𝐓𝐇𝐄 𝐏𝐑𝐄𝐒𝐈𝐃𝐄𝐍𝐓'𝐒 𝐖𝐈𝐅𝐄 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟐)

 

THE PRESIDENT'S WIFE
(Contemporary M&B Story)

By

Havali Adam

Chapter 2

"Tûi i tih avang ngawtin i lo in mawlh mawlh tih i sawi tumna a ni èm lo ang chu màw......?" a awah chuan nuihzatna hlir a khat a, ka bula awm, min buaipui mêk tu chu George Frazier-a ni theiin ka la hre chuang lo.

"I rui hle chu a nih hi maw le" a rawn ti leh sup a, beer takngial pawh in ngai hlei lovin an thil sem thlum túi zet kha ka lo in ṭeuh vel a, ka va han inchhir hnuhnawh vawng vawng tak!

"Ka luak.....ka luak a chhuak!" ti bah hluaiin ka kun rawk rawk a, ka luak zui nghal ṭhawt ṭhawt a, insum hman ni tawh hek lo!

Ka hnâr chhûng chu thip namên loh hian a rawn thip hlur a, ka uak zui tuarh tuarh a, ka luak leh ta nghek bawk. Ka thil lo in zawng zawng ka'n luak chhuak fel chiah chu khaw dang hawi lovin George-a ka en hmâsa ber a, engtin nge min ngàih ang tih lam ka ngaihtuah thlen vang a ni pakhat a, mahse a kekawra ka luak ngei mai lo kái luai ka hmuh rual rual chuan ka ngaihtuahna a dang chiang teh e!

"Tihpalh......." ka ti deuh raih a, mi mah nèl loh sa nák alaiin chutianga ka'n luak khum ta bawrh bawrh mai chu a nawm loh mai bakah ka inthiam lo tak tak a ni.

"I luak a la chhuak em?" a kekawr berh nuaih chu engah mah a ngâi lo emaw tih tur hian a awm a,  chu chuan a laka ka inthlahrunna a tizual ting záwk!

"Ka zia tawhin ka hria" ka ti sap a, kal sawn nghal mai a tum chu

"Ding lawk....." tiin ka be ding a, ka kawr fual chuan keimah avanga a kekawr tuihnâi lo zet chu ka hru zui nghal mawlh mawlh a, mahse hruk pawh hru rei lovin a lo awm sawn vat thung.

"Car chhûngah khan chûang ṭha leh tawh rawh" a ti hniam sup a, ka ngaihbel nge pawh ka hre lo, a aw chu a bul ta mah mahin ka hria.

HOME lam pana kan han inphur chhuah leh hnu chuan inthlahrun tak té hian a lakah ka inthlahrung a, ani lah a ṭawng ṭha duh mang der si lo, tu hmeichhia pawh ni se ka dinhmun anga ding tán chuan inthlahrun loh theih pawh a ni lo. Tin, ka in lâi zawnga hre mang si lo khan chutia George-a ka luak khum hrep hnu chuan zû rim ka hre leh ta nghal a, thil thlum tûi tak nia ka lo ngàih kha zû changkang chì lek chu lo niin, a va han atthlak mai mai tak!

HOME thlen nân kilometer tlém té chiah a awm tawh a, pi Martha-i hriata zû rim nam nih duh lo teh mah ila tih ngaihna dang a awm der bawk si lo va, a nih nîh kan ni tawh mai a ni ang chu! George-a nen chuan kan inbe lo tluang zel a, car thar tlângzarh a nih lâia a awm dan vel kha loh theih lovin ka ngaihtuah chhuak a, lem a chang ti dâwn ila lemchang tur khawpa mi zeihawi a niin ka hre si lo, engkim mai kha a duh dan leh a rilru tak taka ti a ang viau a, mahse chhan ṭha tak erawh a awm ka ring fan tho.

Car chu a ding deuh dat a, ka hawi chhuah chuan HOME kawt kan lo thleng der tawh chu niin, kan chhuak zui nghal a, naupang hovin ka hmêl an hmuh rual rual chuan ka lamah an rawn tlan phei dam dam hlawm a, ka naute vek anga ka en an ni bawk a, ka ngainat tluk zetin min ngaina tih chu mi â ber tân pawha hriatthiam loh theih chì ziazâng a ni lo.

