𝐑𝐄𝐌𝐒𝐀𝐍𝐆𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

REMSÂNGA

(Mizo Short Story)

By

Havali Adam

"Kal rawh, nei nghal vang vang rawh" tiin ka pa chuan min ṭawngkhum khur khur a, a mitmeng leh a ṭawngkâ chhuak tinrengah chuan a thinrimzia a hriat hle bawk.

"Mi zawng zawng hriat loh theih lovin kan mualpho chiang tawh bawk alawm le, chuti taka in lo induh a nih te chuan he in aṭang hian chhuak la, nei nghal ang che" ka nu zàwkin a rawn tih zawm ve leh hmawk hmawk a, kei erawh ka ngawi reng ringawt!

"Khatiang buan buan lo deuh khan sawi ula maw le, hetah lo kal teh Nui, eng nge thil awmzia hi ni reng reng?" ka pi lam chu en pawh ka en ṭha ngam lo.

"Engati nge palâi hmêl te kan hmuh tâk mai? In lo induh tak tak em ni?" ka pi bawk chuan a rawn ti leh a, kei erawh ka la ngawi reng thung.

"Fel ang deuhin a lang a, rilru thianghlim hmêl deuhin a awm vel a, a rukin a lo lerh em em si, a hur pawh a lo hurherh ru zek a nih hi!" ka nu min ṭawngkhum dan zawng zawng chu ka theihnghilh theih tawh pawh ka ring lo.

"Ṭawng hlawk hlawk ṭhin lo teh Rinmawi, thu chiang pawh kan la hriat loh hi!" tiin ka pi'n lo khap lo phei se chu zankhuaa sawi tur a neih ka ring.

"Naktuk aṭangin va awm chilh nghal ang che" ti chang rum rut tu ka pa lam chu ṭi dékin ka hawi a, mahse ka en rei ngam lo hrim hrim!

"Nang pawh Zauva, lo ngawi rih teh!" ka pi aw chu a vin ve ta khawp mai.

"A thu hrimin Remsanga chu i lo duh ve reng reng em ni?" ka pi bawk chuan a rawn ti leh a, tlang taka engkim sawi mai a ṭhain ka hria.

"Duh lo....." ka ti sap a, chutah ka pi chu ṭawng zawm leh nghal zatin

"A nih engati nge palâi a rawn tirh si? In inkârah induh tawnna leh inhmangaih tawnna a awm loh chuan chuti ngawta palâi tìrh chì a ni hleinem, tunah ngat phei chuan i rai lehnghal!" a ti ta piap piap a, sawi dik loh erawh a nei hauh lo.

"Ka hre tawh bîk lo" ka ti ve leh sep a, chhàn dan tur ka vàn khawp mai.

"I lo duh ru ve reng a ni ang chu maw le, hnathawhnaah ni sei in lâwm ziah a, a rukin i duh ru tih a hre kar ang a, ani'n a lo duh che bawk si nen palâi a rawn tîrah ka ngâi hmiah!" ka nu thusawi duh danah chuan min demna hlir a lang tih hai rual a ni lo.

"Eng pawh ni se i mu phawt teh ang u, naktuk lamah kan sawi ṭha dâwn a nia......" tiin ka pi chuan thu a rawn khar ta hmak a, ka nu leh pate pawh an pindan lamah an kal zui nghal daih bawk.

Khuma ka mu te chu a them tê paw'n ka mut a chhuak eih lo va, ka ngaihtuahna a kal ding em em a, ka vanduaina a kal tluang lutuk chu ṭah rawih rawih tham a ni tih pawh ka hria, mahse ṭahin awmzia a nei thui dâwn lo tih ka hriat chian êm avangin ka ṭap buai duh lo mai záwk a ni ber a, chutiang ni lo se zawng insum karna nei hauh lovin ka ṭap chhuak hawm hawm ngei ang.

Ka pum puar deuh al chu ka chûl riak riak a, ka en ngawt ngawt a, ka ngaihzawng nena kan chetsual dunna rah a ni tih ka hai lo va, a chhûngte'n min duh loh avang leh amah ngei paw'n nupui neih a la duh loh thu ka hriat aṭang kha chuan ka fa bîk liau liau turin ka nemnghet hmiah tawh a, chuta kâra ka pum chhûnga nautê insiam mêk pa ka lo hmangaih hman kher chu keimah leh keimah ka inhaw ngawih ngawih bawk.

Kum 1 deuh thaw kan inngaizawng hman kha a ni a, khawpuimi a ni pawh a ni bîk chuang lo, khawsak nunphungah pawh kan inang tlâng viau a, mahse anni chu khaw dang an ni thung a, an khaw high school-ah zirtirtu hna a thawk nghe nghe a, kan inhmuh tirh phat aṭanga kan mitmeng induh tawnna te kha tunah chuan engmah lo maiah a chang zo ta a ni ber e!

Eng dang zawng ai chuan Remsanga mawlh hi a ni ka rilru tibuai ta ber záwk chu!

Engati nge mi pawh hrilh làwk miah lova palâi a rawn kaltîr ringawt!? Palâi êm rawn tîr tur khawpin kan inkârah engmah a awmin ka hre lo. Chhûngkaw khawsak nunphungah chuan keini ai an hniam záwk ngei a, mahse chu chu a pawimawh ber lo, ka rilru tur pawh dâwn miah lova a duh anga thil a rawn ti ringawt chu ka ngaihdan a ni lo va, thil a tibuaithlak zo vek bawk.

A fel tih chu ka hria, kawm pawh a nuam, a bula awm pawh a nuam, min lo ngaizawng ru reng ta pawh ni se ka la hrethiam, mahse engmah mi hrilh làwk miah lova palâi a rawn tîr thut erawh ka hrethiam thei thlawt lo. Ka nu sawi pawh kha a dikna chen a awm, hna kan thawh reng rengin kan inlâwm fô va, zep thu a cheng lo, a bula ka awm chuan ka hlim ṭhin, mahse inngaizawng erawh kan ni hauh lo, ka tân chuan ṭhian ṭha tak a ni.

Ka naute ho tui châwi thawm chuan min tiharh riai riai a, zîng lam thleng khan ka meng tlang dâwn emaw ka ti a, mahse ka lo muhil ve sek chu niin, ka harh meuh chuan nî a lo chhuak èng siar siar tawh záwk a, ka tho ta thuai bawk. Ka nu leh pate chuan kam khat paw'n min be lo hrim hrim a, ka pi erawh ni dang ang bawkin min be deuh reng a, kei paw'n pangngai takin ka chhâng ve zel a, ka nu leh pate ve thung chu biak loh law law a ṭha záwkin ka hria.

Tukṭhuan kan ei lâi chuan ka pa a rawn ṭawng chhuak ta charh charh a, inzilhna hlir a chhak chhuak a, a ṭawngkam tinah chuan Remsangate chhûngkua a hmuh hniamzia leh a hmuhsitzia a chiang em em a, ka nu pawh a bang chuang lo. Hun kal tawh thlengin an sawi chhuak a, Remsangate an retheih ṭhinzia te, mî pawisa an puk kual nasat ṭhinzia te an sawi chamchî a, ka pi paw'n khap leh hlak hlak ṭhin mah se awmzia a awm tam lo hle.

Thil ka hriatthiam theih tirh aṭang tawhin ka nu hian min duat ngai lo tih ka chiang em em a, ka pa pawh a chuti teh lua chuang lo va, mipa a nih vang nge ka hre lo, ka nu ai a lo ṭawng tam lo záwk bawk nen mi vin hluk hluk a nei lutuk ngai lo. Amaherawhchu, a châng chuan an thisen, an fanu ngei mah ni ila an fanu tak tak ka ni lo emaw te ka hial ṭhin.

Unau zînga a upa ber ka ni a, mahse ngaihsakna leh duatna ai chuan thlimna hlirin ka nun a bawh bet a, dawr kan neih avang leh ka pa'n huan ṭha tak tak a neih avangin kan khuaah rau rau chuan a hausa pâwl pawh kan ni ve a, mahse thawmhnaw thar takngial pawh ka nei ngai mang lo, a chhan chu min en hrang bîk thei êm a tin a ni! Hna pawh ka thawk nasa a, hmeichhia e ti lo chuan mipa hna zawng zawng nen lam engkim ka thawk kawp vek ṭhin a ni ber.

