𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐋𝐀𝐒𝐓 𝐂𝐇𝐀𝐏𝐓𝐄𝐑 𝟏𝟎)

 

THE PRESIDENT'S WIFE

(Contemporary M&B Story)

By

Havali Adam

Last Chapter 10

"A ṭhat chu! Fimkhur ang che!" mipa ṭawng ri chhur chhur chuan min ti harh riai riai a, ka lû chu a ná zui nghal zawk zawk bawk.

"Ka hria alawm, mahse i rawn hmanhmawh a ngai ang, a chhan chu kan awmna hmun hi hmun him a ni tlat lo!" chu pa bawk chuan a ti leh hmuk hmuk a, ka harh tih a hre lo a ni ngei ang.

Thawm chhuah miah lova ka han meng diar diar chu room thim ang reng takah hian ka lo awm a, mahse chu room chu khawi lai hmun nge ka hre ta hauh lo mai. Ka hriat hnuhnun ber kha chuan pi Loren-i room chhûngah ka awm kha a ni a, Colton-a paw'n rawn kal a tum a nih kha!

Ni lo, Colton-a kha! Ani kha engtin nge a awm?

Ka ngaihtuahna chu a bing chûk chuk a, ka lû nà ru het het chuan ka thluak a tichawmawlh zo va, ka hliam chu thihpuina tham hiala nâ mah ni se ka la dam ve ṭawk ṭawk erawh ka lawm tak zet! Ka hmâ hunah eng nge thleng dâwn ka hre lo va, engtin nge ka awm dawn tih leh engtin nge min tih zel dâwn tih lah ka hre hek lo, ka hriat chhun chu ka la dam tih leh George-a min ngaihtuah dan tur mawlh a ni.

"Aw.....i lo harh ta nge nge a ni maw?" min rawn betu mipa chu ka vawi khat hmuhna a ni a, ka harh tirh khan ka hmu miah lo bawk.

"Engati nge hetiang hian ka chungah in chet?" ka ti chhuak halh a, ka ṭawng ring lo náin ka thusawi erawh an hre pha vek thung.

"In pawi sawi ka nei em ni?" ka ti leh hap a, ka lûa hliam chuan keimahah nasa takin nghawng a la nei a, ka ṭawng lui hram hram a ni ber.

"Nei te pawh a ni mah nà......" an zînga pakhat chuan a rawn ti zauh a, a nui zui hek hek bawk.

"Pi Loren-i chungah eng thil nge in tih? Khaw'nge a awm?" ka thluak chu ka tifîm lui hram hram a, mahse a harsa fan fan khawp mai.

"Kha pitar, hnawksak zet kha em ni i sawi?" chair-a ṭhu run pa chuan a rawn ti hluk a, a pianhmangah a hrawlin a lian ber a, nikhaw hre lova min khâwng tlutu kha niin ka hria.

"Kan ngàwihtîr ta a nih kha!" pakhat chuan a rawn ti ve leh a, an thil sawi chu ka hrethiam lo kher mai.

"Eng nge in sawi awmzia?" ka ti hap a, chair-a ṭhu pa chu a rawn nui huah huah a, a kuta silai chu a tivir nghal zat zat bawk.

"Silai hian thil a lo tithei khawp mai, in ti ve em naute u?" ti chhur chhur hian room chhûnga mipa pahnih awm ve te chu a bia a, a ṭhuihhruaite ni àwm tak te pawh chuan an lo thlawp hmél khawp mai.

"Eng nge in lakah tihsual kan neih? Engati nge hetiang hian kan chungah in chet?" ka ti khur deuh hlawk hlawk a, pi Loren-i mawlh chu a thi ang tih ka hlau a ni.

"Heti hian ti teh ang, thawnthu pakhat ka han hrilh ang che! Kawngpuiah hian hnahthel a lo awm ṭeuh a, nu pakhat chuan a phiat fai a, mahse hnahthel chu a lo tla zel bawk si a, chu nu pakhat thinrim chuan thing kittute ruaiin thing chu a kihtîr ta daih a, ti khan thil awmzia i man tawh em?" ti nghat nghatin a rawn nui huah huah a, pi Loren-i chunga an chet dan chu ka hrethiam ta kuarh mai.

"Tichuan nang pawh hi hnahthel ang maia hnawkah i lo chang zo ta a, i tawn tur chu i hriatthiam ngei ka beisei" chu pa bawk chuan a rawn ti leh a, min nuih vur vur a, a nui hmêl te chu ka rap ngawih ngawih!

"Amaherawhchu, i lo hlauhthawn lutuk loh nân, dah ṭhat tur kan la nei a, chumi tawktar nân chuan kan hmang rih phawt che ang a, chumi zawh lamah erawh thil a nih dan tur ang thlapin a ni puat tawh ang" tih leh thawh a rual a, a phone call dawn chu a pick up zui nghal zat bawk.

