𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟓)

THE PRESIDENT'S WIFE

(Contemporary M&B Story)

By

Havali Adam

Chapter 5

Ka suangtuahna ata harh chhuaka ka'n meng diar diar chu varṭian a lo ni fel der tawh a, zan lama kan hun hman dan khan ka ngaihtuahna a rawn luah zui nghal zat bawk. Min kuah run chunga muhil thaw ri suk suk ka pasal chu tihharh hlau tak hian ka en dek dek a, ka kut, chet cháknaa khat chuan a biang leh a chal ka tawk den den a, beisei loh taka a lo sat deuh vur avangin ka kut chu ka là sawn thuai nghe nghe!

Ka mut dan ka siam rem vat a, ani pawh ka chet dan chuan a tiharh chawpchilh nghal a, mahse a mut a la chhuah hmèl ang reng viau thung. A âwma min kuah bei mai a tum chu ka lo ṭang ṭung a, maimitchhîng diam tawh si kha a rawn meng leh a, kan mit chu a intawng zui chat a, zawhna a nei tih pawh a hriat hle bawk.

"I ṭha miah lo a nia George.....?" ka tih chuan a lo nui mai a, ka thusawi chu engah mah a ngâi lo a ni ber.

"George.....!?" ti leh halhin a âwmah chuan ka chum dat a, ka aw aṭang ringawt paw'n ka ngaihtuahzia chu a hriatthiam ngei ka ring.

"Nizana ruah i rawn do vang kha a ni chiang mai" ka ti chhuak leh sap a, eng dang sawi tawh lovin ka tho ta thuai bawk.

Damdawi bâwm nena ka inchhawp rup hnu chuan a rawn tho chhuak ṭuah ṭuah a, damdawi chu ka pe vat a, ani pawh chuan ka pek ang àngin a lo ei ve nghal mai a, nizan khan ruah rawn do kher lo se zawng chutianga a awm chu ka ring hauh lo. Kan thawmah pi Martha-i pawh a rawn harh a, kan lo inbuaipui mawlh mawlh a'n hmu chu nui deuh var var pah hian

"In mu nuam thei meuh maw?" a rawn ti hliai a, chutah kan awm dan chuan a ngaih a tiṭha vak lo a ni mahnà!

"I dam lo em ni Sophia?" a rawn ti leh a, rizai lûm bula damdawi bâwm inhûng chu a hmu ni ngei tur a ni.

"George-a záwk hi a nia....." ka ti dek dek chu George-a chuan

"Ka ṭha....." a lo ti nghal vut a, ṭawng zawm tum lo tih hriat tak hian a tho ta daih bawk.

Pâwn lama a chhuak chu ka zui chhuak ve nghal a, mahse ka zui tih erawh a hre miah lo thung. HOME kawta phul ṭona lâiah chuan a ding ngâwi vung vung a, amah hlat lo takin ka ding ve reng nà chu ka be chuang hlei lo va, amah záwk chuan min rawn hmu ta nge nge a, mahse min be bîk chuang der lo.

Ka damdawi pek kha a thawk te pawh a ni ang, a awm dan aṭang chuan a pangngai hmèl viau a, in chhûng lamah ka luhsan ta daih bawk. Ka luhsan aṭanga rei pawh ni lovah a rawn lut ve leh mai a, coffee in pahin pi Martha-i chuan zan lama kan mut ṭhat leh ṭhat loh min záwt a, keimah záwkin ka chhâng zat zat a, George-a erawh a ngâwi reng thung.

Pi Martha-i chuan breakfast kil ve nghal law law turin min sâwm leh a, George-an nuam a tih ka rin loh avangin ka hnial thuai a, chu bakah breakfast lehzel kan ei a nih chuan pi Loren-i lakah pawh a inthlahrunawm dâwn lutukin ka hria a ni. Nî a rawn chhuak det det tihah in lam panin kan haw a, kan tlan chak hran lo hle bawk.

George-a chu a ngâwi vung vung a, kei erawh thlasik boruak hipin ka hnâr ka len vel a, pâwn lamah ka hmai ka dah chhuak deuh ngat ngat a ni ber. Thlasik boruak paw chiai chiai kâra nîin chhum a chhun tle ser ser vel te chu mâwi ka ti zual a, eng rilru dang mah pu thei lovin leilung màwina chuan min fan hneh hliah hliah ti ila a sual tam lo khawp ang.

"Hello......" George-a aw ka hriat rual chuan ka ṭhut dan ka siam rem a, ka melh zawk nghe nghe bawk.

