𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟒)

THE PRESIDENT'S WIFE

(Contempoarary M&B Story)

By

Havali Adam

Chapter 4

Chu thlasik zíng vawt her her chu hmun hran daiha rilru awmtîr chungin ka hip lut leh kawk ṭhin a, George-a hmêl rèng hmuh tur a awm bawk si lo nen ka rilru mai bakah ka awm dang zawng zawng a danglam titih vek tawh a, pi Loren-i a la rawn tho chhuak lo hlauh erawh ka tân chuan vanneihna a ni. A chhan chu tho tawh ngat se zawng George-a awmna min záwt leh ngei ang a, ka chhâng thei dâwn der si lo.

Ka tih tur hre lo chu room lamah ka chho leh ta ngawt a, thil dang ngaihtuah ka tum pôh leh George-a ka ngaihtuahna a zual ting mai si, chutiang em em chuan ka ngaihtuah ang tih rèng ka dâwn pha lo hrim hrim bawk. Minute tin chu a liam zel a, nî éng a fiah telh telh a, khua pawh a vâr tial tial a, kâr lovah breakfast ei hun a rawn inher chhuak der a, in hnuaia ka chhuk thla chu pi Loren-i newspaper lo chhiar ka hmu hmâsa ber a, ngunthluk hmèl zet hian a bih ngar ngar a, ka thawm chu hre lo ang mai a ni.

A lam pana phei ka tum lâi tak chuan in kawtah motor ding thawm a rawn awm a, George-a a nih ringin beiseina ka nei nghal a, ka thin a su deuh dup dup a, ka rilruah chuan zawhna tam tak a awm nghal zut zut bawk. Pi Loren-i ṭhutna lam pawh phei chuang lova ka ding deuh tlawng lâi chuan kawngkapui a rawn inhawng a, George-a hmêl chu ka hmu ta ngei a, ni dang ang lo takin ka lo en chiang mah mah nge ni, mak tih ruk hmèl zet hian min rawn en deuh hû nghe nghe!

"I thawhna a rei tawh em?" tih leh ka hmâa din chu a rual a, kei pawh chuan

"Rei ve tawh tho...." ka lo ti mai a, in chung lama a chho chu ka zui chho nghal bawk.

"Khaw'nge i kal a?" room chhûng kan luh fel hnu chuan ka ti sap a, ka lam a rawn hawi zawk a, a mak ti hmèl chu ka hmuh hmaih lo va, dem pawh ka dem hran lo.

A chhan chu kei hian kan inneih ata a kalna emaw a thil tih pawh ni se ka zàwt ngai lo miau a tin a ni!

"Ka chhuak lawk....." tih té hian min rawn chhâng a, dáwt sawi miah lo mah se thil dang a la awm tlatin ka hria.

"I va'n tho hmâ àwm ve, ka thawhin i lo awm tawh miah lo a....." záwt tlang rawt ngam chiah si lova ka thusawi dan vel chu mak a tih hmèl leh ta hle.

"Chu.....ka awm lo chu min lo ngaihtuah hman viau a ni maw?" min chhán dan teh daih chu ka rin loh lam tak a ni.

"Teuh lo.....chutiang pawh a ni lo" ka ti deuh niah niah a, ani ren run lah chuan min en chiang sawt lehnghal!

"Min lo ngaihtuah miah lo maw?" a kiai zui suk a, chutianga a nui hmêl chu ka vawi khat hmuhna a ni nghe nghe!

"Min ngaihtuah lo tak tak maw?" amah bawk chuan a rawn ti hniam leh ruih a, han chhàn dan tur ber pawh ka hre lo.

"Ka chhuk mai dâwn asin......?" ka ti ta ringawt a, ka awm reng a nih chuan ka rilru chhúngril zawng zawng nen lam a hre fai vek mai ang tih ka hlau a ni.

"Chhuk thlak rual i duh lo em ni?" kal sawn ka tum uk tawh chu ka ding leh rih a, ani pawh chuan min rawn en reng tawh bîk lo.

"Min lo nghak rawh, ka rei lo ang" tiin a kawr chung chu a phelh zung zung a, kawr lûm pan ang reng tak a ha zui zat bawk.

