"I hman tawh em?" Tebawihi chuan a rawn ti lut thar thar a, ani hi zawng kan inah hi chuan ka chhûngte awm leh awm lovin awmzia a nei teh vak lo, kan mize harh dun phar phar ṭhin lutuk lâi tak hi kan inkawm rei theih chhan te pawh ti ila a dik hlel àwm lo e!
"Hman lo...hman lo....i hmanhmawh uchuak fâl thei leh lutuk, ṭhutthlengah khan lo ṭhu hle hle rawh" ti sarh sarhin room-ah ka luhsan nghal daih a, ka insiam zui ta malh malh bawk.
Inbual zo deuh chauh ka la ni a, mi rawn sâwm tawh eng ang mah se chuti zung zunga kal nghal thuai thuai ka tum teuh lo mai. Ka nute nena an inbe thawm chu ngâithla kar chungin ka insiam pah reng a, ka sam ka su lo hlauh záwk a, ni lo se chu tih ro chhûng nen min tur leh sek ngei ang.
"I va han rei ṭhin bîk tak; kei ka hman hmà theih tehreng nen!" ti deuh hlak hlak hian Tebawihi chu ka room-ah a rawn lut ta nge nge a, room ka luh tirha a lo lut zui ve nghal mai lo kha mak ka ti hman viau záwk a nih kha lè!
"Ngawi mai mai teh, dâr 6 leh a chanve daih a nih kha chaw ei te chû? Hmanhmawh viau zel suh!" ka ti lèt arh a, en kher lo mah ila min ner khum nasa leh dâwn tih ka chiang khawp mai.
"Group i check lo hrim hrim nge kei min runluih i duh avangin i hre lo der záwk BEISEITLUANGKIM!?" ka hmingpum ngata min ko kher ṭhin hi chu ka ṭhian mah ni se ka ngei hlur lo thei lo.
"I ninawm chingcheng! I duh leh nangmahin lo va kal hmâsa la ti nia!" tiin ka melh rawm rawm a, ka ṭawng nâ viau e ti lo chuan haw hmêl erawh a pu lo hrim hrim thung.
"Awi, engmah hre si lo hian i zak lo ve pang pang sia màw, dâr 6-ah an sawn kha i hre lo leh pek ngei chu a nih dâwn hi!" duham zeta a rawn tih chuan
"An sawn a!?" ka lo ti hâ a, chaw ei hun an sawn tih hre tur paw'n tlaia phone ka khawih tih loh kha chu ka khawih leh tawh reng reng hleinem!
"Inzawh buai hnuhnawh si se a ngâi lo, a hun tawh lo bawk, insiam zo thuai thuai mai teh" ti pang pang hian amah bawk chuan
"Hei...dâr 5 leh a chanve a pel tawh lehnghal, hmanhmawh teh, kan kalna tur a hnai si lo" a rawn tih zawm leh tawn tawn a, chutia kan chaw ei hun an sawn hmà thu han hriat tâkah chuan kei pawh chu ka hmanhmawh ru ve ta viau mai.
Insiam pawh ka insiam zo har lo hle a, muangchâng hman kan ni tawh lo tih ka hriatna chuan a nawrin min nawr kal a ni ber. In aṭanga kan chhuak tur chu ka chhûngte bulah kal hmà kan ngàih thut thu leh a chhante ka sawi thuak thuak a, rei pawh awm lovin kan liam zui ta vat bawk.
Higher kan kal ve lâia kan section hovin reunion kan nei dâwn a, kum 10 chuang chu a ral ve tawh hial ang, whatsapp group te chu nei ve tho mah ila a takah erawh kan inhmu khât pharh tawh hlawm viau a, tun ṭuma reunion kan neih tur hi kim taka kan inhmuh khawm lehna hmâsa ber te pawh a nih ka ring.
Tin, reunion ni pah fàwmin chaw ei khawm kan rêl thlu tel nghe nghe bawk a, dine out ang deuh reuh a nih ber chu! Kum 10 chuang inhmu tawh lo tih takah eng nge kan tih hlawm tâk zel pawh kan inhriatpui mang tawh lo va, a tak ngeia han inhmuhkhawm dâwn tâkah chuan hun liam tawha kan sulhnu berh ve tak tak te suangtuah kirin lung chu a lêng ru ve reng mai.
Kan reunion neihna tur hi Zemabawkah daih a nih avangin kan tlan rei par par hle a, folkland lam aṭang hel lo phei ila chuan kan tlan rei zual teh ang chu! Chawl lova tlan reng na fám chu kan dine out-na hmun tur pawh kan thleng phei ve ta nge nge a, buidling kawtah chuan car, bike leh scooty a lo inhûng fur tawh nghe nghe bawk.
"Kan tlai chhe lo turah ngâi tawp tawh mai teh ang" scooty ka park ṭhat lâiin Tebawihi chuan a rawn ti hap a, dâr 6 leh a chanve êm chu la ri lo mah se rik erawh a ri hnai thawkhat tawh khawp mai.
Buidling chhûng kan han lut chu rin ai tak kan kal khawm kim ang reng viau a, section khata a kuma kum lo ṭhuho ṭhap ṭhap tawh ṭhin tih takah kan inbe nghal bawrh bawrh hlawm a, karaoke a lo awm thlap bawk nen kan bengchheng nghal luah luah hlawm teh e!
Chaw kan han ei khawm te reng reng chu zawng rual ang mai hian kan ri laih laih a, dawhkan sei zetah kan ei tlar dul a, dâr 12 thleng kan book tawp avangin hmanhmawh pawh kan hmanhmawh lo hlawm hle a, nuam kan ti tlâng hle tih chu hai rual a ni lo.
Kan inei puar fel ta maw tihah a ṭhen an lo zài lâiin a ṭhenin snooker kan lo khel thung a, ka'n la thiam lo lulai em em leh ta nghal a, kei ai aiin Tebawihin a lo thiam lo ve leh chhawng a, zahah pawh kan là lo, kan khelh khelhin kan khel ve tawp tawp a ni ber.
"Eng nge!? Min lo kheuh lo teh!" ti zawi hlakin Tebawih kut chu ka beng thla sawk a, mi mah tum urhsun ve nàk alâia min lo tibuai khanglang chu ka ngaithei teuh lo.
"Aw, a nih han ti phawt teh!" dawhthei lo aw tak hian a rawn ti hluai a, ngun taka ka tinzawn ngar ngar lah chu ka tum nasat ve tehreng nen ka hawl ṭhelh leh chiang teh e!
"I balance a dik lo a nih kha" mipa aw lo chhuahna lam ka hawi chho chu chiang tak hian Hmachhuanan min lo en reng chu niin, hmui ti sawi zeuha ka chhiat khum hman hram erawh ṭul lo ka ti hnuhnawh viau!
"I kut dah dan nen" a rawn ti leh ngat phei chu melh pawh ka melh pei vel tawh lo, Tebawihi erawhin nakin thlengin min chhaih zui leh phah ngei dâwn tih ka chiang a ni.
"Heti hian ti rawh" kan dinna lama lo pen phei nghut nghut pah hian a ti sup a, min rawn din chilh zui chu a ni nghal der!
"I kut hi heti hian dah la, heti hian châwi kang deuh hlek bawk la" ti leh dut dutin ka kut chu a kut hrawl lam mah mah chuan a rawn hum sa pup pup ta mai, nèl loh tawh sa nàk alâia kan inawm hnaih lutuk chu thawk pawh ka thaw ṭha thei dâwn lo hialin ka hria.
"Aw.....ka hria e....ka ti thei mai ang....lawk...." ti bah deuh nawk nawk hian min din chilhna ata chu ka inla hrang hret hret a, snooker kan khelhpui hmeichhe dangte pawh chuan min en tih ka hre reng a, tlêmin ka awm a nawm loh ruk phah riau bawk.
"Eng lo....washroom-ah ka va kal lawk" ti zui leh zatin ka kal sawn páwk pawk a, washroom chhûng ka lut chiah chu am zet hian ka thaw chhuak ham ham a, khatiang teh thlawta ka taksa a rawn inthlak danglam thut chhan lah kha ka hre hauh si lo.
"Hei! Eng nge i hriat a? Engati nge i kal daih?" washroom a lo luh rualin Tebawihi chuan a rawn ti nghal mawlh mawlh a, chhàn pawh ka chhâng lawk lo nghe nghe.
"Nichina i awm dan vel kha...." a tih laklawh lâi chuan
"Engmah a ni lo" tiin ka lo pawt chat hmak a, Hmachhuana hmêl ren run lah chu ka mitthlâah a châm ang tlat leh ta nghal a, tih ngaihna pawh ka hre tawh bîk lo.
"Engmah ni si lo eng nge khatia i kal sawn vel kher si?" a la rawn ti ta zel zui a, mahni infuih ru ngar ngar chung leh ka awm dan chu a dik lo tih hre ran chung hian ka ding ngil zawm zat a, ka insiam ṭha vat a nih loh chuan mak an ti lutuk palh ang.
