𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟕)

THE PRESIDENT'S WIFE
(Contemporary M&B Story)

By

Havali Adam

Chapter 7

Thawm chu a ri chuah chuah a, naupang mangang au thawm te, thil puak ri ṭhuai ṭhuai thawm te, ambulance motor ri vut vut thawm thlengin a inchawhpawlh nuaih a, ka hming ngeia min ko mawlh mawlhtu an awm tih pawh ka hria, mahse chhâng thei dinhmunah ka ding tlat si lo. Ka taksa chu a che leh dat dat ṭhin a, min sawi harh tum an awm tih hai rual a ni lo va, tih theih erawh ka nei lo tluk a ni.

Ka taksa chau ngawih ngawih lutuk chuan ka rilru, la harh ṭawk ṭawk nen lam a pawt chau rawih rawih a, engkim chu a tawi tup a, a tawp hmuk ni berin ka hria. Thim chhah mup ata ka harh meuh  chuan khawia awm nge ka nih pawh hre lèk lovin ka awm a, ka mit ka meng lawk lo va, mahse ka thi lo tih erawh ka hre chiang viau thung. Chutia ka awm deuh vang vang hnu chuan lû chhûng rit lûk chungin ka meng chhuak che che a, ka bulah tûmah an awm lo va, ka awmna hmun chu damdawi in a ni tih ka hre zui nghal bawk.

Ka mut dan aṭang chuan khawl nen ka inchhawp rup tih hrilh hranpa ka ngâi lo va, amaherawhchu, chutiang em em nâ niin ka inhre lo thung. Thawh mai ka tum lâi tak chuan thawm a rawn hnai a, ka mit ka chhîng vat a, tu nge a nih pawh ka hriat loh mipa aw ka hre hmâsa ber a, a dawtah George-a aw ngei ka hre zawm zat a, la harh miah lo anga awm luih ngar ngar chu engtia rei nge ka theih ang pawh ka hre lo.

"A lû ber hi a hliam nâ chu a ni a, ka sawi tawh ang khan a thluak a khawih pawi thei a, a hriatna thahrui thlengin a pangngai leh thei ang em ka hre lo, a pangngai theih chuan a lawmawm viau ang" chung thu sawitu chu doctor a ni tih ka hrethiam nghal mai a, ka taksa dinhmun an hriat dan leh keimah ka inhriat dan erawh a inperhsan deuh hlekin ka hria.

"Ka nupui buaipui hian i theihtawp i chhuah tih ka hria alawm, a chungah eng pawh thleng se demawm i ni lo, keimah záwk hi a ni dem tur leh puhmawh ber tur chu!" George-a awkâ chhuak chuan ka chhûngril a fan rawih rawih a, chutiang taka a inphahhniam aw chu ka la hre ngai lo.

"Hna thawh tur ka la neih avangin ka kalsan rih phawt ang che u, lo lungngâi lutuk lo la, thihna êmin ro a rêl lo hi a lawmawm zàwk lamah ngâi teh ang" ti dap dapin doctor chu a chhuak ta daih a, George-a nen chiah kan awm tâk vang nge ni, room chhûng boruak chu a rit deuh nghal churhin ka hria.

Ka rilruah pi Martha-i a rawn lang zawk a, ka rilru a kal ding nghal kawk a, ka mit ka men rual chuan George-a hmêl, lungngaih hmél zet chu ka hmu nghal a, mahse eng dang mahin ka thluak chhûng an luah thei tawh lo; pi Martha-i tih chauh lo chuan!

"Sophia....." ka harh tih a hriat rual rualin min rawn be nghal a, min hnaih nghal ruak bawk.

"Khaw'nge pi Martha-i? A ṭha em? Khaw'nge a awm?" ka ṭawng bah nawk nawk a, hlauhthawnnaa ka khah vang a ni ber.

"I ṭha em?" ka zawhna hre lo ang hrima a awm tlat chu ka dawhtheihnain a tlin der lo.

"Khaw'nge pi Martha-i a awm? Min hrilh rawh, min hrilh nghal rawh!" ka ti vin tuarh tuarh a, ka â zo ta emaw min ti a ni mahnà, min en dan chu mak a tih hmél kher mai.

"Pi Martha-i chu........" tiin a ngâwi leh daih a, chutah amah bawk chuan

"Pi Martha-i lam ngaihven a hun rih lo, i ṭha em? Nâ i nei em?" a awah chuan min ngaihtuahzia a lang a, mahse ka hmu lem laklawh vek tawh!

