𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟔)

THE PRESIDENT'S WIFE
(Contemporary M&B Story)

By

Havali Adam

Chapter 6

Chu thlasik zan boruak hit har kârah chuan vur a sî seng seng a, muhil thei lo tih takah ka la meng fiah kar kar hle a, a chhan pawh eng dang a ni lo, George-a vang a ni. Ka dinna tukverh bul aṭang chuan khum lam ka hawi phei a, tui tak hian a lo mu thaw ri suk suk a, kei erawh zan tlai tawh tak mah ni se ka muhil ve thei der bawk si lo, men tawp loh chu tihtheih a awm lo a ni.

A hnuah phei chuan room chhûngah pawh awm reng duh lovin ka chhuak ta daih nghe nghe a, zep thu a cheng lo, ka rilru a hahdam thlawt lo a ni e. Engtin nge ka awm tih te, eng nge ka tih ang tih te, ka tân eng nge ṭha ber ang tih te ka ngaihtuah awl lo va, ngaihtuah lo thei lo dinhmunah ka ding a ni ber tawh záwk a, hnawksak mai nia ka inhriatna chuan ka thinlung chhûng a tirum vawng vawng bawk.

Sofa-ah chuan thil chi hrang hrang ngaihtuah kualin ka bawk zâl ta hle hle a, mahse ka mut erawh a chhuak chuang miah lo. Ka rilru a kal ding telh telh a, George-a nena inṭhen mai te chu ka ngaihtuah hial a, inngaihsakna tel lo leh inrintawnna tel lo nupa nun chuan ka nun a pawt chau tial tial a ni ber. Amaherawhchu, han inṭhen ringawt pawh ila a ṭha ber ang em tih ka ngaihtuah tel lo thei bawk si lo, rilru a fîm mawh tak zet!

Ka taksa che deuh datah chuan ka harh nghal zawk a, ka mit ka men rualin George-a hmêl ka hmui zui zat a, mu lovin ka meng tlaivâr dâwn emaw ka tih kha ka lo muhil tlang daih chu niin, chutah George-a lah chuan ka harh tih pawh a hre miah lo lehnghal a, ka harh tih hria se chu eng thumal emaw ni tak a chhah chhuah ngei ka ring.

Step-a min chhohpui lâi chuan loh theih lohna avangin ka che deuh sat sat a, ka tla dâwn emaw ka tih vang a ni pakhat! Ka harh tih a hre chiah chu min pawm nghet salh a, min penpui páwk pawk pah chuan min melh leh zauh ṭhin bawk. Room chhûng kan lut a, engmah a la sawi lo tluang zel a, khuma min nghah hnu chuan ani pawh a rawn mu zui ve nghal a, ka hnung lam aṭangin min kuah deuh hlun bawk.

Kan awm dan avang chuan ka rilruah thil tam tak a rawn lut zut zut a, ka taksa chhûng lam a rawn intur chho ut ut a, ka ṭah mai loh nân ka insum ṭang ṭang a, mahse ka insum zo ta ngàng lo. Thawm chhuah meuha ka insut rual rual chuan ka kâ ka hup vat a, besei ngam ni miah si lova beiseina min siam tlat lawi si chu ka tuar thiam lo a ni ber.

"Sophia......" ka rin tàwk chiah a ni!

"Eng vanga ṭap nge i nih?" a lamah min kuai her a, kei erawh ka hmai ka hup tawp ringawt!

"Sophia........?" amah bawk chuan a rawn ti leh a, chhâng thei dinhmunah pawh ka ding meuh lo.

Ka kut chu rawn chelhin hnuai lamah a pawt thla zal zal a, chiang tak hian min en a, ka ṭap hmêl a vawi khat hmuhna a nih vang nge pawh ka hre lo, a hmêlah chuan mak tihna leh hamhaihna a inlan chhawk zut zut a, kei lah chu ka insum nasat pôh leh ka ṭah a chhuak zual ting bawk si, ka tihngaihna hre lo chuan a vawi khatna atân ka kuah ta rawih a, kuah hmâsatu záwka ṭan hi ka nei ngai lo hrim hrim a, mahse tun ṭum chu thil tam tak pumpelh nân ka kuah a ṭul tlat a ni.

Chutia ka'n kuah tâkah chuan nghet zet hian min rawn kuah ve nghal a, engmah a sawi tawh lo va, zawhna pawh min zàwt tawh hek lo. A taksa si chetin ka mu ta hle hle a, thlasik mah ni se a mi uapna lûm nuam zet chuan thlamuang takin min siam a, ka rilru hahna zawng zawng thawk leh khatah a kiam duak ni berin ka hria.