"Kan la awm mêk e!" tia chawl deuh dat hian

"Fimkhur tak zelin le! Kan pawisa tur pawh a zat dik taka kan dawn ngei ka beisei!" a ti leh sup a, mi dang ruaitu an awm tih ka hriatna chuan ka rilru a kuai pêng chiang kher mai.

"A ṭhat nasat chu! Ka naute pahnih ka rawn chhuahtîr ang" ti lehin room chhûnga awm ve mipa pahnih, pumrua ria lam deuh hlek te chu a signal zeuh a, room aṭang chuan an chhuak nghal nal nal bawk.

Ka lû nâ lai chu ka tawk de de a, thi khar hlirin a lo khat a, tihnàt hlau zeta ka khawih paw'n a rawn nâ nghal zawk zawk thei a, min mantute pawh chuan tlan chhuak thei chì ziazáng ka ni lo tih an hrethiam te pawh a ni ang, hruiin min hreng lo hrim hrim a, ka awm àwm chuan min awmtîr tawp a ni ber.

Ka mitthlaah pi Loren-i a rawn lang zut zut a, thil thlen dan aṭang chuan ruahmanna ngeia thah fel a ni tawh tih ka hrethiam vek a, chu tak chuan ka rilru pawh a tinâ em em a, naupangho ka ngaihtuah thleng chiah phei chu ka thluak a buai zo va, George-a mamawhnain ka khat a, ka thinlung chu ṭanpuitu auvin a rum vawng vawng a, mahse George-a emaw, Colton-a takngial pawh hmuh tur rèng an awm si lo.

Chutia rilru sêng reng renga hun ka hman lai chuan kan awmna room kawngka chu a rawn inhawng ri khap a, kawngka lam ka hawi phei ruala ka mi hmuh avang chuan ka meng phar nasa kher mai. Mit khap hlek lo leh mit là sawn miah lovin ka en ngawt ngawt a, ka lamah a rawn pen phei chhat chhat a, chuti lai hmun daih daiha a hmél hmuh chu inbeisei lo nasa tak ka ni!

"I dam em Sophia? Kan va inhmu khât ta ve ti raw?" Hazel-i chu a nui sâng a, mak ka tih èm avangin ka rilru chu a buai nuaih a ni ber.

"Khawiah nge pawisa chu a awm? I mualpho thup nâna ka mite zînga mi pakhat i thahtîr avanga i pawisa min pek tur thu min tiam pawh kha i theihnghilh ém lo ang chu maw?" min mantute zînga an boss ber leh pa lian ber chuan a lo ti chhur chhur a, Hazel-i erawhin chu pa chu a hlauh hmèl loh hrim hrim thung.

"Mi â emaw min ti a nih chuan i tisual chiang viau ang Oleg, i boss Mikhail-a nen pawh inzawmna ṭha tak kan nei tih hria la a ṭhat ka ring. Chuan, Russia-ah ka la rawn zin thuai dâwn bawk a, min mikhual ngei ka lo beisei ang" Hazel-i chuan zàm hmêl pakhat mah a pu lo va, min mantute chu a thuhnuaia awm vek záwk ang mai an ni!

"Mikhail-a nena kan chungchang engmah hriat i nei lo ve! Chuvangin sawi tam lo mai rawh, min bum nawn theih inbeisei hek suh Hazel Monroe! Khawiah nge pawisa chu a awm? Min pe thuai la, kan kal nghal ang" Oleg-a tia Hazel-in a koh pa aw chu a bulin a ngaihnawm loh hle a, an inkâr a ṭha vak lo tih chu a chiang viau bawk.

"I hmanhmawh mah mah lo maw Oleg? Hei, he laia bawlhhlawh pakhat hi bawlhhlawh bâwmah i la paih miah lo a nia, nge ni a, tih lawm phawt i phut em ni?" ti har harin Hazel-i chuan Oleg-a chu a hnaih salh a, a hmuiah a fawp tawk a, zàm lo zet hian a kap chu a ṭhamsak zeuh nghe nghe!

"Ni lo ve, i hre sual, hmeichhe tisa chàknaa khat hi ka ngaina lo, pawisa chu min pe thuai mai rawh! Tin, kan tih tur kan ti zo tawh a, a bak chu i kut a ni tawh e!" Oleg-a chuan a ti chhumbung leh hmuk hmuk a, Hazel-i kut chu a nawr sawn nghal vut bawk.

"In tih tur in la tifel zo lo deuh tih chu i hmuh hmaih bîkin ka ring lo, he laia fahrah hmeichhia, rimchhe zet hi i thah hmâ loh chu pawisa i dawng thei lo ang" Hazel-i chu ka melh nghal kawk a, chutiang em ema rilru chhia chu a nih ka ring lo hrim hrim!

"I thuhnuaia min dah tum hlek suh, hmeichhia lehnghal!" ti hrawkin Oleg-a chuan a rek âng chawi chawi a, Hazel-i chu a ngâwi chiang kher mai.