"A pawina a awm lo, company-ah i lo kal thei ang" ti deuh nghut hian

"Chu lam zawng i ngaihtuah a ngâi lo, kan inhmuh ngei beisei tawp rawh" a tih zawm leh nghal thlup thlup a, tu nge a biak hre chiah lo mah ila a hmêl leh ṭawngkam aṭang chuan a  thutak tih ka hai lo hle.

"Ni e, ka hnenah hian sawi tur tam tak i la neih ka ring" tlêmin a aw chu a bul hmuk ta lo deuh a, keia tih theih awm chhun chu lo ngaihthlak tawp a ni mai.

"Kei nena lunch ei dun turin lo inruahman ang che" tih leh a phone chu hmeh tawp a rual a, ka mit sîrin ka en ru reng a, mahse ani chuan ka en ru reng tih a hre lo a nih hmèl, ka lam a rawn hawi lo hrim hrim!

Tawi tè tèin kan inbe leh zauh ṭhin tih loh chu kan inbe lo tluk a ni a, ngâwi rengin kan chûang dun deuh tawp a, kâr lovah in kawt kan thleng der a, in chhûng kan lut chu pi Loren-i hmêl ka zawng ru deuh a, mahse hmuh tur a lo awm lo hrim hrim a, maid pahnihte erawh a ngai te bawkin ka hmu leh a, George-a kan nupa room-a a chho fel chiah chu a awm loh chang ang hrim hian min nuih nghal sâng a, pi Loren-i awmna ka záwt zui nghal zat bawk.

Maid te sawi dan chuan pi Loren-i chu a chhuak nih hmél a, rei pawh ni lovah George-a a rawn chhuk leh ta bawk nen eng thil dang mah an sawi zui ngam lo va, kei paw'n ka záwt zel duh ta bîk lo. In aṭanga George-a chhuak tur chuan

"Chhuah duhna i nei a nih chuan min rawn bia ang che" a ti dam dap a, a hmêlah chuan a hriat lova ka chhuah leh daih a hlau tih a hriat hle bawk.

"Neih àwm pawh ka hre lo....." pangngai taka ka tih chuan

"A ṭhat chu....." a lo ti ve leh mai a, mi pawh en tawh chuang lovin a chhuak zui ta nal nal!

George-a ber a awm loh tâkah chuan maid te chu zawhna dang ka zàwt leh a, nizan zankhuaa pi Loren-i mut ṭhat loh thu te, a ṭah thu te, ka awm loh lâia George-a nen an inhauh leh hrep thu te an sawi malh malh a, ka hriat lovah thil a lo thleng nual tih chu hrilh hranpa ka ngâi lo chiang khawp mai.

Room-ah ka chho va, dawhkan chunga ka phone dah ka'n en chu George-a hnen aṭangin phone call a lo awm ṭeuh a, engmah sawi lo leh hrilh lova ka chhuah bo daih avang khan min lo call nasa hle tih chu ka hrethiam chawpchilh nghal mai. Rei pawh awm lovin in hnuai lamah ka chhuk thla leh a, maid pakhat záwk chuan juice min rawn thlit zui zat bawk.

Chutia juice ka in lâi chuan pi Loren-i hmêl ka hmu hlawl a, min hmuh rual rualin min be nghal siam siam a, nimin boruak nen kha chuan danglam tak a ni. George-a chet dan avanga ka lungnih loh hlauin eng eng emaw ni min sawipui chîam a, chung zîngah chuan George-a ngaihzawng hlui pawh a rawn sawi chhuak ta nge nge a, kei ka nih avanga engkim min hrilh tlang vek a duh thu a sawi zui nghe nghe!

"A pa dam lâia a kawppui ni ṭhin kha a ni a, dik tak chuan a pa pawh khan a ngaina lo, keiamah ang bawkin, mahse George-a berin a duh tlat si a, ani ang hmeichhe ngaihsak lo lutukina a duh miau si kha chuan kan en liam ta tawp a, an inkawp kawp khan kan inkawptîr a, George-a lar vang lâi tak a ni bawk nen media lam paw'n an chanchin an ngaihven ṭhin hle" ti malh malha chawl deuh dat hian

"Nimahsela, Hazel Monroe-i záwk khan thuthang a nei chho ta reng mai a, George-a erawhin a ngaithiam mai zel a, mahse kei chuan ka thei ve der lo ta a ni. Hazel-i kha mipa lawm tak a ni tih ka hria a, ka rin ang ngeiin nau a pai ta ngei bawk a, mahse kha a nau pai pa kha ka fapa George-a hi a puh tlat mai a, chutih rual chuan amah vek khan a ruka mi tu emaw a biak hnenah George-a fa a nih loh thu a sawi leh zuah zuah bawk si a, chumi avang chuan tihtur dik nia ka hriat angin ka che chhuak ta a ni" a rawn tih zawm leh zat zat a, mak tiin ka lo meng bial kawk kawk a ni ber.