Ka lo muhil zui daih leh pek chu niin, ka harh meuh chuan nî a lo chhuak èng var var tawh a, George-a taksa khan chial hian ka lo la mu reng a, George-a tak pawh chu eng nge a hriat ka hre lo, morning exercise là tura ka rin tehreng nen rin loh lam daihin ka bulah a mu run bawk si, chutah kan khum síra sana ka'n en leh chiah chu ka va han tho chhuak rang tehreng èm!

"Company-ah kal i tum lo em ni?" tiin George-a chu ka nam deuh that that a, dâr 10 dâwn a ni tawh a, chuti chunga ka bula a lo la mu reng thei chu mak ka ti tak zet!

"Tum e....." a lo ti sam mai a, mahse company-a kal tum si engati nge a la mut tlat si!

"A nih chuan tho thuai rawh!" ka aw chu a nêm zawk zawk lo khawp mai.

"Chawhnu lamah ka chhuak ang" ti ṭial deuh ruih hian puan chu a sin ṭha daih a, ka en tlawk tlawk ringawt!

"George......?" ka ti leh hluai a, a hawina lamah chuan ka ding phei zui zat bawk.

"I dam lo em ni?" ka ti leh ngawt a, dam lo hmêl lah a pu der bawk si lo.

"Ka bulah hian i rawn mu dâwn a nih loh chuan i chhuak thei ang" a meng chuang miah lo va, min chhán dan aṭang chuan tibuai lo tura min duhzia a hriat hle.

"A nih.....keimah avangin i mu ṭha lo em ni?" ka ti leh hram a, dik tak chuan zînga thil thleng avang khan mutmu tuah ṭha lo ni ah ka ngaihbel tlat a tin a ni!

"Ka thusawi kha i hre lo em ni Sophia?" dam ruih, mahse thupe em em si hian a rawn ti sup a, ka ngâwi chiang ta hle bawk.

Room aṭang chuan ka chhuak a, ka ngaihsakna leh ngaihvenna mamawh eih lo ang hrima a awm leh min ṭawngkhum chu ka tha a nâ hnuhnawh hle a, tu hmuh lovin ka insawh tau nghawng nghawng a, ngaihtuah tawh loh ka tum bur bawk. Pi Loren-i ka zawng ru deuh a, mahse maid te sawi dan chuan a lo chhuak daih tawh chu niin, àwm pawh ka ti tho mai, ka tho tlai vet vet êm a tin a ni!

Hun bi mumal lo zetah ka inhnawh puar a, ka bulah maid pahnih chu an awm reng bawk a, chutia thil ka ei lâi chuan security guard pakhat lo lutin in kawta media ho an punkhawm nasatzia a rawn sawi a, zep thu a cheng lo, ani pawh hi kei ni lo ila chuan chutiang thu chu a rawn thlen ngam ka ring lo. A chhan chu a tua te mai pawh hian George-a leh pi Loren-i an zahin an hlau em em vek a, an awm lâi chuan eng thu mah an sawi ngam ngai lo a ni ber.

Ka thil ei zo chu newspaper ka bih nghal chawt a, ka rin rilruk ang ngeiin George-a leh Hazel Monroe-i te'n boruak an lo nei leh hat tawh hi a lo ni a, tun ṭum chu a dan a dang khawp mai. Hotel changkang tak chhûnga thil ei dunin an in-kiss lâi thlalak nen lam a lang chiang em em a, chumi avang chuan media lam te'n ka chanchin an rawn ngaihven leh a, George-a nena kan inṭhen thuai an rin thu chu a darh nghal chuaih chuaih bawk.

In chung lamah ka chho thuai a, George-a han kaih thawh ka tum chu ṭawng thawm avangin ka ke pen lâi ka tawp chat a, a harh tawh tih ka hriat vang ai mah chuan a thusawi záwk chu a ni ngâwi renga min dintîrtu chu!

"Thil harsa a ni hleinem" ti thum dutin a rum deuh nghut a, chutah amah bawk chuan

"Sophia-i hi chu ka kutah dah rawh, i lo ngaihtuah a ngâi lo ang" a ti bul leh hmuk a, ka ngaihtuahna pawh a kal ding nghal vawng vawng khawp mai.

"Ka nu a ni emaw, tu pawh ni rawh se, engtikah mah ka rilru hi ka sawhsawn ngai lo ang" a ṭawngkam tin chuan a denin min dêng dawt dawt a, ka hnîm sawk thei hial!

"A ngaiah khan ni mai rawh se" ti leh supin a phone dah thawm chu ka hre zawm zat a, in hnuai lamah ka chhuk thla ta thuai bawk.