In hnuaia kan chhuk thla chu pi Loren-i, breakfast table-a lo ṭhu ran tawh chuan min lo en deuh vang vang a, tukin chu eng a hria nge ni, zîng dang ang lo takin George-a nena kan chhuk thla rual chu a hlim hmèl miah lo, a tho fuh chiah lo te pawh a ni maithei!

Breakfast kan ei lâi te chuan a ṭawng tam duh lo hle a, thil sawi duh nei ni àwm takin ka hmu a, thlenga ei tur awm te chu ei ṭha mang hlei lo hian a chawk kual sek a, biak ka tum zet nain ngàwih ka chuh leh rih ta záwk!

"Nizan leh tukinah khaw'nge i awm?" pi Loren-i lam chu ka hawi zawk a, kei ni lovin George-a záwk a en ngar a, a hmêlah chuan a lungâwi miah lo tih a lang chiang hle bawk.

"Ka chhuak lawk....." George-a chhánna chu a tawi fel than a, mahse 'chhuak lawk' han tih tur èm chuan a thang bo rei lulâi ve deuhin ka hria.

"Zan khuaa i chhuahna chhàn chu i sawifiah dâwn lo em ni?" pi Loren-i chuan tìmna nei hauh lo hian a melh kal a, kei erawh dèk pawh ka ti ngam lo tluk a ni.

"Ka lakah i lungáwi lo tih ka hria, chutiang bawkin kei pawh i lakah ka lungáwi chiah lo" George-a lam chu ka hawi zawk a, chutiang chuan pi Loren-i a chhàn àwm rèng ka la hre lo.

"I kalna ka hria a, i chhuah chhan pawh ka hria, tuna chinah hmu tawh miah lo ang che!" pi Loren-i chuan a rawn ti chang ta fak fak mai.

"Chu zawng ka thu ni rawh se, i sawi thui rih lo záwk teh ang" George-a aw pawh chu a dam miah lo, a bul mah mah záwk!

"Sophia-i a awm ve avanga kan sawi lohna chhan tur ka hre lo, i nupui a ni a, hre ve pawh ni se eng nge a pawina.......!?" pi Loren-in min hmer tel ve ta chu ka hrethiam lo kher mai.

"Duh táwk rih teh ka nu!" nin hmèl zet hian George-a chuan a ti hluk a, thil ei tuma a kun tawh chu a rawn dak chhuak leh ngat nghe nghe!

"Kha hmeichhe lawi lo tak kha hmu tawh lo la a ni mai" pi Loren-i thil sawi avang chuan ka meng kual ralh ralh a, ka ngaihtuahna pawh a kal thui nghal hle.

"Ka puar ni teh se!" ti bul nghutin George-a chu a tho ta daih a, kan room lamah a pen chho nghal pawk pawk a, hai rual lovin a thim a rim hle a ni.

Pi Loren-i pawh chu rei ṭhu bîk lovin a tho zui ta daih a, keimah teh tlawnga ka han ṭhu chiah chu rilruah thil chi hrang hrang a rawn lut zut zut a, a bîkin nizan zan khuaa George-a chhuah bo chhan mawlh mai chuan ka thluak chhûng a luah awl lo va, kan in chhûng boruak ṭha vak lo chu thuhran ni se, George-a awm loh chhûng zawnga ka rilru buaina te ai mah khan ka rilru puthmang chu a buai ta záwk hialin ka hria.

Mumal lo zeta breakfast ka ei zawh hnu chuan in chung lamah ka chho a, kan room ka'n lut chu ṭi dek hian ka awm a, ṭit lohna chì pawh a ni lo. George-a chu a kekawr iptè zen ran chungin tukverh bulah a lo ding ngawi reng a, ngaihtuah ding hmêl tak hian a awm a, biak hun nia ka hria loh avangin ka be miah lo bawk.

Kan room aṭang chuan thawm dim zetin ka chhuak leh ta zal zal a, in chhûngah pawh awm rei lovin páwnah ka chhuak a, thlasik thli fîm thiang tak chu ka hip vang vang a, ka awmna hmun hmâin a zir bawk nen thlasik boruak dawn nuam tak zawng a ni chiang a ni. Eng emaw chen chu ka awm deuh vang vang a, in chhûngah ka lut ve leh mai a, mahse pi Loren-i leh George-a inchhâng thawm avang chuan ka ke pen lâi ka tawp nghal chat!

