CHÛN CHAWI LOH HRINGNUN By Havali Adam

CHÛN CHAWI LOH HRINGNUN

By 

Havali Adam

"Vawiin chu huanah han kal ang hmiang?" ka pu chuan a rawn ti dap a, school chawlh a ni tho bawk a, hnial tumna pawh ka nei hran lo.

"Serthlum ven pahin" amah bawk chuan a rawn ti leh a, ka lo bu nghauh nghauh a, ka pa lam chu ka hawi zeuh a, ngawi reng hian chaw a bâr mual mual a, ka pu nena kan inbiakna chu hre ve ang paw'n a awm lo hrim hrim!

"Vawiin lam eng nge tih i tum deuh Sangzual? Luiah chuan i kal dâwn nge huanah i rawn kal ve ang?" tiin ka pu chu ka pa lam a hawi zui zat a, ka pa pawh chuan

"Luiah ka kal ang" a lo ti ve ṭha mai a, kan ṭhu dun reng nàin kan inṭhut hnaih lo khawp mai.

"A nih chuan eng lo hawn teh a.......nawhlung tur ṭha deuh....." nî Vuli chuan a lo ti ve nghal zat a, ka pa pawh a bu nghut a, pa ṭawng tam lo ve tak hi chu a ni chiang alawm!

"In tlai chhuah dâwn nge?" ka pu chuan a rawn ti ve leh a, naupang awmchhun tih takah ka ṭawng tawh lo hrim hrim!

"Immm.....tlai chhuah ang" ti nghutin ka pa chu a kham zui nghal daih a, ka en zawk nghe nghe!

Chaw kan ei kham a, ka pu nen chuan serthlum huana kal turin kan insiam nghal a, hna kan thawk dâwn pawh a ni chuang lo va, kan haw har ka ring hran lo. Huan kan han thleng chu serthlum khehna kâwr hmuh tur a lo tam ang reng hle a, feh kal paha lo ru zeuh an awm tih hai rual a ni lo va, chu tak chu kan kal chhan pakhat a ni a, ka pu pawh a lungáwi loh hmêl khawp mai.

A hminga chem keng ve ta lem chu ka pu chuan serthlum kung bul hnim zualpui lâi min sam faitîr zeuh zeuh a, ka pute serthlum huan hi a ṭha ve ang reng a, zauh pawh a zau a, kan naupan zual lâi phei kha chuan Vâi hovin an rawn lei ṭeuh ṭhin nghe nghe a, tun hnuah erawh hralh pawh kan hralh chhuak tawh meuh lo va, kan enkawl tawp a ni ber.

Chawhnu dâr 2 vel thleng huanah chuan kan awm a, in kan thleng chu kan serthlum hawn ka phawrh nghal sang sang a, nî Vuli paw'n min lo buaipui zung zung a, ka inbual fai nghal daih nghe nghe bawk. Ka chau deuh nge ni, ka mut chu a chhuak ru riau a, pindanah lutin khumah chuan ka mu zâl mai mai a, ka lo muhil tlang daih chu niin, thawm ri sut sut chuan min tiharh lo se chu ka harh lawk pawh ka ring lo.

Khum bul lawka che ri sut sut ka pa chu ka en deuh reng a, nî Vuli nena kan khumah ni lovin a khumah ka lo mu tih ka hre chhuak chawpchilh nghal a, ka harh tih pawh hre miah lo hian a insiam mual mual a, a insiam zawh chuan rei awm tawh lovin a chhuak ta daih bawk.

Tukverh lam ka hawi chu khua a lo hniam duai tawh a, pindan aṭang chuan ka chhuak zui ve nghal mai a, ka pa lui kal tur chu ka hmu hman chiah chiah nghe nghe a, an rawn haw har leh viau ang ka ring. Tapchhak lama ka pu ṭhutna bulah ka ṭhu ve ran a, eng eng emaw ni a sawi lâi chuan ngawi rengin thil dang ka lo ngaihtuah daih thung.

Chu thil dang chu eng dang ni lovin ka pa nena kan inkâr a ni!

Ka pa nen hian kan innêl lo em em a, kan inbiak ve pawh hian a hming chauha inbia kan ang ka ti ṭhin. Ka têt lâi aṭang tawh pa ngaihsakna leh hmangaihna ka dawng ngai lo hrim hrim a, ani ai chuan ka pu leh nî Vulite paw'n min duat a, min hmangaih daih záwk a, ka kum a lo tam ve tâk aṭang hian thil ka hrethiam chho ṭan a, ka pa hi chuan ka awm awmin min awmtîr tawp ṭhin ni berin ka hria.

Nî Vuli min hrilh dan chuan ka pian tirh hian damdawi inah ka nu'n min boralsan nghal a, chu chu ka pa'n a tuar nâ em em a, chu bak engmah min hrilh duh ngai lo. Amaherawhchu, ka pa nen an inhauh ṭuma an ṭawng ka hriat ruk danin ka pa chuan ka nu chu keimah avanga thi ah a puh bur hi a lo ni a, chuvanga tun thlenga inpawh hlei thei lo chhunzawm zel pawh kan ni a, chu bakah kan mizia a inperhsan lutuk mah mahin ka hria, chu chu kan inpawh theih loh chhan ti ila a sual tam ka ring lo.

Ka vanneih nge ka vanduai záwk ni, naupang harh vang tak leh ṭawng duh ve barh barh tak niin thil ka hrethiam chak em em a, ka hrethiam hmâ ang reng viau bawk a, ka laka ka pa awm dan pawh hi ka hriatna a rei tawh a, nêl ka tum ṭhin tea a theih miah loh aṭang khan ka rilruah zawhna a rawn piang nghal a, ka pu leh nî Vuli pawh ka zàwt nasa thei hle a, min hrilh ṭha duh chuang ngai lo va, mahse pâwl 5 ka zir kum khan a chhan dik tak ka hre ve ta chiah a nih kha!

Pâwl 1 aṭang pâwl 4 ka zir chhûng zawngte khan ka pa ai chuan nî Vuli leh ka pu hnen aṭangin ngaihsakna ka dawng hnem záwk ṭhin a, exam-naa pakhatna ka nih châng paw'n a ni chu lawm hmêl pawh a pu ngai lo. Pâwl 5 ka zir hmâ kha chuan ka nêl em em a, ka ngâi thei em em a, a bula awm te kha nuam ka ti a, mahse eng atân mah min ti lo tih ka hriatthiam tâk aṭang erawh ka pa mah ni se pawh emaw nèl enah ka en tawh lo hrim hrim!

Kan han tleirawl chho va, High School te kan rap ve ta hial a, nuam ti taka ṭhiante'n an pate nena an ram kal dun chungchâng te, an lui kal dun chungchang an sawi te hian rilruah ka pa a rawn lang lo thei ṭhin lo va, mahse ka ngaihtuah zui rei duh ngai lo law law, chu ai chuan ka pu leh nî Vulite ngaihtuah chhuak vatin ka inhnem chawp daih záwk ṭhin.

Ka nuam tih zâwng pawh a hre lo va, ka hlimna tura thil tih pawh a nei ngai lo va, a fapa mah ni ila ṭul tê lovah chuan biak pawh min be ngai lo va, khum khatah pawh kan mu ngai lo. Ani bula mut ai chuan ka pu emaw nî Vuli bula mut nuam ka ti záwk a, min ngaihhlut lohzia ka hre chiang chho tial tial a, pa nei reng chunga pa ngaihsakna dawn miah loh chu hrehawm tih châng ka nei ve ṭhin tho, mahse ka dawng dâwn chuang lo tih ka hriat chian em avangin eng he hu ah ka ngai lo lui ngar ngar ṭhin.

"Nangni kha......!? Eng nge in tih!?" sir Mala aw ka hriat rual chuan ka hawi phawk hra a, ka ṭhiante pawh chuan an meizial zuk ruk lâi chu an paih nghal vat bawk.

"Meizial rim a va nam ve, in zu ru a ni maw!?" sir Mala chu a rawn hnai zel a, thin a phu rang duh zawih zawih khawp mai.

"Tu tu nge zu che u, sawi r'u!?" a rawn tih leh chuan

"Kan vaiin" tiin Thanngura chuan a lo chhâng vat a, ka melh nghal kawk nghe nghe!

"Ka zu ve lo sir......" ka ti ta thuai a, mahse Thanngura bawk chuan

"Dáwt sawi suh" a rawn ti fak a, mak tihnain ka khat a, ka thin a rim rang hle bawk.

"I va'n dawthei ve a, keite chuan ka zu lo hrim hrim, in bulah ka awm ve mai mai alawm" ka tih laklawh lâiin kan sir chuan

"In zavai khan lo kal teh u!" a rawn ti charh charh a, hrem nih duh hauh lova

"Ka zu ve lo sir" ka tih pawh chuan

"I ṭhiante'n an sawi miau alawm, phat tum duh suh, i zu ve ngei ngei ang, chu bakah nangni ṭhianho hi in awm ṭha duh lo hrim hrim!" a rawn ti daih a nih chu!

"I dawihzep hle mai, ṭhiante tân pawha dàwt sawi han ngam loh...." office lam kan pan ṭham ṭham lâiin Thanngura chuan ka beng bulah a rawn ti zauh a, elhsen zet hian min nuih et et a, ka insum zo ta lo.

Ka che phut a, ka hnek ri nghal sawk a, kan insual chu a ni zui nghal mai. A thuhrimin Thanngura nen hi chuan kan inmil vak lo hrim hrim a, kan khuaa a hausa pâwl an nih avanga a chapo ṭhin êm vangte pawh a ni ang, in-classmate mah ila ka kawm tam lo ber te zínga mi a ni. Chutia kan han insual ta chu min ṭhelh nghal thuai a, kan sir chuan min hau hrep nghe nghe bawk.

