𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟖)

THE PRESIDENT'S WIFE
(Contemporary M&B Story)

By

Havali Adam

Chapter 8

"Chhuak rih teh!" mipa ṭawng ri hluk chuan ka muhil tui lâi min tiharh zawk a, chu aw chu George-a aw ngei niin ka hre bawk.

"Engtin nge hetiang boruak in tawn lâi hian a lo kal i remtih theih záwk? I à zo ta em ni George!? Pi Loren-i tân tak sawn a tha nàtthlak dáwn lutuk tih i hrethiam miah lo em ni?" ti fak fak tu chu Colton-a a ni tih ka hre nghal a, ka meng ta nge nge bawk.

"Chu lam zawng i buaina a ni lo e! Chhuak tawh rawh, thawm dim hauh lova i ṭawng avanga Sophia a rawn harh phah a nih ngat chuan i lakah hian ka lungâwi lo khawp ang" George-a aw chhuak chu chang bawl bawl tak a ni.

"Eng rilru pua a rawn kal remti nge i nih ka hrethiam thei lo, eng pawh ni se, i thutlukna siam apiang a dik vek bîk lo tih erawh i theihnghilh loh hram ka beisei" ti charh charin Colton-a chu a chhuak ta nal nal a, lungni lo tih hriat tak hian kawngka chu a khar ri deuh ṭhuai nghe nghe!

"Chu mihring hrep chu le!" George-a chuan a ti khauh hmuk a, thinrimnain a khat tih chu a beka thisen zâm pawng nghal ṭawlh ṭawlh chuan a tichiang hle.

"George......." ti sepin a kut, ruh taka a hum lâi chu ka tawk zeuh a, rang mangkheng hian a rawn lehhawi thuai a, a hmêla thinrimnate chu chawp leh chilha bo nghalin min ngaihtuah hmèl ta viau bawk.

"Sophia......" tih leh ka kut chu hum a rual a, min awm hnaih sawt nghe nghe!

"Khaw'nge naupang?" ka ti thawp raih a, taksa nâ la nei tho mah ila chuti taka nâ ka ni tawh lo va, ka mut hahdam ṭhat vangte pawh a ni maithei!

"Ka nu leh Colton-a bulah an awm ka ring" a rawn ti ve nghal mai a, chutah hre lo ang tak hian

"Colton-a a lo kal em ni?" ka ti chhuak halh a, ka zawhna pawh chhâng lawk lovin hnai zetah min en run a, ka hmui sîr, ka biang no lâi chu a hmui lûm thar thar chuan a rawn tawk zeuh a, chutiang teh thuta a awm chu ka hamhaih kher mai.

"I bula ka awm lâi hi chuan mipa dang ngaihven lo la ka duh Sophia, keimah chiah hi min ngaihtuah rawh" a ti thum chhal a, kan inen hnai ṭha salh salh bawk nen a thaw rim tui ru tak chu hip lut chiang tak ka ni!

"George......" ka ti thâm sep a, a mitmengah chuan hmangaihna tluk zeta mâwi leh fiah ka hmu zut zut a, mahse chu erawh ka ngaihbel mai mai niin ka hria.

"I muttui em?" a ti thum dam dap a, min en hnai set sawt lutuk chu ka tha a khur ru der der a, ka zàm hle a ni tih hai rual a ni lo.

"Immm......." tih bakin ka chhâng lo va, ka sam hnawk deuh niah chu hui kiangin ka hnungah a rawn kuah zal zal a, chutia mak tihnaa ka khah lâi vek chuan a hmui chu ka hmui bawhthuah zâwngin a rawn chhuk thla riai riai zawm nghap zat bawk.

Chhàn lèt loh harsa khawpa dawnsawn nuam hian min fawp vawng vawng a, kan lei te chu nâ ni hauh si lo hian an insual let tap tap a, inzawmna thuk tak nei ang hrimin an insuih zawm tlat a, ka hmui chung lama a ṭuan chhoh lâi te chuan eng dang reng ka thluak chhûngah a awm thei tawh lo. Chu a hmui thil tithei tak hmang chuan ka hriatthiam phak baka thuk leh rilin min thunun a, a mi thunun dan lah chu hrehawm han tih chì a ni hauh si lo, lungâwina famkim neitu ah min siam a ni ber e!

Ka hmui a fawhna ata a han inla hrang chiah chu ka thaw chhuak halh halh a, tûr in zo hlim ang mai hian ka meng da riai a, ani pawh a bang bîk chuang lo. A chal chu ka chalah a la nghat run a, ka hmai zawnah a thaw lûm ham ham bawk. A mitmengah chuan ngilneihna leh ngaihsakna a khat a, ka hriat ṭhin George-a kha a ni tawh lo tih ka chiang ta viau bawk.

