𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟔)

ZOREMPUIA

(Mizo Romantic Novel)

By

Havali Adam

Chapter 6

Chu thlasik boruak hit hiar kârah chuan nî zung a rawn lang riai riai a, zîng kâr hmâ tak ni tawh lo mah se thlasik a nih vang hrim hrim te pawh a ni ang, hmun tin kil tin mai chu ṭiau chhumin a la bawh paw deuh chûk a, nî ber a rawn chhuah chinah erawh kiam zâi an rel tial tial a, inhriatthiam tawnna nei ang mai hian hmun an inkian te pawh ti ila a àwm ang lo lulâi lutuk bîk lo ta ve ang.

Kawt zâwlah chuan tei chhovin nu Sangtei te nupa che vel chu ka thlir dauh dauh a, tun hnaia nu Sangtei pangpâr lei thar an lo buaipui dun mial mial a, nu Sangtei zawk chu a ṭawng barh barh reng a, rei pawh awm lovin ka chhuk thla ve leh mai a, eng hun bi pawh ni se ka dam lo te a nih ngawt loh chuan zîng tin hi chu nî chhuak hmuh ka tum ziah a ni ber e. Tin, zîng thawh hmâ ṭhan hi a awm ve pakhat bawkin ka hria.

Krismas boruakin min chiahpiah tawh bawk nen dawr lamah pawh kan buai mawp mawp ṭhin hle a, order a tam mai bakah rawn lêng lut an awm nitin reng a, nu Kimtei nen erawh kan inkâr a la ṭha lo tluang zel thung.

Hawihhàwm chhuaha han biak hmâsak châng ka ngah a, ka biak hi chuan pangngai deuh hian min chhâng ve mai zel a, mahse ka biak hmâsak loh erawh hi chuan min be hmâsa ngai meuh lo.

Tin, pa Hminga lakah pawh ka la inthiarfihlim hram hram zel a, nu Kimtei hmuh loh hlana mi biak leh ṭawngkam ngeiawm tak taka mi biak a ching em em leh ta nghal a, ka tih theih awm chhun chu fimkhur a ni tawp mai.

Amaherawhchu, fimkhur eng ang mah ila fimkhurin awmzia a neih loh hun thleng thei reng a ni tih ka hre chiang em em a, ka dikna a nih ngat chuan nu Kimtei pawh ni se ngawih mai mai ka tum tawh bîk hauh lo bawk.

"In bâng tlai leh dâwn em?" phone call ka làk rualin u Zorema aw ka hre zui zat a, tunlâi chu dawrtu kan ngah ṭhin bawk nen kan bâng tlai thei em em a, office bàna min rawn lam kawi lo mai tur paw'n ka hrilh leh zauh ṭhin a, mahse thu a la awih lo tluang zel chu a ni e!

"Tlai leh ang ka ring" ka ti liam puat a, ka thil ṭhui lâiah chuan rilru ka sâwrbing khawp mai.

"A ngaiah khan ka lo nghak ang che" a rawn tih chuan

"Aih.......a ngâi lo, haw tlang záwk rawh u Zorem, vawiin phei chu kan bàn tlai zual ka ring, kan buai êm mai" ka ti ta zung zung a, hnar tum dut ri ka hre zui nghal zat bawk.

"Khawiah emaw min kalpui la ka duh alawm, ka lo nghak ang che" a rawn ti leh nghut a, luhlul chhuahna chì ni paw'n ka hre lo.

"Khawiah maw…..? Min hrilh láwk bawk si lo, kan bàn hun i lo nghah chuan min nghak rei lutuk palh ang, haw záwk mai rawh" ka la ti fan a, haw se ka duh ngawih ngawih vang pawh a ni lo, a laka ka inthlahrun vang záwk a ni.

"Ka tarmit hi thlak a ngâi a......." dam deuh dap hian a rawn ti a, nichin láwka a ṭawng dan nen kha chuan a inang lo ta viauin ka hria.

"A nih chû......." ka lo ti hliai a, sawi tlang rawt lo mah se kei nena tarmit lei dun a rilruk tih ka hrethiam chawpchilh ve nghal mai.

"Kan bàn har hmèl sia....." ka ti leh dai a, han hnial tawp ka hreh ve tho bawk si, ka hun neih danin a zir bawk si lo, thutlukna siam dan tur ka baihvai ru tak zet!

"A nih....." ka ti chhuak leh halh a, eng thu mah a rawn sawi zui tawh miah bawk si lo nen ṭawng hmâsa záwkah ka ṭang leh ta nge nge a, min lo nghah peih phawt te chuan min lo nghak ngar ngar se a ni mai.

"Min lo nghah chu i tum tak tak em ni?" ka ti leh té tê phawt a, min nghak dâwn tih erawh ka hre chiang viau thung.

"Immm....." tih bakin min rawn chhâng lo va, thawm aṭang chuan office bâng turin a insiam fel vel mêk te pawh a ang!

"A nih chuan i lo thlen hunah min rawn bia la, dawr chhûngah i awm ve rih mai dâwn a nia, mahnia awm ngawt ngawt ai chuan nuam pawh i ti záwk ang" ka ti ta zar zar a, chutah keimah bawk chuan

"Ka dah mai aw.....ka ṭhui laklawh lutuk a....." ka tih zawm leh zat a, ani paw'n thu tam rawn sawi tawh lovin kan inbiakna chu kan titawp zui ve nghal mai bawk.

