𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟑)

THE PRESIDENT'S WIFE

(Contemporary M&B Story)

By

Havali Adam

Chapter 3

"I hman tawh em ni?" a mi enna chiang zet avang chuan ka chil ka lem dawk a, ka bu deuh nghat bawk.

"Ti rawh.....i kal ang" tiin a kal sawn zui nghal a, a hnungah chuan ka zui ve mai a, chutia taksa kan han sawizawi dun tur chu ka ngaihtuah chiang chet chet a, ka phur lo hnuhnawh hle a, mahse ṭawngkâa hnar hmâsa tê tê phawt si khan a sàwmna ka lo pawm laklawh tawh nen han kiansan leh lawi chu thil tih chì a ni hauh si lo!

Ui tê ang maiin ka zui dat dat a ni hawt a, gym room kan lut fel chiah chu ka vawi khat hmuhna leh luhna tih takah ka hawi à deuh phuau a, ka mit chuan hmun tin kil tin a fang kual a, kan in compound ngeia awm mah ni se chutiang taka changkang a nih leh taksa sawizawina hmanrua a awm tam chu ka ring lo a ni ber e!

"I vawi khatna a ni bawk a, treadmill-ah hian tlan la a táwk rih ang" tiin ka tlan dan tur chu min hrilh zui malh malh a, ka speed duh zat hmeh dan tur a sawi lâi te chuan ka ngâithla ve kar a, mahse ka hrethiam em em chuang der lo.

"I hria ti raw?" a rawn tih chuan hrethiam àwm ang tak hian ka bu nghauh nghauh a, min ring lo ni maiin ka hria.

"I hrethiam tak tak maw?" a rawn ti leh chu

"Aw....." ka lo ti deuh hliai a, hrethiam lo vek ka ni bîk lo va, mahse ka hriat chin erawh a sawi tam tehlûl nen a tawi khawp mai.

"A nih chuan han ti chhin teh" a ti kher chu ka lungni chiah lo va, mahse a sawi ang chuan ka ti chhin ta tho.

"He lâi hi ti raw hmeh tur?" tih leh ka kuta ka kawhna zawn chu hmeh ka rual a, khâwl chuan nunna nei ang mai hian thawm a rawn chhuah a, ka bula mi pawh chu a ngaih a ngam ta huaiin ka hria.

Speed tihsànna leh tihhniamna ni àwm tak number lo lang chu ka hmet leh a, tlan loh theih lovin khâwl chuan min thunun zui nghal a, chutia ka'n tlan ta chu rei pawh ni lovah ka hah ṭan der a, khâwl erawh khâwl tih takah a nun pangngaiin a la nung ṭha vet vet hle thung a, chutah off ka'n tum chu ka thei ta hauh lo mai.

Mi pawh rawn ngaihsak tawh miah lova George-a thil rit châwi zak zak chu tihbuai ka duh si lo, off dan lah ka thiam chuang bawk si lo, ka rilru chu a buai hle a, number inziahna bula off tih lo awm sen vâ chu ka'n hmet leh ngawt ṭhin, awmzia awm a hnekin a chak zual sauh emaw tih tur hian khâwl chu a rawn rum titih hial a, ka mangang rilru ta hle bawk.

"George!" ka awah chuan hlauhthawnna a khat a, ka kohna lah chu hria ang paw'n a awm der lo lehnghal!

"George....!" a auin ka au a ni tawh ber a, ani pawh chu ka lam a rawn hawi rang hle.

"Khâwl hi a tawp thei lo a nia.....!" ka awm dan leh mitmeng aṭangin ka hlauthawng hle a ni tih chu mi â ber paw'n an hriatthiam hial ka ring.

Ka kut chuan vawn tur a dap ruai a, ka ke lam ni se a chak tulh tulh mai bawk si, mangangna leh thlabârnain min fan rawih rawih a, ka taksa mai ni lo ka rilru nen lam a khur a, ka hlauhthawn ruk sa ang ngeiin thawk leh khatah khâwl chuan min vawrh sawn deuh lawp a, ka thal nghal ṭhuai a, mahse chhuat châr ang reng takah chuan ka awm rei lo hle.

"I ṭha em!?" ngaihtuahnaa khat aw hian George-a chu a ṭawng chhuak hluk a, min pawm hnehsawh miah miah hle bawk.