"Dinner kan ei ve tawh dâwn em ni ang?" a ti hniam sup a, chhán pawh ka chhán hmâin amah záwk chu a che hrut a, zo zet hian min pawm kang nghal nawlh a, mahse a chet danah chuan min tihnàt a hlau tih a hriat hle thung.

"Mi dangin an ei tawh em?" ka ti deuh hliai a, a nghawngah chuan ka kut pahnihin ka kuah chial a, zep thu a cheng lo, ka thinrimna, ka lungchhiatna leh ka mangannate kha an bo duak tawh ni berin ka hria.

"Kan pahnih tih loh chuan an ei vek tawh" a lo ti ve mai a, room aṭanga kan chhuak fel chiah chu Hazel Monroe-i hmêl ka hmu teh hlawl a, mak ti tak ka ni!

George-a chuan tûmah hmu lo ang mai hian ei tur awmna lamah min pawm phei zel a, Hazel Monroe-i mawlh mai chu ka en zui lo thei lo a ni. Kan awmna hmuna a rawn kal chu thuhran ni se, a mitmenga thikna lang lang zut zut te hlei hlei chuan ka mak tihna a belhchhah a, George-a ber lah chu hmu lo ang hmakin a awm tlat bawk si, ka hrethiam lo kher mai.

Tin, Colton-a pawh ka hmu zui nghal a, Hazel Monroe-i nen chuan an ṭhu dun a, pi Loren-i hmêl erawh in kan thlen tirh tih loh kha chu ka hmu leh tawh miah lo va, George-a chu ka záwt nghe nghe a, naupangho nen room hrana an awm thu min hrilh hnu chuan ka ngaih a ṭha nghal huai bawk.

Colton-a leh Hazel-i te chu an titi lûam a, an vawi khat inhmuhna a ni lo tih a hriat em em a, pi Loren-in Colton-a leh George-a te inhriatna a rei tawh thu leh ṭhian an nih thu min hrilh kha ka hre chhuak zawk a, Colton-a tân chuan a ṭhianpa George-a ngaihzawng hlui chu hriat a harsa dâwn lo tih ka hrethiam chawpchilh nghal thuai a, chutah George-a lah chuan ei tur chu min han barh kher leh ta nghal a, ka hrethiam lo vel vek a ni ber.

"Hello Sophia......" aw lo chhuahna lam chu ka hawi a, Hazel-i hmêl, ṭha tak leh changkang vah, pian dik zaih chu ka hmu nghal a, ka lamah a kut a rawn phar zui zat bawk.

"A taka kan vawi khat inhmuhna a niin ka hria, a ni em?" amah bawk chuan a rawn ti leh a, kan han inchibai te chu khawih thiang lo khawih ang hrim hian ka kut hmâwr tê bak a chelh lo va, vawn pawh kan invuan rei lo hle.

"Ka hmu che chu ka lawm hle ma" a rawn tih leh chuan

"Kei pawh...." ka lo ti ve sap a, ka thil ei lâi ber khera min rawn chibai ngat chu chhan eng emaw tak a awm ka ring hmiah bawk.

"Ka kalsan rih phawt mai ang che u, kan inhmu leh dâwn a nia...." ti no duai hian kal sawn a rual a, ka en zui vang vang a, pi Loren-i nen boruak ṭha lo tak an nei chung pawha a rawn kal ngam chu mak ka tih rualin a zah loh thlak lam hret chu a ni.

"I puar tawh em ni?" George-a lam chu ka hawi zeuh a, Hazel-i awm lai khan a be miah lo kha a ni a, mahse an inkâr erawh a ṭhat loh phah ka ring chuang lo.

"Puar a ni mai" tih leh thawh ka rual a, a rawn tho ve nghal zat a, ka en deuh hâ nghe nghe!

Zan lam chu naupangho nen hun kan hmang chawt a, Colton-a pawh haw mai lovin a awm ve reng a, George-a leh pi Loren-i te nen eng eng emaw ni an sawi a, room hran daiha kan awm avangin ka ngaihtuah zui lèm lo va, mahse kei min ngaihvena a rawn kal hrim hrim chu ka lawm viau mai.

Naupangho chuan thil chi hrang hrang min záwt leh sap sap hlawm a, pi Martha-i ka hre chhuak vawng vawng a, a thihna chuan ka thinlung a tinâin min la run hle a, mahse kei tal, naupangho en kawl tura ka dam chhuak chu kawng lehlam záwng tak chuan a lawmawm ka ti hnuhnawh hle a, pi Martha-i rual khan lo thi ve daih ta ila tih te ka ngaihtuah a, nung dama ka awm chu naupangho tân tak chung lam remruatna leh malsawmna niin ka hre ta bawk.