Khua a hniam tial tial a, thlasik tih takah khua a thim chak tawh em em a, kan bâng tlai viau ṭhin náin dawr kan hawng har ta thung a, kan bàn meuh hi chuan dâr 7 leh a chanve dâwn a lo ni duai tawh ṭhin a, chuvanga u Zorema pawh haw tlang záwk mai tura ti ṭang ṭang kha ka ni a, chutih rual chuan kan chhuak dun tur erawh hna ka thawh phur phah sawt thung.

U Zorema chu ka bulah a awm ve ta reng a, thil ṭhui pahin ka be melh melh a, nu Kimtein min rawn leh zeuh zeuh ṭhin tih pawh ka hre ru reng a, mahse ka hmu lo der hmak!

Tin, kei chang ni lovin Lâtei paw'n a lo be ve liam a, kan hnathawhna hmuna rawn awm ve tlawng chu a inthlahrun loh hram ka beisei.

Chutia thil ṭhui mial mial paha ka melh lâi tak chuan min lo en ve chiah a, mit ko kan ák hian ka nui seih a, ani pawh a lo nui suk a, kan mitmengin ka inbia a ni ber.

A sîr zâwng emaw, min hmâ zâwng emaw, engtin pawh awm se ka mitah hi chuan a ṭha vel vek a, zun ni se huhâng a ngah tluk zetin a ngah vei phian leh ta nghal a, nitin amah avang hian tuiral ṭhin ta pawh ni ila a àwm viau tho mai.

Minute tin mai chu a liam hian a liam duak duak a, dawr kan khar fel meuh chuan dâr 8 a ri thuak tawh a, ni dang ai kan bâng tlai zual khawp mai. U Zorema záwk chu ka khawngaih ru ang reng viau a, kan bàn tlai tehlûl nen min nghak chhuak thlap a, dawra kan awm lâi te khan ka rilṭam a hlauh avangin ei tur min leisak hial kha a ni a, ani ang mipa ka tawng hi chu vannei ka inti ve thlawt a ni.

"Ka driver chhawr i ang ê......" ka ti fiamthu hliai a, car chhungah kan chûang dun ran tawh bawk.

"Ka ni lo em ni?" thle deuh ngiala mi rawn en chung hian a ti dut a, ṭum dang ang bawkin a va han pà leh hliah hliah tak!

"Thil ei hmâsa lawk ila, ka treat ang che, min nghak rei bawk si" ka ti leh zat zat a, dik tak chuan ka inthlahrung ve a ni.

"I ril a ṭam em ni?" ka zawhna tak pawh chhâng chuang hlei lo hian a rawn ti daih thung.

"Ṭam deuh reuh, nang pawh a ṭam ka ring" ka lo ti ṭha ve leh mai a, ka haw har tur thu u Chhûanga ka hrilh vek tawh tho bawk nen inei puar nghal chu ka tum rilru ta law law mai.

"Ka ṭhianpate’n dawr an nei alawm, chutah chuan kei ei dâwn a nia, an inhawng rei ṭhin tak e.....!" hrechhuak thut ang hrima a rawn tih chuan ka lo bu zeuh a, thil dang ka sawipui ta daih bawk.

Kâr lovah a ṭhianpate dawr chu kan thleng der a, kawngpui chhak deuh lawkah hian a lo awm a, thil ei pahin lirthei vei vak leh mî chetla vel a thlir pah theih bawk a, ka rin ai a nuam daih! 

Kan ril a ṭam ru ve ve te pawh a ni ang, ei tur chu kan chah ṭeuh a, kan hun neih dan a inan loh ṭhin avangin thil han ei chhuah dun hi kan la nei mang lo a tih theih a, chutia remruat làwkna pawh awm miah lova kan ei chhuak dun chu a nuam lehling phian mai.

Kan inei puar ta maw tihah chuan tarmit zawrhna dawr lam panin kan inphur chhuak leh ta hna hna a, dawr hawn hun ni tawh lo mah se a hmêlhriatte dawr a lo ni hlauh a, dawr chhûng kan lut te chu an lo be nghal siam siam a, an lo dawngsawng ṭha khawp mai.

Inhmêlhriat satliah an ni lo tih chu ka hai lo chiang hle a, dawr neitunu, u Zorema hmêlhriat ber lah chu a ṭawng duh em em leh ta nghal a, u Zorema a biak dan vel te hlei hlei chuan ka rilru a tikal dik lo va, ka thik tlat pek a nih chu!

"I duh ber thlang la.....?" u Zorema chuan a rawn ti sup a, thlan ber tur erawh ka hre lo hle.

"Hei hi a mâwi asin, inhmeh pawh i inhmeh viau ang" rawn ti zat zat tu chu en pawh ka en peih lo.

"Khawi maw.....ka'n vuah chhin ang e....." tih leh u Zorema chuan chu nu tarmit pek chu lo làk a rual nghal zat bawk.

"Hei hi i inhmeh ang" nêm fahran lo hian ka ti ve ta hmak a, u Zorema chuan min rawn en zawk nghe nghe!

"Kha chu a tunlâi mah mah lo maw.....?" u Zorema chu ka melh chho râm a, dar chhin ak hian ka hawi sawn nghal daih a, hmeichhe dang ka thik avanga ka chet dan chu a mâwi lo tih ka hria, mahse ka thik miau si a ni.

"Ka hre lo le, i duh duh thlang leh si rawh, ka thlang thiam vak lo" ti dam diaiin hmun dang chu ka thlithlai kual vel ta daih a, min en zui tih pawh ka hre reng a, ka hre lo der hmak thung.