"Motor kha va check rawh u, pawisa a awm loh vaih chuan he nu phiangsen pawh hi kan that ve nghal ang" tiin Oleg-a bawk chuan a naute pahnih chu a tîr nghal zat a, thil awm dan engkim chuan min ṭhawng em em vek a ni ber e!

"Min thlah rang rawh!" Hazel-i chuan a tivin hlar a, a tal deuh vak vak hnuah Oleg-a pawh chuan a thlah ve ta hram bawk.

"Eng vangin nge hetiang hian ka chungah i awm? I pawi ka sawi em ni? Ni lo, ka sawi àwm reng ka hre lo!" Hazel-i chu ka en kar a, ani paw'n min rawn en rang khawp mai.

"Pawisawi a......? Ni e, i sawi chiang alawm, ka mipa hmangaih thinlung min laksak tih i hre lo em ni mi mawl nu!? Fahrah ni áwm reng i lo ni e!" ti hlak hlakin ka lamah a rawn phei a, ka hmâah rawn ṭhu thlain ka hmai chu a hmer sawi vak a, chu chuan ka lû a tinâ nghal zawk zawk nghe nghe!

"Hre rawh, nang fahrah ve mai mai avang hian George-a hi ka hloh dâwn reng reng lo, ani nena kan awm dun theihna tur a nih phawt chuan ka that hreh reng reng lo che tih hria ang che!" amah vek chuan a ti vin leh fak fak a, chhuata bawk thlawp khawpa nâ hian min beng hawi sawk bawk.

Thinrim zeta min ànkhum buan buan lâi chuan pâwn lamah thil puak ri dur a rawn awm a, mipa aw vin nghal hlur chu Oleg-a kha niin ka hria, Hazel-i pawh a bang chuang lo. Fiah lo zeta meng ṭawk ṭawk chungin Hazel-i te lam chu ka hawi a, vawi leh khatah thil a rawn puak leh dur a, silai puak riin a zawm nghal mawlh mawlh a, thil thleng mêk buai nuaih chuan ka rilru leh ngaihtuahna a timumal lo tak zet!

"Sophia.....!" chu aw chu taksa chak lo chung lo paw'n ka hai lo chiang kher asin; amah George-a aw ngei a ni!

Ka thinlung chu a ṭap hlawp hlawp a, lawmnain a khat a, George-a awa min ngaihtuahna ri langsar tak chuan ka mittui a ko chhuak hial a, chu hmun, hremhmun tluk zeta nuam lo leh hrehawm ata chu min hruai chhuak se ka ti ngawi ngawih bawk.

"Sophia......." tia min ko thawm chu hre leh ṭhin mah ila thil puak ri dur dur leh silai puak ri mawlh chuan hmun tin kil tin a luah a, che chang lovin chhuatah ka mu hlawm tawp ringawt a, chu chauh chu ka tih theih awmchhun pawh a ni réng a!

"Nangmah avanga thil thlen dan buai zo ta vek hi ka ngaidam ngai lo ang che!" tia Oleg-a ṭawng khur khur thawm chu a fiah ṭha hle a, Hazel-i aw pawh a ring lang lang khawp mai.

"I mi ngaihdam ka ngai lo ve!" ti phiar phiarin silai puak ri chuan a zawm zat a, engkim mai chu vawi leh khatah a thleng thut vek a ni ber.

"Nang fahrah phiangsen pawh hi thi ve nghal law law rawh!" ti hlarin Hazel-i chuan silaiin min tin ta ran a, mahse chutia min tin lai tak chuan

"Duh tawk rawh Hazel!" tiin George-a aw ngei mai chu a rawn ri chhuak hluk a, Hazel-i erawh a lo nui sawng duh lek chauh thung!

"Mi à emaw min ti suh George, kei min hmangaih thei tawh lo a nih chuan he nu pawh i hmangaih thei bîk tur a ni lo" ti salh salhin ka lam chu a rawn hawi leh a, chutah amah bawk chuan

"Mangṭha le......" ti leh sapin a silai chuan min tin zui leh nghal zat a, thil eng emaw ni hi a ri ruk ruk a, rei pawh ni lovah silai inkap puak riin a zawm a, ka âwm a thip nghal vawng vawng danah silaia kah ka ni tih chu hai rual a ni ta lo.

"Sophia........!" ti hrawk tu chu George-a a ni tih hre mah ila ka taksaa hliam te chuan min hneh zo va, hmun thim chhah mup lamah min hnuk thla ta riai riai bawk.

Ka taksa hliam chuan ka rilru nen lam a nghawng a, ka kang deuh lawp tih te, George-an min pawm tih te, min penpui hlawk hlawk tih te chu suangtuahna hmangin ngaihruat thiam vek mah ila ka rilru berin hniam lam a pan zel si a, ka tân chuan harh fìm zawh rual a ni ta ngáng lo!

