𝐙𝐎𝐑𝐄𝐌𝐏𝐔𝐈𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟗)

ZOREMPUIA
(Mizo Romantic Novel)

By

Havali Adam

Chapter 9

"I nu Sangtei te chu an thleng tluang ang chu màw?" ka nu aw ka hriat rual chuan ka ngaihtuahna ata ka harh chhuak nghal zawk a, chutih lâi vek chuan khawpuia a rawn ri zui zat bawk.

"Thleng tluang turah ngâi ang, mut in tum tawh em ni?" tia awká pangngai taka zawhna ka han zàwt lèt chu

"Mut loh a hun tawh hleinem, nang pawh mu tawh rawh" a rawn ti dat dat a, ka phone ka hmet èng nghal a, ka nu sawi ang ngeiin zan lâi a lo pèl titih der tawh a nih chu!

"Ruah chu a sûr dâwn a va ang ve......" ka pa zunram thiar zo bathroom aṭanga lo chhuak chuan a rawn ti sup a, kei pawh chu ka ding thuai a, current a rawn awm lo nghal zat bawk.

"Sûr mah se a pawi lo, khua a lúm miah miah êm mai, mut te pawh a titui deuh ang" ti diai diaiin ka nu chuan bathroom lam a pan ve nghal a, kei erawhin tukverh ka lo khar ṭha zung zung thung.

Bathroom aṭanga ka nu a rawn chhuah hnu chuan ka lut ve nghal a, zunram ka'n thiar zo chu nu Sangtei hnen aṭangin phone call ka dawng nawlh a, an thlen tawh thu min rawn hrilh a tum a nih ngei ka ring. 

Phone call ka han là chu ka rin rilruk ang ngeiin an thlen tawh thu leh an thlen tluan thu a rawn sawi liam liam a, rei pawh inbe lovin ka titawp zui thuai nghe nghe!

Kâr lovah ruah mal a rawn far ri ta kauh kauh a, kan in chung rangva a ni kher bawk nen ruah far thawm chu a hriatin a chiang fuk fuk hle a, rei lo tê hnuah phei chuan a rawn súr ta buan buan a, khaw làm lâi mah ni se boruak a inthlak danglam miau avangin puan chu ka sin ṭha sat sat a, ka nu sawi dan takah ruah sûr chuan mut a titui viau dâwnin ka hria.

Ka mit chhînga muthilh ka'n tum chiah chu ka mitthlâah u Zorema a rawn lang nghal a, chutah Peki a rawn lang zui zat ve leh ta nghal a, ka meng leh chiang kher mai. 

Mu saisîr pahin ka ngaihtuah rauh rauh a, eng vanga hmun thuhmuna awm nge an nih tih mawlh mai chu ka hre châk a ni.

Tin, thil chiang em em chu u Zorema laka Peki rilru puthmang a chiang ta viauin ka hria. Ka hmuh tirh phat aṭang khan a nêl har har nghal hle kha a ni a, thikna te chu nei ru tho mah ila khatih hunlâi ka thik dan leh tun hnua ka thik dan erawh a inang tawh lo hle thung.

A chhan chu tunah chuan u Zorema nen inzawmna kan nei tawh tlat a tin a ni!

Ka ngaihtuahna a kal thui tial tial a, ka rilruah rinhlelhna a piang lo thei lo va, u Zorema ni se min duh ve viauin ka hre bawk si, ka thluak chu a mumal thei lo a ni ber. 

Thil dang daih ngaihtuah tum ve teh mah ila ka rilruah u Zorema nena kan inkâr mai bakah Peki ngawr ngawr a awm tlat lawi a, mut pawh ka muthilh lawk theih loh phah nghe nghe!

Boruak vawt deuh suk avang chuan ka harh hlawl a, ka han meng chu zîng khua a lo vâr diam tawh a, mahse ruah a la sùr reng avangin nî éng hmuh tur a awm lo hrim hrim a, hmun tin kil tin chu chhûmin zîngin a bawh paw chûk a, ka mut dan siam rem sat satin muthilh ka tum leh ta daih bawk.

Chutia ka mu ṭhat leh hnua ka han harh chu an lo tho kim vek tawh a, choka lama ka nu leh pate titi thawm chuan min tiharh a ni ber. 

Khua erawh ka harh hmàsak záwk ang chiah khan a lo la cheng hle a, nizan aṭang khan ruah chuan sûr awl lâi a nei lo hrim hrim a nih hmèl!

Tapchhakah meilûm aiin kan ṭhu ṭhap a, ka nu'n ei rawng a báwl pah reng bawk a, kei erawh ka ṭhut ngaiin ka ṭhu deuh tlawng a, ka che chang peih rih lo a ni ber. 

Ka pa leh u Chhûanga thil sawi kârah ka nu chu a lo inrawlh ve leh zauh ṭhin a, chutia Aizawl lama u Chhûanga chhuk hun tur leh chhuk dan tur an rèl lâi chuan ka rilruah u Zorema bawk a rawn lang zui leh ta nghal zat mai.

Ni e, ka lung a dam thei chiah lo chu a ni. Nizan te khan engati nge min rawn call back miah loh? Ka call a ni tih a phone-ah a lang vek àwm si a, eng vanga mi hrang hlak ang maia awm tlat nge a nih? Nge ni a, ani nena kan inkâr, hunin a liampui tawh zawng zawng kha a der mai zâwk em ni a lo nih?

