𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟗)

THE PRESIDENT'S WIFE
(Contemporary M&B Story)

By

Havali Adam

Chapter 9

"Eng nge khatia min en reng a?" tiin George-a chu ka melh leh zauh ṭhin a, in a rawn thlenna a la rei lo bawk a, a dress pawh a ngai ngaiin a la ha thlap a, mit lá sawk lèk lova min en vung vung chu ka hriatthiam loh lam tak a ni.

"George.....?" ka ti leh hliai a, ka nui deuh sak nghe nghe!

"I intihfai dâwn chuan va intifai......." ka tih laklawh lai chuan a rawn che chhuak thut a, engtin nge mit khap kâr leka ka bul a rawn thlen hman pawh chu ka hre lo.

"Eng nge i hriat a George?" mak ti zet hian ka melh kal a, bathroom ka chhuahsan aṭang tawh a awm dan ngai leh min en dan ngaia min en reng chu ngaih te pawh a ti ṭha lo lek lek dâwn záwk alawm le!

"Tho teh George, i rit si, ka sam pawh hi a la ro lo a nia....." ka tih sap sap lai vek chuan a kut dinglam chu ka biangah nghatin a chûl zui riak riak a, ka ngaihtuahna a kuai pêng chiang hle bawk.

"A hun rih lo George......" min fawh tum tih hriat taka a rawn kun hniam riai riai lai chuan a hmuiah ka lo nawr ding chat a, mahse rei erawh a ni lo chiang kher mai.

Ka kuta ka lo danna chu engah mah ngai lovin ka hmuiah a rawn fawp nghal ngawng ngawng a, a duh táwk mai dâwn emaw ka tih chu a lo la duh táwk reng reng lo chu niin!

A tira mi fawp ngawng ngawng si khan min han fawh rei tâk deuh hnuah chuan a duham sawt em em a, min fawp tawn tawn a ni ber a, a chet dan chuan zauthauna leh tisa châkna nasa tak min pe zui nghal hlawp hlawp bawk.

Dan tumna ka nei tawh lo va, dang thei dinhmunah pawh ka ding lo hrim hrim a, ding ta pawh ni tehreng ila ka phal ka ring. A mi tawhna engkim chuan amah mamawh ngawih ngawihin min siam a, min fan chhuak  chiai chiai a, hmangaihtu thinlung tân phei chuan lo hnar phal chì a ni mawlh lo e!

"I nalh lutuk Sophia....." tia phun supin ka bathrobe hak lai chu a phelh zel a, taksa ruak vekin ka awm a ni tih hre tho mah ila ka hmui a fawh avanga thil nuam dangdai lutuk rawn intur chhuak chuan zah loh theihna min pe ni berin ka hria.

Ka âwm bâwra awm hmun a khuar lâi te chuan awm ngaihna rèng ka hre lo va, nawmna nasa lutukin min tuam hlawp hlawp a, chutah ka âwm bâwr maia duh táwk lovin hnuai lamah an chhuk thla zui leh zat phei chu thawk ngaihna rèng ka hre lo va, boruak tam tak hip luh tum ang hrimin ka thaw kawk kawk a, nawmna vawrtawp tluk zeta nuam ka tawn avanga ka thawm chhuah te hlei hlei chuan a tiphur zual emaw tih turin a chet dan a siam rem sauh sauh a, ka engkim, ka taksa pûm mai chu a za chuaih chuaih a ni ber.

Awkâ vin tel lo, thinrim hmêl pawh pu chuang lo leh nátna tel hauh lovin ka tâna mipa danglam bîk a nihzia a lantîr ta mawlh mawlh a, ka thluak réng a fím thei tawh lo va, ka rilru, hlimna tuipui fawna khat chu ka hriatthiam phak bakah a chang zo va, kan panhnih chauha kan khawvel chu kumkhua leh chatuan pawha chen dun reng ka duh hial a ni.

Min hmangaih tih hriat ngawih ngawiha min kuah lai te chuan ngaihngam zet hian ka lo khan chial a, kan thil tih zawh chiah avanga ka taksaa nawmna la chambang mêk chu ka khap daih zawh rual a ni lo va, a ma reha rehtîr tawp chì ah ka ngai hmiah bawk.

Engkim mai chuan min la fan chiai chiai a, ka tawn ngai loh rama hun nuam tak min hmanpuitu ka pasal, George Frazier-a chu ka rilruin hmangaihna thu ka hlan mawlh mawlh a, sawi chhuak pawh ni ila a pawina ka hre chuang hauh lo.

