa a buai chhan chu hriat chàknain ka khat ngut ngut a, hmun thuhmuna awm an ni tih ka hriatna te hlei hlei chuan ka rilru a tikal dik lo zo a, ka ngaihtuahna pawh a kal thui nghal vang vang khawp mai.

End of chapter 8