Ni lo, a ni lo ang, chutiang èm chu a nih ka ring lo, ka ring phal lo hrim hrim bawk. A chhan chu min ngaina ve tih ka hria alawm, ka thinlung hian a hria a ni. 

Ka rilru kal dik lo laklawhin min hruai pêng thui nghal vut vut lutuk te pawh a ni mahnà, eng pawh ni se tun atân chuan rilru pangngai tak ka put a ngâi záwk a ni.

Ruah sûr chuan bàn zâi rèng a rèl hlei thei meuh lo va, mahse khaw lùm lutuk aiin a nuam daih záwk thung. 

Ka nu paw'n kan thlai chî tuh leh thlak te'n ruah tui an han dawng mawlh mawlh tur chu ṭha a ti viau a, tukṭhuan ei lâi chenin a sawi deuh reng a, kei tak paw'n ruah a sûr chu pawi ka ti hran miah lo.

Khuain a zir loh miau avangin inah kan tawm deuh ṭhap a, ruah a sûr buan buan tawh lo nà chu a tla cher cher thung a, khawlâi diak táwk vel chiahin ruah a tla reng ti ila a dik ber ang.

Tihtur em em a awm lo bawk nen lehkhabu hlui, kan naupan lâia kan zir ṭhin ho, ka nu'n a lo la dah ṭhap ho chu ka en lèt vel ta mai mai a, lunglêng mi nih phei chuan lung pawh a lêng vawng vawng duh leh teh e!

Ka phone chu a rawn nghawr dat dat a, u Zorema hming ka hmuh rual chuan ka lehkhabu keu lâi ka tawp chat a, ka ngaihtuahna a dang nghal zar bawk. Phone call chu ka là ang nge là lo ang tihah ka rilru a insual ru rauh rauh a, mahse rei erawh a ni hran lo.

"Hello....." ka ti deuh vâh a, ka aw chu a zawi lo hle bawk.

"Eng nge i tih a?" awkâ dam hniam thlup hian a rawn ti a, kei pawh chuan

"Ka awm mai mai, nang záwk?" ka lo ti ve leh nghal zat a, ruah a sur ri reng bawk nen ka beng chu ka chhî kar a ni ber.

"Office tura ka chhuak kha leiminin kawng a block a, hei, ka haw leh ta ringawt a nih hi, in ka thleng chiah....." pangngai tak hian a rawn ti thum dut dut a, ka ngaihtuah nghal kher mai.

"Fimkhur rawh, chhûah chhuahna chí a ni miah lo a nia, inah khan tawm char char mai rawh" ka ti zo chiah chu

"Min ngâi lo si, keiin ka ngáih tehreng che nen" a rawn ti daih a, ka nui ri hak nghe nghe!

"Min ngáih pawh ka ring chiah lo" ka ti deuh hmak a, ka fiamthu tak nà chu nizan lama Peki min chhàn dan kha ka hre chhuak záwk a, ka rilruah zawhna a rawn piang nghal zat bawk.

"Ngâi tehreng e le, i reh ri a ring khawp asin, nizan khan ka missed call i hmu miah lo em ni?" a zawhna chu engtia han chhán tur nge pawh ka hre mai lo.

"Hmu e, ka rawn call back che kha......?" ka ti deuh nghat a, chu thu ka sawi zawh rual rual chuan

"Min call back maw!?" a rawn ti sup a, a awah chuan ka call back tih hre miah lo te pawh a ang tak tak alawm le!

"Call back e, mahse Peki khan min lo chhâng a, i buai bawk si nen....." ka ti melh melh lâi chuan

"Chutiang engmah ka hre lo" a rawn ti thum bul a, chutah amah bawk chuan

"Min rawn call nawn leh mai lo a nih chû....?" a rawn tih zawm leh zat a, min dem deuh ni maiin ka hria.

"Peki khan min be hman lo khawpa i buai thu a sawi bawk si a, ka rawn be buai duh ta lo che alawm" ka ṭawng zo chiah chu min chhán dan tur hriat châknain ka khar a ni ber.

"A fiamthu a nih dâwn chu.....!" ti supin a nui thum dut a, ka ngaihdan erawh a ni vak lo.

"A fiamthu pawhin ka lo hre chiah lo asin" insum deuh tak chung hian ka ti sap a, dik tak chuan ṭawng deuh bawng bawng ka chák, mahse a hun rih lo tlat!

"I lo ngâi thutak lutuk a ni ang, ani thusawite chu thutaka khukpui chíah ngâi duh suh" a rawn ti dap dap a, mahse ka rilru erawh a nuam thei chuang der lo.

"Nia....." ka ti thawp sep a, ka ngâwi zui ta vang vang bawk.

"Ka ngâi hle mai che Helen, ka bulah awm la, kuah vawng vawng che ka châk ngawt mai" ril ruiha a rawn tih leh chuan maimitchhîng vang vangin a hmêl ka mitthlà a, kei tak pawh hian ka ngâi a ni.

"Kan dam ṭhat te chuan kan la inhmu dâwn chauh alawm....." ka ti ve ta raih a, hmun khatah awm dun ngat ila zawng a âwmah ka bei hle hle leh tawh ngei ang.