"Chu ni lo thil thleng pawh a la awm nual a, mahse sawi chhuah vek a ṭul rih lovin ka hria. Hre tura ka duh che chu, ka fapa George-a hi i rilru tinâ duh tur khawpa sual a ni lo, a hun kal tawha a kawppui ni ṭhin a rawn inlár leh tàk avang hian i rilru buai lo se, a nupui i ni tih inhre reng chungin lungmuang taka awm turin ka duh che Sophia" a rawn tih leh chuan ka lo buk khum nghat a, sawi ve tur rèng ka hre lo.

"Khang thla liam ta chhûng zawnga in lo chen dunna leh nupa in lo nih tawhna te khan engti kawng zâwng emaw tak chuan a rilruah hna a thawh ngei ka ring a, a kawppui hlui a rawn inlar leh avang ngawt hian chuti maia in nupa inkâr a ṭhiah sawm duh ka ring lo bawk" a ti leh charh charh a, George-a hmêl ka mitthlà zui vang vang a, mi sual a ni miah lo tih ka chian rualin eng pawh thleng thei a ni tih ka va hre chiang si èm!

Nilêngin George-a nena kan inkâr chu ka ngaihtuah awl lo va, Hazel Monroe-i nena an inkâr pawh ka ngaihthah chuang der lo. Pi Loren-i chuan ka rilru puthmang tur àwm ang a hrethiam a ni chèk ang, George-a chungchâng emaw Hazel Monroe-i chungchâng pawh min sawipui duh tawh lo hrim hrim a, thil hlimawm leh rilru zàngkhaina tur thu hla lam hlir a chhak chhuak a, mahse ka mood erawh a pangngai tak tak thei tawh lo.

Ina George-a lo haw te chu a rukin ka en leh veng veng ṭhin a, ka hmuh phaka a awm hi chuan eng rilru hnual mah ka pu pawh a ni bík chuang lo, mahse a awm lo tih ka hriat chinah erawh mahni insitna namên lovin min tlák buak a, nasa takin a laka ka rilru puthmang a lo danglam laklawh tawh bawk si nen keimah leh keimah ka intihah thlawn ni maia inngàih châng te pawh ka nei ta fô bawk.

"Ka chhuak leh lawk dâwn a, min nghak lovin min lo mutsan ang che" dam dap hian a rawn ti a, vinna awka tel miah lo mah se a ṭawngkam aṭang chuan thupek a ni tih ka hai lo hle.

"Sophia.....?" amah bawk chuan a rawn ti leh a, ka lo ngâwi rei mah mah te pawh a ni ang.

"Aw.....aw le....." ka ti chhuak sap a, ka thil en ngai ka en reng a, a kalna tur àwm ang ka hre sa tho va, a hmêl chu hmuh loh law law ka duh záwk a ni.

"Ka rei dâwn leh dâwn loh ka hre lo" min rawn din hnaih sawt a, dak chhuak zeuh ila chuan a hmêl ka hmuh nghal ngei pawh ka ring.

"I duh chen chena rei i thang thei alawm George, ka phalna lá ang hrimin awm lo ka awm a nuam záwk!" huaisen tak tluk zeta ka ṭawng chhuak ngam chu keimah leh keimah pawh ka inringhlel rum rum hial!

"Enteh Sophia....." tih leh ka hmâa rawn ṭhut thlak a rual a, ka mal chunga ka kut dah chu a rawn hum zui chat bawk.

"Tunah hian thil buaipui lâi ka nei a......" min ngaihtuah hmèl taka a tih laklawh lâi chuan

"Ka hria alawm George, sawi kher a ngâi lo, kal tawh rawh, nghaktu i nei tih i theihnghilh palh hlauh ang e" ka lo ti dat dat a, hmeichhe dang nen an awm dun tur chu namên lovin ka thik a ni tih hre lo se ka duh ngawih ngawih!

"Min hrethiam a, ka lawm e Sophia" hmuh nuam tàwk chiaha mâwi hian a nui suk a, ka nunah a vawi khatna atân a hnen aṭangin lawmthu sawina ka dawng a, hlim pawh ka hlim ru hman viau a, mahse a ngaihzawng hlui Hazel Monroe-i nen an inhmuh dâwn avang chauha sawi a ni tih ka hriatna chuan min va run vawng vawng si èm!