"Khatih hun lâi khan engmah i hre lo, i tâna ṭha tur chu ka tih mai lo te'n, i nu alawm ka nih!" pi Loren-i awka vin zawi lo tak chu kawngkapui bula dingin ka ngâithla kar a, ngàihthlak ka tum pawh a ni lo.

"Ka tâna ṭha tur i duh luatah ka fa lo piang tur i that tih i theihnghilh loh hram ka beisei" George-a aw pawh chu chang ṭha bawl bawl tak a ni.

"Eng dáwt thu nge a lo fah che ni! Mi ṭha a ni lo, hnaih tum buai tawh suh, nupui nei lâi i ni tih te hi hre ta che!" pi Loren-i chuan a ti vin leh phiar phiar a, ka lo ding mar awt thei hial!

"A nih tuna ka nupui ni mêk hi ka duh rèng vanga nei ka ni em?" George-a zawhna avang chuan ka rilruah hrehawm tihna leh engmah lo maia inngaihna a rawn put chhuak nghal zut zut a, ka zak ru chem chem bawk.

"Khatiang thu kha sawi a ṭul ber lo, ka thua nei lui chu i ni ngei a, mahse i tâna ṭha tur vek a ni; i tâna ṭha tur bak tih ka nei ngai lo!" pi Loren-i aw chu tlêmin a hniam ta deuh a, mahse a la vin fiah hlar tho.

"Ni lo, ka tâna ṭha tur emaw i tih tam tak hi ka tân a ṭha vek lo!" George-a ṭawngkam avang chuan ka inhum ruh ngawt ngawt a, keimah ka lo inngaihbel lo thei lo a tin a ni!

"Kha mi tlâktlai lo nu avang khan Sophia-i hi ṭhen tum miah suh ang che, i ṭhen a nih vaih chuan thil ṭha lo tak i ti tih engtikah emaw i la hre chhuak tho tho ang" a vawi hnihna atân pi Loren-i chuan ka hming a rawn lam ri leh ta nge nge!

"Chu lam zawng ka thu ni rawh se!" ti hmukin George-a chu kawngkapui lamah a rawn pen phei khup khup a, ka lo melh zeuh tih loh chu en pawh ka en ṭha ngam lo.

Kawngkapui hawnga in a chhuahsan rual chuan a thaw deuh fua a, ka awm ve tih pawh hre lo ang maiin a chhuak nul nul a, in kawt aṭanga a tlan chhuak thawm te chu benga hriat phak vek a ni a, mahse chu thawm chuan nasa takin ka thinlungah hna a thawk thung.

Ka dinna ngaiah ka lo ding rei lutuk nge ni, ka hawi chhuah meuh chuan pi Loren-i hmêl rèng hmuh tur a awm tawh lo va, chutiang bawkin maid pahnihte pawh! Ka tih ber tur hre lo chu sofa-ah ka ṭhu deuh tawp a, sofa sîra newspaper lo inpharh darhsarh nuaih lam ka'n hawi chiah chu George-a thlalak ngei mai ka hmu nghal zat a, chutah amah chauhin a ni lo lehnghal!

Ṭhut hnaih sawt sawtin ka là kang thuai a, thlalak pawh en tawh chuang lovin thu inziak chu ka chhiar nghal a, newspaper-ah chuan kum tam tak liam taa George-a bianu nghet lo ni reng tawh ṭhin Hazel Monroe-i lo lèt leh thu leh ka pasal George-a nen ngeia hun an hman dun thu a lo inziak tlar thla dual a, media lam pawh uksak miah lova an inkuah lái thlalak te chu ka en ṭha leh ngat a, ka thinlung chhûng a nâ nghal zawk bawk.

Sawi tur ka hre lo va, ngaihtuah ber tur pawh ka hre chuang lo, mahse ka rilru erawh a buaiin a nâ tih ka hre chiang em em thung. Thu inziak chu chhiar zawh loh ka tum zet nà a, ka chhiar zo ta tho va, chu chuan ka rilru nàtna a tipunlun chiang hle bawk. Kan nupa room-ah chhovin ka inngaihtuah ding ngar ngar hle a, ka awm lohna hmun turah ka awm ni berin ka hria.