"Kal ang, va khel leh ang" tih leh kal ka rual a, ani pawh chuan min rawn zui ve nghal mai bawk.
Snooker kan han khel leh te chu engtin emaw ni hian ka awm deuh tlat tawh a, Hmachhuana mawlh chuan ka awm a tinuam lo a ni ber. Min hrilh ang te chuan ka'n ti ve mai bawk a, mahse eng ka ang thei rih chuang lo, khelh hnem a ngâi te pawh a nih ka ring.
Rei khel tawh lovin ṭhutthlengah chuan ka ṭhu ta daih nghe nghe a, Tebawihi erawh mi dangte nen an zâi nasa hle thung a, kei pawh chu zawi zawiin ka pangngai ve leh mai bawk. Kan boruak mûk lo tak leh ri laih laih reng kârah chuan ka awm ti nuam chiah lo thil pakhat erawh a awm ru reng thung a, chu chu eng dang ni lovin Hmachhuana leh bawk a ni.
Ka sawi thiam chiah lo, kan boruak hip mêk chu nuam ti ve ang paw'n a awm lo, nuam a ti ve lo tak tak te pawh a ni mai thei! Mipahoin beer leh in chì chi hrang hrang an lo keng nûal a, hmeichhe zíngah pawh in an awm nûal a, a in lo awmchhun ka nih hial ka ring.
Zep thu a cheng lo, washroom aṭanga ka chhuah hnu aṭang khan ka awm dan a fu chiah tawh lo hrim hrim a ni. Ni lo se chu beer te pawh ka in ve leh lawp lawp ngei ang a, boruak nen lam ka ngam leh hawr hawr tawh viau bawk ang; mahse chutiang erawh ka ni lo nasa ropui mai bawk si!
"Engin nge in lo kal?" min rawn betu lam ka hawi chu rang zet hian ka hawi lèt leh vat a, engtik lâiin nge ka bulah chuan a lo ṭhut tih rèng ka hre lo.
"Scooty-in" ka ti pangngai ve mai a, ṭhut sawn daih duh rum rum mah ila ka ṭhut sawn vaih chuan min hmuh dan a dan nghal vek ka ring lawi si, a laka dawi dî dê leh kimki chawih anga lan ka hlauh avanga ṭhu sawn lo mai chauh ka ni pakhat bawk.
"Nangmahin em ni?" a rawn tih leh chuan
"Aih, Tebawihi nen" ka lo ti ṭha ve leh mai a, school kan kalho lâi ai let khan tunah chuan a puitling tawh lehnghal a, a mi uap te chu nâ cherh churh tak a ni; a hrehawm záwk!
Higher kan kal chhûng zawng khan kan CR a ni kum tluan parh ṭhin a, khang hun lâi aṭang tawh khan ka nêl ngai lo va, kan class mipaah pawh a upa ber nghe nghe a, chung zawng zawng ngaihtuah phei chuan tuna taka nêl thut theih a ni paw'n ka hre lo.
Chuta chhapah tunah phei chuan a hmêl pawh tih tawh nâk alâiin a taksa nen lam a len belh zual leh ta nghal a, school khata kan kalho lâi pawh khan armwrestling-a champion zak zak thei khawpin a chak mai bakah tihrawl a nei ṭha a, armwrestling-ah nà nâ ná kha chuan champion of champion te kha a ni ṭhin nghe nghe!
Ka mit sîrin ka melh ru leh zeuh zeuh ṭhin a, kan taksa a inlen hleih miah miah bawk si, a mi uap lah awih awm loh khawpin a nâ ham ham bawk si nen tui te chu ka in ta ringawt a, mipa dangte'n snooker an khelh laih laih lâia a khel ve miah lo leh ka bula a rawn ṭhu kher te chu ka nèl loh zual phah te'n ka hria.
"Engtin nge i awm zel tâk?" kan inhmuh tirh ata tawh amah záwkin min la be hmâsa char char a, chuti teh vakin ka nêl hran lo tih erawh a hriatthiam vek tho ka ring; ni lo, hmân aṭang tawh hrethiam tur chu a ni!
"Ka awm vel mai mai rih" tih bakin ka chhâng lo va, lo in-classmate ṭhin ta na fám chu hna a neih tawh leh tawh loh te pawh hriat a chákawm ru viau a, mahse ka záwt ang nge záwt lo ang tihah ka rilru a insual nak nak thung.
"I ṭhiante chu an kâi ṭan a nih dâwn khi" a sawina lam ka hawi chhoh chuan Tebawihi phei chu a lo zuang tawr tawr a, ka nui tawp ringawt!
"A nih nang, eng nge i tih tâk? Armwrestling lam te i la ti ṭhin em?" ka ti ve ta nge nge a, hun liam tawhah lo in chu e kha e viau lo mah ila nula pangngai tân chuan ka awm dan chu a puitling lo ru riauin ka hria a ni.
"Armwrestling lam chu ka ti tawh lo tluk" a nuih deuh nghut hnu chuan a rawn ti zui zat a, chutah amah bawk chu ṭawng zawm lehin
"Ka haw hmàsan che u a ngâi mai thei" a rawn ti dut a, kei pawh chuan
"Engati maw?" ka lo ti ve nghal hluai bawk.
"Tih tur ka nei a" tih baka mi chhâng lovin a ngawi zui vung vung a, a mizia chu school kan kalho lâi ang tho kha a la niin ka hria.
"Juice in ang hmiang?" kan ngawih dun ren rawn lâi chuan a rawn tih deuh hlawl a, mi dang bula ka ṭawng duh tehreng nen a bulah ve thung chuan mize dang daih ka pu lawi a, ka awm dan chu ṭha pawh ka ti chiah lo.
"Pawi hleinem, ka va thlî ang e" tia thawh zui mai ka tum chu ka dar, kawrin a khuh loh chinah chuan a rawn hmer sa hat hat a, ka ṭhutnna ngaiah ka ṭhu thla deuh dawt bawk.
"Keima'n le" tih leh amah záwk chuan juice awmna lama kal phei a rual nghal a, no keng chunga a rawn lèt leh nghut nghut lâi te chuan nêl ang hrimin ka lo en lui ve ngar ngar a, pangngai deuha awm luih ka tum lutuk chu keimah ka ni lo zo vekin ka hria.
"Snooker i khelh ṭhin hrim hrim em ni?" tiin titi chu ka vawrh ṭan ta a, inbe lo leh lutuka awm ngawt zawng a dikin ka hre chiah lo a tin a ni!
"Immm.....khel ṭhin e, mi dang bulah sawn va khel ve daih turin min duh tihna nge?" a tawp rawn khar dan mai mai chu le!
"Aih.....a teuh lo mai, chutiang zâwngin ka sawi lo hrim hrim e a!" ka ti nghal chul a, melh zeuhin hawi sawn leh nghal thuai mah ila a kiai suk hmêl erawh ka hmu hman tho.
"Lo chho ve rawh Besei" kan ṭawng loh lâi taka Tebawihi min rawn kohna chu hnarin ka lu ka thing nak nak a, zài mood-ah pawh ka cheng lo hrim hrim!
"Rawn chho mai rawh BESEITLUANGKIM! In la cool der vel lo mai teh!" duhthaw zet hian a rawn ti leh bawrh bawrh a, hmêlhriatte vek mah ni se min han sawi dan vel chu a lawmawm vak loh!
"Ka peih rih lo" ka ti ve tak nàin min rawn pan ding nghal tharh tharh a, stage-ah chuan min pawt chho lui a, loh theih lovin ka zâi ve ta ringawt bawk.
Kan han zâi tâkah chuan nuam ka ti thar lehling phian ang lawi a, inkuah meuh hian kan zâi dual dual a, rui lo hai lo mah ni ila ka ṭhiante kâi deuh chiai tawh nen chuan kan inang khat tlâng vek a, han rui chhe em em kan awm lo hrim hrim a, a ina te paw'n in dan táwk an thiam hlawm khawp mai.
Hla dang kan sa leh tur chu ṭhutthleng lam ka hawi thla zeuh a, Hmachhuana erawh a lo awm tawh lo hrim hrim a, haw hmâ a ngàih thu kha a sawi tak alawm, a haw daih tawh a nih ka ring hmiah! Chutia ani ber a'n awm lo ta chu ka thaw a veng lehzual a, aw chhang vek khawpin kan zâi vak vak a, mipaho chuan min rawn zawm ve thuai nghe nghe bawk.
Dâr 11 leh a chanve velah ṭin zâi kan rêl diah diah hlawm a, Tebawihi pawh a rui ang reng viau e ti lo chuan engkim a hre vek ang lawi a, ṭawng pawh a ṭawng duh par par khawp mai. Kal lam ang bawkin kan inphur haw leh hnak hnak a, an in kawt thleng ka thlah hnu chuan kan in lamah ka tlan lèt ve leh nghal a, in chhûng ka lut chu thawm a lo reh ṭhiap tawh a, chhûngte mah ni se a inthlahrunawm duh ang reng!