Tin, thil mak deuh pakhat chu, kan awmna room chhûngah chuan naupangho khum tur a lo awm tlar ṭhap a, pi Loren-i ngaihtuah chhuah a nih ka ring nghal hmiah a, George-a erawh naupangho enkawl leh bawihsawm kawnga a inrawlh ka ring lo hulhual!

Mut a hun meuh chuan Colton-a paw'n haw zâi a rêl ve ta a, George-a nen in kawt thleng kan thlah a, naupangho erawh pi Loren-in a mut felpui diam tawh thung.

Khuma kan han mu fel chiah chu rilruah thil chi hrang hrang a rawn lut nghal a, nilêng deuh thawin ka mu tlawk tlawk bawk nen ka mut a chhuak lo hrim hrim a, George-a erawh mutmu a tuah ṭha ngai lo tih hai rual lovin a muhil nghal bawrh bawrh a, hahdam hmèl zet hian a thaw ri suk suk a, harh var se chu Hazel-i lo kal chhan kha ka zawh ngei ka ring.

Ni e, ani kha eng vanga lo kal nge a nih ka hre lo va, lo kal ngam turah pawh ka ruat lo hrim hrim a ni mah záwk! Kan chhiatna tawh hriain min rawn kan ti dâwn ila a awm chhûng khan ka ṭhat leh ṭhat loh thu a chhak chhuak chuang bawk si lo, George-a vang ti leh ngawt dâwn ila George-a lahin a be eih lo a ni kha!

A mitmengah erawh kha chuan thikna tam tak a lang zut zut a, hmuh hmaih theih pawh a ni lo va, a awm lohna hmun turah a awm tih inhre chhuakin a haw ta mai niin ka hria.

Ka taksa che deuh datah chuan ka harh riai riai a, thil lûm nuam zet hian ka chal a rawn tawk zeuh a, ka han meng chhuak diar diar chu George-a hmêl pà tak mai ka hmu nghal a, ani pawh chuan ngaihṭhat hmel tak hian min chhuk melh run a, a harh ve deuh chiah tih ka hrethiam nghal mai bawk.

Tin, kan nupa inkâr aṭanga thil lang chiang leh ka hriat chhuah tâk pakhat chu, min hmangaihtu ni miah lo te pawh hi thinlung leh tih tak zetin a lo hmangaih theih tih hi a ni. Ni e, a hmâ kha chuan ngainatna satliah, zawi zawia ral leh mai tur emaw ka ti kha a ni a, mahse a lo ni hauh lo.

Tunah chuan ngainatna kha hmangaihnaah a chang zo a, thlakhlelhnain a tuamhlawm bawk a, hriat loh kârin kei hian ka pasal, George Frazier-a ngei mai hi ka lo hmangaih thuk hman hle tawh zàwk a lo ni!

Pi Martha-i khan a dam lâi khan hmangaihna leh ngainatna chu hriat loh kâra rawn irh chhuak a nih thu kha min hrilh a, a lo dik ngei a nih dâwn hi!

Amaherawhchu, kan mi hmangaihte'n min hmangaih lèt vek lo tih leh kan mi hmangaihte nen kan inkawp vek thei lo tih ka hre chiang em em a, nupa ni eng ang mah ila George-a rilruah erawh Hazel-i khum zo réng an awm lo va, kei ngei paw'n ka khum thei lo tih ka chiang a, chumi a nih avang chuan ka hmangaihna lan chhuahtîr kher emaw ka hmangaih thu hrilh kher ka tum lo bur bawk.

Nî a liam bek bek a, pi Martha-a vuina hun kan han hmang zo chiah chu ka ngâi thar em em a, kei ang bawkin naupangho paw'n an ngâi hlawm hle a, an ṭah a, a hming an lam chhen a, khap pawh ka tum lo, keimah ang chiahin pi Martha-i chu a ngâi ve ni ah ka ngaihsak hmiah zàwk!

Tin, khatia HOME a kan chhiat tâk vek hnu aṭang khan loh theih lovin in hmun leh ram ka kutah a awm nghal a, pi Martha-i khan ka hmingin a lo hnutchhiah sa vek tawh hrim hrim bawk nen ka tân chuan hnar theih a ni lo va, bawih zui loh chí lah a ni hek lo.