Rei rial lovin kan thawmah pi Martha-i pawh a rawn chhuak ve vat a, min hmuh rual chuan a nui nghal ver ver a, naupangho nen kan din khawm laih laihna piaha George-a lo ding ve reng a hmuh chinah erawh a nuih dan a dang deuh a, mahse kei tih loh chuan an hrethiam kher lo ang.

"Awi, Sophia, in lo kal leh hun hi ka lo ngâichang ru reng ṭhin asin" ti hluaiin pi Martha-i chuan min rawn kuah vawng vawng a, naupangho chu in chhûng lamah an lut sang sang hlawm a, chutah pi Martha-i bawk chuan

"I rim a va dik lo ve Sophia?" rawn tih zawm leh nghalin min en chik ta hle a, George-a lam chu a hawi zui zat a, George-a lah chuan a dar a lo chhin àk duh lek chauh lehnghal!

"Ka tui a hal tawh lutuk, in chhûngah lut ang u" ti zar zarin ka che deuh phawlh phawlh a, ka awm dan chu ka hrethiam chiah bîk lo, ka thil in kha a la reh fel lo ni berin ka hria.

Pi Martha-i chu ka kai kal sawk sawk a, ka ke pen nen lam a ni chhup chhup a, mahse ka tlu lo hlauh! In chhûng kan luh rualin pi Martha-i chuan tui min rawn làk nghal a, George-a nena kan in tur juice a rawn dah tel nghe nghe bawk. Kei ni lovin George-a chu a be zui ta daih a, chuti siam siama pi Martha-in a be bîk chu ka thik ru tlat pek a, juice chu vawi leh khata tlak pawpin ka ding hluai a, an pahnih hnih chuan min lo en zawk tih ka hmu ru reng bawk.

"Thing ka va phun teh ang, ka phun lohna a rei tawh lutuk" ti nak nakin ka kal deuh chhuih chhuih a, thing phun tur tè reuh tè tè chu ka là ri rawk rawk a, an bula awm reng ai chuan tiin ka chhuak ta nal nal!

Thing phun tuma lei ka'n khawih te reng reng chu ka che ngil hlei thei meuh lo va, ka ṭhu sawp deuh nuaih bawk a, rei fê ka beih hnuah pahnih khat chu ka phun ve thei ta chauh a, chutah George-a hmél ka hmu zui zat leh ta nghal a, min rawn biak te chuan chhàn pawh ka chháng duh lo hrim hrim! A coat hak lâi chu hlipin phulah chuan a theh thla a, a kamis bán chu a thlep chhíng deuh hlek a, eng nge tih a tum pawh ka hre nek lo e a!

"I thiam ve ngawt lo ang, lo inkhawih berh ve duh suh, nangni ang mi hausa tawntaw lutuk tân chuan khawih chì pawh a nih loh hi!" leia a ṭhingṭhit rual rual chuan ka lo ti tawn tawn nghal a, zah rèng ka hre tawh lo a ni ber.

"Zû rui ai chuan ka lâktlak tho ka lo inring asin!" a rawn ti sup a, a thusawi awmzia chu hrethiam lo nasa tak ka ni!

"He laiah hian zû rui an awm hleinem, i phun ve duh tak tak a nih chuan rawn là rawh" ka ti leh hmawk hmawk a, thluak fím lo tih takah ka thu sawi reng reng chu a inkawkalh nasa hle.

Chutia thing kan han phun dun chu zei lo ka'n ti lailêng khawp a, tih dan tur te hrilhin ka nuih chîam a, a châng leh ka vin titih thul, ani lah chu a len ang huin a zei lo bawk si, a ngawi ngul a, ka sawi ang àng chuan a ti ve mual mual a, chutah a hmai thak ni àwm tak a tûai zeuh chu a intibal ta nge nge a, za zet hian ka nuih hak hak a, ani erawhin ka nuih chhan a hre lo hle thung.

"I hmaiah khan thil a kâi a nia George....." tiin ka nui zui har har a, chutia ka'n hrilh chu a hmaia thil kàina lâi a hriat chat theih nân ka hmai ka tawk zeuh a, ani pawh chuan a lo hrethiam chawpchilh ve nghal mai bawk.

"Kha......nang pawh i hmai kha a bal....." a rawn ti thum deuh chhal a, ka awih lo lutuk chu ka nui leh chiam nghe nghe!