"Fimkhur la aw......?" nui lui deuh sânga ka tih chuan bu nghut hian ka kut chu a là kang a, a fawp zui zeuh bawk.

"Muttui le......." ti supin a tho va, eng thu mah sawi tawh lovin kan nupa room aṭang chuan a chhuak ta vang vang!

Ka hmuh phak lova a awm chiah chu ka thinlung a rum nghal vawng vawng a, ṭah loh ka tum paw'n ka thei thlawt lo. Khumah chuan ka mu kawm ngut a, George-a lukham chu ka pawm chawt bawk. Pi Loren-i khan lungmuang taka awm turin min hrilh kha a ni a, mahse ka thei thlawt lo chu a ni e.

'Engtin nge an awm ang? Eng nge an tih ang?' tih lam ngawr ngawr chuan ka rilru mai ni lo ka thluak nen lam a luah khat a, ka inngaihtuah lungpuam lutukna lamah pi Martha-i ka ngâi em em bawk. Ani nen chuan awm dun ngat ila zawng ka rilru nàtna te chu ka thlen ang a, ka ṭap hawm hawm ngam ang a, ka sawisel phak loh leh ka huat phak loh ka pasal, George-a chu ngainat loh ka duhzia ka hrilh ngei ang ka ring.

Hringnunah hi chuan ngâithlatu kan mamawh a, kan rethei emaw ka hausa emaw pawh ni se, min ngâithlatu te bulah chuan sumina a lei phak reng reng loh hlimna kan chhar a, kan duhthlanna vang ni miah lova lungngàihna chhumpui lo zîngte chenin kan au chhuahpui rawih rawih ngam ṭhin. Chuvangin, tu tân pawh ngâithlatu hi chu a hlu a ni.

Thawm ri sur sur chuan min tiharh a, ka meng chhuak chu khua a lo vâr fel diam tawh a, nî erawh a la chhuak lo thung. Tukverh lam hawiin ka mu meng kar a, nizan lama ka awm dan kha ka ngaihtuah lèt rauh rauh a, ka lo ṭap muhil tlang daih chu niin! Chutia chet pawh che lova ka mut men kar lâi chuan bathroom kawngka a rawn inhawng ri khap a, George-a hmêl ngei ka hmu chiah chu mak ti tak ka ni!

"Mut mu i tuah ṭhat ngei ka beisei" ka harh tawh tih a hria tih chu hai rual a ni lo va, mahse ka la che chuang der lo.

"Ka awm loh hlana mutpui pawh i lo nei ṭha khawp alawm kha......" a rawn ti leh chiah chu ka harh chhuak zawk a, ka meng bial nghal kawk nghe nghe!

A lukham, ka âwm si cheta ka lo la kuah beh reng chu thlah thuaiin ka nawr sawn vat a, chu chu a lo hmu ni ngei tur a ni. A nui thum dut a, a rim fai sar, a ruka rimtui chem chem chuan ka hnâr a verh nghal chiai chiai bawk. Drawer pawt hawngin thawmhnaw a inbel zui mual mual a, a thawmhnaw hak aṭang chuan morning exercise a là dâwn lo tih pawh a chiang hle.

Thawmhnaw a inbel zo chu khum lamah a rawn phei a, ka lo melh leh zeuh ṭhin a, rawn mut a tum ni berin ka hria. Chutah ka rin ruk ang ngeiin khumah chuan a rawn awm ta ngei a, rei pawh mi en lo hian a lukham chu a en deuh vung vung a, che chhuak thuaiin a lukham, ka mittui avanga val kalh chu ka let sawk sawk a, ka chet dan zung zung avang chuan a hamhaih hmèl hle bawk.

Zah pawh dâwn lova a lukham ka lehthal zawh chiah chu ngâwi reng hian a let leh ngat a, ka ṭap a ni tih a hriatthiam ngei pawh ka ring. Ka tho thuai a, inphih fai hlei lo hian kan nupa room aṭang chuan ka chhuak ta daih a, kan awm dun reng a ni ngat zawngin ka tâna chhàn harsa zawhna min zàwt dâwn tih ka chiang êm a tin a ni!

In hnuai ka thleng thla chu pi Loren-i ka hmu hmâsa ber a, kitchen lamah phei phawta tuisik ka in té tê hnuah a bulah chuan ka ṭhu a, newspaper a lo chhiar uluk hle a, heading pakhata George-a hming leh Hazel Monroe-i hming ka hmu chiah erawh keimahah danglam a awm nghal zawk a, ka melh ngai ka melh rei deuh nge ni, pi Loren-i chuan min rawn en nghe nghe!