"I ṭap elo Nui?" ka pi lam chu ka hawi vat a, ka mittui ka hru hul nghal thuai thuai bawk.

"Ṭap lo e, eng nge tih i tum a?" pangngai thei ang berin ka ṭawng chhuak vâh a, mahse ka ṭap tih erawh a hriatthiam hman vek tho ka ring.

"Vawiin chu ka lo fehpui ang che ka tia....." a rawn ti dek dek chu

"A ngâi teuh lo mai, lo kal ve suh, inah lo awm tawp rawh" ka ti zui nghal sawk sawk a, ani ang kum lama upa tawh leh taksa chak tawh loh tân chuan feh chì pawh va ni suh!

"I nu lahin fehpui che an tum bawk si lo, kei talin ka fehpui loh che chuan i hah lutuk dâwn asin!" a rawn ti ve leh hluai a, lû ka lo thing nang nang thung.

"Hah lo ang, thlai chi thlak a ni mai a, thil harsa a awm lo" ka tih chuan min en vang vang a, a mitmenga min khawngaihna leh lainatna chu ka hmuh hmaih lo chiang kher mai.

"Khawi, dah rawh, kei pawh ka'n insiam nghal ang e" ti leh zar zarin a hnathawh thawmhnaw hak tum chu ka lâksak a, ka insiam zui ta mial mial bawk.

In aṭanga ka chhuah dâwn lâi te chuan min thlir vang vang a, ani tluka min hmangaihtu leh min ngaihsaktu hi chu an awm leh tawh pawh ka ring lo. Chutia feh tura ka kal hnak hnak lâi chuan Remsanga nen kan inhmu hlawl a, ka rilruah thil chi hrang hrang a rawn lut nghal zut zut a, ka thin a rim nghal hlur a, a inthuam dan aṭang chuan feh tur ve tho a ni tih a hriat khawp mai.

Rei pawh en duh lovin ka kal hmawk hmawk a, ka kal chak sawt hle bawk. Short cut kawngah ka kal ta daih nghe nghe a, min rawn zui zel leh ta nghal a, mahse min rawn kal hnaih lutuk hran lo. Ṭawngkhum hrep ka châk a, mahse engkim a nih tur ang a nih vek tawh avangin awmzia a awm tawh lo tih ka hre chiang bawk si, ani lah chuan ṭawngkam khat pawh a rawn chhak chhuak der si lo, ka lung a tiâwi lo zual tak zet a ni.

"Engati nge palâi i rawn kaltîr ringawt!?" ding meuhin ka ti ta nge nge a, ani erawh chuan min rawn kal hnaih zel thung.

"Ka dinhmun tur hi i hrethiam miah lo em ni?" ka ti leh nghat a, ka aw chu a nêm tehchiam lo hle bawk.

"Ka hriatthiam vang alawm nupuia neih che ka tum......." a rawn ti chiah chu sa tak ka ni!

"Enga!.......?" ka ti chhuak hluai a, kan indin hnaih ta khawp mai.

"Palâi ka rawn kaltîr chhan chu nupuia neih che ka duh tihna a ni mai" a rawn ti bul leh nghut a, keia insum zo lo chuan

"Ka duh ve hleinem, engati nge thil tiharsa zâwng hian i awm tlat a? Haw rawh, zui pawh min rawn zui suh!" ka ti ta hlawk hlawk a, ka thusawi erawh engah mah a ngâi eih lo a nih chu!

"Ka râi tih te hi i hre ve lo em ni? Ni lo, i hre reng, mi dang fa ka pai tih pawh i hre reng, engati nge engkim hre vek chung siin hetiang thil hi i tih? I chhûngte rilru tur pawh i dâwn lo em ni?" keimah bawk chuan ka ti leh buan buan a, chawp leh chilhin ka ṭah a rawn chhuak nghal em em bawk.

"Kal ang....." tia min kaih a tum chu ka lo petek vat a, a hmuhah ṭah duh lo teh mah ila ka thei thlawt lo chu a ni e.

"Aih!.......Haw rawh, min lo zui reng reng suh!" ti vin phiar phiarin ka kal sawn nghal pawk pawk a, ka hun tawn mêk chuan min hmer chau ngawih ngawih!

Chutia vung zeta ka kal chu min rawn kuai her lawp a, ka inrin hmâ hauhin ka thil ah lâi chu a lá nghal daih a, tih ngaihna pawh ka hre lo. Làk let ka tum lahin a phal der bawk si lo, ka kalna tur a hre chiang bawk a, engti tura chhuak nge ka nih pawh min záwt lo hrim hrim! Kei pawh chuan ngawi rengin ka zui ta ringawt a, inbiak phei chu khawi lamah a ni mai.

Ram kan thleng a, thlâmah lut hmâsa tê têin hna chu ka thawk zui ta malh malh a, ka bul lawkah Remsanga chuan min tihpui mawlh mawlh bawk a, hauh pawh ka hau peih tawh lo, ka be peih rih thlawt lo a ni záwk mah ang chu!

Mipa dang fa ka pai tih hre reng chunga min neih a tum ṭalh chu awm ang lo ka ti ngawih ngawih a, sawi ngaihna pawh ka hre lo záwk! Chutia hna kan han thawk dun ringawt te chuan ka thin a tirim hlur a, a ṭawng chhuak hmâsa záwkah ka ṭang leh ta nge nge bawk. Ka ṭawngkhum chiam a, vin pawh ka vin nasa, mahse ani erawh a ngawi ngul ringawt! Chungte hlei hlei chuan ka thin a tirim zual a, hna pawh ka thawk hlei thei lo.

Chutiang chuan nî kan vui liam a, in thlen tirh phat aṭangin ka nu âng thawm hriat tur a awm nghal zat a, a mitmeng pawh a ngainatawm loh hrik hrek leh ta khawp mai. Ka naute ho awm lâi leh lâi lo pawh thlu lova ṭawngkam chhia chhahchhuah a hrat em em bawk a, nakin zelah an hmu dik lo ang tih lam réng a ngaihtuah ngai lo ni berin ka hria.

Kâr tluanin mitmeng thip, ṭawngkam kha fak fak leh meinei tak tak ka dawng a, kâr thar kan han chuangkâi chiah chu rilru tihah zual tur tingtangin Remsangan palâi a rawn tîr nawn leh ta nghal a, ka pate insum zo tawh lo chuan a nawrin min nawr chhuak a, duh lo tih pawh a sawi theih tawh loh, ka pi awm lo hlauh phei se chu min that duh hial ang ka ring.

Khawtlângah kan chanchin a langsarin a thang nasa em em a, mite dem rawn ka hlawh a, Remsanga pawh an dem tho, mahse ani chu mipa a ni a, an sawi zui vak lo thung. Kei erawh nî eng emaw zah liam hnuah pawh min la sawi zui char char a, ka nu leh pate min sawi duh danin a zir lo bawk nen a mualpho thei ang berin ka mualpho a, ka nung mawl ve tawp tawh a ni ber.

Hmangaihna tel hauh lovin Remsanga chu pasalah ka nei ta nge nge a, kan inneih nî chuan ka pi tih loh ka chhûngte hmêl hmuh tur pakhat mah an awm lo va, Remsanga chhûngte erawh an awm ve nual a, mahse an tam bîk lem lo hle. A nihna takah chuan vanduai ngawih ngawiha ka inhriat avangin Remsanga chu ka nei ta tawp a ni ber a, ka thisen zawmpuite ngei paw'n min duh loh tâkah chuan dam chhan leh beisei em em ka nei tawh lo a ni.

Amaherawhchu, ka pum chhûnga nautê insiam mêk, ka fa ni mai tur avang chuan dam thlakhlelhna ka la nei ve hram hram a, ka nunah min hmangaihtu nu leh pa nei lo mah ila kei chuan ka fa tâna nu ṭha ber nih chu ka tum nghet bur thung.