"Khawi maw....." ti hniam leh supin ka lamah a rawn tawlh hnai a, chutah a kawr bân vâr thianghlim sara ka hmai hruk fai tum ni àwm tak chuan a che zui zat a, ka bul chu rawn thleng phei har lo tak a ni.

"I awmna ngaiah va awm leh rawh!" ka tih deuh pang pang lâi chuan ngawi reng hian ka hmai chu a rawn hru thuak a, thlek sawn ka tumna lamah ka thal zui tharh a, ani pawh a bang bîk chuang lo.

Ka chungah ka taksa si lovin a bawk run a, tak ngel ngul zet hian min en ngut ngut a, hlauhna chhe tê mah ka nei miah lo chu a mak thlawt a ni. Ka leng halh a, zamna chhe tê mah ka nei miah lo bawk. Min en rei ngur ngur lutuk chu hmui pet sawi ngawng ngawng chung hian ka melh lèt ve kal a, amah lah chuan mak a tih hmèl viau lehnghal!

"Engati nge i mitmeng hi a thip khep khup em em reng le? Mahse, i sual chuang miah si lo va......" ka ti deuh tawl a, chutah keimah vek chuan thawveng phawr phawr zet hian

"Zawh duh che ka ngah a nia, engati nge car design thar release dâwnah khan min fawh ringawt? Chuan, engati nge ka kawngah te khan min kuah vel? Ka hamhaih lutuk kha ka tluk ṭep phah asin, Colton-a kha a felin kawm a nuam tak zet bawk; nangmah ang lo takin!" ka ti leh zat zat a, ani erawh a la ngâwi reng thung.

"I hria em? He i mitmeng tak nghelh nghulh lutuk hi ka en ṭha ngam ngai miah lo, mahse vawiin chu a dan a dang tawp, zàmna nei hlek lovin ka en ngam ve tehmial che chu a nih hî!" ti leh tan tanin ka nui zui hak a, tìmna nei miah lo hian a biang chu ka chûl den den a, ka rin ai khawih a nuam daih lehnghal!

"Awi, i biang hi a va'n nêm reuh em em, i khabe hmul pawh hi a khawng fer fur miah lo" ti chhuak leh halhin a biang leh khabe chu ka khawih tawn ta sek a, ka ṭhen deuh sen sen lâi tak chuan a rawn kun hniam thut a, ka hmui leh a hmui chu mit khap kâr lekah a inbawhthuah zui zat a, chu thil chuan awihawm loh khawpa nasain keimahah danglamna a thlen nghal bawk.

Ka engkim mai chu hriatthiam phak si loh nawmnain a fan vel chiai chiai a, chutiang rèng chuan infawh a nuam ang tih ka lo suangtuah pha ngai lo hrim hrim; a them tê paw'n! Kan hmui chang ni lo kan lei te lam chu a insual zui tap tap a, chak záwk nih tum ang hrim hian an inbuan linglet vel a, chu chuan thil dang kangkâi zelin namên lova tisa châkna ruamah min her luhpui riai riai a, inthunun chu khawi lamah hi a ni ringawt!

Kan taksa a inchawk nung tawn a, mu leh mal hre lek lovin kan innâwk a, kan inchar bet tlat a, damdawi rui ang maiin chu hmui, ka inthunun theih piah lam thleng rawk khawpa min siam theitu hmui chu zawi hniang hian ka fawp lèt ve tawn tawn a, kan duham dun buan buan lutuk chu intlansiaknaa pakhatna nih tum rana tha ṭhulh duh miah lo te pawh kan ang záwk hial àwm e!

Thawk leh khatah ka veng deuh hawk a, ruak huai ang mai hian ka awm a, ka'n meng diar diar chu mipa hmêlṭha tak, khawvela mipa hmêlṭha ber ni áwm hrima hmèlṭha chu ka hmu zui nghal zat a, chutianga khawpa hmêlṭha leh hmêl hmuh nuam ka bul lawka a'n awm ringawt chu lawmnain ka khat a, ka hlim lutuk luatah ka nui ta sen sen a, ani pawh chuan min chhuk melh ve reng a, chu a mitmeng, Scottish mitmeng mawlh mai chuan min zem â thei mai dâwnin ka hre hial a ni.

Scottish pachal a ni tih ka hria a, mahse engtin nge ka hriat tih lam erawh ka hre lo, inhriatna eng emaw tak chu kan lo nei tawh te pawh a ni mahnà le!