"Kha chu i inhmeh lo, hei hi i inhmeh záwk" a hmêlhriatnu ṭawng lang lang ri chu hre lo ang mai hian ka awm hmiah hmiah a, tarmit ka en kual vel mai mai a ni zàwk mah ang chu!

"Khawi, hei hi ka lo là ang e, eng zah man tur nge?" u Zorema aw hniam sup ka hriat rual chuan ka hawi phei zawk a, min rawn en dâwna ka hriat avangin ka hawi lèt lehnghal daih!

"Awi, kha chu i inhmeh pawh ka ti vak lo asin, mahse i duh miau si chuan tih theih ka nei hleinem" ti lang langin a hmêlhriatnu chu a nui zui har har a, ka ei lo laklawh vel vek tawh a ni ber.

"Haw ang le....." u Zoreman a rawn tih chuan bu nghatin ka che zui ve nghal mai a, ka ṭawng tlêm sawt viau a, ka awm dan aṭang chuan a hriatthiam vek tho ka ring; mi à a ni lo tlat!

Car chhûnga kan chùan luh lâi te chuan ka la ngawi reng a, ka lungâwi lo pawh a ni tawh lo, ṭawng ka châk vak rih lo hrim hrim a ni. 

Tin, inti tatu taka ka awm ve ringawt chu ka inthlahrung hnuhnawh ang reng viau a, ka bialpa mah ni se kei ai a upa daih a, fin pawh a fing záwk daih a, mi dang awm lâi renga ka awm dan kha ka ngaihtuah lèt leh ta zel nen ka thu thua awmtîr tum ang maia ka lang chu ṭul ka ti lo ta hle bawk.

"Ka inhmeh leh hmeh loh pawh i sawi dâwn na nge?" a rawn tih chuan a lam ka hawi zawk a, hawi sawn lehnghal mai tum kha ka ni a, mahse ka hawi sawn nghal lo chiang kher mai.

"I hmêlhriatnu thlan záwk kha i là dâwn emaw ka tia......?" ti chhuak hliaiin a hmêl chu ka en chik ngar ngar hle a, hmân aṭang tawh ka beisei lo lam daiha chet hi zawng a hrat ve hrim hrim!

"Duh vak lo chungin i thlan záwk hi ka là ta mai" a rawn ti kher chu ka melh vak a, mi pawh en lo hian a nui ang sun sun leh ta nghal a, ka va han kuk fawk châk mai mai tak!

"A lo nih tak chu!" ti hmakin ka ṭhu tau nghawng a, tlawn titiha min rawn biak leh te chuan ka chhâng eih lo va, min thlem a ni mah záwk!

"Ka inhmeh nge hmeh lo han sawi teh le" nui ruh ruh paha a rawn tih leh chuan pâwn lam ka hawi daih a, ka mal a rawn ṭham chiah erawh ka ṭe chhuak nghal that!

"A za a nia......" ti hluaiin ka mal rawn ṭham leh a tum chu ka lo dang vat a, min fiam tih ka hria, mahse min fiam dan ber kher chu ṭul ka tih loh zâwng tak a ni.

"Ka hmer za lo thiam tho alawm....." inla zei fahrana a rawn tih chuan ei lo zet hian ka lo ner khum sâwng a, hmâ lam hawi ve leh nghal maiin a nui chhuak hawk hawk a, amah ka hriat tirh ata chutiang renga a nuih nasat chu ka la hre lo.

Kâr lovah kan in kawt kan thleng der a, car aṭanga chhuah nghal mai ka tum chu a lamah min pawt hnai hrawk a, lungchim zet hian min fawp vawng vawng a, a mi fawhna zun nei tak avang chuan kan awmna hmun pawh ka theihnghilh ṭep nghe nghe!

Lêngah ka sâwm zet nà chu tih tur a la neih avangin a haw ta záwk a, kawt zâwl aṭanga a tlan liam thlengin ka thlir zui vang vang bawk.

Ka nî hman tinuamtu pakhat hi chu a ni ve chiang alawm; chutiang bawkin awlsam taka ka mood thlak danglam theitu pawh! A tel lova nung thei lo tawp chu ni lo mah ila, a tel lo chuan hringnun hun bi chhiar erawh ka harsat tawh viau ka ring.

Nî te chu an inher liam zel a, krismas kan hnaih ta tial tial bawk nen rilruah chuan kan khuaa haw châkna hlir a khat tawh a ni ber a, u Chhûanga pawh a bang chuang lo, haw a sawi ri ve reng mai.

Keini unau haw châk chu thuhran ni se, ka nu leh pate tân tak pawh keini an fate haw hun chu an thil nghahhlelh ber te zînga mi a ni dâwn tih lah a chiang reng a, min thlahlel ru tawh ngawt tak ang.

"Awi, pangang, ka rap lutuk.....!" tiin nu Sangtei chu a ṭe ṭhat ṭhat a, a hlau ngàng a ni ang, pangpâr pot ṭhenkhat pawh a pal baw nuaih mai.

"A va ho e âw......" pa Ramngheta chuan ngaihsam hmèl zet hian a lo ti thum dut a, nu Sangtei ngaihdan erawh a ni lo teh e!

"I hlauh loh vang mai mai a nih kha!" ti hlak hlakin pa Ramngheta chu

"Va that daih teh, ka rap a nia......" tiin a biak zawm leh nghal zat zat a, pa Ramngheta pawh chuan

"A tét tèt nen......" ti nui nui hian pangang chu a kut lawngin a là lawk a, hmuh phak lovah a paih ta daih a, hlau lo ve tak chu a ni.