"Min hrilh thuai rawh!" ka ti vin leh ṭhak a, ka rilruah amah zahna rèng a lang tawh lo a ni ber.

"George.....!?" ka mittui a baw nghal zawih a, min rawn kuah a tum chu ka lo dang vat a, ka hlauhthawn ruk angin thil a thleng ang tih ka hlau ngawih ngawih!

"Nizan khan rawn hruai tur chein ka lo kal a...." ti supin a chawl deuh dat a, chutah amah bawk chuan

"HOME compound ka lut chiah tihah in chhûng lam aṭangin thil puak a rawn awm a, ka lo luh fel meuh chuan engkim kha a nih tur ang a lo ni vek tawh a, vanduaithlak takin pi Martha-i pawh a nunna chhan hman a ni ta lo a ni. Naupangho erawh an zavai êm chuan an thi lo va, nunna chân awm tho mah se a tam záwk chu an dam chhuak a, tunah hian enkawlna ṭha an dawng mêk bawk, thil dang zawng aia pawimawh ber chu i la dam hi a ni" a rawn ti hniam dap dap a, ka rilruah erawh engmah a lut thei tak tak tawh lo, pi Martha-i thih thu mawlh chuan ka thinlung chhûng a va'n tinâ tehreng èm!

"A thi tak tak lo ti raw? Dáwt i sawi tih min hrilh teh George? Khawngaihin.....?" ṭap hlawp hlawp chunga ka tih lâi chuan min rawn kuah thuai a, awrawl chhuah meuhin ka ṭap zui ta hawm hawm bawk.

Chhûngril lam nátna chuan min tuamhlawm a, ka thisen zawmpui tluk zeta ka hmangaih, ka ngainat leh min enkawl seiliantu pi Martha-i thih thu chu ka awih tak tak ngam lo va, mahse ka thinlungah erawh min kalsan tawh a ni tih a chiang em em bawk si. Amah sûna ṭah tlawk tlawk bak tih theih ka nei lo tih ka inhriatnate chuan min tinâ zual a, a ruala ka thi ve nghal mai lo te chu ka manganna tibelhchhahtu a ni a, nun thlakthlelhna rèng ka nei tawh lo a ni ber.

He khawvelah hian keimah ka nih ang anga min hmangaihtu awmchhun chu amah chauh a ni a, ka tân chuan ka engkima engkim a ni a, a bulah bak hlimna tluan tling tak tak ka nei ngai bawk hek lo. Tunah erawh ani chu mi nung a ni ve tawh lo va, biak pawh theih a ni tawh lo va, ka engkim thlenna ni ṭhin ber a awm ta lo chu ka tuar thiam thlawt lo a ni.

"A rang thei ang berin lo tifel ang che, thil dang duh ka nei lo, ka duh ber chu i tihtur hlen thuai la a ni mai" George-a aw ngei, nghet churh churh chuan min tiharh riai riai a, ka ṭap muhil ta daih kha a ni a, ka'n mêng chhuak chu zan lâi a lo ni der tawh!

"I ṭha em?" tih leh a phone chu hmeh tawp a rual nghal a, min en chik ta hle bawk.

"Sophia.....?" min ngaihtuah tih hriat taka a rawn tih leh chuan

"Ka ṭha....." ka lo ti thawp raih a, ka be chàk lo kher mai.

"Hetiang hian i chungah thil a thleng ang tih rin ngaihna réng ka hre lo" ka en zawk a, mahse ka en rei lo hle.

"Min ngaihtuah ang takin awm suh!" ka ti ta khalh a, ka aw chu a dam lo viau bawk.

"Ka ngaihtuah miau si che alawm Sophia" a tih chuan za lo zet hian ka lo khi sak a, a thusawi zawh chiah chu ka awih lo tih a hriatthiam ngei pawh ka ring.

"Min ngaihtuah tak tak ni la chuan eng thil pawi mah a thleng hman lo ang" ka ti chhum hmarh a, ka rilru nàt rukzia chu pui tak a ni.

"A hming chauha i nupui ka nihna hi hre lo ka ni bîk lo George, chuti chung chuan i lakah hian beiseina chhe tê tak meuh ka lo la nei fan a, phut ngam lo che mah ila min rawn ngaihtuah kha ka lo ring ve em em ngawt a, mahse ka tisual a ni George, hnaih che ka tum pôh leh ka hnaih phak i ni lo tih ka hrefiah leh nge nge ṭhin. Tunah chuan kan kâr thu, kan inzawmna holam tak hi chhut chah ni tawh rawh se, i tân tak pawh a thawventhlak huai ka beisei" ka ti leh siah siah a, ka ṭah a chhuak lo va, ka lung a âwi lo ru em em záwk a ni.