Mu turin ka room-ah ka lut zui nghal hmak a, ka scooty khalh hawna lamah thli thaw ka dawng nasa bawk nen ka mut a tichhuak vekin ka hria. Khuma ka mut rualin mut chhuahna chuan min rawn zem nghal riai riai a, ka mu tui ngàng a ni ang, ka harh leh meuh chuan nî a lo chhuak èng iar tawh a, ham bai baiin ka tho zui ve nghal mai bawk.
"Nizan khan in in thleng tluang em?" tih zawhna message, number lawng tawp aṭanga ka dawng chu mak ka ti ru viau a, han rin mai tur pawh ka hre lo.
Chhâng lovin thil dang ka tihsan ta daih a, chaw ei kham hnuah pawh ka la chhháng lêt duh lo va, dik tak chuan ka ngaihzâwng hlui Dintluanga a nih ka rin vang a ni pakhat! Kum 2 dâwn chu kan inzui ve hman kha a ni a, mahse kei nen kan inngaihzàwn reng lâiin hmeichhe dang lakah sâwn a lo thlak a, khami nî aṭang kha chuan ka nuna làk luh leh ka tum tawh lo hrim hrim!
"Tuikhuahtlângah kal ang" Tebawihi message chu ka hmuh rual rualin ka open nghal a, eng ti tur nge kan nih ka zawh chuan
"Hna dil tur a awm" a rawn ti ve leh nghal zat a, a sawi zel danah chuan OIKOS school-ah teacher hna a ruak a ni àwm e!
A sawi ang ngeiin chawhmâ lamah a rawn kal ta ngei a, University aṭang Master pass hlim deuh hlawl kan nih avangin hna zawng leh exam hmâchhawn tur buaipui châng kan ngah dun thei em em a, teacher hna phei chu vawi hnih khat kan dil tawh nghe nghe a, mahse B.Ed degree nei an lo duh zel tawh avangin kan la tling hlei thei lo va, B.Ed zir ṭhat leh mai te kan duh phah rum rum hial ṭhin.
OIKOS school lam pan chuan kan inphur chhuak leh ta hnak hnak a, private school tih takah rin ai thil buaipui tur vel a lo awlsam phian a, application form pawh soft copy-a thawn mai tur hi a lo ni nghe nghe a, hard copy leh documents pawimawh dangte erawh interview neih nîa ken tur a ni thung.
"Tukin khan number lawng aṭang message ka dawng ringawt a, Dintluanga a ni ang tih ka hlauhzia chu!" laptop-a kan hna dilna tur lehkha chhu malh malh pah chuan ka ti liam puat a, Tebawihi erawhin ka rin ai ka thusawi chu a lo ngaihven daih!
"Khawi maw" tih leh dawhkana ka phone awm chu làk a rual a, chutah amah bawk chuan
"I la reply miah lo a nih hî" ti zawm leh nghal hliai hian
"A va'n hriat hmèl che ve a, nizana kan chhuah thu pawh a hre vek a nih hî, tu nge a?" a rawn ti zui zat zat a, mi mah hriat loh nàk alâia chutiang te mi zawh reng reng!
"Ka hre bîk nàng" ka ti duh lèk chauh a, han rin mai tur ka hre lo ve bawk êm a ni.
"Ti daih ila, nizan kha chuan nangmah i ni lo emaw ka ti hman alawm" tih leh ka dara nghawk chu a rual a, a sawi tum tak erawh ka la man chiah lo.
"Engti zâwngin maw?" ka tih chuan
"Âw.....khá.....Hmachhuanan hawlh dan tur leh vawn dan tur a zirtîr ṭan dek dek che a, washroom lam i pan tâk daih kha maw le" a rawn ti chhuak hlawl a, ka thil chhut lâi chu ka tawp deuh chat nghe nghe.
"Kha tah kha chuan tu paw'n kan en zui vek che alawm" a tih zawm leh sap sap a, han sawi mai tur pawh ka hre lawk lo.
"I sawi ho êm mai a!" tiin ka thil chhut lâiah chuan ka rilru ka peksan ta daih a, duh leh a ṭawng ṭawngin lo ṭawng vel mai mai tawh teh se!
Kan ina application form leh documents thil tel ngâi hrang hrang kan buaipui fel hnu chuan submit turin kan inphur chhuak leh nghal zung zung a, buaipui lâi chuan han buaipui fel nghal sawk sawk ila a hahdamthlak berin ka hria. Kan han submit-na te paw'n che rang min lo ti khawp a, chutih rual chuan submission last date erawh a hlâ vak tawh lo thung.
Nî a ral a, a tukah chuan hmâ takah ka tho va, khua a lûm chho ṭan tawh bawk nen zîng exercise là tura tho hmâ ka a ni ber a, mahse tukin erawh Tebawihi záwkin a peih ve ta ngàng lo va, keimahin ka kal dâwn a nih hmêl!
Kâr khatah hian vawi thum vel zel exercise kan là ve ziah ṭhin e ti lo chuan kan taksaah erawh a lang mawh em em thung a, tlêma taksa han tih cher mawi ve deuh kan duh luatah ei lam pawh kan insum ve nasa ṭhin hle bawk.
Tin, zîng kâr boruak thiang kâk mai han hip ṭhan tâkah chuan hahdamthlak tih piah lam mai bakah ngaia neih a lo awl ang reng a, thawh hmâ ṭhan hi chuan zîng exercise làk loh tukah pawh a thawh tlai theih tak tak miah loh!
Mahnia tlan det det ka ni bawk a, ka hmanhmawh hran lo hle a, ka hnung leh hmâah chuan mi dang tlan an awm ve reng a, tleirawl rualho rawn tlan phei chuan min leh pel zut zut hlawm a, kei erawh ka speed ka ti chak duh chuang lo hrim hrim a, ka taksa zawh táwk chiaha tlan det det reng chu a ṭha záwkin ka hria a ni.
Zarkawt bridge ka thleng phei chu in-stretch turin ka chawl a, tumah an lo awm lo hlauh leh ta nghal a, mi danga an lo awm ve kur hi chuan han in-stretch vel vak hi hmeichhe tân a nuam lutuk ṭhin lo va, mipa an lo awm laih laih tawh phei hi chuan Tebawihi nen pawh kan in-stretch lo tawp zel!
"Fit tawh àwm ve" ka hnung lam aṭanga mipa aw lo chhuak thut chuan min va han tiphu nasa tehreng èm!
"Nang elo!? Eng nge i tih ve a!?" a hmêl ka hmuh rual chuan ka ti phawk hrâ a, chutiang hun leh hmuna ka hmu teh daih chu mak ka ti viau bawk.
"Nangmah ang thovin Exer ka là ve a nih hi!" a rawn ti sam mai a, ka taksa a en thla den den zui nghal kher chu ka ngaihdan a ni lo nasa mai.
"Hei! Khatiang khan min en kher suh!" ka ti deuh pang pang a, ka ding ngil nghal vat bawk.
"I va ho reuh tak e âw....." tia nui suk pah hian ka dinna lamah chuan a rawn phei a, kei erawh ka lo ding mar âwt ringawt!
"Exer hi i là ve ṭhin nge, tukin hi i vawi khatna chauh záwk?" a rawn tih leh chuan ei lo tih hriat tak hian ka ner khum nâng a, min din hnaih ta mah mah erawh ka thaw a tiipik ru ang reng!
"Nang ai paw'n ka là hmâsa záwk ang" ka ti kher chu a lawmah a tla nge ni, a nui deuh sun sun a, a nui hmêl hmu tam ngai lo tih takah mak ka ti ru hman viau nghe nghe.
"Zîng danga exer i là leh dâwn a nih chuan New Capital lamah lo chhuk tawh rawh, nuam pawh i tih záwk ka ring" a rawn ti tak nàin ka awih lo nasa mai, a chhan chu amah pawh New Capital lamah exer a là bîk reng reng hleinem!
"Chuti si engati nge heti lamah i rawn làk daih si?" ka ti ta rèng a, ani lah chuan fiamthu hmêl pu miah lo hian
"New Capital lama kal chu ka tum alawm, mahse nangmah ang deuh ka hmu thuak a, ka zui zel a, chuan hei, i lo ni ta rèng a" a rawn ti kual deuh duah a, hmui tiche zeuha ka lo ner khum leh hman hram avang chuan a nui zui leh ta dut dut bawk.
"Khawi thleng nge tlan i tum?" pangngai taka a rawn tih leh sup tâkah chuan
"MC thleng saw a ni mai, tukin chu Tebawihi a rawn tel peih bawk si lo va, tlan thui pawh ka tum lutuk lo" ka ti ve lûam a, sawi ṭul lo lô sawi tel ang te'n ka inhre leh hnuhnawh ang lawi a, mahse awmzia a awm tawh lo, ka sawi tur ang ka sawi vek tawh!