Thihna hi chu hringnunah chuan thil thleng ngei ngei tura duan a ni a, nunrawng viau angin lang ṭhin mah se a tih tur, a hna a ni ve miau si a, keini mihringte lo her danglam theih lah a ni hauh si lo, nunna làk inring rengin kan chheh velah a awm chu a nih ber hi màw!

Engkim mai chu a reh hian a reh vung vung a, boruak ni se a reh dai dap bawk si, khawi lâi hmuna awm nge ka nih pawh ka hre lo. Thlarau khawvelah ka cheng ta a nih ringin ka rilru a vak kual a, George-a ka ngaihtuah chhuak hmâsa ber a, ka rilruah naupangho an rawn lang leh nghal zat bawk a, Colton-a leh pi Loren-i chena ka ngaihtuah chhuah danah ka thi tawh a nih ka ring hmiah a, mahse thil awm dan chu ka hrethiam ta hauh lo mai.

Kawngka inhawng thawm leh inkhar ri khap thawm ka hriat rual chuan ka rilru a kal ding nghal hle a, thawm lah chu a rawn hnai zel mai bawk si, chutah ka kut chu tu emaw ni hian a rawn vuan leh ta nghal a, engkim ka hriat danah ka la thi lo a nih rinna lian tak ka nei a, mahse ka hliam kha thihpui tham niin ka hre bawk si nen ka thluak chu a buai ru ta hle.

Ka meng diar diar a, ka rilru pangngai vek mah se ka taksa erawh a chak lo em em a, ka kut vuan chunga George-a hmêl ngei mai ka han hmu chu mak tihnain ka khat a, lawmnain ka khat a, chawp leh chilhin thil awm dan chu ka hrethiam nghal zut zut a, thihna ata him dam taka ka awm chu ka lawm a, lawm avangin ka mittui a chhuak ta hial bawk.

"Sophia.......!?" mittui tling pamin George-a chu ka en vawng vawng a, ka harh tih a hriat ruala a hmêla hlimna lang chhuak zawk zawk chu hmuh hmaih chì rual a ni lo.

"Sophia......!" ti leh supin min rawn hnaih nghal ruak a, dam leh thlakhlelhàwm zet hian ka hmuiah a fawp nghal vang vang a, mahse a inla hrang leh vat thung.

"George......" aw chhâng ṭial raiha ka ti chhuak sep chu ka ṭawng rin loh tehlûl nen a lo hre rang khawp mai.

"Ka lawm e Sophia, ka lawm e, i lo harh leh hi ka lawm tak zet Sophia!" a ti chhur chhur a, thinrim awkâ lam lek lek mah ni se a mitmengah chuan lawmna leh hlimna a inlan chhawk zut zut a, a aw pawh a khap dai zo hman lo ni berin ka hria.

"Nangmah chauha awm turin ka kalsan leh tawh ngai bawk hek lo ang che" ti leh supin a kut lúm thar thar chuan ka biang chu a chul riak riak a, ṭap mai tur hmêl a pu te hlei hlei chu ka mittui ko chhuak zualtu a ni ka ti lo thei lo.

Min tihnàt hlau zet hian min kuah leh vawng vawng a, ka biang leh hmui chu a fawp deuh chhen bawk a, ka thih a hlauh thu leh min hmangaih thu ṭawngkâin chhakchhuak lo mah se a chet danah chuan min hmangaih ngawih ngawih tih a va'n hriat si ém!

Kâr lovah doctor a rawn lang a, engkim mai chu ka beisei phak piah lam vek a ni a, thi thei réng dinhmuna ding kha nung damin ka la awm chu a ni si a, chutah ka rin phak baka mak thil thleng a awm leh ta tlat mai!

George-a kâ ngei aṭangin ka rai thu ka han hria chu awih ngam lohnain ka khat nghal vawn vawn a, mahse a hmêla thutakna leh lawmna lang te chuan awih lo thei lovin min siam tlat bawk si, doctor-in ka pum chhûnga nauté, kâr khat leh a chanve vela upa a awm mêk thu a han sawi leh tâkah chuan ka thinlungah hlimna a rawn piang ve ta nge nge a, lawm avangin ka mittui nen lam a dir ta zawih zawih bawk.

Thihna pawh hian zuah chin a lo nei a nih dâwn hi ka ti ta hial a, ka rilruah eng dang réng a lut thei tawh lo va, George-a hlim leh lawm lutuk hmêl mawlh mai chuan kei ngei pawh min tihlim a, min tilawm a, mittui nen inchiahpiah reng mah ila engkim innghahna chu hlimna leh lawmna záwk a ni thung si!

Engtin tin nge ka lo muthilh leh daih pawh ka hre lo, ka harh leh meuh chuan George-a mai ni lo Colton-a hmêl pawh ka hmu tel ta nghe nghe a, ṭawng suam suam pah hian min nuih vur vur a, thil thlen dan zawng zawng a'n sawi ta chu Hazel-i ka ngaihtuah chhuak chiang kher mai.