"Ka ṭha....." tih têin ka chhâng a, chutih lâi vek chuan khâwl chu a rawn alh deuh pup a, ka rak deuh ṭhawt nghe nghe!

Khâwl kang a hmuh rual rualin George-a chu a che chhuak nghal vat a, banga fire extinguisher chu làin a phuh reh thuai a, tlêma tlêmah in kan tikang lo chauh a ni hawt e! Khâwl kang a ṭhelh mit zo ta mawh tihah chuan ka lam a rawn pan ding leh nghal chat a, zo zet hian min pawm kang nawlh a, kei erawh chuan ngampa em em lovin ka lo en deuh kal ringawt!

Pâwn lamah min pawm chhuak a, ka kut mawlh chu dah dan tur ka haihchham hle a, a nghawngah ka suih ang nge, engtin nge ka dah ang tihah ka rilru a insual awl lo va, min en miah lo chu ka lawm hle bawk. Min en ngat se zawng ka buai leh vek emaw kha a ni ngei ang a, chutia min pawm ringawt pawh chu ka tân chuan buai fê na tham a ni tawh záwk a, mahse ka taksa erawhin ngaia nei ang maiin dawnsawn dan a lo thiam em em lawi thung.

In chhûnga min pawm lut chu maid pahnih chuan mak tih hmèl zet hian min lo en reng a, mak an ti pawh chu ka dem bîk lo, kei tak paw'n mak ka ti a nia! In chung lam pana min pawm chhoh lâi te chuan min zo vawh vawh hle a, eng ka hria nge ni, min dah thla tawh turin ka ti duh bîk der lo lehnghal a, hrehawm ka tih miah loh vangte pawh a ni mahnà!

"I nâ lo tak tak maw?" chhuata min nghak thlak hnu chuan a ti dam dap a, tun hnaia a mi ngaihsakna leh ngaihtuahna ka dawng zing malh malh lutuk hi ka hrethiam lo tak zet a ni.

"Immm......" ka ti chhuak sep a, ka chhán dan chu a duhkhawp chiah lo te pawh a ni ang.

"Inbual fai la, i mu hahdam leh záwk dâwn a nia....." mi en deuh rulh chung hian a ti sup a, chutah lû buk khum nghat paha kal sawn mai ka tum chu min chelh ding leh rih a, min din hnaih sawt bawk.

Ka hmai dung hnaih zâwnga a rawn kun hniam tial tial chu mak ti zet hian ka lo en kal a, ani pawh chuan min melh chhuk run a, eng thil chiah nge tih a tum ka hre bau lo. Ka hmai chu a rawn hnaih zel a, kei erawh ka lo ding mar awt tawh thung. Ka inhum ruh ngar ngar a, ka mit en lova ka hmui ngawr ngawr a en tâkah chuan a thil tih tum pawh ka hre chiang ta hle.

Kan hmui a insi ṭep tawh tihah ka thle sawn deuh bak a, chutah ka lo ding nghet lo bawk nen ka ke chu ka'n chhep sual zui leh ta nghal a, chhuat lama ka awn thlak riai riai lâi chu nghet zet hian ka kawngah a rawn chelh a, chhuatah ni lovin khum lamah záwk min tlukpui zal zal a, ka chungah a rawn bawk chu a ni nghal der mai.

"George....." ka ti chhuak hap a, ka aw chu a ring lo hle bawk.

"Eng lo......kan awm dan hi a dik lovin ka hria" ka ti leh halh a, hip vang vang chákawm khawpa a thaw rimtui ru tak te hlei hlei chuan mu leh mal hre lêk lovin min awmtîr thei mai dâwnin ka hria.

"A dik lo lâi chu han sawi la....." a ti deuh ruih a, ka lak ata awm hlat a tum der lo lehnghal!

"Ka.....kan dik lo, kan awm dan hi a dik lo" ka ti sap a, chutiang em ema ka zàm chu ka la hre ngai lo.

"George...." ti leh raiha ka hmui ka pet zui zeuh chu a hmuh hmaih lo chiang kher mai.

Thlipui ang maia chak hian a rawn che vut a, kan hmui a han innâwk chiah chu ka mur sung sung a, ka kâ chhûnga thil sâ ham ham rawn lut riai riai chuan ka rilru leh ngaihtuahna zawng zawng a hruai pêng vek a, men pawh ka meng hlei thei tawh meuh lo. Ka â chhulh a, ka taksa pûm chu a chawmawlh a ni ber.