"Nang nen hian engtikah mah kan inṭhen ngai lo ang" ka en nghal hâw a, ka thusawi engah mah a ngâi lo tih a hriat lutuk chu ka insum thei leh pek lo.

"I sawi ve mai mai a ni George, Hazel Monroe-i i theihnghilh palh chu a ni èm lo maw?" meinei zet hian ka ti salh salh a, inla huaisen takin ka melh deuh kal bawk.

"Ani sawi lan a ṭulna ka hre lo, in dinhmun a inang lo lulai lutuk!" a rawn ti ve ta hluk a, ka nâ zawk nghe nghe!

"Ni e, i sawi dik, ani nen chuan kan dinhmun a inang lo viau tak ang. Chuvangin keini pahnih hi kan inṭhen a ṭha ber; ka rilru tihah zual zâwnga i awm loh hram ka beisei nghal ni bawk rawh se!" ti lèt hlakin ka mut dan ka siam rem a, a hmêl hmuh reng pawh chu ka peih rih chiah lo, rilru a tinâ thar mai mai!

"Lo ngaithla teh Sophia, i rilru tihah zâwnga awm ka duh reng reng lo. Thil pakhat ka hrilh ang che, ka nupui i ni a, i ni reng bawk ang" dam ang reng tak, mahse nghet ru em em si hian a ti dap dap a, chu ringawt pawh chuan ka mittui a ko chhuak leh thei mai dâwnin ka hria.

"Ka rilru tihah zâwnga awm i duh loh thu i sawi a, mahse i tihah em em chu a nih si hi......." ka aw lawi ṭiau avang chuan ka hmui ka hup thuai a, ka maimitchhîng zui nghal daih bawk.

"Thil thleng khan nangmahah nghawng a nei nasa lutuk a, i rilru a la pangngai thei lo niin ka hria. Hlauthawng lo la, i bulah ka awm tlat dâwn tih hre bawk ang che" a ti hniam ruih a, rilru hah hmèl fê hian a thaw chhuak zui ham ham a, mahse a lam ka hawi duh ta chuang lo.

"Min ngaihtuah ang taka i lan hian ka rilru i tinâ daih záwk tih i hria em George?" ka ti chhuak sap a, ka dar a rawn chelh nghal chat bawk.

"Sophia......" a ti thum chhal a, ka mittui chu ka dang zo leh ta ngáng lo.

Min tihnàt hlau tih hriat tak hian min rawn kuah a, ka ṭap chhuak nghal hawk a, ka rilru leh taksa chu nàtna tinrengin a bawm ang mai a ni a, chung nàtnate chu ka do zawh pawh ka inring meuh lo. Ka ṭah chhuak zualpui a reh fel hnu chuan ka mu ngâwi reng a, muhil lovin ka mu meng kar a, George-a phone be thawm chu ngaithlain ka beng ka chhî reng bawk.

"Ni lo, ka lo kal thei lo" a ti nghet churh a, tu nge a biak hre lo mah ila a mi biak tân chuan hriat nuam tak a nih ka ring lo.

"Tun dinhmunah chuan ka nupui hi chhuahsan thei ka ni lo, i lo kal mai a ngaih hmêl" a ti leh nghut a, phone chu a hmet tawp zui nghal daih bawk.

"I ril a ṭam em?" ka en zawk a, ka hmâah tak rawn ṭhu hniam lo se chu ka en kher lo ang.

"Min ngaihtuah suh" ka ti hmak a, dik tak chuan amah ka haw em em pawh a ni lo, a laka beiseina ka neih leh mai loh nân ka inthiarfihlim ṭang ṭang záwk a ni.

"Ka thiam loh tam tak a awm tih ka hria alawm Sophia" a tih laklawh lâi chuan

"Chuti si engati nge min kiansan thuai loh? Min ngaihtuah ang taka lemchan hi a ṭulna ka hre lo, ka dinhmun a heti tâk avang hian min ngaihtuah phah lo la, a hmâ ang chiah khan awm leh rawh" nêm lo zet hian ka ti piap piap a, ka insum theihna a puak keh a ni ber.

"Ka thei lo" a ti bul hmuk a, chu chuan ka thin a tirim zual hle.

"Ni lo, i thei ngei ang, awm ve lo ang maia min ngaih ṭhin ang chiah khan awm leh rawh!" ka ti nghal tawn tawn a, ka ṭawng zawi lo kher mai.

"Mr. George......" aw lo chhuahna lam chu men purin ka hawi phei a, mipa pakhat, police uniform ha ka hmu zui nghal zat bawk.