"Ni e, kan la inhmu dâwn chauh, engtik nge lo chhuk i tum hrim hrim? Nge ni a, ka rawn rim zak zak zâwk dâwn che em ni ang?" a rawn tih chuan

"I peih leh peih loh a ni mai" ka lo ti thàn a, ka khi zui var var bawk.

"Ka fiamthu hleinem Helen, lâng paw'n ka rawn rim zak zak peih reng che a nia......" a ṭawngkam chhuak aṭang chuan dáwt a sawi lo tih ka hre chiang khawp mai.

"Chutiang tak chuan em ni min lo ngàih a?" ti sapin khumah ka mu nui var var a, ka hmangaih a ni tih hre phei se chu engtin tak awm ang màw!

"Ni chiang e" ti hniam sup hian

"In khaw tlangvalhovin an rim huai huai che em?" a rawn tih zawm zat a, kei pawh chuan

"A teuh lo, keini ang te chu túma'n min rim duh tak tak lo" ka ti ve leh hliai a, ka thil sawi dan chu a lawm zâwng tak ni tur a ni.

"A ṭhat nasat chu!" ti deuh nghutin a nui zui huk a, kan awmna inkâr hla viau mah se kan rilru erawh a va inhnaih si èm!

Eng emaw chen chu eng eng emaw sawi dunin kan inbe char char a, kei tak pawh ka rilruah Peki lam rèng a lang tawh lo va, ani nen kan inbiak lâia Peki lo la thik tlat chu ka tum tawh lo hrim hrim bawk.

Kan inbiak zawh meuh chuan hun a lo kal duai tawh a, khuma mu sa ka ni bawk nen ka muhil zui ta daih a, mangramah nen lam min chen chilh zel a, mang nuam tak mangin dârkãr eng emaw chen chu ka muhil a, chawhnu lamah ka harh leh chauh a, hun a kal duai tawh nàin ruah erawh a lo la sûr hàn chuang reng reng lo.

Chuta chhapah current a la awm lo tluang zel leh ta nghal a, ka phone paw'n rei a daih a rinawm ta hauh lo mai. Ei rawngbâwlin ka che ta zar zar a, khua a hniam chak bawk nen zanriah lawh kan ei har lo hle.

Zanah chuan rin ang ngeiin kan phone battery te'n rei an tlin ta hlawm lo va, bati éng hnuaiah awmin ka nu ke ka khawihsak a, kan bulah chuan ka pa pawh a awm ve reng a, u Chhûanga erawh Ruata te inah a lêng thung.

Ka nu chuan u Zorema chanchin a sawi ri leh zauh ṭhin a, ka pa tak paw'n vawi hnih khat chu a sawi ve nghe nghe a, kan inngâizâwng tih an hriat vek tawh avangin engkim a ruh langin an sawi dap dap a, fimkhur turin min fuih pah reng nghe nghe bawk.

A nih pawh a ni réng a, fimkhur tluk hi chu a awm lo a ni. Ka nu sawi uar ber chu mipat hmeichhiatna kawnga kan fimkhur a ngaihzia thu hla lam hlir a hi a, hun lo la awm zel turah pawh thianghlim taka inngâizâwng turin min chah awl lo va, a fanu ka nih vangte pawh a ni ang, a sawi tui miah miah khawp mai.

Tin, inngàihzàwnna hi chu lung tê, thliin a chhèm kual theih ang maia awmhmun nghet nei lo leh sawhsawn awlsam a ni a, duhthlanna nena hringnun kan hman hun lâi leh engtik hun pawha a tu emaw záwk záwk kal bo thei reng dinhmuna kan din lâi ni maiin ka hria; chu chu ka hriatthiam dan ber a ni!

Zan hun a ral a, ni thar a rawn inher chhuak a, khua pawh a ṭha ve ta nge nge e! Ni khat leh zan khat lâi mai ruah a han sùr tâkah chuan engkim chu a fai sawt a tih theih a, rama kan han kal te chu thlai ṭo leh ṭo hre châk reng rengin ka awm a, rin ang chiahin anṭam te, maian te chu an lo ṭo sep sep a, vaimim leh thil dangte pawh an bang chuang lo.

Ina kan haw hnu chuan ka phone charge lâi chu ka khawih nghal a, kan feh dâwn khan current a rawn awm a, ka charge ta thuai kha a ni a, chutia haw vela ka'n khawih nghal chhan ber chu u Zoreman min rawn call leh call loh ka hriat duh vang a ni ti ila a sual lo khawp ang.

Amaherawhchu, a hnen aṭangin phone call ka lo dawng lo hrim hrim chu niin, mahse ka number hriat ngài loh aṭangin whatsapp message ka dawng thung a, message a nih rualin video a ni záwk mah a, thil pawimawh a nih ringa ka download hnu chuan ka en nghal a, mahse chu ka thil hmuh chuan min barakhaih chiang kher mai.

Video-ah chuan u Zorema leh Peki deuh ngar ngar an lang a, an vêng Kristian Ṭhalâi Pâwlin Kutpui an nei mek tih u Zorema khan min hrilh tawh ngei a, Kutpui puala Article inziahsiakah a tel dâwn thute pawh min hrilh kha a ni a, chumi Kutpui an hman mêk boruak vel chu a nih ka ring nghal bur a, mahse engati nge Peki ka hmuh ve si? Engati nge u Zorema bulah a awm ve ngawtna chhan ni ta ang?