Ka taksa mai ni náng, ka thluak chhûng zawng zawng nen lam a nû but a, a sô bulh bulh a, eng ka ngaihtuah thei tawh lo; thil dangdai leh dawnsawn nuam takin min chenchilh mêk a ni tih chauh loh chu! Ka hriatna tha zâm te chuan min phatsan nawn awn awn a, mu leh mal rèng ka hre tawh lo va, hre thei dinhmunah pawh ka dik hek lo.

Inla hrang deuh hlek hian min han fawp leh vang vang a, duh táwka ka hmui a'n suasam buan buan mai chu nuam ka va han ti ngawih ngawih tak em! Kan awm dan dik leh dik loh lamin rilru a luah thei tawh lo va, khawvel hran daiha cheng ang mai kan ni a, chu khawvel chu kan pahnih tân chauha siam bîk emaw tih theih tur khawpin kan inlungrual a, ka hriat tawh azawnga mâwi ber a ni hial ang.

Mitmeng tak nghelh nghulh anga lang, mahse dam ru ruih si chu ka en ngawt ngawt a, ani pawh chuan hnai leh chiang zet hian min en ve reng a, kan mitmengin kan inbe mawlh mawlh a ni ber. Chutah kham lo ang hrim hian ka hmuiah bawk chuan a rawn fawp leh vawng vawng a, nasa takin ka lo danglam leh hman a, inthunun pawh ka tum buai duh tawh lo, ka thei dâwn chuang lo.

"Hmui fawh nuam tak zawng i nei chiang e Sophia" a ti thum chhal a, chu thu chu ka bengah chuan rimâwi a va'n tling hliah hliah si èm!

"Ka....." ka tih laklawh lâi chuan a kutzungṭang pakhat chu ka hmuiah a rawn nghat chat a, ṭawng rih lo turin min duh tih ka hrethiam ve nghal mai bawk.

"Vawiin chu company-ah i rawn kal ve duh ang em? Ni lo, ka sâwm che ni lovin ka office-a rawn awm ve turin ka duh che" bul deuh hmuk angin lang mah se a awki chu a dam thlup a, chhàn mai nachâng pawh ka hre lo nghe nghe!

"Chhun lamah eng i ti ngai chuang em ni?" amah bawk chuan a rawn ti leh sup a, chutiang taka inhnaiha kan inbiak chu nupa kan nih ata a vawi khatna a ni.

"Ti ngai chuang lo va, mahse......" tia ṭawng zawm leh nghal mai ka tum lâi chuan a kutin ka biang a nûl riak riak a, ka ṭawng tawp chiang hle bawk.

"A nih a hnu, company-ah hun kan hmang dun thei a ni mai lo'm ni?" a tih chuan ka ngawi kar a, engtia han chhàn chì nge pawh ka hre lo.

"Inbual fai la, mu leh rih ang che" ti leh daihin a tho zui nghal a, kan taksa insi lova a'n awm chiah chu ka veng hawk a, room aṭanga a chhuah hnu thleng chuan ka mut zangthal ngaiin ka la mu reng a, ka rilru ka kawm a ni ber.

Khatiang tak khan a mi fawhna kha ka lo dawngsawng ṭha ang tih ka ngaihtuah thiam pha lo hrim hrim a, mahse ka dawngsawng ṭha tawn tawn hle chu a nih kha! Rui lo hai lova kan infawh hmâsak ber a ni nghe nghe a, infawh hrim hrim thuah chuan a hmâsa ber erawh a ni hran lo. Ka pasal mah ni se khatiang taka thlakhlelhawm zui vawng vawng theih tur khan min fawh ka beisei ngai lo va, khang thla liam ta chhûng zawng khan ka biangah takngial pawh a fawp ngai lo hrim hrim bawk.

Nimahsela, a tua ve ve paw'n thil a danglam chho hret hret tih kan man thiam a, kan mitmengin engkim a sawi a, ani tân pawh a mi fawhna ka lo dawnsawn ṭhatzia a hriat hnu kha chuan ṭan han khawh zui zel pawh a phurawm ta ve ang. Chuti ngawtin ka dem ngawt bîk thei lo, bul chu a rawn ṭan ngei a, mahse tawp chin nei lêk lovin min fawp vawng vawng reng se tiin duhthu ka lo sam hman hial a nih kha maw le!