Zirtirtute zilhna kan dawn mai bakah principal office-a koh luh kan ni leh ta zel a, dàwta min puh avangin chutiang chuan thil a thleng ang tih ka ring pha lo hrim hrim! Principal office aṭanga kan chhuah hnu chuan in lamah kan haw hna hna a, principal thupek angin kan chhûngte ve ve kan ai awha school-a kaltîr a ngâi thung a, keimah ber chuan ka huphurh ru ta a ni.

Kan in kawt ka thleng chu ka pa ka hmu nghal a, thing a lo ek mêk a, biak pawh be lovin in chhûngah ka lut a, ka pu ka zawng a, mahse a hmêl reng hmuh tur a awm lo va, chutiang bawkin nî Vuli pawh in chhûngah chuan hmuh tur a awm lo hrim hrim! Pâwn lamah ka chhuak leh ta ringawt a, tih ngaihna awm hek lo.

"Khaw'nge nî Vulite hi.......?" tiin ka pa chu ka bia a, ka lam a rawn hawi thuak a, chutiang huna min hmu hlawl chu mak a ti deuhin ka hria.

"An chhuak....." tih bakin min chhâng lo va, min en chîk nger ngur ta viau bawk.

"Eng lo.....school-a kal a ngâi a.....ih....principal-in in chhûngte rawn kaltîr rawh u a tia...." ka ti tîm deuh dai a, ani ber kher hrilh a ngâi chu ṭul ka ti lo khawp mai.

"Engati nge?" a rawn ti bul hmuk a, ka rin láwk dan vel chiah a ni!

"Kan insual a" ka ti pangngai ve leh mai a, a thing eh lâi chu a chhunzawm ta miah lo bawk.

"Engati nge in insual?" a rawn ti leh nghut a, ka va han sawi phur lo mai mai tak!

"Meizial zu ru angin min sawi a" ka tih chuan

"Tuin?" a lo ti leh nghal vut a, kei pawh chuan

"Thannguran" tih bakin ka chhâng thui duh lo va, engmah min zawh zawm tawh loh avang chuan in chhûng lamah ka lut ta daih!

Insil fai thuak thuakin ka pa chu kan school-ah a han kal ta ngei a, dik tak chuan nuam lo ka ti ru ve reng tho. Chu bakah High school ka kal hnua buaina ka neih vawi khatna a ni a, ka pu leh nî Vuli an lo awm lo kher bawk nen ka pa hriat duh lo teh mah ila tihngaihna dang a awm der si lo, a nih nih kan ni tawh mai a ni ang chu!

Naupang fel tak han tih tur ang chì hi chu ka ni lo ve hrim hrim a, insual pawh hrat ve tak, ṭhiante zîngah pawh tlêma mize harh fâl deuh leh pawngpawrh châng ngah ve tak ka ni a, mahse dáwt sawi te, ruih theih thil tih te erawh hi chu ka tum ngai lo hrim hrim thung. Ka pu hian chaw ei lâiin a sawi fô ṭhin a, nî Vuli paw'n a sawi tho va, mahse anni sawi ai chuan ka pa'n vawi khat lèk ruih theih thil ti miah lo tura min hrilh kha ka awih ta ber záwkin ka hria.

Eng nge a chhan ka hre bîk lo, ka pa a nih vangte pawh a ni mahnà! Pa dangte nena an inan lohna pakhat nia ka hriat chu ruih theih thil a ti ngai miah lo hi a ni a, meizial, a bîkin zozial takngial pawh a zu ngai lo va, sahdah, khainî leh hmuam theih eng ilo pawh a hmuam ngai meuh lo va, kuhva erawh hi chu a hming chauhin a ei ve zauh zauh ṭhin thung.

Tin, thingtlanga khawsa mah ni ila pa incheng vawng tak a ni a, kum lamah pawh a la upa tehchîam lo va, ka hriat sual loh chuan tunah hian kum 45-na a hmang mêk a, pafa e ti lo chuan a kum zat dik tak pawh ka hre chiang lo chu a ni ber e! Pa ngaihsakna leh duatna ka dawn ngai loh avangin ka pu leh nî Vuli te ka bel tam záwk a, ka pa ai thlawt chuan ka nu chhûngte lam pawh ka pawh daih záwk!

School aṭanga ka pa rawn haw chu a ngawi ngul a, zawhna zawh ka châk ruk viau rualin zawh loh law law ka ti tlu ta záwk a, kâr lovah ka pu leh nî Vuli te pawh an huan kal an rawn haw thleng a, thingpui ka lo siam nghal zar zar a, ka pa erawh pâwnah thing a ek leh daih tawh thung. Ka siam kep ve avangin thingpui pe tur chuan ka chhuak a, ka rilru chu zawhna zawh châkna hlirin a la khat a ni ber.

"Kha......!" ka ti deuh tawl a, pa han tih vel ai chuan mawl biak tawp hi ka duh daih záwk tlat a tin a ni!

"I zu ve a nih loh chuan i ṭhiante meizial zukna bulah awm tawh lo ang che!" thingpui no làk pah hian a rawn ti nghut a, mi pawh a en chuang lo.

"Engtin nge principal-in min sawi?" ka ti ta nge nge a, ka en chho deuh kal bawk.

"I zirlâi hi ṭha takin zir la, thil dang ngaihtuah suh!" bul zet hian a rawn ti leh daih a, ka zawhna chu chhâng lo chiang tak a ni!

In chhûnga ka luh hnu chuan principal-in ka pa bula min lo sawi dan tur mawlh chu ka ngaihtuah zui reng a, ka pu min biakna te chu rilru pe lo zet hian ka chhâng liam vel mai mai a, a hnuah phei chuan ka inbual fai ta daih nghe nghe!

Tlai dâr 4 leh a chanve vel a ni a, zanriah ei a la hun chiah lo bawk nen pindanah awmin zirlâi ka en kual thuak thuak a, zan lam ai chuan tlai leh zíngah hian ka rilru a kal ding záwk hrim hrim a, exam lâi phei chuan ka tho hmâ ve ṭhin khawp mai.

Chutia lehkha ka zir lâi chuan hmeichhe ṭawng vin hlak hlak thawm a rawn awm thut a, pindan aṭangin ka chhuak zui nghal vat nghe nghe a, chutah kan in chhûng ngeia rawn ṭawng vin hlawk hlawk chu Thanngura nu lo ni rengin, ka hmêl a hmuh rual rual chuan tur zeta mi melh ram chung hian min hau nghal bawng bawng a, ka pu leh nî Vuli hmêlah chuan mak tihna a lang zut zut a ni ber.

"Naupang tê tê si, vawi khat mah ka fapa kut lo thlak tawh hlek suh!" Thanngura nu chu tawp chin nei lo ang hrimin a la ṭawng vin khar khar reng a, ka insum thei ta bîk lo.

"Eng nge dàwta min puh ngawt nì, dáwt sawi lo se chu engtin mah ka ti lo ang!" ka lo ti ve hmak a, ka en lèt deuh kal nghe nghe!

"Awi, i va han zak lo reuh ve le! Mite chu i la chhâng pang pang ngam leh ta nghal a, ka bêng hrep záwk dâwn che emaw ni le" a rawn tih chuan ka lo nui hak a, min va han bêng awm lo chiang!

"Duh tâwk teh u, eng nge thil awmzia hi? Nang pawh Saii, pangngai takin ṭawng teh khai, in in ni lovin kan in a ni tih hre reng la" ka pu chuan a rawn ti ve ta khauh mai.

"Ka fapa thi lek lekin a siam a, engtin nge pangngai taka ṭawng turin min la tih theih záwk!? Nang ni la i thei ang em? Min that duh hial záwk ang ka ring!" Thanngura nu thusawi duh dan chu ka ngaithei leh ta hauh lo.

"Thi lek lek paw'n ka siam lo, kan insual a, min hneh lo va, chu zawng chu a ni mai, i sawi uar lutuk!" ka ti ve leh ta kha kha a, chutih lâi tak chuan ka pa inbual zo chu a rawn chhuak chiah bawk.

"Ngawi chipcham rawh! I dawthei lutuk naupang!" kutzungchal mi hmuh meuh hian a rawn ti tuarh a, chutah zet zawng nî Vuli pawh a insum thei ta bîk lo.

"I zak lo hle mai nu Sai, ka pa awm ve reng lâia khatia ṭawng kha i zak miah na nge? Kan in chhûng ngeiah lehnghal!" nî Vuli chu ka melh zawk a, a thin a rim tih lah a chiang ropui bawk si!

Ka pa erawh a la ngawi reng a, inthak tur tih hriat tak hian pindanah a lut ta daih nghe nghe a, kan in chhûngah chuan nu Saii leh nî Vuli te pahnih inchhâng thawm chu a ri nuah nuah reng a, ka pu paw'n a khap ve ve a, mahse awmzia a awm eih lo thung.

"Haw tawh rawh le!" ka pa lam chu kan zavaiin kan hawi rual ṭhap a, thawmhnaw pangngai a lo inbel diam tawh bawk.

"Enga!?" nu Saii chuan a ti lèt hlar a, chutiang em em a zah loh chu ka ring lo hrim hrim!

Ka pa chu ngawi reng hian nu Saii lamah a phei a, a dar tawh tawnah chelhin kan in aṭang chuan a nawr chhuak titih a, mahse engtin mah a khawih nâ lo thung. Chutia ka pa meuhin veranda thleng a nawr chhuah tâkah chuan a haw ve mai dâwn emaw ka ti a, mahse a teuh lo nasa mai. Hmeichhia zâwk si chuan ka pa chu kutthlak a tum ta hial a, ka pa erawh a lo indang hman hlauh a, a lo indanna lamah nu Saii záwk chu a tlu ta thlawrh bawk.