Vêng khat an ni ti dâwn ila u Zoreman a sawi ngài bawk si lo, ni lo, ka zàwt ngâi lo hrim hrim záwk a ni. 

Video chu lungdam zàn lovin ka en tluan parh a, Peki chuan a kuah thuak thuak reng a, u Zorema pawh a bang chuang lo, ka tân chuan thik loh ngawt zawng thil har tak a ni.

"I inbual nghal dâwn em Bawihi?" ka nu lam chu ka hawi zawk a, ṭawngkâa chhâng lovin ka bu nghal nghauh nghauh bawk.

Inbual tura ka che vel reng rengte chu ka zawi deuh hniang a, ka rilruah u Zorema leh Peki tih chauh loh chu an awm hlei thei lo va, dik tak chuan u Zorema laka rinhlelhna put loh chu a har thlawt a ni.

Min duha min ngainat ve zia hre chiangtu ber ni mah ila Peki nena an awm dun danah erawh rinhlelh loh theih lovin a awm tlat bawk si nen ka thinlungah thikna namên loh a rawn piang leh ta nge nge a, ka inbual chhûng zawng paw'n ka ngaihtuah ngut ngut reng a, inbual zawh veleh biak ka tum ta bur bawk.

Ka rilrua thil dang a awm vang nge ni, inbual pawh ka inbual zo har lo hle a, thawmhnaw ka inbel zung zung a, ka nu thingpui min lo siam chu in leh té tê phawtin u Zorema chu ka call zui nghal a, office bàn la hun chiah lo mah se ka rilru berin min tur ut ut tlat tawh bawk si a, ka call lo thei lo a ni.

"Hello...." a aw ka hre chiah chu han sawi chhuah mai dan tur ka hre lo leh lawi a, chutah amah bawk chuan

"Hello.....Helen.....?" a rawn ti leh a, thawk ka là hmâsa tê tê a, a awkâ dam ruih han hriat tâkah chuan ka sawi tur chu sawi leh loh mai ka duh rum rum hial bawk.

"Eng lo.....thil sawi duh ka nei a....." ka ti sep a, a aw ka hriat hnua ka rilru a inlam lèt hmâ zawt zawt lutuk chu ka awih lo lek lek záwk a ni.

"Immm.....sawi la.....?" a rawn ti ve leh mai a, kei erawhin sawi nghal ka tum chuang der lo.

"Helen......?" amah bawkin a rawn tih leh chuan

"A ngâi leh lo mai" tiin phone chu ka hmet tawp ta daih a, ka sawi a nih chuan kan inkâr tikhitu a ni ang tih ka hlau èm a tin a ni!

Amaherawhchu, ngàwih reng ringawt zawng thil dik a ni hauh si lo. Peki nena an video ka dawn thute chu hrilh ta ila engtin nge a ngàih ang? Anite chu mipa a ni a, a lo ngâi ho leh viau lo maw?

Ni e, mipa rilru leh hmeichhe rilru hi chu a inang thei lo alawm, hetiang em em hian hmeichhe dang ka thik ang tih pawh ka ring pha ngai lo hrim hrim bawk.

Phone call rawn lut chu ka en deuh vang vang a, là ta ila ka hrilh ang nge hrilh lo ang tihah ka rilru a insual buai nuaih nuaih a, ka hrilh a nih chuan thikthu chhe lutukah min ngàih ka hlau bawk si, hrilh loh lahin ka rilru a nuam thei tak tak leh chuang bawk si lo, ka awm dan chu a khingbai tak zet a ni.

"Immm......hello......." ka ti zo chiah chu

"Engati nge i dah ngawt? I thil min hrilh tum pawh min la hrilh hleinem, han sawi teh le, ka lo ngâithla ang" a rawn ti dap dap a, kei erawh ka lo thaw chhuak hap ringawt!

"Helen......?" ka ngàwih deuh vang vang lâia a rawn tih leh chuan

"Eng lo.....video pakhat ka dawng a, chutah chuan nang pawh i lang ve a, mahse a ho lutuk, ni leh lo, ka sawi awmzia chu a ho chiah lo, ka hre lo, sawi chhuah dan tur ber pawh ka hre lo" ka ti bah ta nawk nawk a, ka tum pawh ni miah lova ka ṭawng bahlah nasa lutuk a lo nui thum dut nghe nghe!

"Eng video nge ni reng reng a? Khawi maw, min lo thawn ve teh, ka lo en ve ang e" nuihza aw zeta a rawn tih chuan

"Nia, a pawi lo, ka thawn záwk ang che, ka sawi thiam lo êm mai" ka lo ti chhuak leh halh a, video pawh chu ka thawn zui nghal thuai a, dik tak chuan Peki ka thik thu han hrilh tlawng chu ka zuam lo a ni.

"Kutpui kan hmannaa mi a nih hî, engtin nge i neih daih theih?" a rawn ti deuh thluam a, ka lo rin rilruk kha a dik ta ngei e!