Thaw chhuak hluaiin ka tho ta nge nge a, bathroom ka luh hnu chuan shower hnuaiah dingin ka inphuhtîr sar sar a, ka harh fím deuh kawk a, inbual pawh ka inbual rei lo. Lotion ka inchulh lâi chuan George-a chu gym zo tawh tih hriat tak hian a rawn lut a, a thlan a tla deuh phung a, chutah ka lo en tih hre reng chunga a thawmhnaw hak a'n hlip chiah chu ka hawi sawn rang kher mai.

"I mu na nge?" hriat nuam ang reng taka a rawn tih chuan

"Mu ta lo law law mai, zîng kâr hmâ tak a ni tawh chuang lo va........" ka lo ti ṭha ve mai bawk.

"Zîng dang ai i tho hmâ si a, i mut a la chhuah ka lo ring deuh asin" ka inbiak dan mawlh chu ka ngaihtuah zui lo thei lo, nupa tak tak ang mai kan ni!

"Ka tho tlai ngai chuang hleinem, ni lo'm ni?" chutia ama ṭawngkam zeta ka'n ṭawng ringawt chu a lam ka hawi zawk phah a, ani pawh chuan min lo en ve reng tho.

"Ka sawi awmzia chu ka mut a chhuak tawh chuang lo va, han mut ṭhat leh kher kha ṭulin ka hre tawh chiah lo a ni" tiin ka ṭawng zawm leh nghal daih a, ani ngaihah chuan insawithiam te pawh ka ang ngawt ang ka ring.

Eng thu mah a sawi zui tawh lo va, bathroom-ah lutin a inbual ri sur sur a, rei pawh awm lovin a rawn chhuak thuai a, thawmhnaw a inbel zawh hnu chuan laptop châwiin khum lamah a rawn phei a, ka mit sîrin ka hmu ru reng a, mahse hmu angin ka awm duh bîk miah lo thung. Laptop chu a khawih ri mual mual a, thil pawimawh a ti tih hrilh hranpa ka ngâi lo chiang hle.

"Khaw'nge kal i tum?" ka ding uaih chu min rawn be hlawl a, kei pawh chuan

"In hnuai lamah ka chhuk thla ang chu ka lo tia....." ka ti pangngai ve nghal mai a, min bia e ti lo chuan min en chuang der lo.

"Awm ve rih rawh....." a ṭawng chu ka hre sual emaw tiin

"Maw.....?" ka ti hê hû a, hre sual pawh ni ila a àwm hliah hliah lutuk tlat!

"Hei hi lo en ve lawk teh...." a rawn tih leh chuan mak ti ru zet hian a lamah ka phei det det a, ke thluang duaha a ṭhutna bul ka va thleng chu

"Eng rawng nge mâwi ang?" a lo ti sup a, ka bangbo hman viau a, mahse laptop-ah chuan car a lo design reng chu niin!

"Ka hre lo le, a mâwi tur te chu nangma'n i hre daih záwk lo em ni?" hnaih lutuk lovin a bulah chuan ka ding ran a, a tukkhum hmâchhawn zâwngin ka awm chiah chiah bawk.

"A dum ni ta se mâwi i ti ang em?" thawp supa a rawn tih chuan

"A màwi viau ka ring" ka lo ti ve hliai a, ani pawh chu a bu ta nghut!

Kâr lovah breakfast ei hun a rawn inher chhuak der a, kan hun hman dun dan hre vek mah ila chutiang tak chuan hun a lo kal chak ang tih ngaihna rèng ka hre lo. In hnuaia kan chhuk thla chu maid pahnih chuan min lo en leh ralh ralh tawh a, tun lâi chu an mitmengah mak tihna hlir ka hmu nitin mai zawng a ni e!

Breakfast ei lâi chuan pi Loren-i chu a ṭawng leh siam siam tawh a, min chhuah vahpui a tum thu a rawn sawi dek dek chu George-a chuan a lo ṭawng khalh hmak a, company-ah min hruai a tum tih chiang takin a sawi zui nghal a, pi Loren-i lah chu lungnih loh a hnekin a lawm hmèl em em ta záwk a, breakfast ei chhûng zawng chuan a kâ pawh zen ila min seh lo ang tih theih tur khawpin a nui var var reng a, a thil sawi duh zâwng pawh a dang ta daih bawk.