Thawm ri sur surah chuan ka harh diar diar a, khatia George-a nen chauh khawvel hran daiha hun kan hman dun hnu khan ka lo muhil zui daih chu niin, chutah ruak vekin ka lo la mu leh ta nghal a, khum aṭang chuan ka tho chhuak thuai a, bathrobe chu ha sawk sawkin drawer lam ka pan a, thawmhnaw ka inbel zui nghal mawlh mawlh a, ka inha fel vel chiah tihah George-a chu bathroom aṭangin a rawn chhuak ve chiah bawk.

"Engati nge min kaih thawh loh?" ka zawhna chu ka ngaihtuah chiang a, zawh ṭul lo ka tihnuhnawh leh kher mai.

"I la muhil rei lo ém a, ka kai tho duh lo ta law law che a nih kha!" a lo ti ve mai a, ka rin ai min chhâng awlsam ang reng!

"Min lo nghak rawh....." room aṭang chhuah tuma ka kal lâi chuan a rawn ti leh sup a, ka en nghal zawk nghe nghe!

"Engati maw?" ka ti deuh hâw a, kan inkârah buaina awm lovin min hmangaih tih hre tawh tho mah ila a awm dan chu ka la hrethiam fum fe chiah lo a ni.

"Kan chhuak rual dâwn a nia, ka rei lo ang" a rawn tih chuan ka lo nui hak a, mak a ti deuh nge ni, min rawn en zawk a, kei pawh chu ka nui tawp chiang kher mai.

Thawmhnaw a hak mual mual lâi chuan ka lo ding ngâwi reng a, a inthlak lai chu ka lo en tawp a ni ber. A inha fel zo ta maw tihah chuan ka lamah a rawn phei a, ngâwi reng hian min thlek khum zauh a, kei pawh chuan lo hrethiam thuaiin kan chhuak zui nghal zat bawk.

Room kan chhuahsan aṭanga rei pawh ni lovah Hazel-i a rawn lang hlawl a, engtin nge George-a hmu tur a lo kal fô ngam záwk le ka ti ṭhin, kei ni ta ila ka bik bona a rei tawh ang.

A tirah kha chuan engah teh vak ka ngai lo va, a awm awm khan ka en liam vel mai mai tawp ṭhin kha a ni a, mahse tun hnuah erawh ka rilru sukthlek a dang ta viau mai.

George-a ka rin loh vang a ni lo va, min hmangaih thu a kâ ngei aṭanga hriain ka laka a chet dan zawng zawng leh min ngaihsak dan zawng zawng hre vek tho mah ila ka rilruah thikna a piang lo thei lo a ni.

"Inbe teh ang?" tiin George-a chuan pâwn lamah a chhuahpui nghal daih a, Hazel-i kuta a chelh kher chu ka ngaihdan a ni lo hle bawk.

"Kei paw'n thil hrilh tur che ka ngah alawm George" Hazel-i lah chuan a la ti ham ham zui leh ta nghal a, en pawh ka en rei duh lo.

In aṭanga an han chhuak fel chiah chu eng teh lûaa ngaih ka tum loh tehreng nen, eng nge an sawi ang tih lam ringawt ka rilruah a awm ngut ngut a, hun kal tawh ka ngaihtuah lèt a, hmangaihna lipuia ka zuan luh hmâ ang mai khan George-a leh Hazel-i chu an awm dun ang tih mawlh ka hlau a, hlauhthawn luatah George-a ngei pawh ka ringhlel chho ta chu a ni ber e.

'A kâ ngei aṭangin min hmangaih thu ka hre tawh alawm' tiin ka inhnem hram hram a, keimah leh keimah chu ka intilungawi chawp a, minute tin mai chu rei ka ti em em a, va kal a, an bula va awm ngawt lah a chìin ka hre bawk si lo, ka awm dan chu a mumal lo tak zet a ni.

In chhûngah chuan eng ti hlei thei lovin ka tei kual chhen a, a châng leh room-ah ka lut thul, naupanghovin ka awm dan an hrethiam lo hlauh erawh a vanneihthlak lamah ngai ang.

An awm hrang rei ta luaa ka hriat hnu chuan pâwnah ka chhuak ve ta nge nge a, ka hmu nghal mai lo va, kawt záwl piahah an lo awm chu niin, chutah ka hmuh dan ber kher lah chuan ka rilru a tinâ vawng vawng chiang khawp mai.

A rang a rangin in chhûngah ka tlan lut thuai a, ka hmuh tur ni lo ka hmu palh nge ka hmuh tur dik tak ka hmu záwk pawh ka hre lo.