"Number lawng tawp aṭangin ka dawng alawm, tu min lo thawn nge ka hre bîk lo" ka aw chu a pangngai sawt khawp mai.

"Peki hi em ni i buaina chu ni ta ber?" nghet dam thlup hian a rawn ti sup a, sawi loh theih ni tawh hek lo.

"Immm......" tih chiahin ka chháng a, mahse ka rilru tur àwm ang chu a hriatthiam nghal vek tho ka ring.

"I lo ngâi thutak leh lutuk a ni lo maw?" ngaihsam tih hriat taka a rawn tih chuan ka ngaihdan erawh a ni ve hauh lo.

"A nêl che tih ka hria alawm, mipa i nia, i hmu thiam lo mai mai a nih kha!" ka ti ta charh charh a, ka thin chu a su deuh dup dup bawk.

"Nêl ve ang chû.....kei paw'n ka nêl alawm, ani nen te chuan ṭhian alawm kan nih, engah mah ngâi duh suh" a rawn ti sam leh maithei chu mak ka ti ru vawng vawng khawp mai.

"Nia.....ka hre lo le, ka rin thu ka lo kal thuipui lutuk te pawh a ni ang" ka ti hniam deuh raih a, han sawi leh vak tur pawh ka hre tawh lo.

"Peki te chu vêng khata awm kan nia, KṬP ah kan inhmangho bawk a, chu bak thil dang a awm lo Helen, ngaihngam deuhin awm rawh" a rawn ti leh dut dut a, vêng khata awm an nih thu chuan min ṭhawng deuh dawt a, ka thik a ni tih ka hriattîr kher kher chu ka inchhir hnuhnawh a ni ber.

"Aw le, office in bâng tawh dâwn em?" ka ti ta daih a, pangngai thei ang berin ka aw chu ka thunun hram hram bawk.

"Bâng dâwn hnai chu a ni mai, vawiin lam eng nge i tih? Ramah bawk em ni hun i hman leh?" min biak dan aṭang chuan kan thil sawi zawh chiah khan a rilru a luah tawh lo tih a hriat hle a ni.

"Immm.....ni leh e, ka dah mai dâwn asin, zanah kan inbe ṭha leh záwk dâwn em ni ang?" ka tih chuan 'aw' a lo pawh ve mai a, kan inbiakna pawh chu kan titawp zui nghal chu a ni mai.

Ka inngaihtuah zui chet chet a, u Zorema nena kan inngáihzáwn hnu aṭang hian keimahah puitlin ruk sawt riauna a awm tlatin ka hre pek a, ka ngaihtuah chian pôh leh ka danglam sawtzia ka hre chiang tulh tulh a, ka chhûngte tân phei chuan ngaihzawng ka neih hnua ka ṭawngkam, chet dan leh ka awm dan hrim hrim a danglam sawtzia hmuh hmaih a har viau ang ka ring.

Chumi a nih avangte pawh chu a ni ang, hmeichhe dang laka u Zorema ka hauh tlat nì! A bialnu, a ngaihzawng ka nih piah lamah chanvo nei ve tlata inhriatna ka nei a, ka bialpa a nih angin engkim hre kilkleh thei lo mah ila a ṭhen a zâr tal chu ka hriat ve a ṭulna chin a awm a, hmeichhe dang ka thik pawh chu ka tih tur dik tak niin ka hria.

Chutiang bawk chuan ani pawh ka lakah a intatu em em a, kan inbiak apiangin tlangval rimtu ka neih leh neih loh min zàwt ziah a, mahse kâr hla aṭang chuan a mi ngaihsakna ka dawng thei tak tak chuang lo, a hming chauh a ni; mahse ṭawngkâ tal pawha a mi ngaihsakna leh ngaihtuahna ka dawng chu a ngaihṭhatthlak hrim hrim tho!

"Eng tak chu ngaihtuah ang che maw?" ka nu aw chuan min tiharh zawk a, thil ka ngaihtuah kual nasat lutukna lamah ka din ngaiin ka lo la ding reng tih ka hre chhuak nghal zat bawk.

"Engmah ka ngaihtuah lo" chu thu chu ka sawi tum pawh a ni chiah lo, ka lei ka vêng hman lo a ni mah záwk!

"Engmah ngaihtuah lovin kha chen chen i dinna ngaiah i ding ngâwi reng lo ang e, Aizawl lam i ngâi tawh a ni chiang mai?" ti siam siamin ka nu chu a nui zui pat pat a, ka nui chhuak ve ta hak hak!

"Ngâi ve tawh tho e" tih leh kal sawn ka rual a, ka nu bulah hi chuan ngaihzâwng lam a ni emaw, ni lo emaw, engkim ka thlen ngam a, amah pawh hian min lo dawngsawng ṭha viau ṭhin.

Khua a hniam tial tial a, ruah a sûr leh rih tawh lo bawk nen nî pawh a tla har ang reng reng hle a, dâr 6 dáwnah khua a thim fel ve chiah a, boruak uap lúm deuh churh chuan kawr pawh min tiha ṭha peih mang hlawm lo a ni ber e.

Ka pa leh u Chhûanga phei chu kekawr bul an ha a, an duh táwk der a, mipa nih ka châk ṭhinna ber pawh an awlsam ṭhin bîk lutuk hi a ni. 