"Engati nge i kut lawnga i khawih ringawt…..!? A hling i kâi ang asin!?" la hlauthawng deuh bawk si nen nu Sangtei aw chu a nêm hlei thei rih lo a ni ber e.

"Kha.....kha.....kha.....pangang!" pa Ramngheta chuan a ti thut a, chu veleh nu Sangtei chu ring mangkhengin a ṭe vawn vawn a, pa Ramngheta chu a va kuah rawk rawk a, pa Ramngheta lah chuan zo fahran hian a lo pawm kang nghal hmak bawk.

"Ka pawm lohna che a rei ta hle mai" pa Ramngheta chu a nui sun sun a, nu Sangtei erawhin nuihza hmêl rèng a pu lo hrim hrim thung.

"Chutiang sawi hun pawh a ni lo, pangang chu that vat rawh!" nu Sangtei chuan a ti khar khar a, pa Ramnghetan pangang a thah hmâ chu lei rah tum tawh lo te pawh a ang alawm lè!

"Ka tihder che a nih kha…!"

"Enga…!?"

"Pangang a awm tawh lo hrim hrim"

"A nih chuan min dah thla rawh!" nu Sangtei aw chu ṭeu hlar hlar tak a ni.

"Aih....." lo ti dutin pa Ramngheta chuan in chhûng lamah a pawm lut ta daih a, an han inpawm lut fel chiah chu ka dinna ngaiah ka lo la ding reng tih ka hre chhuak chawpchilh nghal thuai bawk.

"Pangpâr saw tihfel vat ka duh a nia, awm sawn rih teh" in chhûng aṭanga nu Sangtei ṭawng lang lang thawm chu ka la hre pha vek a, rei lovah a rawn nui zui leh har har ang lawi a, pa Ramngheta pawh a bang bîk chuang lo.

Dawr ka thlen chuan an lo hawng fel vel chiah a, tunlâi chu dâr 10 leh a chanve dâwnah te dawr kan hawng chauh zel a, sik leh sa inthlak danglam vangte pawh ti ila a dik hlel àwm lo e!

Chutih rual chuan December thla chhûnga kan hlawh erawh kan bàn tlai ṭhin em avangin thla dang ai a tam deuh hret dâwn a nih hmél a, àwm pawh ka ti viau mai.

Kâr a liam leh meuh chuan khaw lama haw chho turin kan inbuatsaih ta malh malh a, kan bungruaho nen sumo-a haw tum ka ni a, mahse u Zoreman min thlah chhoh a tum ruh tlat mai bawk si a, han hnial viau paw'n awmzia a awm lo der lo.

U Chhûanga erawh bike-in a haw dâwn thung a, chutia u Zoreman min thlah theih dâwn tho chuan tiin a ṭhianu, a bialnu a ni zàwk mah ang chu, phur haw a tum nghe nghe a, ruahman láwk ang lo hlirin awm mah ila thil chu a remchâng vel vekin ka hria.

Thawhṭannî a rawn inher chhuak a, kan khaw lam panin kan haw chho ta ngei a, car khatah u Zorema nen chuan kan chûang dun ran a, tlan pawh kan tlan chak hran lo va, u Chhûangte pahnih erawh kan hmâ daihah an tlan a, bike a nih vang nge ni, an tlan chak par par bîk khawp mai.

U Zorema chuan ka ruih leh ruih loh min záwt leh zauh ṭhin a, min ngaihtuah tih hre reng chunga chùan chu a hahdamthlak tak zet!

"Thil ei lawk ang hmiang…?" Hmuifâng kawngpui pheia kan tlan lâi chuan a rawn ti chhuak sup a, kei paw'n 'aw' ka lo pawh ve nghal mai a, kawngpui sîrah car chu a tiding zui zat bawk.

Restaurant lo hnai berah chuan kan chawl a, ka ril a la ṭam lutuk lo bawk nen ka ei tam hran lo va, kawng laka ei rep rep tur ka lei núal ta záwk a, kal nghal mai lovin phone a hmang leh lawk a, chutia phone a hman lâi chuan kawngpui chhak lam chu ka hawi chho va, thla an lo sap sap hlawm a, u Zorema nen hian thlalak dunna kan lo la nei mang reng reng lo tih ka hre chhuak chawpchilh nghal nghe nghe!

"Khitah khian han kal ve lawk ang" tih leh a bâna kaih chu ka rual zui zat a, phone a hmang zo dim diam tawh tho bawk nen thla làk dun chu ka rilruah a lian ta ber mai.

Ka kaih ang áng chuan min zui ve hnuk hnuk a, thla làk dun ka sawi chiah chu a lo nui sun sun a, min rawn kuah titih nghal ringawt bawk. 

Ka mitah hi chuan a nuih te hian a hmêl hmuh a nuam a, awm pangngaia a awm te hian ṭha vul chûk ni lo mah se a hmêlṭhat dan a táwk em em a, lungâwi lo ang hrima a meng tak ngul ve te hi pà ka ti daih záwk ṭhin.

Thla kan han lá dun te chu kan inkuah chial a, ka inrin loh lâi taka ka biang a rawn fawp thut erawh ka meng phar nasa ngang mai. Ka zak ru bawk si nen a malah ka sik vak a, nâ ti lutuk ang hrim hian a tuai nghal vawn vawn a, mahse a hmêl aṭang chuan a tider tlatin ka hria.

"Biang fawh avang maia mi sih kher........!" a ti deuh nui nui a, car chhûnga kan chùan hnu thleng pawh chuan ama hriat táwk vel lek hian a la phun bul bul reng a, ka nuih a tiza ang reng khawp mai.