Nizan kha chuan ka thinlung chhûng a nâ ngei a, ka nàt nât khan ka nâ mawl tawp a, ṭah pawh ka ṭap hial a nih kha! Amaherawhchu, Hazel Monroe-i nen hun an hmang dun dâwn tih hre tlang chiang em em mah ila finfiahna nen thlap han hmuh tâkah chuan a thawh dan a dang khawp mai. Ka nâ ru veng veng tih chu ka pha lo va, mahse tu hmuhah mah ṭah emaw ṭah chhuak hmèl put ka tum lo bur thung.

Hazel Monroe-i thlalak záwk chu ka mit sîrin ka en ru reng a, hai rual lovin super model a ni tih a pianah chuan a lang chiang em em a, pian mâwi tak a neih mai bakah kei ang lo takin a inkhâi thli zaih a, a hmêl hrim hrim chu hmuh a nuamin a changkang vah vah hle bawk. George-a bêng dâwn a chen a, super model tih takah sâng ṭha veh vawh tak chu a ni.

Ka awm ve tâk reng vang nge ni, pi Loren-i chuan a chanchinbu chhiar lâi chu a khup ta daih a, maid pakhat záwk hnenah chuan coffee no hnih a chah zawm zat a, maid tirh kher ngâi lova keimah va kal mai ka tum chu min khap zui zat bawk. Pasal ka neih tirh kha chuan in chhûng khura chet ka tum ṭhin kha a ni a, mahse pi Loren-i leh George-a te'n an phal tlat si lo va, hlawh neia chhawr maid pahnih an awm ve reng bawk nen tun thleng hian eng ti lem lovin ka khawsa tluang zel a ni ber e!

Zîng kâr boruak hipin in kawt lamah ka tei chhuak mai mai a, kan in hi in hmun zau ṭha tak a ni a, thing pawh a inphun mâwi hlawm hle. Thlasik zîng tih takah boruak chu a vawt deuh suk a, mahse nuam ka ti em em tho. Thingkung pakhat hnuaiah chuan ka ṭhu hahdam der der a, ngaihtuahna a vak vel a, George-a nena kan chunchâng pawh ka ngaihtuah kâi a, tun dinhmunah ngat phei chuan ngaihtuah kài loh theih pawh a ni lo.

"Sophia.......!?" George-a aw ngei mai ka hre thut chu ka hawi zawk a, mi chhe sawi chu koh ai a hnai an tih tak kha maw lè!

"I kalna tur sawi lovin bo tawp tawh suh ka ti a ni lo'm ni?" a rawn ti vin khauh hmuk a, ka bul chu a rawn thleng titih nghal der bawk.

"Ka....eng lo....khawiah mah ka kal hleinem....." ka ti ban deuh chap a, chuti taka a awki a tihdanglam chhan chu ka hre lo kher mai.

"Eng vanga in chhûnga awm mai lo nge i nih?" a aw chu hriat a lo nuam lo hmuk hmuk hle a, han chhán mai dan tur pawh ka hre lawk lo.

"Zîng boruak hîpin ka tei kual mai mai e ka tia....a bak a awm lo" pangngai thei ang berin ka ti sap a, tur zeta min enna pawh chu a zia ta deuhin ka hria.

"Lut ang!" ti bul leh hlukin a kal zui nul nul a, a awm dan chuan min tibangbo hman lek lek bawk.

In chhûng ka lut chu a lo reh deuh ṭhiap a, kitchen lamah maid pahnih an che ri rak rak a, pi Loren-i pawh ka hmu miah lo va, George-a ber lah chu ka hmâ chiahah a kal emaw ka tih kha ka hmu zui tawh miah lo lehnghal a, kan nupa room ka luh chuan ka rin ang ngeiin a lo ding ngáwi run a, mahse min en lo hlauh!

"Newspaper i chhiar ṭhin em?" tihtur hre lo zeta ka awm deuh tlawng lâi chuan a rawn ti sup a, min en chiang ren run ta hle bawk.

"Immm......chhiar ve ṭhin tho e....." ka tih chuan min melh dan a thutak lehzual a, eng vanga chutiang zawhna chu min zàwt nge a nih ka hre lo kher mai.

"A nih tukinah i chhiar tawh em?" a rawn ti leh nghut a, ka melh zawk nghe nghe!