"Ka message i hmu reng si a, engati nge min reply loh?" fiah hniam dam ruih tho sia min biakna chuan ka thin a tiphu rang nghal dawt dawt a, ka awm dan chu a hria ang tih mawlh ka hlau!
Ni lo, eng maw tuna min zawh zawh chiah kha!? Amah hi maw lo ni; number lawng tawp kha!? Engtin nge amah a nih daih theih? Ka phone number a nei tihna a ni ngei ang a, mahse engtin nge a neih reng reng!?
"Min la hlau reng em ni?" a ṭawng chu ka hre sual emaw ka ti hman hial a, mahse a lo ni hauh si lo.
"Aih....teuh lo, teuh lo mai" ka ti phuailuai nuaih a, engtin nge ka hlau ṭhin tih te chu a lo hriat reng reng ni!
"Kal ang e" a rawn ti leh daih ang lawi a, thil ka ngaihtuah ngut ngutna lamah che chang lovin ka lo ding reng chu niin, ka hriat chhuah meuh chuan ka tlai duaih tawh a ni hawt e.
"Ka ruala kal kher i duh deuh em ni?" a rawn ti leh lék phei chu a rang a rang hian ka che chhuak nghal phat a, mipa nui thum huk ri ka hre zui zat bawk.
MC thleng chu kan tlan dun ta ngei a, kan inhmuh tirh khan ka lo en chiang mang miah lo va, tlan paha ka en ruk zeuh zeuh tâkah chuan ka rin ai a pian chu a dik ang reng fû mai. A dress pawh a changkang biai roh a, chu chuan a vun leh taksa a tilangsar deuh vuah bawkin ka hria.
Haw lamah erawh tlan tawh lovin muangchâng lutuk lo hian kan kal bek bek a, kan inbe em em hran lo nà chu kan inbiak chhunah erawh kan sawi zui thui thei phian thung. Ka hlau ru ṭhin tih a hre mawlh mai chu mak ka ti, engtin nge a hriat daih theih záwk lè hi ka tia, a chhan chu han hriat ngawt dan a awm lo ve êm bawk a ni.
Zep thu a cheng lo, higher kan kal lâi kha chuan ka hlau nge ka ṭih ru ṭhin pawh ka hre ta ber lo, ka nêl lo hle tih erawh ka la hre chiang hle thung. High school hmeichhia zawng zawng deuh thawin an star luai luai ṭhin te kha mak ka'n ti thei khawp a, kan class-ah ngei pawh star-tu chu an awm ve tho va, rei lutuk lo an inngâizâwng hman nghe nghe a, pastor fapa a nih avanga hmeichhe mit là zual a ni ber khan ka hre ṭhin.
Class khata ṭhuho ṭhin reng si kha kum 2 chhûng zawng khan vawi 10 pawh kan inbe tling lo hial ang ka ring; Tebawihi phei chuan ka ṭih ruk ṭhin êm avangin min chhaih lui hial rèng a nih kha! Ka ṭih ruk ṭhinzia te kha ka la hre reng, armwrestling-a champion of champion ding lâi a hneh nîah erawh kha chuan ṭih lam rèng rilruah a lang thei tawh lo, kan CR a ni kher bawk nen kan va han au nasa tliar tliar hlawm tak!
Kan teacher te nen pawh khan an han inelh chhin vel nghe nghe a, mahse tuma'n an hneh chuang lo. Khang hun lâi kha chuan a chak ve thlawt; tunah a chak ta lo ve tihna lam pawh ni chuang lovin! Beisei loh deuha Pastor fapa a ni nulh erawh tun thleng hian inhmeh ka la ti ve thei lo, a hmêl a rum mah mah bawk si, a taksa ve thung chu hmân ai khan a inkhaithli mâwi zaih tawh záwk a, taksa hrawl mawl tawp ang kha a ni tawh lo ti ila a sual lo ber ang.
Chutia kan han haw dun zel tâkah chuan Tlangnuama an awm thu a rawn sawi a, kan lo inawm hlat lutuk lo chu niin, a pa rawngbawlna avanga awm an ni tih ka hrethiam nghal mai bawk. Kan vêng pêng luh dâwna thlahna ṭawngkam chhahchhuah ka tum chu
"In vêng lam aṭang ka haw dâwn" a rawn ti mauh mai si a, keia lo hnial ringawt lah tih chì ni hek lo, kan kal dun leh ta hnak hnak a, thui pawh kan kal hmâin kawng chhak lama thingpui lo zawrhnaah chuan chawlh a rawt a, ka hnial eih lo te chu mak ka ti hnuhnawh khawp mai.
Engtin tin emaw ni hian a awm awmin a mual mual roh a, mi lah chu thunun a awlsam phian leh ta nghal a, ka dik lo nge amah záwk a dik lo pawh ka hre tawh neih nuaih lo. Thingpui erawh ka in tui phian ang lawi a, kan in kawt kan thlen tâkah chuan thlahna thu ka chhak chhuak ve ta nge nge a, ani pawh chu rawn hawi lèt tawh miah lovin a kal liam zui nul nul bawk.
Chawlhkâr a ral a, Tebawihi nen chuan OIKOS school-ah teacher hna dilin kan han interview ve ta ngei a, ka rin ai a lo harsa lutuk lo va, mahse dil kan ṭhahnem êm avangin tlin pawh kan inbeisei chuang lo. Interview erawh ka hriat dan chuan ka chhâng ṭha thawkhat viau a, practical an tih mai; class-a zirlâi naupangte zirtîr chhinna ah pawh kan che ṭha viau chuan ka hria.
Hna exam tur neuh neuh a awm avangin ka hun hman dan chu exam hmâchhawn tura inbuatsaih a ni deuh tawp a, Tebawihi pawh a bang bîk chuang lo. Ri thawr thawr chî leh ze nu zên lo chî kan ni ve ve bawk nen kan inlen chilh tawh hi chuan lehkha zir tih lam hi chu khawi lamah a ni ringawt!
"Inah i awm em?" chu message ka hmu teh hlawl chu ka chhiar nawn tluk tluk a, min rawn biak ngawtna chhan ka hre lo leh ta kher mai.
"Awm e" tiin ka reply a, a view nghal ka rin tehreng nen a view har zek lehnghal a, a message ka open hmâ bîk lutuk chu ka inchhir hnuhnawh leh ang lawi a, delete leh te ka tum thul, a message pakhat lék avang chuan buai neuh neuh rei hman tak ka ni!
'Ho êm mai!' ti rilru niah niahin lehkha ka zirsan ta daih a, a phone number pawh amah a ni tih ka hriat hnua save ve mai chauh kha ka ni a, chu pawh kan lo in-classmate ṭhin avangin, chuvang chuan amah avanga lo buai vel chíam tur chu ka niin ka inhre lo.
Chutia lehkha ka zir melh melh lâi chuan ka nu'n sitting room lama chhuak phei turin min rawn ko lang lang a, ka va chhuak phei chu Hmachhuana ka hmu ta hlawl mai, mak tih luat avangin ka ding dat a, mahse ka awm dan chu ka siam ṭha leh nghal vat thung.
"I buai em?" tiin min rawn be sup a, engti tura lo kal nge a nih tih ringawt ka ngaihtuahna lamah a zawhna pawh chu ka chhâng lawk lo nghe nghe!
"Buai lo ve" ka ti ṭha ve mai a, ṭhutthlenga ka ṭhut rualin ka nu chuan
"Beisei, i ṭhianpa chu khawi lam ni nge ni a?" a rawn ti siam siam a, kei pawh chuan
"Hmachhuana a nih hi nu, eng lo, a pa pastor a nia, chuan....amah hi....." tia ngawi deuh dat hian
"A chak tawp" ka tih zawm leh thâwr a, sawi zui vak dan hre tawh bîk hek lo, Hmachhuana lah chu a lo nui ri dut ang leh ta nghal a!
"I sawi dan teh tlawng chu a, engti chakin maw a chak a?" nui var var paha ka nu zawhna min zawh chu ṭul lo ka va'n ti ru tak!
"Armwrestling a nia ka sawi, higher kan kal lâi khan kan CR a ni ṭhin a, khang hun lâi pawh khan armwrestling-ah pakhatna a ni ṭhin alawm, chuan....eng lo.....Tlangnuamah an awm mêk bawk" ka ti leh ta zar zar a, report pe te pawh ka ang lek lek záwk alawm le!
"A nih chu maw lè, ti khan lo inkawm r'u, thingpuite kha lo lùm la aw Beisei" ti leh siar siarin ka nu chu an room-ah a lut zui ta daih a, tlangvalin nula a rim treat-in min treat nge pawh ka hre lo.