Car tlan chhuak thawm ka hre chiah phei chu ka thil tih lai ka tawp chat a, in kawtah car dang inhûng áwm rèng a awm lo hrim hrim a, a awmzia chu George-an a thlah haw tihna a ni mai ang em?

Ni lo, thlah ni se chuan a kalna tur min hrilh ve ang chu maw le! Mi pangngai a ni a, a nupui ka ni bawk a, a chhuak dâwn a nih te chuan min hrilh ve turah ka ngai!

Chutia ngaihtuah buai leh rilru insual reng renga hun ka hman lai chuan pi Loren-i hnen aṭangin phone call ka dawng a, ka pick up zui zat a, kâr tir khan dinner eiah kan sâwm a, dinner ei tura a rawn chhuah tur thu min rawn hrilh ka ring nghal deuh tawp a, a thu rawn sawi hmâsak ber pawh ka lo rin làwk ang chiahin in aṭanga a rawn chhuah tawh thu a ni ta rèng a, biak pawh ka inbe rei hran lo.

Khatia HOME a kan chhiat vek aṭang khan naupangho awmna, tuna kan awmna ni mêkah hian kan awm ta char char a, kan in pangngai záwkah erawh pi Loren-i leh maid pahnih deuh tlawng an awm ngat ngat thung a, pi Loren-i phei chuan haw tawh tur leh naupangho pawh an awmna min ngaihtuahsak a tum thu min hrilh fô va, inthlahrun pawh a inthlahrunawm duh viau!

Amaherawhch, fel viau mah se ka rilru ang an pu lo tih ka hre chiang tlat a, naupangho awmna tur ngaihven dâwn mah se George-a rilru ang chiahin HOME tur dinsak a, enkawltu rawiha chuta awmtîr tawp chu a duh tih ka hre tlang vek a, ka dem pawh a ni lo, anni ang mi hausa lutuk leh fahrah dinhmun hrethiam pha tak tak tân lo chuan a àwm hliah hliah, chutianga naupangho awmna tur ngaihven duhna thinlung a pu hrim hrim chu a lawmawm viau tawh záwk a ni.

Kawngka inhawng leh inkhar ri zui khep chu ka hre reng a, in chhûnga lo lut chiah chu a rim aṭang ringawt paw'n George-a a ni tih ka hre nghal a, ka rin dan ang ni hauh lova Hazel Monroe-i a va thlah haw thlap kher chu  ka run hle a, an awm dun lâia ka va hmuh dan kha ka hre chhuak nghal zawk bawk.

Ka bulah chuan a ding ngâwi reng a, a phone chu a khawih ni maiin ka hria. Ka mit sîrin ka melh ru leh zauh ṭhin tih loh chu en pawh ka en mang lo va, kitchen lamah ka awm ta daih a, ka awmna hmun apianga min rawn zui ve zel erawh ka thil hriatthiam loh lam tak a ni.

"Ka nuin a rawn be tawh che em?" ka ngâwi rei ta deuh a ti te pawh a ni mah nà, ṭawng hmâsaah a ṭang ta nge nge e!

"Be tawh e" ka lo ti ve mai a, mahse biak zui erawh tumna ka nei lo hrim hrim!

"I dam lo em?" a rawn ti leh daih a, a thusawi zawh chiah nena inmil lo lutuk thu a rawn chhak chhuak teh daih chu mak tih avangin ka meng phar awn lo chauh a ni.

"Dam e" ka chhán hmâsak záwk ang chiaha awki hniamin ka ti dat a, ka la en duh miah lo ngar ngar bawk.

"Sophia.....?" min rawn din hnaih salh a, ka awm dan danglam thut chu a hrethiam lo tih hai rual a ni lo.

"Engati nge hetiang hian i awm?" a zawhna chu ka chhâng lo va, chhán loh ka tum pawh a ni chuang lo, ka inla ngêng laklawh ni berin ka hria.

"Sophia....?" amah bawk chuan a rawn ti thum leh dut a, ka darah a rawn chelh zui zat bawk.

"Hetianga i awm chhan hi eng vang nge?" tih leh a lam hawi zâwnga min kawih her a rual a, ka inmelh chiang ta hle.

"Eng vang mah a ni lo" ka ti chu a awih loh hmel kher mai.

"Ka lakah hian thil thup neih tum reng reng suh Sophia, ka nupui i ni a, i rilru zawng zawng nen lam hian ka ta a ni a, i taksa ka hriat chian tluk zeta i rilru hriat chian ka duh bawk" ṭawngkam vin a hmang miah lo nàin a aw chu a nghet ṭha churh churh hle thung.