Chutah Remsanga nen thla 1 lâi kan inneih hnu chuan a chhûngte'n min lo hmu kham ru hle tih ka hre chhuak leh ta zel a, kan inneih tirh te kha chuan ka lakah an fel em em vek a, mahse lem an lo chang vek chu niin! Ka hmingte'n kan dawrah thil an lo bâ ṭeuh a, Remsangan hna thawk lova ina awm tura min tih châng paw'n nuam ka ti ngai chuang lo.

Râi lâi ni mah ila ina awm ai chuan tiin Remsanga ka zui ngat ngat ṭhin a, mahse hna erawh ka thawh a phal lo bur a, thlâmah min awmtîr tawp ṭhin a, an chhûngkuaah chuan a mizia a dang deuh ber tih ka hre chho zel a, sum leh pâi nei lo mah se a phak ang táwkin min duat thiam ṭhin hle bawk. Ka buaina ni ta ber chu a chhûngte an ni a, ka hmingin kan dawra thil bàt an ṭhulh duh bawk si lo, ka pate lahin bâ pe tla turin min rawn ti ve chhen bawk si, rilru hah ngawih ngawiha hun hman châng ka ngah ta khawp mai.

Ka làwina a fuh lo tih hrethiam karin ka nu leh pate chuan min han nuihsawh ta deuh deuh a, chutiang taka vanduaina thuah tam tak tawngbaw tur chuan eng thil em em nge ka tih sual pawh ka hre tawh bîk lo. Zana mut theih loh ka ngah chho tial tial a, Remsanga erawh chhun lamah hna a lo thawk hah ṭhin bawk nen a muhil bawrh bawrh thei a, kei ve thung chu ngaihtuahna kawmin ka tlaivâr ta fô va, mahse chu chu ka taksain a lo ngeih leh bawk si lo, nautê pai lo ngat ila chuan kei nun khaw nawmna reng nei lo hi ka inthat daih duh hialin ka ring ṭhin.

Zan khat chu chaw ei lâiin ka hminga dawr thil bâ tawh lo turin ka ṭawng chhuak ve a, huat tur paw'n ka sawi lo, pangngai takin ka sawi a, Remsanga paw'n a lo tuihnih ve nghe nghe a, mahse ka pasal chhûngte chuan uikawm lutuk angah min puh daih a, Remsanga leh a û hmeichhia phei chu an inchhâng thinrim titih nghe nghe a, mi dang pawh an bang chuang lo, an thil sawi duh dan chu mak ka ti thlawt a ni.

Chumi nî aṭang chuan engmah ka sawi buai duh tawh lo va, dawr bâ pawh rulh ka tum tawh hek lo va, mahse Remsangan a rulhsak char char ṭhin thung a, rulhsak tawh lo tur paw'n ka hrilh zing a, mahse a chhûngte nge nge chu, ṭha miah lo mah se, a lo hmangaih hluah hluah teh e! A chhûngte nen kan inkâr ṭha vak lo mah se ani nen erawh inhauh kan nei ngai vak lo thung a, nupa han nih tâkah chuan rilru pawh a dang ta khawp mai.

"Inah lo awm záwk la.....?" ipté puia tui bottle ka dah luh lâi chuan a rawn ti dam thlup a, kei erawh a bula kal ka tum leh bur tawh thung.

"Ka lo kal ve záwk ang" ka ti pangngai ve mai a, min en tih pawh ka hre ru reng!

"I pum a puar lian tawh bawk si a, inah lo awm mai mai záwk rawh" a rawn tih leh pawh chuan

"Ka lo kal ve duh alawm......." ka lo ti deuh tlat a, tun ṭum a feh tur chu a dan a dang tlatin ka hria.

"Hnathawk tura ka chhuahpui ziah che hi ka tân a mâwi miah lo a nia....." a rawn ti ta nghut mai.

"Hna ka thawk tak tak ngâi chuang hleinem!" ka lo ti sam than a, a ngaihdan erawh a ni vak lo.

"Ka tân a zahthlak alawm, nupuite rài lâi pawha hruai chhuak hreh lo pasal nih ka duh reng reng lo" a lam chu ka hawi nghal zawk a, ka rin ai a lo thutak daih!

"Dik tak chuan......." tiin ka chawl deuh dat a, chutah keimah bawk chuan

"Ina awm ai chuan i bula awm ka duh záwk alawm....." ka tih zawm leh sap a, chu chu ka rilru dik tak pawh a ni rèng!

"Engtin nge ka chhûngte'n an lo tih ṭhin che?" a zawhna avang chuan ka sawi loh tawp tur ka sawi palh tih ka hre chhuak chawpchilh nghal!

"Engtin mah, ka lo kal ve dâwn a nia...." tih leh kal sawn ka rual a, ka tukhum a zat mer mer danah min en zui reng a ni ngei ang.

Ka rilru tur àwm ang a hrethiam ta kuar nge ni, engmah a sawi tawh lo hrim hrim a, lungâwi lo hmêl pawh a pu chuang lo. Kâr lovah ram kan thleng a, ni dang ang bawkin hna a thawk leh bawrh bawrh a, kei erawh thlâmah mei ka lo chhêm vel mai mai a, hmeichhe ṭhenkhat chu ni se kei anga râi puar lian tawhah chuan an feh duh ka ring hauh lo, dik tak chuan kei ngei pawh feh chìah ka inngâi lo va, mahse Remsanga û leh naute mitmeng thip hlar hmuh reng ai chuan râi puar pawh ni ila feh ka la thlang fàn tho!

Ka inngaihtuah lunghnur châng phei chuan a khawi lam lamah pawh belh tur nei lo ang hialin ka inchan ṭhin a, a nihna chen pawh a awm rèng a, ka pasal ni ta Remsanga chhûngte chu thuhran ni se, ka thisen zawmpui ka chhûngte lehzel paw'n min hmangaih miah lo tih ka hre chiang tawlh tawlh a, ka belh theih awmchhun chu ka pi chauh a ni mai.

Chutiang taka mal leh pawh ngam tak tak chu nei lo mah ni ila ka pasal Remsanga erawh ka lakah a sual ngai lo va, a ṭha lo ngai lo va, hmuh theih khawpin min ngaihtuahzia a tilang nasa em em a, kei paw'n huat enah pawh ka en reng thei bîk chuang lo, sawi leh sawi hnu, ka fa lo piang tur avang chauhin ka nung satliah ve tawp tawh a ni ber.

Thlate chu an liam zel a, ka pum a rih ve tâk êm avangin eng ka ti hlei thei ta meuh lo va, mahse chuti chung chuan Remsanga chhûngte erawhin dimna chhe tê mah min nei ngâi lo va, Remsanga awm lâia fel hliau hliau hlawm si kha a ram kal lâi leh a awm loh lâi chuan ka chungah suah sual rawng an báwl reng lawi a, mize thup thiam tak an ni tih pawh ka hre fiah telh telh a, ka chhûngte bula vuivaina thlen te pawh ka chák ve ṭhin, mahse awmzia a awm dâwn chuang lo tih ka hre tlang chiang ropui bawk si!

Ni khat phei chu Remsanga nu, ka nu ni ta chuan chhuat nawt turin min ti teh tlat a, kei lah ka pum a lo pûar lian ve tawh bawk si nen pangngai takin ka hnial a, mahse awmzia a awm thui lo khawp mai.

"I ke paw'n i nawt thei reng alawm, kun kher a ngâi hleinem!" ti kha fak fakin min melh ram ram a, ka tân chuan nawh loh ngam chì pawh a ni lo.

"Ka fapa hian nupui a nei fuh lo deuh chu a ni; sâwn pai lâi a duh tlat chhan te hi ka hrethiam thei thlawt lo!" tiin chhuat ka nawh lâi te chuan a lo ṭawng hmarh hmarh a, chutiang taka min hmusittu bula awm chu nuam lo tak a ni!