Engkim mai kha Hazel Monroe-i leh a thawhpui Russian mite ruahmanna kaltlang veka thleng a lo ni a, pi Martha-i thihna te, HOME kan chhiat vek chhan te, pi Loren-i leh kan maid pahnih te thihna thlengin engkimah Hazel-i a lo inrawlh fai vek chu niin, mak ka ti lutuk chu awm dan tur pawh ka thiam lo hial záwk a ni.

Chutiang taka nunrawng leh itsiknaa khat mihring chu ka la hre ngai lo va, hriat leh pawh ka duh tawh hek lo! Hun liam tawh ka ngaihtuah a, keimah avanga nunna chân an awm chu ka thinlungah inthiam lohna tam tak a awm phah a, chu ka inthiam lohna chuan nghawng ṭha lo tak a nei zui ta bawk.

Ka rilru sukthlek a dik lo zo va, kei ve mai, fahrah, nu leh pa pawh nei lo avanga pi Martha-i te, pi Loren-i leh mi dangte'n nunna an chân phawk phawk chu hrehawm ka ti ngawih ngawih a, HOME kan ṭuma naupang ṭhenkhat thi ve ta chungah te thlengin inthiam lohna nasa tak ka nei a, lungngaihna leh inchhirnain min tuam hlawp hlawp reng a, ṭawng pawh ka ṭawng peih mang ta lo!

"I thiam loh a awm lo Sophia, ka laka Hazel-i insawi khawngaihthlakna zozâi kha ka lo ring thuk hman èm a tin a ni!" tia George-a min thlem leh dut dut ṭhinna te chu ka tân eng a ni zo rih meuh lo va, a tihngaihna hre lo chuan min han kuah leh ringawt ṭhin bawk.

Dik tak chuan puhmawh tur dang ka zawn ngial paw'n ka hre rih tlat lo a tin a ni!

Ka pum chu ka chul deuh reng a, George-a nena kan fa a awm tih ka hriatna chuan tlèmin ka awm a tinuam leh huai ṭhin a, nimahsela, ka ngaihtuahna a kal ding pôh leh keimahah mahni inthiam lohna a lian zel thung a, ka taksa lam a dam lo bawk nen rilru lam thleng thlenga a'n dam lo leh ta zel chu a thuah hnihin rilru a bing chuk chuk duh khawp mai.

Colton-a hnen aṭangin thil awm dan kan hre ve zel a, Hazel-i pawh tualthahnaa a inhnamhnawih avangin dam chhûnga lung in tâng tura a chung thu rel fel tawh a ni tih kan han hria chu dawnsawn dan pawh ka thiam lo.

Tin, kha zan, ṭihbaiawm leh nghilh har tak zanah vek khan police lamin an man nghal a, kei pawh kha silaiin min kap ngei kha a ni a, mahse ka vanneih a siamin min thah tum ruh em em si khan a pawi lai takah min kap lo hlauh hi a lo ni a, ka ngaihtuah lèt apiangin ka vanneihzia ka hre thar leh ṭhin.

Chutih rual chuan ka rilruah erawh inthiam lohna a reh phah chuang der lo va, 'awm lo ta ila chuan tûma'n nunna an chân awm si lo va' tih ringawt ka ngaihtuah ngut ngut a, ka pum chhûnga ka fa, George-a leh Colton-a chen chuan keimah avangin an thi ve leh mai ang tih ka hlau ngawih ngawih a, ka rilru leh ngaihtuahna zawng zawng chu hlauhthawnnain a khat a ni ber.

Chhun nî a ral a, zanin a chhunzawm a, ni thar a rawn inher chhuak leh zel a, rilru mumal hlei thei lovin damdawi inah chuan hun leh nî ka hmang chawl lo va, ka rilrua mahni inthiam lohna a la reh fel thei lo tlat chu thil tibuaithlaktu ber leh ka buaina lian ber a ni ta bawk.

Amaherawhchu, chuti chung chuan George-a dawhthei lo aw leh awkâ vin ka hre ngai lo hrim hrim a, min ning châng a ngah dawn lutuk tih pawh ka hre vek, mahse min ning hmêl réng a pu ngai lo va, min buaipui reng záwk a, ka rilru a nawm loh hlau reng rengin min tihhlim a tum ngar ngar ṭhin nghe nghe!

Thla khat dâwn damdawi ina kan inenkawl hnu chuan in lamah kan haw a, hun a liam zel ang bawkin ka rilru pawh chu tlem tlemin a danglam chho ve tial tial a, chutih rual chuan inthiam lohna erawh ka la nei ru reng thung a, ka bul hnaia awm, ka mi hmangaihte chu keimah avang bawkin an thi ve leh mai ang tih hlauhna mawlh chuan min chenchilh awl lo a ni ber.

Tin, nau ka lo pai ta kher bawk nen ka rin phak baka nasain George-a chuan min duat thiam a, min ngaihsak chhum lo chat lo va, company lamah pawh a kal tawh ngai meuh lo.