Khumah chuan ka mu meng kar a, ka rilru leh ngaihtuahna a kal thui telh telh a, ka inhmu tê chem chem a, ka nâtna chu thup hram hram tum teh mah ila ka thei thlawt si lo. George-a ka ngaihtuah chhuah apiangin ka mittui a hnai kuarh kuarh reng a, ngaihtuah loh tawp ka tum lahin ka thei der bawk si lo, tu min hriatthiampui si lovin ka nâ ru vawng vawng a ni ber!

Ka inngaihtuah lungpuam tak tak hmâin ka tho thuai a, ka rilruah chuan pi Martha-i bula awm bak a lang lo va, ani bulah zawng rilru nâ tak pawh ni ila ka hlim theih ka beisei tlat a, ka hlim ngei pawh ka ring. Thawmhnaw lûm hak belhin in aṭang chuan ka chhuak a, pâwn ka'n chhuak chu boruak a lo inthlak danglam nasa hle a, ka lungngaih rukna leh ka thinlung nàtna te min hriatthiampui ang hrimin chhum pâw deuh chûk te chuan nî èng an hliah vâr vek a, vur pawh a rawn tlâk thuai a rinawm hle.

Chutia pâwn ka chhuak chu pi Loren-i driver chhawr Anthony-a chuan min lo be vat a, ka kalna hmun tura hruai ka ngaih leh ngaih loh thute min záwt a, inhruaitîr ka tum deuh rum rum hman tawh a, mahse ka ṭhulh leh ta záwk! A ngaih loh thu ka hrilh hnu chuan min ngaihsak zui bîk lem lo va, kei pawh chu taxi pharin HOME lam ka pan ta vang vang!

Boruak a inthlak danglam zel a, ka rin rilruk ang chiahin vur chu a rawn tla ta chum chum a, chu chuan khua a tivawt zual hle bawk. Ka kawr lûm hak a lo chhah lutuk lo nen vawt ka ti nghal der a, taxi driver pawh chu a bang bîk chuang lo. HOME thlen nân mêl tlèm tê bak a awm tawh lo tihah chuan vur chu a sùr hian a rawn sûr a ni ber a, kawng hmuh ṭhat theih loh khawpin a sûr chum chum a, keini pawh kan tlan sawt lo ta khawp mai.

Mêl tlèm tê bak awm tawh lo mah se rei fê chu kan tlan a, truck bungraw phur nen kan insû ṭep nghe nghe a, kan vannei hlauh záwk a, chuti ni lo se chu thihna hial tàwk thei reng dinhmunah kan dingin ka hria. HOME kawt kan thlen meuh chuan dârkâr tam tak a liam ṭeuh hman tawh a, taxi fare te pein ka chhuak zui thuai thuai a, pi Martha-in chutiang huna min han hmu hlawl chu mak a lo ti viau a, zawhna min lo zàwt nasa nghal mawlh mawlh hle bawk.

Naupangho ṭhat leh ṭhat loh te sawiin thil chi hrang hrang kan sawi dun ta melh melh a, nu ang chiaha ka en tih takah keimah chauha ka kal chhan min zawh chuan zep nei hauh lovin ka hrilh tlang vek a, a hmêla min khawngaihna leh lainatna lo lang chu ka ṭahpui ta nge nge a, ka nunah mipa avanga ka ṭah hmâsak berna a ni nghe nghe!

"George-a chu i lo hmangaih hman em ni Sophia Bawihi?" lû thing nawk nawkin pi Martha-i chu ka kuah thlawp a, ka ṭap bâng thei rih lo a ni ber.

"A châng chuan hmangaih neih hi a hlimawm viau rualin a lungchhiatthlak ṭhin rèng asin!" rawn ti leh dat datin ka sam chu a chûl hliau hliau a, chu chuan ka ṭah a tichhuak zual sauh bawk!

"Engati nge hetiang hian ka awm?" tiin ka ṭap zui feih feih a, ka mittui, vûr tla chum chum ang maia sûr zawih zawih chu dan pawh tum ila ka theih ka ring lo.

"I lo ngaina hman viau tawh te pawh a ni mahnà....." awka nêm diaia a tih chuan la ṭap reng chung hian ka inngaihtuah vang vang a, mahse ka thluak erawh a fîm hlei thei rih thlawt lo a ni.