"Hetah ni lo, páwnah min lo va nghak lawk rawh, ka rei lo ang" tiin George-a chuan a hnar chhuak thuai a, kei erawh ka lo bo map thung.

"I him hi ka duh ber a, i him theihna tur a nih phawt chuang engmah tih hreh ka nei lo tih hria la ka duh, rei ka kal bosan che ring ngai bawk hek suh Sophia" ti supin ka chalah a fawp vang vang a, room aṭanga a pen chhuak thauh thauh chu ka thlir zui reng nghe nghe!

Police rawn lang mawlh chuan ka rilru sukthlek a tidanglam tih phat rual a ni lo va, eng vanga lo kal nge a nih hriat cháknain ka khat a, George-a lo luh leh hunah pawh zawh chian ka tum nghal bur bawk. Chutiang thil ka ngaihtuah lâi vek chuan ka mitthlâah pi Martha-i hmêl a rawn lang zut zut a, naupanghovin ka ngaihtuahna an rawn luah ve leh chiah phei chu ka thin a su dup dup a, ka hlauthawnna chuan van a tawng hial ka ring.

Ka taksaa khawl thil bet neuh neuh chu ka pawt phawi diat diat a, khum aṭanga ka chhuk erawh ka tlu teuh khawp mai. Ka invuan ding hram hram a, ka ding ngil tur chuan khum bula tui bottle lo intung chu ka vai fuh nghe nghe a, chu veleh ka thawm hriain George-a a rawn lut thuai a, lungnih loh hmèl zet hian min en a, mahse eng thu lungawi lohna awkâ mah a chhakchhuak miah lo thung.

"Inah ka haw duh......." ka ti sap a, chiang taka mi en chung hian

"Damdawi inah hian i taksa enkawl dam rih phawt ang, chu chu i tâna thil ṭha ber a ni rih tlat" a ti dam thlup a, mahse a ngaihdan chu ka pawm zâwng a ni ve hauh lo.

"Ka duh lo, naupangho engtin nge an awm pawh hre lovin ka awm a, keimah chiah hi an belh tur ka ni tawh asin!" ka ti leh ta bawih bawih a, insum theih loh chin ka nei zing malh malh lutuk chu pi Martha-i thihnain min den nàt èm vangah ka puh lo thei lo a ni.

"Naupang dam chhuak ho chu an ṭha, enkawlna ṭha tak an dawng mêk....." a rawn ti dek dek chu

"Ka awih lo!" ka lo ti vin hlar a, insum tih hriat tak hian a thaw chhuak ham ham a, chungte hlei hlei chuan ka rilru a tikal dik lo zual chiang hle.

"Min hruai haw rawh George!" ka ti leh nghat a, tlêmin ka aw pawh a vin lutuk lo ta deuh!

"Ni rih lo e, hetah hian enkawlna ṭha dawng fel phawt záwk rawh Sophia" tih leh ka dar tawn tawna rawn chelh a rual a, a thutak tih a hmêlah chuan a lang chiang ngàng mai.

"Ka duh lo, haw ka duh, khawiah nge naupangho an awm? Ka hmu duh, ka hmu vat duh George!?" ka ti leh hlawk hlawk a, ka ṭawng tawp lam chu mangang au thawm te pawh a ang mah záwk!

"Hetiang hian awm suh Sophia, i tân a ṭha lo" tih paha ka hmai rawn tawh a tum chu ka lo thle sawn bak a, ka meng ling ta hle bawk.

"Ka tâna ṭha tur i ngaihtuah a ngai lo, ka haw duh!" ti vin phiara kal zui nghal ka tum chu min kuah thlawp a, ka tal chhuak thei bawk si lo, rilru buai avangin ka ṭap chhuak leh ta hawm hawm!

"Heta ṭang hian min hruai chhuak rawh George, khawingaihin, ka tel lovin engtin nge naupangho an awm ang? Kei chiah hi an belh tur awmchhun ka ni tawh asin, khawngaihin naupangho bulah min hruai hram rawh, khawngaih takin....." ka aw chhuak chu a chuai raih a, dan sen lovin ka mittui a dir zawih zawih reng bawk.

Min pawm kang nawlh a, room aṭanga min chhuahpui lâi te chuan ka la insut feih feih a, ka ṭah a chhuak viau nà chu ka hah erawh a dam ru tlat lawi a, eng nge a chhan ber pawh ka hre chuang lo. A taksa hlatah min awmtîr lo hrim hrim a, doctor te nena an inbiak lâi te chuan min la pawm tawm kak reng a, damdawi in kan chhuahsan rualin car chhûngah min pawm lùt zui nghal a, tlan pawh kan tlan chhuak har lo hle.