"A zahthlak alawm" ka ti dek dek chu

"Insih kher kha a ngâi hleinem!" a rawn ti tawi nghal hmuk a, nâ a lo ti tak tak nge nì!

"A nâ viau em ni?" ka aw aṭang chuan ka ngaihtuah tih a hriatthiam mai ka ring.

"Nâ.....!" a lo ti hluk a, insum hman lova ka nui chhuak hak chu mi a melh rum ren run teh e!

"A nih......" ti deuh dat hian

"Ka tihpalh ni rawh se, dam dam, ṭawng bul hmuk hmuk kher tawh lo la aw…..?" ka tih zawm leh zat a, ngawi ngul hian hmâ lam a en ding ngar ngar a, ka thusawi chu hria ang paw'n a awm lo.

"Thil i ei duh em?" ti lehin ka ei tur lei chu ka khawih ri rak rak a, mi pawh en chuang lo hian

"Aih......!" a rawn ti bul hmuk a, pa Ramchhana ka hre chhuak zawk nghe nghe!

"Awi, engati nge naupang ang maia i awm leh ṭhin?" ka ti ta hliai a, lungâwi lo zeta min rawn en chiah phei chu nuih loh theih pawh a ni lo.

Eng eng emaw ni ka sawipui lui ngar ngar a, ani pawh a tawp a tawpah chuan a lungâwi ve leh mai a, chutianga kan han inthlem lungâwi ta fô chu kan inhriat chian phah mai bakah kan inkâr thlengin a ngheh phah sawt te'n ka hria.

Ka ti leh pek ṭhin ang!

Mipa zahawm tak mah ni se nèl theihin a awm thiam tlat a, ṭawng tam lutuk lo e ti lo hian biak a nuam em em lawi a, ka tân chuan vana rah ang hial ni mah se ka ban phak maia awm dan táwk thlengin a hre em em ṭhin bawk.

Dârkâr 5 dâwn kan tlan hnu chuan kan khua pawh kan thleng ve ta nge nge a, ka muhil sek emaw ka tih kha ka lo muhil hnem viau chu niin, khaw luh dâwnah ka harh ve chauh a, inhre sa tih takah ka nu leh pate paw'n u Zorema chu an lo be tlângnêl sarh sarh khawp mai.

Ka nu phei chuan riak turin a sâwm nghe nghe a, mahse u Zorema erawh a riak êm bîk lo va, khaw thim tak tak hmâin a haw thla leh ta thuai bawk.

"I ṭhianpa kha a va fel ve, a rawn thlah chho thlap che lenghal a, riah lah kha a duh der bawk si lo" ka nu chu ka melh zeuh pah hian

"Nia.....a fel tak tak a ni" ka ti pangngai ve mai a, chutah amah bawk chuan

"Ṭhian satliah chu in ni chiah lo ti raw?" a rawn ti ta khauh mai.

"Aih.......teuh lo....." ka lo ti nghal thuai a, tomato chu tûlthira vit lut pawk pawkin gas bulah ka ding ta daih bawk.

"I nu ka nih hî Helen....." gas-a tomato ka rawh lâi chuan a rawn ti leh halh a, min hre tlang hnehsawh lutuk chu a zahthlak duh ang reng!

"A fel hmél thlup thlup viau khâ......." a thusawi chu hriat loh der tum paw'n a theih loh!

"Zorema em ni kha.....?" a rawn tih leh chuan

"Immm......" ka lo ti liam puat a, ka inpuang fel law law ang nge engmah ka la sawi duh rih lo ang tihah ka rilru a insual nasa nghal khawp mai.

"Kum eng zat velin nge in inthlauh hrim hrim?" ka thaw chhuak hak a, ka nu erawh a lo nui ri dat dat thung.

"Ka hre chiang chiah lo, u Chhûanga ai chuan a upa záwk ngei a......" ka ti zuih ral niah niah a, u Zorema kum zat ka lo la hre chiang miah lo tih ka hre chhuak chawpchilh nghal bawk.

"A pawina a awm hleinem, hmeichhia hi chu keini aia upa lam zel han awn phawt mai ila, kawngro a lo su ve reuh khawp mai" ti liam liamin amah bawk chuan

"Ka hmuh tirh aṭang tawh khan a ngaihven ru viau chein ka hre rèng a ni" a rawn tih zawm leh sap sap a, han zep chì ni tawh hek lo.

"Nu.......! Min záwt tawh lo la......?" ka tih ngaihna hre lo chuan ka ti ta ringawt a, nute bul mah ni se ka zak tlat a tin a ni!

"Chhûanga chuan a hre tawh ang a…?" nui hak hak chung hian a la rawn ti hram a nih chu!

"Engtin nge i hriat..? U Chhûangan in bulah a sawi tawh a ni maw…?” tlang rawta ka ti zui nghal barh barh chu mi chhâng mai lo hian a nuih kiah kiah a, ka nui ve ta ringawt bawk.

"Hetah lo ṭhu thla teh" tiin tapchhak lamah chuan min hui a, ka ṭhu thla ve nghal mai a, tomato pawh chu thukah ka rawh chhunzawm daih nghe nghe!

"In inngàihzáwnna a rei tawh em?" pangngai tak hian a rawn ti leh sap a, mipa pahnih awm loh lâi tak chu remchângah a là ni maiin ka hria.