"Ka rawn kal leh khawp ang, mi zaktheiloho!" ti vin hrakin nu Saii chu a haw tau nghawng nghawng a, ka pu chuan thil awmzia min záwt zui nghal a, dáwt tel miah lovin ka hrilh fai ta vek!

Ka pu bawk chuan ka pa a zàwt fiah ve leh thung a, mahse a beisei ang chhànna a hmu lo nge ni, a zàwt thui lo khawp mai. Khua a thim titih tawh a, zanriah chu kan ei zui nghal a, chaw ei erawh a va han tui duh lo tehreng em! A tua mah kan ṭawng mang lo a tih theih a, nî Vuli takngial pawh a ngâwi deuh ngal a, nuam lo ka ti ru veng veng bawk.

Chutia chaw kan ei lâi chuan kan in kawngka chu nâ zet hian a rawn inhawng ṭhawt a, Thanngura pa, pa Rochhuma hmêl kan hmu nghal zat a, a hnungah chuan nu Saii a lo ding ran bawk a, buaina an rawn siam leh dâwn tih chu ka hre chiang khawp mai.

"Eng vanga ka nupui hi kut lo thlak nge i nih Sangzual!? Ka bêng hriat ngeia ngaihdam i dil a nih loh chuan ka en liam hauh lo ang che!" pa Rochhuma chuan a rawn ti hmuk hmuk a, ka pa erawh a thusawi chu hria ang paw'n a awm lo.

"Engati nge maw buaina hrang hrang in rawn siam mai le, haw thuai teh u!" ding meuhin ka pu chuan a ti hluai a, a lungâwi lo hle tih pawh a hriat viau!

"Lo ngâwi rawh putar, i buaina a ni lo ve!" chutiang em ema aia upa zah lohna ṭawngkam chu ka la hre ngai lo.

"Enga!? Ka in chhûng a ni tih i hai elo?" tiin ka pu chuan a din chilh nghal ruak a, pa Rochhuma záwk chuan kut thawh hmâsain ka pu chu a vai thlu nghal chawrh a, nî Vuli chu a rawn ṭe chhuak nghal ṭhat bawk.

Dawhkan che deuh dawt avang chuan ka phu zawk a, tawlh hnung rawk rawk khawp hian ka pa chuan pa Rochhuma chu a rek chawt a, engtik lâi khan nge a ṭhutna aṭang a thawh pawh ka hre lo, mit khap kâr lêkin thil chu a thleng zung zung a ni ber.

Pa Rochhuma chuan ka pa chu a hneh lo nasa ngang mai a, hnek emaw nâ taka kutthlak erawh a la dawng lo hrim hrim a, mahse ka pa chuan che hlei thei lovin a nawr bet tlat thung. Pa Rochhuma záwk chu a ṭawng vin hle a, chet làk han tum ve leh ṭhin mah se ka pa chelhna ata chu a tal chhuak thei bawk si lo, pa Rochhuma tân chuan chutiang taka thangtlawma awm chu a tha nàtthlak ve khawp ang.

"Thla nghal rawh!" ti tuarhin nu Saii chuan ka pa chu a hnung lam aṭang cooker chhinin a rawn vaw pawp a, cooker chhin lû pawh a tla ri bawl bawl nghal a, a vaw nâ thawkhat tih chu hai rual a ni lo.

"Awi, in zak lo nupa lutuk!" nî Vuli chuan a ti nghal ṭhat a, a hlauthawng bawk si nen a aw chu ṭap aw te pawh a ang lek lek záwk!

Che chhuak phatin nu Saii chu ka tlawh pawp a, a tlu nghal chawrh a, lûhai tih hriat taka ka pa pai chawn chawn lâi pa Rochhuman a lo hnek siah siah lam chu pan phei lehnghalin ka va kuai vak a, mahse patling tha záwk na ná na chu hneh lo tak ka ni!

Ka lû ah rawn chelhin kan chaw eina dawhkan chu min tuahtîr zui pawp a, ka lû chu a hai nghal muai muai a, ka pu leh nî Vulin an rawn khawih ve tih pawh ka hre vek a, mahse ka tha a zawi titih vek tawh, ka che ṭha thei tawh lo a ni ber. Chutah ka petek deuh lawp a, pa Rochhuma bawk chuan ka bân chu rawn chelhin ṭhutthlenga bânah min tauhtîr leh chawrh a, nát namên lovin a nâ nghal vawn vawn a, ka bân chu a tliak ni maiin ka hria.

Ka hawi chhuah ruala ka hmuh hmâsak ber chu ka pa hmêl a ni a, ka ṭap nghal feih feih a, duh lo teh mah ila ka bân leh lû nâ ta lutuk chuan ṭap lo thei lovin min siam tlat a tin a ni! Rei pawh mi rawn buaipui lo hian a kal sawn leh daih a, thawm chu a ri buan buan a, patling ṭawng vin khur khur thawm pawh ka hre zing ta malh malh khawp mai.

Thawh tuma ka'n che tur te chu ka tho hlei thei miah lo va, ka lû leh bân a nâ ngawt ngawt a, ka lû ka'n khawih chiah phei chu ka kutah thisen a lo kâi nghal luai a, rilruah hlauhthawnna a rawn lut nghal zut zut bawk. Ṭhutthleng nghengin ka ṭhu awn duai a, kawngka bula ka pa thinrimin pa Rochhuma a lo hnek chilh sawk sawk lam chu ka hawi phei a, nî Vuli chuan min rawn buaipui ta vat bawk.

"Awi, ka pa, u Sangzual! Lo phei vat teh u! Lawmsanga hi a ṭha miah lo, hmanhmawh r'u!" tiin nî Vuli chu a au chel chul a, chutah amah bawk chuan

"Hmanhmawh r'u!" a ti vin leh tuarh a, ka pu chu a rawn thleng hmâsa záwk a, min pawm a tum lâi tak chuan ka pa a rawn thleng a, min pawm kang zui nghal lawp bawk.

Health sub-centre lam min panpui thuai thuai a, eng thu mah a sawi lo va, a mitmengah erawh a hlauthawng ve hle tih ka hmu thei thung. Eng ka hria nge ni, ka ṭah lah chu a chhuak tlat pek a, mittui tling pam hian ka en reng a, health worker te'n min buaipui zung zung lâi te chuan ka pa mawlh chu ka la en ngawt ngawt a, chutiang taka a hlauthawng hmêl chu ka la hmuh ngai loh vang ni berin ka hria.

Ka ban chu a lo tliak tak tak a, ka lû pawh a kak thuk ang reng hle a, police kovin ka pu chuan pa Rochhuma chu a mantîr nghal nghe nghe a, chutiang em ema buaina kan tawh zui chu rin ngaihna pawh ka hre lo. Hre láwk ni ngat ila chuan Thanngura min puhna kha ka ngawih liampui mai mai ang a, kan sir ka inhremtîr záwk ngei bawk ang.

Kan in chhûng kan han lut te chu a lo la hnawk rum rum hle a, ka nu chhûngte lamin kan chanchin a rawn hre ve chiah bawk nen ka putea te phei chu an thin a rim em em a, tharum thawh hial an duh a, mahse ka pa berin engmah buaina dang awmtîr a duh tawh loh thu a sawi avangin an insum hram hram a ni ber a, ka putea te mai ni lo ka nutei te chenin an tha a nâ khawp mai.

Kei lah chu ka dam lo zui leh ta zel a, ka bân ai mah chuan ka lûa hliam zâwk chu a nâ tulh tulhin ka hria. Zankhuain nî Vuli leh ka nutei te unauin min buaipui a, min riah chilh a, damdawi in pangngaia indah luh mai te chu an rêl nghe nghe a, mahse chu erawh ka taksa dinhmun an ngâichang leh phawt dâwn a, ka dam lo zual zel a nih chuan damdawi ina min awmpui ngei pawh ka ring.

Khua a rawn vâr a, ka lû leh bân chu a la nâ em em reng a, mahse ka dam lo tawh lo thung. Ka nutei te chuan khaw danga mi ruh hmet thiam min phone-sak a, ka lû ber erawh tih ngaihna vak a awm rih lo. A intuam vâr lûk a, a nâ lutuk tur chhawk nân tiin nâ chhawkna damdawi ka ei deuh tawp a, chutih rual chuan ka chhûngte min buaipuina zawng zawng avangin ka rilru erawh a hahdam ta khawp mai.

Chhunah chuan pa Rochhuma hmêl kan hmu hlawl a, police te'n an hruai kha a ni a, engtin nge a rawn chhuah leh nghal mai theih pawh ka hre lo. Ka rin loh deuhin ngaihdam dilna thu a chhakchhuak awl lo va, ka pu chuan ṭha takin a lo chhawn mai a, mahse ka pa erawh pa Rochhuma ngaihdam dilna chu engah mah a ngâi lo va, aw pawh a pawh lo hrim hrim a, pa Rochhuman ka dam lo min kan nâna pawisa a dah te chu a pe lèt lehnghal nghe nghe bawk.

Pa Rochhumate chhûngkua hi kan khuah chuan awm thei leh hausa páwl tak an ni a, amah hian sawrkâr hna a lo thawk kher bawk nen mi nâwlpui chung en an ni a, ka dam lo min kan nâna a pawisa dah pawh chu a tlêm lo viau a, mahse ka pa berin a dawng duh miau si lo va, tih ngaihna dang awm hek lo, rilru nuam lo zetin a haw leh ta ringawt!

Pa Rochhuma a haw hnu chuan ka puin ka pa chu a zilh zui nghal deuh hluk hluk a, pangngai taka awm tawh tur te paw'n a hrilh a, mahse ka pa chuan a zawm chuang pawhin ka ring lo. Thinrim reng ang hrim hian a ngawi ngul a, a che te reng reng chu ngaihbel loh theih pawh a ni lo.