Zahawmnate hi an va'n hlawhchhuak awlsam bîk ṭhin tak, keini hmeichhiate tân chuan a beiha beih tak meuh a ngâi ṭhin a, mahse mipate erawh an ni ve lo, an mipa nihna hian zahawmna a chhawm nghal ni maiin ka hria.

Zanah chuan ka nu leh pate nen TV kan en ṭhap a, u Chhûanga erawh a lêng chhuak thung a, chutia TV kan en lâi chuan number lawng tawp aṭang bawkin message ka dawng leh nawlh a, ka'n en chiang chu tlaia mi bawk kha a ni tih ka hre nghal a, tu dang ni lovin Peki ngei a nih rinna ka nei lian hle bawk.

"Zanin chu a rawn be hman lo ang che, thil kan buaipui dun dâwn a, nang paw'n rawn biak tum lo law law la a ṭha ang" tih message ka dawn chu

"Min hai a ni lo maw âw?" tiin ka chhâng lèt a, ka hre lo der a ni ber e.

"Hai teh nàng, nang paw'n min hre chiang lutuk, min la hre chiang dâwn chauh bawk" tih chu a rawn thawn ve lehnghal zat a, min hriat chian danah Peki a ni tih chu a chiang ta khawp mai.

"Ka sawi tawh kha, rawn biak tum lo ang che, kan group kan hnatlâng dâwn a, a theih lâi hi chuan ka bulah hun hmang tam ve rawh se, lo chhuk har deuh mah la a pawi miah lo" tih ka han dawng leh chiah chu ka chhiar nawn tluk tluk a, zak lo ti salh salh tak ka ni!

Engtin mah ka chhâng zui tawh lo va, mahse ka rilru erawh a kal thui hle thung. A sawi âi reng rengah tiin u Zorema chu ka call ta ngat a, Pekin min rawn hnehsawh vel lutuk chu tlawmah ka là tlat a tin a ni!

"Ka buai lawk a, nakinah ka rawn be ṭha ang che" ka phone call a làk ruala u Zorema thu rawn sawi chuan ka thinlung a chhun thip nghal zar a, phone chu ka hmet tawp chiang hle bawk.

Ka rilru chu Peki message rawn thawn zawng zawng kha a dik tih rinnain a khat vawn vawn a, TV en lam rèng ka rilruah a awm thei tawh lo va, Peki sawi làwk ang chiaha u Zoreman a buai thu min rawn hrilh ta chiah chu ka thluak a nû bulh bulh a ni ber.

Rei lovah message ka dawng lehnghal zat a, chu erawh Peki ni lovin u Zorema hnen aṭangin a ni thung a, min rawn biak tur thu leh amah lo nghak lawk tura min tih thu hi a rawn thawn a, ka chhâng lèt lo hrim hrim a, chhàn châkna pawh ka nei chuang lo, ka rilru  lam a dam loh vang a ni pakhat!

Chutia amah u Zorema berin min rawn biak tur thu a sawi miau tâkah chuan ka lo nghak ta ngawt ngawt a, minute 10 pawh a rei duh tehreng nen dârkâr hnih dâwn a han reh ta vang vang chu awm a nuam lo rawih rawih thei a, call ngawt dâwn ila a buai ka la ring bawk si, ka awm dan chu a khaihlak ti ila a sual lo ber ang.

Dârkâr a han liam leh meuh chuan ka nu leh pate paw'n mut zâi an rêl titih der a, chutah current a la thim zui leh ta nghal a, zan tir lama boruak lúm uap churh si kha zanlâi a han nih chhoh meuh chuan boruak a inthlak danglam hlawk a, ruah a sûr hnai tih chu hai theih pawh va ni suh!

"I la mu dâwn na nge?" u Chhûanga lêng lo haw chuan a rawn ti dut a, za lo zetin ka lo nuih sak ringawt!

Ka ṭhutna ngaiah ka ṭhu ngâwi reng a, u Zorema chu ka la nghak fan a, min rawn biak tur thu a sawi miau a, ka nghak lo thei lo ve pakhat bawk a tin a ni! 

Dâr zat chu ka en leh zeuh ṭhin a, dâr 12 rik nân minute 15 bak a awm tawh lo va, chuti chen chen min be hman lo khawpa a buai chu ka thil hriatthiam loh lam tak a ni.

Ka phone rawn nghawr dat dat chu ka en thuai a, tu dang ni lovin u Zorema ngei a ni a, a hming ka hmuh rual rual chuan ka ṭah a chhuak ru et et a, mahse ka ṭah mai loh nân ka insum ṭang ṭang thung.

"Hello....." ka ti thawp raih a, ka aw chu a ṭial deuh ruai bawk.

"I lo la meng em ni? I mut tawh ka ring asin?" a thu rawn sawi hmâsak ber te hlei hlei chuan ka ṭah a tichhuak zual!

"Min lo nghak rawh, nakinah ka lo bia ang che' kha i ti si a, ka lo nghah loh che chuan a dik nàng" pangngai taka ṭawng tum teh mah ila ka thei lo a chha chu a ni e!