"Pi Loren-i a lo thleng ṭep tawh ang ka ring" ti daiha kal sawn ka tum chu

"Min pehhel i tum tih ka hriat loh i ring em ni?" a lo ti nghal nghut a, ka darah chuan a chelh nghet sawt nghe nghe!

"Hazel-i avang khan hetiang hian i awm ta chu a ni èm lo maw?" amah bawkin a rawn tih leh chuan ka melh zawk a, engtin nge ka rilrua awm chu a hriat chat theih pawh ka hre lo e a!

"I ngaihdan mai mai a nih chu!" tih leh a mi chelhna, a kut chu nawr kian ka rual a, mahse a kut chuan ka taksa a hlat rei lo hle.

"Ka ngaihdan hi a dik tlata hriatna ka nei...." ti supin ka kawngah chuan a rawn kuah hmak a, pà zet hian a kiai zui suk bawk.

"George.....!" ti deuh hapa tal chhuah ka tum chu ka hmuiah tak a rawn fawp tawk a, chutah a inlak hran rual chuan

"À lutuk teh suh Sophia, nang chu ka nupui i ni a, i ni reng bawk ang. Hazel-i a ni emaw ni lo emaw, tu pawh ni rawh se, mi dang laka ka kalsan che ring ngai suh, mi dang nen intehkhin ngai bawk hek suh" a rawn ti thum leh dap dap a, amah ka rin loh vang pawh ni chuang lovin a thusawi chuan ka rilru a tihahdam em em hran miah lo, thiknaa ka la khah ruk reng vangte pawh a ni ang!

"I nupui nihna chelh reng chung si hian mipa dangin min fawp ta se engtin nge i awm ang George? Ni lo, ka zàwt leh lo che ni záwk teh se, engtin i awm ka ring lo" ti charh charhin a kut chu phih thlak ka tum ngawt a, mahse min lo kuah nghet ngàng mai.

"Chutiang thil chu engtikah mah a thlen beisei suh Sophia, a chhan chu a thleng ngai dâwn lo" a aw chu a khauh ta hmuk hmuk viau e!

"Ka hrethiam lo che George, hnaih ka tum che hian ka lak ata i hlâ leh dâwrh ṭhin ni maiin ka hria" ka ti chhuak ta halh a, ka thusawi ho lam ang taka lang, mahse thil thui tak hril si vang chu nge pawh ka hre lo, min en chik ngur ngur hle.

Kawngka rawn inhawng lam chu kan hawi rual ṭhawt a, pi Loren-i hmêl ka hmu nghal a, chutia pi Loren-i a rawn thleng ta chu George-a paw'n min kuah nghet run tawh bîk lo va, a thawventhlak huaiin ka hria.

Pi Loren-i chuan naupangho thil a rawn ken ṭeuh a, ni dang ang lo takin maid pahnih, in pui lama chhawr lâi te chu a rawn hruai tel ve nghe nghe a, chu pawh ka chet hah ngai a tih loh vang lehnghalin!

A duh dan ang ngeiin maid pahnih chu an che ta malh malh a, ani leh kei erawh pâwn lamah tei chhuakin kan titi daih a, George-a ve thung chu kan chhuah dâwn khan mi tu emaw a bia a, company lam thil niin ka hria. Ka pasal e ti lo hian a hna lam thil, a bîkin company lam ngat phei chu ka hriat thuipui lo hle a, ani paw'n min hrilh ngai bîk chuang lo.

Pi Loren-i chuan amah timualphoa puh hmingchhetute laka hnuchhuina a la neih chhunzawm reng thu min hrilh melh melh a, dàwta puh hmingchhetu ber Hazel Monroe-i lahin mi dang a puhmawh tlat leh lawi tlat bawk si a, chumi avanga a lungawi lohna leh a thinrimna chu ka hnenah a au chhuahpui a ni ber a, George-a nena kan inkâr min han zawh zawm zui daih erawh ka bangbo hman khawp mai.

In chhûnga a rawn luh lâi khan George-a nen kan lo inkuah titih kha a ni a, kei chuan kuah lèt ve chiah lo mah ila inkuah tia sawi theih chu kan ni thovin ka hria. Pi Loren-i chuan min záwt nawn leh ngat a, mumal lo zetin ka chhâng bah nuaih a, Hazel-i nena an inkarin thawm ri va a neih tlém sawtzia te a sawi zui melh melh a, a hmelah chuan a hlim tih a hriat hle bawk.