Chawhnu lamah erawh thing lei tur an lo kal avangin tlêmin a thinrim hmêl pawh a zia ta deuh a, pafa e ti lo chuan kan la inbe leh lo hrim hrim bawk. Tlai a rawn a ni a, ka ṭhiante school bâng chuan min rawn tlawh kawi diah diah hlawm a, an zîngah chuan Thanngura pawh a tel ve nghe nghe a, mahse ka pa ka chhun ve na lam tak a nih vang nge ni, biak pawh ka be duh lo hrim hrim a, min rawn biak pawh chuan ka chhâng ṭha duh mang lo.

Ka bân ruh tliak avang ber chuan school ka kal thei lo ta char char a, khaw danga mi ruh hmet thiamin min rawn hmet tawh bawk nen tlêmin ka zia chho ve tial tial a, eng chen nge school kal thei lovin ka awm reng dâwn tih lam erawh ka hre lo khawp mai. Kan chhûngte hnen aṭangin ngaihsakna ka dawng awl lo va, chhun zan zawmin min rawn kantu an awm reng a, mahse ka rilrua lian ta ber chu ka pa a ni.

Mi ngaihtuah hmêl em em sia ka ṭhat leh ṭhat loh takngial pawh min la záwt lo hrim hrim chu ka rilru kap ru rengtu lian ber a ni a, ka bân ruh a tliah zan aṭang daih tawh khan chu zawhna chu min zawha min biak ka beisei ngar ngar kha a ni a, mahse kâr 2 dâwn a liam hnuah pawh eng ngaihsakna awkâ mah ka la dawng lo tluang zel a, chutiang em ema min ngaihsak lo leh min buaipui lo chu ka rilru a nâ tak zet bawk.

'Mipa ka ni alawm' tiin ka rilru ka tipaukhauh lui ṭhin a, rilru nâ lo anga awm pawh ka tum ve ngar ngar ṭhin, mahse a theih tak tak loh, ka rilru a nâ tho tho! 'Ka nu thihnaa ka inhnamhnawih avang khan min lo haw hle a nih dâwn hi a' tih bak ka rilruah a awm thei tawh lo va, mahni inthiam lohna leh inkhawngaihnain ka khat a, sawi chhuah chì ah pawh ka ngâi lo, keimah tih loh chuan an hriatthiam ve tak tak pawh ka ring lo.

School kal thei lo khawpa taksa nâ neiin ka awm tih hre reng chunga melh pawh min melh duh miah lo te hlei hlei chuan ka rilru a tinâ zual a, amah pawh ka haw tawh lo, ka hun tawn mêk záwk chu ka haw hluah hluah a, chuti fakaua min duh lotu pa ka nei kher kher chu vanduaiah ka inngâi hliah hliah a, engmah tih châkna ka nei lo a ni ber.

"I va ei tlêm ve? I chaw ei a tui na nge?" ka kham rualin ka pu chuan a rawn ti dap a, min ngaihtuah tih hi chu hai theih pawh a ni lo.

"Tui e" tih bakin ka chhâng lo va, tun lâi chu ka mood a fuh hlei thei lo a ni ber e!

"I ei tlêm lutuk, chaw pawh i ei bang ṭeuh tih ka hmu vek a nia, engati nge?" nî Vuli chuan a rawn ti zui ve leh zat a, zep nei hauh lo hian

"Ka ei pei tawh rih lo" ka ti ta nge nge a, pâwn lamah ka chhuak zui ta daih bawk.

Thla chu a lo èng riai a, thlanmûal lam chu ka pan ding nghal chat a, ka nu thlan awmna ka thlen hnu chuan hahdam zet hian ka ṭhu der der a, a taka ka la hmuh ngai reng reng loh, a hmel pawh thlalak chauha ka la hmuh ka nu chu ka ngâi thar em em a, ka ṭah a rawn chhuak ringawt bawk a nih chu!

Nu enkawlna hnuaia seilen loh hrehawmzia leh patlang tur tam bîkzia hre reng chungin hun kal tawh ka ngaihtuah kir a, ka pa duh lo fa ka ni tih ka ngaihtuah chhuak chiah phei chu ka biangah mittui a rawn lûm thla nghal pap a, hruk pawh ka tum chuang lo. Ka hringnun lo hman tawh dan zawng zawngte chu ka mitthlaah an rawn lang zut zut a, vanduai bîk ngawih ngawihah ka inngâi lo thei lo a ni.

Zan rei tak thleng thlanmûalah chuan ka awm ta reng a, ka pu leh nî Vuli paw'n min zawn tawh ngei ka ring, buai pawh an buai ru viau ang, ka pa erawh awm lo mah ila pawi a ti tawp náng, a tân te chuan eng ka ni hleinem, ka awm lo chu a lawm viau záwk maithei a ni. Ni e, a lawm khawp ang, ka hriat sual ka ring lo.

Thawm chu a reh duk a, rannung hram ri a ring tial tial a, zan pawh a tlai thawkhat tawh viau tih ka hria, mahse ina haw ka la peih hlawl lo a ni. Chu bakah chutia ka nu thlan bula ṭhut der der chu nuam ka ti a, hahdamthlak ka ti záwk bawk a, hlimna pianpui ve lo ang maia ka pa hmêl rum el rul reng hmuh ai chuan ka hun hman mêk dan chu nuam ka ti daih záwk!

Thil chi hrang hrang ngaihtuahin hun ka hmangral a ni ber a, chutia ka ṭhut ngawih veng veng lâi chuan ka awmna lam hnaih zâwng hian thawm a rawn ri sut sut a, rei lovah ka pa hmêl ngei mai chu ka hmu nghal thuai bawk.

"Eng vanga i kalna tur sawi lo nge i nih?" thinrim tih hai rual loh hian a ti khur khur a, ka bân nâ lo lamah chuan a hmer chat a, dimna tel miah lovin min kai kal nghal dawr dawr a ni ber.

"Awi, khaw'nge a lo awm a u Sangzual? Engati nge i kalna tur i sawi loh Lawmsang, min timangang hman asin?" in chhûng kan luh rualin nî Vuli chuan a lo ti chul a, ka pu pawh kei min hmu chiah chu a thaw deuh huaiin ka hria.

"Tuna chinah i kalna tur sawi theihnghilh tawh suh ang che?" ka pa chu ka melh chho kal a, ka en lui ngar ngar bawk.

"Ka hrilhna chhan tur che ka hre lo" nêm fahran lova ka ti chiah chu

"Enga!?" a rawn ti bul nghal hmuk a, kei lah insum thei tawh bîk hek lo.

"I beng a ngawng lo va, ka thusawi zawh chiah pawh kha hriat loh tur a awm lo" ka ti leh salh salh a, ka rilru, thinrimnaa khat chu ka khapdai zo lo a ni ber.

"LAWMSANG!" ring ni hauh si lo hian ka pa aw chu a vin hle a, nî Vuli chuan

"Khatiang khan i pa chhâng suh Lawmsang" a lo ti ve nghal vat a, ngeiawm zetin ka nui chhuak hak ringawt!

"A hmêl pawh hi ka hmu reng peih lo!" ti leh halhin ka inher zui zat a, mahse ka va han kal thui hman lo chiang kher em!

"Eng nge? Ka mu duh tawh a nia, min thlah teh!" ka ti khar khar a, ka pa hmêl chu thinrimna hlirin a khat tawh a ni ber.

"Min thlah vat teh!" tia ka kut thin thlak ka tum chu thei lo chiang tak ka ni!

"Ngawi hmak rawh!" thip zet hian min melh chhuk run a, a thusawi chu hria ang paw'n ka awm duh lo.

"Min thlah rawh ka ti a ni lo'm ni?" ka ti zo chiah chu

"NGAWI RAWH!" a rawn ti vin leh nghal hrawk a, ka mipa rilru a rawn chhuak zui zat bawk.

"Min thlah nghal rawh, a sik pawh min si tawh suh, ka tân hian engmah i ni lo, chuvangin min ngaihtuah reng reng suh, ka mamawh lo che!" ti pang pangin ka bân a vawnna ata chu tal chhuah ka tum leh ngat a, a thlah mai loh avang chuan ka seh ta hial a, mahse min thing phar hneh khawp mai.

"Min thlah rawh!" thinrim zeta ka tih laklawh lâi chuan

"LALLAWMSANG!" a rawn ti vin hrawk a, min ben a tum tih hriat taka a kut a lek kan vawk avang chuan hlauhnaa khatin ka lo maimitchhîng chawih a, nî Vuli lo ṭe chhuak ṭhat ri te hlei hlei chuan min bêng ngei dâwna hriatna min neihtîr zual hle bawk.

Ka meng chhuak chiah chu thinrim zeta mi en reng chung hian kut a lo la lek kang vû a, za lo taka nui zeuhin a kut chu ka chelh a, ka biangah ka dawmtîr zui zat a, chutiang em ema ka ṭah a chhuah chu ka nunah a la awm ngai lo.

"Min bêng rawh, i duh tâwkin min bêng rawh" ṭap titiha ka tih chuan a kut chu a là thla vat a, thaw chhuak hakin a kut bawk chu ka chelh a, ka biangah bawk chuan ka dawmtîr leh ngat a, ka chet dan chu mak a ti ve hle te pawh a ni ang, thinrim hmêl rèng a pu tawh lo hrim hrim!

"Min bêng rawh, a nâ thei ang berin min bêng mah la pawi ka ti lo" ka ti chhuak ṭiau a, duh  lo teh mah ila ka mittui chu a sûr hian a sûr zawih zawih a, thawm pawh a reh ṭha ṭhiap ṭhiap khawp mai.