"Min hrethiam teh Helen, a zia lo hle mai, engtin nge......" a ti mual mual lâi chuan

"A nih, ka nghak chhuak ta bawk che a, ka dah mai aw.....?" tih leh kan inbiakna chu hmeh tawp ka rual a, rei pawh ni lovah phone call a rawn lut zui nghal zat bawk.

Phone call chu ka ring raltîr ṭhak a, a rawn tinawn zel a, mahse ka là duh chuang der lo. Ka thinlung a nâ a, ka nâtna tibelhchhah turin a aw ringawt pawh a táwk lutuk a, chuvang chuan a aw chauh pawh ka hre duh rih lo a ni.

"Ka tihpalh, ka tihpalh tak zet" tih message chu vawi ruk dâwn min call zawn zat zat hnuah ka dawng a, chu a message ringawt pawh chuan ka ṭah a tichhuak zual ngawih ngawih!

Ka lungngaihna leh ka thinlung nâtna min hriatpui ni àwm hrim hian ruah lah chu a rawn sûr buan buan zui leh ta nghal a, khuma bawk mu ranin ka mittui chu ka biangah a luang thla pap pap ṭhin a, ri hawm hawma ṭah aiin ri miah lova mittui sén chu a nepna a awm chuang hauh lo tih ka hre chiang fek fawk hle bawk.

Nàtna hian mihringte hi min thlak danglam hnehsawh thei hle a, kan hmangaih leh rin em em te'n nâ taka min siam ngat phei chuan ngaiawh leh ka harsat tlat tawh ṭhin.

Kan thil ngaihtuah nen lam a tam sawt a, eng dang vang a ni lo, dai sual nawn leh kan hlauh vang a ni.

Kan nàtna tur hmun bawka kir leh ai chuan pumpelh dan hram kan zawng a, an lak aṭanga kan awm bo avangin hlim ta viau turah kan inngâi hial ṭhin a, mahse a lo ni hauh si lo.

Ka mu ṭha lutuk lo bawk nen zîngkâr boruak pawh ka hip hmâ hle a, ka tho hmâsa ber nghe nghe a, ka meichhêm thawmah ka nu a rawn harh a, ka pa pawh rei lovah a rawn tho chhuak thuai a, ka tho hmâ ve hrim hrim emaw tiin ngàihṭhat lohna pawh an nei chuang lo va, ka awm dana tih lan kher pawh ka tum hek lo.

Nî a han chhuah meuh tâkah chuan ei rawng ka bâwl fel thuak tawh a tih theih a, u Chhûangan tui chàwiah min awl hnehsawh bawk nen khum siam leh ei rawngbáwl bak tih ka nei lo a ni ber a, rilruah u Zorema dah ka tum loh tehreng nen ka thei der lo lehnghal!

Nizana kan boruak kha ka ngaihtuah lèt a, dik tak chuan a thiam loh alawm, nghak tur khan min ti a, ka lo be ṭha ang che a ti a, mahse nghah chhuah a harsa hle a nih kha! 

Chu mai a ni lo, Peki thusawi ang chiah chiaha thil a thleng tak tak kha ka rilru tinâtu pakhat a ni ka ti lo thei lo.

Gas bulah dingin hmarchapui, phai lam thar tih hriat tak chu ka rawh mial mial a, chutih lâi vek chuan glass tile-a ka phone dah chu a rawn ri kalh a, message a lo thleng tih hrilh hranpa ka ngâi lo va, u Zorema message a nih ringin ka bih thuai nghe nghe a, mahse amah a lo ni awzâwng lo, number lawng tawp mah ni se Peki ngei a ni tih ka chiang tawh lutuk tlat!

"Zîng thawh nuam le, he lam chu lo ngaihtuah suh, ṭha deuhin ka lo enkawl ang" message chu ka chhiar ṭha leh ngat a, mi a rawn zah lo salh salh lutuk chuan ka lâi a chhun chiang kher mai.

Engtin mah ka chhâng lèt lo va, ka rilruah u Zorema a rawn lang nghal chat a, mahse chutiang message Peki hnen aṭanga ka dawn thu chu hriattîr kher a ṭulin ka hre lo thung.

A chhan chu a awih leh tak tak dâwnin ka hre chuang lo, Peki ngat phei chu kei nen kan intawn hmâ daiha a hriat tawh a ni a, vêng khata awm an lo ni lehzel bawk nen ka thusawi rin lohna chen a nei dâwn tih ka hrethiam ve vek tawh tlat!

Chutia amah ka ngaihtuah zui ngut ngut lâi vek chuan a hnen aṭangin phone call ka dawng nghe nghe a, mahse ka la là duh chuang lo, ka lungâwi lo a ni tih hre ve se ka duh a ni ber. Tin, Peki message avang khan ka lungâwi lo ru ṭûn hrim hrim bawk.

Vawi hnih ngawt chu a ring ral ṭhak a, min call chhunzawm tawh lo erawh ka lawm phah em em chuang paw'n ka hre lo, ka rilru puthmang chu a ni deuh nuaih ti ila a sual tam lo ber ang.

Phone call lo lut leh chu u Zorema bawk a nih ringin melh pawh ka melh ṭha peih mang der lo va, mahse Lâtei hming ka hmuh rual rual chuan ka là thuai a, tun hnaia kan inbiak tam lohzia ka hre chhuak nghal zawk nghe nghe!