"Hetia ka tel lova naupangho nen in awm hrang hi ka ngaihtuah ṭhin viau che u a, in pui lama lo let tawh turin ka sâwm ṭhin che u tih pawh i theihnghilh bîk ka ring lo. Nimahsela, tun hnu hian ka ngaihtuah a, hetia in pahniha hun in hmang dun tam thei hi ṭha ka ti lehling ta viau záwk mai" ti dat datin pi Loren-i chu a nui sâng a, chutiang zâwng chuan ka lo la ngaihtuah chhin ngai lo hrim hrim!

"Engtikah tak fate hi nei ve ang che u maw?" mi rawn melh deuh ralh pah hian amah bawk chuan a ti leh sap a, meinei ṭawngkam a hmang lo va, a rilru tur chu ka hriatthiampui em em záwk a ni.

"George-a tak chu ka la hrilh chiah lo va, HOME hlui, kangmei chhuak avanga chhe ta pi Martha-i HOME din kha tuaihnum ṭhat leh ka lo rilruk deuh a, HOME awm ṭhinna a ni tho bawk nen a hmun hmâin a zir em em a, mahse in ngaihdan a nih chiah loh chuan heta hetia awm reng pawh hi ka hnial chuang lo" tiin thu dangah ka pakai ta daih a, George-a nena kan inkâr leh fa neih lam kan sawi zel a nih chuan tum loh deuhin ka inpuang mualpho mai mai ang tih ka hlau!

"A ṭha lutuk alawm, mahse chutianga HOME din leh i duh te chuan tun aṭanga kan buaipui nghal a va ngâi awm ve Sophia, ka lo buaipui dâwn em ni ang?" ngainatawm tak hian a rawn ti hliai a, kei erawhin ka lû ka lo thing vat thung.

"Ni lo ve, George-a ka la hrilh si lo va, tun tut tuta buaipui nghal chung chung ka ti chiah lo deuh a, chu bakah George-a pawn a remti kher lo maithei a ni" ka ti zung zung zo chiah chu

"Rem a tih ka lo ring viau záwk asin Sophia, han ngaihtuah teh, thil dil i neih àwm ka la hre miah lo, ka fapa a ni a, ka hre chiang a, a rilrem zâwng ni lo deuh ta pawh ni se a nupui i nih vang hrim hrima a thlawp che ka ring" a rawn tih zawm nghal malh malh a, a thil sawi chu a tak tak ni se ka ti ngawt mai.

"Eng pawh ni se, in nupain sawi dun phawt ula, inthutlukna azirin ka hriat àwm chin min rawn hrilh ve leh ang a, kan buaipui zui chauh záwk dâwn a nia, ka tân tak pawh pi Martha-i  hriatreng nân leh a tâna ka tihtheih awmchhun a ni tawh a, chuvangin engkim ka lo buaipui ang" amah bawk chuan a rawn ti leh a, mi rilru ṭha a nihzia ka hre thuk telh telh dâwn niin a lang!

In chhûng kan lut chu George-a hmêl ka zawng ru deuh a, pi Loren-i pawh chuan a zawng ru ve thovin ka hria. Maid pakhat záwk bulah chuan George-a awmna ka záwt a, naupangho room chhûnga a luh thu min hrilh chiah chu mak ka ti kher mai. A ruka min hrilh a ni bawk a, pi Loren-i chuan kan ṭawng a rawn hre pha lo hrim hrim a, naupang room ka pan chu min rawn zui ve nghal mai bawk.

Room chhûng kan luh ruala ka thil hmuh chuan min va han barakhaih chiang tehreng em! George-a chuan naupang pakhat hi a lo koki chhuan a, pi Loren-i phei chu meng lian kawkin a âng deuh phuau a, naupang pakhatin min rawn koh rual chuan George-a chu kan lam a rawn hawi vut a, chutah pi Loren-i nena min han hmu dun chiah chu a che sawk sawk a, a naupang koki chhuan lai pawh chu a dah thla thuai nghe nghe!

"Zirtirtu......" tiin naupangho chuan min rawn bawr laih laih a, George-a erawh room aṭangin a chhuak nghal nul nul thung.

"Naupangte u, thil ka lo ken che u a nia, in duh zâwng a nih ngei ka ring" tiin pi Loren-i chuan a ko pêng ta hlawm a, room aṭangin ka chhuak ve ta daih bawk.

Naupang awmna room aṭanga ka chhuak chu kan room lam ka pan ding nghal a, in puia kan nupa room dik tak angin in chungah a awm ve tawh lo bawk a, ka thleng phei har lo khawp mai. Kan room chhûng ka luh hnua ka thil hmuh te hlei hlei chu mak ka ti lehzual a, eng nge a hriat pawh ka hre lo.