"Eng nge i lo tih a?" a rawn tih sup chuan
"Lehkhabu ka lo chhiar vel mai mai a" ka ti pangngai ve mai a, chutah amah bawk chuan
"Eng lehkhabu màw?" a rawn ti leh ngat a, dilchhut ka ti ru ang reng!
"Lehkhabu tih lêmah.....hna exam-naa mi tur a nia" ka ti zuih ral diai a, hna exam ka tum tih vel chu hre lo se ka duh viau a, mahse a zawhnain a zir miau bawk si lo a ni.
"Chu.....i lehkha zir lâi ka rawn tibuai che a va ang ve" mi melh deuh runa a tih chuan
"Buai hran lo ve, zanin chu chawlh ka tum deuh hrim hrim a, zir loh tawp aiah ka zir mai mai záwk alawm" ka ti leh ta lûam a, aw thian zui kharh hian
"Hmun danga i kal haw lam i lo pêng nge i rawn kal ve hrim hrim?" tiin zawhna chu ka zàwt lèt ve dat a, ṭhutthleng khata ṭhu e ti lo chuan kan inṭhut hlat khawp mai.
"Ka rawn lêng" chhumbung deuh taka min chhàn dan avang chuan ka nui hak a, hmân aṭang tawh khan mipa ṭawng duh zawk zawk a ni lo va, ṭawng duh lo tak pawh a ni chuang lovin ka hria.
"Thingpui ka va lûm ang e" tih leh thawh ka rual a, kan hun hman dan tur mawlh chuan ka rilru a kap ru ang reng viau a, a rawn lèn ringawt dan vel te chu hun kal tawh a ngaihtuah chhuah loh theih loh!
Dâr 9 leh a chanve dâwn a lêng ve reng a, engtin tin emaw ka tlingtla thei mai chu a thawventhlak huai te'n ka hria. Kan in kawt thleng thlah tumin pâwn lamah ka zui chhuak a, car a rawn ken danah eng hna emaw tak chu a thawk tawh tih ka hrethiam nghal mai bawk.
"Ka zawhna kha i la chhâng miah lo a nia" a rawn tih chuan ka bangbo teh e!
"Eng zawhna maw?" a thil sawi chu ngaihtuah zui rauh rauh chung hian ka melh chho kiau a, ani paw'n min lo en chiang ngàng mai.
"Min la hlau reng em ni?" a rawn tih leh tâkah chuan zîng exercise kan làk dun ṭuma a zawhna kha ka hre chhuak nghal zawk a, ka rin ai thil a hre rei zèk!
"A hman lâi tawh êm mai a!" zep sî sè lova ti chhuak hapin ka nui lui ngial a, mahse ka nuih erawh a za hran lo hle.
"A nih chuan tha thar ka rawn thawh leh mai dâwn asin" a thusawi awmzia chu pakhat mah ka hre lo.
"Engtia tha thar maw?" ka ti hê hû a, ani lah chuan
"I hre chawp ve zel mai ang" a ti duh lèk chauh ang leh ta nghal a, chu chuan ka rilru a tikal ding viau bawk.
"Lawk!" tiin a kal tur chu ka ko ding dat a, chutah keimah vek chuan
"I sawi awmzia ka hre lo tak tak a nia" ka ti zawm deuh hliai a, eng thil nge tih a tum hre map lova awm ringawt chu dikin ka hre lo a ni.
"Tunah hian ngaihzâwng i nei lo tih ka hria asin" chu thu a sawi zo chiah chu chawp leh chilhin engkim ka hre fiah nghal kuarh a, chutah amah bawk chuan
"Hlauthawng duh suh, i duh loh zâwng a nih chuan engmah ka ti lui lo ang" rawn ti leh supin car-ah chuan a lut nghal a, mi pawh en tawh lovin a tlan chhuak zui ta vang vang bawk.
Khuma ka mu te chu ka mu meng kar a, higher kan kal lâi bawk khan rilru leh suangtuahna a luah ngut ngut a, thil hriat chhuah leh ngaihtuah chhuah pawh ka ngah khawp mai.
Class 12 kan zir lâi kha a ni nghe nghe a, kha kum kha a ni khawvela thil mak tawpkhawk thlen kum chu nì! Ka ngaihtuah zâwng ringawt pawh hian ka la mitthlà uarh uarh thei, thleng lo tura ngaih mah ni se a thleng miau bawk si a ni.
Hriat reng loh theih ni hek lo, ani ang mi tawhkhirh hmèl zet khan hmaichhanah ngei min duh thu a sawi piap mai a nih kha!
Khami ṭuma ka nî hman nawm lohzia mawlh mai te kha mi dang chu ni se an lawm àwm vei nen, ka tân erawh chutiang a ni ve hauh si lo. Ka duh lo tih leh ka ngaina lo tih kha a hrethiam ve vek chuan ka hria, mahse min ngaihven ru reng ṭhin thung a, hriat loh der pawh tum ila engtin emaw ni tak a awm dan kha ka hre tlat zel!
A zah ka hlauh avangin tun thleng hian Tebawihi bulah takngial pawh ka sawi chhuak ngai lo hrim hrim a, higher kan chhuah hnu aṭang phei kha chuan a chanchin engmah ka hre zui tawh lo va, mahse mak ve deuh pakhat chu pastor tih thumal a rik apianga ka rilrua lo lang hmâsa ber ṭhin chu amah bak a ni ngai lo; pastor fapa a nih vangte pawh a ni maithei!
Kum tam a liam hnuah kan inhmu ve leh chauh a, nichin maia a thil sawi te kha ngaihtuah chian phei chuan a awihawm loh rum rum záwk a, engtin nge min la duh reng theih pawh ka hre lo. Kei lahin mitmei ka hmuh ngai der bawk si lo, mahse snooker khelh dan tur min zirtîr ṭuma kan taksa a insi chiah kha chu a tua ve ve pawh kha kan danglam ni maiin ka hria.
Ka alarm set avanga ka phone ri nghawr dat dat chuan ka mut tui lâi min kai tho hlawl a, chutah Tebawihi call ka dawng zui zat bawk a, mahse a rawn missed call zuaih a ni záwk mah a, tho tawh turin min rawn hrilh a ni ber e. Exercise là tura ka inpeih fel diam hnu aṭanga rei lovah phone call bawk ka dawng leh a, kan in kawta ka chhuak chu min lo nghak reng tawh hi a lo ni a, kan tlan zui nghal ve mai bawk.
"Awi, saw saw Hmachhuana a va ang ve? En teh saw, i ti ve em?" Tebawihi hawina lam chu hawi kher ngâi lovin Hmachhuana ngei a ni tih ka hmu ru daih tawh záwk a, chutah Tebawihi bawk chuan
"Hmachhuan" tiin a ko ta lang lang mai, ṭul ka va'n ti lo tehreng èm!
Hmachhuana ren run lah chuan mi a en ngel ngul ang leh ta nghal a, New Capital lama tlan tura min sâwm dèk dek chu Tebawhi záwkin aw a pawh nghal thawr thawr a, tlanho loh theih ni tawh hek lo. Chutah nizan maia a thusawite kha ka hre chhuak zut zut zui a, engmah hrethiam ve hauh lo Tebawihi chu ṭawng zat zat lo se zawng kan inbiak kher pawh ka ring lo.
New Capital-ah chuan exer kan zu là ta ngei a, mi dang pawh an lo tam ang reng khawp mai. Hmachhuana nen chuan kan inbe leh zauh ṭhin tih loh chu kan inbe mang lo va, nizana a thil sawi avang khan biak hreh ruk riauna ka nei ni berin ka hria.
Kan haw lam chu kawngpui sîrah thingpui kan in kawi leh a, ka bulah kher a rawn ṭhu erawh ṭul lo ka ti ru khawp mai. Tebawihi lah chuan engmah a hre ve der bawk si lo, Hmachhuana mawlh chu mak ka ti leh rum rum ṭhin. A mitmeng aṭang leh a chet dan aṭang chuan min la duh reng tih ka hai bîk lo va, mahse tilang huam huam a ni lo thung a, chuvanga Tebawihi pawh chuan hrethiam lo a nih ka ring.
"Zanin lehkha zir i tum em?" Hmachhuana chu en zawk ka hawi sawn ve leh mai a, Tebawihi erawh an in lamah a pêng daih tawh a, kan pahnih chauha han kal dun tâkah chuan kan titi pawh a dang ta zar mai.
"Ka hre lo le" ka ti sap a, lo lèn leh a tum ni ngei tur a ni.
Kan in kawt kan thlen chuan kan inṭhen hrang a, in chhûnga lut nghal mai lovin a kal nghut nghut chu ka thlir zui veng veng a, kawng kawia a kal liam tur chu muangchâng fahran lo hian a rawn lehhawi teh thut a, kan va han inen chiang tehreng èm!
Rang mang khengin ka tlan lut rawk rawk a, ka chet dan átthlak zet avang chuan inngâinep tak ka ni! A mitmeng tak ngul mawlh mai kha ka hmu chiang ropui bawk si, inhmuin hmun khatah awm dun tawh lo mah ila ka thin phû erawh a la rang dawt dawt thei zu nia!