"Restaurant-ah i thawk duh ang em? I thawh duh chuan thawhna tur ka hmu a, mahse Bawngkawnah daih a nia......" a rawn ti nghal par par a, a awrâwl a ring fiak fiak bawk a, loud speaker-a dah lo chung a ring lam hret chu a ni.

"A ni maw!? A va ṭha ve, hlawh eng zat nge?" ka ti ve nghal thuai a, ani pawh chuan

"8000/- an tia, restaurant angah chuan hlawh an pe ṭha teh a nia aw, hmun dangah chuan 6000/- leh 7000/- inkâr an ti deuh vek" a rawn ti ve leh barh barh a, chutah amah bawk chuan zàngkhai vâh hian

"Inrinnî bîk a chawlh theih leh theih loh pawh ka lo zawhsak nghal vek che a, i chawhmeh zawrh ṭhin thute ka sawi a, restaurant neitupa paw'n a hriatthiam hmèl khawp mai" a tih zawm zar zar a, pawisa thawh chhuah ka duh ru reng bawk nen a thil rawn sawi chu bawhzui chì ni dâwn tlatin ka hria.

"Min lo biak chiansak teh a, ka thawh duh ka ring, ka chhûngte ka lo râwn ve hrim hrim phawt ang a, zaninah ka rawn hrilh chiang leh ang che" ka ti ta siam siam a, ani pawh chuan thawk ngei ngei turin min ti zui lûam bawk.

Thil dang sawiin dawr lam chanchinte ka zàwt kâi a, nu Kimtei mize danglam sawtzia mawlh a sawi awl lo va, a sawi dan kalhmangah chuan dawr chhûng boruak pawh a nuam tawh lo hle a ni àwm e!

Rei tak kan inbe lo nà chu thil tam tak kan sawi dun ṭeuh hman thung a, ka nute an lo haw ta bawk nen inbe ṭha leh turin kan inthlah a, phone ka ak dâwn chiah tiha phone call lo lut chu ka en deuh vang vang a, ka là ang nge lá lo ang tihah ka rilru a insual buai nghal nak bawk.

"Hello....." ka ti ta sep a, ka aw chu Lâtei ka biak lâi nen kha chuan inang lo vet vet tak a ni.

"Ka lakah i lungâwi lo tih ka hria, chutih rual chuan ka call làk loh phah chuang suh" a rawn ti nghet deuh charh a, kei erawh ka ngâwi ta ran thung.

"Helen......?" a tu ve ve mah ṭawng chhunzawm mai lova kan ngàwih vung vung hnu chuan a rawn ti hniam leh sup a, nizan ang ém kha chuan ka ṭah a chhuak hran lo va, mahse ka lâi erawh a la nâ ru veng veng thung.

"Nizan avang khan i lung a âwi lo viau em ni?" amah bawk chuan a rawn ti leh a, mit khap fak fakin ka thaw chhuak ham ham a, ṭawng tumna ka la nei lo tluang zel a ni ber e!

"A ṭha e, ka thiam lo a ni tih ka pawm e, mahse ka laka i lungàwi lohna hian rei daih suh se" a rawn tih thum leh dut tâkah chuan ka inup bet reng thei ta bîk lo va, ka laka a inphah hniam ta lutuk chu ka awm a nuam lo a ni mah záwk!

"Tihpalh....." zawiawi tak hian ka ti chhuak sep a, inthiam lohna ka nei tak tak bawk.

"Kan inhmuh a ṭul a nih hi!" a rawn ti dam thluam náin a aw chu a nghet ṭha churh churh hle thung.

"Eng lo......" tia Aizawla hnathawh tur ka hmuh maitheih thu hrilh ka tum lâi chuan

"Office bàn veleh ka rawn tlai chhuah ang a, hmaichhan ngeia kan inbiak chuan i lung pawh ka tiâwi thuai thei mahnà!" a rawn ti nghut nghut a, ka meng lian nasa ngàng mai.

"I tak tak lo ti raw?" ka ti thuai a, zep lo chuan a rawn kal leh duh tak tak ka ring, a tih tawh lamah hi chuan a rilru a sawhsawn mawh ve êm mai!

"Ti tak tak e, eng pawh ni se, chhun chawlh hunah ka rawn bia ang che" min chhán chu ka rin táwk vel chiah a ni.

"A ngâi lo, lo kal ngâi lo, a buaithlak, phone kaltlang paw'n kan sawifel thei reng alawm" ka ti leh ta zung zung a, ka aw aṭang chuan hlauthawng hliah hliah te pawh ka ang ta ve ang.

"Kan duhtáwk hnai dâwn em ni ang?" ka thusawi zawh chiah hre lo ang hrima a rawn ti zui daih chu

"U Zorem......!?" ka lo ti nghal hluai a, kei min hmu tura lo kal a tum chhan chu holam ka tihnuhnawh lehlawi si a ni ber.

"Rawn kal buai duh lo law law záwk mai rawh" ka ti chhuak leh halh a, ka aw chu tlêmin a zia ta deuh bawk.

"Vawiin hun nuam takin i hmang dâwn a nia, chaw ei tui le" ti hniam supin kan inbiakna chu a hmet tawp zui daih a, ka tih ngaihna hre lo chu ka ding ngâwi reng ringawt!

End of chapter 9