"Eng thil nge tih i tum George?" ka ti ta hial a, bathroom lut tur ang maia a awm chu ka hrethiam lo a ni.

"Ka intifai dâwn....." ti supin min en deuh khui khui a, ka mak ti hmêl chu mak a rawn ti lèt záwk te'n ka hria.

"I intihfai tawh kha......." ka ti hliai a, a meng nur nghal nang nghe nghe!

"Engtikah maw?" a hre lo der nge a hre lo tak tak pawh ka hre tawh lo e a!

"Kan.....eng lo......" ti zuih ral riai riain ka ngâwi ta daih a, ka thil sawi tum chu sawi chì ni hek lo.

"Sawi la.....?" a la rawn ti ta deuh deuh lehnghal a, ka sawi zawm lo chiang teh e!

"Kan hmuh laia naupang i lo kokichhuan vang kha em ni hetianga i awm thut chhan hi?" ka tlang rawt a, a mitmengah chuan phatna ka hmu nasa ngang mai.

"Chutiang a nih i lo beisei chu a atthlak hle mai!" ti nghutin bathroom-ah chuan a lut zui nghal daih a, mahse thawm erawh a reh rei tlawk tlawk hle thung.

Chutia a intifai thawm ka ngaihchan reng lai chuan bathroom kawngka chu a rawn hawng kau dek dek a, kan mit a intawn rual chuan thil sawi tum nei ni àwm tak hian a âng zuau hman tawh tihah a kâ a chip leh hmak lawi a, chutah a lû thing nghut nghut pah hian

"A ngâi leh lo ni teh se!" a rawn ti bul deuh hmuk a, bathroom chhûngah chuan a lut zui leh nghal daih bawk.

A awm dan teh thut chu ka ngaihtuah zui neuh neuh a, ka khi sak a, ka ngaihtuah chian pôh leh ka nuih a za zual zel a, bathroom aṭanga a lo chhuah hnu thleng chuan nuih insum ru, mahse inup bet hlei thei si lovin ka nui ta kiah kiah a, a mizia zawng zawng nen ka ngaihtuah a, a intihfaina pawh a la rei lo ang tiha bathroom a luh nawn leh ringawt chhan chu eng dang niin ka hre ta lo.

"Eng chu nge maw i hriat le Sophia?" min ti deuh hluk nghe nghe a, mahse ka nuih a tihzatna erawh a kiam chuang der lo, a nasa záwk tingin ka hria.

Room aṭang chuan kan inzui chhuak hna hna a, kan chhuah aṭanga rei pawh ni lovah dinner kan kil zui nghal a, pi Loren-i chuan naupangho chu a be deuh reng a, kei pawh ka ṭawng ve leh siam siam ṭhin a, George-a erawh a ngâwi reng thung a, naupang room a chhuahsan hnu aṭang khan a awmdan a khaihlak kual vel vek niin ka hria.

Ka hriatthiam dan ber chuan khatia naupangho bula a lo awm kan va hmu kha amah záwk a lo hamhaih lutuk a, keini hriatah lah naupang ngaina àwm rèngin a awm ngai bawk si lo nen a awm dan a khingbai zo va, mipa puitling uaih tawh si kha hriatna hlauh ta ang maiin a che naupangchhia vek a, a intihfaina pawh a la rei loh tehlul nen a inbual nawn leh ta hial a nih kha!

A bul ber chu ka hriat tirh ata naupang ngaina a ni ngai lo va, kei nena fa neiha enkawl dun a sawi lai te khan mak tihnain ka khat kha a ni a, pi Loren-i tak paw'n naupang hnaiha a awm tam lohzia hi chu a hre chiang vein ka hria.

HOME a kan chhiat hmâa kan kal ṭhin lai pawh khan naupang bulah a awm ngai lo hrim hrim a, chuvangin tuna taka naupang bula a lo infiam ve hlawl kan va hmu kha amah berin a dawngsawng thiam lo niin a lang!

"Lo sawipui rawh aw.....?" tiin pi Loren-i haw tur chuan min chah thlap a, min kuah vang vang a, a thil sawi tum chu ka man nghal chat bawk.

"A nih mangṭha u le....." tia kan invai liam hnu chuan in chhûng lamah kan lut zui nghal a, thawm a reh ṭhiap tawh a, naupangho phei chu an muhil vek tawh nghe nghe!