In hnuaia George-a a rawn chhuk thlak ve meuh chuan pangngai takin ka lo awm a, company lama kal tur a ni tih a hriat hle a, biak pawh kan inbe lo hrim hrim! Biak ka tum lo va, ani paw'n min biak a tum bîk lo tih a hriat khawp mai. Maid te'n ei tur an chhawp chhuak tur chu a kutin a hui zeuh a, in aṭang chuan a chhuak zui nul nul a, kan nupa inkâr, a chánga inhnimhnai tak, mahse a chânga inhlat leh em em si chu ka tân zawng rilru nât ruk vawng vawngna tham a tling ka ti lo thei lo.

Thlasik tih takah chhun lam boruak chu nî sa ve teh mah se a vawt deuh raih a, George-a leh Hazel Monroe-i te chanchin lah chu kei ang, in chhûnga tawm cherh cherh tân pawh hriat loh theih loh khawpa nasain a thang vùl chûk a, ka rilru tinâ zual ber tu pakhat chu Hazel Monroe-i kutzungṭanga zungbun awm chu a ni. Zíng lama newspaper ka chhiar lâi kha chuan a awm miah lo va, mahse chhun lama an thlalak theh darhah erawh a lo awm diam lawi bawk si, chu chuan George-a nena an inkâr thu pawh a tarlang chiang viauin ka hria.

Nîlengin hahdamin hun ka hmang lo tluan zak a, pi Loren-i chhuak rawn haw paw'n hmuh hmaih rual lovin min ngaihven ru nghal em em a, eng dang vang a ni lo, thuthang vel chuan boruak a luah hneh êm a tin a ni! Keimah leh keimah ka infuih sauh sauh a, eng ang paw'n lo ngainain ka thinlungah hmun lo chang thuk tawh mah se ka pasal George-a chu keia beisei phak a ni lo tih ka inhrilh nawn awn awn a, ani chuan keimah ni lovin Hazel Monroe-i záwk a thlang kumkhua dâwn tih ka hre chiang ta viau bawk.

Khua a thim a, zanah chuan ka rilru ka lo siam fel láwk tawh ang ngeiin George-a ka pehhel ngat ngat a, engmah a hrethiam miah lo chu ka tân vanneihna a ni. Kan nupa room-a a awm loh leh kan room piah chiaha a office tènauah a inkhung ngawt ngawt a, newspaper-a ka hmuh dan kha chuan tun hnai hian an sumdawnna lamah an tluang vak lo a nih hmèl a, chu pawh a ngaihzawng hlui Hazel Monroe-i rawn lan aṭang chiahin, mahse thu lêng vàk a tam a, a zawng aza ka awih vek bîk chuang lo.

Khuma ka mu tur chu laptop khup hmak hian min rawn en a, ka hawi sawn nghal daih a, khuma a rawn mut lâi te chuan ngaihtuah lo ang tak hian ka lo awm a, ka dar a rawn chelh chiah erawh ka dah thlaksak rang khawp mai. Mak a ti deuh nge ni, thawm engmah a chhuah lo va, min en reng pawh a ni maithei! Chutah che hruta ka dar rawn vawn leh a tum chu

"Mut pangngaiin kan mu thei ang em?" ka lo ti hmak a, ka aw chu a dam hran lo hle bawk.

"Kan mu lo em ni?" amah hnung chhawn zâwngin mu mah ila min rawn mut hnaih sawt tih ka hria.

"Ka lam lo hawi teh....." a ti dam leh thlup a, min biak dan chuan ka insumna leh ka inthununna a tihchhiat mai loh nân ka ṭang ru nasa hle.

"Kan kâr thu hi sawi ṭhat a ngâiin ka hria George" pangngai thei ang berin ka ti chhuak sap a, ka huaisenna zawng zawng sâwng khawmin ka en lèt ve kal bawk.

"Engti zâwngin maw?" ka thil sawi tum hrethiam lo ang hrima a awm teh tlat chu ka hrethiam lo kher mai.

"A hming chauhin nupa kan ni tih kan hre ve ve a, chu lâi tak chu sawi chian ngâi lâi pawh a ni. I duh chuan i ngaihzâwng hlui Hazel Monroe-i nen khan hun in hmang dun fô thei tih pawh ka hria, ka sawiselna che u lam ni lovin nangmah intimualpho zâwng leh kan nupa inkâr thlenga thuthang dik lo tak tak a than tawh loh nán hmâ là la ka duh" ka ti nghet charh charh a, chutiang thu chu ka sawi a ring lo a ni ngei ang, min en dan a thutak sawt teh e!

"Chu, ka ngaihzawng hlui chu i lo thik a ni èm lo maw?" engtin nge nuihza hmêl a put theih záwk pawh ka hre lo, ka fiamthu der si lo!