Ka taksa chu a zawi zual zel a, ka taksa mai ni lo ka rilru nen lam chuan a fîm hlei thei tawh meuh lo va, boruak vawt dai ser serin min han tiharh leh deuh ṭhin mah se ka meng peih mang tawh lo chu a ni der a, ka awm dan ang àng chuan ka zal riai riai a, ka zawi tial tial a, kut tha chak zetin min châwi kang deuh láwp tih erawh ka hre ruai ruai a, chu bak thil hriat dang nei thei dinhmunah pawh ka ding zui ta lo.

Ka harh leh meuh chuan khumah ka lo mu fel than a, room chhûng chu a thim deuh khup a, ka awm dan teh daih chuan min tibangbo hman hle bawk. Ka mutna khum chu kan khum a ni tih ka hre ngei a, mahse engtin nge chu khumah chuan ka lo awm daih theih tih lamin ka rilru a luah hneh khawp mai.

Ka tho chhuak tur chu ka lû a rit deuh lûk a, ka zo lo lek lek dâwn hial a, ding ta lo chuan khumah bawk ka ṭhu leh rih a, ka awm dan chu ngaihtuah lèt nghalin George-a nen HOME kan pan lâi leh kan thlen tirha pi Martha-i min lo biak lái te kha ka hre chhuak zut zut a, ka thil in tuar lovin ka rui hle a ni tih pawh ka hre chhuak chawpchilh zui nghal bawk.

Ka lû chu ka'n dawm deuh vang vang a, nâ tak ni si lo hian chhûngril lamah a nâ pan ṭulh a, a nàt dan a pan e ti lo chuan a nâ ru chum chum tho bawk si, ka in loh tawp tur ka lo in kher kher chu tu dang mah bûrbun chì a ni lo, keima thiam loh ngei a ni.

Indawm ngala rei ren rawn ka ṭhut vang vang  hnu chuan din ka han tum leh a, ka'n ding ta chu ka thawh tirh lâi ai khan ka zia deuh hawk a, ka khaw hmuh pawh a fiah sawtin ka thluak nen a fím zui ta ralh a, darthlalanga ka'n inen chiah chu ka sam a lo hnawk niah nuaih hle a, ka chûl mâm ṭha zung zung a, ramhnuai pilril lutuk kâr aṭanga rawn chhuak hlawl te pawh ka ang ta ve ang!

Ka sam chauh chûl duh tàwk lovin ka thawmhnaw hak lâi te chu ka chûl mar zui liam liam a, mahse thil hriat chhuah ka nei ta záwk mai! Chu ka kawr, ka chúl mêk chu kan chhuah dáwna ka hak kha a lo ni tawh reng reng lo va, chu chuan ka rilru leh ngaihtuahna a tibing nghal mup mup a, ka thawmhaw hak lâi thlak tur khawpa tha nei leh rilru fím pu ka ni lo tih ka inhriat chhuah zut zutna chuan ka thluak chhûngah ngaihṭhat lohna a rawn tleh luhpui hum hum nghal bawk.

Chutia mangang thlabâr tluk zeta ka meng phar awn awn lâi chuan room kawngka a rawn inhawng ri khep a, room chhûnga lo lut mêk ka pasal George-a mit leh ka mit chu a intawng zui chat a, ka lam pan zâwng hian a rawn pen phei khup khup a, chumi paha a mi enna thuk ruih chuan ka thaw hial a tidik lo thei mai dâwnin ka hria a, chu veleh melh tur dang zawng vatin ka hawi sawn thuai a, mahse min rawn din hnaih ta hle tih ka hriatna chuan min tizàm ru er er tho.

"I lo harhna a rei tawh em?" pangngai tak hian a rawn ti hniam sup a, ṭawngkama chhâng lovin ka lû ka thing nak nak a, chutah amah bawk chuan

"Dinner kan zu ei ve tawh dâwn em ni ang?" a rawn tih zui leh dap a, ka mak ti chu ka en chho hau a, mahse rei erawh a ni lo.

"Ti rawh le......." tih leh a kut chu ka lama rawn phar a rual a, ka lo kimki chawih nghal thung.

"Ih.....eng lo.....thil zawh duh che ka nei......" ti ṭial deuh chhal hian ka aw chu ka thian zui kharh a, ka aw aṭang chuan ka thawhna la rei  lohzia a hriatfiah theih kuarh àwm e!