Khuma kan han mu fel chiah chu a taksa siin min pawt hnai nghal salh a, kei pawh chuan ka khan nghal chial a, a muthilh tak tak hmâ chuhin pi Martha-i HOME din, kang chhe tawh chu din ṭhat leh ka duh thu ka hrilh ta melh melh a, ka ngaihdan ka sawi chhûng zawng chuan a lo ngâwi reng a, ka sawi tur ang ka sawi zawh hnu chuan thu tam pawh a sawi chuang lo, mahse a thil sawi danah chuan ka ngaihdan chu a pawm loh zâwng a ni bîk lovin ka hre thung.

"I lung a âwi tawh em?" ti supin ka hawngah a rawn fawp zeuh a, ka chhàn lawk loh avang chuan tlaia ka thil hmuh khan ka lung a la tiâwi lo reng emaw a ti a ni ngei ang.

"Sophia......?" a ti thum leh chhal a, a lam hawi zawngin ka inher sat sat a, kan inen chiang ta hle bawk.

"Min ring turin ka duh che, ka rin ang bawk chein......" ti hniam leh dutin ka hmai chu a zùt riak riak a, nichin maia kan thil sawi lâi nen khan inpersan viau mah se a thusawi awmzia chu ka hre chiang khawp mai.

A inthiam lo hnuhnawh ni berin ka hria!

"Colton-a ringawt pawh i ngaithei lo a nia, engtin nge min ring tih ka hriat theih ang?" ka ti ve ta khauh a, ka thin a rim pawh a ni chuang lo, a rilru dik tak ka hriat chák vang záwk a ni.

"Anite chu a hmeichhe mi alawm......" a rawn ti thuai a, a ṭhianpa mah ni se a la thik reng tih hriat reng reng, ka nui chhuak hak teuh kher mai.

"Keimah ber ka mipa mi loh phawt a hnu!" ka chhàn dan chuan a rilru a tibuai tih ka hmuh hmaih haih lo.

"Ka rilru hriat tum ang hrim hian awm suh Sophia, ka hrilh chiang viau tawh che a ni lo'm ni?" a ti deuh hluai a, ka lo en kal ringawt!

"Hazel-in i rilru a la tibuai a nih chuan i buai lohna turah i buai a ni tih hre mawlh teh......!" a ti hniam leh sup a, ngâwi renga ka en lâi chuan ka hmuiah a rawn fawp zui nghal vawng vawng a, engmah kan sawi zawm ta lo bawk.

Nupa inkârah hi chuan hun inpek tawnna hian kawngro a lo su em em a, kan inneih tirh leh tun hnaia George-a danglam tak hnu ngaihtuah phei hi chuan lei leh van ang velin thil a inthlak danglam tih a chiang hle a, ka tân a i hawng a, ka tân hun a insiam ta fô bawk a, chu chuan ka thinlungah pawh nasa takin hna a thawkin ka hria.

Tin, keimah ngei pawh hi ka bang chuang lo. A hmâ ang khan ka ngâwi chut chut reng tawh bîk lo va, ka pasal a nih angin ka zah a, be hmâsatu záwkah pawh ka ṭang ve ta fô mai. Chu chuan kan kârah inpawhna ṭha zâwk a siam a, min hmangaih hmâ daih aṭang tawh ka hmangaih a ni tih a hriat hunah phei chuan engtin tak ngai ang maw!

Hun te chu an inher liam a, thil a danglam zel a, HOME-a kangmei a chhuah chhan dik tak pawh chhui zui a la ni reng a, thil thar awm lutuk lo mah se ngai erawh an awh reng bîk lo va, rinhlelh an nei leh zauh ṭhin tih loh chu chhui chhuah a mumal a la awm hlei thei lo a ni ber a, mahse George-a erawh chuti maiin a beidawng duh mai lo.

A chhun zan zawmin a phe buai reng a, tun hnai hian a mi chhawr te'n rinhlelh pakhat an neih leh thu min hrilh ve nghe nghe a, tun ṭuma mi hi chu pawi khawihtu leh ruahmanna zawng zawng siamtu niin an ring nghet bur tawh bawk.

Chutiang vel chuan kan boruak a inmung chho mawp mawp a, newspaper lamah leh media lamah pawh kan chanchin a tam chho leh ta hle a, mak tak maiin Hazel-i erawh thla hnih dâwn liam ta aṭang khan a reh hmak thung ti ila a sual lo ang.

Ka phone ring nghawr dat dat chu ka en thuai a, ka rin ang ngeiin George-a a lo ni a, business lam thilah a thangbo rih mêk a, zan khat èm pawh a la châm tling lo náin dik tak chuan ka ngai nghal veng veng a, zan hnih bak châm tur ni lo mah se chu ni hnih leh zan hnih chhûng lek pawh chu rei ka ti viau dâwn niin a lang.