Ani chang a ni lo, a fate chenin ka lakah an khermei em em vek a, artui min eitîr te an tum thul, an rilru ka hre chiang bawk si, luhlul ve tlat ṭhin lo phei ila chu nâ taka ka awm tawh ka ring hial a ni. Râi lâi chuan artui ei a thiang lo an ti ṭhin a, nautê ah nghawng ṭha lo a thleng duh tih nen lam ka hre ve vek a, chuvanga an artui min eitîr tum pawh ei duh bîk tlat lo chu ka ni!

Remsanga awm lâi erawh chuan an fel em em vek lawi a, Remsanga leh a pa tih loh hmeichhia vek an ni bawk nen ze thup thiam tak an ni! Remsanga pa hi chu a tir phat aṭang khan min duh lo tih ka hre chiang em em a, tlang takin min ngainat lohzia a tilang mai a, biak pawh kan inbe ngai lo hrim hrim, mahse a nupui fanaute angin ka lakah sual a chhuah ngai lo thung, pawi pawh ka ti lo daih záwk!

"Thanpui.....! Thanpui......!" min sawi che dat dat tu ka pasal lam ka hawi chu ka harh titih nghal a, chutiang huna min kâi tho hlawl chu mak ka ti ang reng viau bawk.

"I tho teh ang, nichin khan i pi boral thu khawtlâng information mic aṭangin an rawn puang zo chiah a nia....." ka pasal thusawi chuan a denin min deng dawt a ni ber.

"Maw.....?" ka ti chhuak halh a, ka bangbo kher mai.

"Ka'n insiam ang e, nang chu kawr lûm ha la, ti khan kal tawp mai rawh" a rawn ti zung zung a, chet nachâng pawh ka la hre chuang lo.

"Ti rawh le, kawr lûm hi ha la, i kal teh ang" a insiam zawh hnu chuan amah bawkin a rawn ti leh a, thil thleng mêk chu dawnsawn dan ka thiam lo a ni ber.

"Naktuk lamah kal pawh ni ula eng nge pawi le?" tiin in aṭanga kan chhuak tur chu ka nu a rawn ṭawng hram a, an rilru chhiat dan chu ka nu dik tak nen an inah lohna ka hre hlawl lo.

"Kal ang le......" ti dam dupin Remsanga chuan min kuah kal zui nghal a, kan in lam pana kan kal lâi te chuan ka ngaihtuahna a tawi tup a, ka bing mup a, ka ṭah pawh a chhuak lo, mahse ka mit ngeia ka pi ruang ka'n hmu chiah chu a nàt hian ka nâ nghal vawn vawn a, insum te chu khawi lamah, insum thei dinhmunah pawh ka ding lo hrim hrim!

Ka pi ruang bulah chuan ka ṭap hlawp hlawp a, a insuk pho tur a chetsual palh avanga boral ta mah ni se chu a thihna chu ka ngaithiam thei thlawt lo va, a ruang ṭah tute zîngah pawh a ṭap nasa ber ka nih hial ka ring. Râi puar lian tawh teh mah ila ka pi ruang chu awm hlat ka tum lo bur a, ka bulah Remsanga a awm ve reng nghe nghe a, chu chuan engti kawng zawng emaw takin ka thla a timuang hliah hliah bawk.

Kâr lovah varṭian a rawn ni thuai a, chawhmâ lama vui nghal a nih dâwn avangin ṭhalâi ṭhenkhat chu thlan lai turin an chhuak sap sap a, puitling ho pangngai chin erawh an la ṭhu ṭhap thung a, ka nu leh pa leh ka naute pawh an la awm kim ṭhap a, mahse ka nu chuan mittui far khat pawh a sêng ve eih lo. Fanu tak tak ang chiaha en tu ka pi thihna chu a thengthawngah a thawk lo tih chiang takin ka hmu tlang vek a, ka thin a so bulh bulh thei hial a, mahse ka insum hram hram thung.

Ka pa chu thil thlen dan ka záwt chiang a, in chung aṭanga a insuk pho tur a tlák thu a sawi lâi chuan eng ang paw'n min haw mah se chutiang thu em em te chu min hrilh tur an nihzia ka àn chhuahpui hlawk hlawk a, ka lungâwi thlawt lo a ni. Ani chhur chhur lah chuan Remsanga naute hnena kei min hrilh tura a chah vek thu a rawn sawi hrawk hrawk a, mak tihnain ka khat chiang teh e!

Ka bul cheta ṭhu Remsanga lam chu ka hawi nghal thuai a, a mitmengah chuan engmah a hrethiam bîk lo tih leh kan hriat chin a inang tih ka hmu tlang nghal vek a, ani lakah ni lovin a naute lakah záwk ka lungàwi loh dan chu pui tak a ni! Eng pawh ni se, ka chhuahchhal dâwn hrim hrim, a nih nîh kan ni tawh mai ang, ka pi tawhsual tawh chanchin ém pawh min hrilh duh lo tute chu ka hlauhna chhan tur leh ka en liam rengna chhan tur ka hre bîk lo.

Ka thinrim thar ta lutuk chu ka pi ka khawngaih bawk si nen ṭah pawh ka ṭap thei tawh lo va, Remsanga naute ka ànkhum dan tur ringawt ka rilruah a awm ngut ngut a, ka pi kan vui lâi te chuan mittui tling pamin ka ṭhu ngawi reng a, a thi tih ka hriata ka hmuh tirh lâi ang khan ka ṭap ri hawm hawm tawh lo hrim hrim bawk. Chawhnu her a rawn nih tâkah chuan ka pi ruang pawh lei hnuaiah an zalh famkim zo ta a, ka rilru erawh ka pi ngâiin rum vawng vawng mah se lian ber bur tak a ni!

"Engati nge ka pi chetsual thu ka pa'n min hrilh tura a chah che min hrilh miah loh a Ziki?" in chhûng kan luh hnua Remsanga nau ka hmuh rual chuan ka ti nghal phiar a, zam na reng ka nei eih lo bawk.

"Vak vak che chuan, ka theihnghilh palh a ni mai alawm" tham lo zet hian min lo chhâng lèt siah a, thinrim zual tak ka ni!

"Dawt sawi suh, i theihnghilh lo, min hrilh i tum lo hrim hrim záwk!" ka awki chu ka thunun hlei thei meuh lo zawng a ni e.

"Mi'n ka theihnghilh an tih chuan an theihnghilh a ni mai, he in chhûngah hian mo satliah ve mai chauh i ni tih theihnghilh lo bawk la!" tiin ka nu chuan a lo chhan vat a, a thusawi dan ber kher chu nâ vawng vawng duh tak a ni!

"Ka nu.......!" ṭawng tuma ka àn zuau lâiin Remsanga pawh a rawn inrawlh ve ta nge nge a, ka sawi tum ka sawi loh phah nghe nghe!

"Nang pawh Ziki, i theihnghilh ka ring hauh lo!" Remsanga bawk chuan a ti nghet leh churh churh a, kei erawh ka ngâwi ta hle hle.

"Ka theihnghilh emaw theihnghilh lo emaw, eng nge thil liam tawh chu sawi chhuah leh a ṭulna ni reng reng!?" engtin nge chutiang thu chu Ziki chuan a rawn sawi ngam záwk pawh ka hre lo.

"Ngawi hmak rawh!" Remsanga aw chu a khauh ta khur khur hle a, chutah ka nu chuan

"Keini chhûngkua hi zawng, hmân kha kan ang ta lo ve, kan keh chhe zo mai dâwnin ka hria, ka rila rah, ka fate ngei paw'n zahna chhe tê mah min nei tawh lo chu a nia!" a rawn ti diai diai a, lungngaih hmel zet hian a thle bàk a, lem chang thiam tak a ni tih ka theihnghilh hman dâwn alawm le!

Remsanga ṭawng tum leh chu a kutah ka hum chawt a, nâ lutuk lo hian ka hmer deuh vak a, ani pawh chuan engmah sawi belh tawh lo turin ka duh a ni tih a hrethiam chawpchilh ve nghal mai a, eng thu dang mah a chhakchhuak zui ta lo hlauh bawk. Pindanah kan inzui lut a, khuma ka ṭhut thlak rual chuan ka thaw chhuak hap a, ka rilru chu a buaiin a mumal lo tak zet a ni.