Chutah George-a ber lah chu ka rin phak baka danglamin a awm zel leh ta nghal a, a ngaihzawng hlui Hazel-i nena an chanchin nen lam mite mak tih a tling a, an inkâr thu chu a dai tial tial ti ila a sual tam lo khawp ang.

Chutih rual chuan an la inhmu reng tih ka hre thung a, ka mipa hmangaih hmâsak ber a nihna lâiah thik thu neih chângte chu nei ve leh ṭhin mah ila ka inthunun hram hram záwk ṭhin a, ka nunah naupangho bak ka dah pawimawh duh lo ngar ngar a ni ber.

Kan awm dan engkim chu media lam tân chaw tui tak a lo ni lehzel bawk a, ni tin deuh thaw newspaper-ah kan lang a, vanneihthlak takin pi Loren-i paw'n a fihlimzia a finfiah thlap tawh a, chhui zui a ni tawh lo hrim hrim chu a  hahdamthlak huaiin ka hria.

Amaherawhchu, dáwta puhtu an awm tih leh hek tu an awm tih a theihnghilh duh bîk der lo va, police leh investigation lama thawk te ruaiin amah záwkin a chhui lèttîr ta hmak a, a phena awm erawh tu hriat ni rih lo mah se engtik ah emaw chuan hriat chhuah a la nih tho tho ka ring nghet bur bawk.

Tin, thil chhui chhuah tibuaithlak em em tu pakhat chu pawi khawihtu nia rinhlelh leh puhmawh ber te kha thah an ni fel diam tawh tlat a, chuvanga hna thawk chak thei lo pawh chu an ni réng a, HOME a kan ral vek dan chen khan tun thlengin chiang taka chhui chhuah a la ni thei lo tluang zel a, George-a leh a mi rawihte paw'n tha leh zung an sêng nasa tawh viau nghe nghe!

"Kha.....i ṭha zel maw?" Colton-a lam chu ka hawi a, hmêl hmuh nuam zet hian min lo en reng chu niin!

"Taksa nâ nei lo ang mai ka ni tawh zàwk maw lè....." nui deuh sak pah hian ka ti hliai a, Colton-a bulah hi chuan han nuih mai te hi a awlsam bîk tlat ṭhin.

"Ka rawn kal zen zen bawk si a, min ning lutuk ang tih a hlauhawm mang e!" a fiamthu tih hrethiam tho mah ila a rilru chhûngril tak chuan a inthlahrung deuhin ka hria.

"Ka chanchin ngaihvena min rawn tlawh ziah hi ka lawm viau záwk asin, ti teh, in chhûng lamah i lut teh ang" tiin ka sâwm zui zat a, ani lah nghal ta reng reng!

"George-a a awm kur lo em ni? Mi a khap leh fuk fuk ang e, ka peih miah lo a nia, i bulah hi chuan a ṭhianpa takngial pawh min thik tlat lehnghal a, he pa tihmawh lutuk hi chu engtin emaw la tih a ngâi a ni" a rawn ti deuh duah a, kei lah pek chuan

"Khap che pawh ni se i hlau ngai chuang em ni? Pi Loren-i tih lovah chuan ka mihring hriat tawhah George-a hlau lo ber i ni hial ang" ka lo ti lèt ve khauh a, ani pawh a nuih a za ngàng mai.

"Kha chu pasalte ṭanna ṭawngkam a va ang deuh ve.....?" a rawn tih chuan ka nui tawp riai riai a, chutah amah vek chu ṭawng zawm leh nghalin

"Lut ang" tih leh min kuah luh a rual a, kei pawh chu rei lovah ka pangngai ve leh mai bawk.

Faifuk rut rut hian coffee a insiam nghal mual mual a, ka hmuh tirh phat aṭang khan ka ngainat chí a ni hrim hrim a, George-a nen hun rei tak ata ṭhian an lo ni reng tawh tih ka han hre chiah kha chu mak ka ti teh e! 

George-an han ṭawngkhum deuh hluk hluk ṭhin mah se Colton-a ber lah hian engah mah a lo ngâi duh bîk der si lo, an bula awm a nawm ve ve rualin a nawm dan erawh inang lo nasa tak a ni.

A bîk takin George-a hi chu ka pasal a nih vangte pawh a ni ang, kan awm dun tawh hi chuan kan boruak a dam raih a, thawm bengchheng leh han nuih uarh uarh tih vel pawh kan nei ngai chuang lo, mahse a hahdamthlakin a thlamuanthlak veng veng ṭhin thung. 

Colton-a bula awm erawh George-a nena kan hun hman dun ṭhin dan ep chiah a ni a, amah ka ngaina tulh tulh bawk nen han infiam nuih var var changte pawh kan nei ta fô mai.