Kan inbe rei hran lo va, kan inbiak zawh hnu chuan nuapangho mut ṭhat leh ṭhat loh endikin an room-ah ka kal a, thlamuang tak hian an lo muhil siai siai hlawm a, kan room ka han lut leh chu pi Loren-i hnen aṭangin missed call vawi thum lâi a lo awm hman a, ka call back nghal thuai a, thil pawimawh min hrilh tur nei nia ka hriat vang a ni pakhat!

Phone call lah chu a ring ral ṭhak ṭhak leh ta nghal a, a ruk tak chuan ka ngaih a ṭha lo va, ka call fô hnu pawha phone call a pick up thei reng reng lo chu zan mah ni se in awmna hmuna va kal mai ṭhain ka hre ta!

Minute tam pawh khawmuang tawh lovin ka che zung zung a, in pui lam pana ka kal lâi chuan George-a call ka tum deuh ren rawn a, mahse thil awm dan ka la hriat chian bîk loh avangin ka call buai leh ta lo law law záwk a ni.

In kawt ka thlen rual rual chuan gate chhûngah ka lut thuai thuai a, gate bula security guard lo awm miah lo leh kawngkapui lo inhawng huau te hlei hlei chuan ka ngaih a tiṭha lo zual a, in chhûng ka luh fel hnu chuan pi Loren-i chu ka call zui nghal zat a, phone ring-na lamah ka kal zel a, pi Loren-i phone chu dawhkan chungah a lo awm reng a, mahse khawiah nge amah pi Loren-i ber chu a awm tâk ang?

"Pi Loren.....?" tiin ka au lang lang a, sitting room light han on mai ka tum chu a èng thei reng reng lo lehnghal a, engkim chuan ka ngaih a tiṭha lo zual tak zet!

"Pi Loren......?" tiin han ko leh ṭhin mah ila min chhângtu réng an awm lo va, maid takngial pawh hmuh tur pakhatmah an awm miah lo chuan ka ngaih a tiṭha thei lo a ni.

George-a ka call ta nge nge a, mahse a ring ral ṭhak thung a, zan lâia hna thawh tur a neih thu kha min hrilh tawh tih ka hre chhuak chawpchilh nghal zawk nghe nghe! Ka rilru mangang ru chuan Colton-a ka call leh thawr a, hlauhthawn luatah ka call tawp a ni ber a, phone a ring lâi chuan pi Loren-i room-ah lut zelin khuma thisen lo kâi nuaih chu ka hmu zui zat a, ka hlauhthawnna a va han zual chiang tehreng èm!

Colton-an phone call a pick up rual rual chuan in puia ka kal thu leh pi Loren-i room-a thisen ka hmuh thu chu ka hrilh nghal thuai a, a rawn kal tur thu sawiin kan inbiakna chu a hmet tawp a, pi Loren-i hmêl rèng hmuh tur a awm bawk si lo, ṭih ru zet hian khum bul te chu ka en kual duk duk a, amah àwm rèng ka hmu lo chu thuhran ni se, tukverh darthlalang keh darh nuaih aṭang ringawt pawh chuan thil dik lo a awm tih a chiang hle.

Kawngka inhawng ri khep ri ka hriat rual chuan Colton-a emaw tiin ka hawi phei thuai a, mahse a lo ni awzâwng lo. Mipa chu a ni ngei a, mahse a hmai a tuam tlat avangin tunge a nih hriat theih a ni lo va, vawi leh khatah ka lû chu a hai chhup a, chawp leh chilhin ka lû chu nàtnain a rawn tuam hlawm nghal hlawp hlawp a, engtin nge ka awm ber pawh ka hre tawh lo, engkim chu mit khap kâr leka thleng vek a ni a, ka thluak chuan eng a ang zo ta miah lo bawk.

Ka ke chu tu emaw ni hian a chelh a, ka taksa che dat datah chuan ka harh leh zauh zauh ṭhin a, ka lû chhûng nâ vawn vawn lutuk chu ka thi mai dâwn te'n ka hria. Ka meng diar diar a, mipa pakhat, kawr dum vek ha hian ka ke rekah chelhin min lo hnuk chu niin, tih theih lah ka nei bawk si lo, ka lû chhûng nâ hit thip vawn vawn avanga ka engkim chau ngawih ngawih lutuk chu ka tlin dâwnin ka hre lo va, eng hriat zui theih pawh a ni tawh lo.

End of Chapter 9