"Ka la chhiar chiang chiah lo, engati nge? Thil thleng a awm em ni?" hrethiam lo ang reng taka ka tih chuan

"Khawiah mah chhuak rih suh ang che" a lo ti hluk a, a thusawi awmzia chu ka hrethiam lo lehzual!

"Engati maw?" ka ti hê hû a, thil thleng a awm tih chu hai rual a ni tawh lo va, mahse eng thil chiah nge thleng tih erawh ka hre lo a ni.

"Chhuak lo la a ni mai, in i chhuahsan duh a nih paw'n kei min hrilh hmâsa ber ang che" thil awmzia hriat chian châknain ka khat tih chu a hmuh hmaih bîk ka ring lo.

In hnuai lama kan chhuk thlak leh hnu chuan breakfast ei hunbi a rawn inher chhuak thuai a, a tlangpuiin zíng dâr 7 leh dâr 8 inkârah hian kan ei ziah a, chumi ni lovah chuan kan ei ngai mang lo a tih theih! Breakfast kan kil lâi chuan George-a chu rawn ṭawng chhuakin khawiah mah chhuak chí ka nih loh thu a sawi a, pi Loren-i pawh chuan engtin mah hnial a tum miah lo bawk.

Thil dik lo a awm tih hrethiam chawpchilh nghalin ka rilruah newspaper a rawn lang hmâsa ber a, zîng kârah pawh khan pi Loren-i khan a khup daih a nih tak kha maw le! Breakfast chu ka kham thuai a, sofa lam pan ding nghal chatin dawhkan chunga newspaper lo inthlep chu ka chhiar zui nghal a, ka pasal George-a leh Hazel Monroe-i chanchin inziah dan mawlh chuan min va ṭhawng tehreng ém!

Hazel Monroe-i záwk chu media lamin interview neih puiin modelling lama a lo lèt leh dan te leh George-a nena an inkâr dinhmun te an záwt hi a lo ni a, chutah Hazel-i lah chuan George-a nena an inkâr a ṭhat thu mai bakah an renew leh thu te, an la inhmangaih reng thu te chu a sawi chhuak piap piap zui leh ta nghal a, chumi avang vek chuan media lam paw'n ka chanchin an rawn ngaihven lo thei ta lo.

A hming chauh mah ni se George-a te ang mî hriat hlawh lutuk nupui ka ni ve miau a, ka chanchin hriat châkin media lamin beng an chhi kar hlawm a, an sum hmuhna leh eizawnna a ni bawk a, thuthang dik lo pawh a lo tam hman hle. Ka chungchângah ngaihdan chi hrang hrang an inneihsiak a ni ber a, George-an in chhuahsan lo tura min tih chhan pawh kha ka hrethiam ve ta chiah bawk.

George-a mawlh mai chu amah leh amah a intihmingchhe mai maiin ka hria, kei te chu eng tham mah ka ni lo va, media lam paw'n ka chanchin an ngaihven rei peih tak tak lo ang. Amaherawhchu, ani erawh mi lar a ni a, mî chung en a ni a, a nupui mah ni ila Hazel Monroe-i nena an chanchin ai chuan a hminghliauna tur thil a ti chu pawi ka lo tihpui daih záwk a ni.

Ka tân te zawng rilru nàtin awmzia a nei lo va, keia ngainat avangin min ngaihsak phah dâwn chuang lo tih lah ka hre chiang em em bawk a, chuvang chuan a laka vui thei pawh ka ni lo. A nupui ka nih avangin dinhmun ṭha ka neih mai bakah mi chunga lêng ang hialin ka khawsak a nawm phah a, chuta kâra a laka lo lungnih loh ve ngawt zawng a tihin a tih chì loh hrim hrim!

"Mamawh i nei em?" George-a chu ka en zawk a, mahse rei erawh a ni lo.

"Nei lo ve....." ka ti ṭha ve mai a, ka duh duh sawi ngamna ni se chuan ka mamawh chu 'hlim' ka ti ngei ang.

"Kan room-ah hian christmas tree dah ve kher ṭul i ti em?" a rawn ti leh sup a, engkim ka hriat vek tawh vang nge pawh ka hre lo, min ngaihtuah thar riauin ka hria.

"Ṭul ti hran lo ve, engati nge?" pangngai taka ka tih chuan

"Christmas tree leh a chei màwina tur ka rawn lei haw dâwn a, a bak chu i kutah ka dah ni rawh se" a lo ti ve leh mai a, a sawi tâkah chuan christmas tree chei pawh a hun chho tawh viau mai.