Zanah chuan a rawn lêng leh ta ngei a, min rim tih lah hai rual a ni si lo, Tebawihi erawh engmah ka la hrilh duh rih lo char char thung. Chumi zan vek aṭang chuan a hman chang apiang ni àwm hrim hian a rawn lêng ve ta zauh zauh mai a, thil mak deuh pakhat chu hmâna ka ṭih ruk ṭhin em emna kha a rawn lèn ṭhin tâkah chuan a reh tial tial ni mai te'n ka hre tawh, mahse ka hre sual ve thei tho.
Kâr a ral a, OIKOS school-a kan teacher hna dil result pawh a rawn chhuak ta, vanneihthlak takin pathum an làk zîngah ka lo tel ve hlauh mai a, Tebawihi erawh a vanduai zîngah a ṭang hlauh a, mahse pawi ti hmêl pawh a pu chuang lo. Chutia hna ka'n nei ve ta mai chu ka lawm ru em em a, hna nghet ni lo mah se experience atân hrim hrim pawh a ṭha viau dâwnin ka hria.
Chutiang zelin Hmachhuana pawh a rawn lêng leh nulh nulh ṭhin a, beisei loh zan deuha lo lèn a chîng roh em em leh ta nghal a, zan khat, Tebawihi rawn lèn zana a rawn lêng erawh Tebawihin a hriat phah ta nge nge a, inngâizâwng ang hrima min ngâi nghal ringawt erawh a buaithlak châng a tam ṭhin.
"Beisei" ka hming ngeia min rawn kotu mipa chu Dintluanga lo ni rengin, ka bul a rawn thleng phei har lo hle a, chutah amah bawk chuan
"I dam ṭha em?" a rawn ti leh a, kei pawh chuan
"Aw, dam ṭha e, nangni záwk?" ka ti pangngai ve mai a, 'nangni' ka'n tih kherna chhan pawh a sawn thlaknanu nen khan an innei tih thawm ka hriat vang a ni.
"Dam a ni mai" tih bakin min chhâng lo va, han indin hnaih tâkah chuan zû rim a nam deuh thet thetin ka hria.
"A nih, ka'n kal ang e" ti zàng vâhin ka kal sawn zui nghal a, min biak zel duh hmèl viau mah se inbiakna tur kan nei tawhin ka hre lo a ni.
School building-a ka lut tur erawh ral aṭanga min lo thlir rengtu Hmachhuana chu ka va hmu teh hlawl a, ka awm a tinuam lo ru ang reng viau bawk. Zan lama a rawn lèn ve zauh zauh tâk aṭang hian ngaina lo chîam ka ni tawh bîk lo tih chu ka pha lo va, mahse ngaihzâwng tur ang êm chuan ka la ngâi chhin ngai lo hrim hrim; a chet dan phung erawh keimahah a thawk nâ thei viau lawi bawk si!
Ka inhrethiam tawh bîk lo!
Ka ngaihbel deuh nge pawh ka hre lo, zanah chuan a rawn lêng miah lo va, nuam lo ka ti ru ang reng viau bawk. A chhan pawh chhuna min hmuh dan kha ka mawhpuh ber a, ka laka a rilru puthmang ka hre chiang bawk si, nuam lo ru duh tak a ni.
A tuk zanah erawh a rawn lêng ta thung a, a hmâ zawnga ka rilru nuam lo ru reng pawh kha a reh fel ta hmak a, min duh thu sawi kur duah chî ni lo mah se a che zia leh a mitmeng aṭang chuan engkim ka hmu fiah vek a, ka mipa tawn tawhah a la danglam ber hial te'n ka hria.
Zawi zawia ka hriat chian chhoh ve zel tâk vang nge pawh ka hre lo, mize mak deuh deuh a neih rualin ka tân hnawksak zâwng erawhin a awm ngai lo hrim hrim thung. Zanah a rawn lêng a, thingpui kan in dun a, kan inbia a, chu zawng chu a ni mai a, whatsapp message te inthawnin phone call te paw'n inbe ve ṭhin tho mah ila mi rawn len chilh a ngah záwk mah a, chuta thil chiang tak pakhat ni ta chu ka nêl lo tawh bîk hran lo hle tih hi a ni.
A dik, hmân ang kha ka ni tawh lo telh telh; ni lo se chu min tawpsan daih tawh ang! Nge ni a, ani pawh hian ka awm dan aṭang engkim a lo hrethiam vek záwk ni ang!
Ka duh ta tihna erawh a ni hauh lo va, chutin hmân ang khan ka la nêl lo reng tihna pawh a ni chuang hek lo. School te kan lo kalho ṭhin kher bawk nen keimahah chuan ngainat ruk tial tialna a rawn piang ni maiin ka hria.
Hriat loh lâia lo mitthlà leh veng veng châng te pawh ka nei chho ta hial a, a mize dangdai lutuk hian ngaihtuah zui lo thei lovin min siam ṭhin a ni ber. A thlaa thla kan ina a rawn chùan kài tâkah chuan coaching centre a nei tih nen lam ka hriat belh ve leh ta zel a, hlawk pawh a hlawk viau ka ring.
Ka nu leh pate lahin thil sawipui nuam an tih hmèl thei em em leh nghal a, pakhatah chuan thil a lo hre zau ve êm bawk a ni. Ka pa phei chu Mizo history lam tui mî a lo ni bawk si, Hmachhuana ni se awihawm loh khawpin Mizo history a lo hre thuk phian a, a hriatna chu eng pawh ni se, a thu sawi dan hrim hrim chuan thinlung a hneh bîk riauin ka hre ṭhin.
A aw thum lutuk lo mah se aw thâm leh sîn nêm hlei hluai ang chî a ni ve lo va, a thum chhang ṭial lam lek lek záwk mah a, chanchin tharte pûang chhin ta se chu ngaihthlak a nawm viau ka ring.
Bengkhuaia chanchin te, Mizo lalte zînga lal nunrawng ber nia an chhal Sibuta chanchin an sawi kâi zel te phei chu kei ngei paw'n ngaihnawm ti zet hian ka lo ngâithla kar ṭhin a, ka sawi thiam chiah lo, a thil sawi reng reng chu a awihawm bîk hliah hliah mai bakah lehkhabu a chhiar tam hle tih a hriat ngawih ngawih!
Inrinni a ni a, ka nu âwma bawk ni àwm tak chu Civil Hospital-a entîr tumin kan chhuak a, OPD card pawh kan là hmâ viau a, kan han inentîr chu thil hlauhthawnawm pawh ni lova ka nu ruh a len thu hla lam záwk doctor hnen aṭangin kan dawng a, thaw a veng huai mai; cancer a lo ni reng ang tih mawlh kan hlau a ni!
Kan haw lama Hmachhuan leh hmeichhe hmelṭha ving veng deuh mai ka hmu dun thut erawh keimahah danglam a rawn awm nghal zar a, ka sawi thiam dan ber chuan Hmachhuana bula awm hmeichhe ṭawng siam siam chu ka thik ru veng veng ni maiin ka hria. An inhuat loh hmèl dun ropui bawk si, nge ni a, Hmachhuana hian ngaihzâwng a lo nei reng záwk!?
Ni e, ka thik chiang alawm, chutiang bawkin ka duh ru ve reng tawh tih pawh ka inhre chhuak chiang na rawh e! Chu erawh ka lantîr ngai lo va, a hriat pawh ka ring hek lo.
Ka rilru chu a nâ ru veng veng a, bus-a ka nu nen kan chûang haw te chu ka ngawi ngal a, chawp leh chilhin ka awm a nuam lo nghal rawih rawih a ni ber. Ka mitthlaah lah chuan Hmachhuana leh kha hmeichhe hmêl fai ving veng zet mak kha an rawn lang chhen leh ta nghal a, ngaihtuah zui reng loh theih pawh va ni suh!
Zana a rawn lêng te chu chhun lama ka thil hmuh kha ka hre chhuak chawpchilh nghal zut zut a, ka titau ringawt bawk a nih chu! Zan dang ang lo takin ka awm a nuam hlei thei lo va, chutiang em ema ka làk vungna chhan chu ka lo duh ru ve hman viau tawh te pawh a nih ka ring ta!
"Zanin chu i va'n ngâwichawi ve a, i nuamsam meuh na nge?" tia min biakna chu amah pawh en chuang lo hian
"Min ngaihtuah suh" ka ti hniam deuh hmak a, dik tak chuan ka thik ve êm alawm; hetiang tak hian mipa pakhat avangin hmeichhe dang ka thik thei ang tih pawh ka ngaihtuah pha ngai lo!
"Thil dik lo a awm em?" a rawn ti leh sup a, thaw chham tur ang mai hian ka thaw chhuak halh a, ka thik tih hre mah se pawi tihna ka nei miah lo tlat te chu a mak lehling záwk!