"Keia thik phak a ni hleinem!" ka ti salh a, ka thusawi engah mah a ngâi duh miah lo chu mak ka tih rualin ka lungáwi lo ru khawp mai.

"A ni ti ta ila.....?" min chhàn duh dan hrim hrim aṭang chuan thutakin awmzia a nei dâwn lo tih ka hre chiang ta hle.

"Tun chiah ka sawi leh ang George, Hazel Monroe-i nen in inhmu duh a nih paw'n ualau takah awmpui tawh suh, media lam an chak si a, Hazel Monroe-i aiin i hmingchhe záwk zel a ni tih i hriatthiam hram ka beisei" ka tih leh pawh chuan

"Min ngaihtuahna awkâ a va ang ve.....?" a la rawn ti hram a, ka lo thaw chhuak hawk ringawt!

"Hazel-i nena hun kan hman dun chu pawi i ti miah lo tihna a ni em?" a rawn ti leh sup a, a awah chuan nuihza aw kha a awm tawh miah lo bawk.

"Chu lam zawng ka sawi theih a awm lo, i thu thu a ni e" tih leh inher ka rual a, a lama min kuai her tawh lo hlauh chu ka lawm ru kher mai.

Chumi zan aṭang chuan kan nupa inkâr chu kan inneih tirh ang tak tak kha a ni chho leh ta a, inbiak loh erawh kan neih phah lem lo va, khuma kan mut paw'n a hmâ ang chiah khan, khum sîrah ve ve kan mu ṭhin a, mut dâwnah phei chuan kan inbe ngai lo hrim hrim a tih theih; inbiak chu tlèm tê a ni!

Tin, kawng lehlam zâwng tak chuan chutia kan inkâr a zau leh ta dâwrh chu ka tân hlei hlei a ṭha záwkin ka hre hnuhnawh a, kan inngaihven em em tawh loh mai bakah kan inhnimhnai tawh lo bawk a, kan inneih tirh lâi ai mah khan kan inngaihsak lo zualin ka hria. A chhan ni theia lang chu tunah chuan a ngaihzawng hlui, Hazel Monroe-i a rawn lèt leh tawh tlat a, danglam ta viau mah se a àwm lo hran lo.

Hun leh nî a her liam zung zung a, kâr lovah Christmas boruak kan hmang zo der a, ka piana hnu lama ka la hman nawm loh ber a ni hial ang. Christmas nî tak phei chu HOME lamah hun ka hmang daih nghe nghe a, dik tak chuan engkim ka sawi chhuah ngamna pi Martha-i a awm vang a ni ber a, ni lo se chu ka chhuah peih pawh ka ring lo. Media lam lah an vung mai si a, khawiah pawh kal dâwn ila kan chanchin an ngaihven zel tawh mai bawk si, ka nun chu a chep tak zet a ni.

HOME lamah pawh duh ang thalin ka kal tam theih loh phah a, a châng phei chuan George-a chu ṭhen daih mai te ka duh rum rum ṭhin. Chutih lâiin pi Loren-i erawh chuan ka ṭhen a hlau em em thung a, kei min ngaihtuah avanga George-a zilhhau châng pawh a ngah ṭhin hle. Amaherawhchu, George-a nena kan inkâr a ṭhat phah chuang lo va, a chhiat belh chuang hek lo va, kan khawsak sakin kan khawsa a ni ber.

Kum thar kan chuangkâi a, kum tir phat aṭangin boruak a rit nghal miah miah hle a, a chhan pawh Hazel Monroe-i vang bawk a ni. Tun ṭum chu a dan a dang deuh a, George-a nena an chanchin lam ni lovin pi Loren-i nena an chanchin lam záwk a ni a, thu a than dan chuan pi Loren-in mi ruaiin Hazel Monroe-i thahtîr a lo tum a ni àwm a, chumi avang vek chuan George-a nen bawk an inhnial nasat phah hle a, pi Loren-i erawh a ṭang mar nasa khawp mai.

Kan in chhûngkhur boruak chu a ṭha lo zâwngin a kangkâi zel a, breaksfast leh dinner pawh kan kilho tawh ngai meuh lo. Pi Loren-i lah Hazel Monroe-in a lakah case a file bawk si nen nilêngin a chhuak bo ṭhin a, amah leh amah a fihlimzia lantir nân a inbuaipui a ni ber. George-a pawh a bang chuang lo, a nu lam ngaihtuah a ṭul rualin a ngaihzawng hlui, a ngaihzawng ni leh mêk ta Hazel Monroe-i a ngaihtuah ve tho a ngâi bawk si a, in khata cheng e ti lo chuan kan inhmu khât hlawm ṭhin hle.