Colton-a nen chuan coffee inin veranda-a ṭhutthlengah kan ṭhu chhuak leh lawi a, in kawt tual záwla naupangho infiam chu en pahin kan titi siam siam a, chutia kan ṭawng melh melh lâi chuan car dum mâwi tak mai hi in kawt lamah a rawn tlan lut zal zal a, a khalhtu chu George-a a ni tih ka hai lo va, car aṭanga a chhuah rual rualin naupangho chuan an be sap sap hlawm a, kei leh Colton-a ṭhu dun min rawn hmu chiah chu a mitmeng a thip leh khup khup nghal teh e!

Naupangho an kal darh hnu chuan kan awmna lam panin a rawn pen zui thauh thauh a, tlai dang ang lo takin a bag khai lah chu a puar ang reng viau leh ta nghal a, thil rawn hawn a nei tih hrilh hranpa ka ngai lo chiang hle bawk. Kan ṭhutna zawn a rawn thleng chiah chu keimah ni lovin Colton-a záwk a melh deuh run a, Colton-a erawhin a lo nuih hek hek ringawt!

"Eng nge i rawn tih?" George-a chuan a ti nghut a, a biak dan hmuk hmuk chu ka rin tàwk chiah a ni.

"Sophia-i hmêl ka hmu châk a, ka lo kal a nih hi!" Colton-a lam chu hawiin ka ner nghal sâwng a, George-a chhaih thinrim a duh avanga chutiang thu chu sawi a ni tih hriat reng reng!

"A nih chuan i haw nghal thei ni rawh se!" George-a chuan a ti leh hmuk a, a thutak run e ti lo chuan Colton-a erawh a uang em em lawi bawk si!

"Hetah dinner ka ei dâwn tih Sophia-i hian a la hrilh tho che chu ka ring a, mahse ka'n hrilh nghal law law mai ang che" Colton-a lah chuan a ti ta deuh deuh a, George-a rilru a hre chiang lutuk chu ka nui chhuak hak teuh kher mai.

"Dinner ei tur chuan i lo sâwm rèng em ni?" George-a mit leh ka mit chu a intawng chat a, Colton-a a biak dan leh kei min biak dan chu inthlau vet vet tak a ni.

"Ei pawh ni se a pawina a awm chuang em ni?" ka ti dam diai a, hun rei lo tê chhûnga a mizia a thlak danglam lutuk tâk vangte pawh a ni ang, a mitah ka en rei ngam ve ta viau!

"A awm àwm ka hre lo, lut teh ang, thil hmuhtír duh che ka nei" tih leh ka bân reka chelh a rual a, in chhûng lamah min kai lut zui nghal ta nul nul bawk.

Room-a kan luh fel rual rual chuan a bag chu khumah dahin a hawng zui nghal mual mual a, a che vel chu ngâwi rengin ka lo thlir deuh tawp a, a bag rawn khai haw aṭanga ballon rawng chi hrang hrang a rawn phawrh teh hlawl chu mak ti zet hian ka en hâ a, chutiang thil a rawn hawn ka ring lo lutuk chu mak tih avangin ka kâ hau a ni ber.

"Naupang pakhat khan ballon a duh thu ka hnenah a sawi a, tu ber nge ka hre tawh lo" a rawn ti sup a, kei erawh ka la ngâwi reng ringawt!

"I leisak angin i sawi mai dâwn a nia, nangma'n pe bawk ang che" a rawn tih leh chuan

"Engati maw? Nangma lei a ni a, nangmah ngeiin i pe ang chû......?" ka lo ti hluai a, ka mak tihna chu a la reh hlei thei chuang lo.

"Ka duh lo!" a ti bul deuh hmuk a, a aw a thunun hman lo ni ngei tur a ni.

"Eng vanga duh lo nge i nih George? Thilpek pe theitu nih te chu a hlu asin, nangmah ngeiin pe diat diat hlawm la a ṭha záwk ang" ka tih leh pawh chuan

"Nangma'n pe rawh, ka leisak tih sawi lang lo bawk ang che" a ti tlat a, ka hrethiam lo kher mai.

"A nih chuan Colton-a pektîr ila a ṭha ang" ka ti dek dek chu

"A ṭul lo!" a lo ti nghal hluk a, a ma pek duh chuang si lo khan Colton-a pektîr lehzel pawh a phal lo chu a ni si a!

"Eng chu nge maw i hriat le George?" ka ti ta hluai a, ka pek kher a duh tlatna chhan chu ka hre duh a ni.