"Zawhna chu i ngah viau a ni lo'm ni?" a mi chhán dan daih daih chu ka beisei loh lam tak a ni.

"Thawmhnaw hi tu nge min thlaksak?" tiin ka zawh duh tak chu ka zàwt lui ngat a, a mitah erawh ka en rei ngam leh ta chuang lo.

"Tu nge i lo beisei?" min chhâng ṭha duh miah lo chu ka run ru khawp mai.

"Kha i ṭhian chhar thar, Colton-a kha em ni?" a rawn tih zawm zat a, ka rilrua awm ni miah lo a chhahchhuah avang chuan ka melh chho leh ta nge nge!

"Nangmah i ni lo ti raw!?" ka aw chu ka ti nghet salh a, zàm ru em em mah ila derdep tak anga lan kan tum bîk teuh lo.

"Ka ni ti ta ila engtin nge i tih ang? Tihtheih i nei chuang em ni?" min tham lo tih hriat zeta a rawn tih chuan

"George.....!" ka lo ti halh a, ka pasal mah ni se a hminga ka koh hi chu khât tak a ni; a hminga ka koh tawh hi chuan loh theih lohna avang baka ko ka ni ngai lo!

"Colton-a bawk kha i kawr hak thlaksak tur chein i lo duh ru reng a ni záwk lo maw.....!?" âwm poh deuh vang hian thaw ka lá suai suai a, engtin nge chutiang chuan min ngáih theih záwk reng reng nì!

"Engvanga Colton-a chu han sawi chhuak chhen nge maw i nih chu le?" ka ti lèt ve ta salh a, kan inbiak dan chu nupa inbiak dan tur a va'n ni lo chiang teh kher èm!

"Ka kawr chu nangmah hian min thlaksak tak tak em?" ka ti leh nghat a, amah ngei hian min lo thlaksak tak tak a nih ngat chuan ka taksa a hmu vek dâwn tihna a ni a, mahse chu thil chu engtikah mah thleng turin ka duh lo hulhual!

"George.....?" mi pawh chhàn tum lo ang maia a ngawih deuh ren rawn lâi chuan ka ti chhuak leh hap a, amah ni lo hram se ka ti ngawih ngawih bawk.

"Ka nupui i ni a, mi hrang emaw min ti suh!" ti hmukin ka kutah chuan a rawn hmer a, min kai kal zui nghal dawr dawr a, ruh lang rawtin sawi lo mah se engkim chu a chiang ta khawp mai.

In hnuai kan thlen thlak chuan pi Loren-in min lo ngaihven hle a, ka mut chhúng zawng khan George-an min chimbuai rih lo turin a lo hrilh chu niin, chutia ka hmêl harh ṭha pangngai vek tawh a'n hmu ta chu min lo be nghal siam siam a, George-a chuan a melh leh rulh rulh ṭhin a, mahse engah mah a ngâi duh bîk der lo.

Maid te'n ei tur an rawn chhawp chhuah fel diam hnu chuan dinner chu kan kil zui nghal a, pi Loren-i erawh George-an min kiansan rih tura a tih miau avangin sofa-ah a ṭhu phei leh daih tawh a, chutia kan pahnih teh tlawnga dinner kan han kil dun chu nupa kan nih ata a vawi khatna a ni bawk nen ka thin a su dup dup reng a, tihlan loh hram erawh ka tum ngar ngar thung.

Dinner kan ei chhûng zawng chuan kan inbe lo hrim hrim a, kan ei eiin kan ei mial mial a, ani phei chu a kham har lo hle a, mahse a tho zui nghal mai tura ka ngâi chu ka ngâi dik lo chiang khawp mai. Ka hmuh phakah a ṭhu ve reng a, chu chuan ka awm a tihuam lo ru hle a, mahse min ngaihsakna a tihlan ve danah ka ngaihsak ta ringawt!

Ka thawh rual rual chuan a rawn ding ve nghal a, ka darah a chelh a, kei tluk zetin maid te pawh chuan mak an ti tih ka hai lo va, tun hnaia kan taksa a insi tam ta viau chu ka thil hriatthiam loh tak zawng a ni chiang a ni. Zan dang ang lo tak hian pi Loren-i ṭhutna ep lam ka pan chu min rawn zui ve zel a, ka bul chetah a ṭhu nghe nghe a, zîng kâr aṭang tawh khan bangbovin min siam awl lo a ni ber.