"A awm ti raw?" tih leh min din hnaih a rual salh a, ka kut a rawn chelh chiah chu ka thing thla rang khawp mai.
"Dik tak chuan......" ti hapin ka thaw chhuak leh ham ham a, ani pawh chuan min en chiang ren run viau bawk.
"Beiseina min siam ting tang a, mahse......" tiin ka ngawi zui daih a, ka rilru tawt ru ṭun ka sawi ta pawp chu ka thaw a ven phah huai rualin sawi chhuah a ṭul ber em tih lam erawh ka lo ngaihtuah thleng pha reng reng lo thung chu niin!
"Mangṭha le" ti leh sapa ka inher zawm zat chu ka bânah a rawn chelh thuai a, ka dar tawn tawna dawm zui leh nghal chatin tak ngul hian min melh chhuk run a, kan inmelh hnai lutuk leh kan indin hnaih lutuk chu ka sa leh pup pup tawh!
"I rilru tinâ zâwnga ka awm àwm ka va hre lo" thinrim awkâ ni miah si lo hian a ti bul deuh hmuk a, ka dar a chelhna ata tal chhuah ka tum ringawt chu ka thei lo nasa mai.
"Lo lêng tawh lo law law záwk rawh Hmachhuan" chutiang thu dawnsawn nuam lo tak ka sawi tawl chhan chu rilru nâtna tur pumpelh ka duh vang a ni pakhat a, nât erawh a nâ hman viau tawh a, lo inngâizâwng tak tak hman phei ila chuan ka nâ ngawt ang ka ring.
"Engati nge thu inperhsan deuh deuh i sawi?" a ṭawngkâ chhuak hrim hrim chuan ka lung a tiâwi lo laklawh kual vel vek tawh a ni ber.
"Tlang takin sawi law law rawh" a rawn ti nghet leh churh a, chutah amah bawk chuan awkâ dam deuh záwk hian
"Ka laka i awm dan hi ka hai ring suh Beisei" a rawn ti hniam leh sup a, ka thaw chhuak halh a, min hmu tlang vek tawh ni maiin ka hria.
"Ngaihzâwng i nei reng ti raw?" ka rilru luah hneh em emtu thil chu ka sawi chhuak ta nge nge a, ka melh chho lui ve ngar bawk.
"Nei lo, ngaihzàwn mêk erawh ka nei" dàwt sawi hmêl pu eih lo mah se min chhàn dan chu duhkhawp lo nasa tak ka ni!
"A ṭha e" ti salhin a mi vawnna chu nâ zet hian ka phih thla sawk a, tha tawp deuh thaw chhuah loh chuan chuti maiin min thlah dâwn lo tih ka chiang a ni.
"La kal lo teh" ti hlukin chiang mang kheng hian min pawt lèt hrawk a, ka ke ka chhep sual zui nawk nawk kher bawk nen ka bawh phei nghal rawk rawk a, ka tal chhuah phal tawh lo ang hrimin a âwmah chuan min kuah nghet salh salh ta hle bawk.
"Eng nge i hriat ka hre lo, mahse i laka ka rilru puthmang erawh hi chu hmân aṭang tawh chhe tê them mahin a la danglam chhin ngai lo" a ti nghet churh churh a, tal chhuah tum ve leh phat ṭhin teh mah ila awmzia a awm lo a chha chu a ni e.
"Ka duh che tih i hria, min duh ve ṭan tih pawh ka hria" inrintàwknaa khat hian a rawn ti leh a, thil a inti hre vel lutuk chu mi mah lungàwi loh ruk tawh sa nàk alâiin ka thin a tirim zual kher mai.
"A teuh lo, i kâ a kua a, i sawi ve mai mai a nih chu!" am zet hian ka ti hlak hlak a, min kuahna ata ka tal chhuak thei lo mawlh chu a hneawm!
"Sawi mai mai teh nàng, keini pahnih hi kan la inngâizâwng ngei bawk ang" a la rawn ti ta deuh deuh a, ka ngawi mai mai thei thlawt lo.
"Awi, i zak lo, i zak lo lutuk!" ka ti tawn tawn a, chutah min kuahna ata chu min nam hlâ deuh thut a, inrin pawh ka inrin hmâin ka hmuiah tak a rawn fawp mai a nih chu!
Ka laka a chet dan chu a inngaihnep thlak ka ti bawk si, ka tal chhuak thei bawk si lo, rilru a va han chawmawlh duh tehreng èm! Rei ngial min fawh ngawng ngawng tâkah chuan tlêmin a inthla dul deuh a, chu veleh ka che chhuak phat a, ka nam sawn nghal dâwrh bawk.
"I zak miah na nge? I duh leh vawiina i chhuahpuinu kha va fawp la ti nia, lo lêng tawh miah suh!" ka ti hlawk hlawk a, ka ṭawng nât tehreng nen a la rawn nui thei a nih chu!
Eng a hria nge pawh ka hre tawh nek lo e a!
"Chuvang a nih chiah chu i lo lungàwi loh em em, vawiina mi kha ka nau....." a ti hman dek dek chu
"Insawifiah vel a ngâi bawk lo, haw tawh rawh" ka lo tih zawm hmarh hmarh a, insum kàrna rèng ka nei tawh lo a ni ber.
"I rilru dam hmâ chu ka haw dâwn reng reng lo, vawiina mi kha ka nau a nih kha, ka chhang chiah, i thik tih hriat leh hmuh erawh a nuam viau mai" ngeiawm rawngkâi taka min chhâng lêt zel chu ka thin a so bulh bulh thei mai dâwnin ka hria.
"Ka thik bawk lo, haw tawh rawh Hmachhuan" ka tih salh salh pawh chuan haw a tum loh hmèl ropui bawk si, ina luh ka tum lahin rawn luh ve zel a tum lehnghal a, ka rin phak baka a luhlul ren run lutuk chu
"Ka ning a nia, ninawm! I kawr a lian hlei hluai si, haw rawh, ka duh che emaw ti reng reng suh, ka duh teuh lo che" tiin ka âng leh ta bawrh bawrh a, mahse awmzia a eih lo hrim hrim!
"Keiin ka duh tulh tulh thung che alawm, ka nupui pawh i ni lo ang tih tu nge sawi thei" mi chhàn lèt dan a hre zel chu ka beidawng titih der tawh!
"Zanin hi zan chhinchhiah tlâk tak, ka dam chhûnga ka hriat reng tur a nih hi!" lei lam bih ngara ka ngawih ren rawn lâi chuan a ti leh sup a, chuta ka biang tawn tawna dawm zui zatin a vawi hnihna atân ka hmuiah tak a rawn fawp leh ta ngawng ngawng a, min fawh hmâsa záwk nen kha chuan inang lo nasa tak a ni.
Kan chhhel vel chu a reh duk ni mai te'n ka hria, min fawh dan lah chuan ka thunun theih piah lam khawpin ka taksa leh ka engkim chu a tidanglam chhuak vek a, ka mur chhuak vek te pawh ti ila a dik záwk mah ang. Duh lo inti hle si leh haw ngawih ngawih ang taka lang si khan min fawhna chu ṭha em em hian ka lo dawngsawng ang lawi a, phat rual a ni lo, min fawh hmâsak záwk nen kha chuan a inang lo lulâi ve bawk êm a tin a ni!
Ka chhâng lêt tih a hriat rual rualin duhthaw zet hian min fawp zui ngawng ngawng a, engtik lâiin nge a kawngah kherh bet chialin ka lo inpawmtîr hman pawh ka hre lo, ka hriat chhuah meuh chuan ngawi rengin kan inkuah hle hle tawh a, ka rilruah zahna chu awm ve tho mah se hmun erawh an chang tam meuh lo zawng chu a ni e.
"Zanin aṭang chuan ka bialnu a ni ti tawh tih hre reng ang che" ti dam dapin leiah chuan min nghat thla riai riai a, ṭawng nachâng hre lo ang hrim hian ka ngawi dâk a, ka sawi ngâi lova ka rilru chhûngril zawng zawng a hre chiang lutuk chu sawi tur pawh ka nei tawh lo a ni ber.
"Ka duh loh zâwnga engmah tih i tum loh thu kha i sawi láwk ve vek a" ka ti zawi sap a, ka chhuahchhal châk vang hrim hrim a ni pakhat!
"I duh loh zâwngin engmah ka ti hleinem; duh lo anga i inngaih, mahse a ruka i duh zâwng si hlirin alawm ka chet!" min chhàn dan vel chu ka ei thlawt lo.
"Pastor fapa ve si; hnial khan han hriat em em! Haw tawh rawh!" ka ti ta nghat a, nui sun sun hian min rawn kuah leh ringawt a, rei erawh a ni hran lo nàin min uap lûm hman viau thung.