"Thla 5 vel chu a ni ve tawh" chutiang chuan ka nu nen thil ka sawi dun ang tih réng ka suangtuah pha ngai lo; ka ngàihzâwng chanchin lek phei chu!

"Chuti elo…? I lo va zep rei ngar ngar tawh reuh ve, eng ang mi nge an nih hrim hrim a?" ka nu zawhna chuan u Zorema leh a kaihhnawih lam ka lo la hriat chian lohzia min hriat chhuahtîr nghal zut zut a ni ber.

"Amah tak hi chu officer a nia, a sawi dan chuan SCERT-ah science consultant hna a chelh mêk bawk" tia chawl deuh dat hian

"An chhûngkaw lam erawh ka hre thui vak lo, an inah pawh min la hruai lo hrim hrim" ka tih zawm leh melh melh a, min rawn en zawk nàin a mak ti hmêl chu ka hmu hman tho.

"A nih chû maw le....." a lo ti zàwi dat a, engmah min záwt zui tawh miah lo bawk.

Khua chuan hniam lam a pan zel a, ei rawng kan bâwl zo titih tawh a, ka pa leh u Chhûanga an rawn haw tawh tho bawk nen zanriah pawh kan ei har lo hle. 

Zan lampang chu eng ka ti hran lo va, Lâtei nen kan inbe deuh char char a, ani pawh an khaw lamah a haw dim diam tawh a, u Zorema nena kan inkâr ka nu'n a hriat tawh thute chu ka hrilh nghal melh melh a, ṭha a lo ti viau záwk leh ta nghal a, biak erawh kan inbe rei lutuk hran lo.

Dâr 10 pelh tawhah u Zoreman min rawn call hlawl a, Lâtei nen kan inbiak zawh hlima ka call kha a làk theih loh avangin a buai a nih ka ring a, ka call zui duh ta lo kha a ni a, tunah amah zâwkin min rawn call leh ang lawi a, mut dâwn tawh mah ni se ka là ta tho mai.

"Ka chhuak daih a, in ka thleng chiah" thawm ri deuh sur sur karah pawh a aw thum chhal chu hriat hran awl bîk tak a ni.

"A nih chû......i buai a nih ka ring a…...." ka tih laklawh lâi chuan

"Phone ri ka lo hre lo hrim hrim záwk maw le, ka ngàih tluk zet chein min ngâi nghal viau chu a ni lo maw?" a rawn ti su su a, ka nui ta hak hak!

"Ruah sûr a va'n ang em em?" ka ti sap chu

"A sûr alawm, kha lamah khan a sûr ve na nge?" tiin min záwt zui ve nghal zat a, kei pawh chuan

"Sûr rih lo, mahse khua chu a duai ang reng, zan rei lamah a sûr dâwn a ni ang" ka lo ti pangngai ve mai a, kan inbiak dan chu holam viau angin lang mah se ka awm a tinuam ru veng veng thung.

Zan a tlai lam tawh bawk nen kan inbe rei em em hran lo va, ka mut meuh chuan dâr 11 a lo hnai thuak tawh a, eng dang ngaihtuah tawh lovin ka muhil zui ta siai siai bawk. 

Ka mu tui ngàng a ni ang, zîngah chuan thawh ka hai chiang hle a, mahni in dik tak ngeia kan awm tawh vangte pawh a tih theih tho ang chu!

Aizâwla kan in luahah kha chuan tih tur nei tih inhre ran chungin hun kan hmang nitin ṭhin a ni hawt a, ei rawngbàwl a ngàih avanga thawh hmà chu thuhran ni se, hnathawh a ngâi lehzel bawk nen tukṭhuan chenin kan ei hmâ thei hle a, zanah ni se kan mu tlai ngai lo hrim hrim bawk a, thawh hmà tum rana mu nih chuan a thawh hmà loh theih loh a ni ber.

Kâr lovah krismas kâr chu kan chûangkâi der a, han hawi vel paw'n krismas rim hlir a nam tawh a, u Zorema nen pawh kan inbe zantin reng a, chhun lamah erawh phone call-in kan inbe ngai lo a tih theih thawthang a, whatsapp message-in kan inbe tam mah záwk ṭhin.

Veranda-ah ṭhu chhuakin u Chhûanga leh u Ruata te pahnih chhang dêng ri dup dup chu ka en reng a, an titina ah chuan ka inrawlh ve leh zauh zauh ṭhin a, u Ruata pawh a ṭawng duh leh luam luam tawh khawp mai.

U Zorema a rawn sawi chhuak hlawl nghe nghe a, chhang dêng atâna a ṭhat tur thute a sawi kâi ta zel a, chhàn lèt enah pawh ka en lo, ka lo nuih liampui vel mai mai ringawt!

Zan a rawn ni a, zan dang ang bawkin u Zorema nen pawh kan inbe leh malh malh tawh a, duh ber te nena han inbiak meuh chuan pâwn boruak vawt tih lam rèngin rilru a luah thei meuh lo zawng a ni e.

In chhûnga biak chì lah niin ka hre bawk si lo, khaw vawt hnuaia inbia e ti lo chuan vawt lah chu ka ti tehchiam lo leh ta nghal a, kawr lûm ka hak thuah nasat vangte pawh a ni maithei!

Nî thar lo chhuak chuan krismas nî chu a rawn her chhuahpui ta nge nge a, chawlhnî ngeia krismas a'n ni lehzel te chu a krismas bîk ngawih ngawih a, biak ina inkhawm pawh kan tam mup mup khawp mai.