"Awm lo ta pawh ni ila i tân chuan a nuam daih záwk ang ka ring, ka hnawksak êm mai" ti leh halhin ka thaw chhuak ham ham a, mahni inkhawngaihna hlirin ka khat tawh a ni ber.

"Eng atân mah min ti lo tih hre reng chunga i laka beisei ka lo nei leh ṭhin hi ka tihsual lian ber a ni" ti sapin ka mittui chu ka hru thuak thuak a, ka dar ka chhin zui àk bawk.

"Dik tak chuan i mi ngaihsaknate hi ka phut ru ve ṭhin alawm, mahse nang chu ka awm ve tih pawh hre lo ang maiin i awm a, hmân aṭang tawh, hrethiam lo ka ni bîk lo asin" tia chawl deuh dat hian

"Ka nu kha kei min hrin chhuah avanga thi a ni tih pawh ka hria alawm, chuvanga min haw em em chu i ni tih nen lam" ka tih zawm leh zat a, a mitmeng chu a danglam nghal zawk nghe nghe!

"Lawmsang?" nî Vuli chuan a rawn ti thuai a, ka pu chenin chutiang zawng zawng ka lo hre vek chu mak an ti a ni ber.

"I fapa ka ni tak tak em? Ka ni tak tak lo ti raw?" tiin ka pa chu ka en reng a, ka mittui chuan ka khaw hmuh a tifiah lo hle bawk.

"Ni lo, ka ni tak tak lo ang ka ring" ti leh hapin ka ṭap chhuak ta hawk a, inseh ruh ngar ngarin ka insum zui leh nghal vat thung.

Rilru nâ em em chungin pindan lam chu ka pan chhat chhat a, thih daih ka châk tak zet! Khumah chuan ka mu kawm ngut a, rizaiin ka inkhuh hlun a, nî Vuli rawn mut lâi te chuan muhil tawh ang maiin ka awm a, mahse ka muhil reng reng si lo, ri lovin ka ṭap ru char char a ni mah záwk!

Ka lo ṭap muhil tlang daih chu niin, ka harh meuh chuan nî a lo chhuak éng iar tawh a, thawh erawh ka tho chhuak nghal mai lo thung. Khumah chuan harh vek tawh siin ka mu meng reng a, nizana thil thlen dan zawng zawng kha ka ngaihtuah lét a, ka rilru a rawn nâ thar leh nghe nghe a, ngaihtuah lèt thui duh lovin ka tho ta daih a, mahse ka mi hmuh thut avang chuan phu nasa tak ka ni!

"Ka inbuaipui thei" khum aṭanga chhuk thlak ka tum lâia ka dar a rawn chelh rual chuan ka lo ti nghal hmak a, min en ngawt ngawt tih chu ka hre ru reng bawk.

"Nizan avang khan ka tihpalh" awkâ dam ang reng tak hian a ti sup a, eng rilru pûa chutiang thu chu sawi nge a nih ka hre hauh lo.

"A pawi lo, bén hun min la nei em em ang" tih baka chhâng lovin ka chhuahsan ta daih a, ni dang chu ni se min biak dan dam deuh thlup avang chuan mak ka ti ngawt ang ka ring.

Tukṭhuan kan han ei te chu ka pu tih loh ṭawng an awm mang lo va, ka kham thuai nghe nghe a, school tal kal thei tawh ila chu a zia deuh tur a nia, thil pawh ziak ṭha hlei thei lovin ka bân a la nâ miau bawk si a, tun dinhmunah chuan tih ngaihna a vâng rih khawp mai.

Nilêngin inah ka awm leh tawp a, dam tawh ila ka tihzia chu pui tak a ni! Tlai lamah chuan kan school principal leh zirtirtute'n min rawn kan kawi a, dam ṭha zel tur te paw'n min duhsak viau a, ka pu awm lo se chu lo dawngsawngtu an neih pawh ka ring lo. Nî Vuli insuk seng lâi tak a ni a, ka pa ni se tukṭhuan ei kham aṭang tawh khan ka la hmu leh lo hrim hrim a, a rawn thim haw leh ngei pawh ka ring.

Kan principal te an haw ta maw tihah ka pu chuan an chanchin min záwt zui lûam a, ka hriat ang ang chu ka hrilh ve mai bawk. Ka rilru chhûngril takah erawh inthiam loh rukna a awm tlat a, nizana ka awm dan vel avang khan ka pa mai ni lo, ka pu leh nî Vuli te lakah chuan ka inthiam lo hnuhnawh a ni ber.

A nih pawh a ni réng a, nizana ka chet dan kha chu a mâwi lo ve êm alawm, tûmah kha zah ka nei lo va, ka pa meuh pawh rilru nât luat avangin ka zah zo tawh lo hrim hrim kha a ni a, rilru a fim tâk chinah erawh a lo mawl thlak khawp mai. Chutih rual chuan a laka beisei neih vak ka tum tawh lo tak tak thung a, a tua tea pawh kan nih vek ka ring, min ngaina lo tu te bula ṭhat chhuah te, beisei neih reng te hi chu mahni intihnátna mai mai a ni.

Khua a rawn thim a, zan lam chu eng ti lovin khumah ka bawk zâl mai mai a, lehkha han chhiar thuak thuak te pawh ka nei a, mahse ka peih rei tak tak lo. Ka nutei te ho an rawn lêng leh zel bawk nen an bulah chuan ka awm ve ta reng a, mahse rei awm lovin kawt lamah ka tei chhuak daih a, ka nu thlan awmna lam bawk chu ka pan leh ta nge nge bawk.

Ka nu thlan ngheng chuan ka ṭhu der der a, ka mit ka chhîng vang vang a, ngaihtuah ding bîk ka nei pawh a ni lo, chutia fianriala awm veng veng chu nuam ka ti a ni ber. Thawm ri khep ka hriat rual chuan ka ṭhu ngil nghal zawt a, thawm awmna lam ka han hawi chu ka pa a ni tih ka hre nghal a, a lo kal chhan erawh ka hre lo nasa mai.

"La ṭhu rih teh" tiin thawh ka tum chu ka darah a rawn chelh a, ka ṭhu ṭha ve leh mai bawk.

"Eng nge i bân chu a an tawh?" dam ang reng tak hian a rawn ti leh a, a hmêl chu hlim deuh dup mah se min en tih ka hre thei thung.

"Min chhâng dâwn lo em ni?" amah bawk chu a rawn ṭawng zawm leh nghal zat a, chhàn pawh tum lo ang hrima ka ngawih reng vang a ni pakhat!

"A nâ em em tawh lo" ka ti liam puat a, han chhán chîam dan tur ka hre lo tlat a tin a ni!

"Khawi maw......" tih leh ka bân nâ lam chu rawn chelh a rual a, eng vanga mi dang daih anga awm chu nge a nih ka hrethiam lo kher mai.

"A ngâi lo" tiin a kut chu ka lo nawr sawn nghal vat a, mahse a rawn chelh leh ta tho.

"Ka tinâ dâwn hleinem" ti supin ka bân incher khawng bûr chu a en thlithlai dan dan a, ka lo melh ngawt ngawt ringawt!

"Dim hle rawh" a rawn tih leh chuan

"Engati nge hetiang hian i awm thut? A hmâ ang khan awm leh záwk rawh, nizana thil ka sawi ṭeuh vang kha em ni? Ka insum hman lovin ka sawi ve mai mai a nih kha, engah mah ngâi suh" ka lo ti zui nghal malh malh a, min pawh ang ziazânga a awm der vel kher chu ka ngaitheih zâwng a ni hauh lo.

"I ṭawng duh ve par par ngawt mai, i nu ang chiah i ni" tiin a nui thum dut a, ka mak ti lutuk chu ka en nghal hau nghe nghe!

Hmân aṭang tawh kan pahnih chauha kan awm dun reng rengin a nui ngai lo tlat a tin a ni!

"Khatia i nuin min han kalsan ta mai kha ka tûar em em a" rawn ti lehin a chawl dat a, van lam hawiin a thaw chhuak zui ham ham bawk.

"Ka haw hluah hluah che a, i pian tirh chuan hmuh pawh ka hmu duh lo hial che asin" dáwt a sawi lo tih chiang takin ka hre tlang vek bawk nen ka thinlung chhûng chu a nâ thip nghal vawng vawng!

"Mahse......" a tih laklawh lâi chuan

"Engati nge hetiang thu hi ka bulah i sawi? Ka hlawhtlin huna ka chawm loh che i hlauh vang em ni? Lungngâi suh, kei chu nangmah ang ka ni ve dâwn lo, hre tawp rawh, nangmah ang hi nih ka duh ngai bawk lo, ka chawm em em ang che" ka lo ti salh salh a, min rawn en chiang ngang ngang nghal hle bawk.

"A chhan chu ka pa i ni miau a, i lak aṭang hian ngaihsakna te, hmangaihna te dawng ngai lo mah ila nakinah chuan ka mawhphurhna lian ber i la ni dâwn tho tho tih ka hre chiang tawh a, nangmah anga mihring hmangaihna nei reng reng lo nih ka tum lo bur" ka tih zawm leh hmiah hmiah a, ka hun lo tawn tawh zozâi avanga ka lung a àwi loh tho rualin ka thin erawh a rim em em hran lo.

"Keimah ang hi chu ni lo ang che" ti hniam dutin a ke chu a thluang duai a, chuti maia haw a la tum loh hmèl khawp mai.

"Khawvela pa ṭha lo ber ka ni tih i thinlungah khan i vawng reng dâwn a nia" amah bawk chuan a rawn ti leh a, ka thin a sat phat ka rin tehreng nen thinrim ai mah chuan a thusawi dan vel chu mak ka ti ru ang reng viau záwk!