In ropui leh lian takah kan awm a, changkanna leh màwina hrang hrang hmangin kan tuam hlawm a, kan khawsak pawh mite phak bak bak a ni a, mahse chung khawvel hausakna leh màwinate chu kan nun hlimna ber a ni chuang hauh si lo.

Zan khat chu pi Loren-i leh George-a an inhnial leh chiam a, inhnial satliah pawh an ni lo, pi Loren-i chuan a bêng nghe nghe a, mahse George-a erawhin engah mah a ngâi lo thung. Pi Loren-i thinrim lutuk chu a ṭap hial a, Hazel Monroe-i that tura mi rawih a neih loh thu a sawi hlawk hlawk a, mahse a mi chhawr anga insawi te'n pi Loren-i hming bak an lam bawk si lo, chu tak chu kan buaina lian ber a ni a, George-a tân tak pawh eng ber nge rina rin loh tur hriat a har ve viau ang ka ring.

"Naktuk chu HOME tlawh ka tum a, hruai kher ka ngâi lo ang" ka ti chhuak sap a, George-a erawh ngâwi ngulin laptop a bih ngur ngur a, ka ṭawng chu hria ang paw'n a awm lo hrim hrim!

"George.....?" keimah bawk chuan ka ti leh a, ka kalna tur emaw ka chhuahna tur sawi zel tura min tih avanga bia ka ni ber.

"I duh chuan i riak nghal thei ang" min en lo va, a ṭawngkam bul hmuk chuan ka lâi a chhun zawk bawk.

"Aw le......" ka ti thawp sep a, min mamawh miah lo tih hriat lutuka a awm chu ka thinlung chhûng a nâ tak zet!

"Keini pahnih hi kan inṭhen mai ṭhain i hre ve em?" kan ngáwih dun vang vang hnu chuan ka ti leh ta nge nge a, ka nun buai leh laklawh nuaih chu veng hawk se ka ti ngawih ngawih!

"Chu lam ngaihtuah a ṭul lo, muhil tawh rawh" a rawn ti thum bul a, mahse chuti maia ka muthilh theih mai ka ring lo.

"Min ning em?" ka ti leh raih a, ka rilru mumal loh azârah ka ṭawng huai ngam ve te pawh a ni mahnà!

"Ka ning chein i hria em?" a rawn ti nghut a, zawhna veka mi chhàn lèt hi chu amahah a bet tawh ni berin ka hria.

"I tân hian ka hnawksak tih ka hai hleinem George, ni lo, i tân mai ni lo, he chhûngkaw tân hian ka hnawksak a ni. In hnenah hian khawsa lo ila zawng tuna kan buaina tawh mêk pawh hi in tawk lo ang a, pi Loren-i nena in inkâr mai bakah Hazel Monroe-i nena in inkâr chenin a ṭhat ngei ka ring" ka ti leh sap sap a, ka mit ka chhîng zui vang vang bawk.

"Ka pawi i sawi lo va, i hnawksak bawk hek lo, chutiang bawkin ka nu tân pawh eng buaina mah i thlen lo, muhil tawh rawh" a ṭawng tir lam chu bul deuh hmuk hmuk mah se a tawp lam erawh a dam hniam ruih thung.

Meng chhuakin khum aṭang chuan ka tho ta daih a, eng nge tih ber tur pawh ka hre chuang lo. Room ka chhuahsan chiah chu boruak a lo vawt hit har a, kawr lúm là tura lèt leh ka tum zet nàin ka lèt kher duh ta lo law law mai. Sofa-ah chuan ka ṭhu ngâwi reng a, pâwn lam chu ka hawi a, vur a tla lo va, chhum a zîng paw chiai záwk a, thlasik mah ni se ruah a sûr leh dâwn te pawh a ni maithei!

Ka ṭhut deuh vang vang hnu chuan in kawta tei mai mai ka châk teh thut a, pâwn pawh ka thleng har lo hle.  Boruak chu in chhûng ai a vawt záwk a, mahse eng he hu ah ka ngâi hran lo, ka rilru mah a kal ding sawt a, awm reng dâwn pawh ni ila ka huphurh teuh lo mai. Engtia awm nge ṭha ber ang tih lam ringawt chu ka ngaihtuah ngut ngut a, zep thu a cheng lo, ngaihtuah lo thei lo dinhmunah ka ding miau si a ni.

"Sophia.....!?" mipa aw vin khauh zet mai ka hre chiah chu ka hawi phawk hrâ mai.

"Pâwna chhuah hun a ni lo tih i hre lo nge min tihbuai i tum ve hrim hrim záwk!?" George-a aw chu khauh ṭha hmuk hmuk tak a ni!