Ka taksa chauh avanga ka chhîng sek emaw ka tih ka'n harh chu in kawt kan lo thleng fel der tawh a, mak ka ti hman viau a, mahse rei erawh a ni lo. In chhûngah chuan a pawm bawkin min pawm lut leh a, kan nupa room lamah min chhohpui nghal a, rei pawh kan awm hmâin nurse pakhat hi a rawn lut a, damdawi in kan chhuahsan dâwna doctor nen an inbiak dan kha ka ngaihtuah lèt neuh neuh a, min enkawltu tur nurse a mamawh thu a sawi tih ka hre chhuak chawpchilh nghal nghe nghe bawk.

"Khawiah nge naupangho?" tiin George-a chu zawhna ka zàwt deuh tawl a, mi dang awm leh awm loh ka uksak tawh lo a ni ber.

"Ka nu hovin an awm mêk, ngaihtuahawm an ni lo" ti sup hian ka kut chu a chelh ran a, damdawi in ai thlawt chuan ka rilru damsam lo lutuk pawh kha a zia ta deuh záwkin ka hria.

"An bula min hruai turah ka ngai che asin" ka melh kal a, engtiang takin nge ka ngaihtuahna an luah tih lam rèng a dâwn pha lo a ni.

"Zanin chu mu hahdam rih phawt la a ṭha ang, naktuk lamah ka kalpui ang che" pangngai tak hian a rawn ti a, mahse kei erawh ka rilru a la hmin thei chuang lo.

"Ka duh lo, zanin la là hian ka hmu nghal duh!" ka ti ta tlat a, ka hmuh hmâ chu ka awm a nawm theih ka rin loh vang a ni pakhat!

"Ka dawhtheihna hi fiah tum suh Sophia!" George-a aw chu a chang bawl bawl hle a, min en chiang ren run hle bawk.

"I taksa hian hahdam a mamawh tih hi ka sawi nawn chhen ngai suh se!" a rawn tih zawm leh nghut nghut a, chhâng lét tawh lovin ka mu ngâwi ngal a, lungngaihna thuah hnih ka hmâchhawn mêk a ni hawt e!

"Enteh Sophia......." kan ngawih dun vang vang hnu chuan amah bawkin a rawn ti leh sup a, tun ṭum erawh a aw pawh hriat a nuamin a dam ta deuh thung.

"Ka nupui i nih piah lamah ka mawhphurhna i ni a, chuvangin naupangho ṭhat leh ṭhat loh hre tur mai maia chhuahpui che ka tum lo hulhual tih hrethiam la ka duh" a ti hniam dap dap a, room chhûngah nurse a awm tawh rih lo hlauh chu a vanneihthlak záwk, la awm se zawng ka ṭah a chhuak ru ngawih ngawih tih a hmu vek dâwn si a!

"Rilru hahdam deuhin awm la, i kiangah ka awm reng dâwn a ni tih theihnghilh lo bawk ang che" a thusawi mal tinah chuan min thlamuan a duhzia a lang nasa hle.

"Lo hnai teh......" ti thum chhalin ka hnung lam aṭang chuan min rawn kuah a, a taksa lûm thar thar ka'n si chiah chu inthunun zo lovin ka ṭap chhuak hawk a, insum tum eng ang mah ila ka thei thlawt lo a ni.

"Ṭap tawh lûl suh Sophia, i ṭahna hian engtiang taka thukin nge ka thinlung hi a khawih i hre lo a ni" min tihnàt hlau tak chung si hian min kuah nghet salh a, a thusawi chu a tak emaw ka ti hman hial a, mahse a ni hauh si lo.

Eng chena rei nge ka ṭah pawh hre lovin ka muhil zui ta vang vang a, ka harh leh meuh chuan khua a lo èng iar tawh a, ka bulah George-a a lo mu tawh miah lo bawk. Ka mut dan ka'n siam rem sat sat chu tuverh bula George-a lo ding ngâwi reng ka hmu nghal zat a, a bengah chuan phone a chuktuah reng a, min hnung chhawn zâwnga ding a nih vangte pawh a ni ang, ka harh tih a hre lo hrim hrim.

"Ka hrilh chiang viau tawh chein ka hria!" a ti chang bawl a, ka harh tih chu hriattîr ka tum hran lo.

"Ni chiah e, ka thei lo" a aw chu a thum nghet churh a, a ṭawng ring lem lo hle bawk.