Breakfast kan ei zo va, room-ah chhovin kan insiam zui nghal a, ka pasal berin a company-a kal ve tura min duh a nih chuan ka awm ve mai a ni ang chu! Amah nen bak kan ni dâwn chuang lo ti rilru chungin chei pawh ka inchei hran lo va, thawmhnaw lûm lam ka ha deuh tawp a, ani paw'n ka inthuam dan chu sawiselna pakhat mah a nei lo hrim hrim a, chu chuan min ti confi sawt nghe nghe!

Nî hawi záwng a inher danglam a, kei pawh George-a office chhûngah chuan ka awm ve ta ran a, meeting an neih mêk avangin keimah teh tlawngin ka awm vel mai mai a, tih tur te ka dap kual thul, table-a file leh lehkhabu inchhawp rualrem lo tak te chu ka rem ṭhatsak ta ngawt a, office chhûngah chuan tlângnêl takin ka awm hran lo va, mahse ka kimki chuang der lo.

Table sîra kan inneih thlalak lo inhûng chuan ka mit a là hle a, mak pawh ka ti hman viau a, hna chiah ngaihtuaha thawk mawp mawp ṭhin mipa nia ka hriat dan kha a lo dik lo vek emaw ka ti rum rum hial a, chu lâi hmunah chuan kan inneih thlalak hmuh ka inring lo hulhual a ni ber e!

Kan inneih thlalak chu ka en chiang a, kan hmêlah chuan hlimna pakhat mah a lang lo ve ve a, mahse kan lang faiin kan lang ṭha tak zet thung. George-a ngat phei chu hmuh a nuam zual em em a, nupa kan nih hnu hian kan inneih lâia a hmél kha bo ṭhen chuang lo mah se a lang zahawm khup tawh thung a, a miziain a lo zir ve hrim hrim bawk nen han zah loh rual a ni mawlh lo.

Chutia kan inneih thlalak ka en vang vang lâi chuan office kawngka chu a rawn innam hawng thut a, ka phu deuh dawrh nghe nghe a, Colton-a hmêl ka hmu zui zat bawk. Min hmuh rual chuan a nui nghal sak a, chu lâi hmuna kei min hmu hlawl chu mak a ti ni maiin ka hria. Kawngka a khar lâi te chuan ka lo en reng a, engti tura lo lut nge a nih tih lam phei chu hre lo nasa tak ka ni!

"President hi a awm na nge?" zàngkhai vaha a rawn tih chuan

"An meeting lawk a......" ka lo ti ve mai a, han biak vak dan tur ka ván ru viau bawk.

"A nih chu maw le, mahse a pawi lo, a nupui hmêl hi hmuhnawm ti zetin ka lo thlir tluk tluk mai ang" tiin a nui zui deuh hak hak a, kei erawh ka nuih a za lem lo.

"Eng nge i rawn tih dâwn a?" pangngai taka ka tih chuan

"President rawn hmuh lawk ka duh maw le, eng nge i tih ve záwk? Ka rawn kal fô va, mahse ka hmu ngai reng reng lo che, heti lâia hmuh che hi ka lo inbeisei lo viau asin" a rawn ti deuh duah a, hlim hmêl a pu reng a, chu chuan biak a tinuam zual hle.

"Ka awm ve mai mai" tih bakin ka chhâng lo va, chutia kan ngàwih lâi tak chuan kawngka a rawn inhawng a, George-a hmêl kan hmu zui nghal zat bawk.

"Aw, meeting in zo ta maw, nang nghah pah chein Sophia-i hi ka lo thlir tlawk tlawk a, i pawi ka sawi êm lo ang chu maw.......?" Colton-a fiamthu chu George-a chuan chhe tè them paw'n a nuihpui eih lo va, mahse Colton-a chu a inthlahrun phah chuang der lo.

"Eng nge i rawn tih dâwn?" George-a aw chu a bul hmuk hmuk hle a, keini ang tân chuan kimkit chawihna tham a ni.

"Thil sawipui lawk che ka duh....." Colton-a pawh chu a fiamthu reng ta bîk lo e!

"I ril a ṭam em?" tiin George-a chuan min rawn biak zawm daih a, ka meng bial deuh kawk nghe nghe!

"Aw.....eng lo.....ṭam ve tho...." ka chhàn dan teh ngawt chu ka tum làwk pawh a ni lo, ka lei ka vêng hman lo a ni ber.