Chumi zan aṭang chuan kan inngâizâwng chu a ni nghal der a, mutmu pawh ka tuah ṭhat theih loh phah nghe nghe a, ka thinglunga a tla nâ nghal viau ringawt te chu keimah leh keimah ka inmawhpuh tawp tawh!
A nihna chen pawh a awm rèng a, nêl lo viaua ka inngàih lâi te khan a ruk tak chuan ka thinlungah a thawk nâ tlat ṭhin kha a ni a, khang lâi aṭang daih tawh khan keimahah danglamna a lo inmung chho ṭan daih tawh záwk te'n ka hre nghe nghe a, danglamna nia ka hmêlhriat chu rawn zual zelin duhna leh ngainatna a ni tih ka hrethiam zui ta zel a ni ber.
Chutia kan han inngaihzàwn tâkah chuan Tebawihi pawh ka hrilh ve ta nge nge a, mahse a lo awih lo nasa kher mai. Hmachhuana ka nèl loh ṭhinzia hre chiangtu a ni a, ka dem em em hran lo. Insawifiah fê hnuah chauh a awih ve thei hram a, ngaihzâwng ka neih leh tâk avanga neih ve nghal a tum ut ut erawh nuih loh theih pawh a ni lo.
Hmachhuana nen lah inngâizâwng e ti lo chuan kan han che romantic lo dun thei khawp a, kan induh tawn tawp a, a bak thil dang vak a awm ngai lo tluk a ni. Sawi leh sawi hnu, a hmêl chu thuhran ni se, a mizia mawlh hian min hip zual a, min ngaihsak chûk chuk anga lang si lovin min ngaihven ru em em lawi a, zan tih lovah chuan kâr tawpa inhmuh a ni mai a, hna nei ve ve, mahni hnaa buai ve ve kan nih avangin chhun lamah hi chuan kan inhmu ngai lo tluk a ni.
Tin, a hmêl pawh a chhe hran lo va, han ṭha vur erawh a ni chuang lo va, a pà ru hrak thung a, ka duh deuh tawp tih bakin ka sawi thiam lo. Ka duh tâk em em chhan sawi dâwn ta pawh ni ila inngaihtuah fê ka ngaih ka ring, mahse awlsam têa ka sawi theih chu a pà tih hi a ni a, luhlul ngel ngul ṭhin viau mah se amah ti amahtu a ni tlat lawi bawk a, nitin zantin ka thinlung a luah ṭhin a ni ber e.
Keimah leh keimah ngei pawh ka over hret te'n ka inhre hial ṭhin; chutiang em ema mipa duh, vei leh thlakhlelh ka nei ta chu! Tin, a tih tawh lamah chuan thil ti ngut ngut chî a ni tih ka hriat belh lehzel a, a rawn lèn tur thu a sawi tawh hrim hrim chuan sunday zan pawh ni se rawn lèn loh a nei ngai lo.
Tin, han inngaihzawn rei tâkah chuan a first love ka nih thute ka hre leh ta zel a, chan loh khanah min ṭhawng deuh reng mai zawng a ni e. Hetia kan inngaihzawn chhan bulpui ber pawh hi ama tumruh êm vang ka ti lo thei lo, ni lo se chu kei aia hmeichhe fel, hmêlṭha leh pian nalh nalh tak a tawng ṭeuh ngei ang, mahse ani chuan khang kum liam ta chhûng zawng pawh khan kei ngat min lo la nghak fan a, a hunah tak hmâ a rawn là ta rèng bawk a, khang kum liam ta chhûng zawnga a te lova hun ka lo hmang ral ṭhin te kha ka ui hnuhnawh hial a ni.
Han duh chîam dan hre lo mah ila ka duh em em lawi a, Dintluanga nen phei chuan tehkhin chîah pawh ka ngâi lo, inang lo vet vet tak an ni! Inhnial bap bap châng kan nei fô va, mahse inhnial satliah mai chauh kan ni ṭhin. Hmeichhia tih takah kei ka ṭawng duh par par bawk si, ani lahin mi hnialna tur a lo hre ṭha thei ropui bawk si nen tauh pawh ka titau zing ve ta viau a, mahse awlsam tê hian ka lungàwina thlentu a ni leh nge nge zel!
"Higher kan kal lâia min han hlau tlat kha chu a va nuam lo ṭhin tak" ti supin a nui zui dut dut a, hnehsawh zet hian motor chu a khalh pah reng bawk.
"Ka chhiat hawr hawr ṭhin tehreng khan ka hnawl hnu i'n ni ve khanglang lehnghala ti raw?" nui chen chena ka ti kher chu
"I va sual mai mai tak!" a rawn ti bung nghut a, lungàwi lo hmêl chu pe chhe ve ren run tak a ni.
"Tak tak a, khang hun lâi khan engtin nge min duh theih záwk a; hmeichhe dang khan an star nasa thei ropui bawk che si!?" ka ti zui leh melh melh a, kei teh daih min lo duh ru reng kha mak ka ti thar thut a ni ber.
"I chhe hleinem" min chhàn dan tawi fel at chu ka va han awih lo ber kher èm!
"Awi, inla romatic vel loh teh, i inhmeh lo daih záwk a nia" ka ti chîam chu nui sun sun pah hian
"Ka inla romantic lo, i hmelṭha alawm, i nui hmêl ka hmuh nî aṭang kha chuan hmeichhe dangin ka rilru an luah thei tawh lo, chuvangin ka bulah hi chuan nui tam ang che, titau bar bar reng lovin" a rawn tih zawm duah a, tlêm chuan ka awih ve ta deuh!
"Min duat leh duat lovah a innghat ve bawk ang chû...." ka tih chuan a lo nui chhuak hawk a, kei pawh ka bang bîk chuang lo.
"I mize tlang tak leh ri phawng phawng te hi a nia ka duh zualna che chu nì...." a rawn tih ve leh khauh tâkah chuan lawm lovin ka ṭhen ṭhaw a, min rawn melh zauh nghe nghe a, kei lah ka lo ṭhen laklawh tawh bawk si, ka bialpa mah ni se làih loh theih pawh va ni suh!
"Khatiang khan min en ziah kher suh aw" ka ti bai bai chu ka kut rawn chelh lûm ham hamin a la kang a, a fawl zui sap a, a duh dûh danin ka chungah che ṭhin mah se a chet dan eng pawh ka lawmah a tla zel ṭhin hi chu a mak ve thlawt a ni.
"Hmelṭha phawr phawrnu" min sawi dan ber kher chu a dik vek tho bawk si, a lawmawm tehchîam der bawk si lo, ka mizia pho lang tel thei thumal hmanga min biak tawh hi chuan ka ner nâng zel!
"Pà nghet nghutpa" ka'n ti lèt ve ngat chu ri meuh hian a rawn nui chhuak hawk hawk a, gear thlak a ngàih avangin ka kut a vawnna pawh chu a thlah zui ve nghal mai bawk.
Tlangnuam lam panin kan tlan zel a, zanin hian an inah zanriah ka ei dâwn a, an ina ka vawi khat kalna tur chu ni lo mah se chaw ei tur èm chuan ka vawi khat kalna a ni dâwn a, a chhûngte an fel hlawm siam siam viau nàin a zàmawm ru duh ang reng khawp mai.
"Nangmah avangin zawngṭah ka siamtîr ṭeuh a, i ei tlèm leh si vaih" a rawn tih chuan
"Awi, eng nge chutiang te i lo tihtîr a? I va han tizahthlak ṭhin tak Ramhmachhuan!" ka ti zui nghal hlak hlak a, zawngṭah heh deuh anga lan chu ka duh bîk reng reng hleinem!
"Ei ṭeuh la a ni mai" a lo ti sam leh mai a, a darah chuan ka chum ri ṭawk ta nghe nghe!
Thla 6 lâi mai inhnial leh inthlem lungâwi ve leh mai zela kan inngaihzàwn hnu hian inngaihzawnna hi chu romantic chiam kher lo paw'n a lo nghet thei em em tih te, han inngaihzawn vak aia ṭhian ṭha tak ang maia hun hman dun te hi a hahdamthlakin a lo nuam daih záwk tih te ka hriat phah a, eng tianga ṭawngkam bumro bep bup tak pawh hmang mah se dàwt sawi lo tih hriat taka ka laka a rilru puthmang a sawi tlang rawt hi chuan ka lo hlim veng veng ṭhin.
Ṭawngkam nei thlum tak mi a ni lo nàin a ṭawngkam holam tak te avanga lungàwi hliah hliah châng erawh ka ngah hle thung a, inngâizâwng ni satliah mai lova engkim inpawh em em chunga thil kan sawi dun thei te hi kan inkâr tinghettu ka ti lo thei lo. Ka thinlungah ani tluka lian leh ka lairil thlenga luah lûmtu mipa ka nunah ka la tawng ngai lo va, tawn leh pawh ka duh tawh hek lo, a chhan chu min hmangaih tluk zetin ka hmangaih tawh tlat a tin a ni!
The End
Comments
Post a Comment