"Chu lam zawng ka thu a ni e, i ngaihtuah a ṭul lo ang" chuti taka lungâwi lo awkâa a mi biak mêk chu pi Loren-i a nih ka ring rum rum a, mahse tu nen chiah nge an inbiak ka hre hauh si lo.

"I duha thu le, mahse ani erawh hi chuan a hmuh peih che ka ring lo" ti khauh hmukin a ngâwi zui vung vung a, a mi biak mêk ṭawng chu a ngaithla ni maiin ka hria.

"A chhan chu kan inkârah inzawmna ṭha a awm emaw a tih tlat vang a ni" ka en reng lâi chuan a ti leh nghut a, ka ngaihtuah neuh neuh a, mak ka ti tawlh tawlh, a mi biak chu pi Loren-i ni theiin ka hre ta miah lo bawk.

"I duh tàwk teh ang, kan inbiakna hian kawngro a su lem lo" ti bul leh hmukin phone chu a hmet tawp zui zat a, lû tuai puat hian a thaw chhuak hawk a, a rilru a hah tih chu hai rual a ni lo.

"I mu ṭha thei meuh maw?" ka harh tih a rawn hmuh rual chuan a ti hniam sup a, nichin lawka a ṭawng dan zawng zawng nen kha chuan inang lo tak a ni.

"Immm......" tih bakin ka chhâng lo va, ka hmâ chiaha rawn ṭhu hniam pah hian

"Ei tur ka zu là ang e, nimin aṭang tawh engmah i la ei lo va, i taksa tân pawh a ṭha lo" a ti dam leh ruih a, ka hriat ṭhin George-a kha a ni ta lo emaw ka ti hman hial!

"Mak i ti em ni? Maid hnenah i ei tur siam turin ka chah vek tawh alawm, ka zu là ang e, ti khan lo awm rawh, ka rei lo ang" tih leh ka chala rawn fawh zeuh a rual a, rei pawh awm tawh lovin room aṭang chuan a chhuak ta nul nul bawk.

Kâr lovah ei tur nen a hmêl ka hmu leh thuai a, ka mak tihna chu a la bo thei chuang lo. Dimdawi tak hian min tung tho va, spoon hmanga ei tur min han barh lehzel phei chu ka beisei phak bak a ni a, min barh ang àngin ka lo âng mawl ve tawp a, ka awm dan leh ka hmêlah chuan mak ka ti hle a ni tih pawh a hmuh hmaih ka ring lo.

A che te reng reng chu a damin hmuh a nuam em em vek a, pasalin a nupui, hmangaih taka a bawihsâwm ang mai hian ka chan a, lem a chang han tih dâwn lahin lemchang hmêl réng a pu bawk si lo. A awm dan engkim chu ka hriat ṭhin George-a kha a ni lo fai vek a, chutiang taka a mi ngaihsakna leh ngaihtuahna ka dawng te hlei hlei chu ka beisei piah lam daih a ni.

"Naupangho paw'n an hmu châk tawh viau che a nih hmèl, nizana i muthilh hlan khan ka nu nen kan inbia a, i chanchin ngaihvenin zawhna an zàwt reng a ni àwm e" tawi tê hian a khi zui suk a, a thil sawi chuan ka rilru a kai pêng chiang hle.

"Engtikah nge min hruai dâwn?" ka ti chhuak sap a, ka zawhna hrethiam tak hian

"I duh hun hunah a ni mai" a lo ti ve nghal mai a, min awm hnaih deuh sawt bawk.

"A nih chuan kal ang, kal nghal ka duh, hmuh thuai ka duh George" ka aw chhuak chu a pangngai ta viau a, ani pawh chuan

"Aw le...." a lo ti ve leh dut a, din nghal mai ka tum chu zo zet hian min pawm kang nawlh a, in hnuai lamah min chhuk thlakpui zui zat bawk.

In aṭanga kan chhuak tur chu nurse leh maid te chuan min zui zel a, kan mamawh apiang an lo ngaihven nghal char char a ni ber. Kan in compound kan chhuahsan fel ta maw tihah George-a chuan pi Loren-i a be pawp nghal a, an awmna lam pana kan tlan mêk thute chu a hrilh a, rei erawh an inbe lo va, naupangho ka hmu tur mawlh mai chu ka hlim a ni.