Khaw dang aṭanga haw khawm kan awm nual bakah krismas hmang tur hrim hrima rawn zin an kat nuk a, inkhawm bàna zo chhang ban ṭha zet, hnaha fun ngei mai thingpui sen thlum tui tak nena kan han ei liam liam te chu ti-krismas zualtu ka ti lo thei lo.

A tukah chuan ruaiṭheh turin kan inbuatsaih sang sang hlawm a, ka pa leh u Chhûanga phei chu an fatu nghe nghe a, kan ṭheh fel vek hnuah an ṭheh ve chauh bawk.

Chutia ruai kan han ṭheh zo chu kan chhûngte tlawh kual turin kan tei chhuak zawm nghal zat a, kum tina kan tih dan ṭhin a ni a, kumin phei chu pa Lura boral kum a lo ni kher bawk nen kim lo riaua hriatna ka nei a, keini ai mah chuan a kalsan tâk a nupui fanaute tân a lunglènthlak duh ngawt ang ka ring.

Krismas boruak a zo va, mi pawh hrilh làwk miah lovin u Zorema a rawn zin chho thut a, chumi nî lah chu nùla kan kal daih nî tak a la ni zui a, min va han tibuai mai mai tak!

Kan awmna min zawh luih ngat ngat tâkah chuan ka hrilh ta nge nge a, rin láwk ang ngeiin rawn kal a tum nghal hmiah a, kan awmna ka hrilh lawk duh lohna chhan pawh kha lo kal a tum dâwn tih ka chian êm vang a ni.

Kan khaw bul lawkah hian lui dung sei zet mai hi a awm a, kan khaw tui làkna ber pawh a ni nghe nghe a, chumi lui sîrah chuan khaw chhûng mite'n nùl kan nei fer fur hlawm a, lei ni lova balu hmun deuh reuh a nih vang nge ni, thlai rah leh thlai hnahin an ngeih em em lehnghal a, thil chìn pawh a ṭo ṭha duh khawp mai.

Loh theih lohna avangin ka chhûngte bulah chuan u Zorema a lo kal thu ka sawi a, mak an tih ka rin tehreng nen mak ti hmêl pu pakhat an awm eih lo va, hre láwk sa te pawh an ang lek lek záwk!

U Zorema nen kan han inhmu chiah phei chu ka hau nghal tan tan a, chutiang teh thut chuan rawn zin tawh lo se ka duh a ni. Chu bakah a chhûngte'n engtin nge min ngaih ang tih nen lam ka ngaihtuah thleng lo thei lo va, thunun hneh lutuk anga min hriat ka duh lo a ni ber.

"A nawm phian hi a......" a ti leh zauh ṭhin a, ka nu anṭam thian te chu a pui ang lawp lawp leh ta nghal a, ka pa nen lah an titi tui phian bawk si, a awm dan chu ka hrethiam lo lek lek; amah a ang hlawl lo!

Haw lamah chuan ka nu leh pate pahnih a phur haw a, kan thlai hawn zawng zawng pawh a car-ah a phur vek a, kei erawh u Chhûngan min phur haw thung a, zawhna ka la záwt mumal hman lo bawk nen rilru a khingbai duh khawp mai. A lo zin ringawt chhan mawlh chu ka hre châk a, min tiphili hman tak zet tih hria se ka duh bawk.

In kan thleng a, u Chhûanga leh ka pate nen an inbiak avangin ka la be mumal hman lo tluang zel a, khua a hniam tial tial e ti lo chuan haw tum hmêl erawh a pu lo hrim hrim a, riah a tum êm chu ka ring chiah bawk si lo, tun ṭum zet zawng ka rilru sukthlek a tihbuai hnehzia chu pui tak a ni. Awm hle hle thei lovin min siam a, ngaihtuah loh tum paw'n a theih loh, ka ngaihtuah ru reng tho tho!

"Engtin nge awm i tum?" kan ṭhutna bula a rawn ṭhut thlak rual chuan ka lo ti diai, en pawh ka en chuang lo.

"Ka hre lo le" tih bakin min chhâng lo va, savun ṭhutthleng chu a hûng rem zui nghal zat bawk.

"Riak nghal law law rawh, zan haw te chu a tih chì nàng le....." ka nu chuan a lo ti zung zung a, u Zorema erawhin min rawn en daih thung.

"Riak mai la.....?" ka ti ve ta sap a, ka thu ngâichang ang hrima min en vung vung vung a ni pakhat!

"Riak rawh riak rawh u Zorem, in hnuaiah kan pahnihin kan mu dâwn a nia" u Chhûanga lam chu ka hawi zawk a, chutah ka pa lehzel paw'n

"I riak turah ka lo ngâi asin" a rawn ti dut tâkah chuan u Zorema tân pawh han riah loh ngawt chu a hawihhàwmthlak loh lehling tawh záwk ta ve ang!

"Zan haw te ka lo tum rilru deuh a, ka tibuai mai mai lo ang che u maw…?" u Zorema chuan a rilru dik tak a sawiin ka hria.

"A ho lutuk, engmah buaina tur a awm lo, khum pawh in hnuaiah a awm alawm, nula rim tur ṭha deuh pawh ka hria a nia" u Chhûanga zung zung chu eng nge a hriat pawh ka hre nek lo, chhun aṭang tawh ṭawng duh par par tak a ni.

"Chuti chu in khaw nula hmèlṭha ber min rimpui la a ṭha ang" u Zorema chhàn dan avang chuan ka ner sawk a, mahse kan bulah mi dang an awm ve reng tih hre chhuak thutin ka insiam ṭha leh nghal vat thung.