"A nih chuan inhnawh puar turin i chhuak ang hmiang?" tih leh thawh a rual nghal a, chu veleh Colton-a chuan

"Chuti tut tut tur em ni, ka lo nghak ve fan fan che asin?" a lo ti thuai a, kei pawh chu chu ka ngaihdan chiah a ni.

"Chawhnu lamah kan inbe záwk dâwn a nia...." ti nghet churh hian George-a chuan ka kut a rawn chelh zawm zat a, min kai chhuak zui ta daih bawk.

"Engati nge Colton-a kha......?" ka ti dek dek chu mi a rawn melh chhuk deuh run a, ka sawi zawm loh phah nghe nghe!

"Khawi hmunah nge kan inei puar ang?" a rawn tih chuan

"Ka hre lo le" ka lo ti sap a, biak bawrh bawrh theih ang hrimin beiseina min siam té té a, a duh hun tê baka ka thusawi a ngâi pawimawh leh duh miah si lo chu a khamawm ru viau dâwnin ka hria.

"Colton-a kha i ngaihtuah zui reng a ni èm lo ang chu maw?" kan ngawih dun vang vang hnu chuan a rawn ti sup a, engtin nge ka ngaihtuahnaa awm chu a hriat chat theih pawh ka hre lo.

"Ngaihtuah e....." zep nei hauh lova ka ti chiah chu

"Eng vangin?" a rawn ti nghal nghut a, kei pawh chuan

"I laka i awm dan kha a mâwi hleinem, in meeting chhûng khan a lo nghak thlap che asin, i che hawihhâwm miah lo" ka ti charh charh a, ka ṭawng dan avang chuan inthlahrung leh hnuhnawhin ka hmui ka pet zui sawk a, ani erawh a ngâwi ngul ringawt!

A thinrim a nih ringin engmah ka sawi zawm duh tawh lo va, lunch kan ei dun lâi te chuan lungâwi lo ang hrim hian a la ngâwi ngul reng a, ka awm a nawm loh phah vek bawk. A nupui chu ka ni teh meuh mai, mahse chutianga han zilh pang pang ngam tur chuan eng ka niin ka hre lo, chu bakah anite chu ka tân zawng a zahawm hliah hliah lutuk tlat!

Lunch kan ei zo ta maw tihah company lam kan pan leh a, ṭawng mang a la nei lo tluang zel a, chu chuan ka awm a tinuam lo ru tawlh tawlh bawk. Pâwn lam hawiin ka thaw chhuak ham ham a, engmah kha lo sawi ve lo tawp ila a ṭha tur a nia te ka ti hnuhnawh vawng vawng a, ka rilru nuam lo ta lutuk lah chu tihreh dan ka hre hauh si lo.

"George....." ti sapin company building kawt kan thlen chuan a kawr bânah ka pawt taih a, car aṭanga chhuah nghal mai a tum uk tawh chu a rawn lehhawi zawk nghe nghe a, ka kut chu ka dah thla ta zal zal bawk.

"Eng lo......ka.....ka tihpalh" ka ti chhuak hap a, min en dan chu a ngai reng a, hmêl danglam a pu eih lo hrim hrim!

"Ka lo inrawlh ve tawh lo ang, ka tihpalh" ka ti nawn leh ngat chu a mitmeng a tizîm sun a, pâwn lam ka hawi zawm daih a, ka pasal mah ni se keini ang fahrah in aṭang seilian tân chuan a zahawm mah mah lutuk a tin a ni!

"Eng chu nge i buaina?" tih leh ka kut rawn chelh a rual a, lû thin khum nak nakin ka nui lui sak a, ṭawngkâa chhàn pawh ka tum chuang lo.

"I sawi hmâ chu car chhûngah hian kan ṭhut a va ngaih hmèl ve......" a rawn ti hniam sup a, innawr luihna tel hauh lova mi thunun chu thiam tak hi a ni ringawt!

"Kei hi i awm dan màwi leh màwi loh lam lo buaipui ve vak tur niin ka inhre lo, ka thil sawite avang khan min hrethiam dâwn a nia, a thleng leh tawh lo ang" thaw deuh halh hian ka ti dam diai a, kan pahnih tluka kan nupa inkâr hre chiang an awm lo va, chuvang chuan ka ṭawngna tur ni miah lova ṭawng chu ka duh tawh lo a ni.