Ka hriat ngai kawng pawh ni lovah kan tlan zel a, dârkâr khat dâwn kan tlan hnu chuan in pakhat zawn kan thleng a, mak ka ti tih a hrethiam te pawh a ni mahnà, chu in chu naupangho awmna a ni tih min rawn hrilh nghe nghe! Amaherawhchu, ka vawi khat kalna a nih ang bawkin ka vawi khat hriatna a ni a, chu lâi hmun chu tute ta nge tih rèng ka hre lo hrim hrim a, ka zawh avanga an in pakhat záwk a nih thu min hrilh hnuah ka hre ve ta chauh a ni.

In chhûng kan han lut chu naupanghovin min rawn hmu a, an rawn tlan phei dam dam a, inkuah chungin kan ṭap a, a chang leh kan ṭah nuih bawk a, pi Loren-i pawh a bang chuang lo. Min kuah reng chungin thil thleng chu pawi a tihzia a sawi mawlh mawlh a, ka hlauhthawn ruk ang ngeiin naupang zual deuh te chuan pi Martha-i awmna min zàwt sap sap hlawm a, chhâng thei lovin ka ngâwi tawp a, ka ṭah a chhuah ru em em bawk.

"Zirtirtu.....?" an ti leh ngawt ṭhin a, zawhna mitmenga min enna te chu ka en ṭha ngam lo va, engtia han chhàn tur nge ka hre lo tak zet a ni.

"Ani chu vanah a chho daih tawh alawm....." tiin pi Loren-i chuan min rawn chhànsak hlauh a, chutah an zînga pakhat chuan

"A ni maw!? Engati nge min hruai ve loh le? Ka kal ve duh zirtirtu, zirtirtu Martha-i bulah ka kal ve duh, min hruai ve rawh" a rawn ti zui nghal mawlh mawlh a, ka tih ngaihna hre lo chuan ka kuah tawp ringawt a, ṭah pawh ka insum nasa leh hle.

"Zirtirtu Martha-i bulah ka kal ve duh......" an rawn ti leh ṭhin a, anni lètin ka ngâi tih leh ka mamawh tih hrethiam ngat se zawng min ngen lawm lawm duh bîk ka ring lo, mahse hrethiam rual an la ni lo tlat a tin a ni!

Naupang zînga pakhat phei chu ka paw muhil ta ringawt a, mi dang erawh naupang rilru thianghlim tih takah pi Martha-i pawh ngaihtuah zui tawh chuang lovin pi Loren-i hruaina lamah an phei dam dam hlawm a, ka rilruah chuan pi Martha-i la dam ve se tihna hlir a awm a, ka mittui dang zo lova han ṭah leh ngawt châng pawh ka nei a, mahse a enga mah chuan awmzia rèng a nei tawh si lo.

"Mi dang i ngaihtuah luatah i taksa i ngaihthah hlauh ang e Sophia......?" George-a lam chu ka hawi a, chik tak hian min lo en reng a, a ngai tê bawkin a hawi sawn hmâsa záwkah ka ṭang leh ta nge nge e!

"Keimah chauh inngaihtuah thei dinhmunah ka ding lo tih chu a chiang reng alawm, ka tân chuan naupangte hi ka chhûngkua an ni asin" ka ti dam diai a, ka aw chhuak chu a pangngai ang reng viau bawk.

"I taksa tihahdam la ka duh tak zet, awm hahdam duhna thinlung i pu dâwn a nih phawt chuan a ngena ngen che pawh ka hre miah lo" a rawn ti leh sup a, min rawn din hnaih nghal ruak nghe nghe!

"Ka dinhmunin a zir loh êm hi George? I hmu thiam lo em ni? Awm hahdam der der ta ila engtin nge naupang hi a awm ang? I ngaihtuah tawi deuh lua a ni?" ka ti zo chiah chu

"Ka kutah dah tawp rawh....." a lo tih zawm nghal dut a, ka hre sual emaw ka ti hial!

"Enga!?" mawl hmèl deuh hian ka ti hû a, ani lah chuan

"I hahdamna tur a nih phawt chuan ka lo buaipui mai ang" a la rawn ti ta deuh deuh a, chutah ka pawmna ata naupang chu làk a tum zui zat leh ta nghal a, ka mak ti lutuk chu ka meng phar awn awn a ni ber.

"I â zo ta em ni George? Nge ni a, i harhfîm lo záwk?" ka ti chhuak hliai a, ka melh chho deuh kal bawk.

"He naupang hi ka buaipui lo a nih zawngin i taksa hahdamna tur pawh i ngaihthah hmin ṭhak duh dâwn tih ka chiang a ni" tih leh ka naupang pawm lâi chu mi làksak a rual a, a chet dan engkim chuan min barakhaih vel vek!