Zanriah kan ei lâi te chuan kan inbe mang lo va, mi dang nen an inbe deuh reng záwk a, ka pa zawhna chhânga a pa'n a boralsan tawh thu a rawn sawi chiah chu keimahah inthiam lohna a lo awm nghal a, an chhûngkaw chanchin ka lo la hriatsak tlêm lutuk mawlh mai chuan inthiam lohna min neihtîr a ni ber.

Chaw kan ei kham a, ei leh inna ka tifel nghal zung zung a, u Chhûanga chuan u Zorema chu nula rimpuiah a sâwm ta tak tak a, hre lo ang hmakin ka awm lui ngar ngar a, an inzui chhuak fel chiah tihah bathroom ka pan ding nghal chat a, keimahah chuan eng nge dik lo pawh ka hrethiam tawh bîk lo.

Bathroom aṭanga ka chhuah hnu chuan tapchhakah mei lûm ka ai ta mai mai a, ka nu leh pate erawhin TV an en thung a, an en duh zâwng tak Savadhan India an en bawk a, thawm pawh an nei mang lo, an en tui ngàng a ni ang!

Thuk chhûnga mei ling chu chaichehin ka hai chhuak a, chutia ka chet melh melh lâi tak chuan ka phone a rawn nghawr ri ral ral a, u Zorema a ni tih ka hmu zui nghal zat bawk.

"Aw, Hello....." tia phone call ka chhâng chu

"Lo chhuak la....." a lo ti sup a, ka hrethiam lawk lo nghe nghe!

"Pâwnah ka nghak che aw....." rawn ti lehin phone chu hmeh tawp a rual nghal daih a, ka inngaihtuah vang vang hnuah ka che chhuak ve ta chauh bawk.

Ka nute bulah chuan a hmingin dawra ka kal lawk dâwn thu ka sawi liam puat a, mi pawh an rawn bengkhawn lem hlei lo va, an thil en lai mawlh chuan an rilru a là pêng hle te pawh a ni ang.

Kawngka chu dim ang reng tak hian ka khar a, pâwn han thlen meuh chuan in chhûng boruak nen a lo inang lo vet vet hle a, u Zorema nen pawh kan inhmu har hran lo.

"Nula i rim dâwn emaw ka tia..…?" kan indin chilh titih hnu chuan ka ti chhuak hap a, ṭawng zâwng ringawt paw'n thaw te chu a khu rum rum thei!

"Nulate chu ka rim daih tawh che alawm, ka nula rimnaah chuan chaw te pawh ka ei hial tak asin" nui suk paha a rawn ti deuh duah kher chu ka lo ner nasa mai.

"Hmmm.......!" ti hmakin van lam chu ka hawi ta daih a, ka hnung lam aṭang chuan min rawn kuah zui nghal hlun bawk.

"Vawt i tih chuan car chhûngah kan awm thei reng a nia, nge ni a, hetia awm hi nuam i ti rih záwk?" ti thum dut dutin ka kawr lûm iptê zen lâi mêkah chuan a kut a rawn rawlh lut zawm zat a, khaw vawt hnuaia awm mah ni ila a kut chu lum nuam thar thar bík tak a ni.

"U Chhûanga kha nula i rimpui tak tak dâwn emaw ka lo ti hman a......" ka ti deuh hliai a, thu dang ka sawi daih danah chutia khaw vawt hnuaia awm dun chu ka duh a ni tih a hriatthiam nghal mai ka ring.

"Ka'n fiamthu hluai a nih kha.....!" tih leh ka bianga rawn fawh zeuh a rual a, vawi khat mai duh táwk lova a fawh nawn chhen tâkah chuan ka nui chhuak ta hak hak!

"Hriat chian lehzual che ka châk ngawt mai" ti dam diaiin ka khan chial a, van lam chu ka thlir dauh dauh pah reng bawk.

"I pa a boral tawh tih pawh ka lo la hre miah lo a......" ka tih zawm leh dat a, ka aw chu a ring lo khawp mai.

"I hriatah ka sawi ngai lo tlat alawm" a rawn tih chuan

"Chu pawh ni se, in chhûngkaw chanchin a ṭhen a zâr hi chu hre tur ka ni vein ka hria, i ti ve lo em ni? Kan inkâr zawng zawng ngaihtuah phei hi chuan!" ka lo ti zui nghal nang nang a, ka inthiam lo ru tlat a tin a ni!

"I la hre dâwn chauh alawm....." a rawn ti sam leh mai a, kan rilru a inang lo lutuk chu ka sawi zui zel duh ta bîk lo.

"Rimtui chîk chêk nu...." a rawn ti leh daih a, ka biangte chu fawp ni chiah si lo hian a hnim deuh vang vang a, ka rilru hrethiamin min tihhlim a tum te pawh a ang mah záwk!

"Ti rawh le......car-ah lut ang, AC hnuaiah kan awm mai mai záwk dâwn a nia" amah bawk chuan a ti dam leh dap dap a, car awmna lam panin kan kal phei zui nghal chu a ni mai.

Car chhûngah kan ṭhut luh hnu chuan AC a on nghal zung zung a, car chu tinungin zawimuang hian a tlan chhuak zui riai riai a, kan kalna tur pawh ka záwt chuang lo.

Inbe melh melh pahin khaw chhûng chu kan fang kual a ni deuh ber a, zawhna min zawh apiang chu ṭha takin ka chhâng ve zel a, rei pawh ni lovah chuan ka ṭawng duh barh barh leh ta viau bawk.

End of chapter 6