"Buaipui tur chu i ni alawm, engvangin nge i nih loh ang?" nghet cherh churh hian a rawn ti a, a lam ka hawi lo laklawh bawk nen a thinrim emaw ka ti hman hial!

"Ka nupui i nihna hian ken tel tam tak a nei tih i hriat ka lo ring asin" awkâ dam deuh záwka a rawn tih leh chuan a lam ka hawi ta nge nge!

"Tun hnaia kan awm dan hi a dik lo i ti ve tho em?" ka zawhna avang chuan a meng tak nghulh a, ka hawi sawn lehnghal daih bawk.

"A nih dan tur ang thlapin kan awm záwk lo em ni?" a zawhna chu hre lo ang hmakin ka awm tlat a, chutah amah vek chuan

"Eng nge dik lo nia i hriat?" rawn ti lehin a lamah min kuai her a, kan inen lo thei ta lo.

"I chhuak tawh záwk teh ang George......" ka ti thawp sep a, thaw chhuak ham ham hian a ṭhut dan a siam rem a, a ṭawng tawh miah lo bawk.

"I thin a rim lo ti raw?" ka ti leh hram chu chiang ngel ngul zetin min rawn en a, ka mi zah em em a nih vang nge pawh ka hre lo, a thinrim tluka hlauh ka nei lo hial ang ka ring.

"I ṭha em?" a rawn ti daih a, buk khum zeuhin ka nui lui sak a, car aṭang chuan ka chhuak ta daih!

"Sophia....." ka lehhawi a, George-a chu ka lam panin a rawn pen phei thauh thauh a, ka bul lo thlen nân chuan hun a hmang rei lo hle bawk.

"Ka thim a rim lo" ka rilru a nuam chiah lo tih a hrethiam a ni mahnà, chutiang taka a thutak hmél chu ka hmuh àwm pawh ka la hre lo.

"Ka hria alawm....." bu nghat nghat pah hian ka lo ti diai a, lungni vak lovin hre mah ila thinrim han tih tur ang chì erawh niin ka hre lo hrim hrim!

"Lo hnai teh!" ti hniam supin amah záwk chu a che chhuak hmâsa a, a âwmah chuan min kuah bei zui nghal a, ka meng phar nasa ngei mai.

"George......" a awm sawn ve leh mai ringin ka ngâichang deuh ren rawn a, mahse a awm sawn duh lawk lo lehngha!

"Kan awmna hi a ualau viau a nia George" ka tih leh pawh chuan min kuah dan a tihdanglam phah chuang der lo va, ka kuah lèt ve ta ringawt bawk.

Chutia ka'n kuah lét chiah chu a hmâ aia nghet hian a áwmah min pawm bet zui titih nghal a, min lo hmutu tân chuan nupa inngaina leh inngâi tawn tak te pawh kan ang viau ta ve ang! Ka kuta chelhin building chhûng lam chu min panpui a, lift-a kan chùan chhoh dun lâi te chuan ka bul chetah a ding run a, mahse biak erawh kan inbe tawh miah lo thung.

A office kan lut a, rei lovah Colton-a hmêl kan hmu nghal zat a, George-a nena sumdawnna lam an sawi dun lâi te chuan ṭawngkam hnih khatin min rawn fiam zeuh zeuh reng a, mahse George-a erawhin a awm dan leh min fiam dan vel chu a lo ngaithei vak lo a nih hmêl! An thusawi lâia rilru pe turin a hrilh leh hmuk ṭhin a, Colton-a lah chuan hlauh a hnekin a runluih sauh emaw tih tur hian zia a chhuah ham ham a, an awm danah an inhriatna a rei thawkhat tawh viau tih chu a hriat theih mai.

Khua a hniam tial tial a, boruak chu a vawt deuh suk a, kawr lûm keng lo phei ila chu vawt ka ti ru ngawt ang ka ring. George-a nen chuan kan inbe leh zauh ṭhin a, a hnuaia thawkte'n thil pawimawhah an rawn hmu deuh reng bawk a, inbiak tak takna hun kan neih loh tho rualin nei pawh ni ila kan inbiak tam vak ka ring em em chuang lo.