Zan a tlai zel a, kan room lam pana kan chho te chu bodyguard ang mai hian min vêng titih a, hun rei lo tê chhûnga a mizia a thlak danglam hnehsawh lutuk chuan ka ngaih lam lam a tiṭha lo hial záwk a ni. Kha leh chen kha nupa niin kan lo khawsaho tawh a, mahse tun ang réng hian a la awm ngai lo, a hming chauha a nupui ka nihna hre ve hram hramin min en liam hmiah hmiah zel a nih kha!

"Engtin nge i la awm?" khuma ka mut thlak rual chuan a rawn ti sup a, siasîr teh mah ila ka hmâ zawnah a ding miau si a, hmâchhawn loh theih pawh a ni lo.

"I lû a nia ka tih......?" amah bawk chuan a rawn ti leh a, chutah kei pawh chu ngâwi reng tawh bîk lovin

"Ka ṭha tawh, ka lû a hai tawh lo" ka ti chhuak sap a, ka ṭhat thu ka sawi e ti lo chuan ngaihṭhat hmêl a put phah chuang der lo va, chiang taka min en chung hian ka hmai zawnah a rawn ṭhu hniam zui leh ta nghal a, awm ngaihna ka hre lo chu a ni leh der tawh!

"Vawiina HOME kan tlawh kha i la hria em?" a rawn ti thawp sup a, min en hnai ṭha salh salh bawk nen a thaw rimtui ru zet chu ka hnâr chuan a lo hre hrang nalh a, ka thaw làk dan chu a buaizo mai dâwnin ka hria.

"Hria......" ti zawi sepin ka mit ka chhíng ta ngawt a, ani pawh chu tho ve nghal maiin khum lamah a rawn lâwn chho zui zat a, ka thaw deuh huai nghe nghe!

Tlai lamah khan ka lo mu hnem cherh cherh bawk nen ka zan mu chu ka muhil hlei thei der lo mai a, ka mu meng kar a, chhun lama ka awm dan ka ngaihtuah rauh rauh a, ka hriat chin chu HOME kan thlena pi Martha-i min lo lawm lâi vel kha a ni a, khami hnua ka awm dan zawng zawng kha chu kei aiin ama'n a hriat chian záwk ka ring.

Eng pawh ni se, a lakah pawh hian thupha cháwi ka bâ a ni. Ka leiin tui a tih avang mai khan in loh tur ka in ṭeuh kha a ni a, chutah ka'n la luak khum hrep zui leh ta nghal a, chung zawng zawng hre vek chunga thinrimna awkâ a la chhakchhuak miah lo te chu mak pawh ka ti viau a, mahse chu chuan mi sual leh mi rilru kawi a nih lohzia a nemnghet chiang hle thung.

Ka rilru kawmin hun rei tak ka hmang a, ka piah lawka mu chu a muhil ta maw tihah ka mut dan siam rem sat satin ka en ta vang vang a, naupang pawisawi lo hmêl zet hian a lo muhil bâm a, hahdam taka a thaw ri suk suk te chuan engtin emaw ni tak hian min fan a, ngaihtuahna dang daih puin a hnâr ngul invuah dik zaih te, a sam leh a khabe hmul te chen chuan ka en ta reng a, khawih châknaa ka khah chawpchilh nghal avangin ka kut ka'n kan uk hman a, mahse ka ṭhulh leh rang hle.

Ka awm dan chu a dik lo tih ka hria, ka hai lo, a muhil hmêl ringawt paw'n min thunun titih thei chu mak ka tih piah lam a ni a, ka mitthlâah chiang taka min melh chhuk run lâi kha a rawn lang zui zat a, chu vek chuan thil dang min hriat chhuahtîr ta zut zut nghal bawk.

"Ni lo....." ti thawp raihin ka mu ṭha vat a, ka thin a phu nghal dawt dawt a, chu ka pasal, George Frazier-a nen ngeia kan infawp tawn tawn lâi chu ka ngaihtuah chhuak hlawl a, mitthlâ satliah mai a nih ringin ka ngaihtuahna a vak ruai a, mahse mitthlâ satliah a lo ni awzâwng lo, thil thleng dik tak vek záwk a lo ni!