Remsanga ber pawh chuan tihngaihna a hre vak bîk lo, min biak paw'n ka chhâng lo hrim hrim a, ka bulah a awm ve reng a, eng emaw chen chu inbe miah lovin kan awm dun deuh char char a ni ber. Zanriah ei lâi te chuan ka chaw ei a tui lo em em a, chutah ka nu chuan chawhmehah purun vâr a lo telh kher leh ta nghal a, hei pawh hi Remsangan vawi engzah nge a sawi tawh ang, ka pum chhûnga nautê awm mêk hian khawvel èng rawn hmu lo ve lo se an duh ni berin ka hria.

Chu zan vek chuan kan inhnial leh bap bap nghe nghe a, ka pa pawh lo inrawlh vein kan zavaiin min hau a, chhûngkaw pa ber tih takah a tua ma'n dek pawh kan ti ngam lo va, ka nu ang lo takin a fanute chu a hrawk hmurh hmurh a, an titau nasa kher mai. Kei erawh ka awm ngaiin ka awm tawp a, tihtauh pawh ka tum lo va, ka nihna ni lo deuh hleka a sawi paw'n menah ka thlak mai a, a thusawi zawng zawng ka ngaih thutaksak duh lohna chuan rilru nàtna min thlen lo te pawh ti ila a sual lo ang.

Zana kan mu te chu ka mu meng kar a, Remsanga chuan mu hahdam siai siai tur paw'n min ti awl lo va, mahse chuti maiin ka muhil nghal ngawt thei si lo. Ka mitthlâah ka pi a rawn lang zut zut a, hun liam tawh ka suangtuah kir a, ka pi thihna chuan ka thinlung a tinâ thar em em a, 'Nui' tia duat taka min ko tu an awm tawh lo tur ringawt pawh chu ka ngaingam lo va, ka nâ ngawih ngawih a, ka ngâi nghal em em bawk.

"I muthilh vat loh chuan ka ngaih a ṭha lo a nia......" Remsanga lam chu hawi lovin ka en ngai ka en ngawt ngawt a, a thusawi erawh ka hre vek tho.

"Le.......muhil tawh ang, i mut ṭhat loh chuan nautê hian a tuar mai ang asin" a rawn ti dam leh thlup a, khum khata mu dun ta na fam chu ka en ve ta nge nge!

"Doctor sawi dan kha chuan tun kâr tawp hi i neih hun tur a ni tawhin ka hria, a dik em?" mi en deuh ngul chung hian a rawn ti leh a, kei pawh chuan

"Immm......." ka lo ti ṭha ve mai bawk.

"Engati nge min neih?" ka ti zui leh sap chu thawm a reh nghal tlawk tlawk a, hriau pawh tla se a ri lawl lawl thei ang tih tur vel a ni!

"Mu ang le!" ti supin ka mut dan chu amah záwkin a rawn siam rem a, a saisîr zâwngin min muttîr a, ani pawh a rawn saisîr zui ve nghal a, ka dulah chuan a ban a rawn kham deuh ruah nghal bawk.

Pasalte'n nupuite hmangaih taka an chûl den den ang hrim hian ka dul puar pawng lâh chu a chûl riak riak a, mak tak maiin chu thil chuan ka mut a tichhuak ru riai riai leh ta nghal a, ka zawhna pawh chu chhán a tum lo niin a lang. Kan ngâwi dun vang vang a, mit khap kâr lekah ka chhîng ta diar diar a, insawi rem deuh salh hian ka dul a chúlna kut hrawl ang reng tak chu ka hum hnan a, mut chhuaknain min zem chiai chiai tawh bawk nen ka muhil zui ta vang vang!

Nîte chu an ral bek bek a, ka nau neih hun a hnai tial tial a, ka huphurh rualin nautê hrin chhuah thuai thuai ka phur ru em em lawi a, ka fa lo piang mai tur chu hmangaihna nena enkawl ka châk tawh vang a ni ber ang chu! Kâr tawp pawh kan chuangkâi har lo hle a, doctor-in ka nau neih hun a sawi nî chuan nau ka la vei reng reng lo mai a, ka hlauthawng hman nghe nghe a, mahse a hlauhthawnawm loh tih ka hriat hnuah erawh ka rilru a pangngai ve leh mai.

Beisei loh deuhin Pathiannî zîngah nau ka vei thut a, eng tih nachâng mah ka hre lo va, a chinchâng hria te'n min buaipui nghal zung zung a, thingtlâng khaw lian lo ve tak tih takah damdawi in pangngai pawh a awm bawk si lo nen mang a ang rum rum hman a, mahse Pathian zârah doctor te lo thleng thuaiin kan khaw health sub-centre-ah nau chu ka nei a, hmeichhia a ni nghe nghe a, chutia nau ka'n nei fel chiah chu ka veng huaiin ka hria.

Ka fanu chu Remsangan a pawm hmâsa ber a, kei erawh ka taksa a chauh deuh avangin a pawm hmâsa ber dawttu ka ni ve ta chauh a, mi dang hmêl hlim leh hlim loh pawh ka ngaihtuah hman tawh lo, ka fanu chuan ka rilru a luah hneh êm a tin a ni! Kan khum ngeia kan han mutpui te chu ka rilru chhûng kil khawr ber thlengin a hlim ru vawng vawng a, ka fanu chuan ka nun zawng zawng min thlak danglamsak ngei pawh ka beisei!

Kâr khat a tlin nî chuan Remsanga û leh naute nen kan inchhâng buai leh bap bap a, dim baksak lova an pawm ṭhin chu ka phal tawh lo va, anni lahin pawm an tum ṭalh bawk si nen inhnial lo thei dinhmunah pawh ka ding lo. Dik tak chuan an dim lo ve èm alawm, ka chungah pawh tih tawh nàk alaiin ka fanu chungah lehzel chuan thil ṭha lo a thlen ka phal teuh lo.

Chutah ka nu lah chuan nau nei zo hlim deuh chauh e ti lo chuan rama feh turin min ti tlat bawk a, a vawi khatna atân Remsanga bulah ka vui ve ta nghe nghe a, a hmâ kha chuan eng pawh thleng se ka vui ngai lo hrim hrim a, ka rilru a nàt châng paw'n engmah ka sawi chhuak duh ngai lo tawp a, chutia ka vui thu a'n hre chiah chu ka vuina a àwm hliah hliah bawk nen a lungni bîk lo hle a, ka nu nen an inchhàn hrep phah nghe nghe a, keimah zàwkin ka khap dai leh lawi ta hial bawk.

Chutiang vel chu kan boruak a ni deuh reng a, nitin zantin bengah inkhei fek fekna ṭawngkam a lut awl lo va, chutih lâi kâr chuan ka fanu pawh a leikang chho ve tial tial bawk a, thla a tlin hnu phei chuan min hre em em tawh a, min hre hrang nalh bîk pawh ti ila a sual ka ring lo. Chutiang bawkin Remsanga pawh a hre hrang reuh em em a, an inpawm nasa ve ang reng bawk a, hre hrang tur chu a ni ve tho mai.

Tin, thil mak ve deuh pakhat chu Remsanga chhûngte pawm leh chhaih a duh mang miah lo va, nausên te pawh hian thil awmzia an lo hrethiam thui thei fû a ni chék ang! Zan lamah hi chuan Remsangan a awm deuh chawt a, a fanu dik tak a ni lo tih hai rual loh mah ni se a fanu dik tak ang chiahin a en a, a be thum bul bul ṭhin a, chhun lamah erawh keiin ka awm ṭhin thung a, chawhtawlha inbual te thlengin kan thei chho ve ta zel bawk a, nitin hmasawnna kan hmu a ni ber ang chu!