"Chutiang a ni lo....." ka ti dek dek chu

"A nih a hnu, eng vanga chhuak nge i nih?" ti bul leh hlukin ka bul a rawn thleng titih nghal a, chuti taka min lo ngaihtuah chu ka ring lo nasa mai.

"Naupang ang maia thil ngaihtuah thui lovin awm tawh ngai suh!" tih leh ka kuta chelh a rual a, min kai kal nghal hlawk hlawk bawk.

"Min thlah tawh rawh" in chhûng kan luh hnu chuan ka ti fiah felfai thlap a, min en chiang ngang ngang teh e!

"Tuna chinah zan lâia pâwn chhuah ka phal lo tih hre tawh ang che!" ka laka thuneih a tum lutuk chu ka ngaihdana a ni bîk hauh lo.

"Ran ang maia khuahkhirh theihah min ngâi ta em ni?" ka ti lèt ve salh a, ka kut a vawnna chu ka phih thla sawk bawk.

"Keini pahnih hi kan inṭhen a ngâi a ni George, i hlim chuang lo, kei pawh ka hlim chuang lo. Chu bakah ka awm loh hunah chuan i duh duh i kawp thei ang a, media lam paw'n kan chungchang an ngaihven reng tawh lo ang, tun ang ni lo hian!" ka ti leh ta thlawt a, kan kâr thu tihtawpa inṭhen mai loh chu tih theih a vâng ve êm a ni.

Engmah a sawi lo va, in chung lamah ka chhohsan ta daih a, khuma kan mut dun hnu thleng paw'n kan inbe leh tawh lo hrim hrim! Varṭian thlengin ka meng tluan zak a, ani erawh a muhil har viau na chu a muhil ta tho va, zîng kâra chhuah ka rilruk thut bawk nen ka tho te reng reng chu thawm ka dim hle a, a harh a nih vaih chuan ka plan zawng zawng a fail vek a ni mai.

Gate pâwnah ka awm ta maw tihah taxi ka phar nghal a, HOME lam panin kan tlan ta vang vang a, zîng kâra kal ka duh leh thut chhan pawh min chimbuaitu an awm lo ang a, khaw èn pangngai hnuah a nih erawh chuan George-an min thlah a tum ngei dâwn a, media lam paw'n an beng an lo chhî leh kar dâwn tih ka hre làwk vek a, chuvanga chhuak hmâ em em ta pawh chu ka ni!

HOME kawt ka thleng chu pi Martha-i ka be pawp thuai a, in aṭanga a rawn chhuah chuan mak tih hmèl tak hi a pu a, ka dem hran lo, kei pawh ni ila mak ka ti khawp ang. In chhûng kan lut te chu zawhna min zàwt deuh char char a, chutiang huna ka kal chhan chu a hre châk a ni ber a, kan boruak lêng vel hre ve vek tho mah se a hriat loh chin tlêm azâwng ka hrilh puat puat a, zan khuaa mu lo ka ni bawk nen a khumah chuan ka mu nghal daih nghe nghe!

Ka'n mu chu ka mu meng deuh kar a, mahse rei erawh a ni lo. Ka lo mutui viau te pawh a ni ang, thawm ri nak nakah ka harh a, khum aṭanga ka thawh chuan khua a lo èng vek tawh a, nî pawh a lo tlang sâng tawh hle. Pi Martha-i bulah ka tal deuh chawt a, naupangho fel ve tawhzia te, enkawl an hahdamthlakzia te, hun kal tawh thlengin a sawi luam a, keiniho min huikhawm lâi te kha  a rawn sawi chhuak a, a lung a lêng ni maiin ka hria.

Chhun lam chu in chhûng tihfel nân leh naupangho thil zirtir nân hun kan hmang a ni ber a, ka rilru hahna leh buai rukna zawng zawngte kha a bo ta vek emaw tih theih tur khawpin ka hlim a, ka hah a dam a, ka thla a muang hliah hliah bawk. Naupangho ei tur kan han sem te chu nuam ka ti em em a, anni pawh an bang bîk chuang lo.

Khua a hniam tial tial a, zan a rawn inher chhuak thuai a, a ruka ka ngaihtuahna reng, ka rilrua châm reng George-a chu a reh vung vung a, ka riah theih thu kha a sawi a, min mamawh miah lo tih a chiang fek fawk bawk a, zan khat mai ni lo, ka duh chen chen ka riak mai a ni ang chu! Khuma ka mu te reng reng chu muhil thei lovin ka inlet sek a, ka bulah pi Martha-i a mu ve reng bawk nen tihharh ka hlau viau a, mahse ka inlet thawmah chuan a harh ta tho!

"Engtika haw nge i tum?" engkim chiang takin ka la hrilh lo miau a, chutiang zawhna min zàwt pawh chu ka dem hran lo.