"Ngainatna hi chu hmuh theih loh leh khawih theih loh a nih vangte pawh a ni ang, hriat loh kârin a lo piang a, chutiang bawk chuan hmangaihna pawh hi hriat loh kâr veka rawn irh chhuak a ni ṭhin. Kan thil hmuh leh hriat te hian rilru a lo tinâ thei fû a, thil ho tak anga lang, mahse han nâtpui lawih tham a nih tawh si hi chuan, eng thil pawh ni rawh se, keimahniah hmun a chang thuk hle tawh ṭhin záwk a lo ni" pi Martha-i thusawi mal tin chu ka ngaihtuah chian pôh leh a dikzia ka hre chiang tulh tulh!

"Eng ka ti ta nge ni le.....?" ti fân raihin ka thluak chu ka tifím lui hram hram a, pi Martha-i ka kuahna ata inla hrangin ka en ngai ka en reng a, George-a bawk ka ngaihtuah chhuak leh ta nge nge!

"Ni e, i sawi dik ang, hriat loh kârin ka lo ngaina thuk tawh viau te pawh a ni maithei! Kan kârah eng thu hla mah awm lo mah se nupa kan nihna hrim hrim khan min lo phuar khawm hneh êm a, chuvangin he fahrah thinlung satliah ve mai hian a lo ngaihsak ru tawh lutuk ni ta berin ka hria" ka ti hniam leh raih raih a, ka rilru puthmang danglam chhanah chuan eng dang ka puh thei lo, hun tih chauh lo chu!

Khang hun liam ta zawng zawng khan ka hriatthiam phak bakin keimahah hna a lo thawk nasa a, chu chu tuna ka buaina chiah a ni rèng a, engah mah ngâi lovin en liam thei dâwn ni ila chuan ka thinlung a nâ lo ang a, ka ṭap lo ang a, ka awm dan a danglam phah bawk hek lo ang, mahse chutiang chu thil thlen dan a ni mawlh si lo.

Rilru nâ leh ruma awm reng zawng dikin ka hre ta lo va, ka awm dan, ka hawiher leh ka ṭawngkam zawng zawng chu ka thlak thuai a, pi Martha-i paw'n pangngai leh vek tawhah min ngâi har lo hle. Ka haw leh dan tur min zawh chuan chhàn dan tur ka baihvai ru ang reng hle a, taxi ti ngawt dâwn ila vûr a sûr nasa mai si a, chhâng chiang duh lovin thil dang ka sawipui ta ringawt!

Ka awm rei deuh hnu chuan naupangho bulah ka tlâ a, an titi leh ṭawngkam hman thianghlim tak tak te chuan min tihlim hle bawk. An thiam thil leh an thil zir thar chi hrang hrang min show khum zet zet hlawm a, min bawr luih luih reng a ni ber. Chutia duh duh sawia kan inkawm khawm laih laih lâi chuan pi Martha-in min rawn ko a, kei pawh chu ka phei ve nghal mai bawk.

"Engtin nge ni dâwn? Hei, khua lah heti hi a ni si a, haw dâwn pawh ni la hawna chì ah ka ngâi lo, i chanchin hrilh hrim hrim la a ṭhat ka ring" pi Martha-i chuan a ti zàngkhai vah a, kei ang lo takin a lo ngaihtuah kim bîk leh teh e!

"Ka'n bia ang e" tih leh ka kawr lûm hak iptê chu zen ka rual a, mahse ka phone rèng a lo awm ta hauh lo mai.

"Phone ka ken chhuah theihnghilh daih a nih hi maw le" hre chhuak zawkin ka ti hliai a, ka hriat sual loh chuan kan nupa room chhûnga dawhkanah khan ka phone chu a awm ngeiin ka hria.

"A nih chuan khaw awm dan ngáihchàn pahin hetah dinner ei ve nghal mai rawh" pi Martha-i chuan a rawn ti ta ngawt a, chu sâwmna chu ka tân zawng han hnial phal chì ziazâng a ni lo.

HOME ka awm ve lâia kan tih fô ṭhin angin ei rawng kan bâwl dun a, kan titi siam siam pah a, naupang ṭhenkhat, tlêma lian ve tawh deuh hlek te chuan min pui liam liam bawk a, ka bulah eng pawh an sawi ngam a, pi Martha-i tluk zetin min ngaina a ni ber. Dawhkana dinner kan han kil te chu ṭawng an inchuh niah niah hlawm a, an nun khawsak dan sângin changkang lo mah se an zîngah chuan ka va'n hlim si èm!