Chutiang bawkin Colton-a pawh a rawn lang deuh reng a, ei tur min rawn ken châng pawh a tam viau a, rilru pangngai tak put châng chenin ka nei chho ve leh ta fô mai.

Zan khat chu George-a chuan HOME sak ṭhat lam a rawn sawi chhuak hlawl a, ka rilruah pi Martha-i leh pi Loren-i te pahnih an rawn lang nghal a, ka lung a chhia a, ka awm dan chu hrethiam thuaiin George-a chuan a âwmah min kuah bei hle hle a, ka insum zo ta lo chu thlamuang zet hian ka ṭap feih feih a, ka lung a chhiat thut avanga ṭap ta mai mah ni ila ka lawm vang a ni pakhat bawk.

Pi Martha-i chu thuhran ni se, pi Loren-i ber ka ngaihtuah chhuak lo thei lo va, a dam lai khan HOME sak ṭhat a phur em em kha a ni a, min buaipuisak vek tur thute kha a sawi siam siam a, mahse tunah erawh chuan engkim a danglam zo va, ani chu mi nung ni tawh lovin thlaurau chauh a ni tawh záwk a, thlarau bak ni tawh lo mah se chutia HOME sak ṭhat leh kan tum tih chu hria se zawng a hlim ve ngei ka ring.

Zawi zawiin ka ṭha chho ve zel a, ka taksa dinhmun paw'n ziaawm lam a pan tial tial a, ka âwmah erawh ser a awm phah thung a, mahse chu chu ka buaina ber a ni hran lo.

Ni tin zan tin George-a hnen aṭangin duatna ka dawng awl lo va, hlim taka han nuih har har chângte pawh ka nei chho ve ta zeuh zeuh bawk a, chu chuan George-a tak pawh a tihahdam viauin ka hria.

Mahni inthiam lo reng renga hun hmang ṭhin kha ka ni tawh bîk lo va, inthiam lohna chen chu la nei ṭhin tho mah ila ka rilru chhûng ril takah erawh thil nih dan tur pawm thiam mai ṭha záwka rinna a lian em em tawh thung a, chu pawh George-a vang a ni.

Ni e, ani awm lo se chu thinlung keh chhe vekin ka awm ang a, mahni inthiam lo leh rilru nâ reng rengin hun ka hmang ngei ang. Nimahsela, ani chuan

"Khawvelah hian kan tân hun ruat bîk a awm ṭheuh a, tûma'n kan thih hun tur kan hre thei lo ang bawkin mi dangte thih hun tur pawh ka hre thei chuang lo, chuvangin engkim hi hunin a thlenpui a, an ral a, an liam mai a ni" tiin min hrilh a nih kha!

Kha thu a sawi zan aṭang khan ka rilruah danglamna nasa tak a thleng a, mihringte kan dam chhûng chu thihna a awm reng dâwn a, thil a nih ang leh a thlen tawh ang anga pawm thiam mai hi a rilru hriselthlak ber ta záwkin ka hria a ni.

(KUM KHAT HNUAH CHUAN)

Hmangaihna hi mihringte hriatthiam phak baka ropui, chak leh thil a tithei a, a chhe lam zawng emaw a ṭha lam zawng pawh ni se, awihawm loh khawpa thil mak thlentîr theitu awmchhun chu hmangaihna chauh hi a ni.

Ka nunah chung lam malsawmnain hmun a chang a, ka nun nawmna leh hlimna chuan thui tak a hril a, sâng tak a tawng bawk ti ila a sual lo khawp ang. Chutah ka hlim leh lawmna tizual turin fapa duhawm tak ka han nei leh ta zel bawk a, ka tân chuan lei hmun chu vanram tluk zeta mâwi leh nuamah an chang zo ta a ni ber e!

Tin, ka duhthusam ang ngeiin HOME pawh kan din ṭha leh ta nge nge a, HOME hming atân MARTHA'S HOME tih kan dah nghe nghe a, kan chhûngkaw bil tèin kan awmchilh nghal nghe nghe a, mahse HOME building leh kan in erawh a inhnaih ṭha viau nàin a inang lo thung.

HOME-ah chuan hnathawk pathum kan chhawr a, ka duh dan leh ngaihdan chu a ni chiah lo va, mahse ka pasal George-a berin ka hmâkhua a ngaih avanga a thutlukna siam a ni miau a, sawhsawn tura ka tih pawha a sawhsawn duh tlat loh avangin ka pawmpui ve ta nge nge a ni.

Kan in bîkah erawh hnathawk dang chhawr ka duh lo bur thung a, awmpui làk a tih paw'n ka duh tlat tawh bîk lo va, a chhan tak pawh nu ka nihna chanvo leh mawhphurhna chu in chhûng khur mai bakah ka fa leh ka pasal laka hlen ka duh vang a ni ber a, nu ṭha tak leh nupui ṭha tak angin min hria se ka duh vang a ni phakhat bawk, a bak chhan dang a awm hran lo.