Ka ruih lâia ka awm dan zawng zawng ka ngaihtuah chhuak ta phiar chu zahnain ka khat nghal vawn vawn a, keimah leh keimah ka inhau awl lo va, mipa laka hmeichhe thlem sam tak ang maiin ka inchan a, George-a laka ka awm dan zawng zawng avang chuan chutiang rilru chu ka pu lo thei lo a ni. Ka lu ka thing leh ringawt ṭhin a, mahse engmah a sawt tawh si lo, ka zak hnuhnawh ngawih ngawih lutuk chu ṭah mai ka nap rum rum hial a ni.

Chutia thil thleng tawh ka'n ngaihtuah lét chîam chu kâr lovah khua a rawn vâr ṭan der a, mu miah lovin hun tam tak ka seng ral tih hre mah ila ka mut erawh a chhuak chuang hauh lo va, ka piah lawka mu chu a rawn harh palh tâk hlauhah tiin zan tira ka mut ang chuan ka mu ṭha ta vat a, muhil ang hmak hian ka mit ka chhîng a, mahse ka muhil lo hrim hrim thung.

Beisei leh rin làwk ang ngeiin khum chu a rawn che ta sut sut a, ka maimitchhîng nghet zual sauh a, ke pen thawm ka hre zui zat a, chu ke pen thawm chu ka lamah a rawn hnai zel a, tu nge a nih hrilh hranpa ka ngâi lo chiang kher mai. Thluak fîm vek, muhil ang hrima lang siin ka mu ngil pharh a, mipa kut lûm deuh hat hatin ka chal a rawn tawk chiah chu tum baksak lovin ka che dawt a, chu veleh min man chhuak ang tih hlau zet hian ka'n zi der ṭaih ṭaih vel a, lemchang ṭhin te ang maia ka awm ta chu duh lo teh mah ila loh theih loh thil a ni tlat tawh!

"Hetia tui taka i muthilh bâm reuh lâi pawh hian ka laka zawhna nei reng hmêl i pu chu a nih si hi maw.....!" ti thum ṭial deuh ruihin a kut chuan ka biang a rawn nûl leh thuak a, ka chhûngril lam inlinglet nasa lutuk chu thunun beh a va'n harsa tehreng êm!

A mipa rim dangdai leh nam chek chek chu ka hnâr ata a hla tial tial a, chu chuan a kal sawn tih min hriattîr nghal a, washroom kawngka ni àwm tak inhawng ri ka hriat hnu fê ah ka meng chhuak ve ta chauh a, ka men rual rualin dâr zat ka en nghal vat a, sana bân chuan zîng dâr 5 a lo kawk vàng tawh a, chutah washroom aṭanga lo chhuak tur tih hriat taka thawm ka'n hre chiah chu ka mit ka chhîng thuai a, ka meng ngam tawh rih lo hrim hrim bawk.

Thawm dim ang reng tak hian drawer chu a hawng ri rak a, eng thil chiah nge tih a tum tih hriat châknain ka khat a, rei pawh ni lovah ka meng chhuak de de leh ta nge nge a, chutia thawmhnaw a ha vel chu ka en deuh ren rawn a, office-a kal tur a ni lo tih ka chiang a, mahse engti tura insiam nge a nih ka hre mai lo.

Chutiang rènga a taksa ka en chian chu a la awm lo va, a hnung aṭang ringawt paw'n mipa pian chhe lem lo tak a ni tih hai theih a ni mawlh lo. Ka duh aia ka en rei ka hlauh avangin ka awm dan chu ka siam rem a, eng ngaihtuah chiang hman lo leh pekin ka'n mu zangthal ngawt pek a, mahse ka va han tisual chiang tehlûl êm!

A dinna hmâ zawna darthlalang aṭang chuan min rawn en nghal chat a, kei lah ka lo meng laklawh tawh bawk si, maimitchhîng leh ringawt dâwn ila awmzia pakhat mah a nei hauh si lo, ka tih ngaihna hre lo lutuk chu ka mit ka khap fak fak a, ka meng fiah ralh a, ani lah chuan mi rawn en reng chung hian kawr bân tlawn pan zet mai hi a ha mual mual a, chu a kawr hak pan lutuk chuan a bân, a âwm leh a dar tihrawla khat chu a tilang chiang zual hle bawk.

"Ka ruala taksa sawizawi i duh chuan i lo kal ve thei ang" a rawn ti ta mauh a, mi en tawh miah lo nà chu ka hmai a la sâ hat hat reng a, ka thinphu pawh a la pangngai thei chuang lo.