Zan lam chu tlêmin boruak a zia a deuh a, vûr pawh tla tawh lovin sikpui ruah a rawn sûr ta buan buan záwk a, khua pawh tlêm chuan a vawt ta lo deuh záwkin ka hria. Naupangho nen bawk hun kan hmang leh a, ka thawnthu sawi chu ngaihnawm ti em em hian an ngâithla ṭhap a, kár lovah an mut a chhuak thuai a, anmahni khum ṭheuhah kaltîrin ka mangṭha diat diat a, ka chet dan avang chuan pi Martha-i pawh a hlim ru hlein ka hria.

Mei lûm âiin eng eng emaw ni ka sawi dun sep sep a, coffee tui tak min hlui bawk a, hmân ata tawh a coffee siam hi chu ka la ngaina reng mai. Chutia kan titi melh melh lâi chuan kawngkapui a rawn inkik ri karh karh a, ruah a la tla reng bawk nen ṭanpui ngâite an nih tâk hlauhah tiin pi Martha-i chu a che chhuak thuai a, kawngkapui a hawn ruala kan mi hmuh erawh kan va han beisei lo dun tehreng èm!

"Ka lo lut thei ang em?" George-a aw chu a khur deuh bap bap a, a sam huh hlup aṭang chuan ruah tui tih hriat tak a far thla tluk tluk bawk.

"Aw, tehreng e, lo lut rawh, engati nge ruah te i do mai le.....?" pi Martha-i chuan a ti ta zung zung a, chutiang huna George-a hmêl a hmu thut chu mak a ti ve ni ngei tur a ni.

"Min lo nghak lawk rawh, puan ka lo la ang" lo ti ve thuaiin ka che chhuak zui nghal a, inhruk hulna tur puan pawh chu ka hmu har lo hle.

Puan ka pek rual chuan a lo là ve mai a, ani ang puitling uaih tawh si, chutianga ruah a rawn do hmiah hmiah duh chu mak ka ti ru hle a, puitling satliah pawh ni lovin mî chunga lêng pha ngat chin a ni lehnghal a, eng vanga ruah han do mai chu nge a nih ka hrethiam lo hle. A thawmhnaw huh dan aṭang chuan pâwn lamah ruah a tla nasa tih hai theih a ni lo va, mahse chuti chunga ruah a rawn do hmiah hmiah duh chu mak ka ti tawp hlei thei lo a ni e.

"I phone i keng lo a......?" hniam lam lek leka a rawn tih chuan

"Nia, ka lo theihnghilh daih alawm le....." ka ti ve mai a, mitmeng dam ruiha min enna chu tuar thei lovin ka hawi sawn ta daih bawk.

"Coffee ka lo thlit ang che chù George?" pi Martha-i chuan a lo ti diai a, George-a chhánna pawh nghak lem chuang lovin a thlit chhuahsak titih chu a ni nghal der!

"Min duhsak luatah min thiktu an awm leh mai lo ang maw?" George-a ṭawng dan ber kher avang chuan thil hriat chhuah ka nei chiang hle.

"Ni e maw le, ka lo ngaihtuah miah lo va, ruah sùr lâi mah ni se thing a phun leh daih lo ang tih a sawi theih miah loh" tiin pi Martha-i chu a nui zui hak hak a, kei erawh ka nuih a za ve der lo.

"Ti khan lo inkawm rawh u, naupangho an mu ṭha nge mu ṭha lo ka va thlithlai lawk ang e" tih lehin pi Martha-i chuan thawh a rual zat a, eng khaw sawi set set tawh lovin a kal zui nghal chu a ni mai.

"Min hruai turin em ni i lo kal?" ka ti chhuak sap a, ka biak pa chuan a hre pha tih ka chian èm avangin ka ṭawng ring lo hle.

"Ka lakah hian lungáwi lohna i nei em?" a hmêlah chuan inthiam lohna ka hmu a, mahse ka en rei ngam leh ta chuang lo.

"Nei lo ve........" ka ti hman ṭawk ang tihah

"Tukina thil thleng avang khan i mi hriatthiamna ka dil ni rawh se" a rawn tih zawm thlup a, awkâ dam taka min biak tawh hi chuan ngaihthlak nuam ka lo ti veng veng ṭhin.

"Hriatthiam ngâi khawpa thil tihsual i nei reng reng hleinem George" pangngai tak hian ka ti hliai a, chutah ka kut chu a rawn hum thut a, ka phu deuh uih nghe nghe!