Zan khat chu Remsanga û avangin kan buai leh hrep a, a reh ve leh mai ka ring a, mahse chuti ngawtin a reh teuh lo. Ka pa nen lam kan tel vek a, Remsanga pawh ṭum dang ang lo takin a thin a rim zual khawp mai. Kan buaina bul ber chu nautê len chhuahpui ka phal loh vang a ni a, Remsanga û lahin len chhuahpui a tum ṭalh mai bawk si, inchhâng thinrimin kan ri nuaih nuaih zui nghal a, ka fanu, thla 5 lâia upa ve tawh pawh hawina tur ber hre lovin a hawi kual zak zak a, kan in chhûnga innghirnghona thleng mêk chu mak a ti hle pawh a ni ang!

"Kal ang!" tiin Remsanga chuan ka bân reka rawn chelh a rual a, a ṭawngkam chhuak chu a chang hmuk hmuk hle a, a ngaihna hre lo zetin ka lo en hau ringawt!

"Rawn lèt tum tawh reng reng suh!" ka nu lam chu ka hawi zawm zat a, Remsanga chuan min chhuahpui a tum tak tak nge tak tak lo tihah ka rilru a insual buai nasa ta khawp mai.

"Ka rawn lèt tawh lo ang ka nu, ni lo, kan zàwk maw le, kan rawn lèt tawh lo ang" ti chang fuk fuk hian Remsanga chuan min kai kal nghal dawr dawr a, a tlanin ka tlan a ni ber.

"Kal muang deuh ang" ka tih hnuah erawh min kal muanpui ta deuh a, eng rilru pua chutianga che thut chu nge a nih ka hre hauh lo.

Ka nu khan in aṭanga chhuak turin a ti ngei a, kha thu a sawi lâi kha chuan a chhuah duh tak tak pawh ka ring lo, mahse kan hun hman mêk dan chuan thil awmzia erawh a tichiang viau lawi si! Khawia kal tur nge kan nih hre map lovin ka zui mawl tawp a ni ber a, vêngchhak lamah kan kal zel a, a tawp a tawpah chuan a ṭhianpa Hunkimate inah kan kal dâwn tih ka hre ve ta nge nge a, kan awm dan chu a mualphothlak viau rualin Remsanga rilru lian a chhuak tawh miau bawk si, tihngaihna ka hre lo khawp mai.

Hunkimate inah chuan riakin zan hun chu kan hmang ral a, mahse ka muhil lo hrim hrim, Remsanga pawh chuti tho chu! Nupa reka khawsa tih takah Hunkimate nupa chuan kan duh chen chen an bula kan awm theih thu an sawi a, fa nei lo an lo ni kher bawk nen ka fanu chu pawm te an inchuh rak rak a, neinung leh hausa ni chuang miah si lova nupa hlim tak an ni thei chu ka awt ru em em a, mathei lovin Remsanga nena kan inkâr ka ngaihtuah chhuak ta nge nge bawk.

Kan kârah hmangaihna a awm miah lo tih hre ve ve chungin kan innei rawih kha a ni a, kei ngat phei chuan ka beidawn neih tawp a nih kha! Ka tân kha chuan thlan tur dang kha a váng lulâi êm a, ka thisen zawmpui ka chhûngte bulah pawh ka hlim chuang lo va, pasal nei turin min tur chhen bawk nen Remsanga ka nei tawp kha a ni a, chu pawh duhna leh hmangaihna tel miah lo lehnghalin!

Amaherawhchu, nupa kan nih aṭang khan ka rilru a danglam tial tial a, ka duh ta viau e tihna pawh ni chuang lovin ka pasal a ni tih ka hre chiang tawlh tawlh a, engkim a nih tur ang a nih vek tawh tho tho avangin ani nena nupa nih chu a ṭha berin ka hre bawk. Tin, a chenga chengho nà nâ nà chu a tlangval lâia ka hmuh dan leh ka pasal a nih hnua ka hmuh dan a inpersan ta hle a, ka beisei loh lam daihin awm ṭhin mah se ka rilru tinâ zâwnga a awm ngai erawh ka hre miah lo thung.

Hunkimate inah chuan nî 2 ngawt kan awm ta a, kan chhûngkaw buaina chu khawtlângah a darh zui leh ta nghal a, a mualphothlak duh teh e! Remsanga erawh chung kan chanchin lêng vak vel chu hre lo ang hmakin a awm a, sawi pawh min sawipui ngai lo va, a tih tur a ti mawlh mawlh a, kan awmna tur in a ngaihtuah kual nasa bawk a, in luah tur pawh a hmu har lo khawp mai.

Chutia hnawhchhuah kan nih tâkah chuan in dang zui nghalin vêngchhak lamah kan awm ta daih a, kan in luahna pu Hluate pawh an lo fel khawp a, kohhran upa tih takah an in hnuai kan luah man chu tam tak ni lo mah se kan duh hûn huna kan pek theih tur thu min hrilh nghe nghe a, ka chhûngte leh Remsanga chhûngte lam erawh an reh rei ngar ngar hle a, mahse pawi ka ti lo daih záwk!

Kan chhûngkua bîk téa kan han awm hrang ta chu a hahdamthlak nghal viau a, chhun lamah Remsanga hnathawkin a chhuak nitin a, kei inah nautè awmin ka awm thung a, kan chhûngkuaa hun kan hmanho tamna ber chu zan a ni mai. Tin, in dang tir chauh kan ni bawk nen kan buai viau dâwn emaw ka ti kha a ni a, mahse a ni miah lo. Nautè thawmhnaw te, damdawi leh mamawh chi hrang hrang thlengin Remsanga zârah kan nei chawp ve thei zel a, hna erawh a thawh kual nasat phah mah mah a ni.

Zan khat chu eng a hria nge ni, zanriah ei kham aṭangin a lêng chhuak nghal daih a, a kalna tur pawh min hrilh chuang lo, ka zàwt hman lo a ni mah zàwk! Ka fanu, Bawihtei nen chauh inah chuan kan awm tlawng a, Remsanga awm loh vang nge pawh ka hre lo, Bawihtei lah chu a tlei hlei thei der lo leh nghal a, a bîkin tun lâi chu a ṭe hiar chho riauin ka hria.

Zan tlai tak thleng Remsanga chu ka nghak ngat ngat a, mutsan mai ka tum paw'n ka thei bawk si lo, in a rawn thleng chiah chu Hunkiman a rawn kuah lut a, zû a in tih hrilh hranpa ka ngâi lo chiang khawp mai. Engmah sawi lovin khumah ka mut tawp a, Hunkima pawh rei awm lovin a haw ve nghal mai bawk.

Khumah chuan ka mu meng kar a, thil chi hrang hrang ka ngaihtuah kual a, Remsanga zû in chhan mawlh chuan ka rilru a luah lo thei lo. Ka hriat tirh ata tawh zû a in ngai réng ka hre lo va, nupa kan nih hnu thleng paw'n a in ngai chuang lo, mahse chu zan ber khera a rawn rui haw tlat chu ka hriat fiah chàk, la hriat fiah theih rih si loh chu a ni.

Zîng khua a vâr a, mei chhêm turin ka tho chhuak a, zan khuaa muhil lo tih takah ka ni deuh bûr a, ka che vel thawmah chuan Remsanga pawh a rawn harh har lo hle a, pangngai taka a hmêl ka'n hmu chiah phei chu ka rilru a nâ ru thar nghal em em a, eng nge a chhan pawh ka hre tawh bîk lo. A ngâwi reng a, thil awmzia sawifiah tum miah lo anga a awm ngel ngul tlat te chu ka lungàwi loh zual phah ni berin ka hria.

"Engati nge nizan khan zû i in?" keimah záwk chuan ka záwt ta nge nge a, insum thei tawh hek lo.

"I mu miah na nge?" ka zawhna pawh chhâng lova zawhna min záwt lèt daih chu ka rùn kher mai.

"Chaw ei kham hlimah i chhuak nghal daih a, engmah sawi lo lehnghalin, i kalna tur takngial pawh zawh hman i ni lo, chutah i rawn rui haw leh bawk a......" ka tih hmawk hmawk lâi chuan min rawn pan hnai a, a áwmah ka lo nam vat thung.