"Ka duh lo ni mai rawh se" ti fiah raih hian ka tho chhuak zui ve ta nge nge a, harh reng tawh chunga mut tlat chu ka thei ṭhai lo a tin a ni!

"Thawmhnaw hak tura i buai a nih chuan buaina a awm lo" ti supin drawer chu a pawt hawng leh rak rak a, gym dress tih hriat tak kawr leh kekawr a lák chhuah lâi chuan ka lo en ngawt ngawt a, mak ka tih ruk êm vang a ni pakhat!

"I ta tura ka lei a nih hi!" a rawn ti leh chiah phei chu ka meng phar deuh awn a, chutah amah bawk chuan

"Han ha chhin teh....." ti zui leh dap hian ka lamah a rawn pen phei khup khup a, eng ka ti zo ta nge pawh ka hre lo, chutiang taka mipa pian nalh chu ka piana hnu lamah ka la hmu lo hrim hrim!

"Sophia.....?" ka harh chhuak nghal zawk a, George-a chuan min lo en chhuk run chu niin, chutah kan lo indin hnaih tawh em em zui!

"Aw.....eng lo.....eng nge? Eng maw?" ka ti phuailuai nuaih a, ka awm dan chu a dik lo hle tih a hriatthiam vek ka ring; hriathiam loh theih ni hek lo!

"I ha dâwn lo em ni?" awkâ dam ang reng taka a rawn tih chuan

"Aw....aw le...." ka lo ti zung zung a, ka rilrua awm a hriat ka hlauh luatah ka ṭawngkam chhuak reng reng chu a dik lo vel vek a ni ber.

Chutia gym dress ka'n inbel tur chu tawp chatin thil hriat chhuah ka nei zawk a, mit là sawn miah lova min lo en rengtu George-a lam chu hawi vatin ka âwm ka hup nghal chawih a, ka ngaihtuahna fîm hman lo ngat se zawng nawhchizuarte ang maiin a hmâah chuan awlsam taka ka inphelh saruak ngei ka ring.

"I hawi sawn theih chuan ka lawm ngawt ang" ka ṭawng chu hria ang paw'n a awm eih lo va, min en ngaiin min en reng a, chu ringawt pawh chuan min tizam ru er er hman leh teh e!

"George.......?" ka awah chuan ngenna ri a tel tawh a, chu chu hrethiam ni àwm tak hian a che hrut a, room kawngka lam pan zui nghalin

"In hnuaiah ka lo nghak ang che" a rawn ti nghut a, room aṭang a chhuak fel chiah tihah ka thaw huai a, hnâra hlit phawi ang mai ka ni!

Gym dress ka hak fel hnu chuan dârthlalang hmâah ka in en vang vang a, engtin nge chutiang thawmhnaw, ka taksa mil thlap chu a lei thiam záwk pawh ka hre lo. Anite chuan hna bak a ngaihtuah ngaiin ka hre si lo, nge ni a, pi Loren-i a lo râwn diam hman tawh záwk ni ang?

Ni lo, chu zawng a nih ka ring lo, ka taksa mil tur thawmhnaw lei a duh avangin pi Loren-i a râwn lûl lo ang. A engmah ka ni lo va, ka tân paw'n a chuti chuang lo, kan kâra inzawmna siamtu chu nupa kan nihna a ni mai; chu tè chauh chu!

In hnuaia ka chhuk thlak lâi chuan tuisik a lo in khawlh khawlh a, in reng chungin a mit chu keimahah a fu ngur ngur a, kan thil ngainat leh duh zâwng tak kan en ngawt ngawt ṭhin ang mai hian a mit chu a lá sawn lawk duh lo leh ta nghal a, keimahah chuan thil dik lo a awm emaw ka hman hial nghe nghe!

Chutah a tusik inna bottle chu dawhkana nghat ri deuh charh hian min rawn pan hnai a, min la en reng bawk si nen keimahah chuan chawp leh chilhin zàmna a piang nghal a, rei lovah ka hmâ zawnah tak a rawn ding ta run a, ka lo thaw dep dep a, ka hmuh lâi ngeia a hmui a'n pet chiah phei chu ka rilru a danglam titih nghal der a, ka inthunun hram hramna chuan min phatsan ang tih mawlh ka hlau a ni.

End of chapter 2