"Hringnun, ho têa ral leh mai tur hi a hau tak em em lawi a, thui tak tihsual tawh hnua inchhir leh ai chuan eng thil pawi mah ti ve ngai suh ang che" kan ngawih dun vang vang hnu chuan a ti dap dap a, min bia ang deuhin lang mah se a rilrua awm a rawn sawi chhuak vel mai mai ni berin ka hria.

"Min ngaihtuah suh, kei chu danglam alawm, i ngaihsakna tel lo pawhin hei leh chen hi ka thleng thei a, ka tumah ka chiang a, ka la hlawhtling ngei bawk ang" ka ti charh charh a, mi pawh en chuang lo hian a bu nghut nghut a, thinrim awkâa min la be miah lo te chu mak ka ti tulh tulh!

"I danglam tih hi chu ka hriatna a rei tawh" ti supin van lam chu a thlir vung vung a, engmah kan sawi zui ta lo.

Kan haw meuh chuan dâr 11 a lo ri thuak tawh a, zunram thiar leh tê têin ka mu zui nghal daih nghe nghe bawk. Chutah ka mumangah lah chuan ka pa chu ka hmu nasa em em leh ta nghal a, eng nge a chhan pawh ka hre bîk lo. Ka mu ka thawh hnu thleng paw'n ka mumang chu chiang takin ka la hre vek thei a, ka mitthlaah a lang zut zut reng a ni záwk mah ang chu!

Hun a liam zel a, ka bân nâ pawh a dam ve tial tial a, a thlaa thla meuh han inenkawl tâkah chuan school pawh ka kal ve leh thei ta nge nge a, ka kal loh chhûnga an lo zir zawng zawng erawh ka zir thar vek a ngaih phah a, mahse ka huphurh lem lo. A chhan chu ka rilru a chak ve pangngai a, ka zir tam em em ngai lo nâin a tiṭha ber pâwl ka ni ve ziah a, Pathian malsawmna ka dawn vangte pawh a ni ang.

Sik leh sa a inthlak danglam a, kâr lovah thlasik kan chûangkâi ta der mai. Chutiang zelin ka bân pawh dam var chu la ni chiah lo mah se a dam ṭha pangngai tawh em em a, rit chàwi nân ka la hmang ṭha ngam chiah lo tih chauh a ni tawh a, dam ang tluk chu a ni tawh tho mai.

Kum thara Matric exam tur ka nih avangin ka zir ngawrh ve em em a, ka thiam theih loh vang lam ni lovin result ṭha tak ka nei lo ang tih ka hlauh vang a ni záwk mah a, ka thiam tawh sa pawh ka ennawn nitin reng a, zir tam nà nâ ná chuan thiam hnem a lo awl khawp mai. Tin, kan hmâ lawkah krismas hunpui kan hmâchhawn dâwn a, krismas lâiin lehkha zir a har dâwn tih ka hre láwk vek a, chuvanga bei ngawrh em em pawh chu ka ni pakhat bawk.

"Pu......?" tiin kan in chhûng ka lut chu ka au lang lâng a, thawm a reh ṭhuap a, chutah keimah bawk chuan

"Nî.......?" ka ti leh nghal zat a, min chhângtu an la awm lo cheu a, an chhuak lawk a nih ka ring ve ta tawp!

"Lawmsang?" pindana ka inthlak lâi chuan kan kawm chhak nu u Thantei aw ang deuh ka hria a, ka va chhuak chu amah a lo ni ngei a, pangngai takin ka lo chhawn ve nghal mai bawk.

"Enge ni ta u Thante?" kekawr ha ṭha paha ka tih chuan

"I pa a accident kha i hria em?" a rawn ti daih a nih chu!

"Maw? Hre nàng? Engtikah nge a accident?" ka ti nghal zung zung a, mak ka ti khawp mai.

"A hnathawk rawn haw kha truck brake fail-in a hnawl palh a, school i kal daih sia, engmah i hriat ka la ring si lo va, ka lo hrilh tawp che" a rawn ti ve ta zar zar a, ka rilruah chuan hlauhthawnna ai mahin mak tihna a la lian záwk tho tho!

"A nih khaw'nge ka pa chu a awm?" ka ti nghal vat a, ani pawh chuan

"Damdawi in lamah an phur phei tawh, i pu leh i nîte nen, an kalna pawh a la rei lutuk lo, nichin deuh lawk khan an kal" a lo ti ṭha ve leh nghal mai bawk.

"Kan in hi min lo ngaihvensak mai u Thante" tih leh in aṭanga tlan chhuah ka rual a, ka nutei te in lamah ka tlan ding nghal par par a, hah pawh a sawi theih loh!

Ka nutei te in ka thlen rual rual chuan ka pa'n accident a tawh thu leh damdawi ina kal ka duh thu ka sawi nghal zung zung a, ka pa accident tawh chungchang la hre miah lo tih hriat tak hian mak an lo ti hlawm hle a, zawhna dang pawh kan inzàwt ṭha hman meuh lo. Ka putea nen bike-in damdawi in lam kan pan nghal thuai thuai a, ka pute a be pawp nghal bawk a, kan tlan muang hran lo va, kan thlen phei thuai pawh ka ring.

Beisei ang ngeiin kan thleng phei har lo hle a, damdawi inah chuan ka pu leh nî Vuli te pahnih chu ka hmu nghal a, ka mak ti lutuk pawh a zia ta deuh a, mahse ka rilru chu hlauhthawnna hlirin a khat tawh thung. Nî Vuli nen kan ṭhu dun a, thil thlen dan min hrilh melh melh a, ka pa chu vanduaina táwkah pawh a vanduai tak zet tih ka hrethiam nghal mai bawk.

Kâr lovah ka nutei te pawh an rawn thleng phei sap sap a, ka awm hrang ta daih a, ka pa mawlh chuan ka rilru a tibuai a ni. A tira mak ka tih em em chhan pawh kha accident táwk thei lo turah ka lo ngâi hmiah a, accident táwk tur khan rinna ka nei lo hrim hrim a ni ber.

Nî Vuli kâ aṭanga a lû ah hliam nâ ang reng tak a nei tih ka hriat tirh phei kha chuan ka hlauthawng zual em em a, a chhan chu a fapa hi min hriat tawh lo ka hlau a ni. Ni lo, thil dang zawng zawng ai chuan min thihsan ang tih ka hlau ber, ka hlau tak zet!

Nurse pakhat ka lam pana lo kal phei chu zah pawh dâwn lovin zawhna ka lo zàwt tawp a, ani lah chuan ka pa chanchin reng a lo hre hauh lo lehnghal a, mahse a duty pui te min zawhsak ta hlauh a, doctor te'n ka pa an buaipui mêk thu leh a lû tih lova hliam a neih em em loh thu min hrilh hnu chuan ka thaw deuh huai a, ka hlauhthawnna erawh a la reh famkim lo nasa mai.

Ka pute bulah phei lehin ka awm ta hle hle a, puitlingho titi chu ka lo ngaithla a ni deuh ber a, chutih lâi tak chuan doctor a rawn chhuak a, ka pa chanchin an lo zàwt nghal sap sap a, doctor pawh chuan an buaipui zawh tawh thu leh a harh pangngai tawh thu a sawi lûam a, kan hmu duh a nih paw'n chim huai huai rih lo turin min chah tel hram thung.

Ka pa hmêl ka'n hmu chiah chu khawngaihnain ka khat nghal a, eng nge a chhan pawh ka hre lo, chutiang taka hliam nâ tuara a awm hmêl chu ka hmu hlei thei tlat lo. Min rawn en zawk a, rei erawh a ni lo va, a lû mawlh chu a nâ dâwn tih ka chiang a ni. Kei pawh khan ka lû ah hliam ka nei tawh a, a nâtzia leh chhûngril lama a tur nasat ṭhinzia ka tawng vek tawh a, chuvanga a lû chu nàt ring em em pawh ka ni!

Damdawi in riak lova haw nghal a duh tlat avangin kan khaw lamah kan haw ta nge nge a, in kan thlen hnu pawh chuan kan la inbe lo tluang zel a, buaipuitu a neih deuh reng vang a ni pakhat a, zan rei thlengin ka be lo ta law law a, mahse ka muhil thei miah lo thung.

Khum aṭanga tho chhuakin ka pa muhil hmêl chu ka en reng a, ka pa lakah chuan ka sual mah mah em le te ka ti ta hial a, fapa sual tak leh luhlul tak ang paw'n min ngâi mah se dem thei ka ni lo, min ngaihsak loh ang bawkin ka ngaihsak ngai bîk reng reng hleinem!

Tukverh bulah chuan ka ding ngawi reng a, varṭian a ni der tawh a, ka muhil thei lo laklawh bawk nen mut chu ka tum buai duh ta lo law law záwk a ni. Ka rilruah thil chi hrang hrang a rawn lut zut zut a, zirlai lam pawh ka ngaihtuah thei rih lo a ni ber e!

"I mu na nge?" aw lo chhuahna lam ka hawi phei rual chuan ka pa hmêl ka hmu nghal a, ka din dan chu ka siam ṭha vat bawk.

"Eng lo.....ka muhil thei lo va" ka ti pangngai ve mai a, rawn kal phei chhut chhutin ka bulah chuan a ding ngawi ngul a, ka en chho zeuh nghe nghe!

"Eng nge i lû chu a an?" ka ti ta nge nge a, pafa inbia pawh kan ang lo, inhmêlhriat satliah inbia kan ang ka ti mah záwk!

"A la nâ....." zep nei hauh lova a rawn tih chuan ka lo nui ri hak a, ka nuih a zat tak tak vang a ni pakhat!

"Eng nge?" a rawn ti leh nghal vut a, kei pawh chuan

"Eng ni lo ve, a la nâ dâwn tih ka hria alawm, mahse ka zia tawh i tih ve ka lo ring deuh a, chuvang mai mai maw le" ka ti duah a, ani erawh a hnâr a lo tum dut thung.