"Tihtur ka la nei a, ka chhuak leh lawk dâwn...." tih leh room aṭanga chhuah a rual nghal a, ka zui chhuak ve tak nà chu biak hlau lutuk ang hrim hian a kal vung nghut nghut hle a, be lovin a tlan liam lâi chu ka thlir vawng vawng ta ringawt!

"A va hmanhmawh khut khut ve, eng nge a tih leh dâwn?" Colton-an a rawn tih chuan

"Ka hre bîk lo, tihtur eng emaw a nei leh a ni ang" ka lo ti ve nghal mai a, in chhûngah ka lut zui ta daih bawk.

Tlai lam chu ei rawngbawlin hun ka hmang char char a ni ber a, kan in pangngai záwka kan awm loh avangin ei rawng ka bawl a ngai a, ka huphurh pawh a ni chuang lo.

George-a phei chuan hnathawk tur rawih a tum nghe nghe a, mahse keimah záwkin ṭul ka tih loh avang chauhin a ruai ta lo hlauh záwk a, pi Loren-i pawh in pui lamah a awm e ti lo chuan min rawn tlawh zing malh malh ṭhin khawp mai.

Khua a hniam tial tial a, dinner ei hun a rawn inher chhuah meuh chuan George-a pawh kan zîngah a awm leh ta vàng a, tlaia a chhuah leh chhàn kha engmah a sawi lo hrim hrim a, kei paw'n ka zàwt kher duh ta bîk lo.

Tin, zanin vek hian thil pawimawh tak sawipui tur ka nei a, Colton-a awm lo se chu dinner kil zawh hlimah a fâla biak nghal mai ka tum kha a ni a, mahse ka lo inruahman làwk ang ngawt chuan a awm theih dâwn loh tih a hriat hle.

Dawhkana naupangho nen dinner kan han kil sap sap chu a hlimawm dangdai hle a, pi Martha-i dam lâi ata tawh zirtirtu min ti mai ṭhin a, an ṭawng duh barh barh hlawm reuh lutuk chu Colton-a leh George-a takngial paw'n inbiakna hun an nei meuh lo.

Kan inei puar fel hnu chuan naupangho chu room lamah an lut phei dam dam a, keiin kan thil eina hmun leh hmâ vel ka tifel nghal zung zung a, Colton-a leh George-a erawh dinner ei kham hlima pâwn an chhuak kha ka hmu leh ta miah lo va, thil an sawi dun a ni tih ka ring thiam nghal mai bawk.

Thil silfai ngai leh senghawi ngai ho zawng zawng ka zawh fel hnu chuan balloon nen naupangho room-ah ka lut zui nghal a, balloon chu ka sem diat diat a, tu leisak nge an nih min záwt kher lo bawk nen George-a hming lam rik duh viau mah ila ka sawi ri lo ta law law záwk mai. A ṭhen phei chuan an mutna khumah nen lam an kuah ran a, min tihlim ru hle a, George-a hnenah tak pawh naupangho aiawha lawmthu sawi ka bâin ka hria.

Zan lâi a han ni chho va, Colton-a a haw fel ta maw tihah chuan kan pahnih chauhin room chhûngah kan awm a, biak tuma a lam ka hawi chiah chu phone call a dawng nghal zat a, rawn call- tu lah chu tu dang ni lovin Hazel Monroe-i ngei mai a la ni zui a, chutiang zan tlai tawh pawha a la rawn be ham ham ngam chu ka ngaihdan a ni lo kher mai.

"Thil pawimawh tak sawipui che ka duh a.....?" an inbiak laklawh lâi chuan ka ti ta hmiah a, George-a chuan min rawn en zawk nghe nghe!

"Nakinah kan sawi ṭha dâwn a nia...." tih leh a phone chu hmeh tawp a rual a, ka lamah a rawn pen phei zui nghal bawk.

"Eng lam nge?" ka ṭhutna bul chetah a rawn ṭhu thla a, kan inen hnai leh ta viau mai.

"Kan chungchang hi maw le....." ka tih chuan hriatthiam loh hmêl zet hian a meng zím sun a, ka sawi dan teh tlawng chu a holam ve bawk nen ka sawi tum a man chiah lo tak takin ka hria.

"Ka rilru ka siam fel tawh a, ka dam chhûng chu naupangho hi enkawl chhunzawm zel ka tum a, chuvangin nang leh kei hi kan inṭhen mai a ṭha záwkin ka hria George" ka ti leh dat dat a, a meng rum deuh nghal ul tih chu ka hmuh hmaih lo chiang kher mai.