"Ka tihpalh, a thleng nawn tawh lo ang" chutiang thu a rawn sawi te hlei hlei chuan ka rilru a tinâ zual ting a, ka ṭah a chhuak ru em em bawk.

"Tihpalh tih ringawtin awmzia a nei lo, engtin nge kan awm pawh i rawn ngaihtuah tawh lo hrim hrim!" ka tih leh buan buan lâi chuan ka dara rawn chelh a tum a, ka lo vai kiang vat a, ka no ken lâi chu ka thlauh ri bawl nghe nghe!

"Ka tihpalh a ni e" ti hniam supin chhuata no chu a là a, hmui pet deuh ngawng ngawnga thaw chhuak hap chung hian min rawn kuah zui nghal zat a, ka tal phat chu min kuah nghet sauh bawk.

Kuah lètin ka ṭap chhuak ta ringawt a, chutiang tak chuan ka ngaihtuah ang tih leh hlauhthawnna ka nei ang tih ka ring pha ngai lo. Ka ṭap tih hrethiam zet hian ka sam leh ka hnung chu a chûl hliau hliau a, rei lovah zan khuaa ka rilru lo hahna zawng zawngte kha an bo ta duak bawk. Chutia kan inkuah lâi chuan Bawihtei a rawn ṭap a, kan awm hrang nghal vat a, pindan lamah pheiin ka ngaihsak ta zung zung a, ṭah pawh a ṭap rei chuang lo.

Kan boruak chu a pangngai chho ve leh mai a, ni dang ang bawkin Remsanga pawh hnathawk turin a chhuak leh a, in dang tawh mah ila ram erawh amah bakin a enkawl ngai lo va, kan in dang tâk aṭang hian a chhûngte lo thatchhiat hlawmzia ka hmu fiah ta kuarh bawk. Tin, Remsanga tel lo chuan eng an lo nih lohzia a lang chiang tulh tulh a, Remsanga lahin zu pawh emaw hnaih emaw pawh a tum tawh der si lo, an chanchin mi sawi thawm hre ṭhin tho mah ila ka ngaihtuah zui duh ngai lo law law!

Hun leh nî a ral a, Bawihtei paw'n kum khat a tling ve ta! Kan chhûngkuaa hlimna thlentu lian ber pakhat chu amah a ni a, Remsanga paw'n a duat em em a, kei phei chuan nu duatna tel lova puitling chho ka nih avangin ka duat zual em em a, mahse ka duat sual zo ang tih erawh ka hlau hle thung.

"In awm em?" tia kan kawngka inkik ri karh karh ka hriat rual chuan

"Awm e, lo lut rawh" tiin ka lo chhawn hliai a, kan in chhûnga lo lut ka hmu chiah chu ka meng fiah káwk thei!

"I dam maw?" Zela chu ka en kal a, chhàn pawh ka tum chuang lo.

"Hei hi......." tia ka Bawihtei lam a hawi rual chuan

"Ka fa, keima fa chiah, i fa a ni lo" ka lo ti nghal hlawk hlawk a, chu thu ka sawi lâi chuan ka kut ka hum ruh ngar ngar bawk.

"A dik alawm....." ti sup hian ṭhutthlengah chuan a ṭhu a, Bawihtei chu a en vung vung a, kei erawh ka dinna ngaiah ka la ding reng thung.

"Eng nge i rawn tih dâwn!?" ka aw chu a nêm lo khawp mai.

"Thil a lo danglam ta hle mai, i ti ve em?" ka zawhna pawh chhâng chuang lo hian a rawn ti dap a, ka lo thaw chhuak hluai ringawt!

"Ka hnenah rawn lèt leh la ka duh Thanpui, ka fanu nen hian....." ti lehin a rawn ding a, min din hnaih nghal ta viau bawk.

"Hmân ang kha ka ni tawh lo, tunah chuan ka danglam tawh, a pawi thui tak tak hmâ hian ka bulah ka fanu nen hian lo let leh ula ka duh" chu thu a sawi zawh rual chuan min rawn kuah nghal thlawp a, ka thil lo paltlang tawh zawng zawngte ngaihtuah lètin ka ṭap chhuak hawk a, vanduai ngawih ngawih tura piang tluk zeta ka inhriatna chuan min tiṭap lo thei lo a ni.

"Ka hmangaih che, ka la hmangaih reng che asin, nang pawh hian min la hmangaih ve reng ka ring, a chhan chu kan pahnih inzawmna hi chuti maia chhut chah theih a ni lo" ti leh dap dapin min kuah nghet sauh a, chutia kan inkuah lâi tak chuan kawngka a rawn inhawng thut a, ka inla hrang nghal vat a, chutah Remsanga ram kal lo haw chu niin!

"Ka'n haw tawh ang e, naktuk lamah kan inhmu leh dâwn a nia" ti zung zungin Zela chuan Bawihtei biang chu a zu piai zeuh a rual a, a bye bye thlap bawk a, a kal liam chiah chu sawi tur vâng nghal tak a ni!

"I chau em?" tiin Remsanga chu ka bia a, ani pawh chuan

"Chau lo e...." a lo ti pangngai ve mai a, chutah amah vek chuan

"Tu nge a.....?" a rawn tih zawm zat a, min en lo hlauh chu a vanneihthlak ngei mai.

"Eng lo......ka hmêlhriat hlui maw le....." ti sapin a thingpui tur ka buaipui zui nghal ta daih a, ka kal sawn tur chu min rawn en zawk tih erawh ka hmu hman tho.

Khua a rawn thim a, zanriah kan ei lâi chuan ka ṭawng siam siam a, Bawihtei ka be pah reng bawk a, Remsanga erawh tlai aṭang khan a awm dan a dik chiah lo tih ka hai lo khawp mai. Chaw kan ei kham hnu chuan tapchhakah Bawihtei pawm chungin ka ṭhu a, chawhmeh ka chhûang lûm zuaih a, kan bula Remsanga rawn ṭhut lâi chu a thawm aṭangin ka hre reng a, mahse a lam ka hawi lo hrim hrim thung. 

"Khawi, ka lo pawm rih ang" ti supin Bawihtei chu a rawn là titih der a, Bawihtei pawh chuan a lo ban ve ar ar reuh a, a nui nghal ver ver bawk. 

"Naktuk chu rama ka kal hlanin Bawihtei pa kha in lo zui mai dâwn a nia......" a thu rawn sawi avang chuan ka thil chhùan lâi suan thlak ka tum chu ka tawp nghal chat! 

"Eng nge i sawi awmzia?" ka ti fân raih a, a thusawi awmzia chu ka hrethiam lo tak tak!

"Ka duh dan leh ngaihdanin thil ka lo kal thuipui mah mah a ni" ti dam dap hian

"Ka hmangaih êm che avanga nei lui che kha ka ni a, zalen tak leh hlim takin i nun hmang la ka duh ber a, mahse tunah chuan ka duh dan ringawtin engkim a awm vek thei lo tih ka hrethiam tawh e" a rawn tih zawm leh thlup thlup a, ka thin chu a phu rang dawt dawt ta hle bawk. 

"Ka ngâi ngawt ngawt ang che u....." ti thum chhalin tawi tê hian a nui nghawr dat a, a kut chu Bawihtei a khàltîr neuh neuh a, a ṭawngkam tinah chuan tlaia Zela nen kan awm dan zawng zawng leh Zela thusawi zawng zawng kha a lo hre vek tih hai rual a ni lo.

"I ngaih ang kha a ni lo......" ka ti dek dek chu

"Ni lo tak tak se ka ti ngawt mai" a lo ti zui nghal nghut a, en pawh min en tawh lo hrim hrim! 