"In exam a hnai tawh a, ṭha deuhin zir ang che" a rawn tih zawm daih a, chhàn pawh ka chhâng lo.

"Keimah avanga i tih chhiat ka duh lo tih hria la, awm ve ang paw'n min ngâi suh!" amah bawk chuan a rawn ti leh nghut a, a awm dan chu ka sawi thiam chiah lo, ka laka inthlahrung ngawih ngawih a ang ka ti ber!

"I bân pawh hi la dim hle rawh" ti leh supin min rawn en a, ka lo en lèt lâi tak a ni bawk a, kan inen chiang ngàng mai.

Inbe tawh lovin ka kal sawn ta daih a, nî pawh rei lovah a rawn chhuak thuai a, thingpui tur tui ka chhûang zui nghal zat a, ka pa erawh a ngaihtuah ding hle te pawh a ni ang, pâwn lam hawiin a dinna ngaiah a la ding reng thung. Nî Vuli leh ka pu rawn tho chuan kan pafaa kan lo awm ve teh mial chu mak an tih hmél hle a, min en tawn deuh sek nghe nghe!

Chhun lam chu school-ah hun kan hmangral leh ṭhak a, kum thar maia exam tur kan ni bawk nen lehkha kan zir ngawrh tlauh tlauh hlawm hle a, kan zirtirtute paw'n ka lakah beiseina an nei tih ka hre ran a, an beiseina tihhlawhchham ka tum lo bur bawk.

"Ka theih ka ring tawh lo, a rilru a lian êm mai" ka pa aw thum bul bul ri ka hriat rual chuan ka ke pen lâi ka tawp chat a, thawm neih chhunzawm pawh ka tum lo a ni ber.

"I fapa alawm a nih, eng nge i theih loh ang?" nî Vuli aw ka hre zui ve leh zat a, eng thu nge an sawi ka hrethiam lo kher mai.

"Ni lo, a harsa tawh ang, a chhan chu a thinlungah huatna bak tuh ka nei hleinem" ka pa chuan a ti hniam ruih a, an thil sawi lâi mêkah chuan ka tel ve tih ka hre chiang ta viau bawk.

"I tum ve ang chû......? Tum hmâ hauha beidawn nghal ringawt te chu a!? A thu hrimin a tir tê aṭanga i tihsual a ni a, keini siam ṭhat theih pawh a ni lo, in pafa inkâr a nih avangin nang talin hmâ i làk vat loh chuan a haw kumkhua záwk ngei ang che" nî Vuli chuan a ti leh malh malh a, hre zui duh tawh lovin veranda lamah ka kal phei ṭhem ṭhem a, school bâng haw thleng chiah ang hian thawm ka nei lut ṭha leh a, nî Vuli hmêl pawh ka hmu nghal thuai nghe nghe!

Ka pa ve thung chu ka haw tawh tih a hriat aṭang khan a ṭawng mang lo a tih theih a, pindana ka inthlak lâi te chuan kan inbe lo hrim hrim a, an thusawi zawng zawng kha hre lo angin ka awm lui miah miah a ni ber! Chutih rual chuan ka laka a rilru puthmang a lo danglam ta hle a ni tih ka hriat chian phah sawt a, eng he hu ah erawh ka ngâi hran lo.

Hun a inher danglam a, krismas kan chûangkâi der a, hunpui vuak vet chuan a tua te pawh min chiahpiah hneh em em a, chutiang zelin ka pa pawh a dam ve tial tial a, hun han hman dun hi kan neih leh zauh zauh ṭhin a, mahse rei a ni ngai lo va, ka pu leh nî Vuli awm loh lâi tak a ni ziah bawk.

Kum tina kan tih ṭhin angin chhûngkaw thlalakna hun kan nei leh thlap a, ka pa nen pawh thla kan là dun ve leh ngei a, kum dang ai chuan min din hnaih deuh hret te'n ka hre nghe nghe a, mahse chu erawh a dik em ka hre bîk lo, ka ngaihbel te pawh a ni maithei!

Krismas boruak a zo va, kan exam hun a hnai nghal kuar a, lehkha pawh ka zir nasa leh tawh khawp mai. Lehkha ka zir apiangin ka pa chuan ka chawlh huna ei tur min lo siamsak ziah bawk a, nî Vuli tihtîr ti dâwn ila a nih ka ring chiah bawk si lo, a chhan chu ka pa hian chuti ngawtin nî Vuli thu a awih zung zung dâwn lo tih ka chiang; kei min ngaihsak tur lek phei chuan!

Zan khat chu a khua a rawn sik thut a, ka lehkha zir lâi a ni nghe nghe a, kan pahnih chiahin kan awm bawk nen ka mangan hman hle a, a phone chu làin nî Vuli leh ka pu ka phone nghal thuai thuai a, ka pa awm nuam lo hmêl mawlh chuan ka rilru a tibuai vek a, han buaipui vak dan lah ka hre bawk si lo.

"Engtin nge i awm?" ka ti hluai a, men pawh meng peih mang lo hian

"Damdawi kha lo là leh mai teh" a rawn ti ṭial hniam ruih a, mahse ka là duh lawk lo.

"I ei zawh chiah kha......" tiin a pang chu ka tawk kual den den a, a sa ṭha vur vur khawp mai.

"Va lá rawh le, ka lo ei leh ang, tui lo là tel bawk la" fiah lutuk lovin a rawn ti leh sup sup a, ka hnial duh ta bîk lo.

Nî Vuli a rawn haw chiah chu ka pa awm dan ka lo hrilh zung zung a, damdawi min lei belhtîr nghal thuai thuai a, ka pu pawh a rawn thleng har lo khawp mai. Zan a rei telh telh a, ka mut chu a chhuak lo tulh tulh a, mi dang erawh an muhil vek tawh thung. Ka pa phei chu a damdawi eiin a chhawk a, a muthilhna a rei tawh mai.

Thawm dim ang reng tak hian ka tho chhuak ṭhem ṭhem a, ka pa khum bula savun ṭhutthlengah chuan ka ṭhu ngawi reng a, ka pa hmêl chu ngunthluk fê hian ka thlir dauh dauh a, tun hnaia ka laka a awm dan zawng zawng kha ka ngaihtuah chhuak lo thei lo va, eng vanga ka chunga ṭhat chhuah tum ang hrima a awm ta chu nge a nih ka la hre lo tluang zel bawk.

Thawm ri sut chuan min tiharh hlawl a, ka lo muhil tlang daih chu niin, hawi chhuah ka tum lâi tak chuan ka sam chu tu emaw ni hian a rawn chûl den den a, chu ka sam chûltu chu tu dang ni lovin ka pa ngei a ni tih ka hre chiang viau bawk. Ka mut ngai ngai chuan ka mu meng kur a, ka pa erawhin ka harh tawh tih a hre lo a nih ka ring.

Chutiang chuan eng emaw chen chu kan awm a, mahse ka insum thei ta ngang lo. Harh deuh chiah ang maiin ka lû chu ka chet hret hret a, ani pawh chuan a kut a lá sawn nghal vat a, ka sam a chûl tih chu ka hriat a hlau te pawh a ni mahnà!

"I tho nuam em?" chutiang zawhna chu zawh pawh ka tum em em lo, ka lei ka thunun hmâin ka sawi chhuak hman a ni ber e!

"Immm......i muhil thei lo leh pek em ni?" a rawn tih chuan ka lo bu nghauh a, sawi tur a vâng zui nghal hle.

Chumi nî aṭang vek chuan inbe em em si lo, inbe deuh tho si hian kan awm leh ta ngat ngat a, ani pawh a dam lo tawh lo va, dam chiang var erawh a la ni bîk chuang lo. Ka hun hman dan chu school kal leh ina lehkha zir a ni deuh tawp a, Matric exam pawh a hnai thawkhat tawh khawp mai.

Ni khat chu kan in kawta ka pa bike inhûngah chuan ka chûang chhin vel mai mai a, khalh pawh ka khalh thiam chuang lo. Chutah tum loh deuhin ka titlu palh leh ta nghal a, thil dang zawng ai ka pa'n min rawn hmu ang tih mawlh chu ka hlau ber a, a rang a rangin ka tung tho vat a, mahse a side glass a lo chhe hman hram chu niin, ka va han hrilh inthlahrung mai mai tak!

"Eng lo.....ih.....i bike ka titlu palh a, chuan.....eng lo.....a side glass a bung daih" tiin ka pa bulah chuan tim dai hian ka sawi a, engmah sawi lovin in aṭang chuan a chhuak vut a, ka zui ve nghal thuai bawk.

"I khalh thiam em?" mi pawh en chuang lo hian a rawn ti dut a, keimah min be lo emaw ka ti hman hial!

"Aih.....teuh lo mai, ka khalh ngai lo hrim hrim" ka ti deuh phawlh phawlh a, min hauh ka rin tehreng nen min hau miah lo chu mak ka ti ru ang reng viau!

"I zir duh em?" a rawn ti leh daih chuan mawl hmèl zet hian ka lo en hû ringawt!

"Chabi ka zu là lawk ang e" ti supin in chhûnga a lut zui nghal a, a rawn chhuah hnu chuan

"Chûang rawh le" ti leh nghal zatin bike chu a tirum vut vut a, mak ka ti tih ka hmêl leh ka mitmeng aṭangin a hriatthiam vek ka ring.

"Ka khalh thiam hleinem" ka ti dek dek chu

"Ka zirtir dâwn che alawm" a lo ti nghal dut a, chutah a seat hmâ záwka chûang tur chuan min la ti zui a, ngampa lo zetin ka chûang ve ta ringawt!