"Eng thutlukna atthlak nge i lo siam Sophia? Kei leh nang hi kan inṭhen ngai dâwn lo ka ti tawh a ni lo'm ni?" a ti bul hmuk hmuk a, kei erawhin ka lû ka lo thing niah niah thung.

"Ni lo George, kan inṭhen a ṭha záwk! I tân pawh buaipui reng ka ngâi tawh lo ang a, kei chang ni lo, naupangho pawh hi i buaipui an ngâi tawh lo ang a, hlim takin i nun i hmang thei tawh záwk dâwn alawm, ka rilru ang hi i put ve tho ka lo ring asin" ka ti zo chiah chu

"I rilru i sêng thlawn mai mai a ni, engtikah mah kan inṭhen hlek lo ang!" a rawn ti khauh nghal hrawk a, ka kimki deuh chawih nghe nghe!

"I nunphung leh khawsak dan ka tibuai vek tih ka inhre chiang em a tin a ni George, keimah avanga i buai pawh a tam ta mah mah e, kan inṭhen fel ang a, i hmangaih Hazel-i nen pawh hlim taka in inneih ngei theih nân duhsakna ka hlan nghal che ni rawh se!" zàngkhai taka ṭawng ka tum tehlul nen ka va'n thei lo chiang kher em!

"Kan thil sawi mêkah hian Hazel-i hming sawi tel a ṭulna ka hre lo" tih leh ka dar tawn tawna chelh a rual zui zat a, Hazel-i thlavang a hauhna awkâ chuan ka thinlung a tinâ nghal vawng vawng bawk.

"Engati nge min ṭhen i duh em em?" amah vek chuan a rawn ti leh nghut a, min en hnai set sawt lutuk chu zàm er er lohna chì pawh a ni lo.

"Min hrilh teh Sophia, min hrilh mawlh teh" a aw chu thunun a tum tih a hriat hle a, mahse a thunun hman bîk lo chu a ni e.

"A chhan chu i hlim ka duh alawm, ka bulah hi chuan engtik lâi mahin i hlim ngai lo, nang paw'n i inhriat ngei ka ring, kan inṭhen hunah erawh i hlim ngei ka beisei" ka mittui rawn chhuak tur chu ka dang hram hram a, hun kal tawha kan lo khawsak dun dan zawng zawng ka ngaihtuah chhuak kher bawk nen ka rilru chu a no nghal rawih rawih a ni ber.

"Nupa kan nih tirh phat aṭang khan mi sual i nih lohzia ka hria a, i rilru ṭhat azârah i ngaihsakna ka dawng reng ṭhin záwk a, mahse mi dangte hriatthiam theih turin i tilang ngai miah lo a nih kha! Eng pawh ni se ka lawm e George, khang thla kal ta chhûng zawng khan ka nunah thil thar tam tak ka seng lut a, fahrah mai ni si kha ka khawsak te thlengin a nawm phah a, nangmah avanga......" ka ti leh chiah tur chu

"Duh táwk teh Sophia, i ngaihtuahna atthlak tak tak kha paih bo hmak rawh! Zanin bak inhmuh tawh lo tur ang hrima ṭawng kha bansan nghal bawk rawh!" a rawn tih zawm hmuk hmuk a, ka biangah ka mittui a luang thla nghal zawih a, ka hawi sawn ta vat bawk.

"Kan mu tawh dâwn em ni ang?" ti sepin ka hmai chu ka tuai puat a, ani erawhin ka dar a chelh nghet salh thung.

"Ngaithla teh Sophia, min ngaithla mawlh teh, kan bulṭan dan a dik lo tih ka hriat chian tluk zetin i hre chiang tih ka hai hauh lo, mahse eng vanga thil tam tak a inthlak danglam tawh tih hi hre lo der tlat nge i nih?" a rawn tih chuan ka melh zawk a, ka hawi sawn leh rang hle.

"Engati nge inṭhen duh miah lo ang maia i awm tlat mai le?" ka ti thawp sep a, chu thu bak chu sawi tur nei tawh paw'n ka inhre lo, tihngaihna a vâng a ni.

"A chhan chu i laka ka rilru puthmang hi nasa takin a danglam tawh alawm Sophia" min chhán dan avang chuan ka thinlung a nghing dawt a, mahse eng a sawi tumna nge tih erawh ka hrethiam rih chiah lo.