"Ka hre lo le....." ka ti sap a, ka ngaihtuahna ata George-a chu paih chhuah vang vang ka duh kher mai.

"Thu lêng vel hi a dik em?" ram khata awm nà nâ nà chu kan chanchin paw'n a beng a thleng ni ngei tur a ni.

"Dik lo a awm a, mahse dik a tam záwk, George-a hnenah phei chuan inṭhen ka rawt tawh hial asin" ka ti dat dat a, ka mitthlâah George-a hmêl a châm reng bawk.

"Engtin nge a chhán che?" a rawn tih chuan

"Chhánna mumal tak min pe lem lo" ka lo ti sam mai a, pi Martha-i bulah chuan dàwt sawi ka tum lo hrim hrim!

"George-a hi mi ṭha tak a niin ka lo hria asin" a rawn ti dam diai a, ka rilru pawh a tikal thui nghal viau!

" A dik alawm, mi sual a ni lo, ka lakah ngat phei chuan a sual lo hrim hrim, mahse nupa ni lo tur nupa kan ni lâi tak hi thil buaithlak ber chu a ni" ka ti zuai ta raih a, chutah pi Martha-i chuan hriat belh châk tih hriat tak hian

"Engtia nupa tur ni lo maw Sophia? Ka va hrethiam lo ve, i laka a sual loh miau te chuan engati nge inṭhen i rilruk mai?" a rawn ti zat zat a, min en deuh kal bawk.

"A chhan chu hlimna ka pe ve miau lo alawm, a hming chauhin a nupui ka ni a, hmangaih chu khawi lamah, ani lak aṭang hian engtikah mah hmangaihna ka dawn ka ring lo. A rilru a tluangin a ṭha êm záwk a, ni lo se chu hnuaichhiah tak taka mi ṭawngkhum pawh a hrat ta ve ang" ka mittui a hnai nghal kuarh a, insum erawh ka insum nasa viau thung.

"Thil hi a kal dik lo laklawh ni maiin ka hria, han nghak deuh la, a ṭha ve leh mai ang, George-a hian chuti maia a thlahthlam duh che ka ring lo Sophia" pi Martha-i chu en pawh ka en duh tawh rih lo, ka ṭah a chhuak tih a hriat ka hlau a ni.

"Naktuk lamah em ni rawn hruai che a tum?" a tih zawm leh zat a, kei pawh chuan aw thian hmâsa kharh chung hian

"Min rawn hruai lawk lo ang, ka lo kal dâwnah pawh amah alawm heta ka riah nghal theih thu sawi, min mamawh lo tih ka chiang êm a, chuvangin ka duh chen chen ka awm ang" ka ti charh charh a, ka ṭawng ring hran lo hle thung.

"Chuti tur em ni? Kei chu a rawn hruai vat che ka ring záwk asin, mamawh miah lo che angin hre mah la a awm dan aṭang hi chuan a ngaihthah bîk miah lo chein ka hria, a chhan chu a nupui i ni tlat!" chutiang taka pi Martha-in George-a chungchang a khel rei chu ka la hre ngai lo.

"Thil awmze nei lo sawi reng lo hian i muhil tawh záwk teh ang" ka chhán dan tur hre tawh lo chuan ka ti ta ngawt a, ka mut dan ka siam rem zui zat bawk.

"Muttui le, i rilru tihah lutuk lo la aw, a châng chuan kan rin ang hi a ni vek ṭhin lo a nia Sophia...." ka chhâng tawh lo va, muhil ang maiin ka mu ngâwi reng a, mahse ka la harhfim em em thung.

Zîng nî chhuak chuan ka hmai a rawn chhun sâ hat hat a, ka harh thuai a, ka thawh meuh chuan pi Martha-i chu a lo tho daih tawh a, naupangho erawh tho tawh an awm rualin tho lo an la tam mah záwk a, nî thar a nih vang nge ni, ka rilru chu a thar sârh ni mai hian ka hria a, pi Martha-i bula ka awm vang ni ta berin ka hre bawk.

Chhun lam chu lei ṭha khawihin hun kan hmang a, pangpâr pot-a dah tur lei ṭha kan lá khawm a, kan lai bawk a, hahthlak hmél deuhin lang mah se hahthlak erawh ka ti lo hrim hrim thung. A nihna takah chuan nuam ka ti em em záwk a, chhun lama hna han thawh a, zan lama tui taka mut siai siai te chu a nawm dan a dangdaiin a hahdamthlak tak zet a ni.