"Engati nge engmah sawi lova in i chhuahsan? Kei tal chu min hrilh tur che alawm?" min biak dan chuan ka thinlung chhûng a tinghing dawt a, keimahah dik lo a rawn awm nghal thuai bawk.

"Sophia.....?" ti lehin ngenngâwl zet hian min en a, thu dik tak hrilh mai chu a ṭhain ka hria.

"I thin a rim bawk si a, min hmuh nin ka ring a, chuvanga in chhuahsan chu ka ni e" ka ti zawi dat dat a, ka kut a vawnna ata chu ka tal chhuak zal zal a, min en reng tih pawh ka hria, mahse ka hmu lo der tlat thung.

"Ka nu lakah chuan ka thin a rim ngei e; i lakah ni lovin!" dam thlup hian a ti thum chhal a, ka kut chu a rawn chelh leh ngat bawk.

"Kan chungchâng hi ngaihtuah ṭhat a ngâiin ka hria George......?" a mitah tak ka en lui ve ngar ngar a, mahse engtia rei nge ka en theih ang ka hre lo.

"Ni e, a ngâi a ni" a rawn tih chuan ka hnîm nghal sawk a, hawi sawn hmâsa záwkah ka ṭang leh ta nge nge a, ka ṭah mai loh nân ka inthunun nasa hle.

"Min hruai tur chuan em ni i lo kal?" ka aw chu a lawi rât a, ka ṭah a chhuak ru ngawih ngawih tih a hriat loh hram ka beisei!

"Heta riah hi i duh em?" a zawhna chu ka beisei loh lam tak a ni.

"Duh ti ta ila engtin nge i awm ve ang?" ka melh pah zeuh a, min chhàn dan tur chu ka ngâichang ru reng bawk.

"Ka riak ve mai a ni ang chu!" a rawn tih chuan mak ti zet hian

"Haw i tum lo tihna em ni?" ka ti nghal hluai a, ani ang mi lar leh hausain HOME-a riah a hreh miah lo chu mak ka ti thlawt a ni.

"Ka ruala haw i tum te a nih ngawt loh chuan chuti maia haw ka tum bîk hleinem" chutiang thu chu eng rilru pua sawi nge a nih pawh ka hre lo e a!

"Ruah lah chu a sûr nasa ang reng bawk si a, awm ve reng rih mai rawh u" pi Martha-i lam chu kan hawi phei rual ṭhat a, naupangho a thlithlai zo fel tawh ni ngei tur a ni.

"A rem chuan hetah hian kan nupain kan riak nghal law law mai ang" George-a chu ka en thuai a, pi Martha-i tak pawh a bang chuang lo.

"A ṭhat nasat chu! Khaw awm dan aṭang hi chuan han haw chì ziazâng a ni si lo va, in mutna turin ka khum ka va siam ang e" tia pi Martha-i kal zui nghal mai a tum chu George-a chuan

"A ngâi lo ang, puanthuah awm se a táwk mai, chhuatah hian kan lo mu ang e" tiin a ko ding a, thil dang zawng ai chuan chhuata mut a sawi mawlh chu mak ka ti lo thei lo.

"I rui chu a ni èm lo maw George?" ka tih ngawt phah nghe nghe!

"Ka ruiin i hria em ni?" tawi tê, mahse ngainatawm ru táwk chiah si hian a kiai zui suk a, chutianga a nui hmêl chu ka hmuhah chuan a vawi hnihna a ni ta chiah e!

"Puanthuah chu khaw'nge a awm? Ka va là ang e!" ti leh nghal zatin a ding uaih a, pi Martha-i paw'n tih ngaihna a hre bîk chiah lo a nih hmêl!

"Chuti tur em ni?" ti deuh raih hian puanthuah awmna lamah chuan a hruai ta tho va, George-a lah chu eng nge a hriat pawh ka hre lo, amah a ang lo ngawih ngawih!

Puanthuah pawm bâwr deuh ṭûna a rawn chhuah lâi te chuan ka lo en tlawk tlawk a, pi Martha-in kan mutna tur a phah mial mial chu puih a tum zui leh ta nghal a, eng mize pu nge tih leh khawia khawsa ṭhin nge a nih tih hre chiangtu tân chuan mak tih loh rual a ni lo. Ka tân phei zawng a mak lulâi êm a, kâ haua en cháng pawh ka ngah mai.