"I hriat ṭhin inngaihtuahna satliah ang mai mai kha a ni tawh lo Sophia, tunah chuan khang, ka nupui i nih avanga ka mawhphurhna i ni emaw ka tihna te, ngaihsakna ka lantîr ṭhin te kha hmangaihnaah an inlet pumhlum vek tawh asin! Ka hmangaih che avanga min hmangaih ve nghal turin ka phut lo che a, min hmangaih ve theih nâna theih tawp chhuah erawh ka tihmakmawh a ni tih ka hria, hun a duh rei deuh dâwn a nih paw'n ka huphurh reng reng lo" ka biang tawn tawn dawm meuh a rawn tih leh chuan thin phu dep depin ka melh ral a, ka chhûngril chu lawmnain nge ṭahchhuahnain buk rit záwk pawh ka hre lo.

"Ka hmangaih che Sophia, nang nen hian fa neih a, enkawl dun ka duh a ni" thum dam dap hian a ti thuk leh ruih a, nghet zetin min kuah nghal vawng vawng a, hamhaih luatah ka rilru chu a buai nuaih nuaih a ni ber.

"Nang nen hian eng tikah mah kan inṭhen ngai bawk hek lo ang" ti leh supin min fawp zui ngawng ngawng a, khumah chuan min bawh tlu nghal riai riai bawk.

Ka rilru leh taksa, khawi lâi mai pawh chu a neitu mah ni ila ka thunun piah lam vekah an chang zo va, ka hmui fawp reng paha ka thawmhnaw hak a phelh zal zal lâi te chuan engkim hre vek siin ka che hlei thei der lo lawi a, min hmangaih a ni tih lantîr mawlh mawlh duh ang hrimin a mi fawh dan te chu a tidanglam thuai a, ka tân chuan mu leh mal han hriatna chì a ni lûl lo e!

"Taksa mâwi tak zâwng i nei chiang e Sophia" a ti thum dut a, a ṭawng danah chuan a pangngai tawh bîk lo tih a chiang hle.

Ka taksa ruak kang a han tawk thla den den te chu ka lo mur sung sung a, mipa a nihzia min hriattîr awl lo va, ka nunah chutiang rèng thil danglam chu ka la tawng ngai lo. Thlan tla dapa kan awm hle hle hnu chuan a âwma bei chialin min kuah deuh run a, ka chal chu a rawn fawp leh zauh ṭhin bawk.

"Ka hnenah hian insawifiah i bâ a ni George?" ka ti sep chu

"Ka hria alawm...." a lo ti ve nghal mai a, rilru leh taksa lamah inzawmna thuk tak nei mah ila ka rilru peng khat chu a la dam thei zán lo a ni.

"Hazel-i nena in chungchang......" ka tih laklawh lai chuan

"Ka tân hmêlhriat satliah bak a ni tawh lo Sophia, ani chu ka ngaihzawng hlui, ka hmeichhe hmangaih ṭhin a ni ngei a, mahse tunah chuan i nun tlâwm tak hian ka rilru puthmang leh ka thinlung chenin a thlak danglam zo tawh a ni" a rawn ti zui dap dap a, a thusawi mal tin chu awih loh a va'n harsa tehreng èm!

"Ka hmangaih che a, chu chu tun dinhmunah chuan a táwk rih viauin ka hria, nakin hun zelah erawh ka laka i rilru puthmang pawh hi a la inthlak ve ngei ka beisei" ti thum leh chhalin ka hmuiah chuan a rawn fawp vawng vawng a, min kuah khawm vek titih nghal bawk.

Chumi zan vek aṭang chuan sawifiah thiam chiah si loh hian thil a danglam chho tial tial a, min hmangaih tih ka hriatna chuan eng dang zawng aiin ka rilruah hna a thawk lian a ni ber. Hazel-i nena an inkâr thuah buaina ka nei tawh lo va, rinhlelhna nei tur paw'n min siam ngai hek lo. Hazel-i záwkin a rawn kal chilh châng a tam ta viau a, mahse eng he hu ah erawh ka lo ngâi hau si lo, George-a lakah rinna ka nghat pumhlum tawh a ni hawt e!

Amaherawhchu, buaina pakhat kan la nei tlat! Chu chu naupangho enkawl leh enkawl loh chungchang a ni a, ani chuan HOME dinsak a, HOME-a thawk tur chhawr mai a rilruk lâiin kei erawhin keima enkawl ngei ka duh tlat bawk si, lungnî lo fêa ṭawng hluk hluk châng pawh a ngah phah réng a, dik tak chuan kei nena fa neih a, enkawl dun duh si khan fahrah naupangho enkawl zui zel a tum tlat leh tlat si lo chu ka hrethiam thei lo a ni.

Ka chawr chhuah dan ka hre chiang a, chuvangin kei chuan enkawl mamawh em em naupangte chu thlahthlam mai ka tum lo bur!

End of chapter 8