Khaw thim dâwn tak takah in lam panin kan haw a, car chhûngah chuan AC a on thlap a, ka awm a nawm phah viau mai. Kan in kawt kan lut tur chu security guard-in gate min lo hawnsak a, kan in kawta car a park fel vek hnuah kan chhuak ve ta chauh a, in chhûng kan luh rual rual chuan pi Loren-in min lo be nghal siam siam a, company nuam ka tih leh tih loh thute chu a khât mâwi tàwkin min zàwt leh ṭhin a, kei pawh chuan ṭha takin ka hrilh ve mai bawk.

Dinner kan han ei fel dek dek chu ka mut a chhuak ru nghal em em a, ka chau a ni ang ti dâwn ila chauhpui tham tur eng tih mah ka nei hauh si lo. Mu turin room lamah ka chho ta nge nge a, room chhûngah chuan George-an hna a lo thawk mual mual a, ka lut thawm hre vek mah se ka luh tirha min rawn en zawk tih loh kha chu min en zui tawh lo hrim hrim a, kei paw'n ka ngaihsak em em bîk chuang lo.

"Tunah khawiah nge i awm?" mipa aw, ri deuh phawlh phawlh chuan min tiharh záwk a, George-a aw ni ngeiin ka hria.

"Sawi nghal rawh!" vawi leh khatah a aw ki a inthlak thut a, ka thin a lo phu rang nghal dawt dawt nghe nghe!

"Ka lo kal!" tu chiah nge a biak tih hre lo mah ila a thinrim thawkhat hle ni tur a ni.

Ka pasal George-a che sawk sawk chu ka en kar a, drawer aṭanga kawr chung là chhuak rawk rawkin a pen zui nghal pawk pawk a, chutiang taka thil hmanhmawhthlak chu company lam thil emaw sumdawnna lam thil a nih ka ring mawl ve hmiah a, mahse a chet dan leh a hmêl mawlh mai chuan ka rilru a tibuai ang reng viau thung.

Dâr zat ka'n en chu zan lâi dâr 12 a lo la ri lo deuh a, han chhuah rum rumna atân chuan a tlai tawh lam hret chu a ni. Tin, dawhkana a laptop khawih lâi meuh pawh off lo khawpa a kal chhuak thuai thuai chu ka ngaih tiṭha lo ru zualtu pakhat a ni a, phone ka tum zet ve tak nàin ka ṭhulh leh ang lawi a, be buaitu nih ka duh loh rualin a chhuah chhan chu hre lo tura min duh vangah ka ngâi ta záwk bawk.

A lo haw hun ka nghak ngar ngar a, lo thlen tih nî reng a nei thei der lo lehnghal a, kei lah ka muhil thei tawh bawk si lo. Amah ngaihtuah ru em em chungin tukverh bulah chuan ka ding ngâwi reng a, in kawt lam chu ka thlir dauh dauh a, ka ngaihtuah zual em em chhan pawh kan inneih hnuah chutiang chuan a la awm tut tut ngai lo tlat a tin a ni!

Dârkâr a liam a, khua chu a rawn èng fiah tial tial a, nî èm la chhuak rih lo mah se khua erawh a vâr titih tawh a, George-a hmêl réng hmuh tur a la awm lo tluang zel bawk si nen ka rilru leh ngaihtuahna chu hlauhthawnnain a khat pumhlum tawh hial a, a chungah thil ṭha lo tak a thleng ang tih mawlh ka hlau a ni.

Nî a rawn chhuah det det tâkah chuan ka phone phawrhin ka call ta nge nge a, mahse a ring ral ṭhak a, ka call nawn leh chu rei pawh a ring lo ang tihah switch off a rawn inti hmiah a, ka ngaihtuah tehlûl nen ka phone call a hmet switch off hmak thei chu ka run hle a, mawl ka inti hnuhnawh a, keia ngaihtuahna chu eng atân mah a ngâi dâwn lo tih ka hre chhuak chiang viau bawk.

In hnuai lamah chhuk thlain tui ka in khawlh khawlh a, maid pahnih chuan nêl deuh hian min rawn bia a, kei pawh chu zawi zawiin ka mood a inthlak chho ve leh mai a, keimah chiah ka nih avanga min be ngam an ni tih ka hai lo va, George-a awm se zawng dêk pawh an ti ngam leh tawp lo ang.

Ka rilruah mawl intihna leh chaponate lianin vung viau mah se ka pasal George-a ka ngaihtuahna erawh a bâng hlei thei chuang der lo va, eng thil chiah nge thleng ka hriat châkna chuan hahdamin min awmtîr thei thlawt lo a ni ber e!

End of chapter 3