"Ka neih chhan che min zàwt tawh tak e ti raw, a chhan dik tak i la hre duh em? Eng dang a ni lo, ka hmangaih vang che leh ka khawngaih vang che a ni. I chhûngte bulah pawh i nun kha rah beh a ni tih ka hai lo va, keini han neih phak rual ni lo mah la ka hmangaih tlat si che a, min neih chuan i hrehawm lutuk pawh a zia deuh ka ring kha a ni a, mahse ka lo ti sual a ni. Kei min neih avang hian i hlim chuang reng reng lo, ka tihsual tam pôh leh ka inchhir ting dâwn a, chuvangin Bawihtei pa bulah lèt leh zàwk rawh u, a hlim pawh in hlim záwk ngei ang" Bawihtei lawm reng pah hian chung thu chu a rawn sawi leh dap dap a, ka rilru a tikal thui vawng vawng khawp mai. 

Thil dang sawiin min be pangngai leh ta viau a, khuma kan mut dâwn te chuan Bawihtei a lawm nui ar ar a, kei erawh ka dik thei tawh meuh lo. Chutiang rilru ka pasalin a pu ta chu ka thiam loh nge pawh ka hre lo, ni lo, thiam lohna chen ka nei dâwn tih ka chiang, buaithlak min tih ruk châng pawh a tam ang, Zela a rawn inlan hnuhnawh leh kher bawk nen thil a buai zo vek a ni ber e!

Ka chhîng sek emaw ka tih chu ka lo muhil tlang daih chu niin, ka harh chuan Remsanga mutna a lo ruak huai a, a tho tawh a nih ringin ka tho chhuak a, mahse ka la hmu mai chuang lo. A chhuak lawk a ni ang ti rilru neuh neuhin tui ka chhûang lúm a, mahse zîng dâr 7 leh a chanve velah pawh a la rawn haw lo hrim hrim a, a tlai zel a, tukṭhuan ei dâwn thlenga a hmêl hmuh tur la awm lo zel chu ka ngaih a ṭha thei tawh lo. 

Hnathawh thawmhnaw bâwm lam ka en chuan ni dang ang lo tak hian a lo hnawk deuh nuaih a, hrilh hranpa ngai lovin a zîng chhuah daih tih ka hrethiam chawpchilh nghal bawk. Rilru buai ru zet hian ka thaw chhuak ham ham a, chutiang taka a awm dan a thlak ta chu keimah vang ka ti lo thei lo. A rilru ka tinâ hle tih ka hai lo va, chumi avang chuan ka awm a nuam thei bîk chuang lo, eng thil emaw ni tak chu ka tih a ngâi a ni. 

Tukṭhuan kan ei kham a, nî pawh a tlâng sâng tial tial a, Bawihtei chu puain ram lam ka pan ve ta rawih a, rama ka kal chhûng Hunkimate ina dah rih ka tum deuh reuh kha a ni a, mahse ka ngaih a ṭha dâwn chuang lova ka hriat avanga hruai ta tawp ka ni! Thlâm bul ka thlen chuan thlâm chhûnga Remsanga lo ṭhu ngâwi reng chu ka hmu nghal a, ka kal hnaih zel a, a kutah chuan kan inneih thlalak ngei mai kha a lo hum reng tih ka hmu zui zat bawk.

"Remsang......." ka aw a hriat rual rualin a rawn hawi nghal thuai a, mak pawh a tih hmèl hle.

"Engati nge in lo kal?" lungâwi lo zet hian a meng nur nang a, keimah mai ni lova Bawihtei ka hruai tel lehzel chu ṭul a ti lo tih a chiang khawp mai.

"Haw leh thuai rawh u, Bawihtei pa a hrilhhai lutuk ang asin" ti leh nghalin min rawn awm hnaih ruak a, engtin nge rilru nâ miah lo ang chuan a awm theih záwk pawh ka hre lo. 

"A nih Bawihtei pa bulah chuan lèt ta ila i hlim ang maw?" ka zawhna chu hria angin awm lo mah se a hria tih erawh ka chiang a ni. 

"Sawi rawh Remsang, kan tel lovin i hlim ang maw?" ka ti nawn leh ngat a, a hlim thei dâwn a nih ngat chuan hreh tak chungin Zela hnen ka pan mai a ni ang chu!

"Ka hlim leh hlim loh a pawimawh lo, in hlimna turin ka lak aṭang hian kal bo záwk rawh u" amah leh amah a inhmu hniam lutuk chu ka ti thei tawh thlawt lo. 

"Eng nge i hriat a? Engati nge hetiang hian i awm tlat!? I bulah lo kan hlim i ring em ni? Rilru hahdam taka ka awm theihna hmun awmchhun chu i bul hi a ni asin, chuti chung chuan Bawihtei pa zui turin min la ti ṭalh dâwn em? Ni lo, Bawihtei pawh hian pa pakhat chiah a nei, chu chu nangmah i ni, pa nihna hi thisenah a innghat vek kher lo, engati nge thil hrethiam vek si hian i hriatthiam loh luih tlat!?" ka ti ta buan buan a, ka insum thei tawh lo a ni ber. 

"Min hmangaih thu i sawi a, ka hlim i duh thu i sawi bawk a, mahse i ti tak tak lo a nih ka ring. Ka hlim i duh tak tak a nih chuan i bula awm turin min chelh tlat tur i ni a, min hmangaih tak tak a nih chuan kan nupa inkâr tikhi thei thil reng reng chu a hnawhphui hna i thawk tur záwk i ni asin! Engati nge ka rilru tur hi i hriatthiam ve miah loh!?" ka ti leh hlawp hlawp a, ka ṭap titih chu a ni der! 

"Thanpui....." tiin ka kut chu a rawn chelh a, ṭah loh ka tum pôh leh ka ṭah a chhuak zual ting zàwk!

"Kei hian ka hmangaih che asin Remsang" ka ti ṭiau a, chu thu ka sawi zawh rual chuan a âwmah min kuah bei nghal thuai a, ka chal chu a fawp zui vang vang bawk.

"Min ngaidam lûl teh......" a tih lâi te chuan ka lo insût feih feih a, Bawihtei pawh ka ngaihtuah thei meuh tawh lo.

"Ka tiam a che, nang leh kan fanu Bawihtei hi ka lak ata in kal bo tawp lo ang, engtikah mah!" a rawn ti nghet ta churh churh a, ka nunah ka mipa hmangaih hmâsa ber ni lo mah se a tawp ber ni tura ka duhthusam chu amah a ni a, ani tluka hmangaih phu leh min hmangaihtu mi ka tawn leh tawh pawh ka ring lo.

Ka rilru ipikna leh rilru hahna zawng zawng a kiam a, Zela pawh rawn kal leh rawh sek sek, a bula lèt leh ka tum tawh lo bur! Pasal nei lo pawh ni ila a bulah kher chuan ka lèt leh ka ring tawh lo, chu ai chuan Bawihtei ṭulpui ṭhak pawh ka zuam daih záwk! Ka tisual tawh a, ka tisual nawn leh thiang tawh lo. 

Tin, tunah chuan pasal nei lâi ka ni tawh a, ka pasalin ka hmangaih lèt aia tam takin min hmangaih záwk lehnghal a, Bawihtei pa dik tak lam a ni emaw, ni lo emaw, eng pawh ni rawh se, kan inhmangaihna a thuk tawh miau a, eng thil mahin kan chhûngkua a tihkeh sawm theih ka ring tawh lo, ka phal lo hrim hrim bawk.

A hmâ zawnga ka duh ngai reng reng loh, hmangaih pawh ka hmangaih ngai reng reng loh, ṭhian ang chauha ka en ṭhin kha tunah chuan ka hmangaih ngawih ngawih tawh a, harsatna pawh tàwk ila min paltlangpui thei tura ka hriat leh ka rin ngam awmchhun chu amah chauh hi a ni.

"Min hmangaih avangin ka lawm e" tih leh ka bianga rawn fawh zeuh a rual a, lài ang reng hian ka lo khi seih a, ani ang pasal rilru ṭha lutuk ka nei hi ka vanneihzia ka hriat belh zel dâwn a nih hmêl!

"I haw teh ang u, he lâi hmun hi chu Bawihtei tân a him táwk lo, thosi te'n an seh palh ang" amah bawk chuan ti leh supin Bawihtei chu a pawm zui zat a, thlâm aṭang chuan kan chhuak titih nghal bawk. 

***********************************************