Insi chetin bike-ah chuan kan chûang dun a, ka hnung lam aṭang khalh dan tur min hrilh deuh reng a, ka tlu dâwna a hriat chuan amah záwkin a rawn khalh nghal vat zel a, ka vawi khat khalhna a ni bawk nen khalh thiam lo tak ka ni! Chutah mi ka phur nghal ringawt zui a, ka mi phur lah chu a rit ropui bawk si, ngaih ang ngawt chuan a lo awlsam zawk zawk lo khawp mai.

Khaw pâwn lamah kan tlan chho zel a, ka la khalh hlei thei lo tluang zel a, balance ber chu har ka ti em em a, ka hnung lam aṭang min rawn khalhsak leh zauh zauh ṭhin lo phei se chu kan tlu ngun ngawt ang ka ring. Thing buk hnuai daihlimah chuan min dinpui ta nge nge a, min zirtir ning tawh te pawh a ni maithei a ni.

"I tâna pa ṭha ni tur hian eng nge ti ila min duh?" kan ngawih dun vang vang hnua a rawn tih chuan a lam ka hawi nghal thuai a, ani paw'n min lo en reng a, ka hawi sawn leh vat thung.

"Lawmsang....?" ti leh supin ka lamah a rawn pen phei a, kan indin hnaih ta viau bawk.

"Khawvela pa ṭha lo ber tia hre tur chein min duh a ni lo'm ni?" tia kal sawn ka tum chu ka dar tawn tawna chelh chung hian

"Ka lo sual ngawt mai ti raw?" a rawn ti dam thlup a, inchhir vawng vawngte pawh a ang tak tak alawm le!

"Hre tura ka duh che chu....." tia chawl deuh dat hian

"Ka fapa i ni tih ka theihnghilh ngai reng reng lo va, i hriat lovin ka ngaihtuah ru reng ṭhin che asin" a rawn tih zawm zat a, ka va han awih lo chiang tak!

"Dáwt!" ti hrakin ka tal chhuak hlawk a, ka thinrim dan chu pui tak a ni.

"Min ngaihtuah i inti maw!? Engtik lâi khan nge min lo ngaihtuah ṭhin a? Ni lo, dáwt muhlum bak i sawi lo. Engtin min ngaihtuah ang te'n i insawi theih reng reng le, min pawm ngai em? Min paw ngai em? Min infiampui ngai em? AIH, a vaiin AIH vek! Exam-naa ka tih ṭhat leh ṭhat loh pawh i hre ngai lo, zawh pawh min záwt ngai hek lo, ka sawi tawh kha, eng atân mah kei hi chu min ti lo, haw ang, haw ka duh!" ka ti buan buan a, ka thaw chhuak zui ham ham bawk.

"Ka thiam loh a ni tih ka pawm e, ka pawm thlap, thiamthu engmah sawi tur ka nei lo" beidawn hmèl fê hian min en a, min chelhna ata chu tal chhuak thei ngat ila zawng ka tal chhuak chiang khawp ang.

"Min thlah teh, haw ka duh" ka ti khar khar a, beisei loh deuhin awlsam te hian min thlah hlawl a, kan tlan haw zui nghal ta vang vang bawk.

In ka thleng chiah chu ka thaw deuh hlawp hlawp a, ka awm hahdam hnu chuan ka inbual ngaih daih bawk. Ka inbual zo inthlak tura pindan ka lut chu khumah ka pa a lo mu thluang duai a, a bân chu a lû ah a nghat ruah a, a mit a chhîng tlat ná chu a muhilin ka hre lo thung.

Chumi nî bak chu inbiak pangngai takin kan inbe leh ta miah lo va, ani hnathawkin a chhuak awl lo va, kei lehkha zirin hun ka hmang tlauh tlauh bawk a, mahse ka lehkha zir chawlha ka ei tur siam erawh a ṭhulh ngai miah lo thung. Chutianga ka laka awm lo tur pawh chuan vawi tam ka hrilh tawh, mahse awmzia pakhat mah a awm eih lo.

Ka pu leh nî Vuli lah chu kan pafa inkârah chuan inrawlh tum buai lo ang hrimin ngawih an chuh ve ve tlat leh ta nghal a, exam te hlei hlei chu ka tih chhiat phah ang tih ka hlau! Eng dang zawng aiin ka laka ka pa awm dan mawlh chu ka hmu kham a, ṭhat chhuah tawh lo se ka duh a, a hmâ ang chiah khan, ka piang ve tih pawh hre lo ang hmak khan awm leh se ka duh a ni.

Min ngaihvena min hmangaih ang takin a awm tlat a, min tlawn ang hrima a awm te chu ka hmu thei lo va, ka ngaithei lo va, ka rilru a tibuai daih záwk! Kan exam lah a hnai telh telh mai bawk si, lehkha pawh ka zir ṭha hlei thei lo ta hial a, ka rilru ipik churh chu ka buaina ber a ni a, ka pa laka ka vui ngawih ngawihna chuan min hmet chau zualin ka hria.

Amaherawhchu, ka rilru sukthlek a thlak danglam awlsam hle tih ka hre chiang em em thung a, ka tum pawh a ni bîk lo, huat duh viau mah ila ka haw rei thei tak tak si lo. Ka rilruah khawngaihna a rawn piang zel a, chu tak chu min tibuai em em tu pakhat a ni leh lawi a, khawvela ka thisen zawmpui awm chhun a nih tho tho vangte pawh a ni ang, ka hre tawh bîk lo.

Zan khat chu lehkha ka zir lâiin ama chet chet hian lo che mual mual a, nî Vuli leh ka pu erawh an mu ve ve tawh a, naktuk maia exam tur ka nih tawh avangin zirlâi ka en nawn rei deuh hlek a, ka pa lo la men ve reng chhan chu ka hre lo hle bawk. Tui in turin ka tho va, chuta ka thil hmuh erawh chuan min va han ṭhawng tehreng êm!

Ka pa chuan ngawi reng hian ka uniform min lo nawh marsak thlap a nih chu!

Ka necktie te nen lam chuan a lo nawt mar thlap a, hun liam tawh ngaihtuah chhuah loh theih pawh a ni lo. 'Engati nge a hmâ te khan a tih ngai loh? Engati nge tuna taka a fel tâk em em?' tih lampang ringawt chuan ka rilru a luah ngut ngut a, ka inngaihtuah lung puam a, ka ṭah chu a chhuak ru leh ta viau bawk.

Eng dang vang a ni lo, ka laka a awm dan tlâwm ngawih ngawih lutuk chuan ka rilru puthmang zawng zawng a ṭhiat sawm vek a ni ber.

"Engati nge hetiang hian i awm?" a hnung lam aṭanga ka kuah rual chuan ka ti nghal ṭiau a, a thil tih lâi chu a tawp chat nghe nghe!

"I zir zo tawh em ni?" ti dam dupa rawn inher a tum chu ka kuah nghet zual sauh a, ka ṭap chhuak ta hawk bawk.

"Lawmsang?" ti vutin ka kuahna kut chu a pawt phelh hnehsawh khawp mai.

"Ka tihpalh" kun ngula ka tih lâi chuan ka khabe ah a rawn châwi a, mahni tâwka inla pa ve tak mah ni ila ka mittui chu ka dang zo thlawt lo.

"Ka tihpalh....." keimah bawk chuan ka ti chhuak leh ṭiau a, a taksa chhûnga mi kuah luh vek tum ang mai hian min kuah nghal chawn chawn a, ka ṭap chhuak ta feih feih bawk.

"Ni lo, keimah záwk hi alawm dik lo. Ka ṭha lo va, ka sual a, i sawi dik chiah, i tan hian pa ṭha ka ni ngai reng reng lo" a thusawi mal tin mai chuan ka ṭah a tichhuak zual em em a, insum thei dinhmuhah pawh ka ding tawh lo.

"Ka tihpalh, ka tihpalh tak zet ka fapa, engkim hi ka thiam loh vek a ni" ti mawlh mawlhin min kuah nghet sauh a, ka bek leh ka chhip sam te chu a fawp thuak thuak a, ka lungchhiat dan chu pui tak a ni.

Ka ṭap bui bui thawmah chuan nî Vuli leh ka pu an rawn harh a, kei leh ka pa awm dan erawh chhe tê paw'n a la danglam lo hrim hrim a, ka pa záwk chu a thaw chhuak leh hluai ṭhin a, ka awm ngai ngaiin ka awm tawp a, ka ṭap bâng thei rih lo a ni ber.

"I pa hi min ngaidam lul teh ka fapa, min ngaidam thei ang em? Ni lo, min ngaidam thei lo mah la a pawi lo, kan pafa inkâr zau tak siam ṭha tur hian eng pawh ka ti mai ang" tiin a rum zui vawng vawng a, kan rilru a nâ ve ve ni maiin ka hria.

"Eng vangin nge ka ngaihdam theih loh ang che, ka pa alawm i nih!" ṭap aw zet hian ka ti pawr vak a, ka mittui te chu ka la dang zo chuang lo hrim hrim!

"Ka hmangaih che, ka hmangaih lutuk che" a ti khur dat dat a, a ṭawng tawp lamah chuan a ṭap tih pawh ka hre thei!

Kan boruak ipik zawng zawng leh kan pafa inkâr felhlel zawng zawng a'n kiam chiah chu hnâra hlit phawi ang mai hian ka awm a, ka pa pawh a nih ve tho ka ring. Chu zan vek chuan khum khatah kan mu dun nghe nghe a, tleirawlah pawh intipa ve larh ṭhin ka ni a, mahse tun ṭum zet chu ka pa âng chhûng nuam dangdai lutuk chuan naupang ang maiin rilru min puttîr a, zahna nei miah lovin ka kuah chial a, ani pawh a bang bîk chuang lo.

Chu zan chu ka tâna zan chhinchhiah tlâk ber leh hlimnaina ka hringnun a rawn chhun khah zan a ni tih ka hre reng tawh ang.