Chutiang chuan hun leh nî kan chhiar a, kan hmang ral a, kei pawh nî 3 ngawt chu pi Martha-i te bulah ka khawsa ta! George-a hnen aṭangin eng ngaihtuahna thawm ri va mah ka hre ngai lo va, ka dawng ngai bawk hek lo. Chu chuan engkim a ti chiang viau a, pi Loren-i phei chu ka beisei lo tawp záwk, newspaper-ah mai ni lo, phone-ah nen lam an chanchin hmuh tur leh hriat tur a awm ni tin a, buai pawh an buai hlein ka hria.

Mak tih deuh erawh ka nei, chu chu George-a leh Hazel Monroe-i te an ni!

Khatia ka awm loh aṭang khan thawm an neih zawm meuh tawh lo a tih theih a, George-a chanchin a reh ang bawkin Hazel Monroe-i chanchin pawh a reh hmak a, pi Loren-i záwkin thawm a neih len tâk êm vangte pawh a ni maithei! Police te'n thil thlen dan an la chhui mêk zel a, rinhlelh kâi ber leh puhmawh ber chu pi Loren-i a ni miau a, reprort ṭhenkhatah phei chuan ka hming nen lam a kangkâi hial a, HOME lamah ka khawsa ta daih bawk nen min lo ringhlel tel ve chu niin!

Amaherawhchu, chuti taka rinhlelh kâi ka ni lem lo va, mahse ka chanchin ngaihven ru reng an awm tih ka hriat hmaih bîk hauh lo. Nî a liam a, kâr khat dâwn chu HOME lamah ka khawsa ta! George-a hlata ka awm ta vang vang chu ka hlim viau dâwn emaw ka ti kha a ni a, mahse a lo ni teuh lo. Ka ngaihven ru reng a, ka thluak chhûng aṭangin ka paih bo thei lo va, 'min rawn ngaihsak se' tiin ka phut ru em em ṭhin bawk.

Keimahah kim lo a awm a, naupang bulah awmin han hlim châng te chu nei ve ṭhin mah ila a tawpah erawh George-a bawk ka ngaihtuah chhuak leh nge nge ṭhin a, han biak pawh hmâsak lah tlàwmah ka là ve laklawh tingtang tawh bawk si, ka awm dan chu sawifiah thiam phak bakin a buai ru tak zet!

Ni khat chu Colton-a a rawn lang hlawl a, mipa ṭawngkam felfai leh ṭawng duh suam suam tih takah pi Martha-i nen pawh an innèl nghal viau a, ka dam ṭhat leh ṭhat loh thute min záwt a, ka awmna a rawn hre daih thei chu mak ka ti ru viau bawk. Tin, media lamin ka chanchin an ngaihven zual hle tih thu hla kengin kan hnen a rawn thleng a ni ber a, a haw dâwnah pawh fimkhur turin min chah lawm lawm a, ka chapona avanga George-a chanchin engmah ka zàwt lo erawh ka inchhir hnuhnawh khawp mai.

Ka zan mu chu vawi leh khatah ka nghing dawt a, ka meng nghal kawk a, ka bula mu pi Martha-i pawh chu a tho thuai a, naupangho ṭe thawm kan hriat rual rual chuan a tlanin kan tlan a ni ber. Chutah thil puak ri pawp a rawn awm leh nghal zat a, inven hman ni tawh hek lo. Ka hawi chhuah rualin che chang lèk lova chhuata lo bawk hlawm reng pi Martha-i chu ka hmu nghal a, puih tuma ka thawh rual chuan eng nge a nih pawh ka hriat loh a rawn puak leh ṭhuai a, ka lêng nghal lawp a, ka taksa lam nâ eng ang mah se in chhûng kang hluah hluah avang chuan ka tha leh zung ka sêng lui ngar ngar a, mahse a va'n harsa si èm!

Theihtawp chhuahin chet ka tum hram hram a, pi Martha-i lamah chuan ka bawkvak phei ṭai ṭai a, mahse meikhu mawlh mai chu ka tuar zo dâwnin ka hre lo. Ka hrawk a tawt a, ka hmuh theih leh hip luh theih awmchhun chu meikhu ngawt a ni a, naupang ṭap thawm leh mangang au thawmte chu hre pha vek mah ila tih theih engmah ka nei si lo. Ka mit ka chhîng vang vang a, thih bak hmâbak ka nei lo tih ka chiang em em bawk.

Chutia taksa leh rilru chau ngawih ngawiha ka awm lâi chuan ka kang deuh lawp a, ka sâ deuh pup bawk a, meialhin ka taksa chu a rawn tikang tawh ni maiin ka hria. Nimahsela, chutiang chu a ni hauh lo. Ka awmna hmun chu thawklehkhatah a dai vawt raih a, ka mit erawh chauh luatah ka la meng hlei thei lo tluang zel thung.

Nge ni a, kei hi ka thi ta vang vang zàwk....!?

End of chapter 6