"In lo la insiam na nge?" George-a lam chu ka hawi zeuh a, inbual zo chiah tih takah a sam chu a la hnâwng chap a, a kawngah chuan towel vâr thianghlim zet mai a veng ran bawk.

"Ka ngaihtuah chiang a, kan kalna áwm niin ka hre lo George....." ka ti dam diai a, kan fapa, ka hnutè hnea muhil ṭep tawh chu ṭhu chungin ka sukpui deuh dalh dalh a, hriat loh kârin kum khat lâi a lo tling ve ta reng mai.

"A àwm lohna a awm lo" George-a chuan a rawn ti sam mai a, ka ngaihdan nen erawh a inpersan lam hret chu a ni.

"Kan lo kal lo mai ang" amah pawh en lova ka ti leh dek dek chu

"A nih chuan ka kal dâwn lo ni mai rawh se!" a rawn ti nghal nghut a, ka lo thaw hak ringawt!

"Austin-a hi a hritlâng tih i ngaihthah hmiah em ni?" ka ti ve leh ngat a, dik tak chuan kan fapa dam ṭhat loh lâia zin chhuah chu ka huphurh deuh a ni.

"Ngaihthah lah lo ve le, ka ngaihtuah lutuk záwk" pangngai taka a rawn tih chuan

"Chuti si engati nge i ruala zin ve tura min sàwm tlat si?" ka ti leh ta khawl a, kan fapa hriselna ka ngaihtuah luatah ka aw chu a vin lam lek lek maithei a ni.

"Ka sâwm ngai lo che pawh a ni hleinem Sophia, i rai chhûng zawng paw'n ka kalna hmun apiangah ka hruai ṭhin che a ni lo'm ni? Tunah chuan Austin-a paw'n kum a tling tawh lehnghal a, i tân tak a zàngkhai huai ka lo ring záwk asin" a rawn ti ve ta nghut nghut a, a sawi dik tho bawk si nen ka ngâwi ta hle hle.

"Ka sawi tawh kha, khawiah pawh kal ila ka bulah lo i awm tawh dáwn lo" amah bawk chuan a rawn ti leh a, kum khat kal taa Hazel-i avanga thi deuh thawa ka awm chhanah khan amah leh amah a inpuh tlat a, chuvanga a zinna apianga min hruai zel tum ta chu a ni ber e!

"Dik tak chuan tun ṭum chu ka phur lo khawp mai George" ka ṭawng ring hran lo va, ka bulah a rawn phei thuai nghe nghe!

"I nuam lo em ni?" tiin a kut chuan ka chal leh ka pang a tawk kual den den a, kei erawhin ka lû ka lo thing vat thung.

"Chu lam pawh a ni chiah lo, ka phur lo ve tawp!" ka ti hniam leh raih a, min en chik nghal ngur a, dam lo emaw min ti a ni ngei ang.

"Damdawi ka va là ang e" tih leh thawh a rual nghal a, là lo tura ka hrilh chung paw'n a rawn là ta tho va, min eitîr nghal nghe nghe bawk.

"Naktuka sawn mai a ṭhain ka hria, ka'n be chhin ang e" tia a phone a khawih mual mual lâi chuan ka dang vat a, keimah avanga ram danga mite nen an sumdawn tawnna tur business agreement sign nî han sawntîr ngawt chu ka duh lo hulhual!

"A ṭul lo George, ka ṭha alawm, ka nuamsam lo deuh mai chauh a ni. Ka thei ang, ka lo kal thei ang" ka ti ta zung zung a, chal chuar tap hian min rawn en a, ka lo ṭhen sak ringawt!

"Min ngaihtuah lutuk suh George, min ngaihtuah leh lutuk hian ka awm thiam lo záwk ṭhin" ti leh sapin a hmuiah chuan ka fawp zeuh a, a hmêl leh mitmengah erawh min ngaihtuahzia a la reh fel hauh lo thung.

"A nih chuan hun kan nei tam lutuk lo bawk a, UK lamah kan inentir law law záwk mai dâwn a nia....." a rawn ti ve ta dut dut a, ka ṭhat thu sawiin inentîr duh lo teh mah ila a sawi ang chuan min awmpui dâwn tih ka chiang a, ka hnial buai duh ta lo law law mai. 

Chutia kan thu a inhmuh fel tâkah chuan muangmarin kan insiam zui nghal a, kan thlawh chhuah hun a hlâ vak tawh lo bawk nen kan muangchang lo dun khawp mai. In aṭanga kan chhuak, kawngpui lam kan pan lâi chuan naupanghovin HOME kawt aṭangin min thlah liam liam hlawm a, kan tlan liam dâwn thlengin an bân min vai khum lauh lauh a, min en zui dauh dauh pawh an awm fur nghe nghe!