Company lama kal turin a insiam zui mual mual a, biak pawh kan inbe tawh chuang lo. Kan nupa room aṭanga a chhuah fel hnu chuan rei awm bîk lovin in hnuai lamah ka chhuk thla a, rilruah thil chi hrang hrang a infawn khawm a, thuthang lêng vak vel chuan ngaihtuahna a luah lo thei bîk bawk si lo va, pi Loren-i paw'n ka mood thlak tum viau mah se a thei lo chu a ni e.

Dârkâr a liam bawih bawih a, kâr lovah chawhnu her rawn niin khua pawh a hniam ṭan viau a, khaw thim hmâ hret tih àwm velah chuan Colton-a ka hmu hlawl a, company ka kal ṭuma kan inhmu tih loh kha chu kan inhmu leh tawh miah lo va, chutia kan in chhûng ngeia ka han hmu hlawl chu mak ka ti ru viau a, chutah pi Loren-i nen lah chuan an inhriat ṭhat hmèl em em zui!

An inhriatna a rei tawh tih hai rual a ni lo va, pi Loren-i chuan dinner kil ve nghal turin a sâwm nghe nghe a, chu ti taka an lo inhre ṭha chu ka mak tih a tling thlawt a ni. Pi Loren-i nen an inbiak loh kârin Colton-a chuan min rawn be leh zauh ṭhin a, kei paw'n pangngai takin ka lo chhâng mai a, min biak apiang lah chuan a nui sun sun reng leh ta nghal a, rilru sukthlek zawng zawng pawh a thlak vek thei hial a ni.

Chutia sofa-a kan ṭhut lâi chuan George-a a rawn haw a, min hrilh làwk ang ngeiin christmas tree pawh a rawn hawn ta ngei a, mahse kan zînga Colton-a hmêl a'n hmu chiah chu a mitmeng a danglam nghal zawk a, ka lo hmuh hmaih lo chiang khawp mai. George-a chuan eng vanga lo kal nge a nih a záwt a, Colton-a lahin a chhâng ṭha duh der si lo, biak pawh inbe rei lovin George-a phei chu kan nupa room lamah a chho ta daih nghe nghe!

Kei pawh chu ka che chhuak ve nghal mai a, in chung lamah chuan ka chho va, nupa kan nih ata company aṭanga a lo haw emaw a chhuak a lo haw hrim hrim hi chuan kan nupa room-ah ka zui chho tlangpui ṭhin a, ka zui chhoh loh hi chu chhiar tham lek a nih ka ring.

Room chhûng ka lut chu lungâwi lo ang hrima ngâwi ngul hiam a thawmhnaw a lo phelh sawk sawk a, a sana bun lâi te chu dawhkanah a dah ri chawrh a, mi â ber paw'n lungàwi lohna lian tak a nei tih an hriatthiam chawpchilh nghal ngei ka ring. Tin, tun hnai hian lungàwi loh bur bur hmêl a pu ta fô va, a chhan tak erawh keia hriat phak pawh va ni suh!

Bathroom lam pana a kal chu a thawmhnaw awm darh sarh deuh nuaih thleh ṭhat tumin ka che chhuak ve nghal a, rei pawh ni lovah a inphuh ri sur sur a, tun dinhmunah chuan han biak chì ziazàng niin ka hre lo. A rawn chhuah hmâ ngeia chhuah hman tum ran hian ka che zung zung a, drawer-ah a thawmhnaw ka khâi ṭha mawlh mawlh a, room aṭanga chhuah ka tum lâi taka a rawn chhuak hman ta tho erawh ka thaw huai ringawt!

"Chhuak rih lo teh!" kawngka lam ka pan zet tawh chu ka ding leh rih a, min rawn bia ni lo se zawng ka chhuak fel diam tawh ngei ang.

"Colton-a khu eng ti turin nge a lo kal?" a zawhna chu chhàn ngaihna vak ka hre bîk lo.

"Nangmah hmu turin em ni a lo kal?" chhán tuma ka àn zuau lâi chuan a rawn ti leh a, kei erawh ka lû ka lo thing nawk nawk thung.

"A lo kal chhan ka hre lo" ka ti ve tak nà chu a awih loh hmèl kher mai.

"A lo kal chhan i hriat ngei ka ring asin" tih leh min rawn pan a rual a, ka hmâ chiahah a ding nghal run bawk.

"Ka lo zu chhuk ang e" ti sepa kal sawn mai ka tum chu ka dar tawn tawnah a rawn chelh a, ka taksa a ṭang mar awt nghal nghe nghe!

"Phal lo ta ila?" ti supin min melh chhuk run a, a hmâ aiin min en hnai sawt bawk.