Pi Martha-in puanthuah min phah felsak hnu chuan kan mu zui nghal a, kan mutna lah chu a zîm ang reng bawk si, zan dang zawnga inmut hlat tak ṭhin si kha insi chet deuh thawin kan mu meng dun kar a, kei ang bawkin kan inmut hnaih lutuk chu a awm thiam chiah lo ve thovin ka hria. Ka mut dan pawh ka siam rem ngam der lo va, ka insiam rem a nih chuan a taksa ka khan titih nghal der dâwn tih ka chiang em em bawk.

"Hrehawm i ti em?" a rawn ti sup a, kan pahnih hnih chuan chuti maia kan muthilh theih pawh ka ring lo e a!

"Ti lo ve, i ti viau záwk lo maw, i mu ngai àwm bawk si lo?" ka ti ve sap a, ka ṭawng zo chiah chu che deuh hrut hian ka hnung lam aṭang min rawn kuah a, ka lo ṭang mar nghal awt nghe nghe!

"Kan awm dan hi a dik lo a nia George.....?" ka ṭawng chu hria ang paw'n a awm lo hrim hrim!

"George!?" ka ti leh ngat a, mahse chet pawh a che eih lo.

"Ka kuahna che hi hrehawm i ti a nih chuan ka inla hrang thei reng, sawi hreh suh" min chhán dan chuan sawi tur min tihre lo tak zet!

"Hahdam takin awm la ka duh....." a ti dam leh thlup a, mak tak maiin ka tha ṭang deuh ṭung kha a kiam siai siai a, ka thin su dup dup reng pawh kha reh fel hmak chu ni lo mah se a nep ta telh telhin ka hria.

Inbe zui tawh lovin kan ngâwi dun vang vang a, thawm awmchhun chu ruah sûr ri leh khawpui ri dur dur ri a ni mai a, kan mut dan mawlh mai chuan ka rilru a tipelhê lo thei lo. Amaherawhchu, zàma khur ru der der ang kha ka ni tawh miah lo va, chu tak chu eng nge a chhan ber ka hre chiah lo a ni.

"Inah i lo awm si lo va, ka hlauthawng hman teh asin" kan ngawih dun vang vang hnu chuan a rawn ti hniam sup a, ka rilru chu inngaihtuah lungpuamnain a luah lûm zui nghal zat bawk.

"Tukin khan......" a ti leh chiah chu

"George......" ka lo ti thuai a, ka aw lawi deuh rât chuan ka rilru puthmang tur àwm ang a thup lo chiang hle.

"I rilru ka tinâ a ni ti raw?" a mi ngaihtuahna awkâ dam thlup chuan ka rilru a tino zual tak zet!

"Sophia....." ti lehin min kuah nghet sauh a, ka mittui a tla lo thei ta lo.

"Nizan khan ka lo nghak char char che asin" ka ti chhuak ṭiau a, amah ngaihven reng renga ka awm dan zawng zawng kha ka ngaihtuah chhuak bawk nen ka mittui chu ka dang zo meuh lo a ni e.

"Sophia....." ti supin ka hmai bul chetah chuan a rawn thaw lúm ham ham a, min en hnai viau tih ka hrethiam nghal mai bawk.

"Keimah avanga ṭap em ni i nih?" min rawn awm hnaih lehzual a, chhàn pawh ka tum lo, ka ṭah chhuak lutuk mawlh mai chu reh thuai se ka duh zàwk a ni.

"Min hrethiam teh Sophia, i mi hriatthiam ka ngâi a ni" ti thum chhal hian a lamah min pawt phei a, tihrawla khat a taksa lûm thar thar chu ka khan nghal chial bawk.

Awm hlàt ka tum rual rual chuan a mi kuahna a tinghet zual a, tal chhuah theih loh khawpa nghet hian min kuah bet tlat a, mahse min kuah nâ chuang miah lo. Zawi zawiin ka thinglung chhûng nâ leh ṭah chhuak zualpui pawh chu a reh tial tial a, mut chhuakin min rawn zem nghal chiai chiai a, ṭawng thawm awm ta miah lo chuan suangtuahnaah min chentîr a, khawvel hran daiha awm ang mai ka ni!

End of chapter 4