Kâr lovah airport kan thleng a, kan thleng timing khawp mai. Kan thlen aṭanga minute tam pawh ni lovah kan thlawk chhuak nghal der a, thlawhna kan chúan lâia Austin-a rawn harh chu George-an a pawm nghal thak a, an pafa chuan an inchhaih nui ver ver a, kei erawh nui lui hram hram ṭhin teh mah ila ka awm a nuam thei tlat lo va, ka zawi ru ngawih ngawih ni berin ka hria.

Ka awm zui zel dan hre lék lovin ka lo muhil ta nge nge chu niin, ka harh fel meuh chuan George-a dar nghengin ka lo mu ran a, ka harh chhan tak pawh thlawhna ṭum che ah a ni lehnghal a, ka lo muhil tui bawrh bawrh viau a nih hmêl!

"Fanu leh fapa ka nei a ni ringawt alawm le....." George-a fiamthu chu ka nuihpui sak a, ka bianga a rawn piai zui zeuh kher chu ka lo ner nasa teh e!

"Hmeichhe naupang ka ni tawh bîk lo a nia....." ka ti deuh charh a, ka fiamthu ve tho a ni tih hrethiamin a nui ta huah huah bawk.

Thlawhna a ṭum fel ta maw tihah chuan kan chhuk diah diah hlawm a, airport aṭangin hotel lam kan pan nghal a, ṭum danga min zinpui ang bawkin kan awm tur hotel pawh a theuneu lo leh khawp mai. 

Hotel-a kan han innghat fel chu damdawi in lam panin min chhuahpui lehnghal a, a thu sawi tawh leh ka ti ang a tih tawh hi chu a theihnghilh ring lo tawp ila a fuh ber ka ring.

Rei lo tè hnuah hospital kan thleng der a, doctor chuan ka rin loh lam daih min lo zàwt a, ka bulah George-a a awm ve reng bawk nen chhán mai nachâng ka hre lawk lo nghe nghe a, titura min tih ka'n ti nghal zet phei chu ka khur ru deuh dar dar a, chutiang dinhmunnah chuan ka ding leh ang tih rèng ka beisei pha lo hrim hrim a tin a ni!

"Ka lawmpui a che Mr. Frazier, i nupui hian nau a pai e" tluangtlam tak hian doctor chuan a ti zàngkhai vah a, ka mit leh George-a mit chu a intawng nghal chat a, a mak ti hmêl chu ka hai lo chiang kher mai.

"Doctor sawi hi a dik em Sophia?" awih ngam lutuk lo tih hriat taka a rawn tih chuan nui chungin ka lo buk khum nghat a, a mitmenga rinhlelhna chu hlimnain a luahlan zui nghal bawk.

"I pasal chuan a ring hle mai che a Mrs. Frazier......" tiin doctor chu a rawn fiamthu zawm zat a, ka lo nui sak a, George-a erawh a la meng â hú thung.

"I awih lo em ni George?" ti leh sapin ka nuih sen sen a, awm hnaih deuh hretin a hmuiah chuan ka fawp nghal zeuh a, ani pawh chu a rawn nui nghawr ve ta dat dat!

"Ka lawm e Sophia......" ti thum dam dap hian min fawp vawng vawng a, a mi fawh dan chuan lungthu a va'n tikim leh pek ém!

Hospital kan han chhuahsan fel te chu kan chhûngkua bîk té chiah kan ni tawh bawk nen a nui deuh sun sun reng a, a hlim a ni tih chu mi â ber paw'n an hrethiam ngei ang. 

Kan thlenna room kan luh rual rual chuan kan fapa Austin-a pawh ngaihtuah lèk lo hian min pawm nghal chawn chawn a, a awm dan chuan hlimna thuah hnih min pe a ni ber.

"Ka hmangaih che George......" chu thu ka sawi zo chiah chu a nui tawp nghal hmak a, mak tih hmèl fê hian min en hau ringawt!

"Ka thinlung zawng zawngin, chuan, min hmangaih hmâ daihin ka hmangaih tawh bawk che" ka ti leh chiah chu

"Sawi nawn leh rawh, sawi nawn mawlh teh Sophia" a rawn ti nghal thuai a, a mak ti hmêl leh ringhlel hmêl chuan min tihlim zual kher mai.

"Ka hmangaih che George Frazier, ka dam chhûnga i nupui nih a, kan fate enkawl dun a, i rawng bàwl ka duh a ni" ka ti nêm leh diai a, chu thu ka sawi zawh rual rual chuan ka biang tawn tawna chelhin min fawp nghal ngawng ngawng a, kei pawh chuan ka lo chhâng lèt ve nghal tawn tawn bawk.

Awm pangngaia kan awm hle hle hnu thlengin min kuah run reng a, a châng leh ka chalah a rawn fawp leh zauh ṭhin a, kan fapa, a ma tal tala tal pawh chu ngaihsakna châng hre lo ang hrimin kan awm dun vang vang a, kan khawvel chu a famkim tak zet a ni.

The End