"Ni lo George, naupang i pawm àwm réng ka la hre lo, a tihbuai ngei che ka ring, chuvangin min ngaihtuah lo la, naupang kha ka lo pawm leh záwk ang e. A nih loh paw'n khumah ka mutpui thei alawm, i nunphung nena inmil lo lutuka i awm kher a ṭul lo" ka ti ta duah a, ani lah chuan ka thusawi chu engah mah a la ngâi miah lo zui!

"Chu zawng kei leh he naupang inkâr thu hi a ni a, i ngaihtuah loh tawp tur i ngaihtuah buai mai mai záwk a ni. Muhil tawh rawh, i bulah kan lo awm reng ang" a rawn ti dap dap a, chutia naupang a'n pawm ta chu ka ngaih a ṭhat hliah hliah rualin a awm dan dangdai lutuk mawlh chuan ka rilru a tibuai lo thei lo.

"Engati nge hetiang hian i awm George? Engati nge i tih ngai pawh ni miah lo te i tih a, i mizia ni ṭhin nena inperhsan taka i awm tâk mai?" ka ti ta thlawt a, chu chu ka thil hriat chian châk ber te zînga pakhat a ni.

"A chhan chu nangmah......" a hmêlah chuan a thutakzia a lang chiang hle a, min chhán dan chu ka beisei loh lam daih a ni nghe nghe bawk.

"Keimah maw.....?" tia ka phun sep lai chuan

"Engkim hi nangmah vang a ni Sophia, i rilru ka tinâ hle tih pawh ka hria, mahse tihnàt leh ka tum tawh lo....." a rawn ti thum chhal a, chawp leh chilhin ka rilru chu a no thar nghal em em ringawt bawk.

"Engkim chhui chhuah a nih hunah chuan ngaihdam dil che ka bâ a ni tih ka theihnghilh loh hram ka beisei" amah bawk chuan a tih zawm leh dap dap a, ka rilruah zawhna dang a rawn piang nghal chat nghe nghe!

"A awmzia chu......" ka ti hman ṭawk ang tihah chuan

"HOME-a kangmei chhuah chhan kha ruahman lawk a ni tih chhui chhuah a ni tawh a, pawi khawihtu erawh zawn hmuh a la ni rih lo" a rawn ti zui nghut nghut a, kei pawh chu ka ngâwi ta hle hle.

Room pakhatah hian min hruai lut a, khum lian ang reng tak lo awmah chuan ka mu zâl nghal a, mahse ka mu meng reng thung. Thil thlen dan zawng zawng ka chhui kir a, kangmei chhuak tur khawp khan engmah kha a awm lo hrim hrim a, vawi leh khatah thil a rawn puak dur a, kha khan kangmei a siam kha a ni a, George-a thu min hrilh zawh chiah nen ka chhui dawn a, ruahman lawk ni lo se chu kangmei chhuahna chance a awm lo tih ka ring nghet ta bur bawk.

"Muthilh thuai tum teh Sophia, khatia i men reng chuan ka ngaih a ṭha turah ngâi suh" George-a chu ka melh zeuh a, naupang pawm chung hian min lo en reng chu niin!

"Nge ni a, i bula mu ve tur khan min duh záwk?" ti leh supin khum bul chu a rawn thleng phei titih nghal der a, ngâwi rengin ka lo en tawp ringawt!

Ka awm dan aṭangin ka hnar lo tih a hrethiam a ni mahnà, a naupang pawm lâi chu a hmâah a rawn mut a, ani erawh ka hnung lamah a rawn mu thla thung a, min kuah nghal chial a, mak tak maiin a chet dan chuan ka awm a tinuam nghal sawng sawng bawk.

"A nih tur angin thil a thleng vek tawh a, chuvangin tunah rih chuan i taksa hi a hahdam ṭhat a pawimawh ber" ti dam dap hian ka biangah a rawn fawp zeuh a, ngaihtuah thui mang hlei lovin keimah zàwk chuan ka khan nghal chial a, ka awm dan ka'n hre chhuak chiah chu mâwi lo ka ti hnuhnawh viau a, mahse amah ka thlakhlelhna chuan eng dang min ngaihtuahtîr thei tawh si lo a ni.

A taksa lûm thar thar leh sik nuam zet chuan min ur ham ham a, kâr lovah ka mut a rawn chhuak thuai a, ka awmna hmun chu hmun nuam tak tluk zetin a hahdamthlak mai bakah a thlamuanthlak a, ka rilruah eng dang a leng tawh lo va, mutchhuakin min rawn zem chiai chiai ta bawk nen engkim chu a reh nuam veng veng ni maiin ka hria.

End of chapter 7