"George.......kawr i la ha lo a nia......?" ka ṭawngkam chhuak chu a tluangtlam lo hle a, a âwm ruak kang, min ur ham ham tu avang chuan ka zàm chhe lailet der a ni hawt e!

"Ha lo ang hmiang......" ti hniam dutin ka khabeah a rawn dawm a, a châwi zui nghal zat a, ka en ngam lo chu ka maimitchhing ta ringawt!

"Eng titurin nge min beisei?" thawm a reh vung vung hnua a rawn ti leh chiah chu a rang rang hian ka meng nghal kawk a, a mi chelhna ata ka tal pit thuai bawk.

Zahna leh zàmnain ka khat a, ka hmui a rawn fawh beisei ang hrima ka mit ka lo chhîng ngawt te kha ka inchhir hnuhnawh tak zet! Chutah tal pita ka kal sawn tur chu ka bânah a rawn chelh hman hram leh ta nghal a, a lama min pawh lèt rual chuan ka ke ka pal nawk nawk a, tum loh bak sakin ka bawh rawk rawk a, khumah chuan ka bawh tlu a ni ber a, ani lah chu a la nui suk zui!

Ka tukkhumah rawn chelhin hnuai lam aṭang chuan min fawp nghal tawn tawn a, tal chhuah tumin che phat phat ve teh mah ila awmzia a awm thui lo chiang kher mai. A tira nawmna pawh miah si lo kha dam ruiha min fawh chhunzawm zel tâkah chuan ka thisen a inlumlet tial tial a, a ma tân ngei pawh ka danglam tih chu hai rual a ni ta lo.

Khawvel hran daiha cheng tluk zeta nuam hian a mi fawhna chu ka dawngsawng ṭha a, men pawh ka meng phal meuh tawh lo a ni e. A che hrut a, zo zet hian min châwi kang deuh lawp a, ka mit ka men rual chuan ka chungah a lo bawk run tawh tih ka hre chawpchilh nghal a, mi pawh fawp zui lawk lo hian min en vung vung a, a thaw lûm ham ham ringawt te chuan mu leh mal hre thei lovin min siam a ni ber.

Kan awm dan a pangngai chiah chu ka thaw chhuak halh halh a, ani erawhin min la en hnai ngur ngur hle a, ngampa lo zet hian a âwmah ka nem deuh ṭai a, thil thleng zo chiah chuan keimahah nghawng a la nei nasa hle bawk. Ka chala rawn fawp leh zeuh hian a awm sawn ve ta nge nge a, a'n ding mar chiah chu ka en loh tur ka en tih hre chhuak nghalin ka hawi sawn rang kher mai.

Khum aṭang chuan ka tho thuai a, in hnuai lamah ka chhuk thla ta vat a, in hnuai ka thleng thla chu pi Loren-i leh Colton-an min lo en reng a, ka che buai phawlh phawlh lutuk chu mak an lo ti ni maiin ka hria. Colton-a phei chuan min fiam zui hlak hlak a, rei lovah George-a pawh a rawn chhuk thuai a, in a rawn thlen tirh ai kha chuan a hmèl hmuh a nuam ta deuh a, lungâwi lo hmél tak kha a pu tawh lovin ka hre bawk.

Pi Loren-i chuan Colton-a chu dinner ei ve nghal mai turin a sâwm nawn leh a, mahse Colton-a erawhin a lo hnar a, George-a záwk chu biak zawmin Hazel Monroe-i nena an chanchin a than chakzia a sawi ta daih a, chu chu a rawn kal chhan tak a nih thu a sawi zui nghe nghe bawk. Ka awm ve tih hre lo ang mai hian Colton-a chuan thil a sawi piap piap a, ka hriat vek tawh a rin vangte pawh a ni maithei!

Colton-a thil sawiin a zir bawk nen nichin lawka George-a nen kan awm dan kha ka ngaihtuah chhuak nghal a, thil thleng tur ni miah lo kan thlentîr tih ka hre fiah nghal kuarh a, Colton-a haw hnu thlengin ka rilru chu a kal thui hle a, ka tihtur dik tak ni taa ka hriat chu ka pasal, George Frazier-a pehhel zâwnga awm char char a ni.

Ni e, chu chu a ṭhat ber ka ring. Chuti ni lova kan inhnimhnai reng a nih chuan keimah záwk ka inthunun hlei thei ṭhin bawk si lo va, chuvangin ka rilru a nát loh zâwk nân pumpelh hram hram a fuh ber!

End of chapter 5